Një analizë e re e Associated Press tregon se Presidenti Donald Trump ka ndryshuar me sukses fokusin e politikave të tij nga emigracioni në krim, një lëvizje që duket se ka ndikuar pozitivisht në vlerësimin e tij të përgjithshëm. Sipas një sondazhi të fundit të AP-NORC, popullariteti i Trump ka shënuar një rritje të lehtë, ndërsa qasja e tij ndaj krimit është shndërruar në një pikë të fortë.

Sondazhi zbuloi se rreth 53% e amerikanëve miratojnë qasjen e Trump ndaj krimit, një shifër më e lartë se mbështetja për politikat e tij mbi emigracionin, ekonominë apo luftën Rusi-Ukrainë. Kjo vjen pavarësisht kritikave nga demokratët dhe banorët e Uashingtonit, si dhe faktit që statistikat tregojnë një rënie të krimit të dhunshëm në shkallë kombëtare pas rritjes së tij gjatë pandemisë.

Zhvendosja e fokusit

Ky ndryshim në agjendë pasqyron një taktikë të njohur të Trump për të ridrejtuar vëmendjen e publikut. Siç thotë anketuesi republikan Whit Ayers, “krimi tradicionalisht ka qenë një nga çështjet më të forta të republikanëve, kështu që nuk është një surprizë e vërtetë që ai e ka shtyrë këtë në krye të agjendës.”

Analiza e AP thekson se kjo lëvizje e Trump vjen në një moment kur mbështetja për politikat e tij të ashpra mbi emigracionin ka shënuar rënie. Në mars, rreth gjysma e amerikanëve miratonin qasjen e tij mbi emigracionin, por kjo shifër ra në 43% në korrik, pas raportimeve për deportime agresive dhe taktika të diskutueshme të zbatimit të ligjit.

Kthimi te “Ligji dhe Rendi”

Fokusi i Trump te krimi u bë veçanërisht i dukshëm pas një incidenti në Uashington, ku një zyrtar i administratës u sulmua. Duke e cilësuar qytetin si “jashtë kontrollit”, Presidenti autorizoi marrjen nën kontroll të departamentit të policisë lokale dhe vendosjen e Gardës Kombëtare. Kjo taktikë, që lidh krimin me çështjet e sigurisë dhe rendit, duket se po rezonon me një pjesë të madhe të elektoratit, përfshirë edhe votuesit e pavarur.

Sipas zëdhënëses së Shtëpisë së Bardhë, Abigail Jackson, kjo nuk është një zhvendosje e papritur, por një vazhdim i premtimeve të fushatës së Trump për të “bërë Amerikën përsëri të sigurt.” Shtëpia e Bardhë thekson se retorika e tij mbi krimin dhe emigracionin janë të ndërlidhura, me autoritetet federale që po përdorin pikat e kontrollit të vendosura në Uashington për të arrestuar edhe individë me çështje imigracioni.

Megjithatë, kritikët si Tim Roemer, një demokrat nga Nju Jorku, vërejnë se Trump po përfiton politikisht nga situata duke marrë meritat për një rënie të krimit që ndodhi natyrshëm pas pandemisë. “Fatkeqësisht, ai di si t’i fitojë njerëzit në zemër,” tha Roemer.

The post Sondazhet: Popullariteti i Trump rritet me fokusin te krimi, ndërsa qasja ndaj emigracionit dobësohet first appeared on JavaNews.al.

Një ngjarje e rëndë është regjistruar mbrëmjen e sotme në fshatin Abat të Shalës, në Shkodër. Viktimë ka mbetur 61-vjeçari Piro Prroni, i cili u qëllua për vdekje me armë zjarri.

Policia ka identifikuar autorin e dyshuar të krimit, Ndoc Maçaj, i cili pas ngjarjes është larguar dhe tashmë është shpallur në kërkim.

Sipas burimeve paraprake, viktima dhe autori i dyshuar ishin kushërinj mes tyre dhe ngjarja dyshohet se erdhi si pasojë e një konflikti të hershëm.

Forca të shumta policie janë nisur nga Shkodra drejt zonës së thellë malore të Shalës për të bërë të mundur kapjen e autorit dhe zbardhjen e plotë të rrethanave.

The post EMRAT/ Vrau 61-vjeçarin në Shkodër! Policia identifikon autorin, ishte afërm i viktimës first appeared on JavaNews.al.

Bashkimi Evropian ka vendosur të pezullojë përkohësisht takimet zyrtare me kryeministrin në detyrë të Kosovës, Albin Kurti dhe ministrat e tij.

Përmes një letre të dërguar zyrtarisht, shefat e misioneve të BE në Kosovë njoftojnë se ky pezullim takimesh do të qëndrojë në fuqi derisa të formohet qeveria e re.

Letra e plotë

Po ju shkruaj në emër të Shefave të Misioneve të Shteteve Anëtare të Bashkimit Evropian të pranishëm në Kosovë. Pas aktgjykimit të Gjykatës Supreme të Kosovës (P.A.nr.09/2025, datë 25 qershor 2025), i cili shpalli të pavlefshme Udhëzimin Administrativ të Ministrisë së Financave, Punës dhe Transfereve Nr. 01/2025 mbi Përdorimin e Pajisjeve Fiskale Elektronike, Sistemeve Fiskale dhe Programeve Fiskale Elektronike, duke u bazuar në nenin 71 të Kushtetutës që ndalon ushtrimin e funksioneve ministrore dhe parlamentare njëkohësisht, Bashkimi Evropian ka përshtatur praktikat e tij të angazhimit në përputhje me këtë vendim pas konsultimeve me Shtetet Anëtare të BE-së.

Në përputhje me këtë aktgjykim dhe në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga Shtetet Anëtare të BE-së dhe institucionet e BE-së do të përmbahen, përkohësisht, nga mbajtja e takimeve me Kryeministrin në detyrë dhe ministrat brenda ndërtesës së Qeverisë së Kosovës, derisa të jetë në funksion një Qeveri me mandat të plotë.

Ky vendim riafirmon përkushtimin tonë parimor ndaj sundimit të ligjit, llogaridhënies demokratike dhe integritetit institucional. Kjo letër synon gjithashtu të shmangë çdo paqartësi apo keqinterpretim në të ardhmen, siç ndodhi gjatë vizitës së fundit të Përfaqësuesit Special të Bashkimit Evropian për Dialogun Beograd–Prishtinë. E konsiderojmë thelbësore që angazhimet tona institucionale të jenë plotësisht të harmonizuara me kuadrin kushtetues të Kosovës dhe vendimet e gjykatës më të lartë të saj.

Bashkimi Evropian mbetet plotësisht i përkushtuar ndaj angazhimit konstruktiv dhe është i gatshëm për kontakte dhe koordinim thelbësor. Zyrtarët e lartë të BE-së dhe të Shteteve tona Anëtare do të vazhdojnë të bashkëpunojnë me homologët përkatës për të siguruar vazhdimësinë në fushat kyçe të bashkëpunimit.

Besojmë se kjo masë do të kuptohet në frymën e respektit të ndërsjellë dhe në dritën e përkushtimit tonë të përbashkët ndaj qeverisjes së mirë dhe parimeve demokratike që gjithmonë kanë udhëhequr partneritetin tonë.

Gjithashtu, shpresojmë sinqerisht që një qeveri me mandat të plotë të formohet pa vonesa të mëtejshme, në mënyrë që të mund të rifillojmë bashkëpunimin e plotë me BE-në dhe të thellojmë më tej marrëdhëniet tona politike dhe ekonomike.

The post Zbulohet letra! Bashkimi Europian pezullon të gjitha takimet zyrtare me Albin Kurtin first appeared on JavaNews.al.

Sipërmarrësi Behgjet Pacolli ka reaguar pas aludimeve mediatike që erdhën për shkak të një vizite të tij të papritur në Kryeministri ku takoi shefin e qeverisë, Edi Rama.

Në media u pretendua se Pacollit po i bëjnë presion për t’i marrë aeroportin e Vlorës, por biznesmeni i njohur i rrëzon këto pretendime. Pacolli thotë se artikulli është i pavërtetë dhe se “aeroporti tashmë po hyn në një fazë të re zhvillimi profesional, Mabco ka nisur procesin e riorganizimit të brendshëm, që lidhet vetëm me menaxhimin normal”.

Reagimi i Pacollit:

Është e padrejtë të krijohen histori me insinuata. Artikulli i gazetës Kapitali është po aq i shtrembëruar sa edhe i padrejtë.

Unë, së bashku me drejtorin e kompanisë Mabco, koncesionare shumicë e Aeroportit të Vlorës, kemi qenë në Kryeministri thjesht për një vizitë kortezie, ku informuam për ecurinë e punimeve në aeroportin e Vlorës.

Nuk është aspak e vërtetë, as korrekte, të thuhet se ka pasur ndonjë presion apo kërkesë për t’u përfshirë qeveria, ashtu siç raportojnë disa media.

Në fakt, duke qenë se aeroporti tashmë po hyn në një fazë të re zhvillimi profesional, Mabco ka nisur procesin e riorganizimit të brendshëm, që lidhet vetëm me menaxhimin normal.

Duke marrë shkas nga leximi me i thellë i  një shkrimi në  media, dua të konfirmoj që puna për përfundimin e aeroportit të Vlorës po ecën përpara me sukses dhe me mbështetjen e plotë të qeverisë shqiptare! Ne mezi presim që ta përfundojmë aeroportin në afat për ti dhënë Shqipërisë dhe bregdetit të saj të bukur dhe një destinacion tjetër.

Vendimet e aksionerit te VIA nuk janë asgjë tjetër përveçse procedura rutinë që kanë të bëjnë me procese normale qe kane lidhje me garancine ndaj institucioneve financiare për mos transferimin e kuotave sa kohe qe kreditë e marra apo që do merren në lidhje me zhvillimin e aeroportit nuk janë shlyer.

The post Po i bëjnë presion për t’i marrë aeroportin e Vlorës? Reagon Pacolli: Ja pse i vajta Ramës në zyrë first appeared on JavaNews.al.

Kreditimi i ekonomisë u ngadalësua lehtë në muajin korrik. Sipas Bankës së Shqipërisë, kredia e re për korrikun kishte vlerën e 28.9 miliardë lekëve, 1.3% më pak krahasuar me të njëjtin muaj të vitit të kaluar. Megjithatë, ecuria e deritanishme progresive tregon që kredia për ekonominë gjatë vitit 2025 ka vijuar rritjen dhe është në vlerat më të larta historike të regjistruara në këtë periudhë të vitit.

Për periudhën janar-korrik,  janë dhënë gjithsej 231.9 miliardë lekë kredi të reja, me një rritje prej 10% më shumë krahasuar me të njëjtën periudhë të vitit të kaluar.

Ndërkohë që vitin e kaluar rritja e kredisë ishte mbështetur kryesisht te financimet e bizneseve, këtë vit kontributin kryesor po e jep rritja e huave për individë.

Kredia e re për individët në korrik vijoi rritjen e qëndrueshme, në linjë me tendencën positive të viteve të fundit. Kredia e re kishte vlerën e 9.8 miliard lekëve, në rritje me 14% krahasuar me korrikun e vitit të kaluar. Edhe për 7-mujorin kredia e re ngelet të ndjeshme. Ajo arriti vlerën e 77 miliardë lekëve, në rritje me 26% krahasuar me një vit më parë.

Kreditimi i individëve është mbështetur te një rritje shumë e shpejtë në dy segmentet kryesore, të blerjeve të pasurive të paluajtshme dhe financimit të konsumit.

Kredia për bizneset në muajin korrik kishte vlerën e 19.1 miliardë lekëve, 7.5% më pak krahasuar me korrikun e vitit të kaluar. Megjithatë, bilanci progresiv i 7-mujorit është në rritje. Kompanitë private përfituan gjithsej 151.3 miliardë lekë kredi, me një rritje prej 1.1% krahasuar me të njëjtën periudhë të vitit të kaluar.

Pas një rritjeje shumë të shpejtë gjatë vitit të kaluar, këtë vit kredia për bizneset është ngadalësuar ndjeshëm. Në fund të muajit korrik, edhe portofoli total i kredisë për ekonominë, shprehur si tepricë, qëndroi në vlera të përafërta me qershorin. Ai kishte vlerën e 893.1 miliardë lekëve. Megjithatë, me bazë vjetore, kredia vazhdon të jetë në rritje, me 11.9%. Rritja është më e lartë në segmentin e individëve, ku portofoli ka arritur vlerën e 360.5 miliardë lekëve, në rritje me 9.6% krahasuar me një vit më parë.

Ndërsa në segmentin e biznesit vlera e portofolit të kredisë arriti në 490.4 miliardë lekë, në rritje me 16.7% krahasuar me të njëjtën periudhë të një viti më parë./Marrë nga Monitor

The post BSH: Kreditimi i ekonomisë u frenua në muajin korrik first appeared on JavaNews.al.

Presidenti i Ukrainës, Volodymyr Zelensky, ka shkruar në rrjetin social “X” se ka biseduar me Sekretarin e Përgjithshëm të OKB-së, Antonio Guterres, lidhur me sulmin e madh rus që goditi Ukrainën gjatë natës.

“Jam mirënjohës për fjalët e tij ngushëlluese dhe solidaritetin me familjet ukrainase që humbën të dashurit e tyre. Ishte një nga sulmet më të mëdha të Rusisë”, shkruan Zelensky.

Ai thekson nevojën për masa urgjente që të ndalet vrasja e civilëve dhe shtoi se Ukraina është e gatshme për një takim në nivel liderësh, ku mund të trajtohen të gjitha çështjet më të rëndësishme.

Megjithatë, sipas tij, Rusia vazhdon të vendosë kushte të reja dhe të vijojë agresionin.

“Bota duhet të rivendosë fuqinë e ligjit ndërkombëtar dhe respektin për parimet e Kartës së OKB-së”, shkruan Zelensky.

Zelensky po ashtu falënderon Sekretarin e Përgjithshëm për mbështetjen ndaj integritetit territorial dhe sovranitetit të Ukrainës.

“Biseduam edhe për përgatitjet për seancën e 80-të të Asamblesë së Përgjithshme të OKB-së, ku Ukraina do të organizojë evente të rëndësishme. Presim që Sekretari i Përgjithshëm të jetë prezent në këto aktivitete“, përfundon Presidenti ukrainas.

Kujtojmë se sulmi rus me raketa mbi Kiev, gjatë natës së 28 gushtit, shkaktoi të paktën 18 viktima. Mes të vrarëve janë edhe katër fëmijë, ndërsa të plagosurit janë me dhjetëra.

Sulmet dëmtuan gjithashtu ndërtesat e Këshillit Britanik dhe të misionit të BE-së.

The post “Bota duhet të veprojë”, Zelensky kërkon mbështetjen e OKB-së pas sulmit rus first appeared on JavaNews.al.

Berisha njihet për qëndrimet e tij inkoheretne dhe për mos mbajtjen asnjë përgjegjësi për fjalët që thotë, por, ndërsa sot shfaqet si një ndër ‘të persekutuarit’ e Xhorxh Soros-it, një letër e firmosur nga Presidenti i Shqipërisë, Sali Berisha, i është drejtuar miliarderit amerikan, Xhorxh Soros, duke e falënderuar për ndihmën e madhe ndaj popullit shqiptar, madje edhe duke e cilësuar se kjo ndihmesë e tij kishte qenë kyç për fitoren e fundit të Partisë Demokratike.

Në letrën e tij, Berisha përmend ndihmën konkrete që Fondacioni i Shoqërisë së Hapur kishte dhënë për shtypin demokratik shqiptar, duke dërguar 120 tonë letër për botimin e gazetave opozitare.

“Mbështetja juaj ishte shumë e nevojshme. Nuk ka dyshim se ndihmesa juaj ishte një çelës për fitoren tonë demokratike”, shkruante Berisha, duke e ftuar Sorosin që të vizitonte Shqipërinë si “mik personal”.

Në atë kohë, Fondacioni Soros kishte hapur zyrën e tij në Tiranë, duke mbështetur proceset demokratike dhe reformuese. Berisha theksonte se kontributi i Sorosit për ngritjen e një grupi këshillimor pranë qeverisë shqiptare do të ishte thelbësor për reformat politike, shoqërore dhe ekonomike të vendit.

Por, ndryshe nga qëndrimi i atëhershëm, sot Berisha është një prej kritikëve më të mëdhenj të Sorosit, duke e paraqitur shpesh si “armik të demokracisë shqiptare” dhe pjesë të një skeme që synon kapjen e institucioneve, madje duke e akuzuar edhe për shpalljen ‘non grata’ të tij, në një komplot me Edi Ramën dhe Departamentin Amerikan të Shtetit.

Letra e publikuar shërben si një dëshmi e qartë e ndryshimeve drastike të retorikës politike të Sali Berishës gjatë tre dekadave të fundit, duke nxjerrë në pah kontrastin mes së kaluarës dhe qëndrimeve të sotme.

Më poshtë, letra e plotë:

I dashur Z. Soros,

Po shkruaj para së gjithash për t’ju falenderuar për mbështetjen shumë të nevojshme që Fondacioni Soros (Fondacioni i Shoqërisë së Hapur për Shqipërinë) i ka dhënë lëvizjes demokratike në Shqipëri. 120 tonët e letrës janë një shembull i ndihmës që fondacioni juaj i dha shtypit demokratik shqiptar në kohën dhe me qëllimin e duhur. Nuk ka dyshim se kjo ndihmesë, ishte një çelës për fitoren madhështore demokratike në zgjedhjet tona të fundit. Dyzet e pesë vjet të izolimit dhe kontrollit të plotë të shtetit mbi ekonominë e kanë lënë Shqipërinë në një nevojë të ngutshme për reforma të plota të mjedisit ekonomik, politik dhe shoqëror të vendit. Nuk ka asnjë dyshim se mbështetja juaj për një Grup Këshillimor pranë qeverisë shqiptare do të luajë një rol të rëndësishëm në planifikimin dhe kryerjen e këtyre reformave. Si qeveria e Shqipërisë ashtu edhe unë personalisht shpresojmë të kemi marrëdhënie të frytshme me fondacionin tuaj. Kështu që unë ju ftoj me kënaqësi të madhe të vizitoni Shqipërinë si miku im personal.

Shpresoj të shihemi së shpejti, dhe mbetem

Sinqerisht, Dr. SALI BERISHA

The post Sot i kërkoi FBI-së ta hetojë, kur Berisha i shkruante Sorosit: Mezi po pres të kem marrëdhënie me ju first appeared on JavaNews.al.

Komandanti i bazës ajrore të Farkës, nënkolonel Ervin Buzi ka rrëfyer operacionet për shuarjen e flakëve përgjatë javëve të fundit kur Shqipëria u përfshi nga zjarret.

Sipas Buzit, në operacionet nga ajri merret parasysh fakti që risku dhe rreziku është shumë i lartë për shuarjen e flakëve.

‘Ne përpiqemi të zgjedhim një ekuipazh më të mirë dhe duhet me qenë në zonën e operacionit për sa është e mundur. Gjithmonë duhet të kemi parasysh që risku është shumë i lartë, ose je mbi ujë dhe mund të përfundojmë të mbytemi ose je mbi zjarre se mund të përfundojmë në zjarr dhe me këtë arsyetim ne mundohemi që ta ulim këtë probabilitet, duke pasur helikopterin sa më të lehtë që po të fiket një motor, të kemi mundësi të ikim nga uji dhe mundohemi që të mos të hyjmë 100 për qind në tym sepse do të na fiket motori”, u shpreh Buzi në një intervistë për RTSH 24.

Buzi rrëfeu një episod ku kanë qenë disa operacione në zonën e Finiqit dhe në ato të Delvinës, “ku qielli u mbulua plotësisht. Kishte raste që e shikonim liqenin por nuk afroheshim dot sepse na fikeshin motorrat”.

“Kanë qenë disa operacione në zonën e Finiqit dhe në ato të Delvinës, ku qielli u mbulua plotësisht. Kishte raste që e shikonim liqenin por nuk afroheshim dot sepse na fikeshin motorrat. Kishte simptoma në ekuipazh që fillonte dhimbja e kokës si dhe në zonën e Gramshit dhe aty u mbulua komplet, ka raste që t’i thua; ‘tani është apokalips’. Je duke kërkuar sa më shumë që të ndihmosh sa më shumë dhe je në një nxitim të paparë sepse është edhe adrenalinë që të ndihmosh sa më shumë që je edhe kundër natyrës.

Nënkoloneli vuri në dukje se zonat që u përfshinë nga zjarret këtë vit kanë qenë po ato zona ku Forcat e Armatosura janë përballur edhe në vitet e kaluara, por ndryshe nga vitet e mëparshme, ky vit sipas Buzit, “ka qenë me përmasa të frikshme”.

“Zonat që ne kemi operuar janë pothuajse ato zona që ne kemi operuar çdo vit, por këtë vit kanë qenë përmasat shumë të frikshme. Ne punojmë 2-3 ditë në një zonë të caktuar pastaj në një zonë tjetër dhe të vjen keq që thua ky vend duhet ruajtur dhe jo të shkatërrohet sepse zjarri shkatërron çdo gjë. Mendoj se këtë vit kemi pasur përballjen më të madhe me dimensionet më të mëdha të zjarreve”, tha Buzi ndërsa shtoi se një nga përpjekjet konkrete është shpëtimi i jetëve njerëzore.

“Ndërhyrja ajrore duhet ajo nuk diskutohet, ne bëjmë shumë punë. Por gjithmonë duhet bashkëpunim me forcat në terren, sepse ne kur shkojmë për furnizim karburanti aty ka mbetur një vatër e vogël dhe që mund të marrë përmasa të tjera. Mirë do të ishte që të rritet sa më shumë sensibilizimi publik dhe njësitë lokale të lajmërojnë në kohë, sepse ne bëjmë shumë punë.

Vendimtare është kur shkojmë pranë pronave dhe njerëzve sepse duhet të mbrojmë jetën e njeriut dhe shtëpinë, jo se të tjerat nuk janë vendimtare, por të tjerat të lënë më shumë kohë reagimi”, theksoi nënkoloneli Buzi.

The post “U përballëm me apokalipsin”, N/Koloneli rrëfen betejën me flakët: Zjarret sivjet me përmasa të frikshme first appeared on JavaNews.al.

Një ngjarje e rëndë ka ndodhur mbrëmjen e sotme në fshatin Abat të njësisë administrative Shalë në Shkodër, ku 61-vjeçari Piro Prro është vrarë me armë zjarri.

Sipas policisë autori i dyshuar i ngjarjes është N.M. Policia ka mbërritur menjëherë në venngjarje dhe po punon për kapjen e autorit të dyshuar.

Njoftimi:

Rreth orës 20:00, në fshatin Abat, Shalë, shtetasi N. M., në rrethana ende të paqarta, dyshohet se ka vrarë me armë zjarri shtetasin P. P., 61 vjeç.

Shërbimet e Policisë janë nisur menjëherë për në fshatin Abat, për të bërë të mundur kapjen e autorit.

Ndërkohë, është ngritur një grup i posaçëm hetimor, për sqarimin e rrethanave dhe dokumentimin ligjor të ngjarjes.

The post Tronditet Shkodra, vritet me armë 61-vjeçari, detajet e para nga krimi first appeared on JavaNews.al.

Kina do të zgjerojë sistemin e saj të rrjetit të monitorimit të ujit për të përfshirë mbi 200 trupa të vegjël ujorë shtesë dhe do të prezantojë tregues ekologjikë gjatë periudhës së Planit të 15-të Pesëvjeçar (2026-2030), njoftoi Ministria e Ekologjisë dhe Mjedisit, citon “Xinhua”.

Kina ka arritur rezultate pozitive në mbajtjen e ujërave të saj të pastra, tha Jiang Huohua, kreu i Departamentit të Ekologjisë dhe Mjedisit të Ujit në ministri, në një konferencë për shtyp.

Sipas tij, përqindja e trupave ujorë sipërfaqësorë në ose mbi gradën III në sistemin me pesë nivele të cilësisë së ujit të vendit ishte rreth 89 për qind në gjysmën e parë të këtij viti, duke tejkaluar ndjeshëm objektivin e vendosur për periudhën e Planit të 14-të Pesëvjeçar (2021-2025).

Nga viti 2015 deri në vitin 2024, përqindja e trupave ujorë sipërfaqësorë në ose mbi gradën III u rrit nga 64.5 për qind në 90.4 për qind, duke shënuar nëntë vjet përmirësimi radhazi, shtoi Jiang.

“Rrjeti i monitorimit të ujit do të shtrihet përtej lumenjve kryesorë për të përfshirë degët dhe trupat e vegjël ujorë gjatë periudhës së Planit të 15-të Pesëvjeçar, për të pasqyruar më mirë kushtet e ekosistemeve ujore më afër komuniteteve”,- tha ai.

Jiang tha se kur përcaktohen objektivat ekologjike të ujit, duke i kushtuar vëmendje treguesve fizikë dhe kimikë, duhet të përfshihen edhe treguesit përkatës ekologjikë të ujit për të pasqyruar më mirë kushtet e ekosistemit ujor.

The post Zgjerimi i rrjetit të monitorimit të ujit ka ndikuar dukshëm në përmisimin e cilësisë së tij first appeared on JavaNews.al.

Nga Nju Jorku, Marko Caka

Duke marrë shkas nga një reagim publik i një deputeteje të Partisë Demokratike lidhur me pajisjen me shtetësi shqiptare të futbollistit Edon Zhegrova, nuk mund të mos shpreh shqetësimin tim, jo për vetë procesin e shtetësisë, por për mllefin që u ndie më shumë ndaj personave që e kanë dhënë këtë shtetësi, sesa ndaj mënyrës se si ajo është përfituar.

Së pari, Edon Zhegrova është shqiptar dhe ka të gjithë të drejtën e Zotit të marrë shtetësinë e Shqipërisë, si bijtë e të njëjtit komb e të njëjtit gjak, që dëshirojnë të pajisen me pasaportën e tokës mëmë.

Së dyti, Zhegrova nuk është një qytetar i zakonshëm që thjesht ka aplikuar për dokumente. Ai është një futbollist me karrierë të suksesshme ndërkombëtare, që nderon dhe përfaqëson me dinjitet shqiptarët në arenën ndërkombëtare. Nëse ka dikush që e meriton këtë shtetësi, janë pikërisht figura si ai, që e përmirësojnë imazhin e vendit, jo si ata që e njollosin, trafikantët, kriminelët deri edhe politikanët e korruptuar, të cilët, për ironi, shpesh mbrohen nga vetë ajo deputete që sot ngre zërin.

Është e qartë se shqetësimi i saj nuk ka të bëjë as me procedurat, as me shtetësinë në vetvete, por me faktin që ky akt është firmosur nga kryeministri i vendit, armiku i përbetuar i partisë së saj. Është bërë obsesion tashmë që çdo gjë që mban firmën e tij të anatemohet, qoftë edhe kur ndihmon një bashkëkombës të suksesshëm nga Kosova.

Nuk jam në dijeni të plotë të kohës që i është dashur Zhegrovës për të marrë shtetësinë apo të procedurave ligjore, por e di që sportistët me talent të spikatur dhe famë ndërkombëtare kanë pasur gjithmonë lehtësira dhe kjo është e sanksionuar në ligj. Kur ky sportist është edhe shqiptar, nuk ka asnjë arsye të vonohet një vendim i tillë.

Deputetja në fjalë nuk e vuri në pikëpyetje fakti që, nën presidencën e mëparshme, një futbollist afrikan,  i panjohur për publikun shqiptar dhe i padëshmuar në ndonjë nivel të lartë sportiv u pajis me shtetësi brenda natës. Madje, për atë rast ka pasur edhe akuza për korrupsion dhe dhënie parash. Po aty nuk u ndje asnjë zë proteste! Kjo tregon qartë se standardet janë të dyfishta, dhe kritika nuk ka të bëjë me parime, por me interesa të ngushta politike.

Në rastin e Zhegrovës, nuk ka asnjë shenjë që shtetësia i është dhënë për përfitim politik apo ekonomik. Përkundrazi, është një rast ku autoritetet shtetërore kanë vepruar në mbështetje të një bashkëkombësi që e ka ngritur flamurin shqiptar në majat më të larta të sportit.

Le t’i kujtojmë deputetes një fakt 33 vjet më parë, atëherë kur autoritetet greke i dhanë shtetësinë Pirro Dhimës në avion, gjatë rrugës për në Lojërat Olimpike të Barcelonës. Dhe falë atij vendimi të shpejtë dhe vizionar, Greqia fitoi një kampion të madh dhe një ikonë të sportit, që e nderoi atë shtet për dekada. Asnjë politikan grek nuk u mor me procedurën, por të gjithë u bashkuan për ta mbështetur.

Shpresoj që një ditë Edon Zhegrova të jetë pjesë e ëndrrës së tij tek “Zonja e Vjetër”, Juventus, dhe suksesi i tij të na bëjë krenarë të gjithëve, përfshirë edhe ata që sot ndoshta nuk e kuptojnë peshën e sportit dhe të përfaqësimit ndërkombëtar.

Sepse kur një shqiptar nderon kombin, nuk ka rëndësi nëse e ka marrë pasaportën dje apo dhjetë vjet më parë, por ai është yni dhe ne duhet ta mbështesim.

The post Pirro Dhima u bë grek në avion, Zhegrova mezi bëhet shqiptar në tokën e tij first appeared on JavaNews.al.

Një ngjarje e pazakontë është regjistruar mëngjesin e ditës së enjte në fshatin Buzishtë të Pogradecit.

Sipas raportimeve, dy të mitur kanë hyrë në ambientet e shkollës së fshatit dhe kanë shkatërruar orenditë dhe sende të tjera, duke shkaktuar dëme të konsiderueshme materiale.

Gjithçka vjen në një kohë, kur shkolla po përgatitet për të pritur nxënësit e vegjël në vitin e ri shkollor.

Policia ka identifikuar autorët dhe ka nisur një procedim penal ndaj tyre.

The post VIDEO / Në prag të vitit të ri shkollor, dy të mitur shkatërrojnë shkollën në Pogradec first appeared on JavaNews.al.

Guvernatorja e Rezervës Federale (Fed), Lisa Cook, ka paditur presidentin amerikan, Donald Trump, për vendimin e tij për ta shkarkuar, duke hapur një betejë ligjore me peshë të madhe për tregjet financiare, raporton Financial Times.

Sipas dokumenteve gjyqësore, Cook depozitoi padinë ditën e sotme, 28 gusht 2025, në një gjykatë federale në Uashington. Vendimi i saj erdhi pasi Trump deklaroi të hënën se po e shkarkonte menjëherë, duke e akuzuar për mashtrim në aplikime hipotekare.

Akuzat ndaj Cook u publikuan nga Bill Pulte, drejtor federal i strehimit dhe aleat i Trump. Ai pretendon se Cook kishte paraqitur dokumente të pasakta për dy prona të blera në Michigan dhe Atlanta në vitin 2021, duke i cilësuar të dyja si banesa kryesore për të përfituar kushte më të favorshme kredie. Megjithatë, autoritetet amerikane nuk kanë ngritur asnjë akuzë ndaj saj.

Avokati i Cook, Abbe Lowell, deklaroi se Trump nuk ka kompetencë ligjore për ta larguar nga detyra.

“Përpjekja e tij për ta shkarkuar, bazuar vetëm në një letër referimi, nuk ka asnjë bazë faktike apo ligjore,” tha Lowell.

Mandati i Lisa Cook si guvernatore i Fed ishte i parashikuar të zgjaste deri në vitin 2038. Nëse Trump do të arrijë të realizojë shkarkimin e saj, ai do të duhet të sigurojë shumicën e emërimeve në bordin shtatë-anëtarësh të Rezervës Federale, organ që luan rol kyç në përcaktimin e normave të interesit dhe mbikëqyrjen e strukturës së bankës qendrore.

Lëvizja e Trump shihet si pjesë e presionit të tij në rritje ndaj bankës qendrore. Ai ka kërkuar uljen e normave të interesit me tre pikë përqindje nga niveli aktual prej 4.25 – 4.5%. Aleatët e tij kanë propozuar gjithashtu reforma për ta bërë më të lehtë shkarkimin e zyrtarëve të Fed dhe për të rritur kontrollin mbi buxhetin e institucionit.

Sekretari i Thesarit, Scott Bessent, deklaroi se i kishte kërkuar kreut të Fed-it, Jay Powell, një rishikim të brendshëm të institucionit përpara se administrata Trump të urdhëronte një auditim të jashtëm.

“Fed është një institucion i pakontrolluar dhe marrëdhënia e tij me publikun varet nga niveli i lartë i besimit,” tha Bessent për Fox Business, duke shtuar se raste si ai i Cook dëmtojnë këtë besim.

Rezerva Federale bëri të ditur të martën se do të respektojë çdo vendim të gjykatës, e cila pritet të shprehet në ditët në vijim.

The post Vendimi për pezullim nga detyra, Guvernatorja e Fed padit Donald Trump first appeared on JavaNews.al.

Kremlini ka deklaruar këtë të enjte se vazhdon të jetë i interesuar për të vazhduar bisedimet e paqes për Ukrainën, pavarësisht se Rusia kreu një sulm të madh dhe vdekjeprurës gjatë natës së kaluar mbi Kievin.

Zyrtarët ukrainas thanë se sulmi kishte vrarë të paktën 17 persona përfshirë katër fëmijë.

I pyetur nëse kishte një kontradiktë midis sulmit të fundit dhe dëshirës së deklaruar të Moskës për të bërë përparim në bisedimet e paqes, zëdhënësi i Kremlinit Dmitry Peskov u tha gazetarëve se të dyja palët po vazhdojnë të sulmojnë njëra-tjetrën.

“Operacioni special ushtarak vazhdon. Mund të shihni se sulmet mbi infrastrukturën ruse, shpesh mbi infrastrukturën civile ruse, nga regjimi i Kievit po vazhdojnë gjithashtu. Forcat e armatosura ruse po kryejnë gjithashtu detyrat e tyre”, tha Peskov, sipas “Reuters”.

Ai tha se Rusia po godiste me sukses infrastrukturën ushtarake dhe atë të lidhur me ushtrinë.

“Në të njëjtën kohë, Rusia mbetet e interesuar për vazhdimin e procesit të negociatave me qëllim që të arrijë objektivat tona përmes mjeteve politike dhe diplomatike”, shtoi ai.

Peskov ka thënë në mënyrë të përsëritur se Rusia nuk i shënjestron qëllimisht civilët dhe i drejton sulmet e saj vetëm kundër objekteve ushtarake. Por pavarësisht deklaratave nga Kremlini, zyrtarët ukrainas thonë se dhjetëra civilë kanë vdekur muajt e fundit gjatë sulmeve ruse mbi zona populluara, dhe mijëra që nga fillimi i luftës.

Ministria ruse e Mbrojtjes tha më herët të enjten se kishte shënjestruar objekte të industrisë ushtarake dhe baza ajrore ushtarake në atë që e përshkroi si një “sulm në grup” gjatë natës dhe që kishte përdorur raketa hipersonike “Kinzhal”, dronë dhe raketa të sakta të lëshuara nga ajri.

Ushtria ukrainase nga ana tjetër tha se kishte përdorur dronë për të goditur dy rafineri nafte ruse gjatë natës, si pjesë e një fushate të vazhdueshme nga Kievi për të goditur sektorin më të rëndësishëm të ekonomisë së presidentit Vladimir Putin. Rusia konfirmoi se njëra nga rafineritë ishte goditur dhe se një zjarr atje ishte shuar.

I pyetur për sulmet ndaj rafinerive, Peskov tha se tregu i brendshëm i karburanteve në Rusi ishte furnizuar plotësisht dhe se situata ishte nën kontroll.

I pyetur për mundësinë e një armëpushimi ajror midis Rusisë dhe Ukrainës, diçka që presidenti i Bjellorusisë Alexander Lukashenko ka sugjeruar se mund të jetë një opsion, Peskov tha se nuk ishte arritur ndonjë marrëveshje për një armëpushim të tillë dhe se negociatat duhet të zhvillohen në mënyrë diskrete.

The post Kremlini pas sulmeve mbi Kievin: Jemi ende të gatshëm për bisedime paqeje first appeared on JavaNews.al.

Një alarm për bombë është ngritur paraditen e sotme, 28 gusht 2025, në zyrat e Operatorit të Shpërndarjes së Energjisë Elektrike në Selanik, Greqi.

Ka qenë një e-mail, nga një emër i panjohur, që erdhi si paralajmërim në adresën elektronike të Operatorit të Shpërndarjes së Energjisë Elektrike, që ngriti zyrat në këmbë, raporton media greke Protothema. Menjëherë pas leximit të këtij e-mail-i, uniformat blu kanë evakuuar të gjithë kompaninë, si dhe morën masat e nevojshme për rrethimin e saj.

Nga hetimet e kryera, rezultoi se alarmi ishte fals, e se në fakt në kompani nuk ka pasur asnjë lëndë plasëse të vendosur në perimetrin e këtyre zyrave.

Autoritetet Helene po punojnë për identifikimin e autorit të e-mail-it të dërguar, si dhe zbardhjen e motivit të krijimit të kësaj situate.

The post Alarm për bombë në zyrën e Operatorit të Shpërndarjes së Energjisë Elektrike në Selanik first appeared on JavaNews.al.

Avokatët e kryebashkiakut të Tiranës, Erion Veliaj, reaguan një ditë më parë pas vendimit të Prokurorisë së Posaçme Anti-Korrupsion për t’i vënë në dispozicion materialet hetimore vetëm në format elektronik. Sipas tyre, SPAK i ka dorëzuar një USB me të gjitha aktet e dosjes, por në kushtet e izolimit ku ndodhet, Veliaj nuk ka asnjë mundësi t’i aksesojë ato.

Kryebashkiaku kishte kërkuar një kopje fizike të dosjes për të përgatitur mbrojtjen e tij, por kjo kërkesë është refuzuar. Avokatët theksojnë se ky veprim cenon të drejtën e mbrojtjes së garantuar nga Kushtetuta e Shqipërisë dhe Konventa Evropiane e të Drejtave të Njeriut.

Një tjetër shqetësim i ngritur nga mbrojtja është edhe pamundësia për t’u takuar me avokatët ndërkombëtarë, të cilët po përgatisin çështjen për në Gjykatën e Strasburgut. Sipas tyre, refuzimi i SPAK për këtë takim tregon qasje me parimin “në fillim arresto, pastaj heto”.

Avokatët nënvizojnë gjithashtu se Veliaj, përveçse i pamundësuar për të ndjekur mbrojtjen e tij, nuk mund të ushtrojë as detyrën si kryetar i Bashkisë së Tiranës, ku është zgjedhur për tre mandate radhazi. Çështja, sipas tyre, pritet të përfundojë në Gjykatën Evropiane të të Drejtave të Njeriut. /TemA

The post VIDEO/ Paradoksi i SPAK me Veliajn – në burg, me dosje në USB first appeared on JavaNews.al.

Policia e Tiranës ka zbatur urdhrin e gjykatës për të vendosur nën sekuestro pasurinë e 45-vjeçarit Kristian Koni, i cili rezulton i dënuar për vepra të rënda penale.

Sipas Bluve të kryeqytetit në kuadër të operacionit “Fortesa” janë sekuestruar pasuri me vlerë 26 milionë e 500 mijë euro, përkatësisht disa vila në bregdet dhe në Tiranë, llogari të shumta bankare dhe automjete.

“Specialistët e Seksionit për Hetimin e Pastrimit të Parave, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, në kuadër të një procedimi penal të drejtuar nga Prokuroria e Tiranës, ekzekutuan vendimin e Gjykatës së Tiranës, për sekuestrimin e pasurive në pronësi të shtetasit K. K., alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike”, kryer në kuadër të grupit të strukturuar kriminal. Pasuritë e sekuestruara janë konkretisht: 19 prona, 2 automjete dhe 20 llogari bankare, të regjistruara në emër të 45-vjeçarit ose të familjarëve të tij, me vlerë tregu rreth 26 milionë e 500 mijë euro”, informon policia.

Sakaq, bëhet me dije se vijon ende puna për gjurmimin dhe sekuestrimin e pasurive të tjera që dyshohet se kanë burim nga veprimtaritë kriminale të këtij shtetasi.

The post Vlejnë 26.5 milionë euro, të dënuarit për vrasje e drogë i sekuestrojnë vilat në bregdet dhe makinat luksoze (EMRI) first appeared on JavaNews.al.

Një aksident i shumëfishtë ka ndodhur këtë të enjte më 28 gusht në aksin rrugor Rubik-Fushë Milot, ku janë përplasur katër mjete.

Sipas Policisë, shkak për aksidentin është bëri drejtuesi i njërit prej automjeteve, i cili ka humbur kontrollin dhe ka përfunduar duke u përplasur me tre mjetet e tjera.

“Specialistët e Njësisë së Sigurisë Rrugore të Autostradës Milot-Morinë referuan materialet në Prokurori ku nisi procedimi penal për shtetasin A. I., 44 vjeç, banues në Tiranë, pasi në aksin ‘Rubik-Fushë Milot’, duke drejtuar automjetin, ka humbur kontrollin dhe si pasojë automjeti është përfshirë në aksident me 3 automjete të tjera.”, bën me dije Policia.

Si pasojë e përplasjes, dy pasagjere kanë mbetur të lënduara dhe ndodhen në spital, fatmirësisht jashtë rrezikut për jetën.

The post Aksident me katër automjete në Rubik-Fushë Milot, dy pasagjere të plagosura first appeared on JavaNews.al.

Presidenti i Republikës Bajram Begaj, priti këtë të enjte, më 28 gusht, në një takim solemnik luftëtarët e parë për çlirimin e Kosovës, të stërvitur në Shqipëri në vitin 1991, familjarë të martirëve dhe ish-pedagogët ushtarakë që kryen trajnimet e asaj periudhe të rëndësishme historike.

Në fjalën e tij, Kreu i Shtetit vlerësoi guximin, sakrificën dhe rolin vendimtar të këtyre luftëtarëve dhe të ushtarakëve shqiptarë që kontribuuan në përgatitjen politike, logjistike dhe ushtarake.

Ai i cilësoi ata si “njerëz që kanë shkruar një faqe të rëndësishme të historisë së kombit shqiptar” dhe theksoi se akti i vitit 1991 duhet të njihet dhe të mësohet në shkolla për të mos mbetur në harresë.

“Ngjarjet e tetor-nëntorit të ‘91-shit janë fillimi i flakës së madhe të çlirimit të Kosovës. Ishte një sakrificë, sakrificë, së pari, e atyre njerëzve që dolën vullnetarë dhe erdhën për t’u stërvitur në Shqipëri, sakrificë e atyre pedagogëve që i mësuan, trajnuan, i stërvitën, të cilët nuk e dinin se si do të shkonte Shqipëria dhe kur askush nuk e imagjinonte që në ’99-ën ne do të kishim një Kosovë të çliruar”, tha ai.

Në këtë takim, Begaj nderoi veçanërisht figurat e martirëve të këtij grupi, mes të cilëve Adem Jashari, Ilaz Kodra dhe Sali Çekaj, duke siguruar të pranishmit për përkushtimin e tij të vazhdueshëm në vlerësimin e veprës së ish-luftëtarëve: “Unë ju siguroj që do të keni gjithmonë vëmendjen e Presidentit të Republikës së Shqipërisë. UÇK-ja do të jetë patjetër në vëmendjen e shtetit shqiptar.”

Presidenti u shpreh, gjithashtu, se Shqipëria do të mbetet një avokate dhe mbrojtëse e Kosovës në çfarëdo lloj rrethane dhe situate, ndërsa kërkoi që dhe Kosova të dëshmojë pjekurinë e duhur për të ecur përpara.

“Vetë shteti i Kosovës duhet të bëjë shumë më shumë për interesat e brendshme të Kosovës. Tani jemi në një situatë që shpresoj të tejkalohet ngërçi institucional për formimin e institucioneve të reja, pasi Kosova e ka shumë të nevojshme, shumë të domosdoshme për t’u promovouar në arenën ndërkombëtare që është e aftë të bëjë shtetformim dhe të jetë një partner i besueshëm për ata të cilët kontribuuan për shtetin e Kosovës, që janë partnerët tanë strategjik: Shtetet e Bashkuara të Amerikës dhe Bashkimi Evropian.”, shtoi Begaj.

Gjatë bashkëbisedimit, ish-luftëtarët sollën përjetimet e atyre viteve dhe vuajtjet që pasuan nga torturat në burgjet jugosllave apo gjatë luftës së UÇK-së, si dhe i përcollën Kreut të Shtetit mirënjohjen për mbështetjen nga Shqipëria, si dhe për pritjen e rezervuar sot në Institucionit e Presidentit të Republikës.

The post Begaj nderon luftëtarët e parë të çlirimit të Kosovës: Veprat tuaja do të mbeten të paharruara first appeared on JavaNews.al.

Britania e Madhe thërret ambasadorin rus pas sulmeve të natës në Kiev. Lajmi u bë me dije nga Sekretari i Jashtëm i Mbretërisë së Bashkuar, David Lammy, teksa i bëri thirrje Rusisë të ndalonte sulmet mbi Kiev.

“Sulmet e Putinit mbrëmë vranë civilë, shkatërruan shtëpi dhe dëmtuan ndërtesa, përfshirë Këshillin Britanik dhe Delegacionin e BE-së në Kiev. Ne e kemi thirrur ambasadorin rus. Vrasjet dhe shkatërrimet duhet të ndalen.”, shkroi ai në X.

Nga ana e tij, Sekretari i përgjithshëm i NATO-s, Mark Rutte, është vënë në kontakt me shefen e politikës së jashtme të BE-së, Kaja Kallas, dhe presidenten e Komisionit të BE-së, Ursula von der Leyen, në lidhje me sulmin e Rusisë që dëmtoi edhe ndërtesën ku ndodhet delegacioni i BE-së në Ukrainë. Rutte, duke folur në një takim të partive qeveritare gjermane në qytetin jugor të Wuerzburgut, tha se nuk mund të komentojë mbi thashethemet e fundit rreth spiunazhit rus në Evropë.

Po ashtu, edhe presidenti turk, Tayyip Erdogan, ka zhvilluar një telefonatë me homologun e tij ukrainas, Volodymyr Zelensky ku i shprehu gatishmërinë e Ankarasë për të ndihmuar në zhvillimin e çdo bisedimesh të nivelit të lartë midis Ukrainës dhe Rusisë. Erdogan garantoi gjithashtu se Turqia do të vijojë kontributin në sigurinë e Ukrainës pasi të arrihet paqja.

Sulmet ruse mbi Kiev u dënuan gjithashtu edhe nga Komisionerja e BE-së për Zgjerimin, Marta Kos dhe Presidentja e Komisionit Evropian, Ursula von der Leyen.

The post Sulmet ruse mbi Kiev, Britania e Madhe dhe BE thërrasin diplomatët e lartë rusë first appeared on JavaNews.al.