Seanca e radhës për dosjen “Partizani” do të zhvillohet këtë të hënë ndërsa SPAK ka thirrur si dëshmitar, ish-presidentin Bamir Topi.

SPAK po merr dëshmi të personave që kanë pasur role institucionale në periudhën kur janë ndërmarrë procedurat që lidhen me çështjen e kompleksit sportiv “Partizani”. Në seancat e mëparshme kanë dëshmuar ish-ministri i Mbrojtjes, Gazmend Oketa, ish-ministri Genc Rruli dhe ish-ministri i Kulturës, Turizmit, Rinisë dhe Sporteve, Ylli Pango.

Ish-kryeministri dhe kreu i PD, Sali Berisha përballet me akuzën për korrupsion, ndërsa dhëndri i tij, Jamarbër Malltezi dhe biznesmeni Fatmir Bektashi akuzohen për përfshirje në korrupsion dhe veprime të paligjshme për pastrimin e parave.

Dosja “Partizani”, Berisha në SPAK për masën detyrim paraqitje

The post Gjyqi “Partizani”, ish-presidenti Topi paraqitet në Gjykatën e Posaçme për të dëshmuar (VIDEO) appeared first on Euronews Albania.

Gjykata e Shkodrës këtë të hënë ka marrë vendimin dhe ka caktuar masën e sigurisë “Arrest në shtëpi” për Arvin Fregjajn, babanë e tij Agron Mehmeti, si dhe për Arben Kepëcën, vëllain e 32-vjeçarit Vildan Kepëca, i cili mbeti i plagosur gjatë konfliktit të ndodhur në ambientet e Poliklinikës në lagjen “Vasil Shanto”.

Gjatë seancës gjyqësore, Arvin Fregjaj dhe Agron Mehmeti kanë deklaruar se ngjarja ka ndodhur në gjaknxehtësi e sipër, pas një konflikti të çastit, duke theksuar se nuk kanë pasur për qëllim të dëmtonin rëndë 32-vjeçarin.

Në vendimin e saj, gjykata ka arsyetuar se, në këtë fazë të procesit, nuk është provuar që mjeti me të cilin është goditur Vildan Kepëca të jetë armë e ftohtë. Për rrjedhojë, akuza për mbajtje pa leje të armës së ftohtë nuk është konsideruar e mbështetur me prova në këtë fazë procedurale.

Po ashtu, masa “Arrest në shtëpi” është caktuar edhe për Arben Kepëcën, i cili u arrestua nga Policia pak orë pas plagosjes, pasi dyshohet se u nis me armë zjarri për t’u hakmarrë ndaj autorit të dyshuar të sulmit.

Hetimet vijojnë nën drejtimin e Prokurorisë për zbardhjen e plotë të rrethanave të konfliktit.

The post Plagosja në Poliklinikën e Shkodrës, Gjykata cakton masën ‘arrest në shtëpi’ për 3 personat e përfshirë në konflikt appeared first on Euronews Albania.

Meteorologia Lajda Porja në një lidhje live për Euronews Albania bëri parashikimin e motit dhe u shpreh se dita e sotme do të jetë dita e fundit për sa i përket të nxehtit afrikan.

Meteorologia u shpreh gjithashtu se këtë javë territori shqiptar do të përfshihet nga mot i paqëndrueshëm dhe temperatura drejt rënies. Sakaq, sipas saj, duke filluar që nga dita e mërkurë dhe në vijim, do të jetë mot mjaft i freskët, i cili do të zgjasë edhe gjatë fundjavës.

 “Sot do të jetë edhe dita e fundit ku do të kemi këtë valën e nxehtë afrikane. Presim temperatura shumë të larta edhe gjatë ditës së sotme, 39-40 gradë do të jenë pothuajse të gjitha qytetet kryesore të Shqipërisë.

Megjithatë, kjo valë e nxehtë afrikane tashmë po largohet gradualisht. Parashikohet që dita e nesërme të sjellë një rënie, e cila do të jetë me 2 gradë. Megjithatë mbetet sërish një mot i nxehtë me vlera 39 gradë. Nesër presim që të kemi shumë vranësira, të ketë edhe lagështirë dhe në fakt të mos ndjehet shumë ai freskimi i moti.

Duke filluar që nga dita e mërkurë dhe në vijim, ne do kemi një mot mjaft të freskët, i cili do të zgjasë duke përfshirë edhe fundjavën. Do të bien ndjeshëm temperaturat duke filluar që nga e mërkura dhe deri në fundjavë. Presim një maksimum 34-35° gjatë ditës së mërkurë. Rreth kësaj vlere do të jetë e enjtja, do të jetë dita e premte, e cila do të ketë jo më shumë se 30°. Po ashtu edhe fundjava do të jetë thuajse në 30 apo 31°.

Për sa i përket reshjeve, sot do të kemi një mot i cili do të jetë i qëndrueshëm, do ketë më shumë kthjellime, më pak vranësira. Parashikohet që ditën e martë të kemi në mbrëmje vonë reshje, të cilat do jenë kryesisht në skajin verior.

Do të jetë dita e mërkurë e cila do të sjellë një sistem vranësirash duke sjellë rrebeshe shiu dhe erë të fortë, kryesisht në veri dhe në qendër. Nuk përjashtohet të martën gjatë natës, në mëngjesin e të mërkurës, edhe qarku i Vlorës.

Parashikohet që moti të jetë i qëndrueshëm në fundjavë edhe pse termometri do të jetë jo më shumë se 30 apo 31° dhe do të kemi kryesisht kthjellime dhe vranësira. Pra, përmirësohet theksuar duke filluar që nga dita e mërkurë do të kemi rënie të temperaturave edhe në vlerat minimale, nga netët tropikale që kemi përjetuar pothuajse gjatë gjithë këtyre ditëve, do të ulet termometri ndjeshëm dhe mëngjesi i të enjtes dhe të premtes do të jetë mjaft i freskët.

Do të kemi prezente stuhitë e forta të erës duke filluar që nga e mërkura dhe të paktën deri në fundjavë, sidomos në tokë por edhe në brigjet detare”, u shpreh meteorologia.

E pyetur nga gazetarja Esmeralda Mulaj se si do të jetë moti në vendet e rajonit, meteorologia  u shpreh se e njëjta situatë reshjesh do të përfshijë edhe rajonin.

“Republika e Kosovës do të ketë rrebeshe shiu duke filluar që nga e marta. Sot është dita më e nxehtë ku Kosova regjistron 35 gradë, por nga e marta dhe në vijim termometri do të zbresë me 2-3 gradë të martën dhe të mërkurën, dhe ndjeshëm, madje presim që termometri të premten, e cila do të jetë edhe dita më e freskët e kësaj jave në Kosovë, të regjistrojë jo më shumë se 25 apo 26°. Parashikohet në fakt që era, rrebeshet dhe stuhitë e breshërit të jenë dominante në pjesën më të madhe të Kosovës.

Maqedonia e Veriut sot do të regjistrojë një temperaturë mjaft të lartë, 37-38° në qytetin e Shkupit. Parashikohet që sot të jetë mot i kthjellët dhe i nxehtë. E marta, shtohet lagështira, ulet termometri në 35° por ndjehet sërish nxehti, duke qenë se nuk është se do të kemi prezencë të reshjeve. Reshjet do të fillojnë të mërkurën. Të mërkurën, të enjten dhe të premten edhe Maqedonia e Veriut do të ketë një mot të freskët dhe të paqëndrueshëm”, përfundoi meteorologia.

The post Nga i nxehti ekstrem drejt reshjeve të shiut, parashikimi i motit për pjesën e dytë të korrikut appeared first on Euronews Albania.

Ministria e Shëndetësisë në Kongo njoftoi se të paktën 930 persona kanë vdekur nga shpërthimi i Ebolës, me 37 vdekje të reja të regjistruara në një periudhë 24-orëshe nga e premtja deri të shtunën.

Vdekjet u regjistruan nga 2,344 raste të konfirmuara që nga e shtuna, tha ministria e shëndetësisë. Shpërthimi i Ebolës që u shpall në Kongon lindore më 15 maj është shpërthimi më i shpejtë i Ebolës i regjistruar ndonjëherë.

Virusi Bundibugyo, përgjegjës për shpërthimin, është më pak i zakonshëm se të tjerët që shkaktojnë sëmundjen Ebola dhe nuk ka vaksinë ose trajtim të miratuar.

Ebola është shumë ngjitëse dhe mund të transmetohet te njerëzit nga kafshët e egra. Përhapet në popullatën njerëzore nëpërmjet kontaktit me lëngjet trupore si të vjellat, gjaku ose sperma, dhe me sipërfaqe dhe materiale të kontaminuara si shtrati dhe veshjet. Sëmundja është e rrallë, por e rëndë dhe shpesh fatale.

Rritja e numrit të vdekjeve vjen ndërsa frika për sigurinë ka kufizuar reagimin në provincën më të prekur të Iturit. Janë prekur gjithsej pesë provinca, të gjitha në rajonin lindor ku dhuna rebele është e përhapur.

Të paktën 12 sulme – kryesisht të nxitura nga skepticizmi dhe thashethemet – janë regjistruar kundër institucioneve dhe ekipeve shëndetësore që nga shpallja e shpërthimit në mesin e majit, thanë autoritetet të shtunën. Ndërkohë, shumë punonjës shëndetësorë kanë lënë punën e tyre ndërsa protestojnë për mungesën e pagesës.

Të paktën 36 punonjës shëndetësorë të infektuar me virusin kanë vdekur. Organizata Botërore e Shëndetësisë javën e kaluar shprehu shqetësime se 80% e rasteve të reja të Ebolës po dilnin nga zinxhirë transmetimi të panjohur, një shenjë se shpërthimi po përhapet më shpejt nga sa mund të ndjekin zyrtarët e shëndetësisë, pavarësisht një përgjigjeje në zgjerim.

Ministria e Shëndetësisë e Kongos tha në përditësimin e saj të fundit se 724 pacientë janë aktualisht në izolim dhe në spitale, dhe se po intensifikon përpjekjet e reagimit në zonat shëndetësore të prekura.

The post 930 viktima nga shpërthimi i Ebolës në Kongo appeared first on Euronews Albania.

Kreu i PD-së, Sali Berisha është paraqitur këtë të hënë në ambientet e Prokurorisë së Posaçme kundër Korrupsionit dhe Krimit të Organizuar, SPAK në zbatim të masës së sigurisë të vendosur ndaj tij nga GJKKO, lidhur me dosjen hetimore të ish-kompleksit sportiv “Partizani”.

Ashtu siç ka ndodhur në çdo paraqitje të kryedemokratit në Prokurorinë e Posaçme, ai është pritur nga mbështetës me të cilët është përshëndetur. Pas daljes nga ambientet e SPAK ai ka folur për mediat.

Ish-kryeministri Berisha përballet me akuzën për korrupsion, ndërsa dhëndri i tij, Jamarbër Malltezi dhe biznesmeni Fatmir Bektashi akuzohen për përfshirje në korrupsion dhe veprime të paligjshme për pastrimin e parave.

The post Dosja “Partizani”, Berisha në SPAK për masën detyrim paraqitje appeared first on Euronews Albania.

Zëvendëspresidenti JD Vance dhe bashkëshortja e tij, zonja e dytë Usha Vance, njoftuan të dielën lindjen e fëmijës së tyre të katërt, i pari i një zëvendëspresidenti në detyrë në më shumë se 150 vjet.

I lindur të dielën, Alec Neel Vance u bashkohet vëllezërve dhe motrave më të mëdhenj, Ewan, nëntë vjeç, Vivek, gjashtë vjeç, dhe Mirabel, katër vjeç.

Vance njoftoi lindjen në mediat sociale me një deklaratë të nënshkruar nga ai dhe gruaja e tij.

“Jemi të emocionuar të njoftojmë se djali ynë, Alec Neel Vance, lindi këtë mëngjes. Usha dhe foshnja janë të lumtur dhe të shëndetshëm, dhe fëmijët tanë janë shumë të gëzuar që takojnë vëllain e tyre të vogël”, thuhet në deklaratë.

Ata falënderuan mjekët dhe stafin në Qendrën Mjekësore Ushtarake Kombëtare Walter Reed dhe ekipin mjekësor të Shtëpisë së Bardhë.

Familja në rritje e nënpresidentit republikan është në përputhje me avokimin e tij të zjarrtë që amerikanët të kenë më shumë fëmijë. Ai gjithashtu ka sugjeruar se vrasja në vitin 2025 e aktivistit konservator Charlie Kirk, i cili ishte miku i tij, ndikoi në vendimin për të pasur një fëmijë tjetër.

Vance, një ish-marins amerikan, shprehu vazhdimisht alarmin për rënien e nivelit të lindjeve në Amerikë, ndërsa nisi karrierën e tij politike në vitin 2021 me një kandidaturë për një vend në Senatin e SHBA-së nga Ohajo. Si zëvendëspresident, ai tha në Uashington në tubimin anti-abort të vitit 2025, Marshimi për Jetën: “Dua më shumë foshnje në Shtetet e Bashkuara të Amerikës”.

Usha Vance, vajza e emigrantëve nga India, kishte qenë tashmë subjekt i njëfarë vëmendjeje publike për shkak të bashkëshortit të saj. Shtatzënia e saj, e cila u njoftua në janar, e përforcoi këtë vëmendje, pasi është e rrallë që personat që mbajnë postet më të larta publike të Shteteve të Bashkuara t’u shtojnë familjeve të tyre anëtarë gjatë shërbimit.

Herën e fundit që një zëvendëspresident në detyrë u bë baba i ri ishte në vitet 1800.

The post JD Vance bëhet baba për herë të katërt, lind fëmija i parë i një zv.presidenti në detyrë pas më shumë se 150 vitesh appeared first on Euronews Albania.

Dy orë para nisjes së seancës plenare në Kuvend kanë nisur të merren masat nga policia. Këto masa vijnë pasi qytetarët kanë njoftuar protestë para Kuvendit ku pritet këtë të hënë të zhvillohet në orën 12:00 seanca plenare.

Siç shihet edhe nga pamjet, një makinë ujëhedhëse është vendosur para Parlamentit ndërsa pritet të shtohen forcat e policisë në rast përshkallëzimi të tensioneve. Gjithashtu para Parlamentit është vendosur edhe një gardh metalik.

The post Protesta e paralajmëruar e qytetarëve, vendoset përpara Parlamentit një makinë ujëhedhëse (VIDEO) appeared first on Euronews Albania.

Lionel Scaloni dështoi ta udhëhiqte Argjentinën drejt një tjetër titulli, me Spanjën superiore që iu përkul Albiceleste-s dhe fitoi trofeun e Kupës së Botës. Trajneri i kombëtares argjentinase u shfaq i ngarkuar emocionalisht në konferencën për shtyp pas finales dhe shpërtheu në lot, në pamundësi të përfundonte deklaratat e tij.

Sakaq, trajneri 48-vjeçar la të hapur mundësinë e largimit nga kombëtarja e atdheut të tij, me kontratën që i skadon në muajt në vijim.

“Nuk kam folur me Leon,” tha ai fillimisht në lidhje me të ardhmen e Lionel Messit, përpara se të vazhdonte të fliste për të ardhmen e tij, duke thënë se do të flas me presidentin.

“Kam një ide të përgjithshme se çfarë dua të bëj. Do ta respektoj kontratën time dhe pastaj do ta shohim. Gjithashtu ndiej nevojën për të menduar. Nuk e di nëse do të jetë e mundur të përjetoj diçka kaq të madhe përsëri. Ndoshta. Do të duhet ta diskutojmë. Jam mirënjohës ndaj presidentit për këtë mundësi. Ne u përpoqëm deri në momentin e fundit, si stafi i trajnerëve ashtu edhe lojtarët, të jepnim gjithçka, dhe mendoj se është e drejtë që e shfrytëzoj këtë kohë për të menduar. Ky vend është i mrekullueshëm. Është një vend ëndrrash, një vend që nuk e kisha imagjinuar kurrë se do ta gjeja. Le të shohim nëse mund të ndalem.

Askush nga stafi i trajnerëve nuk e kishte imagjinuar kurrë se do të ishte në këtë pozicion. Për të vazhduar, duhen shumë gjëra, si të bësh një fillim të ri dhe të rindërtosh një ekip si ky, gjë që nuk ka gjasa të ndodhë përsëri. Dhe kjo më dhemb, më dhemb shumë. Më vjen keq”, u shpreh ai.

Teksa ishte drejt mbylljes së deklaratës së tij, Skaloni kërkoi falje dhe u ngrit i ngarkuar emocionalisht nga tavolina.

Following their World Cup final defeat to Spain, Argentina manager Lionel Scaloni walked out of his post-match press conference after becoming too emotional to carry on. pic.twitter.com/c7NQjN2MG8

— BBC Sport (@BBCSport) July 20, 2026

The post Scaloni paralajmëron largimin nga Argjentina pas finales së Kupës së Botës, shpërthen në lot gjatë konferencës për mediat (VIDEO) appeared first on Euronews Albania.

Kryeministri spanjoll Pedro Sanchez dhe Presidenti i SHBA-së Donald Trump u takuan ballë për ballë të dielën , pas gati dy vitesh tensionesh publike dhe përpjekjesh të dështuara për të përmirësuar marrëdhëniet midis Madridit dhe Uashingtonit.

Të dy udhëheqësit u takuan në finalen e Kupës së Botës 2026 në stadiumin MetLife në New Jersey, ku Spanja u përball me Argjentinën. Sanchez dhe Trump u ulën në tribunat zyrtare, në një takim të shkurtër që fitoi interes politik për shkak të tensionit që i kishte paraprirë midis dy qeverive.

Në finale morën pjesë edhe Mbreti Felipe VI i Spanjës, Mbretëresha Letizia dhe Princeshat Leonor dhe Sofia, me të gjithë delegacionin spanjoll që u shfaq në fushë.

Takimi Sanchez-Trump erdhi pas muajsh konfrontimi, me shpenzimet e mbrojtjes të Spanjës dhe kontributin e vendit në NATO si një pikë kyçe ngërçi. Përplasja kishte filluar të përmirësohej në javët e fundit pasi presidenti amerikan deklaroi se Spanja ishte “shlyer plotësisht” duke rënë dakord për një rritje të konsiderueshme të angazhimeve të saj mbrojtëse në Samitin e NATO-s në Ankara muajin e kaluar.

Ky qëndrim ishte një ndryshim i qartë i tonit krahasuar me atë që Trump kishte thënë gjatë Samitit, kur ai e kishte përshkruar Spanjën si një “kauzë të humbur” dhe madje kishte kërcënuar me hakmarrje tregtare. Megjithatë, me t’u kthyer në Uashington, presidenti amerikan ndoqi një qëndrim më pajtues ndaj Madridit.

Nga ana e tij, Pedro Sanchez ka argumentuar vazhdimisht se Spanja i ka “tejkaluar detyrimet e saj”, duke rritur ndjeshëm shpenzimet e saj ushtarake.

Donald Trump u shfaq gjithashtu në ceremoninë e trofeut, teksa ishte gati të festonte me ekipin spanjoll për fitimin e Kupës së Botës përpara se të merrej nga Presidenti i FIFA-s, Gianni Infantino.

Hyrja e presidentit amerikan në fushë për ceremoninë e medaljeve, me Infantinon në krah të tij, u shoqërua me fishkëllima të forta nga spektatorët.

Megjithatë, Trump ua dha medaljet e argjendta argjentinasve. Ai madje i dha edhe pak më shumë merita Lionel Messit.

View this post on Instagram

A post shared by EL PAÍS (@el_pais)

The post Pas muajsh tensionesh politike SHBA-Spanjë, Sanchez dhe Trump takohen në finalen e Kupës së Botës appeared first on Euronews Albania.

Një person është vrarë dhe disa të tjerë janë plagosur pasi ushtria amerikane sulmoi qytetin në veriperëndim të Iranit.

Majid Farshi, drejtor i përgjithshëm i menaxhimit të krizave në provincën e Azerbajxhanit Lindor tha se sulmi në orët e para të mëngjesit kishte në shënjestër një bazë ushtarake në jugperëndim të Tabrizit.

“Agjencitë e shpëtimit, sigurisë dhe zbatimit të ligjit ishin të pranishme në vendngjarje në momentet e para pas incidentit dhe po merren masat e nevojshme për të menaxhuar krizën, për t’u ofruar ndihmë viktimave dhe për të hetuar shkallën e saktë të këtij krimi”, tha Farshi.

Sulmi ndaj Tabrizit në Iranin verior është i pari përtej jugut që nga përshkallëzimi i fundit që filloi 10 ditë më parë.

Goditet një anije pranë brigjeve të Omanit, përfshihet nga flakët

The post Sulmet amerikane në Iran, vritet një person dhe plagosen disa të tjerë appeared first on Euronews Albania.

Në shtator të vitit 2024, ekspertët holandezë të sigurisë kibernetike zbuluan se dikush kishte depërtuar në sistemet kompjuterike të Policisë Kombëtare dhe kishte hyrë në llogarinë e emailit të një punonjësi të policisë.

Hakeri, ose grupi, kishte përdorur një informacion të vjedhur – një pjesë e të dhënave që ruhen përkohësisht në pajisjen e një përdoruesi nga shfletuesit e internetit – për të hyrë në librin elektronik të adresave të personit.

Kjo do të thoshte se hakeri kishte qasje në të gjitha kontaktet në emailin e personit; duke përfshirë potencialisht të gjithë 64.000 punonjësit e forcës policore, për të mos përmendur emrat e mundshëm të burimeve ose informatorëve të përdorur nga policia.

Për herë të parë, “Holanda kishte rënë viktimë e një sabotimi të qëllimshëm kibernetik nga një grup i mbështetur nga Rusia”, përfundoi agjencia e inteligjencës ushtarake e vendit në një raport. Grupi, të cilit më vonë iu vu nofka “Laundry Bear”, “ka dëshmuar se është veçanërisht i suksesshëm”.

“Shpërtheu në media. Shkaktoi shumë shqetësim” mes ligjvënësve holandezë, agjencive të sigurisë dhe publikut të gjerë, tha Bart van den Berg, i cili ishte analisti kryesor i inteligjencës dhe menaxher i krizave në Qendrën Kombëtare të Sigurisë Kibernetike të qeverisë.

Ai shtoi: “Ishte një çështje e ndjeshme”.

Dy vjet më vonë, Denis Obrezko, një programues IT 35-vjeçar nga rajoni qendror rus i Samarës, u ndalua më 6 nëntor nga policia tajlandeze mbi bazën e një fletarrestimi amerikan. Në dhomën e tij të hotelit në qytetin turistik Phuket, policia sekuestroi laptopin, telefonin celular dhe një portofol digjital të Obrezkos.

Javën e kaluar, rreth një muaj pasi u ekstradua, Obrezko doli për herë të parë para një gjykate federale në Boston, ku u deklarua i pafajshëm për akuzat se kishte hakuar pothuajse një duzinë kompanish dhe agjencish qeveritare amerikane.

Ai përballet me burgim deri në 10 vjet.

Arrestimi – dhe ekstradimi – i hakerëve rusë mbi bazën e fletarrestimeve amerikane në mbarë botën dikur ishte një dukuri e zakonshme. Autoritetet në Moskë një kohë e akuzuan SHBA-në se po kryente “gjueti” ndaj qytetarëve rusë.

Kjo ka qenë më pak e zakonshme gjatë pesë vjetëve të fundit. Një nga arsyet pse rasti i Obrezkos është i pazakontë. Ajo që është gjithashtu e pazakontë është se Obrezko dikur punonte për agjencinë kryesore të inteligjencës së Rusisë, Shërbimin Federal të Sigurisë, e njohur si FSB.

Dhe, kompania private për të cilën ai punonte në kohën e sulmeve të dyshuara thuhet se ishte e lidhur me një tjetër ish-oficer të FSB-së. Edhe ai mund të ketë qenë i pakujdesshëm.

“Dua të them, çfarë po i thoshte mendja të shkonte në Tajlandë?” tha van den Berg. “Këta njerëz rrezikojnë të arrestohen kur ndodhen jashtë Rusisë”.

“Diçka në llogaritjet e tij kriminale ruse shkoi keq”, shtoi ai. “Ose nënvlerësoi inteligjencën perëndimore. Ose mbivlerësoi mbrojtjen e tij” nga shteti rus.

“Zoti Obrezko është deklaruar i pafajshëm dhe synon ta mbrojë çështjen me vendosmëri në gjykatë, si nga pikëpamja ligjore ashtu edhe faktike”, tha avokati mbrojtës Maksim Nemtsev.

“Meqenëse çështja është ende në shqyrtim, nuk besojmë se është e përshtatshme të debatojmë faktet në media”, shtoi ai.

Biznes vendor

Rreth tre vjet para se të hakohej sistemi i policisë holandeze, organizata e themeluar nga i ndjeri Aleksei Navalny, aktivisti rus kundër korrupsionit, raportoi se më shumë se gjysmë milioni adresa emaili të përdorura për regjistrim në organizatën e Navalnyt ishin vjedhur.

Shumë prej atyre të cilëve iu vodhën emailet më vonë raportuan se kishin marrë mesazhe kërcënuese.

Operacioni përfshinte dikë që krijonte emra domenesh të rrejshme – faqe interneti të shkruara qëllimisht gabim që ngjanin me ato të vërteta – dhe më pas i përdorte ato për të dërguar emaile. Ndonjëherë ato përmbanin mesazhe të infektuara me viruse.

Një hetim i vitit 2021 nga Current Time gjurmoi një adresë emaili te një sërë domenesh fiktive të përdorura për të ngacmuar biznese në Samara, një rajon përgjatë lumit Vollga në Rusinë qendrore.

Domenet ishin të lidhura me një biznesmen të quajtur Mikhail Dudin, i cili thuhet se bashkëpunonte me një ish-oficer të FSB-së nga rajoni, Pavel Seleznev. As Dudin dhe as Seleznev nuk ishte e mundur t’i kontaktonim për koment.

Emri i Dudinit shfaqet në një bazë të dhënash të përdorur nga GetContact, një aplikacion i njohur që ndihmon njerëzit të identifikojnë telefonatat. Aplikacioni u lejon përdoruesve të kërkojnë një numër telefoni dhe ta krahasojnë atë me emra të tjerë llogarish.

Sipas Current Time, llogaria e Dudinit në GetContact shfaqet me nofkën “Ethan Hunt” – një referencë ndaj personazhit kryesor të filmave aksion “Mission: Impossible”.

Një nga kompanitë e Dudinit quhej Yutek-NN, e cila e përshkruan veten si një kompani që përdor “teknologji të avancuar, koncepte inovative dhe dizajn kreativ”. Kompania ishte e licencuar për të shitur pajisje teknike të specializuara të projektuara për mbledhje të fshehtë informacioni, një licencë që zakonisht lëshohet nga FSB-ja.

Sipas dokumenteve të paraqitura në gjykatën amerikane, Obrezko ishte zëvendësdrejtor i Yutek, të cilës iu bashkua në vitin 2023.

“Është misioni juaj, nëse vendosni ta pranoni”

Një llogari në platformën ruse të rrjeteve sociale VK tregon se Obrezko u diplomua në Universitetin Bauman, një shkollë teknike në Moskë që u identifikua nga një konsorcium mediash si një vend ku trajnohen hakerët e qeverisë.

Përpara se t’i bashkohej Yutekut, Obrezko punoi për FSB-në midis viteve 2012 dhe 2017, sipas një deklarate nën betim të FBI-së, e cila u bë publike në kohën e ekstradimit të tij. Nuk është e qartë se çfarë bënte ai atje.

Sipas Reuters, Obrezko punoi për Kaspersky Lab, zhvilluesin e njohur të programeve antivirus me seli në Moskë, përpara se t’i bashkohej Ministrisë ruse të Situatave Emergjente; në vitin 2021 ai ishte folës i ftuar në një aktivitet të organizuar nga Universiteti Teknik i Moskës për Komunikime dhe Informatikë. Ai u prezantua si zëvendësdrejtor i qendrës së informacionit dhe analizës së ministrisë.

Në qershor dhe korrik 2024, para se të vërehej depërtimi në sistemin e policisë holandeze, FBI-ja u njoftua nga një partner privat me bazë në SHBA – që besohet të ketë qenë Microsoft – se kompani dhe agjenci qeveritare amerikane dhe evropiane po viheshin në shënjestër.

Punonjësit e Yutekut vodhën emaile nga “agjenci të ndryshme qeveritare të vendeve të NATO-s në mbarë Evropën, si dhe nga organizata të tjera që mbështesin vazhdimin e rezistencës së Ukrainës ndaj pushtimit rus”, sipas deklaratës nën betim.

Yutek “i kreu këto operacione të spiunazhit kibernetik me urdhër të qeverisë ruse”.

Sipas deklaratës, hetuesit e FBI-së gjurmuan emailet fiktive tek një grup tjetër emailesh dhe më pas te një seri transaksionesh me kriptovaluta gjatë viteve 2024 dhe 2025. Një nga transaksionet u gjurmua deri te një ofrues interneti në Samara.

Në fund, hetuesit thanë se zbuluan se adresa e emailit e përdorur për transaksionet me kriptovaluta ishte e lidhur drejtpërdrejt me një adresë tjetër Google në emrin e vërtetë të Obrezkos.

E njëjta adresë Google ishte përdorur për të regjistruar disa llogari në rrjete sociale – përfshirë X dhe Instagram – si dhe një llogari PayPal, e cila përdorte gjithashtu të njëjtin numër telefoni celular, të identifikuar si numri i Obrezkos, dhe kishte të shënuar datën e lindjes së tij.

I njëjti emër përdoruesi dhe e njëjta fotografi u përdorën gjithashtu për disa llogari në rrjete sociale, përfshirë Instagramin.

Më 27 maj 2025, Qeveria holandeze i identifikoi publikisht hakerët si “aktorë kërcënues të mbështetur nga shteti rus” dhe grupin e quajti “Laundry Bear”. Një raport i Microsoftit i publikuar po atë ditë e quajti grupin “Void Blizzard”.

Megjithatë, as raporti holandez dhe as Microsoft nuk identifikojnë individë të caktuar, madje as kompani të caktuara të përfshira në sulm.

Disa orë pas publikimit të raportit të Microsoftit, sipas deklaratës së FBI-së, Obrezko i dërgoi email “Ethan Hunt”-it – të cilin FBI-ja e quan “bashkëkomplotist të paidentifikuar” – për t’u takuar më vonë atë ditë.

Sipas Alexander Leslie, këshilltar i lartë në organizatën amerikane të kërkimeve kibernetike Recorded Future, gabimi i Obrezkos ishte se ripërdori të njëjtin emër përdoruesi dhe numrin e tij rus të telefonit në llogari të ndryshme emaili dhe rrjete sociale.

“FBI-ja nuk duket se e identifikoi atë përmes një gabimi katastrofik. Hetuesit ndërtuan gradualisht një zinxhir provash që përforconin njëra-tjetrën, bazuar në një seri dështimesh më të vogla operative”, tha ai.

Një haker “mund të jetë shumë efektiv në fitimin e qasjes, vjedhjen e informacionit dhe për të mos u zbuluar”, tha Leslie, “por më pak efektiv në mbrojtjen e identitetit të tij gjatë një hetimi afatgjatë të kundërzbulimit.”

Gjuetia ndaj hakerëve

Nuk është e qartë saktësisht se çfarë po bënte Obrezko në Tajlandë kur mbërriti atje më 31 tetor të vitit të kaluar.

Deri në vitin 2021, arrestimi i shtetasve rusë të dyshuar për kryerjen e krimeve kibernetike me kërkesë të autoriteteve amerikane ndodhte rregullisht në mbarë botën, gjë për të cilën Moska ankohej vazhdimisht.

Në tetor 2016, një rus i quajtur Yevgeny Nikulin u arrestua sapo hyri në Republikën Çeke. I kërkuar për organizimin e një sulmi kibernetik ndaj kompanisë së rrjeteve sociale LinkedIn, Nikulin u dënua me shtatë vjet burgim në SHBA në vitin 2020 dhe u dëbua në Rusi tri vjet më vonë.

Në mars 2021, Vladislav Klyushin, një sipërmarrës i teknologjisë së informacionit i lidhur me Kremlinin, u arrestua në Zvicër, i akuzuar se kishte përdorur njoftime për shtyp të hakuara për të kryer transaksione në bursë. Autoritetet amerikane e lidhën atë me një oficer të inteligjencës ushtarake ruse, i cili ishte akuzuar për hakimin e kompjuterëve të Partisë Demokratike në vitin 2016.

I dënuar me nëntë vjet burgim, Klyushin u lirua në vitin 2024 dhe u kthye në Rusi si pjesë e një shkëmbimi të madh të të burgosurish, që përfshinte edhe shtetas amerikanë të mbajtur në burgjet ruse.

Në vitin 2021, një seri sulmesh kibernetike me ransomuer – ku hakerët përdorin programe keqdashëse për të bllokuar sistemet kompjuterike dhe i zhbllokojnë ato vetëm nëse paguhen – goditën spitale, kompani softuerike, përpunues të mishit dhe kompani të tjera në Shtetet e Bashkuara.

Autoritetet amerikane thanë se ransomueri – i quajtur REvil – operonte nga Rusia.

Pasi presidenti Joe Biden e paralajmëroi drejtpërdrejt udhëheqësin rus Vladimir Putin që të merrte masa kundër këtij problemi në korrik 2021, FSB-ja zhvilloi bastisje të gjera ndaj anëtarëve të dyshuar të grupit në Moskë dhe gjetkë. Agjencia tha se kjo ishte bërë me kërkesë të autoriteteve amerikane.

Për studiuesit dhe hetuesit, problemet e vazhdueshme me krimin kibernetik rus burojnë nga kufijtë e paqartë midis grupeve kriminale dhe agjencive të inteligjencës, si FSB-ja.

“Do të ishte një mënyrë shumë perëndimore të menduari të supozoje se në Rusi ekzistojnë dallime të qarta midis asaj që është shtet dhe asaj që është kriminale”, tha van den Berg.

Ekspertët perëndimorë thonë gjithashtu se kriminelët kibernetikë rusë veprojnë me bindjen se, për sa kohë nuk synojnë individë, kompani apo agjenci qeveritare në Rusi, ata kanë liri të plotë veprimi.

Në rastin e sulmit ndaj Holandës, van den Berg tha se një kriminel i zakonshëm kibernetik mund të përpiqej t’i zhvaste para personit të synuar, ta shantazhonte ose të përfitonte nëpërmjet ndonjë transaksioni tregtar.

Kjo nuk ndodhi në këtë rast.

“Po përballemi me një sulm kriminal apo me një model biznesi? Meqenëse modeli i biznesit nuk është i qartë, mund ta pyesni veten se kush e paguan këtë njeri”, tha van den Berg. “A ia shet ai shtetit të dhënat e vjedhura apo është punësuar drejtpërdrejt prej tij? Nëse rezulton se është kështu, atëherë kemi të bëjmë me një nivel të përfshirjes së shtetit në gjithë këtë çështje”./ REL

The post I dyshuar si haker i FSB-së ruse, Denis Obrezko përballet me 10 vjet burgim në SHBA appeared first on Euronews Albania.

Eksplorimi i hapësirës ndonjëherë ka pasoja që nuk janë menjëherë të dukshme. Sipas shkencëtarëve të NASA-s, një copë rakete mund të përplaset me Hënën në fillim të gushtit.

Në janar të vitit 2025, rreth një vit e gjysmë më parë, kompania SpaceX e Elon Musk lëshoi ​​raketën e saj “Falcon 9”, duke dërguar dy anije uljeje në Hënë. Tani, astronomi amerikan Bill Gray dhe agjencia hapësinore amerikane NASA, të cituar nga agjencia e lajmeve dpa, paralajmërojnë se një fazë e sipërme e raketës mund të godasë aksidentalisht Hënën. Llogaritjet sugjerojnë se impakti do të ndodhë më 5 gusht.

Portali hapësinor Space.com raporton se një diskutim në panel me ekspertë mbi ndikimin e afërt u mbajt në fillim të korrikut. Ai u organizua nga Instituti Virtual i Kërkimeve për Eksplorimin e Sistemit Diellor (SSERVI) i NASA-s. Hëna është një mjedis dinamik, tha vëzhguesi hënor Brian Day për faqen, ndryshime dhe ndikime ndodhin.

A do të jetë e dukshme përplasja nga Toka?

Ekspertët aktualisht po debatojnë nëse përplasja do të jetë e dukshme nga Toka. Nga perspektiva e Tokës, përbërësi i raketës mund të godasë pikërisht në skajin e diskut hënor. Reja e pluhurit e krijuar në këtë proces mund të ndriçohet nga Dielli dhe kështu të bëhet e dukshme, shton faqja.

Faza e sipërme e raketës “Falcon 9” peshon rreth katër ton. Sipas portalit Space.com , copëza e mbeturinave hapësinore aktualisht po udhëton me më shumë se dy kilometra në sekondë.

NASA i konsideron të ulëta shanset për të vëzhguar përplasjen nga Toka.

“Mendoj se do të jetë shumë, shumë e vështirë për t’u parë, nëse jo e pamundur”, tha William Cooke, një menaxher në agjencinë hapësinore amerikane, sipas agjencisë së lajmeve dpa.

Një incident i ngjashëm ndodhi katër vjet më parë. Imazhet nga sonda “Lunar Reconnaissance Orbiter” treguan mbeturina hapësinore që godisnin Hënën. Shkencëtarët e NASA-s dyshonin se një pjesë e një rakete të vjetër kineze ishte pas përplasjes, por Kina i hodhi poshtë këto raporte. Impaktet në Hënë ndodhin gjithashtu në mënyrë të përsëritur për qëllime kërkimore, megjithëse në ato raste ato janë të planifikuara.

1.7 milion satelitë të planifikuar ‘shkatërrues’ për astronominë duke e bërë qiellin e natës më të ndritshëm

Përplasja e parashikuar më 5 gusht 2026 nuk ishte e planifikuar. Kompania e Elon Musk nuk i është përgjigjur ende një kërkese të DPA-së për koment.

The post Alarm në hapësirë, NASA: Pjesë e raketës Falcon 9 mund të përplaset me Hënën më 5 gusht appeared first on Euronews Albania.

Këtë të enjte do te zhvillohet seanca e radhës në Kuvend. Seanca pritet të nisë në orën 12:00 ku do të të shqyrtohen një sërë projektligjesh, projektrezolutash dhe raporte vjetore të institucioneve.

Seanca do të nisë me miratimin e procesverbalit të mbledhjes së datës 16 korrik 2026. Gjithashtu do të paraqitet Raporti i Këshillit Kombëtar të Integrimit Europian për vitin 2025.

Në rendin e ditës është edhe shqyrtimi i projektligjit “Për shoqëritë evropiane të bashkëpunimit (SHEB)” dhe disa projektrezoluta. Gjithashtu është njoftuar se do të mbahet një protestë para ambienteve të Kuvendit.

Rendi i ditës:

Në mbështetje të nenit 7, pika 6, dhe nenit 27/1, pika 2, të Rregullores së Kuvendit, bazuar në kalendarin e punimeve të Kuvendit për periudhën 6 – 24 korrik 2026 dhe në vendimin nr. 11, datë 16.7.2026, të Konferencës së Kryetarëve,

URDHËROJ:

I. Mbledhjen e Kuvendit në seancë plenare në datën 20.7.2026, ora 12:00.

II. Rendi i ditës i seancës plenare është si më poshtë:

1. Miratimi i procesverbalit të seancës plenare të datës 16.7.2026.

2. Njoftime.

3. Raporti i Këshillit Kombëtar të Integrimit Europian për vitin 2025.

4. Projektligji “Për shoqëritë evropiane të bashkëpunimit (SHЕВ)”.

5. Projektrezolutë “Për vlerësimin e veprimtarisë së Avokatit të Popullit për vitin 2025”.

6. Projektrezolutë “Për vlerësimin e veprimtarisë së Këshillit të Lartë Gjyqësor për vitin 2025″.

7. Projektrezolutë “Për vlerësimin e veprimtarisë së Këshillit të Lartë të Prokurorisë për vitin 2025”

8. Projektrezolutë “Për vlerësimin e veprimtarisë së Kontrollit të Lartë të Shtetit për vitin 2025″.

9. Projektrezolutë “Për vlerësimin e veprimtarisë së Prokurorisë së Përgjithshme për vitin 2025″.

10. Projektrezolutë “Për vlerësimin e veprimtarisë së Strukturës së Posaçme kundër Korrupsionit dhe Krimit të Organizuar për vitin 2025”

11. Projektrezolutë “Për vlerësimin e veprimtarisë së Inspektorit të Lartë të Drejtësisë për vitin 2025″.

12. Diskutime për çështje jashtë rendit të ditës

III. Ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet.

IV. Ky urdhër hyn në fuqi menjëherë.

Seanca e fundit parlamentare, PS dhe PD me dy raporte për reformën territoriale, çfarë ndodh me hartën e re?

The post Sot seancë plenare në Kuvend, rendi i ditës. Do të mbahet edhe një protestë para Parlamentit appeared first on Euronews Albania.

Sekretari i Shtetit i SHBA-së, Marco Rubio, tha të dielën se Irani po përpiqet ta përdorë Ngushticën e Hormuzit si një mjet negociues mes konfliktit të vazhdueshëm në Lindjen e Mesme, duke u bërë thirrje vendeve të tjera të luajnë një rol më të madh në mbrojtjen e rrugëve ndërkombëtare të transportit detar.

“Është e qartë se Irani, të paktën disa njerëz në Iran, duan të kontrollojnë ngushticën dhe ta përdorin atë si levë kundër botës”, u tha Rubio gazetarëve përpara se të nisej për në Filipine për të marrë pjesë në një takim të ministrave të jashtëm të Shoqatës së Kombeve të Azisë Juglindore (ASEAN).

Ai tha se disa figura brenda Iranit duket se kanë ndërmend ta përdorin kontrollin e rrugës ujore strategjike si një levë mbi bashkësinë ndërkombëtare.

Ai shtoi se, ndërsa SHBA-të do të vazhdojnë të ndërmarrin hapat e nevojshëm për të siguruar sigurinë e tregtisë globale detare, vendet e tjera duhet të kontribuojnë më shumë duke ofruar mbështetje financiare ose burime ushtarake për të ndihmuar në ndarjen e përgjegjësisë.

“Shtetet e Bashkuara do të bëjnë dhe do të vazhdojnë të bëjnë atë që u nevojitet për të mbrojtur transportin detar global, por vendet e tjera duhet të fillojnë të ndërmarrin hapa dhe të ofrojnë, qoftë pajisje apo financa, për të ndihmuar në përballimin e kësaj barre”, shtoi ai.

Uashingtoni është i hapur për të arritur një zgjidhje diplomatike me Iranin, tha ai, duke shtuar se nëse diplomacia dështon, situata nuk do të jetë në favor të Teheranit.

Ai pretendoi se iranianët po dërgojnë sinjale të dëshirës së tyre për të folur me SHBA-në.

Lidhur me vdekjen e një ushtari amerikan të shtunën në Irak, Rubio tha se ishte një aksident gjatë shpërthimit të kontrolluar të municioneve të pashpërthyera nga një dron iranian i rrëzuar.

Një raketë e vetme iraniane depërtoi në mbrojtjen ajrore të Jordanisë të premten, pavarësisht interceptimit të shumicës së raketave që po vinin, tha ai, duke shtuar se forcat amerikane e goditën Iranin në përgjigje të lëshimit të raketave dhe dronëve që synonin anijet tregtare.

The post Rubio: Irani dëshiron ta përdorë Ngushticën e Hormuzit si mjet negociues appeared first on Euronews Albania.

Ministria e Brendshme e Bahreinit tha të hënën se sirenat e alarmit u aktivizuan, duke u bërë thirrje qytetarëve të qëndrojnë të qetë dhe të shkojnë në vendin më të afërt të sigurt.

Ministria gjithashtu i bëri thirrje publikut të ndjekë përditësimet përmes kanaleve zyrtare, sipas deklaratës.

Alarmi erdhi disa orë pasi Bahreini lëshoi ​​një paralajmërim të ngjashëm më herët gjatë ditës. Nuk pati raportime të menjëhershme për viktima ose dëme.

Tensionet rajonale janë përshkallëzuar që kur SHBA-të dhe Izraeli nisën një ofensivë të përbashkët kundër Iranit në shkurt. Teherani u hakmor me sulme me dronë dhe raketa që synonin vendet e Gjirit që strehonin asete amerikane.

SHBA-të dhe Irani nënshkruan një memorandum mirëkuptimi të ndërmjetësuar nga Pakistani muajin e kaluar për t’i dhënë fund konfliktit të tyre dhe për të arritur një marrëveshje paqeje të qëndrueshme, por tensionet u përshkallëzuan përsëri javën e kaluar mbi Ngushticën e Hormuzit, me të dyja palët që shkëmbyen sulme.

The post Aktivizohen sirenat e alarmit në Bahrein, qeveria u bën thirrje qytetarëve të strehohen në vende të sigurta appeared first on Euronews Albania.

Çmimet e naftës u rritën me rreth 3% të dielën, pasi Shtetet e Bashkuara dhe Irani shkëmbyen sulme të përgjakshme për më shumë se një javë.

Nafta e papërpunuar Brent, çmimi ndërkombëtar referues, u rrit me 3% në rreth 90.78 dollarë për fuçi, dhe nafta e papërpunuar amerikane u rrit me pothuajse 3% në 84.85 dollarë për fuçi.

Trafiku në Ngushticën e Hormuzit, ku rrjedh 20% e furnizimit global me naftë, ka qenë në rënie pas përshkallëzimit të tensioneve javën e kaluar. Të mërkurën, SHBA-të rivendosën bllokadën detare të porteve iraniane.

Disa anije kanë përdorur rrugë alternative, duke përfshirë edhe përgjatë vijës bregdetare të Omanit, të cilat nuk janë miratuar nga Teherani.

Çmimet e benzinës kanë qenë gjithashtu në rritje, por mesatarja kombëtare e SHBA-së mbetet pak nën 4 dollarë për galon, sipas AAA. Me 3.992 dollarë për galon, shoferët amerikanë po paguajnë rreth 34% më shumë sesa paguanin para fillimit të luftës.

Kontratat e ardhshme të Dow Jones, të S&P dhe të Nasdaq ranë të gjitha me rreth 0.2%.

The post Sulmeve e SHBA-së kundër Iranit, çmimet e naftës rriten me 3% appeared first on Euronews Albania.

Presidenti i Hungarisë, Tamas Sulyok ka pranuar të japë dorëheqjen pas nënshkrimit të një amendamenti kushtetues të miratuar nga partia në pushtet Tisza e kryeministrit, Peter Magyar.

Amendamenti do t’i japë fund menjëherë mandatit të Sulyok, duke përmendur “humbjen serioze të besimit” të shoqërisë tek një udhëheqës i zgjedhur në fillim të vitit 2024 nga ligjvënësit e partisë nacionaliste Fidesz të ish-kryeministrit Viktor Orbán.

Sulyok tha se nuk kishte zgjidhje tjetër veçse ta miratonte legjislacionin, pasi respektonte ligjin. Megjithatë, ish-gjyqtari i gjykatës kushtetuese paralajmëroi se reforma kishte dëmtuar sundimin e ligjit në Hungari.

Ai tha të shtunën: “Amendamenti i shtatëmbëdhjetë i kushtetutës ka shënuar një pikë kthese në demokracinë kushtetuese të Hungarisë.

“Duke larguar mbajtësit e funksioneve publike në një mënyrë që shkel hapur sundimin e ligjit… kjo vendos një precedent negativ që shkakton një plagë të thellë në vlerat kushtetuese të demokracisë, ndarjen e pushteteve dhe sundimin e ligjit.”

Legjislacioni ishte pjesë e përpjekjes së Hungarisë për të çmontuar bastionet e pushtetit të Orban-it, pasi rrëzoi udhëheqësin e krahut të djathtë në një fitore të thellë zgjedhore në prill.

Orban, për të cilin kritikët thonë se i dobësoi institucionet demokratike gjatë 16 viteve të tij në pushtet, kritikoi reformat në Facebook.

Ai tha: “Tirania nuk është më një kërcënim, por realitet. Nëse kjo mund t’i bëhej presidentit, nesër, askush nuk do të ishte i sigurt.”

Fidesz është përballur me një sërë dorëheqjesh të profilit të lartë dhe një rënie të mbështetjes publike që nga humbja e zgjedhjeve në prill.

Parlamenti, ku partia hungareze e qendrës së djathtë Tisza ka shumicën prej dy të tretash, gjë që i lejon asaj të ndryshojë çdo ligj, do të zgjedhë një president të ri i cili do të shërbejë deri në hyrjen në fuqi të një kushtetute të re ose për një maksimum prej pesë vjetësh.

Pasi Sulyok nënshkroi amendamentin, Magyar tha se kryetarja e parlamentit, Agnes Forstthoffer, do të merrte rolin e presidentes së përkohshme nga e hëna.

Amendamenti gjithashtu vendos një afat prej 12 vitesh për ligjvënësit dhe përcakton një moshë daljeje në pension prej 70 vjeç për gjyqtarët e gjykatës kushtetuese, gjë që do ta detyrojë presidentin aktual të gjykatës, aleatin e Orbán, Péter Polt, të dalë në pension, raportoi Reuters.

Magjari i kishte bërë thirrje vazhdimisht Sulyok të jepte dorëheqjen, duke e akuzuar atë se nuk arriti të përfaqësonte unitetin kombëtar në çështjet kryesore dhe se po i shërbente interesave të Orbán-it dhe qeverisë së tij.

The post Presidenti i Hungarisë pranon të japë dorëheqjen pasi ndryshimi i ligjit i jep fund mandatit të tij appeared first on Euronews Albania.

Një incident është regjistruar ditën e djeshme, kur një anije mallrash në pronësi turke GOLDEN LEO, që mbante flamurin e Guinea-Bissau, u godit nga një sulm me raketa ndërsa ishte e ankoruar në Odessa.

Anija, e cila po transportonte një ngarkesë me misër, u dëmtua nga një shpërthim pranë portit, i cili rezultoi në një zjarr në bord.

Sipas autoriteteve ukrainase, kapiteni u plagos, pesë anëtarë të ekuipazhit mbeten të zhdukur, ndërsa tetë marinarë u nxorën shëndoshë e mirë nga anija.

Pak kohë më vonë, një incident i dytë serioz u regjistrua në terminalin e Konsorciumit të Gazsjellësit Kaspik (CPC) në Novorossiysk të Rusisë. Tankeri NISSOS IOS me flamur liberian dhe në pronësi greke thuhet se u godit nga mjete ajrore pa pilot (UAV) ndërsa ngarkonte naftë bruto.

EOS Risk raporton se operacionet e ngarkimit u pezulluan menjëherë, ndërsa anija pësoi dëme të konsiderueshme në akomodimin e saj, urën, pajisjet e navigimit, pajisjet mekanike dhe objektet ndihmëse.

Një zjarr i lokalizuar u vu nën kontroll nga sistemet e zjarrfikjes së anijes, pa raportime për lëndime, ndotje apo rrjedhje ngarkese deri më tani. Anija cisternë mbetet mbi ujë dhe u zhvendos nga rimorkiatorët në një vend ankorimi të sigurt jashtë Novorossiysk, ndërsa vlerësimi i shkallës së dëmit vazhdon.

Kompania e sigurisë detare vëren se të dy incidentet konfirmojnë përkeqësimin e ndjeshëm të mjedisit operativ në Detin e Zi.

Në të njëjtën kohë, u bën thirrje anijeve që operojnë në zonë të mbajnë mbikëqyrje të shtuar, të zbatojnë plotësisht udhëzimet e BMP-së, të monitorojnë vazhdimisht paralajmërimet zyrtare nga autoritetet dhe të ndjekin menjëherë udhëzimet e autoriteteve ushtarake në rast të një sulmi me raketa ose zbulimit të municioneve të pashpërthyera.

The post Breshëri sulmesh në Detin e Zi, dy anije tregtare në shënjestër brenda pak orësh appeared first on Euronews Albania.

Pesë anëtarë të një familjeje që ishin nisur për një ditë ecjeje në natyrë humbën jetën pasi një përmbytje e menjëhershme përfshiu kanionet e Utahut jugor të premten, thanë zyrtarët e zbatimit të ligjit.

Viktimat ishin një kapiten në departamentin e zjarrfikësve të Provos, gruaja e tij dhe djemtë e tyre, sipas zyrtarëve të zjarrfikësve. Një vajzë që nuk ishte në udhëtim mbijetoi.

Familja mbërriti të premten në kampingun Sunglow në një kanion piktoresk me shkëmbinj të kuq pranë Bicknell, Utah, për ekskursionin e tyre njëditor, tha zyra e sherifit të qarkut Wayne.

“Besohet se familja ra viktimë e përmbytjeve të shkaktuara nga shirat e rrëmbyeshëm”, tha zyra e sherifit në një njoftim për shtyp.

Edhe pse zyra e sherifit nuk i identifikoi viktimat, departamenti i zjarrfikësve të Provos konfirmoi në një postim në mediat sociale se një kapiten zjarrfikësish, Spencer Long, dhe anëtarët e familjes së tij u vranë.

Të premten në mbrëmje, ndihmësit u thirrën në kamping pasi trupi i një të riu u gjet në përmbytjet. Trupat e anëtarëve të tjerë të familjes u gjetën më vonë të premten dhe të shtunën. Ndërkohë, kanë nisur homazhet për familjen.

The post Përmbytjet në kanionin e Utahut, humbin jetën 5 anëtarë të një familjeje appeared first on Euronews Albania.

Si pjesë e masave të reja të përkohshme për të parandaluar përhapjen e epidemisë së Ebolës, qeveria kanadeze njoftoi këtë se do të ndalojë hyrjen në vend për të gjithë të huajt që kanë vizituar Republikën Demokratike të Kongos brenda 21 ditëve nga mbërritja e tyre në Kanada.

Masa do të hyjë në fuqi në mesnatë të hënën, tha Agjencia e Shëndetit Publik të Kanadasë.

Ndalimi nuk vlen për qytetarët kanadezë ose banorët e përhershëm. Ata që bien në këtë kategori do të karantinohen për 21 ditë pas mbërritjes nëse kanë udhëtuar në Kongo, Ugandë ose Sudanin e Jugut brenda 21 ditëve nga mbërritja në Kanada.

Agjencia siguroi se masat po zbatohen për arsye paraprake, duke pasur parasysh se rreziku është i ulët. Deri më tani, në Kanada nuk janë raportuar raste të sëmundjes të lidhura me një udhëtar nga Afrika.

Sipas Organizatës Botërore të Shëndetësisë, në Republikën Demokratike të Kongos janë regjistruar gjithsej 2,124 raste të Ebolës dhe 828 prej këtyre pacientëve kanë vdekur.

The post Masat kundër Ebolës, Kanadaja ndalon hyrjen e udhëtarëve të huaj që kanë vizituar Kongon appeared first on Euronews Albania.