Në Elbasan është çelur sezoni artistik veror me koncertin “Virtuozët”, një aktivitet që solli në skenë instrumentistë të talentuar të qytetit dhe vepra nga kompozitorë të mëdhenj botërorë.

Koncertet u mbajtën në Muzeun Etnografik dhe në Galerinë e Artit, brenda Kullës së Kalasë, duke sjellë një përvojë unike ku arti dhe trashëgimia kulturore ndërthuren. Drejtori i Qendrës së Artit, Klinton Kapaj, thotë se ky aktivitet synon promovimin e artistëve të rinj në bashkëpunim me profesionistët e skenës.

“Është një bashkëpunim i rëndesishëm me të gjithë talentet e qytetit në sektorin e muzikës Ddhe me shkollën e muzikës, për të bashkëvepruar dhe bashkërenduar gjithë këtë aktivitet të rëndësishëm që ne sot kishim. Bashkia Elbasan gjithmonë i mbështet dhe i përkrah talentet e qytetit dhe ndërthur në çdo aktivitet artistët me eksperiencë dhe talentet e reja”, tha Klinton Kapaj.

Aktiviteti artistik “Virtuozët” u ndoq me interes edhe nga turistë të huaj, të cilët u shprehën kuriozë për aktivitete të tilla.

“Është një mundësi e mirë të dëgjoj një nga violinistët më të mirë në Shqipëri. Është hera ime e dytë që jam këtu, por hera e parë që dëgjoj muzikë në këtë vend, kështu që do të jetë një eksperiencë ndryshe, dhe jam shumë e lumtur. Ky vend ka një akustikë shumë të mirë, ndaj dëgjimi i muzikës këtu do t’i japë asaj dimensione ëndërrimtare dhe do të jetë një eksperiment interesant”, theksoi një turiste.

Sezoni artistik veror në Elbasan sapo ka nisur, me aktivitete që zhvillohen në hapësira publike dhe në objekte të trashëgimisë kulturore, duke i dhuruar qytetit net të mbushura me art dhe emocion. m.p.

Barcelona duhet të sigurojë të ardhura këtë verë, me qëllim që të jetë në gjendje të regjistrojë transferimet e reja. Lojtari i vetëm i transferuar deri tani, Joan Garcia, edne nuk është regjistruar në La Liga.

Deri tani janë larguar Ansu Fati në huazim te Monaco, Pablo Torre u shit për 5 milionë euro te Mallorca, por klubi katalanas ka ende 50% të kartonit të tij, pritet të largohet edhe Ter Stegen.

Dy lojtarë të tjerë që janë në listën e largimeve të  drejtorit sportiv, Deco, janë edhe Ronald Araujo dhe Andreas Christensen. Sipas asaj që raporton AS, dy lojtarët nuk pranojnë të largohen nga Barcelona, madje janë rikthyer në stërvitje përpara afatit të vendosur nga klubi.

Përsa i përket mbrojtësit danez, kontrata e tij skadon vitin tjetër dhe drejtuesit katalanas duan ta largojnë që këtë verë, por deri tani nuk ka pasur asnjë ofertë konkrete për të.

Përsa i përket Ronald Araujo-s, kontrata e të cilit skadon në vitin 2031, drejtuesit e Barcelonës presin oferta mbi 60 milionë euro, por problemi kryesor është dëshira e lojtarit për të mos u larguar nga klubi katalanas. m.p.

Ministri i Jashtëm i Izraelit, Eli Cohen, ka dhënë një paralajmërim të drejtpërdrejtë ndaj Iranit lidhur me programin e tij bërthamor.

Në një intervistë për Top Channel, ai deklaroi se pengesat për një ndërhyrje ushtarake izraelite tashmë janë hequr dhe se në rast se Irani rifillon aktivitetet për zhvillimin e armëve bërthamore, Izraeli është i gatshëm të veprojë.

Eli Cohen theksoi se shteti izraelit po armatoset intensivisht për t’u përballur me çdo kërcënim potencial nga Teherani.

Duke folur gjithashtu për situatën në Rripin e Gazës, ai u shpreh se operacionet ushtarake në jug synojnë eliminimin përfundimtar të Hamasit.

Ministri shtoi se nëse Hamasi mposhtet, ekziston një plan i veçantë për të ardhmen e Rripit të Gazës dhe për stabilizimin e rajonit.

“Ne treguam aftësitë tona gjatë luftës 12-ditore. Nëse Irani vendos të rinisë programin e armëve bërthamore, ne do ta sulmojmë sërish. Të gjithë kanë frikë të sulmojnë Iranin, por ne jo.

Ne po armatosemi në mënyrë shumë serioze përballë programit bërthamor. Dhe në fakt, ne nuk po luftojmë vetëm për Izraelin, por për të gjithë botën e lirë. Hamas nuk do të qeverisë më në Gaza. Falë operacioneve tona, Nasrallah në Liban është neutralizuar dhe Assad u largua nga Siria. E njëjta gjë do të ndodhë në Gaza.

Eliminimi i Hamasit do t’i hapë rrugë një të ardhmeje ndryshe për banorët e Gazës, ku të drejtat e njeriut, demokracia dhe një ekonomi më e zhvilluar do të jenë të mundshme.”-tha Cohen. m.p.

Pronarët e dy farmacive në Korçë janë marrë nën hetim nga Policia nën dyshimin e kontrabandës së medikamenteve nga Greqia.

Kontrolli i ushtruar në mënyrë të befasishme nga autoritetet në ambientet e subjekteve të tyre, zbuloi sasi ilaçesh pa dokumentacion dhe të futura kontrabandë, ndërsa hetimet janë ende aktive.

Specialistët për Hetimin e Krimeve Ekonomike dhe Financiare konfirmuan se i referuan materialet në Prokurori, ku filloi procedimi penal për A. M., 28 vjeç, dhe L. Q., 43 vjeçe, banues në Korçë.

“Gjatë kontrollit të ushtruar në subjektet e tyre farmaci, që këta shtetas administronin, u gjetën dhe u sekuestruan, një sasi medikamentesh të dyshuara të futura kontrabandë nga Greqia”, bëri me dije policia vendore për detajet e para të këtij aksioni. m.p.

Zyrtari i Partisë Demokratike, Dorian Teliti zbuloi sot, sipas pretendimeve të tij, prapaskenat e aksionit të ndërmarrë nga IKMT, me urdhër të kryeministrit Edi Rama, për prishjen e objekteve të ndërtuara pa leje në Theth.

Sipas Telitit, me hyrjen në fuqi të “Paketës së maleve”, për të cilën u hapën sot zyrtarisht thirrjet për aplikime, Thethi do të përfundojë në duart e investitorëve strategjikë, ose oligarkëve të lidhur me qeverinë.

“Sot hyri në fuqi ‘Paketa e maleve’ dhe atje mesa duket në mendjen e qeveritarëve, të kryeministrit apo dikush tjetër do na dali tashmë me aplikim sipas ligjit të ri të ‘Paketës së Maleve’, ndonjë ose disa investitor strategjik, që do bëjnë zëvendësimin e këtyre godinave që u prishën tashmë, me godina të reja, më të bukura ndoshta nga ana e syrit, por ama është vetëm një zëvendësim dhe vendimmarrje e bazuar në interesa jo zhvillimore”, tha Teliti në “Off the Record” në A2 CNN.

I vendosur nga moderatori Andrea Danglli përballë konstatimit se banorët e Thethit janë pronarë të këtyre tokave prej shekujsh tashmë, Teliti sqaroi se kushdo që gëzon statusin e investitorit strategjik mund t’a marrë pronën përmes procedurave që përfshijnë shtetëzimin dhe kompensimin.

“Po aty do të ndërtohen, sepse ‘Paketa e Maleve’ bashkë me ligjin e investimeve strategjike e dinë shumë mirë këta që ta shpronëson. ‘Paketa e Maleve’ është e gërshetuar me ligjin e Investimeve Strategjike. Në momentin që vjen Investitori Strategjik me statusin e tij, të merr tokën tënde, të time, pronën e babës, prej tre shekujsh ta kesh ti edhe të stërgjyshit tënd. Ta merr, ta shtetëzon, të jep kompensimin dhe vazhdon puna. Koha do të flasë dhe fatkeqësisht koha na ka dhënë të drejtë”, shpjegoi Teliti. m.p.

59 deputetë laburistë i kanë bërë thirrje David Lammy-t, Sekretarit britaniku të Shtetit dhe Ministrisë së Jashtme që ta njohin menjëherë Palestinën si shtet.

Deputetë të qendrës dhe të krahut të majtë, përfshirë disa kryetarë komisionesh, i shkruan sekretarit të jashtëm këtë javë për të thënë se “duke mos e njohur [Palestinën] si shtet, ne minojmë politikën tonë të një zgjidhjeje me dy shtete dhe vendosim një pritje që status quo-ja të mund të vazhdojë dhe të shohë fshirjen dhe aneksimin efektiv të territorit palestinez”.

59 deputetët sugjerojnë që qeveria të ndjekë pesë masa të ndryshme për të parandaluar qeverinë izraelite nga zbatimi i planit të saj të Rafah, duke shtuar se ata besonin se Gaza po “pastrohej etnikisht” – një pretendim i mohuar me forcë nga Izraeli.

Letra u organizua nga Miqtë e Partisë Laburiste të Palestinës dhe grupi i Lindjes së Mesme. Aty thuhet se plani izraelit, i cili do të shihte “transferimin e popullsisë në skajin jugor të Gazës në përgatitje për deportim jashtë rripit”, është një përshkrim i saktë, por ata besojnë se një mënyrë më e qartë për ta përshkruar atë është “spastrimi etnik i Gazës”.

Zyrtarët izraelitë kanë thënë se duan të ndajnë popullsinë civile nga Hamasi, i cili ende kontrollon pjesë të Gazës dhe mban dhjetëra pengje të rrëmbyera në sulmin e 7 tetorit që shkaktoi luftën 21 muaj më parë.

Emmanuel Macron diskutoi njohjen e Palestinës si shtet në një konferencë të përbashkët për shtyp me Sir Keir Starmer të enjten, të njëjtën ditë që u nënshkrua letra. “Sot, të punojmë së bashku për të njohur shtetin e Palestinës dhe për të filluar këtë momentum politik është e vetmja rrugë drejt paqes”, u shpreh Macron.

Ndërsa Franca ende nuk e ka njohur një shtet palestinez, Norvegjia, Irlanda dhe Spanja e koordinuan njohjen e tyre vitin e kaluar. m.p.

Gazetari Basir Çollaku e sheh të rrezikshëm për turizmin në Shqipëri, precedentin e krijuar në fshatin turistik të Thethit, ku si pasojë e aksionit të shembjes së objekteve të ndërtuara pa leje nga ana e IKMT-së, ka pasur përplasje deri në hedhjen e molotovëve dhe nxjerrjen e armëve nga policia.

Çollaku deklaroi në A2 CNN, se kryeministri Edi Rama ka ngjallur frikë tek të huajt që vizitojnë vendin tonë, përmes këtij aksioni.

“Turistë të lemerisur dhe kujtojnë se kanë ngatërruar vend. Kanë prenotuar në Shqipëri dhe janë në një zonë lufte. Ne flasim për një vend ku ekziston ligji dhe shteti, jo në një vend ku ekziston individi dhe çdo gjë tjetër është derivat, i veprimeve, orekseve dhe mesazheve të tij. Këtu kjo lloj dhune që rrezikon ytë agravojë, nuk e di çfarë imazhi mund të kemi kur policë me automatik i drejtohen banorëve shqiptarë sigurisht”.

“Turistë të lemerisur dhe kujtojnë se kanë ngatërruar vend, kanë prenotuar në Shqipërinë dhe kujtojnë se janë në një zonë lufte. Jo vetëm në Theth por unë besoj se kjo do të jetë një goditje për turizmin në të gjithë Shqipërinë, sipas humorit mëngjesor të kryeministrit, i cili është i pashëndetshëm edhe në periudhën paszgjedhore me rezultatin e tij euforik, sepse ka të tjera ekuilibra, të tjera ngjarje, të tjera dosje të rëndësishme, ku ortakë të tij qeveritar, të kabinetit të ministrave, deputetë, kryebashkiakë, janë atje dhe janë në prag hekurash”, u shpreh Çollaku.

Parlamenti i Gjermanisë (Bundestagu) mbajti një seancë përkujtimore për 30-vjetorin e masakrës së Srebrenicës, ku u vranë mbi 8.000 boshnjakë në korrik të vitit 1995.

Në seancë morën pjesë deputetë, dy të mbijetuar të gjenocidit dhe ambasadorë të Bosnjë-Hercegovinës dhe Kosovës. Deputetët e Bundestagut e dënuan ashpër qasjen e Serbisë ndaj luftërave të përgjakshme në ish-Jugosllavi. Michael Brand, deputet i CDU-së, theksoi se Serbia e mbështetur nga Rusia ka udhëhequr luftëra që nga viti 1991.

Ai e quajti presidentin serb Vuçiç trashëgimtar të politikave të Millosheviçit dhe e akuzoi për lidhje me Putinin. Jasmina Hostert, një deputete e lindur në Sarajevë dhe e plagosur në luftë, mbajti një fjalim të ndjerë për dhimbjen dhe rëndësinë e përballjes me të kaluarën.

Gjatë seancës, një deputet i AFD-së relativizoi gjenocidin, çka u kundërshtua fuqishëm. Ky përvjetor riktheu në vëmendjen ndërkombëtare nevojën për drejtësi dhe paqe në Ballkan. m.p.

Nga kaçkavalli i Gjirokastrës te ‘Feta’ greke apo ‘Pecorino’ italian. Tanimë është më lehtë të gjesh një produkt të huaj në dyqane dhe markete sesa prodhim shqiptar.

Vetëm gjatë vitit të kaluar janë importuar nga jashtë 35.428 tonë produkte bulmetore, vezë e mjaltë, me vlerë 68 milionë euro. Vlera këto të rritura ndjeshëm me vitet e mëparshme, pasi në 2023-shin u importuan 31 mijë tonë me vlerë 62 milionë euro vetëm tek kjo kategori.

Sasia më e madhe e importit të bulmetit është nga Italia me 22 mln euro (8 mijë tonë), ndjekur nga Greqia me 5.2 milionë euro (1.586 tonë) e më pas Serbia me 2.5 milionë euro importe bulmeti.

Shtimi i prezencës së mallit të importit është i dukshëm edhe në produktet e tjera, që lidhen me prodhimin blegtoral në vend. Boshllëku i mishit vendas, po mbushet nga Brazili kryesisht.

Janë 48.602 tonë mish të importuara nga jashtë me vlerë 82 milionë euro vetëm gjatë vitit të shkuar. Harta e importit të mishit kalon përtej oqeanit, pasi janë blerën 26.5 milionë euro mish nga Brazili dhe 9.8 milionë euro nga SHBA apo 5.1 milionë euro nga Paraguai. Ndërsa në rajon kryeson mishi i blerë në Itali dhe Greqi.

Kërkesa në rritje për bulmet apo mish importi ka ardhur si rezultat i uljes së prodhimit vendas, i shkaktuar nga tkurrja e numrit të bagëtive. Shqipëria numëron më pak se 1.7 milionë krerë lopë e të imta, nga 2.4 milionë krerë para një dekade.

Të dhënat e Institutit të Statistikave tregojnë se prodhimi i qumështit dhe i nënprodukteve të tjera pësoi rënie vjet, situatë që vijon edhe përgjatë këtij viti, pasi importi i prodhimeve të importuara po shtohet.

Shifrat e INSTAT tregojnë se në vitet e fundit importi i produkteve të bulmetit dhe të mishit është rritur shpejt. Nga viti 2020 deri në fund të 2024-ës sipas përllogaritjeve janë blerë nga jashtë 300 milionë euro bulmet dhe 383 milionë euro produkte mishi dhe të brendshmet e tij.

Jo vetëm tek blegtoria, por edhe prodhimet bujqësore po zëvendësohen me ato të importuara kryesisht sa i takon drithërave ku pesha kryesore mbahet nga gruri. m.p.

Mbrojtësi i majtë i Gent, Archie Brown, ka zbuluar se ‘marrëveshja ishte pothuajse e përfunduar me Milan’, por shpjegon pse vendosi të bashkohet me Fenerbahce në vend të klubit italian. 

Mbrëmjen e kaluar pati shumë kaos dhe raportime kontradiktore rreth situatës, madje u tha se dy avionë privatë po e prisnin lojtarin, njëri për në Milano, tjetri për në Stamboll. 

Sot në mëngjes, Brown mori vendimin e tij dhe fluturoi drejt Turqisë për t’u bashkuar me ekipin e Jose Mourinhos, Fenerbahce, në Superligën e Turqisë. 

“Marrëveshja ishte praktikisht e kryer me Milanin. Isha gati të shkoja. Por më pas, mora një telefonatë gjatë natës nga presidenti i Fenerbahces”.  

“Ajo ndryshoi gjithçka. Pasioni që tregoi ai, vizioni, e bënë vendimin të qartë. E dija që duhej të vija te Fenerbahce”, ka thënë Brown. 

Ky version përputhet me raportimet në Itali, Belgjikë dhe Turqi, të cilat sugjeronin se edhe pse Milan ishte seriozisht i interesuar, Fenerbahce kishte qenë gjithmonë një hap përpara në garë. 

Nuk ishte çështje e vlerës së transferimit, që ishte rreth nëntë milionë euro në të dy rastet, apo e kushteve personale, ishte vendosmëria dhe pasioni i treguar nga pala turke. 

Archie Brown pritet të fitojë 1.5 milionë euro në sezon, me një kontratë katërvjeçare dhe opsion për një vit të pestë me Fenerbahcen./ D.C

Kreu i shërbimit të inteligjencës ushtarake të Ukrainës, Kirilo Budanov, zbuloi se Koreja e Veriut aktualisht furnizon deri në 40 përqind të municioneve të artilerisë ruse për luftën në Ukrainë.

Në një intervistë me Bloomberg, Budanov tha se regjimi i Kim Jong-un dërgon jo vetëm predha, por edhe raketa balistike dhe sisteme të plota artilerie. Sipas tij, Rusia në këmbim dërgon para dhe teknologji të përparuar, duke e ndihmuar kështu Phenianin të lehtësojë izolimin e tij ndërkombëtar.

“Këto janë armë të mira”, tha Budanov, duke zbuluar se deri në 60 përqind të humbjeve në njësitë e tij në tre muajt e fundit u shkaktuan nga raketat e Koresë së Veriut.

“Koreja e Veriut ka rezerva të mëdha dhe prodhimi i tyre nuk ndalet, vazhdon 24 orë në ditë”, shtoi ai më tutje.

Bashkëpunimi midis Rusisë dhe Koresë së Veriut është thelluar që kur Vladimir Putin vizitoi Phenianin për herë të parë në 24 vjet në qershor të vitit të kaluar dhe nënshkroi një Marrëveshje Partneriteti Strategjik. Budanov pretendon se Pheniani ka dërguar gjithashtu mijëra trupa për të ndihmuar ushtrinë ruse në rajonin e Kurskut, dhe inteligjenca perëndimore vlerëson se ushtria e Putinit ka marrë miliona predha nga Koreja e Veriut.

Ministri i Jashtëm rus Sergei Lavrov udhëtoi për në Phenian të premten, ndërsa këshilltari i sigurisë i Putinit, Sergei Shoigu, vizitoi Phenianin për herë të tretë brenda tre muajsh vetëm muajin e kaluar.

Pas ndërprerjes së papritur të javës së kaluar, Presidenti i SHBA-së Donald Trump ka urdhëruar rifillimin e dërgesave të armëve në Ukrainë, duke përfshirë sistemet kryesore të mbrojtjes ajrore. Edhe pse marrëdhënia e tij me Putinin është vënë shpesh në pikëpyetje, Trump këtë javë tha se presidenti rus po “vret shumë njerëz” dhe i quajti “marrëzi” përgjigjet e tij ndaj thirrjeve për armëpushim.

Budanov beson se mbështetja amerikane do të zgjasë. “Qëndrimi i tyre është konsistent. Si kreu i shërbimit, unë di më shumë sesa shihet në media”, deklaroi ai.

Ai thotë se një armëpushim është i mundur, por vetëm nëse Ukraina, Rusia dhe SHBA-të përfshihen në marrëveshje. “Mund të arrihet edhe para fundit të vitit”, thotë ai.

Vetëm më 9 korrik, Rusia lëshoi 728 dronë në Ukrainë, duke shkatërruar objekte dhe infrastrukturë civile. Kombet e Bashkuara raportuan se në qershor u shënua numri më i lartë i viktimave civile në tre vjet, me 232 të vdekur dhe 1,343 të plagosur.

Forcat ruse kanë bërë përparime të vogla, por të qëndrueshme. Muajin e kaluar, ato hynë në rajonin verilindor të Sumy-t dhe aktualisht po përparojnë drejt Donetskut dhe po përpiqen të depërtojnë në Oblastin e Dnipropetrovskit. m.p.

E ardhmja e Max Verstappen duket si një enigmë: për cilin ekip do të garojë në vitin 2026? A do të vazhdojë me Red Bullin, duke respektuar kontratën e tij deri në vitin 2028, apo do të kalojë te Mercedesi? Së fundmi, për të ardhmen e pilotit holandez ka folur Nelson Piquet Jr. Sipas brazilianit, 4 herë kampioni i Formulës 1 ka vendosur të kalojë te ekipi gjerman.

Një mendim që nuk ka kaluar pa u vënë re, duke marrë në konsideratë lidhjen familjare midis Nelson dhe Max. Në fakt, ish-kampioni i botës në Formula E është kunati i holandezit, i cili është i lidhur me Kelly Piquet që nga viti 2021. Piquet Jr. foli për të ardhmen e Verstappen gjatë podkastit “Pelas Pistas”, duke e nisur fillimisht me një koment në lidhje me formën aktuale të Mercedesit: “Këtë vit, ka fundjava ku gjërat nuk po shkojnë mirë për ekipin gjerman.

Nuk ka shumë gjëra që mund të bësh për këtë: një nga pilotët e tyre është një fillestar (Andrea Kimi Antoneli), i cili për fat të keq u godit nga Isak Haxhar fundjavën e kaluar”. Më pas erdhi deklarata e bujshme: “Mercedesi nuk pati një fundjavë të shkëlqyer në Silverston, por kush e di se çfarë do të ndodhë vitin tjetër, kur Maks të drejtojë për ta…”. Një deklaratë befasuese, e pasuar nga një sqarim i mëtejshëm nga braziliani, djali i tre herë kampionit në F1:

“Nëse Verstappen do të transferohej te Mercedesi, shoku i tij i skuadrës do të jetë Antonelli”. Kështu, holandezi do të zëvendësonte George Russell, një pilot me të cilin Verstappen nuk ka marrëdhënie të mira. Nelson theksoi se fjalët e tij ishin thjesht një opinion: “Max do të vazhdojë të garojë në F1 në 2026, kjo është e qartë. Mendoj se ai do të marrë një vendim për të ardhmen e tij në gusht”. Pra, për të mësuar saktësisht se me cilin ekip do të jetë Verstappen sezonin e ardhshëm, do të duhet të presim edhe disa javë./ D.C

Emigracioni në Bashkimin Evropian e ka çuar popullsinë e bllokut në rekordin prej 450.4 milionë njerëz vitin e kaluar.

Kështu kanë treguar të dhënat e fundit të Eurostat, të publikuara ditën e premte. Sipas raportit, Unioni ka regjistruar më shumë vdekje sesa lindje që prej vitit 2012, që do të thotë se emigracioni është i vetmi faktor që ka çuar në rritjen e popullsisë.

“Rritja e konstatuar e popullsisë mund t’i atribuohet në masë rritjes së lëvizjeve migratore post-COVID-19”, deklaroi Eurostat. Në vitin 2024, BE-së iu shtuan 1.07 milion banorë të rinj, me kuotën migratore prej 2.3 milionë që kompensuan rënien e natyrshme të njerëzve prej 1.3 milionë.

Vdekjet e regjistruara vitin e kaluar, që arritën në 4.82 milionë, vazhduan të nxirrnin në deficit kuotën e lindjeve me 3.56 milionë. Trendi i vendos sfidat demografike të Evropës në vëmendje teksa popullsia në plakje e kontinentit të vjetër dhe rënia e lindjeve po kufizojnë sistemin e mirëqenies dhe po krijojnë mungesë krahu pune.

Franca, Gjermania dhe Italia vazhdojnë të mbajnë pozicionet e tyre si vendet me popullsitë më të mëdha të bllokut, duke përbërë thuajse gjysmën e të gjithë popullsisë evropiane, ose 47 për qind.

Ndërkohë, 19 vende regjistruan një rritje të shifrave të popullsive përkatëse vitin e kaluar, ndërsa 8 regjistruan rënie. Malta ishte vendi që arriti rritjen më të madhe, ose 19 për 1 mijë banorë, e ndjekur nga Irlanda me 16.3 dhe Luksemburgu me 14.7.

Ndërsa mes vendeve që konstatuan rënie, Letonia regjistroi kuotën më të lartë me minus 9.9, e ndjekur nga Hungaria me minus 4.7 dhe Polonia me Estoninë, që mbajnë vendin e tretë me minus 3.4. m.p.

Pasuria e bashkëthemeluesit të Microsoft-it, Bill Gates, ka rënë ndjeshëm me 51 miliardë dollarë në vetëm disa ditë, pas deklaratës së tij se do të dhurojë pasurinë me një ritëm shumë më të shpejtë se sa ishte planifikuar më parë.

Sipas indeksit të miliarderëve të Bloomberg, pasuria e Gates ra nga 175 miliardë dollarë më 3 korrik në vetëm 124 miliardë dollarë më 11 korrik, shkruan A2 CNN. Kjo rënie erdhi si pasojë e rishikimit të metodologjisë së Bloomberg për të reflektuar më mirë nivelin e lartë të bamirësisë së Gates dhe angazhimin e tij për ta shpërndarë pasurinë gjatë dy dekadave të ardhshme.

Në një postim në blog më 8 maj, Gates deklaroi se gati e gjithë pasuria e mbetur e tij do të shkojë për Fondacionin Gates — organizata bamirëse që themeloi bashkë me ish-bashkëshorten Melinda French Gates. Fondacioni pritet të përmbyllë misionin e tij deri në vitin 2045.

“Do të thonë shumë gjëra për mua kur të vdes, por nuk dua që njëra prej tyre të jetë ‘vdiq i pasur’”, shkroi Gates. “Ka shumë probleme urgjente për t’u zgjidhur, për të mbajtur burime që mund të ndihmojnë njerëzit”. m.p.

Anita Haradiaj ka rrëfyer për njohjen e saj me ish-kryeministrin e Kosovës, Ramush Haradinaj, tashmë të martuar prej shumë vitesh ndërsa së bashku ndajnë dhe 3 fëmijë të mrekullueshëm.

E ftuar në emisionin “S’e luan topi”, ka treguar se hera e parë që takohej me Ramush Haradianj ishte në radio ku dhe ajo punonte në atë kohë. Ndër të tjera ajo ka zbuluar dhe një tjetër anë të ish-kryeministrit, duke treguar se ai është person shumë romantik.

“Takimin e parë me të e kam bërë gjatë një interviste në radio. Ishte i ftuar në Radio Kosova dhe më tha mua ‘goca e kujt je ti’. Dhe unë, duke menduar që ne njiheshim familjarisht, i thashë jam goca e Mustafës. Kr nisa punë në Koha Vizion, u takuam sërish. Aty u njohëm, u takuam, ai ishte një djalë ndryshe. Mua më pëlqen gjithçka që është e vështirë, më pëlqen të sfidohem. Dhe ai ishte i pjekur, nuk kishte rutinë, nuk e dije kur do flije apo ku do ishe.

Është shumë romantik, më shumë se unë. Gjithçka e ka me shumë delikatesë, me shumë elegancë. Më ka sjellë edhe mëngjesin në shtrat. Edhe lule…”, ka treguar Anita Haradinaj. m.p.

“Jemi në një pikë kthese”, sipas Pallatit Elize, dhe “në fjalimin që Emmanuel Macron do të mbajë të dielën përpara drejtuesve të forcave të armatosura priten njoftime të rëndësishme”. Është traditë që presidenti i Republikës franceze t’u drejtohet gjeneralëve më 13 korrik, një ditë para festës kombëtare, por këtë vit ngjarja ndodh në një moment të veçantë. “Presidenti do të thotë se liria nuk ka qenë kurrë më në rrezik që nga viti 1945, dhe se duhet reaguar”, paralajmërojnë burime.

Siç ka kujtuar shefi i Shtabit të Përgjithshëm, Thierry Burkhard, në një konferencë shtypi jo të zakonshme, kërcënimi nga Rusia është gjithnjë e më i prekshëm dhe Franca është bërë objektivi kryesor i luftës hibride të nisur nga Kremlini ndaj Europës. Përballë kësaj situate dhe rritjes së kërcënimeve ndërkombëtare, përdorimit gjithnjë e më të shfrenuar të forcës në botë dhe dobësimit të aleancave të vjetra (me referencë të qartë ndaj SHBA-së), Macron pritet të shpallë masa të reja për mbrojtjen, në veçanti në dy drejtime: financimi i forcave të armatosura dhe shërbimi ushtarak.

Financimi dhe armët bërthamore

Sa i përket financimit, ligji i programimit ushtarak parashikon tashmë 413 miliardë euro për periudhën 2024-2030, me rritje vjetore prej 3 miliardë eurosh. Por përballë kërcënimeve në rritje ndaj interesave franceze dhe europiane, pritet që Macron të njoftojë rritje shtesë të buxhetit ushtarak, veçanërisht për forcën bërthamore parandaluese, e rikthyer në plan të parë pas luftës në Ukrainë, kërcënimeve ruse dhe tërheqjes amerikane nga kontinenti.

Gjatë vizitës shtetërore në Londër, Macron ka nënshkruar një marrëveshje me kryeministrin britanik Keir Starmer për një koordinim më të ngushtë mes dy vendeve lidhur me “ombrellën bërthamore” për t’u mbrojtur nga kërcënimi rus. Në atë konferencë për shtyp, Macron tha: “Sot duhet të rishikojmë qartë programimin dhe strategjinë tonë, në dritën e ndryshimeve në natyrën e rrezikut.”

Reforma e shërbimit ushtarak

Pika e dytë e rëndësishme në fjalimin e së dielës do të jetë një reformë e shërbimit ushtarak. Ky do të mbetet vullnetar, pra nuk bëhet fjalë për rikthimin e detyrimit ushtarak të përgjithshëm të shfuqizuar nga Jacques Chirac në vitin 1997. Por Macron synon ta zgjerojë mundësinë dhe përfitimet e shërbimit ushtarak vullnetar, për të nxitur më shumë të rinj që duan të kontribuojnë në mbrojtjen kombëtare.

Aktualisht, dhjetë vende të BE-së kanë shërbim ushtarak të detyrueshëm (Austria, Qipro, Kroacia, Estonia, Finlanda, Greqia, Letonia, Lituania, Danimarka dhe Suedia), ndërsa vende si Gjermania, Belgjika dhe Polonia kanë rihapur debatin për rikthimin e tij.

Në Francë, Macron ka nisur më parë “Shërbimin Kombëtar Universal” (SNU), një formë shërbimi civil “për të shërbyer atdheun”, që ka pasur sukses të kufizuar për shkak të paqartësive mbi natyrën dhe qëllimin e tij.

Të dielën, Macron mund të flasë më qartë për një rilançim të fuqishëm të shërbimit ushtarak për të rinjtë, si dhe për forcat e armatosura në përgjithësi – një objektiv ambicioz, por i vështirë për t’u arritur duke pasur parasysh paqëndrueshmërinë politike (qeveria nuk ka shumicë në parlament) dhe krizën financiare që po kalon Franca. m.p.

Pronari i një banese mbeti i plagosur pasditen e sotme si pasojë e shpërthimit të bombolës së gazit që përdorte për gatim.

Ngjarja ka ndodhur në lagjen “Partizani” të Shkodrës, kurse shkaqet mbeten ende të panjohura, teksa policia vendore ka nisur hetimet. I plagosuri është dërguar në spital dhe ndodhet jashtë rrezikut për jetën.

“Rreth orës 17:55, në lagjen “Partizani”, në banesën e shtetasit A. J., ka shpërthyer një bombël gazi. Si pasojë është dëmtuar pronari i banesës, i cili ndodhet në spital, jashtë rrezikut për jetën”, bëri me dije policia pas hetimeve paraprake.

Grupi hetimor po punon për sqarimin e plotë të rrethanave të ngjarjes, ndërsa do merret edhe dëshmia e të dëmtuarit. m.p.

Mediat opozitare ruse dhe gazeta britanike The Sun i kanë bërë jehonë një skandali të ri seksual që ka përfshirë Kremlinin, pasi u zbulua se ministri i ri i Mbrojtjes, Andrej Belousov, i cili njihet edhe si njeri i afërt me Putinin ka përdorur avionë ushtarakë të llojit Iljushin-76 (me vlerë mbi 100 milionë dollarë), për të transportuar të dashurën e tij sekrete nëpër Rusi.

23-vjeçarja Marija Shalajeva nga Jekaterinburgu, ka postuar në rrjetet sociale video dhe foto ku tregon se është dërguar me avion ushtarak në një udhëtim fundjave në Rostov mbi Don, aty ku ndodhet edhe selia kryesore e Forcave të Armatosura ruse.

Në postimet e saj, tashmë të fshira, biondja simpatike shkruan se ka udhëtuar në një aeroport të mbyllur për civilët, dhe se i dashuri i saj “nga Kremlini” i kishte organizuar një trajtim për manikyr atje.

“Kush thotë se avionët nuk fluturojnë në Rostov? Fluturojnë, por jo për të gjithë. Gjithsesi, ja ku jam prapë në Rostov. Nuk mund ta lë”, ka shkruar ajo.

“Final Four” pritet të pësojë ndryshim rrënjësor në edicionin e ardhshëm, ndërsa FSHF do të njoftojë vendimin zyrtar në vazhdim. Mësohet se nuk do të ketë gjysmëfinale dhe finale për të vendosur fituesin e kampionatit.

Në anën tjetër, sistemi i “Final Four” do të mbetet, por pëson ndryshim rrënjësor. Kështu në përfundim të 36 javëve do të luhen 6 ndeshje në total. Skuadrave do u përgjysmohen pikët dhe secili prej tyre do të ketë nga tre ndeshje.

Dhe sërish si në dy edicionet e fundit, përmes “Final Four” do të vendoset fituesi i kampionatit dhe skuadrat që shkojnë në Europë. Sot ishte takimi i parë mes klubeve në FSHF dhe ky ishte përfundimi i tij./ D.C

Deputeti i zgjedhur i PD, Luçiano Boçi, tha se Kryeministri Edi Rama po kërkon të rrëmbejë edhe malet e Shqipërisë, siç bëri me bregdetin, duke ia dhënë njerëzve të tij të besuar mundësinë për të bërë turizëm, shkruan A2 CNN. Pas përplasjes fizike me policët në Theth, ku ishte bashkë me kolegun Bardh Spahia, në mbështetje të banorëve, Boçi tha se opozita do përdorë çdo instrument për mbrojtjen e banorëve atje.

“Turizmi familjar ka marrë goditje përfundimtare. Siç shihet prishjet këtu janë selektive, policia dhe IKMT janë në kundërshtim të plotë me ligjin. Banorët kanë ndërtuar në tokat e tyre, por kjo nuk përputhet me oreksin e Edi Ramës i cili kërkon të rrëmbejë edhe këtë perle të natyrës siç ka bërë me të tjerat. Këtu nuk ka shtet, sepse të marrësh zvarrë banorët sepse kanë ndërtuar në tokat e tyre kanë bërë turizëm familjar këtij nuk i thonë shtet. Të gjithë drejtuesit e IKMT thonë një fjalë, kemi urdhër. Nga kush kane urdhër? Këtu sundon arroganca e një shteti që qeverisjen e kanë marrë nga bandat. Do të jemi këtu si opozitë me të gjitha mjetet tona për të reaguar. Thirrja ime është të bëhemi bashkë të gjithë burrat e malësisë për ta ndalur këtë valë terrori”, u shpreh Boçi.

“Siç e shikoni jemi në një terror të vërtetë të shtetit të Edi Ramës. Banorët nuk janë përballur ndonjëherë me pamje terrori të tillë. Si një besëprerë tipik Edi Rama pasi iu dha fjalën dhe u bëri thirrje të investonin emigrantët e kësaj treve, i dhunon sot dhe i hedh në lum investimet e tyre. Një hakmarrje primitive e tij për votën që nuk e mori kurrë të thethjanëve”, tha Spahia.

Prej disa ditësh situata në Theth është tensionuar pas nisjes së operacionit të IKMT-së për prishjen e ndërtimeve pa leje në zonë. Banorët kundërshtojnë veprimet e shtetit, pasi thonë që nuk e kanë të mundur që të ndërtojnë me leje pasi u mungojnë certifikatat e pronësisë. m.p.