Presidenti i SHBA-së, Donald Trump, ka shprehur besimin e tij se takimi tripalësh i drejtuar prej tij që përfshin edhe presidentin ukrainas Volodymyr Zelensky dhe liderin rus Vladimir Putin ka gjasa të zhvillohet.

Trump e bëri këtë deklaratë bëri gjatë një interviste me Daily Caller.

“Një takim dypalësh nuk jam i sigurt, por një takim trilateral do të ndodhë. Por, e dini, ndonjëherë njerëzit nuk janë gati për të. Do përdor një analogji. E kam përdorur disa herë. Ke një fëmijë, ndërkohë ka edhe një fëmijë tjetër në shesh lojërash, dhe ata e urrejnë njëri-tjetrin, dhe fillojnë të godasin, godasin dhe godasin, dhe ti dëshiron t’i ndalosh, por ata vazhdojnë. Pas pak, ata janë shumë të lumtur të ndalen. E kuptoni? Është pothuajse kështu. Ndonjëherë duhet të luftojnë pak para se të mund t’i ndalosh. Por kjo ka zgjatur shumë kohë. Shumë njerëz kanë vdekur” tha Trump.

Gjithashtu, presidenti amerikan përsëriti gatishmërinë e tij për të ndihmuar në përfundimin e luftës.

“Ata duan që lufta të zgjidhet, por nëse mund t’i ndihmojmë, do të isha i gatshëm ta bëja këtë. Po flasim për shumë jetë. Nuk po flasim për diçka që e pata filluar unë. E kam trashëguar këtë luftë. Dhe gjithçka që po përpiqem të bëj është të fik flakën. Mendova se e kisha zgjidhur. E bëra këtë shtatë herë me të tjerët, me luftëra që ishin më të vështira se kjo. Pra, tre nga ato luftëra kanë vazhduar për më shumë se 30 vjet, dhe unë i përfundova të gjitha. Kjo luftë është, ka qenë një luftë shumë e vështirë”, shtoi ai.

Më herët, Andriy Yermak, kreu i Zyrës së Presidentit të Ukrainës, deklaroi se Trump është i vetmi lider botëror i aftë për të detyruar Rusinë të ulet në tryezën e negociatave.

The post Trump: Takimi tripalësh, mes meje, Putinit dhe Zelenksyt ka gjasa të zhvillohet first appeared on JavaNews.al.

Sinoptikania Anira Gjoni në një intervistë për ABC News ka dhënë një parashikim të detajuar për stuhinë që Shqipërinë këtë të shtunë. Sipas saj, stuhia do të arrijë kulmin gjatë natës, nga ora 22:00 deri në orën 3:00 të mëngjesit, dhe reshjet do të jenë më të forta në disa zona të vendit.

Anira Gjoni tha se reshjet do të intensifikohen gjatë natës dhe do të vazhdojnë deri të nesërmen, ndërkohë që pasditja e ditës së diel do të sjellë një pushim të përkohshëm.

Ajo sqaroi se reshjet e shiut pritet të vazhdojnë deri të mërkurën e ardhshme, por me një intensitet më të ulët pas ditës së martë.

Për shkak të reshjeve të shumta, sinoptikania ka paralajmëruar se në zonat malore të të gjitha qarqeve mund të ketë probleme serioze, si rrëshqitje dherash dhe mundësi për përmbytje të vogla. Po ashtu, qytetet e mëdha si Lezha, Durrësi dhe Tirana pritet të përjetojnë një përkeqësim të ndjeshëm të motit, me erë të fortë dhe reshje intensive, të cilat do të ndikojnë në trafikun dhe jetën e përditshme.

“Në zonat malore në të gjitha qarqet shfaqen problematika, të rrëshqitjeve të dherave. Kurse në qytetet si Lezha, Durrësi dhe Tirana pritet që të kenë një përkeqësim të motit. Presim që të kemi pushimin e reshjeve gjatë paradites së ditës së nesërme. Stuhia do të jetë nga ora 22:00 e darkë deri rreth orës 3:00 të mëngjesit. Por, kjo varet në zona të ndryshme, me orë të ndryshme. Reshjet pritet që të vazhdojnë gjatë natës, dhe deri mëngjesin e ditës së nesërme. Në ditën e hënë dhe të martë pritet që të ketë reshje shiu, deri nga dita e mërkurë, por kjo me intensitet të ulët”, tha meteorologia.

The post “Reshjet do të vijojnë edhe gjatë natës”, meteorologia: Durrësi, Lezha dhe Tirana do kenë një përkeqësim të motit first appeared on JavaNews.al.

Përmasat e pakontrolluara të turizmit të seksit në Shqipëri kanë nxitur reagimin e shoqërisë civile, të cilët mendojnë se penalizimi i mëtejshëm i punës së seksit, sipas Kodit Penal në fuqi, nuk e zgjidh problemin, por e shtyn atë drejt më shumë rreziqeve, si dhunë, shfrytëzim dhe shëndet publik të cenuar nga sëmundjet seksualisht të transmetueshme.

Sipas drejtueses së Shoqatës së Personave të Prekur nga HIV/Aids, Olimbi Hoxhaj, dekriminalizimi do të sillte më shumë përfitime.

“Legalizimi i punës së seksit duhet parë me shumë vëmendje nga ministritë. Është bërë një përpjekje shumë vite më parë për ta dekriminalizuar punën e seksit, por ajo që ndodhi ishte se kur u çua në Gjykatën Kushtetuese, jo vetëm nuk u dekriminalizua, por u penalizuan edhe ata që merrnin shërbimin. Nëse flasim për një situatë me përmasa të tilla të turizmit seksual në vend, duhet ta legalizojmë punën e seksit në Shqipëri. Pse? Sepse:

1. E kemi të kontrolluar;
2. E dimë kush e ushtron atë sepse janë të certifikuar;
3. Ruhet shëndeti publik i popullatës nga përhapja e SST-ve;
4. Shteti merr pjesën e tij nga taksimi i këtij shërbimi.

Kështu nuk do të kemi më vatra të përhapjes së sëmundjeve seksualisht të transmetueshme, por do kemi vende ku njerëzit, për nevojat e tyre, për frustrime emocionale e nevoja biologjike, do të gjejnë partnere. Kështu shëndeti i popullatës është i siguruar,” shprehet znj. Hoxhaj.

Diskutimet për Kodin e Ri Penal shihen nga shoqëria civile si një moment i rëndësishëm që institucionet të marrin në konsideratë tregun ilegal të seksit në Shqipëri, i cili tashmë po synohet edhe nga të huajat. Kjo me qëllim kontrollimin dhe mbrojtjen e atyre që përfshihen në këtë treg,  sidomos kur nuk është një zgjedhje e lirë, por një rrugë mbijetese.

“Jemi në një moment deciziv, sepse është duke u diskutuar drafti i ri i Kodit Penal që të bëhen dëgjesa me OJF-të për të arritur një dakordësi, që ne të mendojmë seriozisht për legalizimin e punës së seksit në Shqipëri,” thekson ajo.

Vendet që e kanë dekriminalizuar, thotë znj. Hoxhaj, kanë parë përmirësim në treguesit e shëndetit publik, sigurinë e ofruesve të shërbimit dhe mbrojtjen nga trafikimi i qenieve njerëzore.

Shoqëria civile propozon një qasje që nuk ndëshkon trupin e gruas apo të individit, por të fokusohet tek shfrytëzuesit, trafikantët dhe ata që ushtrojnë dhunë.

Deklarata e plotë e drejtueses së Shoqatës së Personave të Prekur nga HIV/AIDS, znj. Olimbi  Hoxhaj

Diskutimet mbi Draftin e Kodit te ri Penal e shohim si një moment shumë të rëndësishëm dhe si shoqëri civile, e kemi ndjekur me vëmendje këtë proces. Mendojmë se penalizimi i mëtejshëm i punës së seksit nuk e zgjidh problemin, përkundrazi, e shtyn edhe më thellë në hije, rrit rreziqet për dhunë, shfrytëzim dhe  rritje të infeksioneve ST dhe e bën më të vështirë aksesin ne kujdes shëndetësor apo ndihmë juridike.

Dekriminalizimi i punës se seksit është një hap i domosdoshëm. Jo për ta promovuar, por për ta rregulluar, kontrolluar dhe mbrojtur ata që përfshihen në të, sidomos kur nuk është një zgjedhje e lirë, por një rrugë mbijetese. Vendet që e kanë dekriminalizuar, kanë parë përmirësim në treguesit e shëndetin publik, sigurinë e ofruesve të shërbimit dhe mbrojtjen nga trafikimi i qenieve njerëzore.

Ne propozojmë një qasje që nuk ndëshkon trupin e gruas apo të individit, por fokusohet në shfrytëzuesit, tek trafikantët dhe ata që ushtrojnë dhunë. Dhe paralelisht, shteti duhet të ofrojë alternativa, punësim, arsim, strehim, mbështetje psikologjike, që askush të mos detyrohet të shesë trupin për të mbijetuar.

Ky është momenti për të reflektuar si shoqëri: a do t’i ndëshkojmë me tej njerëzit në nevojë, apo do t’i mbështesim që të dalin nga situata ku ndodhen?

The post Tregu i punës së seksit në Shqipëri, Hoxhaj: Të dekriminalizohet! Mbrohen viktimat dhe shëndeti publik first appeared on JavaNews.al.

Shtëpia e Bardhë ka reaguar ndaj deklaratave të presidentit francez Emmanuel Macron i cili tha se presidenti rus Vladimir Putin do të mashtronte presidentin amerikan Donald Trump nëse nuk angazhohet deri të hënën për bisedime me presidentin ukrainas Volodymyr Zelensky, për të diskutuar mbi përfundimin e luftës në Ukrainë.

“Nëse kjo nuk ndodh deri të hënën, afati i caktuar nga presidenti Trump, kjo do të thotë se presidenti Putin ka mashtruar sërish presidentin Trump,” tha Macron, duke iu referuar afatit të vendosur nga Trump për një takim dypalësh mes Putinit dhe Zelenskyt.

Në përgjigje të komenteve të Macron, Stephen Miller, zëvendësshefi i stafit të Trump, hodhi poshtë sugjerimin se Putin mund të mashtrojë presidentin amerikan.

I pyetur nga një gazetar jashtë Shtëpisë së Bardhë të premten, nëse deklarata e Macronit ishte e vërtetë, Miller u përgjigj: “Një pyetje absurde. Presidenti Trump ka arritur shtatë marrëveshje paqeje në shtatë muaj. Asnjë president në histori nuk ka bërë më shumë për të çuar përpara kauzën e paqes. Ai është nominuar nga disa liderë botërorë për Çmimin Nobel për Paqe.”

Miller shtoi se Trump “po punon me vendosmëri për të ndalur vrasjet në Ukrainë,” duke theksuar përpjekjet e presidentit për të ndërmjetësuar një zgjidhje.

Ndërkohë, presidenti ukrainas Volodymyr Zelensky rikujtoi afatin e Trump gjatë një deklarate të premten, duke vënë në dukje se Trump kishte dhënë një afat prej një deri në dy javë për Putinin për të rënë dakord për një takim dypalësh.

“Dy javë do të jenë të hënën. Dhe ne do t’ua rikujtojmë të gjithëve,” tha Zelensky, duke sinjalizuar gatishmërinë e tij për bisedime direkte me Putinin, por duke theksuar nevojën për garanci të forta sigurie për Ukrainën.

Zelensky ka qenë i vendosur se çdo marrëveshje paqeje duhet të respektojë integritetin territorial të Ukrainës dhe të përfshijë garanci sigurie të ngjashme me ato të Nenit 5 të NATO-s.

Macron, i cili ka qenë një mbështetës i fortë i Ukrainës që nga fillimi i pushtimit rus në shkurt 2022, shprehu dyshime për gatishmërinë e Putinit për të negociuar sinqerisht, duke e quajtur atë “një grabitqar në portat tona” në një intervistë të mëparshme për transmetuesin francez LCI.

The post ‘Putin e mashtron lehtësisht Trumpin’! Shtëpia e Bardhë reagon ndaj deklaratave të Macronit first appeared on JavaNews.al.

Stuhia e fortë dhe reshjet e dendura pushtuan Shqipërinë mesditën e së premtes, duke krijuar probleme në disa qytete.

Anulim fluturimesh, bllokim i lundrimit në det në të gjitha portet, pemë të thyera e rrugë të përmbytura, ky është bilanci paraprak i shkaktuar nga stuhia.

Në kryeqytet, era e fortë rrëzoi disa pemë në rrugë të ndryshme, duke krijuar kaos në trafik.

U dëmtuan disa automjete të parkuara në rrugë.

Në Farkë u rrëzua edhe një shtyllë elektrike, çka solli bllokimin e rrugës.

U shënuan gjithashtu dhjetëra raste plagosjesh dhe lëndimi të mbi 20 qytetarëve, nga xhamat e thyer apo objekte të rëna nga ballkonet. 4 prej tyre po marrin mjekim në Spitalin e Traumës në Tiranë.

Në Durrës, erërat e forta shkaktuan shkëputjen nga litarët lidhës me kalatën të tragetit të linjës Durrës–Bari, duke e spostuar atë.
Ndërhyrja në kohë shmangu përplasjen me kalatën dhe pas këtij momenti, trageti ka vijuar normalisht lundrimin drejt Barit.
U pezullua gjithashtu lundrimi i anijeve të vogla dhe i mjeteve të peshkimit, deri në përmirësimin e situatës.
Ndërsa në qytet, reshjet sollën sërish përmbytje.

Me përmbytje u përball edhe Vlora.
Në lagjen “4 Heronjtë” në Vlorë, bllokimi i tubacioneve ka shkaktuar përmbytje në disa banesa të zonës, duke dëmtuar rëndë orenditë shtëpiake. Uji ka shpërthyer nga rrugët dhe ka depërtuar brenda shtëpive, duke krijuar një situatë të vështirë për banorët.

Zona historike, lagjja Pavarësia, dhe ajo e emërtuar “Albano dhe Romina”, u pushtuan nga uji, duke bllokuar qarkullimin e mjeteve në të gjithë qytetin bregdetar, i cili duket i mësuar tashmë me situata të tilla.

Nuk i shpëtoi përmbytjeve as Lezha.

Në bulevardin “Gjergj Fishta” dhe bllokun e banimit “11 Janari” në lagjen Besëlidhja, niveli i ujit kaloi 30 centimetra, duke bllokuar hyrjet e pallateve dhe duke e bërë të vështirë lëvizjen e automjeteve dhe këmbësorëve.

Në disa zona, stuhia solli edhe ndërprerje të furnizimit me energji elektrike, mes tyre edhe zona turistike e Shëngjinit.

Moti i keq shkaktoi gjithashtu trafik të rënduar në aksin Lezhë–Shkodër, pasi shumë pushues u larguan nga Shëngjini dhe Velipoja.

Stuhia e fortë që përfshiu edhe Maqedoninë e Veriut detyroi një traget turistësh, që po udhëtonin në liqen nga Shën Naumi drejt Ohrit, të hynte në ujërat territoriale të Shqipërisë.

Edhe Lushnja nuk i shpëtoi pasojave të stuhisë.
Rrugët u përmbytën në qendër të qytetit dhe në zonën e gjimnazit “18 Tetori”.
Edhe pse në këto qytete u shënuan problemet më të mëdha, stuhia shkaktoi dëme pothuajse në të gjithë vendin.

Pemët e rrëzuara, të cilat ishin të djegura nga zjarret e viteve të kaluara, ranë mbi rrugën Fier–Cakran, në vendin e quajtur “Qafa e Shkozës”, duke bllokuar për disa minuta qarkullimin dhe duke e vështirësuar kalimin e automjeteve.

Stuhia dhe reshjet e dendura përfshinë Shqipërinë për disa orë, teksa situata u përmirësua pasditen e kësaj të shtune.

The post Vendi u godit për disa orë nga stuhia, zbulohet bilanci i dëmeve: Anulime fluturimesh, makina e shtylla të dëmtuara… first appeared on JavaNews.al.

Policia italiane ka vënë në pranga dy shqiptarë, të cilët u kapën me 15 kilogram kokainë. Mediat italiane raportojnë se përveç drogës dy shqiptarëve ju gjetën edhe 100 mijë euro cash.

Mediat raportojnë se dy të arrestuarit në Peruxhia janë të moshës 36 dhe 25 vjeç. Operacioni filloi në fshatin Sant’Enea, teksa hetuesit dyshojnë për aktivitet trafiku mes Toskanës dhe Umbrias.

Gjatë ndalimit, njëri u përpoq të arratisej, duke u përpjekur të hiqte qafe afërsisht dy kilogramë kokainë që mbante me vete, por u ndalua nga policia.

Tjetri, gjithashtu i arrestuar, po fshihte afërsisht 70,000 euro në para të gatshme në pjesën e poshtme të rreme të makinës së tij dhe në çantën e shpinës. Gjatë kontrolleve u gjetën më shumë drogë dhe para të gatshme.

Kokaina ishte e paketuar me natriban të ngjyrave të ndryshme, që dyshohet se simbolizonin porositësit. Disa prej tyre kishin edhe stampa përsipër.

Në shtëpinë e njërit, gjithashtu në Sant’Enea, shumë pranë vendit të shitjes, u gjetën edhe dy kilogramë të tjerë kokainë, materiale paketimi dhe 7500 euro. Megjithatë, pjesa më e madhe e drogës ishte në shtëpinë e tjetrit në Castelnuovo Berardenga, në provincën e Sienës.

Oficerët gjetën 10 kilogramë të tjerë drogë dhe 16,000 euro. Dy trafikantët janë tani në burg në dispozicion të autoriteteve gjyqësore, informon media italiane.

Hetimet janë duke u zhvilluar për të zbuluar rrjetin e kontakteve dhe bashkëpunëtorëve brenda organizatës, që të dy duhet të kenë pasur pas tyre për të drejtuar një operacion trafikimi droge të kësaj shkalle, pasi vlera e drogës së kapur e kalon vlerën e 1 mln eurove në tregun e pakicës.

The post U kapën me 15 kg kokainë dhe 100 mijë euro, dy shqiptarë të prangosur në Peruxhia first appeared on JavaNews.al.

Frekuentim i festave familjare shoqërohen po ashtu me konsum më të lartë të alkoolit, i cili shpesh bëhet burim aksidentesh deri në fatalitete.

Shefi i shërbimit të toksikologjisë, Andrin Tahiri në një intervistë për Vizion Plus tregon disa nga efektet negative të alkoolit dhe pasojat e tij përtej shëndetit .

“Alkooli është një nga dukuritë sociale më të përhapura sot, një sëmundje sociale që karakterizohet nga pirja me tepricë e alkoolit, i cili sjellë efekte toksike në sistemin nervor qëndror. Ngasja e mjeteve të motorizuara në një situatë. Ulet vëmendja, përqëndrimi, pamundësi për të vlerësuar situatën më shpejtë. Si ndodh hap pas hapi? Këndi i shikimit ngushtohet, shikimi periferik dëmtohet, ka një diskordancë në perceptimin e distancave dhe objekteve, pra përkeqësohet shikimi”, tha Tahiri.

Jo të pakta janë rastet kur të rinjtë e kombinojnë alkoolin me substancat narkotike, duke e bërë rrezikun edhe më të madh për shëndetin dhe jetën e tyre, e po ashtu edhe për të tjerët.

“Sidomos tek të rinjtë alkooli, kokteilet e alkoolit si dhe përzierja me substancat narkotike që janë tejet mase të rrezikshme, sidomos tek të rinjtë sot, alkooli është më shumë perceptim si gjendje, pa llogaritur pasojat për jetën e përditshme që në pjesën më të madhe mund të shkojnë edhe deri në fatalitete”, u shpreh mjeku.

Mjeku Tahiri jep edhe një mesazh për të gjithë të rinjtë dhe drejtuesit e mjeteve: “Stop alkoolit në mënyrë kategorike, edhe nëse për të rinjtë është një festë apo një party, është e thjeshtë, të lënë mjetet e autorizuara diku dhe të marrin taksi ose të shoqërohen nga ata që nuk konsumojmë alkool. Është një zgjidhje 100% e sigurt.”

Pak ditë më parë, dy motra humbën jetën tragjikisht në një aksident automobilistik, kjo pasi drejtuesi i mjetit ishte në gjendje të rëndë të dehur në momentin e përplasjes.

The post Alkooli shkak për aksidentet, mjekët: Shoferët në gjendje të dehur humbasin përqendrimin first appeared on JavaNews.al.

Një shqiptar i moshës 35-vjeçare është arrestuar në shtetin italian i akuzuar për dhunë të rëndë në familje.

Shqiptari, identiteti i të cilit nuk është bërë me dije për mediat, dhunonte sistematikisht të dashurën e tij 23-vjeçare. Sulmi më i rëndë është ai i 20 korrikut kur shqiptari e goditi në mënyrë brutale me bishtin e një fshese.

Si pasojë e sulmit ajo pësoi thyerje të hundës dhe lëndime të tjera, me një prognozë prej të paktën 30 ditësh.

Masa e sigurisë “arrest me burg” u pa si e arsyeshme nga gjyqtari i çështjes për shkak të shkallës së seriozitetit të ngjarjes dhe mundësive të përshkallëzimit të sulmeve fizike. Sakaq, 35-vjeçari shqiptar nuk ishte i pajisur me leje qëndrimi në shtetin italian.

The post I theu hundën të dashurës me bishtin e fshesës, arrestohet shqiptari në Itali first appeared on JavaNews.al.

Dy persona kanë humbur jetën në një aksident ajror që ndodhi mes komunave Crescentino e Livorno Ferraris në Itali.

Viktimat janë babë e bijë, të cilët humbën jetën pas rrëzimit të një avioni të vogël me të cilin ata po udhëtonin.

Avioni raportohet të ketë rënë me shpejtësi të lartë në tokë dhe më pas ka shpërthyer në flakë.

Në vendngjarje shkuan menjëherë zjarrfikësit dhe efektivët e policisë që po hetojnë për shkaqet e këtij aksidentit të rëndë.

The post Rrëzohet një avion i vogël në Itali, ndërrojnë jetë piloti dhe e bija first appeared on JavaNews.al.

Me certifikim e rezultatit final të zgjedhjeve parlamentare të 11 majit nis numërimi mbrapsht për partitë politike për të depozituar pranë Komisionit Qendror të Zgjedhjeve deklarimin e shpenzimeve në fushatë.

Interesi më i madh është të paratë e shpenzuara nga socialistët dhe demokratët, si dy forcat kryesore politike në vend.

Mes parave të shpenzuara nga demokratët janë edhe ato për lobistin Chirs LaCivita, për faturën e të cilit Sali Berisha gjithmonë është treguar i rezervuar për të treguar se sa para i dha magjistarit elektoral që nuk e riktheu në pushtet. Por, mesa duket fatura do të vijojë të jetë mister edhe për pak kohë.

“Ju garantoj se ajo kontratë, me të gjitha burimet se ku është marrë çdo qindarkë, do bëhet publike ditën që do përmbushet detyrimi ligjor i dorëzimit të saj në KQZ, siç na detyron ligji”, shprehej Berisha.

Sali Berisha ka afat deri në fund të muajit tetor, pasi deklarimi duhet të bëhet 60 ditë pas miratimit të rezultatit përfundimtar të zgjedhjeve, por krahas shpenzimeve të partive, janë edhe ato të kandidatëve për deputet disa prej të cilëve e kanë ezauruar këtë procedurë duke i treguar KQZ-së se xhepat e tyre.

Në analizën financiare të deklarimeve të kandidatëve të listës së Partisë Socialistë rezulton që mes emrave me më shumë para të shpenzuara është Olsi Komiçi ish komisioneri i Vettingut të gjyqtarëve dhe prokuroreve, nga shtatori deputet i Elbasanit. Ai pranon se ka shpenzuar mbi 25 mijë euro në fushatë.

Kandidatja më e votuar e qarkut Elbasan Sara Mila ka deklaruar 9 mijë euro, ndërsa Vlora rezulton të jetë qarku ku socialistët që garonin në listë të hapur, janë investuar më shumë me burime financiare. Ardit Bido raporton rreth 20 mijë euro, ndërsa Damianin Gjiknurin 10 mijë euro. Ministri i Drejtësisë si drejtues politik i Lezhës, ka shpenzuar vetëm 3 mijë euro.

Në radhët e demokratëve më shumë para rezulton të ketë hedhur për fushatë Gjin Gjoni, në total 10 mijë euro, pasuar nga Belind Këlliçi, i cili ndonëse në listë të sigurt, nuk është treguar i kursyer në fushatë pasi rezulton që të ketë shpenzuar rreth 8 mijë euro, pjesën më të madhe e ka donacion. Më modest në shifra janë treguar Jozefia Topalli dhe Agron Gjekmarkaj, me 1 mijë e 500 euro.

Sali Berisha deklaron zero shpenzime pasi për të ka hapur thesin partia, njëjtë si Edi Paloka e Flamur Noka, ndërsa në kampin rozë mes emrave me zero para figurojnë Endrit Brahimllari dhe Zegjine Çaushi. Për Edi Ramën nuk ka ende asnjë dokument të pasqyruar. Në fund të afatit ligjor, të gjitha paratë e deklaruara do të jenë objekt auditimi nga ana e Komisioni Qendror te Zgjedhjeve, ku në rast mospërputhje shifrash, kandidatët por edhe partia do të përballen me gjoba.

The post Nisin deklarimet e shpenzimeve të fushatës, PD vijon të heshtë për faturën e La Civitas first appeared on JavaNews.al.

Të dhënat e fundit të INSTAT-it tregojnë një ngadalësim të ndjeshëm për sa i përket hyrjes së shtetasve të huaj përgjatë vitit 2025 krahasuar me një vit më parë.

Gjatë periudhës janar–korrik, Shqipërinë e kanë vizituar mbi 6,5 milionë shtetas të huaj, me një rritje 3,5% me bazë vjetore nga 23% në vitin 2024. Ndikimin më të madh në rënien e turizmit e ka pasur Kosova me 121 mijë shtetas më pak.

“… nuk janë shumë optimiste në qoftë se ne bazën e zhvillimit ekonomik, të rritjes ekonomike të Shqipërisë përgjatë 2025-ës e kishim bazuar kryesisht te turizmi,” thotë eksperti i ekonomisë, Klodian Muço.

“Ky stanjacion, pra, fakti që nuk kemi një rritje të fortë dyshifrore si në vitet e kaluara duhet të na bëjë të mendohemi se çfarë nuk shkon te turizmi ynë,” shton kolegu i tij, Fatos Çoçoli.

Sipas ekspertëve të ekonomisë, disa nga faktorët e këtij fenomeni janë mungesa e infrastrukturës dhe çmimet e larta.

“Janë problematika që përmenden ndër vite në Shqipëri: aspekti i mungesës së infrastrukturës, e cila vazhdon të lërë për të dëshiruar; mbeturinat vazhdojnë akoma të digjen në mënyrë spartane,” shprehet z. Muço.

“Është e pafalshme që çmimet mesatarisht të këtij sezoni turistik veror, sidomos në Jug, të jenë rritur me 12–20 për qind. Duhet ta shikojmë politikën tonë të çmimeve. Ajo po na i mban larg të huajt që na vijnë për të na vizituar,” thekson eksperti Çoçoli.

Por a mund të bënte më shumë qeveria në këtë sektor?

“Kam përshtypjen që këtu nuk është faji i qeverisë. Qeveria mund ta formalizojë sektorin. Sektori i turizmit është sektor që vuan nga një informalitet relativisht i lartë. Për pjesën që abuzohet me çmimet apo me shërbimin nuk është faji i qeverisë,” thotë z. Muço.

Edhe për muajin korrik, shifrat kanë qenë jopremtuese, me një rritje prej 0,3% krahasuar me të njëjtin muaj të një viti më parë.

The post Ndikimi i çmimeve të larta në turizëm, ekspertët: Sektori qëndroi në stanjacion për disa faktorë first appeared on JavaNews.al.

Reshjet e dendura të shiut kanë bërë që shumë pushues të largohen nga plazhet e Velipojës dhe Shëngjinit. Si pasojë, prej më shumë se dy orësh është krijuar trafik i rënduar në akset kryesore Shkodër–Lezhë dhe Lezhë–Milot.

Qarkullimi është vështirësuar gjithashtu edhe në rrugët dytësore, ndërsa dalja nga Shëngjini mbetet problem për drejtuesit e automjeteve.

Në akset kryesore dhe kryqëzime janë vendosur punonjës policie për të menaxhuar situatën.

The post Reshjet e shiut sjellin trafik të renduar në aksin Shkodër – Lezhë first appeared on JavaNews.al.

Pas informacionit të marrë nga komandanti i Shën Naumit, të Maqedonisë së Veriut, se një parashutist ishte ngritur në fluturim dhe, si pasojë e erës së fortë, kishte devijuar fluturimin dhe mund të kishte rënë në fshatin Alarup, Pogradec, menjëherë shërbimet e Drejtorisë Vendore të Kufirit dhe Migracionit Korçë kanë shkuar në adresën e dhënë.

Ata kanë bërë të mundur lokalizimin e tij dhe kanë marrë kontakt me sportistin, shtetasin V. P., i cili ishte në gjendje shumë të mirë shëndetësore.

Nga ana e shërbimeve të DVKM Korçë, është bërë e mundur dërgimi i këtij shtetasi në PKK Tushemisht, i cili ka kaluar për në Maqedoninë e Veriut.

Sportisti falënderoi shërbimet e Policisë për reagimin e menjëhershëm dhe profesionalizmin e treguar.

The post Parashutisti maqedonas u ngrit në fluturim në Shën Nuam, por era e fortë e çoi në Tushemisht! first appeared on JavaNews.al.

Pavarësisht nëse vera jote ka qenë plot me shpenzime ose jo, sezonit po i vjen fundi dhe ekuinoksi i vjeshtës po afron për të sjellë një fillim të ri. Astrologjia e shtatorit premton pak kaos, pasi dy eklipset radhazi mund të tronditin situatën në karrierë, financa e më gjerë. Por gjithashtu priten edhe surpriza të këndshme dhe horoskopi financiar i muajit do t’ju japë një parashikim të energjisë kozmike që po vjen drejt llogarisë tënde bankare.

Sezoni i Virgjëreshës zgjat për tre javët e para të shtatorit dhe është një kohë e shkëlqyer për të qenë kursimtarë dhe më të kujdesshëm me shpenzimet teksa mbyllet vera. Kjo bëhet edhe më e theksuar me hyrjen e Mërkurit në Virgjëreshë më 2 Shtator. Qoftë duke planifikuar në mënyrë profesionale apo duke vënë rregull në financa, kjo atmosferë analitike është ideale për të hyrë në detaje. Rreth datës 7 Shtator, një eklips hënor te Peshqit mund të mjegullojë logjikën por gjithashtu të sjellë fat, dëgjoni zemrën.

Më 13 Shtator, një moment i qartë me Mërkurin është ideal për ide të reja praktike dhe fitimprurëse. Shkruajini idetë që të mos harrohen. Eklipsi diellor më 21 Shtator mund të zbulojë disa të vërteta të fshehura, ndaj përballuni me realitetin. Më pas, Marsi kalon në Akrepin strategjik më 22 Shtator, duke sjellë një energji planifikuese në vend të impulsivitetit.

Drejtësia dhe barazpesha bëhen temat kyçe në gjysmën e dytë të muajit, pasi Mërkuri hyn në Peshoren paqësore më 18 Shtator. Koha është e përshtatshme për marrëveshje dhe bashkëpunime. Sezoni i Peshores nis më 22 Shtator dhe sjell fokus te ekuilibri, qoftë në jetën personale apo në llogaritë bankare. Kjo është gjithashtu dita e ekuinoksit të vjeshtës, një mundësi për të filluar një faqe të re.

Parashikimi për secilën shenjë:

Dashi

Virgjëresha të ndihmon të përqendrohesh në punë dhe të organizohesh. Por eklipsi më 7 Shtator të kujton të ruash ekuilibrin punë-jetë. Eklipsi diellor më 21 shtator të jep një goditje nga realiteti, ndoshta është koha për të ndryshuar rutinën ose mënyrën si e mat produktivitetin.

Demi

Marsi në zonën e produktivitetit tënd deri më 22 shtator të jep një shtysë për të përfunduar detyra dhe për të arritur objektivat. Një projekt pasioni mund të kthehet fitimprurës në mes të muajit. Pas ekuinoksit, fokusi kalon te balanca.

Binjakët

Po reflekton mbi mësimet e karrierës dhe po i integron ato në një qasje më të pjekur. Eklipsi më 7 shtator mund të sjellë përfitime financiare. Pas 22 Shtatorit, rritet produktiviteti, bëhu gati të godasësh me listën tënde të detyrave.

Gaforrja

Afërdita në zonën tënde të parave deri më 19 shtator sjell bollëk. Investo në gjërat që të sjellin vlerë. Mund të jetë moment i mirë për përmirësime në shtëpi. Pas ekuinoksit, pasioni për projekte të vjetra mund të rizgjohet.

Luani

Virgjëresha ndriçon sektorin tënd financiar, duke të shtyrë të bësh llogaritë. Mes muajit mund të shfaqen ide për të shtuar të ardhurat. Eklipsi më 21 shtator është mundësi për të krijuar një buxhet realist dhe për t’iu përmbajtur atij.

Virgjëresha

Marsi në sektorin tënd financiar të shtyn drejt të ardhurave të reja. Nëse kërkon rritje page, mesi i muajit është momenti i duhur. Pas 22 shtatorit, bëhesh më strategjik/e me planifikimin dhe balancimin e buxhetit.

Peshorja

Marsi në shenjën tënde të jep energji për të ndjekur qëllimet. Eklipsi më 7 Shtator mund të ndryshojë rutinën dhe të të nxisë drejt një ekuilibri më të shëndetshëm. Pasi sezoni yt nis më 22 shtator, je gati për plane konkrete financiare.

Akrepi

Afërdita në sektorin tënd të karrierës të ndihmon të fitosh përmes sharmit tënd dhe lidhjeve të shumta. Pas 22 shtatorit, bëhesh më ambicioz/e, por mbaj parasysh: vepro me strategji, jo në mënyrë impulsive.

Shigjetari

Virgjëresha të ndihmon të organizohesh në punë dhe të ndërtosh plane për të ardhmen. Mesi i muajit sjell ide të reja. Pas eklipsit më 21 shtator, mund të dalin mundësi të papritura për karrierë, qëndro gati!

Bricjapi

Mos prit që rastet e mira të vijnë vetë, merr nisma. Apliko për punë të reja ose kërko rritje rroge. Pas 22 shtatorit, njohjet e shumta bëhen çelësi i suksesit, lidhu me njerëz që mund të të ndihmojnë të ecësh përpara.

Ujori

Po mëson shumë për financat dhe shtatori është muaj reflektimi. Zbato ato që ke mësuar. Eklipsi më 7 Shtator të ndihmon të shohësh të vërtetën për gjendjen tënde financiare. Pas 22 shtatorit, do të fitosh besim për të vepruar në karrierë.

Peshqit

Puna bëhet më e lehtë kur përfshin kënaqësi e bukuri në rutinë. Zbukurimet e vogla ndikojnë pozitivisht në produktivitetin tënd. Pas mesit të muajit, bashkëpunimet profesionale kanë potencial, eklipsi më 21 Shtator mund të sjellë surpriza të papritura. Bëhu i/e guximshëm/e.

The post Horoskopi për muajin Shtator 2025: Puna, dashuria dhe financat sipas yjeve first appeared on JavaNews.al.

Një aksident rrugor me pasojë plagosjen e një kalimtari është regjistruar pasditen e së shtunës në zonën e Repsit, në aksin e Rrugës së Kombit.

Sipas të dhënave nga policia, aksidenti ka ndodhur pranë Repsit, kur mjeti i drejtuar nga N.A. ka përplasur këmbësorin A.N. i cili ishte duke kaluar rrugën.

I plagosuri ka marrë dëmtime të shumta dhe për këtë arsye është dërguar me urgjencë në spitalin e Traumës në Tiranë.

Ndërkohë që policia ka shoqëruar drejtuesin e mjetit të përfshirë në aksident dhe po punon për zbardhjen e shkaqeve.

The post Aksident në Rrugën e Kombit, makina përplas këmbësorin, detajet e para first appeared on JavaNews.al.

Gjatë vizitës në SHBA nga 27 deri më 29 gusht, zv/Ministri i Tregtisë i Kinës dhe përfaqësuesi për negociatat tregtare Li Chenggang shkëmbeu mendime me zyrtarë të Departamentit të Thesarit, të Departamentit të Tregtisë dhe Zyrës së Përfaqësuesve Tregtarë të ShBA-së për marrëdhëniet dypalëshe ekonomiko-tregtare.

Sipas një deklarate të bërë nga Ministria Kineze e Tregtisë, të dy palët shkëmbyen mendime për zbatimin e konsensusit të arritur midis dy liderëve kinezë dhe amerikanë gjatë bisedës telefonike më 5 qershor, promovimin e marrëdhënieve dypalëshe ekonomiko-tregtare dhe vazhdimin e bisedimeve pasuese dypalëshe ekonomiko-tregtare.

Li Chenggang theksoi se të dyja palët duhet ta shfrytëzojnë plotësisht mekanizmin e konsultimeve ekonomiko-tregtare Kinë-SHBA, të menaxhojnë mosmarrëveshjet përmes dialogut dhe konsultimeve të barabarta dhe të zgjerojnë bashkëpunimin për të promovuar zhvillimin e shëndetshëm, të qëndrueshëm dhe të vazhdueshëm të marrëdhënieve dypalëshe ekonomiko-tregtare.

The post Kina dhe SHBA shkëmbejnë mendime mbi çështjet tregtare first appeared on JavaNews.al.

Stuhia e shoqëruar me reshje shiu ka përfshirë juglindjen e vendit, duke shkaktuar probleme në qytetin e Maliqit.

Era e fortë ka rrëzuar disa pemë përgjatë bulevardit kryesor, duke krijuar vështirësi në qarkullim.

Në terren ndodhen forcat zjarrfikëse dhe punonjës të shërbimeve, të cilët po punojnë për pastrimin e rrugës dhe normalizimin e situatës.

Autoritetet u bëjnë apel qytetarëve për kujdes gjatë lëvizjes, për shkak të motit të paqëndrueshëm.

The post Moti me reshje shiu në jug-lindje të vendit, shkaktohen dëme në Maliq first appeared on JavaNews.al.

Ministri i Drejtësisë, Ulsi Manja, është futur në mes të replikave Edi Rama dhe KLGJ-së, vetëm një ditë pasi kjo e fundit mori në mbrojtje gjyqtarët e vendit pas postimeve krikuese të kryeministrit.

Manja, përmes një postimi në rrjete sociale, e nis fillimisht duke thënë se “Nga padrejtësia nuk lind e drejta: beteja për territorin dhe Shqipërinë europiane!”

“Nga padrejtësia nuk lind e drejta: beteja për territorin dhe Shqipërinë europiane!

Që në momentin kur nisi prishja e ndërtimeve pa leje në Theth, shumëkush mendoi se kjo ishte një tekë vere e Edi Ramës. Një lojë politike, një manovër për të tërhequr vëmendjen e publikut nga temat e ditës apo aktualiteti politik.
Por koha po tregon, dhe do të tregojë deri në fund, se nuk është as kështu e as ashtu. Kjo është një betejë vizioni. Një betejë që lidhet drejtpërdrejt me horizontin e Shqipërisë 2030 në Bashkimin Europian.

Sepse është fare e thjeshtë. Dhe këtë më mirë se kushdo e dinë shqiptarët që jetojnë e punojnë prej dekadash në vendet e BE-së: në Europë nuk hyhet me ndërtime pa leje, me kioska dhe tenda metalike që zaptojnë hapësirën publike, që bllokojnë hyrjet e pallateve, me qoftehane mbi trotuarë, me tarraca pallatesh të kthyer në bahçe apo pemtore të paligjshme, me ndërtues që shesin tre herë të njëjtin apartament, me kasapë që therin bagëti pas dyqanit në mes të qytetit, me varreza makinash, me karburante të braktisura buzë çdo rruge kombëtare, me plehra që hidhen sa andej e këtej në çdo cep të Shqipërisë, pa pyetur fare për ndotje mjedisi apo prishje imazhi turizmi. Shkurt, në BE nuk shkohet me shtet rrumpallë, por me shtet rregullash, institucione të përgjegjshme dhe sundim ligji.

Prandaj të gjithë ata “vajtues publikë” që përpiqen ta paraqesin këtë operacion si një konflikt personal mes kryeministrit dhe qytetarëve, mes qeverisë dhe drejtësisë, apo si hakmarrje politike ndaj individëve e bizneseve, nuk bëjnë gjë tjetër veçse helmojnë publikun. Në fakt, ata janë tregtarët e paligjshmërisë, që duan të mbajnë gjallë kaosin, sepse vetëm aty gjejnë oksigjenin e tyre politik dhe ekonomik. E vërteta është krejt tjetër: në territor sot po ndeshen dy palë dhe vetëm dy — interesi publik dhe paligjshmëria e kthyer në mentalitet.

Në këtë betejë, Edi Rama ka mandat popullor për të qenë në krahun e së mirës së përbashkët. Dhe në këtë betejë ai i ka ftuar të gjithë: prokurorinë, gjyqësorin, çdo qytetar që beson se nuk ka Shqipëri europiane mbi themelet e kaosit. Ai nuk po sulmon askënd; përkundrazi, po i thërret të gjithë në luftë kundër paligjshmërisë. Sepse një ndërtim pa leje është i paligjshëm edhe në pronën tënde, jo më në tokën e përbashkët apo në pronën e tjetrit.

Si mundet, pra, që dikush që ngrihet në krah të ligjit të akuzohet si intimidues? Si mund të quhet cenim i drejtësisë kur thua thjesht: mos na pengoni të pastrojmë vendin nga ndërtimet pa leje dhe nga çdolloj paligjshmërie tjetër?
Që nga Roma e lashtë kemi trashëguar një postulat të hekurt: “Ex iniuria ius non oritur” – nga padrejtësia nuk lind e drejta. Dhe ky është thelbi: një gjë e paligjshme, një pronë e grabitur, një ndërtim pa leje, nuk mund të bëhet kurrë e ligjshme, kurrë jotja.

Prandaj, nëse ka përplasje sot, ajo nuk është Rama kundër drejtësisë, as Rama kundër qytetarëve, por e mira kundër së keqes. Dhe në këtë betejë, mandati i katërt është zotimi për të vendosur kontroll mbi territorin me çdo mjet ligjor, për t’i dhënë fund kaosit dhe ndotjes — jo vetëm në hapësirat publike, por edhe në mentalitetin e atyre që ende mendojnë se janë mbi ligjin.

Është e thjeshtë krejt! Dhe sot, më shumë se kurrë, kjo nuk është vetëm beteja e qeverisë. Është beteja e çdo qytetari që do të jetojë në një vend normal, në një Shqipëri të qytetëruar, të barabartë me Europën. Kush mbron paligjshmërinë, mbron prapambetjen. Kush ngrihet për ligjin, ngrihet për të ardhmen. Shqipëria e 2030 nuk ndërtohet mbi rrumpallë, por mbi drejtësi, rregulla dhe respekt të interesit publik.“, shkruan Manja në rrjete sociale.

The post Replikat mes Ramës dhe gjyqësorit, reagon Manja: Shumëkush e mendoi si një tekë vere, por është betejë për… first appeared on JavaNews.al.

Pasojat e stuhisë që përfshiu ditën e sotme vendin tonë, kanë lënë pa energji elektrike zonën e Gjirit të Lalzit, Hamallaj, Manzës dhe Xhafzotajt.

Mësohet se shkak për këtë është bërë dëmtimi i linjës kryesore të furnizimit me energji 110 KË në Durrës.

Mësohet se ekipet e OSHEE ndodhen në terren dhe po punojnë për normalizimin e situatës.

The post Stuhia le pa drita Gjirin e Lalzit, Hamallajn dhe Xhafzotajn first appeared on JavaNews.al.

“Nëse kërcënohemi, nuk do të hezitojmë të përgjigjemi”. Kështu ka deklaruar ministri i Jashtëm turk, Hakan Fidan, në një intervistë televizive, duke folur për kërcënimin që, sipas Ankarasë, vjen nga “çmenduria e Hitlerit” që ka prekur qeverinë e shtetit të Izraelit, politikat e së cilit rrezikojnë stabilitetin e të gjithë rajonit.

“Nuk kemi ndërmend të sulmojmë askënd, përveç nëse do të kërcënohemi. Në atë rast nuk do të tërhiqemi dhe përgjigja jonë nuk do të vonojë”, tha Fidan. “Mesazhi ynë është i qartë dhe i drejtohet të gjithëve: mos u tregoni armiqësorë ndaj nesh dhe ne nuk do të jemi armiqësorë ndaj jush. Por nëse dikush guxon të na kërcënojë, do të përballet me pasojat”, theksoi ministri i Jashtëm turk.

Reagimi vjen një ditë pasi Fidan njoftoi se Ankaraja ka ndërprerë të gjitha lidhjet tregtare me Izraelin, ka ndaluar anijet turke të ankorohen në portet izraelite dhe ka mbyllur hapësirën ajrore për avionët izraelitë.

Ministri i Jashtëm turk e bëri këtë deklaratë gjatë një seance të jashtëzakonshme të parlamentit turk të thirrur për situatën në Gaza.

“Turqia ka ndërprerë çdo formë tregtie me Izraelin, anijet tona nuk do të ndalen më në portet izraelite dhe asnjë avion izraelit nuk do të mund të përdorë hapësirën ajrore turke”, tha Fidan, duke ritheksuar se vendimi vinte si përgjigje ndaj ofensivës së Izraelit në Rripin e Gazës.

Ky është një hap tjetër i ashpër në marrëdhëniet mes dy vendeve, pas vendimeve të mëparshme të qeverisë turke për të kufizuar lidhjet diplomatike e ekonomike me Izraelin.

Kujtojmë se në maj 2024, Turqia ndërpreu të gjitha lidhjet tregtare me Izraelin, duke ndaluar eksportet dhe importet, përfshirë produkte kyçe si çelik, çimento dhe aviacion. Ky hap erdhi pas refuzimit të Izraelit për të lejuar Turqinë të dërgojë ndihma humanitare në Gaza. Presidenti turk, Recep Tayyip Erdoğan, e akuzoi Izraelin për “krime kundër njerëzimit”.

Tanimë, Turqia ndodhet në një pozicion kritik në Lindjen e Mesme, pasi po përballet edhe me sfida të tjera rajonale, përfshirë tensionet me Iranin dhe përpjekjet për të ndërmjetësuar në konflikte të tjera.

The post Turqia paralajmëron Izraelin: Nëse kërcënohemi do të përgjigjemi! first appeared on JavaNews.al.