Gjykata Supreme e Kosovës ka hedhur poshtë një ankesë të parashtruar nga dy anëtarë të Lëvizjes Vetëvendosje (LVV) kundër një vendimi të Panelit Zgjedhor për Ankesa dhe Parashtresa (PZAP) për ta urdhëruar Komisionin Qendror të Zgjedhjeve (KQZ) që ta certifikojë Listën Serbe për pjesëmarrje në zgjedhjet lokale.

“Hedhet poshtë si e palejuar ankesa e parashtruar nga Sami Kurteshi dhe Alban Krasniqi”, thuhet në aktvendimin e 28 gushtit të Supremes.

Gjykata ka thënë se “duke u nisur nga fakti se ankesa ndaj vendimit të PZAP-it në Gjykatën Supreme është parashtruar nga Sami Kurteshi dhe Alban Krasniqi në cilësinë e anëtarit individual të KQZ-së, të njëjtit nuk kanë të drejtë, përkatësisht nuk kanë legjitimitet që të parashtrojnë ankesë në emër të tyre personalisht, pasi që nuk janë palë të drejtpërdrejta sipas vendimit të PZAP-së”.

“Kjo për faktin se sipas vlerësimit të kolegjit të kësaj gjykate të drejtë për të paraqitur ankesë në Gjykatën Supreme ndaj vendimit të PZAP-it, përveç personave që kanë interes ligjor (të përcaktuar me paragrafin 1 të nenit 119), ka vetëm KQZ-ja, përkatësisht zyra e saj, ashtu siç është e përcaktuar me Ligjin për Zgjedhjet e Përgjithshme, përkatësisht nenin 119 paragrafi 2, e jo anëtarët individual të saj. Për më tepër, këta të fundit e shprehin mendimin e tyre gjatë procesit të vendimarrjes brenda KQZ-së, por nuk legjitimohen që të veprojnë si palë individuale në procedurë gjyqësore, siç është edhe rasti konkret”, thuhet në aktvendim.

Supremja ka thënë se kolegji i saj nuk është lëshuar në shqyrtimin meritor të çështjes së ngritur me ankesë nga ankuesit.

PZAP-ja e urdhëroi javën e kaluar komisionin zgjedhor ta certifikojë partinë më të madhe të serbëve në Kosovë – e cila gëzon mbështetjen e Beogradit zyrtar – pak ditë pasi asaj iu mohua regjistrimi për pjesëmarrje në zgjedhjet e 12 tetorit.

Dy anëtarët e LVV-së në KQZ, Kurteshi dhe Krasniqi, ishin të vetmit që votuan kundër certifikimit të kësaj partie.

Ky rast ishte pothuajse një përsëritje e rastit të zgjedhjeve të përgjithshme të shkurtit, kur LVV e kishte kundërshtuar deri në Supreme pjesëmarrjen e Listës Serbe në zgjedhje, por pa sukses.

Vendimi për moscertifikimin e Listës Serbe është kritikuar nga vendet e QUINT-it dhe nga Bashkimi Evropian, të cilat i bënë thirrje Qeverisë në detyrë dhe partive politike të mos ndërmarrin ndonjë hap tjetër për ta penguar regjistrimin e Listës Serbe për zgjedhjet e tetorit.

Lista Serbe vendosi të garojë në zgjedhjet e sivjetshme lokale, pasi kishte bojkotuar zgjedhjet e kaluara lokale, duke bërë që kryetarët shqiptarë ta merrnin dhe mbanin pushtetin në katër komunat me shumicë serbe në veri të vendit nga maji i vitit 2023.

Nëse certifikohet, Lista Serbe pritet t’i rimarrë të gjitha katër komunat veriore: Mitrovicë e Veriut, Leposaviq, Zveçan dhe Zubin Potok./REL

Policia e Vlorës ka arrestuar shtetasin Erjon Çeloaliaj, 35 vjeçari nga Orikumi, i shpallur në kërkim.

Çeloaliaj ishte shpallur në kërkim, pasi Gjykata e Shkallës së Parë e Juridiksionit të Përgjithshëm Vlorë, me vendimin e datës 03.03.2025, i ka caktuar masën e sigurisë “Arrest në burg”, për veprën penale “Vrasja me dashje”, mbetur në tentativë.

35-vjeçari akuzohet se më datë 02.04.2024, në aksin rrugor “Llogara-Palasë”, në bashkëpunim me vëllanë e tij, ka goditur me mjet prerës (thikë), shtetasit K. A., 41 vjeç, dhe S. A., 38 vjeç, gjatë një konflikti për motive të dobëta ndërmjet tyre.

Më pas, ka përplasur me automjetin e tij, shtetasin K. A., i cili është dëmtuar rëndë.

Materialet procedurale i janë referuar Prokurorisë, për veprime të mëtejshme.

Kryeministri i rebelëve Huthi në Jemen që mbështeten nga Irani, Ahmed al-Rahawi, raportohet të jetë vrarë nga një sulm izraelit në apartamentin e tij në Sana, të enjten.

Mediat në Jemen shkruajnë se Rahavi ishte vrarë bashke me disa shoqërues të tij.

Sipas raportimeve, bëhet fjalë për një sulm të ndarë nga ai që thuhet se shënjestroi 10 ministra të lartë Huthi ditën e djeshme, përfshirë atë të mbrojtjes. Zyrtarët ishin mbledhur në një lokacion jashtë Saanës për të ndjekur një fjalim të liderit të grupit Abdul Malik al-Houthi.

Kontrollet kufitare dhe kthimi i azilkërkuesve në kufi, sipas ministrit të Brendshëm të Gjermanisë Dobrindt janë pjesë e një politike të suksesshme të migracionit.

Ministri i Brendshëm i Gjermanisë Alexander Dobrindt është shprehur i kënaqur me efektin e kontrolleve të ashpërsuara në kufi. Politikani kristiansocial kthimet e azilkërkuesve që në kufi i ka cilësuar si një “masë me efikasitet të lartë” në luftën kundër migracionitilegal. Ai i tha revistës “Stern”: “Ne kemi kthyer që nga 8 maji në kufi mbi 10.000 migrantë ilegalë, ndër ta rreth 550 persona, që synonin të aplikonin për azil.

Dobrindt si një ndër veprimet e para të tij pas marrjes së detyrës si ministër i Brendshëm në maj të këtij viti udhëzoi, që të kthehen në kufi edhe azilkërkuesit si dhe qëtë ashpërsohen kontrollet ekzistuese në pikat kufitare. Kontrollet u vendosën që në shtator 2024 nga qeveria e mëparshme dhe ministrja socialdemokrate e Punëve të Brendshme Nancy Faeser.

Bie ndjeshëm numri i refugjatëve

Që me fillimin e kontrolleve në kufijtë e Gjermanisë janë kthyer mbi 30.000 vetë, tha Dobrindt. Nga të gjitha masat e marra në kuadrin e politikës për refugjatët ndërkohë numri i migrantëve ilegalë është përgjysmuar. “Në krahasim europian ne nuk jemi më në krye, por renditemi në vendin e tretë si një destinacion për migracionin ilegal”, tha ministri Dobrindt. Ai e konsideron si sukses thelbësor kthimin e refugjatëve në kufi.

Rezerva ligjore

Lidhur me legjitimitetin e kthimeve të migrantëve ilegalë në kufi sipas udhëzimeve që ka dhënë ministri i Brendshëm ka mjaft rezerva.Një grup refugjatësh në fillim të verës iu drejtua Gjykatës Administrative të Berlinit, e cila u dha të drejtë atyre. Gjyqtarët vendosën përmes një procedure të përshpejtuar, se kthimi i tyre në kufi ka qenë jo konform ligjit. Në bazë të Marrëveshjes së Dublinit që vlen në BE, vendi anëtar ku shkelin së pari refugjatët është përgjegjës për procesin e azilit.

Qeveria gjermane e konsideron këtë vendim gjykate si një rast të veçuar dhe vendim individual: “Politika duhet të bëjë dallimin”, tha Dobrindt. Nëse në një demokraci përballë sifdave të reja nuk duken më mundësi ndryshimi nga politika, kjo i hap rrugën partive radikale. Ai tha, se operon brenda kuadrit të së drejtës europiane dhe gjermane.

Kosto të larta për policinë federale

Pavarësisht çështjeve ligjore partitë e opozitës E Majta dhe ekologjistët vazhdimisht kritikojnë disproporcionalitetin e kontrolleve kufitare. Vetëm nga shtatori 2024 deri në fund të qershorit 2025 ka pasur kosto shtesë mbi 80 milionë euro, kryesisht për turnet shtesë në radhët e policisë federale. Edhe sindikata e policisë e konsideron këtë angazhim forcash si të diskutueshëm në sfondin e numri të vogël të kthimeve në kufi./dw

Muaji gusht do të mbyllet me temperatura të freskëta dhe reshje shiu. Sipas meteorologëve e shtuna do të ketë reshje shiu, të cilat do të sjellin edhe problematika me përmbytjet lokale.

“Gjatë natës një sistem i fuqishëm vranësirash do të prekë territorin shqiptar, duke bërë që dita e shtunë të ketë reshje që do të jenë me intensitet mesatar dhe herë pas here intensive. Do të jetë e gjithë ultësira perëndimore e rrezikuar, qarku i Shkodrës, Tirana, Elbasani, Berati, Fieri dhe Vlora, do të kenë reshje në formë shtrëngatash. Parashikohet që e shtuna të ketë reshje gjatë gjithë ditës, rrebeshe, do të kemi vetëm momente të shkurtra ku do të ketë ndërprerje të tyre, megjithatë është e paqëndrueshme. Shirat do të jenë herë pas here problematikë duke sjellë përmbytje të rangut lokal në disa qytete të zonës së ulët ku është Durrësi, Vlora, Tirana, Elbasani, Lushnja dhe Fieri ku do të jetë intensiteti më i lartë dhe presim që të ketë edhe probleme”, tha Lajda Porja.

Temperaturat do të pësojnë ulje me rreth 10 gradë Celsius.

“Shoqërohet menjëherë me një rënie të ndjeshme të temperaturave, në disa zona 8 gradë, në disa zona edhe 10 gradë më freskët. Parashikohet që maksimumi nga 37 gjatë ditës së sotme të jetë jo më shumë se 29-30 gradë. Megjithatë, dita e diel do të sjellë një përmirësim të reshjeve, do të mbeten prezente kryesisht në veri e qendër dhe me intensitet të ulët, por do të jetë mjaft freskët. Parashikohet që të dielën temperaturat të pësojnë sërish rënie, mëngjeset janë të freskëta dhe temperaturat do të jenë 27-28 gradë.”

Gjatë fundjavës problematike veç reshjeve do të jetë edhe era, sidomos në zonat bregdetare.

Klan News

Një 35-vjeçar nga Berati është arrestuar në Greqi, pasi ishte shpallur në kërkim ndërkombëtar me akuzat për vrasje me dashje të mbetur në tentativë, dhe mbajtje pa leje të armëve.

Sipas policisë, shtetasi Fatjon Shabanaj në muajin maj 2021, në Poshnje, të Beratit dyshohet se ka qëlluar me armë zjarri ndaj shtetasit I. I., i cili si pasojë është plagosur.

Arrestimi u bë i mundur falë bashkëpunimit të Policisë së Shtetit me autoritetet greke dhe Interpol-in ndërsa aktualisht po vijon procesi për ekstradimin e tij në Shqipëri.

Njoftimi i policisë:

“Vijon bashkëpunimi intensiv me partnerët, për lokalizimin, kapjen dhe arrestimin me qëllim ekstradimin, të shtetasve të shpallur në kërkim ndërkombëtar.

Si rezultat i këtij bashkëpunimi, është finalizuar një tjetër fazë e operacionit ndërkombëtar “The Wanted”.

Falë informacionit të siguruar nga Departamenti i Policisë Kriminale në Policinë e Shtetit dhe shkëmbimit me Policinë greke, nëpërmjet Interpol Tiranës, u bë i mundur arrestimi në Greqi, me qëllim ekstradimin në Shqipëri, i shtetasit shqiptar Fatjon Shabanaj, 35 vjeç, lindur në Berat.

Ky shtetas ishte shpallur në kërkim ndërkombëtar nga Interpol Tirana, pasi Gjykata e Rrethit Gjyqësor Berat, në vitin 2021, i ka caktuar masën e sigurisë “Arrest në burg”, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.

Në muajin maj 2021, në Poshnje, Berat, shtetasi F. Sh. dyshohet se ka qëlluar me armë zjarri ndaj shtetasit I. I., i cili si pasojë është plagosur.

Interpol Tirana vijon bashkëpunimin me Interpol Athinën, për finalizimin e procedurave të ekstradimit të shtetasit F. Sh., në Shqipëri.

Policia e Shtetit, në bashkëpunim me partnerët ndërkombëtarë, vijon intensivisht punën për lokalizimin dhe kapjen e shtetasve të shpallur në kërkim ndërkombëtar.”

Pronari i një argjendarie në Shkodër është kërcënuar me armë zjarri paraditen e sotme në qytetin e  Shkodrës. Uniformat blu bëjnë me dije se në lagjen “Vasil Shanto”, një shtetas ende i paidentifikuar, që qarkullonte me motomjet, ka qëndruar para një argjendarie dhe me skafandër në kokë është futur në ambjentet e saj.

Pronari i argjendarisë i ka kërkuar që të heqë skafandrën, por ai ka refuzuar dhe është larguar me vrap, duke lënë edhe motomjetin para argjendarisë.

Dyshohet se jashtë ambienteve të saj, ky shtetas i ka drejtuar një armë zjarri pronarit të argjendarisë që të mos ta ndiqte për ta kapur. Shërbimet e Policisë kanë shkuar menjëherë në vendin e ngjarjes dhe vijojnë kontrollin në zonë për kapjen e tij.

Njoftimi i policisë:

Rreth orës 11:30, në lagjen “Vasil Shanto”, një shtetas ende i paidentifikuar, që qarkullonte me motomjet, ka qëndruar para një argjendarie dhe me skafandër në kokë është futur në argjendari.

Pronari i argjendarisë i ka kërkuar që të heqë skafandrën, por ai ka refuzuar dhe është larguar me vrap, duke lënë edhe motomjetin para argjendarisë.

Dyshohet se jashtë ambienteve të saj, ky shtetas i ka drejtuar një armë zjarri pronarit të argjendarisë që të mos ta ndiqte për ta kapur.

Shërbimet e Policisë kanë shkuar menjëherë në vendin e ngjarjes dhe vijojnë kontrollin në zonë për kapjen e tij.

Grupi hetimor, nën drejtimin e Prokurorisë, po punon për identifikimin e autorit dhe dokumentimin ligjor të rastit.

Presidentja e Kosovës, Vjosa Osmani, u ka bërë thirrje partive parlamentare ta gjejnë një zgjidhje në përputhje me Kushtetutën e vendit për t’i themeluar Kuvendin dhe Qeverinë e re sa më parë që jetë e mundur.

Thirrja e Osmanit vjen në një kohë kur Kuvendi ka mbetur peng i zgjidhjes së nënkryetarit të vet nga pakica serbe – hapi i fundit i nevojshëm për konstituimin e Kuvendit përfundimisht.

Këtë javë u duk sikur Kosova do të bëhej me Kuvend të ri më në fund pas një ngërçi të gjatë pas zgjedhjeve të shkurtit, sepse zgjodhi kryetarin dhe katër nënkryetarët.

Megjithatë, partitë parlamentare kanë hasur sërish në mospajtime për votimin e nënkryetarit nga pakica serbe në Kuvend.

“Që Kuvendi të konstituohet urgjentisht, që qeveria të zgjidhet po ashtu urgjentisht, çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën sa më parë që të jetë e mundur”, tha Osmani.

Një ditë më parë, deputetët nuk e votuan asnjë nga kandidatët e Listës Serbe të hedhur në votim përmes shortit për nënkryetar të Kuvendit.

Vota nuk mori as deputeti tjetër serb, Nenad Rashiq nga Partia për Liri, Drejtësi dhe Mbijetesë, i cili nuk përkrahet nga Lista Serbe.

Rashiq – i cili nuk ishte votuar as në seancën e kaluar – i mori 56 vota për, 1 kundër, ndërsa 20 deputetë abstenuan.

Deputetët do të mblidhen sërish të shtunën për ta vazhduar seancën konstituive aty ku ka mbetur të enjten.

Votimi ndaras për nënkryetarët nga pakicat ka nxitur dyshime se mund të jetë shkelur Kushtetuta e vendit, pasi në të kaluarën ata janë votuan në një pako.

Osmani tha se “nuk dua ta jap interpretime kushtetuese për këtë situatë”, kur u pyet për votimin ndaras nga gazetarët pasi bëri homazhe te Monumenti i Personave të Zhdukur në Prishtinë, në shënim të Ditës Ndërkombëtare të të Zhdukurve me Dhunë.

Dita Ndërkombëtare e Viktimave të Zhdukjeve me Dhunë shënohet më 30 gusht.

Të zhdukur, edhe sot e kësaj dite, mbeten ende mbi 1,600 persona.

Gjatë luftës në Kosovë janë vrarë rreth 13,000 njerëz, janë zhvendosur mbi 800,000, ndërsa janë zhdukur rreth 6,000, prej të cilëve rreth 1.600 janë ende të pagjetur.

Qindra trupa të shqiptarëve të vrarë të Kosovës janë gjetur në varrezat masive në Serbi./REL

Ish-kryebashkiaku i Himarës, Jorgo Goro ka fituar lirinë. Sipas gazetares Glidona Daci, ai ka lënë ambientet e burgut pasi kreu dënimin me 2 vite e 20 ditë burg.

Goro është liruar që më 12 gusht pasi kreu dënimin për shpërdorim detyre dhe fshehje pasurie.

Goro u kallëzua nga Fredi Beleri me pretendimin se i ka dhuruar në vitin 2016 pasuesit të tij të komanduar në krye të Bashkisë, Arqile Bollanos 4263 metra sipërfaqe toke.

Sipas SPAK, kjo sipërfaqe toke është përfituar në mënyrë të paligjshme, pasi Bollano kishte përfituar më parë një sipërfaqe prej 7700 metra katrorë tokë në bazë të ligjit 7501.

BE në Kosovë njoftoi kryeministrin, Albin Kurtin përmes një letre, se nuk do të zhvillohen takimet brenda ndërtesës së Qeverisë së Kosovës, derisa të ketë një qeveri me mandat të plotë.

Zyrtarë të qeverisë së Kosovës thanë se Kryeministria është vendi i punës i kryeministrit në detyrë, Albin Kurti kushdo që dëshiron të takojë atë. Ky reagim i zëdhënësit të qeverisë së Kosovës u bë, pasi Bashkimi Evropian ka bërë të ditur se nuk do të zhvillojë takime me kryeministrin dhe anëtarët e kabinetit qeveritar brenda ndërtesës së Qeverisë së Kosovës, derisa Kosova të ketë një qeveri me mandat të plotë. Zëdhënësi i Qeverisë në detyrë të Kosovës, Përparim Kryeziu, tha se “vendi i punës i kryeministrit Kurti është Kryeministria”, por sipas tij, “takime mund të mbahen edhe jashtë ndërtesës së Qeverisë”.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës. Gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve”, theksoi zëdhënësi Kryeziu, duke shtuar se takime jashtë mjediseve të Kryeministrisë kanë ndodhur edhe në të kaluarën gjatë kohës sa Kurti ka qenë kryeministër me mandat të plotë.

Letra e BE-së i referohet aktgjykimit të Gjykatës Supreme
Mediet në Kosovë publikuan një letër të datës 8 gusht, përmes së cilës shefi i zyrës së BE-së në Kosovë, Aivo Orav, e ka informuar kryeministrin në detyrë, Albin Kurti, se në këtë përfundim kanë ardhur pas “aktgjykimit të Gjykatës Supreme të Kosovës të datës 25 qershor” dhe se BE-ja “ka përshtatur praktikat e saj të angazhimit në përputhje me këtë vendim pas konsultimeve me të gjitha shtetet anëtare”. Aktgjykimi i Gjykatës Supreme të Kosovës të datës 25 qershor e shpalli të pavlefshëm një udhëzim administrativ të nënshkruar nga ministri në detyrë i Financave, Hekuran Murati, ku argumentoi se “nxjerrja e akteve nënligjore apo udhëzimeve administrative nga ministrat që janë deputetë është e kundërligjshme dhe shkel dispozitat kushtetuese”. Këtë aktgjykim të Gjykatës Supreme Qeveria në detyrë e kishte cilësuar si “shqetësues dhe arbitrar”, duke i kritikuar ashpër me emër gjyqtarët e Supremes.

Në letrën e Bashkimit Evropian, thuhet se “në përputhje me këtë aktgjykim dhe në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga shtetet anëtare të BE-së dhe institucionet e BE-së do të përmbahen, përkohësisht, nga mbajtja e takimeve me kryeministrin në detyrë dhe ministrat, brenda ndërtesës së Qeverisë së Kosovës, derisa të vijë një qeveri me mandat të plotë”.

Opozita: Jo në të njëjtën kohë edhe postin e deputetit edhe atë të ekzekutivit
Kjo letër e BE-së drejtuar Kurtit, i referohet vizitës së fundit të të dërguarit të BE-së për dialogun Kosovë-Serbi, Peter Sorensen, i cili më 6 gusht zhvilloi takim me kryeministrin në detyrë, Albin Kurti, brenda ndërtesës së Qeverisë së Kosovës. “Kjo letër po ashtu synon të shmangë çdo paqartësi apo keqinterpretim, siç ishin ato që rrethuan vizitën e fundit të përfaqësuesit të posaçëm të BE-së për dialogun Kosovë-Serbi, Peter Sorensen. E vlerësojmë si thelbësore që angazhimet tona institucionale të mbesin në linjë me kornizën kushtetuese të Kosovës dhe vendimeve të gjykatës së saj të lartë”, thuhet në letrën që Aivo Orav i dërgoi Kurtit më 8 gusht. Takimi i fundit i shefit të zyrës së BE-së në Kosovë, Aivo Orav, që zhvilloi me Albin Kurtin në zyrën e tij në Kryeministri, ishte më 25 korrik 2025.

Partitë parlamentare opozitare të deritashme e kanë akuzuar Kurtin dhe anëtarët e qeverisë së tij që janë zgjedhur deputetë, se nuk mund të zhvillojnë në të njëjtën kohë edhe postin e deputetit edhe atë të ekzekutivit. Por, kryeministri në detyrë, Albin Kurti, ka thënë se vendi nuk mund të ketë vakum në qeverisje. Njëra nga partitë e deritashme opozitare, Lidhja Demokratike e Kosovës (LDK), tashmë ka dorëzuar 17 kallëzime penale ndaj Albin Kurtit dhe ministrave të tij, duke i akuzuar ata për shkelje të Ligjit për Qeverinë./DW

Britania e Madhe ua ka ndaluar pjesëmarrjen zyrtarëve izraelitë në panairin e saj më të madh tregtar të mbrojtjes, për shkak të përshkallëzimit të luftës kundër Hamasit në Gazë, në përpjekje për të ushtruar trysni ndaj aleatit historikisht të ngushtë për shkak të konfliktit.

Qeveria e kryeministrit Keir Starmer tha në korrik se do ta njihte shtetin palestinez, nëse Izraeli nuk do të ndërmerrte hapa për t’i lehtësuar vuajtjet e palestinezëve në Gazë dhe nëse nuk do të përmbushte kushte të tjera, duke e zemëruar Qeverinë izraelite.

Ministria e Mbrojtjes e Izraelit tha se, si pasojë e këtij ndalimi, nuk do ta organizojë pavijonin e saj kombëtar si më parë në panairin Defence & Security Equipment International (DSEI), në Londër.

Megjithatë, kompanitë izraelite të mbrojtjes, si Elbit Systems, Rafael, IAI dhe Uvision, do të mundë të marrin pjesë.

Një zëdhënës i Qeverisë britanike tha të premten se vendimi i Qeverisë izraelite për ta përshkallëzuar më shumë luftën në Gazë ishte i gabuar.

“Si pasojë, ne konfirmojmë se asnjë delegacion qeveritar izraelit nuk do të ftohet të marrë pjesë në DSEI UK 2025”, tha ai.

“Duhet të ketë zgjidhje diplomatike për ta përfunduar këtë luftë tani, me armëpushim të menjëhershëm, kthimin e pengjeve dhe një rritje të ndihmës humanitare për popullin e Gazës”, shtoi ai.

Izraeli e cilësoi vendimin e Britanisë si “akt të pafat diskriminimi” dhe se “po fut konsiderata politike krejtësisht të papërshtatshme për një ekspozitë profesionale të industrisë së mbrojtjes”.

Panairi katërditor, i cili hapet më 9 shtator, mbledh delegacione shtetërore dhe kompani private që ekspozojnë pajisje dhe armë ushtarake në qendrën Excel të Londrës. Ky aktivitet zhvillohet çdo dy vjet.

DSEI organizohet nga një kompani private, Clarion Defence and Security, por me mbështetjen e Qeverisë dhe ushtrisë britanike./REL

Përfundimi i ndeshjes Dinamo City-Jagiellonia, e vlefshme për play off-in e Conference League, solli skena dhune jashtë fushës së blertë.

Disa tifozë shqiptarë penguan qarkullimin e tre autobusëve që transportonin tifozët polakë, duke i gjuajtur me sende të forta.

Ngjarja u regjistrua në aksin rrugor Qafë Kashar-Rinas, ku tifozët po shkonin drejt aeroportit.

Për këtë arsye, janë arrestuar tre persona, ndërsa janë proceduar në gjendje të lirë dy të tjerë.

“Specialistët për Hetimin e Krimeve të Komisariatit të Policisë Nr. 7, në bashkëpunim me shërbimet e Sektorit të Forcës së Posaçme “Shqiponja”, arrestuan në flagrancë shtetasit A. M., 32 vjeç, K. S., 29 vjeç dhe Sh. S., 30 vjeç, dhe referuan materialet në Prokurori ku nisi procedimi penal për 2 shtetas të mitur 17 vjeç”, njoftoi policia.

Kujtojmë se skenat e dhunës u regjistruan edhe jashtë stadiumit, ku disa tifozë shqiptarë sulmuan një tifoz polak, i cili disa orë përpara ndeshjes kishte përdhosur bustin e Heroit Kombëtar Gjergj Kastrioti Skënderbeu.

Sfida mes Dinamo City dhe Jagiellonia u mbyll me rezultatin e barabartë 1-1. Por skuadra shqiptare nuk mundi të kualifikohej në fazën e grupeve pasi polakët e fituan sfidën e parë më rezultatin e thellë 3-0.

Trajneri i Shqipërisë, Silvinjo foli në konferencë për listën e bërë publike, për dy ndeshjet e muajit shtator.

Tekniku kuqezi e cilësoi si shumë të rëndësishme ndeshjen ndaj Letonisë, ndërsa zbuloi edhe arsyen përse nuk ka ndryshime.

“Ne kemi bërë rreth 50% të rrugëtimit dhe kemi 4 ndeshje për të luajtur, po luftojmë kundër kohës. Është një ndeshje shumë e rëndësishme që e luajmë në shtëpi, do të përgatitemi mirë. Përsa i përket lojtarëve që mungojnë fola me Ismajlin, i cili ka bërë tashmë një transferim javët e fundit, ka një dëmtim të lehtë dhe duhet të jetë i qetë për të qenë në 100% e tij. Përsa i përket ndryshime në listën, një grup ndryshon kur një lojtar nuk ka se çfarë jep më në Kombëtare dhe kur kam bindjen që është ashtu, ndryshe nuk ka pse të ndryshojë asgjë në grup, unë kam besim te të gjithë lojtarët. Nëse marr një shenjë që një lojtar nuk do të stërvitet, atëherë do të jetë jashtë. Nuk është momenti për të eksperimentuar, sepse kemi ndeshje të fortë përpara dhe kemi bërë eksperimente gjatë këtyre dy viteve, fokusi është për të fituar.

Do të ketë ndryshime për Letoninë, kemi lojtarë si Bajrami, Berisha dhe Pajaziti që kanë luajtur me U21 por skanë bërë 45 minuta me Kombëtaren tonë. Kemi lojtarë të mirë që sju ka ardhur ende momenti i duhur. Letonia është ekip i fortë, e dimë që është ndeshje e vështirë, e kemi parë ndeshjen e kaluar dhe mund të ketë ndryshime në këtë rast, përsa i përket Nedim Bajramit dhe Ernest Muçit të dy kanë bërë rrugëtime me Kombëtaren shqiptare. Bajrami bëri një Europian të shkëlqyer ndoshta nuk është në momentin e tij më të mirë, Muçi ka pasur një dëmtim të vogël por dje luajti 45 minuta dhe kemi folur me të. Janë lojtarë që përgjigjen nëfushë për Kombëtaren, kemi besim te këta dy lojtarë”, tha Silvinjo.

Katër muaj pas përfundimit të zgjedhjeve të 11 majit, e ngarkuara me punë e SHBA-ve në Tiranë, Nancy VanHorn, vizitoi paraditen e së premtes kryeministrinë. Ajo qëndroi rreth 20 minuta në godinën qeveritare.

Vizita e diplomates amerikane vjen një ditë pas shpalljes së rezultatit përfundimtar të zgjedhjeve nga Komisioni Rregullator, i cili certifikoi rezultatin e 11 majit.

Gjithashtu, vizita përkon me pritshmëritë për shpalljen e kabinetit të ri qeveritar nga kryeministri Rama.

Ndërkohë më 11 shtator pritet të mbahet Asambleja e PS-së, ku do të zyrtarizohen emrat e qeverisë së re./tvklan

Trajneri i Kombëtares shqiptare, Silvinjo, ka shpallur listën e lojtarëve të grumbulluar për dy ndeshjet e muajit shtator, miqësoren ndaj Gjibraltarit dhe sfidën kualifikuese të Kupës së Botës kundër Letonisë.

Tekniku kuqezi ka thirrur 25 futbollistë.

Lista e plotë:

Portierë: Thomas Strakosha, Elhan Kastrati, Mario Dajsinani

Mbrojtës: Elseid Hysaj, Ivan Balliu, Mario Mitaj, Naser Aliji, Marash Kumbulla, Adrian Bajrami, Berat Gjimshiti, Arlind Ajeti

Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Ernest Muçi, Jasir Asani

Sulmues: Armando Broja, Myrto Uzuni, Rey Manaj, Mirlind Daku

Grumbullimi i Kombëtares do të nisë të hënën, më 1 shtator, në Malaga, ku kuqezinjtë do të përgatiten për ndeshjen miqësore ndaj Gjibraltarit, e cila do të luhet më 4 shtator në stadiumin “Europa Point”, në orën 18:00.

Më pas, më 5 shtator, Kombëtarja do të rikthehet në Tiranë për të vijuar përgatitjet në kuadër të ndeshjes kualifikuese ndaj Letonisë, që do të zhvillohet më 9 shtator, në stadiumin “Air Albania”, në orën 20:45.

Njoftimi i plotë:

Vijojnë operacionet e njëpasnjëshme nga Drejtoria e Forcës së Posaçme Operacionale në DPPSh, për kapjen e shtetasve në kërkim.

Finalizohet operacioni policor i koduar “Operacionalja 64”.

Lokalizohen, kapen dhe vihen në pranga 2 shtetas të kërkuar (vëllezër), të dënuar nga autoritetet italiane, me 7 dhe 5 vjet burgim, për pjesëmarrje në organizate kriminale që trafikonte lëndë narkotike.

Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, strukturat e Drejtorisë së Forcës së Posaçme Operacionale në Departamentin e Policisë Kriminale në DPPSh, bazuar në informacionet e siguruara për vendndodhjen e dy shtetasve të shpallur në kërkim ndërkombëtar, organizuan dhe finalizuan operacionin policor të koduar “Operacionalja 64”.

Në kuadër të operacionit, u bë e mundur kapja dhe arrestimi me qëllim ekstradimin në Itali, i shtetasve të shpallur në kërkim ndërkombëtar:

Roland Metushi, 47 vjeç, dhe Saimir Metushi, 45 vjeç (vëllezër), të dy banues në Divjakë.

Gjykata e Novarës, Itali, në muajin tetor 2024, e ka dënuar shtetasin Saimir Metushi, me 7 vjet burgim, ndërsa shtetasin Roland Metushi, me 5 vjet burgim, për veprat penale “Organizata kriminale” dhe “Trafikimi i lëndëve narkotike”.

Materialet procedurale mbi arrestimin provizor të këtyre shtetasve, me qëllim ekstradimin e tyre në Itali, u referuan në Prokurorinë pranë Gjykatës së Shkallës Parë të Juridiksionit të Përgjithshëm Fier.

Interpolit Tirana, në bashkëpunim me Interpol Romën, vijon procedurat për ekstradimin e këtyre shtetasve, në Itali.

Ministrat e Mbrojtjes dhe të Jashtme të Bashkimit Evropian do të bisedojnë për vazhdimin e mbështetjes për Ukrainën, si dhe për gjendjen e rënduar në Rripin e Gazës gjatë dy ditëve të bisedimeve në Kopenhagë, të cilat nisin të premten.

Takimi zhvillohet një ditë pasi Rusia e bombardoi kryeqytetin e Ukrainës, Kiev, duke i vrarë të paktën 21 njerëz, përfshirë fëmijë, dhe duke plagosur të paktën 48 të tjerë.

Ministrat e Mbrojtjes të BE-së do t’i hapin bisedimet të premten mbi mënyrat për ta rritur mbështetjen ushtarake për Kievin dhe për ta rritur bashkëpunimin e bllokut me industrinë e mbrojtjes së Ukrainës, duke pasur parasysh kufizimet e Shteteve të Bashkuara në mbështetjen me armë.

Bisedimet e ministrave të Jashtëm të shtunën do të përqendrohen në planet për sanksione të mëtejshme ndaj Rusisë, me synim që të ushtrohet trysni mbi presidentin e Rusisë, Vladimir Putin, për ta pranuar një armëpushim dhe për t’u angazhuar në bisedime për paqe.

Kohët e fundit BE-ja ka vënë në shënjestër të ashtuquajturën “flotë në hije” të Moskës, anije të përdorura për të shmangur kufizimet e eksportit të energjisë, si dhe të ardhurat energjetike të saj.

Gjithashtu pritet të diskutohet për garanci të mundshme sigurie për Ukrainën pas përfundimit të luftës, si edhe për mënyrën e trajtimit të aseteve të ngrira të bankës qendrore ruse në BE, që arrijnë shumën prej rreth 210 miliardë euro.

Ministrat e Jashtëm të Ukrainës, Islandës, Norvegjisë dhe Mbretërisë së Bashkuar janë ftuar në Kopenhagë për t’u bashkuar me homologët e tyre të BE-së.

Edhe lufta në Gazë në rend dite
Edhe lufta në Gaza është pjesë e rendit të ditës të shtunën.

BE-ja është e ndarë për mënyrën se si duhet të përgjigjet ndaj një raporti të brendshëm, i cili gjeti se veprimet e Izraelit në këtë territor të shkatërruar bien ndesh me marrëveshjen BE-Izrael që i detyron të dyja palët t’i respektojnë të drejtat e njeriut.

Derisa disa vende të BE-së, përfshirë Francën dhe Spanjën, e mbështesin një qëndrim më të ashpër ndaj Izraelit, të tjera si Gjermania janë kundër sanksioneve.

Lufta në Gazë nisi më 7 tetor 2023, kur Hamasi vrau 1.200 njerëz në jug të Izraelit dhe mori rreth 250 pengje, sipas shifrave izraelite. SHBA dhe BE e kanë shpallur Hamasin organizatë terroriste.

Prej atëherë, më shumë se 62.122 palestinezë janë vrarë gjatë luftës së Izraelit, sipas Ministrisë së Shëndetësisë në Gazë, e cila është pjesë e qeverisjes së Hamasit dhe e përbërë nga profesionistë mjekësorë.

Përveç këtij bilanci, 154 të rritur kanë vdekur nga shkaqe të lidhura me kequshqyerjen nga fundi i qershorit, kur Ministria nisi t’i llogariste këto raste, dhe 112 fëmijë kanë vdekur nga kequshqyerja që prej fillimit të luftës.

Shtetet e Bashkuara, Katari dhe Egjipti po përpiqen të ndërmjetësojnë për t’i dhënë fund konfliktit./REL

Autori i dyshuar i vrasjes së një 61-vjeçari në Shkodër është vetëdorëzuar në polici orët e para të mëngjesit. Bëhet fjalë për një 58-vjeçar me iniciale N.M.

Ai akuzohet për vrasje me dashje dhe armëmbajtje pa leje. Sipas njoftimit të policisë, dyshohet se 58-vjeçari e vrau 61-vjeçarin P.P pas një konflikti për motive të dobëta.

“Dyshohet se vrau me armë zjarri pistoletë, 61-vjeçarin, për motive të dobëta, arrestohet 58-vjeçari, i cili u vetëdorëzua disa orë pas ngjarjes, bashkë me armën e krimit. Specialistët e Sektorit për Hetimin e Krimeve ndaj Personit vunë në pranga shtetasin N. M., 58 vjeç, për veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”, njofton policia.

Ngjarja e rëndë ndodhi në fshatin Abat të Shalës. Policia gjeti në vendin e krimit dy gëzhoja pistoletë dhe dy mjete prerëse.

Ministrat e Mbrojtjes dhe të Jashtëm të BE takohen në Kopenhagen. Çfarë është e gatshme të ofrojë Evropa për të mbrojtur Ukrainën?

Këto javë janë periudhë ulje-ngritjesh për evropianët. Njëherë ata lihen mënjanë dhe as nuk merren në konsideratë, kur Presidenti i SHBA-së, Donald Trump negocion me kreun e Kremlinit, Vladimir Putin. Pastaj befas ata vendosen në qendër të vëmendjes, sepse marrëveshja e supozuar duhet të mbështetet ushtarakisht, domethënë, të ofrojnë garanci sigurie për Ukrainën: Madje edhe me trupa tokësore të vendosura jo shumë larg fushave të betejës ukrainase e kryesisht pa mbështetjen e SHBA-së. Trump mund të përfytyrojë vetë të ofrojë pak mbështetje nga ajri, si u tha, pavarësisht se është e paqartë, ç’do të thotë kjo në rast krize.

Që pas samiteve në Alaska dhe Uashington dhjetë ditë më parë po spekulohet rreth garancive të sigurisë pë Ukrainën, edhe pse armëpushimi që evropianët supozohet të garantojnë deri më tani nuk është arritur. E madje as që duket në horizont. Megjithatë, ministrat e Mbrojtjes dhe të Jashtëm të BE do të duhet të adresojnë këtë çështje mjaft delikate në takimin e tyre në Kopenhagen (29.08.) .

Kallas kërkon garanci “të besueshme dhe të fuqishme”

Ka disa ide, si duhet të jenë garanci të tilla sigurie. Ato duhet të jenë “të besueshme dhe të fuqishme”, kërkoi shefja e Politikës së Jashtme të BE-së, Kaja Kallas para takimit ministror në Kopenhagen. Paqeruajtësit perëndimorë duhet të jenë “të aftë të mbrojnë veten”. Vetë Komisionerja e BE-së, Kallas nuk ka trupa të BE dhe është e lirë nga presioni i marrjes së përgjegjësisë në rast emergjence. Situata ndryshon për ministrat e Mbrojtjes. Ka mjaft në ministritë e tyre që pyesin veten se si duhet të jetë vetëmbrojtja evropiane kur në anën tjetër ke një fuqi bërthamore.

Ekziston konsensus brenda BE, se mbështetja amerikane ka tepër rëndësi, qoftë edhe vetëm për hir të parandalimit bërthamor. Franca dhe Britania e Madhe janë dy vendet që kanë shkuar më larg në lidhje madje edhe me vendosjen e ushtarëve të tyre në tokën ukrainase. Por edhe Emmanuel Macron dhe Keir Starmer gjithmonë i kanë kushtëzuar angazhime të tilla me përfshirjen amerikane.

Cila është strategjia e Trump?

Kjo përfshirje nuk dihet. Madje edhe njohës të mirë të Uashingtonit zyrtar, pyesin secilat interesa ndjek Donald Trump në Ukrainë.

Çfarë po përpiqet të arrijë Donald Trump me samitet dhe telefonatat e tij kryesisht të papërgatitura? Kjo nuk kuptohet qartë. Njëherë ai e akuzon Ukrainën se në thelb është agresore pse zgjat lufta më shumë se tre vjet e gjysmë. Herë tjetër shpall Presidentin rus Vladimir Putin si problem, si dikush që përhap “mashtrime” dhe bën diçka krejtësisht të ndryshme nga ajo që sapo kishte premtuar në telefonatë.

Por strategjia e Trump është thelbësore për evropianët dhe vlerësimin e rreziqeve për Evropën. Thomas Kleine-Brockhoff, drejtor i Këshillit Gjerman për Marrëdhëniet me Jashtë (DGAP) është i mendimit, se “interesi i Trump në luftën e Ukrainës është riorganizimi i rendit botëror”. Presidenti amerikan po kërkon afrim me Rusinë me qëllimin e një rendi të madh fuqish “në të cilin lojtarët e mëdhenj vendosin dhe lojtarët e vegjël duhet të nënshtrohen”, u shpreh ai për ARD/Bruksel. Për Kleine-Brockhoff kjo shpjegon edhe pse zgjidhjet e propozuara nga vetë Trump janë shpesh në kurriz të Ukrainës. Një fund i shpejtë i luftës është përparësia e tij, “në mënyrë që ai të mund ta vendosë këtë rend me Putinin dhe Xi Jinping”.

Si të mbrohet Ukraina e nga do të vijnë paratë?

Edhe më urgjente se debati rreth mekanizmave mbrojtës pas armëpushimit – ende relativisht teorik – është pyetja shumë konkrete në Kopenhagen: si mund ta mbrojnë më mirë evropianët Ukrainën që tani. Forcimi i ushtrisë ukrainase konsiderohet si garancia më e rëndësishme e sigurisë për vendin – të paktën për momentin, dhe për sa kohë që Putini nuk tregon shenja të reduktimit të sulmeve ushtarake ndaj pozicioneve ushtarake dhe popullsisë civile.

“Tani është bërë mjaftueshëm e qartë se Putini po luan me kohën”, shpjegon drejtori i Institutit DGAP, Kleine-Brockhoff. Prandaj, evropianët duhet t’ia bllokojnë planet Putinit. Kjo përfshin ndërtimin e kapaciteteve të industrisë së mbrojtjes ukrainase dhe bashkëpunimin në mbrojtje, por edhe burime të reja financimi – për shembull, pyetja se “si mund të përdoren asetet ruse në mënyrë më efektive se sot”. Kjo pritet të diskutohet të shtunën, kur të mbërrijnë edhe ministrat e Jashtëm në Kopenhagë. Disa prej tyre duan të konfiskojnë asetet ruse të investuara në Evropë dhe t’i përdorin ato për të mbështetur Ukrainën.

Deri më tani, investimet ruse, të vlerësuara në mbi 200 miliardë euro, vetëm sa janë ngrirë. Evropianët po i tërheqin interesat e këtyre aseteve dhe po i kanalizojnë ato në ndihmë të Ukrainës. Megjithatë, disa kryeqytete evropiane, përfshirë Berlinin, janë të shqetësuar për hapat e mëtejshëm, për shkak të humbjes së besueshmërisë. Edhe shtete të tjera autoritare në Evropë mund të bëhen skeptike dhe të tërheqin asetet e tyre. Janë disa vende që duan ta parandalojnë këtë. Që kjo temë diskutohet në Kopenhagen lidhet me interesimin e kryediplomates, Kaja Kallas, po nëse do të ketë progres nuk dihet./dw