Pas një takimi të kabinetit të sigurisë në Jerusalem që zgjati disa orë, zyra e kryeministrit izraelit, Benjamin Netanyahu, njoftoi në orët e para të mëngjesit të së premtes miratimin e një plani për marrjen nën kontroll të Gazës.

Sipas deklaratës zyrtare, plani u miratua me shumicë votash nga kabineti dhe përfshin gjithashtu pesë kushte që synojnë përfundimin e luftës.

“Forcat e Mbrojtjes së Izraelit (IDF) do të përgatiten për të marrë kontrollin e Gazës, duke siguruar njëkohësisht ndihmë humanitare për popullsinë civile jashtë zonave të luftimeve”, thuhet në deklaratë.

Pesë parimet e shpallura për përfundimin e konfliktit janë:

1.Çarmatimi i Hamasit

2.Kthimi i të gjithë pengjeve, të gjallë dhe të vdekur

3.Demilitarizimi i Rripit të Gazës

4.Kontrolli i sigurisë nga Izraeli mbi Rripin e Gazës

5.Krijimi i një qeverie civile alternative që nuk përfshin as Hamasin dhe as Autoritetin Palestinez

Në përfundim të deklaratës, thuhet se “një shumicë absolute e ministrave të kabinetit vlerësoi se plani alternativ i paraqitur nuk do të siguronte as mposhtjen e Hamasit dhe as kthimin e pengjeve të rrëmbyer”.

Ky vendim vjen në një kohë kur tensionet në Gaza janë në kulm dhe bashkësia ndërkombëtare vijon të paralajmërojë për një katastrofë të thellë humanitare.

The post Plani për pushtimin e Gazës, 5 kushtet që janë vendosur për t’i dhënë fund luftës first appeared on JavaNews.al.

Ish-zv/kryeministrja Edita Tahiri në një intervistë për Klan News hodhi dritë mbi një episod të paditur më parë, ku asaj iu ofrua posti i presidentes nga përfaqësues amerikanë. Sipas saj, gjëja dështoi për shkak të një ndërhyrjeje nga ana e ish-kryeministrit Ramush Haradinaj, që kërkoi ndihmë për të dalë nga gjykata në këmbim të votës për të.

Sipas Tahirit, kjo u refuzua menjëherë nga SHBA-të, që respektojnë ndarjen e pushteteve dhe nuk ndërhyjnë në drejtësi.

Këtë episod Tahiri e zbuloi pasi u pyet nëse kishte shpresë që Amerika do të ndërhynte në procesin e drejtësisë në favor të ish-liderëve të UÇK-së.

“Jo. Asnjëra prej tyre nuk qëndron. Amerika është lider në botë i demokracisë, që i ka të ndara pushtetet. Drejtësinë, pushtetin ekzekutiv dhe Kongresin. Është i njohur parimi amerikan i qeverisjes Check and Balance. Kur është çështje e drejtësisë nuk ndërhyjnë.

Kam me ta dhanë një shembull nëse kemi kohë. Ishte një kohë në vitin 2010, isha ministre. Ka qenë ambasadori amerikan Christopher Dell bashkë me Peter Fay, në atë kohë ka qenë përfaqësuesi special, dhe më thanë që nëse jam e gatshme të pranoj postin e presidentes. Biseduam dhe unë i dhashë përgjigjen dhe iu thashë jam e gatshme. Pastaj më erdhi ambasadori amerikan, hera e parë po e them. Më tha Edita nuk kemi mundësi me e shty përpara sepse një prej politikanëve, nuk është këtu por është në gjykatë jashtë, edhe ka kërkuar nga amerikanët, ju më ndihmoni të dal nga Gjykata dhe unë votoj Edita Tahirin. Edhe më tha ambasadori: A e di Edita se çfarë është për Amerikën që të prekim ligjin apo të ndërhyjmë në gjykatë? Ne për interestat tona është vijë e kuqe. Çfarë flet Grenell rrugëve janë deklarata. Haradinaj ka qenë. E qëllove por nuk po dua të them më shumë.”, tha Tahiri për gazetarin Besard Jacaj.

The post Rrëfehet Edita Tahiri: Amerikanët më ofruan postin e presidentes, Haradinaj më pengoi first appeared on JavaNews.al.

Me entuziazmin e tij të zakonshëm, kreu i Fondit Rus për Investime të Drejtpërdrejta dhe njëkohësisht përfaqësues i posaçëm i presidentit rus për bashkëpunimin ekonomik me vendet e huaja, Kirill Dmitriev, parashikoi se samiti i paralajmëruar mes Vladimir Putin dhe Donald Trump “mund të hyjë në histori”.

Kjo, nëse do të mbahet dhe në çfarë forme. Ka nga ata që frikësohen se mund të bëhet fjalë për një tjetër manovër për të vënë Ukrainën me shpatulla pas murit dhe të tjerë që parashikojnë përsëritjen e dështimit të samitit të Hanoit në vitin 2019 mes Trump dhe Kim Jong-un, që pritej të ishte një “takim shkrirjeje”, por përfundoi para kohe dhe pa asnjë deklaratë të përbashkët.

Vetëm njoftimi për një samit të afërt SHBA-Rusi, i pari që nga viti 2021, ka mjaftuar për t’u ofruar një dalje të përkohshme nga bllokada të dy liderëve, në prag të ultimatumit amerikan ndaj Rusisë për të ndalur luftën në Ukrainë, përndryshe do të përballet me sanksione të reja. Hipoteza e samitit i ka dhënë Trump mundësinë të flasë për “përparime”, pa qenë i detyruar të zbatojë kërcënimet me tarifa të reja që nuk do të kishin shumë efekt, dhe Putinit një mënyrë për të mos ndërprerë lidhjet me Uashingtonin, pa iu nënshtruar ultimatumit të tij. Është edhe një herë një “lepur i nxjerrë nga cilindri” nga lideri i Kremlinit, ashtu si armëpushimet e pjesshme apo rifillimi i bisedimeve të drejtpërdrejta me Ukrainën muajt e fundit, që i kanë lejuar atij të ruajë një lloj dialogu me administratën e re amerikane, pa ndalur ofensivën ushtarake.

Putin gjithashtu ka arritur të refuzojë idenë e një takimi trepalësh me presidentin ukrainas, Volodymyr Zelensky, të cilin nuk e konsideron një bashkëbisedues legjitim dhe që, në çdo rast, do ta takonte vetëm për të nënshkruar një marrëveshje përfundimtare. Më së shumti, ai ka arritur të përjashtojë edhe Europën nga procesi. Kremlini po përqendron gjithçka te përballja me Trump, duke shpresuar të përfitojë nga admirim i fshehtë i liderit amerikan për imazhin e tij si “njeri i fortë” dhe nga dëshira e tij për të shënuar një tjetër “sukses paqësor” që do ta detyronte të pranonte një marrëveshje sipas kushteve të Rusisë, me fjalë të tjera, dorëzimin e Ukrainës.

Qëllimi i Putinit është të bindë Trump se e vetmja rrugë drejt paqes është memorandumi rus i paraqitur në Stamboll në qershorin e kaluar, dhe ta shtyjë atë të ushtrojë presion mbi Zelensky-n që ta pranojë. Sipas Sam Greene, drejtor i Russia Institute në King’s College në Londër, këtu duhet të hyjë në lojë diplomacia europiane.

“Pranimi i faktit që nuk je në tryezë nuk do të thotë domosdoshmërisht që po heq dorë nga përgjegjësitë. Në fund të fundit, është në lojë siguria europiane. Mungesa e masave parandaluese siguron pothuajse me siguri që Ukraina do të mbetet një zonë lufte”, ka shkruar ai në platformën X.

Ndërsa për Tatiana Stanovaya, themeluese e think tank-ut R.Politik dhe analiste e Carnegie Russia Eurasia Center, nuk duket asnjë shenjë ndryshimi në horizont. Edhe nëse takimi do të ndodhte dhe edhe nëse do të përsëritej suksesi i samitit të Helsinkit në vitin 2018, ku Trump mbështeti hapur Putinin përballë FBI-së dhe madje edhe nëse Putin do të pranonte të takonte Zelensky-n, gjë që e ka refuzuar shumë herë, “skenari më i mundshëm është që përpjekja për paqe do të dështojë sërish”, sepse “pala ruse mund ta paraqesë në dhjetë mënyra të ndryshme veten si të gatshme për koncesione dhe negociata serioze, por në realitet qëndrimi i saj bazë mbetet i pandryshuar: Ajo dëshiron që Kievi të dorëzohet”.

Sipas Stanovaya-s, Moska do të vazhdojë fushatën ushtarake me shpresën se pas disa muajsh do të mund të rifillojnë negociatat, këtë herë me një Ukrainë më të dobësuar. Këtë e kanë bërë të qartë edhe disa anëtarë të Komisionit për Mbrojtjen në Dumen ruse.

“Detyra e ushtrisë është të vazhdojë operacionet dhe të avancojë, në asnjë mënyrë nuk duhet të ndalet vrulli ofensiv”, ka deklaruar deputeti Andrej Kolesnik.

Në çdo rast, vetë njoftimi për një samit është një lajm i mirë për Rusinë, siç dëshmon rritja prej 4.6% e bursës së Moskës. Për Putinin, fakti që do të takohet me presidentin amerikan pas më shumë se tre vitesh izolim, do të ishte një fitore e madhe diplomatike. Nëse do të arrinte edhe të vononte sanksionet apo të zbuste qëndrimin e Kievit, do të ishte një fitore e dyfishtë. Më pak e mundshme mbetet që kjo të çojë drejt paqes. “Konflikti,– parashikon Stanovaya,– duke alternuar mes lufte të hapur dhe tensioni latent, duket se do të vazhdojë edhe në të ardhmen e afërt”.

Shkrim nga La Repubblica

The post Analizë/ Takimi Putin-Trump, blofi i ri i Kremlinit për të vazhduar avancimin në luftë? first appeared on JavaNews.al.

Një grua 41-vjeçare është arrestuar nga karabinierët në Napoli për trafik droge, pasi e kishte kthyer apartamentin ku jetonte me katër fëmijët, nusen 19-vjeçare dhe nipin 2-vjeçar, në një qendër shitjeje kokaine. Mediat italiane raportojnë se 41-vjeçarja, bashkëshorti i së cilës është në burg e drejtonte biznesin e saj nga apartamenti ku jetonte.

Gjatë kontrollit u sekuestruan 26 doza kokaine të fortë, 510 euro dhe një peshore. Banesa ishte e blinduar me shufra të salduara dhe e mbikëqyrur nga kamera sigurie.

Policia ndërhyri pasi një oficer u shtir si klient. Karabinierët, pasi vëzhguan hyrjet dhe daljet e klientëve, duhej të prisnin momentin e duhur për të ndërhyrë. Kur panë djalin 16-vjeçar të gruas në një skuter duke u kthyer në shtëpi me kroasanë për mëngjes, njëri nga oficerët u paraqit si klient. Kur gjyshja që punonte në shtëpi hapi derën për të lejuar të birin të hynte, filloi ndërhyrja.

Autoritetet kanë njoftuar shërbimet sociale për praninë e të miturve në mjedisin e trafikut.

The post Trafik droge në shtëpi, arrestohet gjyshja 41-vjeçare në Napoli. Polici u shtir si klient first appeared on JavaNews.al.

Shtetet e Bashkuara kanë rritur në 50 milionë dollarë shpërblimin për informacione që çojnë në arrestimin e presidentit të Venezuelës, Nicolas Maduro, duke dyfishuar kështu shumën e vendosur më parë në 25 milionë dollarë nga administrata Trump në janar.

Prokurorja e Përgjithshme e SHBA-së, Pam Bondi, në një video të postuar në rrjetet sociale të enjten, e përshkroi Maduron si një nga trafikantët më të mëdhenj të drogës në botë, duke bashkëpunuar me kartelet si Tren de Aragua, Cartel of the Suns dhe karteli famëkeq i Sinaloas në Meksikë. Ajo tha se Maduro përbën një kërcënim serioz për sigurinë kombëtare të SHBA-ve dhe për këtë arsye u dyfishua shpërblimi.

Sipas Bondit, Departamenti i Drejtësisë ka sekuestruar deri tani mbi 700 milionë dollarë pasuri të lidhura me Maduron, përfshirë dy aeroplanë privatë dhe nëntë automjete. Po ashtu, tonelata kokainë e sekuestruar është lidhur drejtpërdrejt me presidentin venezuelan.

Ministri i Jashtëm i Venezuelës, Yvan Gil, reagoi ndaj shpalljes së SHBA-ve duke e quajtur atë “maskaradën më qesharake” dhe një përpjekje për të shpërqendruar opinionin publik nga skandali Jeffrey Epstein në SHBA.

Maduro u akuzua në një gjykatë federale amerikane në vitin 2020 për çështje të lidhura me drogën dhe u ofrua një shpërblim prej 15 milionë dollarësh për arrestimin e tij, që më pas u rrit në 25 milionë nga administrata Biden. Kjo shumë është po aq sa shpërblimi që u dha për arrestimin e Osama bin Laden pas sulmeve të 11 shtatorit 2001.

Në qershor, një ish-drejtor i inteligjencës ushtarake venezuelane pranoi fajësinë në SHBA për trafik droge dhe narko-terrorizëm, duke konfirmuar akuzat për përfshirjen e zyrtarëve të lartë venezuelanë në një kartel droge që përpiqej të furnizonte SHBA-të me kokainë.

Pavarësisht këtyre akuzave dhe shpërblimeve, Maduro vazhdon të mbajë pushtetin pas rizgjedhjes së tij në vitin 2024, në një proces zgjedhor që u kritikua ashpër nga SHBA-të, Bashkimi Evropian dhe disa vende të Amerikës Latine.

Së fundmi, administrata Trump arriti një marrëveshje për lirimin e 10 amerikanëve të burgosur në Karakas, ndërkohë që SHBA-të lehtësuan sanksionet për kompaninë e naftës Chevron për të rifilluar punën në Venezuelë.

The post Një nga trafikantët më të mëdhenj të drogës? SHBA jep 50 mln dollarë për arrestimin e Maduros first appeared on JavaNews.al.

Policia e Kavajës ka vënë në pranga një 47-vjeçar, banues në Kavajë, i cili dyshohet se shkaktoi zjarrin që përfshiu një sipërfaqe të madhe me pemë frutore në fshatin Kryeluzaj.

Sipas njoftimit zyrtar, i arrestuari, me iniciale G. B., kishte ndezur zjarr për të djegur mbeturina në tokën e tij, por flakët dolën jashtë kontrollit dhe u përhapën në zonën përreth, duke shkaktuar dëme të konsiderueshme.

Policia ndërhyri menjëherë pas marrjes së informacionit dhe arriti ta identifikojë dhe ta arrestojë autorin e dyshuar brenda një kohe të shkurtër. Ndaj tij janë referuar materialet në Prokurorinë e Durrësit.

Policia u bën thirrje qytetarëve të shmangin ndezjen e zjarreve në mjedise të hapura, si dhe të mos hedhin cigare të ndezura në afërsi të pyjeve apo tokave të mbjella, për të parandaluar ngjarje të ngjashme.

The post Zjarri dogji pemët në Kavajë, arrestohet autori i dyshuar first appeared on JavaNews.al.

Një numër organizatash shqiptaro-amerikane i kanë kërkuar presidentit të SHBA-së, Donald Trump, që të mbështetë njohjen reciproke midis Kosovës dhe Serbisë.

Letra e firmosur nga organizata Shqiptarët për Amerikën (AFA) së bashku me Vatrën, AARC, Jehona e Malësisë, Shoqata Kosova Michigan, Shoqata Malësia e Madhe, Shoqata Dukagjini dhe Shoqata Kastrati, vlerësoi përpjekjet fillestare të presidentit amerikan për t’i ulur palët në tryezë në vitin 2020.

“Për popujt e Kosovës dhe Shqipërisë ju jeni paqebërësi i shekullit,” nis letra e organizatave shqiptare në Amerikë.

Megjithatë ato theksuan se Serbia ka neglizhuar zbatimin e disa prej pikave kritike të Marrëveshjes së Uashingtonit dhe “vazhdon të forcojë aleancat me kundërshtarët e Amerikës, si Rusia, Kina dhe Irani, duke cenuar kështu përpjekjet për bashkëpunim rajonal të ngushtë dhe duke kërcënuar interesat amerikane”.

“Sot ju jeni në pozicionin unik për të siguruar që procesi i normalizimit midis Kosovës dhe Serbisë të mbërrijë konkluzionin e duhur: njohjen reciproke brenda kufijve ekzistues.

Me respekt ju kërkojmë të:

1. Riafirmoni publikisht mbështetjen e SHBA-së për njohjen reciproke Kosovë–Serbi si themeli i paqes afatgjatë;

2. Inkurajoni të dyja vendet që të finalizojnë njohjen dhe të zotohen për bashkëpunim bazuar në parimin e normalizimit të marrëdhënieve midis dy vendeve;

3. Mbështetni mekanizmat rigorozë të zbatimit në mënyrë të plotë dhe brenda afateve,” thuhet në letër.

Për nismëtarët e kësaj kërkese, njohja reciproke midis Kosovës dhe Serbisë nuk do të ishte vetëm një formalitet diplomatik, por rruga më efektive për t’i dhënë fund statukuosë aktuale, që i mban vazhdimisht të destabilizuar dy fqinjët e Shqipërisë.

“Pavarësia e Kosovës është një fitore e pastër amerikane. Populli i Kosovës duroi dekada nën shtypjen sistematike, që kulmuan me gjenocidin, krimet e luftës dhe krimet kundër njerëzimit të kryera nga regjimi i [Sllobodan] Millosheviqit… Shteti i Kosovës është produkt i drejtësisë historike dhe i nevojë humanitare,” nënvizojnë organizatat shqiptaro-amerikane në letrën drejtuar presidentit Trump.

The post Organizatat shqiptaro-amerikane i shkruajnë Trumpit: Inkurajoni njohjen reciproke Kosovë–Serbi first appeared on JavaNews.al.

Në zemër të shkretëtirës së Karakumit në Turkmenistan, flakë të dobëta përshkojnë muret e një krateri gjigant prej 70 metrash diametër dhe 20 metra thellësi, i njohur si “Porta e Ferrit”. Pas më shumë se 50 vitesh zjarr të pandërprerë, autoritetet turkmene kanë premtuar se ky zjarr, që lëshon metan, një gaz që përshpejton ngrohjen globale, do të shuhet së shpejti.

Krateri i Darvazës, siç njihet zyrtarisht, është bërë simbol i një katastrofe mjedisore. Edhe pse kontributi i tij në ndotjen globale është minimal, ai mbetet një burim i vazhdueshëm i çlirimit të metanit. Sipas Agjencisë Ndërkombëtare të Energjisë, Turkmenistani mban rekordin botëror për numrin më të madh të çlirimeve të mëdha të metanit në vitin 2024, të zbuluara përmes të dhënave satelitore.

Në vitin 2022, ish-presidenti Gurbanguly Berdymukhamedov urdhëroi zyrtarisht shuarjen e kraterit, duke deklaruar se “sasia e madhe e gazit ndikon negativisht në mjedis dhe në shëndetin e popullsisë”. Për një vend si Turkmenistani, i mbështetur ekonomikisht te rezervat e tij të mëdha të gazit natyror, ky vendim është gjithashtu një çështje financiare. “Po humbasim lëndë të parë të çmuar që mund të eksportohen dhe të sjellin përfitime për popullin tonë”, pati thënë ai.

Përpjekjet për të shuar kraterin përballen me vështirësi teknike të mëdha për shkak të strukturës komplekse të nëntokës. Një specialist i kompanisë shtetërore Turkmengaz, që foli në kushte anonimiteti, shpjegon se formacionet gjeologjike përbëhen nga shtresa të shumta gazi të ndërthurura me shtresa uji, gjë që i jep flakëve jetëgjatësi të pazakontë.

“Nuk kemi të bëjmë me një qese të vetme gazi që shteron, por me një proces të ndërthurur që ushqehet vazhdimisht nga shtresa të ndryshme”, tha ai.

Sipas Turkmengaz, intensiteti i djegies në Darvaza është ulur më shumë se trefish dhe kontrolli i fluksit të gazit është përmirësuar ndjeshëm. Megjithatë, objektet e kompanisë janë të mbyllura për vizitorët dhe të dhënat zyrtare janë të pakta e të paverifikueshme.

Zjarri në Darvaza nisi në vitin 1971, kur një grup gjeologësh sovjetikë shpuan aksidentalisht një xhep gazi, duke shkaktuar shembjen e platformës dhe çlirimin e gazit toksik. Për të shmangur një katastrofë shëndetësore, ata i vunë flakën, me shpresën se do të shuhej për pak ditë. Por pas më shumë se pesë dekadash, flakët vazhdojnë ende të digjen.

“Ky incident të paktën na ndihmoi të kuptojmë më mirë rezervat e gazit në këtë zonë”, shprehet shkencëtari 90-vjeçar turkmen, Anatoly Bushmakin.

Pavarësisht simbolikës së zymtë mjedisore, Darvaza është bërë një nga atraksionet e rralla turistike në këtë vend të mbyllur. Por flakët e zbehura zhgënjejnë shumë vizitorë që bëjnë udhëtime të gjata për të parë “mrekullinë”.

“Jemi disi të zhgënjyer”, thotë një turiste nga Ashgabati, që kishte udhëtuar pesë orë përmes rrugëve të shkatërruara të shkretëtirës.

Agjencitë vendase të udhëtimeve janë të shqetësuara.

“Shumica e turistëve që marrin vizë për të hyrë në Turkmenistan vijnë vetëm për të parë Darvazën. Nëse zjarri do të shuhet plotësisht, shumë agjenci do të humbasin të ardhura”, thotë Ovez Muradov, një punonjës i një agjencie turistike lokale.

Me gjithë përpjekjet për ta shuar, Darvaza mbetet ende një vend i ndezur, si simbol i një trashëgimie sovjetike, një burim ndotjeje, por edhe një atraksion që mban gjallë shpresat për një industri turistike në një nga vendet më të izoluara të botës.

The post “Porta e Ferrit” do të shuhet: Nga katastrofë mjedisore në atraksion (Historia e saj) first appeared on JavaNews.al.

E bekuar me një klimë mesdhetare dhe temperatura të ngrohta që arrijnë deri në 30 gradë Celsius, Shqipëria është një parajsë për adhuruesit e diellit, shkruan Milo Boyd në një artikull të botuar në të përditshmen britanike “Mirror”.

Kompania ajrore “Wizz Air” ka lançuar një itinerar të ri, duke lidhur Britaninë e Madhe me destinacionin e ri evropian të lirë dhe me diell.

Shqipëria është quajtur “Maldivet e Evropës” falë brigjeve të saj të pacënuara me rërë të bardhë dhe ujërave të kristalta që zbukurojnë Rivierën e saj spektakolare.

Me një numër në rritje të pushuesve që zbulojnë rajonin – kjo perlë ende ofron vlera të jashtëzakonshme krahasuar me vendet e tjera evropiane.

Vizitorët mund të kënaqen me akomodime luksoze pa shtrënguar buxhetin e tyre, me apartamente buzë detit të disponueshme për vetëm 20 paund në natë.

Ushqimi është i shijshëm dhe një vakt i bollshëm me pije, zakonisht kushton rreth 15 paund.

Falë një mori videosh në TikTok që shfaqin ujërat e saj të kristalta dhe rërën e bardhë të pastër, Shqipëria është bërë një pikë e nxehtë për pushuesit që kërkojnë një përvojë të ngjashme me ato në Maldive.

E bekuar me një klimë mesdhetare dhe temperatura verore që arrijnë deri në 30 gradë Celsius, Shqipëria është një parajsë për adhuruesit e diellit.

Linja e re e “Wizz Air” lidh Aeroportin Gatwick të Londrës me Tiranën, kryeqytetin e Shqipërisë. Biletat më të lira kushtojnë vetëm 19,99 paund.

Nëse nuk jeni afër Aeroportin Gatwick të Londrës, atëherë “Ryanair” ofron gjithashtu fluturime për në Tiranë nga Birmingham, Bristol, Mançester, Edinburgu dhe Aeroporti Stansted i Londrës.

Shqipëria krenohet me koston e ulët të jetesës në Evropë, me dhoma hoteli në qendër të Tiranës që kushtojnë më pak se 30 paund, përfshirë mëngjesin.

Apartamentet buzë detit përgjatë bregdetit Adriatik janë edhe më të përballueshme.

Një tjetër rrugë e përballueshme për në bregdetin e shkëlqyer të Shqipërisë është të fluturosh për në Korfuz dhe pastaj të hipësh në një traget për afërsisht 15 paund në çdo drejtim.

Ju mund të ngrini një kamping në Dhërmi, dhe të eksploroni një plazh të ri çdo ditë. Një drekë e këndshme buzë detit në zonë do të kushtojë vetëm rreth 10 paund për person.

Ekspertja e udhëtimeve, Laura Hewson, e cila eksploroi Shqipërinë vjeshtën e kaluar, ndau përvojën e saj.

“Në atë kohë, se bashku me shoqen time, Farrell Modd po planifikonim të shkonim në Kroaci. Por, një nga miqtë tanë që kishte qenë në Shqipëri tha se duhej të shkonim me patjetër. Ai tha se ishte si Greqia dhe Kroacia, por më e lirë dhe shumë më e bukur pasi nuk kishte dyndje turistësh”, tha Laura Hewson.

Ajo shtoi se në Shqipëri, mund të përballonin një hotel me katër yje – me mëngjesin e përfshirë – me të njëjtin çmim që kishin paguar për qëndrimet në hostele në Itali dhe Spanjë.

Farrell Modd, zbuloi se rrjetet sociale kishin luajtur një rol në zgjedhjen e Shqipërisë si destinacionin e tyre – duke shtuar se ajo ishte mahnitur nga videot ku shfaqeshin peizazhe magjepsëse nga vendi.

Farrell ishte e entuziazmuar kur zbuloi se vendi i vogël mesdhetar ofronte ujëra të pastra kristal dhe vendpushime të shumta për not – të gjitha me çmime miqësore me buxhetin për turistët./ata

The post “Mirror”: Shqipëria, destinacioni i bekuar me klimë mesdhetare dhe peizazhe magjepsëse first appeared on JavaNews.al.

Presidenti i Shteteve të Bashkuara të Amerikës, Donald Trump, ka kërkuar dorëheqjen e menjëhershme të kreut të prodhuesit amerikan të çipave, Intel.

Sipas Trump, CEO Lip-Bu Tan, ka raporte problematike me Kinën, madje ka cilësuar se ai është në konflikt me këtë shtet, raporton BBC. Këto raporte problematike, Trump u referohet investimeve të dyshimta të Tan nëpër kompani që sipas Shteteve të Bashkuara, janë të lidhura me ushtrinë kineze.

Është e pazakontë që një president të kërkojë dorëheqjen e një drejtuesi ekzekutiv të një korporate.

Tan është shprehur më herët se Intel do të zvogëlojë investimet e saj në prodhim, përfshirë në SHBA-të, për t’iu përshtatur kërkesës së klientelës. Kompania ka shkurtuar mijëra vende pune përgjatë këtij viti, në përpjekje për t’a lartësuar atë. Por, aksionet e Intel ranë në më shumë se 3% pas sulmit të Trump, ky i fundit i cili ka qenë kritik ndaj kompanisë që më herët.

Pavarësisht shqetësimeve të Trump, nuk është e paligjshme që amerikanët të investojnë në firma kineze. Por, Uashingtoni ka shtuar kufizimet që nga mandati i parë i Trump, ndërsa përpiqet të ndërpresë lidhjet e biznesit midis SHBA-ve dhe Kinës kur bëhet fjalë për teknologjinë e përparuar, pasi si demokratët ashtu edhe republikanët shqetësohen hapur për sigurinë kombëtare.

Sulmet e Trump vijnë pasi senatori republikan, Tom Cotton, i drejtoi një letër bordit të Intel, ku shkruhej se “shoqatat e z. Tan ngrenë pyetje në lidhje me aftësinë e Intel” për të qenë një “administrator i përgjegjshëm i parave të taksapaguesve amerikanë dhe për t’u përmbajtur rregulloreve përkatëse të sigurisë”.

Në një deklaratë më herët këtë javë, Intel u shpreh se Tan dhe kompania është “thellësisht të përkushtuar ndaj sigurisë kombëtare të SHBA-ve dhe integritetit të rolit tonë në ekosistemin e mbrojtjes së SHBA-ve”.

Lidhjet e Tan me Kinën janë vënë në qendër të vëmendjes në një raport të kongresit të vitit 2024, që shqyrtonte raportet midis firmave të investimeve amerikane dhe bizneseve kineze.

The post Trump kërkon dorëheqjen e menjëhershme të kreut të Intel, akuzat për raporte konfliktuale me Kinën first appeared on JavaNews.al.

Një zjarr i përmasave të mëdha ka përfshirë një sipërfaqe të konsiderueshme pylli me pisha në zonën kufitare mes bashkive Patos dhe Mallakastër, mes fshatrave Lofkënd dhe Drenie. Flakët, të cilat kanë nisur prej ditës së djeshme, po luftohen nga ajri dhe nga toka.

Në terren ndodhen forca të shumta, përfshirë ato të Emergjencave Civile, shërbime zjarrfikëse nga disa bashki, dhe trupa të Forcave të Armatosura. Në ndihmë është angazhuar edhe një helikopter, ndërhyrja e të cilit ka bërë të mundur izolimin e vatrave aktive. Pavarësisht situatës serioze, autoritetet po bëjnë maksimumin për të parandaluar përhapjen e mëtejshme të zjarrit.

Ministri i Mbrojtjes, Pirro Vengu, ndodhet në zonë për të koordinuar operacionin dhe ka vlerësuar lart profesionalizmin e të gjithë atyre që janë angazhuar.

Ai theksoi se mbrojtja e jetës së qytetarëve dhe e mjedisit është prioritet absolut.

Në operacionin e shuarjes së zjarrit po marrin pjesë:

2 automjete zjarrfikëse të Forcave të Armatosura

3 zjarrfikëse nga bashkia Patos

1 zjarrfikëse nga bashkia Mallakastër

1 zjarrfikëse nga bashkia Lushnjë

1 zjarrfikëse nga bashkia Fier

2 mjete të kompanisë Albpetrol

1 mjet zjarrfikës nga Roskoveci

Përveç dëmeve në ekosistem, autoritetet nuk e përjashtojnë mundësinë që zjarri të jetë i qëllimshëm. Policia ka nisur hetimet dhe kujton se zjarrvënia e qëllimshme dënohet sipas Kodit Penal.

Situatë e vështirë edhe në Mirditë, flakët përfshijnë pyllin me pisha

Një vatër tjetër zjarri ka shpërthyer pasditen e së enjtes në fshatin Vjollcë (Malaj), në Mirditë. Terreni i thepisur dhe era e fortë kanë bërë që flakët të përhapen me shpejtësi në një sipërfaqe të madhe pylli me pisha.

Zjarrfikësit, pavarësisht përpjekjeve të pandërprera, nuk kanë arritur ta izolojnë zjarrin. Për shkak të aksesit të vështirë në zonën malore, ndërhyrja po vijon me mjete të kufizuara. Zjarrfikësit janë ende në vendngjarje, duke u përpjekur të vënë situatën nën kontroll.

The post Luftë me flakët në jug, zjarr masiv mes Patosit dhe Mallakastrës, situatë e vështirë edhe në Mirditë first appeared on JavaNews.al.

Policia e Kosovës ka bërë të ditur se një person është arratisur nga Qendra e paraburgimit në Mitrovicën e Veriut. Në një postim në Facebook, policia njofton se ka marrë masat duke ngritur pika kontrolli në të gjithë veriun e vendit dhe duke kontrolluar edhe fizikisht zonën për rreth qendrës se Paraburgimit edhe me njësi të specializuara.

“Sot me 07.08.2025 rreth orës 15:45 jemi njoftuar se nga Qendra e Paraburgimit ne Mitrovice Veri një person është arratisur. Policia menjëherë ka marrë masat duke ngritur pika statike te kontrollit ne tere veriun e vendit dhe duke kontrolluar edhe fizikisht zonën për rreth qendrës se Paraburgimit”, njofton policia.

Krah njoftimit policia ka bërë përshkrimin e të arratisurit. Bëhet shtetasin serb Dorde Radomiroviç, 34-vjeç të lindur në Novi Sad.

Policia thekson se vijon të jetë ende në kërkim të personit të arratisur, teksa kërkon mirëkuptimin e qytetarëve dhe i bën thirrje të njoftojnë në numrin e saj ose stacionin më të afërt në rast se hasin të arratisurin.

“Në këtë kohe ne ende jemi ne kërkim te personit ne fjale ndërsa kemi angazhuar edhe njësi te specializuara  ( njësia Policore me qen- K9 ).

“Lusim qytetarët që të kenë mirëkuptim derisa jemi në operacion dhe po ashtu në rast se hasin ne këtë person të thërrasin në numrin 192 ose te lajmërojnë ne stacionin me te afërt.

Detajet e personit dhe vepra për te cilën kërkohet janë te paraqitura në dokumentin e bashkangjitur”.

The post FOTO / Arratiset 34-vjeçari serb nga Qendra e Paraburgimit, policia kërkon ndihmë first appeared on JavaNews.al.

Egnatia ka barazuar me rezultatin 0-0 në transfertë ndaj skuadrës sllovene Olimpija Ljubljana në ndeshjen e parë të raundit të tretë të kualifikimeve për UEFA Conference League.

Pavarësisht se përballë kishin një kundërshtar me më shumë përvojë ndërkombëtare, kampionët e Shqipërisë vuajtën shumë ndaj ekipit slloven dhe luftuan fort për çdo top, duke mos lejuar gola në portën e tyre. Rrogozhinasit goditën vetëm dy herë në portën kundërshtare.

Në minutën e 90-të, Egnatia mbeti me një lojtar më pak në fushë, pasi Abdurramani Fangaj u ndëshkua me karton të kuq, duke e komplikuar situatën në minutat e fundit të takimit, por djemtë e Edlir Tetovës ja dolën të mbanin portën të pastër edhe në minutat shtesë.

Barazimi pa gola i jep kampionëve të Shqipërisë shpresa reale për një kualifikim historik, teksa fati i tyre në aventurën europiane do të vendoset në ndeshjen e kthimit në Rrogozhinë, përpara tifozëve shqiptar.

The post Egnatia barazon pa gola në Slloveni, fati i aventurës europiane vendoset në Rrogozhinë first appeared on JavaNews.al.

Hamasi ka reaguar, lidhur me planin e kryeministrit izraelit, Benjamin Netanyahu për të marrë kontrollin ushtarak të Gazës dhe për t’ia dorëzuar forcave arabe për qeverisje.

Në një deklaratë të lëshuar nga udhëheqja e lëvizjes palestineze, thuhet se planet e Netanyahut për të zgjeruar operacionet ushtarake në Gaza tregojnë se qëllimi i tij është të sakrifikojë pengjet izraelite në shërbim të interesave të tij personale.

Në një deklaratë të enjten, grupi militant akuzoi kryeministrin izraelit për përmbysjen flagrante të procesit të negociatave pasi ai tha se Izraeli synon të marrë kontrollin ushtarak të Gazës.

“Deklaratat e Netanyahut përfaqësojnë një përmbysje të hapur të procesit të negociatave dhe zbulojnë qartë motivet e vërteta pas tërheqjes së tij nga raundi i fundit, pavarësisht afërsisë sonë me arritjen e një marrëveshjeje përfundimtare”, tha Hamasi.

Komentet e Netanyahut erdhën pak para se kabineti i sigurisë i Izraelit të mblidhej për të votuar për një riokupim të plotë të Gazës. Zgjerimi i mundshëm i fushatës ushtarake të Izraelit është përballur me rezistencë nga disa izraelitë që kërkojnë përfundimin e luftës dhe lirimin e pengjeve të mbetura.

“Planet e kryeministrit do të ishin një vazhdim i politikës së shfarosjes dhe zhvendosjes. Gaza do të mbetet rezistente ndaj pushtimit”, tha Hamasi ndërsa i bëri thirrje bashkësisë ndërkombëtare të hedhë poshtë komentet e Netanyahut.

The post Hamasi: Netanyahu po sakrifikon pengjet për t’i shërbyer interesave të tij personale first appeared on JavaNews.al.

Dy shtetas të Shqipërisë janë ndaluar nga policia në Kosovë, pasi është konstatuar se kanë paguar me kartëmonedha të falsifikuara në një pikë karburanti, ku kanë furnizuar automjetin me karburant.

“Me datën 07.08.2025 Policia e Kosovës, respektivisht Drejtoria për Hetimin e Krimeve Ekonomike dhe Korrupsionit (DHKEK)– Prishtinë kanë arritur që të sigurojnë informata/prova se dy të dyshuarit  meshkuj shtetas të Shqipërisë në një pikë të derivateve janë furnizuar me derivate, dhe kanë kryer pagesë në vlerë prej 50 (pesëdhjetë) euro nga të cilat të gjitha në monedha nga 10 (dhjetë) euro. Pas pranimit të pagesës është vënë re se nga kartëmonedhat e ofruara 4 (katër) prej tyre janë të falsifikuara”, njofton policia.

Pas kësaj dyshja janë ndaluar në doganën e Morinit dhe në automjetin e tyre gjatë kontrollit u janë gjetur edhe 780 euro të tjera të dyshuara si të falsifikuara.

“Lidhur me rastin informacionet e shpejta dhe efikase janë ofruar nga zyrtarë të Njësisë për Mbështetje të Trafikut Rrugor, informacione të cilat kanë ndihmuar në koordinimin e njësive relevante policore, ku edhe si rezultat të dyshuarit janë ndaluar dhe arrestuar në Pikën Kufitare me Shqipërinë, në Vërmicë– Prizren. Të dyshuarit e lartcekur janë intervistuar në cilësi të personave të dyshuar në prezencën e avokatëve mbrojtës dhe pas konsultës me prokurorin e rastit njëri nga të dyshuarit i cili ka kryer veprën Falsifikim i parasë është dërguar në mbajtje prej 48 orësh, ndërsa i dyshuari tjetër me urdhër verbal nga prokurori është liruar ne procedurë te rregullt”, sqaron më tej policia në Kosovë.

The post Paguan me euro false në një pikë karburanti, ndalohen dy shtetas të Shqipërisë në Kosovë first appeared on JavaNews.al.

Forcat e Mbrojtjes së Izraelit (IDF) kanë lëshuar një urdhër të ri evakuimi për banorët e lagjeve Daraj dhe Tuffah në Rripin e Gazës. Në një mesazh të publikuar në rrjetin social X, zëdhënësi i IDF-së, në gjuhën arabe, ka bërë thirrje që të gjithë banorët që nuk janë larguar ende, të evakuohen menjëherë për arsye sigurie, duke u drejtuar drejt jugut, në zonën humanitare të Al-Mawasi.

Ky urdhër vjen në kuadër të një përshkallëzimi të operacioneve ushtarake në Gaza, ku ushtria izraelite po intensifikon sulmet kundër grupeve militante dhe pozicioneve terroriste. IDF njofton se do të vazhdojë të ndërhyjë në çdo zonë ku evidentohen kërcënime ndaj sigurisë së Izraelit.

Në të njëjtën kohë, kryeministri izraelit Benjamin Netanyahu ka mbledhur kabinetin e sigurisë për të diskutuar strategjinë e mëtejshme ndaj situatës në Gaza. Në këtë takim, ai ka nënvizuar nevojën për një ofensivë të plotë ushtarake në Rripin e Gazës, duke paralajmëruar një pushtim të gjerë që synon shkatërrimin e kapaciteteve të grupeve terroriste dhe rivendosjen e sigurisë në rajon.

Netanyahu ka theksuar se kjo operacion do të jetë i gjatë dhe i ashpër, por i domosdoshëm për mbrojtjen e qytetarëve izraelitë dhe përfundimin e kërcënimit që vjen nga Gaza. Qeveria izraelite është duke koordinuar masat e evakuimit dhe sigurisë, ndërsa ushtria po vazhdon aktivitetet në terren.

The post Ushtria izraelite urdhëron evakuimin e lagjeve Daraj dhe Tuffah në Gaza: Shkoni menjëherë… first appeared on JavaNews.al.

Kathleen Folbigg, gruaja që u cilësua dikur si “nëna më e keqe e Australisë”, do të përfitojë një dëmshpërblim prej mbi 1 milion euro për 20 vitet që kaloi padrejtësisht në burg.

Ajo u dënua në vitin 2003 për vdekjen e katër fëmijëve të saj, por u lirua në vitin 2023, pas një rishikimi gjyqësor të çështjes së saj, i cili zbuloi se fëmijët mund të kenë vdekur nga një sëmundje e rrallë gjenetike.

Sipas mediave ndërkombëtare, avokatja e saj, Rhanee Rego, deklaroi se Folbigg ka marrë një ofertë dëmshpërblimi prej 1.116.598 euro, një shumë që ajo e cilësoi si “të padrejtë” dhe “moralisht fyese”.

“Shuma që ofrohet është një fyerje morale, krejtësisht e pamjaftueshme dhe e pajustifikueshme. Sistemi e ka dështuar sërish Kathleen Folbigg”, u shpreh Rego.

Katër fëmijët e Folbigg, Caleb, Patrick, Sarah dhe Laura, ndërruan jetë papritur midis viteve 1989 dhe 1999, në moshën nga 19 ditë deri në 18 muaj. Prokuroria në atë kohë pretendoi se ajo i kishte mbytur, duke u mbështetur në prova të dobëta dhe në ditarët e saj personalë, ku shfaqeshin momente të vështira emocionale.

Në vitin 2003, ajo u dënua me 40 vite burg për vrasjen e tre fëmijëve dhe për vrasje nga pakujdesia për fëmijën e katërt, dënim që më vonë u ul në 30 vite pas një ankese.

Në vitin 2023, një hetim i ri gjyqësor zbuloi se fëmijët mund të kishin vdekur nga shkaqe natyrore, për shkak të mutacioneve gjenetike shumë të rralla, duke çuar në lirimin dhe rehabilitimin e saj.

Avokatja e saj shtoi gjithashtu se krahasuar me raste të tjera, si ajo e Lindy Chamberlain – një nënë tjetër e dënuar gabimisht që mori 1.7 milionë dollarë për vetëm 3 vite burg – dëmshpërblimi për Folbigg është thellësisht i padrejtë.

Megjithëse Qeveria e Uellsit të Ri Jugor konfirmoi pagesën e kompensimit, ajo nuk pranoi të publikojë detajet e vendimit, duke iu përgjigjur kërkesës së vetë Folbigg për konfidencialitet.

The post “Nëna më e keqe e Australisë” merr mbi 1 milion euro dëmshpërblim pas 20 vitesh burgim të padrejtë first appeared on JavaNews.al.

Ardon Jashari, i cili sapo ka mbërritur te Milan, dha intervistën e tij të parë për televizionin e klubit.

“Është një ndjenjë e jashtëzakonshme të jem këtu pas këtyre javëve. Jam krenar që jam në këtë klub historik. Dua ta ndihmoj këtë ekip të kthehet aty ku i takon, të fitojë tituj dhe do të jap gjithçka për të arritur këtë qëllim. Interesi i Milan më bëri menjëherë krenar. Ishte një ëndërr që e kisha pasur që kur isha fëmijë. Ishte klubi që ishte gjithmonë i pranishëm në familjen time dhe në grupin tim të miqve, kështu që mund të them se ëndrra është bërë realitet”, tha Ardoni.

Mesfushori më pas foli për karakteristikat e tij teknike, duke thënë se do ta ndihmojë ekipin si në sulm ashtu edhe në mbrojtje.

“Do të përpiqem të bëj pasimin e fundit dhe t’i ndihmoj shokët e skuadrës të shënojnë. Lojtarët e Milan nga e kaluara që i kam admiruar më shumë?  Roberto Baggio dhe Andrea Pirlo  Më pëlqente shumë mënyra se si luanin, ishin teknikë dhe të fortë, krijues në pasimin e fundit. Kjo është ajo që përpiqem të bëj”, rrëfeu ai më tej.

Sa i përket faktit se do të ndajë mesfushën me një fitues të Topit të Artë si Luka Modric, Jashari tha se “është fantastike”.

“Udhëtimi im nis përkrah një lojtari kaq të pabesueshëm, i cili ka fituar kaq shumë. Ai vetëm mund të më ndihmojë, dua të mësoj gjithçka prej tij dhe të dëgjoj të gjitha mësimet e tij, brenda dhe jashtë fushës. Megjithatë, është një gjë fantastike të jesh pjesë e këtij klubi fantastik.”

I pyetur përse zgjodhi fanellën me numrin 30, talenti shqiptaro-zviceran tha: “Fillova me këtë numër në Zvicër, e zgjodha sepse gjithmonë e kam dashur Messin, i cili filloi me këtë numër. Ai më ndihmoi shumë, si në Zvicër ashtu edhe në Belgjikë, shpresoj ta bëj një numër historik.”

The post “Adhuroja Pirlon e Baggio-n”, Jashari flet si milanist: Të luaj me Modriç është fantastike first appeared on JavaNews.al.

Në Prishtinë u mbajt këtë enjte, 7 gusht, një protestë në mbështetje të veteranëve të Ushtrisë Çlirimtare të Kosovës, ku qytetarë të shumtë kërkuan drejtësi për ish-krerët e UÇK-së që po gjykohen në Hagë.

Në lidhje me këtë zhvillim ka reaguar edhe kryeministri i Shqipërisë, Edi Rama, i cili me anë të një postimi në rrjetet sociale u shpreh i habitur pse Kuvendi i Kosovës ende nuk ka miratuar një rezolutë të përbashkët, pa dallime politike, për të denoncuar shkeljet e të drejtave themelore të Hashim Thaçit dhe bashkëluftëtarëve të tij.

Rama nënvizoi se një veprim i tillë nga Kosova do të pasohej menjëherë edhe nga Kuvendi i Shqipërisë, për të përçuar këtë mesazh të qartë në çdo shtet demokratik që mbështet financiarisht Tribunalin e Hagës.

The post Protesta për ish-krerët e UÇK, Rama: Pse Kuvendi i Kosovës nuk e ka ngritur ende zërin?! first appeared on JavaNews.al.

Pas më shumë se tre vitesh nga fillimi i pushtimit rus të Ukrainës, duket se po afrohet mundësia për një takim mes presidentit rus Vladimir Putin dhe presidentit amerikan Donald Trump.

Vizita e fundit në Moskë e të dërguarit të Trump-it, Steve Witkoff, duket se ka përshpejtuar ndjeshëm këtë proces. Pas deklaratës optimiste të Trump-it për suksesin e misionit dhe gatishmërinë për t’u takuar me Putinin dhe presidentin ukrainas Volodymyr Zelensky në ditët në vijim, Kremlini ka konfirmuar se një takim mes Putinit dhe Trump është në agjendë, edhe pse një datë ende nuk është caktuar.

Moska shprehu kënaqësi për bisedën tre-orëshe midis Putinit dhe Witkoff-it, të cilën e cilësoi si “konstruktive dhe konkrete”, duke shtuar se është arritur një marrëveshje parimore për një takim dypalësh në ditët e ardhshme.

Corriere Della Sera shkruan se si vend i mundshëm për takimin po përmenden Emiratet e Bashkuara Arabe, pas një bisede të Putinit me sheikun Mohammed bin Zayed Al Nahyan.

Ndërkohë, Putin mbetet i rezervuar për një takim me Zelenskyn, duke thënë se nuk është kundër në parim, por se ende nuk janë krijuar kushtet e nevojshme.

Mediat amerikane raportojnë se një nga kushtet e Trump-it për takimin me Putinin është pranimi i një dialogu të drejtpërdrejtë edhe me Zelenskyn. Presidenti ukrainas, në komunikim me liderët evropianë dhe sekretarin e ri të NATO-s, Mark Rutte, tha se Evropa duhet të luajë një rol aktiv në paqe dhe se Ukraina është gati për një armëpushim të vërtetë, por se nga Moska ende mungon një përgjigje e qartë.

The post Putin gati të takohet me Trump, Zelensky lihet jashtë (Pikëtakimi: Emiratet e Bashkuara Arabe?!) first appeared on JavaNews.al.