Viti 2025 po rezulton të jetë viti i Pamelanaissance.

Ish-ylli i Baywatch na mahniti me filmin “The Last Showgirl”, një film që u rendit në listën e Filmave më të Mirë të Vitit 2025. Pastaj ishte roli i saj kryesor në filmin Naked Gun, në të cilin shkëlqen përballë Liam Neeson.

Tani, ka një ndryshim të vogël: Anderson po shet turshi artizanale.

Aktorja 58-vjeçare dhe ikona e kulturës pop është bashkuar me markën e stilit të jetesës nga Los Angeles, Flamingo Estate, për një lansim të kufizuar, “Pamela’s Pickles” – kavanoza me turshi pikante dhe lulesh që kushtojnë 38 dollarë (32 euro) një copë.

Me sa duket, receta bazë vjen nga tezja e madhe e Andersonit, Vie. Aktorja shtoi një shije personale me petale trëndafili të thata, ndërsa Flamingo Estate shtresoi piper rozë, spec djegës guajillo dhe kripë deti të tymosur, së bashku me piper organik Espelette rigjenerues.

Epo, e gjitha kjo është për një kauzë të mirë, pasi 100 për qind e të ardhurave nga turshitë vegane do të dhurohen për Qendrën e Kafshëve të Egra të Kalifornisë (CWC), një strukturë trajtimi mjekësor dhe rehabilitimi për kafshët e egra që ofron kujdes mjekësor për më shumë se 4,000 kafshë të egra çdo vit.

The post Pamela Anderson do hapë biznes turshish, ja cila është kauza e saj appeared first on Albeu.com.

Kryetari i Partisë Demokratike, Sali Berisha, kërkoi sot mbledhjen urgjente të Këshillit të Sigurisë Kombëtare, duke e lidhur këtë me përkeqësimin e situatës nga zjarret, veçanërisht në Delvinë dhe Gramsh.

Thirrje të ngjashme kanë ardhur edhe nga përfaqësues të tjerë të opozitës.

Megjithatë, burime për Report Tv bëjnë të ditur se Këshilli i Sigurisë Kombëtare, i drejtuar nga Presidenti Bajram Begaj, nuk do të mblidhet në këto momente. Nga Presidenca saktësojnë se, në kushtet kur forcat janë të angazhuara në terren, prioritet mbetet ndihma direkte për të përmirësuar situatën.

Sipas të njëjtave burime, më herët është mbledhur Komiteti i Mbrojtjes Civile, nën udhëzimet e të cilit po veprohet dhe po menaxhohet situata.

Ky strukturë koordinon punën e të gjitha ekipeve të emergjencës, duke udhëhequr operacionet për kontrollin e flakëve dhe evakuimin e banorëve në zonat më të rrezikuara.

Autoritetet vijojnë apelimin për bashkëpunim dhe ndjekjen e udhëzimeve zyrtare, ndërsa frontet e zjarrit mbeten ende aktive në disa zona të vendit.

The post Zjarret në vend, menaxhimi i situatës nën udhëzimet e Komitetit të Mbrojtjes Civile appeared first on Albeu.com.

Bordi i drejtorëve të Barcelonës miratoi këtë të mërkurë një garanci prej shtatë milionë eurosh për të balancuar llogaritë dhe për t’iu afruar arritjes së rregullit 1:1 dhe për të qenë në gjendje të regjistrojë nënshkrime të reja.

Presidenti e kishte kërkuar këtë nga anëtarët e tjerë të bordit, të cilët e miratuan unanimisht në një takim të mbajtur këtë pasdite.

Arsyeja për këtë miratim është se klubi kishte shpenzuar më shumë se ç’duhej, veçanërisht në lidhje me seksionet e tij sportive. Kjo rritje e shpenzimeve ndikon në “Fair Play”-in e ekipit të parë. Ky miratim balancon financat dhe e çon një hap më afër regjistrimit të lojtarëve të rinj.

Megjithatë, ata nuk do të jenë në gjendje ta bëjnë këtë ende. Është një hap përpara, por ka ende çështje për t’u zgjidhur, veçanërisht ajo e kutive VIP në Spotify Camp Nou. Pasi auditori dhe LaLiga ta vërtetojnë këtë çështje, klubi do të jetë rikthyer te Rregulli 1:1, pasi vlera e kutive VIP është 100 milionë euro.

Ndërkohë, klubi është ende duke pritur që komiteti mjekësor i LaLigas të vendosë për operacionin në shpinë të Ter Stegen dhe mungesën e tij të pritshme. Nëse është më shumë se katër muaj, ata mund të përdorin një pjesë të pagës së portierit gjerman për të regjistruar Joan Garcían. Ky opsion do të ishte i menjëhershëm, pasi nuk varet nga Fair Play.

The post Bordi miraton për Barçën garancinë prej shtatë milionë euro… appeared first on Albeu.com.

Situata në njësinë Skënderbegas të Gramshit vijon të jetë e rënduar si pasojë e zjarrit.

Ndërkohë në terren kanë zbritur ekipet e Ministrisë së Bujqësisë, të cilat po marrin masa për groposjen e kafshëve të ngordhura që janë djegur.

Kjo ndërhyrje e shpejtë vjen për të shmangur përhapjen e ndonjë epidemie.

Kujtojmë se si pasojë e flakëve, 39 banesa u shkrumbuan, sipërfaqe të mëdha me pyje e shkurre, por edhe dhjetëra bagëti që mbetën të rrethuara nga flakët.

Në mesditë, flakët kanë hyrë në fshatin e tetë të kësaj njësie. Për shuarjen e tij po punojnë më shumë se 350 efektivë, të ndihmuar edhe nga ajri me helikopter.

Nisur nga situata e rënduar, kanë nisur edhe evakuimet e banorëve, por për zjarrfikësit beteja me ta ka qenë po aq e vështirë sa beteja që po zhvillojnë prej dy ditësh me zjarrin.

The post Frikë për përhapjen e sëmundjeve, nis groposja e kafshëve të djegura në Gramsh appeared first on Albeu.com.

Presidenti i Serbisë, Aleksandër Vuçiç ka deklaruar së fundmi se nuk ka ndërmend të kandidojë sërish për të njëjtin post. Vuçiç u shpreh se mandati i tij do të përfundojë për një vit e gjysmë ndërsa shtoi se ai nuk është një diktator siç e paraqesin. Vuçiç e quan veten një veteran politik.

“Karrierën time si president do ta përfundoj për një vit e gjysmë. Unë jam një veteran politik dhe nuk mund të kandidoj më për president, dhe as që më shkon ndër mend të ndryshoj Kushtetutën për ta bërë këtë. Nuk jam diktator, siç më paraqesin zakonisht në mediat austriake.”-tha ai.

Presidenti i Serbisë nuk dha një datë të saktë për zgjedhjet ndërsa theksoi se do të shpallen përpara afatit të parashikuar me ligj. Aleksandër Vuçiç deklaroi se kjo është në kompetencë të institucioneve shtetërore.

“Do të ndihmoj dikë dhe do të luftoj që ata që mendoj se mund ta çojnë Serbinë përpara të kenë sukses në zgjedhje, këtë do ta bëj patjetër. Nga cilat pozita, kjo nuk është temë tani, dhe as nuk mund ta them.”-deklaroi ai.

The post Vuçiç: S’do kandidoj më për President! Jam veteran politik, s’jam diktator siç më quajnë appeared first on Albeu.com.

Qëndrimi i Rusisë për fundin e luftës mbetet i pandryshuar. Këtë e ka bërë të ditur vetë presidenti rus Vladimir Putin i cili në një deklaratë të bërë ditën e sotme.

Kushtet vazhdojnë të jenë ato që Putin vendosi vitin e kaluar: tërheqjen e plotë të forcave të Kievit nga 4 rajonet kryesore të Ukrainës dhe braktisjen e ambicieve të saj për në NATO.

Deklarata e Kremlinit vjen dy ditë përpara takimit Trump- Putin në Alaskë, me presidentin Amerikan që ka deklaruar se për të arritur paqe në Luftën e Europës Lindore të dyja palët duhet të bëjnë lëshime territoriale.

Rusia kontrollon aktualisht 19% të territorit të Ukrainës duke përfshirë Krimenë, gadishullin e aneksuar në vitin 2014, Rajonin e Luhanskut I cili është 100% I pushtuar si dhe pjesë të tjera të rajoneve të Donetskut,Zaporizhias dhe Hersonit që janë pushtuar nga forcat ushtarake të Moskës në mbi 70%.

Liderët Europianë mbajtën gjithashtu një samit virtual me Presidentin Amerikan Donald Trump përpara se kreu i Shtëpisë së Bardhë të takoj Presidentin Rus Vladimir Putin.

Biseda virtuale është organizuar nga Gjermania ndërkohë që Brukseli zyrtar e ka bërë të qartë se Ukraina duhet të lejohet të zgjedhë vetë mbi të ardhmen e saj.

The post Pak para Samitit SHBA-Rusi, Putin shuan shpresat për mbarimin e luftës: Qëndrimi ynë nuk ka ndryshuar, duam Krimenë dhe 4 rajonet e Ukrainës appeared first on Albeu.com.

Situata nga zjarret në zonën e Delvinës mbetet shqetësuese, ndërsa gjatë përpjekjeve për shuarjen e tyre ka ndodhur një incident serioz.

Nënkryetari i Bashkisë së Delvinës, Filip Xuxi, është asfiksuar nga tymi teksa ndodhej në vijën e parë të frontit të zjarrit, si pjesë e grupit të emergjencës që po punon për kontrollin e situatës.

Xuxi u transportua me urgjencë në spital në gjendje të rënduar shëndetësore për shkak të inhalimit të tymit në sasi të mëdha. Ai ndodhet nën kujdesin e mjekëve në repartin e urgjencës, dhe gjendja e tij po monitorohet nga afër.

Zjarret kanë përfshirë disa zona pyjore përreth qytetit, duke shkaktuar dëme të konsiderueshme materiale dhe duke vështirësuar ndërhyrjen për shkak të terrenit të vështirë dhe erërave të forta.

Autoritetet lokale dhe forcat zjarrfikëse po vazhdojnë përpjekjet për të vënë nën kontroll flakët, duke apeluar për ndihmë shtesë dhe kujdes maksimal nga banorët e zonës.

The post Asfiksohet nga tymi nënkryetari i Bashkisë Delvinë, ishte pjesë e grupit për shuarjen e flakëve appeared first on Albeu.com.

Flakët që nisën nga Bashkia e Delvinës kanë përfshirë malin e Sopotit dhe tashmë kanë hyrë në territorin e Bashkisë Gjirokastër.

Korrespondentja e Top Channel Kristina Fidhi raporton se zjarri, i fuqizuar nga era dhe thatësira, paraqet një kërcënim serioz për qytetin e Gjirokastrës dhe fshatin Lazarat.

Forcat zjarrfikëse të Gjirokastrës po luftojnë për ta ndalur përhapjen e flakëve, të ndihmuara nga disa banorë të Lazaratit, të cilët po përballen me zjarrin në majën e Sopotit. Çdo minutë konsiderohet kritike, ndërsa flakët vazhdojnë të mbulojnë zonën, duke rritur rrezikun e përhapjes.

Operacioni i emergjencës vazhdon pa garanci se zjarri do të kontrollohet së shpejti, ndërsa autoritetet apelojnë për kujdes maksimal dhe respektim të udhëzimeve për evakuim nga banorët e zonës.

The post Flakët që nisën në Delvinë tashmë përhapen edhe në Gjirokastër, kërcënim serioz për disa fshatra appeared first on Albeu.com.

Ambasada e Shteteve të Bashkuara në Tiranë ka bërë një njoftim zyrtar lidhur me situatën e zjarreve në vend ku iu ka bërë thirrje qytetarëve amerikanë në Shqipëri të tregojnë kujdes dhe të ndjekin udhëzimet e autoriteteve.

Në një mesazh për qytetarët amerikanë, ambasada thekson rëndësinë e kujdesit të shtuar në zonat e rrezikuara.

“Ambasada e Shteteve të Bashkuara në Tiranë po vazhdon të ndjekë nga afër disa zjarre në zona të ndryshme të vendit dhe u bën thirrje të gjithë qytetarëve amerikanë të tregojnë kujdes në zonat e rrezikuara nga zjarret.” -thuhet në njoftimin zyrtar.

Gjithashtu, disa zona në të gjithë vendin janë nën urdhër evakuimi për shkak të rrezikut të lartë nga zjarret.

Situata më kritike është rregjistruar në Delvinë dhe Gramsh ku ka pasur dëme të shumta materiale dhe ka pasur evakuime masive.

The post Ambasada Amerikane në Tiranë thirrje qytetarëve të saj: Tregoni kujdes në zonat e rrezikuara nga zjarret appeared first on Albeu.com.

Ushtria izraelite ka vazhduar bombardimet në Qytetin e Gazës më 13 gusht, para një ofensive të planifikuar për marrjen nën kontroll të plotë të kësaj zone, teksa Ministria e Shëndetësisë në Gazë tha se në 24 orët e fundit janë vrarë 123 persona.

Shifrat e viktimave janë më të lartat e regjistruara brenda një jave, teksa lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – pothuajse është në vitin e dytë. Kryeministri izraelit, Benjamin Netanyahu, përsëriti një ide që palestinezët duhet të largohen nga Gaza.

“Ata nuk po dëbohen, do t’u lejohet të ikin”, tha ai për kanalin izraelit të televizionit i24NEWS. “Të gjithë ata që shqetësohen për palestinezët dhe thonë se duan t’i ndihmojnë, duhet të hapin dyert e tyre dhe të mos na japin ne leksione”.

Arabët dhe shumë udhëheqës botërorë janë kundër idesë për zhvendosjen e popullsisë së Gazës prej 2 milionë banorësh. Ndërkaq, palestinezët thonë se një zhvendosje e tillë do të ishte sikurse një tjetër Nakba (katastrofë), kur qindra mijëra palestinezë u larguan apo u dëbuan gjatë luftës më 1948.

Plani për rimarrjen e Qytetit të Gazës nga Izraeli – që e kishte marrë nën kontroll në ditët e para të luftës, por më pas ishte tërhequr – pritet të ndodhë pas disa javësh, sipas zyrtarëve. Kjo nënkupton se ende ka shpresa që të arrihet një armëpushim, megjithëse bisedimet për të kanë ngecur dhe lufta po vazhdon.

Aeroplanët dhe tanket izraelite sulmuan rëndë zona të ndryshme në Qytetin e Gazës, duke shkatërruar shtëpi gjatë natës, thanë banorët. Sipas mjekëve, 12 persona u vranë pasi u godit një shtëpi në lagjen Zeitun.

Sulme ka pasur edhe në pjesë të tjera të Gazës, përfshirë në Han Junis, ku janë vrarë tetë palestinezë që po prisnin në radhë për të marrë ndihma, thanë mjekët palestinezë. Për këtë rast, ushtria izraelite nuk ka komentuar.

Edhe tetë persona të tjerë, përfshirë tre fëmijë, kanë vdekur nga uria dhe kequshqyerja në Gazë në 24 orët e fundit, tha Ministria e Shëndetësisë në Gazë. Sipas kësaj ministrie, që nga nisja e luftës 235 persona, përfshirë 106 fëmijë, kanë vdekur nga uria apo kequshqyerja.

Lufta nisi më 7 tetor 2023, pasi Hamasi sulmoi jugun e Izraelit duke vrarë afër 1.200 persona dhe duke rrëmbyer 251 të tjerë. Ofensiva izraelite ka vrarë më shumë se 61.000 palestinezë, sipas Ministrisë së Shëndetësisë në Gazën e kontrolluar nga Hamasi – shifra që OKB-ja i konsideron të besueshme./ REL

The post Sulmet izraelite vrasin 123 persona në Gazë në 24 orët e fundit appeared first on Albeu.com.

Lela Seferi, ish-banorja e njohur e “Big Brother VIP Kosova 3”, ka shpallur një lajm të rëndësishëm për fansat e saj. Ajo ka zbuluar se do të jetë moderatorja e re e programit “Big Talk”.

Lajmi u bë i ditur gjatë një live në TikTok, ku Lela ishte e shoqëruar nga ish-banorja Xheneta Fetahu dhe partneri i saj, Leonardo Gashi.

Në transmetim, Lela u shpreh me shumë entuziazëm: “Keni me më pa shumë shpejt, në Big Talk. Do të jem moderatore. Kështu që mezi po pres me ju pa!” Ajo gjithashtu theksoi se ndihej e lumtur dhe e vlerësuar për këtë mundësi të re në karrierën e saj.

The post Pas suksesit në “BBVK3”, kjo ish-banore do të jetë në krye të moderimit të “Big Talk” appeared first on Albeu.com.

Dashi
Të lindur më: 21 Mars – 19 Prill
Në dashuri, mund të ndjeni një nevojë për më shumë intimitet dhe sinqeritet me partnerin, ndaj tregohuni të hapur me ndjenjat tuaja. Në punë, dita sjell mundësi të reja për bashkëpunime, ndaj mos hezitoni të merrni iniciativa. Kujdesuni për shëndetin, shmangni stresin dhe ushqehuni shëndetshëm për të ruajtur energjinë. Financat janë të qëndrueshme, por shmangni shpenzimet e panevojshme për të ruajtur balancën.

Demi
Të lindur më: 20 Prill – 20 Maj
Në marrëdhënie, mund të përballeni me keqkuptime të vogla, ndaj komunikoni qartë për të shmangur tensionet. Në aspektin profesional, përqendrohuni në detajet dhe mos lini asgjë të papërfunduar sot. Shëndeti kërkon pak më shumë vëmendje, ndaj pushoni mjaftueshëm dhe mos e teproni me lodhjen. Financat janë të paqëndrueshme, kështu që planifikoni me kujdes çdo shpenzim.

Binjakët
Të lindur më: 21 Maj – 20 Qershor
Dita është e favorshme për të forcuar lidhjet romantike dhe për të kaluar momente të bukura me të dashurit tuaj. Në punë, kreativiteti juaj vlerësohet dhe mund të merrni vëmendje pozitive nga kolegët ose eprorët. Kujdesuni për shëndetin mendor duke bërë aktivitete që ju relaksojnë. Në aspektin financiar, mund të merrni një lajm të mirë ose një përfitim të papritur.

Gaforrja
Të lindur më: 21 Qershor – 22 Korrik
Në dashuri, një bisedë e thellë mund të sjellë qartësi dhe afrim me partnerin. Në punë, mund të hasni sfida të vogla, por vendosmëria juaj do t’ju ndihmojë t’i kapërceni me sukses. Shëndeti është i mirë, por mos e injoroni nevojën për aktivitet fizik. Në financa, është koha të rishikoni buxhetin dhe të kurseni më shumë.

Luani
Të lindur më: 23 Korrik – 22 Gusht
Marrëdhëniet romantike janë të ngrohta dhe mund të merrni një surprizë të këndshme nga partneri. Në aspektin profesional, dita është shumë dinamike dhe kërkon organizim të mirë për të arritur qëllimet. Kujdesuni për shëndetin duke shmangur ushqimet e rënda dhe duke qëndruar aktivë. Financat janë të qëndrueshme, por mos investoni në projekte të pasigurta.

Virgjëresha
Të lindur më: 23 Gusht – 22 Shtator
Në dashuri, sot ndjeni harmoninë dhe mbështetjen e partnerit, çka ju bën të ndiheni më të sigurt. Në punë, bashkëpunimi me kolegët sjell rezultate pozitive dhe mundësi të reja për të spikatur. Shëndeti është i mirë, por merrni kohë për relaks dhe meditoni për të balancuar energjitë. Në aspektin financiar, shmangni shpenzimet impulsive dhe përqendrohuni tek nevojat kryesore.

Peshorja
Të lindur më: 23 Shtator – 22 Tetor
Në marrëdhënie, mund të ndiheni më të tërhequr drejt partnerit dhe të kërkoni më shumë kohë cilësore së bashku. Në punë, idetë tuaja novatore mund të vlerësohen nga të tjerët, ndaj mos hezitoni të shpreheni. Shëndeti është i mirë, por mos neglizhoni pushimin dhe hidrimin. Financat janë të mira, por është e këshillueshme të mos ndërmerrni rreziqe të mëdha sot.

Akrepi
Të lindur më: 23 Tetor – 21 Nëntor
Sot jeni të hapur për biseda të thella në marrëdhëniet personale, çka mund të sjellë një afrim të veçantë. Në aspektin profesional, përqendrohuni te detyrat më të rëndësishme dhe shmangni shpërqendrimet. Shëndeti kërkon vëmendje, sidomos nëse keni pasur shqetësime të vogla kohët e fundit. Financat janë të stabilizuara, por kontrolloni mirë çdo pagesë ose borxh.

Shigjetari
Të lindur më: 22 Nëntor – 21 Dhjetor
Në dashuri, mund të merrni një mesazh të papritur që ju sjell gëzim ose të ndiheni më afër partnerit. Në punë, dita është e favorshme për të bërë plane afatgjata dhe për të marrë vendime të rëndësishme. Kujdesuni për shëndetin duke bërë ushtrime të lehta ose duke kaluar kohë në natyrë. Financat paraqiten të mira, por kini kujdes me investimet e reja.

Bricjapi
Të lindur më: 22 Dhjetor – 19 Janar
Marrëdhëniet romantike janë në qendër të vëmendjes dhe mund të ndjeni nevojën për të ndryshuar diçka në mënyrën si komunikoni. Në punë, një projekt i rëndësishëm kërkon përkushtim shtesë, ndaj mos e lini pas dore. Shëndeti është i qëndrueshëm, por kushtojini vëmendje mirëqenies emocionale. Financat janë në linjë të mirë, por mos u nxitoni me blerje të mëdha.

Ujori
Të lindur më: 20 Janar – 18 Shkurt
Në dashuri, mund të keni një takim të këndshëm ose një bisedë që forcon lidhjen tuaj. Në aspektin profesional, dita është e favorshme për të mësuar diçka të re ose për të zhvilluar aftësi të reja. Shëndeti është i mirë nëse ruani ekuilibrin mes punës dhe pushimit. Në financa, mund të merrni një ofertë interesante ose të zbuloni një mundësi për të kursyer.

Peshqit
Të lindur më: 19 Shkurt – 20 Mars
Sot marrëdhëniet janë të qeta, por mund të ndjeni nevojën për të qëndruar pak më shumë vetëm për të reflektuar. Në punë, përqendrohuni te detyrat e përditshme dhe mos u shpërqendroni nga problemet e vogla. Kujdesuni për shëndetin mendor, meditoni ose lexoni për të qetësuar mendjen. Financat janë të qëndrueshme, por mos i lini pas dore detyrimet e vogla.

The post Horoskopi 13 Gusht, ja çfarë kanë parashikuar yjet për ju appeared first on Albeu.com.

Banorët në Delvinë prej disa orësh po përballen me pamje apokaliptike teksa flakët afrohen minutë pas minute drejt banesave të tyre. Temperaturat dhe era kanë favorizuar flakët të cilat janë përhapur me shpejtësi. Të pyetur nga ZËRI, banorët shprehen se gjithçka është shkatërruar dhe se shohin vetëm tym dhe flakë.

“Çdo gjë mori fund, gjithçka u shkatërrua. Këtu nuk shihet më asgjë, vetëm tym dhe kaos”, u shpreh një banor.

Sipas tij të gjithë banorët janë larguar ndërsa pas kanë lënë mundin e gjithë jetës së tyre nën ‘pushtetin” e flakëve. Situata është alarmante pasi flakët po afrohen pranë puseve të naftës dhe një shpërthim i tyre do të ishtë i rëndë dhe me pasoja shkatërruese.

“Askush nuk e mendonte që zjarri do përhapej kaq shpejt. Era dhe temperaturat e larta e sollën këtë në qytet”, tha një tjetër banor për Zërin. Flakët i janë afruar edhe spitalit të qytetit. Mësohet se është urdhëruar largimi i bombolave të oksigjenit që të mos shkaktojnë shpërthime.

The post Zjarret në Delvinë/ “Të gjithë janë larguar”, banori: Çdo gjë mori fund, gjithçka u shkatërrua! appeared first on Albeu.com.

Departamenti amerikan i Shtetit e ka publikuar të martën raportin më të ri lidhur me respektimin e të drejtave të njeriut në botë, dhe në pjesën për Kosovën ka përmendur se Qeveria ka ndërmarrë “hapa kredibilë për jokonsistent në identifikim, hetim, ndjekje penale dhe ndëshkim të zyrtarëve që kanë kryer shkelje të të drejtave të njeriut”.

Në raportin për vitin 2024, është përmendur se Asociacioni i Gazetarëve të Kosovës (AGK) ka raportuar se ka qenë disa herë shënjestër e fushatave të shpifjeve, kur ka mbrojtur gazetarë dhe media.

“AGK-ja ka raportuar se zyrtarë qeveritarë, përfshirë kryeministrin dhe pjesëtarë të partisë politike në pushtet janë përfshirë në fushata shpifjeje për të minuar besimin e publikut në media”, është përmendur në raport.

Aty është thënë, po ashtu, se AGK-ja ka raportuar dhjetëra raste kur zyrtarë qeveritarë, liderë politikë, stafi gjyqësor, interesat biznesore, kriminelë të dyshuar, protestues dhe grupe fetare i kanë sulmuar fizikisht apo verbalisht gazetarët, duke ua dëmtuar pajisjet, apo duke kryer sulme kibernetike kundër mediave.

“Gazetarët kanë thënë se presioni prej politikanëve dhe grupeve të organizuara kriminale ka rezultuar shpesh me vetcensurë. Disa gazetarë janë përmbajtur nga hulumtimet për shkak të frikës për sigurinë fizike apo sigurinë në punë. Gazetarët kanë pranuar se në disa raste u janë ofruar përfitime financiare, në këmbim të raportimeve pozitive apo për braktisje të hulumtimeve”, është thënë mes tjerash në raport.

Kosova e ka shënuar rënien më të madhe në 15 vjetët e fundit në Indeksin vjetor për lirinë e shtypit të organizatës ndërkombëtare, Reporterët pa Kufij, duke u renditur në vendin e 99-të në botë nga 180 shtete. Ky është viti i dytë radhazi që Kosova ka shënuar rënie, pasi në vitin 2024 ra nga vendi i 56-të në atë të 75-të.

Në raportin e publikuar nga Reporterët pa Kufij, më 2 maj, Kosova është renditur më së keqi në zonën e Ballkanit Perëndimor dhe Bashkimit Evropian. Qeveria në detyrë e Kosovës i pati hedhur poshtë gjetjet e raportit të Reporterëve pa Kufij këtë vit, duke thënë se “nuk e pasqyron gjendjen e vërtetë” në Kosovë.

Në raportin e Departamentit amerikan të Shtetit është përmendur edhe miratimi i ligjit për Komisionin e Pavarur për Media, i cili, veç tjerash, parashihte licencimin e mediave online, mbikëqyrjen e tyre dhe gjoba deri në 40 mijë euro.

Gjykata Kushtetueses e ka rrëzuar këtë ligj në prill të këtij viti, pasi ka gjetur se disa nene të tij nuk ishin në përputhje me Kushtetutën e vendit. Komisioni i Pavarur i Mediave (KPM) – i themeluar në vitin 2005 – është organ kompetent për rregullimin, menaxhimin dhe mbikëqyrjen e spektrit të frekuencave të transmetimit në Republikën e Kosovës.

AGK-ja funksionon si shoqatë joprofitabile, ndërsa Këshilli i Mediave të Shkruara të Kosovës është trup vetërregullues./ REL

The post Raporti i DASH: Kosova, jokonsistente në ndëshkimin e shkelësve të të drejtave të njeriut appeared first on Albeu.com.

Këngëtarja e njohur amerikane Katy Perry po kalon një periudhë të vështirë, si në aspektin personal ashtu edhe në atë profesional.

Pas ndarjes nga aktori Orlando Bloom, e konfirmuar në fillim të muajit të kaluar, vjen një tjetër goditje: autoritetet spanjolle kanë vendosur një gjobë prej 6.000 euro ndaj shtëpisë produksioni që realizoi klipin e këngës ‘Lifetimes’, të artistes, pa leje zyrtare brenda Parkut Natyror të Ses Salines, në ishujt Balearikë.

Zona e mbrojtur, që shtrihet nga jugu i Ibizas deri në veri të Formenterës dhe përfshin gjithashtu zonën detare mes dy ishujve, është e njohur për bukurinë e saj të jashtëzakonshme natyrore dhe për vlerat e larta ekologjike. Ajo përfshin plazhe të famshme, pyje, fusha dhe ekosisteme detare që janë pjesë e trashëgimisë botërore të mbrojtur nga UNESCO.

Autoritetet e Balearit reaguan pas publikimit të klipit dhe hetimeve përkatëse, duke theksuar rëndësinë e ruajtjes së zonave të mbrojtura dhe respektimin e rregullave nga çdo produksion artistik apo komercial.

The post Katy Perry gjobitet pasi xhiroi një videoklip në një zonë të mbrojtur appeared first on Albeu.com.

Policia iraniane ka njoftuar se i ka ndaluar rreth 21.000 persona për shkelje të dyshuara të sigurisë gjatë luftës 12-ditore me Izraelin, që është zhvilluar në qershor – shifër shumë më e lartë sesa vlerësimet zyrtare të publikuara më herët.

Zëdhënësi i policisë, Saeed Montazerolmehdi, tha më 12 gusht se informacionet e marra nga qytetarët kanë luajtur rol të rëndësishëm në arrestime. Nuk dihet sa prej tyre vazhdojnë të mbahen në paraburgim.

Në mesin e të ndaluarve janë edhe 2.774 shtetas të huaj të akuzuar për spiunazh. Autoritetet thanë se në telefonat e tyre janë gjetur dëshmi për aktivitete të dyshimta, si fotografi të pozicioneve ushtarake dhe objekteve kyç, si dhe të dhëna për vendndodhjen e transmetuar. Edhe 261 persona të tjerë dyshohen për spiunazh, ndërsa 172 janë arrestuar për xhirime të paautorizuara.

Ky njoftim bie ndesh me deklaratat e fundit të shefit të gjyqësorit, Gholam Hossein Mohseni-Ejei, i cili kishte raportuar për 2.000 arrestime gjatë dhe pas konfliktit, duke theksuar se shumë prej tyre ishin liruar pasi hetimet nuk kishin gjetur prova për spiunazh ose bashkëpunim me Izraelin.

Organizatat për të drejtat e njeriut kanë shprehur shqetësim për masat e marra ndaj të dyshuarve. Agjencia e lajmeve HRANA, me seli në SHBA, ka dokumentuar qindra arrestime gjatë konfliktit, shpesh ndaj pakicave etnike dhe aktivistëve. Organizata ndërkombëtare për të drejta të njeriut, Amnesty International ka dënuar rritjen e ekzekutimeve në Iran pas luftës, duke paralajmëruar për tortura, gjykime të padrejta dhe vrasje arbitrare.

Që nga fundi i qershorit, Irani i ka ekzekutuar të paktën shtatë persona të akuzuar për spiunazh për Izraelin, përfshirë shkencëtarin bërthamor Rouzbeh Vadi. Vadi, i arrestuar mbi një vit më herët, akuzohej se kishte dhënë informacione të ndjeshme që i kishin ndihmuar operacionet izraelite.

Autoritetet iraniane shprehin shqetësim për depërtimin e thellë të shërbimit izraelit të inteligjencës Mossad, i cili, sipas tyre, ka mundësuar operacione të rënda ushtarake e të inteligjencës brenda vendit.

Në qershor, parlamenti miratoi një ligj për rritjen e ndjeshme të dënimeve për spiunazh dhe bashkëpunim me qeveri të huaja armiqësore, veçanërisht Izraelin. Edhe pse Këshilli i Gardës e rrëzoi ligjin, një zëdhënës i këtij organi tha se, me disa ndryshime, ai mund të miratohet./ REL

The post Irani arrestoi 21 mijë persona gjatë luftës kundër Izraelit në qershor appeared first on Albeu.com.

Kryeministri izraelit Benjamin Netanyahu deklaroi se shpresat për një armëpushim të pjesshëm dhe një marrëveshje për lirimin e pengjeve nga grupi Hamas kanë përfunduar.

Në një intervistë për televizionin i24, të cituar nga Times of Israel, Netanyahu përmendi edhe deklaratën e Presidentit amerikan Donald Trump, sipas të cilit Hamasi nuk është i gatshëm për një marrëveshje.

“E dëgjuat Presidentin Trump,” tha Netanyahu kur u pyet nëse armëpushimi dhe lirimi i pengjeve mbeten ende një mundësi. “Mendoj se është pas nesh. Kemi bërë gjithçka. Na është bërë e qartë se ata thjesht po na mashtrojnë. Shumë pengje, të vdekur dhe të gjallë, do të mbeten në duart e tyre.” Ai shtoi se dëshiron të gjithë pengjet, “si të gjallët ashtu edhe të rënët”.

Netanyahu njoftoi gjithashtu se Izraeli do t’u lejojë banorëve të Rripit të Gazës të largohen nëse dëshirojnë, duke përmendur se kjo është një praktikë që është ndjekur edhe gjatë konflikteve të tjera në Siri, Ukrainë dhe Afganistan. Ai i bëri thirrje vendeve të tjera që duan të ndihmojnë palestinezët t’u “hapin dyert e tyre” për t’u strehuar.

Ndërkohë, ushtria izraelite përgatit një ofensivë më të gjerë në territor, duke shtuar tensionet në rajon.

Në të njëjtën intervistë, Netanyahu foli për përkushtimin e tij ndaj një “misioni historik dhe shpirtëror” dhe vizionin e tij për “Izraelin e Madh” — një koncept që përfshin territore të ndryshme, përfshirë një shtet të ardhshëm palestinez dhe zona aktualisht pjesë e Jordanisë dhe Egjiptit. Ky term u përdor pas Luftës Gjashtëditore të vitit 1967 dhe ka ngjallur diskutime të shumta politike dhe ndërkombëtare.

Situata në Rripin e Gazës mbetet shumë e tensionuar, ndërsa Izraeli dhe grupet palestineze janë në një fazë kritike të konfliktit që po godet rëndë civilët në të dyja palët.

The post Netanyahu paralajmëron ofensivë të re në Gaza: Nuk ka armëpushim me Hamasin, banorët mund të largohen appeared first on Albeu.com.

Familjet e evakuuara nga fshatrat e Njësisë Administrative Skënderbegas të Gramshit, kanë mbërritur në ambientet e konviktit të qytetit, ku janë marrë masa për akomodimin e tyre.

Korrespondentja e Top Channel Bruna Kërçyku bën me dije se po ashtu po bëhen gati hotelet e zonës për të akomoduar njerëzit e prekur.

Tajar Bici, nënkryetar i Bashkisë Gramsh bëri me dije se kanë siguruar 120 shtretër nga konvikti dhe bizneset. Deri tanin janë 32 persona të regjistruar për t’u akomoduar në konvikt.

Pop ashtu janë marrë masa për ushqime. Aktualisht janë evakuuar drejt qytetit 32 banorë, ndërsa pjesa tjetër qëndrojnë përreth zonave për të shuar flakët, duke shpresuar deri në momentin e fundit.

Dy fshatrat Shëmbërdhenj dhe Bletas janë shkrumbuar plotësisht banesat. Ndërkohë rrezikohen fshatrat Harunas, Nartë, Shelcan, Bulçar, Snisëm, Sojnik, Probat dhe Grabova e Poshtme.

Kujtojmë se situata me zjarrin në disa fshatra të Gramshit është serioze, ndërsa një person ka humbur jetën dhe disa të tjerë kanë mbetur të lënduar.

The post Evakuimi i banorëve nga fshatrat e Gramshit pasi flakët dolën nga kontrolli, 32 familje akomodohen në konviktin e qytetit appeared first on Albeu.com.

Marrëdhënia e Adrola Dushit dhe Capital është tashmë e konsoliduar dhe çifti po shijon disa ditë relaxi në një rezidencë private buzë detit.

Është siguruar një foto nga një darkë intime ku dyshja shoqërohen nga nëna e reperit dhe djali i modeles, Troi.

Nga pamjet duket se Capital është shumë i afërt me Troin, duke ndërtuar një raport të ngrohtë dhe të shëndetshëm me të.

Edhe pse përfoljet për lidhjen e tyre datojnë prej kohësh, as Adrola dhe as Capital nuk e kanë konfirmuar publikisht marrëdhënien e tyre, megjithatë modelja është parë shpesh pranë reperit në koncertet e tij, si një mbështetëse e zjarrtë.

The post Një dashuri që nuk fshihet më/ Adrola, Capital, Troi dhe nëna e reperit në momentet më të ngrohta appeared first on Albeu.com.

Shumë vatra zjarri në vend kanë sjellë situatë alarmante në zona të ndryshme të Shqipërisë ndër të cilat edhe flakët në fshatin Lekël të Tepelenës. Mësohet se flakët e zjarrit kanë shkaktuar dëmë të shumta në bimësi por edhe në banesa.

Nuk dihet ende një numër i saktë i banesave të djegura ndërsa raportohet se flakët kanë djegur tre stane. Zjarrit nuk i ka shpëtuar as kisha ortodokse “Shën Ilia”, e cila është monument kulture.

Situata u përshkallëzua pas shpërthimit të dy bombave të mbetura në zonë që nga Lufta e Dytë Botërore.

Mësohet se ato janë aktivizuar për shkak të temperaturave të larta dhe zjarrit. Kjo situatë alarmante ka sjellë që të kryhet evakuimi i banorëve në fshatrat Lekël dhe Hormovë. Një viktimë është regjistruar sot në Gramsh nga zjarret të cilat në të gjithë vendin kanë marrë “pushtetin” edhe për shkak të temperaturave të larta dhe erës të cilat kanë qenë në favor të tyre.

The post Banesa dhe stane të djegura në Lekël të Tepelenës, shp*rthejnë dy b*mba të L*ftës së Dytë Botërore appeared first on Albeu.com.