“Duhet të pezullohet veprimtaria e Agjencisë Kombëtare të Ushqimit”, ishte kjo kërkesa e bërë nga kryeministri Edi Rama më 2 korrik 2025 për ministren e bujqësisë Anila Denaj.

Ministria e Bujqësisë ka sqaruar për Report Tv se nuk është pezulluar gjithë veprimtaria e Autoritetit Kombëtar të Ushqimit, por i është hequr e drejta për të bërë kontrolle që nuk janë të programuara që në nisje të vitit.

Praktikisht nëse ka indicie për abuzim, AKU i ndalohet të veprojë pa marrë më parë aprovim nga Ministria e Bujqësisë. Ndërsa çdo inspektim i planifikuar do të vijojë të kryhet siç është bërë deri më tani.

“Nuk ekziston një pezullim i përgjithshëm i punës së AKU-së, por është vendosur pezullim i inspektimeve të paplanifikuara, në pritje të ristrukturimeve dhe përshtatjeve të nevojshme sipas ligjit të ri. Inspektimet e planifikuara dhe të miratuara nga titullari i AKU-së po kryhen në mënyrë të rregullt dhe në përputhje me planet operacionale të miratuara”, thuhet në përgjigjen e Ministrisë së Bujqësisë.

Vjet AKU ka bërë në terren 25 mijë kontrolle të planifikuara dhe më shumë se 6700 të tjera të paprogramuara në bazë risku. Por rritja e kontrolleve dhe të paparashikuara nga inspektorët e AKU-së, ka shtuar ankesat nga subjektet private.

“Vendimi për pezullimin e inspektimeve të paplanifikuara është marrë duke marrë parasysh rritjen e ndjeshme të ankesave nga subjekte të ndryshme për qasjen dhe sjelljen e inspektorëve, mungesën e planeve operacionale të argumentuara si dhe përgatitjet e nevojshme për implementimin e Ligjit nr. 99/2024”, thotë ministria.

Ministria sqaron po ashtu se po punohet për të adresuar rastet e mundshme abuzive gjatë kryerjes së inspektimit dhe për këtë arsye është ngritur grupi i punës që përfshin edhe ekspertizën e Universitetit Bujqësor të Tiranës, që do të sigurojë vlerësim profesional të inspektorëve.

“Ministria e Bujqësisë dhe Zhvillimit Rural është në proces të hartimit të një plani pune të detajuar për vijimin e procedurave dhe marrjen e vendimeve të mëtejshme në funksion të realizimit të reformës së inspektoratit”, vijon më tej përgjigja.

Por, të gjitha këto masa janë të përkohshme, derisa të zbatohet plotësisht reforma e inspektorateve për të cilën ende nuk ka përfunduar plotësimi i akteve nënligjore, që parashikon shkrirjen jo vetëm të AKU por edhe të dy institucioneve të tjera në fushën e bujqësisë: Drejtorisë së Shërbimeve të Peshkimit dhe Akuakulturës, si dhe Agjencisë Kombëtare të Veterinarisë dhe të Mbrojtjes së Bimëve. Të treja këto institucione do të ristrukturohen duke i kaluar të gjitha funksionet dhe kompetencat e inspektoratit në një strukturë të vetme qendrore./Shqiptarja

Një 67-vjeçar nga Patosi ka rënë në prangat e policisë së Durrësit.

Gjatë kontrollit të automjetit të Maksim Lajthisë në Portin e Durrësit, efektivët gjetën një sasi kokainë, shishe me verë dhe 12 200 euro që ai nuk e kishte deklaruar

“Specialistët për Hetimin e Narkotikëve të DVP Durrës arrestuan në flagrancë shtetasin M. L., 67 vjeç, banues në Patos, pasi në PKK Port Durrës, në hyrje, gjatë kontrollit në automjetin e tij, shërbimet e Policisë gjetën dhe sekuestruan një sasi lënde të dyshuar narkotike kokainë, shishe me verë dhe 12 200 euro që ai nuk e kishte deklaruar”, njoftoi sot policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

Presidenti i Republikës, Bajram Begaj, ka dekretuar lirimi nga detyra të ambasadores së Shqipërisë pranë UNESCO-s, Besiana Kadare.

Vajza e shkrimtarit të njohur Ismail Kadare, e ka mbajtur këtë post diplomatik për vite me radhë, duke luajtur një rol të rëndësishëm në promovimin e trashëgimisë kulturore shqiptare dhe përfshirjen e saj në listën e trashëgimive botërore të mbrojtura.

Besiana Kadare, u emërua në këtë post më 1 tetor të vitit 2021, me dekret të Presidentit të asaj kohe, Ilir Meta. Më parë, ajo ka qenë ambasadore e vendit në OKB.

TikTokeri i famshëm Kozak Braçi, është ndëshkuar me një gjobë prej 100 mijë lekësh të reja për ndotje të mjedisit, pasi u kap në një video duke hedhur mbeturina nga dritarja e një automjeti në lëvizje, ku ai ndodhej si pasagjer.

Videoja, e publikuar së fundmi në rrjetet sociale, ngriti reagime të shumta dhe çoi në ndërhyrjen e menjëhershme të Policisë. Pas verifikimeve, u konstatua se pamjet ishin regjistruar disa kohë më parë.

Në video, ai dëgjohet teksa thotë “In Albania, no problem”, duke dhënë kështu një shembull të turpshëm për flakjen e mbeturinave.

Pas identifikimit, Braçi, u shoqërua në ambientet e Policisë për kryerjen e veprimeve të mëtejshme procedurale.

Pas njoftimit të madh të Trump-it për shitjen e armëve europianëve për Kievin dhe për ultimatumit ndaj Putinit, nuk mungojnë dyshimet dhe pasiguritë, sidomos në lidhje me planin afatgjatë. Europa është e kënaqur me këtë ndryshim qëndrimi për armët, edhe pse nuk beson në efektshmërinë e kërcënimit me “taksat dhe sanksionet” që do të hyjnë në fuqi pas plot 50 ditësh.

Për më tepër, edhe pse Sekretari i Përgjithshëm i NATO-s, Mark Rutte, duke folur nga Zyra Ovale krah Trump-it, e quajti “të vetëkuptueshme” kërkesën e presidentit amerikan që europianët të paguajnë për armët, Përfaqësuesja e Lartë për Politikën e Jashtme të BE-së, Kaja Kallas, deklaroi dje: “E mirëpresim njoftimin e presidentit Donald Trump për dërgimin e më shumë armëve në Ukrainë, megjithëse do të donim që SHBA të ndante barrën me ne”.

Një tjetër çështje është se çfarë lloj armësh do të dërgohen. Prej ditësh qarkullojnë zëra për mundësinë e dërgimit edhe të raketave me rreze të gjatë veprimi, por si Trump ashtu edhe Rutte u shprehën në mënyrë të paqartë të hënën për përmbajtjen e “paketës”, përveç përmendjes së sistemeve mbrojtëse Patriot.

Burime anonime të cituara nga gazetat thonë se Trump do të dërgojë edhe armë ofensive: në veçanti, raketa të tjera të tipit ATACMS (Army Tactical Missile System), me lejen për t’u përdorur nga ukrainasit në rrezen e plotë deri në 300 kilometra në territorin rus (nuk arrijnë në qytetet Moskë e Shën Petersburg, por mund të godasin baza e depo armësh në thellësi). Për më tepër, Ukraina ka kërkuar — por ende nuk ka marrë — raketat JASSM (Joint Air-to-Surface Standoff Missiles), të cilat kanë rreze më të gjatë se ATACMS dhe mund të lëshohen nga avionët luftarakë F16 (që tashmë janë ofruar nga europianët për Kievin).

Por dje presidenti amerikan deklaroi se për momentin nuk ka ndërmend të dërgojë raketa me rreze të gjatë veprimi, edhe pse nuk e përjashtoi këtë mundësi në të ardhmen. E megjithatë, ishte vetë ai që ngjalli shpresa tek Zelensky, duke e pyetur, më 4 korrik, nëse ishte në gjendje të godiste Moskën dhe Shën Petersburgun. Tani Shtëpia e Bardhë thotë se ishte thjesht një pyetje e zakonshme.

I dërguari i Trump në NATO, Matt Whitaker, thekson se prioritet janë sistemet mbrojtëse — Patriotët që mund të kapin raketat balistike ruse — dhe shpresohet që ato të mbërrijnë në ditët në vijim nga rezervat europiane, ndërsa vetë europianët janë në pritje të furnizimeve të reja nga Amerika. Edhe vetë ukrainasit i konsiderojnë Patriotët si nevojën më urgjente: ata kanë aktualisht 8 njësi, prej të cilave dy nuk funksionojnë, dhe shumë qytete janë të pambrojtura nga sulmet ajrore ruse.

Por të gjithë ekspertët theksojnë se, përveç Patriotëve (që duhen sa më shpejt), janë të domosdoshme edhe armë që u mundësojnë ukrainasve të “marrin iniciativën” në fushëbetejë: “Më shumë armë ofensive për të goditur objektivat pas vijës së frontit — shkruhej dje në editorialin e Washington Post —. Kjo është zona ku administrata Biden ka vepruar shumë ngadalë dhe me shumë hezitim, gjithmonë nga frika se sulmet më të drejtpërdrejta ndaj Rusisë do të shkaktonin një konflikt rajonal më të gjerë me një fuqi bërthamore”.

Pikërisht pas kërcënimit me sanksione dytësore ndaj vendeve që blejnë gaz dhe naftë ruse, Trump u ka kërkuar senatorëve republikanë që për momentin të ngrijnë një projektligj që parashikon sanksione dytësore deri në 500%, i mbështetur nga 85 prej 100 senatorëve: këto sanksione do të kishin pasoja shkatërruese, por udhëheqësi i republikanëve në Senat, John Thune, shpjegon se “për momentin, presidenti dëshiron ta menaxhojë vetë këtë çështje”.

A është vërtet gati Trump të shkojë përpara me sanksione dytësore që do të godisnin Kinën dhe Indinë — rivalin kryesor dhe një aleat kyç i SHBA? Edhe vetë SHBA-të do të vuanin, për shkak të rritjes së çmimit të naftës. Shumëkush nuk beson se Trump është i gatshëm të sakrifikojë këto marrëdhënie për hir të Ukrainës.

Për më tepër, me të dy vendet — Kinën dhe Indinë — janë në zhvillim negociata për taksat doganore dhe, sipas politologut Ian Bremmer, Trump po e kupton se ndodhet në një pozitë më të dobët se ç’e mendonte, si në aspektin politik (në raport me durimin e opinionit publik), ashtu edhe ekonomik (për shkak të pasojave të mundshme nga kufizimet kineze për mineralet kritike), dhe u ka kërkuar “skifterëve” në administratën e tij të ulin pritshmëritë për periudhën afatshkurtër, duke zbutur gjithashtu disa kufizime mbi eksportin e çipave gjysmëpërçues në Kinë.

A do të arrijnë New Delhi dhe Pekini të reduktojnë varësinë nga Rusia brenda këtyre 50 ditëve? Vështirë, për shkak të kompleksitetit të një operacioni të tillë. A mund të ushtrojë Kina presion mbi Moskën për të ndalur luftën? Nuk është e sigurt që Kina ta dëshirojë këtë: një përfundim i shpejtë i luftës do të rrezikonte të zhvendoste gjithë vëmendjen e SHBA në Indo-Paqësor./Corriere della sera

Pas historisë me Laert Haxhiun, në disa media u përfol për të tjera takime speciale me modele të njohura, këtë radhë në burgun e Reçit. Sipas mediave, 2 vajza të njohura të showbizzit shqiptar kanë marrë takim në dhomë speciale me një të dënuar, por nga drejtoria e Burgjeve thuhet se nuk ka të dhëna për episode të tilla.

Megjithatë, pas shkrimeve të cilat nuk janë vërtetuar deri më tani nga autoritetet, kanë nisur verifikimet, pasi emrat e tyre nuk figurojnë në librat e hyrje-daljeve në burg. Burime për Report Tv nga Drejtoria e Burgjeve thanë se po verifikohet nëse ka pasur zyrtarë të burgjeve të përfshirë që mund të kenë lejuar këto takime në shkelje të procedurave, pasi modelet mund të jenë futur duke u maskuar në letra si bashkëshorte të të dënuarve apo të afërme të tyre.

Drejtoria e Burgjeve nisi verifikim edhe për takimin special në burgun e Drenovës mes një modeleje nga Kosova, Ziza Pajaziti dhe të dënuarit me burg përjetë Laert Haxhiu. Disa ditë pas këtij takimi, Haxhiut iu gjet 1 celular, dhe 3 aparate të tjerë anëtarëve të grupit të tij.  Po hetohet për personin që mund të ketë futur celularët brenda burgut.

Drejtoria e Përgjithshme e Burgjeve ka emëruar drejtuesit e rinj në Burgun e Peqinit dhe në Burgun e Elbasanit.

Kështu, në Burgun e Peqinit është emëruar drejtor Altin Ago. Kujtojmë se ky institucion i vuajtjes së dënimit ka qenë me drejtues të komanduar që prej Prillit 2025, pas dorëheqjes së ish-drejtorit Florenc Doka.

Ndërsa në Burgun e Elbasanit është emëruar drejtor Qazim Hoxha.

Emërimet e reja janë bërë një ditë më parë nga Drejtoria e Burgjeve.

Në lidhje me kontrollet në burgje, Report Tv mëson se janë kontrolle rutinë dhe verifikuese, pas shkrimeve që kanë dalë në media në lidhje me disa takime në Burgun e Reçit, të cilat deri më tani nuk janë verifikuar.

Një vendim i shpallur nga Gjykata Kushtetuese në muajin maj, rrëzonte opozitën për mandatin e deputetit Vullnet Sinaj, por zbardhja e e plotë e tij më 10 korrik, zbulon se Gjykata, ka korrigjuar vetveten, duke riaktivizuar të drejtën e një të pestës së deputetëve për t’iu drejtuar direkt asaj në rastet e papajtueshmërisë së mandatit. Në këtë mënyrë, kapërcehet ngërçi i krijuar nga shumica socialiste, me rastin e Olta Xhaçkës apo dhe Vullnet Sinajt, kur Parlamenti refuzoi t’i dërgonte çështjet në Gjykatë.

Sipas vendimit të fundit, nëse Kuvendi, vendos me votën e shumicës të mos e përcjellë çështjen për shqyrtim në Gjykatën Kushtetuese, atëherë, 1/5 e deputetëve (28 deputetë) mund t’i drejtohen drejtpërdrejt Gjykatës, për t’i kërkuar të gjykojë rastin në fjalë.

E drejta e një të pestës së deputetëve për të vënë në lëvizje Gjykatën Kushtetuese, parashikohet në nenin 134 të Kushtetutës. Po ashtu edhe Ligji që rregullon funksionimin dhe organizimin e kësaj Gjykate, parashikon në nenin 66 se “për shqyrtimin e papajtueshmërisë në ushtrimin e funksioneve të deputetëve, Gjykata Kushtetuese vihet në lëvizje me kërkesë të Kuvendit ose të një të pestës së deputetëve”.

Por në vitin 2023, kishte qenë po Gjykata Kushtetuese e cila e kishte nxjerrë jashtë loje, mekanizmin e një të pestës së deputetëve. Ndërsa shqyrtonte kërkesën e 28 deputetëve demokratë, për rastin Xhaçka, ajo e kushtëzonte ushtrimin e kompetencës së vet për shqyrtimin e papajtueshmërisë së një mandati, me kërkesën nga ana e Parlamentit.

Në vendimin e datës 23 janar 2023, duke e rrëzuar ankimimin e një të pestës së deputetëve demokratë, Gjykata theksonte se “konstatimi i papajtueshmërisë dhe mbarimit të mandatit të deputetit për shkelje të pikës 3 të nenit 70 të Kushtetutës është një çështje që i përket juridiksionit të Gjykatës, juridiksion ky që aktivizohet vetëm me kërkesë të Kuvendit”.

Pikërisht ky interpretim i atëhershëm i Gjykatës, u kthye në një pengesë më shumë për opozitën, ndërkohë që u përdor nga shumica, në mbrojtje të deputetëve të saj. Shumica refuzoi madje dhe interpretimin e qartë të Komisionit të Venecias, sipas të cilit vendimet e Gjykatës Kushtetuese janë detyruese dhe për parlamentin.

Me vendimin e fundit, Kushtetuesja, ndonëse nuk e njeh si një nga dy rrugët e drejtpërdrejta për ta vënë në lëvizje këtë Gjykatë (siç e parashikon ligji për këtë institucion), e aktivizon megjithatë mekanizmin e tre të pestave, vetëm kur Parlamenti refuzon ta dërgojë rastin në Gjykatë.

PJESË NGA VENDIMI: 

Gjykata thekson se qëllimi i kompetencës kushtetuese për kontrollin e papajtueshmërisë së mandatit të deputetit nënkupton një gjykim në themel prej saj, në të cilin ajo vlerëson nëse veprimet konkrete të kryera nga deputeti janë të papajtueshme me mandatin e tij dhe në përfundim konstaton këtë papajtueshmëri, nëse është rasti. Në funksion të realizimit të këtij qëllimi, kushtetutëbërësi ka parashikuar edhe një të dhjetën e deputetëve si subjekt q vë në lëvizje procedurën parlamentare për dërgimin e çështjes së papajtueshmërisë së dyshuar të deputetit për shqyrtim në themel në Gjykatë. Në këto kushte, në rastet kur Kuvendi vihet në lëvizje me mocion të një të dhjetës së deputetëve ose të Kryetarit të tij, ai (Kuvendi) ka detyrimin kushtetues për të filluar procedurën parlamentare për shqyrtimin e mocionit për dërgimin e çështjes së papajtueshmërisë së mandatit në Gjykatë.

Në rast të rrëzimit të mocionit të një të dhjetës së deputetëve të Kuvendit ose Kryetarit të tij, për rrjedhojë në rast të mosvënies në lëvizje të Gjykatës nga Kuvendi, në kuptim të bërjes efektiv të këtij mekanizmi të kontrollit kushtetues të parashikuar nga shkronja “e” e pikës 1 të nenit 131 të Kushtetutës, paraqitja e kërkesës nga jo më pak se një e pesta e deputetëve, në kuptim të së drejtës së saj sipas shkronjës “c” të pikës 1 të nenit 134 të Kushtetutës, të reflektuar tashmë edhe në përmbajtjen e pikës 2 të nenit 66 të ligjit nr. 8577/2000, përbën mjetin alternativ për vënien në lëvizje të gjykimit kushtetues për kontrollin e papajtueshmërisë së mandatit të deputetit.

E drejta e një të pestës së deputetëve sipas nenit 66, pika 2, të ligjit nr. 8577/2000 lidhet me vënien në lëvizje të Gjykatës në ato raste kur vetë Kuvendi, pas shqyrtimit të mocionit të Kryetarit të tij ose një të dhjetës së deputetëve, vendos të rrëzojë mocionin në seancë plenare, për rrjedhojë të mos pranojë dërgimin e çështjes në Gjykatë. Vetëm në këtë mënyrë bëhet i  zbatueshëm neni 70, pika 4, i Kushtetutës dhe merr vlerë e drejta e pakicës parlamentare, jo më pak se një të pestës së deputetëve, për të kërkuar nga Gjykata shqyrtimin përfundimtar në themel të çështjes së papajtueshmërisë së mandatit të deputetit.