Gazeta Si – Një 47-vjeçar shqiptar me origjinë nga Gjirokastra u u gjet i vdekur në zonën e Agios Panteleimonas të hënën në mbrëmje në Athinë.

Mediat greke raportojnë se viktima është identifikuar si Artur Bashimi, person me precedentë penalë për vjedhje, i cili u gjet i shtrirë përtokë me një plagë të shkaktuar nga arma e zjarrit në kokë.

Forca të shumta policie dhe një mjek ligjor kanë shkuar me shpejtësi në vendngjarje, ndërsa po zhvillohen hetime për rrethanat e vrasjes.

Artur Bashimi rezulton i arrestuar në shkurt 2022 si pjesë e një grupi kriminal që kryente vjedhje në mjetet e transportit publik. Ai është arrestuar sërish më pas në prill 2024, po si pjesëtar i një grupi kriminal që kryente vjedhje në Greqi.

Artur Bashimi rezulton të jetë vëllai i 38-vjecarit Marsel Bashimi alias Marsel Shkurtaj alias Marsel Gozhita, person me precedentë të rëndë penalë në Greqi e Shqipëri.

Marsel Bashimi në korrik 2022 u arrestua bashkë me Bledar Jambellin dhe Kristaq Lecin, si autorë të një ngjarjeje të rëndë me përdorim armësh në Greqi. Jambelli e Leci akuzohen në Shqipëri si porositës dhe organizatorë të vrasjes së komisar Artan Cukut në Tiranë para disa vitesh.

The post Ekzekutohet me një plumb në kokë 47-vjeçari shqiptar në mes të Athinës appeared first on Gazeta Si.

Gazeta Si – Presidenti amerikan Donald Trump ka pritur në Shtëpinë e Bardhë liderët evropianë dhe të NATO-s, menjëherë pas përfundimit të takimit të tij me presidentin ukrainas Volodymyr Zelenski.

Trump shpjegoi objektivat e bisedimeve të tij me udhëheqësit evropianë, duke thënë se ata do të diskutonin “kush do të bëjë çfarë”, si pjesë e garancive të sigurisë për Ukrainën dhe “shkëmbimeve të mundshme të territorit” për t’i dhënë fund luftës.

“Presidenti Putin ra dakord që Rusia do të pranonte garanci sigurie për Ukrainën. Dhe kjo është një nga pikat kyçe që duhet ta shqyrtojmë dhe do ta shqyrtojmë këtë në tryezën e bisedimeve. Jam optimist se së bashku mund të arrijmë një marrëveshje që do të pengonte çdo agresion të ardhshëm kundër Ukrainës, dhe në fakt mendoj se nuk do të ketë”, deklaroi Trump.

Kancelari gjerman Friedrich Merz në tryezën e përbashkët me liderët europianë, kreun e NATO-s dhe presidentët Donald Trump dhe Volodymyr Zelensky ka kërkuar një armëpushim sa më shpejt të jetë e mundur për konfliktin në Ukrainë.

“Për të qenë i sinqertë, të gjithë do të donim të shihnim një armëpushim, më të fundit nga takimi i ardhshëm e tutje”, i tha ai Trumpit. Merz shtoi se “nuk mund ta imagjinojë” që takimi trepalësh të zhvillohet “pa armëpushim”.

Ai i kërkon Trump të ushtrojë presion mbi Rusinë që të bjerë dakord për diçka të tillë. “Do të shohim se si do të funksionojë kjo dhe nëse mund ta bëjmë këtë”, iu përgjigj Trump, por presidenti amerikan theksoi sërish se gjashtë luftërat që ai pretendon se i ka zgjidhur përfunduan pa armëpushime.

Më pas, në diskutim u përfshi presidenti francez Emmanuel Macron. Ai tha se diskutimet për garancitë e sigurisë kanë të bëjnë me “të gjithë sigurinë e kontinentit evropian”.

Ai i bëri jehonë komenteve të Merz se një armëpushim është “i domosdoshëm” dhe thotë se të gjithë udhëheqësit “e mbështesin këtë ide”.

“Garancitë e sigurisë do të përfshinin një ushtri të fortë ukrainase për vitet dhe dekadat që do të vijnë, dhe një angazhim nga të gjithë ata që janë rreth tryezës për të ndërtuar sigurinë”, theksoi Macron.

Kryeministri i Mbretërisë së Bashkuar, Keir Starmer, në takimin në Shtëpinë e Bardhë u tha udhëheqësve të tjerë se ai mendon se ata mund të bëjnë “përparim të vërtetë” për t’i dhënë fund luftës në Ukrainë, veçanërisht në garancitë e sigurisë. Ai tha se një takim trepalësh është një “hap i arsyeshëm i radhës”. Me atë takim të mundshëm dhe garancitë e sigurisë, do të ishte një hap “historik” përpara, thotë ai.

Sekretari i Përgjithshëm i NATO-s, Mark Rutte, tha se oferta e presidentit të SHBA-së, Donald Trump, për garanci sigurie për Ukrainën përbën një “përparim” në sigurimin e një marrëveshjeje të mundshme paqeje për Ukrainën.

“Fakti që keni thënë: ‘Jam i gatshëm të marr pjesë në garancitë e sigurisë’ është një hap i madh, është vërtet një përparim dhe bën gjithë ndryshimin. Prandaj, faleminderit edhe për këtë”, i tha Rutte – Trumpit.

Ursula von der Leyen, presidentja e Komisionit Evropian, gjatë fjalës së saj nga takimi i udhëheqësve evropianë me Zelenskyn dhe Trumpin në Shtëpinë e Bardhë tha se fëmijët duhet që të jenë përparësi në këtë luftë.”‘Dua ta falënderoj Trumpin që foli edhe për fëmijët, të cilët janë një përparësi”, tha ajo.

Kryeministrja italiane, Giorgia Meloni gjatë takimit të saj me Donald Trump, Volodymyr Zelensky dhe udhëheqës të tjerë në Shtëpinë e Bardhë tha se duhet që të arrihet një marrveshje paqeje.

“Nëse duam të garantojmë paqen, duhet ta bëjmë së bashku, të bashkuar. Mund të mbështeteni te Italia dhe ne jemi në anën e Ukrainës dhe do të mbështesim të gjitha përpjekjet e saj drejt paqes. Kjo është një ditë e rëndësishme”, tha ajo.

Presidenti i Finlandës, Alexander Stubb, e nisi fjalën e tij me një batutë drejtuar Donald Trump për “rininë”, pasi lideri amerikan e kishte përshkruar Stubb-in si të ri dhe të fuqishëm, gjë që ai me humor tha se do t’ia tregonte gruas së tij.

Stubb vijoi duke thënë: “Mendoj se në dy javët e fundit, ndoshta kemi bërë më shumë përparim drejt përfundimit të kësaj lufte sesa në tre vitet e gjysmë të fundit.”

Ai shpjegoi edhe arsyen pse po merr pjesë në takim si përfaqësues i Finlandës, pasi vendi i tij ndan një kufi prej 800 miljesh me Rusinë.

“Ne, sigurisht, kemi përvojën tonë historike me Rusinë… dhe nëse shohim anën pozitive të asaj ku ndodhemi tani, ne gjetëm një zgjidhje në vitin 1944, dhe jam i sigurt se do të arrijmë një zgjidhje në vitin 2025 për t’i dhënë fund luftës së agresionit të Rusisë dhe për të arritur një paqe të qëndrueshme dhe të drejtë. Situata është shumë e vështirë, por për këtë arsye jemi këtu”, – shtoi Stubb.

The post Samiti / Liderët europianë i kërkojnë Trumpit armëpushim dhe garanci sigurie për Ukrainën appeared first on Gazeta Si.

Gazeta Si – Një 59-vjeçar ka humbur jetën sapo ka dalë nga një klinikë dentare në qytetin e Bilishtit. Sipas policisë, 55-vjeçari ka shkuar në klinikë për të bërë një mbushje dhëmbi dhe pasi ka mbaruar, duke dalë nga klinika është rrëzuar në tokë.

Policia e Devollit thotë se ka shoqëruar në komisariat dentistin 36-vjeçar, ndërsa pritet të dalë ekspertiza mjeko-ligjore për sqarimin e vdekjes së 59-vjeçarit.

“Rreth orës 18:10, në rrugë është marrë dhe është transportuar nga urgjenca e spitalit, pa shenja jete dhe pa shenja dhune, shtetasi Sh. D., 59 vjeç, banues në Progër. 59-vjeçari, rreth orës 17:00, ka qenë për mjekim dentar, në një klinikë ku është trajtuar nga dentisti, shtetasi B. L., 36 vjeç. Nga shërbimet e Komisariatit të Policisë Devoll është shoqëruar 36-vjeçari, për t’u pyetur në lidhje me rastin”, – njofton policia.

Grupi hetimor, nën drejtimin e Prokurorisë, po punon për sqarimin e rrethanave dhe shkakut të humbjes së jetës së 59-vjeçarit.

The post Devoll, 59-vjeçari humb jetën sapo del nga klinika dentare appeared first on Gazeta Si.

Gazeta Si – Presidenti ukrainas Volodymyr Zelenski i dorëzoi presidentit të SHBA-ve, Donald Trump një letër nga Zonja e Parë e Ukrainës, Olenia Zelenska drejtuar Melania Trump.

Në nisje të takimit mes tyre në zyrën iovale të Shtëpisë së Bardhë, Zelensky falënderoi Trumpin për ftesën e tij dhe për “përpjekjet e tij personale” për të ndaluar luftën.

Ai gjithashtu falënderon Zonjën e Parë të SHBA-së, Melania Trump, për shkrimin e një letre drejtuar Vladimir Putinit në lidhje me fëmijët ukrainas që Rusia ka rrëmbyer.

Ai i dorëzon Trumpit një letër nga Olena Zelenska, zonja e parë e Ukrainës.

“Gruaja ime, Zonja e Parë e Ukrainës, ajo më dha një letër. Nuk është për ty, por për gruan tënde”, tha ai, duke shkaktuar të qeshura në dhomë.

Ndërkohë një gazetar e pyet Trumpin rreth një letre nga Zonja e Parë e SHBA-së, Melania Trump, dhënë Putinit disa ditë më parë, e cila thuhet se i referohet gjendjes së vështirë të fëmijëve ukrainas që vuajnë nga lufta.

Dhe ai është pyetur nëse letra ishte e nevojshme sepse zonja e parë mendon se Putini është agresori në këtë luftë.

“Zonja e parë ndjeu shumë fuqishëm”, thotë Trump, duke thënë se ajo ka një “dashuri të madhe për fëmijët”, duke iu referuar djalit të tyre 19-vjeçar Barron Trump, dhe thotë se e urren “të shohë diçka të tillë të ndodhë”. Letra u prit shumë mirë nga Putini, thotë ai.

The post Zelenski i jep presidentit Trump letrën e bashkështortes së tij për Melanian appeared first on Gazeta Si.

Gazeta Si – Mes diskutimeve intensive mbi luftën dhe paqen, një moment i veçantë ndodhi në Zyrën Ovale, ndërsa zgjedhja e kostumit të zi nga presidenti ukrainas Volodymyr Zelenski u vu re nga një gazetar dhe presidenti Donald Trump.

Pavarësisht se lideri ukrainas kishte ndryshuar veshjen në krahasim me vizitën e fundit në Zyrën Ovale, ajo që ra në sy ishte mosmbajtja e një kravate, që shumë media e kanë cilësuar si një gjest relaksimi.

“Dukesh fantastik me atë kostum”, tha gazetari Brian Glenn i Real America’s Voice, i cili vuri në dyshim zgjedhjen e veshjes së Zelensky-t gjatë vizitës së tij në Shtëpinë e Bardhë në shkurt.

“Thashë të njëjtën gjë”, tha me zë të lartë Trump. “Je në të njëjtën situatë”, i tha Zelenski Glennit. “Unë ndryshova, ti jo”.

Veshja e Zelenskit u diskutua midis zyrtarëve amerikanë dhe ukrainas përpara bisedimeve të së hënës midis udhëheqësit ukrainas dhe Trump, tha një zyrtar evropian, me mirëkuptimin që Zelenski nuk duhet të mbërrijë i veshur me bluzën e tij të zakonshme të gjelbër ushtarake.

Trump ishte i pakënaqur kur Zelenski mbërriti në Shtëpinë e Bardhë në shkurt i veshur me uniformën e tij ushtarake, duke u tallur se ishte “veshur tërësisht”

The post Zelenski në Zyrën Ovale me kostum të zi (por pa kravatë). Një gjest relaksimi? appeared first on Gazeta Si.

Gazeta Si – Gjurmët e thashethemeve, dyshimeve dhe zbulimeve që rrethojnë çështjen “Jeffrey Epstein:, financierit pedofil që vdiq në burg më 10 gusht 2019, duket se nuk kanë fund.

Disa ende dyshojnë në vetëvrasjen e tij. Tani, ndërsa në Uashington qarkullojnë thashetheme se vendimi për të vendosur forcën policore të kryeqytetit nën kontrollin federal, është vetëm një përpjekje tjetër e Donald Trump për të larguar vëmendjen nga dosjet famëkeqe – aq sa edhe Dhoma e Përfaqësuesve thuhet se ka shtyrë pushimet e verës për të shmangur një votim për botimin e tyre – një gazetë tjetër, “National Enquirer”, një tabloid i njohur për historitë e tij sensacionale, ka zbuluar emrat e 22 personave të lidhur me sipërmarrësin që kanë vdekur në rrethana misterioze, duke nxitur më tej teoritë e konspiracionit që do të çonin në eliminimin e dëshmitarëve të mundshëm të tregtisë së ndyrë seksuale të financierit për të parandaluar që emrat e klientëve të tij të fuqishëm të dilnin në dritë.

“Shumë njerëz ishin të bllokuar dhe të ngatërruar në rrjetën e Epstein, dhe shumë prej këtyre njerëzve tani janë zhdukur, të vdekur”, tha hetuesi privat, Ed Opperman për “Enquirer”.

Njëri prej tyre është financieri Steven Hoffenberg, i cili i rrëfeu gazetarit të Enquirer, Doug Montero, ekzistencën e videove, të filmuara fshehurazi nga financieri dhe partnerja e tij, Ghislaine Maxwell, që tregojnë “burra të famshëm” që kanë marrëdhënie me vajza të mitura dhe që dyshohet se janë porositur nga “ndërmjetës të fuqishëm shantazhi” nga i ashtuquajturi, “Deep State”.

Hoffenberg, i cili vdiq në vitin 2022 në moshën 77 vjeç pasi vuajti 18 vjet burg për një skemë Ponzi prej 475 milionë dollarësh, dyshohet se i zbuloi FBI-së lidhjet e dyshuara të Epstein me Mossad-in, agjencinë e inteligjencës izraelite.

Lista e vdekjeve “të dyshimta” është e gjatë: ajo varion nga shoku i fundit i qelisë së Epstein, Efrain “Stone” Reyes, 51 vjeç, i cili vdiq nga COVID në nëntor 2020 menjëherë pasi foli me FBI-në, deri te tre akuzueset e tij më të shquara: Virginia Giuffre, e cila kreu vetëvrasje prillin e kaluar dhe Carolyn Andriano dhe Leigh Skye Patrick, të dyja vdiqën nga mbidoza.

Lista përfshin gjithashtu emrat e njerëzve që humbën jetën nga sëmundja, siç është Joe Recarey, detektivi i policisë së Palm Beach i cili udhëhoqi hetimin e Floridës që e nisi gjithçka, dhe ish-kamerieri i tij Alfredo Rodriguez, i cili vodhi librin e vogël të zi famëkeq të ish-shefit të tij dhe ofroi ta shiste te federalët.

Por përfshin edhe dy avokatët që mbrojtën Epstein në Florida: Kenneth Starr, i cili vdiq nga ndërlikimet e një operacioni në moshën 76 vjeç, dhe Roy Black, 80 vjeç, i cili ndërroi jetë muajin e kaluar.

Ghislaine Maxwell, e dënuar me 20 vjet burg në vitin 2022 për trafikim seksual dhe abuzim me fëmijë, është ende gjallë.

Më 1 gusht, ajo u transferua në mënyrë misterioze nga Florida në një burg në Bryan të Teksasit, ku siguria është në nivelin më të ulët.

Disa e panë këtë lëvizje si një shpërblim për bashkëpunimin e saj me FBI-në, ndërsa të tjerë e panë si një mënyrë për ta bërë atë të prekshme. “Ajo ka një shënjestër pas shpine!” thuhet se i tha “Enquirer” një burim nga burgu.

E vetmja gjë e sigurt është se do të dëgjojmë më shumë rreth dosjeve të Epstein në muajt në vijim, qoftë edhe vetëm për shkak të hetimit nga Komiteti Mbikëqyrës i Dhomës së Përfaqësuesve, i cili i ka urdhëruar Departamentit të Drejtësisë t’i publikojë Kongresit deri të martën e ardhshme të gjitha dokumentet që ka në zotërim në lidhje me financuesin pedofil.

Në tetor, ligjvënësit do të dëgjojnë dëshmi me dyer të mbyllura nga ish-presidenti Bill Clinton, gruaja e tij Hillary Clinton, gjashtë ish-Prokurorë të Përgjithshëm dhe dy ish-drejtorë të FBI-së.

Epstein me siguri kishte kontakte të nivelit të lartë, siç dëshmohet nga fotografitë që ai mbante të ekspozuara në mënyrë të dukshme në ndërtesën e tij në Nju Jork: nga Mick Jagger te Elon Musk, nga Woody Allen te Princi Saudit Bin Salman.

Këta emra nuk janë domosdoshmërisht në listën e “klientëve” të financuesit, por megjithatë ato japin një masë se sa të ndjeshme mund të jenë dosjet në duart e hetuesve.

Përshtati: Gazeta “Si”

The post Çështja ‘Epstein’, mes dyshimeve dhe mistereve: Pas tij, një zinxhir prej 22 viktimash! appeared first on Gazeta Si.

Gazeta Si – Presidenti i Shteteve të Bashkuara, Donald Trump, zhvilloi këtë të hënë më 18 gusht, një takim me presidentin e Ukrainës, Volodymyr Zelenski, në Shtëpinë e Bardhë, ku të dy liderët u shprehën optimistë për arritjen e një marrëveshjeje paqeje që mund t’i japë fund luftës në Ukrainë.

Ndryshe nga takimi i shkurtit, Trump e priti Zelensky-n në një atmosferë miqësore, duke e përshëndetur me buzëqeshje dhe duke i vendosur dorën mbi supe.

Gjatë konferencës së përbashkët për mediat, presidenti amerikan konfirmoi se do të zhvillojë një telefonatë me presidentin rus Vladimir Putin menjëherë pas takimeve të ditës së sotme, duke shtuar se mund të organizohet një takim trepalësh SHBA-Ukrainë-Rusi.

Gjatë takimit, Trump tha se nuk e përjashton dërgimin e trupave amerikane në Ukrainë për të ndihmuar në ruajtjen e një marrëveshjeje të mundshme paqeje. “Do t’ju njoftojmë për këtë, ndoshta më vonë sot”, tha Trump.

Hapja e tij për të lejuar trupat amerikane në terren në Ukrainë mund të sjellë një ndryshim të madh, pasi Ukraina i konsideron garancitë e sigurisë si kritike për çdo marrëveshje përfundimtare paqeje me Rusinë.

Trump tha se Evropa do të marrë drejtimin në sigurimin e paqes, por se SHBA-ja do të jetë e përfshirë.

“Ata janë vija e parë e mbrojtjes, sepse janë atje, në Evropë. Por ne do t’i ndihmojmë. Gjithashtu, do të jemi të përfshirë”, tha ai.

Trump tha se nëse do të kishte një marrëveshje paqeje, ajo do të zbatohej. “Mendoj se nëse mund të arrijmë paqen, do të funksionojë. Nuk kam asnjë dyshim për këtë”, tha ai.

Trump shtoi se pavarësisht se si do të përfundojnë takimet e sotme me presidentin ukrainas Volodymyr Zelenski dhe udhëheqësit evropianë, mbështetja amerikane për Ukrainën do të mbetet. 

Një marrëveshje paqeje mund të arrihet ndërsa Ukraina dhe Rusia janë në luftë, sipas presidenti amerikan.

“Nuk mendoj se keni nevojë për një armëpushim. E dini, nëse shikoni gjashtë marrëveshjet që kam arritur këtë vit, të gjitha ishin në luftë, unë nuk bëra asnjë armëpushim. E di që mund të jetë mirë të ketë, por gjithashtu mund ta kuptoj, strategjikisht, pse një vend ose tjetri nuk do ta dëshironte atë”, deklaroi Trump gjatë takimit me Volodymyr Zelenskyn në Zyrën Ovale.

Më tej ai tha se i pëlqen “koncepti i një armëpushimi” sepse njerëzit do të ndalonin së vrari, por theksoi se “ne mund të punojmë për një marrëveshje paqeje ndërsa ata janë duke luftuar“. 

Mes një breshërie zërash nga gazetarët e pranishëm, njëri prej tyre i drejton Volodymyr Zelenskit një pyetje provokuese: nëse është i gatshëm të “dërgojë trupat ukrainase drejt vdekjes” apo të “rishikojë hartat” e vendit.

“Ne jetojmë çdo ditë nën sulme”, përgjigjet Zelenski, duke përmendur vdekjen e një fëmije së fundmi. “Duhet ta ndalim këtë luftë për të ndalur Rusinë, dhe kemi nevojë për mbështetjen e partnerëve amerikanë dhe evropianë. Do të bëjmë çfarë të mundemi për këtë. Po tregojmë se jemi një popull i fortë dhe mbështesim idenë e presidentit Trump për t’i dhënë fund kësaj lufte. Jemi gati për një takim trepalësh (me Putinin)”.

Pas takimitg me Zelenskin, Trump priti në një tryezë të përbashkët në Shtëpinë e Bardhë, shefin e NATO-s, Rutte, kryeministrin britanik Keir Starmer, presidentin francez Emmanuel Macron, kryeministren italiane Giorgia Meloni, kancelarin gjerman Friedrich Merz, presidenten e Komisionit Evropian, Ursula von der Leyen dhe presidentin finlandez, Alexander Stubb.

Donald Trump do t’i paraqesë udhëheqësit ukrainas një plan që diskutoi me presidentin Putin në Alaska të premten, duke propozuar që Ukraina të heqë dorë nga kontrolli i territorit në lindje të vendit, duke përfshirë zonat që nuk janë të pushtuara nga Rusia dhe të marrë garanci për sigurinë e ardhshme të Ukrainës në këmbim.

The post Trump pret Zelenskin në Shtëpinë e Bardhë: Dua paqe, jo armëpushim. Lideri ukrainas: Gati për një takim tripalësh appeared first on Gazeta Si.

Gazeta Si – Një 61-vjeçar shqiptar i identifikuar me iniciale N.M, pronar i kafenesë së njohur lokale “Maison Haute”, është qëlluar për vdekje të dielën në mbrëmje lagjen Itterbeek në Anderlecht të Belgjikës nga qiramarrësi i tij.

Sipas dëshmitarëve, në kafene u dëgjuan të paktën katër të shtëna. Autoritetet konfirmojnë se autori i dyshuar është arrestuar nga policia, ndërsa viktima, me origjinë shqiptare, u dërgua në spital, por nuk mundi t’u mbijetojë plagëve të marra.

Ngjarja ka shkaktuar tronditje të madhe në komunitet. Michèle, një banuese e lagjes dhe mike e ngushtë e shqiptarit, tregon me lot në sy: “Vetëm dje në mesditë pimë një gotë bashkë. Ishte njeri i mrekullueshëm, gjithmonë i gatshëm të ndihmonte. E kisha paralajmëruar një ditë që ky qiramarrës do të sillte telashe… dhe ja ku jemi sot.”

Zonja shton se shqiptari sapo ishte kthyer nga pushimet dhe nuk kishte asnjë konflikt të mëparshëm në lagje. Policia vendore ka izoluar zonën për hetime dhe ka përjashtuar për momentin lidhjen e ngjarjes me trafikun e drogës. Gjithçka dyshohet të ketë nisur pas një konflikti personal mes shqiptarit dhe qiramarrësit të tij.

The post Belgjikë, pronari shqiptar i një kafeneje vritet nga qiramarrësi i tij appeared first on Gazeta Si.

Gazeta Si – Hamasi ka pranuar propozimin më të fundit nga ndërmjetësit rajonalë për një marrëveshje armëpushimi dhe lirimi pengjesh me Izraelin.

Të paktën kështu ka raportuar rrjeti televiziv arab Al Jazeera këtë të hënë, më 18 gusht, duke iu referuar një burimi nga grupi i armatosur palestinez.

Propozimi i ardhur nga Egjipti dhe Katari është një plan gjithëpërfshirës me dy faza, i bazuar në një kornizë të paraqitur nga i dërguari amerikan, Steve Witkoff.

Plani parashikon që Hamasi të lirojë rreth gjysmën e 50 pengjeve izraelite që kanë mbetur, 20 prej të cilëve besohet se janë gjallë, në dy faza gjatë një armëpushimi të përkohshëm 60-ditor.

Gjatë kësaj kohe, do të zhvillohen negociata për një armëpushim të përhershëm dhe tërheqjen e trupave izraelite.

The post Al Jazeera: Hamasi pranon propozimin e ri për armëpushim në Gaza appeared first on Gazeta Si.

Gazeta Si – Në fillim të gushtit, Zyra Federale Gjermane e Statistikave njoftoi se në gjashtë muajt e parë të këtij viti, shitjet e birrës në Gjermani ishin më të ulëtat e regjistruara ndonjëherë që nga fillimi i përpilimit të këtyre të dhënave në vitin 1993.

Rënia krahasuar me të njëjtën periudhë në vitin 2024 ishte 6.3 përqind: një nga rëniet më të mëdha ndonjëherë, e krahasueshme me atë të parë në fillim të vitit 2020, kur epidemia e koronavirusit shkaktoi mbylljen e bareve dhe restoranteve.

Është gjithashtu një trend që ka qenë i vazhdueshëm në Gjermani për vite me radhë. Pavarësisht se është vendi i tretë më i madh që pi më shumë birrë në Bashkimin Evropian në raport me popullsinë e tij (pas Republikës Çeke dhe Austrisë), konsumi është ulur me afërsisht një të tretën në dekadat e fundit: në vitin 1994, në Gjermani u konsumuan 133 litra birrë për frymë, ndërsa në vitin 2024, u konsumuan vetëm 88 litra.

Gjermania është vendi kryesor në prodhimin e birrës në Evropë, me 1,500 fabrika birre. Megjithatë, nga viti 2020 deri në vitin 2024, çmimi i birrës u rrit me 22 përqind, kryesisht për shkak të kostove më të larta të energjisë (prodhimi i birrës është një aktivitet që kërkon shumë punë, që kërkon ngrohje dhe ftohje të sasive të mëdha të lëngut).

Inflacioni gjithashtu luan një rol, megjithëse në mënyra më pak të drejtpërdrejta: për shembull, njerëzit po hanë më rrallë në restorante dhe nëse e bëjnë këtë, shpesh përmbahen nga pirja e alkoolit, duke u përpjekur ta ulin disi faturën e tyre.

Një ndryshim më i gjerë kulturor është gjithashtu në proces. Popullsia e Gjermanisë po plaket dhe të rinjtë po konsumojnë më pak alkool sesa në të kaluarën, pjesërisht, sepse janë më të vetëdijshëm për pasojat e tij shëndetësore (një trend që Gjermania e ndan me shumë vende të tjera, ku të rinjtë janë më pak të pamatur sesa dikur).

Në vitet e fundit, shitjet e birrave dhe pijeve joalkoolike të bëra duke përzier birrën me pije joalkoolike (siç është Radler, i cili kryesisht bëhet duke përzier birrën dhe limonadën) janë rritur ndjeshëm.

Gjermania deri më tani ka miratuar politika më tolerante për alkoolin sesa vendet e tjera evropiane. Ligji lejon pirjen e birrës që nga mosha 16 vjeç dhe madje edhe nga mosha 14 vjeç nëse shoqërohet nga prindërit (ka diskutime për rritjen e moshës minimale për konsumimin e të gjitha llojeve të alkoolit në 18 vjeç).

Ky ndryshim po ka një ndikim veçanërisht negativ në bizneset e vogla: dhjetëra të tilla janë mbyllur në pesë vitet e fundit.

Shumë prej tyre po përpiqen të kufizojnë rënien e mundshme të të ardhurave në të ardhmen duke investuar më shumë në produkte joalkoolike, të cilat pritet të bëhen edhe më të njohura në të ardhmen.

Disa janë përpjekur gjithashtu të promovojnë konsumin e birrës tek të rinjtë, duke u përpjekur ta paraqesin atë si një produkt në modë dhe tërheqës, por pa shumë sukses.

The post Në Gjermani, nuk është pirë kurrë kaq pak birrë! appeared first on Gazeta Si.

Gazeta Si – Tre shqiptarë, të cilët po ktheheshin nga një dasmë, kanë humbur jetën dhe dy të tjerë kanë mbetur të plagosur pas një aksidenti tragjik të ndodhur mesditën e së hënës në kilometrin 537.5 të autostradës Egnatia, në pikën e pagesës Iasmos.

Mediat greke raportojnë se një kamion u përplas me dy makina, të cilat ishin të ndalura dhe mjetet shpërthyen në flakë pas përplasjes, duke çuar në karbonizimin e tre nga katër pasagjerëve në njërën prej makinave. 

Kamioni thuhet se u përplas kokë më kokë me automjetin përpara tij, i cili u përfshi nga flakët. Në bord ndodheshin 4 shqiptarë me banim në Athinë, një 59-vjeçar, një 61-vjeçar (pasagjer), një grua 57-vjeçare dhe një grua 49-vjeçare. Tre të parët u karbonizuan, ndërsa e fundit arriti të dilte vetë nga makina.

Mjeti tjetër i përfshirë në aksident mbante 4 të afërm grekë, gjithashtu banorë të Athinës, një shofer 36-vjeçar, një pasagjer 28-vjeçar dhe dy djem të moshës 4 dhe 5 vjeç.

Të gjithë u dërguan në spitalin e Komotinisë me lëndime të lehta. Raportohet se edhe shoferi me shtetësi bullgare i kamionit  është plagosur rëndë.

Forca të mëdha zjarrfikëse me 22 zjarrfikës dhe 9 automjete, 3 ambulanca dhe policia shkuan me nxitim në vendngjarje.

Zjarri u përhap edhe përreth autostradës Egnatia, në zonat rurale. Pak pas orës 16:00, përfundoi devijimi i përkohshëm i trafikut të automjeteve në rrjetin kombëtar Komotini-Porto Lagos-Xanthi.

Sipas ERT, të afërmit kishin udhëtuar për në Evros për dasmën e familjarëve dhe po ktheheshin kur ndodhi aksidenti i tmerrshëm.

The post Greqi / Kamioni përplas makinën që digjet në autostradë, humbin jetën 3 shqiptarë (video) appeared first on Gazeta Si.

Gazeta Si – Fillimisht ajo ndaloi në Romë, për t’u lidhur me videokonferencën e “koalicionit të të Vullnetshmëve” dhe për të përcaktuar një linjë të përbashkët që do të paraqitet sot në Shtëpinë e Bardhë, kur liderët kryesorë europianë, presidentja e BE-së, von der Leyen dhe kreu i NATO-s Rutte, do të takojnë Trumpi dhe Zelenskin. Më pas në mbrëmje, Giorgia Meloni – gjithmonë me telefonin në dorë – u drejtua për në Uashington.

Asnjë nuk mund të parashikojë nëse do të bëhet një hap i vërtetë përpara. Sigurisht që synimi është të mos përsëritet skena e para gjashtë muajve, kur Trump i dha disa “shuplaka” Zelenskit para kamerave, në një përplasje epike.

Aq sa, sipas rrëfimeve, problemi kryesor i bisedimeve të djeshme mes liderëve, ishte pikërisht formati i deklaratave për shtyp.

Në Shtëpinë e Bardhë kishin menduar për komunikime të shkurtra të Trump dhe Zelenskit në Zyrën Ovale menjëherë pas takimit kokë më kokë.

Por rreziku – siç shpjegoi Meloni te aleatët – është që gjithçka të shndërrohet në një shfaqje personale të Trump, që do të linte Zelenskin dhe liderët e tjerë pa zë, ose në një mbivendosje të rrezikshme zërash dhe pozicionesh.

Prandaj po ushtrohet presion i fortë mbi Trump që të pranojë një model më institucional, si në Alaskë: deklarata të dy presidentëve pa pyetje, në fund të ditës.

Do të shihet nëse Trump do të bindet. Sigurisht, siç u tha njerëzve të saj Meloni, për momentin nuk mbetet gjë tjetër veçse të shoqërohen përpjekjet me durim dhe këmbëngulje, pa e sulmuar, edhe kur kjo bëhet e vështirë për shkak të toneve shumë miqësore që ka përdorur me Putinin.

Por, siç ua tha edhe liderëve të tjerë dje, rreziku është që Trump, nëse sulmohet, të prishë gjithçka dhe të thotë se Ukraina nuk do paqen, Europa nuk bashkëpunon dhe atëherë amerikanët të bien dakord drejtpërdrejt me rusët. Një katastrofë, që do ta linte Europën jashtë loje, shkruan “Corriere della Sera”.

Me çfarë pozicioni shkon Italia në Uashington? Meloni nuk u jep shumë rëndësi telekonferencave ku marrin pjesë shumë shtete pa arritur në ndonjë përfundim, përveç, siç komentojnë njerëzit e saj, se i bëjnë qejfin Macron që kërkon të tregojë “se është ai lideri i vërtetë i Europës”.

Në një shënim, Meloni shkruan se gjatë diskutimit “u theksua rëndësia e vazhdimit të punës me Shtetet e Bashkuara për t’i dhënë fund konfliktit dhe për të arritur një paqe që të sigurojë sovranitetin dhe sigurinë e Ukrainës, e cila duhet të përfshihet në çdo vendim”.

Për më tepër, “diskutimi konfirmoi nevojën për të ruajtur presionin kolektiv mbi Rusinë dhe për garanci të forta e të besueshme sigurie”.

Fjalë, sigurisht, më të përgjithshme nga ato që liderët shkëmbyen në bisedimet më të ngushta. Pika kyçe, për kryeministren – që e ka diskutuar edhe me Zelenskin – është t’i sigurohet Ukrainës se nuk do të mbetet vetëm në të ardhmen.

Dhe që, sipas planit “të shpikur prej nesh”, siç përsërit ajo, të zgjerohet zbatimi i nenit 5 të NATO-s, në mënyrë që nëse Ukraina do të sulmohej, të mbrohej nga Aleanca, edhe pse formalisht nuk është anëtare.

Ideja nuk bind Macronin, i cili shtyn për një ndërhyrje të drejtpërdrejtë të vendeve europiane në mbrojtje të Ukrainës, me kontigjente ushtarake.

Por Meloni iu përgjigj: “Rusia ka 1 milion e 300 mijë ushtarë: sa do të duhej të dërgonim ne për të qenë në nivelin e detyrës?”.

Dhe më tej: “Nëse një nga ushtarët tanë do të vdiste, do të bënim sikur s’ka ndodhur gjë, apo do të duhej të reagonim? Sepse, nëse reagojmë, është e qartë që do të duhet ta bëjë edhe NATO. Atëherë më mirë ta aktivizojmë menjëherë klauzolën”.

Ideja duket se po i intereson si Zelenskit, ashtu edhe Trumpit, më pak Macronit, të cilit nuk i pëlqen pozicioni italian – një përplasje që zgjat prej kohësh.

Do të jetë një moment vendimtar, i pari prej problemeve “jashtëzakonisht komplekse”, siç thotë kryeministrja: adoptimi i gjuhës ruse, si gjuhë zyrtare, territoret që kërkon Putini, armëpushimi.

Por paraprake mbetet çështja e sigurisë: çfarë mund të marrë Zelenski në këmbim të pranimit të disa kushteve ruse dhe si mund t’ua shpjegojë bashkëqytetarëve të tij, se “vdekja ka vlejtur për diçka?”. Një mbrojtje automatike, është e bindur Meloni, do të ishte “një rezultat konkret, solid” për të.

Do të shihet që mbrëmjen e kësaj të hëne, nëse do të ketë hapa përpara. Dhe nëse ndoshta mund t’i jepet vazhdim propozimit italian, që Roma të jetë selia e një samiti tripalësh të mundshëm: Putin–Zelenski–Trump.

Të dyve të fundit nuk do t’u dukej e mërzitshme kjo ide, por edhe këtu ka nisur një duel: duket se dje Macron u zemërua përballë kësaj hipoteze, duke propozuar më mirë Gjenevën në Zvicër. Por Meloni, me një batutë, e qetësoi. Nuk është ky momenti për t’u përçarë.

Përshtati: Gazeta “Si”

The post Meloni përplaset me Macron për ushtarët: Rusia ka 1.3 milionë, po ne? appeared first on Gazeta Si.

Gazeta Si – Kryebashkiaku i Tiranës, Erion Veliaj, ka reaguar nga qelia, ku po vuan masën e sigurisë për 4 akuza nga SPAK, duke e cilësuar situatën e tij si një “eliminim politik”.

Në një mesazh në rrjetet sociale, Veliaj theksoi se gjatë 21 viteve të karrierës politike i është nënshtruar çdo lloj kontrolli dhe verifikimi, por asnjëherë nuk i është gjetur shkelje.

“Jam viktimë e një eliminimi politik. Kam kaluar një vetting 21-vjeçar dhe nuk më kanë gjetur asgjë. Sot jam këtu jo për shkak të fakteve apo ligjit, por për arsye që lidhen me interesa të tjera”, – shkruan ai.

Veliaj ka lënë të kuptohet se arrestimi i tij është i motivuar nga kalkulime politike dhe jo nga prova konkrete.

Ndërkohë, avokatët e tij pritet të paraqesin ankesa në instancat gjyqësore për ndryshimin e masës së sigurisë.

Më 23 korrik, SPAK mori zyrtarisht të pandehur Erion Veliajn për korrupsion pasiv, pastrim parash, fshehje pasurie dhe futje e sendeve te palejuara në institucionet e ekzekutimit të vendimeve penale. Akuzat iu komunikuan edhe bashkëshortes së tij, Ajola Xoxa.

SPAK i ka komunikuar akuzë edhe efektivit të Policisë së Burgjeve i cili i ka dhënë celularin në qeli Veliajt.

Veliaj është vënë në hetim nga SPAK disa muaj më parë dhe që prej 10 shkurtit, kur u arrestua, qëndron në paraburgimin e Durrësit.

The post I pandehur për 4 akuza, Veliaj i kërkon GJKKO të shpallen të pavlefshme hetimet appeared first on Gazeta Si.

Gazeta Si – Një aksident i rëndë i ka marrë jetën një personi dhe ka plagosur 3 të tjerë mesditën e kësaj të hëne në aksin rrugor Shkodër–Bushat, pranë kryqëzimit të Kryebushatit.

Ngjarja ndodhi rreth orës 12:10, kur një kamion u përplas fillimisht me një automjet dhe më pas goditi një një tjetër.

Si pasojë e aksidentit, humbi jetën Altin Luli, teksa të plagosur, jashtë rrezikut për jetën mbetën L.L., M.L., dhe A.H., e cila udhëtonte në mjetin tjetër.

Drejtuesi i kamionit, i cili përplasi dy automjetet, sipas policisë nuk ka pësuar dëmtime. Viktima, drejtuesi i një prej makinave, udhëtonte me bashkëshorten dhe fëmijën e tij, të cilët u dërguan në spital.

Pamjet nga vendngjarja tregojnë se një prej automjeteve është shkatërruar pothuajse tërësisht, ndërsa për nxjerrjen e të bllokuarve ndërhynë forcat zjarrfikëse.

Policia ka mbërritur menjëherë në vendngjarje dhe ka nisur hetimet për të përcaktuar shkaqet e aksidentit.

“Rreth orës 12:10, në aksin rrugor ‘Shkodër-Lezhë’, kamioni me drejtues shtetasin H. Sh. është përplasur me automjetin me drejtues shtetasin A.L., dhe më pas me automjetin me drejtuese shtetasen A.H. Si pasojë e aksidentit ka humbur jetën një shtetas dhe janë dëmtuar 3 shtetas, të cilët janë në kujdesin e mjekëve, jashtë rrezikut për jetën. Grupi hetimor vijon punën për zbardhjen e rrethanave të aksidentit”, thuhet në një njoftim paraprak të Policisë së Shkodrës.

The post Aksident me 1 të vdekur dhe 3 të plagosur në Shkodër appeared first on Gazeta Si.

Gazeta Si – Një 41-vjeçar u arrestua gjatë një operacioni në fshatin Papër, pasi i shpallur në kërkim ndërkombëtar nga autoritetet spanjolle i akuzuar për drogë.

Sipas njoftimit zyrtar, policia tha se arrestoi E.B., 41 vjeç, teksa qarkullonte me automjet në rrugën e fshatit Papër.

Ai ishte shpallur në kërkim ndërkombëtar pasi Gjykata e Sabadellit, Spanjë, më datë 30 qershor 2025 kishte lëshuar urdhër arresti për veprat penale “Kultivimi i bimëve narkotike” dhe “Vjedhja e energjisë elektrike”.

The post Në kërkim nga Spanja për drogë, arrestohet 41-vjeçari në Elbasan appeared first on Gazeta Si.

Gazeta Si – Një 49-vjeçare, e cila ishte në masën e sigurisë “arrest shtëpiak” në Durrës, jo vetëm ka ushtruar prostitucion, por ka bashkëpunuar në një plan grabitjeje të klientit të saj, në një krim të përsëritur.

Policia thotë se ka shpallur në kërkim Alma H., dhe ka arrestuar partnerin e saj, Robert Lamnica, 40 vjeç. Sipas policisë, ky i fundit ka qenë po në “arrest shtëpiak” për të njëjtën vepër si bashkëpunëtorja e tij, në një krim të mëparshëm, për të cilin po hetoheshin nga Prokuroria e Durrësit dhe ishin marrë nën akuzë prej muajit prill.

Operacioni është koduar “Last Threat”, ndërsa sipas hetimeve, të dy e kanë kryer veprën e vjedhjes së celularit dhe një shume parash një klienti 44-vjeçar. Marrëdhëniet seksuale ishin ofruar në banesën e të dyshuarës.

“Specialistët për Hetimin e Krimeve të Komisariatit të Policisë Durrës arrestuan në flagrancë shtetasin R. L., 40 vjeç, banues në fshatin Shënavlash, dhe shpallën në kërkim shtetasen A. H., 49 vjeçe, banuese në Durrës. 49-vjeçarja, ndërkohë që ishte me masë sigurie “arrest në shtëpi”, dyshohet se i ka ofruar marrëdhënie seksuale, kundrejt pagesës, në banesën e saj, një 44-vjeçari. Në këtë banesë, shtetasi R. L. i ka marrë me dhunë 44-vjeçarit, celularin dhe një shumë parash”, bëri me dije policia.

Në operacionin e muajit prill të këtij viti, dy persona u arrestuan nga policia e Durrësit, pasi merreshin me prostitucion dhe më pas i kërcënonin klientët me thikë për t’u marrë para.

Në pranga ka rënë edhe një person tjetër, pasi gjatë kontrollit iu gjet një sasi lënde narkotike kokainë të ndarë në doza gati për shitje. Të arrestuarit në atë aksion ishin Robert Lamnica, Armand Hysa dhe 49-vjeçarja Alma H.

Policia njoftoi se të dyshuarit i kërcënonin klientët e tyre duke u bërë shantazh nëpërmjet publikimit edhe të fotografive, ose dhe i grabisnin me dhunë, si në rastin e fundit me klientin 44-vjeçar.

The post Durrës, gruaja nën ‘arrest shtëpie’ i ofron s*ks me pagesë 44-vjeçarit dhe e grabit me dhunë bashkë me partnerin appeared first on Gazeta Si.

Gazeta Si – Për herë të parë në njëzet vjet, Bolivia nuk do të ketë një president të krahut të majtë. Në raundin e parë të zgjedhjeve presidenciale të së dielës, me 90 përqind të votave të numëruara, dy kandidatët më të njohur janë senatori i qendrës Rodrigo Paz Pereira (aktualisht me 32 përqind) dhe ish-presidenti i krahut të djathtë Jorge Quiroga (27 përqind).

Kështu, Pereira dhe Quiroga do të kalojnë në një balotazh zgjedhor, të planifikuar për 19 tetor, ndërsa të gjithë kandidatët e krahut të majtë, të cilët kishin garuar në një garë të ndarë, do të përjashtohen.

Surpriza më e madhe ishte senatori qendror-djathtas Rodrigo Paz Pereira, 57 vjeç, i cili filloi fushatën me vetëm 3% mbështetje, por tani kryeson me 32.1% të votave paraprake. Në vend të dytë është Jorge “Tuto” Quiroga, ish-president dhe kandidat i djathtë, me 26.9%.

Fushata e balotazhit pritet të dominohet nga kriza ekonomike më e thellë në 40 vite, mungesa e dollarëve dhe karburanteve, si dhe inflacioni në rritje.

Presidenti aktual Luis Arce nuk kandidoi dhe zgjodhi ministrin e tij të Brendshëm, Eduardo del Castillo, i cili mori vetëm 3.15% të votave.

Shumë vota u shpallën të pavlefshme, 19.1%, kryesisht si formë proteste kundër ndalimit të ish-presidentit Evo Morales të kandidojë përsëri. Biznesmeni Samuel Doria Medina, i cili kryesonte sondazhet për pjesën më të madhe të fushatës, u rendit i treti dhe njoftoi mbështetjen e tij për Paz Pereira në rundin e dytë.

Më e larta mes kandidatëve të majtë ishte Andrónico Rodríguez, 36 vjeç, i cili u rendit i katërti me vetëm mbi 8%. Procesi zgjedhor u monitorua nga mbi 2,500 vëzhgues nacionalë dhe ndërkombëtarë, përfshirë Bashkimin Evropian dhe Organizatën e Shteteve Amerikane, dhe u zhvillua kryesisht pa incidente, përveç disa situatave të izoluar, si sulmet ndaj Rodriguez gjatë votimit.

The post Bolivia nuk do të ketë një president të krahut të majtë për herë të parë në 20 vjet appeared first on Gazeta Si.

Gazeta Si – Sali Berisha, kritikoi Këshillin e Lartë Gjyqësor dhe Këshillin e Lartë të Prokurorisë për mungesën e reagimit pas sulmeve të Kryeministrit Edi Rama ndaj një prokuroreje dhe një gjykatësi disa ditë më parë.

“Edi Rama sulmoi me egërsinë më të madhe një prokurore me mbiemrin Gjeli, e cila në mënyrë absolute kishte zbatuar pikë për pikë atë që kërkohej në raportin e policisë së Shkodrës. Dhe pas prokurores Gjeli që nuk la turfullim pa bërë kundër saj, iu vërsul një gjykatësi tjetër, në mos gabohem, Balliu mbiemër, për fajin e vetëm që ky gjykatës me karakter për ligjin, kishte zbatuar pikë për pikë vendimin e qeverisë, u shpreh Berisha nga godina e SPAK, ku zbatoi masën e – detyrimit për praqitje’ – Ky gjykatës, në përputhje me vendimin, i cili i njihte shkelësit e ligjit të drejtën e parablerjes me firmë të Edi Ramës, kishte vendosur masën e sigurisë, sepse Edi Rama pavarësisht nga pafytyrësia e tij, kërkonte që gjykatësi të mbajë dy standarde, njëherë ta zbatojë dhe njëherë të mos e zbatojë. Tani ky, i vërsulet gjykatësit, një djalë i ri ai, me fjalët e një ordineri, jo të një kryeministri, jo i pacipë, jo këto e ato”, tha Berisha, pasi doli nga SPAK, ku ishte paraqitur në zbatim të masës së sigurisë.

“A dëgjuat ju, dy sulme të egra, a dëgjuat ju një fjalë të vetme nga dy institucionet kryesore të drejtësisë, të cilat detyrimisht duhet të merrnin në mbrojtje këto individë sepse kishin zbatuar ligjin. Asnjë fjalë, heshtje varri. Ndërkohë që kur unë denoncoja lidhjet me krimin të Altin Troplinit, ata lëshonin kilometra deklarata në mbrojtje të Gjokës apo Troplinit”, shtoi ai.

Në fillim të korrikut, Rama kritikoi prokuroren e Shkodrës Elsa Gjeli për mënyrën se si kishte trajtuar çështjen e ndërtimeve të ngritura në Theth, të cilat u prishën pas aksionit të IKMT-së.

Kryeministri tha se Gjeli duhet të kishte nisur një çështje penale dhe paralajmëroi kallëzim ndaj saj dhe të gjithë Prokurorisë së Shkodrës pranë Këshillit të Lartë të Prokurorisë.

Elsa Gjeli reagoi, duke dërguar një shkresë për KLP-në, ku kërkonte mbrojtje për pavarësinë e magjistraturës dhe ishte e gatshme të përgjigjej para çdo institucioni.

Më 1 gusht, Rama kritikoi gjyqtarin e Gjykatës Administrative, Hazbi Balliu, për një vendim që kishte të bënte me sigurimin e një pallati të konfiskuar, vendim që, sipas Ramës, ishte absurd duke marrë parasysh legjislacionin që ai vetë kishte miratuar më parë.

The post Berisha kritikon KLGJ-KLP: Nuk reaguan pas sulmeve të Ramës ndaj njerëzve të drejtësisë appeared first on Gazeta Si.

Gazeta Si – Në 24 orët e fundit, autoritetet kanë evidentuar 23 vatra zjarri në të gjithë Shqipërinë. Nga këto, 16 janë shuar plotësisht, katër vijojnë të jenë aktive, ndërsa tre janë në monitorim të vazhdueshëm.

Vatrat e shuar përfshijnë zona si Gramsh, Vlorë, Skrapar, Durrës, Krujë, Memaliaj, Shkodër, Patos, Delvinë dhe Elbasan.

Vatrat aktive ndodhen kryesisht në Bulqizë, Fushë Arrëz, Kolonjë dhe Delvinë, ku forcat zjarrfikëse, pyjore, bashkiake dhe Forcat e Armatosura po ndërhyjnë për të neutralizuar flakët dhe për të mbrojtur komunitetet.

Agjencia Kombëtare e Mbrojtjes Civile dhe strukturat vendore apeluan për bashkëpunim nga banorët dhe vazhdojnë patrullimin dhe mbikëqyrjen e zonave të rrezikuara.

The post Shuhen 16 vatra zjarri në vend, 4 janë ende aktive appeared first on Gazeta Si.

Gazeta Si – Ish-kryeministri dhe kreu i Partisë Demokratike, Sali Berisha, u paraqit këtë të hënë në ambientet e SPAK, në zbatim të masës së sigurisë “detyrim paraqitjeje”, të vendosur nga gjykata, pasi është marrë si i pandehur për aferën e klubit sportiv “Partizani”.

Pasi doli nga ambientet e e SPAK-ut, Berisha dha edhe një deklaratë pë mediat, ku nuk i kurseu akuzat ndaj kryeprokurorit të SPAK-ut, Altin Dumani.

“250 urdhra-arreste s’janë ekzekutuar, janë njoftuar krerët e karteleve. U bëj thirrje gazetarëve të merren me informacionet e këtij institucioni, të mos bien pre e mashtrimeve të tyre. 34 ton kokainë, 6.5 miliardë euro. Asnjë gram nuk është kapur në Shqipëri, dezinformojnë, mashtrojnë se u kapën 17 tonelata. Theksova këtë moment, se nëse Altin Troplinin po e dekoronte Elvis Doçi, pikërisht për këtë bashkëpunim kriminal të ngushtë, mes personave të caktuar, një pjesë është edhe policia. Rastet janë flagrante, që akuzohen vetë këta prokurorë, kjo paraqet një problem madhor për rendin dhe sigurinë. Padrinot janë të lirë”, deklaroi Berisha.

Dosja “Partizani” do të gjykohet më 18 shtator, ku përfshihen akuzat për korrupsion e pastrim parash, për Berishën, dhëndrin e tij Jamarbër Malltezi dhe tre persona të tjerë.

Berisha akuzohet se gjatë kohës që mbante postin e kryeministrit ka ndërmarrë veprime konkrete për miratimin e ligjeve dhe akteve nënligjore, nga të cilat ka përfituar dhëndri i tij, Jamarbër Malltezi, në ndërtimin e pallateve mbi truallin e ish-kompleksit sportiv Partizani.

Edhe vetë Malltezi përballet me akuza për korrupsion dhe pastrim parash. Sipas SPAK, ai ka përfituar në mënyrë të paligjshme rreth 5.4 milionë euro përmes një projekti ndërtimi, përfitime të cilat lidhen me vendime të marra nga qeveria e drejtuar në atë kohë nga vjehrri i tij

The post Berisha, akuza SPAK-ut: Nuk ekzekutoi 250 urdhër-arreste, njoftoi krerët e karteleve appeared first on Gazeta Si.