Dashi
Të lindur më: 21 Mars – 19 Prill
Në dashuri sot priten biseda të ndjeshme me partnerin, ndaj mundohuni të tregoni mirëkuptim. Në punë, do të keni mundësi të zgjidhni një çështje të vjetër që ju ka shqetësuar prej kohësh. Shëndeti mund të jetë pak i luhatshëm, ndaj mos e neglizhoni pushimin dhe kujdesuni për veten. Financat duken të qëndrueshme, por shmangni shpenzimet impulsive gjatë ditës.

Demi
Të lindur më: 20 Prill – 20 Maj
Sot ndiheni të afërt me partnerin ose dikë të veçantë mund të hyjë në jetën tuaj. Në aspektin profesional, do të gjeni mbështetje nga kolegët për një projekt të rëndësishëm. Shëndeti është i mirë, por duhet t’i kushtoni më shumë vëmendje ushqyerjes. Në anën financiare, mund të merrni një lajm të vogël pozitiv që ju jep më shumë siguri.

Binjakët
Të lindur më: 21 Maj – 20 Qershor
Çështjet e zemrës mund të sjellin surpriza të këndshme, veçanërisht nëse jeni të hapur për biseda të sinqerta. Në punë, një ide e re mund të vlerësohet nga eprorët dhe të hapë rrugë të reja. Shëndeti kërkon më shumë aktivitet fizik, ndaj merrni kohë për veten. Financat janë të qëndrueshme, por është mirë të bëni një planifikim më të detajuar të shpenzimeve.

Gaforrja
Të lindur më: 21 Qershor – 22 Korrik
Sot lidhjet romantike kërkojnë më shumë durim dhe mirëkuptim, pasi mund të lindin keqkuptime të vogla. Në punë, do të ndiheni të motivuar për të përfunduar detyra të rëndësishme dhe të arrini rezultate të mira. Shëndeti është i mirë, por mos e nënvlerësoni lodhjen mendore. Financat janë të balancuara, por është koha të mendoni për kursime afatgjata.

Luani
Të lindur më: 23 Korrik – 22 Gusht
Në dashuri, sot është dita ideale për të shprehur ndjenjat dhe për të forcuar lidhjet ekzistuese. Në ambientin e punës ju pret një surprizë pozitive ose një vlerësim nga drejtuesit. Shëndeti është në gjendje të mirë, por mos e teproni me aktivitete fizike. Në aspektin financiar, mund të merrni një ofertë interesante që ja vlen të analizohet me kujdes.

Virgjëresha
Të lindur më: 23 Gusht – 22 Shtator
Ndjenjat tuaja do të jenë të balancuara sot, duke ju mundësuar një komunikim të mirë me partnerin. Në punë, mund të hasni disa sfida, por përkushtimi juaj do të shpërblehet. Shëndeti kërkon më shumë kujdes për sistemin nervor, ndaj shmangni stresin e tepërt. Financat janë të qëndrueshme, por mos harroni të bëni llogari të sakta para çdo shpenzimi.

Peshorja
Të lindur më: 23 Shtator – 22 Tetor
Marrëdhëniet romantike janë në qendër të vëmendjes sot, dhe një bisedë e thellë do të sjellë qartësi. Në punë, do të keni mundësi të përmirësoni marrëdhëniet me kolegët dhe të arrini një marrëveshje të rëndësishme. Shëndeti është i mirë, por kushtojini vëmendje ushqimit të shëndetshëm. Financat janë stabile, por një shpenzim i papritur mund t’ju detyrojë të rishikoni buxhetin.

Akrepi
Të lindur më: 23 Tetor – 21 Nëntor
Sot ndiheni më të afërt me partnerin dhe është momenti i duhur për të zgjidhur mosmarrëveshje të vogla. Në aspektin profesional, do të ndjeni presion për të përfunduar detyra, por do t’ia dilni me sukses. Shëndeti është i mirë nëse i kushtoni rëndësi pushimit. Në planin financiar, shmangni investimet e nxituara dhe qëndroni të kujdesshëm me shpenzimet.

Shigjetari
Të lindur më: 22 Nëntor – 21 Dhjetor
Jeta sentimentale sot do të jetë plot energji pozitive, veçanërisht për ata që kërkojnë diçka të re. Në punë, do të merrni njohje për përpjekjet tuaja dhe mund të shfaqen mundësi për avancim. Kujdesuni për shëndetin, sidomos ndaj lodhjes dhe mungesës së gjumit. Financat janë të mira, por bëni kujdes me huatë ose borxhet.

Bricjapi
Të lindur më: 22 Dhjetor – 19 Janar
Sot ndjeni nevojën të jeni më të hapur me ndjenjat tuaja, gjë që do të përmirësojë marrëdhëniet personale. Në punë, një takim i rëndësishëm mund të sjellë mundësi të reja bashkëpunimi. Shëndeti është i mirë, por mos e neglizhoni aktivitetin fizik. Financat janë të qëndrueshme, por është momenti të mendoni për investime me risk të ulët.

Ujori
Të lindur më: 20 Janar – 18 Shkurt
Në dashuri, sot është ditë e mirë për të forcuar besimin dhe për të bërë plane të përbashkëta me partnerin. Në aspektin profesional, do të keni energji për të përballuar sfida dhe për të përmbyllur projekte të mbetura pezull. Shëndeti është i favorshëm, por kujdesuni për hidratimin. Financat janë nën kontroll, ndaj mund të lejoni ndonjë shpenzim të vogël për veten.

Peshqit
Të lindur më: 19 Shkurt – 20 Mars
Marrëdhëniet personale sot kërkojnë më shumë vëmendje, ndaj kushtojini kohë njerëzve të dashur. Në punë, mund të përballeni me vonesa të vogla, por asgjë që nuk zgjidhet me durim. Shëndeti është i mirë, por mos e teproni me ushqimet e rënda. Në aspektin financiar, shmangni spekulimet dhe qëndroni në kursin tuaj të zakonshëm.

The post Horoskopi 19 Korrik, ja çfarë kanë parashikuar yjet për ju appeared first on Albeu.com.

Një bërthamë akulli që mund të jetë më e vjetër se 1.5 milion vjet ka mbërritur në Britani, ku shkencëtarët do ta shkrijnë me kujdes për të zbuluar të dhëna jetike mbi historinë klimatike të planetit.

Ky cilindër i akullt, i nxjerrë nga thellësitë e Antarktidës Lindore, është konsideruar si akulli më i vjetër i planetit dhe përmban informacion të paprecedentë mbi përqendrimet e dioksidit të karbonit, temperaturat dhe modelet e erës që datojnë më shumë se një milion vjet më parë.

Akulli është dërguar në British Antarctic Survey në Kembrixh, ku ekipi i udhëhequr nga Dr. Liz Thomas do ta analizojë me metoda të avancuara gjatë një procesi që zgjat shtatë javë. Ata do të përdorin teknologji si spektrometri masiv me plazmë të lidhur induktivisht (ICPMS) për të analizuar mbi 20 elementë kimikë dhe izotope në lëngun e shkrirë të akullit.

Kjo bërthamë mund të zbulojë se si ka ndryshuar klima globale gjatë Tranzicionit të Pleistocenit të Mesëm (800,000 – 1.2 milion vjet më parë), kur ciklet e akullnajave ndryshuan nga çdo 41,000 në çdo 100,000 vjet. Kjo është një nga pyetjet më të mëdha të pazgjidhura në shkencën e klimës.

Bërthamat e akullit PNRA/IPEV 15 që duken si të ngrira dhe kanë diametër rreth 15 cm janë brenda kanaleve metalike. Ato janë të grumbulluara mbi rafte druri dhe metali.

Gjithashtu, shkencëtarët kërkojnë të kuptojnë se si kanë reaguar shtresat e akullit dhe nivelet e detit në të kaluarën, në një periudhë kur përqendrimet natyrore të CO₂ mund të kenë qenë po aq të larta sa janë sot.

Projekti përfshin institucione nga Britania, Gjermania, Zvicra, Italia dhe Franca. Akulli u shpuar në një zonë rreth 40 km nga baza kërkimore Concordia, u nda në segmente 1 metër dhe u transportua me anije e më pas me furgon frigoriferik në Evropë.

Në total, janë nxjerrë 2.8 km akull, sa tetë Kulla Eiffel të grumbulluara njëra mbi tjetrën.

The post Pritet zbulimi i sekreteve të klimës së Tokës, akulli 1.5 milionë vjeçar do të shkrihet appeared first on Albeu.com.

Ukraina ka riatdhesuar 1,000 trupa të saj bazuar në një marrëveshje të arritur me Rusinë në Stamboll, njoftoi më 17 korrik Shtabi Koordinues për Trajtimin e të Burgosurve të Luftës.

“Sipas palës ruse, trupat u përkasin qytetarëve të Ukrainës, përfshirë ushtarë”, tha Shtabi Koordinues në Telegram.

Shkëmbimi u konfirmua nga Vladimir Medinsky, kreu i delegacionit rus në Stamboll, i cili pohoi më tej se Ukraina dorëzoi 19 trupa të ushtarëve rusë si pjesë e marrëveshjes.

Sipas marrëveshjes së arritur më 2 qershor në Stamboll, Rusia dhe Ukraina u dakortsuan të për riatdhesimin e rreth 6,000 trupave të ushtarëve dhe qytetarëve ukranias.

Ky shkëmbim u kryer në disa faza dhe përfundoi më 16 qershor e 6,057 trupa të kthyer në Ukrainë sipas marrëveshjes.

Kievi më vonë deklaroi se Moska përfshiu trupa të disa ushtarëve të vrarë në transferim. Nga ana tjetër, Ukraina i ktheu Rusisë tre ushtarë të vrarë rus.

Megjithatë, dy raundet e bisedimeve të paqes ruso-ukrainase në Stamboll në maj dhe qershor dështuan të arrinin ndonjë përparim drejt përfundimit të armiqësive, megjithëse të dyja palët arritën marrëveshje për shkëmbime të reja të të burgosurve, duke përfshirë shkëmbimin më të madh të luftës që përfshinte 1,000 robër nga secila palë.

Kievi i ka kërkuar vazhdimisht Moskës të miratojë një formulë shkëmbimi të të burgosurve “të gjithë për të gjithë”. Ndërsa mbi 5,000 ukrainas janë kthyer nga robëria ruse që nga marsi i vitit 2022, Rusia vazhdon t’i rezistojë një shkëmbimi gjithëpërfshirës.

The post Ukraina riatdheson 1,000 trupa në kuadër të një marrëveshjeje me Rusinë appeared first on Albeu.com.

Igor Popoviç, përfaqësues i Zyrës për Kosovën në Qeverinë e Serbisë, është arrestuar të premten nga Policia e Kosovës, pas një deklarimi që ka bërë në Rahovec kundër Ushtrisë Çlirimtare të Kosovës (UÇK), raportojnë mediat në Kosovë.

Popoviç është ndihmës i Petar Petkoviç, shefit të kësaj Zyre në Serbi. Përgjatë deklarimit të tij, Popoviç e ka quajtur UÇK-në organizatë “terroriste”.

Ushtria Çlirimtare e Kosovës (UÇK) ishte forcë politiko–ushtarake e cila ka luftuar për çlirimin e Kosovës nga sundimi serb në periudhën 1990-1999. Radio Evropa e Lirë ka kërkuar konfirmim prej Policisë së Kosovës lidhur me raportimet për arrestim, por ende nuk ka marrë përgjigje./ REL

The post Etiketoi UÇK-në si “organizatë terroriste”, arrestohet në Kosovë zyrtari serb appeared first on Albeu.com.

Pak çaste para se të firmoste ligjin e ri për rregullimin e kriptomonedhave, presidenti amerikan Donald Trump falënderoi publikisht një nga një të gjithë ata që kontribuuan në hartimin e të ashtuquajturit ligj GENIUS, duke shtuar me humor të njohurin e tij: “E quajtën kështu për nderin tim”, tha Trump, duke shkaktuar të qeshura në sallë.

Ai e përshkroi ligjin si “të jashtëzakonshëm” dhe theksoi se është rezultat i një pune të gjatë dhe të përkushtuar:

“Ky është një ligj i fuqishëm… kemi punuar shumë fort për këtë”, deklaroi ai, duke falënderuar të gjithë të përfshirët.

Nënshkrimi i ligjit u shoqërua edhe me mesazhe me nuancë politike dhe ekonomike, ku Trump la të kuptohej se së shpejti do të ketë zhvillime të rëndësishme në tregtinë ndërkombëtare.

“Kur u dërgoj një letër ku thuhet se do të paguajnë 35% ose 40% tarifa doganore, kjo është në vetvete një marrëveshje,” theksoi ai, duke shtuar:

“Pastaj do të na telefonojnë për të parë nëse mund të bëjmë një marrëveshje ndryshe – si për shembull të hapin tregun e tyre për ne.”

Deklaratat e Trump vijnë në një moment kur kriptomonedhat dhe rregullimi i tyre janë bërë temë e debatit publik dhe ekonomik në SHBA, veçanërisht për rolin që ato mund të luajnë në ekonominë dixhitale të së ardhmes.

The post Trump nënshkruan ligjin për kriptomonedhat appeared first on Albeu.com.

Në tokat e fshatit Sektor Seman, është gjetur i dekompozuar, trupi i pajetë i shtetasit M. Sh., 72 vjeç, banues në Fier.

Nga kqyrja paraprake, nuk janë konstatuar shenja dhune.

Ky shtetas është shpallur në kërkim në datë 12.07.2025, nga Komisariati i Policisë Fier, pas kallëzimit të bërë nga vëllai i tij për largim nga banesa.

Grupi hetimor po punon për përcaktimin e shkakut të vdekjes.

The post I humbur një javë më parë, gjendet trupi i dekompozuar i 72-vjeçarit në Seman appeared first on Albeu.com.

Zbardhen të tjera detaje nga ngjarja e rëndë që ndodhi pasditen e sotme në lumin Shkumbin, ku dy të mitur, një 7 dhe tjetri 9 vjeç u mbytën teksa laheshin.

I afërmi i fëmijëve, ka folur për mediat dhe ka treguar se një prej fëmijëve e gjeti një punëtor i hidrocentralit aty pranë dhe e mbante në krahë ndërsa fëmijën tjetër e mbante policia.

Sakaq, i afërmi i viktimave raporton se prindërit e fëmijëve janë në gjendje të rënduar pas humbjes së jetës së djemve të tyre.

Sipas raportimeve, fëmijët kishin dalë me nënën e tyre për të kullotur bagëtitë në zonë ndërsa papritur të miturit janë futur për tu larë në lumë, por fatkeqësisht humbën jetën.

“Isha te puna, pash policinë, pash që po vinin me vrap. Një zotëri që punon te hidrocentrali, njëri fëmijë kishte në krah. Pash të ëmën që po përplasej këtej, të atin nuk e di nga ikte më… I njoh, i kam njerëzit e mi, u turra dhe unë me vrap.

Kanë bagëtitë, i nxjerrin këtej zallit, me ato mbahen. Prindërit mbajnë lopët, këta mbajnë bagëtitë e imëta, delet.

Më tutje është bërë një grop e madhe, kanë bërë një pritë, dhe aty i kishte gjet roja i hidrocentralit. Njërin fëmijë e kishte polici në krah, ja mora i bëra frymëmarrje artificiale, nuk jepet reagim fare. Vinin çdo ditë te puna ime mbushnin ujë, rrinin aty kur ishte vap”, tha ai.

The post Mbytja e të miturve në Shkumbin, flet i afërmi: Njërin nga fëmijët e kishte në krah punëtori i hidrocentralit, tjetrin policia! Prindërit po çmenden appeared first on Albeu.com.

I riu në foto është Mario Nikprelaj, 23-vjeçari shqiptar i cili u konfliktua me një stjuardesë dhe tentoi të hapte derën e daljes së emergjencës ndërsa avioni i SkyWest Airlines ishte në ajër.

SkyWest Airlines u detyrua të bëjë një ulje emergjente në Cedar Rapids, Iowa, rreth orës 18:00 të së enjtes.

Sipas dëshmitarëve dhe komunikimeve me kullën e kontrollit të Aeroportit të Iowa-s Lindore, Nikprelaj ishte përfshirë në një konflikt fizik me një anëtare të ekuipazhit, ndërkohë që përpiqej të hapte derën. Fatmirësisht, ekuipazhi dhe pasagjerët ndërhynë me shpejtësi duke parandaluar një tragjedi.

Pas uljes, Nikprelaj u shoqërua nga policia jashtë avionit, siç dëshmohet në një video të publikuar nga një pasagjer në rrjetet sociale.

Nikprelaj u dërgua në qendrën e paraburgimit të qarkut Linn dhe përballet me akuza për prishje të rendit, sulm, posedim të paligjshëm të ilaçeve me recetë, shkelje fiskale dhe ngacmim në shkallën e parë.

Policia e Cedar Rapids ka bërë të ditur se janë të mundshme edhe akuza të tjera, ndërsa hetimet vazhdojnë.

Nikprelaj, banues në Nebraska dhe i vetëquajtur reper në ngjitje, nuk është i panjohur për autoritetet. Në vitin 2020, në moshën 18-vjeçare, ai u arrestua në Michigan pasi vodhi një borëpastruese ndërkohë që ishte pa këmishë dhe pa këpucë.

Sipas policisë, ai ishte përfshirë më herët në një përplasje fizike me të dashurën e tij, dhe pas incidentit, vodhi një borëpastruese që ishte në funksion, pa e ditur se ajo kishte sistem GPS dhe kamera të brendshme. Ai u lokalizua dhe arrestua shpejt.

Në atë rast, ai u akuzua për vjedhje automjeti, dhunë në familje dhe shkelje të provës, ndërsa policia shtoi se ai kishte rezistuar edhe më parë ndaj arrestimit.

The post FOTO/ “Hape derën!”- Sherr me stjuardesën gjatë fluturimit, ky është 23-vjeçari shqiptar që alarmoi pasagjerët në avion appeared first on Albeu.com.

Vatra e zjarrit në Belishovë të Mallakastrës vijon të jetë aktive.

Flakët, që kanë nisur që në mesditë, kanë përfshirë një sipërfaqe të gjerë me shkurre, pisha dhe ullishte, duke shkrumbuar dhjetëra hektarë.

Shërbimet zjarrfikëse, të ndihmuara nga mjetet e ushtrisë, po punojnë në kushte të vështira për shkak të terrenit të thyer kodrinor. Era e fortë ka favorizuar përhapjen e flakëve në disa drejtime, duke e bërë të vështirë izolimin dhe vënien nën kontroll të tyre.

Ndërkohë, aktive mbeten edhe vatrat e zjarrit në kodrat e Gorishovës, por me intensitet më të ulët.

The post Vijon zjarri në Belishovë, dhjetëra hektarë të djegura, era favorizon flakët appeared first on Albeu.com.

“Social Top 5” është një rubrikë e emisionit “Live From Tirana” që sjell vëmendjen tek personazhet e famshëm, qofshin ata shqiptarë apo të huaj. Teksa të gjithë jemi gjithë sy e veshë se çfarë postojnë yjet në rrjete sociale, kjo ndikon dhe tek numri i tyre i ndjekësve në Instagram.

Le t’i hedhim një sy personazheve që kanë qenë në vëmendjen e të gjithëve këtë javë bazuar edhe zhvillimeve të fundit. Kanë fituar apo kanë humbur më shumë ndjekës brenda kësaj jave?! Le të shohim renditjen më poshtë…Artisti i njohur Gjesti një javë më parë numëronte 607 mijë ndjekës dhe tani ka 605 mijë ndjekës, kjo e rendit atë në vendin e fundit. Gjatë kësaj jave ai ka humbur 2 mijë ndjekës.

Më pas kemi Egli Takon, ish-finalisten e edicionit të katërt të “Big Brother VIP” që nuk ka pasur asnjë ndryshim nga java e kaluar. Ajo vazhdon të ketë po 371 ndjekës. Në vendin e tretë këtë javë është Franceska Murati, e cila gjithashtu nuk ka pasur asnjë ndryshim nga java e kaluar. Në rrjetin e saj social vazhdon të ketë po 151K.

Në vend të dytë në “Social Top 5” për këtë javë, renditet kryeministri i vendit, Edi Rama, i cili nuk ka pasur një ndryshim të numrit të ndjekësve nga java e kaluar me 637 mijë ndjekës.

Në vend të parë për këtë javë është Sara Hoxha, e cila ka fituar plot 3 mijë ndjekës më shumë. Nga 590K, tani ajo ka shkuar në 593K në Instagramin e saj.

The post Sara Hoxha, Gjesti, Egli apo kryeministri Rama? Ja kush ka fituar më shumë ndjekës në Instagram këtë javë appeared first on Albeu.com.

Policia e Elbasanit ka reaguar zyrtarisht për ngjarjen e rëndë që ndodhur pasditen e kësaj të premteje në lumin Shkumbin ku dy të mitur (vëllezër) u mbytën.

Sipas raportimeve, ngjarja ka ndodhur aksidentalisht ndërsa trupat e pajetë të të miturve 7 dhe 9 vjeç, po transportohen për ekspertizë mjeko-ligjore.

Thuhet se dy të miturin kishin dalë për të ruajtur bagëtitë ndërsa një moment janë futur në lumë për tu larë, por fatkeqësisht janë mbytur.

Grupi hetimor dhe shërbimet e Policisë ndodhen në vendngjarje dhe vijojnë punën për sqarimin e plotë të rrethanave.

Njoftimi i Policisë

Në fshatin Labinot Fushë, dyshohet se janë mbytur aksidentalisht në lumin Shkumbin dy fëmijë të moshës 7 dhe 9 vjeç (vëllezër).

Trupat e pajetë po transportohen për ekspertizë mjeko-ligjore.

Grupi hetimor dhe shërbimet e Policisë ndodhen në vendngjarje dhe vijojnë punën për sqarimin e plotë të rrethanave.

The post DETAJE/ Dy vellezërit e mitur u mbytën në Shkumbin, Policia e Elbasanit: Trupat po dërgohen për ekspertizë mjeko-ligjore appeared first on Albeu.com.

Deputetja e Kuvendit të Kosovës nga Nisma Socialdemokrate, Xhevahire Izmaku i ka thënë të premten Radios Evropa e Lirë se takimi mes kryetarit të kësaj partie, Famir Limaj dhe kryeministrit në detyrë të Kosovës, Albin Kurti, njëherësh kryetar i Lëvizjes Vetëvendosje, do të zhvillohet në pasditen e së shtunës, me qëllim të gjetjes së një zgjidhjeje për konstituim të Kuvendit të Kosovës.

Seanca e re për konstituim të Kuvendit do të mbahet të shtunën në orën 11:00. Deri më tani, 48 përpjekje kanë rezultuar të pasuksesshme.

“Ne qëndrojmë me kërkesën tonë, që mendojmë se është e arsyeshme, për pozitën e kryetarit të Kuvendit. Votat i kemi. Nëse propozohet emri i Fatmir Limajt, atëherë të hënën mund të konstituohet Kuvendi”, tha Izmaku për Radion Evropa e Lirë.

Sipas saj, deri më tani nuk ka ndonjë sinjal të qartë nga Lëvizja Vetëvendosje se mund të arrihet një marrëveshje me Nismën Socialdemokrate, por “ekziston një ambient pozitiv”.

“Por, nuk mund të them se si do të jetë vendimmarrja. Situata është e paparashikueshme”, ka thënë mes tjerash ajo. Më herët gjatë ditës, Limaj është takuar edhe me presidenten e Kosovës, Vjosa Osmani.

“Ky takim vjen në prag të përfundimit të afatit kushtetues të përcaktuar me Aktgjykimin e Gjykatës Kushtetuese në rastin KO124/25, i cili obligon deputetët që të konstituojnë Kuvendin brenda 30 ditëve, konkretisht deri më 26 korrik”, është thënë në një komunikatë të lëshuar nga Presidenca.

Gjykata Kushtetuese e ka përcaktuar 26 korrikun si afat të fundit për konstituim, por ajo nuk ka ofruar më shumë hollësi se çfarë ndodh tutje nëse partitë nuk merren vesh deri atëherë.

Osmani ka paralajmëruar se do t’i drejtohet Gjykatës Kushtetuese në javën e ardhshme, nëse Kuvendi i Kosovës nuk do të konstituohet brenda këtyre ditëve.

Situata është bllokuar pasi Partia Demoratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit nga kryesuesi i seancës Avni Dehari është jokushtetuese.

Lëvizja Vetëvendosje kërkon që për Albulena Haxhiun, të propozuar për kryeparlamentare, të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme. Pjesëtarë të shoqërisë civile kanë protestuar disa herë para ndërtesës së Kuvendit duke i thirrur deputetët në përgjegjësi.

The post Deputetja e Nismës Socialdemokrate: Nëse propozohet emri i Fatmir Limajt, të hënën mund të konstituohet Kuvendi appeared first on Albeu.com.

Një ngjarje tragjike ka ndodhur ditën e sotme në fshatin Labinot-Fushë të Elbasanit, ku dy të mitur kanë humbur jetën pasi u mbytën në rrjedhën e lumit Shkumbin.

Sipas informacioneve paraprake, fëmijët ndersa ruanin bagëtitë së bashku me një familjare të tyre kishin hyrë në ujë për t’u larë, por rrjedha e fortë dhe mungesa e sigurisë bënë që ata të mos arrinin të dilnin më në breg.

Banorë të zonës dhe forcat e emergjencës që mbërritën aty u përpoqën t’i ndihmonin, por fatkeqësisht, trupat e pajetë të të miturve u gjetën pak më vonë në një kanal të lumit më poshtë.

Ngjarja ka tronditur gjithë zonën, ndërsa familjarët ndodhen në gjendje të rënduar psikologjike të afërm e bashkëfshatarë të viktomave .

Autoritetet kanë nisur hetimet për të zbardhur rrethanat e plota të kësaj tragjedie. Praprakisht raportohet se viktimat ja vëllezër 8 dhe 10 vjeç.

The post Ngjarje e rëndë në Elbasan, po ruanin bagëtitë dhe u futën për t’u larë, mbyten 2 vëllezërit e mitur në lumin Shkumbin appeared first on Albeu.com.

Ish-punonjësja e Ministrisë së Financave Anila Boshnjaku ka bërë një postim në rrjetet sociale ku shkruan se nga një kontroll që ka bërë në e-Albania, rezulton se për muajin tetor 2014, nuk janë paguar siguracionet.

Boshnjaku i sugjerin publikisht ish-kolegëve të saj që të bëjnë një kontroll për atë muaj, por edhe në përgjithësi sepse siç thotë “ndodh edhe kështu”.

Ky mesazh eshte per ish-koleget e mi te Ministrise se Financave: Nga nje kontroll qe bera ne e-Albania, me rezulton qe per muajin tetor 2014 nuk jane paguar sigurimet. ju sugjeroj te beni nje kontroll per ate muaj, por pse jo edhe ne pergjithesi se ja qe ndodh edhe keshtu. Nuk di pse e si, por…. ju pershendes!

The post Ish-punonjësja e Ministrisë së Financave, thirrje publike ish-kolegëve: Kontrolloni, për muajin tetor 2014 nuk janë paguar sigurimet appeared first on Albeu.com.

Të paktën tre persona kanë humbur jetën pas një incidenti të rëndë që ndodhi në një qendër trajnimi të Departamentit të Policisë të Qarkut Los Angeles.

Lajmin e ka konfirmuar Prokurorja e Përgjithshme e SHBA-së, Pam Bondi, e cila shkroi në “X” se: “Sapo fola me departamentin lidhur me një incident që duket të jetë tejet i rëndë dhe që ka marrë jetën e të paktën tre personave në një qendër trajnimi të zbatimit të ligjit në Los Angeles. Agjentët federalë janë në vendngjarje dhe po punojmë për të mësuar më shumë”.

Zëdhënësi i Departamentit të Sherifit të Los Angeles-it konfirmoi se shpërthimi ndodhi në Akademinë e Trajnimit Biscailuz Center në East Los Angeles.

Ai deklaroi se shkaku i shpërthimit është ende nën hetim, dhe se nuk janë ende në gjendje të konfirmojnë nëse ka të vdekur të tjerë apo të plagosur.

Sipas gazetës Los Angeles Times, duke iu referuar burimeve të paidentifikuara, shpërthimi ndodhi gjatë lëvizjes së disa lëndëve plasëse nga njësia e specializuar për bomba.

Hetimet janë në vazhdim dhe zona mbetet e rrethuar nga forcat e rendit dhe ekipet hetimore.

The post Shpërthim në qendrën e trajnimit të Policisë në Los Angeles, raportohet për tre të vdekur appeared first on Albeu.com.

Lëvizja “Shqipëria Bëhet” e drejtuar nga Adriatik Lapaj, ka reaguar zyrtarisht pas publikimit të një audioje ku një aktivist i kësaj force partiake, kërcënonte dhe ofendonte Endrit Shabanin dhe Zeqir Kordhonin, i njohur si daja i Shabanit.

Në reagimin zyrtar, lëvizja “Shqipëria Bëhet”, i bën thirrje të gjithë simpatizantëve, aktivistëve dhe anëtarëve të angazhuar në këtë forcë politike, të distancohen nga gjuha e dhunës, pavarësisht situatës së padrejtë, siç e cilëson kjo parti.

Përplasjet mes Endrit Shabanit dhe Adriatik Lapajt, të cilët në parlamentaret e 11 Majit garuan së bashku nën siglën e koalicionit “Nisma Shqipëria Bëhet”, kanë ndodhur për 1 mandat të fituar në qarkun e Tiranës, mandat për të cilin palët nuk po bien dakord se cili prej tyre duhet ta marrë.

Gjuha kërcënuese për të cilën flitet në reagimin zyrtar të Lëvizja “Shqipëria Bëhet”, i atribuohet një audioje të publikuar nga emisioni investigativ “Piranjat”, ku një aktivisit i Shqipëria Bëhet, i paidentifikuar, ka kërcënuar Shabanin dhe të afërmin e tij, Zeqir Kordhoni.

Ky i fundit, sipas palës së Lapajt, ka shkelur marrëveshjen, i cili me një shkresë drejtuar KQZ-së ka kërkuar revokim të dorëheqjes nga kandidimi, duke pretenduar mandatin e Tiranës. Sipas arsyetimit të palës “Nisma Thurje”, pakti fillimisht është shkelur nga Lapaj, i cili fillimisht deklaroi publikisht se nuk do e mbante për vete mandatin, dhe më pas vendosi që të ishte ai, si drejtuesi i koalicionit, që të shkonte në Kuvend.

Fiktivisht mandati i Tiranës i përket 60-vjeçares Ana Dajko, e njohur si tezja e Adriatik Lapaj, pasi është e para në listën e Tiranës. Pas saj në renditje është Livia Stavri, e cila është bashkëshortja e Endrit Shabanit, e cila mund të fitojë vendin në Parlament nëse Dajko vendos të largohet.

Reagimi i Lëvizja Shqipëria Bëhet:

Në dritën e ngjarjeve të fundit dhe përmbajtjeve të publikuara në rrjet, dëshirojmë të sqarojmë se nuk përfaqësojmë dhe nuk mbështesim asnjë formë gjuhe fyese, kërcënuese apo të dhunshme që bie ndesh me vlerat tona.

Ne u bëjmë thirrje të gjithë ndjekësve tanë, simpatizantëve, aktivistëve dhe anëtarëve të angazhuar me ne, të refuzojnë në çdo moment gjuhën e dhunës pavarësisht ngarkesës emocionale nga çdo padrejtësi.

Por, po aq të qartë duam të jemi edhe për një tjetër të vërtetë:

Në këtë histori, të dhunuarit e vetëm janë 64.000 qytetarët që na votëbesuan dhe qindra aktivistët tanë që dhanë gjithçka në këtë betejë.

Ndiejmë keqardhje të sinqertë për situatën e krijuar në lidhje me çështjen e mandatit dhe ju sigurojmë se nuk po i shmangemi përgjegjësisë sonë, por po bëjmë çdo përpjekje të ndershme për të mos ju zhgënjyer dhe për të ruajtur besimin që na keni dhënë.

Sepse për ne, gara e ndershme dhe meritokracia janë dy shtyllat mbi të cilat u ngrit “Shqipëria Bëhet”. Ishin të vetmet armë që kishim përballë një sistemi të kalbur. Ishin këto dy parime që frymëzuan 64.000 qytetarë të na mbështesin pa interes.

Ndaj po goditen sot, me shënjestër të saktë, si nga snajperistët e zakonshëm të sistemit, ashtu edhe nga ata që u shërbejnë si zëdhënës.

Nëse gabimi ynë është dorështrirja për bashkëpunim, mund të na gjykoni! Ne po kërkojmë thjesht që marrëveshja parazgjedhore të realizohet ashtu siç u dolëm qytetarëve në fushatë. Është pikërisht ajo pika që dëshmon qasjen tonë për garën.

Theksojmë se ne nuk do të heqim dorë nga besimi që gara e ndershme është rruga e vetme për të rikthyer besimin në demokraci. Përtej çdo shantazhi e hileje, brenda e jashtë sistemit, ne do të qëndrojmë.

Jemi në pritje të reflektimit dhe uljes për zgjidhje nga pala tjetër në Koalicion. Ne e konsiderojmë këtë një moment që duhet tejkaluar si detyrë ndaj zgjedhësve tanë. Jemi në pritje të Z.Shabani dhe Z.Soko për ta adresuar me maturi e të vazhdojmë punën për zgjedhjet vendore.

Sepse rrugën e nisur, nuk do ta lëmë në mes!

The post “Dajos do t’i q*het motra”, aktivisti i Lapajt kërcënoi Endrit Shabanin, reagon “Shqipëria Bëhet”: Distancohemi nga dhuna, por nuk do ta lëmë me kaq appeared first on Albeu.com.

Presidentja e Kosovës, Vjosa Osmani ka zhvilluar të premten takim me kryetarin e Nismës Socialdemokrate, Fatmir Limaj, pak para seancës parlamentare të së shtunës për konstituim të Kuvendit të Kosovës.

Deri më tani, 48 përpjekje kanë rezultuar të pasuksesshme.

“Ky takim vjen në prag të përfundimit të afatit kushtetues të përcaktuar me Aktgjykimin e Gjykatës Kushtetuese në rastin KO124/25, i cili obligon deputetët që të konstituojnë Kuvendin brenda 30 ditëve, konkretisht deri më 26 korrik”, është thënë në një komunikatë të lëshuar nga Presidenca.

Gjykata Kushtetuese e ka përcaktuar 26 korrikun si afat të fundit për konstituim, ajo nuk ka ofruar më shumë hollësi se çfarë ndodh tutje nëse partitë nuk merren vesh deri atëherë.

Presidentja Osmani është cituar të ketë thënë se zbatimi i këtij aktgjykimi është detyrim i qartë kushtetues dhe e ka potencuar rëndësinë që të gjithë përfaqësuesit e qytetarëve të veprojnë në frymën e bashkëpunimit dhe mirëbesimit, me qëllim të arritjes së një zgjidhjeje sa më të shpejtë për konstituimin e Kuvendit.

Palët janë takuar një ditë pasi deputetja e Nismës Socialdemokrate, Xhevahire Izmaku, ka thënë se pret që kryetari i partisë, Fatmir Limaj, të takohet me liderin e Lëvizjes Vetëvendosje, Albin Kurti, për një marrëveshje të mundshme në fundjavë.

“Presim që në fundjavë të ketë një epilog pozitiv, pra shpresojmë se këto bisedime që kanë vazhduar me muaj të tërë, të prodhojnë rezultat dhe Kosova të ketë institucione”, ka thënë Izmaku për gazetarë.

Sipas saj, temë e bisedimeve është që Limaj të jetë kandidat për kryetar të Kuvendit, duke shtuar se “më në fund dikush po del mbi egot personale dhe partiake, e ky duket që do të jetë zoti Limaj pra, sepse nga fillimi e ka ndryshuar diskursin në këtë vend”.

Kush sa vota i ka?
Në Kuvendin e Kosovës me 120 ulëse, nevojiten 61 vota për të votuar me sukses emrin e ri të kryekuvendarit.

Lëvizja Vetëvendosje, si fituesja e më së shumti votave në zgjedhjet e 9 shkurtit, i ka 48 ulëse në Kuvend, pasuar nga Partia Demokratike e Kosovës me 24, Lidhja Demokratike e Kosovës me 20, Lista Serbe – partia më e madhe e serbëve në Kosovë me 9 dhe koalicioni mes Aleancës për Ardhmërinë e Kosovës dhe Nismës Socialdemokrate, me 8 të tilla. Edhe 11 ulëse tjera janë të pakicave.

Vetëm Nisma Socialdemokrate i ka tre deputetë në Kuvend. Përveç Limajt kjo parti përfaqësohet nga Xhevahire Izmaku dhe Arbëreshë Kryeziu.

Ministri në detyrë i Administrimit dhe Pushtetit Lokal dhe kryetari i Iniciativës së re Demokratike të Kosovës (IRDK), Elbert Krasniqi, ka sinjalizuar më parë se shtatë deputetë të pakicave joserbe do të votonin pro konstitutimit të Kuvendit të ri dhe një qeverie të re të udhëhequr nga Lëvizja Vetëvendosje.

Në një skenar kur Lëvizja Vetëvendosje, deputetët e Nismës dhe shtatë të pakicave do të votonin për konstituim të Kuvendit, do të duheshin edhe tri vota për finalizim të procesit me sukses.

Deri më tani, deputetët e pakicave, Duda Balje, Veton Berisha dhe Adem Hoxha janë deklaruar se nuk ofrojnë mbështetje pa u plotësuar kushtet e tyre.

Osmani ka paralajmëruar se do t’i drejtohet Gjykatës Kushtetuese në javën e ardhshme, nëse Kuvendi i Kosovës nuk do të konstituohet brenda këtyre ditëve.

Situata është bllokuar pasi Partia Demoratike e Kosovës, Lidhja Demokratike e Kosovës , Aleanca për Ardhmërinë e Kosovës dhe Lista Serbe nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit nga kryesuesi i seancës Avni Dehari është jokushtetuese.

Lëvizja Vetëvendosje kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme.

Pjesëtarë të shoqërisë civile kanë protestuar disa herë para ndërtesës së Kuvendit duke i thirrur deputetët në përgjegjësi./rel

The post Osmani takon Limajn në prag të seancës së re për konstituim të Kuvendit appeared first on Albeu.com.

Këngëtarja Dafina Zeqiri ka ndarë disa momente nga lindja e djalit.

Përmes një videoje të postuar në rrjetet sociale nga klinika, artistja shfaqet e emocionuar, ndërsa përlotet në çastin kur prek për herë të parë Daskanin, së bashku me partnerin e saj, Kreshnikun.

Dafina Zeqiri dhe Kreshnik Gjergji, që u martuan në tetor të vitit të kaluar, u bënë prindër për herë të parë.

The post FOTO/ Dafina Zeqiri publikon pamjet emocionuese nga lindja e djalit appeared first on Albeu.com.

Mario Nikprelaj 23 vjeç ka tentuar të hapë derën e avionit gjatë një fluturimi nga Omaha për në Detroit pas një sherri me stjuardësën.

Shqiptari ka detyruar pilotët që të bëjnë një ulje emergjente. Fluturimi 3612 i Delta Connection, i operuar nga Skywest Airlines, u detyrua të devijonte në Aeroportin Lindor të Ajovës në Cedar Rapids, Ajova, sipas CNN.

“Më 17 korrik 2025, afërsisht në orën 6:13 pasdite, Policia e Cedar Rapids u dërgua në Aeroportin Lindor të Ajovës pas një shqetësimi gjatë fluturimit nga një pasagjer në një fluturim Skywest nga Omaha në Detroit”, tha Departamenti i Policisë së Cedar Rapids.

I riu shqiptar tashmë do të përballet me akuzat e sjelljes jo korrekte, sulm dhe ngacmim ndërsa shkaqet e sherrit të tij me stjuardesën janë ende të paqarta. Sipas Flight Ware, avioni u ul në Detroit rreth 1 orë e gjysmë më vonë sesa ishte planifikuar.

The post VIDEO/23-vjeçari shqiptar sherr me stjuardesën në avion, tenton të hapë derën gjatë fluturimit, pilotët bëjnë ulje emergjente appeared first on Albeu.com.

Kryeministri Edi Rama ka zhvilluar ditën e sotme një takim në qytetin e Beratit me përfaqësues të teknologjisë ndërsa gjatë këtij takimi nuk kanë munguar batutat teksa po ndaheshin konkluzionet e mbledhjes.

Një prej tyre tha se integriteti për ta është shumë i rëndësishëm ndërsa Rama me batutë iu përgjigj “për qeverinë nuk është, se ne dava hajdutësh”.

Përfaqësuesi i teknologjisë: Disa prej miqve tanë, mund të them me bindje të plotë janë në portale dhe janë të persekutuar që punojnë me shtetin. Duhet ta provosh, unë nuk e kam provuar, nuk kam punuar ndonjëherë, ideja është që është e padrejtë. Sepse kemi të bëjmë me heronj të kohërave moderne dhe me njerëz që punojnë shumë herë më lirë se sa kompani që punojnë me administratën publike në Itali, vendet fqinje.

Ministrja Ibrahimaj: Po flet për portale që punojnë me shtetin por që ofrojnë shërbime të cilat janë shumë herë më të lira se në vendet e tjera, të njëjtat shërbime.

Kryeministri Edi Rama: Këtë hall qajeni vetë se ne nuk ua qajmë dot. Ne nuk po kërkojmë të na qani hallin, po hallin s’ua qajmë dot. Në qoftë se ju sulmojnë, ta gëzoni edhe shëndet t’ju bëhet.

Përfaqësuesi i teknologjisë: Integriteti për ne është shumë i rëndësishëm.

Kryeministri Edi Rama: Jo për ne nuk është në fakt se…për ju është i rëndësishëm, për ne jo.. ne dava hajdutësh.

The post Rama ‘shpërthen’ në Berat me përfaqësuesit e teknologjisë: Ne jemi dava hajdutësh, nuk kemi integritet appeared first on Albeu.com.