Opinion nga Timothy Snyder, Financial Times

Vladimir Putin, arkitekti i luftës më të përgjakshme të shekullit XXI, nuk e sheh pushtimin e Ukrainës thjesht si politikë apo strategji. Ai e justifikon atë përmes një miti të lashtë, “Përralla e Viteve të Shkuara”, një kronikë mesjetare ku kryeplaku danez Rørek (i njohur si Rurik) paraqitet si themelues i një tradite të shenjtë që, sipas Putinit, legjitimon pretendimet e Rusisë mbi Kievin.

Por e vërteta historike është tjetër: Rørek nuk ka shkelur kurrë në Kiev, e aq më pak të ketë themeluar ndonjë shtet rus. Këto janë mashtrime mesjetare që shërbyen për të forcuar pushtetin e princave të asaj kohe, dhe që sot Putini i përdor për të justifikuar një luftë të përgjakshme.

Një mit që udhëton nga murgjit te Kremlini

Në vitin 862, sipas kronikës së murgjve të Kievit, sllavët i ftuan skandinavët që t’i sundonin. Historianët janë të qartë: ky ishte një trillim i huazuar nga sagat nordike, ku pushtimet justifikoheshin si “ftesa”.

Në fakt, Rørek ka sunduar në brigjet e Baltikut, por kurrë nuk ka qenë në Kiev. Vetëm një shekull më vonë skandinavët filluan të vendoseshin aty. Megjithatë, murgjit i dhanë Rørek-ut një jetë biblike, e bënë hero, e bënë “babain” e një dinastie imagjinare dhe ia sollën “trashëgimtarin” fshehurazi në Kiev.

Kjo ishte thjesht politikë e mitizuar: një mënyrë për të rritur prestigjin e sundimtarëve të Kievit.

Shekuj më vonë, Moska, e krijuar shumë më vonë se ngjarjet e shekullit IX, e përvetësoi mitin e Rurik-ut për të ndërtuar dinastinë e saj. Në 1721, Pjetri i Madh e përdori për të themeluar “Perandorinë Ruse” dhe për ta lidhur atë me një origjinë të lashtë skandinave.

Sot, Putini bën të njëjtën gjë, por në një shkallë më të rrezikshme: ai përdor mitin për të thënë se Moskës i takon Kievi, dhe se ukrainasit nuk ekzistojnë si komb më vete.

Hamlet, Putini dhe politika e mashtrimit

Historia e Rørek-ut nuk ndalet te kronikat e Kievit. Në një tjetër vepër mesjetare, Gesta Danorum, ai paraqitet si një viking pagan, gjysh i Amleth, personazhi që më vonë do të frymëzonte Shekspirin për Hamletin.

Kështu, Rørek qëndron në prapaskenën e një prej tragjedive më të mëdha të artit botëror. Por ai nuk është themelues i Rusisë, sado që Putini ta paraqesë si të tillë. Ky manipulim i së shkuarës është pikërisht ajo që filozofja Hannah Arendt do ta quante totalitarizëm: kur një regjim përdor mite për të justifikuar pushtimin dhe gjakderdhjen reale.

Ukraina, historia dhe e ardhmja

Ndërsa Putini e “ngrin” të shkuarën për ta përdorur si armë, Ukraina po rilind në një tjetër drejtim. Më shumë se një shekull më parë, mendimtarë si Mykhailo Hrushevsky dhe Ivan Franko i dhanë kombit një histori sociale dhe kulturore, jo mite dinastike. Sot, në mes të luftës, Ukraina po përjeton një ringjallje me botime të reja, histori globale, dhe një dialog të hapur me kulturat tjera.

Kjo e dallon thellësisht nga Rusia e Putinit, e cila vazhdon të jetojë me mitin e “Rusisë së përjetshme dhe të pastër”.

Aleanca e dy cinikëve

Takimi i Putinit me Donald Trump në Alaskë javën e kaluar e vërtetoi këtë tragjedi. Putini foli për “kombin vëllazëror” ukrainas, duke e lidhur me mitin e Rurik-ut. Trump, nga ana tjetër, u përqendrua te pakënaqësia e tij për faktin se njerëzit kujtojnë ende ndihmën ruse në zgjedhjet e vitit 2016.

Trump e mohoi gjithçka si një “mashtrim”, ndërsa Putini vetëm buzëqeshi. Në këtë simbiozë, Ukraina mbeti e padukshme: askush nuk përmendi qindra mijëra të vrarë e të plagosur.

Kur arti bëhet armë

Nga Rurik te Hamlet, nga murgjit mesjetarë te diktatorët modernë, arti dhe miti janë përdorur për të justifikuar pushtetin. Por kur politika kthehet në teatër mitesh, ajo sjell tragjedi reale: qytete të bombarduara, fëmijë të rrëmbyer, popuj të zhdukur nga historia.

Putini mund të besojë se po bën “të vërtetë” një legjendë të shekullit IX. Por në shekullin XXI, pasojat e këtij mashtrimi janë shumë konkrete: gjak, shkatërrim dhe humbje.

The post Mitologjia si armë, pse Putini beson se Rusia ka “rrënjë të shenjta” në Ukrainë first appeared on JavaNews.al.

Ish-presidenti i Kosovës, Behgjet Pacolli, ka denoncuar këtë të diel një episod të shëmtuar të ndodhur në dëm të disa shtetasve të Kosovës, të cilët po përpiqeshin të futeshin në Ukrainë.

“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina ka kthyer shtetasit e Kosovës në pikën kufitare me Moldavinë, jo vetëm që i ka refuzuar, por i ka ofenduar dhe keqtrajtuar, madje duke i quajtur “terroristë”. Ky nuk është rasti i parë: para disa vitesh, e njëjta Ukrainë veproi në mënyrë skandaloze me ekipin tonë kombëtar të futbollit, të cilët u detyruan të udhëtonin në Gjeorgji për të zhvilluar ndeshjen”, shkruan Pacolli në një status në Facebook, përcjell A2 CN.

Pacolli kërkon reagim nga autoritetet shtetërore për këtë sjellje nga pala ukrainase. “Ne këtu në Kosovë vazhdojmë të tregojmë solidaritet dhe dhimbje për ta, ndërkohë që ata na poshtërojnë. A nuk është koha të rishqyrtojmë qëndrimet tona ndaj atyre që nuk na respektojnë as dinjitetin më minimal?”.

The post Denoncimi i Pacollit: Ukraina pengon hyrjen e shtetasve të Kosovës në territorin e saj, i quan “terroristë” first appeared on JavaNews.al.

Në një reagim publik për ndarjen nga jeta të analistit dhe gazetarit Artur Zheji, lideri i BDI-së, Ali Ahmeti, shprehu dhimbjen dhe vlerësimin e tij për figurën e Zhejit.

Përmes një postimi në rrjetet sociale, Ahmeti e cilësoi atë si një zë të guximshëm dhe të pavarur në hapësirën mediatike shqiptare. “Humbja e tij la një boshllëk të madh në gazetari dhe në jetën publike shqiptare”, shkruan ai, duke nënvizuar kontributin intelektual dhe qytetar të Zhejit në debatin publik shqiptar.

“Me pikëllim të thellë mora lajmin për ndarjen nga jeta të gazetarit dhe analistit të njohur Artur Zheji, në moshën 63-vjeçare.

Arturi ishte një zë i guximshëm dhe i pavarur në hapësirën mediatike shqiptare. Ndonëse ndonjëherë në debate dhe diskutime publike kemi ndarë mendime të ndryshme, mirëpo gjithmonë me respekt dhe vlerësim të ndërsjellë, gjë që përbën dëshmi e integritetit dhe kulturës së tij të lartë intelektuale.

Humbja e tij lë një boshllëk të madh në gazetari dhe në jetën publike shqiptare.

Ngushëllimet e mia më të sinqerta familjes, miqve dhe kolegëve të tij. U prehtë në paqe dhe i qoftë e lehtë toka shqiptare.”, shprehet ai.

The post Ali Ahmeti për ndarjen nga jeta të Artur Zhejit: Humbje e madhe për gazetarinë dhe jetën publike shqiptare first appeared on JavaNews.al.

Një nga ushtarakët më të dekoruar të ushtrisë ruse ka rezultuar të jetë pjesë e një mashtrimi të përmasave të mëdha. Hetuesit rusë kanë zbuluar se kolonel-lejtnant Konstantin Frolov, i njohur me nofkën “Xhelati” për aftësitë e tij si snajper, ka urdhëruar trupat e tij të qëllonin qëllimisht mbi të dhe mbi njëri-tjetrin për të përfituar kompensime financiare dhe medalje nderi, përcjell A2 CNN.

Sipas raportimit të gazetës Kommersant, Frolov dhe 35 ushtarë të Brigadës së 83-të Ajrore të Sulmit arritën të përfitonin rreth 2,5 milionë dollarë nga buxheti i Kremlinit, duke inskenuar plagosje gjatë luftës në Ukrainë.

Frolov, 39 vjeç, ishte kthyer në një figurë të njohur përmes mediave shtetërore, duke rrëfyer histori për akte heroike dhe plagosje të shumta në front. Në një video të Ministrisë së Mbrojtjes në vitin 2024, ai deklaronte: “Që fëmijë, detyra dhe nderi nuk kanë qenë kurrë fjalë boshe për mua. Unë gjithmonë kam dashur të jem ushtarak, dhe u bëra një i tillë”.

Madje, ai kishte pretenduar se kishte shpëtuar dhe birësuar një vajzë të plagosur nga bombardimet ukrainase, një histori që hetimet e fundit e cilësuan plotësisht të pavërtetë.

Raportimet e rreme për plagosjet u përdorën si bazë për t’i akorduar Frolovit disa medalje për trimëri dhe guxim. Por pas një denoncimi në qershor të vitit të kaluar, autoritetet nisën një hetim të gjerë që zbardhi mashtrimin, shkruan A2 CNN.

Gjatë hetimeve, Frolov pranoi se kishte kërkuar nga ushtarët e tij të qëllonin mbi të, duke shmangur organet jetike, në mënyrë që të dukej se ishte plagosur në beteja reale. Ai madje denoncoi bashkëpunëtorët e tij për të përfituar një marrëveshje me prokurorinë.

Kremlini refuzoi kërkesën e tij për t’u rikthyer në front, ndërsa Frolov tani përballet me akuza për mashtrim në shkallë të gjerë, ryshfet, si dhe trafikim të paligjshëm armësh dhe pajisjesh shpërthyese.

The post Skandal në ushtrinë ruse! “Xhelati” i Putinit del mashtrues, plagoste veten për para dhe medalje first appeared on JavaNews.al.

Gjatë një interviste për Meet the Press, zëvendëspresidenti amerikan JD Vance mbrojti qasjen e Presidentit Donald Trump për përfundimin e luftës në Ukrainë përmes negociatave dhe kompromiseve, duke u përpjekur të largonte fokusin nga sanksionet dhe kërkesat për armëpushim që Kreu i Shtëpisë së Bardhë kishte propozuar më parë ndaj Rusisë.

Vance përdori shembuj nga historia, duke përmendur Luftën e Dytë Botërore, për të argumentuar se diplomacia është e domosdoshme për të përfunduar konfliktet e mëdha.

Megjithatë, ai gaboi kur tha se “Lufta e Dytë Botërore përfundoi përmes negociatave”.

“Nëse kthehemi te Lufta e Dytë Botërore, nëse kthehemi te Lufta e Parë Botërore, nëse kthehemi tek çdo konflikt i madh në historinë e njerëzimit, të gjithë përfundojnë me një lloj negociate,” tha Vance.

Reagimet në rrjetet sociale nuk vonuan.

Një komentues shkroi: “Vance thotë se Lufta e Dytë Botërore përfundoi me negociata, dikush t’i tregojë për Hiroshimën”. Një tjetër tha se“Lufta e Dytë Botërore përfundoi me gjithçka tjetër, por jo negociata.”

Lufta e Dytë Botërore nuk përfundoi me negociata, por u mbyll me dorëzim të pakushtëzuar të Gjermanisë më 7 maj 1945 dhe të Japonisë më 2 shtator 1945.

Sa i përket Ukrainës, Vance theksoi se çdo vendim mbi territoret e humbura nga Rusia duhet të vendoset nga vetë ukrainasit. “Së pari, ukrainasit do të vendosin vetë ku të vendosen kufijtë në vendin e tyre,” tha ai. Presidenti Volodymyr Zelensky ka bërë të qartë se nuk ka asnjë dëshirë të pranojë humbjen e territorit të pushtuar në mënyrë të paligjshme.

Qasjen e propozuar nga Trump, mbështetur nga Vance, disa kritikë e shohin të kundërt me realitetin historik dhe situatën aktuale të konfliktit në Ukrainë, ku Rusia vazhdon të kontrollojë pjesë të mëdha të territorit ukrainas që nga fillimi i pushtimit në 2022.

The post JD Vance bën gafën historike teksa flet për Ukrainë: Lufta e Dytë Botërore mbaroi sepse… first appeared on JavaNews.al.

Në mes të tensioneve gjithnjë e më të ashpra mes Shteteve të Bashkuara dhe Venezuelës, presidenti Nicolás Maduro po kërkon të thellojë lidhjet me Kinën, rivalin kryesor ekonomik të Uashingtonit.

Gjatë mbylljes së “Kongresit të Parë Pedagogjik të Mësuesve Bolivarianë”, Maduro tregoi publikisht telefonin e tij të ri Huawei, të cilin, sipas tij, ia kishte dhuruar presidenti kinez Xi Jinping. Maduro madje shtoi me humor se përmes këtij telefoni komunikonte drejtpërdrejt me liderin kinez “nëpërmjet satelitit”. “Ni hao, ni hao (përshëndetje). Xiexie, xiexie (faleminderit)”, tha ai, duke imituar një bisedë në gjuhën kineze.

Ky veprim, megjithëse simbolik, tregon përpjekjet e qeverisë së Venezuelës për të afruar më shumë Pekinin në një kohë kur presioni amerikan po rritet.

Takimi diplomatik dhe qëndrimi i Kinës

Vetëm disa ditë më parë, Maduro priti ambasadorin kinez në Karakas, Lan Hu, duke vlerësuar bashkëpunimin ekonomik, shkencor dhe teknologjik me Kinën. Ambasadori Hu ka kritikuar hapur “masat e njëanshme dhe shtrënguese” të SHBA-së ndaj Venezuelës, duke nënvizuar nevojën për një botë multipolare të bazuar në respektin reciprok.

Ndërkohë, Pekini shprehu shqetësim për dislokimin e madh ushtarak amerikan në ujërat e Karaibeve. Zëdhënësja e Ministrisë së Jashtme kineze, Mao Ning, deklaroi se Kina “kundërshton çdo kërcënim ose përdorim force që shkel sovranitetin e një vendi” dhe u bëri thirrje SHBA-së të shmangë tensionet në rajon.

Shtetet e Bashkuara rrisin presionin

Administrata Trump njoftoi dërgimin e një nëndetëseje bërthamore, avionëve zbulues dhe anijeve luftarake për të luftuar kartelet e drogës, të cilët Uashingtoni i lidh me qeverinë e Maduros. SHBA e ka akuzuar prej vitesh presidentin venezuelas si udhëheqës të “Kartelit të Diellit” dhe së fundmi ka dyfishuar shpërblimin në 50 milionë dollarë për informacion që çon në arrestimin e tij. Maduro, nga ana tjetër, shpalli mobilizimin e 4,5 milionë milicëve dhe theksoi se “asnjë perandori nuk do të prekë tokën e shenjtë të Venezuelës”.

Interesat ekonomike të Kinës

Ekspertët theksojnë se qëndrimi i Kinës është kryesisht ekonomik. Sipas të dhënave të Observatorit të Kompleksitetit Ekonomik, Kina ka një suficit tregtar prej 2,7 miliardë dollarësh me Venezuelën, duke eksportuar më shumë mallra sesa importon, ndërkohë që investon në mënyrë aktive në sektorin e naftës.

Vetëm këtë javë u raportua se një kompani private kineze ka nisur shfrytëzimin e dy fushave të naftës në Venezuelë, me plane për të investuar mbi 1 miliard dollarë deri në vitin 2026.

“Pekini ka interes që të ruajë qasjen e tij ndaj burimeve energjetike të rajonit, por kjo nuk do të thotë se Kina do të ndërhyjë drejtpërdrejt në konfliktin SHBA–Venezuelë”, tha për CNN Gabriel Pastor, analist në qendrën CERES në Uruguai.

Megjithëse Maduro po kërkon aleatë të fuqishëm përballë presionit amerikan, Kina deri më tani ka dhënë vetëm deklarata diplomatike, duke shmangur hapa konkretë që do të ndryshonin ekuilibrat në rajon.

The post Maduro i kërkon ndihmë Kinës pasi Trump i dërgoi flotën “te dera”, a do të reagojë Pekini? first appeared on JavaNews.al.

Irani ka shprehur gatishmërinë për të reduktuar programin e tij të pasurimit të uraniumit në përpjekje për të parandaluar rikthimin e sanksioneve të Kombeve të Bashkuara nga Britania e Madhe.

Zyrtarë iranianë të paidentifikuar thanë se Teherani është i gatshëm të zbusë qëndrimin e tij të ashpër për të shmangur kërcënimin e sulmeve të mëtejshme nga Izraeli ose SHBA-ja, raporton ‘The Telegraph’

Ali Larijani, këshilltar i lartë i Ajatollah Ali Khameneit dhe sekretar i sapoemëruar i Këshillit të Lartë të Sigurisë Kombëtare, po nxit liderët të bien dakord për uljen e pasurimit të uraniumit nga 60% në 20% të pastërtisë.

Vendet evropiane kanë paralajmëruar se, pa përparim konkret në çështjen bërthamore deri në fund të muajit, ato janë të gatshme të zbatojnë sanksione “snapback” të hequra si pjesë e marrëveshjes bërthamore të vitit 2015.

Sanksionet e Kombeve të Bashkuara ndaj Iranit, të lidhura me programin e tij bërthamor, janë një çështje komplekse që rrjedh nga Marrëveshja e Përbashkët Gjithëpërfshirëse e Veprimit (JCPOA) e vitit 2015 dhe Rezoluta 2231 e Këshillit të Sigurimit të OKB-së.

Këto sanksione synojnë të pengojnë Iranin nga zhvillimi i armëve bërthamore, duke vendosur kufizime në aktivitetet bërthamore dhe të raketave, si dhe kufizime tregtare dhe financiare.

Para vitit 2015, gjashtë rezoluta të Këshillit të Sigurimit të OKB-së (1696, 1737, 1747, 1803, 1835 dhe 1929) vendosën sanksione të rrepta ndaj Iranit për shkak të shqetësimeve ndërkombëtare për programin e tij bërthamor. Këto sanksione përfshinin: Embargo armësh: Ndalimi i shitjes ose transferimit të armëve të rënda, si tanke, avionë luftarakë dhe raketa. Kufizime në programin e raketave balistike: Ndalimi i aktiviteteve të lidhura me raketat balistike të afta për të mbajtur armë bërthamore. Inspektimet e ngarkesave: Shtetet anëtare të OKB-së u detyruan të inspektojnë ngarkesat nga dhe drejt Iranit për materiale të ndaluara. Ngrirja e aseteve dhe ndalimet e udhëtimit: Për individë dhe entitete të lidhura me programin bërthamor të Iranit.

Me nënshkrimin e JCPOA-së në 2015, këto sanksione u pezulluan sipas Rezolutës 2231, me kusht që Irani të kufizonte aktivitetet e tij bërthamore, duke përfshirë pasurimin e uraniumit, dhe të lejonte inspektimet nga Agjencia Ndërkombëtare për Energjinë Atomike (IAEA).

Megjithatë, mekanizmi “snapback” u përfshi për të siguruar që sanksionet mund të rikthehen shpejt nëse Irani shkelte marrëveshjen, ndërsa së fundmi, Teherani ka shprehur gatishmërinë për të reduktuar programin e tij të pasurimit të uraniumit.

The post Irani u frikësohet sanksioneve, Teherani: Të gatshëm të reduktojmë pasurimin e uraniumit first appeared on JavaNews.al.

Gazetari Richard Assheton ka udhëtuar drejt Kukësit dhe sjell historinë e kthimit vullnetar të 32-vjeçarit, Ardit Shehu.

“Ky shqiptar, azili i të cilit u refuzua, na deklaroi me një theks të rëndë londinez: ‘Bro, tani Anglia është e mbaruar’”.

Kështu nis artikulli Sunday Times.

Kjo thuhet në artikull sepse Britania e Madhe dhe Shqipëria kanë bashkëpunuar në një skemë riatdhesimi të përshpejtuar që ka zmbrapsur fluksin e mbërritjeve me gomone që në vitin 2022 arriti në gati 13.000 persona.

Sipas Sunday Times të Londrës që nga marrëveshja mes Rishi Sunak dhe kryeministrit shqiptar Edi Rama në vitin 2022, Britania ka deportuar mbi 13,000 shqiptarë.

Kjo është afërsisht trefishi i numrit të atyre që deportoheshin gjatë viteve 2010. Shqiptarët janë tani kombësia më e deportuar dhe mbërritjet e tyre me varka të vogla kanë rënë me 95%.

“Policia, sa herë që flasim [në rrugë] na ndalon”, ka thënë një shqiptarë në një kafene në Kukës . “E di? Për të arrestuar shqiptarët, vetëm shqiptarët.”

Ai kishte jetuar në Barking në lindje të Londrës dhe kishte punuar me para në dorë në të zezë, në kantier ndërtimi, por u deportua gjashtë muaj më parë, tha ai.

Ervin Hoxha, ministri i Brendshëm ka deklaruar për Sunday Times: “Përpjekjet tona të përbashkëta e kanë kthyer këtë çështje në një histori suksesi.” Ai tha se Shqipëria ishte “mirënjohëse” ndaj Britanisë për bashkëpunimin.

Edval Zoto, i cili deri vitin e kaluar drejtonte një projekt të financuar nga Britania si pjesë e marrëveshjes për kthimet dhe përpiqej të bindte njerëzit nga Kukësi të mos emigronin drejt Britanisë, tha se: “Nuk mendoj se Rama po e përdor këtë marrëveshje për përfitim politik… përveç ruajtjes së marrëdhënieve të mira me Britaninë”.

The post “Anglia ka mbaruar”, Sunday Times: Shqiptarët po kthehen vullnetarisht. Paguhen me mijëra paund nga shteti first appeared on JavaNews.al.

Psikologia e njohur, Jorida Rustemi, ka ndarë sot lajmin e hidhur për ndarjen nga jeta të bashkëshortit të saj, Vasileios Stachos, i cili humbi betejën pas një sëmundjeje të rëndë.

Përmes një mesazhi prekës në rrjetet sociale, Rustemi shprehet se bashkëshorti i saj, i njohur ndryshe si Vasili, ka luftuar me forcë dhe dinjitet për më shumë se katër vite, duke mos humbur kurrë shpresën deri në momentet e fundit të jetës.

“Me zemër të thyer ndaj me ju dhimbjen e thellë për largimin e parakohshëm të bashkëshortit tim, babait të dy fëmijëve tanë, që ende të vegjël besojnë se do të rriten me të dy prindërit pranë,”  shkruan psikologia.

Rustemi e përshkruan bashkëshortin e saj si një njeri me forcë karakteri, shpirt sipërmarrës dhe të dashur për jetën, duke shtuar se miqtë dhe kolegët e tij në mbarë botën do ta kujtojnë gjithmonë për vizionin dhe pasionin që tregonte në çdo hap.

Ceremonia mortore do të mbahet të martën, më 26 gusht, në vendlindjen e tij në Glifadha, Athinë, ku miqtë, kolegët dhe të afërmit do të kenë mundësinë t’i japin lamtumirën e fundit.

The post Humbje e madhe për psikologen Jorida Rustemi, ndahet nga jeta bashkëshorti i saj first appeared on JavaNews.al.

Nje zjarre i fuqishem ka shperthyer ne nje gomisteri ne Durres. Godina tre-kateshe, kati pare fuksiononte si biznes (gomisteri) eshte perfshire nga flaket disa minuta me pare.

Godina ndodhet te rrethrrotullimi Shkozetit. Policia ka devijuar per disa minuta trafikun, evakuoi banoret qe jetonin ne dy katet e tjera dhe i hapi rrugen zjarrefikesve dhe punonjesve te OSHEE, te cilet beren shkeputjen e energjise elektrike.

Pas rreth 20 minutash zjarrefikesit bene te mumdur lokalizimin e flakeve. Ndersa hetuesit po punojne per te mesuar shkakun e zjarrit.

The post Flakët shkrumbojnë gomisterinë në Durrës, evakuohen banorët, policia devijon trafikun first appeared on JavaNews.al.

Për dekada me radhë, sëmundjet e zemrës janë konsideruar si probleme të moshave të mëdha, apo pasojë e jetës së ç’rregullt, përdorimit të duhanit për një kohë të gjatë, kequshqyerjes, apo tensionit të lartë të gjakut. Megjithat, vitet e fundit, kardiologët kanë vërejtur një ndryshim shqetësues, teksa mosha gjithnjë e me të reja përfundojnë në pavionet e spitaleve me problem serioze të shëndetit të zemrës.

Në episodin e radhës të Apostrof Podcast, bisedojmë me mjekun kardiolog Novruz Caushaj në lidhje me këtë shqetësim në rritje të jetës moderne, si edhe arsyet përse të rinjtë sot janë më vulnerabël se kurrë më parë.

Dr. Caushaj shprehet se rritja e rasteve të problemeve kardiologjike tek të rinjtë lidhet me jetën sedentare, stresin, kequshqyerjen dhe ushqimet e procesuara, ndërsa thekson se nuk duhen anashkaluar faktorët gjenetikë.

Një nga shembujt e frikshëm që ai përmend, janë edhe pijet e energjike. “Një kanaçe e vetme e një pijeje energjike çfarëdo, përmban kafeinë sa 20 filxhanë kafeje ekspres.” Ai thotë se furnizimi i organizmit papritur me një sasi kaq të lartë kafeine, aktivizon sistemtin nervor simpatik, rrit hormonet e stresit dhe shton rrahjet e zemrës, ndërsa ul ndjeshëm kohën e relaksimit të zemrës midis kontraktimeve. Me kalimin e kohës, diçka e tillë mund të çojë në lodhje dhe problema afatgjata të zemrës.

Por, ai thkeson se shëndeti i zemrës nuk lidhet vetëm me zgjedhje individuale, ndërsa shton se stresi mbetet një nga faktorët e rëndësishëm të problemeve kardiovaskulare. Orët e gjata në punë, pasiguria ekonomike dhe presioni i vazhdueshëm social për të qëndruar në “krye të punëve,” shpesh në shoqëritë tona shpërblehet dhe normalizohet, edhe pse nga ana tjetër ndikon tërthorazi në shkurtimin e jetës. Në këtë aspekt, sëmundjet e zemër kthehen po aq çështje politike dhe sociale, sa ç’janë edhe problema mjekësore.

Dilema që ngrihet në lidhje me brezat e ardhshëm, është e frikshme: A do t’iu duhet të rinjve të mësohen të jetojnë me më tepër probleme kronike të zemrës se sa prindërit e tyre, apo jemi ende në kohë për ta ndryshuar këtë trajektore? Për Dr. Caushaj, ndërgjegjësimi përbën hapin e parë dhe thelbësor drejt mbajtjes nën kontroll të problemeve kardiologjike, veçanërisht tek të rinjtë, në të ardhmen. Nëse arrijmë të kuptojmë ndikimin që ka mënyra e jetesës dhe stimulantët e jashtëm në organizmin tonë, do të mund të hapim rrugën drejt parandalimit. Por,  nga ana tjetër, kjo kërkon edhe ndryshime kolektive, nga mjedise pune më të shëndetshme, tek vendosja e rregullave më strikte ndaj shitjes së produkteve që shpesh bëjnë më tepër dëm se sa na ndihmojnë në jetët tona të përditshme.

The post “Sëmundjet e zemrës nuk janë më ‘të pleqërisë’, Dr. Novruz Caushaj paralajmëron të rinjtë! first appeared on JavaNews.al.

Në “Hollivud” të Los Anxhelosit u zhvillua ceremonia e nisjes së thirrjes globale për krijime pamore me inteligjencë artificiale (AI), me temën “E ardhmja e ndritshme e njerëzimit.

Në mesazhin e tij në këtë aktivitet, të organizuar nga Grupi Mediatik i Kinës (CMG) dhe Akademia e Filmit e Nju-Jorkut (NYFA), drejtori i përgjithshëm i CMG-së, Shen Haixiong, theksoi që synimi është eksplorimi i rezonancës emocionale mes njerëzve e AI-së përtej kodimit dhe krijimi i vizionit të një të ardhmeje harmonie dhe bashkëjetese midis tyre.

Shen vuri në dukje më tej se kjo është një praktikë inovative në prodhimin e videove të fuqizuara nga teknologjia AI, një mundësi për dialog midis qytetërimeve nëpërmjet AI-së dhe një bashkëpunim që lidh partnerët globalë.

“Si një grup mediatik i përgjegjshëm, inovativ dhe me ndikim botëror, CMG-ja është e gatshme t’i marrë videot si një pikë lidhëse e AI-në si një urë bashkëpunimi, për të punuar me miqtë në mbarë botën, për të çuar përpara zhvillimin dhe qeverisjen e inteligjencës artificiale, për të shmangur abuzimin dhe përdorimin e gabuar të AI-së, për të ngushtuar hendekun teknologjik dhe për ta drejtuar AI-në të mbetet e përqendruar te njeriu dhe të shërbejë për të mirën e njerëzimit,” vuri në dukje drejtori i përgjithshëm i CMG-së.

Në këtë ceremoni morën pjesë mbi 100 të ftuar, përfshirë anëtarë të Akademisë së Arteve dhe Shkencave Kinematografike, të njohur ndryshe si votues për çmimet “Oscar”, drejtues të “Warner Bros.”, kineastë të njohur të “Hollivudit” dhe ekspertë të inteligjencës artificiale.

The post Mbahet në Los Anxhelos ceremonia e nisjes së thirrjes globale për krijime pamore me AI first appeared on JavaNews.al.

Pasanikët po dynden drejt Dubait në numër rekord, të tërhequr nga qyteti në shkretëtirë që ka politikë të zero taksave mbi të ardhurat dhe mënyra e lehtë e jetës luksoze, që është bërë më e vështirë që të gjendet në vende të tjera.

Emiratet e Bashkuara Arabe dhe veçmas Dubai prej kohësh kanë mirëpritur njerëz të pasur të vendeve fqinje dhe personat që ndihmojnë milionerët të zhvendosen aty i thanë AFP-së se po vërehet një rritje e perëndimorëve që po dynden drejt Dubait.

Kompania këshilluese Henley & Partners parashikon se Emiratet e Bashkuara do të tërheqin këtë vit një numër të paprecedent prej 9.800 milionerësh – më shumë se kudo tjetër në botë.

Emiratet e Bashkuara e kanë paraqitur veten si magnet për pasanikët, duke ofruar stabilitet ekonomik dhe politik me nivele shumë të ulëta kriminaliteti, një mjedis të mirë biznesi dhe qasje edhe më të lehtë te luksi.

Skema e vizave të artë e shtetit të Gjirit, e krijuar për të tërhequr të huaj të pasur ose të kualifikuar, u lejon individëve të marrin një leje qëndrimi për një periudhë 10-vjeçare.

Mike Coady, drejtues i Skybound Wealth Management, një kompani këshilluese për individë të pasur, tha se disa nga klientët e tij “ndihen sikur suksesi është bërë një barrë në vendet e tyre të origjinës”. “Ata paguajnë më shumë taksa, hetohen më shumë dhe u ofrohet më pak”, tha ai, por shtoi se në Dubai, “pasuria nuk fshihet, ajo është e normalizuar”. “Në Londër, klientët e mi flasin me zë të ulët për pasurinë e tyre. Në Dubai, ata mund të jetojnë të lirë”.

Si një destinacion kryesor për influencerët e famshëm, Dubai është bërë sinonim i shfaqjeve të ekzagjeruara të pasurisë. Qyteti është shtëpi e një qendre tregtare të jashtëzakonshme, që brenda ka një pistë skijimi, ndërtesën më të lartë në botë dhe Palmën – një ishull artificial i mbushur me hotele me pesë yje. Zhvillimi i shpejtë dhe destinacion për pasanikët nga e mbarë bota është përballur me kritika për shkak të pabarazive ekstreme, ndërsa një ushtri punëtorësh emigrantë, që kanë paga të ulëta, janë shtylla kryesore e ekonomisë.

“Shumë pak burokraci”

Coady tha se klientët e tij që po zhvendosen ishin kryesisht profesionistë në të 30-tat dhe 40-tat, përfshirë themelues të kompanive teknologjike, pronarë biznesesh, konsulentë dhe menaxherë fondesh.

Njëri prej tyre është një themelues 42-vjeçar i një kompanie të softuerit, për shkak se u frikësua nga tatimi mbi fitimet për shkak të shitjes së kompanisë, u zhvendos nga Britania në Emiratet e Bashkuara – që tani është shndërruar në eksportuesin kryesor të milionerëve.

Disa po detyrohen të largohen për shkak të një politike më rreptë tatimore për personat me status “jorezident” – ata që jetojnë në Britani, por që vendbanimin e përhershëm e kanë jashtë vendit dhe që kishin përfituar nga mospagesa e tatimeve mbi të ardhurat e fituara jashtë shtetit.

Së bashku me ndryshime të tjera që pritet të ndodhin në politikat tatimore dhe rregullat për trashëgiminë, si dhe me atë që Coady e quajti “retorikë në rritje kundër pasurisë”, pritet që Britania të humbasë një numër rekord prej 16.500 milionerësh këtë vit, sipas Henley & Partners.

Personi më i famshëm që u largua këtë vit, miliarderi John Fredriksen, i tha mediave norvegjeze se u zhvendos në Emiratet e Bashkuara për shkak se “Britania është bërë ferr”.

Duke folur në podcastin “Building Wealth With No Borders” rreth zhvendosjes së tij në Dubai, Max Maxwell, CEO i Paddco Real Estate, tha: “Të gjithë jemi duke ndjekur një mënyrë jetese, çfarëdo që kjo të nënkuptojë për secilin prej nesh”. Biznesmeni shpjegoi se pas largimit nga Shtetet e Bashkuara për në Emiratet e Bashkuara, ai zbuloi se familja e tij mund të shijonte “një mënyrë jetese më të mirë se ku ishim më parë” për të njëjtën shumë parash.

Philippe Amarante, nga Henley & Partners në Dubai, tha se pasanikët kërkojnë të ruajnë pasurinë dhe mënyrën e tyre të jetesës, si dhe mundësinë për të bërë biznes me “shumë pak burokraci”. Dhe Emiratet e Bashkuara kanë pozicionuar veten “me një mesazh shumë të qartë dhe të thjeshtë: ne jemi të hapur për biznes”, tha Amarante. Për klientët e Coadyt, “Emiratet e Bashkuara i përshtaten si dorëza”, tha ai.

“Blini komplet një ndërtesë”

Megjithatë, dyndja e pasanikëve të huaj nuk ka kaluar pa polemika. Autoritetet në Emirate kanë forcuar kontrollet kundër pastrimit të parave pasi Emiratet e Bashkuara u vunë në “listën gri” globale në 2022 për shkak të shqetësimeve mbi transaksione të paqarta financiare dhe një fluks parash nga Rusia, ndërsa të pasanikët rusë u dyndën më mënyrë masive drejt Gjirit pas pushtimit të Ukrainës, për të shpëtuar nga sanksionet shkatërruese në vendin e tyre.

Pasanikët nga e gjithë bota po marrin tani familjet, bizneset dhe zyrat private me vete drejt Dubait, “diçka që është e re,” tha Faisal Durrani, kreu i kërkimeve për Lindjen e Mesme në firmën këshilluese të pasurive të paluajtshme Knight Frank.

Dubai është tashmë një nga 20 qytetet kryesore në botë me më shumë milionerë, me 81.200 prej tyre dhe 20 miliarderë, sipas Henley & Partners. Duke tejkaluar Nju Jorkun dhe Londrën, marrë së bashku, vitin e kaluar u shitën në Dubai 435 shtëpi me vlerë 10 milionë dollarësh ose më shumë – duke e bërë atë tregun më të madh për prona luksoze, relativisht të përballueshme në Emiratet e Bashkuara krahasuar me Perëndimin, tha Durrani.

Ai tha se blerës nga vende si Monako dhe Zvicra vinin te kompania duke kërkuar, për shembull, një banesë në Dubai për 100 milionë dollarë. “Por, në Dubai për atë çmim, mund të blini një ndërtesë të tërë”./REL/

The post Pse milionerët dynden drejt Dubait? first appeared on JavaNews.al.

Në pikën kufitare të Kakavijës vijon të shënohet një fluks i lartë i qytetarëve kryesisht në dalje nga territori shqiptar. Kjo si rezultat i kthimit të emigrantëve në vendet ku jetojnë dhe punojnë, pas përfundimit të pushimeve verore.

Sipas të dhënave të bëra publike nga autoritetet kufitare, gjatë 24 orëve të fundit janë përpunuar gjithsej 12284 shtetas në hyrje – dalje të territorit shqiptare.

“Kanë vënë 4 sportele, po presim tani”.

“Po vij nga Durrësi dhe rruga ka qenë e ngarkuar se kthehen njerëzit tani”.

“Ka ndryshime përgjatë viteve edhe për kalimin në kufi edhe për rrugët”.

“Qëndrova dy javë në Shqipëri dhe tani po presim në kufi’, u shprehën disa nga udhëtarët.

Autoritetet shqiptare dhe ato greke në pikën e kalimit kufitar të Kakavijës janë angazhuar maksimalisht për të menaxhuar fluksin. Pala shqiptare po punon me 6 sportele në dalje dhe 2 në hyrje, ndërsa pala greke punon me  4 sportele në hyrje dhe një në dalje të territorit grek. Pavarësisht numrit të madh të qytetarëve, procedurat po zhvillohen në mënyrë të organizuar, ndërsa kontrollet kufitare vijojnë me intensitet të plotë.

The post Fluks i lartë në dalje të Shqipërisë. Në Kakavije, në 24 orët e fundit kaluan mbi 12 mijë shtetas në hyrje-dalje first appeared on JavaNews.al.

Shikimi i videove për një kohë të gjatë në Instagram,  TikTok ose videot e shkurtra në YouTube mund të duket si një mënyrë e padëmshme për të kaluar kohën, por neuroshkencëtarët paralajmërojnë se efektet në tru mund të jenë më alarmante dhe shqetësuese nga sa mendojmë.

Disa studime sugjerojnë që shikimi i videove të shkurtra (reels) shkaktojnë në tru të njëjtin efekt me substancat që shkaktojnë varësi si alkooli, si dhe probleme me motivimin, përqendrimin dhe madje edhe të kujtesën.

Sipas një studimi të botuar në NeuroImage, të udhëhequr nga Profesor Qiang Wang nga Universiteti i Tianjin, personat që shikojnë shumë reels-a aktivizojnë në tru të njëjtat zona si alkooli dhe bizhozi.

 “Varësia nga videot e shkurtra është një kërcënim global për shëndetin publik. Ky konsumim me intensitet të lartë  jo vetëm që dëmton vëmendjen, gjumin dhe shëndetin mendor, por gjithashtu rrit rrezikun e depresionit”, tha Prof. Wang.

Hulumtime të tjera kanë treguar se si videot e shkurtra mund të ndikojnë negativisht edhe në aftësitë njohëse dhe në kujtesën afatshkurtër.

“Sa herë që përdorim diçka që shkakton varësi, si alkooli, lojërat ose reels, niveli i dopaminës rritet, duke çuar në një ndjenjë euforie”, shpjegon studimi

Dopamina është një neurotransmetues thelbësor që luan një rol të rëndësishëm në rregullimin e humorit, motivimit dhe sistemit të shpërblimit të trurit. Ajo është e lidhur ngushtë me kënaqësinë dhe shpërblimin.

“Sa më shumë dopaminë çlirohet, aq më shumë neuro-lidhje formohen, pasi ato veprojnë si shpërblime të natyrshme. Por, ndërsa niveli ynë i varësisë rritet, dopamina vazhdon të pushtojë sistemin. Ju përfundoni duke dëshiruar më shumë nga ajo kënaqësi, si të shikoni Reels vazhdimisht”, thuhet në studim.

Çdo gjë që bëhet e tepërt mund të krijojë varësi, qoftë alkooli, lojërat apo edhe rrjetet sociale. E njëjta gjë vlen edhe për videot e shkurtra në rrjetet sociale: konsumimi i tyre pa kufij mund ta shtyjë trurin në një cikël të pashëndetshëm, prandaj vendosja e kufijve është thelbësore.

Videot e shkurtra mund të duken argëtuese, por mund të riformësojë mënyrën se si funksionon truri ynë. Duke mbistimuluar rrugët e dopaminës, ato rrezikojnë të dëmtojnë vëmendjen, kujtesën dhe madje edhe vetëkontrollin në mënyra çuditërisht të ngjashme me substancat që krijojnë varësi.

The post Shikimi i “Reels” në rrjetet sociale ka të njëjtin efekt në tru si alkooli first appeared on JavaNews.al.

Ministri i Jashtëm i Rusisë, Sergey Lavrov, ka vënë në dukje hendekun e madh mes Moskës dhe Kievit, duke shuar shpresat se presidenti amerikan Donald Trump mund të sjellë një fund të shpejtë të luftës në Ukrainë.

Në një intervistë ekskluzive për NBC News, Lavrov tha se nuk ka asnjë takim të planifikuar mes presidentit rus Vladimir Putin dhe homologut ukrainas Volodymyr Zelensky, pasi çështjet kyçe si garancitë e sigurisë për Ukrainën dhe mosmarrëveshjet territoriale mbeten pa zgjidhje.

“Putin është gati të takohet me Zelenskyn, nëse ky takim do të vendosë realisht diçka. Për një shfaqje tjetër të Zelenskyt në skenë, kjo nuk është e dobishme,” tha Lavrov.

Edhe pse Trump është takuar këtë muaj me Putinin, Zelenskyn dhe liderët evropianë, përpjekjet e tij për paqe janë zbehur nga sulmet e vazhdueshme ruse, përfshirë bombardimin e një fabrike amerikane javën e kaluar.

Shtëpia e Bardhë po kërkon një samit Putin-Zelensky, por Lavrov këmbëngul se është Ukraina ajo që po bllokon procesin, bashkë me udhëheqësit evropianë që “nuk duan paqe”.

Mosmarrëveshje për territoret dhe NATO-n

Lavrov tha se Ukraina po refuzon kërkesat për dorëzimin e Krimesë dhe Donbassit të pushtuar, si dhe për braktisjen e synimit për t’u anëtarësuar në NATO. “Zelensky i tha jo gjithçkaje. Si mund të takohemi me një njeri që hiqet si lider?” u shpreh ai.

Megjithëse Rusia mban nën pushtim rreth 20% të territorit të Ukrainës, Moska këmbëngul që nuk ka “interes për territore”, por vetëm për mbrojtjen e “popullsisë etnike ruse” që jeton aty prej shekujsh.

Civilët

Sipas OKB-së, Rusia ka vrarë ose plagosur afër 50 mijë civilë që nga nisja e agresionit në vitin 2022, përfshirë gra e fëmijë në spitale, kisha dhe shkolla. Vetëm javën e kaluar, një kopësht fëmijësh në Lviv u godit nga raketat ruse.

Lavrov i hodhi poshtë akuzat, duke pretenduar se Rusia nuk ka sulmuar kurrë civilë dhe duke akuzuar Ukrainën për goditje të qëllimshme ndaj kishave e vendbanimeve.

Putin, Trump dhe “drita në fund të tunelit”

Edhe pse sulmet ruse janë dyfishuar që prej marrjes së detyrës nga Trump në janar, Putin e ka vlerësuar presidentin amerikan, duke e cilësuar takimin e tyre të fundit në Alaska si “shumë të mirë” dhe duke thënë se “me Trump ka një dritë në fund të tunelit”.

Lavrov ndërkohë theksoi se garancitë e sigurisë për Ukrainën nuk mund të diskutohen pa përfshirjen e Rusisë, ndërsa hodhi dyshime mbi legjitimitetin e Zelenskyt, pasi zgjedhjet presidenciale në Ukrainë janë shtyrë për shkak të ligjit ushtarak.

Pesimizëm në Washington

Zëvendëspresidenti amerikan JD Vance tha se Rusia ka bërë “lëshime të rëndësishme”, përfshirë njohjen e integritetit territorial të Ukrainës pas luftës, por pranoi se negociatat janë “plot me pengesa”.

Edhe vetë Trump ka ulur tonet, duke thënë se dy javët e ardhshme do të jenë vendimtare për vendimin e madh: “Ose sanksione masive, ose tarifa masive! Ose s’bëjmë asgjë dhe themi është lufta juaj!”

The post Lavrov “shuan” shpresat: Ukraina dhe liderët europianë nuk duan paqe first appeared on JavaNews.al.

Kjo është nëndetësja 105, e publikuar nga kryeministri Edi Rama në rrjetet sociale, dikur krenari e flotës ushtarake, por sot ka marrë një kuptim të ri. Vajzat dhe djemtë e orkestrës së Forcave të Armatosura sjellin tingujt e “Ritfolk” mbi kuvertën e nëndetëses, në brigjet e Pashalimanit.

Kjo performancë vjen si shembull se si trashëgimia ushtarake dhe kujtesa historike mund të rigjallërohen përmes kulturës, duke e bërë Pashalimanin jo vetëm një pikë referimi për historinë e marinës shqiptare, por edhe një hapësirë tërheqëse artistike që bashkon kujtesën me krijimtarinë.

Nëndetësja 105 është një nga katër nëndetëset që Shqipëria mori nga Bashkimi Sovjetik në vitet ’50. Me kalimin e kohës doli jashtë përdorimit aktiv dhe, ashtu si të tjerat, u çarmatos. Pashalimani mbeti si relikë historike, ndërsa sot është shndërruar në një platformë të pazakontë koncertesh.

The post Nëndetësja 105, nga një relikë ushtarake në platformë arti, Rama ndan videon first appeared on JavaNews.al.

Sikur të mos mjaftonte barazimi 3-3 ndaj St Pauli, te Borussia Dortmund duhet të përballen edhe me një situatë të pazakontë.

Shkak është bërë mesfushori Jobe Bellingham, i cili u transferua këtë verë nga anglezët e Sunderland.

19-vjeçari luajti vetëm një pjesë ndaj St Pauli, pasi trajneri Niko Kovac e zëvendësoi në fillimin e fraksionit të dytë, pasi nuk ishte i kënaqur me paraqitjen e treguar.

Sipas mediave gjermane, kjo nuk është pritur aspak mirë nga babai i futbollistit, Mark Bellingham, i cili pas ndeshjes takoi drejtorin sportiv Sebastian Kehl, duke treguar pakënaqësitë.

Ai madje shpërtheu ndaj trajnerit Niko Kovac, me të cilin kërkoi takim pas ndeshjes. Sipas tij, tekniku kroat ishte shkaku që ekipi nuk fitoi, ndërsa e akuzoi edhe për zëvendësimin e të birit.

Kjo situatë mund të tensionojë më tej marrëdhëniet dhe rrezikon që Jobe Bellingham të dënohet nga stafi teknik, për përfshirjen e prindërve në vendimet e skuadrës.

The post Situatë e pazakontë te Dortmund, babai i Jobe Bellingham “kapet” me trajnerin first appeared on JavaNews.al.

Ishulli i Hauait është prekur nga një vullkan i madh. Llava raportohet të ketë shpërthyer të shtunën në mbrëmje dhe besohet se valët janë hedhur deri në 30 metra në ajër.

Videoja e publikuar nga Shërbimi Gjeologjik i Shteteve të Bashkuara tregon vullkanin, i cili ka shpërthyer në Ishullin e Madh të Hawaiit, për herë të 31-të në më pak se një vit – duke e bërë atë një nga vullkanet më aktivë në botë.

Llava filloi të shpërthejë nga vullkani rreth orës 14:04 sipas orës lokale. Aktiviteti i vullkanit monitorohet nga afër dhe ky incident i ri nuk kërcënoi asnjë shtëpi.

The post Llava arrin 30 metra lartësi! Shpërthen vullkani “i fjetur” në ishullin Hawaii first appeared on JavaNews.al.

Seanca vendimtare për fatin e mandatit të koalicionit “Nisma Shqipëria Bëhet” zhvillohet të hënën në orën 10:00 në Kolegjin Zgjedhor.

Kreu i subjektit politik Adriatik Lapaj ka depozituar më 4 gusht një ankim pranë Gjykatës Administrative të Apelit Tiranë, duke kontestuar vendimet e KQZ dhe KAS që e lënë jashtë Kuvendit.

Lapaj  kërkon të njihet si fitues i listës së hapur me votat preferenciale për qarkun e Tiranës dhe mosnjohjen si të vlefshme dorëheqjet e 15 dhe 17 korrik nga Zeqir Kordhoni dhe Kleana Xhuveli.

Më 23 korrik, Kryekomisioneri Ilirjan Celibashi vendosi që mandati i vetëm i fituar nga Nisma “Shqipëria Bëhet” t’i jepet Kleana Xhuvelit e renditur e 4-ta në listën e mbyllur të subjektit. Por më 30 korrik, KAS rrëzoi këtë vendim dhe mandati iu kalua të parës së listës së mbyllur, Ana Dajko, duke anuluar vendimin paraprak dhe dorëheqjet.

Seanca e 25 gushtit do të vendosë nëse Adriatik Lapaj do të hyjë në Kuvend, duke përcaktuar fatin e mandatit dhe interpretimin e rregullave për listat e hapura dhe mbyllura.

The post Seanca vendimtare për Lapajn, Kolegji vendos të hënën për fatin e mandatit first appeared on JavaNews.al.