Kryetarja e komanduar e Bashkisë së Tiranës, Anuela Ristani, ka bërë një apel për qytetarët që të tregojnë kujdes për shkak të motit të përkeqësuar që pritet në ditët në vijim.

Sipas Buletinit Meteorologjik të Shërbimit Meteorologjik Ushtarak, nga data 29 gusht deri më 2 shtator vendi do të përballet me situata të vështira atmosferike, me reshje shiu me intensitet të lartë.

“Të dashur qytetarë,

Sipas Buletinit Meteorologjik të Shërbimit Meteorologjik Ushtarak, për periudhën 29 Gusht 2 Shtator priten situata të vështira atmosferike me reshje shiu me intensitet të lartë.

Ju këshillojmë të tregoni kujdes gjatë këtyre ditëve, të shmangni lëvizjet e panevojshme në zonat me rrezik përmbytjeje dhe të merrni masat e nevojshme për sigurinë tuaj dhe të familjeve tuaja, shprehet Ristani.

Ajo garantoi se strukturat e Bashkisë së Tiranës dhe Emergjencat Civile janë në gatishmëri të shtuar për menaxhimin e situatës.

“Strukturat e Bashkisë dhe Emergjencat Civile janë në

gatishmëri të shtuar për menaxhimin e situatës.

Për çdo rast emergjent, mund të kontaktoni në numrat:

112 – Emergjencat Civile

S

127 -Urgjenca Mjekësore

128 – Policia

Bashkia është pranë jush dhe në shërbimin tuaj 24/7”,-nënvizon Ristani.

Forcat e Mbrojtjes së Izraelit kanë konfirmuar eliminimin e një figure të lartë të organizatës terroriste ISIS në Rripin e Gazës, gjatë një sulmi ajror të kryer nga Komanda Jugore dhe Inteligjenca Ushtarake.

Lajmi u bë i ditur përmes një deklarate në rrjetin social X, ku IDF njoftoi se Muhammad Abd al-Aziz Abu Zayda, i njohur si kreu i distriktit “Palestinë”, është vrarë në zonën e Al-Bureij.

Sipas deklaratës zyrtare, Abu Zayda ishte figura më e lartë e ISIS-it në Gaza, përgjegjës për përcaktimin e politikave, planifikimin dhe ekzekutimin e operacioneve të grupit në disa rajone, përfshirë Judenë, Samarainë, Gazën dhe gadishullin e Sinait.

Ai kishte rol kyç në transferimin e armëve dhe pajisjeve luftarake si dhe në sigurimin e fondeve për veprimtarinë terroriste të grupit në rajon.

Krahas operacionit në Gaza, forcat izraelite kanë ndërmarrë edhe një tjetër sulm ajror të koordinuar në Libanin jugor, duke eliminuar Ahmed Na’im Matuk, një komandant i lartë i Forcës “Radwan” të Hezbollahut.

Sipas IDF-së, Matuk ishte kreu i një shtabi batalioni dhe ka qenë i përfshirë në planifikimin e disa komploteve kundër Izraelit që nga nisja e konfliktit.

Një episod i pakëndshëm përfshiu notaret italiane Benedetta Pilato dhe Chiara Tarantino, të cilat u ndaluan në aeroportin e Singaporit, pas përfundimit të Kampionatit Botëror të Notit dhe një pushimi në Bali.

Sipas autoriteteve lokale, kamerat e sigurisë i kanë filmuar teksa vendosnin disa objekte të marra nga një dyqan brenda aeroportit në çantën e Pilatos.

Të dyja u ndaluan nga policia pak para se të hipnin në avion për të shkuar drejt Italisë dhe kaluan disa orë nën arrest, deri në ndërhyrjen e Ambasadës Italiane dhe të Ministrisë së Jashtme italiane. Pas sqarimeve të dhëna, ato morën një leje të posaçme për t’u kthyer në Itali, duke shpëtuar vetëm me një paralajmërim.

Në një reagim publik, Benedetta Pilato deklaroi se nuk ka pasur kurrë qëllim të kryejë veprime të papërshtatshme dhe theksoi se gjithçka ka ndodhur pa dashje. “Kam bashkëpunuar plotësisht me autoritetet dhe kam qenë transparente. Kush më njeh, e di sa shumë vlerësoj ndershmërinë dhe sportin“, tha ajo.

Ndërkohë, Federata Italiane e Notit ka reaguar me një deklaratë, ku thekson se ngjarja ka ndodhur jashtë aktiviteteve zyrtare dhe gjatë një periudhe pushimesh, duke shtuar se do ta vlerësojë me kujdes këtë çështje në vijim.

Përmes një dekreti, presidentja e Kosovës, Vjosa Osmani, ka harmonizuar listën e vendit për organizatat e huaja terroriste me atë të Shteteve të Bashkuara.

Në mesin e organizatave që i janë shtuar listës janë kartele, por edhe Ansar Allah nga Jemeni, apo rebelët Huthi.

Pesidentja Osmani tha se Kosova qëndron pranë SHBA-së në luftën kundër krimit të organizuar transnacional dhe terrorizmit, karteleve të drogës e regjimeve kriminale “sepse udhëheqja amerikane e bën botën më të sigurt”.

“Historia tregon një të vërtetë të thjeshtë: kur Amerika udhëheq, ka më shumë paqe, më shumë siguri dhe më shumë liri globalisht. Kosova gjithmonë do të qëndrojë pranë SHBA-së për të avancuar këtë vizion dhe në përpjekje për të luftuar të gjithë ata që rrezikojnë sigurinë kombëtare të aleates sonë më të rëndësishme”, shkroi Osmani.

Në dekret përmenden dy urdhrat ekzekutiv të Trumpit të lëshuara në janar të këtij viti. Përmes këtyre urdhrave Trump vendosi në listën e organizatave të huaja terroriste një sërë kartelesh, por edhe grupe të tjera.

Më 20 janar ai lëshoi urdhrin ekzekutiv për të futur në listën e organizatave të huaja terroriste: Cártel del Golfo , Cártel de Jalisco Nueva Generación, Cártel de Sinaloa, Cártel del Noreste, Carteles Unidos, La Nueva Familia Michoacana, Mara Salvatrucha (MS-13) dhe Tren de Aragua.

Ndërkaq, përmes urdhrit të 22 janar, SHBA-ja shpalli sërish organizatë terroriste Ansar Allah, apo rebelët Huthi në Jemen. Ky grup ka mbështetjen e Iranit.

Gjatë mandatit të tij të parë presidencial, Trump e kishte shpallur rebelët Huthi si organizatë të huaj terroriste, por ai vendim ishte shfuqizuar nga administrata e Joe Bidenit për shkak të shqetësimeve se një gjë e tillë mund të pengonte dërgimin e ndihmave të domosdoshme në Jemen.

Edhe në të kaluarën, Kosova ka harmonizuar listat e organizatave terroriste me ato të shpallura nga SHBA-ja. Një hap të tillë ndërmori më 2020, kur shpalli Hezbullahun e Libanit organizatë terroriste./REL

Gjykata e Tiranës ka dënuar 5 persona si të përfshirë në një rast mashtrimi për t’i zhvatur paratë një biznesmeni ndërtues.

Vendimi është dhënë në muajin korrik nga togat e zeza, ku “truri” i kësaj skeme mashtruese është dënuar në mungesë pasi nuk është arrestuar.

Bëhet fjalë për Xhensil Hidën, i cili pretendonte se ishte kryebashkiaku i Tiranës, Erion Veliaj, dhe i dërgoi SMS në aplikacionin “Telegram” një ndërtuesi në Tiranë duke i kërkuar një shumë parash 70 mijë euro, me pretendimin se i nevojiteshin një miku të tij.

“Më pasi ai i ka thënë se do t’ja dërgonte lekët te ai (duke nën kuptuar zyrën e Kryetarit të Bashkisë) dhe ai i ka thënë se nuk i donte lekët tek zyra, por do shkonte t’i merrte një person. Ditën e ngjarjes, ai i ka kërkuar t’i dërgonte një numër kontakti që t’i jepte lekët, dhe i ka thënë se do t’i dërgonte një numër dhe se i ka kërkuar të mos vonohej por të nisej për Vlorë. Më pas e ka marrë një numër telefoni duke i thënë se ishte tek lokal “****” në Lushnje duke i thënë se do të merrte porosinë, por kallëzuesi i ka kërkuar të vinte te biznesi i tij pranë “****”, Tiranë. Rreth orës 13:05 e ka telefonuar përsëri duke i thënë të dilte se ishte te parkimi i “****””, thuhet në vendim.

Hida është gjykuar në mungesë dhe u dënua me 3 vite burgim, që për shkak të gjykimit të shkurtuar, përfundimisht me 2 vite.

Ndërsa i pandehuri tjetër, Leonard Xhika, u dënua gjithashtu me 2 vite burgim pas aplikimit të gjykimit të shkurtuar, por dënimi u pezullua në 4 vite shërbim prove.

Xhika ishte personi që kishte shkuar të merrte paratë nga ndërtuesi, sipas udhëzimit që i kishte dhënë Xhensil Hida.

Kurse 3 personat e tjerë, Mikel Panxhi, Xhonatan Xhaferri dhe Petro Ferzaj, u dënuan me nga 8 muaj burg për veprën penale të moskallëzimit të krimit. Këta ishin personat, të cilët u kontaktuan nga Xhensil Hida që të merrnin shumat e pretenduara të parave nga Leonard Xhika.

Në fakt, dorëzimi i vërtetë i parave nuk ndodhi asnjëherë, pasi ndërtuesi kishte njoftuar autoritetet dhe takimi që u realizua ishte i simuluar. Brenda çantës së pretenduar të parave, në fakt nuk kishte shuma monetare, por ishte e mbushur me letra. Pas dorëzimit të çantës nga biznesmeni, ndërhyri policia duke bërë arrestimet.

Biznesmeni ndërtues, i cili denoncoi ngjarjen, ka sqaruar se me personat në fjalë nuk ka njohje të mëparshme. Kjo ishte hera e dytë që persona të caktuar tentonin ta mashtronin për t’i marrë para. Rasti i parë kishte ndodhur 2 vite më parë, nga persona të tjerë.

Presidenti francez Emmanuel Macron ka dhënë një deklaratë të fortë gjatë një konference për shtyp, ku ka ngritur shqetësime të qarta mbi qasjen e presidentit amerikan Donald Trump ndaj krizës në Ukrainë, nëse ai nuk respekton angazhimin për t’u takuar me presidentin ukrainas Volodymyr Zelensky.

Macron tha se një “paqe e drejtë dhe e qëndrueshme” është e mundur vetëm nëse Ukraina merr garanci të forta sigurie nga fuqitë perëndimore dhe se takimi i propozuar me Putinin është thelbësor për t’i dhënë një drejtim real diplomatik përpjekjeve për paqe.

Megjithatë, Macron paralajmëroi se nëse presidenti rus Vladimir Putin nuk përmbush angazhimin e tij për t’u përfshirë në një takim dy ose trepalësh me Zelenskyn, siç ishte rënë dakord në diskutimet me Trumpin, atëherë do të ishte e qartë se ai “e ka luajtur” Trumpin për interesat e veta.

“Ky do të ishte një shembull tjetër i përpjekjeve të Putinit për të manipuluar marrëdhëniet ndërkombëtare përmes paqartësive dhe premtimeve të pambajtura,” tha Macron, duke theksuar se mosrespektimi i këtij angazhimi duhet të sjellë pasoja të qarta, përfshirë sanksione të reja kundër Rusisë.

Presidenti francez la të kuptohet gjithashtu se ai dhe kancelari gjerman Friedrich Merz mund të flasin me Trump gjatë fundjavës, për të ritheksuar rëndësinë e rolit amerikan në mbështetjen ndaj Ukrainës dhe nevojën për unitet në qëndrimin ndaj Kremlinit.

Edi Rama ka reaguar pas deklaratës së Këshillit të Lartë Gjyqësor, të cilët kanë shprehur pakënaqësi ndaj kritikave të kryeministrit ndaj një gjyqtari një ditë më parë.

Përmes një postimi në Facebook, Rama ka vijuar t’i cilësojë skandaloze vendimet e disa gjyqtarëve, që sipas tij janë në dëm të interesit publik.

Po ashtu, në postimin e tij Rama ka thënë se KLGJ ka harruar se si instanca më e lartë e vetëqeverisjes së gjyqësorit, ka jo vetëm të drejtën, por edhe detyrën të marrë seriozisht shqetësimet e palëve të cënuara nga ato që sipas tij janë vendime qorre të gjykatësve.

Reagimi i Ramës

Lexova reagimin e KLGJ, organi më i lartë i vetëqeverisjes së gjyqësorit, lidhur me çka unë kam ndarë me publikun për disa vendime skandalozisht brutale në mbrojtje të zaptuesve të hapësirës publike dhe në dëm të rendit ligjor, interesit publik si edhe komuniteteve të cënuara drejtëpërdrejt nga këto vendime. KLGJ i ka rënë shumë gjatë, duke harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë. KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cënuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik. KLGJ ka harruar edhe të tjera gjëra më shumë rëndësi, por të paktën ka thënë një të vërtetë që më gjen shumë dakord, duke nënvizuar se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”. Duke e mbyllur me kaq për sot, u them anëtarëve të KLGJ të mos harxhojnë kohën e tyre për të gjykuar se si e bëj unë punën për të cilën më ka votuar populli shqiptar – gjykatësi im i përditshëm të cilit unë nuk kam se si të mos ia shpjegoj hapur pse nuk largohen njësoj si të tjerat ca ngrehina të paligjshme në mes të rrugës, që marrin mbrojtjen e pajustifikueshme të ca gjykatësve të pandjeshëm ndaj interesit publik – po të përqëndrohet tek puna e vet, që gjermësot le shumë për të dëshiruar në funksion të Shqipërisë 2030 në BE.

Një tjetër tragjedi në brigjet e Spanjës. Të paktën 69 persona kanë vdekur dhe dhjetëra të tjerë rezultojnë të zhdukur pasi një varkë u përmbys në brigjet e Mauritanisë.

Roja bregdetare tha se të paktën 19 persona janë shpëtuar, ndërsa ende vazhdojnë kërkimet për pasagjerë të tjerë. Sipas dëshmive në varkë dyshohet se ishin rreth 160 persona kryesisht nga Gambia dhe Senegali.

Udhëtimi i rrezikshëm përmes Oqeanit Atlantik është bërë një rrugë gjithnjë e më e zakonshme për emigrantët që përpiqen të arrijnë në Evropë.

Komisariati i policisë Kolonjë zbardh ngjarjen ku u gjet një kufomë thuajse e dekompozuar në fshatin Mollas.

Kufoma u zbulua nga një banor i zonës i cili lajmëroi policinë në datën 7 të muajit korrik. Këta të fundit, dërguan monstra për kryerjen e analizës së ADN-së dhe po ashtu për ekspertizën antropologjike për të bërë të mundur identifikimin e kufomës.

Mësohet se ditën e sotme është bërë identifikimi i viktimës, konkretisht një i moshuar 75-vjeçar, i cili banonte në qytetin e Korçës. Në qershor të këtij viti, ka qenë bashkëshortja e viktimës që ka kallëzuar pranë komisariatit të Korçës se kishte humbur kontaktet me bashkëshortin e saj.

Pas analizave shkencore u konfirmua edhe identiteti i 75-vjeçarit. Islam Fixha dyshohet se vuante nga probleme të shëndetit, konkretisht nga humbja e kujtesës (skleroza) dhe ka ndërruar jetë për shkaqe natyrale në fshatin Mollas të Kolonjës. Nga ana e policisë së Kolonjës, vijon puna për dokumentimin e plotë të ngjarjes.

Kryetarja e Kuvendit, Elisa Spiropali  deklaron se në mbledhjen e kësaj të premteje të Komisionit për Çështjet Europiane, Kuvendi përfundoi shqyrtimin e pozicioneve negociuese për gjashtë grupkapitujt.

Në një reagim në “Facebook”, Spiropali shkruan se në këtë mbledhje Kuvendi shqyrtoi draftpozicionin negociues për Grupkapitullin V “Burimet, bujqësia dhe kohezioni”.

Më tej kryeparlamentarja shkruan se pritet që së shpejti të mbahen dhe dy konferencat ndërqeveritare BE-Shqipëri, të cilat, me hapjen e negociatave për grupkapitujt IV dhe V, do të shënojnë hapjen e negociatave për të gjithë grupkapitujt.

Spiropali thekson “Anëtarësimi i Shqipërisë në BE është kryefjala e Legjislaturës XI dhe e Kuvendit të ri.”

Reagimi i Spiropalit

Me mbledhjen e sotme të Komisionit për Çështjet Europiane, Kuvendi shqyrtoi draftpozicionin negociues për Grupkapitullin V “Burimet, bujqësia dhe kohezioni”.

Me këtë mbledhje përfunduam shqyrtimin e pozicioneve negociuese për gjashtë grupkapitujt:

I “Themelorët”,

II “Tregu i brendshëm”,

III “Konkurrueshmëria dhe rritja gjithëpërfshirëse”,

IV “Agjenda e gjelbër dhe ndërlidhja e qëndrueshme”,

V “Burimet, bujqësia dhe kohezioni”,

VI “Marrëdhëniet me jashtë”, të cilat i janë paraqitur për miratim Këshillit të Ministrave.

Presim shumë shpejt mbajtjen e dy konferencave ndërqeveritare BE-Shqipëri, të cilat, me hapjen e negociatave për grupkapitujt IV dhe V, do të shënojnë hapjen e negociatave për të gjithë grupkapitujt.

Anëtarësimi i Shqipërisë në BE është kryefjala e Legjislaturës XI dhe e Kuvendit të ri.

Midis shkarkimeve reale dhe atyre të fshehta (që do të thotë shkarkime konsensuale), Jose Mourinho e ka pasuruar ndjeshëm portofolin e tij.

Sipas të dhënave të mbledhura nga Daily Mail, thuhet se ‘Special One’ ka fituar mbi 100 milionë euro (konkretisht një shifër marramendëse prej 103 milionë eurosh). Kjo shumë e madhe ndahet midis shtatë herëve që ish-trajneri i Interit është ndarë nga ish-klubet e tij, ndonjëherë në një mënyrë të ‘stuhishme’.

Chelsea mban rekordin, duke i paguar atij 31 milionë euro në dy raste të ndara. Real Madrid, Manchester United dhe Tottenham gjithashtu kontribuan në këtë investim.

Përveç Romës, nga e cila Mourinho mori “vetëm” 3 milionë euro. “Dhurata” e fundit vjen nga Fenerbahce, e cila do t’i paguajë atij 9 milionë euro pas aventurës së tij në Turqi, e cila zgjati pak më shumë se një vit.

Gjatë fundjavës priten reshje shiu në disa qarqe në vend, pas temperaturave të larta që na kanë shoqëruar përgjatë këtyre muajve të verës.

Sipas Shërbimit Meteorologjik Ushtarak, reshje intensive priten në qarqet Lezhë dhe Durrës.

Ndërsa, në qarqet Shkodër, Dibër, Tiranë, Vlorë dhe Gjirokastër priten reshje mesatare deri lokalisht intensive, në qarkun Kukës priten reshje mesatare ndërsa në qarqet e tjerë priten reshje të dobëta deri lokalisht mesatare.

Reshjet priten të shoqërohen me shtrëngata pothuajse në të gjitha qarqet. Sot pasdite dhe nesër (e shtunë, 30 gusht) era pritet të fryjë e lehtë deri mesatare, për momente të shkurtra deri e fortë në bregdet dhe zonat malore.

Temperaturat minimale dhe maksimale të ajrit pritet të arrijnë: në bregdet: 21 / 24 °C, në vendet e ulëta: 19 / 25 °C, në vendet malore: 14 / 28 °C.

Si pasojë e motit me shi, është ndaluar pajisja me leje-nisje e mjeteve të vogla lundruese dhe ato të peshkimit të cilat duan të operojnë jashtë gjirit të Vlorës në det të hapur duke filluar nga ora 10:00 datë 30 gusht.

‘Njoftim për kushtet hidrometeorologjike detare datë 30.08.2025, në bazë të parashikimit për situatën hidrometeorologjike të përkeqësuar jashtë gjirit të Vlorës, gjatë datës 30.08.2025 duke filluar nga ora 12:00 datë 30.08.2025, kushtet hidrometeorologjike do të jenë në drejtimin jug-jug-lindje në forcën deri 5-6bft me shpejtësi ere deri 10-15m/s dhe lartësi dallge nga 1.00 deri 1.50 metra, kërkojmë: Është ndaluar pajisja me leje-nisje e mjeteve të vogla lundruese dhe ato të peshkimit të cilat duan të operojnë jashtë gjirit të vlorës në det të hapur duke filluar nga ora 10:00 datë 30.08.2025.

Të gjithë drejtuesit e mjeteve të vogla lundruese dhe anijeve të peshkimit që operojnë brenda gjirit të Vlorës dhe Himarës të marin në konsideratë kushtet hidrometeorologjike dhe marjen e masave për sigurimin e tyre. Me qëllim parandalimin e çdo situate të papritur për shkak të kushteve atmosferike, kërkojmë bashkëpunimin e të gjithë subjekteve dhe institucioneve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gadishmerisë së ekuipazhit në mjetet lundruese.

Anijet e transportit ndërkombëtar detar do të vazhdojnë të operojnë normalishtë sipas destinacioneve përkatëse. Përmirësimi i situatës hidrometeorologjike të përkeqësuar për mjetet e vogla lundruese dhe të peshkimit do të jetë mbas orës 08:00 të datës 31.08.2025.

Pas kritikave të kryeministrit Edi Rama për gjyqtarin Ligoraq Toshi, ka reaguar Këshilli i Lartë Gjyqësor.

Në një reagim publik, KLGJ thotë se deklarata të tilla cënojnë figurën e gjyqtarëve dhe minojnë pavarësinë e gjyqësorit.

Këshilli i Lartë Gjyqësor apelon që për çdo pretendim në lidhje me vendimet gjyqësore, të bëhet ankim në një gjykatë më të lartë.

Gjyqtari Ligoraq Toshi ishte i radhës që u kritikua nga Kryeministri Edi Rama, pas Hazbi Balliut dhe Klarent Demirit.

Sipas kreut të qeverisë, Toshi  nuk ka lejuar prishjen e një ndërtese pa leje që ka bllokuar hapësirën mes dy pallateve në Tiranë.

Deklarata e Këshillit të Lartë Gjyqësor:

Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cënojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.

Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.

Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.

KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.

Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.

Jose Mourinho nuk është më trajneri i Fenerbahçes. Sipas gazetarit të njohur të merkatos, Fabrizio Romano, klubi turk ka vendosur ta shkarkojë teknikun portugez pas dështimit për të siguruar një vend në fazën grupore të Ligës së Kampionëve.

Emër i madh në botën e futbollit, Mourinho ishte prezantuar me bujë si trajner i Fenerbahçes një vit më parë më parë, menjëherë pas largimit të tij nga AS Roma. Por aventura në Stamboll duket se ka qenë më e shkurtër se ç’pritej për 62-vjeçarin, i cili nuk arriti të përmbushte objektivat e klubit për sezonin e ardhshëm.

Romano, përmes një postimi në rrjetin social X, konfirmoi lajmin, duke theksuar se “moskualifikimi në Champions ka qenë vendimtar për të ardhmen e Mourinhos në klub”.

Trajneri portugez, i njohur për sukseset e tij me ekipe si Porto, Chelsea, Inter, Real Madrid dhe Manchester United, nuk arriti të lërë gjurmë në eksperiencën e tij më të fundit.

Largimi i tij shënon një tjetër ndalesë të shkurtër në një karrierë të gjatë dhe shpeshherë të luhatshme në vite të fundit.

Fenerbahçe pritet të bëjë publike së shpejti vendimin dhe hapat e radhës për zëvendësimin e tij në pankinë.

Turqia ka ndërmarrë masa të reja të ashpra ndaj Izraelit, duke përshkallëzuar më tej reagimin diplomatik dhe ekonomik ndaj ofensivës izraelite në Gaza.

Ministri i Jashtëm turk, Hakan Fidan, njoftoi gjatë një seance në parlament se Ankaraja ka ndaluar hyrjen e anijeve izraelite në portet turke, ndërsa njëkohësisht u ka ndaluar edhe anijeve me flamur turk të shfrytëzojnë portet izraelite.

Përveç masave detare, Fidan bëri të ditur se janë vendosur edhe kufizime në hapësirën ajrore turke për avionët që lidhen me Izraelin, duke përfshirë ndalimin e hyrjes për avionë që transportojnë armë dhe municione me destinacion shtetin hebre.

“Ne e kemi ndërprerë plotësisht tregtinë me Izraelin, kemi mbyllur portet tona për anijet izraelite dhe nuk po lejojmë as anijet tona të shkojnë në portet izraelite”, deklaroi Fidan.

Më tej ai shtoi “Nuk do të lejojmë as anije kontejnerë që transportojnë armë e municione për në Izrael të hyjnë në portet tona apo avionë të tillë të fluturojnë në hapësirën ajrore turke.”

Turqia ka qenë një ndër kritiket më të zëshme të ofensivës izraelite në Gaza, duke e akuzuar Izraelin për gjenocid në enklavë, një akuzë që Tel Avivi e ka mohuar vazhdimisht. Qeveria turke ka pezulluar të gjitha marrëdhëniet tregtare me Izraelin dhe ka bërë thirrje për masa të menjëhershme ndërkombëtare, duke i kërkuar fuqive të mëdha që të ndalojnë mbështetjen ndaj shtetit izraelit.

Sipas agjencisë Reuters, autoritetet portuale turke kishin nisur prej javësh të kërkonin deklarata zyrtare nga anijet që ndalojnë në portet turke, ku të konfirmohej se ato nuk ishin të lidhura me Izraelin dhe nuk transportonin mallra ushtarake.

Google përballet me një shkelje të të dhënave dhe ishte vetë gjiganti i teknologjisë që njoftoi lajmin duke përshkruar një sulm sigurie që rezultoi në akses dhe zbulim të paautorizuar të të dhënave personale të përdoruesve, shkruajnë mediat e huaja.

”Gjiganti i teknologjisë me seli në Mountain View paralajmëroi gjithashtu së fundmi për një tjetër mashtrim të ri, në të cilin individë keqdashës imitojnë mbështetjen e IT-së së Google për të hakuar llogaritë e përdoruesve dhe për të aksesuar informacionin personal ose financiar”, sipas Columbus Dispatch.

Për këtë arsye, kompania me seli në Kaliforni ka këshilluar 2,5 miliardë përdoruesit e saj të Gmail të përditësojnë fjalëkalimet e tyre dhe të forcojnë sigurinë e tyre.

Si të mbroheni?

Siç raportohet nga blogu i sigurisë kibernetike Malwarebytes Labs, mashtruesit zakonisht u dërgojnë një email përdoruesve duke i informuar ata se “llogaria e tyre nuk është e sigurt” dhe duke i nxitur ata të rivendosin fjalëkalimin e tyre.

Pasi të futin kredencialet e tyre të hyrjes duke përdorur lidhjen mashtruese, viktimat pa e ditur u japin hakerëve qasje në llogarinë e tyre.

Pra, si mund ta mbroni veten? Google ka deklaruar se Gmail nuk dërgon kurrë mesazhe ose email-e që kërkojnë fjalëkalimet e përdoruesve ose informacione të tjera personale. Kompania e madhe e teknologjisë ka përpiluar gjithashtu një listë këshillash për të shmangur mashtrimet e phishing:

Raportoni email-et e phishing te Ndihma e Google

Edhe pse Google lëshon paralajmërime për phishing nëse zbulon email-e të dyshimta, ai nuk dërgon kurrë email-e të padëshiruara që kërkojnë informacione personale

Mos u përgjigjeni kërkesave për informacione private përmes email-it, mesazhit me tekst ose telefonatës

Mos e futni fjalëkalimin tuaj pasi të klikoni një lidhje në një mesazh. Email-et e Google nuk kërkojnë kurrë fjalëkalimin e llogarisë suaj

Kini kujdes me mesazhet që duken urgjente

Mos klikoni kurrë në lidhje nga burime të panjohura ose të pabesueshme.

Policia Rrugore ka apeluar të gjithë drejtuesit e automjeteve dhe motomjeteve që të tregojnë kujdes gjatë drejtimit të mjeteve.

Nisur nga shkeljet e shumta të konstatuara nga shërbimet e Policisë Rrugore, më së shumti gjatë fundjavëve, shkelje që përbëjnë rrezik të madh për përfshirje në ngjarje rrugore, si dhe nisur nga fakti që parashikohet që përgjatë fundjavës të ketë reshje shiu, Policia Rrugore apelon që të tregojnë kujdes në akset rrugore ku mund të ketë prezencë uji dhe të mos drejtojnë automjetet apo motomjetet me shpejtësi tej normave të lejuara.

Po ashtu, policia apelon që të moskryejnë parakalime të gabuara dhe të vendosin rripin e sigurimit.

“Të mos drejtojnë automjetet dhe motomjetet nën efektin e alkoolit apo, më keq akoma, në gjendje të dehur, por të përdorin automjetet e transportit publik. Të vendosin rripin e sigurimit dhe të detyrojnë edhe pasagjerët për ta vendosur atë. Të mos kryejnë parakalime të gabuara apo sjellje agresive në rrugë dhe të mos përdorin celularin gjatë drejtimit të automjetit. Për të gjithë drejtuesit e motomjeteve, biçiklistët dhe ata me monopatina. Gjatë natës të veshin jelekët fosforeshentë që të bëhen të dallueshëm në trafik në kushtet e errësirës. Të vendosin kaskë mbrojtëse në kokë. Policia Rrugore është prezente në akset rrugore nacionale, urbane e rurale, duke përdorur mjetet inteligjente për matjen e shpejtësisë dronët dhe alkooltestuesit”,- thuhet në njoftim. 

Shtëpia e Bardhë deklaron se Donald Trump i ka kërkuar Kongresit Amerikan të miratojë një shkurtim shtesë prej 4.9 miliardë dollarësh për ndihmën ndërkombëtare, një veprim që rrit ndjeshëm shanset për një mbyllje federale në fund të shtatorit.

Shkurtimet “përfshijnë programe në Departamentin e Shtetit, si dhe Agjencinë e Kombeve të Bashkuara për Zhvillim Ndërkombëtar dhe programet e ndihmës ndërkombëtare”, thuhej në letrën drejtuar kryetarit republikan të Dhomës së Përfaqësuesve dhe të publikuar nga Zyra e Buxhetit të Shtëpisë së Bardhë.

Presidenti Trump “gjithmonë do ta vërë Amerikën në vend të parë”, shkruante zyra në letër.

Demokratët kishin njoftuar së fundmi se çdo qëllim nga ana e presidentit amerikan për të anuluar fondet e miratuara tashmë nga Kongresi do të shkatërronte çdo mundësi për të negociuar me ta në mënyrë që të shmangej mundësia e paralizës fiskale, e ashtuquajtura “mbyllje”, pas 30 shtatorit.

Sipas New York Post, e cila zbuloi këtë informacion mbrëmë, shumica dërrmuese e shkurtimeve, 3.2 miliardë dollarë, kanë të bëjnë me fonde për Agjencinë Amerikane për Zhvillim Ndërkombëtar (USAID).

Donald Trump ka pezulluar tashmë miliarda dollarë fonde për ndihmë ndërkombëtare që nga kthimi në Shtëpinë e Bardhë dhe ka shpërbërë zyrtarisht USAID-in, i cili tani është nën Departamentin e Shtetit.

Një ish-i burgosur në Liverpool u shpall fajtor për vrasjen e një ish-roje burgu, pasi ky i fundit kishte zbuluar një aferë mes tij dhe një gardiane.

Elias Morgan e qëlloi për vdekje Lenny Scott, baba i tre fëmijëve, me gjashtë plumba në një parking jashtë një palestre në Skelmersdale, në shkurt të vitit 2024.

Ngjarja ndodhi katër vite pasi Scott, atëherë rojë në burgun HMP Altcourse, kishte gjetur një telefon në qelinë e Morgan, ku zbuloi lidhjen me gardianen. 35-vjeçari fillimisht u përpoq ta korruptonte Scott për të mos raportuar aferën dhe më pas nisi ta kërcënonte.

Në një telefonatë të bërë në vitin 2020, Scott kishte shprehur frikën për jetën e tij dhe të familjes. Morgan u vetëdorëzua në polici dy javë pas të shtënave dhe u shpall fajtor për vrasje nga Gjykata e Lartë në Preston, të premten.

Në Maqedoninë e Veriut, kryeministri Hristijan Mickoski paralajmëroi se Qeveria mund të emërojë komisionarë, nëse zgjedhjet lokale nuk japin rezultat. Kjo mund të ndodhë sidomos në komunat e vogla, ku ka pak votues ose shumë njerëz janë larguar jashtë vendit, thonë analistët.

Nëse as pas rundit të dytë të zgjedhjeve nuk zgjidhet kryetari i një komune, Komisioni Shtetëror Zgjedhor (KSHZ) në Maqedoninë e Veriut duhet ta njoftojë Qeverinë e vendit.

Në atë rast, brenda 15 ditësh, Qeveria do të emëronte një komisionar, që do t’i kishte të gjitha kompetencat e kryetarit të komunës.

Pastaj, Qeveria do ta njoftonte Kuvendin, i cili, brenda 60 ditësh, do të shpallte zgjedhje të reja në atë komunë.

E gjithë kjo është e rregulluar kështu me nenin 134 të Kodit Zgjedhor në Maqedoninë e Veriut.

Zgjedhja e komisionarit nuk ka kritere të veçanta, por zakonisht ai zgjidhet nga komuna ku jeton. Dhe, mandati i tij është i përkohshëm, derisa të zhvillohen zgjedhjet e reja.

Njoftimi i Mickoskit pasoi vendimin e Komisionit Shtetëror Zgjedhor për të lehtësuar pjesëmarrjen e kandidatëve të pavarur, me vetëm dy nënshkrime, në zgjedhjet lokale të 19 tetorit.

Kjo ngriti shqetësime se fleta e votimit mund të bëhet shumë e gjatë dhe e ngatërruar.

“Çdo gjë është e mundur. Fleta e votimit mund të jetë 7-8 metra e gjatë, për të penguar qytetarët që të dalin. Por, dua të paralajmëroj se sipas Kushtetutës dhe ligjit, nëse zgjedhjet nuk janë të suksesshme, Qeveria emëron komisionarë”, tha Mickoski.

Si zgjidhen kryetarët e komunave dhe këshilltarët në Maqedoninë e Veriut?

Për të zgjedhur kryetarin e komunës në rundin e parë, duhet të votojë së paku një e treta e votuesve të regjistruar.

Nëse asnjë kandidat nuk merr shumicën e nevojshme, raundi i dytë zhvillohet mes dy kandidatëve më të votuar në raundin e parë. Kandidati që fiton më shumë vota në rundin e dytë, zgjidhet kryetar.

Nëse as pas raundit të dytë nuk zgjidhet kryetari, KSHZ-ja e njofton Qeverinë dhe Qeveria ndërhyn sipas ligjit.

Për zgjedhjen e këshilltarëve nuk kërkohet pjesëmarrje minimale. Ulëset në këshill ndahen sipas numrit të votave që merr secila listë kandidatësh.

Skenari i zgjedhjeve të pasuksesshme, i mundshëm në komunat më të vogla

Analistët politikë paralajmërojnë se zgjedhjet për kryetarë komunash në Maqedoninë e Veriut mund të dështojnë në disa komuna më të vogla – sidomos në ato që janë më të prekura nga emigracioni.

“Nuk pres që në një numër të madh komunash të mos arrihet pragu. Por, në komunat më të vogla, ku ka pak interes për të votuar, abstenimi mund të çojë në dështim të procesit. Këto zakonisht janë zona me popullsi shumë të vogël. Nuk pres që kjo të ndodhë në Shkup apo në qytetet e mëdha”, thotë Aleksandar Novakovski, ish-kryetar i Komisionit Shtetëror Zgjedhor, për Radion Evropa e Lirë.

Ai paralajmëron, gjithashtu, për rreziqet nga numri i madh i kandidatëve dhe mundësinë e manipulimeve.

“Shpresojmë që këto të mos ndodhin. Por, nëse ndodhin, mund të ketë pasoja serioze në përpunimin e të dhënave, kosto financiare dhe fletëvotime tepër të gjata. Po ashtu, mund të rrezikohet fshehtësia e votës, si dhe të ketë shumë ankesa”.

“Nga përvoja ime, keqpërdorimet janë të mundshme. Për shembull, një parti që e di se nuk mund të fitojë në një komunë, mund t’u thotë mbështetësve të saj të regjistrohen si kandidatë. Imagjinoni 1.000 kandidatë në një fletëvotim…”, thotë Novakovski.

Analisti politik, Sefer Selimi, thotë se deklarata e kryeministrit Mickoski për mundësinë e emërimit të “të besuarve” të Qeverisë, në rast se dështojnë zgjedhjet lokale, duket më shumë si një mënyrë për t’i dekurajuar kandidatët e pavarur.

Sipas tij, partitë tradicionale gjithmonë kanë vendosur pengesa shtesë për pjesëmarrjen e tyre.

“Mundësia për të emëruar të besuar qeveritarë është shumë e vogël. Edhe nëse ndodh, përsëri duhet të ketë zgjedhje, ku qytetarët vendosin, e jo kryeministri”, thotë Selimi.

Kriteret për pjesëmarrjen e kandidatëve të pavarur në zgjedhje duhej të përcaktoheshin përmes ndryshimeve në Kodin Zgjedhor.

Kryetari i Kuvendit, Afrim Gashi, thirri një seancë të jashtëzakonshme më 16 gusht, por propozimi nuk u miratua.

Kuvendi pritet të mbajë edhe dy seanca para nisjes së fushatës për zgjedhjet lokale – më 2 dhe më 12 shtator.

Kondarko: Kemi mekanizma për të siguruar mbarëvajtjen e zgjedhjeve

Kryetari i Komisionit Shtetëror Zgjedhor të Maqedonisë së Veriut, Boris Kondarko, tha se edhe nëse ka numër të lartë të kandidatëve të pavarur – pasi tani u mjaftojnë vetëm dy nënshkrime për të garuar – KSHZ-ja i ka mekanizmat për të siguruar mbarëvajtjen e zgjedhjeve.

Ai pranoi se numri i lartë i tyre mund ta bëjë procesin më të kushtueshëm, por tha se nuk do ta pengojë organizimin.

“Do të shohim pas afatit të dorëzimit të listave, më 13 shtator, se sa kandidatë do të regjistrohen, sa do t’i plotësojnë kushtet dhe sa do të konfirmohen. Ne do t’i përshtatim fletëvotimet në mënyrë që të respektohen të drejtat e të gjithëve”, tha Kondarko për Radion Evropa e Lirë.

Në vitin 2021, dy komuna në Maqedoninë e Veriut – Mavrovë-Rostushë dhe Qendra Zhupa – mbetën pa kryetarë komune dhe u drejtuan përkohësisht nga përfaqësues të emëruar nga Qeveria.

Në rundin e parë, zgjedhjet nuk u zhvilluan me sukses, sepse në votime morën pjesë vetëm rreth 25 për qind e qytetarëve – shumë më pak se pragu i kërkuar.

Në rundin e dytë, në Mavrovë-Rostushë, kandidati u tërhoq, ndërsa në Qendrën Zhupë përsëri nuk u arrit numri i nevojshëm i votuesve.