Vendet nordike po përjetojnë një vapë vërtet të paparë.

”The Guardian” raporton se një stacion meteorologjik në pjesën norvegjeze të Arktikut regjistroi temperatura mbi 30 gradë Celsius për 13 ditë në korrik, ndërsa Finlanda pati tre javë radhazi me të njëjtën temperaturë.

Shkencëtarët thonë se kjo është seria më e gjatë e regjistruar që nga viti 1961 dhe 50% më e gjatë se rekordi i mëparshëm.

“Një valë vape vërtet e paparë është ende në kulmin e saj, me temperatura maksimale rreth 32-33°C”, tha Mika Rantanen, një klimatolog në Institutin Meteorologjik Finlandez, në një postim në mediat sociale.

“Rajonet e Arktikut kanë regjistruar gjithashtu tre javë temperatura mbi 25 gradë Celsius dhe mund të barazohen me rekordet e tyre të nxehtësisë së gushtit”, shtoi ai.

The post Evropa Veriore goditet nga një valë të nxehti të papërjetuar më parë appeared first on Albeu.com.

Prokuroria e Posaçme Kundër Korrupsionit dhe Krimit të Organizuar (SPAK) paraqiti në Gjykatën e Posaçme të Shkallës së Parë, kërkesën për gjykim të çështjes penale nr. 161 të vitit 2023, në ngarkim të shtetasve:

Limon Shala
Fatmir Thaçi
Florant Saraçi
Engjell Cara
Shkëlqim Hoxha

Në përfundim të hetimeve të kryera, të mbështetura në prova dhe analiza ligjore, ka rezultuar se:

Shtetasit Engjell Cara, Limon Shala, Fatmir Thaçi dhe Florant Saraçi janë vënë nën akuzë për kryerjen e veprës penale,“Korrupsioni aktiv në zgjedhje”, e kryer në bashkëpunim dhe më shumë se një herë, parashikuar nga nenet 328, 25 dhe 50, germa “h” të Kodit Penal.

Shtetasi Shkëlqim Hoxha akuzohet për veprën penale“Moskallëzim i krimit”, parashikuar nga neni 300 i Kodit Penal.

Hetimet treguan se këta shtetas, në bashkëpunim me njëri-tjetrin, kanë siguruar dhe ofruar bileta udhëtimi të parapaguara për persona të ndryshëm (të dokumentuara në 64 raste), me qëllim që të votonin në favor të kandidatit, Shkëlqim Hoxha, në zgjedhjet vendore të vitit 2023 në Bashkinë Rrogozhinë.

Gjithashtu, ka rezultuar se shtetasi Shkëlqim Hoxha ishte në dijeni të kësaj veprimtarie të paligjshme, më konkretisht se shtetasit Fatmir Thaçi dhe Limon Shala ishin të angazhuar në sigurimin dhe ofrimin e biletave të udhëtimit për persona të ndryshëm, me qëllim pjesëmarrjen në votime si dhe dhënien e votës në favor të tij, për shkak të cilësisë së tij si kandidat i Partisë Demokratike për Bashkinë Rrogozhinë Ai nuk e ka kallëzuar në organet kompetente, në kundërshtim me dispozitat ligjore në fuqi, konkretisht nenin 300 i Kodit Penal.

Procedimi penal nr. 161/2023 është bashkuar me procedimin penal nr. 162/2023, duke u hetuar si një çështje e vetme, për shkak të përputhjes së fakteve dhe subjekteve nën hetim.

Regjistrimi i procedimeve është bërë mbi bazën e referimeve të përcjella nga strukturat hetimore pranë Drejtorisë Vendore të Policisë Durrës.

The post SPAK çon për gjykim pesë shtetas për blerje votash, në zgjedhet 2023, në Rrogozhinë appeared first on Albeu.com.

Reshje të dendura shiu dhe breshër të fuqishëm kanë përfshirë disa rajone të Kosovës gjatë pasdites së sotme, duke shkaktuar përmbytje dhe ndërprerje të energjisë elektrike.

Zonat më të prekura janë Brezovica, Gjilani, Ferizaj dhe disa fshatra të komunës së Gjakovës.

Pamjet e shpërndara në rrjetet sociale tregojnë rrugë dhe oborre të përmbytura, me nivele të larta të ujit dhe shtresa të dendura breshëri në shumë lokacione.

Rrugët urbane janë mbuluar nga uji, duke vështirësuar qarkullimin e automjeteve dhe duke rrezikuar objektet afariste dhe banesat në katet e ulëta.

Situatë e ngjashme është raportuar edhe në Ferizaj, ku rrjetet e kanalizimit nuk kanë përballuar vëllimin e madh të ujit.

Në komunën e Gjakovës, disa fshatra janë goditur nga breshëri i madh.

Ndërkohë, Kompania për Distribuimin e Energjisë Elektrike në Kosovë (KEDS) njoftoi se reshjet kanë shkaktuar dëmtime në rrjetin elektrik, duke lënë pa energji një numër të konsiderueshëm të konsumatorëve, veçanërisht në rajonin e Anamoravës.

“Ekipet tona janë në terren dhe po punojnë pa ndërprerje për të rikthyer furnizimin me energji sa më shpejt që të jetë e mundur”, thuhet në njoftimin e KEDS-it

The post Reshje të fuqishme dhe breshër në disa rajone të Kosovës appeared first on Albeu.com.

Ditën e martë vendi ynë do të jetë në ndikimin e kushteve atmosferike relativisht të paqëndrueshme.

Moti parashikohet fillimisht me kthjellime dhe gradualisht shtim vranësirash mesatare deri të dendura, më të theksuara në relievet kodrinore-malore të vendit.

Temperaturat maksimale do të arrijnë në 30 gradë celcius, ndërsa ato minimale në 14 gradë celcius.

Reshjet e shiut parashikohen me intensitet të ulët të karakterit lokal në pjesën më të madhe të vendit, ndërsa në intervale të shkurtra kohore në mënyrë të izoluar, në jug priten shtrëngata me shkarkesa elektrike e breshër (në male).

Era do të fryjë e lehtë me drejtim kryesor juglindje-veriperëndim me shpejtësi mesatare 7 m/s, në bregdet dhe lugina hera-herës do të arrijë shpejtësi 8-16m/s

Valëzimi në det do të jetë i forcës 2-3 ballë.

The post Moti bën kthesën e papritur për nesër, ja çfarë pritet të ndodhë me temperaturat appeared first on Albeu.com.

Hailey Bieber ka ndarë një fotografi të rrallë me të birin Jack, duke ofruar një pasqyrë të verës së saj në Instagram, ku shfaqet me pamje natyrale dhe atmosferë relaksi.

Modelja 28-vjeçare zbuloi se shtatzënia ishte një surprizë dhe pranoi se e pati të vështirë ta pranonte në fillim, për shkak të ndryshimeve emocionale dhe mendore që solli me vete.
Ajo dhe bashkëshorti i saj, Justin Bieber, mirëpritën Jack-un në gusht të vitit 2024, mes spekulimeve për vështirësi në martesë, shkruan DailyMail.

Megjithatë, Hailey i hodhi poshtë thashethemet gjatë një interviste për Vogue Italia, duke e përshkruar Justin-in si një baba të jashtëzakonshëm.

Hailey theksoi se përvoja e mëmësisë ka qenë sfiduese, por në fund një mësim i madh personal dhe për marrëdhënien e saj. “Papritmas, partneri yt të sheh si një perëndeshë, një superheroinë”, tha ajo.

Ndërkohë, Justin ka folur për vështirësitë që ka përjetuar nën vëmendjen publike, duke e përfshirë këtë tematikë edhe në albumin e tij të fundit.

The post Hailey Bieber rrëfen sfidat e mëmësisë dhe ndan momente të veçanta me djalin e saj Jack appeared first on Albeu.com.

“Shqipëria Bëhet” ka ankimuar vendimin e Komisionit të Ankesave dhe Sanksioneve të cilët ditë më parë rrëzuan zyrtarisht kreun e KQZ-së Ilrirjan Celibashin, duke ia hequr të drejtën për t’u bërë deputete kushërirës së Lapajt, Kleana Xhuvelit dhe duke ja kaluar mandatin Ana Dajkos.

Pas këtij vendimi, mesa duket partia e Adriatik Lapajt nuk ka ndërmend të ndalet dhe ka depozituar sërish një tjetër kërkesë në KAS ku dhe ka kërkuar që mandati të shkojë në duart e atij që është më i votuar në listën e hapur, i cili është dhe kreu i kësaj force politike.

Aktualisht mandati është i Ana Dajkos, të ëmës së kandidatit të “Nisma Shqipëria Bëhet” në Vlorë, Vasil Dajko.

Kujtojmë se më 23 korrik, kreu i KQZ u përpoq që “t’i jepte drejtim” sherrit mes dy ish-aleatëve, Adriatik Lapajt dhe Endri Shabanit për “karrigen” në Parlament.

Lapaj mbeti zyrtarisht jashtë Kuvendit të Shqipërisë, ndërkohë që mandati i deputetit të Nisma Shqipëria Bëhet i shkoi Kleana Xhuvelit.

Gjatë fjalës së tij, kreu i KQZ-së sqaroi pikë për pikë dhe lexoi atë çfarë ligji e thotë qartë se asnjë prej kandidatëve në listën e mbyllur, të çdo subjekti politik, nuk mund të japin dorëheqjen në datën e zgjedhjeve, apo dhe pas saj, pasi listat janë konfirmuar nga KQZ.

Ai shtoi se për t’i kaluar mandati kandidatit më të votuar në listën e hapur, të gjithë kandidatët që janë pozicionuar në listën e mbyllur duhet të heqin dorë nga mandati dhe më pas të procedohet.

Por, duke qenë se Zeqir Kordhoni, i njohur tanimë edhe si daja i Endri Shabanit, kërkoi që të “ulej” në Kuvendin e Shqipërisë, atëhere ky fakt e bëri të pamundur marrjen e mandatit nga Adriatik Lapaj.

Pas kërkesës së Kordhonit, ishte Kleana Xhuveli ajo e cila kërkoi që të vijonte garën për në Kuvend dhe bazuar në renditjen e saj në listën e mbyllur rrjedhimisht mandati i kaloi asaj.

“Zonja Kleana Xhuveli ka pohuar se dëshiron të marrë mandatin e deputetit. E ka bërë këtë deklarim edhe zoti Zeqir Kordhoni, por duke qenë se Xhuveli është renditet në listën e mbyllur të këtij koalicioni më sipër, i takon asaj e drejta për të marrë mandatin e deputetit të këtij koalicioni”, tha Celibashi.

Ku kjo çështje nuk përfundoi me kaq! Lapaj bëri kërkesë në KAS të cilët vendosën më pas që mandati t’i shkonte Dajkos, ndërkohë se kush do të ulet si përfundim në Kuvendin e Shqipërisë mbetet për t’u parë!

The post Adriatik Lapaj nuk dorëzohet kollaj, sërish kërkesë KAS-it që mandati t’i shkojë në duart e tij: E meritoj unë, jam më i votuari appeared first on Albeu.com.

Teksa u kthye nga pushimet e fundjavës, ish-presidenti amerikan Donald Trump foli me gazetarët lidhur me krizën humanitare në Rripin e Gazës, duke u ndalur veçanërisht te mungesa e ushqimit dhe ndihmës për civilët palestinezë.

I pyetur për zhvillimet më të fundit, Trump theksoi angazhimin e Shteteve të Bashkuara për të ndihmuar popullsinë në nevojë.

“Vetëm ne duam që njerëzit të ushqehen. Dhe ne jemi i vetmi vend që po e bën vërtet këtë. Po japim para për të ushqyer njerëzit”, deklaroi ai.

Megjithatë, Trump e hodhi poshtë cilësimin e situatës si gjenocid, pavarësisht dëshmive për krizën e rëndë humanitare. “Nuk mendoj se është gjenocid. Ata janë në luftë,” tha ai, duke kujtuar se konflikti nisi më 7 tetor 2023, kur Hamasi ndërmori sulme ndaj Izraelit.

Ndërkohë, javën e kaluar, i dërguari special i SHBA-së, Steve Witkoff, vizitoi një pikë të shpërndarjes së ndihmave në Gaza, e menaxhuar nga një kontraktor amerikan me mbështetje izraelite.

Së bashku me ambasadorin amerikan në Izrael, Mike Huckabee, ata vizituan edhe Rafahun qyteti jugor i Gazës që aktualisht është kthyer në një zonë ushtarake dhe thuajse i shpopulluar pas ndërhyrjes izraelite.

Pavarësisht përpjekjeve për shpërndarjen e ndihmave, agjencitë humanitare vazhdojnë të paralajmërojnë për rrezikun në rritje të urisë masive dhe kolapsit të shërbimeve bazë në enklavën palestineze.

The post Kriza në Gaza, Trump: Duam që njerëzit të ushqehen, por nuk po ndodh gjenocid appeared first on Albeu.com.

Përhapja e teknologjisë dhe rritja e përdorimit të makinerive që ndihmojnë në punët e shtëpisë po zgjerojnë vit pasi viti shpenzimet e familjeve shqiptare për riparimin e tyre.

Sipas të dhënave të INSTAT të ardhurat nga aktivitetet e shërbimeve për riparimin e kompjuterëve, celulareve, televizorëve, furrave, lavatriçeve, frigoriferëve, fshesave, hekurit, mikserëve, etj kanë shënuar 10,2 miliardë lekë ose një vlerë e përafërt me 103 milionë euro në vitin 2023.

Të dhënat tregojnë për një rritje të vazhdueshme të shërbimeve për riparimin e kompjuterëve dhe pajisjeve elektro-shtëpiake gjatë tre viteve të fundit, duke reflektuar një kërkesë në rritje për këto lloj shërbimesh në treg. Në vitin 2021, të ardhurat totale të këtij sektori arritën në 6.75 miliardë lekë, ndërsa me 2022 rreth mbi 8.6 mld lekë. Në vitin 2023 të ardhurat e bizneseve që ofrojnë shërbimet e riparimit pësuan rritje 18 për qind në krahasim me vitin 2022.

Kjo tendencë sinjalizon disa zhvillime. E para shërbimet e riparimit po bëhen gjithnjë e me të shtrenjta në çmime për shkak të mungesës së specialisteve. Riparuesit e defekteve të pajisjeve janë shumë të kërkuar, teksa një pjesë e madhe e tyre emigrojnë në vende të tjera të Europës pasi edhe atje ka mungesa në këto lloj profesionesh.

Së dyti familjet shqiptare gjithnjë e më shumë po rrisin përdorimin e pajisjeve elektroshtëpiake sidomos atyre elektronike. Gama e tyre rritet nga viti në vit dhe gjithashtu nevoja për shërbimet e riparimit gjithashtu. Kompjuterët dhe celularet tashme janë bërë sende personale dhe nevoja për riparimin e tyre po rritet me përdorimin e tyre.

Pandemia e COVID-19 dhe periudha pas saj rriti ndjeshëm përdorimin e kompjuterëve, laptopëve, celularëve dhe pajisjeve shtëpiake për punë, shkollë online apo argëtim. Kjo solli edhe një nevojë më të madhe për mirëmbajtje dhe riparim të tyre.

Gjithashtu çmimet e larta pas pandemisë kanë zhvendosur prirjen konsumatore për shërbimet e riparimit dhe mirëmbajtjes, si një zgjedhje më ekonomike në vende të blerjes së një pajisje të re. Nga ana tjetër përmes platformave online, serviset kanë më shumë mundësi për të siguruar pjesë rezervë më shpejt, çka përmirëson efikasitetin dhe rentabilitetin e aktivitetit.

Në një shoqëri që vit pas viti bëhet e varur nga teknologjia, tregu i riparimeve do të njohë rritje. Veç faktorëve të tregut, po ndikojnë edhe zhvillimet demografike në vend ku ka gjithnjë e më pak zanatçinj dhe riparues, çka po ushtron presion për çmime më të larta./Monitor

The post Shqiptarët harxhojnë mbi 100 milionë euro në vit për riparimin e kompjuterëve dhe elektroshtëpiakeve appeared first on Albeu.com.

Një moment i kapur nga “Kiss Cam” gjatë një eventi publik ka ndezur rrjetin, pasi në kamerë u panë CEO Andy Byron dhe drejtoresha e burimeve njerëzore Christine Cabot në një përqafim të afërt, që shumë e interpretuan si provë të një lidhjeje sekrete.

Pamjet u përhapën me shpejtësi, dhe reagimi i parë i Byron ishte heshtja. Por pas rritjes së presionit publik dhe spekulimeve në media, ai doli me një deklaratë të fortë:

“Jemi të pafajshëm. Do të padis të gjithë ata që përhapin shpifje. Unë dhe bashkëshortja ime jemi në proces divorci dhe Christine është gjithashtu e ndarë nga bashkëshorti i saj.”

Sipas informacioneve të publikuara nga “The Post”, Christine Cabot ishte martuar më parë me Kenneth C. Thornby, me të cilin ka një vajzë, dhe divorci i tyre është finalizuar në vitin 2022.

Megjithatë, reagimi i publikut mbetet i ndarë. Ndjekësit në rrjetet sociale nuk janë bindur nga deklaratat, duke komentuar se një njeri i pafajshëm nuk përpiqet të shmangë kamerën kur kapet në një moment të tillë.

Skandali ka vënë në pikëpyetje jo vetëm integritetin e personazheve në fjalë, por edhe mënyrën se si opinioni publik reagon ndaj marrëdhënieve të supozuara në ambiente profesionale.

The post Skandali në ‘Kiss Cam’/ Andy Byron reagon pas videos virale: Ishim të ndarë kur ndodhi appeared first on Albeu.com.

Përmes një postimi në Facebook, kreu i Partisë së Lirisë, Ilir Meta, ka reaguar pas komunikimit zyrtar të akuzave nga Prokuroria e Posaçme (SPAK), duke e quajtur procesin një hetim të fabrikuar që daton që prej dhjetorit 2019.

Meta thekson se nuk kishte asnjë të re nga takimi i fundit që zhvilloi me prokurorët më 27 maj, ndërsa përshëndeti mbylljen formale të hetimeve.

“Asgjë e re nga takimi i fundit më 27 maj me prokurorët e SPAK-ut. Përshëndes mbylljen zyrtare të hetim-fabrikimeve të nisura që në dhjetor 2019”, shkruan Meta.

Ai thekson se gjatë takimit me prokurorët, ka kërkuar sërish që të hetohet me përgjegjësi se kush ka kryer pagesat e paligjshme në emër të Lëvizjes Socialiste për Integrim (LSI) për lobimin në SHBA dhe se kujt i dërgoheshin faturat për miratim nga kompania lobuese GSIS.

“Ngritëm me forcë dhe zyrtarisht kërkesën për të hetuar me përgjegjshmëri se kush ka bërë pagesa të paligjshme për llogari të LSI-së për kompanitë në SHBA dhe së dyti se kujt i dërgonin faturat për t’u aprovuar në Partinë e Lirisë, kompania GSIS”, vijon Meta.

Sipas tij, moskryerja e hetimeve në këto dy drejtime nuk është çështje profesionale apo ligjore, por pasojë e drejtpërdrejtë e një diktati politik.

“Mos-hetimi në këto dy drejtime është vetëm pasojë e një diktati politik, pasi nga ana ligjore dhe profesionale kjo është gjëja më e thjeshtë që mund të bëhet dhe që duhet të ishte bërë prej dy vitesh”, përfundon Meta.

The post SPAK i komunikoi sot akuzat, vjen reagimi i menjëhershëm nga Meta: Asgjë e re nga takimi i 27 majit me prokurorët appeared first on Albeu.com.

Kryeministri Edi Rama, ka reaguar pas debateve publike dhe kundërshtive rreth draftit të Kodit të ri Penal të prezantuar nga qeveria.

Kreu i qeverisë shkruan se drafti, u prezantua për të mbledhur në mënyrë demokratike opinionet rreth tij.

“Drafti i ekspertëve të nderuar të fushës është prezantuar publikisht pikërisht për të mbledhur në mënyrën më demokratike dhe transparente të mundshme të gjitha opinionet rreth tij”, thekson Kryeministri.

Por, Rama shtoi se problem serioz nuk është liria në Shqipëri, por “masa domethënëse e atyre që e përdorin lirinë vetëm për të bërë sherr e shamata për mungesën e saj”.

“Të alarmuarit nga drafti i Kodit të ri Penal dhe gojëmbyllja me ligj e forcave liridashëse politike dhe mediatike, mbase duhet të kujdesen që të mos ekspozohen shumë në diell, ndërkohë që drafti i ekspertëve të nderuar të fushës është prezantuar publikisht pikërisht për të mbledhur në mënyrën më demokratike dhe transparente të mundshme të gjitha opinionet rreth tij.

Hëpërhë problem më serioz që ka liria në Shqipëri nuk është as regjimi, as drafti i kodit të ri jo e jo, po masa domethënëse e atyre që e përdorin lirinë vetëm për të bërë sherr e shamata për mungesën e saj🤡”, shkruan Rama.

The post Kodi i ri Penal/ Reagon Rama: U prezantua për të mbledhur në mënyrë demokratike opinionet rreth tij! Hëpërhë problemi më serioz që ka liria në Shqipëri s’është as regjimi dhe…. appeared first on Albeu.com.

Pas lajmit të gëzueshëm për ardhjen në jetë të djalit të tyre, Dafina Zeqiri dhe partneri i saj Kreshniku janë shfaqur për herë të parë së bashku në publik.

Dyshja u fotografua gjatë një dasme ku ishin të ftuar, ndërsa imazhi u ndanë nga vetë këngëtarja në rrjetin social Instagram.

Të veshur me elegancë dhe me buzëqeshje të ndritshme në fytyrë, Dafina dhe Kreshniku rrezatuan lumturi, ndërsa postimi u shoqërua me përshkrimin: “Mami & Babi”.

Kjo dalje e parë publike pas lindjes ka ngjallur reagime të shumta në rrjete sociale, ku fansat kanë përgëzuar çiftin për këtë kapitull të ri në jetën e tyre.

Duket se ata po e përjetojnë prindërimin me shumë dashuri dhe qetësi, duke u rikthyer gradualisht edhe në jetën shoqërore.

The post Dafina Zeqiri dhe Kreshniku dalin për herë të parë publikisht pas lindjes së djalit appeared first on Albeu.com.

Avokati i ish-presidentit të Republikës, Ilir Meta, Kujtim Cakrani, ka reaguar për mediat pas daljes nga ambientet e Prokurorisë së Posaçme (SPAK), ku klientit të tij i është komunikuar zyrtarisht aktakuza lidhur me çështjet CEZ-DIA dhe lobimin e ish-LSI-së.

Sipas Cakranit, komunikimi i akuzës nuk solli asnjë element të ri dhe prokuroria ende nuk ka dhënë përgjigje për kërkesën kryesore të mbrojtjes: të identifikohet kush ka bërë pagesat për lobimin në emër të LSI-së.

“Nuk ka asnjë gjë të re për çështjen CEZ-DIA apo për lobimin. Zoti Meta ka dhënë shpjegimet e tij dhe ka kërkuar nga prokuroria hetime të thelluara për të zbuluar kush ka kryer pagesat. Ata s’kanë asnjë informacion për këtë”, deklaroi Cakrani.

Avokati i ish-presidentit të Republikës, Ilir Meta, Kujtim Cakrani, ka reaguar për mediat pas daljes nga ambientet e Prokurorisë së Posaçme (SPAK), ku klientit të tij i është komunikuar zyrtarisht aktakuza lidhur me çështjet CEZ-DIA dhe lobimin e ish-LSI-së.

Sipas Cakranit, komunikimi i akuzës nuk solli asnjë element të ri dhe prokuroria ende nuk ka dhënë përgjigje për kërkesën kryesore të mbrojtjes: të identifikohet kush ka bërë pagesat për lobimin në emër të LSI-së.

“Nuk ka asnjë gjë të re për çështjen CEZ-DIA apo për lobimin. Zoti Meta ka dhënë shpjegimet e tij dhe ka kërkuar nga prokuroria hetime të thelluara për të zbuluar kush ka kryer pagesat. Ata s’kanë asnjë informacion për këtë”, deklaroi Cakrani.

The post SPAK i komunikon zyrtarisht akuzat Metës, flet avokati: S’ka prova për korrupsion, do të shkojmë me gjykim normal appeared first on Albeu.com.

Dy ditë më parë, gazetari i njohur Blendi Fevziu, ka folur nga Palasa, ku përmes një video të publikuar në “Facebook”, ka ngritur alarmin për braktisjen e plazheve të jugut nga turistët.

Fevziu shprehet se, plazhet janë boshatisur dhe turizmi i plazheve është nën nivelin e pritshmërive.

Sipas tij, një ndër arsyet kryesore është ulja e numrit të vizitorëve nga Kosova, Maqedonia e Veriut dhe Mali i Zi.

“Dështimi i këtij viti kanë qenë plazhet. Po pse kanë dështuar plazhet? E para dhe kryesorja, nëse referojmë të dhënat e INSTAT, 54% e turizmit vjetor përbëhet nga shqiptarët e Kosovës dhe Maqedonisë dhe më pak të Malit të Zi. Po ashtu një pjesë turistësh që e çojnë në 68% numrin e turistëve që hyjnë në rrugë tokësore, ky lloj turizmi ka pësuar rënie. Shqiptarët e Kosovës janë dukshëm më pak të pranishëm, madje edhe në veri dhe Durrës. Janë shumë pak të pranishëm në jug ku është shtuar turizmi i shqiptarëve të diasporës”, shprehet Fevziu.

Gjithashtu, Fevziu fajëson çmimet e larta për këtë braktisje, duke thënë se çmimet në jug të vendit, janë “të çmendura” dhe ideja për të tërhequr turistët elitarë, është e gabuar, pasi shërbimi nuk përputhet me çmimin dhe turistët elitarë nuk afrohen.

Si shembull, Fevziu përmend faktin se turistët elitarë nuk kanë ku dalin mbrëmjeve, apo nuk kanë ku parkojnë jahtet, pra mungon infrastruktura.

“Duhet ta mbushim mendjen, problemi kryesor i turizmit dhe dëmtimi më i madh janë çmimet. Nuk paragjykoj askënd të vendosë çmimin që do, për shezllonë, dhomën apo restorantin. Çmimi është ofertë-kërkesë, por ka një problem, me çmimet që ka Shqipëria nuk justifikon shërbimin. Në veri çmimet janë ngritur por pak, edhe në Durrës edhe në Velipojë, por janë ngritjet më të ulëta. Çmimet e jugut janë të çmendura!

Dëgjoj njerëz që thonë, po sa e merrni në Mykonos, Saint-Tropez, Monte Carlo, Sardinia, Porto Cervo. Jugu i Shqipërisë pavarësisht bukurive, nuk mund të jetë asnjë prej këtyre, sepse nuk ka shërbime, nuk ofron asgjë. Dëgjoj operatorë turistikë të dalldisur, që thonë nuk na duhet turizmi i lirë, por duam turizëm elitar. Po mirë, këta turistë elitarë ku do të shkojnë pasdite? Në cilin dyqan? Ku do ti parkojnë jahtet apo varkat e tyre? Apo do të rrinë në det me spirancë? Ku janë aeroportet që do të ulen avionët? Ku ka turist elitar që vjen dhe të mos ketë, me përjashtim të dy hoteleve me pesë yje të standardit ndërkombëtar…”, thotë Fevziu i alarmuar.

Ai jep edhe një shembull se si disa njerëz të pasur nga Evropa, zbritën nga jahti për të bërë plazh në Vlorë, por sapo panë plazhin u kthyen sërish në jaht.

“Para ca kohësh nga një jaht në Vlorë zbriti një nga familjet më të pasura të Evropës. Me të zbritur me jaht dhe me të parë plazhin, hipën në varkë dhe ikën sërish. Mos pretendoni turistë elitarë, nuk është gati Shqipëria dhe nuk do të jetë as në dhjetë vitet e ardhshme”, tha ndër të tjera Fevziu.

The post Blendi Fevziu alarmohet nga plazhet bosh në jug: Mblidhni mendjen, me keto çmime të çmendura Shqipëria nuk justifikon shërbimin… (VIDEO) appeared first on Albeu.com.

Një incident i rëndë me thirrje raciste ndaj shqiptarëve është regjistruar të shtunën në mbrëmje (2 gusht) në Sallën e Sporteve në Kumanovë, gjatë ndeshjes kualifikuese të basketbollit mes Maqedonisë së Veriut dhe Rumanisë.

Thirrjet, të cilat dyshohet se janë bërë nga tifo grupi “Kumani”, përfshinin fraza si: “Le ta kuptojnë shqiptarët e mallkuar, emri Maqedoni nuk do të zhduket. Maqedoni, e pastër”.

Thirrjet u dëgjuan në prani të disa zyrtarëve të lartë shtetërorë, duke përfshirë kryeministrin Hristijan Mickoski, zëvendëskryeministrin Ivan Stoillkoviq, ministrin e Brendshëm Pançe Toshkovski dhe kryetarin e Komunës së Kumanovës, Maksim Dimitrievski.

E gjithë skena është transmetuar drejtpërdrejt në kanalin zyrtar të Federatës Ndërkombëtare të Basketbollit (FIBA) në YouTube.

Këto thirrje shkaktuan një valë reagimesh, veçanërisht pasi ndeshja u zhvillua në prani të zyrtarëve të lartë shtetërorë.

Zëvendëskryeministri i Parë në Qeverinë e Maqedonisë së veriut, Izet Mexhiti, dënoi ashpër thirrjet, duke i cilësuar si një sulm ndaj bashkëjetesës dhe barazisë që e bën Maqedoninë e Veriut unike. Ai bëri thirrje për zbardhjen e rastit dhe parandalimin e përsëritjes së tyre.

Kryetari i Tetovës, Bilall Kasami, theksoi se incidenti nuk ishte vetëm një turp për sportin, por një goditje ndaj idesë së barazisë. Ai e cilësoi Maqedoninë e Veriut si një mozaik kulturor që duhet ndërtuar me frymë të përbashkët.

Arben Taravari, kryetar i Aleancës për Shqiptarët, theksoi se thirrjet ofenduese ndaj shqiptarëve ndodhën në prani të kryeministrit Mickovski dhe zyrtarëve të tjerë, duke kërkuar një reagim të fortë nga ana e tyre.

BDI kërkoi përgjegjësi politike dhe dorëheqjen e dy zëvendësministrave nga radhët e VLEN-it, Astrit Iseni dhe Safije Sadiki Shaini. Ajo gjithashtu u bëri thirrje të gjithë përfaqësuesve shqiptarë në qeveri që të distancohen publikisht nga ky akt.

Thirrjet raciste janë dënuar edhe nga subjekte të tjera politike, të cilat kanë kërkuar zbardhjen e shpejtë të rastit dhe marrjen e masave nga autoritetet kompetente.

Reagime pati edhe nga Kosova.

Presidentja e Republikës së Kosovës, Vjosa Osmani, ka reaguar pas thirrjeve antishqiptare që u dëgjuan gjatë ndeshjes së futbollit ndërmjet Maqedonisë së Veriut dhe Rumanisë, e zhvilluar në Kumanovë. Ajo i ka cilësuar këto thirrje si të papranueshme dhe si cenim të drejtpërdrejtë të frymës së bashkëjetesës dhe respektit të ndërsjellë.

“Shqiptarët janë popull autokton në trojet e tyre dhe meritojnë të trajtohen me dinjitet dhe barazi, ashtu si çdo komunitet tjetër”, thekson Osmani në deklaratën e saj publike.

Presidentja ka shprehur shqetësim edhe për mungesën e reagimit nga institucionet shtetërore të Maqedonisë së Veriut. Sipas saj, heshtja e zyrtarëve të lartë në Shkup i jep hapësirë retorikës së urrejtjes dhe minon tolerancën ndëretnike – një vlerë kyçe për vendet që synojnë anëtarësimin në Bashkimin Evropian.

“Sporti duhet të jetë mjet bashkimi, jo platformë për ideologji të errëta që ngjallin kujtime të dhimbshme dhe kërcënojnë paqen,” tha ajo.

Osmani u ka bërë thirrje autoriteteve në Maqedoninë e Veriut që të ndërmarrin masa të menjëhershme ndaj organizatorëve të këtyre thirrjeve dhe të dënojnë çdo formë të gjuhës së urrejtjes, për të mbrojtur parimet e tolerancës dhe barazisë.

“Republika e Kosovës do të mbrojë me vendosmëri dinjitetin e shqiptarëve, kudo që ata jetojnë”, përfundoi Presidentja Osmani.

Kryetari i PDK-së, Memli Krasniqi, ka reaguar ndaj thirrjeve “vdekje për shqiptarët” dhe “dhoma gazi për shqiptarët”, të bëra në një aktivitet sportiv në Maqedoninë e Veriut, në prani të Kryeministrit Mickoski dhe delegacionit qeveritar.

Ai i cilësoi këto thirrje si të rënda, të papranueshme dhe kundër vlerave demokratike. Krasniqi theksoi se shqiptarët janë komb shtetformues dhe partner kyç në rrugën euroatlantike të Maqedonisë së Veriut.

“Heshtja përballë gjuhës fashiste është qëndrim”, tha ai, duke kërkuar që qeveria e Maqedonisë së Veriut të distancohet qartë nga ekstremizmi.

Krasniqi kritikoi edhe Kryeministrin në detyrë të Kosovës, duke e quajtur “kumbara të kësaj qeverie në Shkup”, dhe e akuzoi për heshtje përballë kësaj klime anti-shqiptare.

“Shqiptarët nuk do të lejojnë askënd t’i nëpërkëmbë më”, përfundon reagimi.

Edhe deputeti dhe zyrtari i lartë i AAK-së, Daut Haradinaj, ka reaguar me tone të forta ndaj kryeministrit në detyrë, Albin Kurti, duke e akuzuar për heshtje të qëllimshme përballë valës së urrejtjes raciste ndaj shqiptarëve në Maqedoninë e Veriut.

Përmes një statusi në Facebook, Haradinaj thotë se “ndryshimi” që Kurti pretendoi ta sillte në këtë vend po shoqërohet me “klithma shurdhuese” të urrejtjes ndaj shqiptarëve.

Ai rendit disa nga sloganet që, sipas tij, janë dëgjuar së fundmi:

“Dhoma gazi për shqiptarët”
“Shqiptari i mirë është vetëm shqiptari i vdekur”
“Maqedoni e pastër (pa shqiptarë)”
“Shqiptarët e mallkuar ta dijnë se emri Maqedoni nuk zhduket”

Haradinaj e akuzon Kurtin për heshtje dhe mungesë reagimi, duke e quajtur atë “kumbarë të koalicionit qeverisës në Maqedoni të Veriut”.

Reagime të forta ka pasur edhe nga Shqipëria zyrtare.

Kryetarja e Kuvendit Elisa Spiropali e quajti ngjarjen “të papranueshme” dhe një kujtesë se rruga drejt një shoqërie të drejtë kërkon një angazhim të vazhdueshëm.

Spiropali theksoi se gjuha e urrejtjes, e cila nxit dhunën dhe racizmin, nuk duhet të ketë vend në asnjë hapësirë publike, e sidomos në sport. Ajo shtoi se sporti, në thelb të tij, promovon frymën e bashkimit, bashkëpunimit dhe respektit të ndërsjellë.

Kryeparlamentarja vlerësoi reagimin e institucioneve të Maqedonisë së Veriut, por kërkoi një reagim edhe më të fortë nga zyrtarët më të lartë të vendit.

“Ngjarja e djeshme në Kumanovë, ku një ndeshje basketbolli u njollos nga thirrje ekstremisht fyese dhe përjashtuese ndaj shqiptarëve, është e papranueshme dhe një kujtesë se rruga drejt një shoqërie të drejtë, gjithëpërfshirëse dhe të respektit të ndërsjellë kërkon angazhim të pandërprerë. Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit. Vlerësoj reagimin e institucioneve të RMV, duke kërkuar njëkohësisht reagim edhe më fortë publik të zyrtarëve më të lartë të vendit mik”, theksoi Spiropali.

Spiropali shtoi se bashkëjetesa ndëretnike është një vlerë e përbashkët në rrugën evropiane, e cila duhet ruajtur me përgjegjësi.

Ajo bëri thirrje që sjellja korrekte, si në fusha dhe tribuna, ashtu edhe në institucione, të shërbejë si shembull për vizionin e përbashkët për të ardhmen.

“Bashkëjetesa ndëretnike në Maqedoninë e Veriut është një vlerë e përbashkët në rrugën evropiane, që duhet ruajtur dhe kultivuar me përgjegjësi nga të gjithë faktorët në rajon, përmes veprimit, qëndrimeve dhe shembullit. Sjellja korrekte në fusha, në tribuna dhe në institucione flet shumë për vizionin tonë për të ardhmen. Shqipëria dhe shqiptarët mbeten të palëkundur në promovimin e një bashkëjetese model dhe larg ndasive të dala mode e boje”, shkruan Spiropali.

Edhe Ambasadori i Shqipërisë në Maqedoninë e Veriut, Denion Meidani, ka reaguar ashpër ndaj incidentit racist të ndodhur në Kumanovë, gjatë një ndeshjeje basketbolli.

The post Thirrjet raciste anti-shqiptare në Kumanovë, reagime të ashpra nga Kosova, Shqipëria e diaspora appeared first on Albeu.com.

Shqipëria zë vendin e fundit mes 35 vendeve europiane sa i përket shpenzimeve për pensione për frymë, sipas të dhënave për vitin 2022.

Me vetëm 1,600 euro për pensionist në vit, vendi mbetet shumë larg mesatares së Bashkimit Europian, e cila arrin në 16,100 euro.

Edhe kur merret parasysh fuqia blerëse, diferenca mbetet e ndjeshme.

Në raport me Prodhimin e Brendshëm Bruto, Shqipëria shpenzon vetëm 5.3% për pensione, kundrejt 9.3% që shpenzon mesatarisht BE-ja — një tregues i qartë i sfidave strukturore që përballet sistemi i pensioneve në vend.

Ndërkohë, Mali i Zi, edhe pse me të njëjtën përqindje të PBB-së si Shqipëria (5.3%), arrin të japë 4,000 euro për pensionist në vit, më shumë se dyfishin e Shqipërisë.

Serbia, nga ana tjetër, shpenzon 3,500 euro për pensionist dhe 6.3% të PBB-së për pensione, duke reflektuar një mbështetje më të lartë financiare të të moshuarve.

Europa

Gjithnjë e më shumë brezat e rinj po shprehen se nuk do të tërhiqen kurrë nga puna, për shkak të pasigurive financiare.

Por si ia dalin pensionistët e sotëm? Si i mbulojnë shpenzimet mujore dhe si duken realisht pensionet në Europë sot?

Grafiku më poshtë paraqet të dhënat më të fundit mbi shpenzimet vjetore publike për pension për çdo përfitues në 35 ekonomi europiane, si dhe pjesën që zënë përfitimet e pleqërisë në prodhimin kombëtar të secilit vend.

Të dhënat janë marrë nga dy baza të ndryshme të Eurostat dhe përfshijnë:

Totali i shpenzimeve për pensione publike për vitin 2022, i ndarë me numrin e përfituesve
Vlerat e shprehura si në euro, ashtu edhe sipas standardit të fuqisë blerëse (PPS)
Përqindja e PBB-së që i dedikohet pensioneve, sipas të dhënave nga baza e parë.

Këto të dhëna ofrojnë një panoramë të qartë të hendekut mes vendeve në shpenzimet për kujdesin ndaj të moshuarve, duke vënë në dukje sfidat që përballojnë pensionistët në Europë — veçanërisht ata në vendet me të ardhura të ulëta.

Islanda, Luksemburgu dhe Norvegjia kryesojnë renditjen, me pagesa vjetore pensioni mbi 30,000 euro për përfitues.

Pagat e larta, të ardhurat e qëndrueshme fiskale nga energjia apo sektori financiar, si dhe sistemet e detyrueshme të kursimeve për pension, u japin këtyre ekonomive të vogla dhe të pasura mundësinë të ofrojnë përfitime bujare për të moshuarit.

Danimarka dhe Zvicra plotësojnë pesë vendet e para, secila duke kombinuar pensionet bazë universale me skemat e detyrueshme të pensioneve profesionale.

Në të pesë vendet e para, përfitimet ende konsumojnë më pak se 9% të PBB-së – shumë nën mesataren e BE-së (12.2% të PBB-së) – falë bazave më të larta tatimore.

Pagesat e ulëta të Europës Lindore pasqyrojnë baza tatimore të dobëta

Në vende si Polonia dhe Hungaria, pensionet përthithin një pjesë të ngjashme të PBB-së si vendet nordike, por pagesat vjetore mbeten nën 7,000 euro për përfitues.

Produktiviteti i ulët kufizon fluksin e kontributeve, ndërsa emigracioni i dekadave të fundit ka reduktuar më tej fuqinë punëtore.

Kur llogariten sipas standardit të fuqisë blerëse (PPS), diferenca ngushtohet — pensionistët polakë marrin rreth 11,700 njësi PPS — por të ardhurat reale mbeten modeste.

Rritja e pagave, pjesëmarrja më e lartë e të moshuarve në tregun e punës dhe skemat shtesë të kursimeve vullnetare mund të përmirësojnë qëndrueshmërinë dhe përmbushjen e nevojave, pa rënduar buxhetet publike./ Monitor, Visual Capitalist

The post Shqipëria me pensionet më të ulëta në Europë appeared first on Albeu.com.

Dje u mbajt nata e fundit e Sunny Hill Festival, një nga ngjarjet më të mëdha muzikore në rajon, që këtë vit mblodhi mijëra fansa në Prishtinë.

Por, pavarësisht atmosferës festive, rrjetet sociale po ziejnë nga disa pamje që po qarkullojnë me shpejtësi, ku protagonistja është vetë Dua Lipa, organizatorja dhe ylli më i madh i festivalit.

Në video të publikuara gjatë ditës së tretë të festivalit, Dua shihet duke qëndruar pranë fansave, duke marrë bluza për t’i nënshkruar.

Mirëpo, ajo që ka tërhequr më shumë vëmendje është mënyra e papërshtatshme me të cilën disa fansa ia kanë hedhur bluzat, duke e goditur në fytyrë në disa raste.

Dua duket e irrituar dhe i kthen disa prej bluzave pa i nënshkruar, me një shprehje fytyre që tregon se situata nuk i ka pëlqyer aspak.

Ngjarja ka ngjallur debat në rrjete sociale: një pjesë e publikut e mbështet reagimin e saj, duke theksuar se yjet meritojnë respekt dhe qetësi në interaksionet me fansat.

Pavarësisht këtij incidenti, Sunny Hill Festival mbylli një tjetër edicion të suksesshëm, duke konfirmuar pozicionin e tij si një prej festivaleve më të rëndësishme muzikore në Evropën Juglindore.

The post Fansat godasin në fytyrë Dua Lipën me bluza gjatë kërkesave për autograf, këngëtarja reagon e nervozuar appeared first on Albeu.com.

Kreu i PD-së, Sali Berisha ka hedhur akuza se Ministri i jashtëm ka kërcënuar vëzhguesit ndërkombëtarë që të ndryshojnë raportin lidhur me zgjedhjet e 11 Majit.

Ish-kryeministri pubikuar letrën ku sipas tij thuhet ‘Dua të shpreh shqetësimin serioz lidhur me paragrafin hyrës të deklaratës, në të cilin bëhet një paraqitje thellësisht negative në pikëpamjen tonë dhe e pabalancuar e zgjedhjeve parlamentare të vitit 2025″.

Berisha deklaroi se letra u dërgua nga Ministri Igli Hasani koordinatores speciale të OSBE-së Farah Karimi më 12 Maj, sipas tij, pasi u lexua raportoi i vëzhguesve ndërkombëtare për zgjedhjet parlamentare.

Sali Berisha: Farsa elektorale e 11 majit 2025 është procesi elektoral më i shëmtuar në 32 vite pas rënies së Perdes së Hekurt. Është procesi më i diskredituar. Është procesi më i korruptuar.

Këtu në mënyrë të vazhdueshme kemi paraqitur qindra fakte dhe dokumente të pakundërshtueshme të përdorimit të mbi 1 miliard e 20 milionë euro para të buxhetit me qëllim blerjen dhe influencën e votës. Të organizimit të mbi 4 mijë e 500 aktiviteteve më shumë se tre vite të tjera të marra së bashku, në 4 muajt e fundit para zgjedhjeve, të ndaluara me ligj. Të gjysëm miliardi prokurime të ndaluara me ligj para zgjedhjeve.

Të armatosjes së terroristëve elektoralë patronazhistë me të dhënat e qytetarëve për t’i mikluar dhe kërcënuar ata. Firmosjen e licencave për mbjelljen e kanabisit në përmasa 140 herë më të mëdha se sa ç’parashikon ligji. Kemi paraqitur para jush manipulimin ekstrem të votës së diasporës.

Por ju jeni dëshmitarë se këtu, nga kjo sallë, nga Parlamenti Europian dhe asambleja parlamentare e OSBE, kam denoncuar me forcën më të madhe këcënimet, presionet e Edi Ramës dhe ministrit Igli Hasani ndaj vëzhguesve ndërkombëtarë me qëllim që ata të ndryshojnë raportin.

Siç unë u kam njoftuar, laptopi po bën transparencë të madhe.

Këtu para jush kam sjellë sot letrën kërcënuese që ministri i jashtëm i narkoshtetit, Igli Hasani, iu drejton me datën 12 maj, sapo lexohet raporti, zonjës Farah Karimi, koordinatore speciale dhe lider i misionit afatshkurtër të OSBE-së.

Ambasadorit Lamberto Zannier, kryetar i misionit të vëzhguesve të ODIHR-it.

Zotit Bjorn Soder, kryetar i delegacionit të asamblesë parlamentare të OSBE.

Zoti Simone Billi, kryetar i delegacionit të asamblesë parlamentare të Këshillit të Europës.

Dhe zotit Michael Gahler, kryetar i delegacionit të Parlamentit Europian.

Shikoni çfarë banditizmi, sapo kanë lëshuar komunikatën, atyre iu drejtohet kjo letër.

Pas kortezisë, në letër thuhet: ‘Lidhur me deklaratën e gjetjeve dhe konkluzioneve paraprake, dua t’ju përcjell pritshmërinë që këto raporte të pasqyrojnë me saktësi realitetet e observuara në terren gjatë procesit elektoral’.

Dhe vazhdon: ‘Në këtë drejtim, dua të shpreh shqetësimin serioz (imagjinoni ju çfarë mafiozësh janë këta, ata sa e kanë lexuar raportin, dhe ky sikur t’ua ketë marrë kopjen para) lidhur me paragrafin hyrës të deklaratës, në të cilin bëhet një paraqitje thellësisht negative në pikëpamjen tonë dhe e pabalancuar e zgjedhjeve parlamentare të vitit 2025’.

Përmbajtja e letrës:

Tiranë, 12 maj 2025

Për: Farah Karimi, Koordinatore Speciale dhe Udhëheqëse e Misionit Afatshkurtër të OSBE-së

Ambasador Lamberto Zannier, Shef i Misionit të Vëzhgimit të Zgjedhjeve të ODIHR

Björn Söder, Shef i Delegacionit të AP të OSBE-së

Simone Billi, Shef i Delegacionit të AP të Këshillit të Europës

Michael Gahler, Shef i Delegacionit të PE

Më lejoni t’ju shpreh edhe një herë mirënjohjen tonë të sinqertë për Misionin Ndërkombëtar të Vëzhgimit të Zgjedhjeve, për angazhimin dhe përkushtimin e vazhdueshëm në monitorimin e zgjedhjeve parlamentare të mbajtura më 11 maj 2025 në Shqipëri.

Në lidhje me Deklaratën e Gjetjeve dhe Përfundimeve Paraprake të publikuar më 12 maj 2025, dëshiroj të shpreh me respekt pritshmërinë tonë që këto raporte të pasqyrojnë në mënyrë të saktë realitetin e vëzhguar në terren gjatë gjithë procesit zgjedhor.

Në këtë kuadër, më duhet të shpreh shqetësimin serioz lidhur me paragrafin hyrës të Deklaratës, i cili paraqet një pasqyrim ndjeshëm negativ dhe, sipas mendimit tonë, të paekuilibruar të zgjedhjeve parlamentare të vitit 2025. Toni dhe korniza e këtij paragrafi hyrës rrezikon të errësojë kontekstin më të gjerë të përparimeve të bëra, përfshirë përmirësimet demokratike si rritja e transparencës, avancimi i teknologjisë zgjedhore dhe, në mënyrë të veçantë, zbatimi me sukses i votimit nga jashtë vendit.

Për më tepër, pohimi se partia në pushtet ka përfituar nga përdorimi i përhapur i burimeve administrative nuk është i mbështetur mjaftueshëm, veçanërisht për një vlerësim paraprak. Për shembull, referenca në faqen 2 (paragrafi 4) për “faljen e një numri të madh gjobash shtetërore pak para ditës së zgjedhjeve” nuk përfshin sqarimin e dhënë nga Komisioni Qendror i Zgjedhjeve (KQZ) në letrën e datës 8 maj 2025. KQZ-ja konfirmoi se projektvendimi i qeverisë për masat administrative të paekzekutuara nuk bie ndesh me Kodin Zgjedhor të Shqipërisë.

Gjithashtu, përmendja në raport e “intimidimit të përhapur të votuesve” duket të bazohet kryesisht në akuza të pa verifikuara. Siç është bërë publikisht e ditur, Struktura e Posaçme Kundër Korrupsionit dhe Krimit të Organizuar (SPAK) ka ngritur një njësi të posaçme për zgjedhjet, për të hetuar të gjitha denoncimet e besueshme për intimidim të votuesve dhe parregullsi zgjedhore. Janë nisur disa hetime dhe janë kryer arrestime – tregues të qartë të përkushtimit institucional të Shqipërisë për të mbrojtur integritetin e procesit zgjedhor dhe për të garantuar llogaridhënie.

Lidhur me përshkrimin e klimës elektorale si “shumë e polarizuar”, theksojmë se, pavarësisht mospajtimeve të forta, partia në pushtet nuk ka kundërshtuar zyrtarisht vendimet kryesore të Komisionit Qendror të Zgjedhjeve – përfshirë vonesën në publikimin e rezultateve të votimit elektronik dhe pezullimin e numërimit të votave nga Greqia, pas një kërkese nga opozita. Këto veprime pasqyrojnë një zgjedhje të qëllimshme për të ruajtur një klimë politike të qetë dhe konstruktive.

Në lidhje me vërejtjen se mjedisi mediatik mungon në raportim të pavarur dhe se shumica e mediave perceptohen të jenë në linjë me partinë në pushtet (faqe 3, paragrafi 2), dëshirojmë të rikujtojmë deklaratën e bërë nga Shefi i Misionit Ndërkombëtar të Vëzhgimit të Zgjedhjeve gjatë konferencës për shtyp pas zgjedhjeve, duke sqaruar se “nuk duket të ketë autocensurë, siç ishte raportuar në Përfundimet Paraprake.” Ne besojmë se kjo dallim është thelbësor dhe duhet të reflektohet në raportin e shkruar.

Duke marrë parasysh këto konsiderata, i bëjmë thirrje me respekt Misionit dhe ODIHR-it që të sigurojnë një qasje më të balancuar dhe të bazuar në prova në vlerësimet e tyre. Është me rëndësi që gjetjet paraprake të mos hedhin dyshime të pajustifikuara mbi një proces zgjedhor që, siç pranohet edhe në vetë raportin, është zhvilluar përgjithësisht në mënyrë profesionale dhe në përputhje me standardet demokratike.

Në fund, dëshiroj të ritheksoj mirënjohjen e thellë të autoriteteve shqiptare për rolin e rëndësishëm që luan misioni juaj në mbështetjen e zhvillimit demokratik në Shqipëri. Këtë reagim e ofrojmë në frymën e një angazhimi konstruktiv dhe bashkëpunimi të vazhdueshëm.

Ju lutem pranoni shprehjen e konsideratës sime më të lartë.

Me respekt,

IGLI HASANI

The post Zgjedhjet e 11 Majit/ Berisha publikon letrën: Ministri i Jashtëm kërcënoi vëzhguesit ndërkombëtarë, kërkoi që të ndryshojnë raportin appeared first on Albeu.com.

Kjo javë është mjaft e favorshme për Ujorët.

Ata do të kenë mundësi të reja profesionale dhe personale, duke përfituar nga kreativiteti dhe bashkëpunimi me të tjerët.

Një periudhë e shkëlqyer për të ecur përpara!

Këshilla: Besoni në veten tuaj dhe shfrytëzoni mundësitë që vijnë.

Për Gaforren – Kujdes gjatë javës!

Gaforret, mund të përballen me disa pengesa profesionale dhe tensione në marrëdhënie këtë javë.

Duhet të jenë të kujdesshëm me komunikimin dhe financat.

Këshilla: Ruani ekuilibrin dhe mos humbni besimin!

The post Njihuni me shenjat që do të shijojnë sukses dhe ato që do të përballen me pengesa appeared first on Albeu.com.

Ministri i Ekonomisë, Kulturës dhe Inovacionit, Blendi Gonxhe, ka publikuar pamjet nga punimet nga restaurimi i Muzeut Historik Kombëtar.

Ministri Gonxhe, ka publikuar videon duke treguar si ishte Muzeu dhe se si do të bëhet, teksa shprehet se Muzeu Historik Kombëtar, por rikthehet në një institucion dinjitoz dhe bashkëkohor.

Ai theksoi se Ministria e Ekonomisë, Kulturës dhe Inovacionit, është në proces buxhetimi për Fazën e II-të dhe sipas tij do të përfshijë:

Shtesa nëntokësore me laboratorë e hapësira teknike;

Fasadën e brendshme “Oculus” prej xhami dhe mbulescn ikonike;

Sisteme moderne MEP, mbrojtje nga zjarri, muzeologji bashkëkohore dhe mobilim tërësor.

Ndërsa aktualisht në fazën e parë, punimet përfshijnë:

Paketim dhe evakuim të artefakteve,

Konsolidim dhe përforcim strukturor,

Rinovim të fasadave dhe izolimin e çatisë,

Instalimin e sistemit të monitorimit CAM,

Restaurimin e fasadës me teknologji moderne (fibra karboni dhe xhaketim kolonash).

Postimi i plotë:

Mirëmëngjes nga Muzeu Historik Kombëtar, ku pas një kohe të gjatë sfidash dhe dëmtimesh, përfshirë tërmetin e 2019-tës, ka nisur restaurimi, rikonstruksioni dhe muzealizimi më i rëndësishëm i këtij institucioni simbol, me një ndërhyrje madhore në kuadër të programit #EU4Culture, nën drejtimin e UNOPS, me mbështetjen e Bashkimit Evropian dhe MEKI.

Aktualisht në fazën e parë, punimet përfshijnë:

Paketim dhe evakuim të artefakteve,

Konsolidim dhe përforcim strukturor,

Rinovim të fasadave dhe izolimin e çatisë,

Instalimin e sistemit të monitorimit CAM,

Restaurimin e fasadës me teknologji moderne (fibra karboni dhe xhaketim kolonash).

Ndërkohë, MEKI është në proces buxhetimi për Fazën e II-të, për të garantuar vijimin e këtij transformimi rrënjësor, që do të përfshijë:

Shtesa nëntokësore me laboratorë e hapësira teknike;

Fasadën e brendshme “Oculus” prej xhami dhe mbulescn ikonike;

Sisteme moderne MEP, mbrojtje nga zjarri, muzeologji bashkëkohore dhe mobilim tërësor.

Po rikthejmë Muzeun Historik Kombëtar në një institucion dinjitoz dhe bashkëkohor, të denjë për të ruajtur dhe treguar historinë tonë kombëtare.

The post Restaurimi i Muzeut Historik/ Blendi Gonxhe publikon pamjet: Transformimi përfshin shtesa nëntokësore me laboratorë, do e rikthejmë në një institucion dinjitoz appeared first on Albeu.com.