Të premten fillon java e katërt e Ligës së Parë të Maqedonisë së Veriut, ndërsa më pas kampionati do të marrë një pauzë dhjetëditëshe për shkak të angazhimeve të përfaqësueses së vendit, e cila do të zhvillojë një miqësore dhe më pas ndeshjen kualifikuese për Botëror kundër Lihtenshtajnit, njofton Telegrafi.

Java hapet me derbin e vjetër të futbollit vendor, Shkupi – Vardari. Ky duel që dikur mbushte stadiumet, këtë herë e gjen Shkupin në krizë të thellë, si në aspektin organizativ ashtu edhe në përbërjen e skuadrës. Përveç kësaj, problemi me sistemin VAR në Çair, sipas njoftimit të Federatës së Futbollit të Maqedonisë  ka bërë që ndeshja të zhvendoset në Strumicë.

Të shtunën zhvillohen dy përballje interesante. Në Kumanovë luhet derbi shqiptar Bashkimi – Struga. Kumanovarët kanë treguar se dinë të befasojnë, por Struga deri më tani ka qenë perfekte, me 3 fitore në 3 ndeshje. Ndërkohë në Gostivar, Arsimi i Çegranit, që ende kërkon fitoren e parë në elitë, do të përballet me Sileksin, skuadra e vetme që nuk ka pranuar gol dhe ka pikë të plota pas tri xhirove.

Të dielën, më 31 gusht, Shkëndija e Tetovës zbret në Shkup për t’u përballur me Rabotniçkin. Kuqezinjtë do të kenë një sfidë të vështirë, duke pasur parasysh edhe lodhjen nga udhëtimi evropian në Razgrad përballë Ludogoretsit. Po atë ditë luhen edhe duelet Makedonija Gj.P – Pelisteri dhe Tikveshi – AP Brera. Të gjitha ndeshjet e javës së katërt nisin në orën 16:30. /Telegrafi/

Programi i plotë:

• 29. 08. 16:30 | Shkupi – Vardari
• 30.08. 16:30 | Bashkimi – Struga; Arsimi – Sileksi
• 31.08. 16:30 | Rabotniçki – Shkëndija; Makedonija Gj.P – Pelisteri; Tikveshi – AP Brera

The post Java e katërt fillon nesër, me derbin e vjetër Shkupi – Vardari appeared first on Telegrafi.

Kampionët bullgarë të Ludogorets sonte në Razgrad do të kërkojnë përmbysje kundër skuadrës shqiptare nga Maqedonia e Veriut, Shkëndijës, në ndeshjen e kthimit të play-offit për Ligën e Evropës, njofton Telegrafi.

Skuadra e Lidogoretsit pësoi humbje në takimin e parë në Shkup me rezultat 2-1 dhe tashmë janë të detyruar të kërkojnë fitore për të siguruar kalimin në fazën e grupeve të garës së dytë më të rëndësishme evropiane për klube.

Rui Mota, trajneri i Ludogoretsit, shpalosi pritshmëritë e tij para ndeshjes së kthimit të play-offit të Ligës së Evropës kundër Shkëndijës.

“Presim të bëjmë shumë më mirë se në ndeshjen e parë. Tashmë kemi bërë analizën me lojtarët dhe me gjithë ekipin. E dimë çfarë duhet të ndryshojmë dhe shpresojmë ta zbatojmë në fushë. Do të hyjmë në këtë ndeshje sikur të jemi duke humbur. Që nga minuta e parë, ideja jonë do të jetë ta fitojmë ndeshjen. Kjo është në mendjen e futbollistëve. Shpresoj që rezultati i takimit të parë të ketë qenë vetëm një rastësi që nuk do të përsëritet,” tha Mota.

Kuqezinjtë nga Tetova shkojnë në këtë duel me një epërsi minimale, por me moral të lartë pas suksesit në ndeshjen e parë.

Takimi zhvillohet sonte në orën 19:30 në stadiumin e Razgradit. Fituesi i këtij çifti do të luajë në fazën e grupeve të Ligës së Evropës, ndërsa skuadra e eliminuar kalon automatikisht në grupet e Ligës së Konferencës. /Telegrafi/

The post Rui Mota kërkon përmbysje ndaj kuqezinjve nga Tetova appeared first on Telegrafi.

Shkëndija e Tetovës ka zhvilluar sonte stërvitjen e fundit zyrtare para ndeshjes së kthimit në play-offin e Ligës së Evropës, që do të luhet nesër në Razgrad kundër kampionit bullgar, Ludogorets, njofton Telegrafi.

Trajneri Jeton Beqiri doli para gazetarëve, duke theksuar se ekipi është i përgatitur dhe i motivuar për të dhënë gjithçka në këtë duel vendimtar:

“Në ndeshjen e nesërme do të mundohemi të bëjmë paraqitjen tonë më të mirë, të japim maksimumin dhe të jemi të disiplinuar në aspektin defenziv. Duhet të shfrytëzojmë rastet që do të na paraqiten, sepse dihet që kemi përballë një kundërshtar shumë cilësor, i cili mund të të ndëshkojë në çdo moment nëse nuk je i fokusuar 100%”, u shpreh Beqiri.

Ai shtoi se edhe pse Ludogoretsi është favorit në letër, gjithçka është e mundur në futboll:

“Futbolli është i bukur sepse jo gjithmonë fiton favoriti. Çdo natë shohim ekipe që befasojnë dhe eliminojnë kundërshtarë me buxhete shumë më të mëdha dhe me futbollistë më cilësorë.”

Sa i përket gjendjes së skuadrës, Beqiri theksoi se ekipi është pothuajse i plotë, me disa lojtarë që kanë probleme të vogla, por janë të gatshëm të japin kontributin e tyre. Mungesa e vetme është sulmuesi Atdhe Mazari, i cili nuk ka të drejtë loje në këtë fazë. /Telegrafi/

The post Beqiri: Futbolli nuk njeh gjithmonë favoritë appeared first on Telegrafi.

Thirrjet raciste në terrenet sportive në Maqedoninë e Veriut vazhdojnë të përsëriten, duke hedhur hije mbi futbollin vendor, njofton Telegrafi.

Rasti i fundit u shënua mbrëmë në Kavadar, gjatë ndeshjes mes Pelisterit dhe Shkupit, ku nga tribuna u dëgjuan brohoritje fyese me përmbajtje raciste ndaj shqiptarëve.

Ky incident vjen vetëm një muaj pas një rasti të ngjashëm në Kumanovë, duke treguar se problemi mbetet i pranishëm dhe i përsëritur. Refreni “le ta kuptojnë shqiptarët e mallkuar, emri maqedonas nuk do të zhduket” është bërë tashmë një nga thirrjet më të dëgjuara në këto ndeshje.

Federata e Futbollit të Maqedonisë së Veriut reagoi pas raportit të delegatit të takimit. Në kumtesën zyrtare të FFM-s theksohet:

“Pas raportit të delegatit të ndeshjes KF Pelisteri – KF Shkupi, Komisioni për ndeshjet e FFM-së e ka dërguar KF Pelister në Komisionin Disiplinor për procedurë të mëtejshme. Raporti ka të bëjë me brohoritje fyese nga disa tifozë në ndeshjen Pelisteri – Shkupi, të luajtur në kuadër të raundit të 3-të të Ligës së Parë të Futbollit të Maqedonisë së Veriut.”

Ky nuk është incidenti i parë i këtij lloji në futbollin vendor, ndërsa pritet të shihet se cilat masa konkrete do të ndërmarrë Komisioni Disiplinor ndaj klubit nga Manastiri. /Telegrafi/

The post Thirrjet raciste ndaj shqiptarëve në stadiumet e Maqedonisë së Veriut nuk ndalen appeared first on Telegrafi.

Sot rikthehen emocionet e futbollit në Ligën e Parë të Maqedonisë me ndeshjet e javës së tretë. Struga kërkon vazhdimsi të suksesit, ndërsa të dielën luhet derbi shqiptar në Tetovë në mes Shkëndijës dhe Arsimit, njofton Telegrafi.

Sot me fillim në ora 17:00 rikthehen betejat e kampionatit në futbollin elitar të Maqedonisë së Veriut, me duelin e parë që e luajnë Struga dhe Rabotniçki, struganët nga dy ndeshje kanë po aq fitore dhe kërkojnë të vazhdojnë serinë pozitive, ndërsa Rabotniçki ka një barazim dhe në javën e fundit u mund në shtëpi nga Bashkimi.  Në ora 20:00 është përballja e dytë e ditës ku Vardari do të ketë përballë AP Breran nga Strumica.

Kampionati vazhdon me një duel të shtunën, ku në ora 17:00 Sileksi është nikoqir i Makedonija Gj.P., ndërsa të dielën kemi përballjen e dy ekipeve shqiptare, Shkëndija – Arsimi e cila luhet me fillim në ora 17:00. Shkëndija edhe pse po luan në dy fronte, atë evropian dhe kampionat, kërkon të vazhdojë serinë e fitoreve, ndërsa Arsimi shpreson në fitoren e parë që do të ishte historike pas inkuadrimit në Ligën e Parë.

Java e tretë mbyllet të hënën me dy përballje. Bashkimi pas pikëve të plota që mori si mysafir në Shkup ndaj Rabotniçkit, kërkon fitoren e parë para shikuesve të saj në Kumanovë, pasi në javën e parë e mbylli në barazim me Arsimin. Kësaj radhe kumanovarët kanë përballe Tikveshin nga Kavadari. Ndeshja e fundit e javës së tretë është përballja Pelisteri – Shkupi, ku padyshim duke marrë parasysh situatën te bardhekaltrit nga Çairi, pritet fitore e pastër e nikoqirëve nga Manastiri të cilët këtë ndeshje do ta luajnë në Kavadar. Të dy këto përballje luhen me fillim në ora 17:00. /Telegrafi/

The post Struga e hapë javën e tretë, të dielën derbi shqiptar Shkëndija – Arsimi appeared first on Telegrafi.

Shkëndija e Tetovës sonte përballet me Ludogoretsin në ndeshjen e parë të Play-Offit të Ligës së Evropës, ku pasi që tetovarët kanë siguruar fazën e Grupeve të Ligës së Konferencës, kërkojnë të shkojnë një hap më larg, të shkruajnë histori duke siguruar rezultat të mirë në ndeshjen e parë, që do tu mundësonte grupet e ligës së dytë më të rëndësishme evropiane, ate të Ligës së Evropës.

Ndeshja e parë luhet në Shkup, në stadiumin Arena “Todor Proeski”, ku kuqezinjtë presin mbështetje të madhe edhe nga tifozët e flaktë dhe armata e “Ballistëve”.

Trajneri Jeton Beqiri për këtë ndeshje ka vendosur të luajë në portë me Baboucarr Gaye, ndërsa mbrojtja përbëhet nga

Aleksander Trumçi, Klisman Cake, Ronaldo Ëebster dhe Imran Fetai.

Në mesfushë, Reshat Ramadani, Adamu Alhassan dhe Arbin Zjenullahi kanë marrë besimin e trajnerit Beqiri.

Sulmi përbëhet nga kapiteni Besart Ibraimi, i ndimuar nga Fabrice Tamba dhe Liridon Latifi.

Në anën tjetër trajneri portugez i bullgarëve, Rui Mota do ta sulmojnë Shkëndijën me francezin Mounir Chouiar, Yves Erick Bile dhe Erick Marcus. /Telegrafi/

Shkëndija: Baboucarr Gaye, Aleksander Trumçi, Klisman Cake, Ronaldo Ëebster Imran Feta, Reshat Ramadani, Adamu Alhassan, Arbin Zjenullahi Besart Ibraimi (kapiten), Fabrice Tamba dhe Liridon Latifi.

Ludogorets: S. Padt, Son, I. Nachmias, D. Almeida, A. Nedyalkov, Pedro Naressi, D. Duarte, P. Staniç, Erick Marcus, Mounir Chouiar dhe Y. E. Bile

The post Formacionet zyrtare, Shkëndija – Ludogorets, Beqiri në sulm me kapitenin Ibraimi appeared first on Telegrafi.

Trajneri i kuqezinjve beson se ekipi i tij mund të arrijë rezultat pozitiv në përballjen e parë të “play-off”-it të Europa League në Shkup, njofton Telegrafi.

Kampioni i Maqedonisë së Veriut, Shkëndija, nesër mbrëma (ora 20:00) në Arenën Kombëtare “Todor Proeski” pret Ludogoretsin në ndeshjen e parë të “play-off”-it për Ligën e Evropës. Trajneri Jeton Beqiri e pranon se përfaqësuesi bullgar është favorit në letër, por thekson se skuadra e tij do të japë gjithçka për të arritur sukses.

“Këto janë ndeshje të rëndësishme evropiane me kundërshtarë cilësorë. Përveç ndoshta TNS-s, në fillim, të gjithë rivalët tjerë kanë qenë ekipe shumë të forta dhe nga secili mund të mësosh shumë. Jam i kënaqur me paraqitjen e Shkëndijës, përjashtim ndoshta bën ndeshja në transfertë kundër Qarabagut. Por në këtë nivel nuk ke të drejtë të gabosh, sepse çdo pakujdesi dhe gabim paguhen shtrenjtë. Sa i përket Ludogoretsit, i kemi analizuar, por edhe ata kanë shumë ndryshime në përbërje. Në çdo rast, të jeni të sigurt se Shkëndija do të bëjë gjithçka që mundet për të dalë me rezultat pozitiv,” u shpreh trajneri Beqiri.

Nga ana tjetër, mesfushori Reshat Ramadani theksoi se ekipi është plotësisht i gatshëm për të përballuar sfidën.

“Mendoj se jemi të përgatitur. Dëshira është maksimale dhe me siguri do të japim më shumë se maksimumi. E kemi analizuar Ludogoretsin dhe jemi të gatshëm për lojë të hapur,” tha Ramadani. /Telegrafi/

The post Beqiri: Ludogoretsi favorit, por Shkëndija do të luftojë për sukses appeared first on Telegrafi.

Kriza në radhët e FC Shkupit po thellohet. Klubi nga Çairi ka anuluar ndeshjen e javës së dytë në Ligën e Parë të Maqedonisë së Veriut, ndaj Sileksit, ekip ky që do ta fitojë ndeshjen me rezultat zyrtar 3-0, njofton Telegrafi.

Shkupi ishte në kërkim të një fushe alternative për shkak se stadiumi i tyre nuk plotëson kushtet për përdorimin e teknologjisë VAR. Opsionet si stadiumi në Kumanovë, Gjorçe Petrov dhe në Strumicë u përmendën si alternativa, por asnjëra nuk u realizua.

Edhe pse arsyeja zyrtare për anulimin nuk është bërë publike, është e qartë se përveç vështirësive logjistike, klubi po përballet edhe me probleme organizative. Kujtojmë që në javën e parë ndaj Shkëndijës, Shkupi u paraqit me ekip të rinjsh.

Me këtë vendim, Sileksi fiton automatikisht tri pikët, ndërsa një mosparaqitje e radhës nga Shkupi do të nënkuptonte përjashtimin e tyre nga liga dhe zbritjen në kategorinë më të ulët. Ky zhvillim sjell sfida të reja për Federatën e Futbollit të Maqedonisë dhe komisionin për gara.

Nga klubi i Shkupit ende nuk ka asnjë reagim apo deklaratë zyrtare për situatën e krijuar. /Telegrafi/

The post Vazhdon kriza te Shkupi, nuk do ta luajë ndeshjen ndaj Sileksit appeared first on Telegrafi.

Skuadra e Shkëndijës së Tetovës është mundur me rezultat të thellë 5-1 nga Qarabagu në ndeshjen e kthimit të raundit të tretë eliminues në Ligën e Kampionëve, duke i dhënë fund aventurës në garën më prestigjioze evropiane për këtë sezon, raporton Telegrafi.

Ndeshja nisi në mënyrën më të mirë për kampionët e Maqedonisë së Veriut. Fabrice Tamba kaloi Shkëndijën në epërsi në minutën e 10-të, pas një asisti të mrekullueshëm nga Besart Ibraimi, duke mposhtur portierin vendas për 0-1.

Gëzimi i kuqezinjve zgjati shumë pak, pasi në minutën e 16-të, Qarabagu barazoi me një autogol të pafat të Klinsman Cake, pas një krosimi nga goditja e lirë. Vetëm dy minuta më vonë, vendasit përmbysën rezultatin me golin e Kadi Borges, duke kaluar në 2-1.

Presioni i ashpër i azerbajxhanasve vazhdoi dhe në minutën e 33-të, pas një tjetër asisti të Zubir, Akunzade shënoi për 3-1. Vetëm dy minuta më pas, Trumçi shkaktoi penallti dhe Jankoviç e shndërroi në gol për 4-1, rezultat me të cilin u mbyll pjesa e parë.

Në fillim të pjesës së dytë, trajneri Jeton Beqiri ndërhyri me dy zëvendësime, duke futur Krasniqin dhe Alhasanin në vend të Cakës dhe Latifit, por loja e Shkëndijës nuk ndryshoi ndjeshëm. Qarabagu uli disi ritmin, por sërish dominoi fushën.

Në minutën e 59-të, Leandro Andrade shënoi golin e pestë për vendasit, duke e bërë disavantazhin e Shkëndijës edhe më të thellë. Kuqezinjtë patën vetëm një mundësi të rrezikshme në këtë pjesë, përsëri me Tamban, por portieri Koxhalski kontrolloi lehtësisht topin.

Në minutat e fundit, Qarabagu administroi rezultatin dhe pa probleme mbylli ndeshjen, duke u kualifikuar në fazën play-off të Ligës së Kampionëve.

Ndërkohë, Shkëndija do të vazhdojë garën në të njëjtën fazë, por në Ligën e Evropës, ku do të përballet me humbësin e çiftit Ludogorets – Ferencvaros. /Telegrafi/

The post Shkëndija eliminohet nga Liga e Kampionëve pas humbjes së thellë në Baku appeared first on Telegrafi.

Enis Bardhi e ka nisur në mënyrën më të mirë të mundshme aventurën e tij në sezonin e ri dhe me fanellën e re në Superligën turke, njofton Telegrafi.

Mesfushori shkupjan, kapiten dhe pjesë e rregullt e përfaqësueses së Maqedonisë së Veriut, këtë verë u transferua te Konyaspor.

Në ndeshjen hapëse, ekipi i tij fitoi bindshëm si mysafir ndaj Eyupsporit me rezultatin 1-4.

Bardhi realizoi golin e tretë për Konyasporin nga pika e bardhë e penalltisë, në minutën e 33-të të takimit. Bardhi luajti deri në minutën e 88-të.

Ky fillim premtues pritet të jetë një ogur i mirë për Bardhin dhe Konyasporin, të cilët synojnë një sezon të suksesshëm në elitën e futbollit turk. /Telegtafi/

The post Fillim i mbarë për Enis Bardhin në Turqi, gol dhe fitore bindëse me Konyasporin appeared first on Telegrafi.

UEFA ka bërë ndarjen e grupeve për shortin e “play-off”-it në të tri garat evropiane për klube, njofton Telegrafi.

Sot, Shkëndija do të mësojë rivalin e mundshëm nëse arrin të kalojë pengesën e radhës në Ligën e Kampionëve – skuadrën e njohur azerbajxhanase Qarabag, me të cilën përballet në rrethin e tretë kualifikues.

Në rast të kualifikimit, tetovarët do të përballen me një kundërshtar mjaft të fortë në fazën “play-off” të Ligës së Kampionëve. Ndër emrat e mundshëm janë: Celtic (Skoci), Bodo/Glimt (Norvegji), fituesi i çiftit Kopenhagë – Malmo, fituesi i përballjes Crvena Zvezda – Lech Poznan, si dhe fituesi nga dueli Ludogorets – Ferencvaros.

Por edhe në rast të eliminimit nga Qarabagut, Shkëndija do të vazhdojë garat në Evropë, këtë herë në Ligën e Evropës. Në këtë skenar, ku do të jetë pjesë e skuadrave jo-bartëse, janë përcaktuar edhe kundërshtarët e mundshëm në “play-off”-in e kësaj gare:

Kundërshtarë potencialë të Shkëndijës në “play-off”-in e Ligës së Evropës:

Young Boys (Zvicër)

Fituesi i çiftit Hamrun Spartans – Maccabi Tel Aviv

Humbësi i çiftit Ludogorets – Ferencvaros

Humbësi i çiftit Malmo – Kopenhagë

Shorti për “play-off”-in e Ligës së Kampionëve do të hidhet sot në orën 12:00, ndërsa ai i Ligës së Evropës një orë më vonë, në 13:00. /Telegrafi/

The post Rivalët që mund të përballet Shkëndija në “play-off”-in e Ligës së Evropës appeared first on Telegrafi.

Sezoni evropian për klubet nga Maqedonia e Veriut ka qenë i vështirë dhe i shkurtër për shumicën e tyre, me Sileksin e Rabotniçkin të eliminuar në rundin e parë, ndërsa Vardari u turpëruar mbrëmë nga Lozana, njofton Telegrafi.

Vardari, skuadër kjo që e përfaqësoi vendin në Ligën e Konferencës, është eliminuar në raundin e dytë kualifikues, duke përfunduar para kohe aventurën në Evropë, edhe atë duke u turpëruar me rezultat të thellë 5:0 (6:2) nga Lozana e Zvicrës. Më herët, që në raundin e parë të kësaj gare, u eliminuan edhe Sileksi dhe Rabotniçki, duke e lënë vendin pa përfaqësim në këtë garë.

Megjithatë, është skuadra nga Tetova, Shkëndija, ajo që po mban gjallë shpresat dhe nderin e futbollit të Maqedonisë në garat evropiane. Kampionët e vendit kanë kaluar me sukses dy runde në kualifikimet për Ligën e Kampionëve, duke eliminuar fillimisht ekipin nga Uellsi, The New Saints (TNS), e më pas duke bërë një befasi të madhe me eliminimin e gjigantit rumun, FCSB (Steaua Bukuresht).

Në raundin e tretë, Shkëndija do të përballet me Qarabagun e Azerbajxhanit, një kundërshtar me përvojë të madhe ndërkombëtare. Ndeshja e parë do të zhvillohet më 5 gusht në arenën “Todor Proeski” në Shkup, me fillim nga ora 20:00. Por mos harrojmë se sido që të jetë rrugëtimi i kuqezinjve, ata së paku kanë siguruar garat në grupe të Ligës së Konferencës.

Por mos harrojmë se kuqezinjtë e Tetovës, synojnë të vazhdojnë rrugëtimin historik drejt fazës së grupeve të Ligës së Kampionëve, apo atyre të Evropës. /Telegrafi/

The post Debakël i Vardarit, Shkëndija ruan nderin e Maqedonisë në arenën evropiane appeared first on Telegrafi.

Shkëndija e Tetovës po ndjek gjurmët e Skënderbeut të Korçës, klubit të vetëm shqiptar që ka arritur deri më sot në play-off të Ligës së Kampioneve, raporton Telegrafi.

Në sezonin 2015–2016, Skënderbeu kaloi tre kundërshtarë radhazi – Crusaders (Irlandë e Veriut), Milsami (Moldavi) dhe FC Astana (Kazakistan), përpara se të ndalej nga Dinamo e Zagrebit në raundin play-off-it.

Megjithatë, kjo arritje e kualifikoi direkt në fazën e grupeve të UEFA Ligës së Evropës , duke shënuar një arritje historike për futbollin shqiptar.

Lexo po ashtu Përveç suksesit sportiv, Shkëndija ka fituar të paktën pesë milionë euro

Në mënyrë të ngjashme, Shkëndija po ngjitet me vendosmëri në skenën evropiane. Gjatë këtij edicioni, kuqezinjtë nga Tetova kanë eliminuar në raundin e parë The New Saints (Uells), ndërsa mbrëmë arriti një triumf të madh ndaj FCSB (Steaua nga Rumania), klub me traditë dhe eksperiencë të pasur në Evropë.

Aktualisht, Shkëndija është kualifikuar në raundin e tretë të Ligës së Kampioneve, ku do të përballet me Qarabagun e Azerbajxhanit, kundërshtar me reputacion, por që nuk është i pakalueshëm.

Shkëndija tani më minimalisht ka siguruar 5 milionë euro të ardhura nga pjesëmarrja dhe fitoret në Ligën e Kampioneve, një shifër rekord kjo për një klub nga Maqedonia e Veriut.

Lexo po ashtu Shkëndija mëson emrat e kundërshtarëve të mundshëm të "play-off"-it

Ky sukses financiar pritet të sjell stabilitet afatgjatë për klubin tetovar, duke i mundësuar investime në infrastrukturë, akademi dhe përforcime cilësore në skuadër.

Me një organizim serioz dhe një strategji të qartë, Shkëndija po vendos themelet e një epoke të re, duke dëshmuar se edhe ekipet nga Maqedonia e Veriut mund të jenë faktorë të rëndësishëm në arenën ndërkombëtare. /Telegrafi/

The post Shkëndija e Tetovës në hapat e Skënderbeut appeared first on Telegrafi.

Kuqezinjtë nga Tetova shënuan fitore të madhe edhe në ndeshjen e kthimit ndaj FCSB-së në Bukuresht, duke kaluar në raundin e tretë të kualifikimeve për Ligën e Kampionëve, njofton Telegrafi.

Ky sukses historik u siguron atyre të paktën pjesëmarrjen në grupet e Ligës së Konferencës, një arritje e paprecedent për futbollin e Maqedonisë së Veriut.

Përveç suksesit sportiv, ky kualifikim do të sjellë në arkën e klubit shumën më të madhe ndonjëherë të fituar nga një ekip nga Maqedonia nga UEFA – të paktën pesë milionë euro, ndërsa kjo shumë mund të rritet ndjeshëm në varësi të rrugëtimit të mëtejshëm të ekipit.

Në raundin e tretë të Ligës së Kampionëve, Shkëndija do të përballet me Qarabagun nga Azerbajxhani. Nëse arrin ta eliminojë këtë kundërshtar, atëherë kuqezinjtë do të luajnë në “play-off”-in për grupet e Ligës së Kampionëve. Në rast eliminimi, ata zhvendosen në “play-off”-in e Ligës së Evropës. Edhe nëse nuk kalojnë më tej as aty, Shkëndija tashmë e ka të garantuar pjesëmarrjen në grupet e Ligës së Konferencës.

Shkëndija tashmë është emër i konfirmuar në hartën evropiane të futbollit – dhe ky është vetëm fillimi. /Telegrafi/

The post Përveç suksesit sportiv, Shkëndija ka fituar të paktën pesë milionë euro appeared first on Telegrafi.

Mesfushori kreativ tetovar, Arbin Zejnullai, pas një periudhe brilante në kampionatin shqiptar me fanellën e Egnatias, rikthehet në Tetovë për të veshur sërish fanellën kuqezi të KF Shkëndija, njofton Telegrafi.

Pas 5 trofesh të fituar, përfshirë dy tituj kampion radhazi, Zejnullai vendosi të mbyllë me sukses një kapitull të rëndësishëm në Rogozhinë, duke lënë gjurmë si një nga lojtarët më vendimtarë të skuadrës.

Tani, me më shumë përvojë, pjekuri dhe uri për sukses, Arbin Zejnullai është gati të japë gjithçka për Shkëndijën, klubin ku nisi rrugëtimin si profesionist. /Telegrafi/

The post Arbin Zejnullai rikthehet te Shkëndija appeared first on Telegrafi.

Klubi shqiptar nga Maqedonia e Veriut, ish-kampion i vendit, pas katër muajsh ndalim nga FIFA për transferime, ka marrë dritën jeshile për të regjistruar futbollistë të rinj gjatë afatit kalimtar të verës, njofton Telegrafi.

Pas gati katër muajsh pezullim, klubi shqiptar nga Maqedonia e Veriut, Shkupi, është larguar nga “lista e zezë” e FIFA-s dhe tashmë mund të regjistrojë lojtarë të rinj për këtë afat kalimtar veror.

Ish-kampioni i Maqedonisë së Veriut ishte sanksionuar nga FIFA në fund të muajit shkurt, së bashku me klubin tjetër të elitës, Voska Sport, për shkak të mosrespektimit të obligimeve ndaj ish-futbollistëve apo palëve të treta. Sanksionet përfshinin ndalim të regjistrimit të lojtarëve në tre afate kalimtare, por situata duket se është zgjidhur më herët.

Pas përmbushjes së kushteve dhe rregullimit të çështjeve të hapura, Shkupi ka marrë konfirmimin nga FIFA për të operuar lirshëm në tregun e transferimeve. Kjo do të thotë se të gjitha përforcimet që janë prezantuar deri tani, mund të regjistrohen dhe të jenë të gatshëm për sezonin e ri.

Ky është një zhvillim i rëndësishëm për klubin nga Çairi, që vjen vetëm një ditë pasi grupi i tifozëve “Shvercerat” kishte dalë me një reagim të ashpër ndaj pronarit të klubit, duke kërkuar largimin e tij. Mbetet të shihet nëse ky hap pozitiv do të shënojë një kthesë për Shkupin në prag të sezonit të ri futbollistik. /Telegrafi/

The post Shkupi mund të regjistrojë përforcimet, largohet nga “lista e zezë” e FIFA-s appeared first on Telegrafi.

Pasi ndërpreu kontratën me klubin gjerman Bochum, anëtari i përfaqësueses së Maqedonisë së Veriut, Agon Elezi, ka nënshkruar marrëveshje me Sarajevën deri në vitin 2028. 24-vjeçari rikthehet në rajon pas një eksperience në Kroaci dhe Gjermani, duke shpresuar në më shumë minuta loje, njofton Telegrafi.

Mesfushori shkupjan, Agon Elezi është zyrtarisht futbollist i ri i FK Sarajevo. Përfaqësuesi i Maqedonisë së Veriut ka firmosur kontratë deri në vitin 2028 me klubin boshnjak, duke u bërë një nga përforcimet kryesore të verës.

Elezi së fundmi ishte pjesë e klubit gjerman VfL Bochum, me të cilin ndërpreu bashkëpunimin si lojtar i lirë. Në sezonin e kaluar, ai ishte i huazuar te Gorica në Kroaci, ndërsa pas rikthimit në Gjermani, vendosi që për më shumë hapësirë të rikthehet në futbollin e rajonit.

24-vjeçari është produkt i akademisë së FC Shkupit, ku edhe hodhi hapat e parë në karrierë. Nga aty, ai kaloi te Caen në Francë, por nuk arriti të konsolidohej dhe më pas vijoi rrugën me Vëllazërimin, Skënderbeun e Korçës dhe më pas me sukses te Varazhdin në Kroaci – periudhë që i hapi rrugën drejt transferimit në Bundesligë.

Rikthimi në Ballkan për Elezin është një tjetër sfidë, ku me fanellën e Sarajevës synon të rigjejë formën më të mirë dhe të kontribuojë në sukseset e klubit të njohur boshnjak. /Telegrafi/

The post Agon Elezi zyrtarizohet te Sarajeva appeared first on Telegrafi.

Shkëndija e Tetovës ka kaluar me sukses pengesën e parë në Ligën e Kampionëve, pasi mposhti TNS-in pas vazhdimeve me rezultat 2-1 në “Todor Proeski” të Shkupit, njofton Telegrafi.

Pas barazimit 0-0 në ndeshjen e parë në Uells, dueli i kthimit solli emocione që nga minuta e parë. Në aksionin e parë serioz, Latifi goditi shtyllën, ndërsa portieri i mysafirëve bëri disa pritje vendimtare në fillim.

Goli i parë erdhi në minutën e 18-të, kur kapiteni Besa Ibraimi asistoi bukur për Tamban, i cili nga kaloi Shkëndijën në epërsi.

Në minutën e 28-të, Ibraimi u afrua shumë pranë një goli spektakolar me një lëvizje të bukur dhe tentim lobimi, por topi kaloi ngjitur me shtyllën.

Kur pritej fundi i pjesës së parë, TNS barazoi në minutën e 44-të pas një gabimi të mbrojtjes dhe një goditjeje të saktë nga Williams.

Pjesa e dytë solli disa raste për Shkëndijën, ndërsa në minutën e 82-të gjyqtari akordoi penallti për “kuqezinjtë”, por pas rishikimit me VAR u konstatua pozicion jashtë loje.

Ndeshja shkoi në vazhdime, ku vendimtari ishte një autogol për TNS. Në minutën e 116-të, pas një krosimi të Ademit, mbrojtësi Bodenham e devijoi topin në rrjetën e vet dhe Shkëndija avancoi në raundin tjetër.

Skuadra tetovare tani do të përballet me gjigantin rumun, Steaua Bukuresht, në raundin e dytë të kualifikimeve për Ligën e Kampionëve. /Telegrafi/

The post Shkëndija në raundin e dytë, aty e pret  Steaua appeared first on Telegrafi.

Pas një vere të qetë dhe pa lëvizje të mëdha në tregun e transferimeve, ish-kampioni i vendit, FC Shkupi, më në fund e ka thyer heshtjen duke njoftuar për përforcimin e parë për sezonin e ri, njofton Telegrafi.

Bëhet fjalë për mbrojtësin e ri, Emre Kadri, i cili vjen nga skuadra e Rabotniçkit.

Kadri është 21 vjeç dhe më herët ka luajtur edhe për Bregallnicën e Shtipit, ndërsa karrierën e ka nisur në akademinë e Adana Demirspor në Turqi. Megjithëse është pjesë e kampionatit prej disa kohësh, ende nuk ka debutuar në mënyrë të rregullt në elitën e futbollit vendor.

Përkundër pritshmërive të tifozëve për një emër të njohur në këtë fillim merkatoje, drejtuesit e klubit kanë vendosur të investojnë te një talent i ri në mbrojtje.

Vlen të theksohet se klubi nga Çairi, i cili sezonin e kaluar e mbylli në vendin e shtatë dhe mbeti jashtë garave evropiane, ka qenë në heshtje të plotë deri tani. Pavarësisht largimeve të shumta të futbollistëve gjatë javëve të fundit, klubi nuk ka publikuar asnjë njoftim zyrtar për ndonjë prej tyre – gjë që ka shtuar paqartësinë rreth gjendjes së brendshme të skuadrës. /Telegrafi/

The post Shkupi e thyen heshtjen dhe prezanton përforcimin e parë appeared first on Telegrafi.

Ezgjan Alioski, reprezentuesi i njohur i Maqedonisë së Veriut dhe një nga futbollistët më të spikatur të gjeneratës së tij, është rikthyer në Zvicër pas një dekade, duke firmosur sërish me klubin ku shkëlqeu dikur – FC Lugano, njofton Telegrafi.

FC Lugano ka zyrtarizuar rikthimin e Ezgjan Alioskit, mbrojtësit të majtë dhe ikonës së përfaqësueses së Maqedonisë së Veriut, me një kontratë të vlefshme deri më 30 qershor 2027 dhe me mundësi vazhdimi edhe përtej kësaj date.

33-vjeçari rikthehet në klubin ku u afirmua si një nga më të mirët në Superligën zvicerane gjatë sezoneve 2015/16 dhe 2016/17, duke regjistruar 54 paraqitje, 19 gola dhe 14 asistime. Këto statistika i hapën rrugën drejt Leeds United në Angli dhe më pas eksperiencave të tjera të rëndësishme në Premier League, Superligën turke me Fenerbahçen dhe së fundmi në Arabinë Saudite me Al-Ahlin.

FC Lugano e sheh Alioskin jo vetëm si përforcim me cilësi të larta teknike, por edhe si lider brenda dhomave të zhveshjes, duke ndihmuar zhvillimin e lojtarëve të rinj dhe ngritjen e nivelit të skuadrës.

Te Lugano besojnë që Alioski do t’i jap vlera ekipit, ndër ata që i ka besuar shqiptarit është drejtori sportiv Sebastian Pelzer, i cili theksoi:

“Ezgjan përfaqëson vlerat dhe shpirtin e skuadrës sonë. Me karizmën dhe eksperiencën e tij, ai do të jetë një shtyllë e rëndësishme në rrugëtimin tonë sportiv.”

Rikthimi i Alioskit është pritur me shumë entuziazëm nga klubi dhe tifozët, që e kujtojnë si një nga emrat më të dashur të viteve të fundit në bianconero. /Telegrafi/

The post Te Lugano besojnë që Alioski do t’i jap vlera ekipit appeared first on Telegrafi.