Kreu i shërbimit të inteligjencës ushtarake të Ukrainës, Kirilo Budanov, zbuloi se Koreja e Veriut aktualisht furnizon deri në 40 përqind të municioneve të artilerisë ruse për luftën në Ukrainë.

Në një intervistë me Bloomberg, Budanov tha se regjimi i Kim Jong-un dërgon jo vetëm predha, por edhe raketa balistike dhe sisteme të plota artilerie. Sipas tij, Rusia në këmbim dërgon para dhe teknologji të përparuar, duke e ndihmuar kështu Phenianin të lehtësojë izolimin e tij ndërkombëtar.

“Këto janë armë të mira”, tha Budanov, duke zbuluar se deri në 60 përqind të humbjeve në njësitë e tij në tre muajt e fundit u shkaktuan nga raketat e Koresë së Veriut.

“Koreja e Veriut ka rezerva të mëdha dhe prodhimi i tyre nuk ndalet, vazhdon 24 orë në ditë”, shtoi ai më tutje.

Bashkëpunimi midis Rusisë dhe Koresë së Veriut është thelluar që kur Vladimir Putin vizitoi Phenianin për herë të parë në 24 vjet në qershor të vitit të kaluar dhe nënshkroi një Marrëveshje Partneriteti Strategjik. Budanov pretendon se Pheniani ka dërguar gjithashtu mijëra trupa për të ndihmuar ushtrinë ruse në rajonin e Kurskut, dhe inteligjenca perëndimore vlerëson se ushtria e Putinit ka marrë miliona predha nga Koreja e Veriut.

Ministri i Jashtëm rus Sergei Lavrov udhëtoi për në Phenian të premten, ndërsa këshilltari i sigurisë i Putinit, Sergei Shoigu, vizitoi Phenianin për herë të tretë brenda tre muajsh vetëm muajin e kaluar.

Pas ndërprerjes së papritur të javës së kaluar, Presidenti i SHBA-së Donald Trump ka urdhëruar rifillimin e dërgesave të armëve në Ukrainë, duke përfshirë sistemet kryesore të mbrojtjes ajrore. Edhe pse marrëdhënia e tij me Putinin është vënë shpesh në pikëpyetje, Trump këtë javë tha se presidenti rus po “vret shumë njerëz” dhe i quajti “marrëzi” përgjigjet e tij ndaj thirrjeve për armëpushim.

Budanov beson se mbështetja amerikane do të zgjasë. “Qëndrimi i tyre është konsistent. Si kreu i shërbimit, unë di më shumë sesa shihet në media”, deklaroi ai.

Ai thotë se një armëpushim është i mundur, por vetëm nëse Ukraina, Rusia dhe SHBA-të përfshihen në marrëveshje. “Mund të arrihet edhe para fundit të vitit”, thotë ai.

Vetëm më 9 korrik, Rusia lëshoi 728 dronë në Ukrainë, duke shkatërruar objekte dhe infrastrukturë civile. Kombet e Bashkuara raportuan se në qershor u shënua numri më i lartë i viktimave civile në tre vjet, me 232 të vdekur dhe 1,343 të plagosur.

Forcat ruse kanë bërë përparime të vogla, por të qëndrueshme. Muajin e kaluar, ato hynë në rajonin verilindor të Sumy-t dhe aktualisht po përparojnë drejt Donetskut dhe po përpiqen të depërtojnë në Oblastin e Dnipropetrovskit.

Budanov thotë se Rusia nuk do të jetë në gjendje të pushtojë të gjithë Donbasin deri në fund të vitit, por po përpiqet të krijojë një zonë tampon dhjetë kilometra të thellë në territor.

The post “Predha e raketa balistike”, Kievi ngre alarmin: Rusia po na vret me armët e Koresë së Veriut first appeared on JavaNews.al.

Nga Gentian Gaba

Po t’u besosh këtyre, është hera e tretë brenda pak muajsh që “pushojnë nga puna” ambasadoren Yuri Kim. Hera e parë, sipas tyre, ishte në shkurt (ka madje edhe artikuj online për këtë), hera e dytë në mars, ku pretendohej se ishte nën hetim intensiv, sipas “ekspertëve” të Tiranës, dhe hera e tretë sot.

Mesa duket, kanë menduar se “e treta e vërteta”, pas lajmit se Departamenti i Shtetit ka nisur të largojë nga puna mbi 1.300 punonjës, si pjesë e një riorganizimi të thellë të agjencisë, sipas burimeve zyrtare të vetë Departamentit.

Sipas raportimeve, bëhet fjalë për 1.107 zyrtarë të shërbimit civil dhe 246 të shërbimit të jashtëm, që preken në këtë fazë të ristrukturimit, në kuadër të përpjekjeve më të gjera të administratës Trump për të reduktuar madhësinë e qeverisë federale.

Tani, nuk e di nëse lajmet në Shqipëri vijnë më shpejt se në Uashington D.C., por nga sa kuptoj, deri më tani asnjë profil i lartë nuk është prekur. Aq më tepër kur kujtojmë se zonja Kim u emërua ambasadore pikërisht gjatë mandatit të parë të presidentit Trump.

Nga ajo që shoh, këtu lajmi është frymëzuar nga pamjet e protestës përballë godinës së Departamentit të Shtetit. Por pikërisht këtu qëndron edhe keqkuptimi, sepse ndërsa jashtë protestohet, brenda godinës zyrtarët në detyrë, të ndarë nga protesta, duartrokasin në mënyrë simbolike në nder të punonjësve civilë që po largohen, si shenjë respekti për kontributin e tyre.

Se çfarë do të ndodhë me Yuri Kim, është punë e saj. Por ajo që më ka argëtuar këto ditë është mënyra se si ndërtohen realitete paralele, pa asnjë lidhje me të vërtetën (në Tiranë e kishin “shkarkuar” disa herë më parë), për të justifikuar gabimet strategjike në raport me SHBA-në. Rrëfime që ngjajnë më shumë me një lojë pasqyrash, e ndërtuar për të çorientuar publikun.

Dhe mbi të gjitha, kjo është pjesa më problematike, kjo qasje tregon mungesë të thellë reflektimi. Asnjë përpjekje për të kuptuar ku është gabuar, vetëm këmbëngulje për të shpikur armiq të jashtëm, për të fshehur dështimin dhe për të shmangur reformimin dhe ndryshimin e nevojshëm. Ndryshim që është kusht i domosdoshëm për të ndërtuar partneritete serioze përtej Adriatikut, nëse vërtet duan të përballen me një kundërshtar si Edi Rama. /alfapres/

The post Ore, sa herë do e shkarkoni nga puna Yuri Kim? first appeared on JavaNews.al.

Një paralajmërim i drejtpërdrejtë është dhënë ndaj Iranit në lidhje me programin e tij bërthamor.

Në një intervistë për Top Channel, ministri izraelit Eli Cohen deklaroi se se pengesa për të mos ndërmarrë një sulm ndaj Iranit është tashmë hequr, dhe se në rast të rinisjes së aktivitetit bërthamor nga ana e Teheranit, Izraeli është i gatshëm të ndërhyjë ushtarakisht.

“Ne treguam aftësitë tona gjatë luftës 12-ditore. Nëse Irani vendos të rinisë programin e armëve bërthamore, ne do ta sulmojmë sërish. Të gjithë kanë frikë të sulmojnë Iranin, por ne jo.”

Ministri Cohen shtoi se vendi i tij po armatoset seriozisht për t’u përballur me çdo kërcënim të mundshëm nga Irani, ndërkohë, në frontin jugor, theksoi se operacionet ushtarake në Rripin e Gazës kanë për qëllim të eliminojnë përfundimisht praninë e Hamasit.

”Ne po armatosemi në mënyrë shumë serioze përballë programit bërthamor. Dhe në fakt, ne nuk po luftojmë vetëm për Izraelin, por për të gjithë botën e lirë. Hamas nuk do të qeverisë më në Gaza. Falë operacioneve tona, Nasrallah në Liban është neutralizuar dhe Assad u largua nga Siria. E njëjta gjë do të ndodhë në Gaza”, tha ai.

Teksa fëmijë e të rritur humbin jetën në Gaza, ministri izraelit tregons e një plan do të ketë për frontin jugor nëse do të mposhtin Hamasin.

“Eliminimi i Hamasit do t’i hapë rrugë një të ardhmeje ndryshe për banorët e Gazës, ku të drejtat e njeriut, demokracia dhe një ekonomi më e zhvilluar do të jenë të mundshme”.

The post “Të gjithë kanë frikë, vetëm ne jo!”/ Ministri i Energjisë së Izraelit: E sulmojmë përsëri Iranin nëse rinis aktivitetin bërthamor first appeared on JavaNews.al.

Karabinierët e Riccione të Italisë (Rimini), panë të shqetësuar një 24-vjeçar shqiptar teksa luante me telefonin e tij dhe ky veprim u tërhoqi vëmendjen.

Menjëherë e mbajtën nën vëzhgim dhe e nënshtruan të riun në një kontroll fizik, sapo ai i shiti dozën e radhës për 30 euro një përdoruesi, në orët e vona të natës.

Nga kontrolli arritën të zbulonin 20 doza me kokainë në trup, mjet dhe më pas në banesën ku qëndronte. Gjithashtu si provë u sekuestruan edhe 700 euro cash që dyshohet se janë fitime nga aktiviteti i paligjshëm.

Policia tha se ai po qëndronte në një dhomë hoteli, nga ku bënte biznesin e tij ilegal, informon media italiane.

Shqiptari u vendos në paraburgim, ku në një seancë mase sigurie të përshpejtuar u la në arrest shtëpie nga gjykata, deri në fund të procesit që do bëhet me procedurë të shkurtuar.

The post Drejtonte trafikun e kokainës nga dhoma e hotelit në Itali, shqiptarin e tradhton loja me telefon first appeared on JavaNews.al.

Pronarët e dy farmacive në Korçë janë marrë nën hetim nga Policia nën dyshimin e kontrabandës së medikamenteve nga Greqia.

Kontrolli i ushtruar në mënyrë të befasishme nga autoritetet në ambientet e subjekteve të tyre, zbuloi sasi ilaçesh pa dokumentacion dhe të futura kontrabandë, ndërsa hetimet janë ende aktive.

Specialistët për Hetimin e Krimeve Ekonomike dhe Financiare konfirmuan se i referuan materialet në Prokurori, ku filloi procedimi penal për A. M., 28 vjeç, dhe L. Q., 43 vjeçe, banues në Korçë.

“Gjatë kontrollit të ushtruar në subjektet e tyre farmaci, që këta shtetas administronin, u gjetën dhe u sekuestruan, një sasi medikamentesh të dyshuara të futura kontrabandë nga Greqia”, bëri me dije policia vendore për detajet e para të këtij aksioni.

The post U gjenden medikamente kontrabandë, nën akuzë pronarët e dy farmacive në Korçë. Dyshohet se u futën nga Greqia first appeared on JavaNews.al.

Nga Mero Baze

Në Theth faji është i ndarë mes shtetit dhe ndërtuesve pa leje. Faji i shtetit, tashmë i pranuar nga vetë qeveria, është gjithë struktura administrative dhe politike që ka lejuar ndërtimet, që për mua është shumë e besueshme që janë lejuar përmes parave nën dorë. Dhe dëmi është dyfish, pasi kanë inkurajuar një krim të madh, për një fitim të tyre.

Përtej korrupsionit, qeveria është përgjegjëse në një periudhë më afatgjatë lidhur me strategjinë e zhvillimit të një prej zonave me potencial të lartë turistik. Dhe gjithmonë boshllëkun që lë ligji e mbush paligjshmëria dhe tregu i egër.

Por tani debati për Thethin nuk mund të bëhet si debati për lagjen 5 Maji në Tiranë dhe tokën e Nëna Lizës. Debati për Thethin ka kuptim të bëhet duke rënë dakord që nëse do flasim për perspektivën e një vendi turistik apo të një fjetoreje. Si fjetore nuk vlen asnjë lek, nëse i prish perspektivën turistike. Se po të ishte e mirë për fjetore, nuk boshatisej derisa u shfaq interesi për turizmin.

Prishja e ndërtimit dhe kthimi në pikën zero është detyrim për qeverinë, por me një kosto që duhet të bëhet gati ta paguajë. Dhe këtu nuk bëhet fjalë thjesht për kosto financiare, por për një plan urgjent për zhvillimin e turizmit të qëndrueshëm në atë zonë.

Ajo që kishte nisur të ndodhte nuk është as turizëm, as i qëndrueshëm dhe as ligjshmëri. Ajo është në thelb vrasje e turizmit për atë zonë. Ndalimi i saj i bën nder zonës dhe vetë operatorëve të turizmit në Theth, pavarësisht emocioneve të ditës.

Nëse kthehemi pas në kohë dhe do të pranojmë që Parku Rinia dhe Lumi i Lanës kishin marrë djersën dhe gjakun e qindra investitorëve në Tiranë, natyrisht nuk do ishin prishur kurrë, edhe pse përgjegjëse për to ishte po shteti.

Por unë nuk kam njohur më asnjë ish-ndërtues të paligjshëm në Parkun Rinia që nuk i doli më mirë më pas, kur ndërtoi me leje dhe përfitoi nga zhvillimi i Tiranës.

E njëjta gjë duhet të ndodhë dhe në Theth.

Çdo subjekt që po dëmtohet nga ky aksion tërësisht i domosdoshëm dhe i vonuar, duhet të ulet me qeverinë në negociata dhe të bien dakord për një plan zhvillimi që garanton investimet e tyre jo vetëm nga ana ligjore, por edhe nga pikëpamja e tregut. Thethi nuk do të jetë më atraksion turistik, nëse pllajat e tij mahnitëse dhe kodrat përreth do të bathorizohen. Dhe këtu nuk kam parasysh vetëm ndërtimet pa leje në tokë të botës apo tokë të babës, por edhe ndërtimet me leje.

Gjëmat më të mëdha administrata jonë i bën kur jep leje, sesa kur nuk jep leje.

Pra, debati nuk duhet të përqendrohet as te “toka e babës”, as te “toka e zënë”, as te ndërtimi pa leje. Rreziku më i madh i Thethit në të ardhmen mund të jenë ndërtimet me leje, nëse ato nuk bëhen brenda një plani të qartë për zhvillimin e turizmit të qëndrueshëm.

Turizmi i qëndrueshëm në ato zona është turizmi familjar, turizmi i kullave dhe bujtinave të mëdha që përballohen me fuqi punëtore të familjeve dhe që garantojnë identitet, miqësi me natyrën dhe mbi të gjitha nuk zhgënjejnë turistët nga gjithë bota që shkojnë drejt Thethit e Valbonës për natyrën. Kanë shkuar aty edhe kur nuk kishte asnjë bujtinë.

Pamjet e sotme dhe të këtyre javëve në Theth do të jenë të rënda, por më të rënda do të ishin ato pamje nëse Thethi do të lihet në rënie të lirë dhe në vullnetin që është duke prerë degën e pemës ku ka hipur.

Zgjidhja e vetme është që çdo i dëmtuar dhe të tjerë që duan të investojnë në atë zonë, të stimulohen me përparësi për t’u orientuar drejt një biznesi të ligjshëm që garanton mbijetesën e Thethit si vend turistik dhe jo si kapanon për të fjetur.

Nëse Thethin e vrasim si vend turistik, gjithë këto debatet e tjera janë kot. Do të jetë plagë më e madhe të shikosh kapanone të ndërtuara bosh, ku nuk shkel njeri, sesa të korrigjohet një zhvillim i gabuar për faj të qeverisë dhe vetë banorëve.

Ky “mort” në Theth mund të jetë një pikë kthesë e fortë, për ta parë problemin e turizmit në Theth në sy dhe për t’i dhënë një zgjidhje afatgjatë, që mund të bëjë të harrohet dhimbja e gabimeve të sotme prej qeverisë dhe ndërtuesve.

Vetëm ajo mund të sigurojë që Thethi do të mbetet një vend turistik dhe jo një Bathore e eksportuar si model zhvillimi “opozitar”. Të gjithë ata që nxisin këtë model zhvillimi dhe u dalin zot fadromave me molotov, thjesht duan t’i zhysin edhe më keq ata fatkeqë, që boll dëm u është bërë duke i lënë të bëjnë çfarë u thotë mendja.

Të gjithë ata që deri më sot e sulmojnë qeverinë në disa raste me të drejtë për tejkalim të lejeve për zhvillim në zona turistike, apo që flasin për dëmet në natyrë, befas janë reshtuar pro një modeli zhvillimi që e vret Thethin. E përsëris: nuk është puna te toka e babës, toka e zënë apo mungesa e lejes së ndërtimit. Ato rregullohen me pak vullnet. Problemi është se si do të mbijetojë Thethi si zonë turistike dhe si t’u shërbejë atyre banorëve, përfshid he viktimave të këtij modeli.

The post Debati për Thethin ka kuptim vetëm për ata që e duan Thethin vend turistik first appeared on JavaNews.al.

Partia e Lirisë ka dënuar aksionin e IKMT dhe Policisë së Shtetit ndaj banorëve të zonës së Thethit në Shkodër, duke fajësuar kryeministin Edi Rama se qëndron në krye, kurse si qëllim ka që t’i shërbejë oligarkëve dhe klientëve të tij.

Sekretari i Përgjithshëm, Tedi Blushi, doli sot në një deklaratë për mediat, ku teksa publikoi ehde pamje nga situata në Theth, akuzoi Ramën se pasi u bëri premtimet për legalizim, pas zgjedhjeve të 11 majit po u shëmb edhe ndërtimet, në kulmin e sezonit turistik.

Ai shprehu solidaritetin me banorët e zonës dhe i bëri thirrje autoriteteve që të “ndalin terrorin shtetëror”.

Deklarata e plotë e Tedi Blushit:

“Çizmja e pushtetit dhe fadromat e tiranisë të regjimit të “Ramaduros” prej ditësh po ushtrojnë një terror shtetëror të paprecedent ndaj banorëve të Thethit.

Vendimi i Edi Ramës për t’i shpallur luftë një komuniteti që kërkon vetëm të jetojë dhe të punojë në paqe në tokën e vet, është dëshmia më tronditëse e instalimit të një junte policore, shtypëse, kriminale dhe antikombëtare, që në kulmin e sezonit turistik, në vend të promovojë një nga perlat natyrore të Shqipërisë, po promovon turizmin e kallashnikovëve dhe fadromave.

Edi Rama, kjo qenie e pabesë dhe e paturp, që në adn ka mashtrimin, u premtoi banorëve të Thethit para zgjedhjeve se do u legalizonte pronat e do u falte edhe taksat, ndërsa tani kur zgjedhjet mbaruan u dërgon fadromat.

Pamjet nga Thethi, ku pushteti ka zbritur me makina të blinduara, kallashnikovë dhe fadroma si në një fushë beteje, janë dëshmia më e qartë e një regjimi që ka humbur çdo kontakt me realitetin dhe çdo ndjenjë përgjegjësie ndaj qytetarëve. Ato nuk përfaqësojnë shtetin ligjor, por një juntë të verbër që përdor dhunën për të shuar çdo zë kundërshtie, për të kontrolluar çdo pëllëmbë toke dhe për të shkelur me çizmen e pushtetit çdo normë demokratike

Drejtimi i automatikëve ndaj banorëve që po mbrojnë pronat e tyre është dhunë e mirëorganizuar për të mbuluar terrorin elektoral të 11 Majit. Është akt i pastër kriminal për të shuar me dhunë çdo zë kundërshtues, për të shtypur komunitete patriotike që nuk kanë kërkuar asgjë më shumë përveçse të ruhen, të mbrohen dhe të zhvillohen në paqe.
Partia e Lirisië, duke shprehur solidaritetin e thellë me të gjithë banorët e Thethit, bën thirrje të ndalet urgjentisht çdo formë e ndërhyrjes brutale policore dhe urbanistike me armë në dorë, si dhe të nisin hetimet penale për urdhërdhënësit dhe autorët e këtij sulmi kundër qytetarëve të pambrojtur.

Thethi meriton të jetë zemra e turizmit malor shqiptar dhe jo një vend ku dërgohen tanke civile për të shuar zërin e njerëzve që nuk përkulen. Kur një shtet i drejton armët kundër popullit të vet – ai nuk është më shtet. Është regjim represiv dhe duhet përballur si i tillë. Nëse sot është Thethi, nesër do të jetë shtëpia jote, çdo fshat dhe çdo qytet i Shqipërisë, ku më nuk do të mbizotërojë ligji por junta e kallashnikoëve dhe buldozerave kriminale që do shkatërrojnë dhe rrëmbejnë pronat e qytetarëve, për llogari të oligarkëve dhe klientëve të Edi Ramës”.

The post PL mbështet banorët e Thethit, Blushi: Ndalni terrorin, Rama promovon turizmin e kallashnikovëve dhe fadromave first appeared on JavaNews.al.

Nga Ylli Pata

Pas disa ditësh heshtjeje mbi operacionin në Theth, deputetët e PD-së së Shkodrës u ngjitën më në fund në Dukagjin.

Edhe pse me vonesë, kreu i qarkut Luçiano Boçi, së bashku me Bardh Spahinë-ish-kryebashkiakun, dolën në mejdan para kamerave, duke u përleshur me policët, ku rikthyen sharjet me libër shpie live, duke bërë të ditur para të gjithëve se ata “janë gjallë dhe siç kanë qenë këtu e 34 vite njësoj”.

Megjithatë, ishte interesant se rikthimi i tyre për tu bashkuar me një pjesë banorësh që janë rebeluar prej ditësh atje, ishte i vonë. Madje shumë i vonë. Duket nuk ka një mister për këtë, pasi ka pasur këto ditë mjaft aktivitet mendimesh nga njerëz zyrtarë të opozitës, të cilët në një farë mënyre e tregojnë një lloj “mazokizmi politik”.

Ajo që nuk kanë gëlltitur në PD-në është humbja në njësinë administrative Shalë, e cila ka për qendër pikërisht Thethin. Shala, dikur komunë, ka qenë një bastion i palëvizshëm i PD-së, ku fitorja ishte me një diferencë të madhe. Në zgjedhjet e fundit, PD humbi, natyrisht jo me një diferencë kush e di çfarë, pore dhe numrat e votuesve rezidentë janëë modestë, pasi njerëzit janë larguar me vite e vite. Në 11 maj, PS mori në njësinë administrative të Thethit, 388 vota, ndërsa PD 259 vota. Diferenca është 129, që përbën një zhvillim jo aq numerik sesa politik në këtë territor. Në të cilin 5 vota ka marrë koalicioni i Lulzim Bashës dhe 1 votë Lëvizja Bashkë.

Në rrjetet opozitare nuk fshihej mërzia, frustrimi dhe adhnimi me elektoratin e Thethit. Duke shprehur në fjalë të tjera logjikën klishe: “Mbajeni Ramën tani, vetë e deshët”.

Shikohej hapur zhgënjimi për braktisjen e “qëndrestaëve”, të Thethit për partinë që kanë dashur 34 vite me radhë. Një zhgënjim paksa cinik, duke qëndruar në distancë e duke e shfryrë inatin nga rrjetet sociale.

Por gjithçka ndryshoi pas molotovit në urën e vogël të Thethit, ku dhe në televizionet e Tiranës u kthyen në një “rebelim i popullit me policinë”. Popull s’kishte, por megjithatë, spinët mediatikë të opozitës, bombarduan rrjetet me një punonjës të fadromës që fliste dialect jugor dhe sipas tyre po “shante dukagjinsit”.

Për pak orë u hartua fabula e vjetër e “Jugit që urren verin”, ndaj dhe ka plasur në Theth. Dy ditë ditë më pas, shkuan atje deputetët e Shkodrës, të armatosur me molotovin verbal të gjuhës së pas 1997-s. “Kryengritje kundër atyre që duan të vrasin e fyejnë popullin e Dukagjinit”.

Po a mund ta kthejë opozitën jo thjeshte në Theth e Dukagjin, por në qarkun Shkodër, e në të gjithë vendin, vendosja e gishtit në të njëjtën vrimë të kavallit 34 vjeçar?

Ku simboli e flamuri i reagimit e reaksionit është ose molotovi, ose “dashuria” ndaj armës sovjetike?

Partia Demokratike, dhe e gjithë opozita mund të kishte hyrë fort në debatin e nisur nga Edi Rama në Theth. Madje ishte një shans i artë, që së bashku me banorët, por edhe me këshilltarët që kanë në bashki, të shkonin atje e të thonin fjalën e tyre. Madje edhe të ndalonin me protesta paqësore ndërhyrjen e IMT-së. Duke provokuar një dialog të pushtetit me qytetarët, e në këtë rast opozita, përveç përfaqësuese, kthehet edhe në propozuese e një rruge për të zgjidhur problemin e paligjshmërisë, problemin e mjedisit dhe ndërveprimin e pushtetit me komunitetit.

Madje, duke e nisur debatin pikërisht në këshillin bashkiak e për të folur për të gjithë territorin. Më pas të jepte qëndrimin e saj për aksionin që ka nisur në shkallë vendi e ku bizneset janë mjaft të frustruara pas prishjeve. Këtu opozita mund e duhet të luajë një rol të rëndësishëm, pasi ka një shans të artë për të marrë iniciativën e opinionit publik.

Por “eksitimi” nga era e molotovit dhe shpërthimi i librit të shtëpisë përpara kamerave, e polarizon situatën, jo thjeshte në Theth, por kudo. Banorët e Thethit dhe votuesit e vjetër të PD-së në Shkodër e kudo, e kanë braktisur partinë e tyre, se ajo i ka ikur problemeve, halleve, por edhe sukseseve të tyre. Siç nuk është zgjidhja rihapja e temës së inatit veri-jug, sidomos sot kur opozita do të ishte e interesuar për të rimarrë ato terrene që ju larguan në 11 maj.

Por e gjithë kjo mundësi apo shans që është hapur për opozitën, nuk i vlen Sali Berishës, i cili është i interesuar për një zhurmë sa më të madhe. Që të shurdhojë hallet e tij penale dhe politike…

The post Rikthimi i ‘dashnorëve të molotovit’ në Theth, a do ta ngjallë opozitën? first appeared on JavaNews.al.

Një 50-vjeçar është gjetur pa shenja jete në Shkodër, në sediljen e pasagjerit të një makine në pronësi të një subjekti tregtar.

Sipas policisë, dyshohet se ai ka pësuar arrest kardiak dhe si pasojë ka humbur jetën.

Trupi i pajetë i shtetasit E. M. u gjet rreth orës 19:15, në lagjen “Qemal Stafa”. Grupi hetimor ka nisur punën për zbardhjen e plotë të rrethanave të ngjarjes.

Njoftimi i policisë:

Shkodër / Informacion paraprak

Rreth orës 19:15, në lagjen “Qemal Stafa” brenda automjetit në pronësi të një subjekti tregtar, në serdilen e pasagjerit është gjetur pa shenja jete shtetasi E. M., rreth 50 vjeç, i cili dyshohet se ka pësuar arrest kardiak dhe si pasojë ka humbur jetën.

Grupi hetimor vijon punën për sqarimin e plotë të rrethanave të rastit.

The post Gjendet pa shenja jete 50-vjeçari në Shkodër! U gjet në sediljen e pasagjerit të një makine… first appeared on JavaNews.al.

Ish-ambasadori i parë gjerman pas Luftës së Dytë Botërore në Shqipëri, Werner Daum, ka ndërruar jetë, duke lënë pas një trashëgimi të jashtëzakonshme për Shqipërinë dhe kombin shqiptar.

Sali Berisha ka përkujtuar kontributin e tij të madh, duke e quajtur Daum “Ambasador i Lirisë” për shqiptarët. “Daum mbeti një mbështetës i palodhur i Shqipërisë dhe kulturës së saj, duke promovuar idenë e saj në Evropë dhe duke marrë shumë nderime për kontributin e tij. Ai ishte një mik i shquar i ditëve më të vështira të shqiptarëve, duke luajtur një rol kyç në nxitjen e protestave dhe kryengritjes paqësore në vitin 1990”, shkruan Berisha.

Postimi i kreut të PD-së Sali Berisha:

Të dashur miq, ish-ambasadori i parë gjerman pas Luftës së Dytë Botërore në Shqipëri, një mik i madh i Shqipërisë dhe kombit shqiptar, Ëerner Daum, mbylli sytë përgjithmonë në atdheun e tij të dytë, në Shqipëri.

Ambasadori Ëerner Daum ishte një mik i shquar i ditëve më të vështira për Shqipërinë dhe shqiptarët. Në vitet 1989–1990, pas rënies së Murit të Berlinit, Ëerner Daum, përfaqësues i kombit të madh gjerman, pasardhës i një familjeje antinaziste i mëkuar me pasionin për lirinë, bëri gjithçka dhe më shumë se kushdo tjetër që të inkurajonte shqiptarët të ngriheshin kundër regjimit komunist diktatorial dhe të ndiqnin rrugën e kombeve të tjera të shtypura ish-komuniste. Me kontaktet dhe takimet e tij direkte me guximtarë të grupeve antikomuniste në Shkodër, Kavajë, Tiranë etj., ai dha ndihmesë tejet të çmuar në inkurajimin e protestave të para antikomuniste në Shkodër, Kavajë, Tiranë në muajt e parë të vitit 1990.

Por veprimtaria e tij për lirinë e shqiptarëve kulmoi si promotor kryesor i kryengritjes paqësore të Rinisë së Tiranës më 2 korrik 1990. Ambasada e vendit të tij, nën drejtimin e tij, u shndërrua në kështjellën e lirisë të 3800 të rinjve që shembën Murin e Berlinit në Tiranë dhe e mbushën atë me kryengritës në çdo skaj të saj. Qëllimi i tij ishte që kryengritja paqësore e 3800 të rinjve që mbushën ambasadën e RFGJ dhe qindra e qindra të rinjve të tjerë që hynë në ambasadat e tjera të mbështetej nga qytetarët e Tiranës dhe të përmbysej kështu edhe në Shqipëri regjimi komunist.

Pas këtij aksioni të jashtëzakonshëm, që u shndërrua në kryelajmin e mediave botërore, ai u transferua nga Shqipëria dhe, mjerisht, shoqëria shqiptare ato ditë historike nuk doli dot nga apatia. Por megjithëkëtë, kryengritja paqësore e 2 korrikut 1990, arkitekt kryesor i të cilës ishte ambasadori Ëerner Daum, do të ishte preludi i revolucionit demokratik të Dhjetorit 1990 që solli përmbysjen e diktaturës komuniste; ndaj dhe ai do të mbetet gjithmonë Ambasador i Lirisë për shqiptarët.

Pas largimit nga Shqipëria, mik i çmuar i shqiptarëve dhe në veçanti i kolosëve Ismail Kadare dhe Martin Camaj, studiues dhe intelektual klasi në elitën akademike gjermane por edhe franceze, Ëerner Daum do të ishte një avokat i Shqipërisë, shqiptarëve, kulturës së tyre. Ai i kushtoi kohë dhe energji të çmuar promovimit të tyre në Europë. Dashurinë dhe respektin e tij për Shqipërinë, shqiptarët, kulturën, identitetin, historinë e tyre, ai e paraqiti në një seri studimesh, referatesh, leksionesh dhe ekspozitash ndër më të arrirat kushtuar atyre.

Për të gjithë kontributin e tij të jashtëzakonshëm, Presidenti i Republikës, Bujar Nishani, e ka nderuar këtë burrë të shquar të kombit gjerman me Urdhrin “Naim Frashëri” i Klasit të Parë. Kurse kryetari i Bashkisë së Kavajës e shpalli më datën 10 korrik 2025 Qytetar Nderi të qytetit.

Unë pata fatin ta takoj përsëri atë më 10 korrik 2025 në Kavajë, në 35-vjetorin e rënies së heroit të parë të demokracisë së Shqipërisë, Josif Buda, në varrimin e të cilit ai kishte marrë pjesë dhe kujtimin e të cilit ai kishte ardhur ta nderonte. Dy ditë më parë pata me ambasadorin një bisedë të gjatë, që së bashku me kujtimin e veprës së tij të ndritur do ta mbaj mend përgjithmonë.

The post “Ambasadori i Lirisë”/ Ndarja nga jeta e Daum, Berisha: Mik i shquar i ditëve më të vështira për shqiptarët first appeared on JavaNews.al.

Franca dhe Kaledonia e Re njoftuan të shtunën një marrëveshje “historike” në të cilën territori përtej detit do të mbetej francez, por do të shpallej shtet i ri. Marrëveshja 13-faqëshe e njoftuar të shtunën kërkon një kombësi të Kaledonisë së Re dhe mundësinë që banorët atje ta kombinojnë këtë status me kombësinë franceze.

Franca njoftoi të shtunën një marrëveshje “historike” me Kaledoninë e Re , në të cilën territori përtej detit, i tronditur nga dhuna vdekjeprurëse separatiste vitin e kaluar, do të mbetej francez, por do të shpallej shtet i ri.

Presidenti Emmanuel Macron kishte bërë thirrje për bisedime për të zgjidhur një bllokim midis forcave besnike ndaj Francës dhe atyre që duan pavarësinë , duke u kërkuar zyrtarëve të zgjedhur të Kaledonisë së Re, si dhe udhëheqësve politikë, ekonomikë dhe të shoqërisë civile, të mblidheshin pranë Parisit për të hartuar një kornizë kushtetuese për territorin.

Pas 10 ditësh bisedimesh, palët ranë dakord që të krijohej një “Shteti i Kaledonisë së Re”.

Arkipelagu do të ruajë “një status brenda Francës, me kaledonianët që do të mbeten francezë”, tha Nicolas Metzdorf, një deputet anti-pavarësi.

“Nuk janë planifikuar më referendume, me përjashtim të atij që konfirmon këtë marrëveshje”, tha ai në një mesazh dërguar AFP-së.

Prioriteti tani është rimëkëmbja ekonomike e Kaledonisë së Re pas dhunës së vitit të kaluar që vrau 14 persona dhe vlerësohet se i ka kushtuar territorit dy miliardë euro (2.3 miliardë dollarë), duke ulur me 10 për qind produktin e brendshëm bruto ( PBB ), tha ai.

Kryeministri François Bayrou tha se marrëveshja e së shtunës — e cila ende kërkon miratim parlamentar dhe në referendum — ishte me “dimensione historike”.

Me një popullsi prej rreth 270,000 banorësh dhe të vendosur gati 17,000 kilometra (10,600 milje) larg Parisit, Kaledonia e Re është një nga disa territore përtej detit që mbeten pjesë integrale e Francës.

Është sunduar nga Parisi që nga vitet 1800, por shumë kanakë vendas ende e urrejnë pushtetin e Francës mbi ishujt e tyre dhe duan autonomi ose pavarësi më të plotë.

Trazirat shpërthyen në maj të vitit 2024 pasi Parisi planifikoi t’u jepte të drejtë vote mijëra banorëve jo-indigjenë me qëndrim afatgjatë, diçka që Kanakët kishin frikë se do t’i linte ata në një pakicë të përhershme, duke ua shkatërruar shanset për të fituar pavarësinë.

Si pjesë e marrëveshjes, banorët e Kaledonisë së Re në të ardhmen do të lejohen të votojnë vetëm pas 10 vitesh jetese në arkipelag.

Referendumi i fundit për pavarësi në Kaledoninë e Re u mbajt në vitin 2021 dhe u bojkotua nga grupet pro-pavarësisë për shkak të ndikimit të pandemisë Covid-19 në popullsinë Kanak.

Referendumi ishte i fundit nga tre që nga viti 2018, të cilët të gjithë hodhën poshtë pavarësinë e Kaledonisë së Re.

Që nga referendumi i vitit 2021, situata politike në arkipelag ka qenë në bllokim.

Kaledonia e Re mund të marrë shtetësinë e vet © Sebastien Bozon, AFP

Macron deklaroi në fillim të qershorit se donte një “projekt të ri” për Kaledoninë e Re.

Marrëveshja 13-faqëshe e njoftuar të shtunën kërkon një kombësi të Kaledonisë së Re dhe mundësinë që banorët atje ta kombinojnë këtë status me kombësinë franceze.

Sipas marrëveshjes, një “Shteti i Kaledonisë së Re” do të sanksionohet në kushtetutën e Francës dhe vendet e tjera mund ta njohin një shtet të tillë.

Marrëveshja gjithashtu kërkon një pakt rimëkëmbjeje ekonomike dhe financiare që do të përfshinte një ripërtëritje të aftësive të përpunimit të nikelit të territorit.

Të dyja dhomat e parlamentit të Francës do të takohen në tremujorin e katërt të këtij viti për të miratuar marrëveshjen, e cila më pas do t’u paraqitet banorëve të Kaledonisë së Re në një referendum në vitin 2026.

The post Arrihet marrëveshja historike! Franca bie dakord për krijimin e shtetit të ri “Kaledonia e Re” first appeared on JavaNews.al.

Policia e Vlorës vazhdon aksionin për largimin e automjeteve të parkuara në mënyrë të kundraligjshme, ose kundravajtje, në kuadër edhe të aksionit për lirimin e hapësirave publike.

Drejtuesi i Policisë së Vlorës, Elidon Çela, tha për mediat se nuk do të ketë më asnjë tolerim, por vetëm masa administrative.

Përveç masës administrative të heqjes së mjetit me karrotrec, do ketë edhe ndjekje penale për drejtuesit e mjeteve që bllokojnë qarkullimin e lirë të mjeteve dhe këmbësorëve.

Prej ditësh Policia e Vlorës po vijon aksionin për lirimin e rrugëve nga parkimet e gabuara të shoferëve, duke i shoqëruar me gjoba dhe bllokim mjeti.

The post Policia vijon aksionin për parkimet e gabuara në Vlorë, i largon mjetet me karrotrec first appeared on JavaNews.al.

Kina publikoi të premten një propozim të ri për rëndësinë e lëvizjes drejt transportit detar të gjelbër, inteligjent dhe të hapur, në kuadër të 20-vjetorit të Ditës Kombëtare Detare, shkruan “CGTN”.

Ministria e Transportit bëri të ditur se, si tregtari më i madh i mallrave në botë dhe ekonomia e dytë më e madhe, Kina transporton rreth 95 për qind të ngarkesave të importit dhe eksportit me det.

Rrjeti i saj detar përfshin vende dhe rajone të mëdha dhe kryeson në kapacitetin e porteve, madhësinë e flotës, prodhimin e ndërtimit të anijeve dhe shkallën e industrisë detare.

Në vitin 2024, vlera totale e ekonomisë detare të Kinës tejkaloi për herë të parë 10 trilionë juanë (rreth 1.4 trilionë dollarë).

Kina promovon transportin detar me karbon të ulët dhe propozon të përshpejtojë transformimin e gjelbër të industrisë së transportit duke avancuar në mënyrë gjithëpërfshirëse zhvillimin e porteve të gjelbra, anijeve të gjelbra dhe rrugëve të gjelbra të transportit.

“Është thelbësore të ndërtohet një sistem furnizimi me energji të pastër, me karbon të ulët, i sigurt dhe efikas, si dhe të promovohet në mënyrë aktive përdorimi i energjisë së pastër dhe në të njëjtën kohë të forcohet mbrojtja ekologjike detare”,- thuhet në propozim.

Arritjet e fundit të Kinës në transportin detar të gjelbër pasqyrojnë këtë angazhim.

Në qershor, Kina dorëzoi anijen e saj të parë për kontejnerë me karburant të dyfishtë me metanol, “COSCO SHIPPING Yangpu”, të ndërtuar në vend, me kapacitet 16.000 TEU, sistemi i të cilit me karburant të dyfishtë mundëson ndërrimin pa probleme midis llojeve të karburantit në varësi të nevojave specifike të rrugës dhe ndihmon në uljen e emetimeve të dyoksidit të karbonit me rreth 120.000 tonë në vit, ekuivalente me sekuestrimin e karbonit nga mbjellja e 6.7 milionë pemëve.

Deri në fund të vitit 2024, Kina kishte mbi 600 anije me energji LNG, 485 anije elektrike dhe disa të mundësuara nga karburantet metanol dhe hidrogjen, sipas Ministrisë së Transportit.

The post Transporti detar i gjelbër dhe intiligjent drejt zhvillimit të gjerë first appeared on JavaNews.al.

Presidentja e Komisionit Evropian, Ursula von der Leyen, ka reaguar ashpër ndaj vendimit të Presidentit amerikan Donald Trump për vendosjen e tarifave 30% ndaj produkteve evropiane të importuara në SHBA, duke paralajmëruar se ky veprim do të prishë seriozisht zinxhirët transatlantikë të furnizimit dhe do të dëmtojë ekonominë në të dy anët e Atlantikut.

Në një deklaratë zyrtare, von der Leyen theksoi se Bashkimi Evropian është i gatshëm të marrë masa të nevojshme për të mbrojtur interesat e tij në rast se tarifat hyjnë në fuqi nga 1 gushti.

“Vendosja e tarifave prej 30% mbi eksportet e BE-së do të prishte zinxhirët kryesorë të furnizimit transatlantik, në dëm të bizneseve, konsumatorëve në të dy anët e Atlantikut,” deklaroi ajo.

“Pak ekonomi në botë janë aq të hapura dhe të drejta në praktikat tregtare sa Bashkimi Evropian”, theksoi Ursula von der Leyen.

Ajo paralajmëroi se Bashkimi Evropian është i përgatitur për kundërmasa proporcionale nëse SHBA nuk tërhiqet nga vendimi.

“Ne mbetemi të gatshëm të vazhdojmë të punojmë drejt një marrëveshjeje deri më 1 gusht. Në të njëjtën kohë, do të marrim të gjitha masat e nevojshme për të mbrojtur interesat e BE-së, duke përfshirë marrjen e kundërmasave proporcionale nëse është e nevojshme,” thuhet në deklaratë.

The post Trump shpalli tarifa 30% për produktet e BE-së, reagon Von der Leyen: Jemi gati për kundërpërgjigje first appeared on JavaNews.al.

Drejtoresha e Qendrës Kombëtare të Librit dhe Leximit, Alda Bardhyli, e ftuar në emisionin “Kjo javë” në News 24, ndau disa sugjerime leximi për verën. Ajo theksoi rëndësinë e rikthimit te klasikët, si dhe vlerën e letërsisë shqipe.

Ajo rekomandoi vepra si “Mandarinët” e Simone De Beauvoir dhe “Në kërkim të kohës së humbur” të Prustit. Bardhyli dha edhe sugjerime për politikanët, duke përmendur veprat “Republika” e Platonit dhe “Arti i luftës” i Sun Tzu.

Drejtoresha e Qendrës Kombëtare të Librit dhe Leximit, Alda Bardhyli: Kur flasim për lexime bere, mua më pëlqen që të rikthehemi ndonjëherë dhe tek klasikët. Vetëm pak kohë më parë është botuar në shqip një vepër e madhe e një autoreje që unë e dua dhe e çmoj, Simone De Beauvoir. Është vepra “Mandarinët” e përkthyer nga Diana Çuli. Do e sugjeroja këtë vepër, që na çon në vitet 1945, është vepër që tregon për përpjekjet e një grupi intelektualësh francezë, një përpjekje e tyre e vazhdueshme për të shpëtuar një botë, e cila ishte në fund të Luftës së Dytë Botërore, bota duket sikur i është rikthyer sërish në këto ngjarje dhe në kontekstin kulturor e gjeo-politik, kjo është vepër që na mëson për rolin që duhet të kenë mendjet e mprehta të një shoqërie. Përmes kësaj vepre, autorja duket se i bën ftesë intelektualëve sot, që të jenë më të pranishëm me potencialin e tyre në çështje politike e kulturore të vendit të tyre. Do sugjeroja edhe “Në kërkim të kohës së humbur” të Marsel Prust. Një vepër interesante është edhe “Shënimet e një gruaje”. Janë “Kujtimet” e Tedi Papavramit, “Parajsa Artificiale” e Ben Blushit, Alfred Peza ka nxjerrë roman interesant, doja të rikthehemi dhe tek letërsia shqipe. Bajram Karabolli ka ripërkthyer “Don Kishotin”.

Nëse flasim për politikën, që politikanët të lexojnë libra pra, besoj se për maxhorancën do ishte e vlefshme vepra “Republika” e Platonit, pasi ka nevojë për qeverisje të mirë dhe për reflektim. Për opozitën, do sugjeroja një autor interesant kinez, Sum Tzu, “Arti i luftës” është libër që ka në thelb strategjinë sesi të ruajmë kurajon, qetësinë dhe të menaxhojmë situata reflektuese dhe të kemi tensione sa më pak kur kemi sfidat tona. Sugjeroj dhe autorët shqiptarë.

The post Drejtoresha e Qendrës Kombëtare të Librit: Ja cilët janë titujt që iu sugjeroj lexuesve në këtë verë të nxehtë first appeared on JavaNews.al.

Presidentja e Kosovës, Vjosa Osmani, ka deklaruar se do t’i drejtohet sërish Gjykatës Kushtetuese për të kërkuar sqarim lidhur me pasojat ligjore në rast të mosrespektimit të afatit kushtetues për konstituimin e Kuvendit.

Gjatë një diskutimi të mbajtur në Hudson Institute në Ëashington D.C., Osmani u shpreh optimiste se në javët në vijim situata do të mund të ndryshojë, siç tha ajo të konstituohet Kuvendi dhe do të formohet qeveria e re.

Ajo theksoi se, për shkak të disa paqartësive kushtetuese, Kuvendi ende nuk është konstituar. Edhe pse Gjykata Kushtetuese ka sqaruar se ekziston një afat i rreptë 30-ditor për konstituimin e parlamentit, i cili skadon më 26 korrik, siç tha ajo nuk është definuar se cilat janë pasojat ligjore në rast të mosrespektimit të këtij afati.

“Kushtetutën tonë, kur e hartuam, ishte e pamundur të parashikonim çdo skenar të mundshëm. Ajo u hartua me një mendim pozitiv, me idenë që ligjvënësit do të bashkëpunonin me njëri-tjetrin, e jo të bllokonin njëri-tjetrin dhe institucionin. Tani, për shkak të disa paqartësive kushtetuese – nëse mund ta quaj kështu – parlamenti nuk është konstituar ende. Por kemi pasur një rast të ri në Gjykatën Kushtetuese, dhe gjykata ka dhënë një sqarim.

Ekziston një afat i rreptë 30-ditor, i cili skadon më 26 korrik për konstituimin e parlamentit. Por nuk është sqaruar se cilat janë pasojat ligjore nëse nuk respektohet ky afat kushtetues i detyrueshëm. Kështu që duket se do të më duhet t’i drejtohem përsëri gjykatës dhe t’i parashtroj atë pyetje veçmas. Dhe shpresoj që ata do të përgjigjen. Por gjithashtu kam një grimë shprese që gjërat e mira mund të ndodhin gjatë javëve në vijim. Dhe ndoshta do të kemi një qeveri – sado e brishtë – por na duhet një qeveri dhe një parlament i konstituar për të parandaluar dëme ndaj vendit”, tha Osmani.

The post Moskonstituimi i Kuvendit, Presidentja e Kosovës: Do t’i drejtohem sërish Gjykatës Kushtetuese first appeared on JavaNews.al.

Një ngjarje dramatike është shënuar mëngjesin e sotëm në fluturimin nga Dubrovniku drejt Lyon-it, kur avioni i pasagjerëve i kompanisë Volotea është përfshirë nga flakët gjatë fluturimit dhe ka kryer një ulje emergjente në aeroportin “Sandro Pertini” pranë Torinos.

Sipas mediave italiane, ngjarja ndodhi rreth orës 10:28, kur avioni tip “Airbus A320”, i cili ishte nisur nga Dubrovniku dhe duhej të mbërrinte në Lyon në orën 10:40, pësoi një defekt teknik në ajër.

Gjatë këtij defekti, një nga motorët e avionit shpërtheu në flakë, duke detyruar pilotin të aktivizojë procedurat e emergjencës dhe të kërkojë ulje të menjëhershme.

Fatmirësisht, avioni arriti të ulet në mënyrë të sigurt pa pasoja për pasagjerët apo ekuipazhin. Sipas raportimeve të “Corriere della Sera” ndërhyrja e shpejtë e kontrollit të trafikut ajror dhe profesionalizmi i pilotit parandaluan një tragjedi të mundshme.

Aktiviteti në aeroportin e Torinos u ndërpre për rreth një orë për shkak të incidentit, ndërsa pasagjerët që udhëtonin drejt Francës u evakuuan me siguri dhe më pas u transferuan me autobusë drejt destinacionit të tyre përfundimtar, Lyon.

Autoritetet kanë nisur hetimet për të zbuluar shkaqet e saktë të defektit në motorin e avionit.

The post Panik në ajër, avioni i nisur nga Kroacia përfshihet nga flakët mbi Itali first appeared on JavaNews.al.

Një incident është regjistruar pasditen e sotme në Shkodër. Një bombol gazi ka shpërthyer në banesën e shtetasit me iniciale A.J., ku për pasojë është lënduar vetë pronari.

Uniformat blu bëjnë me dije se i lënduari ndodhet në spital për të marrë ndihmë mjekësore.

Njoftimi:

Rreth orës 17:55, në lagjen “Partizani”, në banesën e shtetasit A. J., ka shpërthyer një bombël gazi.

Si pasojë është dëmtuar pronari i banesës, i cili ndodhet në spital, jashtë rrezikut për jetën.

Grupi hetimor po punon për sqarimin e plotë të rrethanave të ngjarjes.

The post Shpërthen bombola e gazit në një banesë në Shkodër, lëndohet një person first appeared on JavaNews.al.

Sllovakia po kërkon të arrijë një marrëveshje me partnerët evropianë në lidhje me furnizimet me gaz rus deri të martën, në mënyrë që të miratojë një paketë të re sanksionesh të BE-së ndaj Rusisë, tha të shtunën kryeministri Robert Fico.

Ai u tha gazetarëve në Bratislavë se dëshiron “ta zgjidhë këtë deri të martën, sepse tensionet po rriten nga të gjitha anët”.

Deri më tani, Sllovakia ka ruajtur veton e saj në paketën e 18-të të sanksioneve që do të zbatohet në përgjigje të pushtimit të plotë të Ukrainës nga Rusia.

Bratislava e ka bllokuar paketën për shkak të shqetësimeve mbi një propozim për heqjen graduale të të gjitha lëndëve djegëse fosile ruse deri në vitin 2028, nga frika se kjo mund të dëmtojë interesat ekonomike të vendit.

Sllovakia merr pjesën më të madhe të gazit nga Rusia dhe ka një kontratë afatgjatë me Gazprom-in rus që vlen deri në vitin 2034. Fico dëshiron garanci ligjore nëse Gazprom pretendon një shkelje të mundshme të kontratës.

Fico tha se kishte folur me kancelarin gjerman Friedrich Merz rreth kësaj çështjeje, duke theksuar se Sllovakia do ta hiqte veton e saj nëse arrihet një marrëveshje për ndalimin e gazit.

Paketa e fundit e sanksioneve, e zbuluar të martën nga Presidentja e Komisionit Evropian Ursula von der Leyen dhe Përfaqësuesja e Lartë Kaja Kallas, fut në listën e zezë edhe 22 banka të tjera ruse dhe e zgjeron ndalimin e transaksioneve për subjektet me seli jashtë vendit që kontribuojnë në anashkalimin e sanksioneve. Fondi Rus i Investimeve Direkte, një fond sovran pasurie me një kapital të vlerësuar prej 10 miliardë dollarësh është në shënjestër.

Gjithashtu, ai përmban një ndalim për përdorimin direkt ose indirekt të tubacioneve Nord Stream që lidhin Rusinë dhe Gjermaninë. Tubacionet nënujore sot janë jofunksionale dhe Berlini ka përjashtuar mundësinë e rifillimit të tranzitit të gazit pas përfundimit të luftës.

The post Sllovakia, marrëveshje me BE-në për ndërprerjen e furnizimeve me gazin rus/ Fico: Kemi afat deri të martën! first appeared on JavaNews.al.

Teksa në Srebrenica varroseshin eshtrat e shtatë viktimave të tjerë të genocidit të vitit 1995 dhe e gjithë bota kujtonte mbi 8 mijë burrat dhe djemtë myslimanë të ekzekutuar nga pjesëtarët e Ushtrisë së Republikës Serbe të Bosnjes dhe formacioneve paraushtarake nga Serbia, u mbrëmje, serbët kaluan në provokime duke lëshuar përpara kishës atje muzikë fyese për boshnjakët.

Mediat në Prishtinë pohojnë se pasi shumë të ftuar, delegacione ndërkombëtare, qytetarë dhe familje të pikëlluara u larguan nga Srebrenica, nisi një furi provokimesh me qëllime të qartë: të shqetësohen boshnjakët në Srebrenicë, të dërgohen mesazhe urrejtjeje dhe të kremtohej genocide i kryer.

Muzika e vendosur përpara kishës ishte ajo e Baje Malog Knindzhe, ku në mënyrat më të tmerrshme fyhen boshnjakët, lartësohen krimet dhe bëhen thirrje për dëbim. Përmasat dhe brutaliteti i vrasjeve 30 vjet më parë në enklavën ku mijëra vetë kërkuan strehim nga forcat serbo-boshnjake – tronditën botën dhe çuan në disa dënime të profilit të lartë në Gjykatën Penale Ndërkombëtare për ish-Jugosllavinë.

Në mesin e të dënuarve me burgim të përjetshëm është komandanti i atëhershëm i forcave serbe, Ratko Mlladic, i gjetur fajtor për krime lufte, krime kundër njerëzimit dhe genocid. Për presidentin e Serbisë Aleksandar Vucic megjithatë, në Srebrenicë nuk u krye genocid, por vetëm krim.

The post Serbët, provokime në Srebrenicë/ Vendosin muzikë nacionaliste në ditën e përkujtimores së masakrës first appeared on JavaNews.al.