PARIS, 25 korrik /ATSH/- Vendimi i guximshëm i Francës për të njohur shtetin e Palestinës mund të ndihmojë në ndryshimin e diskutimeve rreth të ardhmes së Lindjes së Mesme, edhe nëse nuk ka gjasa të ketë një ndikim të menjëhershëm për banorët në Gazë ose në luftën e Izraelit me Hamasin, sipas AP.

Në një botë ku vendet po përdorin sërish forcën ushtarake për të imponuar vullnetin e tyre mbi të tjerët – veçanërisht Rusia në Ukrainë, dhe SHBA-ja dhe Izraeli me sulmet e tyre të fundit ndaj Iranit dhe objekteve të tij bërthamore – presidenti francez Emmanuel Macron po përpiqet t’i japë një goditje diplomacisë dhe idesë së saj të natyrshme se lufta, në fund të fundit, rrallë sjell paqe.

Të mos veprosh me vendosmëri ndërsa shpaloset një fatkeqësi humanitare në Gaza, mund të jetë një njollë, kur të shkruhen librat e historisë.

Macron ka mjete për të ndikuar në çështjet botërore si udhëheqës i një vendi të armatosur me armë bërthamore, ekonomikisht dhe diplomatikisht të fuqishëm, i cili gjithashtu ulet në tryezën e madhe në Kombet e Bashkuara, si një nga pesë anëtarët e përhershëm të këshillit të tij të sigurisë.

Të qenit anëtari i parë dhe, për momentin, i vetmi anëtar i grupit të vendeve të industrializuara G7 – që ndërmerr këtë hap mbart rreziqe të brendshme.

Duke kryesuar një vend me popullsinë më të madhe hebraike në Evropë dhe popullsinë më të madhe myslimane në Evropën Perëndimore, Macron është në një situatë të tensionuar të opinionit publik.

Fjalët e tij do t’i kënaqin disa votues, por do t’i zemërojnë të tjerët – një fakt i reflektuar nga reagimet politike thellësisht të ndara në Francë ndaj vendimit të tij të shpallur në X të dje në mbrëmje.

Por, pasi mbështeti me vendosmëri të drejtën e Izraelit për t’u mbrojtur kundër Hamasit dhe sulmit të tij të 7 tetorit 2023 që shkaktoi luftën, Macron po sinjalizon se mbështetja e Francës mund të shkojë vetëm deri diku.

Kryeministri izraelit Benjamin Netanyahu dënoi ndryshimin e njërit prej aleatëve më të ngushtë të vendit të tij në Evropë.

“Një veprim i tillë shpërblen terrorin dhe rrezikon të krijojë një tjetër përfaqësues iranian, ashtu siç u bë Gaza”, tha ai në një deklaratë.

“Një shtet palestinez në këto kushte do të ishte një pikënisje për të shkatërruar Izraelin – jo për të jetuar në paqe pranë tij”, shtoi ai.

Një hap, por jo një shkop magjik

Ideja që palestinezët dhe izraelitët mund të jetojnë krah për krah në paqe në shtetet e tyre ndoshta nuk është dukur kurrë më jorealiste – me Gazën në rrënoja dhe Bregun Perëndimor të pushtuar – që përballet me vendbanime në rritje nga izraelitët.

Vetëm fjalët e Macron nuk do ta ndryshojnë këtë. Megjithatë, mesazhi i udhëheqësit francez është se shpresa për një “zgjidhje me dy shtete” të arritur përmes diplomacisë nuk duhet të lejohet të vdesë – sado e paarritshme që mund të duket.

“Kjo zgjidhje është e vetmja rrugë që mund të adresojë aspiratat legjitime si të izraelitëve ashtu edhe të palestinezëve. Tani duhet të arrihet sa më shpejt të jetë e mundur”, tha Macron në një letër drejtuar presidentit palestinez, Mahmoud Abbas, e cila konfirmoi vendimin e tij për të njohur Palestinën si shtet.

“Perspektiva e një zgjidhjeje të negociuar për konfliktin në Lindjen e Mesme duket gjithnjë e më e largët. Nuk mund ta pranoj këtë”, tha ai.

Ndikimet e para ka të ngjarë të mos jenë në Gaza, por në kryeqytetet botërore ku udhëheqësit mund të përballen me presion ose të ndihen të nxitur për të ndjekur shembullin e Francës.

Vëmendja po përqendrohet te vendet e tjera të G7-ës, për shkak të ndikimit të tyre ekonomik dhe diplomatik.

Edhe pse më shumë se 140 vende e njohin Palestinën si shtet, Franca do të jetë më e madhja, më e populluara dhe më e fuqishmja midis atyre në Evropë që e kanë ndërmarrë këtë hap. //a.i/

The post ANALIZË – Si mund të ndryshojë dinamikën e LM-së njohja e shtetit të Palestinës nga Franca appeared first on Agjencia Telegrafike Shqiptare.

LONDËR, 25 korrik /ATSH/ – Kryeministri izraelit, Benjamin Netanyahu dhe presidenti i SHBA-së, Donald Trump duket se i kanë braktisur negociatat e armëpushimit në Gazë me grupin militant palestinez Hamas – një ditë pasi tërhoqën delegacionet e tyre nga bisedimet, sipas “Reuters”.

Netanyahu tha se Izraeli tani po shqyrtonte disa mundësi “alternative” për të arritur qëllimet e tij – për të kthyer pengjet nga Gaza dhe për t’i dhënë fund sundimit të Hamasit në territor.

Dje në mbrëmje, i dërguari i SHBA-së Steve Witkoff, tha se Hamasi ishte fajtor për bllokimin e negociatave të armëpushimit, të ndërmjetësuara nga Katari dhe Egjipti.

Armëpushimi i propozuar do të zgjaste 60 ditë, gjatë të cilave do të lejohej ndihma shtesë në Gazë, dhe disa nga 50 pengjet e mbetura do të liroheshin në këmbim të të burgosurve palestinezë të mbajtur nga Izraeli.

Presidenti i SHBA-së, Donald Trump tha se Hamasi nuk dëshironte një marrëveshje armëpushimi në Gazë dhe se ai beson se udhëheqësit e grupit militant tani do të “ndiqen”.

Deklarata e tij vjen një ditë pasi Steve Witkoff, i dërguari i SHBA-së në Lindjen e Mesme, ndërpreu bisedimet indirekte me grupin militant palestinez, në Doha dhe mes shqetësimeve ndërkombëtare në rritje për krizën humanitare në Gazë.

“Është shumë keq, pasi ka arritur në një pikë ku do të duhet ta përfundojme punën”, tha presidenti i SHBA-së.

“Mendoj se ata do të ndiqen”, tha Trump duke iu referuar udhëheqësve të Hamasit.

Deklarata e Trump lë pak ose aspak hapësirë për rifillimin e negociatave për të ndaluar luftimet, në një kohë kur shqetësimi ndërkombëtar po rritet për shkak të përkeqësimit të urisë në Gazën e shkatërruar nga lufta.

Trump reagoi gjithashtu ndaj njoftimit të presidentit francez, Emmanuel Macron se Franca do të ishte fuqia e parë e madhe perëndimore që do të njihte shtetin e pavarur palestinez.

“Ai është një djalë shumë i mirë, më pëlqen, por kjo deklaratë nuk ka peshë”, tha Trump.

Netanyahu e quajti vendimin një “shpërblim për terrorizmin”.

Vendet perëndimore janë angazhuar për dekada të tëra për një shtet të pavarur palestinez, por prej kohësh kanë thënë se ai duhet të lindë nga një proces paqeje i negociuar.

Dy fuqitë e tjera të mëdha të Evropës, Britania e Madhe dhe Gjermania, e bënë të qartë se nuk kishte plane për të vepruar menjëherë për shtetësinë palestineze. //a.i/

The post KOMENT – A po i braktisin Netanyahu dhe Trump negociatat për armëpushim në Gazë? appeared first on Agjencia Telegrafike Shqiptare.

UASHINGTON, 25 korrik /ATSH/-  Presidenti i SHBA-së, Donald Trump tha se Hamasi nuk dëshironte një marrëveshje armëpushimi në Gazë dhe se ai besonte se udhëheqësit e grupit militant tani do të “ndiqeshin”, sipas “abc news”.

Deklarata e tij vjen një ditë pasi Steve Witkoff, i dërguari i SHBA-së në Lindjen e Mesme, ndërpreu bisedimet indirekte me grupin militant palestinez, në Doha dhe mes shqetësimeve në rritje ndërkombëtar për krizën humanitare në Gazë.

Ndërkohë, kryeministri i Izraelit, Benjamin Netanyahu tha se Izraeli dhe aleatët e tij do të ndjekin “opsione alternative” për të kthyer pengjet e mbetura të 7 tetorit dhe për t’i dhënë fund sundimit të Hamasit në territor, duke shkaktuar shqetësimin se SHBA-ja dhe Izraeli kanë braktisur bisedimet për armëpushim.

“Është shumë keq, pasi ka arritur në një pikë ku do të duhet të përfundojmë punën”, tha presidenti i SHBA-së.

“Mendoj se ata do të ndiqen”, tha Trump duke iu referuar udhëheqësve të Hamasit.

Deklarata e Trump lë pak ose aspak hapësirë për rifillimin e negociatave për të ndaluar luftimet, në një kohë kur shqetësimi ndërkombëtar po rritet për shkak të përkeqësimit të urisë në Gazën e shkatërruar nga lufta.

Trump reagoi gjithashtu ndaj njoftimit të presidentit francez Emmanuel Macron se Franca do të ishte fuqia e parë e madhe perëndimore që do të njihte shtetin e pavarur palestinez.

“Ai është një djalë shumë i mirë, më pëlqen, por kjo deklaratë nuk ka peshë”, tha Trump.

Netanyahu e quajti vendimin një “shpërblim për terrorizmin”.

Vendet perëndimore janë angazhuar për dekada të tëra për një shtet të pavarur palestinez, por prej kohësh kanë thënë se ai duhet të lindë nga një proces paqeje i negociuar.

Dy fuqitë e tjera të mëdha të Evropës, Britania e Madhe dhe Gjermania, e bënë të qartë se nuk kishte plane për të vepruar menjëherë për shtetësinë palestineze. //a.i/

The post SHBA – Trump: Hamasi nuk dëshiron marrëveshje armëpushimi në Gazë appeared first on Agjencia Telegrafike Shqiptare.

PEKIN, 25 korrik /ATSH/- Kina po përjeton një shpërthim të infeksionit “Chikungunya” që përhapet nga mushkonjat, me mijëra raste të raportuara në jug të vendit, sipas AP.

“Rastet e etheve “Chikungunya” janë rritur në 4 014, duke regjistruar një rritje të shpejtë të rasteve që kur autoritetet filluan të gjurmojnë infeksionet dy javë më parë”, sipas Departamenteve Shëndetësore.

Guangdong, në provincën jugore të Kinës, është prekur rëndë nga rritja e infeksioneve.

Infeksioni “Chikungunya” përhapet tek njerëzit nga pickimet e mushkonjave të infektuara.

“Ai shkakton ethe dhe dhimbje të forta të kyçeve, por vdekjet janë të rralla”, sipas Organizatës Botërore të Shëndetësisë.

Raportet e medieve lokale thanë se autoritetet lokale pothuajse kishin dyfishuar numrin e shtretërve të izolimit të papërshkueshëm nga mushkonjat në 7 220 për të përmbushur kërkesat në rritje.

Kina regjistroi rritjen e parë të rasteve me “Chikungunya” në vitin 2010 – ku u raportuan 253 raste në Donguan.

“Rasti i parë në vend u importua në vitin 1987”, sipas të dhënave kërkimore dhe raporteve të medias. //a.i/

The post Kina Jugore goditet nga shpërthimi i infeksionit të transmetuar nga mushkonjat, “Chikungunya” appeared first on Agjencia Telegrafike Shqiptare.

UASHIGTON, 25 korrik /ATSH-DPA/- Në mosmarrëveshjen për tarifat me Bashkimin Evropian, presidenti i SHBA-së Donald Trump aktualisht i sheh shanset për të arritur një marrëveshje në rreth 50%.

“Do të thosha që kemi një shans 50 me 50, ndoshta edhe më pak, për të arritur një marrëveshje me BE-në. Nëse arrihet, ajo do të duhet të përfshijë uljen e tarifave nga ana e tyre, të cilat aktualisht janë 30%. Ata do të duhet t’i ulin – ndoshta. Ose mund të vendosin t’i lënë siç janë. Por ata duan shumë të bëjnë një marrëveshje”, u tha Trump gazetarëve para se të nisej për një vizitë pesëditore në Skoci.

Të mërkurën, Trump la të kuptohej mundësia e uljes së tarifave për importet e produkteve evropiane – nëse Bashkimi Evropian do te hapte tregun e tij më shumë për Shtetet e Bashkuara të Amerikës.

Trump sapo ka arritur një marrëveshje me Japoninë për tarifat prej 15% – që është dukshëm më pak se sa ishte planifikuar, fillimisht.

SHBA-ja ka negociuar një marrëveshje tregtare me BE-në për javë të tëra, e cila synon të parandalojë hyrjen në fuqi më 1 gusht – të tarifave prej 30% – të shpallura më herët nga Trump. //a.i/

The post SHBA – Trump: Shanset 50 me 50 për një marrëveshje tregtare me BE-në appeared first on Agjencia Telegrafike Shqiptare.

UASHINGTON, 25 korrik /ATSH/- Presidenti i SHBA-së, Donald Trump hodhi poshtë planin e Presidentit francez, Emmanuel Macron për të njohur shtetin palestinez në Asamblenë e Përgjithshme të Kombeve të Bashkuara, në shtator, sipas “Reuters”.

“Ajo që thotë ai nuk ka rëndësi”, u tha Trump gazetarëve në Shtëpinë e Bardhë.

“Ai është një djalë shumë i mirë. Më pëlqen, por kjo deklaratë nuk ka peshë”, theksoi Trump.

Macron i dërgoi një letër presidentit palestinez, Mahmoud Abbas duke e njoftuar për vendimin e tij.

Kjo vjen në përgjigje të një letre që Abbas i dërgoi Macron disa javë më parë, ku kërkohej dënimi i sulmit të Hamasit më 7 tetor, lirimi i menjëhershëm i pengjeve, mbështetje për çarmatosjen e Hamasit dhe theksohej angazhimi i Autoritetit Palestinez për t’ju nënshtruar reformave – për t’i lejuar atij – të qeverisë plotësisht Bregun Perëndimor dhe Gazën dhe të zhvillojë zgjedhje presidenciale deri në vitin 2026.

Presidenti francez, Macron e bëri njoftimin përpara një konference ndërkombëtare mbi zgjidhjen me dy shtete të organizuar nga Franca dhe Arabia Saudite që do të zhvillohet javën e ardhshme në selinë e OKB-së, në Nju Jork.

Zyrtarët sauditë thanë publikisht se shpresojnë që konferenca të nxisë më shumë vende për të njohur Palestinën.

“Franca do të vazhdojë me njohjen e plotë të Palestinës si shtet – kur unë të marr pjesë në Asamblenë e Përgjithshme të Kombeve të Bashkuara këtë shtator. Duke vepruar kështu, Franca synon të japë një kontribut vendimtar për paqen në Lindjen e Mesme dhe të mobilizojë të gjithë partnerët e saj ndërkombëtarë që dëshirojnë të marrin pjesë”, tha Macron.

“Ky qëndrim pasqyron angazhimin e Francës ndaj ligjit ndërkombëtar dhe mbështetjen e saj për të drejtat e popullit palestinez për vetëvendosje dhe krijimin e shtetit tonë të pavarur”, shkroi zëvendëspresidenti palestinez Hussein al-Sheikh në X.

Por, zyrtarë të shumtë izraelitë e dënuan njoftimin e Macron.

“Një shtet palestinez në këto kushte do të ishte një pikë nisjeje për të shkatërruar Izraelin – jo për të jetuar në paqe pranë tij”, tha kryeministri izraelit Benjamin Netanyahu në një deklaratë.

Ministri ultranacionalist i Financave, Bezalel Smotrich tha se Izraeli duhet t’i përgjigjet vendimit të Francës duke aneksuar zyrtarisht Bregun Perëndimor. Disa ministra të tjerë të qeverisë iu bashkuan thirrjes së tij.

Ministri izraelit i Mbrojtjes, Israel Katz tha se vendimi i Macron ishte një çmim për vrasësit dhe përdhunuesit e Hamasit që kryen masakrën më të keqe të hebrenjve që nga Holokausti. //a.i/

The post SHBA – Trump hedh poshtë planin e Macron për të njohur shtetin palestinez appeared first on Agjencia Telegrafike Shqiptare.

MOSKË, 25 korrik /ATSH/- Kremlini tha sot se një takim midis presidentit rus Vladimir Putin dhe homologut të tij ukrainas Volodymyr Zelenskiy mund të ndodhë vetëm si një hap i fundit për të nënshkruar një marrëveshje paqeje, sipas “Reuters”.

Zëdhënësi i Kremlinit, Dmitry Peskov tha se ishte e pamundur që një takim i tillë të mund të ndodhte deri në fund të gushtit, siç ka propozuar Ukraina.

“Takimi mund dhe duhet të vendosë pikën përfundimtare mbi një zgjidhje dhe të çimentojë modalitetet dhe marrëveshjet e përpunuara nga ekspertët. Është e pamundur ta bëjmë anasjelltas”, u tha Peskov gazetarëve.

“A është e mundur të kalohet nëpër një proces kaq kompleks brenda 30 ditësh? Epo, natyrisht, është e pamundur”, shtoi ai.

Ukraina tha se një takim i udhëheqësve ishte i nevojshëm për të arritur një progres në procesin që po ecën ngadalë, gjatë të cilit janë zhvilluar tre seanca të shkurtra bisedimesh paqeje në Turqi që nga mesi i majit.

Zelenskiy u tha gazetarëve se Rusia kishte filluar të angazhohej për mundësinë e një takimi të tillë.

“Ata kanë filluar ta diskutojnë atë. Ky është një progres drejt një formati të tillë takimi,” tha ai.

Një delegat ukrainas tha pas raundit të fundit të bisedimeve të paqes të mërkurën, të cilat zgjatën vetëm 40 minuta, se Kievi kishte propozuar një takim midis Putinit dhe Zelensky-t në gusht – pasi kjo përkonte me afatin 50-ditor që presidenti i SHBA-së Donald Trump kishte vendosur javën e kaluar për një marrëveshje. //a.i/

The post MOSKË – Kremlini: Takimi Putin-Zelensky vetëm në pikën përfundimtare të marrëveshjes së paqes appeared first on Agjencia Telegrafike Shqiptare.

PARIS, 25 korrik /ATSH/- Ministri i Jashtëm i Sirisë zhvilloi sot bisedime të sinqerta dhe produktive me Shtetet e Bashkuara të Amerikës dhe Francën, në të cilat ata nënvizuan rëndësinë e sigurimit të suksesit të tranzicionit politik, unitetit dhe integritetit territorial të Sirisë, sipas “Reuters”.

Ministri i Jashtëm sirian, Asaad Al-Shibani, ministri i Jashtëm francez, Jean Noel Barrot dhe i dërguari special i SHBA-së për Sirinë, Thomas Barrack u takuan sot në Paris, disa ditë pas armëpushimt që ndaloi gjakderdhjen në provincën jugore të Sirisë, Sweida.

Qindra njerëz u raportuan të vrarë në përleshjet midis luftëtarëve Druze, fiseve beduine sunite dhe forcave qeveritare, dhe Izraeli kreu sulme ajrore për të parandaluar atë që e quajti “vrasje masive të Druzëve.

Në një deklaratë të përbashkët, zyrtarët sirianë, amerikanë dhe francezë thanë se kishin zhvilluar një takim shumë të sinqertë dhe produktiv në një moment kritik për Sirinë.

Duke nënvizuar rëndësinë e angazhimit të shpejtë për të siguruar suksesin e tranzicionit politik të Sirisë pas rënies së presidentit Bashar al-Assad, ata thanë se kishin rënë dakord për nevojën për të siguruar që fqinjët e Sirisë të mos përbënin një kërcënim dhe që Siria të mos ishte kërcënim për fqinjët e saj.

“Ata gjithashtu ranë dakord për të vënë përballë përgjegjësisë personat përgjegjës për dhunën”, thuhet në deklaratë.

Përplasjet e javës së kaluar nxorën në pah sfidat me të cilat përballet presidenti i përkohshëm Ahmed al-Sharaa në stabilizimin e Sirisë dhe ruajtjen e sundimit të centralizuar, pavarësisht lidhjeve të ngrohta me SHBA-në dhe kontakteve në zhvillim e sipër të sigurisë të administratës së tij me Izraelin. //a.i/

The post PARIS – Siria, SHBA-ja dhe Franca bisedime ‘të sinqerta’, kërkojnë suksesin e tranzicionit të Sirisë appeared first on Agjencia Telegrafike Shqiptare.

BARCELONË, 25 korrik /ATSH/- Nëse dëshironi të udhëtoni dhe zbuloni vende që ende nuk janë prekur nga turizmi masiv, ju rekomandojme destinacionin evropian, Shqipërinë, shkruan Alba Solé Ingla në një artikull të botuar në revistën katalanase “El Nacional.cat”.

Shqipëria është e rrethuar nga Mali i Zi, Kosova, Maqedonia e Veriut dhe Greqia. Vendi jetoi i izoluar nga bota nën regjimin diktatorial deri në vitet 1990.

Plazhe parajsore

Ky vend ballkanik po fiton titullin si parajsa e panjohur e Mesdheut.

Riviera Shqiptare shtrihet nga veriu në jug të vendit. Parku Kombëtar Arkeologjik i Butrintit ka një sipërfaqe prej 15 hektarësh dhe ndodhet në lartësitë 30-50 metra mbi nivelin e detit.

Një nga zonat më të famshme të plazhit në jug të vendit është Ksamili – me rërën e tij të bardhë dhe ujërat e kristalta që magjepsin çdo vizitor.

Shumica e plazheve në Shqipëri janë private, dhe për t’i shijuar ato, duhet të merrni me qira një shezlong dhe një ombrellë dielli. Çmimi zakonisht është midis 5 dhe 8 euro gjatë gjithë ditës; komoditeti ia vlen!

Ksamili ndodhet pranë ishullit grek, Korfuzit dhe është i njohur si për turistët vendas ashtu edhe për ata ndërkombëtarë, veçanërisht nga Italia.

Ksamili është vendi ideal për të eksploruar atraksione të tjera shqiptare, siç është Syri i Kaltër – një atraksion turistik popullor, me ujëra bruz që mund të shihet nga një thellësi mbi 50 metra.

Gjithashtu, ju mund të vizitoni Parkun Natyror të Butrintit, një Vend i Trashëgimisë Botërore të UNESCO-s.

Ecje malore dhe fshatra magjepsës

Nëse jeni adhurues të maleve, janë me fat, sepse Shqipëria veriore është gjithashtu një parajsë për alpinistët.

Shqipëria është një nga vendet më malore në botë, me dy të tretat e territorit të saj të mbuluara nga male. Prandaj, mos e humbisni Thethin.

Ky fshat, i vendosur në zemër të Alpeve Shqiptare, ju lejon të zbuloni thelbin e vërtetë të banorëve të tij.

Thethi është një fshat i vogël që për vite me radhë mbeti i izoluar – falë vendndodhjes së tij të largët dhe një rruge – praktikisht e pa-aksesueshme për shumicën e turistëve.

Në ditët e sotme, është më e lehtë të shkosh atje, dhe shumë turistë udhëtojnë atje për të bërë ecje malore – nga Valbona në Theth.

Nëse nuk keni dëshirë të bëni shëtitje të gjata, ju rekomandojmë gjithashtu të vizitoni dy qytete mahnitëse, Gjirokastrën dhe Beratin.

Gjirokastra, është një qytet i bukur me një qendër historike – që është pjesë e Trashëgimisë Botërore të UNESCO-s, një kështjellë spektakolare dhe një pazar ku do të humbisni mes dyqaneve të vogla.

Berati, më pak se dy orë larg nga kryeqyteti, Tirana, njihet si “qyteti i një mbi një dritareve”.

I vendosur pranë lumit Osum, Berati është qyteti më i vjetër në Shqipëri dhe shquhet për qendrën e tij historike – të përbërë nga tre lagje të vjetra që ruajnë arkitekturën osmane dhe bizantine në ndërtesa, xhami dhe kisha të shumta.

Gjithashtu, Berati është shpallur pjesë e Trashëgimisë Botërore të UNESCO-s.

Gastronomia shqiptare

Kuzhina shqiptare është një ndërthurje unike e ndikimeve turke, ballkanike dhe mesdhetare.

Nga mishi dhe peshku i pjekur në skarë me çmime jashtëzakonisht të përballueshme deri te gjirotë greke, kuzhina shqiptare magjeps çdo vizitor.

Pjata më tipike shqiptare, byreku, mund të jetë një nga më të njohurat midis vizitorëve të huaj dhe vendasve. //a.i/

https://www.elnacional.cat/es/estilo-vida/pais-barato-europa-viajar_1267149_102.html

The post “El Nacional”: Eksploroni Shqipërinë, perlën e Mesdheut! appeared first on Agjencia Telegrafike Shqiptare.

TEL AVIV, 24 korrik /ATSH-DPA/- Ekipet negociuese amerikane dhe izraelite të përfshira në përpjekjet për të siguruar një armëpushim midis lëvizjes militante palestineze Hamas dhe Izraelit në Rripin e Gazës janë tërhequr, një shenjë se bisedimet mund të jenë në prag të dështimit.

I dërguari special i SHBA-së, Steve Witkoff, shkroi në platformën X se Hamasi nuk ishte i gatshëm të arrinte një armëpushim.

“Edhe pse ndërmjetësit kanë bërë përpjekje të mëdha, grupi islamist nuk duket se po vepron në një mënyrë të koordinuar ose të ndershme”, tha ai.

“Tani do të shqyrtojmë mundësi alternative për të sjellë pengjet në shtëpi dhe do të përpiqemi të krijojmë një mjedis më të qëndrueshëm për popullin e Gazës”, tha Witkoff.

“Është turp që Hamasi ka vepruar në këtë mënyrë egoiste. Ne jemi të vendosur të kërkojmë një fund të këtij konflikti dhe një paqe të përhershme në Gaza”, shtoi ai.

SHBA-ja, së bashku me Katarin dhe Egjiptin, veprojnë si ndërmjetës midis Izraelit dhe Hamasit, pasi dy palët ndërluftuese nuk flasin drejtpërdrejt me njëra-tjetrën.

Në tryezën e negociatave u paraqit propozimi për një armëpushim 60-ditor, gjatë të cilit Hamasi do të lironte 10 nga pengjet e mbetura. //a.i/

The post FOKUS – Izraeli dhe SHBA-ja tërheqin ekipet negociuese, shenjë e dështimit të bisedimeve me Hamasin appeared first on Agjencia Telegrafike Shqiptare.

BUDAPEST, 24 korrik /ATSH/- Kryeministrit populist të Hungarisë, Viktor Orban i janë dashur vite për të ndërtuar një marrëdhënie të ngushtë politike me presidentin e SHBA-së, Donald Trump, sipas AP.

Por, pavarësisht marrëdhënieve të ngrohta të Viktor Orbán me administratën Trump, vendi i tij mund të goditet rëndë nga tarifat e SHBA-së ndaj Bashkimit Evropian.

Këtë muaj, Trump njoftoi se do të vendoste tarifa prej 30% ndaj Meksikës dhe BE-së duke filluar nga 1 gushti – një veprim që mund të shkaktojë trazira masive midis Shteteve të Bashkuara të Amerikës dhe BE-së me 27 anëtarë, anëtare e së cilës është edhe Hungaria.

Si një ekonomi e vogël, e orientuar drejt eksportit me industri të mëdha automobilistike, farmaceutike dhe të verës – disa nga kategoritë kryesore të produkteve që Evropa eksporton në SHBA – Hungaria do të preket më shumë nga tarifat e Trump.

“Tarifat do ta vendosnin ekonominë hungareze në një situatë shumë të vështirë – pasi e gjithë mundësia që Hungaria të eksportojë në Amerikë do të eliminohej”, tha Peter Virovacz, analist kryesor në “ING Hungary”.

Partnerët më të mëdhenj tregtarë të Hungarisë janë vendet e tjera të BE-së si Gjermania, Italia dhe Rumania, dhe Kina, por shumë kompani hungareze eksportojnë mallrat e tyre përtej Atlantikut.

Tregtia drejt Shteteve të Bashkuara të Amerikës përfaqëson rreth 15% të të gjitha eksporteve hungareze në vendet jashtë BE-së.

Lidhjet politike mund ta zbusin goditjen

Qeveria e Hungarisë, një mbështetëse e zëshme e politikës së jashtme “patriotike” të Trump – që i jep përparësi interesave kombëtare – ka pranuar se tarifat do të paraqisnin një sfidë per vendin.

Hungaria ka fajësuar BE-në, për dështimin në arritjen e një marrëveshjeje gjithëpërfshirëse tregtare me Uashingtonin.

Në një intervistë në prill, Orban tha se ndërsa tarifat do të ishin një disavantazh, qeveria e tij po negocionte marrëveshje dhe çështje të tjera ekonomike që do t’i kompensonin ato.

Por Peter Kreko, drejtor i “Political Capital” me seli në Budapest, shprehu dyshime se lidhjet politike mund të luanin një rol domethënës në zbutjen e dëmit në ekonominë e Hungarisë – të shkaktuar nga politika tregtare e Trump.

“Marrëdhëniet padyshim të mira dypalëshe thjesht nuk mund të kompensojnë konfliktet tregtare midis BE-së dhe SHBA-së, dhe si pasojë, Hungaria do t’i vuajë tarifat në të njëjtën mënyrë si BE-ja”, tha Kreko. //a.i./

The post ANALIZË – Hungaria mund të goditet rëndë nga tarifat e SHBA-së pavarësisht marrëdhënieve të ngrohta Trump-Orban appeared first on Agjencia Telegrafike Shqiptare.

ROMË, 24 korrik /ATSH-ANSA/- Kryeministrja italiane Giorgia Meloni është shfaqur në kopertinën e revistës javore amerikane “Time” – e cila i ka kushtuar një artikull të gjerë në botimin e saj të fundit.

Artikulli i shkruar nga Massimo Calabresi bazohet në një intervistë të zhvilluar më 4 korrik  me titull “Ku po e udhëheq Evropën Giorgia Meloni” – duke ndjekur një profil kompleks dhe shumëplanësh të lideres së “Fratelli d’Italia”.

Në Itali, Meloni është përqendruar në disa nga premtimet e saj më dramatike të fushatës, si vendosja e një bllokade detare për të ndaluar hyrjen e emigrantëve të paligjshëm të transportuar me anije.

“Në skenën ndërkombëtare, ajo është shfaqur më pak si një revolucionare e krahut të djathtë sesa si një konservatore pragmatike.

Meloni ka përqafuar Bashkimin Evropian, NATO-n dhe Ukrainën, ka punuar për të izoluar Kinën dhe ka punuar me shkathtësi për të rivendosur marrëdhëniet e tensionuara midis Amerikës dhe Evropës gjatë fillimit të mandatit të dytë të presidentit te SHBA-së, Donald Trump.

Gjatë rrugëtimit të saj, Meloni ka fituar mbështetjen e udhëheqësve nga i gjithë spektri ideologjik, nga Biden te presidentja e Komisionit Evropian, Ursula von der Leyen e deri te zëvendëspresidenti i SHBA-së, J.D. Vance. //a.i/

The post ROMË – Giorgia Meloni në kopertinën e revistës amerikane “Time” appeared first on Agjencia Telegrafike Shqiptare.

FLORIDA, 24 korrik /ATSH/- Hulk Hogan, 12 herë kampion bote në mundje profesionale (wrestling) dhe personalitet televiziv, i cili ndihmoi në transformimin e WWE – “World Wrestling Entertainment” në një sport të njohur në nivel global – ka vdekur në moshën 71-vjeçare, sipas “People”.

Sipas raporteve Hogan pësoi një atak kardiak. Ikona e mundjes, ylli i kinematografisë dhe i dhe reality show-t, ishte dy herë anëtar i “Hall of Fame” të WWE.

Për 35 vjet, deri në daljen në pension në vitin 2012, Hogan ishte i njohur për shfaqjet e tij televizive dhe hyri në mijëra ringje anembanë botës.

Hogan luajti në 15 filma, duke përfshirë “Rocky III” (1982).

Ai u shfaq në “Grammy Awards” në vitin 1985 në krah të këngëtares Cyndi Lauper si truproja e saj.

Ai mori pjesë në mbi 200 filma dhe seriale, duke përfshirë “The Love Boat” (1986) deri te shfaqjet e mundjes, “WWE Raw”.

Nga viti 2005 deri në vitin 2007, Hogan dhe bashkëshortja e tij Linda dhe fëmijët e tyre Brooke dhe Nick luajtën në serialin “reality” të VH1, “Hogan Knows Best”. //a.i/

The post Hulk Hogan, legjenda e wrestling vdes në moshën 71-vjeçare appeared first on Agjencia Telegrafike Shqiptare.

PEKIN, 24 korrik /ATSH-DPA/- Udhëheqësit e BE-së e paralajmëruan sot Kinën se do të ndërmarrin veprime të reja për të luftuar praktikat e padrejta tregtare, gjatë një takimi me presidentin kinez Xi Jinping në Pekin – në një samit të nivelit të lartë që synonte përmirësimin e marrëdhënieve të tendosura.

“Bashkimi Evropian është i përgatitur të angazhohet në dialog konstruktiv për të zgjidhur konfliktet aktuale”, tha blloku pas një takimi midis presidentes së Komisionit Evropian, Ursula von der Leyen, presidentit të Këshillit Evropian, Antonio Costa dhe presidentit kines Xi Jinping, në Pekin.

“Megjithatë, për sa kohë që kjo nuk ndodh, BE do të marrë masa për të mbrojtur interesat e saj legjitime”, thanë udhëheqësit.

“Që tregtia të mbetet reciprokisht e dobishme, ajo duhet të bëhet më e ekuilibruar”, kërkoi von der Leyen gjatë një konference për shtyp pas bisedimeve.

“Evropa mirëpret konkurrencën. Ne e pëlqejmë konkurrencën, por konkurrenca duhet të jetë e drejtë”, tha Von der Leyen.

“Kina dhe BE-ja duhet të veprojnë me largpamësi mes paqëndrueshmërisë globale dhe të bëjnë zgjedhje strategjike, duke forcuar bashkëpunimin dhe besimin e ndërsjellë”, tha Xi.

Samiti përkon me 50-vjetorin e marrëdhënieve diplomatike BE-Kinë.

Temat kryesore përfshijnë qëndrimin e Kinës ndaj luftës së Rusisë në Ukrainë dhe tensionet tregtare në rritje.

“Ky samit është një mundësi për të avancuar dhe ribalancuar marrëdhëniet tona”, postoi Von der Leyen në platformën X pasi mbërriti në Pekin.

Pavarësisht se janë partnerët e dytë më të mëdhenj tregtarë të njëri-tjetrit, lidhjet midis dy palëve janë bërë gjithnjë e më të tensionuara.

Brukseli është i alarmuar nga një deficit tregtar rekord prej mbi 300 miliardë eurosh (353 miliardë dollarë) i regjistruar vitin e kaluar, dhe kufizimet e eksportit të Kinës për metalet e rralla të përdorura në motorët elektrikë dhe sensorët. //a.i/

The post PEKIN – BE: Tregtia me Kinën duhet të bëhet më e ekuilibruar appeared first on Agjencia Telegrafike Shqiptare.

PEKIN, 24 korrik /ATSH-DPA/- BE-ja dhe Kina ranë dakord për një mekanizëm të ri për të ndihmuar në zbutjen e kufizimeve të eksportit të elementeve të rralla tokësore dhe magneteve, tha sot presidentja e Komisionit Evropian, Ursula von der Leyen pas takimit në kryeqytetin kinez, Pekin.

“Ne ramë dakord të kemi një mekanizëm të përmirësuar të furnizimit për eksportet. Me fjalë të tjera, nëse ka pengesa, ky mekanizëm i përmirësuar i mbështetjes së zinxhirit të furnizimit mund të kontrollojë dhe zgjidhë menjëherë problemin që ekziston”, tha Von der Leyen.

Vendimi i Kinës për të ndaluar eksportet e metaleve të rralla tokësore është bërë një nga çështjet më të mëdha në marrëdhëniet BE-Kinë – e cila ishte në krye të axhendës së Brukselit, ndërsa udhëheqësit e saj u takuan me presidentin kinez Xi Jinping dhe kryeministrin Li Qiang, në takime të ndara.

Shefja e BE-së nuk dha detaje të mëtejshme se si do të funksiononte saktësisht mekanizmi.

Instrumenti u hartua për të ofruar më shumë transparencë në lidhje me dhënien e licencave për lëndët e para dhe dorëzimin tek kompanitë, tha von der Leyen.

Ajo i bëri thirrje Kinës të tregojë më shumë besueshmëri në furnizimin me lëndë të para të rëndësishme.

Kina futi kufizime eksporti për shtatë metale të rralla dhe magnete të bëra prej tyre në prill, duke i detyruar kompanitë në mbarë botën të kalojnë në një proces të gjatë dhe të ndërlikuar aplikimi në mënyrë që të ishin në gjendje të importonin materialet.

Si rezultat i kontrolleve, të cilat u vendosën nga Pekini mes një mosmarrëveshjeje tregtare të përshkallëzuar me SHBA-në, kompanitë industriale kanë shprehur gjithnjë e më shumë shqetësime se mund të duhet të ndalojnë prodhimin për shkak të mungesës së metaleve të rralla, të cilat janë thelbësore për prodhimin e motorëve elektrikë dhe sensorëve. //a.i/

The post PEKIN – BE dhe Kina bien dakord për planin për të zbutur kufizimet e eksportit të metaleve të rralla appeared first on Agjencia Telegrafike Shqiptare.

BRUKSEL, 24 korrik /ATSH-DPA/- Negociatat midis BE-së dhe SHBA-së për të arritur një marrëveshje tregtare të minutës së fundit janë në vazhdim, tha sot presidentja e Komisionit Evropian, Ursula von der Leyen – tetë ditë përpara se tarifat e reja të SHBA-së ndaj bllokut të hyjnë në fuqi.

“Për momentin, kemi kontakte dhe diskutime shumë intensive teknike dhe politike që janë duke u zhvilluar”, tha shefja e ekzekutivit të BE-së gjatë një konference për shtyp pas samitit BE-Kinë, në Pekin.

“Por ne kemi qenë shumë të qartë, për disa javë kemi kërkuar një zgjidhje të negociuar, të gjitha instrumentet e tjera janë në tryezë dhe mbeten në tryezë derisa të kemi një rezultat të kënaqshëm”, shtoi Von der Leyen.

Negociatorët në Uashington dhe Bruksel po punojnë për të arritur një marrëveshje përpara se tarifat prej 30% ndaj importeve nga blloku 27-anëtarësh, të shpallura nga presidenti i SHBA-së Donald Trump, të hyjnë në fuqi më 1 gusht.

Deklarata e Von der Leyen erdhi pasi vendet e Bashkimit Evropian miratuan një propozim të Komisionit për të vendosur potencialisht tarifa importi ndaj mallrave amerikanë me një vëllim të përgjithshëm tregtar prej 93 miliardë eurosh (109,4 miliardë dollarë) nëse bisedimet me SHBA-në dështonin.

Masat përfshijnë një listë të miratuar të mallrave të synuara me vlerë 21 miliardë euro dhe një listë të re me mallra shtesë me vlerë 72 miliardë euro, të cilat mund të preken nga tarifat nga 7 gushti nëse nuk arrihet një marrëveshje.

Pavarësisht miratimit të kundërmasave të mundshme, blloku ende shpreson të gjejë një zgjidhje të negociuar në mosmarrëveshjen tregtare me Uashingtonin.

Trump tha dje se SHBA-ja është e gatshme të ulë tarifat e paralajmeruara ndaj mallrave evropiane – nëse BE-ja hap tregun e saj më tej për kompanitë amerikane.

“Nëse ata bien dakord të hapin bllokun për bizneset amerikane, atëherë ne do t’i lejojmë ata të paguajnë një tarifë më të ulët”, tha Trump. //a.i/

The post BRUKSEL – Von der Leyen: Bisedimet tregtare BE-SHBA në vazhdim appeared first on Agjencia Telegrafike Shqiptare.

LUBJANË, 24 korrik /ATSH-DPA/- Parlamenti slloven miratoi sot ligjin që lejon vdekjen e asistuar për pacientët me sëmundje terminale, pas një jave diskutimesh politike.

Ligji do t’u lejojë pacientëve me sëmundje terminale t’i japin fund jetës së tyre me ndihmë mjekësore – nëse të gjitha opsionet e trajtimit janë shteruar dhe nuk ka asnjë perspektivë të arsyeshme për shërim ose përmirësim.

Pacientët e kualifikuar do të duhet të paraqesin një kërkesë për vdekje të asistuar te mjeku i tyre.

Nëse ata mbeten të sigurt për vendimin e tyre pas një konsultimi të dytë, mjeku do ta përcjellë kërkesën në komisionin për vdekjen e asistuar.

Sapo të jepet autorizimi, pacientit do t’i ofrohet një substancë që mund ta marrë në mënyrë të pavarur për t’i dhënë fund jetës së tij.

Dispozita nuk zbatohet për pacientët me sëmundje mendore.

Parlamenti e miratuar ligjin një javë më parë, por pas një vetoje nga Këshilli Kombëtar, Dhoma e Sipërme e vendit, kërkohej një votim i ri.

Mocioni i vetos u mbështet nga Partia Demokratike konservatore, e cila bëri thirrje që qeveria të përmirësonte në vend të kësaj kujdesin paliativ dhe rrjetin e kujdesit paliativ, dhe të zbatonte plotësisht një ligj për kujdesin afatgjatë.

Në vitin 2024, 54,89% e votuesve ishin në favor të vdekjes me asistencë mjekësore në një referendum konsultativ. Pak para kësaj, parlamenti e hodhi poshtë propozimin.

Në votimin e së enjtes, 50 nga 90 anëtarët e parlamentit votuan pro dhe 10 kundër ligjit, i cili kërkonte 46 vota për t’u miratuar. //a.i/

The post SLLOVENI – Miratohet ligji për vdekjen e asistuar për pacientët në fazë terminale appeared first on Agjencia Telegrafike Shqiptare.

TIRANË, 24 korrik /ATSH/- Tirana, një destinacion i jashtëzakonshëm – për pushime në qytet – që ofron kulturë autentike, peizazhe piktoreske, kuzhinë të shijshme dhe çmime të përballueshme, në zemër të Shqipërisë, sipas “Travel and Tour World” (TTW).

Një thesar i fshehur për turistët me buxhet të kufizuar

Tirana, kryeqyteti i gjallë i Shqipërisë, po fiton shpejt popullaritet në mesin e vizitorëve që duan të eksplorojnë pa shpenzuar shumë.

Ndërsa vendi shpesh vlerësohet për bregdetin e tij mahnitës, ky xhevahir urban i vendosur në zemër të Shqipërisë po vendoset në qendër të vëmendjes.

Ndërsa shumë turistë po bëhen më të kujdesshëm me shpenzimet e tyre dhe kërkojnë përvoja kuptimplote, Tirana ofron një ndërthurje perfekte të kulturës, çmimeve të përballueshme dhe sharmit natyror.

Ripërcaktimi i një udhëtimi miqësor me buxhetin

Ndërsa kostot e udhëtimeve vazhdojnë të rriten në të gjithë botën, shumë turistë po e zhvendosin fokusin e tyre nga pikat tradicionale turistike në qytete më pak të njohura që ofrojnë po aq shumë – por me më pak para.

Një eksperte e udhëtimeve nga Britania e Madhe vizitoi së fundmi Tiranën.

Në vend që të vizitonte qytete të mbipopulluara me çmime marramendëse, ajo eksploroi kryeqytetin shqiptar – i cili ofron akomodim dhe ushqim të përballueshëm.

Vizitorët mund të eksplorojnë kuzhinën tradicionale shqiptare dhe të shijojnë ëmbëlsirat ballkanike për vetëm 45 qindarka.

Një ndërthurje e kulturës dhe kuzhinës

Ajo që e bën Tiranën një vend kaq magjepsës nuk është vetëm çmimi i përballueshëm, por edhe mënyra se si vizitorët njihen me jetën e përditshme autentike, mjedisin e bukur dhe kulturën ushqimore.

I fshehur midis kodrave dhe vargmaleve, ky qytet ofron një arratisje paqësore së bashku me energjinë e gjallë urbane.

Një destinacion i spikatur për adhuruesit e natyrës është Mali i Dajtit, i vendosur jashtë qytetit, i cili ofron ecje fantastike, pamje panoramike dhe një mënyrë të shkëlqyer për të përjetuar bukurinë natyrore të Shqipërisë.

Kultura e kafeneve të kryeqytetit është një tjetër pikë referimi. Rrugët janë të mbushura me vende për t’u ulur në natyrë, ku vendasit pushojnë në diell, pinë kafe dhe bisedojnë me miqtë.

Ndër vendet më të mira për një vakt të shijshëm vendas është “Kernace Zgare Fatosi”, një vend i njohur që ofron qofte të shijshme, bukë të freskët dhe gatime tradicionale me bazë kosi.

Vendasit sugjerojnë ta vizitoni gjatë muzgut, kur mjedisi bëhet vërtet magjik dhe ushqimi është në formën e tij më të mirë.

“Restorant GjinoKastra” shërben pjata tradicionale, për turistët që janë të hapur ndaj përvojave unike kulinare.

Dhe sigurisht, asnjë vizitë në Tiranë nuk do të ishte e plotë pa provuar një filxhan kafe autentike turke.

Megjithatë, udhëtarët duhet të dinë se kafenetë e qytetit janë gjithmonë plot jetë, një shenjë se sa të rëndësishme janë këto kafene në jetën e përditshme.

Eksploroni zemrën e qytetit

Përtej ushqimit, Tirana është e pasur me vende kulturore dhe monumente historike. Vizitorët mund të zbulojnë një ndërthurje të ndikimeve osmane, italiane dhe të epokës socialiste, të gjitha në një vend.

Disa atraksione që duhen vizituar me patjetër përfshijnë:

Sheshi Skënderbej, qendra e qytetit, që mban emrin e heroit kombëtar të Shqipërisë, e rrethuar nga institucione kulturore.

Kalaja e Tiranës ofron një pamje të rrënjëve osmane të qytetit – e shndërruar në një qendër kulturore dhe kulinare.

Pazari i Ri, një treg në ambient të hapur, plot me prodhime të freskëta, produkte të punuara me dorë dhe shije lokale.

Sofra e Ariut – një vend vërtet unik ku vizitorët mund të darkojnë në një mjedis të qetë që i sjell ata afër natyrës dhe jetës së egër.

Këto vende jo vetëm që pasqyrojnë thellësinë e historisë shqiptare, por gjithashtu u lejojnë vizitorëve të lidhen më thellë me mënyrën lokale të jetesës.

Jeta e gjallë e natës

Një nga transformimet më dramatike të Tiranës ka ndodhur në lagjen e Bllokut.

Dikur një zonë e kufizuar për zyrtarët komunistë, tani është lagjja më e gjallë e qytetit, ku ndodhen disa nga baret, restorantet dhe kafenetë më të mira.

Nëse dëshironi të provoni kokteje, birrë artizanale apo thjesht një ekspres të mirë pas darkës, Blloku i ofron me stil dhe shpirt.

Për një mbrëmje më të relaksuar dhe piktoreske, tarraca në “Hotel Xheko Imperial” ofron pamje marramendëse të horizontit të qytetit.

Është vendi i përsosur për t’u çlodhur dhe për të bërë foto të paharrueshme, veçanërisht gjatë perëndimit të diellit.

Kombinimi i flladit të freskët, pijeve dhe pamjeve panoramike e bën atë një vend të preferuar si për vendasit ashtu edhe për vizitorët e huaj.

Tirana, një nga opsionet më të mira në Evropë

Gjithnjë e më shumë, turistët po kërkojnë destinacione që ofrojnë përvoja autentike, mundësi të përballueshme dhe që janë të paprekura nga turizmi masiv – krahasuar me qytetet tradicionale evropiane. Tirana është pikërisht qyteti që i plotëson këto dëshira.

Ndërsa turistët vazhdojnë t’i japin përparësi komoditetit dhe cilësisë – qytete si Tirana ka të ngjarë të gëzojnë një rritje të vazhdueshme të popullaritetit.

Kjo gjithashtu mund të ndihmojë në lehtësimin e barrës së qyteteve të mbipopulluara si Parisi, Roma ose Barcelona, duke lejuar që turizmi të shpërndahet në mënyrë më të barabartë dhe të qëndrueshme, në të gjithë kontinentin. //a.i/

The post “Travel and Tour World” – Tirana, destinacioni i jashtëzakonshëm me kulturë autentike, bukuri piktoreske dhe kuzhinë të shijshme appeared first on Agjencia Telegrafike Shqiptare.

STAMBOLL, 23 korrik /ATSH-DPA/- Të paktën 10 persona jane raportuar të vdekur për shkak të një zjarri pyjor në rajonin perëndimor turk të Eskishehirit.

Pesë prej tyre ishin punonjës pyjorë dhe pesë te tjere nga ekipi i Ndihmës Emergjente për Fatkeqësitë”, tha sot ministri i Bujqësisë dhe Pyjeve, Ibrahim Yumakli.

Disa persona të tjerë thuhet se po trajtohen në spital. Yumakli tha se era kishte ndryshuar papritur drejtimin, duke bërë që punonjësit të mbeteshin të bllokuar mes flakëve.

Për ditë të tëra, shërbimet e emergjencës kanë luftuar me disa zjarre pyjore në Turqi.

Për shkak të kushteve të thata, zjarret mund të përhapen më shpejt. Erërat e forta po i bëjnë më të vështira përpjekjet për shuarjen e zjarreve. //a.i/

The post TURQI – Të paktën 10 të vdekur nga zjarri pyjor appeared first on Agjencia Telegrafike Shqiptare.

UASHINGTON, 23 korrik /ATSH/- Në serinë e fundit të hetimeve të administratës Trump që synojnë Universitetin e Harvardit, Departamenti Amerikan i Shtetit (DASH) tha se po heton nëse shkolla “Ivy League” do të mbetet pjesë e programit qeveritar që ofron viza amerikane për studentët dhe studiuesit nga vendet e tjera, sipas AP.

Harvardi është përballur me sanksione dhe mbikqyrje në rritje nga Uashingtoni.

Universiteti i Harvardit ka ngritur një padi kundër shkurtimeve të fondeve federale prej 2,6 miliardë dollarësh dhe ka akuzuar administratën republikane për zhvillimin e një fushate që synon hakmarrjen.

Në deklaratën e sekretarit amerikan të Shtetit, Marco Rubio nuk u specifikua arsyeja pse departamenti i tij po shqyrtonte të drejtën e Harvardit për të marrë pjesë në “Programin e Vizitorëve të Shkëmbimit”, i cili u lejon shtetasve të huaj të studiojnë ose të punojnë në Shtetet e Bashkuara të Amerikës përmes programeve të shkëmbimit kulturor dhe arsimor.

“Të gjithë organizuesit, siç është Harvardi, duhet të përmbushnin plotësisht rregulloret e shtetasve jo-amerikanë që vijnë në SHBA për të marrë pjesë në një program të miratuar shkëmbimi arsimor ose kulturor, transparencën në raportim dhe angazhimin për të nxitur parimet e shkëmbimit kulturor dhe mirëkuptimit të ndërsjellë mbi të cilat u themelua programi”, tha Rubio.

Zëdhënësi i Harvardit, Jason Newton, tha se hetimi ishte një tjetër hap hakmarrës i ndërmarrë nga administrata.

“Harvard vazhdon të regjistrojë dhe sponsorizojë studiues, studiues dhe studentë ndërkombëtarë, dhe do të mbrojë komunitetin e tij ndërkombëtar dhe do t’i mbështesë ata ndërsa aplikojnë për viza amerikane”, tha Newton në një deklaratë.

Ai tha se shkolla është e përkushtuar të përmbushë rregullat e programit.

Departamenti Amerikan i Shtetit (DASH) tha se hetimi do të kërkojë të sigurojë që programet e tij “të mos jenë në kundërshtim me interesat e kombit tonë”.

Muajin e kaluar, administrata e Trump nxori një përfundim se Harvard toleronte antisemitizmin, një hap që mund të rrezikonte të gjithë financimin federal të Harvardit, duke përfshirë kreditë ose grantet studentore. //a.i/

The post SHBA – DASH hetim për vizat e studentëve të huaj në Universitetin e Harvardit appeared first on Agjencia Telegrafike Shqiptare.