Një ngjarje e dhunshme ka ndodhur mbrëmjen e sotme në Fier, ku dy persona kanë mbetur të plagosur me mjet prerës, dyshohet thikë, pas një konflikti mes tyre.

Rreth orës 21:40, shtetasit A.M., 28 vjeç, dhe L.S. u paraqitën në spitalin e Fierit për ndihmë mjekësore. Sipas burimeve paraprake, të dy janë plagosur gjatë përleshjes.

Grupi hetimor është duke punuar intensivisht për sqarimin e rrethanave të ngjarjes dhe për identifikimin e personave të tjerë të përfshirë në konflikt. Hetimet vazhdojnë.

Një ngjarje e rëndë ka ndodhur mbrëmjen e sotme në fshatin Bogdan në Berat. Një 57-vjeçar ka gjetur vdekjen, pasi është qëlluar nga bashkëfshatari i tij 53-vjeç.

Të dy kanë duke ruajtur prej disa netësh parcelat me misër, që i dëmtonin derrat, kur në përpjekje për të gjuajtur derrin, 83-vjeçari Dhimitër Kuqi ka gjuajtur aksidentalisht bashkëfshatarin e tij Adriatik Toska, i cili ka gjetur vdekjen e menjëhershme.

Në vendngjarje kanë shkuar forcat e policisë, që po kryejnë edhe veprimet e para hetimore, për të zbardhur rrethanat e ngjarjes, ndërkohë që autori është shoqëruar në Komisariatin e Policisë së Beratit.

Njoftimi i policisë

Berat/Informacion paraprak

Rreth orës 21:00, në fshatin Bogdan, Berat, shtetasi Th. K., 53 vjeç, banues në fshatin Bogdan, dyshohet se ka qëlluar me armë gjahu me qëllim për të vrarë një kafshë të egër dhe nga pakujdesia ka plagosur shtetasin A. T., 57 vjeç, i cili si pasojë e plagës së marrë ka ndërruar jetë në spital.

Shtetasi Th. K, është shoqëruar në ambientet e Drejtorisë Vendore të Policisë Berat, për veprime të mëtejshme.

Grupi hetimor ndodhet ne vendngjarje dhe po punon për zbardhjen e plotë të rrethanave të kësaj ngjarje.

Një zjarr i përmasave të mëdha është aktivizuar në kodrat e fshatit Humelicë, Njësia Administrative Cepo. Flakët po përhapen me shpejtësi mes fshatrave Humelicë dhe Picar, duke rrezikuar zonat e banuara.

Efektivi i MZSH Gjirokastër, i angazhuar në terren për të parandaluar përhapjen drejt zonave të banuara dhe për të vënë nën kontroll situatën.

Puna vijon intensivisht në kushte të vështira terreni dhe me rrezik të lartë për shkak të erës dhe temperaturave të larta.

Kostot e jetesës në Shqipëri zhvlerësojnë pagat, e sidomos atë minimale. Prej prillit të vitit 2023, paga minimale në Shqipëri është 40 mijë lekë (408 euro), nga EUROSTAT vlerësohet si paga më e ulët në rajon pasi në Malin e Zi është 670 euro, Serbi 618 euro apo Maqedoni të Veriut 584 euro.

Paga minimale e Shqipërisë, sipas EUROSTAT, lë pas vetëm Moldavinë dhe Ukrainën. Ndërsa pagën minimale më të lartë në Evropë e ka Luksemburgu me 2704 euro, ndjekur nga Irlanda me 2.282 euro dhe Holanda me 2.246 euro në muaj.

Në raportin e publikuar së fundmi për pagat minimale në Evropë, Eurostat vlerëson se pavarësisht se Shqipëria nuk është e fundit për vlerën e pagës minimale, ajo është e fundit për ‘fuqinë blerëse’ me këtë pagë.

E matur sipas fuqisë blerëse (PPS), që nënkupton të ardhurat të përshtatura me nivelin e çmimeve, paga minimale në Shqipëri ka akoma më pak vlerë. Fuqinë më të lartë blerëse nga vendet fqinje e ka e Veriut, Turqia e Mali i Zi, kurse Shqipëria është e fundit. Pra me pagën minimale të vendit blihet shumë herë më pak se në rajon.

Aktualisht janë 185 mijë të punësuar në vend që paguhen me 40 mijë lekë apo 408 euro në muaj. Në kushtet kur çmimet rriten dhe gati 40% e pagës mujore shkon vetëm për ushqime, edhe fuqia blerëse e 40 mijë lekëshit është më e ulët.

Qeveria ka premtuar gjatë fushatës elektorale se nga 1 janari 2026 paga minimale në vend do të rritet nga 40 mijë lekë në 50 mijë lekë. Nëse merret ky vendim, numri i përfituesve do të jetë gati 480 mijë, pra punonjës që në vend paguhen deri në 50 mijë lekë në muaj./tpz

Në kuadër të operacionit të goditjes së organizatës kriminale të përfshirë në trafikimin e drogës në tregun europian, SPAK ka ushtruar kontroll në një resort në Golem.

Prokuroria e Posaçme gjatë kontrollit te një resorti, ka sekuestruar celularin e pronarit, Orman Kokoshi.

Deri më tani nuk dihen detaje rreth këtij aksioni, ndërsa të tjera informacione pritet të zbardhen në vijim.

Ka pasur një hipotezë për zhvillimin në Romë të një samiti mes Trump dhe Putin për luftën në Ukrainë, por aktualisht ajo është rrëzuar për shkak të kundërshtimit nga Rusia. Megjithatë, mbetet e hapur mundësia që presidenti i Shteteve të Bashkuara dhe ai i Rusisë të takohen në Vatikan, edhe pse në këtë pikë duket e vështirë.

Të enjten, më 7 (gusht), Trump telefonoi kryeministren Meloni dhe i propozoi të priste të hënën samitin në Romë. Kryeministrja u shpreh menjëherë e gatshme dhe pak orë më vonë Rubio e propozoi zyrtarisht Romën edhe në mbledhjen e Këshilltarëve për Sigurinë Kombëtare (NSA), e zhvilluar mes Italisë, Francës, Shteteve të Bashkuara, Gjermanisë, Britanisë së Madhe, Ukrainës dhe Finlandës.

Zelensky shprehu menjëherë miratimin e tij, duke thënë se ishte “shumë pro” kësaj ideje. Por po aq e menjëhershme ishte edhe kundërshtia e Rusisë e cila, sipas burimeve, “e konsideron Italinë një vend tepër të rreshtuar me Ukrainën”. Ky nuk është i vetmi pengesë. Putin është zyrtarisht i shpallur në kërkim nga një urdhër arresti ndërkombëtar i lëshuar nga Gjykata Penale Ndërkombëtare, gjë që duket se ka ndikuar gjithashtu në zgjedhjen e vendit për takimin. Jo rastësisht, Putin deklaroi: “Kemi shumë miq të gatshëm të na ndihmojnë për të organizuar këtë lloj aktiviteti. Njëri prej tyre është presidenti i Emirateve të Bashkuara Arabe, Mohammed bin Zayed, i cili ndodhet për vizitë në Rusi. Mendoj se do të vendosim, por ai do të ishte një nga vendet më të përshtatshme”.

Hipoteza e Vatikanit nuk është mohuar, edhe pse për momentin nuk duket më e mundshmja. “Disponueshmëria ekziston dhe mbetet. Më pas do të shohim…”. Në nivelet e larta të Selisë së Shenjtë po ndiqet me vëmendje mundësia e një takimi mes Trump dhe Putin. Situata është tejet delikate, vështirësitë të panumërta dhe është e natyrshme që të mbizotërojë kujdesi. “Nuk kemi asnjë konfirmim, por…”.

Megjithatë, nuk është sekret që Vatikani është shprehur prej kohësh i gatshëm të ndihmojë për një zgjidhje diplomatike të konflikteve, jo vetëm në Ukrainë. Këtë e kishte thënë edhe Papa Françesku dhe e përsëriti me qartësi Papa Leone XIV, më 14 maj, gjashtë ditë pas zgjedhjes: “Selia e Shenjtë është e gatshme që armiqtë të takohen dhe t’i shohin njëri-tjetrit në sy… Popujt duan paqe dhe unë, me dorën në zemër, u them përgjegjësve të popujve: le të takohemi, të dialogojmë, të negociojmë! Lufta nuk është kurrë e pashmangshme, armët mund dhe duhet të heshtin”.

Sekretari i Shtetit, Pietro Parolin, vijon punën pa ndërprerje dhe Papa Prevost ka konfirmuar kardinalin Matteo Zuppi si të dërguar paqeje. Sipas burimeve pranë Vatikanit, “kontaktet nuk janë ndërprerë kurrë”. Ndërmjetësimi i Selisë së Shenjtë ka mundësuar kthimin në shtëpi të disa fëmijëve ukrainas dhe shkëmbime të të burgosurve. Papa amerikan ka folur në telefon me Putinin më 4 qershor, duke i kërkuar “një gjest që të favorizojë paqen”, një hap përpara i rëndësishëm, pasi paraardhësi i tij nuk kishte arritur më të fliste me presidentin rus pas pushtimit të Ukrainës. Prevost ka konfirmuar gatishmërinë për të pritur në Vatikan “negociata” paqeje.

Në këto raste, zakonisht nuk zbulohet asgjë paraprakisht: më 17 dhjetor 2014, presidenti amerikan Barack Obama dhe ai kubanez Raúl Castro shpallën fundin e embargos, dhe doli se në vjeshtë delegacionet ishin takuar në Vatikan. Edhe tani është e vështirë, dhe nëse ndodh, nuk do të jetë kurrë Selia e Shenjtë ajo që do ta bëjë njoftimin. Megjithatë, fakt mbetet se dyert janë dhe mbeten të hapura.

Nje aksident i shumefishte ka ndodhur ne vendin e quajtur “pushimi shoferit” ne autostraden Lushnje-Fier. Nga perplasja janë shkaktuar vetëm dëme materiale por është bllokuar qarkullimi rrugor duke shkaktuar rradhë të gjata automjetesh në autostradë. Policia e qarkullimit rrugor me forca shtesë ka devijuar kalimin e mjeteve nga autostrada drejt fshatrave Kemishtaj dhe Krutje perkohesisht deri ne normalizimin e trafikut. Nderkohe grupi i punës po dokumenton  aksidentin ku disa makina janë përplasur dhe kanë pësuar dëme materiale. Fluksi i mjeteve që përshkojnë autostradën është tepër i lartë në këtë periudhë.

Manchester United ka siguruar shërbimet e një prej sulmuesve më premtues në Europë. Klubi nga ‘Old Trafford’ ka arritur marrëveshje me RB Leipzig transferimin e Benjamin Seskos, në një operacion me vlerë totale prej 85 milionë eurosh, 66.3 milionë në tarifë fikse dhe pjesa tjetër në formë bonusesh.

22-vjeçari slloven, i cili ka spikatur në Bundesligë dhe ishte gjithashtu në radarët e Newcastle, do t’i nënshtrohet vizitave mjekësore përpara se të firmosë zyrtarisht me ‘Djajtë e Kuq’. Kjo lëvizje pritet të sjellë ndryshime edhe në repartin sulmues të United, pasi ardhja e Seskos i hap rrugën largimit të Rasmus Hojlund, që kërkohet nga Milani dhe Roma.

Transferimi i Seskos e çon në 140 milionë euro shifrën totale të shpenzimeve të United në këtë merkato vere, pas blerjeve të Matheus Cunha dhe Bryan Mbeumo, duke e konfirmuar Premier Leaguen si ligën me investimet më të mëdha në Europë.

Kryetari i Lidhjes Demokratike të Kosovës, Lumir Abdixhiku ka reaguar pas vendimit të Gjykatës Kushtetuese e cila tha se deputetët duhet të zgjedhin kryetarin e Kuvendit përmes votimit të hapur.

“Gjykata Kushtetuese i dha të drejtë të plotë kërkesave tona dhe lëndës së hartuar nga LDK. Siç e kishim thënë, sa e sa herë, partia e parë kishte uzurpuar foltoren, me imponim kishte ndryshuar rendin e ditës dhe me kokëfortësi për plot 48 herë kishte shkelur Kushtetutën e Kosovës duke insistuar në votimin e fshehtë – para dhe pas aktgjykimit të Gjykatës Kushtetuese.

Votimi i fshehtë nuk pranohet”, shkroi Abdixhiku në Facebook.

Abdixhiku tha se Kosova ka humbur kohë që nga mbajtja e zgjedhjeve më 9 shkurt.

“Gjysmë viti i humbur nga ata që imponimin e kanë si vlerë e përçmimin si metodë – gjithsesi paditurinë për të lexuar Kushtetutën e vendimet e saja si mburrje. Dritë, megjithatë do të ketë”, tha ai.

Gjykata Kushtetuese tha të premten, më 8 gusht, se deputetët duhet të zgjedhin kryetarin e Kuvendit përmes votimit të hapur.

Po ashtu, gjykata vendosi që një kandidaturë për kryeparlamentar të votohet vetëm tri herë.

Kushtetuesja tha se konstituimi duhet të përmbyllet brenda 30-ditësh.

Igor Popoviqi, ndihmësdrejtor i të ashtuquajturës “Zyrë për Kosovë” në Qeverinë e Serbisë është shpallur fajtor në Gjykatën Themelore në Prishtinë, Departamenti Special, për veprën penale të nxitjes së përçarjes dhe urrejtjes etnike. Gjyqtari Kujtim Krasniqi ka caktuar dënimin prej 6 muajsh burgim, i cili u zëvendësua me gjobë prej 3 mijë eurosh dhe dënim plotësues, dëbim nga Kosova për një periudhë prej dy vjetësh.

Në këtë rast, gjykata ka aprovuar marrëveshjen për pranim fajësie mes tij dhe Prokurorisë Speciale të Republikës së Kosovës.

Popoviq ishte arrestuar më 19 korrik në pikën kufitare të Bërnjakut dhe akuzohet se më 18 korrik 2025 në Rahovec kishte mbajtur një fjalim publik me përmbajtje nxitëse, duke përhapur urrejtje dhe mosdurim ndërmjet grupeve etnike në Kosovë.

Popoviq është sjellë sot i prangosur në gjykatë dhe është paraqitur para gjyqtarit Kujtim Krasniqi dhe prokurores speciale Fikrije Krasniqi-Fejzullahu, raporton “Betimi për Drejtësi”.

Sipas aktakuzës së ngritur më 04.08.2025 nga Prokuroria Speciale e Republikës së Kosovës, Igor Popoviq me dashje dhe me qëllim ka nxitur dhe përhapur publikisht urrejtje dhe mos durim midis grupeve entike, në atë mënyrë që i njëjti me datën18.07.2025, rreth orës 12:00 në Rahovec ka mbajtur një fjalim publik me të cilin i është drejtuar një mase të gjerë të qytetarëve, ku mes tjerash ka përdorur gjuhë me përmbajtje nxitëse dhe urrejtëse duke thënë “…

Serbët kanë pësuar këtu në rajonin e Rahovecit, Metohisë, Kosovës e Metohisë për shkak se janë vendas dhe i kanë rrënjët këtu dhe nuk lejojnë që dikush t’i shpall okupator, ardhacak dhe t’i përzë nga këtu, nga UCK – organizatë terroriste” dhe se për shkak të kësaj ka vazhduar të bëjë thirrje në drejtim të qytetarëve si “neve na mbetet të jemi krenar me trimërinë e viktimave dhe vëllezërve të mbetur këtu dhe të mëtojmë që Hoca e Madhe dhe Rahoveci të mbeten serbe, që këtu të ndërtohen shtëpi serbe dhe shkolla serbe, të lindin fëmijë serbë, të ekzistojnë institucionet serbe dhe kjo është detyrë e Zyrës për Kosovën  e  Metohinë dhe për Qeverinë e Serbisë” e të ngjashme, ashtu që ka nxitur dhe thelluar mosbesimin dhe mos tolerancën në disverisitetin e grupeve etnike që jetojnë në Kosovë si dhe ka cenuar bashkëjetesën e serbëve dhe shqiptarëve e për të cilin fjalim ka qenë në dijeni se përcillet nga mediat dhe se në këtë mënyrë potencialisht ka mundur të prish rendin dhe qetësinë publike.

Me këtë po akuzohet se ka kryer veprën penale “Nxitja e përçarjes dhe mosdurimi”nga neni 141 par.1 të KPRK-së.

Prokuroria kishte njoftuar njofton se i akuzuari ka pranuar fajësinë për veprën penale që i vihet në barrë.

Në orët e para të mëngjesit të kësaj të premteje, në fshatin Nënmavriq, është gjetur nga familjarët, në afërsi te banesës, trupi i pajetë i 47-vjeçarit Z. V.

Nga këqyrja e trupit nuk janë konstatuar shenja dhune.

Paraprakisht, dyshohet se 47-vjeçari e ka humbur jetën, si pasojë e pickimit nga bletët.

Grupi hetimor po heton për të dokumentuar rrethanat e rastit.

Sulmuesi i Kombëtares së Polonisë, Robert Lewandowski, ka pësuar një lëndim gjatë stërvitjeve të fundit me Barcelonën.

Klubi katalanas përmes rrjeteve sociale ka treguar rreth lëndimit të lojtarit.

Lewa ka pësuar një lëndim në kofshën e majtë dhe pritet të mungojë në ndeshjen miqësore të së dielës ndaj Comos.

Ai tashmë është futur në fazën e rikuperimit, por nuk dihet data e saktë e rikthimit të tij.

SPAK ka zhvilluar një operacion të gjerë kundër trafikut ndërkombëtar të drogës, duke goditur një rrjet të dyshuar kriminal në tre qytete: Tiranë, Elbasan dhe Durrës. Pas një hetimi disa-mujor, janë firmosur 15 masa sigurie ndaj personave të përfshirë në këtë aktivitet.

Sipas burimeve hetimore, rrjeti i zbuluar dyshohet se kishte linja të konsoliduara furnizimi të kokainës, me origjinë nga Amerika Latine, e cila transportohej drejt porteve europiane dhe më pas shpërndahej në disa vende të BE-së, duke përdorur Shqipërinë si një pikë kyçe tranziti dhe koordinimi.

Identifikimi i të dyshuarve u bë i mundur falë përgjimeve të komunikimeve të tyre në platformën e koduar Sky ECC, e përdorur gjerësisht nga organizatat kriminale për të shmangur zbulimin. Hetimet kanë treguar se bëhej fjalë për një strukturë të organizuar ndërkombëtare, e aftë të menaxhonte sasi të mëdha kokaine nga kontinenti amerikan deri në tregjet europiane.

Nga 15 masat e sigurimit, katër prej tyre u janë komunikuar brenda ambienteve të burgut, ku ndodhen aktualisht për çështje të tjera penale.

Operacioni, i udhëhequr nga prokurori i posaçëm Vladimir Mara, ka çuar deri tani në arrestimin e tre personave, ndërsa disa të tjerë janë ende në kërkim. Në mesin e të përfshirëve rezultojnë emra të njohur për drejtësinë, si Franc Çopja, i arrestuar në Belgjikë, dhe Ervis Çela, i ndaluar një muaj më parë me akuzën e vrasjes.

SPAK ka paralajmëruar se hetimet do të zgjerohen edhe më tej, me qëllim identifikimin e të gjithë hallkave të këtij rrjeti dhe sekuestrimin e pasurive të përfituara nga aktiviteti kriminal. Ky operacion tregon edhe një herë intensifikimin e bashkëpunimit mes autoriteteve shqiptare dhe partnereve ndërkombëtare në luftën kundër trafikut të kokainës nga Amerika Latine drejt Europës.

Presidenti i klubit francez Lille, Olivier Letang, ka komentuar situatën aktuale të futbollistit kosovar Edon Zhegrova, duke hedhur poshtë zërat për një transferim të mundshëm brenda Ligue 1.

Ditëve të fundit është raportuar për një kalim të mundshëm të Zhegrovës tek Olimpique Marseille.

“Nuk kam pasur kontakte me ndonjë klub tjetër francez për Edonin.

Në një moment kemi menduar se ai mund të largohej, por tani mendoj se kushtet nuk janë më të përshtatshme që ai të largohet”, deklaroi Letang.

Shefi i klubit theksoi gjithashtu se Zhegrova mbetet një opsion i vlefshëm për skuadrën, duke e përshkruar si një lojtar të gatshëm dhe të motivuar.

“Në vend që të kërkojmë një lojtar të ri, ai është këtu, është gati, është i etur.

Nëse ai futet në një dinamikë të mirë, me dëshirën për të vrapuar, për të dhënë gjithçka për ekipin dhe për të qenë pjesë e ‘tufës’, atëherë do të jetë aty për ne”, përfundoi Letang.

Kjo deklaratë vjen në një moment kur spekulimet për të ardhmen e Zhegrovës janë shtuar, sidomos pas interesimit të raportuar nga Marseille.

Pas 44 viteve të mbushura me përkushtim, ndershmëri dhe sakrifica, në radhët e Policisë së Shtetit, oficeri i karrierës, Drejtues i Parë Besnik Bakiu, mbylli sot shërbimin aktiv, duke dalë në pension, por jo duke u ndarë nga misioni i tij.

Për kontributin e tij të çmuar, Drejtori i Përgjithshëm i Policisë së Shtetit, Drejtues Madhor Ilir Proda i akordoi Certifikatën e Karrierës, me motivacionin “Për merita të veçanta, profesionalizim dhe përkushtimin e treguar në përmbushjen cilësore të detyrave dhe kontributin e dhënë gjatë viteve të punës në shërbim të Policisë së Shtetit”.

Gjatë ceremonisë së organizuar për këtë qëllim, Drejtori i Përgjithshëm Ilir Proda ka vlerësuar maksimalisht Drejtuesin e Parë Besnik Bakiu, për gjithë kontributin e dhënë, si dhe për vlerat e tij edhe në fushën e krijimtarisë dhe gazetarisë.

“Të shërbesh 44 vite në Policinë e Shtetit dhe ta mbyllësh me nder këtë rrugëtim kilometrik, është krenari për ty në radhë të parë, për familjen tënde, për ne, Policinë e Shtetit, dhe për shoqërinë ku bën pjesë. Dera e shtëpisë sonë është përherë e hapur për të dhënë këshillat e tua të vyera për përmbushjen sa më cilësore të shërbimit ndaj qytetarëve dhe ligjit.”, tha Proda.

Drejtues i Parë Besnik Bakiu falënderoi Drejtor Prodën, për certifikatën dhe theksoi:

“Tashmë do të vijoj të jem një zë i fortë në media dhe në shoqërinë civile, ku do të aderoj për të mbrojtur e vlerësuar angazhimin, përkushtimin dhe sakrificën e punonjësve të Policisë së Shtetit. Për më shumë se 4 dekada jam përpjekur të respektoj ligjin dhe qytetarët dhe kam guxuar të shkruaj në media shumë herë për përbaltjen e padrejtë të Policisë së Shtetit, gjë që tashmë do ta bëj akoma më shumë dhe më mirë.”

Drejtues i Parë Besnik Bakiu, përveçse një oficer i dalluar, është studiues dhe shkrimtar, i përkushtuar ndaj kërkimit dhe dokumentimit të historisë, sfidave dhe arritjeve të Policisë së Shtetit. Me daljen në pension, ai do t’i bashkohet shoqërisë civile, duke vazhduar të shkruajë, të ndajë përvojën e tij dhe të mbrojë me fjalë dhe fakte figurën dhe sakrificën e punonjësve të Policisë.

Ky është një mision që nuk matet me vite shërbimi, por me gjurmët e lëna në zemrat e kolegëve dhe në kujtesën e shoqërisë.

Policia e Shtetit i uron shëndet, mbarësi dhe frymëzim në kapitullin e ri të jetës dhe e falënderon për shërbimin dhe shembullin që ai ka dhënë.

Kryeministri në detyrë, Albin Kurti, i pyetur nga mediat nëse do të takohet përsëri me partitë e tjera politike për të gjetur një bashkëpunim rreth konstituimit të Kuvendit të Kosovës, ka deklaruar se takimet me partitë e tjera për konstituim të Kuvendit të Kosovës kanë rezultuar pa sukses, megjithëse atyre iu ofruan dy kompromise ndaj tyre.

Gjatë përurimit sot të shërbimit të hemodializës në spitalin e Komunës së Podujevës, Kurti tha se Lëvizja Vetëvendosje ka përfunduar hapat e saj, ndërkaq nga pala tjetër nuk ka pasur ndonjë ofrim bashkëpunimi.

“Ne kemi ofruar dy kompromise, i pari ka qenë me rastin e votimit të fshehtë, nëse nuk zgjidhet me të parën kandidatja Haxhiu atëherë ne do të sjellim një emër tjetër dhe të merremi vesh për paketën ku bën pjesë kryetari dhe nënkryetarët dhe të kthehemi tek votimi hapur, ne kemi bërë hapa dhe nuk ka pasur nga pala tjetër.

Kur Gjykata Kushtetuese me aktgjykimin paraprak na pat thënë me pikën e veçantë se marrëveshjet politike duhet të arrihen mes grupeve parlamentare sepse mosmarrëveshjet nuk i zgjidh gjykata, menjëherë dy partitë kryesore opozitare, sërish dërguan lëndë në Gjykatën Kushtetuese… Ne e kemi respektuar dhe unë kam shkruar letra për t’u takuar, mirëpo deri tani nuk kemi pasur sukses”, tha Kurti.

Sot, më 8 gusht, përfundon afati i masës së përkohshme që e ka vendosur Gjykata Kushtetuese e Kosovës për çështjen e konstituimit të Kuvendit. Më 24 korrik, Kushtetuesja tha se deputetët nuk mund të marrin asnjë vendim e as të ndërmarrin ndonjë veprim rreth formimit të Kuvendit, deri më 8 gusht.

Kjo u bë pasi ky institucion po shqyrton dy lëndë që janë kërkesa të Partisë Demokratike të Kosovës dhe Lidhjes Demokratike të Kosovës, të cilat duan sqarime për çështjet kushtetuese që lidhen me formimin e Legjislaturës së nëntë.

Zjarrfikësit dhe autoritetet lokale thanë se janë në gatishmëri të lartë të premten, pavarësisht se kanë arritur ta vënë nën kontroll zjarrin më të madh me të cilin është përballur Franca në dekadat e fundit, për shkak se parashikohen temperatura të larta që mund ta rindezin zjarrin në jug. Në tri ditët e fundit, zjarri u përhap në më shumë se 160 kilometra katrorë në rajonin Aude. Si pasojë e zjarrit ka vdekur një person, ndërkaq qindra të tjerë janë detyruar që të largohen nga shtëpitë e tyre.

Për shkak të motit të nxehtë dhe të thatë, zjarri u përhap shpejt me një perimetër që arriti në 90 kilometra, dhe autoritetet lokale thanë se duhet të mbeten vigjilente gjatë gjithë fundjavës, pasi pritet që temperaturat të shkojnë në mbi 30 gradë Celsius. Administratori i rajonit, Christian Pouget, tha se rreth 1,000 persona ende nuk kanë mundur të kthehen në shtëpitë e tyre pasi zjarri përfshiu 15 komunat në rajonin malor të Krbieres, duke shkatërruar ose dëmtuar të paktën 36 shtëpi.

Si pasojë e zjarrit janë lënduar 21 persona, përfshirë 16 zjarrfikës, thanë autoritetet lokale. Rreth 1.300 shtëpi janë ende pa energji elektrike për shkak të dëmeve të shkaktuara në infrastrukturë, thanë autoritetet në Aude. Banorët janë paralajmëruar të mos kthehen në shtëpi pa autorizim, pasi shumë rrugë mbeten të bllokuara dhe të rrezikshme.

Hetimet kanë nisur për të kuptuar se si shpërtheu zjarri. Ky është zjarri më i madh që Franca ka regjistruar në bazën e saj të të dhënave, të krijuar më 2006. Por, ministrja franceze për Ekologji, Agnès Pannier-Runacher, tha se ky është zjarri më i madh që vendi ka regjistruar që nga viti 1949, duke lidhur shpërthimin e zjarrit me ndryshimet klimatike.

Evropa Jugore është përballur me shumë zjarre të mëdha gjatë kësaj vere. Shkencëtarët paralajmërojnë se ndryshimet klimatike po rrisin frekuencën dhe intensitetin e valëve të nxehtësisë dhe thatësirës, duke e bërë rajonin më të ndjeshëm ndaj zjarreve të egra. Muajin e kaluar, një zjarr i madh që arriti deri në portin jugor të Marsejës, qytetit të dytë më të madh të Francës, la të plagosur rreth 300 persona./ REL

Një vatër e re zjarri është parë sot në fshatin Vilz, qendra andministrative Rrëshen e rrethit Mirëditë.

Vatra është në afërsi të banesave dhe nëse nuk merren masa të menjëhershme rrezikojnë shtëpitë dhe bagëtitë e zonës.

Banorët kanë ngritur alarmin dhe kanë këkruar ndihmë për ndërhyrje të menjëhershme, sepse përhapja e zjarrit favorizohet edhe nga era dhe nëse do të lihet pas dore, zjarri kalon në anën tjetër t shpatit duke rrezikuar edhe fshatra të tjerë.