Ardhja e Leon Avdullahut te Kombëtarja e Kosovës ka qenë lajm i bujshëm në vendin tonë, por edhe në Zvicër, shtet ku është lindur dhe rritur mesfushori i ri i Dardanëve.

Por edhe më e bujshme ka qenë një deklaratë nga Blerim Xhemaili për mediat zvicerane, me ish-mesfushorin e Kombëtares së Zvicrës që është pyetur rreth vendimit të Leon Avdullahut për ta refuzuar Zvicrën dhe ta pranuar fanellën dardane.

“Federata duhet të ndihmohet më shumë, ndoshta duke përfshirë ish-lojtarë si ne, të cilët kanë kaluar nëpër të njëjtat zgjedhje dhe në fund kanë zgjedhur Zvicrën. Largimi i Avdullahut është një humbje e madhe për Zvicrën, duhet të kishin luftuar më shumë për ta mbajtur. Shpesh këta janë lojtarë që nuk do të kishin shumë hapësira këtu ose përballen me konkurrencë të madhe. Por ndonjëherë është edhe çështje zemre dhe të dyja janë të kuptueshme”, kishte deklaruar ndër të tjera Xhemaili për RSI në Zvicër.

Lexo po ashtu "Zvicra viktimë, do ta ndihmoja që lojtarët të mos zgjedhin Kosovën" - Blerim Xhemaili me deklaratë skandaloze

Deklarata e Xhemailit shkaktoi shumë bujë jo vetëm në Zvicër, por edhe në Kosovë dhe Shqipëri.

Megjithatë ish-reprezentuesi zviceran ka dhënë një intervistë ekskluzive për Telegrafin, duke sqaruar gjithë deklaratën e tij të mëparshme dhe duke thënë se u keqinterpretua dhe se fjalët e tij janë shtrembëruar.

“Pikë së pari dua t’i kërkojë falje të gjithë Kosovës dhe shqiptarëve nëse janë ndjerë të fyer, por qëllimi im nuk ka qenë ta fyej askënd. Unë thjesht kam dhënë një deklaratë jo vetëm për Avdullahun, por në përgjithësi për lojtarët”, ka thënë fillimisht Xhemaili për Telegrafin.

“Unë Kosovën e dua dhe e kam shikuar disa herë në stadium, derisa kam dhënë një mendim timin rreth largimeve nga Zvicra”.

“Kam thënë që për Zvicrën është humbje e madhe largimi i Leonit, derisa për Kosovën është një fitore e madhe pasi kanë marrë një futbollist shumë të talentuar dhe i cili ka të ardhme të ndritur”, shtoi ish-mesfushori.

39-vjeçari i cili ka veshur fanellën e Kombëtares së Zvicrës në 69 ndeshje ka komentuar për Telegrafin vendimin e Avdullahut.

“Sigurisht që një futbollist kur ka dy zgjedhje ose më shumë do të mendojë mirë për të ardhmen. Ai ka menduar për të gjitha, si në aspektin sportiv, por edhe është një çështje zemre. Nuk është asgjë e keqe të mendosh edhe për aspektin sportiv, apo thjesht të vendosësh të luash për vendin tënd duke bërë zgjedhje zemre”.

“Unë në vitin 2006 nuk kam pasur mundësi si Leoni të zgjedh për ndonjë Kombëtare. Ka qenë vetëm Zvicra që është interesuar, derisa në Maqedoninë e Veriut prej nga vij unë nuk ka qenë e lehtë të luajnë futbollistët shqiptarë”, vazhdon tutje Xhemaili i cili është me prejardhje nga Bogovina e Maqedonisë së Veriut.

Xhemaili u pyet edhe për zgjedhjen e tij që bëri për të luajtur me Zvicrën, duke thënë se në atë kohë nuk ka pasur kurrë kontakt me Shqipërinë, ose Maqedoninë e Veriut, pasi Kosova ende nuk kishte një kombëtare pasi nuk ishin të pranuar në UEFA dhe FIFA.

“Shumë gjëra janë thënë kinse më kanë kërkuar para për të luajtur për Shqipërinë e gjëra të tilla. Nuk është aspak e vërtetë. Unë në asnjë moment nuk jam kontaktuar kurrë nga Shqipëria, as unë dhe as familja ime. E thash më lartë se te Maqedonia e Veriut nuk ka qenë e lehtë të luanin shqiptarët dhe ata u interesuan shumë vonë për mua, derisa Kosova nuk kishte një Kombëtare që ta kisha si opsion”, deklaroi Xhemaili.

Krejt në fund ai i uroi sukses Avdullahut dhe Kosovës, derisa thotë se Dardanët kanë marrë në radhët e veta një mesfushor shumë të fortë.

“Dua t’i uroj sukses Leon Avdullahut te Kosova. Kosova ka marrë në radhët e veta një mesfushor shumë të fortë i cili ka të ardhme të ndritur”.

“Sa i përket futbollistëve të tjerë, të gjithë që kanë mundësi të zgjedhin duhet të mendojnë si aspektin sportiv ashtu edhe çështje zemre”, përfundoi ish-reprezentuesi zviceran.

Xhemaili ka luajtur për grupmoshat U19, U20 dhe U21 te Zvicra, derisa debutimin me ekipin e parë të Helvetikëve e bëri në mars të vitit 2006 në miqësoren ndaj Skocisë.

Ai ishte grumbulluar në 86 ndeshje me Kombëtaren e Zvicrës, derisa 41 herë ishte titullar derisa në 28 ndeshje të tjera luajti duke u inkuadruar nga banka rezervë.

Ish-mesfushori i shumë skuadrave evropiane me fanellën bardhekuq realizoi edhe 10 gola dhe dhuroi gjashtë asistime. /Telegrafi/

The post Rrëfimi ekskluziv i Blerim Xhemailit për ardhjen e Avdullahut te Dardanët: Kosovë më fal, deklaratat e mia u keqinterpretuan appeared first on Telegrafi.

Trajneri i Kombëtares së Zvicrës, Murat Yakin ka folur në konferencën për shtyp pas publikimit të listës së futbollistëve të ftuar për ndeshjen kualifikuese ndaj Kosovës në kuadër të Kupës së Botës 2026.

Zvicra e pret Kosovën më 5 shtator në ndeshjen e parë të Grupit B, takim që pritet të zhvillohet në  St. Jakob-Park të Baselit.

Trajneri i Helvetikëve, Yakin ka ftuar gjithsej 23 futbollistë për ndeshjen ndaj Dardanëve dhe pjesë e listës janë dy yje shqiptarë.

Lexo po ashtu Zvicra publikon listën e futbollistëve të ftuar ndaj Kosovës – mungojnë Bislimi e Hajdari, përfshihen Xhaka dhe Jashari

Megjithatë, në konferencën për shtyp, Yakin është pyetur edhe për zgjedhjen e Leon Avdullahut për të përfaqësuar Kosovën dhe mungesën e ftesës së Albian Hajdarit, i cili gjithashtu është në radarin e Dardanëve.

“Avdullahu? Pata një bisedë të gjatë me të në pranverë dhe i shpjegova perspektivat sportive. Siç e shoh unë, ai nuk e zgjodhi rrugën sportive. Nëse dikush mendon ndryshe për kulturën, ne nuk mund ta ndikojmë këtë”, ka thënë fillimisht Yakin, duke kundërshtuar teorinë se Federata e Zvicrës nuk i kishte kushtuar mjaftueshëm përpjekje lojtarit.

“Albian Hajdari? Kjo është rënë dakord. Ne kemi një plan për të, por do ta trajtojmë atë pas ndeshjeve të shtatorit”, përfundoi trajneri i Helvetikëve, i cili shihet si shqetësuar edhe për ikjen e mundshme të mbrojtësit të Hoffenheimit. /Telegrafi/

The post Trajneri i Zvicrës flet për ‘ikjen’ e Leon Avdullahut te Kosova dhe të ardhmen e Albian Hajdarit appeared first on Telegrafi.

Suedia i hap kualifikueset me një vizitë në Slloveni më 5 shtator, dhe tre ditë më vonë do të luajë në Prishtinë ndaj Kosovës. 

Edhe pse aktualisht është jashtë fushave për shkak të një mosmarrëveshjeje me drejtuesit e Newcastle United , sulmuesi Alexander Isak është në listën e lojtarëve të kombëtares suedeze për kualifikueset e Kupës së Botës 2026. 

Edhe pse ka një kontratë me Newcastle United deri në vitin 2028, Isak po përpiqet të largohet nga “St James Park” dhe të vazhdojë karrierën e tij te Liverpool, por klubet ende nuk kanë rënë dakord.  

Sulmuesi suedez aktualisht po stërvitet veçmas nga ekipi i parë i ‘Larsakave’ dhe së fundmi publikoi një mesazh ku thuhej se ka humbur besimin te drejtuesit e klubit për shkak të premtimeve të pambajtura. 

“Jam shumë i lumtur që Isak dëshiron të jetë pjesë e ekipit, ai është një lojtar i shkëlqyer”.  

“Situata e tij nuk është perfekte dhe ai nuk është stërvitur me ekipin e tij. Por ai është një lojtar që mund të jetë i vendosur dhe dëshiron të jetë pjesë e ekipit tonë. Kupa e Botës është e rëndësishme për Alexander Isak”, ka thënë përzgjedhësi i Suedisë, Jon Dahl Tomasson. 

Suedia do të luftojë për Kupën e Botës në Grupin B së bashku me ekipet kombëtare të Zvicrës, Kosovës dhe  Sllovenisë. /Telegrafi/  

The post Isak nuk po luan me ekipin e tij, përzgjedhësi Tomasson tregon arsyen pse e ftoi sulmuesin për ndeshjen ndaj Kosovës appeared first on Telegrafi.

Vendimi i Leon Avdullahut për të zgjedhur Kosovën, pasi kishte avancuar në radhët e ekipeve zinxhir të Zvicrës, erdhi vetëm pak ditë pas atij të Eman Kospos, i cili vendosi të përfaqësojë Bosnjën në vend të helvetikëve. Këto vendime i ka komentuar ish mesfushori i helvetikëve, Blerim Xhemaili, i cili e sheh Zvicrën si viktimë, në rastin e ikjes së talentëve.

Leon Avdullahu, shihet si një prej talentëve më premtues, i cili u largua nga Zvicra, për të përqafuar rrënjët e tij – një fenomen që po bëhet gjithnjë e më i zakonshëm gjatë viteve të fundit.

Shembuj të ngjashëm nga e kaluara janë Mladen Petric dhe Ivan Rakitic, që kishin lënë Zvicrën për të kaluar te Kroacia.

Ish-mesfushori i Kombëtares së Zvicrës, Blerim Xhemaili, e sheh situatën si një sfidë të vazhdueshme për federatën zvicerane, ndërsa ka ofruar ndihmën e tij që lojtarët me prejardhje shqiptare të mos zgjedhin Kosovën dhe Shqipërinë.

Lexo po ashtu Kush është Leon Avdullahu, ardhja më e re te Kombëtarja e Kosovës?

“Federata duhet të ndihmohet më shumë, ndoshta duke përfshirë ish-lojtarë si ne, të cilët kanë kaluar nëpër të njëjtat zgjedhje dhe në fund kanë zgjedhur Zvicrën”, deklaroi Xhemiali.

Në pyetjen nëse Zvicra është viktimë apo bashkëpunëtore në këto raste, duke mos i vlerësuar talentët, Xhemaili u përgjigj qartë, duk i dal në krah federatës.

Lexo po ashtu Dikur kishte lënë Zvicrën për Kroacinë, Petric i del në mbrojtje Avdullahut

“Mendoj se është më shumë viktimë. Shpesh këta janë lojtarë që nuk do të kishin shumë hapësirë këtu ose përballen me konkurrencë të madhe. Por ndonjëherë është edhe çështje zemre. Të dyja janë të kuptueshme”, ka thënë Xhemaili.

Megjithatë, ai shkoi edhe më larg, duke i paralajmëruar lojtarët si Avdullahu dhe Kospos se një vendim i tillë, largimi nga Zvicra, mund të ndikojë në karrierën e tyre.

“Është një humbje, duhet të kishim luftuar më shumë për ta mbajtur (te Zvicra). Unë për shembull, nëse nuk do të kisha luajtur me Zvicrën, nuk e di nëse do ta kisha pasur të njëjtën karrierë”, përfundoi Xhemaili intevistën e tij për RSI.

Mesfushori bëri karrierë te  Zurich, Bologna, Montreal, Galatasaray, Napoli, Torino, Parma dhe Bolton. /Telegrafi/ 

The post “Zvicra viktimë, do ta ndihmoja që lojtarët të mos zgjedhin Kosovën” – Blerim Xhemaili me deklaratë skandaloze appeared first on Telegrafi.

Kombëtarja e Suedisë e ka publikuar listën për ndeshjet me Slloveninë dhe Kosovën, të vlefshme për kualifikimet e Kupës së Botës 2026.

Skandinavët do të luajnë gjatë shtatorit dy ndeshjet e para kualifikuese, ku fillimisht presin Slloveninë, pastaj udhëtojnë në Prishtinë për ndeshjen me Kosovën.

Për këto dy ndeshje, përzgjedhësi i suedezëve, Jon Dahl Tomasson, ka publikuar listën me 24 futbollistët e ftuar.

Lexo po ashtu “E kam refuzuar Kosovën, ndihem mirë që zgjodha Suedinë”, Besfort Zeneli konfirmon vendimin e tij

Pjesë e listës janë yjet e mëdha si Alexander Isak, Viktor Gyokeres, Anthony Elanga, Lucas Bergall dhe Isak Hien.

Megjithatë, në listë nuk gjendet edhe mesfushori shqiptar, Besfort Zeneli, i cili kishte lënë Kosovën për Suedinë.

Më poshtë keni listën e Suedisë për dy ndeshjet e shtatorit. /Telegrafi/

Nu inleds resan mot VM 2026

- | 5 sep
- | 8 sep pic.twitter.com/0JFVHwUyMi

— Svensk Fotboll (@svenskfotboll) August 27, 2025

The post Suedia publikon listën për ndeshjen ndaj Kosovës – mungon Zeneli, përfshihen Isak dhe Gyokeres appeared first on Telegrafi.

Leon Avdullahu ka marrë vendimin për të veshur fanellën e ekipit kombëtar të Kosovës. Ka disa arsye që mund të çojnë një lojtar të ndërron ekipin e përfaqësimit, një temë që mediumi Blue Sport e diskutoi me sulmuesin Mladen Petric, i cili kishte bërë njëjtë.

Futbollisti, i cili ka kaluar të gjitha grupmoshat e Zvicrës nga U15 deri në U21 dhe ishte në listën për ndeshjet kualifikuese të Kupës së Botës, tani mund të debutojë për Kosovën më 5 shtator kundër Zvicrës.

Për Federatën Zvicerane, kjo është humbja e dytë e një talenti të madh brenda pak ditësh, pas mbrojtësit Eman Kospo, i cili vendosi të luajë për Bosnjën dhe Hercegovinën.

Petric shpjegon se vendime të tilla nuk janë të rralla në Zvicër, me sulmuesin që kishte kaluar te Kroacia në atë kohë.

“Mund të ketë arsye të ndryshme për secilin lojtar. Disa lojtarë zgjedhin të ndërrojnë sepse shohin perspektiva më të mira për të luajtur. Ka edhe ata që besojnë se mund të kenë sukses më të madh me ekipin kombëtar të vendlindjes së tyre”, ka thënë ish-lojtari kroat për Blue Sport.

Megjithatë, për Avdullahun, perspektiva e pjesëmarrjes në turne të mëdha ndërkombëtare nuk është e njëjtë si me Zvicrën.

“Aktualisht është e pamundur që ai të luajë në një turne të madh me Kosovën në një kohë të afërt”, thotë Petriç, duke theksuar se Kosova po ngjitet ngadalë në renditjen botërore.

Një faktor tjetër mund të jetë ndikimi i familjes dhe lidhja emocionale me vendin e origjinës.

“Është vendimi i tij dhe ai duhet të jetojë me të. Ka shumë arsye që nuk i dimë, dhe sigurisht është një humbje për futbollin zviceran, por në fund, është zgjedhja e lojtarit”, deklaroi Petric. /Telegrafi/

The post Dikur kishte lënë Zvicrën për Kroacinë, Petric i del në mbrojtje Avdullahut appeared first on Telegrafi.

Leon Avdullahu është prurja më e re e Kombëtares së Kosovës dhe pritet të jetë i gatshëm për dy ndeshjet e shtatorit, të vlefshme për kualifikimet për Kupën e Botës 2026.

Mbrëmjen e së hënës u konfirmua se mesfushori 21-vjeçar vendosi ta pranoj ftesën e Kosovës për të luajtur me ekipin e parë, pas shumë viteve si pjesë e ekipeve të moshave të Zvicrës.

Ardhja e Avdullahut e përmirëson dukshëm ekipin e Kosovës, e në veçanti repartin e mesfushës, i cili ka çaluar më shumë në vitet e fundit.

Lexo po ashtu “Leoni na informoi vendimin e tij, kjo na zhgënjen”, drejtori i kombëtares së Zvicrës komenton vendimin e Avdullahut

Por, si mund të paraqitet Avdullahu në skemat e trajnerit Franco Foda te Kosova?

Telegrafi ka bërë tri formacione të mundshme me rreshtime të ndryshme, ku Avdullahu mund të jetë lider i ri i mesfushës.

Në rreshtimin e parë 4-2-3-1, i cili është i preferuari të Fodas, Avdullahu do të paraqitej në dyshen e mesfushës së bashku me Elvis Rexhbeçajn.

Në rreshtimin e dytë 4-3-3, 21-vjeçari shtatlartë do të paraqitej si mesfushor i fundit apo mesfushor defensiv, ndërsa para tij përsëri do të ishte Rexhbeçaj së bashku me njërin mes Florent Muslijës, Valon Berishës dhe Bledian Krasniqit.

Rreshtimi i tretë apo më pak i mundur për t’u praktikuar nga Foda është ai 3-4-3, ku Avdullahu përsëri do ta kishte partner Rexhbeçajn, ndërsa nga krahët do mund të luanin Mërgim Vojvoda ose Milot Rashica dhe Donat Rrudhani ose Leart Paqarada.

Kosova starton në eliminatoret për Kupën e Botës 2026 në shtator, ku takohet me Zvicrën si mysafir fillimisht, pastaj në shtëpi me Suedinë. Pjesë e grupit është edhe Sllovenia.  /Telegrafi/

The post Tri formacionet se si mund të luajë Kosova me Leon Abdullahun në fushë appeared first on Telegrafi.

Zvicra ka humbur një talent të madh në mesfushë me Leon Avdullahun. Agjenti i tij ka shpjeguar arsyet pse 21-vjeçari zgjodhi Kosovën dhe jo Zvicrën.  

Javën e kaluar, Leon Avdullahu dhe Eman Kospo morën vendimin për të mos përfaqësuar Zvicrën, por respektivisht Kosovën dhe Bosnjën.  

Por çfarë fshihet pas largimit të Avdullahut dhe Kospos? Gazeta 20 Minuten bisedoi me agjentin Sascha Fischer, përfaqësues i Avdullahut, i cili dha arsyet e këtij vendimi. 

“E kuptoj emocionin dhe zhgënjimin që shumë në Zvicër ndoshta e ndiejnë tani. Leon është rritur këtu, ka marrë formimin e tij këtu dhe Zvicra për të gjithmonë do të mbetet atdheu i tij”. 

Për Fischer është e rëndësishme që vendimi i klientit të tij të kuptohet drejt.  

“Ky nuk ishte një vendim kundër Zvicrës, por për Kosovën. Shpesh në futboll dëgjojmë se lojtarët ndjekin vetëm paratë dhe karrierën. Në këtë rast është e kundërta, Leoni ka vendosur nga bindja, nga zemra dhe nga identiteti familjar që të përfaqësojë Kosovën”. 

Avdullahu dëshiron që me emrin dhe reputacionin e tij të ndihmojë Kosovën të konsolidohet në futbollin evropian. 

Lexo po ashtu “Leoni na informoi vendimin e tij, kjo na zhgënjen”, drejtori i kombëtares së Zvicrës komenton vendimin e Avdullahut

Ai synon që me cilësitë dhe përgjegjësinë e tij të japë kontribut për një federatë dhe një komb që kërkon të forcojë pozitën e vet në arenën ndërkombëtare. Ky, sipas tij, nuk është aspak një gjest kundër Zvicrës. 

 Ajo që e bën edhe më të veçantë situatën është fakti se Avdullahu pritet që në fillim të shtatorit të debutojë me fanellën e Kosovës dhe kjo pikërisht kundër Zvicrës, pasi të dy kombëtaret gjenden në të njëjtën grup kualifikues për Kupën e Botës 2026./Telegrafi/

The post “Vendimi nuk ishte kundër Zvicrës, por për Kosovën”, flet agjenti i Leon Avdullahut appeared first on Telegrafi.

Leon Avdullahu ka marrë një vendim të rëndësishëm për karrierën e tij, duke zgjedhur të luajë për Kombëtaren e Kosovës.

Leon Avdullahu ka lindur dhe është rritur në Solothurn të Zvicrës, ndërsa ka rrënjë nga Kosova, më saktësisht nga Komuna e Kamenicës. Ai ka bërë të gjithë rrugëtimin e tij te Baseli, ku ka kaluar të gjitha grupmoshat e ekipit dhe ka bërë një paraqitje të shquar që e ka shpërblyer me debutimin në ekipin e parë në vitin 2023.

Gjatë kohës së tij te Baseli, Avdullahu ka arritur të shpallet kampion i Zvicrës dhe të fitojë Kupën e vendit, duke konfirmuar cilësitë e tij si një lojtar i talentuar dhe me potencial të lartë.

21-vjeçari luan në pozitën e mesfushorit defensiv dhe këtë verë ka bërë një hap të madh në karrierë duke u transferuar te skuadra gjermane Hoffenheim për një shifër prej 8 milionë eurosh.

Ai është titullar i rregullt në Bundesligë, duke treguar pjekuri dhe qëndrueshmëri në fushë, ndërsa vlera e tij aktuale në Transfermarkt është 10 milionë euro.

Avdullahu ka përfaqësuar Zvicrën në të gjitha grupmoshat nga U15 deri te U21, duke grumbulluar përvojë të vlefshme ndërkombëtare.

Ai kishte ftesë edhe nga Kombëtarja A e Zvicrës, por ka vendosur të marrë një drejtim tjetër në karrierën e tij, duke zgjedhur të luajë për Kombëtaren e Kosovës.

Debutimi i tij pritet të jetë pikërisht ndaj Zvicrës më 5 shtator, një moment simbolik dhe emocionues për të dhe për tifozët e Kosovës.

Ky është një vendim i madh për të ardhmen e Avdullahut dhe për Kombëtaren e Kosovës, duke i shtuar mesfushës një lojtar të ri, të talentuar dhe me vizion. /Telegrafi/ 

The post Kush është Leon Avdullahu, ardhja më e re te Kombëtarja e Kosovës? appeared first on Telegrafi.

Leon Avdullahu ka marrë një vendim të rëndësishëm për karrierën e tij, duke zgjedhur të luajë për Kombëtaren e Kosovës dhe duke refuzuar përfundimisht mundësinë për të përfaqësuar Zvicrën.

Kjo zgjedhje u konfirmua nga presidenti i FFK-së Agim Ademi, ku i shtoi se mesfushori i talentuar ka zgjedhur me zemër Dardanët.

“Pritjes i erdhi fundi, Leoni është i Kosovës. Ndjej kënaqësi të ndaj me ju lajmin e madh se Leon Avdullahu, i udhëhequr nga zemra e tij, ka vendosur që të luaj për Kombëtaren e Kosovës. Leoni më njoftoi sonte për vendimin e madh, që pason takimin që kishim pak kohë më parë kur edhe i kishim diskutuar të gjitha gjërat. Leoni me këtë vendim dëshmoi edhe një herë fuqishëm që Kosova mbetet zgjedhje zemre dhe se identiteti e prejardhja nuk mohohen. Mirë se vjen Leon, le të nisim së bashku një rrugë të gjatë e të suksesshme për ekipin kombëtar të Kosovës dhe për Ty”, ka shkruar Ademi në rrjetin e tij social.

 

View this post on Instagram

 

A post shared by Agim Ademi (@agimademi_official)

Vendimi i Avdullahut është i rëndësishëm për futbollin kosovar, pasi shton thellësinë dhe kualitetin në mesfushën e ekipit kombëtar.

Lojtari i ri ka treguar potencial të madh në karrierën e tij me klube dhe pritet të sjellë energji, vizion dhe kreativitet në fushë, duke përforcuar skuadrën në përballjet e ardhshme kualifikuese për Kupën e Botës 2026.

Avdullahu ka luajtur nga fillimet e tij te Baseli, ndërsa këtë vit për 8 milionë euro ai bëri hapin e madh duke u transferuar në Bundesliga te Hoffenheim.

Ai ka debutuar tashmë në Bundesliga, ku kishte një paraqitje briliante ndaj Bayer Leverkusen, ndërsa vlera e tij në Transfermakt është rritur në 10 milionë euro.

Avdullahu do t’i jap Franco Fodas një shtysë të re në mesfushë, ku Kosova në këto kualifikime, do të jetë përballë Suedisë, Zvicrës dhe Sllovenisë. /Telegrafi/ 

The post Pritjes i erdhi fundi – Leon Avdullahu ka zgjedhur Kosovën para Zvicrës appeared first on Telegrafi.

Federata e Futbollit e Kosovës (FFK) ka njoftuar opinionin se biletat për ndeshjen Kosovë–Suedi kanë dalë në shitje sot (e premte), më 22.08.2025.

Dardanët do të nisin kampanjën kualifikuese shtator, me ndeshjen e parë të vlefshme për Grupin B, e cila luhet me 5 shtator në udhëtim ndaj Zvicrës.

Tri ditë më vonë, më datë 8 shtator 2025, në kuadër të kualifikimeve për Kupën e Botës 2026, Kosova do të luajë në stadiumin “Fadil Vokrri” ndaj Suedisë.

Për këtë ndeshje, FFK ka njoftuar sot (e premte), se sapo kanë dalë në shitje biletat dhe ato mund të blihen online.

Çmimet e biletave janë si në vijim: Veri dhe Jug 10 euro, Lindje 20 euro, Perëndim 30 euro dhe VIP 100 euro.

FFK ka njoftuar se biletat blihen përmes platformës online në linkun: https://eu.ebileta.al/biglietteria/listaEventiPub.do

/Telegrafi/

The post Dalin në shitje biletat e ndeshjes Kosovë-Suedi appeared first on Telegrafi.

Leon Avdullahu, që kaloi te Hoffenheim këtë verë nga Basel, ka mbetur të vendos se kë do ta përfaqësojë, Kosovën apo Zvicrën, me Dardanët që i kanë bërë thirrje sot gjatë ditës.

Zvicra ditëve të fundit është futur fuqishëm në garë për ta bindur mesfushorin e ri t’i bashkohet përfaqësueses së tyre, ku ka luajtur në të gjitha grupmoshat.

Në këtë situatë, tifo-grupi i njohur “Dardanët” ka marrë iniciativën për të bërë një thirrje publike drejtuar lojtarit, duke e ftuar të zgjedhë Kosovën si kombëtare të tij.

“Leon, Kosova është vendi i gjyshit e babait tënd. Ti je shqiponja që gëzon kombin, sepse vetëm këtu nuk je i huaj. Nuk kemi bërë asnjëherë më parë një thirrje të tillë, por për ty po bëjmë përjashtim”.

“Leon do të thotë Luan, e luani është i fortë vetëm aty ku është i përfaqësuar me shpirt. Te Kosova nuk do të jesh asnjëherë i huaj, por gjithmonë i Dardanëve”.

“Mos harro, Leon: këtu vlen, këtu çmohesh, këtu do të të duan pa interes. Hajde me Luanët, aty ku zemra të rreh më fort”, shkruajnë Dardanët. /Telegrafi/ 

The post “Hajde te Kosova, aty ku zemra rreh fortë” – Dardanët me thirrje të fuqishme për Leon Avdullahun appeared first on Telegrafi.

Leon Avdullahu, mesfushori i talentuar i Hoffenheimit, ende nuk ka vendosur se cilën kombëtare do të përfaqësojë, duke u përballur me dy opsione kryesore: Kosovën ose Zvicrën.

Sipas mediumit zviceran Blick, javën e kaluar drejtues të Kombëtares së Zvicrës e vizituan lojtarin për ta bindur të mbetet besnik ndaj Zvicrës dhe të mos zgjedhë Kosovën.

21-vjeçari gjendet në listën e trajnerit Murat Yakin dhe pritet të ftohet për ndeshjet e muajit të ardhshëm, të vlefshme për kualifikueset e Kupës së Botës 2026, ku Zvicra do të përballet me Kosovën dhe Slloveninë.

Në të njëjtën kohë, Federata e Futbollit e Kosovës po punon intensivisht për ta bindur Avdullahun të zgjedhë fanellën e “Dardanëve”. Një delegacion i Kosovës ishte i pranishëm në stërvitjen e parë të lojtarit me Hoffenheim muajin e kaluar, ndërsa presidenti Agim Ademi e vizitoi në Bazel në fund të qershorit për ta shprehur përkushtimin e Kosovës.

Avdullahu ka përvojë të mëparshme me të gjitha grupmoshat e Zvicrës, por zgjedhja përfundimtare mbetet ende e hapur.

Sipas diskutimeve në podcastin e Blick, “Forza”, gazetarët Florian Raz dhe Emanuel Gisi e shohin me mundësi të lartë kalimin e Avdullahut te Kosova, duke i dhënë një avantazh të rëndësishëm kombëtares dardane në këtë garë për talentin e mesfushorit.

Vendimi i tij pritet të ndikojë jo vetëm në të ardhmen e karrierës së tij ndërkombëtare, por edhe në perspektivën e Kosovës dhe Zvicrës për Kupën e Botës 2026.

Në ditët në vijim do të jetë e qartë nëse Avdullahu do të zgjedhë të vazhdojë traditën zvicerane apo të bëhet një prej emrave të rinj të Kombëtares së Kosovës. /Telegrafi/ 

The post Shtatori po vjen – Leon Avdullahu duhet të zgjedh mes Kosovës dhe Zvicrës appeared first on Telegrafi.

Përzgjedhësi i Kombëtares së Kosovës U17, Arbnor Morina, ka mbledhur 28 futbollistë në një grumbullim dyditor, që po mbahet sot dhe nesër, si pjesë e përgatitjeve për ndeshjet kualifikuese që do të zhvillohen në muajin tetor.

Në ditën e parë të këtij grumbullimi, futbollistët zhvilluan një ndeshje kontrolluese me qëllim që stafi të ketë një pasqyrë më të qartë mbi potencialin individual dhe kolektiv të tyre. Nesër, futbollistët do ta kenë edhe një ditë në dispozicion për të treguar më të mirën.

Nga 28 futbollistët e ftuar, një pjesë janë lojtarë vendorë, ndërsa pjesa tjetër janë nga diaspora. Morina theksoi se ky grumbullim është vazhdimësi e planit vjetor të punës, i cili ka për qëllim përgatitjen sa më të mirë për kualifikimet e tetorit.

“Ky grumbullim është vazhdimësi e planit vjetor, i cili duhet të përmbushet në kualifikimet që i kemi në muajin tetor. Kemi një grup futbollistësh nga jashtë, që për arsye të ndryshme nuk kanë qenë në grumbullimet e mëhershme, dhe për të qenë korrekt me ta dhe me të gjithë të tjerët, i kemi ftuar për t’u dhënë rastin të tregojnë çfarë mund të bëjnë. Pjesa tjetër janë futbollistë vendorë, për të plotësuar ato pozita ku kemi mungesa me lojtarët nga jashtë,” shtoi përzgjedhësi Morina.

Ndër të tjera, ai tha se deri më tani paraqitjet kanë qenë solide, por jo mjaftueshëm të mira për të pasur aspirata të mëdha.

Pas përfundimit të këtij grumbullimi, do të publikohet lista zyrtare me 20 deri në 24 futbollistë që do të vazhdojnë përgatitjet dhe do të jenë në dispozicion për ndeshjet kualifikuese.

The post Fillon grumbullimi dyditor i Kombëtares së Kosovës U17 appeared first on Telegrafi.

Sulmuesi kosovar, Fatjon Bunjaku, në një intervistë për portalin Telegrafi.com, ka rrëfyer prapaskenat e transferimit të tij nga FC Malisheva te AF Elbasani, pritjen që i është bërë në klubin shqiptar dhe pritshmëritë e trajnerit Ivan Gvozdenovic. Ai ka folur gjithashtu për synimet ambicioze këtë sezon, arsyet pse nuk u realizuan ofertat nga Rumania, idhullin e tij në futboll dhe ëndrrën për të veshur fanellën e Kombëtares A të Kosovës.

Pas një sezoni të shkëlqyer me FC Malishevën dhe paraqitjeve të spikatura në Ligën e Konferencës, por edhe më parë në futbollin e Kosovës, Fatjon Bunjaku ka nisur aventurën e tij të parë jashtë Kosovës me fanellën e AF Elbasanit.

Bunjaku ka treguar se transferimi te AF Elbasani ishte rezultat i punës së tij të palodhur dhe formës së mirë që tërhoqi vëmendjen e drejtuesve shqiptarë. Pas bisedimeve mes klubeve dhe përfaqësuesit të tij, marrëveshja u finalizua shpejt, duke i hapur rrugën një kapitulli të ri në karrierën e tij. Ai u prit me krahë hapur nga shokët e skuadrës, stafi dhe trajneri Gvozdenovic, i cili pret shumë nga ai.

Lexo po ashtu Konfirmohet lajmi i Telegrafit, Fatjon Bunjaku prezantohet te Elbasani

“Transferimi im te Elbasani erdhi si rezultat i paraqitjeve të mira individuale me klubin e FC Malishevës, duke shtyrë drejtorin sportiv të AF Elbasanit, Elton Guranjakun të kontaktoj me mua qysh para përfundimit te sezonit. Por, pasi përfunduam ndeshjet në Ligën e Konferencës me skuadrën e Malishevës, unë lajmërova përfaqësuesin tim, Labinot Talla, që të flas me klubin e Malishevës dhe të gjejmë një zgjidhje që i kënaq të dyja palët. Pas bisedimeve me klubin e FC Malishevës dhe AF Elbasanit, ne gjetëm një rrugë së bashku dhe finalizuam transferimin”, ka thënë fillimisht Bunjaku për Telegrafin.

“Pritja në ekipin e AF Elbasanit ishte tepër e mire si nga lojtarët, stafi i trajnerëve, drejtuesit e klubit, por po ashtu edhe nga trajneri Ivan Gvozdenovic, i cili ka pritshmëri mjaft të mëdha nga unë këtë sezon”, shtoi vushtrriasi.

Synimet e tij janë të qarta: pjesëmarrja në garat evropiane për të tretin vit radhazi dhe, pse jo, lufta për titullin kampion me Elbasanin. Me ofertat e dështuara nga Rumania pas Ligës së Konferencës, Bunjaku ka zgjedhur të fokusohet te projekti i ri në Shqipëri, duke u frymëzuar nga idhulli i tij Cristiano Ronaldo, por duke ruajtur stilin personal.

“Synimet e mia me klubin e Elbasanit janë sigurisht dalja në Evropë pasi që kam dy vite radhazi që e arrij këtë gjë me ekipin që kam qenë dhe pse jo të synojmë  diçka shumë të madhe për klubin që është titulli kampion. Për synimet e mia individuale ashtu si çdo sulmues pretendoj të shënoj gola dhe ti ndihmoj ekipit me asistime”.

“Kisha marrë dy oferta nga Rumania pas ndeshjes se parë në Ligën e Konferencës kundër Vikingur nga përfaqësuesi im Labinot Talla, nga klubi UTA në Superligë dhe Sepsi në Ligën e Parë, por që dështuan pasi që klubi UTA nuk kishte mundësi të paguante kartonin tim të plotë pa mundësi përqindjeje kurse pas bisedave të gjata me përfaqësuesin tim Labinot Talla ne vendosem që mos të shkoj në Sepsi pasi ka qenë në Ligën e Parë”, nënvizoi 21-vjeçari.

“Lojtari im i preferuar është Cristiano Ronaldo, dhe gjatë gjithë karrierës sime kam përcjell atë si luan, por që nuk e kam kopjuar dhe aq shumë. Unë jam Fatjoni, kam stilin tim të të luajturit dhe dua te mbahem mend për lojën time dhe si Fatjon Bunjaku”.

Paraqitjet me Kosovën U21 i kanë dhënë shtysë për të ëndërruar një thirrje nga Kombëtarja A në të ardhmen e afërt.

“Po kam bërë paraqitje të mira me Kosovën U21 dhe jam krenar, dhe po në të ardhmen pres ftesë edhe nga Kombëtarja A për ndeshje zyrtare apo miqësore”, përfundoi sulmuesi kosovar. /Telegrafi/

The post Fatjon Bunjaku: Nga Malisheva te Elbasani – synon Evropën dhe ëndërron Kombëtaren e Kosovës appeared first on Telegrafi.

Federata e Futbollit e Zvicrës (SFV) ka njoftuar se sot (e enjte) kanë dalë në shitje biletat e ndeshjes kualifikuese mes kombëtares Helvetike dhe asaj të Kosovës.

Kombëtarja e Zvicrës e fillon fushatën e saj kualifikuese për Kupën e Botës 2026 para tifozëve vendas të premten, më 5 shtator, në orën 20:45 në stadiumin St. Jakob-Park në Bazel.

Kështu, ata kanë njoftuar se biletat për ndeshjen kundër Kosovës janë në dispozicion ekskluzivisht online në faqen www.ticketmaster.ch nga ora 14:00 e ditës së sotme (e enjte), 31 korrik.

Sipas tyre, biletat janë të disponueshme në kategori të ndryshme vendesh dhe çmimesh, duke përjashtuar tarifat që variojnë nga 25 franga (pas portës për të rinjtë deri në 16 vjeç) deri në 135 franga (vende Premium – Qendra Kryesore e Tribunës).

Fëmijët deri në 6 vjeç janë falas dhe nuk kanë nevojë të blejnë biletë. Megjithatë, ata nuk kanë të drejtë për vendin e tyre dhe duhet të ulen në prehrin e një të rrituri shoqërues.

Federata e Zvicrës ka njoftuar gjithashtu se biletat për sektorët zyrtarë për tifozët e Kosovës (B1-B2) shiten ekskluzivisht përmes Federatës së Kosovës.

Tifozët e Kosovës kanë mundësinë të blejnë bileta shtesë për sektorët B3-B7 nga publiku.

SFV rekomandon blerjen e biletave ekskluzivisht përmes www.ticketmaster.ch.

/Telegrafi/

The post Dalin në shitje biletat për ndeshjen Zvicër-Kosovë appeared first on Telegrafi.

Kanë mbetur vetëm 50 ditë deri te një nga përballjet më të shumëpritura për kualifikimet e Kupës së Botës 2026, ajo mes Zvicrës dhe Kosovës, që do të luhet më 5 shtator, në stadiumin “St. Jakob-Park” të Bazelit, nga ora 20:45.

Atmosfera pritet të jetë e zjarrtë në Bazel, me interesim të madh nga shqiptarët që jetojnë në Zvicër, të cilët pritet të jenë në numër të madh për të përkrahur Kosovën në këtë ndeshje vendimtare.

Të enjten, Federata Zvicerane e Futbollit kujtoi se ndeshja zhvillohet fiks pas 50 ditësh, dhe njëkohësisht njoftoi se biletat do të dalin në shitje më 31 korrik, përmes platformës zyrtare ticketmaster.ch.

Kosova dhe Zvicra janë pjesë e të njëjtit grup kualifikues së bashku me Suedinë dhe Slloveninë.

Tre ditë pas ndeshjes në Bazel, më 8 shtator, Kosova do të përballet me Suedinë, ndërsa Zvicra pret Slloveninë. /Telegrafi/ 

The post Edhe 50 ditë nga ndeshja Zvicër – Kosovë, vjen lajmin për biletat appeared first on Telegrafi.

Në episodin më të ri të emisionit “Arena e Yjeve”, i ftuar është një nga figurat më të njohura të futbollit kosovar, Hekuran Kryeziu, ish-kapiten i Kombëtares dhe ish-mesfushor i spikatur në Superligën e Zvicrës.

Kryeziu rrëfen për herë të parë në detaje rrugëtimin e tij, sfidat, prapaskenat e transferimeve dhe momentet më të paharrueshme në karrierë.

“Peng e kam që nuk kemi arritur në Kampionatin Evropian”, rrëfen Kryeziu në “Arena e Yjeve”.

“Peng nuk më ka mbet që nuk kam shënuar shumë gola, pasi e di që në futbollin modern mesfushorët shënojnë shumë gola”.

“Ndeshja që më ka mbetur më së shumti në mend është loja me Azerbajzhanin…”, vazhdon rrëfimin e tij ish-futbollisti kosovar.

Këtë podcast mund ta ndiqni në TV Dukagjini çdo të shtune nga ora 17:10, ndërsa nuk do të ishte i mundur pa përkrahjen e sponsorit tonë Golden Eagle Energy Drink dhe Air Munich./Telegrafi/

The post Pengu më i madh me fanellën e Kombëtares së Kosovës për Hekuran Kryeziun dhe ndeshja që nuk e harron kurrë appeared first on Telegrafi.

Në episodin më të ri të emisionit “Arena e Yjeve”, i ftuar është një nga figurat më të njohura të futbollit kosovar, Hekuran Kryeziu, ish-kapiten i Kombëtares dhe ish-mesfushor i spikatur në Superligën e Zvicrës. Kryeziu rrëfen për herë të parë në detaje rrugëtimin e tij, sfidat, prapaskenat e transferimeve dhe momentet më të paharrueshme në karrierë.

Ai zbulon se si nisi të merrej me futboll në moshë të re, duke e trashëguar dashurinë për lojën nga familja. “Gjithçka nisi natyrshëm. Në shtëpinë tonë gjithmonë është folur për futboll”, tregon Kryeziu.

Një nga rrëfimet më interesante është ai për transferimin e dështuar te Juventusi. “Ishte gjithçka gati, madje kalova edhe testet mjekësore. Por në fund diçka nuk shkoi siç duhej”, tregon ai, duke mos fshehur zhgënjimin e asaj kohe.

Kryeziu flet edhe për përvojën e tij me Luzernin, klubin ku kaloi të gjitha grupmoshat dhe arriti të bëhej kapiten, si dhe për kthesën e madhe që i dha karriera e tij, kur mori ftesën për t’iu bashkuar Kombëtares së Kosovës – një ftesë që, siç tregon ai, i erdhi nga një gazetar, para se Kosova të pranohej në UEFA e FIFA.

Ai ndalet edhe te tentativa e Shqipërisë për ta afruar në Kombëtare, duke treguar bisedat që kishte me trajnerët Gianni De Biasi dhe Paolo Tramezzani. “I vlerësoj për qasjen e tyre, por zemra më thoshte Kosovë”, u shpreh mesfushori.

Në rrëfimin e tij, Kryeziu ndan edhe pengun më të madh me fanellën e Kosovës, si dhe ndeshjen që nuk do ta harrojë kurrë. Po ashtu, flet për vendimin për të zgjedhur Zurichun në vend të klubeve italiane nga Serie A dhe për arsyet pse nuk u ndje rehat në Ukrainë, duke kërkuar largimin.

Ai zbulon gjithashtu se ishte shumë pranë një marrëveshjeje me një klub të njohur turk, por gjithçka u ndërpre në momentet e fundit.

Në fund, Kryeziu flet për shokët më të mirë në Kombëtare, përvojën e tij të parë si trajner, dhe ndan planet për të ardhmen në botën e futbollit.

Një rrëfim i sinqertë dhe emocionues nga një prej lojtarëve më të përkushtuar që ka njohur futbolli kosovar.

Këtë podcast mund ta ndiqni në TV Dukagjini çdo të shtune nga ora 17:10, ndërsa nuk do të ishte i mundur pa përkrahjen e sponsorit tonë Golden Eagle Energy Drink dhe Air Munich./Telegrafi/

The post Hekuran Kryeziu rrëfen karrierën në “Arenën e Yjeve”: Kaloi testet mjekësore te Juventusi, gazetari që e ftoi te Kosova dhe biseda me Shqipërinë appeared first on Telegrafi.

Në episodin e fundit të emisionit “Arena e Yjeve”, mysafir ishte mbrojtësi i Kombëtares së Kosovës, Lirim Kastrati, i cili ndau rrëfime ekskluzive nga karriera e tij mbresëlënëse që nga ditët në akademinë e Romës, e deri te përfaqësimi i Kosovës dhe sfidat në arenën ndërkombëtare.

Kastrati përshkroi përvojën e tij si pjesë e akademisë së famshme ‘Trigoria’ në Itali, ku theksoi se përveç talentit në fushë, kërkohej edhe përkushtim në shkollim dhe disiplinë jashtë saj. “Duhej të ishe futbollist dhe nxënës shembullor. Nuk mjaftonte vetëm topi”, tha ai.

Për të, takimi i parë me Francesco Tottin dhe Daniele De Rossin ishte si një ëndërr. “Kur Totti më thirri në emër, nuk po më besohej. U ndjeva menjëherë i pranuar”, kujton Kastrati, i cili kaloi disa javë me ekipin e parë të Romës dhe kishte bashkëlojtarë yje si Salah, Nainggolan dhe Alisson Becker.

Megjithatë, rruga drejt suksesit nuk ishte pa pengesa. Ai zbuloi se si një transferim i mundshëm te Bologna u bllokua për arsye personale nga trajneri Mihajlovic, për të cilin drejtues të klubit i kishin thënë hapur: “Ai e di nga vini ju të dy dhe nuk të do”.

Një tjetër moment kritik në karrierën e tij ishte kur pandemia COVID-19 i ndërpreu një marrëveshje të sigurt për të kaluar në Angli, ndërsa më vonë pati një tjetër rast të humbur për transferim në Bundesliga për shkak të rrethanave jashtë kontrollit të tij.

Kastrati foli edhe për golat e karrierës, duke përmendur një nga më të bukurit që e futi në historinë e klubit të madh hungarez. Ai ndau emocionet e një asisti të paharruar me fanellën e Kosovës, dhe tregoi për eksperiencën e tanishme në Poloni, ku tashmë po këshillon edhe Dion Gallapenin për hapat e parë te Widzew Lodz.

Ky episod i “Arena e Yjeve” ofroi një portret të plotë të Lirim Kastratit: një lojtar i përkushtuar, që ka kaluar përmes akademive më të mëdha evropiane, është përballur me sfida të rënda personale dhe profesionale, por gjithmonë ka qëndruar besnik pasionit për futbollin dhe krenarisë për Kosovën.

Këtë podcast mund ta ndiqni në TV Dukagjini çdo të shtune nga ora 17:10, ndërsa nuk do të ishte i mundur pa përkrahjen e sponsorit tonë Golden Eagle Energy Drink. /Telegrafi/

The post Lirim Kastrati rrëfen rrugëtimin unik në “Arena e Yjeve”: Nga Trigoria te Kosova, mes legjendave dhe sfidave personale appeared first on Telegrafi.