Më 8 gusht 1963, në orët e para të mëngjesit, një grup prej 15 vjedhësish profesionistë, të armatosur dhe jashtëzakonisht të organizuar, sulmuan një tren postar që udhëtonte nga Glasgow për në Londër, duke realizuar një nga grabitjet më të famshme në historinë britanike: “The Great Train Robbery”.

Çfarë ndodhi?

Treni, i cili transportonte postën dhe para të gatshme të Bankës së Anglisë, kishte ndaluar në një stacion të izoluar në zonën Bridego Bridge, pranë Ledburn në Buckinghamshire, jo shumë larg Londrës. Grabitesit, të cilët kishin modifikuar sinjalet hekurudhore për ta ndalur trenin në vendin e duhur, u futën në kabinën e makinistit dhe e detyruan atë të mos lëvizte.

Makinisti i trenit, Jack Mills, u godit me një shufër metalike dhe u plagos rëndë, gjë që më vonë shkaktoi zemërim të madh publik. Nga 72 qeset postare që ndodheshin në tren, u morën 120 qese me para në banknota, me një vlerë totale prej 2.6 milionë paund – ekuivalente me më shumë se 60 milionë paund sot.

Organizimi i grabitjes

Truri i operacionit ishte Bruce Reynolds, një hajdut me përvojë në grabitje të nivelit të lartë. Ai, së bashku me një ekip prej specialistësh, përfshirë Ronnie Biggs, Charlie Wilson, Buster Edwards, dhe Roger Cordrey, kishin përgatitur gjithçka me detaje të jashtëzakonshme për muaj me radhë.

Grupi u strehua pas grabitjes në një shtëpi të izoluar në Leatherslade Farm, ku qëndruan për disa ditë, derisa të ftohej gjurmimi policor. Por një gabim fatal i tyre – mosdjegia e shtëpisë që përmbante prova – i çoi hetuesit britanikë në vendin e fshehjes, ku u gjetën shenja gishtash, lista dhe materiale provuese.

Kapja dhe dënimi

Policia britanike ndërmori një nga hetimet më të mëdha në historinë e saj. Brenda pak muajsh, shumica e grabitësve u arrestuan dhe u dënuan me burgime të gjata, mes 25 dhe 30 vjetësh – ndëshkim i ashpër për kohën, i cili kishte për qëllim të jepte një shembull.

Ronnie Biggs, një nga më të njohurit e grupit, u arratis nga burgu në vitin 1965 dhe u zhduk për dekada, duke jetuar në Brazil si një personazh gjysmë legjendar, deri sa u kthye vetëvullnetarisht në Angli në 2001 për t’u përballur me drejtësinë.

Çfarë ndodhi me paratë?

Shumica e parave nuk u gjetën kurrë. Thuhet se një pjesë e madhe u shpërnda midis grabitësve dhe u shpenzua shumë shpejt, ndërsa të tjerë u mashtruan nga persona të tretë që pretenduan t’i ndihmonin në fshehjen e tyre.

Trashëgimia dhe ndikimi

“The Great Train Robbery” mbeti në kujtesën kolektive britanike jo vetëm për shumën marramendëse të parave, por për mënyrën e sofistikuar të organizimit. Shumë prej grabitësve, megjithëse kriminelë, u trajtuan nga opinioni publik si “antiburrokratë” ose “Robin Hood modernë”, sidomos pasi askush nuk u vra, edhe pse dhuna ndaj makinistit Mills u dënua gjerësisht.

Ngjarja frymëzoi filma, libra dhe dokumentarë, dhe është ende objekt i analizave kriminalistike, sociale dhe kulturore. Grabitja shënoi një pikë kthese për mënyrën si policia britanike filloi të modernizonte metodat hetimore dhe të merrej më seriozisht me kriminalitetin e organizuar.

Përgatiti: L.Veizi

Kryetari i bashkisë së qytetit francez Villeneuve-de-Marc, u shtrua në spital mbrëmë në gjendje të rëndë pasi u sulmua në rrugë nga një banor. Sipas “France today” këtë mëngjes, gjendja e tij po përmirësohet ngadalë.

Gilles Dussault u sulmua dhunshëm pasdite, pak para orës 5 pasdite ndërsa po ecte me djalin e tij 28-vjeçar. Zyra e prokurorit të Vienne ka hapur një hetim për vrasje në tentativë.

Sulmuesi përdori një “objekt të papërcaktuar” për të plagosur burrin 60-vjeçar në gjoks. Djali pësoi lëndime të lehta. Sulmuesi më pas iku, duke goditur një mur me makinën e tij. Sipas mediave franceze, ai është ende në kërkim aktiv. Presidenti francez Emmanuel Macron komentoi mbrëmë me një mesazh të postuar në mediat sociale:

“Kur sulmohet një përfaqësues i zgjedhur, është Kombi që e mbështet atë. Mendimet tona janë me Gilles Dussault, kryetarin e bashkisë së Villeneuve-de-Marc, dhe me djalin e tij, të cilët u sulmuan dhunshëm”, tha ai. m.p.

“Për herë të parë në shekullin e shtetësisë së Shqipërisë, një njësi e pavarur antikorrupsion po arreston politikanë, zyrtarë dhe kontrabandistë droge, me sa duket pa frikë apo favorizim”.

Kështu nis një shkrim i “The Economist” për SPAK, ku thekson se “Struktura Speciale Kundër Korrupsionit dhe Krimit të Organizuar ka besimin e 76% të shqiptarëve”.

“Gjithnjë e më shumë elita e Shqipërisë, përfshirë zyrtarë të lartë të Partisë Socialiste në pushtet, po kapen në rrjetën e saj. Edi Rama, kryeministri, nuk është më aq entuziast sa ishte kur arrestonte kryesisht armiqtë e tij. Në vitin 2023, SPAK e vendosi Sali Berishën, një ish-president që drejton partinë kryesore të opozitës në vend, në arrest shtëpiak. Ai është në gjyq për korrupsion. Vitin e kaluar arrestoi Ilir Metën, një tjetër ish-president dhe tani udhëheqës të opozitës. Edhe ai është akuzuar për korrupsion. Ish-ministra në qeveritë e zotit Rama janë arrestuar gjithashtu, dhe në shkurt ishte radha e Erion Veliajt, kryetarit socialist të Bashkisë së Tiranës. Të tre i mohojnë akuzat”, lexohet në shkrimin e “The Economist”.

Më tej, në artikull flitet edhe për bosët e drogës: “Në rolin e saj në luftën kundër krimit të organizuar, njësia ka shënuar suksese të mëdha duke punuar me policinë jashtë vendit. Në mënyrë tipike, një bos shqiptar i drogës mund të operojë nga Dubai. Blerësit e tij në Ekuador dërgojnë anije në Evropë, ku njerëzit e tij mbikëqyrin shpërndarjen. Ai më pas investon fitimet e tij në ndërtim në Shqipëri dhe “ushtarët” e tij blejnë apartamente. Në korrik, SPAK sekuestroi asete nga burra që dyshohet se pastrojnë paratë e drogës nga Zvicra, dhe akuzoi një grup tjetër për përpjekje për të kontrabanduar armë në Britani”.

“The Economist” i kthehet arrestimeve të politikanëve, që thotë se kanë sjellë shumë polemika në jetën politike të Shqipërisë: “Arrestimet e politikanëve janë më të diskutueshme. Zoti Berisha pretendon se zoti Rama po e persekuton atë dhe e quan SPAK-un “kamzhikun e tij”. Por numri në rritje i bashkëpunëtorëve të ngushtë të zotit Rama të akuzuar për korrupsion ka dëmtuar edhe imazhin e tij. Kur u arrestua zoti Veliaj, ishte radha e kryeministrit për të akuzuar SPAK-un për abuzim me të drejtat e njeriut. Kjo i solli atij kritika nga Bashkimi Evropian; një diplomat nga një vend i BE-së i quan akuzat e tij “marrëzi”. Z. Rama shpejt hoqi dorë nga sulmet e tij. Z. Rama ka premtuar se Shqipëria do të bashkohet me BE-në deri në vitin 2030. Një rekord në luftën kundër korrupsionit është një kriter jetësor dhe disa shtete anëtare e vlerësojnë shumë bashkëpunimin e SPAK-ut në luftën kundër bandave të drogës. Edhe pse Z. Rama mund të ketë dashur të mbrojë Z. Veliaj, ai gjithashtu e kuptoi se sulmi ndaj tij ishte një humbje votash. Një burim në gjyqësor thotë lakonikisht se nëse klasat politike të Shqipërisë do të ishin të kënaqura me punën e tij, “do të kishim një problem”. m.p.

Ardon Jashari ka përfunduar zyrtarisht transferimin e tij nga Club Brugge te Milani, me raportime nga Belgjika që tregojnë se Zlatan Ibrahimovic ka kontaktuar drejtpërdrejt me mesfushorin zviceran për t’i shpjeguar në detaje projektin e klubit.

Sipas asaj që raportohet nga media belge hln.be, Zlatan Ibrahimovic, i cili vepron si këshilltar i lartë për klubin dhe firmën pronare RedBird, ka telefonuar Jasharin gjatë bllokimit në negociata për ta bindur të zgjedhë Milanin.

Jashari vjen pas një sezoni të fortë në Belgjikë, ku u votua si ‘Lojtari më i mirë i sezonit’ në elitën e futbollit belg për sezonin 2024/2025. m.p.

Mbajtja e një lidhjeje mund të konsiderohet diçka shumë e vështirë dhe 42% e martesave po përfundojnë me divorc. Ekspertët janë duke i hulumtuar arsyet se përse lidhjet po dështojnë.

Sipas një profesori të psikologjisë sociale, ne thjeshtë jemi idealistë, Eli Finkel, i cili ligjëron në Universitetin Northëester, beson se ne presim shumë nga një lidhje romantike dhe duhet t’i zvogëlojmë pritshmëritë tona për të qenë të kënaqur.

Ai beson se ndryshimet më të mëdha të pritshmërive martesore gjatë 100 viteve të fundit kanë shtuar presion të madh mbi çiftet.

Finkel thotë se nuk duhet të keni turp të kërkoni më pak nga partneri, dhe e ka përsëritur prapë faktin se duhet t’i zvogëloni pritshmëritë në lidhje për të qenë të lumtur.

“Shumë njerëz ngatërrojnë pritshmëritë me standardet. Pritshmëritë projektojnë versionin tënd ideal tek dikush tjetër. Standardet janë një sërë besimesh, sistem vlerash dhe trajtimesh që ti pret t’i shohësh në një individ që ti zgjedh”, thotë Chris Seiter, një këshillues marrëdhëniesh dhe specialist ndarjesh. m.p.

Egnatia ka bërë detyrën më së miri në Slloveni teksa ka barazuar me shifrat 0-0 ndaj Olimpijas së Ljubljanës në takimin e parë të turit të tretë të Ligës së Konferencës në një duel dramatik deri në sekondat e fundit.

Ekipi i drejtuar nga Edlir Tetova bëri gjithçka mirë në pjesën e parë duke mos lejuar vendasit të shfaqeshin shpesh rrezikshëm para Dajsinanit, duke tentuar që të dilnin nga kjo transfertë me një rezultat pozitiv.

Por në pjesën e dytë, protagonist u bë gjyqtari skocez i cili dha një tufë kartonë të verdhë për rrogozhinasit, plot 9 të tillë, me një të kuq për Fangajn. Ai dha edhe dy penallti për vendasit, ku e para shumë bujare, u gabua nga Tam. Ndërsa e dyta në minutat e fundi shtesë, për fat u anulua pas sinjalizimit të VAR, pasi ishte faull jashtë zonës.

Egnatia kthehet në Shqipëri me një rezultat pozitiv që i jep mundësi të mira të tentojë kualifikimin në play-off të turneut./ D.C

Rezerva valutore ka vijuar rritjen në gjysmën e parë të këtij viti. Sipas të dhënave të Bankës së Shqipërisë, në fund të qershorit, vlera e mjeteve të rezervës arriti në 6 miliardë e 727 milionë euro, në rritje me 7.4% krahasuar me fundin e vitit 2024 dhe me 22% krahasuar me të njëjtën periudhë të një viti më parë.

Në një masë të madhe, rritja e rezervës valutore u ndikua nga emetimi i Eurobondit të radhës të Qeverisë shqiptare në muajin shkurt, për një vlerë totale prej 650 milionë eurosh.

Megjithatë, rritja e rezervës ka vijuar edhe në tremujorin e dytë të vitit. Ndikim të konsiderueshëm, veç të tjerash, vlerësohet të kenë edhe blerjet e valutës nga Banka e Shqipërisë në tregun e brendshëm valutor.

Duke parë vazhdimin e presioneve të forta mbiçmuese për monedhën vendase, Banka Qendrore ka vazhduar edhe këtë vit blerjen e valutës, për të mos lejuar rënien e mëtejshme të kursit Euro-Lek.

Paralelisht, Banka e Shqipërisë ka vijuar edhe programin e ankandeve të planifikuara, pikërisht me qëllim rritjen e rezervës së saj valutore. Në tre ankandet e zhvilluara gjatë tremujorit të parë 2025, janë blerë 33.2 milionë euro me një mesatare 11.07 milionë euro, kundrejt mesatares prej 14.2 milionë euro gjatë vitit 2024.

Shuma e blerë ka qenë e ngjashme me shumën e blerë në të njëjtën periudhë të një viti më parë (32.6 milionë euro), duke treguar, sipas Bankës së Shqipërisë, se pjesëmarrja relativisht më e ulët e bankave lidhet me faktorë sezonalë.

Megjithëse të dhënat nuk janë ende të disponueshme, besohet se shumat e blera në tregun e brendshëm valutor janë rritur ndjeshëm gjatë tremujorit të dytë të vitit.

Banka e Shqipërisë synon të blejë këtë vit përmes ankandeve 270-350 milionë euro, ose 20 milionë euro më shumë krahasuar me objektivin e vitit 2024, si në intervalin e poshtëm, ashtu edhe në atë të sipërm. Vitin e kaluar, Banka e Shqipërisë bleu afërsisht 933 milionë euro në tregun e brendshëm valutor. Blerjet e valutës arritën vlerën më të lartë historike dhe u rritën me 249% krahasuar me një vit më parë.

Në mesin e këtij viti, titujt e borxhit përbënin 73% të mjeteve të rezervës, ndërsa depozitat në cash përbënin 18% të saj. Pjesa e mbetur e rezervës është e investuar në ar dhe në të drejta tërheqjeje (SDR) pranë Fondit Monetar Ndërkombëtar.

Rezerva valutore është instrument i rëndësishëm për të amortizuar goditje të mundshme, të lidhura si me deficitin e llogarisë korrente, ashtu edhe me nivelin e lartë të Euroizimit të sektorit financiar në vend. (Lajm nga Revista Monitor) m.p.

Flakët kanë përfshirë në mënyrë të shpejtë dhe të pakontrolluar rajonin Aude, që ndodhet në jug të Francës.

Zjarri tashmë është përhapur në një sipërfaqe më të madhe se qyteti i Parisit, duke rrezikuar një pjesë të konsiderueshme të territorit dhe duke krijuar situatë alarmante për banorët dhe autoritetet lokale.

Zjarri, i cili ka marrë përmasa të mëdha në pak orë, ka përfshirë pyje të dendura dhe ka shkatërruar të paktën 25 shtëpi në fshatrat përreth, raporton The Mirror.

Si pasojë, mijëra banorë janë detyruar të largohen nga shtëpitë e tyre, ndërsa turistët që ndodheshin në zonë janë evakuuar për t’u siguruar nga rreziku i zjarrit.

Për shkak të përhapjes së flakëve dhe tymit të dendur, autoritetet kanë mbyllur shumë rrugë dhe kanë ndaluar qarkullimin në disa zona për të lehtësuar punën e zjarrfikësve dhe për të parandaluar aksidentet.

“Është një katastrofë me përmasa të papara më parë,” tha kryeministri francez, François Bayrou gjatë vizitës në zonën e prekur, duke shprehur solidaritetin me të gjithë të prekurit dhe duke siguruar se qeveria po mobilizohet në maksimum për të ndihmuar në menaxhimin e situatës dhe në ringritjen e zonave të dëmtuara. m.p.

Një aeroplan i vogël që transportonte staf mjekësor u rrëzua këtë pasdite në një lagje me popullsi të dendur në kryeqytetin e Kenias, duke lënë gjashtë persona të vdekur.

Aeroplani Cessna, i drejtuar nga AMREF Flying Doctors, ishte nisur drejt Hargeisës, kryeqyteti i territorit të shkëputur të Somalisë, Somaliland, njoftoi organizata në një deklaratë zyrtare.

Komisioneri i Qarkut Kiambu, Henry Wafula, konfirmoi se katër persona që ndodheshin në bord dhe dy të tjerë në tokë humbën jetën si pasojë e aksidentit.

Sipas Autoritetit të Aviacionit Civil të Kenias, aeroplani u nis nga Aeroporti Ëilson në orën 14:14 me orën lokale (11:14 GMT), por humbi kontaktin me kontrollin e trafikut ajror vetëm tre minuta pas ngritjes. m.p.

Nën ndikimin e rrjeteve sociale dhe montazheve abuzive që u bëhen imazheve të mjekëve të njohur për qëllimi përfitimi shumë pacientë po bien pre e mashtrimeve.

Kjo grua dhe jo vetëm u drejtua tek Prof Dr Myftar Barbullushi për të marrë ilaçin magjibërës që largon diabetin siç dhe thuhej në video montazh kur në fakt Prof Barbullushi është mjek nefrolog dhe merret me veshkat.

“Një grua duke ndenjur e pashë në Facebook dhe thoshte që largon diabetin. Por erdha dhe kuptova që është mashtrim”.

Mashtrime te tilla kanë bërë që shumë pacientë që trajtohen prej vitesh nga diabeti të besojnë e të blejnë ilaçe bimore duke hequr dorë nga barnat mjekësorë duke riskuar shëndetin e tyre. Për këtë Porf Barbulushi ka bërë edhe një përgënjeshtrim në llogarinë tij në Facebook ku sqaron se jam mjek nefrolog dhe jo diabetolo, nuk kam, lidhje me atë ilaç.

“Në fillim nuk i dhashë rendësi, por nuk reshtin pacientët e vijnë nga rrethet dhe deri 20 telefonata në ditë që kërkojnë këtë ilaç”, shprehet Porf Dr myftar Barbullushi.

Mjekë të njohur çdo ditë përballen me mashtrime të tilla që jo vetëm u dëmtojnë imazhin si mjekë, por riskojnë dhe popullatën. Ndaj kërkohet ndërhyrje nga Autoriteti i sigurisë kibernetike për mbrojtjen e qytetarëve nga ky fenomen me pasoja të rënda në shëndet. m.p.

Një vatër zjarri ka rënë pasditen e së enjtes (7 gusht) në fshatin Vjollcë (Malaj) të Mirditës.

Menjëherë pas njoftimit, forcat zjarrfikëse janë nisur drejt zonës, por për shkak të erës së fortë dhe terrenit të thepisur, flakët janë përhapur me shpejtësi dhe kanë përfshirë një sipërfaqe të madhe pylli me pisha.

Report Tv ka siguruar edhe pamjet e flakëve, teksa gazetari Elvis Hila informon se pavarësisht përpjekjeve të pandërprera, zjarrfikësit nuk kanë mundur të izolojnë zjarrin, i cili ka avancuar në një zonë të vështirë malore.

Forcat janë ende në vendngjarje dhe ndërhyrja po vijon me mjete të kufizuara, për shkak të aksesit të vështirë në zonë dhe do të duhet një ndërhyrje më e specializuar nga ajri. m.p.

Digjitalizimi i parë nga numri i familjeve me kompjuter është më i lartë në bashkitë e mëdha të vendit në raport me ato të vogla dhe zonat e thella të vendit. Sipas të dhënave të detajuara të Cens 2023 kryeqyteti kryeson me një përqindje më të lartë, ku gati gjysma e familjeve (49.3%) kanë një kompjuter në banesë.

Pas Tiranës renditet Korça me 33.9%, e ndjekur nga Saranda (30.2%), Durrësi (29.2%), Shkodra (28.5%), dhe Shijaku (27.5%), Shijaku dhe Hasi kanë përqindje më të larta.

Në anën tjetër, në qytete si Selenica vetëm 5.8% e familjeve kanë kompjuter, Memaliaj (6.1%), Finiqi (7.8%), dhe Roskoveci (8.0%) me përqindjet më të ulëta në vend, duke reflektuar prapambetje të thellë digjiitale.

Të dhënat tregojnë se qendrat urbane të tilla si Tirana, Durrësi dhe Shkodra tregojnë një nivel më të lartë të aksesit në teknologji, e lidhur edhe me nivelin më të lartë te të ardhurave, edukim më të lartë dhe përfshirje më të madhe në ekonominë digjitale.

Ndërsa në Bashkitë e vogla dhe më pak se 10% e familjeve kanë kompjuter. Kjo reflekton infrastrukturën e dobët në tërësi dhe të ardhurat e ulëta.

Zonat jugore dhe verilindore janë më të prekura, me bashkitë e Libohovës, Këlcyrës, Konispolit dhe Dropull që mbeten nën mesataren kombëtare. Në këto bashki dhe të tjera të Vogla një pjesë e madhe e popullsisë aktive ka emigruar, duke lënë pas persona të moshuar që nuk përdorin teknologjinë.

Në shumë bashki, veçanërisht ato me moshë mesatare dhe të tretë më të lartë, ka mungesë njohurish për përdorimin e teknologjisë. Kjo krijon një rreth vicioz: nuk e përdorin teknologjinë sepse nuk e kuptojnë, dhe nuk mësojnë sepse nuk e kanë.

Në zonat rurale ku ekonomia është e përqendruar në bujqësi apo punë manuale, shumë familje nuk e shohin kompjuterin si të nevojshëm për jetën e përditshme. Në disa raste, edhe shkollat nuk e përforcojnë mjaftueshëm rëndësinë e përdorimit të teknologjisë.

Në shumë fshatra dhe zona malore mungon interneti me shpejtësi të mirë ose është shumë i kushtueshëm. Pa një lidhje të qëndrueshme, edhe nëse ka kompjuter, përdorimi i tij mbetet i kufizuar. Ndërkohë, familjet e reja që janë më të predispozuara për pajisje digjiitale jetojnë në qytete të mëdha.

Pajisja me kompjuter në shtëpi është një tregues kyç për përfshirjen në arsimin online, mundësitë e punës në distancë, aksesin në informacion dhe shërbimet publike elektronike. Mungesa e teknologjisë në familje thellon pabarazitë sociale dhe kufizon mundësitë për zhvillim individual dhe komunitar. m.p.

Sot mbushen plot 16 vite nga një prej ngjarjeve më të rënda në historinë e Policisë së Shtetit. Më 7 gusht të vitit 2009, katër efektivë të forcave operacionale mbetën të vrarë në përpjekje për arrestimin e Dritan Dajtit.

Altin Dizdari, Fatos Xhani, Kastriot Feska dhe Saimir Duçkollari gjetën vdekjen pas përplasjes me armë zjarri me të shumëkërkuarin e drejtësisë asokohe.

Më 7 gusht të vitit 2009, efektivët e Njësisë Operacionale të Policisë së Shtetit ndërhynë në zonën e plazhit për të arrestuar Dritan Dajtin, i cili ishte në kërkim pasi ai ishte dënuar për vrasjen e biznesmenit Agim Beqo, ngjarje e ndodhur në vitin 1999 në Tiranë.

Katër oficerët e policisë të vrarë u shpallën më pas Dëshmorë të Atdheut dhe u varrosën me ceremoni zyrtare në Varrezat e Dëshmorëve të Atdheut në Tiranë.

Çështja ndaj Dritan Dajtit testoi gjithë sistemin gjyqësorë në vend, u zvarrit për vite me radhë, pas tërheqjes së njëpasnjëshme të avokatëve dhe tërheqjes së trupave gjykuese. Megjithatë, më 23 korrik 2014 Gjykata e Faktit të Krimeve të Rënda dënoi Dajtin me 4 burgime të përjetshme.

Vendimi megjithatë nuk qe jetëgjatë. Gjykata e Apelit për Krimet e Rënda prishi vendimin e Shkallës së Parë, pasi sipas saj nuk ishte mbajtur parasysh e drejta e Dritan Dajtit për të pasur përfaqësues ligjorë.

Në Gjykatën e Lartë bënë rekurs edhe Prokuroria edhe Dritan Dajti. E para kërkoi lënien në fuqi të vendimit të Gjykatës së Shkallës së Parë për Krimet e Rënda, ndërsa Dajti kërkoi pafajësi ose zbutje të akuzës në vrasje në tejkalim të vetëmbrojtjes. Ai po ashtu pretendoi se i ishte shkelur e drejta e mbrojtjes.

Organi më i lartë i drejtësisë në Shqipëri vendosi të kthente çështje për gjykim në Gjykatën e Apelit për Krimet e Rënda, duke arsyetuar se Dajtit nuk i ishte cënuar e drejta e mbrojtjes dhe se këtë ai mund ta shfrytëzonte në Gjykatën e Apelit.

Kthimi i çështjes solli edhe problemin se në këtë gjykatë nuk kishte më trupa gjykues për të shqyrtuar çështjen, pasi thuajse të gjithë gjykatësit kishin qenë një herë pjesë e gjykimit të saj me vendime të ndryshme. Për këtë rast në Gjykatën e Apelit të Krimeve të Rënda u komanduan pesë gjyqtarë nga rrethet.

Pas një sage gjyqësore 15 vjeçare që pasoi vrasjen e katër punonjësve të Policisë së Shtetit në vitin 2009, Gjykata e Lartë vendosi në vitin 2024 që të rikthejë dënimin me burgim të përjetshëm për Dritan Dajtin. m.p.

Zëvendëskryeministrja Belinda Balluku ka ndarë pamjet e zjarreve në pyllin me pisha mes Patosit e Mallakastrës dhe thotë se ekipet e Emergjencave Civili të të dy bashkive janë angazhuar maksimalisht për vënien e tyre nën kontroll.

Zjarret kanë nisur prej ditës së djeshme dhe për shkak të terrenit dhe pamundësisë për kontroll nga toka, në ndihmë të zjarrfikësve ka shkuar dhe një helikopter Cougar.

“Zjarri që ka përfshirë prej dje një pyll pishash që shtrihet mes Patosit e Mallakastrës, po kontrollohet nga Emergjencat Civile në bashkëpunim me forcat e tjera nga dy bashkitë e përfshira.

Tashmë dhe një helikopter i ka ardhur në ndihmë trupave të ndodhura atje që nga dita e djeshme.

Të gjithë po bëjnë maksimumin që këto sipërfaqe të mëdha të këtij pylli, që shtrihet mes Lofkëndit e Drenies, të mos dëmtohen më tej. Zjarrvënia e qëllimshme dënohet nga Kodi Penal”, shkruan Balluku. m.p.

Alvaro Morata së shpejti do të jetë lojtar i Comos. Telenovela e gjatë verore, e krijuar për shkak mosmarrëveshjeve midis Milan dhe Galatasaray, duket se është afër fundit.

Diskutimet midis palëve gjatë orëve të fundit kanë qenë pozitive dhe tani Cesc Fabregas është gati të mirëpresë bashkëkombësin e tij për të forcuar sulmin e klubit të Comos.

Marrëveshja e huazimit do të çojë në arkat e Milanit 1 milion euro paraprakisht, plus 9 milion euro për një blerje të detyrueshme.

Klubi turk, i cili kërkoi kompensim për përfundimin e parakohshëm të huazimit, do të marrë 5 milion euro në total (tre milion euro plus dy bonuse).

Spanjolli, nga ana tjetër, do të nënshkruajë një kontratë katërvjeçare deri në vitin 2029.

LUTFI DERVISHI – Tribunali për Krimet e Luftës në ish-Jugosllavi që u ngrit më 1993, kur ende tymi dilte nga shtëpitë e djegura në Bosnje, nisi hetimet dhe arrestimet me një shpejtësi që, për standardet ndërkombëtare, quhej blitzkrieg.

Slobodan Millosheviçi, president i Serbisë, i quajtur i “Kasapi i Ballkanit” u arrestua në 2001, aktakuza u ngrit shumë shpejt, dhe gjykimi nisi në 2002 pra vetëm një vit pas arrestimit.

Tani kthehemi te Haga e Kosovës. U desh më shumë se një dekadë për ta ngritur një dhomë gjykimi dhe, edhe pasi u arrestuan ish-drejtuesit e UÇK-së në 2020, jemi në vitin e pestë të pritjes, me një proces që ecën më shpejtësinë e breshkës.

Në Tribunalin për Jugosllavinë , për krimet e luftës u gjykuan kryetar shtetesh, gjeneralë dhe arkitektësh të spastrimit etnik. Në Specialen për Kosovën, na u deshën pesë vjet për të verifikuar nëse një komandant lokal kishte dijeni për zinxhirin komandues. Dhe bëhet fjalë për UÇK një lëvizje vetëmbrojtëse kundër dhunës së armatosur dhe drejtuesin e saj Hashim Thaçi i cilësuar nga ish Presidenti SHBA -se Joe Biden si George Washingtoni i Kosovës.

Pra, një tribunal gjykoi përgjegjësit e masakrave masive në më pak kohë sesa kjo dhoma e Hagës, që duket i ka harruar të pandehurit në burg. Me këtë ritëm, do përfundojnë dënimet para se të mbarojë procesi. m.p.

Në Prishtinë po protestohet “kundër padrejtësisë” nga Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës (UÇK), të cilët po akuzohen për krime lufte dhe krime kundër njerëzimit.

Gjatë fjalimit para protestuesve, Ali Ahmeti, që ka qenë pjesë e UÇK-së, bëri thirrje liri për ish-krerët e UÇK-së.

Ai tha se ata po trajtohen padrejtësisht nga Gjykata Speciale. “Sot kërkojmë të drejtën tonë, UÇK-ja ka bërë një luftë të drejtë, për liri, për çlirim nga pushtimi. Ajo i është përmbajtur ligjeve ndërkombëtare të luftës. Nuk është marrë me të pafajshmit, nuk ka vrarë civilë, gra, fëmijë, apo pleq”, tha Ahmeti.

Sipas Ahmetit, Serbia po bën gjithçka që përmes gjykatës në Hagë “të zhbëjë shtetin e Kosovës”. Në këtë drejtim ai përmendi se Gjykata ka marrë prova materiale nga Serbia. “Ky model i drejtësisë selektive, nuk sjellë drejtësi universale, por narrativ që zhvendos fajin nga pushtuesit te çlirimtarët”, tha Ahmeti. m.p.

Zurdi Bresho një ish-efektiv i nderuar në radhët e bluve ka ndërruar jetë këtë të enjte. Lajmin e trishtë e ka dhënë kreu i Shqipëria Bëhet, Adriatik Lapaj, i cili përmes rreshtave ka treguar se sa njeri i paqtë, fjalë pak, i qeshur dhe i dashur ka qenë zoti Zurdi.

Me figurën e tij Lapaj tregon se është rritur qysh fëmijë, pasi ka qenë shoku i të atit, po ashtu dhe ai Polic.

Madje, avokati ka treguar edhe për takimin e fundit që pati me të në Sarandë, para zgjedhjeve të 11 Majit, ku mbylli fushatën në qytetin bregdetar si dhe për lulet që mbollën së bashku të cilat tani nuk dihet nëse do të lulëzojnë më pa kujdesjen e ish-policit i cili ashtu si dhe Lapaj thotë i qëndronte mbi kokë.

“Ika në universitet dhe kaluan vite pa e parë. Derisa një ditë, rreth pesë vite më parë, teksa po mbillja lule bukovile në lagjen “Kodër”, dëgjova një zë. Nga ekipi më bënin me shenjë të ktheja kokën. Buzë gardhit të një banese, mbështetur mbi tela, qëndronte një burrë i buzëqeshur.

E njoha menjëherë. Bëmë muhabet dhe mbollëm përpara banesës së tij dy lule. Sa herë shkoja në Sarandë, kaloja e kontrolloja pemët dhe lulet që kishim mbjellë në qytet. Ato që mbolla me Zurdiun ishin të shëndetshme, më të bukura, më të kujdesura… Ai kujdesej për to”, shkruan Lapaj ndër të tjera.

Ndërkohë që ish-efektivi Zurdi Bresho do të përcillet ditën e nesërme 8 gusht për në banesën e fundit. Ceremonia do të mbahet në orën 11:00 dhe trupi i tij do të prehet në varrezat në Nivicë, në fshatin e tij të lindjes. m.p.

Shtatë shtete kanë prodhuar dy të tretat e katër llojeve më të zakonshme të plastikës më 2024, sipas kompanisë britanike për konsulencë mjedisore, Eunomia, dhe grupit kërkimor për klimën dhe energjinë, Zero Carbon Analytics.

Por, Kina gjendet në një kategori më vete, pasi ka prodhuar sa gjashtë vendet e tjera së bashku, sipas këtij studimi.

Shifrat u publikuan teksa 184 shtete po përpiqen të gjejnë një gjuhë të përbashkët në negociatat në Gjenevë për një traktat, që synon t’i japë fund ndotjes nga plastika.

Studimi i Eunomia dhe Zero Carbon Analytics përqendrohet në prodhimin e disa prej llojeve më të përdorura të polimereve: polietileni (PE), polipropileni (PP), polietileni tereftalat (PET) – që zakonisht përdoret në shishet e pijeve – dhe polistireni (PS).

Kina ishte përgjegjëse për 34 për qind të prodhimit të katër polimereve kryesore vitin e kaluar, u tha në studim. Në vendin e dytë janë Shtetet e Bashkuara me 13 për qind, pasuar nga Arabia Saudite dhe Koreja e Jugut me pesë për qind, India me katër për qind, Japonia me tre për qind dhe Gjermania me dy për qind.

Sipas një studimi të mëparshëm nga ofruesi i të dhënave për energjinë, Wood Mackenzie, prodhimi i plastikës është i përqendruar në një grup të vogël të kompanive gjigante, disa prej të cilave janë në pronësi shtetërore. m.p.

Ministri i Financave Petrit Malaj ka bërë të ditur se numri i të punësuarve të rinj ka shënuar një rritje gjatë gjashtëmujorit të parë të vitit 2025 krahasuar me një vit më parë. Në një postim në Facebook, kreu i financave bën të ditur se janë mbi 10 mijë e 500 punonjës të rinj më shumë, në krahasim me janar-qershor 2024.

“Numri i të punësuarve të rinj rezultoi me një ecuri pozitive në gjashtëmujorin e parë të vitit 2025. Shifrat e raportuara nga Administrata Tatimore flasin për 10,523 punonjës të rinj më shumë, në krahasim me janar-qershor 2024”, shkruan Malaj. m.p.