PESHAVAR, 20 gusht  /ATSH/ – Të paktën 75 persona, përfshirë 17 fëmijë,gjeën vdekjen  në një aksident rrugor në Afganistan, ku u përfshi një autobus që transportonte migrantë të deportuar nga Irani, njoftuan  sot zyrtarët, sipas NBC.

Autobusi po udhëtonte drejt kryeqytetit Kabul nga Irani fqinj kur u përplas me një motor dhe një automjet tjetër në provincën perëndimore të Heratit, pranë kufirit iranian, sipas zyrtarit të lartë të qeverisë afgane, Ahmadullah Muttaqi.

“Makina mbante karburant dhe shpërtheu në flakë pas përplasjes me autobusin e mbushur plot me pasagjerë”, tha ai. “Dhe autobusi u përfshi nga zjarri dhe shumica e njerëzve në bord humbën jetën nga djegiet”.

Shtatëdhje e tre migrantë afganë që ndodheshin në autobus, mes tyre 17 fëmijë, humbën jetën, së bashku me dy persona nga automjetet e tjera. Tre të tjere mbetën të plagosur.

“Refugjatët afganë po ktheheshin në shtëpi pas shumë vitesh në Iran, por nuk arritën kurrë në destinacion pasi autobusi i tyre u përfshi në një aksident tragjik” përfundoi Muttaqi. /Ad.Ab./

The post AFGANISTAN – Mbi 70 të vdekur në aksident rrugor, mes tyre 17 fëmijë appeared first on Agjencia Telegrafike Shqiptare.

KALIFORNI, 20 gusht  /ATSH- DPA/ – “Google” po sfidon rivalin e saj “Apple “me një ofensivë të inteligjencës artificiale (IA) pak para lançimit të pritur të modeleve të reja “iPhone”.

Seria e re “Pixel 10” përmban veçori të IA-së si përkthimi i thirrjeve dhe një “trajner kamere” që ofron këshilla për kompozimin e fotove, bëri të ditur kompania të mërkurën në një njoftim për shtyp.

Në modelet më të shtrenjta “Pixel 10 Pro”, IA është e integruar drejtpërdrejt në kamera, duke krijuar detaje artificiale në nivele të larta zmadhimi.

“Google” planifikon gjithashtu të ofrojë rekomandime shëndetësore në orën inteligjente”Pixel 4″, nën markën “Fitbit” që ka blerë më parë.

“Apple” është përballur me vështirësi në fushën e IA-së, duke u detyruar të shtyjë për vitin e ardhshëm versionin e ri të asistentit Siri, i cili pritej të bëhej më i dobishëm në jetën e përditshme falë qasjes në të dhënat e përdoruesve.

Ndërkohë, “Google” po integron thellësisht softuerin e vet IA “Gemini” në pajisjet “Pixel” dhe në smartfonët e tjerë me sistemin operativ “Android”, të prodhuar gjithashtu nga vetë kompania.

Në vitet e fundit, “Apple” ka prezantuar veçori individuale të IA-së për fotot dhe përpunimin e tekstit.

Si një tjetër lëvizje kundër konkurrencës, “Google” ka shtuar një “kamerë telefoto” edhe në modelin bazë të “Pixel 10”, diçka që shpesh mungon në këtë kategori çmimi.

Kompania amerikane deri tani i ka parë telefonat “Pixel” si një lloj “prototipi” për të demonstruar aftësitë e sistemit “Android”. Pjesëmarrja e modeleve të mëparshme në treg ka qenë e vogël, pjesërisht sepse “Google” nuk ka dashur të dëmtojë biznesin e partnerëve të saj të “Android”. /Ad.Ab./

The post “Google Pixel 10” me IA të integruar sfidon rivalin e saj “Apple” appeared first on Agjencia Telegrafike Shqiptare.

PARIS, 20 gusht /ATSH – AFP/ – Ndryshimet e menjëhershme dhe potencialisht të pakthyeshme në Antarktidë të shkaktuara nga ndryshimet klimatike mund të ulin nivelet e ujërave  në oqeane dhe të çojnë në “pasoja katastrofike për brezat”, paralajmëruan sot shkencëtarët.

Ndryshimet klimatike në Antarktidë kërcënojnë ndikime ‘katastrofike’ në nivel global

Në një kuptim më të gjerë, një rishikim i gjendjes së njohurive nga një grup ekspertësh të lartë zbuloi ndryshime përshpejtuese në të gjithë rajonin që shpesh janë shkak dhe pasojë e ngrohjes globale, sipas një studimi të botuar në “Nature”.

“Antarktida po tregon shenja shqetësuese të ndryshimit të shpejtë në akullin, oqeanin dhe ekosistemet e saj”,  tha autorja kryesore dhe profesorja e Universitetit Kombëtar Australian, Nerilie Abram.

“Disa nga këto ndryshime të menjëhershme do të jenë të vështira për t’u ndaluar.”

Ndryshimet në aspekte të ndryshme të sistemit klimatik të Antarktidës amplifikojnë njëra-tjetrën dhe kanë përshpejtuar ritmin e ngrohjes edhe në nivel global, tha ajo.

Studimi shqyrtoi provat e ndryshimeve të menjëhershme  ose “ndryshimeve të regjimit” në akullin detar, rrymat rajonale të oqeanit, shtresën e akullit të kontinentit, raftet e akullit dhe jetën detare.

Nëntëdhjetë përqind e nxehtësisë së gjeneruar nga ngrohja globale e shkaktuar nga njeriu thithet nga oqeanet.

Kjo do të përshpejtojë ngrohjen në rajon dhe më gjerë, dhe mund të shtyjë disa specie detare drejt zhdukjes.

Gjatë dy viteve të fundit, për shembull, zogjtë e pafuqishëm të pinguinëve u zhdukën në vende të shumta shumimi, duke u mbytur ose duke ngrirë kur akulli i detit u zhduk më herët se zakonisht.

Bota do të duhej të ngrohej me pesë gradë Celsius krahasuar me nivelet para-industriale për të shkrirë të gjithë shtresën e akullit të Antarktidës, gjë që do të ngrinte oqeanet globale pothuajse të paimagjinueshme.

Por ngrohja globale deri më sot, mesatarisht rreth 1.3 gradë Celsius, po i afrohet me shpejtësi një pragu që do të shkaktonte që një pjesë e shtresës së akullit të gjeneronte të paktën tre metra ngritje të nivelit të detit, duke përmbytur zonat bregdetare të banuara sot nga qindra miliona, tha studimi.

E vetmja mënyrë për të ngadalësuar ndryshimet e ndërlidhura në Antarktidë është të ndalohet shtimi i gazrave që ngrohin planetin në atmosferë

Një “ngadalësim i shpejtë dhe i konsiderueshëm” i rrymave ka filluar tashmë, dhe provat nga periudha e mëparshme ndërakullnajore, midis dy epokave të akullnajave, para epokës sonë, 125 000 vjet më parë, tregojnë një ngecje të menjëhershme të sistemit në kushte të ngjashme me ato që shihen sot.

“Kjo do të çonte në ndikime të përhapura në klimë dhe ekosistem”, duke filluar nga një intensifikim i ngrohjes globale deri në një ulje të kapacitetit të oqeanit për të thithur CO2, raportoi studimi. /Ad.Ab./

.

The post FOKUS – Ndryshimet klimatike në Antarktidë çojnë në pasoja katastrofike globale appeared first on Agjencia Telegrafike Shqiptare.

AMSTERDAM, 20 gusht /ATSH-DPA/ – Aktiviteti i lundrimit “Sail Amsterdam 2025” është hapur zyrtarisht me një flotilje ku morën pjesë qindra anije të mëdha historike me vela.

Dhjetëra mijëra spektatorë, si nga bregu ashtu edhe mbi varkat shoqëruese, ndoqën anijet e zbukuruara që vinin nga mbarë bota teksa kalonin përpara tyre.

Sipas organizatorëve, ky është aktiviteti më i madh detar në botë dhe zhvillohet çdo pesë vjet.

Parada nisi nga porti i IJmuiden në Detin e Veriut dhe vazhdon  përgjatë kanalit të Detit të Veriut, rreth 20 kilometra i gjatë, deri në Amsterdam.

Këtë vit “Sail Amsterdam” shënon edicionin e 10-të saj. Aktiviteti u organizua për herë të parë 50 vite më parë, për të festuar 700-vjetorin e kryeqytetit holandez.

Në kuadër të 750-vjetorit të qytetit, festimet janë veçanërisht madhështore. Organizatorët presin mbi 2 milionë vizitorë gjatë aktivitetit, i cili zgjat deri të dielën. /Ad.Ab./

The post HOLANDË – Amsterdami mirëpret qindra anije historike nga e gjithë bota appeared first on Agjencia Telegrafike Shqiptare.

UASHINGTON, 20 gusht /ATSH/ – Shtetet e Bashkuara të Amerikës po dërgojnë tre destrojerë të pajisur me raketa “Aegis” pranë ujërave të Venezuelës – si pjesë e përpjekjeve të presidentit Donald Trump për të goditur kartelet e drogës në Amerikën Latine, sipas AP.

Destrojerët “USS Gravely”, “USS Jason Dunham” dhe “USS Sampson” pritet të mbërrijnë së shpejti, tha një zyrtar i planifikimit ushtarak amerikan.

Një zyrtar i Departamentit të Mbrojtjes konfirmoi se këto mjete ushtarake janë dërguar në rajon për të mbështetur përpjekjet kundër narkotikëve. Ai tha se anijet do të qëndrojnë atje “për disa muaj”.

Vendosja e destrojerëve dhe e personelit amerikan në rajon  vjen ndërsa Trump ka nxitur përdorimin e ushtrisë për të penguar kartelet që ai i fajëson për rrjedhjen e fentanilit dhe drogave të tjera drejt SHBA-së dhe për dhunën në disa qytete amerikane.

Trump gjithashtu ka kërkuar nga presidentja e Meksikës, Claudia Sheinbaum, të bashkëpunojë më shumë për sigurinë, duke qenë më agresive kundër karteleve sesa paraardhësi i saj. Por Sheinbaum ka vendosur një vijë të qartë kur vjen puna te sovraniteti i Meksikës, duke refuzuar sugjerimet për ndërhyrje nga ushtria amerikane.

Në shkurt, Trump shpalli disa grupe kriminale, përfshirë  “Tren de Aragua” në Venezuelë, “MS-13” në El Salvador dhe gjashtë grupe me qendër në Meksikë si organizata të huaja terroriste.

Në fillim të këtij muaji, qeveria amerikane njoftoi rritjen e shpërblimit për arrestimin e presidentit venezuelian Nicolas Maduro në 50 milionë dollarë, duke e akuzuar atë si një nga trafikanët më të mëdhenj të narkotikëve në botë dhe për bashkëpunim me kartelet për të furnizuar SHBA-në me kokainë të përzier me fentanil. /Ad.Ab./

The post UASHINGTON – SHBA dërgon tre destrojerë në Venezuelë për të goditur kartelet e drogës appeared first on Agjencia Telegrafike Shqiptare.

KOPENHAGË, 20 gusht /ATSH/ – Danimarka do të heqë taksën mbi vlerën e shtuar (TVSH) për librat në një përpjekje për të nxitur më shumë njerëz të lexojnë, sipas “The Guardian”.

Me 25%, norma e taksës mbi librat në vend është më e larta në botë, një politikë që qeveria beson se po kontribuon në një “krizë të leximit” në rritje.

Ministri i Kulturës, Jakob Engel-Schmidt, njoftoi sot se qeveria do të propozojë në projektligjin e buxhetit që taksa mbi librat të hiqet.

Ky hap pritet të kushtojë 330 milionë korona (rreth 38 milionë paund) në vit.

“Kjo është diçka për të cilën unë, si ministër i Kulturës, kam punuar, sepse besoj se duhet të vendosim gjithçka nëse duam të përfundojmë krizën e leximit që fatkeqësisht është përhapur në vitet e fundit”, tha Engel-Schmidt.

“Jam jashtëzakonisht krenar. Nuk është çdo ditë që arrin të bindësh kolegët që të shpenzohet një shumë kaq e madhe parash për të investuar në konsumimin dhe kulturën e danezëve”.

Vendet e tjera nordike gjithashtu aplikojnë normën standarde prej 25% TVSH, por kjo nuk vlen për librat. TVSH-ja për librat në Finlandë është 14%, në Suedi 6% dhe në Norvegji zero. Suedia e uli TVSH-në për librat në vitin 2001, duke sjellë një rritje të shitjeve të librave, por analiza tregoi se ato bliheshin kryesisht nga lexuesit ekzistues.

“Tashmë ne kemi lëvruar para për një bashkëpunim të forcuar midis bibliotekave publike të vendit dhe shkollave, në mënyrë që më shumë fëmijë të prezantohen me literaturë të mirë”, tha Engel-Schmidt.

Në total, 8,3 milionë libra u shitën në dyqane dhe online në Danimarkë në vitin 2024, sipas zyrës kombëtare të statistikave. Popullsia e vendit është pak më shumë se 6 milionë banorë.  /Ad.Ab./

The post KOPENHAGË – Danimarka heq TVSH-në e librave për të nxitur leximin appeared first on Agjencia Telegrafike Shqiptare.

BERLIN, 20 gusht /ATSH/ – Kancelari gjerman Friedrich Merz nuk e ka përjashtuar mundësinë e rritjes së taksave për shtresat më të pasura, si zgjidhje për boshllëqet e vazhdueshme buxhetore të vendit.

Zëdhënësi i qeverisë Steffen Meyer, tha sot në Berlin se prioriteti kryesor është rritja ekonomike.

“Qeveria do të bëjë gjithçka që i shërben këtij objektivi dhe do të shmangë gjithçka që e dëmton”, tha ai, duke theksuar gjithashtu rëndësinë e investimeve në infrastrukturë dhe lehtësimin e barrës për “klasën e mesme punëtore”.

Deklaratat vijnë pas intervistës së fundjavës nga zëvendëskancelari Lars Klingbeil, i cili tha se nuk përjashtohet mundësia e rritjes së taksave për të pasurit për të mbuluar deficitin prej miliarda eurosh në buxhetet e ardhshme.

Propozimet e Klingbeil, i cili është gjithashtu ministër i Financave dhe bashkëkryetar i SPD- së, janë kundërshtuar nga disa politikanë të bllokut konservator të Merz (CDU/CSU).

Sipas marrëveshjes së koalicionit mes CDU-së, CSU-së dhe SPD-së, qeveria është zotuar të ulë tatimin mbi të ardhurat për shtresat e mesme deri në mesin e mandatit.

Megjithatë, një rritje e mundshme e taksave për të pasurit pritet të kthehet në një tjetër pikë tensioni mes partnerëve të koalicionit, të cilët tashmë kanë pasur përplasje mbi çështje të tjera, si zgjedhja e gjyqtarëve në Gjykatën Kushtetuese. /Ad.Ab./

The post GJERMANI – Merz bën thirrje për taksa të larta ndaj të pasurve appeared first on Agjencia Telegrafike Shqiptare.

FIRENCE, 20 gusht /ATSH/ – Shoqata Italiane e Trajnerëve të Futbollit (AIAC) po kërkon pezullimin e Izraelit nga garat ndërkombëtare për shkak të luftës në Gaza, sipas “AP”- së.

Para ndeshjeve vendimtare të Italisë për kualifikimet e Kupës së Botës kundër Izraelit gjatë dy muajve të ardhshëm, AIAC -ja thotë se “Izraeli duhet të ndalet. Futbolli gjithashtu duhet të veprojë”.

AIAC –ja ka dërguar një letër zyrtare te federata italiane e futbollit, e cila do t’i përcillet organeve drejtuese të futbollit europian dhe botëror, duke kërkuar pezullimin e Izraelit.

“Bordi Drejtues i AIAC-së beson unanimisht se, duke pasur parasysh masakrat e përditshme, që kanë sjellë edhe qindra viktima midis menaxherëve, trajnerëve dhe sportistëve është legjitime, e nevojshme, madje një detyrë, që të vendoset në qendër të diskutimeve të federatës kërkesa për të paraqitur te UEFA dhe FIFA për përjashtimin e përkohshëm të Izraelit nga garat sportive”, përfundon letra.

Italia do të luajë kundër Izraelit në një fushë neutrale, në Debrecen, Hungari më 8 shtator, para se të presë ndeshjen e kthimit në Udine më 14 tetor.

“Ne mund të përqendrohemi vetëm te loja, duke bërë sikur nuk shohim. Por besojmë se kjo nuk është e drejtë”,  tha zëvendëspresidenti i AIAC-së, Giancarlo Camolese.

“Bota është në flakë. Shumë njerëz si palestinezët po vuajnë”, tha zëvendëspresidenti i AIAC-së, Francesco Perondi. “Indiferenca është e papranueshme”, përfundoi ai./ Ad.Ab./

The post ITALI – AIAC-ja kërkon pezullimin e Izraelit në sport lidhur me luftën në Gaza appeared first on Agjencia Telegrafike Shqiptare.

MELBURN, 20 gusht /ATSH/ – Kryeministri australian Anthony Albanese i hodhi sot poshtë akuzat e homologut të tij izraelit Benjamin Netanyahu se ai ishte një “politikan i dobët që e ka tradhtuar Izraelin” duke njohur një shtet palestinez, sipas “AP”-së.

Akuza  publike e Netanyahut erdhi pas një njoftimi të 11 gushtit nga kryeministri Albanese se njohja e qeverisë së tij për një shtet palestinez do të formalizohej në Asamblenë e Përgjithshme të Kombeve të Bashkuara në shtator. Njoftimi u pasua nga anulime të vizave australiane dhe izraelite.

“Historia do ta kujtojë Albanese për atë që është: një politikan i dobët që tradhtoi Izraelin dhe braktisi hebrenjtë e Australisë”, tha dje Netanyahu në mediet sociale.

“Unë i trajtoj udhëheqësit e vendeve të tjera me respekt. Unë angazhohem me ta në një mënyrë diplomatike”, u përgjigj ashpër kryministri Albanese

“Nuk i marr këto gjëra personalisht”, tha ai. “Gjithnjë e më shumë ka shqetësim global, po shqetësim global, sepse njerëzit duan të shohin fundin e ciklit të dhunës që kemi parë për një kohë shumë të gjatë. Kjo është ajo që australianët duan gjithashtu të shohin”.

Ministri australian i Punëve të Brendshme, Tony Burke, e ndezi më tej zemërimin e Izraelit duke anuluar vizën e ligjvënëses së ekstremit të djathtë izraelite, Simcha Rothman, një anëtare e koalicionit të Netanyahut, e cila planifikoi një turne fjalimesh në Australi.

Rothman është anëtar i partisë së Sionizmit Fetar, e cila mbështet vazhdimin e luftës, zhvendosjen masive të palestinezëve përmes asaj që e përshkruan si migrim vullnetar dhe rivendosjen e vendbanimeve hebraike në Gaza.

Burke akuzoi sot Netanyahun për “sulm” kundër Australisë ashtu siç kishte bërë kundër Britanisë, Kanadasë, Francës, Irlandës, Norvegjisë dhe Spanjës për njohjen e një shteti palestinez. Burke mohoi se kryeministri Albanese ishte “i dobët”.

“Forca nuk matet me sa njerëz mund të hedhësh në erë ose sa fëmijë mund të lësh të uritur”, tha Burke për “Australian Broadcasting Corp”.

Ministri i Jashtëm izraelit Gideon Saar u hakmor të hënën për trajtimin  ndaj Rothman duke revokuar vizat e përfaqësuesve australianë në Autoritetin Palestinez. Saar gjithashtu i tha ambasadës izraelite në Australi që të “shqyrtojë me kujdes” çdo aplikim zyrtar për vizë nga Australia në Izrael.

Australia është një vend gjithnjë e më shumëkulturor ku më shumë se gjysma e popullsisë ka lindur jashtë shtetit ose ka të paktën një prind të huaj.

Ekziston një shqetësim i përhapur në komunitet për luftën Izrael-Hamas, i treguar nga dhjetëra mijëra demonstrues pro-palestinezë që marshuan mbi Urën e Portit të Sidneit në fillim të këtij muaji. /Ad.Ab./

The post AUSTRALI – Albanese i përgjigjet Netanyahu-t: Nuk jam “i dobët” appeared first on Agjencia Telegrafike Shqiptare.

NJU JORK, 19 gusht /ATSH/ – Teleskopi Hapësinor “James Webb” ka zbuluar një hënë shumë të vogël që rrotullohet rreth Uranit, sipas “AP”- së.

NASA njoftoi se objekti i ri qiellor është vetëm rreth 10 kilometra i gjerë dhe u pa me kamerën infra të teleskopit.

Shkencëtarët besojnë se kjo hënë ka mbetur e fshehur për kaq gjatë për shkak të madhësisë së vogël dhe dritës së zbehtë, madje as sonda “Voyager 2”, gjatë fluturimit të saj pranë Uranit rreth 40 vite më parë, nuk arriti ta dallonte.

Deri tani Uranit i njiheshin “28 hëna”, shumica të vogla dhe pranë planetit.

Me këtë zbulim, numri i tyre shkon në 29.

Hëna e re ende nuk ka marrë emër, por si traditë, hënat e Uranit pagëzohen me personazhe nga Shekspiri dhe Aleksandër Popi.

Sipas ekspertëve, ky zbulim sugjeron se rreth Uranit mund të fshihen edhe shumë hëna të tjera të vogla. /Ad.Ab./

The post Teleskopi “Webb” zbulon një hënë të re rreth Uranit appeared first on Agjencia Telegrafike Shqiptare.

PEKIN, 19 gusht /ATSH/ – Në një hap të jashtëzakonshëm të shkencës dhe teknologjisë, shkencëtarët kinezë po zhvillojnë robotin e parë humanoid me një mitër artificiale, i aftë të rrisë embrionet njerëzore jashtë trupit të njeriut, sipas revistës “Newsweek”.

Lindjet priten të ndodhin në vitin 2026 dhe “nënat” robotë do të përdorin lëng amniotik sintetik, tuba që imitojnë kordonin umbilikal dhe inteligjencë artificiale për të monitoruar zhvillimin e fetusit për vetëm rreth 14 000 dollarë për çdo lindje.

I prodhuar nga “Kaiwa Tech” dhe i drejtuar nga Dr. Zhang Qifeng në Guangzhou, ky inovacion synon të ndihmojë çiftet e prekura nga infertiliteti, të shmangë lindjet në mënyra surrogate dhe të hapë horizonte të reja në shkencën riprodhuese.

Por nuk mungonjnë polemikat.

Shkencëtarët po punojnë ende mbi metoda të sigurta për fertilizim dhe lindje, ndërsa ekspertët ligjorë përpiqen të përcaktojnë të drejtat prindërore, kufijtë etikë dhe statusin e fëmijëve të rritur në laborator.

A është ky fundi i lindjes natyrale, apo një mrekulli për miliona njerëz? /Ad.Ab./

The post Roboti i shtatzënisë në Kinë, e ardhmja e lindjes ka mbërritur! appeared first on Agjencia Telegrafike Shqiptare.

MOSKË, 19 gusht /ATSH-DPA/ – Rusia ka kthyer trupat e 1 000 ushtarëve ukrainas, tha sot kryenegociatori rus Vladimir Medinsky.

“Në këmbim, Ukraina dorëzoi trupat  e 19 ushtarëve rusë”, shtoi Medinsky në komente të publikuara në Telegram.

Kievi konfirmoi se i kishte marrë trupat.

Lufta e nisur nga Rusia, tashmë në vitin e saj të katërt, ka shkaktuar vdekjen e dhjetëra ushtarëve nga të dyja palët.

Pas bisedimeve në Stamboll në maj, janë zhvilluar disa shkëmbime të të burgosurve gjatë muajve të fundit.

Moska ka premtuar gjithashtu të kthejë trupat e mijëra ushtarëve.

Rusia tha se kishte kthyer 7 000 trupa përpara dorëzimit të fundit, ndërsa pretendoi se Ukraina kishte transferuar më pak se 100 gjithsej. Moska e paraqet këtë si dëshmi se Ukraina ka pësuar humbje shumë më të larta në fushëbetejë.

Sipas Shtabit të Koordinimit të Ukrainës për Trajtimin e të Burgosurve të Luftës, ata duhej të ishin liruar më herët sipas marrëveshjes së Stambollit për shkëmbimin e ushtarëve të plagosur rëndë  /Ad.Ab./

The post MOSKË – Rusia dorëzon trupat e 1 000 ushtarëve ukrainas appeared first on Agjencia Telegrafike Shqiptare.

JERUZALEM, 19 gusht /ATSH-AFP/ – Kryeministri izraelit Benjamin Netanyahu i dërgoi sot një letër presidentit francez Emmanuel Macron, duke e akuzuar se me vendimin për të njohur shtetin palestinez po nxit antisemitizmin.

Fundin e muajit të kaluar, Macron deklaroi se Franca do të njihte zyrtarisht një shtet palestinez gjatë një takimi në OKB në shtator, duke marrë menjëherë kundërshtim nga Izraeli.

Në letër, Netanyahu shkroi se antisemitizmi është “rritur” në Francë pas njoftimit dhe e akuzoi Macronin se “hedh benzinë mbi këtë zjarr antisemitik” dhe se vendimi i tij shpërblen Hamasin, duke vështirësuar lirimin e pengjeve dhe duke inkurajuar urrejtjen ndaj hebrenjve francezë.

Ai e ftoi Macronin të veprojë kundër antisemitizmit dhe të zëvendësojë “dobësinë me vendosmëri” deri më 23 shtator, festa e Vitit të Ri Hebre.

Sipas një vlerësimi, të paktën 145 nga 193  shtetet anëtare të OKB-së e kanë njohur ose planifikojnë të njohin shtetin palestinez, përfshirë Australinë, Britaninë e Madhe dhe Kanadanë.

Australia njoftoi këtë muaj se do të njohë Palestinën në shtator. Netanyahu sulmoi edhe kryeministrin australian Anthony Albanese, duke e quajtur “politikan të dobët që tradhtoi Izraelin dhe braktisi hebrenjtë australianë”.

Kriza diplomatike mes dy vendeve u përshkallëzua pasi Australia anuloi vizën e politikanit izraelit të djathtë ekstreme Simcha Rothman, ndërsa në kundërpërgjigje ministri i Jashtëm izraelit, Gideon Saar, u hoqi vizat përfaqësuesve australianë pranë Autoritetit Palestinez. /Ad.Ab./

The post IZRAEL – Netanyahu kritikon Macron për “nxitje të antisemitizmit” appeared first on Agjencia Telegrafike Shqiptare.

Qeveria BERLIN, 19 gusht /ATSH – DPA/ – Qeveria gjermane beson se takimi i Ukrainës në Uashington ishte një takim historik që arriti të rikonstruktoje qeverinë amerikane me pozicionet evropiane, thanë sot burime qeveritare.

Takimi i djeshëm në Shtëpinë e Bardhë, ku morën pjesë presidenti ukrainas Volodymyr Zelensky dhe udhëheqës evropianë, e ktheu dinamiken e takimit të javës së kaluar në Alaskë mes presidentit amerikan Donald Trump dhe presidentit rus Vladimir Putin, thanë burimet.

Ai gjithashtu rezultoi në dakordësinë e presidentit Putin për të marrë pjesë në një takim bilateral me Zelenskn gjatë një telefonate me presidentinTrump, duke testuar më tej seriozitetin e Rusisë për negociatat e paqes.

Burimet thanë se qeveria gjermane ishte e qartë se planifikon të marrë pjesë në garantimet e sigurisë për Ukrainën pas një traktati paqeje, por theksuan se një vendim mbi kontributin e saj të saktë do të merret vetëm pasi të jetë sqaruar kuadri i gjerë i garantimeve.

Raportohet se ishte rënë dakord midis udhëheqësve evropianë në Uashington që garantimet e sigurisë duhet të jenë gjithëpërfshirëse, duke përfshirë çështje të sigurisë ushtarake, armatimin dhe monitorimin e Ukrainës, si dhe mbështetjen politike për vendin. /Ad.Ab./

The post BERLIN – Unitet BE-SHBA për Ukrainën appeared first on Agjencia Telegrafike Shqiptare.

LONDËR, 19 gusht /ATSH-DPA/ – Organi mbikëqyrës i zgjedhjeve në Britaninë e Madhe  ka rënë dakord të ndihmojë homologët e tij ukrainas në planifikimin e zgjedhjeve pas luftës.

Marrëveshja e bashkëpunimit do të shohë Komisionin Zgjedhor të ndajë me Kievin praktikat më të mira mbi sigurinë kibernetike dhe edukimin e votuesve kur ukrainasit të shkojnë sërish në votime.

Aktualisht, zgjedhjet në Ukrainë janë pezulluar për shkak të ligjit ushtarak që është vendosur pas pushtimit rus në shkurt 2022.

“Organizimi i zgjedhjeve të rregullta që fitojnë besimin dhe sigurinë e publikut është thelbësor për një demokraci të shëndetshme dhe të lirë”, tha drejtori ekzekutiv i komisionit, Vijay Rangarajan.

“Ne jemi krenarë që mirëpresim kolegët dhe miqtë tanë nga Ukraina në Mbretërinë e Bashkuar dhe të nënshkruajmë këtë marrëveshje bashkëpunimi. Ka shumë gjëra që mund të mësojmë nga njëri-tjetri dhe forcimi i lidhjeve mes nesh do të na ndihmojë të ndajmë përvojë dhe dije gjatë viteve që vijnë. Ne jemi të gatshëm ta mbështesim Ukrainën ndërsa përgatitet për zgjedhjet e ardhshme pas luftës”, shtoi ai.

Memorandumi i mirëkuptimit me Komisionin Qendror të Zgjedhjeve të Ukrainës, i nënshkruar në Londër, do të mundësojë që dy organizatat të ndajnë informacione për të ndihmuar autoritetet ukrainase në planifikimin e zgjedhjeve pas luftës.

Delegacioni ukrainas zhvilloi disa takime në Britaninë e Madhe sipas komisionit, mbi çështje si dezinformimi, ndërhyrjet e huaja, siguria fizike dhe siguria kibernetike, si dhe diskutime mbi rregullimin e financimit politik.

“Konsideroj se nënshkrimi i memorandumit mes institucioneve tona është një moment historik që do të nxisë bashkëpunimin tonë dhe, përmes shkëmbimit të përvojave dhe marrjes së praktikave më të mira, do të ndihmojë në forcimin e vlerave demokratike në Ukrainë,” tha kryetari i komisionit ukrainas, Oleh Didenko.

“Ndërsa përgatitemi për zgjedhje sfiduese pas luftës, vendosja e bashkëpunimit dhe njohja me procese të rëndësishme si votimi jashtë vendit dhe lufta kundër dezinformimit do të na mundësojnë të përgatitemi në mënyrë efektive dhe efikase për zgjedhjet më të vështira në historinë e vendit tonë”, përfundoi  Didenko.

The post LONDËR – BM-ja ndihmon Ukrainën për zgjedhjet pas luftës appeared first on Agjencia Telegrafike Shqiptare.

UASHINGTON, 19 gusht / ATSH/ – Presidenti Donald Trump ka përjashtuar mundësinë e dërgimit të trupave amerikane në Ukrainë në intervistën e tij të parë pas takimit të djeshëm në Shtëpinë e Bardhë me presidentin ukrainas Volodymyr Zelenskyy dhe udhëheqësit evropianë, sipas “The Guardian”.

“Ju kam dhënë sigurinë time, dhe unë jam president”, tha sot Trump për “Fox News” në programin “Fox & Friends” gjatë një interviste telefonike kur u pyet nëse forcat amerikane mund të dërgoheshin për të mbrojtur Ukrainën nga një tjetër pushtim rus.

Presidenti amerikan theksoi përsëri se Ukraina nuk do të pranohej në NATO gjatë mandatit të tij, por shtoi se Kievi do të merrte ende garanci sigurie. Ai sugjeroi se këto garanci do t’i merrnin përpara aleatët evropianë.

Trump tha se Franca, Gjermania dhe Britania e Madhe janë disa nga vendet që po shqyrtojnë dërgimin e trupave të tyre për të forcuar mbrojtjen e Ukrainës. /Ad.Ab./

The post SHBA – Trump përjashton dërgimin e trupave amerikane në Ukrainë appeared first on Agjencia Telegrafike Shqiptare.

UASHINGTON, 19 gusht /ATSH/ – Teksa mburrej me kredencialet e tij si i ashtuquajturi “kryepaqebërës” gjatë bisedimeve lidhur me luftën në Ukrainën në Shtëpinë e Bardhë, presidenti amerikan  Donald Trump bëri dy pretendime të mëdha; ai dëshiron marrëveshje paqeje në vend të armëpushimit, dhe se ka përfunduar gjashtë luftra që kur u bë president, komenton “The Guadian”.

Por në nxitimin e tij për të arritur një marrëveshje paqeje në Ukrainë, Trump po luan lirshëm me të vërtetën.

Trump dhe administrata e tij kanë pretenduar se kanë ndihmuar në zgjidhjen e konflikteve mes Izraelit dhe Iranit, Republikës Demokratike të Kongos dhe Ruandës, Kamboxhias dhe Tajlandës, Indisë dhe Pakistanit, Serbisë dhe Kosovës, dhe Egjiptit e Etiopisë.

Megjithatë, pretendimi për t’i zgjidhur këto konflikte është “i zbukuruar” dhe në disa raste kundërshtohet nga dhuna e vazhdueshme në vende si Republika Demokratike e Kongos, ku rebelët e mbështetur nga Ruanda nuk respektuan një afat për arritjen e një marrëveshjeje paqeje sot në Doha.

Në Iran, Shtetet e Bashkuara të Amerikës ndërmorën sulme me armë bunker-shkatërruese kundër objektivave ushtarake dhe bërthamore, përpara se ta detyronin Iranin të pranonte një armëpushim.

India ka mohuar që Trump të ketë luajtur ndonjë rol në arritjen e një marrëveshjeje armëpushimi me Pakistanin për t’i dhënë fund disa ditëve të sulmeve mbi territorin e kontestuar të Kashmirit në maj.

Egjipti dhe Etiopia nuk kanë asnjë marrëveshje për të zgjidhur rrënjën e konfliktit të tyre, një digë mbi lumin Nil, e ndërtuar nga Etiopia, që do të devijonte ujin nga Egjipti.

Dhe Serbia ka mohuar se kishte ndonjë plan për të ndjekur një luftë me Kosovën, megjithëse  presidenti Trump mori meritën për parandalimin e saj.

Sa i përket armëpushimeve, me pranimin e vet Trump shpesh i ka kërkuar ato në këto konflikte. Tani, ai ka kërkuar ta rishkruajë historinë, duke ushtruar presion mbi Ukrainën.

Deklarata e presidentit Trump se ai nuk po kërkonte armëpushim në Ukrainë erdhi pas një takimi me presidentin Putin në Alaskë të premten e kaluar, ku presidenti rus fillimisht kërkoi që Ukraina të dorëzonte kontrollin mbi territorin në juglindje të vendit përpara se të negocionte një armëpushim.

Çështja është thelbësore për renditjen e hapave drejt një paqeje përfundimtare në Ukrainë.

Putini dëshiron të vendosë se cilin territor do të mbane Rusia ndërsa luftimet ende vazhdojnë, ndërsa Kievi ka kërkuar një armëpushim përpara se të merren vendime mbi pretendimet territoriale.

Në takimet dje me liderët europianë, Trump tha  se nuk po kërkonte arritjen e armëpushimit.

“Nëse shikoni gjashtë marrëveshjet që unë zgjidha këtë vit, ata ishin të gjithë në luftë. Nuk bëra asnjë armëpushim”, deklaroi Trump, duke i thënë Zelenskyt, “Nuk mendoj se ju duhet armëpushimi”.

Por historia e tij flet ndryshe. Më 10 maj, pas shpërthimit të dhunës mes Indisë dhe Pakistanit, Trump njoftoi se “pas një nate të gjatë bisedimesh të ndërmjetësuara nga Shtetet e Bashkuara të Amerikës, kishte kënaqësinë të njoftonte se India dhe Pakistani kishin rënë dakord për një rmëpushim të plotë dhe të menjehershëm. Urime të dy vendeve për përdorimin e arsyes së shëndoshë dhe zgjuarsisë së madhe”.

Më 26 korrik, presidenti Trump tha se po i telefononte liderët e Tajlandës dhe Kamboxhias për të bërë thirrje për një armëpushim pas tre ditësh luftimesh kufitare. “Telefonata me Kamboxhian ka përfunduar, por pres të rikthehem për një thirrje lidhur me ndalimin e luftës dhe armëpushimin në bazë të asaj që Tajlanda ka për të thënë”, shkruante  ai. “Po përpiqem ta thjeshtoj një situatë komplekse”!

Për Izraelin dhe Iranin,  presidenti Trump kishte shkruar gjithashu se “ishtë plotësisht një  dakordësi mes Izraelit dhe Iranit që do të kishte armëpushim të plotë dhe total”.

Televizioni amerikan, “MSNBC”, publikoi një përmbledhje të deklaratave të Trump duke bërë thirrje për armëpushim në Ukrainë në javët dhe ditët përpara takimeve të tij me Putinin dhe më pas Zelensky.

Por Trump, në kërkim të një fitoreje të shpejtë, ka rishkruar historinë e tij teksa afrohet më pranë një plani të miratuar nga Putini për t’i dhënë fund një konflikti që ka rezultuar shumë më i vështirë për t’u zgjidhur sesa kishte menduar dikur.  /Ad.Ab./

The post ANALIZË – “The Guardian”: Trump u ka dhënë fund gjashtë luftërave, a është e vërtetë kjo? appeared first on Agjencia Telegrafike Shqiptare.

LONDËR, 19 gusht /ATSH-DPA/ – Presidenti amerikan Donald Trump ka thënë se avionët amerikanë mund të ndihmojnë në mbrojtjen e Ukrainës nëse arrihet një marrëveshje për t’i dhënë fund luftës, por pranoi se ishte e mundur që presidenti rus Vladimir Putin të refuzojë një plan paqeje.

Ai tha se do të ishte një “situatë e vështirë” nëse Putini nuk pajtohet me kushtet e paqes, por theksoi se presidenti ukrainas Volodymyr Zelensky duhet të tregojë fleksibilitet, duke përfshirë heqjen dorë nga shpresat për të rikthyer Krimenë apo për t’u anëtarësuar në NATO.

Komentet e presidentit amerikan erdhën ndërkohë që kryeministri britanik Keir Starmer zhvilloi bisedime me anëtarët e “koalicionit të vullnetshmëve”, shtetet e gatshme të kontribuojnë për të garantuar sigurinë e Ukrainës nëse arrihet një marrëveshje për t’i dhënë fund pushtimit rus.

Gjatë një telefonatesot, anëtarët e grupit diskutuan mundësinë e sanksioneve të reja ndaj Rusisë, ndërsa planifikuesit nga këto shtete do të takohen me homologët e tyre amerikanë “në ditët e ardhshme”, mes përpjekjeve për të ngritur “garanci të forta sigurie”, sipas zyrës së  kryeministrit Starmer.

“Shpresoj që presidenti Putin të sillet mirë, dhe nëse jo, do të jetë një situatë e vështirë. Dhe shpresoj që Zelensky, presidenti Zelensky, të bëjë atë që duhet të bëjë. Ai duhet të tregojë pak fleksibilitet”. I tha presidneti Trump Fox News”.

Britania e Madhe dhe Franca janë zotuar të dërgojnë forca në Ukrainë për të penguar presidentin   Putinin të nisë një sulm të ri ndaj fqinjit të tij, nëse arrihet një marrëveshje për përfundimin e luftës.

Trump tha se ata ishin “të gatshëm të vendosin njerëz në terren” dhe shtoi se “ishin  të gatshëm t’i ndihmonin me shumë gjëra, veçanërisht ndoshta nga ajri, sepse askush nuk kishte pajisje të tilla si ne”.

Megjithatë, ai sugjeroi se Putini kishte pak gjasa të niste një pushtim tjetër, pasi ishte “i lodhur prej tij” pas tre vitesh lufte. /Ad.Ab./

The post SHBA -Trump: Do të jetë një “situatë e vështirë” nëse Putin nuk pranon planin e paqes appeared first on Agjencia Telegrafike Shqiptare.

OSAKA, 19 gusht /ATSH-DPA/ – Ministri i Jashtëm gjerman Johann Wadephul akuzoi  sot Kinën dhe Korenë e Veriut se po kërcënojnë stabilitetin ndërkombëtar përmes veprimeve agresive në rajonin Indo-Paqësor.

“Rregulli është gjithmonë që kufijtë nuk duhet të zhvendosen me forcë. As në Europë, as në Indo-Paqësor, e askund tjetër në botë”, tha Wadephul gjatë një vizite në “Flotën e 7”-të amerikane dhe një bazë detare japoneze në Jokosuka, në jug të Tokios.

Duke folur për gazetarët, Wadephul theksoi rolin jetik që kanë partneritetet e forta për ruajtjen e paqes, sigurisë dhe stabilitetit. Ai e përshkroi bazën si strategjikisht të rëndësishme për ruajtjen e stabilitetit në Indo-Paqësor dhe vuri në dukje se, së bashku me partnerët e ngushtë të G7-s, Japoninë dhe Shtetet e Bashkuara, Gjermania ndan shqetësimet mbi tensionet në rritje në rajon.

“Flota e 7”-të amerikane është vendosur në Japoni nën një pakt sigurie dypalësh të nënshkruar në vitin 1960 për të ndihmuar në mbrojtjen e vendit.

Më shumë se 26 000 ushtarë amerikanë jetojnë dhe punojnë në bazën e Jokosukës. Zona e saj e veprimit mbulon 36 vende, dhe deri në 70 anije luftarake, përfshirë një aeroplanmbajtëse dhe nëndetëse, janë të dislokuara aty në mënyrë të përhershme.

Wadephul paralajmëroi se fuqizimi ushtarak i Kinës dhe përpjekja e saj për t’u bërë lideri botëror teknologjik përmes “big data” dhe inteligjencës artificiale përbëjnë një sfidë për rajonin.

Ai i bëri thirrje Pekinit që të mos ndryshojë status quo-në në ngushticën e Tajvanit, duke theksuar se ndalimi i përdorimit të forcës, i parashikuar nga Karta e Kombeve të Bashkuara, vlen për ngushticën e Tajvanit, Detin e Kinës Jugore dhe Detin e Kinës Lindore.

Ministri i Jashtëm kritikoi gjithashtu ashpër retorikën dhe manovrat e Koresë së Veriut, të cilat sipas tij po rrisin tensionet.

“Pheniani vazhdon të zgjerojë arsenalin e tij bërthamor, të kryejë testime të raketave balistike në shkelje të ligjit ndërkombëtar dhe të mbështesë luftën e Rusisë në Ukrainë me personel ushtarak, duke minuar paqen si në Indo-Paqësor ashtu edhe në Europë”, tha Wadephul.

Ai i quajti aktivitetet e Koresë së Veriut si shkelje të disa rezolutave të Këshillit të Sigurimit të OKB-së. /Ad.Ab./

The post JAPONI – Wadephul kritikon Kinën dhe Korenë e Veriut për tensionet në Indo-Paqësor appeared first on Agjencia Telegrafike Shqiptare.

UASHINGTON, 18 gusht /ATSH/ – Presidenti amerikan Donald Trump tha sot se priste që presidenti rus Vladimir Putin të lironte mbi 1 000 të burgosur ukrainas menjëherë pas një takimi trepalësh me udhëheqësin ukrainas Volodymyr Zelensky, sipas “Reuters”.

“Mendoj se do të shihni se presidenti Putin me të vërtetë do të donte të bënte diçka gjithashtu”, tha Trump në takimin me Zelensky dhe shtatë udhëheqës evropianë, duke parashikuar disa “lëvizje vërtet pozitive” pasi u ra dakord për një takim trepalësh.

“E di që ka mbi 1 000 të burgosur dhe e di që do t’i lirojnë. Ndoshta do t’i lirojnë shumë shpejt, menjëherë, gjë që mendoj se është shumë mirë”, tha Trump. /Ad.Ab/

The post UASHINGTON – Trump parashikon lirimin e mbi 1 000 ukrainasve nga Rusia appeared first on Agjencia Telegrafike Shqiptare.