Pas orësh bllokimi, republikanët në Senatin e SHBA-së e kanë miratuar me një diferencë të ngushtë projektligjin e madh të Donald Trump mbi taksat dhe shpenzimet, që do të thotë se legjislacioni i propozuar ka kapërcyer një nga pengesat e tij kryesore.

Akti i Projektligjit “One Big Beautiful” u miratua me nënpresidentin JD Vance që hodhi një votë vendimtare, pas më shumë se 24 orë debat, transmeton Telegrafi.

Tani ai kthehet në Dhomën e Përfaqësuesve, ose në dhomën e ulët, ku ende përballet me më shumë kundërshtime. Një version i mëparshëm u miratua nga republikanët e Dhomës me një diferencë prej një vote të vetme.

Trump i kishte dhënë Kongresit të kontrolluar nga republikanët një afat deri më 4 korrik, për t’i dërguar atij një version përfundimtar të projektligjit për ta nënshkruar si ligj.

“Projektligji si amendament është miratuar”, tha Vance të martën pasdite, një moment që u prit me duartrokitje midis republikanëve të Senatit, ndërsa demokratët u ulën në vendet e tyre dhe tundën kokat në shenjë mosmiratimi.

Mosmarrëveshjet mbi deficitin, programet sociale dhe nivelet e shpenzimeve kishin krijuar sfida për republikanët, duke penguar progresin dhe duke e bërë Trump të pranonte se do të ishte “shumë e vështirë” të përmbushte afatin e tij për miratimin e projektligjit.

Pavarësisht përpjekjeve për të galvanizuar partinë e tij, udhëheqësi i shumicës në Senat, John Thune, humbi tre republikanë – Susan Collins nga Maine, Thom Tillis nga Karolina e Veriut dhe Rand Paul nga Kentucky – në votimin e ngushtë.

Collins, Tillis dhe Paul iu bashkuan të gjithë demokratëve në votimin kundër projektligjit.

Pas ditësh negociatash, udhëheqësit republikanë më në fund arritën të siguronin mbështetjen e senatores së Alaskës, Lisa Murkowski, e cila kishte mbajtur pezull mbështetjen e saj për shkak të shqetësimeve për ndikimin e shkurtimeve në Medicaid në shtetin e saj.

Murkowski ende dukej i pakënaqur me projektligjin, edhe pasi votoi për ta mbështetur atë, duke e përshkruar procesin si “të nxituar” dhe nën një “afat kohor artificial”.

“Kam luftuar shumë me ndikimin tek më të prekshmit në këtë vend”, tha Murkowski, duke shtuar se procesi ishte “ndoshta periudha më e vështirë dhe më e mundimshme legjislative 24-orëshe” e karrierës së saj.

“Shpresa ime është që Dhoma do ta shqyrtojë këtë dhe do ta pranojë se nuk jemi ende atje”, u tha ajo gazetarëve jashtë sallës së Senatit, pak çaste pas votimit.

Mbështetja e Murkowskit bëri që votimi përfundimtar i Senatit të shkonte 50-50 dhe e shtyu Vance, të ndërhynte për të hedhur votën e tij vendimtare.

Gjatë një vizite në një qendër paraburgimi për emigrantë në Florida, Trump festoi miratimin e projektligjit.

“Është një projektligj i shkëlqyer. Ka nga diçka për të gjithë”. tha ai.

Legjislacioni, i konsideruar si një gur themeli i agjendës së mandatit të dytë të Trump, do të bënte ulje të përhershme të mëdha taksash që u vendosën përkohësisht kur ai ishte në detyrë për herë të parë.

Për të kompensuar humbjen e pritur të të ardhurave, republikanët kanë kërkuar të ulin shpenzimet në një gamë të gjerë programesh, duke përfshirë subvencionet ushqimore dhe kujdesin shëndetësor për amerikanët me të ardhura të ulëta.

Votimi u bë të martën pasdite, duke përfunduar një seancë votimi të stuhishme në Capitol Hill.

Demokratët ishin përpjekur të tregonin muskujt e tyre duke vënë pengesa procedurale kundër projektligjit për të vonuar miratimin e tij.

Kjo përfshinte kërkesën që nëpunësit e Senatit të lexonin me zë të lartë të gjitha 940 faqet e projektligjit, dhe nisjen e një procesi të gjatë debati mbi ndryshimet e propozuara në atë që quhet “voto-a-rama”.

Tani është detyrë e republikanëve të Dhomës së Përfaqësuesve të miratojnë ndryshimet e bëra nga Senati, përpara se presidenti të mund ta nënshkruajë projektligjin për ta shndërruar në ligj.

Por fati i tij mbetet i pasigurt, pasi është kundërshtuar nga këndvështrime të ndryshme dhe republikanët mund të përballojnë vetëm humbjen e tre votave.

Një grup konservatorësh fiskalë kanë sinjalizuar pakënaqësinë e tyre me sa shumë propozimi i Senatit mund t’i shtojë deficitit kombëtar të SHBA-së – që i referohet diferencës midis asaj që shpenzon qeveria dhe asaj që ajo mbledh në të ardhura çdo vit.

Sipas Grupit të Lirisë së Dhomës së Përfaqësuesve të krahut të djathtë, propozimi i Senatit mund t’i shtojë deficitit 650 miliardë dollarë çdo vit. /Telegrafi/

The post “Projektligji i madh dhe i bukur” i Trump miratohet në Senat pas dramës appeared first on Telegrafi.

Pse politikanët burra, veçanërisht në Uashington D.C., papritmas duken kaq të dhënë pas kostumeve blu me shkëlqim? A është ky një trend MAGA? Apo diçka më e gjerë?

Ku shkon presidenti, shumë e ndjekin. Presidenti Trump ka nisur së fundmi të veshë një lloj kostumi që është një nuancë më e ndritshme e blusë sesa ngjyra tradicionale e mesnatës ose bluja e errët. Kjo është lexuar nga shumë si përshtatje me blunë e flamurit amerikan, veçanërisht kur kombinohet me këmishën e tij të bardhë dhe kravatën e kuqe, duke krijuar kështu një lidhje midis personit të tij dhe patriotizmit, veçanërisht në fotografi.

Mund të jetë gjithashtu sepse kostumi blu i ndritshëm është më i lehtë për t’u parë në ekranin e TV, gjë që mund të jetë arsyeja pse është gjithashtu një nuancë e preferuar e spikereve të lajmeve të Fox. (Kjo mund të jetë një pyetje e tipit “pula apo veza?”. Kush ishte i pari Trump apo Fox?)

Por kjo mund të jetë siç thotë Alan Flusser, një rrobaqepës i grupit të manjatëve sepse “atyre u pëlqen të dallohen”. Tashmë kjo duket se u pëlqen edhe atyre që qëndrojnë me presidentin, si Sekretari i Mbrojtjes Pete Hegseth, dhe që duan të shihen qartë se qëndrojnë me presidentin. Gjithnjë e më shumë, thotë Sam Hine, korrespondenti global i modës në “GQ”, kjo mund t’i pëlqejë një brezi të ri të veshjeve të fuqishme që nuk duan të vishen tamam si baballarët e tyre, me kostume të errëta, por që duhet t’i përmbahen një stili të caktuar profesional.

Efekti është një maskulinitet më i dukshëm, gjë që ka kuptim për turmën Trump dhe ata që ngjiten në Wall Street. Më parë, politika dhe financat ishin bastione të veshjes diskrete, ku etosi mbizotërues i veshjes ishte të ishe i rregulluar mirë, të përshtateshe dhe të mos tërhiqjeje vëmendjen, por kjo filloi të ndryshonte në vitet 1980.

Fara e mbjellë atëherë me Gordon Gekkon, ardhja e të cilit si një paradigmë e kulturës pop përkoi me vitet formuese të pasurive të patundshme në Nju Jork të zotit Trump, tani po japin fryte.

Nuk është rastësi që kjo ngjyrë blu e veçantë, e cila njihet ndryshe si blu kobalti dhe blu mbretërore, quhet edhe blu napolitane, e cila është një ngjyrë blu e preferuar nga disa kapitenë italianë të industrisë si Gianni Agnelli. ©NYT, LAPSI.al

The post Pse politikanët amerikanë po vishen tani me kostume blu vezullues appeared first on Lapsi.al.

Nga: Martin Sandbu / The Financial Times [Why is the right so fascinated with fantasy literature?]
Përktheu: Agron Shala / Telegrafi.com

Kryeministrja italiane, Giorgia Meloni, themeloi një konferencë politike konservatore të emërtuar sipas një heroi të një romani bestseller të zhanrit të fantazisë, të vitit 1979 [Atreju, personazh nga vepra Historia pa mbarim]; dikur ajo vishte kostumin e hobitit, ndërsa në vitin 2023 organizoi një ekspozitë muzeale kushtuar J.R.R. Tolkienit [autor i Kryezotit të Unazave dhe Hobitit]. Peter Thiel, miliarderi i teknologjisë që mbështet Trumpin dhe është skeptik ndaj demokracisë, kryeson një trend në Luginën e Silikonit [Silicon Valley] për emërtimin e kompanive të frymëzuara nga Kryezoti i Unazave – duke filluar nga kompania e tij e inteligjencës së të dhënave, Palantir (gurë magjikë në Tokën e Mesme), deri te prodhuesi i armëve, Anduril (një shpatë, sipas Tolkienit). Nënpresidenti amerikan, J.D. Vance, ka thënë se konservatorizmi i tij është ndikuar nga Tolkieni dhe C.S. Lewisi – autori i Kronikave të Narnisë.

Me fjalë të tjera, magjepsja me letërsinë fantastike i bashkon konservatorët nacionalistë evropianë, sivëllezërit teknologjikë të Trumpit dhe lëvizjen MAGA [Make America Great Again]. A është kjo thjesht një rastësi? Apo ka diçka në vetë natyrën e letërsisë fantastike që, në mënyrë të pazakontë, përputhet me mendësinë e djathtë?

Në rastin italian, adhurimi për letërsinë fantastike ka qenë “më shumë psikologjik sesa politik”, thotë Salvatore Vassallo, profesor i shkencave politike në Universitetin e Bolonjës. Ai kishte rëndësi në kohën kur Meloni dhe shoqëruesit e saj ishin të rinj, dhe pjesa e tyre e së djathtës ishte e përjashtuar nga politika tradicionale për shkak të bagazhit të “referencave kulturore fashiste, të cilat nuk mund t’i shprehnin” publikisht.

Pra, fantazia si një filozofi reaksionare e pranueshme për publikun? Pa dyshim, shumë tema të këtij kodi letrar duket se përputhen me këtë përshkrim.

Për shembull, është e lehtë të kuptosh se si hierarkia shoqërore mesjetare dhe kategorizimi esencial racor – të zakonshëm në botët fantastike – mund të nxisin pikëpamjet reaksionare. Gjithashtu, është e lehtë të shihet tërheqja ndaj traditës dhe ritualit nga ata që e ndjejnë veten të përjashtuar nga moderniteti. (Vassallo thotë se dashuria e Melonit dhe e të tjerëve për Tolkienin ishte “në përputhje me atë që ata mendonin për veten: njerëz ‘të pastër’ që luftonin për vlerat që i çmonin, por që të tjerët përreth i nënvlerësonin”.)

Por, disa nga këto vlerësime janë të padrejta. Në fund të fundit, shumë vepra të letërsisë fantastike mund të interpretohen ndryshe: heronjtë sfidojnë hierarkitë shoqërore; bashkëpunimi ndërmjet racave të ndryshme mposht të keqen. Një mospëlqim i supozuar estetik ndaj modernitetit nuk gjen vend në optimizmin teknologjik të Luginës së Silikonit.

Çelësi, mendoj unë, gjendet më shumë te mënyra se si letërsia fantastike ka prirjen drejt heroikes. Këto janë rrëfime të këmbënguljes personale përballë fatkeqësisë maniheike [sipas dualizmit të maniheizmit, religjionit ku bota shihej si një fushëbetejë midis forcave kundërshtare të dritës dhe errësirës, të së mirës dhe të keqes]. Janë histori ku virtyti fiton; ku individët – nëse marrin vendimet e duhura, përqafojnë vlerat e duhura, ndjekin instinktet e duhura – ia dalin të mundin sistemin. Janë, mund të thuash, rrëfime për triumfin e vullnetit.

Kjo përputhet mirë me populizmin. Ajo mbështet idenë se problemet në jetën e njerëzve shkaktohen nga forcat dashakeqe, dhe se disa individë të veçantë mund t’i përballojnë dhe t’i mposhtin ata armiq. Të dyja këto ide qëndrojnë në themel të retorikës që populistët përdorin për të justifikuar pse njerëzit (hiç më pak se “populli”) duhet të votojnë për ta. “Unë jam hakmarrja juaj”, ka thënë Donald Trump.

Populizmi mund të jetë i djathtë ose i majtë. Por, në një mënyrë tjetër, triumfi i vullnetit që përshkon zhanrin fantastik është (siç i përshtatet vetë termit) më i lehtë për populistët e djathtë që ta përvetësojnë. Ai shndërrohet në një frikë nga të qenit i kontrolluar nga strukturat anonime të shoqërisë dhe në një dëshirë që zgjedhjet dhe vlerat tona personale të përcaktojnë botën përreth nesh. Ai pasqyron një dëshirë për kontroll, pushtet dhe për një mekanizëm të qartë që lidh zgjedhjen individuale me ndikimin shoqëror – një dëshirë, në thelb, për një botë epike, jo për atë moderne.

Fantazia përfaqëson jo aq një rikthim në një idil paramodern, sesa një përmbushje të lirisë që Iluminizmi premtoi, por që kompleksiteti shoqëror ia mohoi individit. Kjo është më e vështirë për të majtën për ta përqafuar, pasi struktura shoqërore është thelbësore për botëkuptimin e saj. Në nivel personal, ekzistencialistët e majtë mund të dëshirojnë të çlirohen nga pritshmëritë shoqërore. Por, politikisht, e majta e pranon rëndësinë parësore të strukturës shoqërore dhe përpiqet ta formësojë atë, ndërsa e djathta synon ta lërë ashtu siç është (në versionet reaksionare), ose ta shkatërrojë (në ato më libertariane).

Ato ëndrra të pastra të djathta janë të destinuara të dështojnë. Ne jetojmë në modernitet, pavarësisht nëse na pëlqen apo jo; shoqëria, pashmangshmërisht, i strukturon zgjedhjet tona. Por, a është për t’u habitur që zhgënjimi që lind nga kjo përvojë nxit një dëshirë për unaza dhe amulete magjike – ose për teknologji të fuqishme, por të vështira për t’u kuptuar?

Megjithatë, nga letërsia fantastike mund të nxirret edhe një mësim tjetër. Një strukturë e thellë që lidh njerëzit me natyrën shfaqet, për shembull, në serinë Tokëdeti të Ursula Le Guinit. Këto janë vepra për kufijtë e asaj që fuqia individuale mund të arrijë dhe për mënyrën se si ajo duhet të përdoret për të rikthyer ekuilibrin dhe për të përforcuar strukturat, e jo për t’i shembur ato.

Ndoshta Giorgia, Peter, JD dhe miqtë e tyre duhet të lexojnë më shumë letërsi fantastike, jo më pak. /Telegrafi/

The post Pse populistët magjepsen me letërsinë fantastike? appeared first on Telegrafi.

Zëvendëspresidenti amerikan JD Vance ka kritikuar gazetarët që raportojnë mbi raportin e rrjedhur të inteligjencës amerikane, në lidhje me sulmet e Amerikës ndaj objekteve bërthamore të Iranit.

Raporti, të cilin Trump dhe kabineti i tij janë përpjekur ta minimizojnë, tha se sulmet vetëm sa i kishin shtyrë planet e Iranit “disa muaj” prapa, në vend që vendet të “zhdukeshin” siç kishte sugjeruar Trump.

Në një postim të gjatë në X, Vance tha se media në SHBA “është plot me njerëz më pak kuriozë dhe më pak të mprehtë në vendin tonë”, transmeton Telegrafi.

“Mënyra se si media e ka paraqitur raportin është në kundërshtim me IAEA-n, vetë iranianët dhe udhëheqja politike dhe mbrojtëse e administratës”, tha ai.

“Më e rëndësishmja, raportet e medias janë në kundërshtim me logjikën e shëndoshë”, shtoi JD Vance.

“Presidenti Trump e ka zhdukur programin bërthamor iranian. Media amerikane duket se është e destinuar të zhdukë besueshmërinë e saj në këtë histori të rreme”, theksoi për fund zëvendëspresidenti. /Telegrafi/

The post Vance: Rrjedhjet e informacionit për Iranin ‘kundërshtohen me logjikën e shëndoshë’ appeared first on Telegrafi.

Zëvendëspresidenti amerikan J.D. Vance vlerësoi pilotët amerikanë për goditjen e një objektivi me madhësinë e një ‘makine larëse’ në gjysmën e botës, në sulmin e tyre të guximshëm ndaj vendeve bërthamore iraniane.

“Është vërtet një operacion i pabesueshëm, një dëshmi e fuqisë së ushtrisë amerikane. Këta djem fluturuan nga Missouri. Ata nuk u ulën asnjë herë”, tha Vance në emisionin “Meet the Press” të NBC-së.

Zëvendëspresidenti u shfaq në emisionin e mëngjesit të së dielës për të dhënë më shumë detaje rreth sulmeve të paprecedentë ushtarake amerikane që synonin objektet bërthamore të Iranit, duke pohuar se nuk kishte interes për të vendosur trupa amerikane në tokë për një konflikt të zgjatur.

Të shtunën në mbrëmje, Vance u pa duke qëndruar pas presidentit Donald Trump ndërsa ai njoftoi atë që u konsiderua një operacion “i suksesshëm”, transmeton Telegrafi.

Në sulmin përfshiheshin shtatë bombardues B-2 dhe një total prej 125 aeroplanësh ushtarakë, duke përfshirë aeroplanë luftarakë dhe cisterna furnizimi me karburant, konfirmuan zyrtarë të lartë të Pentagonit gjatë një informimi të së dielës në mëngjes.

“Ata hodhën bomba 15 mijë tonëshe mbi një objektiv me madhësinë e një makine larëse, dhe pastaj u kthyen në shtëpi shëndoshë e mirë pa u ulur kurrë në Lindjen e Mesme ose pa u ndalur kurrë përveçse për t’u furnizuar shkurtimisht me karburant. Dhe, sigurisht, e bënë këtë në ajër”, vazhdoi zëvendëspresidenti.

Ai tha se SHBA-të “e vonuan ndjeshëm” programin bërthamor të Iranit, por tha se nuk do të hynte në “informacion të ndjeshëm” kur u pyet nga prezantuesja Kristen Welker se sa vite do të vonohej programi. /Telegrafi/

The post JD Vance zbulon se sulmet kundër Iranit ishin aq të sakta sa goditën ‘një objektiv me madhësinë e një lavatriçeje’ appeared first on Telegrafi.

Zëvendëspresidenti amerikan JD Vance, gjatë një interviste për NBC News, ka deklaruar se Shtetet e Bashkuara nuk janë në luftë me Iranin, por kundër programit bërthamor të tij.

“Nuk jemi në luftë me Iranin. Jemi në luftë me programin bërthamor të Iranit,” theksoi ai, duke shtuar se nuk ka frikë se përplasja aktuale do të shndërrohet në një konflikt të zgjatur.

Vance gjithashtu u shpreh se SHBA nuk ka si synim ndryshimin e regjimit në Teheran, një ide që është përmendur shpesh nga zyrtarë të lartë izraelitë.

Ai nënvizoi se Shtetet e Bashkuara “nuk kanë asnjë interes” për të vendosur trupa tokësore në Iran, duke theksuar se ndërhyrja është e kufizuar dhe nuk shënon hyrje në një konflikt të ri afatgjatë.

Vance, i cili erdhi në detyrë përkrah presidentit Donald Trump, i njohur për qëndrimin e tij kundër “luftërave të pafundme”, po përpiqet të qetësojë bazën e lëvizjes MAGA, e cila është e ndarë lidhur me vendimin për të goditur objektiva iraniane.

Zëra të rëndësishëm brenda kësaj lëvizjeje janë përpjekur të sigurojnë opinionin publik se bëhet fjalë për një sulm të vetëm dhe të izoluar, një qëndrim që u përsërit edhe nga analisti Pete Hegseth në Pentagon, pasditen e së dielës./abcnews.al

Dilema nëse SHBA-të duhet t’i bashkohen Izraelit në sulmin ndaj Iranit, apo të qëndrojnë krejtësisht jashtë ofensivës, ka nxjerrë në pah përçarjet midis mbështetësve të Presidentit të SHBA-së, Donald Trump. Presidenti republikan po shqyrton mundësinë për të ndihmuar izraelitët në shënjestrimin e objekteve bërthamore të Republikës Islamike, pas një takimi me këshilltarët e tij të sigurisë kombëtare në Dhomën e Situatave të Shtëpisë së Bardhë të martën.

Gjatë fushatës, Trump u ankua shpesh kundër “luftërave të pafundme dhe budallaqe” në Lindjen e Mesme, por gjithashtu pohoi se Irani “nuk mund të ketë një armë bërthamore”. Mundësia që ai të tërheqë SHBA-të në një tjetër ngatërresë në një vend të huaj i ka vënë krahët izolacionistë dhe skifterë të partisë së tij kundër njëri-tjetrit.

Midis atyre që kanë shprehur dyshime në lidhje me planet bërthamore të Iranit është Drejtoresha e Inteligjencës Kombëtare të Trump, Tulsi Gabbard, e cila në mars u shpreh para Kongresit se teksa uraniumi i pasuruar i Iranit ishte në nivelin më të lartë historik, ekspertët nuk besonin se ata po punonte për një armë bërthamore.

Më 10 qershor – vetëm 3 ditë para se të fillonin sulmet izraelite ndaj Iranit – Gabbard postoi gjithashtu një video në të cilën paralajmëroi se “elita politike dhe luftëdashësit” po “nxisin pa kujdes frikën dhe tensionet” që rrezikonin ta vendosnin botën “në prag të shfarosjes bërthamore”. Videoja e Gabbard dhe komentet e mëparshme thuhet se kanë nxitur një përplasje midis saj dhe Trump, i cili, sipas agjencisë amerikane të lajmeve Politico, “u zemërua” nga videoja.

“Nuk më intereson çfarë thotë ajo”, – u tha Trump gazetarëve kur u pyet për komentet e saj të mëparshme para Kongresit. “Mendoj se iranianët ishin shumë afër të kishin një armë”. Më vonë Gabbard akuzoi median se i nxori komentet e saj të mëparshme jashtë kontekstit, duke i thënë CNN se është “në të njëjtën anë” me Trump. Gabbard nuk ka qenë e vetmja midis republikanëve në kritikimin e përfshirjes së mundshme të SHBA-së në konflikt.

Të martën, kongresmeni konservator republikan Thomas Massie nga Kentucky u bashkua me demokratët për të prezantuar një projektligj që bllokon Trump nga angazhimi i forcave amerikane në “armiqësi të paautorizuara” me Iranin pa miratimin e kongresit. “Kjo nuk është lufta jonë. Edhe nëse do të ishte, Kongresi duhet të vendosë për çështje të tilla sipas Kushtetutës sonë” – shkroi Massie në X.

Disa mbështetës të doktrinës “Amerika e Para” të Trump theksojnë se ai u zotua ta mbante SHBA-në larg “luftërave përgjithmonë”, të tilla si ato që çuan në vdekjen e mijëra trupave amerikane në Afganistan dhe Irak. Ish-prezantuesi i Fox News, Tucker Carlson, ka bërë thirrje që SHBA-të të qëndrojnë larg konfliktit me Iranin. Në podcastin e tij, ai i kritikoi ashpër “luftëtarët” republikanë, duke provokuar një qortim nga Trump, i cili e quajti Carlson “të çuditshëm”.

Kongresmenja e Xhorxhias dhe besnikja e Trump, Marjorie Taylor Greene doli në mbrojtje Carlson në një përçarje shumë të pazakontë me presidentin. Ajo tha se kushdo që mbështet një ndërhyrje të tillë nuk ishte “Amerika e Para”. Tensionet shpërthyen deri në britma të martën gjatë një interviste midis Carlson dhe senatorit të Teksasit, Ted Cruz, i cili u shfaq si “skifter”, por kaloi në mbrojtje kur u pyet nëse e dinte popullsinë dhe përzierjen etnike të Iranit.

Carlson i tha: “Ju jeni një senator që po bën thirrje për përmbysjen e qeverisë dhe nuk dini asgjë për vendin!”

Cruz u përgjigj: “Jo, ju nuk dini asgjë për vendin!”

Steve Bannon, ish-strategu politik i Trump, argumentoi në podcastin e Carlson se lejimi i “shtetit të thellë” për të shtyrë SHBA-në në një luftë me Iranin do të “hedhë në erë” koalicionin e mbështetësve të Trump.

“Nëse përfshihemi në këtë luftë, e cila në mënyrë të pashmangshme duket se do të ndodhë, ajo jo vetëm që do ta hedhë në erë koalicionin, por do të pengojë edhe gjënë më të rëndësishme, që është deportimi i pushtuesve të paligjshëm të huaj që janë këtu”, – tha ai.

Megjithatë, të mërkurën, Bannon dukej se e zbuti pak tonin e tij, duke u thënë pjesëmarrësve në një aktivitet të “Christian Science Monitor” se krahu MAGA i mbështetësve të tij do t’i besonte gjykimit të tij nëse ai vendoste të angazhonte forcat amerikane në konflikt. “Ndoshta e urrejmë, por e dini, do të bashkohemi”, tha ai.

Një tjetër komentator politik konservator, Charlie Kirk – i cili e përshkruan veten si më afër anës “izolacioniste” të debatit – shkroi në X se Trump është “pragmatik” dhe vlerëson “logjikën e shëndoshë”. “Nuk e di nëse Presidenti Trump do të zgjedhë të përfshijë Amerikën kundër Iranit”, shkroi Kirk. “Por ai është një njeri që i besoj se do të marrë atë vendim”.

Senatori i Kentucky-t, Mitch McConnell, tha se kishte “qenë një javë paksa e keqe për izolacionistët” në parti. “Ajo që po ndodh këtu është se disa nga lëvizja izolacioniste e udhëhequr nga Tucker Carlson dhe Steve Bannon janë të shqetësuar se mund të jemi duke i ndihmuar izraelitët të mposhtin iranianët”, – tha McConnell për CNN.

Anëtarë të tjerë të luftës në parti po e nxisin Trumpin të shënjestrojë Iranin. Senatori i Karolinës së Jugut, Lindsey Graham, tha se ishte në interesat e sigurisë kombëtare të SHBA-së të parandalonte Iranin nga pajisja me një bombë bërthamore. Teherani pohon se programi i tij bërthamor është për qëllime paqësore dhe civile, siç është energjia.

“Presidenti Trump e kupton kërcënimin që Ajatollahu [Udhëheqësi Suprem i Iranit, Ali Khamenei] na paraqet neve, jo vetëm Izraelit, dhe se ai, në fund të fundit, do ta ndihmojë Izraelin të përfundojë punën”, tha Graham për Fox News.

Zëvendëspresidenti JD Vance, duke kërkuar të kapërcejë përçarjen, shkroi në një postim në mediat sociale se Trump “mund të vendosë se duhet të ndërmarrë veprime të mëtejshme për t’i dhënë fund pasurimit iranian”. “Ky vendim në fund të fundit i përket presidentit”, shtoi ai. “Dhe sigurisht, njerëzit kanë të drejtë të shqetësohen për përfshirjen e huaj pas 25 viteve të fundit të një politike të jashtme idiote”.

Një sondazh i opinionit në ditët e fundit tregon se votuesit e Trump do të mbështesnin gjerësisht SHBA-në në ndihmën e Izraelit për të sulmuar Iranin. Sondazhi i Gray House zbuloi se 79% e të anketuarve do të mbështesnin SHBA-në që t’i siguronte armë sulmuese Izraelit për të goditur objektivat ushtarake iraniane. Rreth 89% ishin të shqetësuar për prodhimin e bombave atomike nga Irani. Megjithatë, në platformën e mediave sociale Trump’s Truth Social, shumë shprehën shqetësim se SHBA-të mund të gjenden përsëri të përfshira në një konflikt të Lindjes së Mesme mijëra kilometra larg.

“Asnjë luftë me Iranin”. “Mjaft me luftëra të huaja”, shkroi një përdorues. “Amerika e para!” Një përdorues tjetër paralajmëroi se përfshirja e SHBA-së në operacionet izraelite mund t’u kushtojë politikisht republikanëve në vitet në vijim. “Mos e bëni këtë”, shkroi përdoruesi. “Republikanët nuk do të fitojnë më kurrë nëse e bëni këtë.”

Kur bënte fushatë për Shtëpinë e Bardhë në shtator, Trump tha: “Ne do ta rivendosim shpejt stabilitetin në Lindjen e Mesme. Dhe do ta kthejmë botën në paqe.” Me konfliktin Iran-Izrael në teh të thikës, pyetja nëse presidenti amerikan është izolacionist apo ndërhyrës mund të marrë përgjigje më shpejt sesa më vonë. ©BBC, LAPSI.al

The post A duhet të hyjë Amerika në luftë? Plas sherri mes besnikëve të Trump appeared first on Lapsi.al.

Një burim i informuar pranë Ministrisë së Punëve të Jashtme të Iranit në Teheran ka deklaruar për BBC-në se Irani po shqyrton mundësinë për të marrë pjesë në një takim të drejtpërdrejtë me zv.presidentin e SHBA-së, JD Vance.

“Ne kurrë nuk jemi tërhequr nga diplomacia”, është shprehur burimi.

Mendohet se ministri i Jashtëm i Iranit, Abbas Araghchi, mund të takohet me zv.presidentin amerikan në ditët në vijim, nëse Teherani vendos të pranojë propozimin.

Presidenti amerikan Donald Trump foli për këtë mundësi para gazetarëve, duke deklaruar se pala iraniane kishte sugjeruar që takimi të mbahej në Shtëpinë e Bardhë, një ide që, sipas tij, do të ishte e vështirë për t’u realizuar.

Trump theksoi edhe një herë se, sipas tij, “opsioni i vetëm që i ka mbetur Iranit është dorëzimi”.

Ndërkohë, udhëheqësi suprem iranian, Ajatollah Ali Khamenei, deklaroi se nuk do të dorëzohet.

The post BBC: Irani shqyrton një takim të drejtpërdrejtë me zëvendësin e Trump appeared first on Lapsi.al.

Papa Leoni i XIV është takuar në Vatikan me zv.Presidentin amerikan JD Vance. Ishte Selia e Shenjtë, e cila në një deklaratë sqaroi se të dyja palët janë të kënaqura nga marrëdhëniet midis SHBA-së dhe Vatikanit. Në fokus të bisedimeve ishte situata globale.

“Pati një shkëmbim pikëpamjesh mbi çështjet aktuale ndërkombëtare me një thirrje të përbashkët për respektimin e ligjit humanitar dhe ndërkombëtar në zonat e konfliktit, si dhe mbështetje për zgjidhje të negociuara midis palëve të përfshira”, thuhet ndër të tjera në deklaratë.

U diskutua gjithashtu liria fetare dhe bashkëpunimi midis kishës dhe shtetit, ku mori pjesë edhe Pjesë e takimit ishte edhe Sekretari i Shtetit, Marco Rubio, ku diskutuan gjithashtu për lirinë fetare dhe bashkëpunimit që duhet të ketë mes kishës dhe shtetit.

Takimi u zhvillua me dyer të mbyllura pa praninë e gazetarëve dhe zgjati 45 minuta.

Zëvendëspresidenti i Shteteve të Bashkuara J.D. Vance dhe Sekretari i Shtetit Marco Rubio u pritën në Vatikan të hënën në mëngjes nga Papa Leo XIV, në një takim që u përqendrua në marrëdhëniet dypalëshe dhe bashkëpunimin midis Kishës dhe shtetit. Vance zhvilloi më pas bisedime me Kryepeshkopin Paul Richard Gallagher , Sekretarin e Vatikanit për Marrëdhëniet me Shtetet dhe Organizatat Ndërkombëtare.

Sipas një deklarate nga Sekretariati i Shtypit i Vatikanit, bisedimet e zhvilluara konfirmuan kënaqësinë për marrëdhëniet e mira dypalëshe, ndërsa në të njëjtën kohë të dyja palët u përqendruan në bashkëpunimin midis Kishës dhe shtetit, si dhe në çështje me rëndësi të veçantë për jetën kishtare dhe lirinë fetare.

Pope Leo XIV received US Vice President JD Vance and Secretary of State Marco Rubio at the Vatican as part of renewed efforts to end the Russia-Ukraine war.https://t.co/7blBvrVHwG#3000kNairapic.twitter.com/12ob6XtcBT

— Newstropy (@_newstropy) May 19, 2025

Përveç kësaj, diskutimet përfshinë një shkëmbim pikëpamjesh mbi një numër çështjesh aktuale ndërkombëtare, me theks në nevojën për të respektuar të drejtën humanitare dhe ndërkombëtare në zonat e konfliktit dhe për të gjetur zgjidhje paqësore përmes negociatave midis palëve të përfshira.

The post Amerikanët të parët tek Papa, Leo XIV pret JD Vance dhe Marco Rubion appeared first on Lapsi.al.

Kryeministrja italiane Giorgia Meloni organizoi bisedime transatlantike midis Zëvendëspresidentit të SHBA-së, JD Vance dhe Presidentes së Komisionit Evropian, Ursula von der Leyen të dielën, në Romë. Diskutimi kishte për qëllim të ndihmonte në përparimin e bisedimeve tregtare midis SHBA-së dhe BE-së, dhe von der Leyen tha se shpresonte që kjo të shënonte “një fillim të […]

The post Kryeministrja e Italisë ndërmjetëson bisedime mes Ursula von der Leyen dhe JD Vance appeared first on BoldNews.al.

Në një takim të zhvilluar të dielën në Romë, nën kujdesin e kryeministres italiane Giorgia Meloni, në prani të zv.presidentit amerikan JD Vance dhe Presidentes së Komisionit Europian Ursula von der Leyen, u hodhën hapat e parë pozitivë për një rifillim në marrëdhënien tregtare mes SHBA-së dhe BE-së — një sinjal i rrallë nga administrata Trump, e cila muajin e kaluar nisi një valë të re tarifash në shkallë globale.

“Do të kemi një bisedë të shkëlqyer dhe shpresoj që kjo të jetë fillimi i disa negociatave tregtare afatgjata dhe përfitimeve afatgjata për të dyja palët”, deklaroi JD Vance, duke cilësuar Melonin si “ndërtuese urash” mes Uashingtonit dhe Brukselit.

Meloni, që prej vizitës së saj në Shtëpinë e Bardhë muajin e kaluar ku e ftoi Donald Trump në Itali për një samit me liderët europianë, u shfaq e qetë në rolin e “ndërtueses së urave” mes dy aleatëve të mëdhenj.

“Jam shumë krenare që kam mundësinë sot të pres dy nga liderët e Shteteve të Bashkuara dhe Bashkimit Europian për të nisur një dialog. E dimë sa të rëndësishme janë marrëdhëniet tona ekonomike dhe jemi këtu pikërisht për këtë,” tha Meloni.

Ursula von der Leyen nga ana e saj theksoi nevojën për dialog teknik mbi propozimet e ndërsjella që po qarkullojnë që prej javës së kaluar:

“Ajo që na bashkon është dëshira për një marrëveshje të mirë për të dyja palët. Tani që kemi shkëmbyer dokumentet, është e rëndësishme që ekspertët të thellohen në detaje.”

Deri tani, administrata Trump ka vendosur 10% taksë mbi të gjitha importet dhe 25% tarifa për çelikun, aluminin, makinat dhe pjesët e tyre – masa që prekin edhe BE-në. Një tjetër valë tarifash me 10 pikë përqindje është pezulluar deri në fillim të korrikut, por SHBA-ja vetëm javën e kaluar i paraqiti zyrtarisht Brukselit një plan të detajuar për objektivat e saj.

Ky takim i profilit të lartë vjen menjëherë pas inaugurimit të Papës së ri Leoni XIV në Vatikan, një moment me simbolikë të fortë edhe për Vance, i cili tha: “Shtetet e Bashkuara janë shumë krenare për të dhe jashtëzakonisht të entuziazmuara.”

Ndërsa Trump ka shfaqur herë pas here qëndrim armiqësor ndaj BE-së — duke e quajtur “më e ligë se Kina” dhe duke pretenduar se BE-ja është krijuar për të “shtypur SHBA-në” — deklaratat e Vance në Romë sugjerojnë një përpjekje për të zbutur tensionet përmes një rruge tregtare më pragmatike, me Italinë në rolin e ndërmjetësit.

The post JD Vance sinjale pozitive për negociatat tregtare SHBA-BE appeared first on Lapsi.al.

Presidenti ukrainas Volodymyr Zelensky dhe zëvendës presidenti amerikan JD Vance janë takuar këtë të dielë, për hetë të parë që nga përplasja e tyre e zjarrtë në Zyrën Ovale. Zelensky dhe JD Vance janë të dy në Vatikan për meshën inauguruese të Papa Leoni XIV, ku u takuan shkurt për të shtrënguar duart para shërbesës. […]

The post Zelensky dhe JD Vance takohen në Vatikan, për herë të parë pas përplasjes në Shtëpinë e Bardhë appeared first on BoldNews.al.

Zëvendës-presidenti i SHBA-së, JD Vance dhe presidenti ukrainas Volodymyr Zelensky u takuan për herë të parë që nga “përplasja” e tyre në Shtëpinë e Bardhë, duke buzëqeshur dhe duke shtrënguar duart në Vatikan.

Për herë të dytë brenda disa javësh, udhëheqës botërorë dhe personalitete të tjera zbarkuan në Romë – këtë herë për të festuar meshën e parë të Papa Leos XIV, i cili u zgjodh si papë këtë muaj, shkruajnë mediat e huaja, përcjell Telegrafi.

Delegacione nga më shumë se 100 vende janë të pranishme në Vatikan.

Zelensky, JD Vance shake hands in first meeting after White House fiery exchange. pic.twitter.com/aJKvluHCT0

— Roya News English (@RoyaNewsEnglish) May 18, 2025

Zelensky u prit me duartrokitje teksa mbërriti në Sheshin e Shën Pjetrit, dhe Papa bëri një turne me “Popemobile” nëpër shesh.

Aty, Zelensky ishte ulur pranë Presidentes së Komisionit Evropian, Ursula von der Leyen, me Vance afër.

Kryeministrja italiane Giorgia Meloni po shtyn për një takim midis udhëheqësit me seli në Bruksel dhe administratës amerikane, ndërsa një luftë tregtare po afrohet, dhe afërsia e tyre të dielën mund të ndihmojë në hapjen e rrugës.

Si Papa i parë i lindur në SHBA, Papa i ri deri më tani e ka përqendruar mesazhin e tij në arritjen e paqes në Ukrainë dhe Gaza, duke sinjalizuar se ai mund të vazhdojë – ose zgjerojë – angazhimin gjeopolitik të paraardhësit të tij, Papa Françeskut.

Presidenti Donald Trump, Zelensky dhe Vance u takuan për herë të fundit në Shtëpinë e Bardhë në shkurt, kur u përplasën për të ardhmen e paqes në Ukrainë në një takim televiziv të përshkruar si një nga incidentet më të këqija diplomatike në historinë e kohëve të fundit.

Zelensky: “Have you ever actually been to Ukraine to see the problems we have?”

JD Vance: “I’ve been to…. I’ve actually seen and watched the stories.” pic.twitter.com/ZXhMsF9ngM

— NEXTA (@nexta_tv) February 28, 2025

Gjatë atij takimi, Vance e pyeti Zelenskyn nëse ai kishte “thënë ndonjëherë faleminderit” për miliarda dollarë ndihmë të ofruara vendit të shkatërruar nga lufta nga SHBA-të, që nga pushtimi i plotë i filluar nga Rusia në vitin 2022.

Trump dhe Zelensky u takuan përsëri në Vatikan muajin e kaluar në funeralin e Papa Françeskut, një diskutim i shkurtër që Shtëpia e Bardhë e përshkroi si shpresëdhënës ndërsa Zelensky si “substancial”.

Ndërkohë, negociatat në Stamboll javën e kaluar midis ekipeve ukrainase dhe ruse nuk arritën të jepnin një përparim në një armëpushim të mundshëm.

Trump planifikon të telefonojë Vladimir Putinin dhe Zelenskyn veçmas të hënën, njoftoi ai të shtunën, në një përpjekje për të ndaluar “gjakderdhjen” në Ukrainë. /Telegrafi/

The post Zelensky dhe JD Vance u takuan për herë të parë që nga “përplasja” e tyre në Shtëpinë e Bardhë appeared first on Telegrafi.

Zëvendëspresidenti i Shteteve të Bashkuara të Amerikës, JD Vance, deklaroi se India dhe Pakistani duhet të zbusin tensionet, por shtoi se SHBA-të nuk mund të kontrollojnë vendet aziatike të armatosura me armë bërthamore dhe se një luftë mes tyre nuk do të kishte lidhje me SHBA-të.

“Ne duam që kjo situatë të de-përshkallëzohet sa më shpejt të jetë e mundur. Megjithatë, ne nuk mund t’i kontrollojmë këto vende. Ajo që mund të bëjmë është të përpiqemi t’i inkurajojmë ata të ulin tensionet, por nuk do të përfshihemi në mes të një lufte që në thelb nuk na përket dhe nuk ka asnjë lidhje me aftësinë e Amerikës për ta kontrolluar atë”, tha Vance në një intervistë për Fox News.

India është një partnere e rëndësishme e Uashingtonit, i cili synon të përballojë ndikimin në rritje të Kinës, ndërsa Pakistani mbetet një aleat i SHBA-ve, pavarësisht nga rëndësia e tij e reduktuar pas tërheqjes së trupave amerikane nga Afganistani fqinj në vitin 2021.

Lexo po ashtu India pretendon se Pakistani ka nisur sulme të shumta përgjatë kufirit perëndimor

Analistët dhe disa ish-zyrtarë amerikanë kanë thënë se përfshirja e SHBA-ve në arritjen e objektivave diplomatike në luftën e Rusisë në Ukrainë dhe në luftën izraelite në Gaza mund ta shtyjë Uashingtonin të lërë Indinë dhe Pakistanin të veprojnë vetë në ditët e para të tensioneve të tyre, pa ndonjë presion të madh të drejtpërdrejtë nga qeveria amerikane, sipas reuters.

Pakistani dhe India janë akuzuar reciprokisht për sulme me dronë, ndërsa ministri i mbrojtjes i Islamabadit ka thënë se përshkallëzimi i mëtejshëm i konfliktit është “gjithnjë e më i mundshëm”. Luftimet dyditore kanë marrë jetën e më shumë se 40 personave.

Presidenti i SHBA-ve, Donald Trump, e ka quajtur përshkallëzimin e tensioneve një turp, duke thënë se shpreson që të dy vendet të ulin tensionet. Departamenti i Shtetit ka bërë thirrje që të dyja vendet të punojnë drejt asaj që Uashingtoni e quan “një zgjidhje të përgjegjshme”. /Telegrafi/

The post JD Vance: Nuk do të përfshihemi në një luftë që nuk na përket, nuk mund ta kontrollojmë Indinë dhe Pakistanin appeared first on Telegrafi.

Nuk kishin kaluar as 10 ditë kur J.D. Vance mori detyrën si zv.President i SHBA dhe një deklaratë e tij bëri mobilizoi udhëheqësit e Kishës Katolike. Replika pati edhe mes tij dhe Kardinalit amerikan Prevost, i cili u zgjodh sot Papë me emrin Leon XIV. Në një postim në “X”, Prevost kishte komentuar në atë kohë se sa të papajtueshme ishin ato Vance thoshte për mësimet e Biblës.

Megjithatë, në reagimin e tij të parë, J.D. Vance, i cili u konvertua në katolik në vitin 2019, e uroi Papën e ri dhe shprehu sigurinë e tij se “miliona katolikë amerikanë dhe të krishterë të tjerë do të luten për punën e tij të suksesshme të udhëheqjes së Kishës”.

Më 29 janar të këtij viti, Vance i tha Fox News: “Ekziston një ide e krishterë që thotë duaje familjen tënde, duaje të afërmin tënd dhe pastaj duaje komunitetin tënd, pastaj bashkëqytetarët e tu dhe pas kësaj, si përparësi, pjesën tjetër të botës. Një pjesë e madhe e së majtës ekstreme e përmbysi këtë”.

Por a është e vlefshme kjo hierarki e propozuar nga Vance për dashurinë ndaj të tjerëve, pyesnin veten shumë njerëz. Për disa, kjo ishte e bazuar mirë, duke gjykuar nga ajo që thotë Letra e Parë e Apostullit Pal drejtuar Timoteut.

“Kushdo që nuk kujdeset për të vetët dhe veçanërisht për familjen e tij, e mohon besimin dhe është më i keq se një jobesimtar”, shkruan ai (“nëse nuk kujdeset për të vetët, dhe veçanërisht për familjen e tij, ai e ka mohuar besimin dhe është më i keq se një jobesimtar”).

JD Vance is wrong: Jesus doesn’t ask us to rank our love for others https://t.co/hDKPKuMXmu via @NCRonline

— Robert Prevost (@drprevost) February 3, 2025

Por Prevosti nuk ishte dakord me Vance.

Në një nga postimet e tij të pakta në X, ai zgjodhi të ripostojë një artikull nga “National Catholic Reporter”, gazeta amerikane për Kishën Katolike duke theksuar se “Vance gabon: Krishti nuk na kërkon të kemi përparësi në dashurinë tonë për të tjerët”.

Në një ripostim tjetër, të vitit 2018, ai citoi një postim të bërë nga kryepeshkopi i Çikagos, i cili kritikonte politikën e administratës së parë Trump që ndante fëmijët emigrantë nga prindërit e tyre për deportim.

There is nothing remotely Christian, American, or morally defensible about a policy that takes children away from their parents and warehouses them in cages. This is being carried out in our name and the shame is on us all.

— Cardinal Cupich (@CardinalBCupich) June 20, 2018

“Nuk ka asgjë të krishterë, amerikane apo moralisht të mbrojtshme në një politikë që u merr fëmijët prindërve të tyre dhe i fut në kafaze. Kjo po bëhet në emrin tonë dhe turpi është mbi të gjithë ne”, – shkroi Kardinali Cupic që Prevosti e mbështeti. ©LAPSI.al

The post Përplasjet/ Kur Papa i ri kritikonte J.D. Vance dhe administratën Trump appeared first on Lapsi.al.

Pamjet e 28 shkurtit të këtij viti, tregonin zëvendës Presidentin Amerikan JD Vance duke  iu hakërrye presidentit Ukrainas Volodymir Zelensky në Shtëpinë e Bardhë  dhe duke duke I thënë se nuk po bashkëpunonte me Washingtonin për ti dhënë fund luftës me Rusinë. Vanca tha gjithashtu se Zelenlsy  nuk ishte mirnjohës për ndihmën që Amerika I kishte dhënë vendit të tij .

Tashmë situata duket se ka ndryshuar pas takimit Trump Zelenksy ne Vatikan dhe  Shtetet e Bashkuara duket se po pranojnë realitetin se është Moska ajo që nuk do që kjo luftë të marrë fund.

Në një intervistë për Fox News, Zëvendës Presidenti Amerikan JD Vance u shpreh se ai mendon se lufta në Europën Lindore nuk do të përfudnojë së  shpejti ashtu sic ishin planet dhe premtimet e administratës Trump. Vance tha se  paqja tashmë varet nga puna që do të bëjë Rusia dhe Ukraina.

“Për tre vite të dyja palët kanë luftuar pa u ndalur duke mos llogaritur paqen dhe duke thënë se do të luftojmë deri në fund dhe të shohim se kush do të rrëzohet. Në dy javët e fundit i kemi parë këto dy pale që janë ulur dhe kanë dëgjuar kushtet e njëri tjetrit. Procesi tashmë varet nga Rusia dhe Ukraina.  Kjo luftë nuk do të përfundojë së shpejti. Ukrainasit janv të zemvruar që u pushtuan, por a duan ata të vijojnë të humbin mijëra ushtarë?  Shpresoj që pale të vijnë në vete.”

Deklaratat e Zëvendës Presidentit Amerikan JD Vance erdhën pasi Shtetet e Bashkuara dhe Ukraina nënshkruan një marrëveshje për ndarë fitimet e mineraleve me vlerë që Kievi zyrtar zotëron, në këmbim të ndihmës ushtarake dhe financiare Amerikane.

Shtetet e Bashkuara paralajmëruan këtë javë se do të tërhiqeshin nga negociatat për paqe nëse Rusia dhe Ukraina nuk përfshiheshin në mënyrë konstruktive në bisedime mbi mënyrën sesi duhet ti jepet fund luftës në Europën Lindore./abcnews.al

Pretendimi: Papë Francesku refuzoi takimin me JD Vance duke e deleguar takimin tek sekretari i shtetit të Vatikanit

Verdikti: E pavërtetë

——————————————

Ndërsa lajmi për vdekjen e Papa Françeskut më 21 prill 2025 u përhap në të gjithë botën, një ditë më parë qarkulluan pretendime se pak para vdekjes së Papës, ai nuk mori pjesë në një takim me zëvendëspresidentin e ShBA, JD Vance.

Megjithatë, nuk ka prova që Papa refuzoi një takim me Vance gjatë fundjavës së Pashkëve 2025, një pretendim që duket se buron nga një artikull i përditësuar që atëherë nga The Daily Beast. 

Përkundrazi, Vance dhe Papa u takuan shkurtimisht të Dielën e Pashkëve, më 20 prill, në një takim të dokumentuar nga të dyja palët.

Zëvendës-presidenti amerikan JD Vance dhe Papë Francesku në Casa Santa Maria, më 20 prill 2025

Planet e udhëtimit të publikuara para Pashkëve tregojne se, si pjesë e një udhëtimi në Itali dhe Indi, Vance duhej të takohej me Kardinalin Pietro Parolin, sekretarin e shtetit të Vatikanit. Ky takim ndodhi më 19 prill, sipas Vatican News, një shërbim lajmesh i ofruar nga Dikasteri i Selisë së Shenjtë për Komunikim, dhe u zhvillua përveç, jo në vend të, takimit të 20 prillit me Papë Françeskun. 

Sipas Vatican News, Papa dhe Vance patën një takim “të shkurtër” më 20 prill që zgjati “disa minuta”. Në të, dyshja thuhet se shkëmbyen urime për Pashkët dhe rinovuan një “angazhim të përbashkët për të mbrojtur të drejtën e lirisë fetare dhe lirinë e ndërgjegjes”.

Papa dhe Vance shkëmbyen gjithashtu pikëpamje mbi “situatën ndërkombëtare, veçanërisht në lidhje me vendet e prekura nga lufta, tensionet politike dhe situatat e vështira humanitare, me vëmendje të veçantë të përqendruar te migrantët, refugjatët dhe ata në burg.”

Papë Francesku vdiq më 21 prill 2025 në moshën 88 vjeç, pasi një goditje në tru e futi në koma dhe i shkaktoi pamjaftueshmëri kardiake. Ai vuante gjithashtu nga një sëmundje kronike e mushkërive dhe kohët e fundit ishte shtruar në spital për 38 ditë për shkak të problemeve me frymëmarrjen që çuan në pneumoni të dyfishtë.

Fakti që JD Vance ishte një nga udhëheqësit e fundit që u takua me Papa Françeskun përpara vdekjes së tij u vu në lojë në mënyrë humoristke nga media dhe rrjetet sociale, ku u parashtruan teori se Vance kishte vrarë Papën, se takimi me Vance ishte aq i padurueshëm sa Papa kishte zgjedhur të vdiste menjëherë pas tij apo se Vance është Antikrishti.

The post Papa Francesku nuk refuzoi takimin me JD Vance appeared first on Faktoje.al.

Zëvendëspresidenti amerikan, JD Vance ka paralajmëruar se SHBA do të tërhiqet nga përpjekjet diplomatike për t’i dhënë fund luftës, nëse Ukraina dhe Rusia nuk pajtohen për një marrëveshje.

Paralajmërimi i JD Vance vjen në një kohë kur takimi i nivelit të lartë që u prit të mbahej në Londër midis ministrave të Punëve të Jashtme të Britanisë së Madhe, Francës, Gjermanisë, Ukrainës dhe SHBA-së degradoi në takim të nivelit të zyrtarëve, pasi sekretari amerikan, Marco Rubio dhe i dërguari i posaçëm, Steve Witkoff refuzuan të marrin pjesë.

SHBA-ja është impenjuar në bisedimet e kësaj jave në Moskë, ku Witkoff do të takohet për herë të katërt me presidentin rus, Vladimir Putin, teksa shpejtësia e përpjekjeve diplomatike për t’i dhënë fund luftës është shtuar.

Nga ana tjetër, presidenti ukrainas, Volodymyr Zelensky vazhdimisht ka këmbëngulur se duhet “një armëpushim i menjëhershëm, i plotë dhe i pakushtëzuar”./abcnews.al

Zëvendëspresidenti i SHBA-së JD Vance u takua sot me zyrtarin nr. 2 të Vatikanit, mes tensioneve për politiken e SHBA-së ndaj emigrantëve, sipas AP.

Selia e Shenjtë rikonfirmoi marrëdhëniet e mira, duke theksuar se palët kishin shkëmbyer mendime rreth konflikteve aktuale ndërkombëtare, migrantëve dhe të burgosurve.

Vatikani lëshoi ​​një deklaratë pasi JD Vance, një i konvertuar katolik, u takua me sekretarin e shtetit, kardinalin Pietro Parolin dhe ministrin e Jashtëm, kryepeshkopin Paul Gallagher.

Nuk u bë e ditur nëse Vance do të ndalonte për të përshëndetur Papa Françeskun, i cili ka rifilluar disa detyra zyrtare pas shërimit të tij nga pneumonia.

Selia e Shenjtë i është përgjigjur me kujdes administratës Trump, në përputhje me traditën e saj të neutralitetit diplomatik.

Ajo ka shprehur alarmin për politikën e ashpër të SHBA-së lidhur me deportimin e emigrantëve dhe shkurtimin e ndihmës ndërkombëtare – ndërsa ka këmbëngulur  për zgjidhje paqësore për luftërat në Ukrainë dhe Gazë.

Këto shqetësime u pasqyruan në deklaratën e Vatikanit, ku thuhej se bisedimet ishin të përzemërta dhe se Vatikani kishte shprehur kënaqësinë për angazhimin e administratës në mbrojtjen e lirisë së fesë dhe ndërgjegjes.

“Ka pasur një shkëmbim mendimesh për situatën ndërkombëtare, veçanërisht për vendet e prekura nga lufta, tensionet politike dhe situatat e vështira humanitare, me vëmendje të veçantë ndaj emigrantëve, refugjatëve dhe të burgosurve”, thuhet në deklaratë.

Gjithashtu, palët shprehën shpresen për një bashkëpunim të qetë midis Shtetit dhe Kishës Katolike në SHBA.

Referenca për “bashkëpunim të qetë” dukej se i referohej akuzës së JD Vance se Konferenca e Peshkopëve Katolikë të SHBA-së po zhvendoste “emigrantët e paligjshëm” me qëllim që të merrte fonde federale.

Kardinalët e lartë amerikanë kanë refuzuar fuqishëm pretendimin.

“Është e qartë se qasja e administratës aktuale të SHBA-së është shumë e ndryshme nga ajo me të cilën jemi mësuar dhe, veçanërisht në Perëndim – nga ajo në të cilën jemi mbështetur për shumë vite”, tha Parolin për “La Repubblica” në prag të vizitës së JD Vance.