Deputetët e Kuvendit të Kosovës do të mblidhen sot sërish në tentimin për të konstituuar Kuvendin e Kosovës. Procesi i konstituimit ka mbetur te zgjedhja e nënkryetarit nga komuniteti pakicë serb.

Në seancën e 26 gushtit, deputeti i Listës Serbe, Sllavko Simiç, tre herë nuk i mori votat për t’u zgjedhur nënkryetar i Kuvendit.

Më pastaj kryetari Kuvendit, Dimal Basha, vendosi që procedura për zgjedhjen e nënkryetarit të bëhet përmes shortit, mirëpo pas vendosjes në votim edhe të deputetit nga komuniteti serb, Nenad Rashiq, as ai nuk mori votat e nevojshme për të marrë këtë post.

Për Rashiqin, i cili kandidojë vetën, sot pritet të jetë hera e tretë dhe e fundit që tenton të marrë besimin e deputetëve. Përndryshe në ditën e 26 gushtit, Dimal Basha mori besimin e 73 deputetëve, 30 ishin kundër dhe tetë abstenuan.

Po në të njëjtën ditë janë zgjedhur nënkryetarët nga tri partitë më të mëdha shqiptare që janë Albulena Haxhiu, Vlora Çitaku dhe Kujtim Shala.

Edhe nga komunitetet tjera pakicë Emilia Rexhepi është zgjedhur si nënkryetare me rotacion.

Pas dështimit në dy seancat e fundit për të zgjedhur nënkryetarit nga komuniteti serb, edhe sot procesi i zgjedhjes së nënkryetarit pritet të vazhdojë përmes shortit, i cili parashihet edhe në rregulloren e Kuvendit./kosovapress/

Sot është Dita Ndërkombëtare e Personave të Zhdukur. Kur janë bërë 26 vjet nga përfundimi i luftës në Kosovë, zyrtarisht edhe mbi 1590 persona figurojnë si të zhdukur.

Dje, krerët e shtetit kanë bërë homazhe te Monumenti i Personave të Zhdukur, në shënim të Ditës Ndërkombëtare të të Zhdukurve me Dhunë.

Edhe këtë të shtunë do të vazhdojnë aktivitete të ndryshme. Pas përfundimit të luftës në Kosovë, në vitin 1999, të zhdukur kanë qenë rreth 6.500 persona.

Që nga ajo kohë janë kryer disa zhvarrime në varreza masive në Kosovë dhe Serbi, dhe deri më tash janë gjetur rreth 70 për qind e të zhdukurve.

Një studim i fundit i zhvilluar nga Ohio State University sugjeron se jetesa pranë oqeanit mund të lidhet me jetëgjatësi më të madhe.

Studimi përfshiu të dhëna nga më shumë se 6 000 zona në Shtetet e Bashkuara të Amerikës, duke krahasuar jetëgjatësinë sipas afërsisë me trupat e ujit.

Rezultatet treguan se banorët që jetojnë brenda rreth 30 kilometrash nga oqeani ose gjiri jetojnë mesatarisht një apo dy vite më gjatë se mesatarja kombëtare prej 79 vjetësh.

Në të njëjtën kohë, ata që jetojnë pranë lumenjve dhe liqeneve të brendshme në zonat urbane mund të kenë jetëgjatësi më të shkurtër, rreth 78 vjet.

Edhe banorët ruralë pranë ujërave mund të përfitojnë disa avantazhe, por jo aq të dukshme sa ata pranë bregdetit.

Shkencëtarët shpjegojnë këtë diferencë me faktorë të ndryshëm mjedisorë dhe socialë; ajër më i pastër, temperatura më të ulëta gjatë verës, më shumë mundësi për aktivitet fizik dhe rekreacion, transport më i mirë dhe të ardhura më të larta pranë bregdetit.

Ushtria izraelite njoftoi se i ka dhënë fund të ashtuquajturës “pauzë humanitare” në Gaza, të cilën planifikon ta pushtojë dhe ku gati 1 milion palestinezë janë strehuar, dhe e ka shpallur atë një “zonë të rrezikshme lufte”.

Ushtria izraelite po intensifikon sulmet e saj në Gazën veriore në ndjekje të pushtimit dhe zhvendosjes me forcë të palestinezëve. Izraeli i cili ka intensifikuar sulmet në Gazën lindore, të cilën planifikon ta pushtojë, synon të zhvendosë me forcë afërsisht 1 milion palestinezë nga zona.

Në një deklaratë me shkrim, ushtria izraelite deklaroi se Gaza është hequr nga e ashtuquajtura “pauzë humanitare”, të cilën e ka shpallur qeveria e Tel Avivit. Në deklaratë Gaza e cila planifikohet të pushtohet, përshkruhet se si “zonë e rrezikshme lufte”.

Pas këtij vendimi, ushtria izraelite pritet të intensifikojë më tej sulmet e saj në Gazën veriore, veçanërisht në qytetin e Gazës.

– Izraeli ka vendosur të pushtojë qytetin e Gazës

Kabineti izraelit i Sigurisë miratoi një plan më 8 gusht për të pushtuar qytetin e Gazës. Kryeministri izraelit, Benjamin Netanyahu tha në një intervistë para mbledhjes së kabinetit se ata synojnë të pushtojnë të gjithë Rripin e Gazës.

Ministri i Jashtëm belg shprehu keqardhje për vendimin e SHBA-së për të revokuar vizat për përfaqësuesit palestinezë përpara Asamblesë së Përgjithshme të OKB-së, duke e etiketuar këtë veprim si “goditje ndaj diplomacisë”

“Në një moment kur ka një vrull të ripërtërirë drejt një zgjidhjeje me dy shtete… pengimi i zërit palestinez nuk është vetëm i padrejtë, por është edhe kundërproduktiv”, tha Maxime Prevot në platformën sociale të kompanisë amerikane X.

Ai theksoi se OKB-ja duhet të mbetet një vend ku të gjithë popujt mund të dëgjohen, “veçanërisht ata, e ardhmja e të cilëve varet nga dialogu”.

“Përjashtimi i përfaqësuesve palestinezë minon vetë parimet e multilateralizmit dhe të drejtës ndërkombëtare”, tha Prevot, duke shtuar se rruga drejt paqes kërkon “më shumë dialog, jo më pak”.

Vendimi i SHBA-së për të mohuar dhe revokuar vizat për zyrtarët palestinezë dhe për t’i ndaluar ata të marrin pjesë në Asamblenë e Përgjithshme të OKB-së muajin e ardhshëm në New York vjen në një kohë kur disa vende perëndimore përgatiten të njohin një shtet palestinez.

“Në përputhje me ligjin amerikan, Sekretari i Shtetit Marco Rubio po mohon dhe revokon vizat për anëtarët e Organizatës për Çlirimin e Palestinës (PLO) dhe Autoritetit Palestinez (PA) përpara Asamblesë së Përgjithshme të Kombeve të Bashkuara që do të mbahet së shpejti”, tha Departamenti i Shtetit në një deklaratë të premten.

Një influencuese meksikane u gjet e vdekur brenda një kamioni së bashku me bashkëshortin dhe fëmijët e saj. Viktimat janë 32-vjeçarja Esmeralda Ferrer Garibay, bashkëshorti i saj 36-vjeçar, djali i tyre 13-vjeçar dhe vajza 7-vjeçare .

Trupat u gjetën javën e kaluar në Guadalajara, por identitetet e tyre u zbuluan vetëm dje, raporton The Sun.

Familja ishte zhvendosur së fundmi në qytet për të jetuar dhe punuar atje.

Autoritetet dyshojnë se bashkëshorti i Garibay ishte shënjestra e sulmit, por hetimet vijojnë ende dhe pritet që të hedhin dritë mbi ngjarjen makabre.

/abcnews.al/

Një tërmet me magnitudë 5.5 ballë të shkallës Rihter ka goditur Japoninë, njoftoi Qendra Sizmologjike Evropiane-Mesdhetare.

Sipas raportimeve, epiqendra e tërmetit ishte në det të hapur në Paqësor, në lindje të ishullit Honshu.

Ndërsa, Epiqendra ishte në një thellësi prej 35 kilometrash, rreth 11 kilometra larg qytetit të Sendait me një popullsi prej një milion banorësh.

Më shumë se 60 migrantë dhe azilkërkues janë dëbuar nga SHBA-ja drejt Rusisë. Ky është një nga grupet më të mëdha të shtetasve rusë që janë dëbuar ilegalisht nga SHBA, të cilët janë dërguar në Rusi përmes Kajros.

Një dëbim tjetër i madh ndodhi në muajin qershor, kur SHBA dërgoi rreth 40 persona të tjerë në Rusi.

Numri i fluturimeve për deportimin e emigrantëve nga Shtetet e Bashkuara ka arritur një nivel rekord këtë vit. Sipas të dhënave të publikuara,  gjatë muajit korrik janë regjistruar 1214 fluturime deportimi, shifra më e lartë që nga viti 2020, kur filloi monitorimi i tillë.

Kancelari gjerman, Friedrich Merz tha se lufta e Rusisë në Ukrainë mund të vazhdojë për “muaj të tërë” pavarësisht përpjekjeve të fundit të udhëhequra nga Shtetet e Bashkuara për t’i dhënë fund konfliktit.

Duke folur së bashku me presidentin francez, Emmanuel Macron, në Francë, Merz tha se ai nuk ka “iluzione” për mundësinë e një përfundimi të shpejtë të luftës dhe u zotua se “ne nuk do ta braktisim Ukrainën”.

Merz tha se nuk ishte “i befasuar” nga vonesat e vazhdueshme të Kremlinit mbi përpjekjen e presidentit amerikan, Donald Trump, për të organizuar bisedime të drejtpërdrejta mes liderit rus, Vladimir Putin, dhe homologut të tij ukrainas, Volodymyr Zelensky. “Ajo është pjesë e strategjisë së këtij presidenti rus”, tha ai.

Google përballet me një shkelje të të dhënave dhe ishte vetë gjiganti i teknologjisë që njoftoi lajmin duke përshkruar një sulm sigurie që rezultoi në akses dhe zbulim të paautorizuar të të dhënave personale të përdoruesve, shkruajnë mediat e huaja.

”Gjiganti i teknologjisë me seli në Mountain View paralajmëroi gjithashtu së fundmi për një tjetër mashtrim të ri, në të cilin individë keqdashës imitojnë mbështetjen e IT-së së Google për të hakuar llogaritë e përdoruesve dhe për të aksesuar informacionin personal ose financiar”, sipas Columbus Dispatch.

Për këtë arsye, kompania me seli në Kaliforni ka këshilluar 2,5 miliardë përdoruesit e saj të Gmail të përditësojnë fjalëkalimet e tyre dhe të forcojnë sigurinë e tyre.

Si të mbroheni?

Siç raportohet nga blogu i sigurisë kibernetike Malwarebytes Labs, mashtruesit zakonisht u dërgojnë një email përdoruesve duke i informuar ata se “llogaria e tyre nuk është e sigurt” dhe duke i nxitur ata të rivendosin fjalëkalimin e tyre.

Pasi të futin kredencialet e tyre të hyrjes duke përdorur lidhjen mashtruese, viktimat pa e ditur u japin hakerëve qasje në llogarinë e tyre.

Pra, si mund ta mbroni veten? Google ka deklaruar se Gmail nuk dërgon kurrë mesazhe ose email-e që kërkojnë fjalëkalimet e përdoruesve ose informacione të tjera personale. Kompania e madhe e teknologjisë ka përpiluar gjithashtu një listë këshillash për të shmangur mashtrimet e phishing:

• Raportoni email-et e phishing te Ndihma e Google
• Edhe pse Google lëshon paralajmërime për phishing nëse zbulon email-e të dyshimta, ai nuk dërgon kurrë email-e të padëshiruara që kërkojnë informacione personale
• Mos u përgjigjeni kërkesave për informacione private përmes email-it, mesazhit me tekst ose telefonatës
• Mos e futni fjalëkalimin tuaj pasi të klikoni një lidhje në një mesazh. Email-et e Google nuk kërkojnë kurrë fjalëkalimin e llogarisë suaj
• Kini kujdes me mesazhet që duken urgjente
• Mos klikoni kurrë në lidhje nga burime të panjohura ose të pabesueshme.

Kërcënim për ministrin e Brendshëm të Serbisë, Ivica Daçiç. Në Qeverinë e Serbisë ka mbërritur një zarf i adresuar për ministrin e Brendshëm, brenda të cilit janë gjetur tre plumba. Njoftimi është dhënë nga Ministria e Punëve të Brendshme serbe.

Sipas njoftimit, zarfi është evidentuar të enjten “gjatë procesit të rregullt të ndarjes së postës”.

“Gjatë kontrollit të sigurisë me pajisje me rreze X, në zarf u gjetën tre plumba”, thuhet në komunikatën e Ministrisë së Brendshme serbe.

Autoritetet shtuan se policia ka identifikuar dhe gjetur personin që më 26 gusht kishte dorëzuar dërgesën në një degë të Postës së Serbisë në Pozharevc.

Nuk është bërë i ditur identiteti i të dyshuarit. Ivica Dacic njihet si një nga bashkëpunëtorët me të ngushte të presidentit serb Aleksandër Vucic.

Ai ka shërbyer si zëvendëskryeministër i Serbisë që nga viti 2022 dhe ministër i punëve të brendshme që nga viti 2024.

/abcnews.al/

Njëzet e gjashtë shtete anëtare të Bashkimit Evropian (BE), përveç Hungarisë, dënuan sulmet e fundit ruse ndaj Kievit dhe u zotuan të përshpejtojnë punën për pakon e 19-të të sanksioneve kundër Moskës.

“Shprehim ngushëllimet tona, solidarizohemi me të gjithë ukrainasit dhe dënojmë fuqimisht sulmet e vazhdueshme të Rusisë ndaj civilëve dhe infrastrukturës civile, të cilat janë përshkallëzim i qëllimshëm dhe minojnë përpjekjet drejt paqes”, thuhet në një deklaratë të lëshuar nga shefja e politikës së jashtme të BE-së, Kaja Kallas, e mbështetur nga 26 shtetet anëtare, përveç Hungarisë.

Duke kujtuar ndërtesën e dëmtuar të Delegacionit të BE-së, deklarata vuri në dukje se rrezikimi i jetës së diplomatëve dhe personelit diplomatik është “shkelje e qartë” e Konventës së Vjenës për Marrëdhëniet Diplomatike.

“Sulmet e qëllimshme kundër civilëve dhe objektivave jo-ushtarake janë krime lufte. Të gjithë komandantët, autorët dhe bashkëpunëtorët e këtyre shkeljeve të rënda të së drejtës ndërkombëtare humanitare do të mbahen përgjegjës”, shtoi deklarata.

Në deklaratë thuhet se sulme të tilla “vetëm përforcojnë” vendosmërinë e bllokut për të mbështetur Ukrainën.

“BE-ja do të vazhdojë dhe do të rrisë mbështetjen e saj gjithëpërfshirëse për Ukrainën në të gjitha aspektet, përfshirë përshpejtimin e punës për pakon e 19-të të sanksioneve”, nënvizoi më tej deklarata.

Deklarata i kërkon Rusisë të “ndalojë vrasjet” dhe të tregojë “gatishmëri të sinqertë” për paqe. Ukraina njoftoi të enjten se të paktën 21 persona u vranë në një sulm masiv rus ndaj Kievit gjatë natës. Këshilli Britanik dhe misioni i BE-së në Kiev thanë se ndërtesat e tyre u goditën dhe u dëmtuan në sulm.

Përshkallëzohen tensionet mes Shteteve të Bashkuara të Amerikës dhe Venezuelës. Washingtoni zyrtar ka dërguar  një grup prej 7 luftëanijesh ushtarake në Karabinet jugore si dhe një nëndetëse  bërthamore të aftë për të kryer sulme të shpejta. Qëllimi Kryesor sipas zyrtarëve amerikanë është përballimi nga kërcënimet  Karteleve tëdrogës së Amerikës Latine.

Vetë Trump e ka bërë lutën kundër karteleve të drogës e një prioritet të Qeverisë së tij.Ndërsa anijet e Gardës Bregdetare dhe Marinës amerikane operojnë rregullisht në Karaibet Jugore, ky përforcim është dukshëm më i madh se  vendosjet normale ushtarake.

Një zyrtar amerikan që foli për kushtet e anonimatit për mediat ndërkombëtare tha se Shtetet e Bashkuara e kanë bërë të qartë se regjimi I Maduros nuk është qeveria legjitike e Venezuelës dhe se është një kartel Narko terrorizmi.

Administrata  e Donald Trump njoftoi më herët përgjatë këtij viti se kishte dyfishuar shpërblimin në 50 milionë dollarë për këdo të jepte informacione mbi arrestimin e Maduros.

Administrata Trump ka shpallur kartelin Sinaloa të Meksikës dhe grupet kriminale venezueliane si organizata terroriste globale. Shtetet e tjera të Karaibeve kanë mbështetur operacionet kundër drogës të administratës amerikane, ndërsa Shtëpia e Bardhë thekson gatishmërinë e Trump për të përdorur “çdo element të fuqisë amerikane” për të ndaluar transportin e lendeve narkotike ,.

Pas kësaj lëvizje të Shteteve të Bashkuara, Presidenti i Venezuelës Nicolas Maduro tha se nuk kishte asnjë mundësi që trupat Amerikanë të pushtonin vendin e tij .

Maduro bëri këtë deklaratë ndërsa mbikqyrte stërvitjen e ushtrisë së Venezuelës.

Pamjet e seancave stërvitore u publikuan nga televizioni shtetëror i Venezuelës me titujt se vendi nuk do të dorëzohej përballë presionit të Washingtonit.

Një aksident me vdekje ka ndodhur në Kavajë. Mësohet se rreth orës 14:00, në aksin Rrogozhinë-Kavajë, një shtetas ka përplasur me automjetin që drejtonte, këmbësorin 83 vjeç, i cili si pasojë e plagëve të marra ka humbur jetën.

Drejtuesi i automjeti është shoqëruar në komisariat.

Grupi hetimor është në vendngjarje dhe po punon për sqarimin e rrethanave të aksidentit.

/abcnews.al/

Familjarë, miq, kolegë i bënë nderimet e fundit aktorit dhe regjisorit Naun Shundi.

Homazhet u zhvilluan në sallën e Art Turbinës.

Naun Shundi  u shua në moshën 66 vjeçar pas një beteje më një sëmundje të rëndë.

Ai është një nga figurat më të vlerësuara të skenës shqiptare.  Ka lënë pas rreth 100 role dhe kolegët e kujtojnë kështu.

“Do ta kujtojmë si një koleg ndër të rrallët, në atë heshjen e vet, në atë qetësinë e vet,  po thonte shumëcka është trishtim i madh të bësh homazh për kolegët. Do ishte shumë bukur të vinim të shikonim shfaqet e tyre”

Mjeshtrinë  si aktor Naun Shundi ja ka përcjellë dhe brezave të rinj si peadog në Akademinë e Arteve për rreth 7 vite.

Më pas  si themelues I një hapësire të veçantë kulturore,  teatrit  të tij,   hapi dyert për shumë krijues.

Teatri Kombëtar një vit më parë e nderoi me medaljen e mirënjohejes.

“Nauni ishte nga këta artistë të mëdhenj kokëulur dhe modest që asnjëherë nuk i ra gjoksit që jam unë, por vepra e tij puna e tij talenti i tij  ulurinin gjithandej, vlerësoheshin gjithandej. rruga e tij artisitke ësht ënjë rrugë që duhet ndjekur sidomos nga të rinjtë sepse ai la mesazhe paqe nekomunitetit artistik, dashurie.”

Pas rreth një  orë e gjysmë  homazhe   artisti u përcoll në banesën e fundit.

Me ikjen e Naun Shundit skena shqiptare humbi  një artist që teatrin e deshi shumë. /abcnews.al

Turistët e zgjedhin Shqipërinë jo vetëm për bregdetin por edhe turizmin kulturor e historik.

Gjirokastra ka pritur fluks të shtuar të turistëve të huaj ndërsa prenotimet tregojnë se inters është i njëjtë edhe në muajt e vjeshtës.

Maksi Hoxha kryetar i Dhomës së Tregtisë thotë se prenontimet janë nga shtete të ndryshme të botës, por kryesojnë Franca, Spanja e gjermania

Shtimi i fluksit turistik ka nxjerrë më shumë në pah mungesën e  punonjësve dhe të stafit të kualifikuar. Në qytetin e gurte tashmë veç zonës historike janë çelur dhe një numër shumë i lartë bujtinash të cilat janë të preferuara nga turistët./abcnews.al

Administrata e Presidentit amerikan Donald Trump ka miratuar një marrëveshje të re pë shitje armësh për Ukrainën me vlerë 825 milionë dollarë.

Paketa e re e ndihmës përfshin 3350 raketa ERAM me rreze të gjatë veprimi nga 250 kilometra deri në 400 kilometra si dhe 3350 njësi GPS.

Pjesë e saj janë po ashtu komponentë të tjerë si pjesë këmbimi për sistemet raketore si dhe predha, mina dhe mbështetje teknike. Vendimi vjen ndërsa përpjekjet amerikane për të ndërmjetësuar paqen mes Ukrainës dhe Rusisë duket se kanë ngecur.

Departamenti i Shtetit deklaroi mbrëmjen e të enjtes se Kongresi është informuar për shitjen e këtyre armëve. Ashtu siç Presidenti amerikan Donald Trump kishte paralajmëruar, fatura e kësaj pakete ushtarake nuk do të paguhet më nga Washingtoni por nga aleatët e NATOS-s.  Financuesit më të mëdha të blerjes së këtyre armëve  nga SHBA për Ukrainën janë Danimarka, Holanda dhe Norvegjia.

“Shitja e propozuar do të mbështesë objektivat e politikës së jashtme dhe të sigurisë kombëtare të Shteteve të Bashkuara duke përmirësuar sigurinë e një vendi partner, që është forcë për stabilitet politik dhe progres ekonomik në Evropë,” thuhej në deklaratën e Departamentit amerikan të Shtetit.

Kjo nuk është marrëveshja e parë ku Washingtoni pranon të dërgojë armë në Ukrainë që prej rikthimit të Donald Trump në pushtet, i cili ishte zotuar se do t’i jepte fund këtij konflikti.

Në muajin korrik, Shtetet e Bashkuara kishin njoftuar edhe shitjen e dy paketave të tjera të armatimeve, njëra me vlerë 322 milionë dollarë për forcimin e mbrojtjes ajrore dhe furnizimin me mjete luftarake të blinduara, dhe tjetra me vlerë 330 milionë dollarë, që përfshin sisteme mbrojtjeje ajrore si dhe mirëmbajtjen e artilerisë vetëlëvizëse./abcnews.al

Një 52-vjeçar është arrestuar nga policia, pasi ka përplasur me makinë një 90-vjeçar, i cili për pasojë humbi jetën.

“Në vijim të informacionit paraprak të dhënë dje, për aksidentin e ndodhur në aksin rrugor “Përmet-Çarçovë”, bëjmë me dije se specialistët e Sektorit të Policisë Rrugore, në përfundim të veprimeve procedurale, arrestuan në flagrancë shtetasin A. M., 52 vjeç, banues në Përmet, pasi dyshohet se përplasi me automjet, shtetasin S. P., 90 vjeç, banues në Përmet, i cili për pasojë humbi jetën”, njofton policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme./abcnews.al

Një seancë në Senatin e Meksikës agravoi deri në përleshje fizike këtë javë, pasi dy prej figurave kryesore politike të vendit u konfliktuan me njëri-tjetrin pas një debati të ashpër mbi praninë e mundshme të trupave të huaja në vend.

Alejandro “Alito” Moreno, kryetar i Partisë Revolucionare Institucionale (PRI), u përplas me presidentin e Senatit, Gerardo Fernández Noroña, përfaqësues i partisë në pushtet Morena. Përplasja ndodhi menjëherë pas përfundimit të seancës së së mërkurës, sapo deputetët kishin përfunduar këndimin e himnit kombëtar.

“Po të kërkoj të më lësh të flas”, dëgjohet të thotë Moreno në një video të transmetuar drejtpërdrejt nga senati.

“Nuk më prek!”, ia kthen Fernández Noroña.

Në pamje shihet se pasi Fernández Noroña përpiqet të largohet, Moreno e kap sërish, duke e shtyrë dhe qëlluar në qafë. Kur një ndihmës i Fernández Noroñës ndërhyn për t’i ndarë, Moreno e rrëzon atë në tokë. Në përpjekje për të dalë nga podiumi, një ligjvënës tjetër ndërhyn në konflikt, duke tentuar të godasë presidentin e senatit.

“Më provokoi, më preku, më tërhoqi”, tha më pas Fernández Noroña në një konferencë për shtyp. “Më goditi në krahë dhe më tha: ‘Do të të rrah, do të të vras.’”

Nga ana e tij, Moreno reagoi në rrjetin social X (ish-Twitter): “Kur Noroña e kaloi kufirin, e dinte mirë çfarë po bënte. Do të përballem gjithmonë ballë për ballë, me karakter dhe pa frikë, për të mbrojtur Meksikën dhe për t’i dhënë asaj drejtimin që meriton.”

Përplasja ndodhi pas një debati të tensionuar, gjatë të cilit partia në pushtet Morena dhe aleatët e saj akuzuan partitë opozitare PRI dhe PAN se po mbështesnin një ndërhyrje ushtarake të Shteteve të Bashkuara në Meksikë pretendim që të dy partitë e mohuan.

Pak ditë më parë, një senator i partisë PAN kishte deklaruar në Fox News se “ndihma nga Shtetet e Bashkuara për të luftuar kartelet në Meksikë është plotësisht e mirëpritur”.

Çështja është bërë veçanërisht e ndjeshme në Meksikë, pasi ish-presidenti amerikan Donald Trump raportohet se ka autorizuar përdorimin e forcës ushtarake kundër karteleve të drogës në disa vende të Amerikës Latine, të cilat i konsideron organizata terroriste.

Presidenti i Senatit, Fernández Noroña, njoftoi se do të thërrasë një seancë të jashtëzakonshme të premten, ku do të propozojë përjashtimin e Moreno dhe tre senatorëve të tjerë të PRI-së për shkak të incidentit. Ai gjithashtu bëri të ditur se ka paraqitur një kallëzim penal ndaj Moreno.

Në një tjetër deklaratë në rrjetet sociale, Moreno akuzoi partinë në pushtet se kishte ndryshuar rendin e ditës në minutën e fundit, me qëllim për të heshtur opozitën./abcnews.al

Industria e mbrojtjes e Turqisë, e cila është një burim krenarie, po shkruan histori, u shpreh presidenti turk Recep Tayyip Erdogan në eventin e madh turk të teknologjisë, edicionin detar të festivalit TEKNOFEST, të emëruar si “Atdheu Blu”.

Eventi katërditor, “TEKNOFEST Atdheu Blu”, po mbahet në Komandën e Kantierit Detar të Stambollit.

Ashtu si lufta e vendit për pavarësi u dha shpresë të shtypurve 100 vjet më parë, iniciativat e sotme të industrisë së mbrojtjes po u japin kurajë të shtypurve, tha ai.

“Kudo që ka një vëlla ose motër që vuan nga vështirësitë, nga Palestina në Siri, nga Jemeni në Somali, nga Sudani në Libi, ata krenohen me arritjet e Turqisë”, vuri në dukje ai.

Në një kohë shumë të shkurtër, Turqia ka arritur një nivel që bota e ka zili, nënvizoi ai.

Erdogan tha se Turqia po forcon industrinë e saj të mbrojtjes, ndërsa po punon gjithashtu për të rritur interesin e brezit të ri për teknologjinë, digjitalizimin dhe inovacionin.

Vizitorët do të jenë në gjendje të shohin se sa larg ka përparuar teknologjia detare turke, shtoi ai.