AUSTIN, 24 korrik /ATSH / – “Tesla” deklaroi se ka ndërtuar versionet fillestare të një makine elektrike të përballueshme, një lëvizje që duket se synon të ndalë rënien e ndjeshme të shitjeve që kompania ka përjetuar në tregjet globale, sipas Reuters.

Kompania e Elon Musk raportoi rënien më të madhe tremujore të shitjeve në më shumë se një dekadë dhe një fitim që nuk përmbushi pritshmëritë e “Wall Street”-it. Megjithatë, përqindja e fitimit nga prodhimi i makinave ishte më e mirë se sa pritej.

Tesla tha se pret të nisë prodhimin në volum të modelit të lirë gjatë gjysmës së dytë të këtij viti, duke ngjallur shpresa se kjo do të ringjallë kërkesën në një kohë kur kompania po përballet me konkurrencë në rritje nga makinat elektrike më të lira, sidomos në Kinë, si dhe me një reagim të vazhdueshëm ndaj pikëpamjeve të djathta ekstreme të Musk.

Shefi  i Financave i “Tesla”-s, Vaibhav Taneja, deklaroi gjatë një telefonate me investitorët se prodhimi i modelit më të lirë do të përshpejtohet tremujorin e ardhshëm, por me një ritëm më të ngadaltë se sa ishte parashikuar fillimisht. Kompania nuk dha asnjë përditësim për parashikimin e saj vjetor për dorëzimet.

“Rezultatet zhgënjyese të Tesla-s nuk janë befasuese duke pasur parasysh vështirësitë që ka kaluar së fundmi”, tha analisti i Emarketer, Jacob Bourne. “Një model vërtet i përballueshëm mund të jetë çelësi për të rritur shitjet nëse Tesla arrin ta pozicionojë atë në mënyrë të suksesshme, pa dëmtuar imazhin e modeleve të saj më të shtrenjta.”

Kjo është rënia e dytë radhazi e të ardhurave tremujore, me një rënie prej 12%, pavarësisht se kompania prezantoi një version të përmirësuar të Model Y, SUV-i më i shitur i saj, që pritej të ndihmonte në rritjen e kërkesës.

Një rënie prej 51% në shitjet e kredive rregullatore të makinave,  të cilat blihen nga prodhues të tjerë që nuk i përmbushin rregulloret e ndotjes , ndikoi gjithashtu negativisht në të ardhurat dhe fitimin.

Të ardhurat ranë në 22,5 miliardë dollarë për tremujorin prill-qershor, nga 25,5 miliardë dollarë një vit më parë. Analistët kishin parashikuar mesatarisht 22,74 miliardë dollarë. Fitimi i rregulluar për aksion ishte 40 cent, më pak se parashikimi prej 43 cent.

Marzhi bruto nga automjetet, duke përjashtuar kreditë rregullatore, ishte 14.96%, më i lartë se pritshmëritë, falë uljes së kostos për njësi.

Në prill, “Tesla” kishte deklaruar se do të fillonte prodhimin e modelit më të përballueshëm deri në fund të gjysmës së parë të vitit, por burime për Reuters kishin thënë se ai do të vonohej disa muaj. Tesla nuk dha detaje për modelin, numrin e njësive të prodhuara apo çmimin që do të nxjerrin në treg. /Ad.Ab./

The post TESLA-Kompania ndërton makina elektrike me kosto të përballueshme appeared first on Agjencia Telegrafike Shqiptare.

PARIS, 24 korrik  /ATSH-AFP/ – Një statujë e apostullit “Shën Tomas” u rikthye sot në katedralen Notre-Dame në Paris, duke kompletuar kthimin e të 16 statujave që zbukuronin bazën e kambanarës përpara zjarrit shkatërrues të vitit 2019.

Statuja, me gjatësi tre metra dhe peshë 100 kilogramë, nuk u prek nga zjarri, pasi ishte hequr nga katedralja vetëm disa ditë më parë për restaurim rutinë, së bashku statujat e tjera.

“Kjo është pothuajse një mrekulli”, tha Marie-Hélène Didier, përgjegjëse për ndërtesat historike në rajonin e Parisit. “Është një simbol shumë i fuqishëm të shohësh të gjitha statujat sërish atje lart”, i tha ajo agjencisë AFP.

Pas bekimit nga kryepeshkopi i Parisit, Laurent Ulrich, statuja u vendos në bazën e kambanarës me një vinç. Ajo aktualisht qëndron e fshehur pas skelave që rrethojnë kambanarën, por do të jetë plotësisht e dukshme deri në fund të gushtit.

Notre-Dame ishte pranë shkatërrimit në vitin 2019, por u rinovua plotësisht nga brenda dhe iu vendos një çati dhe kambanare e re gjatë një restaurimi intensiv pesëvjeçar.

Të 16 statujat, që përfaqësojnë 12 apostujt dhe katër ungjilltarët sipas traditës katolike, u dizenjuan në vitin 1857 nga Eugène Viollet-le-Duc, arkitekti i kambanarës, dhe u gdhendën nga Adolphe-Victor Geoffroy-Dechaume.

Shkaku i saktë i zjarrit të vitit 2019 nuk është identifikuar kurrë, pavarësisht një hetimi  të hollësishëm , për të cilën u sugjerua si më e mundshme një aksident, p.sh. një defekt elektrik. /Ad.Ab./

The post NOTRE DAME – Rikthehet statuja e “Shën Tomasit” në bazën e kambanarës appeared first on Agjencia Telegrafike Shqiptare.

LONDËR, 24 korrik /ATSH-DPA/ – Kryeministri britanik Keir Starmer dhe presidenti ukrainas Volodymyr Zelensky diskutuan sot në një bisedë telefonike “rëndësinë” e masave kundër korrupsionit, pas protestave që shpërthyen ndaj një projektligji të diskutueshëm në Ukrainë.

Zelensky tha se i kishte paraqitur kryeministrit britanik planet e tij për të siguruar “pavarësinë dhe efektivitetin e infrastrukturës kundër korrupsionit në Ukrainë”, pasi qeveria e tij në Kiev u përball me protestat të fuqishme, të parat që nga fillimi i luftës tre vjet më parë.

Presidenti ukrainas njoftoi sot se do të paraqesë një projektligj të ri kundër korrupsionit në parlamentin e vendit.

Mijëra njerëz dolën në rrugët e Kievit dhe qyteteve të tjera këtë javë për të protestuar kundër një projektligji që synon të rrisë mbikëqyrjen ndaj dy agjencive kundër korrupsionit.

Dy liderët gjithashtu diskutuan për sanksionet ndaj të ardhurave nga energjia ruse gjatë bisedës së tyre telefonike, sipas një deklarate nga “Downing Street”.

Në përmbledhjen e bisedës, një zëdhënës tha se të dy liderët “ranë dakord që partnerët ndërkombëtarë duhet të vazhdojnë të rrisin presionin ndaj Rusisë”.

“Kryeministri theksoi mbështetjen e palëkundur të Britanisë së Madhe për Ukrainën  dhe të dy liderët ranë dakord për rëndësinë e rolit të institucioneve të pavarura kundër korrupsionit në zemër të demokracisë ukrainase”, tha zëdhënësi.

“Të dy liderët theksuan se presidenti rus Vladimir Putin duhet të ulet në tryezën e bisedimeve dhe të pranojë një armëpushim pa kushte për të arritur një paqe të drejtë dhe të qëndrueshme në Ukrainë”, shtoi ai.

Zelensky tha se kishin pasur “një bisedë shumë të mirë dhe thelbësore” gjatë telefonatës.

Në një postim në platformën X, ai shkroi se “kishte folur  për përgatitjen e një projektligji që synon forcimin e sistemit ligjor dhe sigurimin e pavarësisë dhe efektivitetit të infrastrukturës kundër korrupsionit në Ukrainë”.

Zelensky shtoi se kryeministri britanik “sugjeroi përfshirjen e ekspertëve që mund të kontribuojnë në një bashkëpunim afatgjatë.”

Dy liderët janë takuar edhe muajin e kaluar personalisht, kur Zelensky u prit në zyrën e kryeministrit Starmer. /Ad.Ab./

The post BM – Starmer dhe Zelensky diskutojnë për luftën kundër korrupsionit appeared first on Agjencia Telegrafike Shqiptare.

LONDËR, 24  korrik  /ATSH-DPA/ – Qeveria e kryeministrit britanik Keir Starmer është “thellësisht e përkushtuar” për njohjen e një shteti palestinez, tha një anëtar i kabinetit të tij.

Sekretari për Biznesin, Jonathan Reynolds, theksoi se një hap i tillë duhet të jetë domethënës dhe të ndodhë si pjesë e një “lëvizjeje të vërtetë drejt një zgjidhjeje me dy shtete dhe një marrëveshjeje afatgjatë për paqe” me Izraelin.

Starmer po përballet me presion në rritje për të përmbushur premtimin e Partisë Laburiste për të njohur Palestinën.

“Ne jemi thellësisht të përkushtuar për njohjen e Palestinës si shtet, gjë që ishte pjesë e manifestit tonë, por, natyrisht, duam që kjo të jetë domethënëse”, i tha Reynolds  radios “LBC”.

“Tani për tani, nuk ekziston një shtet palestinez. Nuk ka një marrëveshje politike mes dy territoreve kryesore palestineze në Bregun Perëndimor dhe Gazë. Kemi ndërmarrë hapa të tjerë përballë situatës së papranueshme në Gazë. Kemi vendosur sanksione ndaj dy ministrave të kabinetit izraelit. Personalisht kam ndaluar eksportet e armëve drejt Izraelit që mund të përdoren në konfliktin në Gazë”, shtoi ai

“Kemi pezulluar bisedimet me Izraelin për një marrëveshje më të avancuar tregtare dhe marrëdhënie ekonomike. Pra, kemi ndërmarrë këto hapa të menjëhershëm. Dhe ne duam të shohim Palestinën të njihet. Dua që kjo të jetë domethënëse. Dua që të ndodhë në bashkëpunim me partnerët, me vende të tjera anembanë botës”, përfundoi Reynolds. /Ad.Ab./

The post BM – Reynolds: Qeveria “thellësisht e përkushtuar” për njohjen e Palestinës appeared first on Agjencia Telegrafike Shqiptare.

SIDNEJ, 24 korrik /ATSH/ – Ish-kryeministri i Australisë, Scott Morrison, i kërkoi Shteteve të Bashkuara të Amerikës që të forcojnë angazhimin ekonomik në Indo-Paqësor për të kundërshtuar ndikimin në rritje të Kinës., sipas Reuters.

Gjatë një dëshmie në Kongresin Amerikan, Morrison theksoi se “siguria ekonomike është shqetësimi kryesor për shumë vende të Azisë Juglindore, dhe se udhëheqja amerikane në investime dhe tregti u jep vendeve të rajonit zgjedhje përballë Kinës”.

“Kur Kina është aktive në një vend të caktuar, përgjigjja nuk është që SHBA-ja apo aleatët të mos jenë të pranishëm, por që të jenë edhe më të pranishëm, për të ofruar atyre këtë zgjedhje”, tha ai.

Ai solli si shembull përvojën e qeverisë së tij, kur Kina vendosi sanksione tregtare prej 20 miliardë dollarësh ndaj Australisë pasi Kanberra kërkoi një hetim mbi origjinën e COVID-19. Sanksionet u hoqën pas ndryshimit të qeverisë në vitin 2022.

Morrison tha gjithashtu se SHBA-ja duhet të punojë më ngushtë me aleatët e saj të Quad-it, përfshirë Australinë dhe Japoninë, për të ndërtuar një zinxhir furnizimi për mineralet kritike dhe elementët e rrallë tokësorë, që nevojiten për pajisjet mbrojtëse, përfshirë nëndetëset me energji bërthamore që Australia po blen nga SHBA-ja në kuadër të marrëveshjes “AUKUS”.

Ai paralajmëroi se ndërgjegjësimi publik në Australi për kërcënimin që paraqet Kina është në rënie, duke theksuar nevojën për një angazhim më të madh të perëndimit në rajon. /Ad.Ab./

The post Morrison: SHBA-ja duhet të dyfishojë angazhimin në Indo-Paqësor për të përballuar Kinën appeared first on Agjencia Telegrafike Shqiptare.

DAMASK, 24 korrik /ATSH-DPA/ – Arabia Saudite nënshkroi sot një marrëveshje ekonomike me vlerë mbi 6 miliardë dollarë me Sirinë e shkatërruar nga lufta, duke dhënë një tjetër sinjal mbështetjeje nga monarkia e pasur me naftë për udhëheqësit e rinj të vendit.

Marrëveshjet u nënshkruan gjatë një forumi të madh biznesi saudit-sirian, i hapur sot  në Damask.

Arabia Saudite ka dhënë mbështetje politike dhe ekonomike për Sirinë që nga rrëzimi i udhëheqësit afatgjatë Bashar al-Asad në muajin  dhjetor.

Në maj, udhëheqësi de facto i Arabisë Saudite, princi i kurorës Mohammed bin Salman, organizoi  në Riad një takim mes presidentit amerikan Donald Trump dhe presidentit aktual sirian Ahmed al-Sharaa, duke shënuar takimin e parë në 25 vjet mes liderëve të dy vendeve.

Gjatë vizitës së tij në Arabinë Saudite, Trump shpalli heqjen e sanksioneve amerikane ndaj Sirisë. Edhe Bashkimi Evropian ka ndërmarrë një hap të ngjashëm.

Sipas ministrit saudit të Investimeve, Khalid Al-Falih, marrëveshjet e nënshkruara  sot mbulojnë sektorë si energjia, infrastruktura, industria, shërbimet financiare, teknologjia e informacionit dhe bujqësia.

“Do të punojmë për të inkurajuar investitorët ndërkombëtarë që të eksplorojnë mundësitë në Siri”, tha Al-Falih.

Që prej rrëzimit të al-Asadit, udhëheqja e re e Sirisë ka kërkuar njohje ndërkombëtare dhe mbështetje ekonomike për rindërtimin e vendit, i cili është shkatërruar nga më shumë se një dekadë luftë.  /Ad.Ab./

The post ARABI SAUDITE – Marrëveshje me vlerë 6 miliardë dollarë për Sirinë appeared first on Agjencia Telegrafike Shqiptare.

BRUKSEL, 24 korrik /ATSH/ – Një marrëveshje tregtare ndërmjet Bashkimit Evropian dhe Shteteve të Bashkuara  të Amerikës mund të jetë e afërt, por meqenëse ende nuk ka asnjë garanci, Brukseli vazhdon të përgatitet për masa kundërpërgjigjeje, sipas kanalit televiziv  “CNBC”.

“Aktualisht, një normë tarifore bazë prej 15% ,që përfshin një tarifë ekzistuese rreth 4,8% është skenari bazë për eksportet e BE-së drejt SHBA-së”,  i tha një diplomat i BE-së kanalit “ CNBC”. “ Megjithatë, mund të ketë përjashtime që janë ende në shqyrtim”, shtoi ai. “BE-ja mund të ulë gjithashtu tarifat e saj për produktet amerikane”.

Negociatat midis SHBA-së dhe BE-së kanë qenë të vështira, ndërsa presioni po rritet përpara afatit të 1 gushtit, pas të cilit eksportet e BE-së në SHBA do të përballen me një tarifë prej 30%. Edhe pse më e ulët se norma 50% që kishte përmendur më parë ish-presidenti Trump, tarifa 30% pritet të ketë ndikim të rëndë mbi bizneset dhe ekonomitë në të dy anët e Atlantikut.

John Plassard, partner dhe strateg investimesh në “Cité Gestion” (bankë e pavarur private në Zviër), tha për “CNBC” në se një normë 15% do të ishte “e rëndësishme, por jo shkatërruese” për tregjet.

“Nuk mendojmë se është fundi i botës”, tha Plassard, duke shtuar se megjithëse pritet më shumë paqëndrueshmëri, zhvillimet e fundit janë “më konstruktive se sa retorika e mëparshme.”

Marrëveshja ende nuk është përfunduar.  Megjithatë, marrëveshja është larg përfundimit. Një diplomat i BE-së tha për CNBC se “vendimi përfundimtar është në duart e presidentit Trump”.

Një tjetër zyrtar i BE-së u shpreh gjithashtu me skepticizëm, duke thënë se raportimet se palët janë afër një marrëveshjeje janë “tepër optimiste”.

“Kontaktet mes palëve vazhdojnë, por deri sa presidenti Trump të shprehet vetë, nuk kemi asgjë konkrete. Çdo gjë mbetet ende e hapur”, thanë ata.

Administrata e presidentit  Trump-it mbajti dje të njëjtin qëndrim të ngjashëm.

Kur u pyet për tarifën e mundshme prej 15%, zëvendëssekretari i shtypit i Shtëpisë së Bardhë, Kush Desai, tha se diskutimet mbi marrëveshjen tregtare janë “spekulative,” sipas një raporti të Reuters.

Trump është i njohur për ndryshime të papritura qëndrimi dhe vendime të shpejta,  siç ndodhi këtë javë me marrëveshjen tregtare SHBA-Japoni.  Gjatë një takimi me delegacionin japonez, u vunë re ndryshime në një kartelë me marrëveshjen që ndodhej në tavolinën e presidentit Trump, sipas një fotoje të postuar në  platformën X nga Dan Scavino, zëvendës-shef i stafit të Shtëpisë së Bardhë.

BE përgatitet për skenarin pa marrëveshje

Ndërkohë, BE-ja po përgatit kundërmasa që do të hyjnë në fuqi nëse tarifat amerikane zbatohen javën e ardhshme.

Masa kryesore do të jenë tarifat hakmarrëse që mund të hyjnë në fuqi vetëm disa ditë pas vendosjes së tarifave amerikane. Sipas planit të ri të BE-së, listat e mëparshme të kundërmasave do të kombinohen në një listë të vetme që kap vlerën e 93 miliardë eurove (rreth 109.4 miliardë dollarë).

Gjithashtu, është diskutuar gjerësisht përdorimi i të ashtuquajturit “Instrument kundër shtrëngimit” (Anti-Coercion Instrument),  një opsion që është cilësuar si “arma bërthamore” e BE-së.

Nëse zbatohet, kompanitë amerikane mund të përballen me kufizime në qasjen e tyre në tregun e BE-së, për shembull, mund të ndalohen të marrin pjesë në tenderë publikë, të përballen me kufizime në eksport-import dhe të pengohen në investime direkte.

Deri më tani, Franca është i vetmi vend që ka kërkuar “vendosjen e menjëhershme të masave kundërshtrënguese”, por sipas një diplomati të BE-së, ka një shumicë të cilësuar në favor të këtij instrumenti nëse nuk arrihet një marrëveshje. /Ad.Ab./

The post ANALIZË – Pa një marrëveshje të garantuar tregtare BE-SHBA, Europa mban të hapur “kundërpërgjigjen” appeared first on Agjencia Telegrafike Shqiptare.

VARSHAVË, 24 korrik /ATSH-DPA/ – Polonia planifikon të zgjatë kontrollet në kufijtë e saj me Gjermaninë dhe Lituaninë, deklaroi sot anëtari i kabinetit Tomasz Siemoniak.

Sipas rregullave të zonës Shengen, këto kontrolle kufitare, të cilat filluan më 7 korrik, duhet të përfundojnë pas 30 ditësh, u shpreh Siemoniak për televizionin “TVN24”.

“Ato me siguri do të zgjaten”,  shtoi ai.

Siemoniak ka qenë ministër i Brendshëm që nga maji 2024, por do të zëvendësohet nga Marcin Kierwiński si pjesë e një riformatimi të madh të kabinetit qeveritar. Ai do të vazhdojë të jetë koordinator i shërbimeve speciale dhe përgjegjës për çështjet e migracionit të parregullt.

Në dy javët e para të zbatimit të masave, roja kufitare polake tha se kishte kthyer mbrapsht 100 persona që përpiqeshin të hynin në vend në mënyrë të parregullt nga Gjermania ose Lituania.

Që nga 7 korriku, janë kryer kontrolle të rastësishme ndaj rreth 280,000 personave dhe 134,200 automjeteve, shkroi roja kufitare në platformën X të mërkurën.

Në intervistën televizive, Siemoniak akuzoi Rusinë dhe Bjellorusinë se po përdorin migracionin si armë në kuadër të një sulmi hibrid ndaj Polonisë dhe Bashkimit Evropian.

“Emigrantët fluturojnë drejt Moskës me viza ruse. Më pas, transportohen me autobus drejt kufirit polak, ku autoritetet bjelloruse u tregojnë se çfarë duhet të bëjnë”, tha ai. “Dhe pastaj ata përpiqen të hyjnë në Poloni”.

Polonia vendosi kontrollet si përgjigje ndaj kontrolleve të Gjermanisë, të cilat janë në fuqi që nga tetori 2023.

Qeveria në Varshavë ishte nën presion nga grupe të djathta vigilente, të cilat pretendonin se Gjermania po dërgonte refugjatë në Poloni. Këto grupe nisën patrullimet e tyre në kufi, me qëllim të identifikimit të emigrantëve të parregullt. /Ad.Ab./

The post POLONI – Siemoniak: Në fuqi kontrollet kufitare me Gjermaninë dhe Lituaninë appeared first on Agjencia Telegrafike Shqiptare.

LONDËR, 23 korrik /ATSH-DPA/ – Një numër rekord oficerësh të  policsë janë shkarkuar nga detyra në Angli dhe Uells gjatë vitit të fundit, sipas të dhënave të reja nga Ministria e Brendshme britanike.

Të dhënat tregojnë se 426 oficerë u pushuan nga puna ose ju ndërprenë kontratat në 12 muajt deri në mars, një rritje prej 17% krahasuar me rekordin e mëparshëm prej 365 oficerësh dhe më shumë se dyfishi i numrit të shkarkimeve në vitin 2019-20, kur ishin vetëm 164 raste.

Në maj, qeveria forcoi rregullat për standardet e sjelljes, përfshirë lehtësimin e shkarkimit të atyre që dështojnë në kontrollin e të dhënave personale ose kryejnë shkelje të rënda disiplinore.

Gjatë së njëjtës periudhë 12-mujore, 4 806 oficerë u larguan vullnetarisht nga puna, shifra e dytë më e lartë që nga viti 2006, megjithëse pak më e ulët se rekordi prej 5 15 largimesh në vitin 2023-24.

Këto zhvillime ndodhin në një kohë kur forcat policore kanë paralajmëruar qeverinë se niveli i financimit nuk mjafton për të ruajtur trupën ekzistuese.

Në fund të marsit 2025, kishte 146 442 oficerë me kohë të plotë (FTE), një rënie prej pothuajse 1% nga rekordi prej 147 745 vitin e kaluar.

Metropolitan Police pati rënien më të madhe me 1 022 oficerë më pak ,një rënie prej 3%.

Planet për një rritje mesatare prej 2.3% në shpenzimet për polici u përballën me kritika të forta nga drejtuesit e policisë, të cilët paralajmëruan për një mungesë financimi që pritet të arrijë në 1,2 miliardë paund dhe që do të sjellë shkurtime të tjera.

“Do të humbim 10 000 oficerë me përvojë në vit deri në fund të periudhës së rishikimit të buxhetit, për shkak të pagave të ulëta dhe kushteve të papranueshme të punës”, tha Tiff Lynch, kryetare në detyrë e Federatës së Policisë, tha:“

Gavin Stephens, kryetar i Këshillit Kombëtar të Shefave të Policisë, shtoi se fondet e lëvrura janë larg nga çfarë nevojitet për të zbatuar planet e qeverisë dhe për të ruajtur stafin aktual.

Qeveria është zotuar të rekrutojë 13 000 oficerë patrullimi deri në vitin 2029, me 3000 rekrutime të reja që pritet të jenë aktive deri në pranverën e ardhshme.

Ndërkohë, numri i rekrutimeve të reja ra me 17%, në 7 874 rekrutë (pa përfshirë transferimet), nga 9,492 një vit më parë. Kjo ndjek një rënie dramatike prej 42% në vitin 2022-23, kur ishin rekrutuar 16 355 oficerë.

Reagime politike

Konservatorët e quajtën rënien e numrit të policëve një “goditje shkatërruese” për komunitetet që përballen me krime dhe sjellje antisociale në rritje.

Shifrat përfshijnë tre muajt e fundit të qeverisë konservatore dhe nëntë muajt e parë të laburistëve në pushtet.

Chris Philp, ish-sekretar hije për çështjet e brendshme nga radhët e konservatorëve, akuzoi laburistët duke thënë se “ata kanë zhgënjyer policinë dhe publikun. Kanë rritur ndjeshëm taksat, kanë shpërdoruar paratë dhe tani po pakësojnë numrin e policëve. Publiku është më pak i sigurt për shkak të paaftësisë së tyre.”

Një zëdhënës i Ministrisë së Brendshme deklaroi se qeveria është e përkushtuar për të rikthyer policimin në lagje dhe se deri në mars 2026 do të ketë 3 000 oficerë dhe punonjës policie shtesë në komunitet, falë një investimi prej 200 milionë paundësh.

“Numri i oficerëve ka qenë i qëndrueshëm që nga korriku i kaluar, pavarësisht rënies mes marsit dhe qershorit 2024. Megjithatë, rritja premtuese në policimin në lagje tregon se po shohim më shumë oficerë në rrugët tona”, shtoi zëdhënësi.  /Ad.Ab./

The post FOKUS – Rekord shkarkimesh të oficerëve të policisë në BM appeared first on Agjencia Telegrafike Shqiptare.

LONDËR, 23 korrik /ATSH-DPA/ – Kryetari i bashkisë së Londrës, Sadiq Khan, ka shtuar presionin ndaj qeverisë britanike në lidhje me Izraelin, duke kërkuar nga ministrat që të “njohin menjëherë shtetin palestinez”.

Khan deklaroi se Britania e Madhe “duhet të bëjë shumë më tepër për të ushtruar presion ndaj qeverisë izraelite që të ndalë këtë vrasje të tmerrshme e të pakuptimtë”, ndërsa organizatat humanitare paralajmërojnë për uri masive në Rripin e Gazës.

Në një deklaratë të publikuar sot  në platformën X, Khan, që vjen nga Partia Laburiste, përmendi “fëmijë të uritur që kërkojnë ushqim mes rrënojave” dhe “anëtarë familjesh që vriten nga ushtarë izraelitë ndërsa kërkojnë ndihma ushqimore”.

“Komuniteti ndërkombëtar,  përfshirë qeverinë tonë, duhet të bëjë shumë më tepër për të ushtruar presion mbi qeverinë izraelite që të ndalojë këtë vrasje të pakuptimtë dhe të lejojë ndihmat jetike të hyjnë në Gaza”, shtoi ai.

“Britania duhet të njohë menjëherë shtetin palestinez. Nuk mund të ketë zgjidhje me dy shtete nëse nuk ka më një shtet të quajtur Palestinë”, tha Khan.

Kryepeshkopi i York-ut, Stephen Cottrell, figura më e lartë aktualisht në Kishën Anglikane, e quajti dhunën, urinë dhe çnjerëzimin ndaj popullsisë së Gazës nga qeveria izraelite si “të mbrapshtë dhe të pajustifikueshme”.

“Sanksionet, vonesat dhe fragmentimi nga ana e qeverisë izraelite nën një rrethim të plotë kanë krijuar kaos, uri dhe vdekje”, tha ai.

“Në emër të Zotit, ngre zërin kundër këtij sulmi barbar ndaj jetës dhe dinjitetit njerëzor. Është një njollë për ndërgjegjen e bashkësisë ndërkombëtare dhe një shkelje e rëndë e ligjit humanitar ndërkombëtar,” tha ai.

Ai përsëriti thirrjen për një armëpushim të menjëhershëm dhe të përhershëm, lirimin e të gjithë pengjeve, dhe refuzoi çdo politikë që mund të çonte në spastrimin etnik të popullsisë palestineze nga Gaza. /Ad.Ab./

The post BM – Kryebashkiaku i Londrës kërkon njohjen e menjëhershme të shtetit palestinez appeared first on Agjencia Telegrafike Shqiptare.

MOSKË, 23 korrik/ATSH-DPA/ – Negociatorët nga Moska dhe Kievi u takuan sot për bisedime në Turqi, në sfondin e luftës së Rusisë kundër Ukrainës.

Sipas agjencisë shtetërore ruse TASS, takimi në Pallatin Çıragan në Stamboll përfundoi pas më pak se një ore. Fillimisht nuk pati informacione për rezultate konkrete.

Pritshmëritë ishin të ulëta. Të dyja palët ndërluftuese kishin deklaruar më herët se një përparim drejt një zgjidhjeje paqësore ishte i pamundur, pasi qëndrimet e tyre ishin shumë të largëta.

Lufta e nisur nga Rusia ka zgjatur tashmë më shumë se tre vjet.

Presidenti ukrainas Volodymyr Zelensky e kishte njoftuar takimin më herët këtë javë, por i kishte zbutur pritshmëritë. Ai tha se prioritet i Kievit ishte zgjerimi i shkëmbimeve të të burgosurve dhe kthimi i fëmijëve të rrëmbyer nga Rusia nga territoret e pushtuara.

Moska dhe Kievi rifilluan bisedimet direkte në maj për herë të parë që nga viti 2022. /Ad.Ab./

The post TURQI -Përfundojnë bisedimet ruso-ukrainase në Stamboll appeared first on Agjencia Telegrafike Shqiptare.

BERLIN, 23 korrik /ATSH-DPA/ – Kancelari gjerman Friedrich Merz dhe presidenti francez Emmanuel Macron theksuan rëndësinë e partneritetit franko-gjerman në kohë sfidash politike globale.

“Ne mbështetemi në themelet e një miqësie të ngushtë franko-gjermane që është zhvilluar gjatë dekadave. Dhe të dy ndiejmë një detyrim të madh për të vazhduar punën në këtë drejtim në vitet që vijnë,” tha Merz në fillim të vizitës së punës së Macron në Berlin sot në mbrëmje.

Merz theksoi se marrëdhëniet franko-gjermane kanë rëndësi të veçantë edhe për të personalisht, duke përshëndetur mysafirin e tij në gjuhën frënge.

Ai shtoi se më shumë se gjysma e kabinetit të tij tashmë ka bërë vizita inauguruese në Francë që nga marrja e detyrës nga qeveria në fillim të majit.

Merz tha se ata do të diskutonin për politikën aktuale tregtare, përfshirë edhe mosmarrëveshjet mbi tarifat me Shtetet e Bashkuara, të Amerikës si dhe çështje të politikës së jashtme dhe të sigurisë.

Duke folur për çështjen e tarifave, Macron theksoi se ata kanë qenë në komunikim të vazhdueshëm gjatë ditëve të fundit për të koordinuar një përgjigje ndaj ofensivës së tarifave të presidentit amerikan Donald Trump.

“Italia dhe Komisioni Evropian janë përfshirë në këtë çëshjtje. Ata ndajnë dëshirën për të ofruar stabilitet dhe për të pasur tarifa sa më të ulëta”, tha Macron, duke shtuar se në të njëjtën kohë duan të respektohen si partnerë.

Macron vuri në dukje gjithashtu miqësinë personale mes tij dhe Merzit, si dhe mes dy vendeve.

“Marrëdhëniet franko-gjermane dhe vullneti i përbashkët për të avancuar agjendat dypalëshe dhe evropiane janë thelbësore” ,tha presidenti francez. “Vielen Dank, Friedrich,” përfundoi ai deklaratën e tij, që në gjermanisht do të thotë “Faleminderit shumë, Friedrich”.

Kjo ishte vizita e parë e  presidentit Macron në Gjermani që kur qeveria e Merzit mori detyrën më 6 maj. /Ad.Ab./

The post GJERMANI – Merz dhe Macron theksojnë partneritetin franko-gjerman në takimin mes tyre appeared first on Agjencia Telegrafike Shqiptare.

NOTINGHEM, 23 korrik /ATSH/ – Përveç higjienës, mjekësisë, arsimit, verës, rendit publik, ujitjes, rrugëve, sistemit të ujit të pijshëm dhe shëndetit publik, romakët prodhuan gjithashtu një numër të madh mbishkrimesh, shkruhet sot në gazetën “The Guardian”, duke ju refeuar një botimi në revisten “Nature”.

Të kuptuarit e këtyre teksteve të lashta është një sfidë për studiuesit, por një mjet i ri i inteligjencës artificiale nga “Google DeepMind” synon ta lehtësojë këtë proces.

I quajtur “Aeneas”, sipas heroit mitik trojan,  programi parashikon se ku dhe kur janë bërë mbishkrimet dhe jep sugjerime për fjalët që mungojnë.

Historianët që e testuan thanë se ky mjet u transformoi punën, duke i ndihmuar të identifikonin mbishkrime të ngjashme me ato që po studionin,  një hap kyç për vendosjen e tyre në kontekst ,  dhe duke sugjeruar fjalë për të plotësuar boshllëqet në artefaktet e dëmtuara nga koha.

“Aeneas ndihmon historianët të interpretojnë, atribuojnë dhe rikonstruktojnë tekstet e fragmentuara latine”, tha dr. Thea Sommerschield nga Universiteti i Nottingham. “Ky ishte qëllimi madhor që vendosëm të realizonim”.

Mbishkrimet janë ndër burimet më të rëndësishme për jetën në botën antike, që nga dekretet e perandorëve, grafitet politike, poezitë e dashurisë, regjistrat tregtarë dhe deri te epitafet në varre. Studiuesit vlerësojnë se çdo vit zbulohen rreth 1 500 mbishkrime të reja.

“Sipas tyre, janë vetë njerëzit e lashtë që flasin,nga të gjitha shtresat shoqërore”, tha Sommerschield. “Nuk është vetëm historia e shkruar nga fitimtarët”.

“Por problemi qëndron në faktin se këto tekste janë shpesh të copëzuara ose aq të dëmtuara nga koha sa që pjesë të tyre janë të palexueshme. Shumë objekte me mbishkrime janë shpërndarë ndër vite dhe origjina e tyre është e pasigurt”, shtoi ai

Ekipi i Google, i udhëhequr nga Yannis Assael, bashkëpunoi me historianë për të krijuar një mjet të Inteligjencës artificiale që ndihmon në kërkime. Programi u trajnua me një bazë të dhënash prej afro 200 000 mbishkrimesh të njohura, me gjithsej 16 milionë karaktere.

“Aeneas” merr tekstin, dhe në disa raste imazhet,  nga mbishkrimi që po studiohet dhe e krahason me mbishkrimet ekzistuese nga shekulli i 7 p.e.s. deri në shekullin e 8-të e.s. Inteligjenca Artificiale nuk kërkon vetëm fjalë të ngjashme, por lidh mbishkrime përmes lidhjeve historike më të thella.

Duke u bazuar në trajnimin me këtë koleksion të pasur, “Aeneas” mund të caktojë një tekst studimi në një nga 62 provincat romake dhe të parashikojë kohën kur është shkruar me një saktësi brenda 13 vitesh. Gjithashtu sugjeron fjalë për të plotësuar boshllëqet, megjithëse kjo veçori është testuar vetëm me tekste të njohura ku disa fjalë janë fshehur qëllimisht.

Në një test, “Aeneas” analizoi mbishkrimin madhështor Res Gestae Divi Augusti të gdhendur në monumente të ndryshme të Perandorisë Romake, që përshkruan arritjet e perandorit August. Inteligjenca artificiale sugjeroi dy periudha të mundshme për tekstin,  dekada e parë para erës sonë ose periudha 10-20 e.s, pikërisht si debatet mes historianëve.

Në një rast tjetër, “Aeneas” analizoi mbishkrimet mbi një altar votiv në Mogontiacum (Mainz, Gjermani) dhe zbuloi përmes ngjashmërive të hollësishme gjuhësore se ai ishte ndikuar nga një altar më i vjetër në të njëjtin rajon. “Ishin momente mahnitëse për ne,” tha Sommerschield.

Detajet janë botuar në revistën “Nature”, dhe “Aeneas” është tashmë i disponueshëm  online për studiuesit.

Në një bashkëpunim, 23 historianë përdorën “Aeneas” për të analizuar mbishkrime latine dhe në 90% të rasteve, konteksti i ofruar nga inteligenca artificiale u konsiderua i dobishëm.

“Ky mjet ka potencial të jetë transformues”, tha Mary Beard, profesore e klasikes në Universitetin e Kembrixhit.

Profesor Jonathan Prag nga Universiteti i Oksfordit shtoi se Aeneas mund të përdoret për të rianalizuar mbishkrimet ekzistuese për të përmirësuar interpretimin. “Më parë, kjo kërkonte një njohuri të jashtëzakonshme personale ose një bibliotekë gjigante,” tha ai. “Por sigurisht, duhet ta përdorësh atë në mënyrë kritike”. /Ad.Ab./

The post “NATURE” – Google nxjerr një mjet të IA-së që plotëson fjalët e munguara në mbishkrimet romake appeared first on Agjencia Telegrafike Shqiptare.

KIEV, 23 korrik /ATSH/ – Një dron “mashtrues” rus, i përbërë tërësisht nga pjesë kineze, zbulon bashkëpunimin në rritje mes Pekinit dhe Moskës, sipas gazetes “The Telegraph”.

Është zbuluar se një dron i ri “mashtrues” rus, i përdorur për të depërtuar në mbrojtjen ajrore të Ukrainës, është ndërtuar tërësisht nga pjesë kineze, një zhvillim i rëndësishëm që shënon  për herë të parë që Rusia përdor armë të prodhuara vetëm me komponentë nga Kina.

Ky zbulim u bë nga shërbimet sekrete ukrainase, të cilat arritën të kapin dhe çmontojnë dy dronë të tillë të rinj pa pilot (UAV).

Droni CBTS.611000 përdoret kryesisht për zbulim dhe si mjet mashtrues, por gjithashtu mund të mbajë një lëndë shpërthyese deri në 15 kg.

Gati gjysma e pjesëve të njërit prej dronëve ishin prodhuar nga kompania kineze “CUAV Technology”, me seli në provincën Guangdong, e cila reklamohet si ofrues i zgjidhjeve me burim të hapur për dronët. Komponentët përfshinin, kontrolluesin e fluturimit me autopilot, module navigimi dhe antena, sensorin e shpejtësisë së ajrit, si dhe një tub “pitot” (sensor për matjen e shpejtësisë së erës).

Pavarësisht se “CUAV Technology” në vitin 2022 kishte njoftuar ndalimin e eksporteve të produkteve të saj drejt Rusisë dhe Ukrainës për të parandaluar përdorimin ushtarak, këto pajisje po shfaqen sërish në armatimin rus.

Sipas inteligjencës ukrainase, përveç”CUAV Technology”,  në dron u gjetën një motor dhe një modul ndezjeje elektronike nga “Mile Haoxiang Technology”, një kamerë “FPV” nga “Foxeer Technology”, dhe një kopje kineze e modulit australian të transmetimit të të dhënave RFD900X nga RFDesign, i aftë të transmetojë të dhëna deri në 40 km largësi.

“Ky sistem krijon një kanal transmetimi të të dhënave nga UAV në stacionin tokësor apo mes UAV-ve, duke përmirësuar ndjeshëm aftësinë e tyre për zbulim”, njoftoi  burimi  shërbimeve secrete të Ukrainës.

Ajo ka vlerësuar më parë se 80% e elektronikës në dronët rusë është me origjinë nga Kina, një pretendim që është mbështetur edhe nga Departamenti i Shtetit i SHBA-së.

Ndërkohë , Kina ka mohuar vazhdimisht se furnizon me armë vdekjeprurëse ndonjë palë në konflikt dhe këmbëngul se kontrollon me rigorozitet eksportin e produkteve me përdorim të dyfishtë (civil dhe ushtarak).

Në një postim në “Telegram”, shërbimet secrete  ukrainase thanë se dronët kanë formë delta, të ngjashme me dronët Shahed-136 iranianë, të cilët Rusia i përdor me emrin Geran-2, por që janë më të vegjël në përmasa.

Më herët këtë muaj, pamje të një Geran-2 të dëmtuar zbuluan gjithashtu se pjesë të tij ishin prodhuar nga një kompani mekanike në provincën Suzhou në Kinë.

Ky rast nënvizon rritjen e ndihmës teknologjike dhe indirekte që Rusia mund të jetë duke marrë nga Kina, pavarësisht deklaratave publike për neutralitet. /Ad.Ab./

The post FOKUS – Dronë të prodhimit kinez janë përdorur nga ana e Rusisë në Ukrainë appeared first on Agjencia Telegrafike Shqiptare.

TOKIO, 23 korrik /ATSH/ – Bashkimi Evropian dhe Japonia do të bashkëpunojnë më ngushtë për të kundërshtuar shtrëngimin ekonomik dhe për të adresuar praktikat e padrejta tregtare, tha sot për gazetarët presidentja e Komisionit Evropian, Ursula von der Leyen, sipas Reuters.

Deklaratat e von der Leyen vijnë pas një samiti BE-Japoni me kryeministrin japonez Shigeru Ishiba, në një kohë kur BE-ja po has vështirësi në përfundimin e një marrëveshjeje tregtare me Shtetet e Bashkuara të Amerikës dhe vetëm një ditë para takimeve të mundshme sfiduese me udhëheqësit kinezë.

Ndërkohë, Japonia arriti  dje një marrëveshje tregtare me SHBA-në, e cila ul tarifat për importet e makinave në këmbim të investimeve dhe huave drejt SHBA-së.

Von der Leyen tha se BE-ja dhe Japonia do të synojnë forcimin e sigurisë ekonomike.

“Do të punojmë më ngushtë për të kundërshtuar shtrëngimin ekonomik dhe për të adresuar praktikat e padrejta tregtare”, tha ajo. “Ne besojmë në konkurrencën globale dhe ajo duhet të sjellë përfitime për të gjithë”, shtoi von de Leyen.

Nga ana e tij, Ishiba u tha gazetarëve se BE-ja dhe Japonia do të punojnë për të ruajtur dhe forcuar një rend ekonomik të lirë, të drejtë dhe të bazuar në rregulla.

Ai shtoi se BE-ja dhe Japonia kanë rënë dakord të punojnë për forcimin e industrisë së mbrojtjes dhe të nisin bisedimet për një marrëveshje sigurie informacioni.

“Në fushën e sigurisë, ramë dakord të bashkëpunojmë për të nisur një dialog mbi industrinë e mbrojtjes me qëllim forcimin e bazës industriale të mbrojtjes, që është një përparësi për të dyja palët, dhe për të filluar negociatat zyrtare për një marrëveshje sigurie informacioni midis Japonisë dhe BE-së”, tha Ishiba. /Ad.Ab/

The post TOKIO – Von der Leyen: BE-ja dhe Japonia do të bashkëpunojnë më ngushtë për politikat tregtare appeared first on Agjencia Telegrafike Shqiptare.

BERLIN, 23 korrik /ATSH -DPA/ – Kancelari gjerman Friedrich Merz do të presë sot në mbrëmje presidentin francez Emmanuel Macron për një takim pune dhe darkë në Berlin.

Kjo do të jetë vizita e parë e Macron-it në Gjermani që kur qeveria e Merz-it mori detyrën më 6 maj.

Vetëm një ditë pas zgjedhjes së tij, Merz udhëtoi në Paris për të sinjalizuar një “fillim të ri” në marrëdhëniet franko-gjermane, të cilat ishin ftohur ndjeshëm gjatë mandatit të ish-kancelarit Olaf Scholz.

Tani, të dy liderët synojnë të thellojnë bashkëpunimin “në të gjitha nivelet”.

Temat kryesore të diskutimit përfshijnë përpjekjet për të forcuar pavarësinë e Evropës nga Shtetet e Bashkuara të Amerikës dhe diskutimet për një mburojë bërthamore evropiane, një koncept që ish – kancelari Scholz, thuhet se e kishte kundërshtuar me skepticizëm të madh.

Megjithatë, mes dy vendeve ekzistojnë ende mospajtime të rëndësishme. Parisi po insiston për  një borxh të përbashkët evropian me qëllim forcuimin e industrinë së mbrojtjes, një propozim që Berlini e refuzon.

Franca gjithashtu mbështet përdorimin e energjisë bërthamore, ndërsa Gjermania e ka ndërprerë plotësisht atë.

Mospajtime ka edhe në zhvillimin e përbashkët të armëve. Në projektin FCAS, sistemi ajror i luftës i zhvilluar bashkë me Spanjën, të dy vendet ende kanë qëndrime të ndryshme mbi përfshirjen përkatëse në projekt.

Nga këndvështrimi francez, qëllimi i darkës së sotme është përgatitja për mbledhjen e Këshillit ministro-shtetëror franko-gjerman, që do të mbahet në Francë në fund të gushtit.

Në fokus do të jenë konkurrueshmëria evropiane, siguria dhe mbrojtja, si dhe reformat ekonomike dhe sociale.

Darka do të zhvillohet në Villa Borsig, një rezidencë buzë liqenit Tegel, që dikur i përkiste familjes industriale Borsig dhe që sot shërben si shtëpi pritjeje e Ministrisë së Jashtme gjermane. /Ad.Ab./

Bottom of Form

The post GJERMANI – Merz pret Macron-in për darkë në Berlin appeared first on Agjencia Telegrafike Shqiptare.

DAMASK, 22 korrik /ATSH-DPA/ – Një komision hetimor sirian konfirmoi sot se 1 426 persona, kryesisht civilë, përfshirë shumë anëtarë të komunitetit alavi,  janë vrarë gjatë një vale dhune në provincat bregdetare të vendit, mes datave 6 dhe 9 mars.

Sipas zëdhënësit të komisionit, Yasser al-Farhan, përplasjet filluan kur njësi të grupeve të armatosura të lidhura me diktatorin e rrëzuar Bashar al-Asad ndërmorën sulme të koordinuara kundër forcave qeveritare në Latakia, Tartus dhe Hama, duke vrarë 238 ushtarë dhe pjesëtarë të forcave të sigurisë.

Ndër viktimat ishin edhe 90 gra, shumica prej tyre civile të paarmatosura, tha komisioni në një konference  shtypi në Damask.

Sulmuesit u përshkruan si grupe të organizuara dhe të paligjshme, besnike ndaj regjimit të përmbysur të Asadit, që tani veprojnë në mënyrë të pavarur dhe kundërshtojnë autoritetet në këtë fazë tranzicioni .

“Këto grupe ndërmorën sulme në shkallë të gjerë kundër objektivave ushtarake dhe të sigurisë, bllokuan rrugë dhe përdorën armë të rënda ”, tha al-Farhan.

Qeveria e re ndërmori një operacion ushtarak për të shtypur dhunën.

Vëzhguesi sirian për të Drejtat e Njeriut, një organizatë me bazë në Britani, vlerësoi në atë kohë se mbi 1 600 persona, kryesisht nga pakica alavite, ishin vrarë gjaë trazirave.

Më shumë se gjashtë muaj pas rrëzimit të ish presidentit Asad nga një aleancë rebele e udhëhequr nga elemente islamikë, dhuna vazhdon të tronditë edhe jugun e Sirisë, ku forcat  druze të milicisë po përplasen me grupe fisnore sunite beduine të mbështetura nga Damasku.

Megjithëse Presidenti Ahmad al-Sharaa është zotuar të mbrojë pakicat, kritikët e akuzojnë qeverinë e tij për arrestime simbolike dhe mungesë përgjegjësie. /Ad.Ab./

Bottom of Form

The post SIRI – Më shumë se 1 400 të vrarë gjatë dhunës së marsit në vend appeared first on Agjencia Telegrafike Shqiptare.

UASHINGTON, 22 korrik /ATSH – DPA/ – Shtetet e Bashkuara duan të diskutojnë një zgjatje të afatit për mosmarrëveshjen tarifore me Kinën, deklaroi sot sekretari amerikan i Thesarit, Scott Bessent.

“Do të jem në Stokholm të hënën dhe të martën me homologët e mi kinezë dhe do të punojmë për atë që ka shumë gjasa të jetë një zgjatje. Mendoj se tregtia është në një pozicion shumë të mirë me Kinën”, tha Bessent në një intervistë për transmetuesin amerikan “Fox Business”.

Afati aktual pritet të skadojë më 12 gusht, pasi tarifat ishin reduktuar për 90 ditë për të lejuar zhvillimin e negociatave mes dy vendeve.

Presidenti amerikan Donald Trump ka rritur në disa hapa tarifat ndëshkuese ndaj importeve kineze në SHBA deri në 145%. Pekini, nga ana tjetër, u kundërpërgjigj me tarifa të veta prej 125% dhe vendosi kontrolle eksporti për mineralet e rralla me rëndësi industriale dhe magnetët e prodhuar prej tyre.

Njëkohësisht, Bessent rikonfirmoi afatin e mëparshëm të 1 gushtit për konfliktin tarifor me vendet e tjera, duke deklaruar se SHBA-ja planifikon të vendosë tarifa me nivele të ndryshme për importet nga këto vende. “Ky afat është mjaft i prerë”, tha Bessent.

I pyetur nëse kjo vlen edhe për BE-në, ai konfirmoi se afati zbatohet për të gjitha vendet.

Komisioni Evropian ka qenë duke negociuar me Uashingtonin për çështjen e tarifave prej disa kohësh. Trump kishte paralajmëruar tarifa prej 30% për importet e produkteve nga BE duke filluar nga 1 gushti.

Në rast se SHBA zbaton nivelin e ri të tarifave, BE-ja planifikon të kundërpërgjigjet me tarifa të tjera. /Ad.Ab./

The post SHBA – Uashingtoni kërkon zgjatje të negociatave tregtare me Kinën appeared first on Agjencia Telegrafike Shqiptare.

BERLIN, 22 korrik /ATSH-DPA/ – Gjermania dhe Republika Çeke ranë dakord që kontrollet në kufirin e përbashkët duhet të jenë vetëm të përkohshme, deklaruan kancelari Friedrich Merz dhe kryeministri Petr Fiala pas një takimi sot në Berlin.

“Ne duam një zgjidhje evropiane”, siguroi Merz. “Por përderisa nuk jemi në gjendje të mbrojmë më mirë kufijtë e jashtëm të Bashkimit Evropian, duhet të kryejmë kontrolle në kufijtë e brendshëm evropianë”.

Gjermania dhe Çekia ndajnë një kufi prej më shumë se 800 kilometrash. Ministri i Brendshëm gjerman, Alexander Dobrindt, urdhëroi intensifikimin e kontrolleve në këtë kufi vetëm pak orë pasi mori detyrën në fillim të majit.

Për shkak të migracionit të parregullt, Fiala shprehu mirëkuptim për qasjen gjermane. Megjithatë, ai theksoi se në vend të kontrolleve kufitare, duhet të ketë një zgjidhje afatgjatë për kufirin e jashtëm të BE-së.

“Një zgjidhje afatgjatë duhet të jetë një zgjidhje evropiane, në mënyrë që të mund të vazhdojmë të kalojmë lirshëm kufijtë e brendshëm të BE-së”. /Ad.Ab./

The post Gjermani – Merz dhe Fiala kërkojnë një zgjidhje evropiane për sigurinë kufitare appeared first on Agjencia Telegrafike Shqiptare.

LEJPSIG, 22 korrik /ATSH-DPA/ – Dyzetë e tre persona u deportuan sot nga Gjermania drejt Bagdadit, konfirmoi Ministria e Brendshme, duke shënuar fluturimin e parë të tillë që nga muaji shkurt.

Ministri i Brendshëm, Alexander Dobrindt, i cili është shfaqur në mbështetje të një qasjeje më të ashpër ndaj migracionit, deklaroi për gazetën “Bild” se ky fluturim është pjesë e politikave të tij të reja, ndërsa vazhdon të kërkojë më shumë riatdhesime, marrëveshje me vende të tjera dhe një luftë më të fortë kundër trafikantëve të njerëzve.

Sipas autoriteteve në landin e Thuringisë, 43 personat  që ndodheshin në bord kishin detyrim ligjor për të lënë vendin. Të gjithë ishin të pamartuar dhe disa prej tyre kishin dënime penale.

Një fotograf i agjencisë DPA përshkroi përgatitjet e policisë për nisjen e fluturimit, ku pasagjerët u transportuan me automjete policie dhe dy autobusë të mëdhenj të aeroportit. Secili pasagjer u shoqërua veçmas nga një oficer policie deri në avion.

Pas uljes në kryeqytetin irakian, pasagjerët kaluan disa procedura të emigracionit, sipas burimeve nga aeroporti.

Transferimi u zhvillua nën masa të rrepta sigurie në Irak, megjithatë mbeti e paqartë se ku do të dërgoheshin peesonat pas hyrjes në vend.

Sipas Ministrisë së Brendshme gjermane, vitin e kaluar janë deportuar 816 irakianë. Disa janë dërguar në vende të tjera të BE-së për përpunimin e kërkesave për azil, ndërsa 615 janë dërguar direkt në Irak.

Sipas OKB-së, 1,2 milionë irakianë janë të zhvendosur brenda vendit dhe rreth 3 milionë varen nga ndihma humanitare. Shumë prej të kthyerve kanë vështirësi të përmbushin nevojat bazë për jetesë.

Në një sondazh të kryer nga Organizata Ndërkombëtare për Migracionin (IOM) në vitin 2023, pothuajse gjysma e migrantëve të kthyer në Irak thanë se dëshironin të largoheshin përsëri nga vendi brenda gjashtë muajve. /Ad.Ab./

The post GJERMANI – Dyzet e tre irakianë deportohen drejt Bagdadit appeared first on Agjencia Telegrafike Shqiptare.