Policia Kufitare njofton se shpëtoi dy turistë gjermanë të cilët kishin lënë jahtin e tyre dhe po lundronin me një gomone drejt bregdetit të Qeparoit.

Berhard Michael, 70 vjeç, dhe Ute Dorothea, 63 vjeçe, u transportuan me siguri në portin e Himarës. Rreth 100 metra larg bregut, ata u gjetën mbi një gomone plastike pa motor, vetëm me lopata, me emrin “Timini”. Çifti ishte shkëputur nga jahti i tyre personal “Tiaman” dhe për shkak të erës së fortë nuk kishin mundur të ktheheshin në breg.

Ngjarja ndodhi mbrëmjen e së dielës, rreth orës 22:00, kur Salla e Komisariatit të Policisë Himarë mori njoftim për dy persona në vështirësi. Menjëherë, mjeti lundrues i Policisë Kufitare u nis drejt zonës së Qeparoit dhe rreth orës 22:45 konstatoi dy turistët gjermanë mbi gomone.

Rreth orës 00:30, ata mbërritën në port në gjendje të mirë shëndetësore.

The post Me gomone drejt Qeparoit, shpëtohen turistët gjermanë që rrezikuan të mbyteshin first appeared on JavaNews.al.

Në Kolegjin Zgjedhor po mbahet seanca ku po shqyrtohet padia e Adriatik Lapajt ndaj KAS dhe KQZ-së, i cili kërkoi mandatin e vetëm të fituar nga koalicioni “Nisma Shqipëria Bëhet” në zgjedhjet e 11 majit.

Por Lapaj ka ndryshuar mendje dhe tashmë nuk e kërkon mandatin për vete. Ai ka kërkuar që të lihet në fuqi vendimi i KQZ-së që mandati t’i jepet kushërirës së tij, Kleana Xhuveli dhe rrëzimin e vendimit të KAS-it, i cili e kaloi te e para në listë, Ana Dajko.

Në ankimimin e tij më 4 gusht në Kolegjin Zgjedhor, Lapaj kërkonte që të njihet si fitues i listës së hapur me votat preferenciale të qytetarëve. Ai kërkonte gjithashtu mosnjohjen si të vlefshme të revokimit të dorëheqjeve më 15 dhe 17 korrik nga Zeqir Kordhoni, daja i Endri Shabanit, që pretendoi i pari se firma e dorëheqjes së tij duhej verifikuar pasi nuk mbante mend si dhe të kushërirës së Lapajt, Kleana Xhuveli, të cilën KQZ-ja e shpalli fituese.

Sipas marrëveshjes paraprake të koalicionit, të gjithë emrat e listës së mbyllur do të dorëzonin mandatin dhe në Kuvend do të hynte më i votuari i listës së hapur. Por tërheqja e Kordhonit nga dorëheqja i bllokoi rrugën Lapajt për në parlament dhe solli përplasjen publike me Shabanin. Në këtë ngërç, kushërira e Lapajt, Kleana Xhuveli, e 4-ta në listë, po ashtu shpalli ambicien për të marrë mandatin.

Celibashi ia dha mandatin Xhuvelit, por KAS e riktheu te Ana Dajko, e para në listë.

Me vendimin që pritet të marrë Kolegji sot, pritet që t’i hapet rruga edhe certifikimit zyrtar të 11 majit.

The post Seanca në Kolegj, Lapaj ndryshon mendje: Mos ia jepni mandatin tezes, por gocës së tezes first appeared on JavaNews.al.

Shtetet e Bashkuara kanë miratuar një marrëveshje me vlerë rreth 850 milionë dollarë për të furnizuar Ukrainën me 3,350 raketa të tipit ERAM, sipas një raportimi të The Wall Street Journal, që citon zyrtarë amerikanë.

Dërgesa pritet të arrijë në duart e forcave ukrainase brenda gjashtë javësh, ndërsa financimi i kësaj pakete ushtarake do të mbulohet kryesisht nga vendet evropiane. Përveç raketave, paketa përfshin edhe pajisje të tjera ushtarake shtesë.

Raketat ERAM kanë aftësi për të goditur objektiva në një distancë që varion nga 241 deri në 450 kilometra. Megjithatë, përdorimi i tyre do të kërkojë një autorizim të veçantë nga Departamenti Amerikan i Mbrojtjes.

Miratimi i kësaj pakete ishte vonuar përkohësisht për shkak të bisedimeve midis presidentit rus Vladimir Putin dhe presidentit amerikan Donald Trump në Alaskë, si dhe diskutimeve me presidentin ukrainas Volodymyr Zelensky në Uashington.

Sipas The Wall Street Journal, edhe pse SHBA nuk ka njoftuar për dërgesa të tjera raketash, armë të tjera të blera nga qeveritë evropiane nëpërmjet Uashingtonit — si sistemet e mbrojtjes ajrore dhe raketat GMLRS me një rreze prej rreth 150 kilometrash, mund të forcojnë më tej arsenalin ushtarak të Ukrainës.

Më herët, gazeta kishte raportuar se Pentagoni kishte kufizuar për disa muaj përdorimin nga Ukraina të armëve me rreze të gjatë ndaj objektivave në territorin rus.

The post “Dhurata” 850 milionë dollarë, SHBA miraton dërgimin e raketave ERAM në Ukrainë first appeared on JavaNews.al.

I jepet sot (25 gusht) lamtumira e fundit gazetarit dhe publicistit të ndjerë, Artur Zheji, i cili u nda nga jeta 2 ditë më parë. Homazhet po zhvillohen në ambientet e Universitetit të Arteve të Bukura, ku familjarë, miq dhe kolegë po i japin lamtumirën e fundit.

Më pas, arkëmorti me trupin e pajetë do të përcillet drejt banesës së fundit, pranë varrezave të Tufinës. Artur Zheji konsiderohet si një personalitet e spikatura në fushën e gazetarisë.

Ai ishte drejtues i Radio Televizionit Shqiptar, i Agjencisë Telegrafike Shqiptare dhe disa medieve të shkruara, duke dalluar për shkrimet analitike dhe stilin kritik.

Një karrierë e pasur në shërbim të medies

Artur Zheji njihej si një nga penat më të spikatura të gazetarisë shqiptare, i specializuar në analizë dhe opinion. Me një veprimtari të pasur, ai shërbeu në funksione drejtuese në disa media, duke kulmuar me postin e Drejtorit të Përgjithshëm të Radio Televizionit Shqiptar.

Përmes shkrimeve të tij si editorialist, analizave politike dhe drejtimit të programeve televizive, ai la një gjurmë të pashlyeshme në fushën e medies, duke u bërë një zë i rëndësishëm për debatin publik në vend.

Artur Zheji ishte i njohur jo vetëm për kontributin e tij në media, por edhe për trashëgiminë e pasur kulturore. Si djalë i eruditit Petro Zheji dhe aktores Besa Imami, ai vetë la gjurmë si dramaturg, një anë e talentit të tij të vlerësuar nga Teatri Kombëtar, i cili shprehu dhimbjen për humbjen e tij.

“Në krijimtarinë e tij, fjala u bë reflektim i kohës dhe i shoqërisë, duke pasuruar jo vetëm medien dhe debatin publik, por edhe skenën tonë kombëtare”, thuhet në mesazhin e Teatrit Kombëtar.

Zheji la pas dy vajza dhe një djalë, së bashku me bashkëshorten e tij. Humbja e tij e papritur ka tronditur jo vetëm familjen, por edhe kolegët dhe opinionin publik, të cilët e shihnin si një figurë me integritet dhe profesionalizëm të lartë. Vdekja e tij është një humbje e madhe për gazetarinë, analizën politike dhe medien shqiptare në përgjithësi.

The post Lamtumirë Artur Zheji! Mbahen homazhet për gazetarin dhe publicistin e ndjerë first appeared on JavaNews.al.

Federata e Futbollit njofton se nga sot të gjithë futbolldashësit dhe tifozët e Kombëtares kanë mundësi të blejnë biletat edhe fizikisht për ndeshjen e 9 shtatorit, Shqipëri – Letoni, e vlefshme për kualifikueset e Kupës së Botës 2026.

Departamenti i Komunikimit në FSHF bën me dije se biletat mund të sigurohen pranë pikës së shitjes që ndodhet tek hyrja e tribunës kryesore të stadiumit “Air Albania”. Pika fizike do të jetë e hapur çdo ditë nga ora 10:00 deri në 18:00.

Ky vendim vjen për shkak të kërkesave të vazhdueshme të tifozëve për bileta fizike, ndërkohë, vazhdon edhe shitja online e biletave në ebileta.al në këtë link .

The post Shqipëri – Letoni/ Nga sot dalin në shitje biletat fizike pranë stadiumit “Air Albania” first appeared on JavaNews.al.

Fëmijët që ekspozohen ndaj acetaminofenit, i cili gjendet në medikamentet si paracetamoli apo Tylenol, mund të kenë më shumë gjasa që të pësojnë çrregullime gjatë zhvillimit të sistemit të tyre nervor, si autizmi apo ADHD-ja (çrregullim me deficit të vëmendjes ose hiperaktivitet).

Studimi i Shkollës së Harvardit për Shëndetin Publik dhe Mount Sinai dhe autorë nga institucione të ndryshme, analizoi të dhënat nga më shumë se 100 mijë njerëz. Autori kryesor është dekani i fakultetit të Harvardit, i cili është po ashtu një profesor për lëndën e shëndetit mjedisor.

Studiuesit analizuan rezultatet e 46 studimeve të mëparshme me këta pacientë për të zbuluar lidhjen e mundshme midis përdorimit të acetaminophenit para lindjes dhe çrregullimet neurozhvillimore te fëmijët pas lindjes. Ekipet identifikuan se kur ishte përdorur paracetamoli – në tremujorin e parë, dytë ose tretë – apo gjatë gjithë shtatzënisë, duke bërë më pas lidhjen me dosjen mjekësore të nënave.

Paracetamoli është medikament që mjekët e japin për ethet e dhimbjet gjatë shtatzënisë, por mund t’i dëmtojë fëmijët dhe duhet përdorur rrallë, theksuan studiuesit.

“Duke qenë se ky medikament përdoret gjerësisht, edhe një rritje sado e vogël e rrezikut mund të ketë ndikim të madh në shëndetin publik. Rekomandojmë përdorim me masë të acetaminofenit, dozën më të vogël efektive në një kohëzgjatje sa më të shkurtër, sipas udhëzimeve të mjekut, në bazë të vlerësimeve individuale për rreziqet dhe favoret që mund të sjellë, dhe jo të kufizohet fare,” thonë studiuesit, duke shtuar se dhimbjet dhe ethet e patrajtuara po ashtu mund ta dëmtojnë beben.

Studimi këshillon që mjekët të rekomandojnë edhe mjekime që nuk përfshijnë përdorimin e lëndëve kimike mjekësore.

Vitin e kaluar, paracetamoli ishte në fokusin e një tjetër studimi në Univesitetin e Notingamit, që nxori se përdorimi i paracetamolit mund të sillte një rritje me 24 për qind deri në 36 për qind të rrezikut nga ulçera në stomak ose gjakosje në zorrë. Marrja e medikamentit po ashtu mund të rrisë rrezikun nga sëmundjet kronike të veshkave me 19 për qind, sëmundjet e zemrës me 9 për qind, dhe hipertensionin me 7 për qind. /Harvard, NDTV

The post Studimi: Përdorimi i paracetamolit gjatë shtatzënisë mund të rrisë rrezikun e autizmit, ADHD first appeared on JavaNews.al.

Kancelari gjerman Friedrich Merz ka nxitur të rinjtë që të mos mbështeten vetëm tek pensionet shtetërore, por të investojnë rregullisht shuma të vogla në tregun e aksioneve, një nismë që ka nxitur reagime të ashpra nga sindikatat. Sindikata e fuqishme IG Metall e ka quajtur këtë qasje “të ndarë nga realiteti dhe të rrezikshme”, duke kërkuar përforcimin e sistemit publik të pensioneve.

Sistemi publik gjerman i pensioneve, themeluar nga Otto von Bismarck në 1889, po përballet me sfida të mëdha për shkak të plakjes dhe zvogëlimit të fuqisë punëtore: Deri në vitin 2036, 19.5 milionë gjermanë do të jenë pensionuar, ndërsa vetëm 12.5 milionë punonjës të rinj do t’i bashkohen tregut të punës.

Qeveria aktuale synon të inkurajojë kursimet private të pensioneve përmes llogarive individuale me bazë kapitali, duke nisur një subvencion të ri prej 10 eurosh në muaj për fëmijët nga 6 deri në 18 vjeç, që do të investohen në një plan aksionesh dhe do të mbahen deri në moshën e pensionit. Ekspertët paralajmërojnë se efekti real ekonomik mund të jetë modest, por qëllimi është ndryshimi i sjelljes financiare të familjeve dhe të rinjve për të rritur ndërgjegjësimin për investimet.

Për shumë gjermanë, investimet në aksione mbeten të panjohura: Vetëm 17% e popullsisë posedon aksione ose fonde investimi, krahasuar me 39% në Mbretërinë e Bashkuar dhe 62% në SHBA. Sipas profesorëve të financave, përfitimet më të mëdha priten nga përvoja praktike dhe kultura e kursimeve të kapitalit, jo vetëm nga subvencionet simbolike.

Historikisht, tentativat për të promovuar pensionet private kanë dështuar. Shembuj janë produktet si Riester Pension, të cilat shpesh kanë rezultuar të shtrenjta dhe me kthime të ulëta. Merz dhe këshilltarët e tij shpresojnë që nisma e re, duke filluar nga një investim i vogël mujor prej 10 eurosh, mund të krijojë një efekt afatgjatë duke nxitur të rinjtë të investojnë më shumë dhe të ndërgjegjësojnë familjet për sigurinë financiare në të ardhmen.

Sipas llogaritjeve, me një kthim mesatar vjetor prej 7%, një investim prej 10 eurosh në muaj për fëmijët mund të rritet në rreth 65,000 euro në 50 vjet, megjithëse inflacioni mund të zvogëlojë vlerën reale. Megjithatë, ekspertët theksojnë se përfitimet më të mëdha janë psikologjike dhe kulturore, duke ndikuar tek mënyra se si gjermanët menaxhojnë kursimet dhe investimet gjatë dekadave të ardhshme.

The post Gjermania ndeshet me krizën e pensioneve: A mund ta ndryshojnë 10 euro në muaj mënyrën si investojnë njerëzit? first appeared on JavaNews.al.

Artur Zheji, gazetari dhe analisti i njohur, ndërroi jetë më 23 gusht 2025, në moshën 64-vjeçare, pas një arresti kardiak teksa ndodhej në Sarandë me familjen e tij. Ngjarja ndodhi në një restorant në rrugën “Butrinti”, ku Zheji po festonte ditëlindjen e djalit të tij. Pavarësisht ndihmës së shpejtë mjekësore, ai nuk arriti të mbijetojë.

Disa kohë më parë Zheji kreu një ndërhyrje në Gjermani.

“E vërteta është se, këto dy tre muajt e fundit, u kujdesa për shëndetin, më me vëmendje se më parë, pasi bëra një ndërhyrje kirurgjikale të lehtë dhe të shpejtë, në Gjermaninë e bekuar nga Zoti” – tha ai pas ndërhyrjes, në një intervistë në media.

Vetëm disa muaj më parë, më 22 maj 2025, Artan Lame, ish-drejtor i Agjencisë së Kadastrës dhe një figurë e njohur në fushën e trashëgimisë kulturore shqiptare, ndërroi jetë në moshën 58-vjeçare.

Edhe Lame kreu ndërhyrje në zemër në Mynih, Gjermani. Ai vdiq pikërisht aty pas ndërhyrjes. Lame kishte vuajtur prej vitesh nga probleme kardiake dhe humbi jetën pas daljes nga gjendja e komës.

Sistemi shëndetësor gjerman është ndër më të avancuarit në botë dhe ka standarde shumë të rrepta profesionale dhe etike. Me sa kuptohet nga këto raste, ndërlikimet pas ndërhyrjeve kirurgjikale ndodhin, edhe kur trajtimi është i nivelit të lartë.

Zemra është një organ delikat, dhe pas një operacioni – sidomos në moshë të mesme apo të shtyrë – çdo trup reagon ndryshe.

Këto dy humbje të njëpasnjëshme janë kujtesë mbi rëndësinë e kujdesit shëndetësor, veçanërisht për personat me histori të problemeve kardiake. Pra ndërhyrjet kirurgjikale, edhe kur kryhen në qendra të avancuara mjekësore si Gjermania, mbartin rreziqe, veçanërisht për pacientët me sëmundje kronike.

Dita

The post Një rastësi e trishtë: Edhe Lame, edhe Zheji kryen ndërhyrje në një nga qendrat më të avancuara në botë, por… first appeared on JavaNews.al.

“Bota ka ndryshuar që kur presidenti i Shteteve të Bashkuara vendosi të imponojë ligjin e më të fortit. Mënyra e vetme që ne evropianët të reagojmë është të promovojmë zbatimin e projektit federal, dhe nuk mund të jemi pesimistë për këtë qëllim”.

Kështu ka deklaruar ish-presidenti i Bankës Qendrore Evropiane, Jean-Claude Trichet, i cili shpreh shqetësim për dobësinë politike të Bashkimit Evropian përballë sfidave globale. Në një analizë të fundit, ekonomisti francez dhe paraardhësi i Mario Draghi-t në Bankën Qendrore evropiane, thekson nevojën urgjente për thellimin e integrimit evropian dhe ndërtimin e një federate të vërtetë politike.

Ashtu si Draghi, “me të cilin ndaj përfundimet e raportit, besoj se Evropa duhet të ecë përpara në procesin e integrimit”.

Ai shton se Evropa ndodhet mes dy forcave destabilizuese: “Kemi një autokrat agresiv rus dhe një president amerikan që dëshiron të na braktisë në fatin tonë, megjithatë besoj se pikërisht nga bashkimi i këtyre dy forcave negative do të lindë vendosmëria e Evropës për të realizuar gradualisht projektin e saj afatgjatë, i cili duhet të jetë ai i një federate të vërtetë politike. Do t’ia dalim”.

INTERVISTA

Ekonomia është paralizuar nga zgjedhjet e Trump-it. Presidenti i Fed-it, Jerome Powell, dha miratimin për një ulje të parë të normave të interesit: A është ky fillimi i një trendi?

“Le të shohim anët pozitive: Powell ka riafirmuar pavarësinë e bankave qendrore duke rezistuar ndaj sulmeve verbale të paprecedenta nga administrata amerikane. Dhe ky është thelbi. Tani ai mendon, duke u bazuar vetëm në të dhëna, veçanërisht ato negative për punësimin që dolën menjëherë pas mbledhjes së fundit të Fed-it, se ka ardhur momenti për një ulje të moderuar të normave në mbledhjen e ardhshme të shtatorit. E kam vlerësuar shumë faktin që Powell konfirmoi synimin për të mbajtur pritshmëritë për inflacionin të ankoruara fort rreth 2% në afat të mesëm. BQE është në të njëjtën linjë. Në mënyrë të qëndrueshme, zhvillimet e ardhshme të politikës monetare do të varen nga të dhëna të reja, të cilat mbeten kryesisht të paparashikueshme për shkak të ndikimit të ardhshëm të vendimeve të administratës aktuale amerikane për tarifat doganore, emigracionin dhe politikën buxhetore”.

Por si mund të mbrohet Evropa nëse aleati historik i kthehet kundër?

“Strategjia e vetme e mundshme është të përshpejtojmë ndërtimin e projektit federal. Ekonomia është thelbësore. Duhet të përfundojmë shpejt tregun unik për bankat dhe kapitalet: BE-ja është një xhuxh financiar krahasuar me Shtetet e Bashkuara dhe Kinën. Nevojitet një treg i vetëm për platformat dixhitale, telekomunikacionin, industrinë e armëve, energjinë dhe sektorë të tjerë. Vetëm me një bashkim të vërtetë mund të financohen investimet që nuk mund të shtyhen më. Tregu unik nuk mjafton, këtë e kemi parë qartë në diskutimet tregtare: partneri amerikan përfiton sidomos nga diplomacia e tij e unifikuar, mbrojtja unike, ekzekutivi i unifikuar. Në të gjitha negociatat, jo vetëm me Shtetet e Bashkuara, “tavani ynë i xhamtë” është se ende nuk jemi bërë një federatë e plotë”.

Në veçanti, për unionin bankar, a do të mjaftonte zgjidhja e pengesës për sigurimin e kursimeve të depozituesve?

“Jo, për fat të keq kjo është e nevojshme, por jo e mjaftueshme. Dhe kjo është e pashpjegueshme kur mendon se në disa sektorë industrialë ia kemi dalë: Airbus ka të njëjtën peshë me Boeing në aviacionin civil, në industrinë e makinave janë realizuar bashkime gjigante. Në financë, përkundrazi, pengesat duken të pakapërcyeshme. Mund të projektojmë zgjidhjet teknike më të sofistikuara për të përfunduar unionin, dhe është absolutisht e nevojshme ta bëjmë këtë, por gjithmonë do të na duhet të kapërcejmë paragjykimet kombëtare, mungesën e besimit të ndërsjellë, rezistencat ndaj bashkimeve që mund të krijonin më në fund grupe evropiane mjaftueshëm të mëdha për të përballuar gjigantët amerikanë dhe kinezë. Përndryshe, do të jemi të dënuar përjetësisht të përjashtohemi nga gara botërore që po zhvillohet mes dy blloqeve të mëdha, Uashingtonit dhe Pekinit. Pika jonë e dobët është që nuk jemi një federatë”.

Realisht, sa shpresa duhet të kemi?

“Nuk jam naiv. Rruga drejt një federate të vërtetë është politikisht e vështirë në të gjitha vendet tona dhe do të jetë e gjatë. Por nuk besoj se Evropa mund të pranojë përgjithmonë të jetë një xhuxh politik që thjesht vështron pasivisht negociatat mes gjigantëve – sot amerikanë, kinezë dhe rusë, nesër India, Pakistani, Brazili, Indonezia e me radhë, të gjitha federata politike. Situata aktuale, në të cilën Evropa neglizhohet nga Shtetet e Bashkuara në negociatat tregtare, përjashtohet nga negociatat për Ukrainën dhe nuk ka rol në Lindjen e Mesme, nuk mund të zgjasë përjetësisht”./tvklan.al

Marrë nga “La Repubblica“

The post Edhe Jean-Claude Trichet i alarmuar si Draghi: BE është një xhuxhe mes SHBA dhe Kinës first appeared on JavaNews.al.

Ka rënë në prangat e Policisë autori i aksidentit trafgjik që u mori jetën natën e mbremshme motrave Elvisa dhe Rozina Dhimaku.

Burime nga blutë bëjnë me dije se Kevi Norra, 23 vjeç, ka qenë në drejtimin e mjetit tip Audi në gjendje të dehur dhe duke parakaluar gabimisht. Ky ka qenë edhe momenti kur Norra ka përplasur automjetin Lancia ku ndodheshin motrat Dhimaku, nga Delvina.

Nga aksidenti i rëndë ka mbetur e plagosur edhe Antonela Zhupa teksa ajo ndodhej në mjetin e motrave Dhimaku.

Aksidenti u regjistrua të dielën rreth orës 20:15 të mbrëmjes në vendin e quajtur “Pularia”. Në vendin e aksidentit shkuan forca të shumta policie, ambulanca dhe zjarrfikëse, të cilat kanë ndërhyrë për nxjerrjen e trupave dhe për ndihmën e të plagosurit.

The post I dehur në timon dhe në parakalim, arrestohet 23-vjeçari që vrau me makinë dy motrat nga Delvina first appeared on JavaNews.al.

Kur na ndajnë edhe dy javë nga nisja e vitit të ri shkollor, ka nisur sot në të gjithë vendin shpërndarja e librave shkollorë falas. Lajmin e ka ndarë në rrjetet sociale, kryeministri Edi Rama, sipas të cilit 236 mijë nxënës do të përfitojnë libra falas. Kreu i qeverisë thekson se kjo është mbështetje e përvitshme e Qeverisë për fëmijët dhe familjet e tyre në prag të vitit të ri shkollor.

“Mirëmëngjes dhe me nisjen sot të shpërndarjes së librave shkollorë falas për 236 mijë nxënës në të gjithë vendin, një mbështetje e përvitshme e Qeverisë për fëmijët dhe familjet e tyre në prag të vitit të ri shkollor, ju uroj një javë të mbarë”, shkruan Rama, përcjell A2 CNN.

Shpërndarja e librave do të vazhdojë sipas një grafiku të caktuar në koordinim me mësuesit dhe prindërit, duke siguruar që të gjithë nxënësit të marrin tekstet e tyre në kohë.

Kujtojmë se mësimi në të gjitha shkollat e arsimit parauniversitar në vend, qofshin këto publike apo private, do të nisë zyrtarisht në datën 8 shtator. Për secilin cikël të arsimit parauniversitar është detajuar struktura e plotë e vitit të ri shkollor, me periudhat në të cilat do të zhvillohet mësim, periudhat e pushimeve, si dhe afatet kur do të zhvillohen provimet kombëtare.

Sa i takon arsimit bazë, bëhet e ditur së viti shkollor do të nisë në datën 8 shtator të vitit 2025, për të përfunduar më 12 qershor të vitit të ardhshëm. Nxënësit e arsimit të detyruar 9-vjeçar do të kenë dy periudha pushimesh. Periudha e parë e pushimeve do të jetë në fundvit, ndërsa përudha e dytë do të jetë në javën e parë të muajit prill.

The post Nis shpërndarja e librave, Rama: Falas për 236 mijë nxënës në të gjithë vendin first appeared on JavaNews.al.

Charles Kushner, ambasadori i ri i Shteteve të Bashkuara në Francë, ka thyer heshtjen që nga mbërritja e tij në Paris në fillim të korrikut. E para e tij nismë publike ka potencialin të tensionojë marrëdhëniet mes presidentit francez Emmanuel Macron dhe presidentit amerikan Donald Trump.

Në një letër të datës 25 gusht, e publikuar nga mediat më 24 gusht, Kushner, paralajmëron Macron për rritjen shqetësuese të antisemitizmit në Francë.

“Shkruaj me shqetësim të thellë për rritjen dramatike të antisemitizmit dhe mungesën e veprimeve të mjaftueshme nga qeveria juaj,” thekson Kushner.

Letra vjen pak ditë pas një paralajmërimi të ngjashëm nga kryeministri izraelit Benjamin Netanyahu, i cili kritikoi planet e Francës për të njohur Shtetin e Palestinës në Asamblenë e Përgjithshme të OKB-së. Netanyahu tha se mbështetja për Palestinën “frymëzon urrejtjen ndaj hebrenjve dhe fuqizon Hamasin”.

Kushner është në të njëjtin mendim me Netanyahu-n. Ai thekson se deklaratat publike kundër Izraelit dhe hapja për njohjen e shtetit palestinez “inspirojnë ekstremistët, ushqejnë dhunën dhe rrezikojnë jetën e hebrenjve në Francë”. Ambasadori amerikan nënvizon se “Presidenti Trump dhe ai kanë fëmijë hebrenj dhe nipër hebrenj. E di se si ndihet për antisemitizmin, ashtu si të gjithë amerikanët.”

Kushner, i jep sugjerime të qarta Presidentit Macron: zbatimi i ligjeve kundër urrejtjes, siguria e shkollave, sinagogave dhe bizneseve hebreje, ndëshkimi i sulmuesve dhe heqja e çdo hapësire që i jep legjitimitet Hamasit!

Kjo lëvizje, dhe tonet e letrës, reflektojnë qëndrimin e administratës Trump kundër planeve franceze për njohjen e Shtetit të Palestinës, në një kohë kur diplomacia franceze synon të marrë mbështetjen edhe të vendeve si Mbretëria e Bashkuar, Kanadaja dhe Australia.

The post Kushner paralajmëron Macron, letra që mund të tensionojë raportet SHBA-Francë first appeared on JavaNews.al.

Detaje të reja për vrasjen makabër në Volos të Greqisë, ndodhur paraditen e 22 gushtit.

Siç shkruan Protothema, motra e 36 vjeçares shqiptare që u vra nga bashkëshorti i saj ka folur për dhunën që viktima përjetonte në mënyrë të vazhdueshme. Ajo ka rrëfyer se 40 vjeçari e kishte përdhunuar për ta lënë shtatzënë, një mënyrë kjo për ta pasur nën kontroll.

“Shkonte dhe bënte abort shpesh, po ai e kërcënonte. I thoshte nëse më lë, do të të bëj akoma më keq…”, ka treguar motra e viktimës.

Sipas saj, çifti janë njohur që në moshë të re, por sjellja e burrit ka ndryshuar drastikisht pas lindjes së fëmijëve.

“Kur bënë fëmijët, ai ndryshoi. E rrihte”, ka thënë motra e 36 vjeçares për mediat greke.

Mësohet se familja e së ndjerës kishte dijeni për dhunën, por nuk e denoncoi kurrë te autoritetet.

“Shumë vite nuk folëm dhe ky është faji ynë. I thosha motrës të ndahej, por ajo kishte frikë. Bëra çfarë munda për ta ndihmuar, edhe me para, por ajo nuk mund të përballonte situatën”, është shprehur e motra, duke shtuar se 36 vjeçarja e ka përjetuar shpesh dhunën në sy të fëmijëve.

Mediat greke raportojnë se 40 vjeçari ka dhënë një deklaratë të detajuar para autoriteteve pas arrestimit të tij. Sipas thenewspaper.gr, i akuzuari, i ka treguar policisë veprimet e tij vetëm pak orë pas arrestimit.

“Ajo më bërtiste se e kisha tradhtuar, atëherë e humba fillin dhe fillova ta ndjek. Pas vrasjes, endesha rrugëve. Sa herë shihja një patrullë, fshihesha. Natën e kalova në një parking të vjetër, pa ushqim, vetëm me pak ujë që gjeta në një shishe“, ka rrëfyer ai.

Sipas hetuesve, 40-vjeçari kishte xhelozi patologjike ndaj gruas së tij, duke e përshkruar si një person “mizor dhe të pamëshirshëm”, ndërsa nuk janë gjetur shenja të çrregullimit psikologjik.

The post “Ai e përdhunoi, e la shtatzënë që të mos divorcoheshin”/ Detaje makabre nga vrasja në Volos first appeared on JavaNews.al.

Më shumë se 10 mijë njerëz morën pjesë në një demonstratë pro-palestineze në Kopenhagen, duke bërë thirrje për t’i dhënë fund luftës në Gaza dhe duke i kërkuar Danimarkës të njohë shtetin e Palestinës.

Rreth 100 organizata, përfshirë Oxfam, Greenpeace dhe Amnesty International, morën pjesë në marshim, së bashku me sindikata, parti politike, kolektiva arti dhe aktivistë, përfshirë Greta Thunberg.

Midis protestuesve ishin shumë familje me fëmijë të vegjël, flamuj dhe banderola me mbishkrimet “Ndaloni shitjen e armëve”, “Çlironi Palestinën” dhe “Danimarka i thotë jo gjenocidit”.

Një mbështetëse tradicionale e Izraelit, Danimarka ka thënë se synon të përdorë presidencën e saj aktuale të Bashkimit Evropian për të rritur presionin mbi qeverinë izraelite për t’i dhënë fund luftës në Gaza.

Megjithatë, Danimarka ka deklaruar se nuk ka ndërmend të njohë një shtet palestinez në të ardhmen e afërt.

“Ata që janë në pushtet nuk po e ndalojnë gjenocidin, kështu që është edhe më e rëndësishme të dalim dhe të protestojmë dhe t’u tregojmë të gjithë udhëheqësve se nuk jemi dakord”, tha një protestues për AFP-në.

Po kështu dhjetëra mijëra australianë janë mbledhur në më shumë se 40 qytete anembanë Australisë për të protestuar kundër luftës së vazhdueshme të Izraelit në Gaza dhe për të bërë thirrje për sanksione ndaj Tel Avivit.

Organizatorët nga Grupi i Veprimit për Palestinën thanë se demonstratat kishin për qëllim të ushtronin presion mbi qeverinë federale për të sanksionuar Izraelin dhe për të vendosur një embargo armësh.

Sipas tyre pjesëmarrja në protesta ishte në rreth 40,000 njerëz në Sydney, 50,000 ose 60,000 në Melbourne, 10,000 në Hobart, mijëra në Perth dhe rreth 50,000 në Brisbane, dhe gjetkë”.

Senatorja e të Gjelbërve, Larissa Ëaters, tha se qeveria “do ta ndiejë presionin” dhe duartrokiti pjesëmarrjen e lartë, duke bërë thirrje për sanksione kundër Izraelit “ashtu siç bëmë me Rusinë”. “Ka kaq shumë njerëz këtu që bëjnë thirrje për paqe, bëjnë thirrje për sanksione kundër Izraelit ashtu siç bëmë me Rusinë dhe bëjnë thirrje për t’i dhënë fund tregtisë dypalëshe të armëve”, tha ajo në tubimin e Brisbane.

“Australianët janë të tmerruar që po i shesim pjesë armësh qeverisë izraelite. Kjo duhet të ndalet”, shtoi ajo.

The post Dhjetëra mijëra protestues pro Gazës në 40 qytete australiane dhe Danimarkë first appeared on JavaNews.al.

Partizani nisi me fitore sezonin e ri te Kategorisë Superiore duke mundur debutuesit e Vorës me rezultatin minimal 1-0. Të kuqtë zhvilluan një ndeshje në sulm që nga minuta e parë, dhe përfituan nga një autogol i shpejtë i Repajt, i cili vendosi ritmin e takimit dhe i dha avantazhin ekipit mikpritës.

Megjithatë, Vora nuk u tërhoq dhe reagoi me disa sulme të rrezikshme, ku Kasalla dhe Luis Felipe patën mundësi për të barazuar, por nuk arritën të konkretizonin rastet. Pjesa e parë dhe e dytë u karakterizuan nga ndërhyrje të forta dhe disa kartonë të verdhë, duke bërë ndeshjen më të tensionuar, shkruan A2 CNN.

Incidenti më i diskutueshëm erdhi në minutat e fundit, kur gjyqtarja Emanuela Rusta tregoi dy herë kartonin e verdhë për lojtarin Shanaj, por harroi ta nxirrte nga fusha me të kuq.

Të shtunën u luajtën takimet Bylis-Tirana 0-0 dhe Elbasani-Flamurtari 1-0. Ndërsa të premten, kampionët në fuqi të Egnatias, u mundën nga Vllaznia 2-0 në Shkodër.

Ndeshja e fundit e javës së parë, Teuta-Dinamo, është programuar për t’u zhvilluar më 5 shtator, për shkak të impenjimit të bluve në Conference League.

The post Partizani fiton minimalisht ndaj Vorës, polemika me gjyqtaren Rusta first appeared on JavaNews.al.

Një ngjarje e rëndë dhe tronditëse ka ndodhur mbrëmjen e djeshme në fshatin Çukë të Sarandës, ku një vajzë e mitur, vetëm 15 vjeçe, është gjetur e vetëvarur në banesën e të afërmve të saj.

E mitura kishte ardhur nga Tirana për pushime pranë familjarëve.

Trupi i saj është transportuar në morgun e Sarandës.

Policia ka nisur hetimet për të zbuluar rrethanat e plota të kësaj ngjarjeje tragjike.

The post E rëndë në Sarandë! 15-vjeçarja i jep fund jetës në banesë, ishte për pushime first appeared on JavaNews.al.

Nga Adrian Thano

Vdekja e papritur e Artur Zhejit është një nga ato lajme që të ndal frymën për një çast. Jo thjesht sepse u shua një njeri i njohur në botën e medias, por sepse u shua dikush që ishte aktiv, i pranishëm, që shkruante, fliste, debatonte deri dje, dhe sot nuk është më.

Nuk kisha miqësi personale me të, dhe shpesh nuk ndaja të njëjtat bindje, por ndjej detyrim ta them sot që vdekja është kufiri i madh që na barazon të gjithëve. Dhe ndoshta pikërisht për këtë duhet të mësojmë të jemi pak më të kujdesshëm me njëri-tjetrin sa jemi gjallë.

Shoqëria shqiptare është e ashpërsuar, e përçarë, e lodhur. Media është kthyer në një ring, rrjetet sociale në një fushë gjykimi pa mëshirë. Ky trishtim që na vjen nga largimi i një figure si Zheji, duhet të na shërbejë si kujtesë kolektive: nuk ia vlen të shahemi kaq rëndë përditë, nuk ia vlen të hedhim kaq shumë baltë. Të mos harrojmë se secili nga ne sot është, nesër nuk është.

Gazetarë, analistë, qytetarë të thjeshtë, politikanë – jemi të gjithë të njëjtë përballë kësaj të panjohure që na pret. Jeta është e brishtë dhe e përkohshme. Tepër e shkurtër për t’u shpenzuar në kaq shumë përbuzje.

E ndjej këtë boshllëk e këtë thirrje edhe më shumë, sepse gjatë këtyre viteve kam humbur shumë bashkëpunëtorë të çmuar të gazetës DITA – njerëz me mendim të thellë, penë të rrallë dhe shpirt qytetar si Moikom Zeqo, Arben Duka, Shaban Murati. Secili prej tyre la gjurmë të forta, jo vetëm në faqe gazetash, por në vetë ndërgjegjen publike. Me ikjen e tyre, u zbeh një dritë që ndriçonte debatin, kulturën, po edhe shpirtin kritik të kësaj shoqërie.

Këto mungesa dhe së fundmi Zheji më kujtojnë sa të përkohshëm jemi të gjithë. Dhe sa shumë kemi nevojë të jemi më të butë, më falës, më pranues ndaj njëri-tjetrit. Një ditë nuk do na mbetet gjë më e vlefshme sesa mënyra si jemi sjellë me njerëzit përreth nesh.

Pak më shumë ndjeshmëri, më pak arrogancë, më shumë mirëkuptim dhe ndalim të gjykimit të nxitimshëm do t’i bënte veç mirë një shoqërie si e jona, ku shpesh dominon polarizimi, përçmimi, cinizmi dhe përçarja.

Ndërkohë, ka edhe një arsye më shumë për ne shqiptarët që të përpiqemi të kemi pak më shumë njerëzillëk me njëri-tjetrin. E dimë të gjithë – jashtë nesh, e rrotull nesh, nuk është se na duan shumë. Historia jonë, pozicioni ynë, paragjykimet që përballim – të gjitha këto na bëjnë shpesh të ndjehemi të vetmuar si popull. Nuk na duan, po ne nuk duam as veten. Kjo është e rëndë për t’u mbajtur kaq gjatë. A e kemi luksin të jemi kaq armiq me veten? Nuk po flas për virtyt apo dashuri nëse jeni velur me këto fjalë, por së paku për mbrojtje.

Sot, me respekt për kujtimin e Zhejit, e ndjej të nevojshme këtë thirrje të heshtur për më shumë mirësi. Ky është ndoshta, nderi më i madh që mund t’u bëjmë edhe të ikurve tanë.

The post Për Artur Zhejin (dhe për ne që jemi ende këtu) first appeared on JavaNews.al.

Ditën e sotme (25 gusht) vendi ynë do të ndikohet nga kushte atmosferike të qëndrueshme.

Moti parashikohet i kthjellët në të gjithë territorin ndërsa nga orët e mesditës deri ato të pasdites alternime vranësirash kalimtare të pakta deri mesatare në relievet malore në lindje. Sipas SHMU-së, vranësirat në këto relieve do të shoqërohen me reshje shiu të herëpashershme dhe të dobëta ndërsa në relievet e larta malore në formën e shtrëngatave afatshkurtra. Pas orëve të pasdites mot përsëri i kthjellët në të gjithë territorin.

Era do të fryjë me drejtim veriperëndim – verilindje me shpejtësi mesatare 7 m/s, ndërsa në zonat luginore dhe përgjatë vijës bregdetare hera-herës do të fitojë shpejtësi 12 m/s.  Deti do të jetë me valëzim të forcës 1-2 ballë.

The post Dita e sotme me diell dhe vranësira kalimtare, temperaturat mbeten të pandryshuara first appeared on JavaNews.al.

Dy jetë të reja u shuan në një aksident fatal mbrëmjen e djeshme, ndërsa një tjetër vajzë mbeti e plagosur.

Ky është bilanci i rëndë i një aksidenti që iu mori jetën dy motrave nga fshati Kopaçëz i Delvinës mbrëmjen e të dielës.

Ela Dhimaku 22 vjeçe ishte drejtuesja e mjetit tip Lancia që u përplas me një automjet tip ‘Audi’ të drejtuar nga 23-vjeçari Kevi Norra, ndërsa motra e saj Rezi Dhimaku 20 vjeçe ishte pasagjere.

Në mjet bashkë me dy motrat që morën plagë fatale nga përplasja udhëtonte edhe një vajzë tjetër, Antonela Zhupa 24 vjeçe rezulton e plagosur dhe është transportuar me urgjencë drejt Tiranës.

Aksidenti i rëndë u regjistrua rreth orës 20:15 të mbrëmjes në vendin e quajtur “Pularia”. Në vendin e aksidentit shkuan forca të shumta policie, ambulanca dhe zjarrfikëse, të cilat kanë ndërhyrë për nxjerrjen e trupave dhe për ndihmën e të plagosurit. Rrethanat e aksidentit mbeten ende të paqarta.

The post Kush janë dy motrat që u shuan në Sarandë-Delvinë. Dalin pamjet e aksidentit të tmerrshëm first appeared on JavaNews.al.

Një aksident i rëndë ka ndodhur sot në aksin rrugor Sarandë–Delvinë, në vendin e quajtur “Pularia”, ku për pasojë kanë humbur jetën dy vajza të reja nga fshati Kopaçezë, njësia administrative Delvinë. Ngjarja e rëndë ka tronditur zonën, ndërsa viktimat janë identifikuar nga autoritetet, por emrat nuk janë bërë ende publikë.

Burime nga vendngjarja bëjnë me dije se një person tjetër ka mbetur i plagosur rëndë dhe është transportuar me urgjencë në spitalin e Sarandës, ku ndodhet në kujdesin e mjekëve.

Në vendin e aksidentit kanë mbërritur forca të shumta policie, ambulanca dhe zjarrfikësja, të cilat kanë ndërhyrë për nxjerrjen e trupave dhe për ndihmën e të plagosurit.

Rrethanat e ngjarjes mbeten ende të paqarta. Paraprakisht dyshohet se mjeti ka dalë nga rruga për shkaqe që janë ende në hetim.

The post Aksident tragjik në Sarandë–Delvinë, humbin jetën dy vajza, një i plagosur rëndë first appeared on JavaNews.al.