Situata në Delvinë vijon të jetë kritike, ndërsa zjarri ka përfshirë zona të gjera dhe i është afruar rrezikshëm spitalit të qytetit.

Policia ka evakuuar banorët e lagjeve Llakë, Mukurs dhe Xhermëhallë, ku gratë, fëmijët dhe pleqtë janë larguar nga shtëpitë, ndërsa burrat kanë mbetur për të ndihmuar në shuarjen e zjarrit së bashku me zjarrfikësit dhe punonjësit e emergjencës.

Qyteti aktualisht është pa energji elektrike, duke e bërë më të vështirë menaxhimin e situatës emergjente. Pacientët e spitalit janë strehuar për arsye sigurie në kinoteatrin e qytetit.

Dyshohet se shumë banesa mund të jenë përfshirë nga flakët, por për shkak të tymit dhe qasjes së vështirë në terren, ende nuk janë bërë evidentime të sakta të dëmeve.

Forcat e ushtrisë dhe zjarrfikësit po punojnë intensivisht për të frenuar përparimin e flakëve, ndërsa era e fortë që fryn në drejtim të qytetit po vështirëson punën e tyre dhe rrit rrezikun për banorët.

Pranë spitalit, janë marrë masa urgjente për çmontimin dhe largimin e sistemit të furnizimit me oksigjen, për të shmangur rrezikun e një shpërthimi në rast se flakët arrijnë godinën. I gjithë personeli mjekësor është në gatishmëri për të mbrojtur ambientet me mjetet që kanë në dispozicion.

Autoritetet u bëjnë thirrje qytetarëve të qëndrojnë të qetë dhe të ndjekin udhëzimet e forcave të rendit për të shmangur incidente të tjera.

Aktualisht në territorin e vendit janë raportuar 34 vatra zjarri, nga të cilat 27 janë aktive dhe 7 po mbahen nën monitorim. Situata më problematike vijon të jetë në jug të vendit, me rrezik të lartë për zonat e mbrojtura, banesat dhe infrastrukturën.

Qarku Vlorë

Bashkia Delvinë – Zjarri i nisur në Finiq ka kaluar në territorin e Delvinës, duke rrezikuar edhe qytetin, pas fshatrave  Pecë, Kranë, Krongj, Kardhikaq dhe Sirakat. Po vijon evakuimi i banorëve në zonat e rrezikuara. Në terren kanë operuar helikopteri i FA-së, 2 avionë grekë PZL, 1 helikopter çek dhe 1 sllovak. Bashkia Delvinë po hap breza mbrojtës me skrepa, ndërsa kërkohet mbështetje shtesë nga ajri për shkak të riskut të lartë.

Fshati Sevaster, Nj. A. Sevaster – Në terren ndodhet mjeti zjarrfikës i Selenicës me efektivët e tij. Flakët, të favorizuara nga era dhe terreni, po rrezikojnë disa banesa. Ka nisur evakuimi i banorëve.

Fshati Mesaplik, Nj. A. Brataj – Zjarri ka marrë përmasa të mëdha, duke rrezikuar banesa. Forcat zjarrfikëse të Vlorës po ndërhyjnë me mjete dhe efektivë, ndërkohë që po vijon evakuimi i banorëve.

Bashkia Dropull – Zjarri i ardhur nga Finiqi është shtrirë nga lartësitë mbi fshatin Goric deri në fshatin Dhuvjan (ish-reparti ushtarak i Leftokaresë). 20 forca të bashkisë Dropull po e mbajnë nën monitorim. Nuk ka rrezik për banesat.

Parku i “Rëzom” – Maja e “Lucës” – Vatra në sipërfaqe me shkurre e pyll vazhdon aktive. Terreni i thyer nuk lejon ndërhyrje me mjete, por AdZM do të kryejë ndërhyrje në orët e para të mëngjesit.

Lagjja “15 Tetori”, Vlora – Vatër aktive në kodrën pas bashkisë. Në terren ndodhet 1 mjet zjarrfikës me 3 efektivë.

Rrethrrotullimi i Orikumit – Vatër aktive, ku po ndërhyhet me 1 mjet zjarrfikës dhe 3 efektivë.

Qarku Dibër

Ternovë, Zerqan – Bulqizë – Zjarri ka marrë përmasa të mëdha. Po punojnë forcat e MZSH-së, pyjores, bashkisë dhe kompanive minerare, si dhe 30 trupa FA.

Mali me Gropa, Biz – Martanesh – Vatër në zonë të mbrojtur, larg zonave të banuara. Monitorim nga AdZM dhe njësia vendore.

Fshati Luzni – Zjarri rrezikoi banesat, por forcat operacionale arritën ta vendosin nën kontroll.

Xibër Murriz – Klos – Vatër nën monitorim, pa rrezik.

Qarku Berat

Fshati Rehovë – Poliçan – Riaktivizim me përmasa të mëdha, që po prek fshatrat Rehovë, Vokopolë, Zhapokikë, Plashnik e Panarit, si dhe Rezervatin e Mbrojtur “Balloll”. Kërkohet ndërhyrje nga ajri.

Në fshatin Vokopolë  u evakuuan banorët. Në vendngjarje janë edhe efektivë të FA dhe forca nga bashkitë përreth. Situata është kritike.

Fshati Mbrakull – Poliçan – Zjarri ka kaluar pranë ujësjellësit dhe qytetit. Po punojnë 35 forca FA, 65 forca MZSH, 15 forca bashkiake dhe mjetet zjarrfikëse të zonës.

Fshati Velçan – Sinjë – Vatër nën monitorim.

Fshati Orizaj – Qendër Skrapar – Zjarr në sipërfaqe me shkurre, po monitorohet.

Qarku Tiranë

Spanesh – Rrogozhinë – Zjarri pranë banesave, është kryer evakuim i banorëve.

Ferraj dhe Zall-Herr – Tiranë – Forcat zjarrfikëse dhe APR po punojnë për izolimin.

Damjan dhe Isufaj – Vaqarr – Vatra e madhe po përparon drejt Pezë Helmës. Po ndërhyhet me 20 forca zjarrfikëse dhe mjete.

Mali i Bërzhitës – Ibë – Vatra aktive, pa rrezik të menjëhershëm.

Qarku Gjirokastër

Hormovë – Tepelenë – Zjarri rrezikon banesat, është kryer evakuimi i banorëve. Ndërsa të gjitha strukturat janë në terren.

Koshtan – Memaliaj. Zjarri ka përhapje të madhe. Banorët janë evakuuar, por 3 banesa janë përfshirë nga zjarri. Forcat zjarrfikëse me mjetin zjarrfikës si dhe forca vullnetare dhe Policia e Shtetit janë pozicionuar në sheshin e Teqesë dhe po punojnë për të ruajtur banesat e tjera.

Turan – Tepelenë – Janë djegur dy stalla bagëtish. Po punojnë forcat tokësore dhe ajrore.

Qarku Elbasan

Kullollas – Gramsh – Situatë e rënduar, është raportuar një humbje jete. Banorët janë evakuuar. Për shkak të flakëve janë bllokuar edhe disa rrugë që lidhin fshatrat. Në bashkinë Gramsh janë marrë masa për strehimin e banorëve të evakuuar.

Mukaj dhe Sojnik – Gramsh – Situatë problematike. Mbi 150 forca po punojnë për izolimin e zjarrit në sipërfaqe me shkurre dhe ferra. Është kërkuar ndërhyrja me 50 forca operacionale FA. Në terren janë edhe forcat zjarrfikëse të Elbasanit dhe Gramshit afër fshatit Snosëm e Sojnik, të shoqëruara edhe nga punonjës bashkiak e banorë të zonës.

Qarku Shkodër

Xath – Fushë Arrëz – Po ndërhyhet me mbi 170 forca dhe mjete. Falë ndërhyrjes së koordinuar, deri tani është bërë i mundur shpëtimi i banesave që ishin në rrezik në fshatrat Xhath dhe Flet. Aktualisht po punohet me intensitet të lartë për izolimin dhe shuarjen e vatrave në disa drejtime, megjithë terrenin e vështirë.

Baks–Rrjoll – Velipojë – Vatër në kallamishte, po punohet për shuarjen.

Qyteti i Pukës – Vatra në kontroll.

Ura e Shtrejtë – Postribë – Monitorim i vazhdueshëm.

Qarku Kukës

Gegaj – Tropojë – Vatër e izoluar, pa rrezik për banesat.

Parku i Monellës – Kukës – Vatër nën monitorim.

Qarku Korçë

Gërmenj – Leskovik – Zjarri në Parkun Natyror vijon aktiv, po monitorohet.

Qarku Fier

Gjonc-Selisht – Cakran – Vatër e vendosur nën kontroll, monitorim.

Bashkia Lushnje – Vatër e re, po ndërhyhet me forcat zjarrfikëse të Divjakës.

Shefi i përkohshëm i NASA-s, Sean Duffy, ka urdhëruar agjencinë hapësinore amerikane të përshpejtojë planet për vendosjen e një reaktori bërthamor në sipërfaqen e Hënës, me synim furnizimin e misioneve të eksplorimit dhe krijimin e një baze të përhershme.

Sipas një udhëzimi të datës 31 korrik, të siguruar nga CNN, kjo lëvizje synon ta mbajë SHBA-në përpara Kinës dhe Rusisë, të cilat kanë shpallur disa herë planet e tyre për një projekt të përbashkët të këtij lloji deri në mesin e viteve 2030.

Duffy paralajmëroi se, nëse një vend tjetër e realizon i pari këtë arritje, mund të shpallë një “zonë të ndaluar” në Hënë, duke penguar planet amerikane përmes programit “Artemis”.

Misioni “Artemis III”, i planifikuar për vitin 2027, synon të rikthejë njerëzit në Hënë për herë të parë pas më shumë se 50 vitesh, por programi ende ka disa sfida përpara. “Jemi në një garë për në Hënë, në një garë me Kinën. Dhe për të pasur një bazë në Hënë, na duhet energji,” deklaroi Duffy.

Flakët që kanë përfshirë faqen e malit mbi qytetin e Delvinës janë afruar ndjeshëm pranë puseve të gazit dhe kondensatit, duke ngritur alarmin për një katastrofë të mundshme.

Edhe pse puset janë të rrethuara nga një perimetër sigurie i papyllëzuar, era e fortë dhe temperaturat e larta rrezikojnë përhapjen e zjarrit drejt tyre.

Mësohet se për të frenuar avancimin e flakëve, në vendngjarje janë dislokuar forca të shtuara zjarrfikëse, trupa ushtarake dhe një helikopter që po kryen hedhje uji nga ajri.

Vendi ku po përhapet zjarri është një nga vendburimet më të rëndësishme të gazit natyror dhe kondensatit në Shqipëri. Puset e Delvinës, të zbuluara në fund të viteve ’80 , prodhojnë rreth 8–10 mijë Nm³ gaz në ditë, një sasi me rëndësi strategjike për sigurinë energjetike të vendit.

Samiti SHBA-Rusi në Alaska po zhvillohet në një vend ku Lindja takohet me Perëndimin, fjalë për fjalë, në një vend të njohur për të dy vendet si një vijë e frontit të Luftës së Ftohtë e mbrojtjes nga raketat, posteve të radarëve dhe mbledhjes së inteligjencës.

Nëse kjo mund të çojë në një marrëveshje për të sjellë paqe në Ukrainë pas më shumë se 3 vjet e gjysmë luftimesh, mbetet për t’u parë.

Por çfarë duhet të dini rreth takimit midis presidentit rus, Vladimir Putin dhe presidentit të SHBA-së, Donald Trump, samiti i parë në katër vjet:

Samiti do të zhvillohet të premten në Alaska. Do të jetë udhëtimi i parë i Putinit në Shtetet e Bashkuara që nga viti 2015, për Asamblenë e Përgjithshme të OKB-së në Nju Jork. Meqenëse SHBA-ja nuk është anëtare e Gjykatës Ndërkombëtare Penale, e cila në vitin 2023 lëshoi një urdhër arresti për Putinin për akuzat për krime lufte, nuk është e detyruar ta arrestojë atë.

Të dy vendet konfirmuan një takim vetëm midis Putinit dhe Trumpit, edhe pse kishte sugjerime fillestare se presidenti ukrainas, Volodymyr Zelensky mund të jetë pjesë e tij. Por Kremlini ka kohë që kundërshton takimin e Putinit me Zelenskyn,  të paktën derisa të arrihet një marrëveshje paqeje midis Rusisë dhe Ukrainës dhe të jetë gati për t’u nënshkruar.

Putini ka thënë javën e kaluar se nuk ishte kundër takimit me Zelenskyn por siç ka thënë “duhen krijuar kushte të caktuara” që kjo të ndodhë dhe se “kjo ështe ende shumë larg për t’u arritur”.

Deklarata e tij ka ngritur frikën për përjashtimin e Ukrainës nga negociatat. Zyrtarët ukrainas javën e kaluar kanë biseduar me aleatët evropianë, të cilët theksuan se paqja nuk mund të arrihet pa përfshirjen e Kievit.

Do të jetë vizita e parë e një udhëheqësi rus në Alaska, edhe pse ishte pjesë e perandorisë cariste deri në vitin 1867, sipas agjencisë shtetërore të lajmeve Tass.

Alaska ishte kolonizuar nga Rusia duke filluar nga shekulli i 18-të derisa Cari Aleksandri II ua shiti atë Shteteve të Bashkuara në vitin 1867 për 7.2 milionë dollarë. Kur u zbulua se përmbante burime të mëdha, u pa si një marrëveshje naive që shkaktoi keqardhje dhe vetë-qortim.

Trumpi është dukur gjithnjë e më i acaruar me Putinin për shkak të refuzimit të Rusisë për të ndaluar bombardimin e qyteteve ukrainase. Kievi ka rënë dakord për ndaljen e luftës duke këmbëngulur në një armëpushim si hapin e parë drejt paqes.

Moska ka paraqitur kushte armëpushimi që nuk janë fillestare për Zelenskyn, të tilla si tërheqja e trupave nga katër rajonet që Rusia i aneksoi ilegalisht në vitin 2022, ndalimi i përpjekjeve të mobilizimit ose ngrirja e dërgesave të armëve perëndimore.

Për një paqe më të gjerë, Putini kërkon që Kievi të lëshojë rajonet e aneksuara, edhe pse Rusia nuk i kontrollon plotësisht ato, dhe Krimenë, të heqë dorë nga një përpjekje për t’u bashkuar me NATO-n, të kufizojë madhësinë e forcave të saj të armatosura dhe të njohë rusishten si gjuhë zyrtare së bashku me gjuhën ukrainase.

Zelensky këmbëngul se çdo marrëveshje paqeje duhet të përfshijë garanci të forta sigurie për Ukrainën për ta mbrojtur atë nga agresioni i ardhshëm rus.

Putini e ka paralajmëruar Ukrainën se do të përballet me kushte më të ashpra për paqe, teksa trupat ruse hyjnë në rajone të tjera për të ndërtuar atë që ai e ka përshkruar si një “zonë neutrale”. Disa vëzhgues sugjeruan se Rusia mund t’i shkëmbejë këto fitime të fundit për territor ende nën kontrollin ukrainas, në katër rajonet e aneksuara nga Moska.

Zelensky ka thënë të shtunën se “ukrainasit nuk do t’ia japin tokën e tyre pushtuesit”.

Por Trumpi ka thënë të hënën: “Do të ketë shkëmbim territoresh. E di këtë nëpërmjet Rusisë dhe nëpërmjet bisedave me të gjithë. Për të mirën, për të mirën e Ukrainës. Gjëra të mira, jo të këqija. Gjithashtu, disa gjëra të këqija për të dyja palët”.

Putini e sheh takimin me Trumpin si një shans për të forcuar fitimet territoriale të Rusisë, për ta mbajtur Ukrainën jashtë NATO-s dhe për ta parandaluar atë të strehojë ndonjë trupë perëndimore, në mënyrë që Moska të mund ta tërheqë gradualisht vendin përsëri në orbitën e saj.

Ai beson se koha është në anën e tij, ndërsa forcat ukrainase po përpiqen të ndalojnë përparimet ruse përgjatë vijës së frontit mes një morie raketash dhe dronësh të Moskës që vazhdojnë ta godasin vendin.

Takimi është një grusht diplomatik për Putinin, i izoluar si pasojë e pushtimit. Kremlini kërkoi t’i portretizonte kontaktet e ripërtërira me SHBA-në si dy superfuqi që kërkojnë të zgjidhin probleme të ndryshme globale, teksa Ukraina është vetëm njëra prej tyre.

Ukraina dhe aleatët e saj evropianë janë të shqetësuar se një samit pa Kievin mund t’i lejojë Putinit të marrë Trumpin në anën e tij dhe ta detyrojë Ukrainën të bëjë lëshime.

“Çdo vendim që merret pa Ukrainën është në të njëjtën kohë vendim kundër paqes”, ka thënë Zelensky. “Ato nuk do të sjellin asgjë. Ato janë vendime të vdekura. Ato nuk do të funksionojnë kurrë”.
Zyrtarët evropianë e përsëritën këtë.

“Ndërsa punojmë drejt një paqeje të qëndrueshme dhe të drejtë, e drejta ndërkombëtare është e qartë: Të gjitha territoret e pushtuara përkohësisht i përkasin Ukrainës”, ka thënë shefja e politikës së jashtme të Bashkimit Evropian, Kaja Kallas. “Një paqe e qëndrueshme do të thotë gjithashtu se agresioni nuk mund të shpërblehet”, ka shtuar ajo.

Sekretari i Përgjithshëm i NATO-s, Mark Rutte, ka thënë të dielën se besonte që Trumpi po “sigurohej që Putini të ishte serioz, dhe nëse nuk ishte, atëherë gjithçka do të ndalet këtu”.

E ardhmja e Kristjan Asllanit te Interi mbetet e pasigurt, teksa merkatoja e verës po hyn në fazën e saj vendimtare.

Pas refuzimit nga Real Betis dhe Sassuolo, një tjetër klub i Serie A ka bërë lëvizjen e radhës për mesfushorin shqiptar.

Bëhet fjalë për Torinon, që sipas raportimeve nga Italia ka kontaktuar së fundmi për të marrë informacione mbi situatën e lojtarit. Granatat po kërkojnë të përforcojnë repartin e mesfushës për t’i dhënë më shumë opsione trajnerit Baroni, dhe Asllani shihet si një profil i përshtatshëm për projektin e tyre.

23-vjeçari, i cili është pjesë e Interit prej verës së vitit 2022, ka pasur hapësira të kufizuara në formacionin e Simone Inzaghit, ndërsa me Chivun në stol, i është bërë e qartë që nuk është më pjesë e ideve të klubit.

Torino ende nuk ka bërë një ofertë zyrtare, por sinjalet nga “Olimpico Grande Torino” tregojnë se interesimi është serioz, ndërsa merkatoja mbyllet më 31 gusht.

Pas tre vitesh lufte brutale dhe rraskapitëse, një marrëveshje e mundshme midis presidentit amerikan, Donald Trumpit dhe homologur rus, Vladimir Putinit në takimin e së premtes mund ta vërë Ukrainën në një situatë pa rrugëdalje.

Po spekulohet se të dy udhëheqësit mund të arrijnë një të ashtuquajtur marrëveshje “tokë për paqe”, sipas së cilës Ukraina do të detyrohej të heqë dorë nga një pjesë e territorit të saj në këmbim të ndalimit të konfliktit, shkruan Sky News.

Një marrëveshje e tillë, në praktikë, do të nënkuptonte aneksimin nga Rusia të territorit sovran të Ukrainës, të ligjëruar me forcë.

Nuk dihet ende nëse presidenti ukrainas, Volodymyr Zelensky apo ndonjë përfaqësues tjetër i Ukrainës do të lejohet të marrë pjesë drejtpërdrejt në samit dhe në çfarë kushtesh.

Rusia aktualisht pushton rreth 19 për qind të territorit ukrainas. Kjo përfshin gadishullin e Krimesë dhe pjesë të rajonit të Donbasit, të cilat i ka pushtuar që përpara fillimit të pushtimit të gjithanshëm në shkurt të vitit 2022.

Trump ka deklaruar se shpreson që t’i kthejë Ukrainës “territor të vlefshëm”, por mbetet e paqartë se për çfarë do të ishte vërtet dakord Putin.

Ekspertët po analizojnë se çfarë do të nënkuptojë ky takim i shumëpritur mes dy liderëve botërorë për të ardhmen e vendit të goditur nga lufta dhe për situatën në vijat e frontit.

Familjet e evakuuara nga fshatrat e Njësisë Administrative Skënderbegas të Gramshit, kanë mbërritur në ambientet e konviktit të qytetit, ku janë marrë masa për akomodimin e tyre.

Ndërkohë, po bëhen gati hotelet e zonës për të akomoduar njerëzit e prekur. Tajar Bici, nënkryetar i Bashkisë Gramsh bëri me dije se kanë siguruar  120 shtretër nga konvikti dhe bizneset. Deri tanin janë 32 persona të regjistruar për t’u akomoduar në konvikt.

Po ashtu, janë marrë masa për ushqime. Aktualisht janë evakuuar drejt qytetit 32 banorë, ndërsa pjesa tjetër qëndrojnë përreth zonave për të shuar flakët, duke shpresuar deri në momentin e fundit.

Dy fshatrat Shëmbërdhenj dhe Bletas janë shkrumbuar plotësisht banesat. Ndërkohë rrezikohen fshatrat Harunas, Nartë, Shelcan, Bulçar, Snisëm, Sojnik, Probat dhe Grabova e Poshtme.

Kujtojmë se situata me zjarrin në disa fshatra të Gramshit është serioze, ndërsa një person ka humbur jetën dhe disa të tjerë kanë mbetur të lënduar.

Skuadra e Shkëndijës së Tetovës ka përfunduar aventurën në Ligën e Kampionëve pas një humbjeje të thellë 5-1 ndaj Qarabagut në ndeshjen e kthimit të raundit të tretë eleminator.

Ndeshja nisi mirë për kampionët e Maqedonisë së Veriut, të cilët kaluan në epërsi në minutën e 10-të me golin e Fabrice Tambas, pas asistimit nga Besart Ibraimi. Por gëzimi zgjati pak, pasi vetëm gjashtë minuta më vonë, Qarabag barazoi me një autogol të Klinsman Cakës. Brenda pak minutash, vendasit shënuan edhe tri herë të tjera, duke përfunduar pjesën e parë me rezultatin 4-1.

Në pjesën e dytë, përkundër disa zëvendësimeve nga trajneri Jeton Beqiri, loja e Shkëndijës nuk ndryshoi. Qarabagu shënoi edhe golin e pestë në minutën e 59-të dhe dominoi pjesën e mbetur të ndeshjes pa shumë vështirësi.

Me këtë humbje, Shkëndija eliminohet nga Liga e Kampionëve, por do të vazhdojë garën në fazën play-off të Ligës së Evropës, ku do të përballet me humbësin e përballjes Ludogorets-Ferencvaros.

Disa besojnë se zhdukja e mushkonjave do të kishte pasoja serioze për kafshët që ushqehen me to, siç janë zogjtë. Por shkencëtarë të tjerë argumentojnë se mushkonjat nuk janë një pjesë e pazëvendësueshme e dietës së disa specieve omnivore.

Biologu australian Scott O’Neill, themelues i Programit Botëror të Mushkonjave, beson se zhdukja e një prej mushkonjave më të rrezikshme për njerëzit, Aedes aegypti, nuk do të shkaktonte dëme të menjëhershme në ekosisteme.

Qëllimi i Programit Botëror Kundër Mushkonjave është të zvogëlojë përhapjen e infeksioneve të transmetuara nga insekte të tilla si e ashtuquajtura mushkonja e etheve të verdha, e familjes Culicidae, e cila mbart sëmundje si dengu, chikungunya dhe ethet e verdha.

Ndryshe nga speciet e tjera të mushkonjave, Aedes aegypti injoron mjediset në të cilat jetojnë kafshët e tjera dhe është përshtatur për të jetuar në qytete, ku kafshon vetëm njerëzit.

Ekzistojnë gjithashtu edhe mushkonjat pjalmuese, por sipas O’Neill, edhe zhdukja e tyre do të kishte efekte të papërfillshme, pasi shumë pak bimë varen vetëm nga këto insekte për riprodhim. Ndikimi në ekosistem do të ishte shumë më i keq nëse pjalmuesit jetësorë si bleta do të zhdukeshin.

Takimi mes presidentit amerikan, Donald Trump dhe homologut rus, Vladimir Putin do të mbahen në Anchorage , qyteti më i madh i Alaskës.

“Presidenti Trump është i vendosur të përpiqet t’i japë fund kësaj lufte dhe të ndalojë vrasjet”, tha në një konferencë, sekretarja e Shtëpisë së Bardhë, Karoline Leavitt, shkruan Sky News.

“Siç e ka thënë presidenti vazhdimisht, preferenca e tij e fortë do të jetë gjithmonë për paqen dhe partneritetin sa herë që këto rezultate mund të arrihen. Nuk ka asnjë udhëheqës në botë tani që ka qenë më i përkushtuar për parandalimin e luftërave ose përfundimin e tyre sesa Presidenti Trump.”, shtoi ajo.

Presidenti amerikan, Donald Trump, ka thënë se do të tentojë t’ia kthejë Ukrainës një pjesë të territorit të vet në takimin që do ta ketë me presidentin rus, Vladimir Putin më 15 gusht.

Trump u shpreh se bisedimet në Alaskë do të jenë të natyrës fillestare, dhe kanë për qëllim të bindin Putinin për t’i dhënë fund luftës, dhe që do të ketë “disa shkëmbime territoresh”.

Kanë mbërritur 10 pacientët e parë në spitalin e Gramshit, ku gjendja e tyre paraqitet e stabilizuar, kryesisht me asfiksim dhe ankth.

Ndërkohë mësohet se një repart është hapur posaçërisht nëse do të ketë pacientë të prekur nga zjarri. Pavarësisht thirrjes së autoriteteve për të lënë shtëpitë vetë banorët pohojnë se kanë refuzuar, pasi  kanë lënë pas gjithçka të ngritur me djersë e mund.

Ata tregojnë për mediat momentet e ferrit dhe sesi i shpëtuan zjarrit. Kërkojnë ndihmën e autoriteteve për t’u strehuar.

Ndërkohë nusja e djalit të 80-vjeçarit që shkaktoi zjarrin, shprehet në lot për ç’ka përjetoi dhe momentet e para të përballjes me zjarrin agresiv.

Edhe kreu i Urgjencës Kombëtare Skënder Brataj, foli për gjendjen shëndetësore të pacientëve dhe masat e marra për të përballuar situatën e krijuar.

“Situata e zjarreve në Gramsh mbetet e vështirë, sidomos në fshatin Skënderbegas. Kanë ardhur 10 pacientë, pas 6 të parëve kanë ardhur edhe 4 të tjerë. Fatmirësisht pa rrezik për jetën, me intoksikime, ankth dhe gjëra të lehta. Janë 6 ekipe këtu të urgjencës dhe helikopteri të fusha e sportit dhe sipas emergjencës do i nisim drejt Tiranës. Deri tani nuk ka raste të tilla, po i përballojmë këti, spitali i Gramshit në gatishmëri, madje kemi edhe nga Trauma dhe Elbasani nëse do të jetë e nevojshme. Por në këtë moment situata është nën kontroll. Kemi hapur repartë sipër, gjithë personeli është në detyrë”, tha Brataj.

Ai apeloi për banorët që të evakuoheshin sa më parë nëse haseshin me zjarre, pasi rreziku është i lartë. Brataj këshilloi qytetarët dhe veçanërisht banorët e zonave me rrezik që të përdornin peshqir apo rrobë të njomë gjatë zjarreve dhe ta vendosnin në hundë, që të parandalonin asfiksimin nga tymi, që sjell edhe pasoja fatale.

Për herë të dytë brenda një muaji Greqia ka kërkuar ndihmën e Mekanizmit Evropian të Mbrojtjes Civile për katër avionë zjarrfikës për shkak të gjendjes alarmante të frontit të zjarreve orët e fundit.

Repartet e zjarrfikësve në gjithë vendin po përballen me të paktën 106 zjarre në të gjitha fushat e operacioneve, 63 prej të cilave shpërthyen vetëm sot.

Forca të shumta tokësore dhe ajrore të zjarrfikësve po operojnë kryesisht në Kefaloni, Vonicë, Zakinthos, Arta, Prevezë, Hios, Mesinia dhe Aitoliko.

Një zjarr masiv në Ahaia pranë Patras, në Greqinë perëndimore, u përhap në shtëpitë dhe fshatrat e zonës, i nxitur nga erërat e forta dhe Mbrojtja Civile u ka dërguar mesazh me numrin e emergjencës 112 banorëve të largohen nga shtëpoti e tyre.

Erërat e forta që mbizotërojnë ende sot, të kombinuara me uljen ekstreme të lagështisë për shkak të thatësirës së zgjatur, kanë krijuar një përzierje shpërthyese që në çdo rast favorizon fillimin e zjarreve të reja -thonë specialistët.

Në Hartën e Rrezikut të Sekretariatit të Përgjithshëm për Mbrojtjen Civile, rrezik shumë i lartë zjarri parashikohet për nesër, në periferinë e Athinës, Peloponez, Greqinë Perëndimore, dhe Qendrore, Ishujt e detit Jon ,por edhe në zonat e Greqisës së veriut .

Sipas programit të vëzhgimit satelitor të tokave të BE, Copernicus, në dy muajt e fundit, deri në 29 korrik, mbi 55.000 hektarë toka pyjore dhe bujqësore janë djegur në gjithë vendin.

89 palestinezë janë vrarë në 24 orët e fundit nga bombardimet izraelite në Gaza, përfshirë 15 persona që prisnin ushqim në një pikë shpërndarjeje, sipas autoriteteve vendase.

Sulmet kanë ardhur vetëm një ditë pas zemërimit global për vrasjen e gjashtë gazetarëve në territor.

Agjencia e Mbrojtjes Civile në Gaza raportoi se sulmet ajrore ndaj qytetit janë intensifikuar që prej miratimit nga kabineti i sigurisë i kryeministrit Benjamin Netanyahu të planit për zgjerimin e ofensivës.

Ndërkohë, pesë persona, përfshirë dy fëmijë, kanë vdekur nga uria. Ministrat e Jashtëm të 24 vendeve, përfshirë Britaninë, Australinë, Francën, Spanjën dhe Japoninë, paralajmëruan se “vuajtjet humanitare në Gaza kanë arritur nivele të paimagjinueshme” dhe kërkuan nga Izraeli të lejojë menjëherë hyrjen e ndihmave.

Në veri të Gazës, të paktën 15 persona humbën jetën ndërsa prisnin për ndihma ushqimore pranë kalimit Zikim. Në jug, një sulm në Khan Younis vrau pesë persona nga e njëjta familje, ndërsa katër të tjerë humbën jetën në një kamp me tenda në Mawasi.

Banorët e lagjeve Zeitoun dhe Sabra përshkruan bombardimet si më të rëndat në javët e fundit. “Dëgjohej sikur lufta po rifillonte,” tha Amr Salah, 25 vjeç. “Disa shtëpi u goditën drejtpërdrejt, dhe avionët kryen ato që ne i quajmë ‘unaza zjarri’.”

Sipas Ministrisë së Shëndetësisë në Gaza, numri i viktimave nga uria që nga 7 tetori 2023 ka arritur në 227, përfshirë 103 fëmijë. Spitalet lokale raportojnë raste të reja të vdekjeve nga kequshqyerja, ndërsa OKB-ja paralajmëron për rrezikun e një urie masive.

Izraeli, që përballet me kritika gjithnjë e më të ashpra për luftën 22-mujore kundër Hamasit, mohon akuzat për “politikë urie”, duke pranuar probleme në shpërndarjen e ndihmave, por duke fajësuar raportimet mediatike për “gënjeshtra”.

Të dielën, një sulm ajror izraelit vrau gazetarin e njohur të Al Jazeera, Anas al-Sharif, dhe katër kolegë të tij. Ushtria izraelite pretendon se ai ishte lider i një qelize të Hamasit, akuzë të cilën Al Jazeera e ka hedhur poshtë. Vdekja e tyre ka nxitur reagime të forta nga OKB-ja dhe organizatat për të drejtat e njeriut, të cilat kërkojnë një hetim të pavarur.

Që nga 7 tetori 2023, ofensiva izraelite ka vrarë 61,599 palestinezë dhe ka plagosur mbi 154,000 të tjerë, sipas Ministrisë së Shëndetësisë në Gaza.

Vatra zjarresh masive kanë përfshirë edhe Njësinë Terpan në qarkun e Beratit dhe rrethinat e saj.

Më problematike paraqitet situata nga tymi dhe flakët në kodrat e Terpanit dhe luginën poshtë saj që lidhet me fshatin Plashnik.

Mësohet se në Plazhnik situata është më kritike, ku janë evakuuar banorët e lagjes Rexhaj.

Ndërkohë, Forcat operacionale ndodhen në teren, ku prioritet mbetet mbrojtja e jetës së banorëve.

Vetëm Cristiano Ronaldo mund t’i jepte një unazë kaq të shtrenjtë si propozim martese partneres së tij, pasi ekspertët vlerësuan se unaza që mori Georgina Rodriguez nga ylli portugez së fundmi vlen diku midis 2 dhe 5 milionë dollarëve.

Në foton e publikuar nga Georgina në rrjetet sociale, shihet dora e saj duke prekur atë të partnerit të saj, ndërsa unaza që Ronaldo i dhuroi duke i kërkuar të martohej me të shkëlqen.

“Po, pranoj. Për të dhe për të gjithë jetën time”, shkroi ajo përkrah fotos.

Page Six kontaktoi dy ekspertë bizhuterish pasi krijuesi i solitaire-it të Rodriguez nuk është identifikuar ende. Drejtori ekzekutiv i Rare Carat, Ajay Anand, vlerësoi se guri qendror ishte diamant dhe me qartësi të përsosur, me një peshë të mundshme prej mbi 30 karatësh, gjë që do ta çonte vlerën në 5 milionë dollarë.

Nga ana e saj, specialistja e unazave të fejesës në Lorel Diamonds, Laura Taylor, tha për unazën: “Prerjet ovale njihen për fasetat e tyre të shkëlqyera, të cilat maksimizojnë shkëlqimin dhe i japin gurit një pamje të ndritshme dhe të gjallë nga çdo kënd.”

Ajo vlerësoi se guri qendror peshonte midis 15 dhe 20 karatësh dhe kushtonte mbi 2 milionë dollarë.

“Guri qendror është i rrethuar nga diamante të konsiderueshme në anët, të cilat shtojnë edhe më shumë shkëlqimin dhe e bëjnë mbresëlënës, por të duket edhe më i madh. Kjo është një unazë mahnitëse, lehtësisht ndër më mahnitëset që kemi parë vitet e fundit, dhe i përshtatet në mënyrë të përkryer njërit prej çifteve më të famshme të futbollit”, vazhdoi ajo.

Administrata Trump po vlerëson planet për krijuar një “Forcë Reagimi të Shpejtë për Trazirat Civile të Brendshme” të përbërë nga qindra trupa të Gardës Kombëtare të ngarkuara me vendosjen e shpejtë në qytetet amerikane të cilat përballen me protesta ose trazira të tjera, sipas dokumenteve të brendshme të Pentagonit të shqyrtuara nga The Washington Post.

Plani parashikon që 600 trupa të jenë në gatishmëri në çdo kohë, në mënyrë që të mund të vendosen brenda vetëm një ore, thonë dokumentet. Ata do të ndahen në dy grupe me nga 300 trupa dhe do të vendosen në baza ushtarake në Alabama dhe Arizona, me fushëveprim përkatësisht në rajonet në lindje dhe perëndim të lumit Misisipi.

Parashikimet e kostos të përshkruara në dokumente tregojnë se një mision i tillë, nëse propozimi miratohet, mund të arrijë në qindra miliona dollarë nëse avionët dhe ekuipazhet ushtarake do të duhet të jenë gjithashtu gati 24 orë në ditë.

Transporti i trupave nëpërmjet linjave ajrore komerciale do të ishte më pak i kushtueshëm, thonë dokumentet. Propozimi, i cili nuk është raportuar më parë, përfaqëson një tjetër zgjerim të mundshëm të gatishmërisë së Presidentit Donald Trump për të përdorur forcat e armatosura në tokën amerikane.

Ai mbështetet në një seksion të Kodit Amerikan që i lejon komandantit suprem të anashkalojë kufizimet në përdorimin e ushtrisë brenda Shteteve të Bashkuara.

Dokumentet, të shënuara si të paracaktuara, janë gjithëpërfshirëse dhe përmbajnë diskutime të gjera rreth implikimeve të mundshme shoqërore të krijimit të një programi të tillë. Ato u përpiluan nga zyrtarë të Gardës Kombëtare dhe mbajnë vula kohore deri në fund të korrikut dhe fillim të gushtit.

Viti fiskal 2027 është më i hershmi që ky program mund të krijohet dhe financohet përmes procesit tradicional buxhetor të Pentagonit, thonë dokumentet, duke lënë të paqartë nëse iniciativa mund të fillojë më shpejt përmes një burimi alternativ financimi.

Gjithashtu është e paqartë nëse propozimi është ndarë ende me Sekretarin e Mbrojtjes Pete Hegseth. Zëdhënësit e Departamentit të Mbrojtjes refuzuan të komentojnë. Byroja e Gardës Kombëtare nuk iu përgjigj një kërkese për koment.

Gjykata e Bosnje-Hercegovinës e ka miratuar kërkesën që dënimi me burgim ndaj Millorad Dodikut të ndryshohet në dënim me gjobë, në përputhje me ligjet që e parashohin këtë gjë.

Dodiku ishte kryetar i Republikës Sërpska, entitetit serb të Bosnje-Hercegovinës, deri kur iu hoq mandati nga Komisioni Qendror i Zgjedhjeve ditë më parë.

Gjykata ka bërë të ditur të martën se “në përputhje me dispozitat ligjore, është marrë vendimi që, pas deklarimit të Prokurorisë së Bosnjë e Hercegovinës, të miratohet propozimi i mbrojtjes dhe dënimi me burg i shqiptuar ndaj të dënuarit Millorad Dodik të zëvendësohet me gjobë”.

Kodi Penal i Bosnje – Hercegovinës parasheh mundësinë e zëvendësimit të dënimit me burgim që shkon deri në një vit, ku një ditë burg llogaritet 100 marka (50 euro). Për shlyerje të një viti burgim, Dodiku do t’i paguajë rreth 36.500 marka, që janë pak më shumë se 18.000 euro.

Dodiku është dënuar me një vit burgim dhe gjashtë vjet ndalesë për mbajtje të ndonjë pozite publike, për shkak të mosrespektimit të vendimeve të Përfaqësuesit të Lartë të komunitetit ndërkombëtar në Bosnje-Hercegovinë, Christian Schmidt.

Pas publikimit të vendimit përfundimtar, Komisioni Qendror i Zgjedhjeve në Bosnje e ka anuluar mandatin e tij si president i Republikës Sërpska, i zgjedhur në zgjedhjet e përgjithshme të vitit 2022.

Ekipi ligjor i Dodikut e ka apeluar vendimin më 12 gusht dhe Gjykata e Apelit pritet ta publikojë vendimin final brenda tri ditësh. Sipas ligjeve në fuqi, pas përfundimit të mandatit të Dodikut, për shkak të vendimit të gjykatës, Komisioni Zgjedhor duhet t’i shpallë zgjedhjet e parakohshme për pozitën e kryetarit të Republikës Sërpska, të cilat mund të bllokohen apo pengohen nga ky entitet serb.

Menjëherë pas vendimit të Komisionit Zgjedhor, Dodiku e ka bërë publike idenë e mbajtjes së një referendumi në Republikën Sërpska, përmes së cilit banorët do të vendosnin për mandatin e presidentit të entitetit, apo për refuzim të vendimit të gjykatës.

Ekipi i tij ligjor ka nisur ankesë edhe në Gjykatën Kushtetuese të Bosnje-Hercegovinës, të cilën Dodiku nuk e njeh, duke kërkuar nga ajo një masë të përkohshme që ndalon ekzekutimin e vendimit, derisa Kushtetuesja ta thotë fjalën e fundit. Avokati i Dodikut, Goran Bubiq ka thënë se vendimi është marrë me qëllim të krijimit të rrugës ligjore për apel në Gjykatën Evropiane për të Drejta të Njeriut.

Një hap i tillë është i mundshëm vetëm pas vendimit të Gjykatës Kushtetuese. Dodiku është shpallur fajtor për nënshkrimin e një dekreti që Përfaqësuesi i Lartë në Bosnje, Christian Schmidt, paraprakisht e ka anuluar. Përmes këtyre ligjeve, trupat legjislativë në Republikën Sërpska kanë tentuar ta parandalojnë zbatimin e vendimeve të Gjykatës Kushteteuse dhe të Schmidit në territorin e entitetit serb. REL

‘Me shqetësim të thellë po ndjek situatën kritike të shkaktuar nga zjarret, me të cilat po përballet vendi ynë.’  Kështu shkruan në një postim në llogarinë e tij në Facebook, Presidenti i Republikës, Bajram Begaj, ku ndër të tjera ai shkruan se ‘në këto momente sfiduese dua të bëj thirrje për ndërgjegjësim maksimal nga secili prej nesh, duke treguar kujdes, angazhim dhe përgjegjësi’.

‘Ftoj të gjithë qytetarët, veçanërisht banorët e Bashkisë Gramsh, Njësisë Administrative Skënderbegas, ku situata është edhe më kritike, të bashkëpunojnë e të kontribuojnë krah për krah me strukturat e emergjencave civile, zjarrfikësit, Forcat e Armatosura dhe policinë, të cilët po punojnë dhe sakrifikojnë për të mbrojtur jetën, pronën, pasurinë.

Mbështetja jonë për ta, me çdo formë të mundshme, është jetike’, shkruan Begaj.

Në këtë postim Presidenti ka falenderuar të gjithë efektivët e angazhuar si dhe ka shprehur mirënjohjen për ndihmën që po japin vendet mike në përballimin e situatës.

‘Në emër të të gjithë shqiptarëve, falënderoj të gjithë efektivët e angazhuar, si dhe shpreh mirënjohje të thellë për ndihmën që po marrim nga vendet mike, përfshirë dërgimin e helikopterëve dhe pajisjeve të specializuara’, shkruan Begaj.

Ministria e Mbrojtjes dhe Forcat e Armatosura të Shqipërisë janë tërësisht të angazhuara në menaxhimin e situatës së rënduar nga zjarret në bashkinë Gramsh, me trupa të FA në terren, së bashku me zjarrfikës lokalë, forca policie, Agjencia Kombëtare e Mbrojtjes Civile dhe strukturat bashkiake.

‘Dhjetëra mjete janë vënë në dispozicion, përfshirë zjarrfikëse, autoambulanca dhe mjete transporti, ndërkohë që 4 helikopterë po operojnë nga ajri për shuarjen e flakëve në zonat më të vështira. Prioritet mbetet evakuimi i banorëve nga zonat në rrezik’, thuhet në njoftimin e MM.

Për shkak të situatës, Ministria e Mbrojtjes i bën thirrje banorëve të fshatrave Ërmenj, Harunas dhe Zenelas të largohen menjëherë nga banesat e tyre dhe të bashkëpunojnë me autoritetet për evakuimin e sigurt.