Policia e Kosovës ka kryer bastisje në shtëpinë e serbes A.M., që së bashku me të dashurin e saj, J.I, pjesëtar i forcave ajrore kroate, u arrestuan në Kroaci nën akuza për spiunazh për Serbinë.

Zëvendësdrejtori i Policisë së Kosovës për rajonin e Veriut, Veton Elshani, i tha Radios Evropa e Lirë se bastisjet u kryen më 27 gusht rreth orës 20:00, pas publikimit të informacioneve se A.M., ishte arrestuar në Kroaci.

Elshani tha se menjëherë autoritetet kosovare kanë verifikuar adresën e të dyshuarës A.M., në Mitrovicë të Veriut.

“Kemi gjetur lokacionin e shtëpisë, kemi pranuar informacione se në atë shtëpi mund të ketë armë, kemi hyrë kemi bastisur këtë shtëpi, kemi gjetur një sprej, disa gëzhoja, fishekë dhe jemi larguar nga ai vend”, u shpreh Elshani.

Sipas Elshanit, autoritetet e Kosovës janë në koordinim të ngushtë me autoritetet kroate për këtë rast.

Më 28 gusht, Prokuroria e Qarkut në Split njoftoi se ndaj të dyshuarve ka caktuar masën e paraburgimit.

The post Policia e Kosovës bastis shtëpinë e të arrestuarës për spiunazh për Serbinë appeared first on Telegrafi.

Kompania Rajonale e ujësjellësit “Prishtina”, ka njoftuar se për shkak të shpenzimit enorm të ujit në shumë zona, furnizimi me ujë të pijshëm është i kufizuar në një pjesë të Prishtinës dhe Zllatar.

Lagjet që po përballen me ndërprerje ose reduktime janë Mati 1 (në tërësi), pjesë të lagjes Bregu i Diellit, Zllatar dhe pikat e larta të qytetit.

Sipas njoftimit, kapacitetet në rezervuar janë të limituara, edhe pse po trajtohet ujë me kapacitet të plotë.

Kompania njofton se furnizimi pritet të stabilizohet gjatë ditës së nesërme, nëse konsumi bie në nivel të menaxhueshëm.

The post ​Disa pjesë të Prishtinës me ndërprerje të ujit, kompania thotë se po shpenzohet shumë appeared first on Telegrafi.

Agjencia e Menaxhimit Emergjent njofton se gjatë ditës së sotme në Kosovë janë regjistruar gjithsej 49 vatra zjarri.

Nga këto, 7 vatra mbeten aktive, ndërsa 42 të tjera janë lokalizuar falë ndërhyrjes së shpejtë dhe profesionale të Njësive të Zjarrfikjes dhe Shpëtimit.

Agjencia apelon tek qytetarët që të tregojnë kujdes maksimal, të shmangin çdo veprim që mund të shkaktojë zjarr, dhe të denoncojnë pranë organeve ligjzbatuese çdo rast të zjarrvënies së qëllimshme.

Për çdo emergjencë, qytetarët mund të kontaktojnë në numrat 112, 193 dhe 192.

AME shpreh mirënjohje të veçantë për punën dhe angazhimin e pjesëtarëve të Njësive Profesionale të Zjarrfikjes dhe Shpëtimit, të cilët po punojnë pa ndërprerje për të siguruar kontrollin e situatës dhe mbrojtjen e qytetarëve dhe pronës./Telegrafi/

The post Kosova përfshihet sërish nga flakët, 7 vatra mbeten aktive appeared first on Telegrafi.

Nenad Rashiq ka deklaruar se ka zhvilluar bisedime me kryeministrin në detyrë dhe kryetarin e Lëvizjes Vetëvendosje Albin Kurti para se të kandidonte për postin e nënkryetarit të Kuvendit.

Ai e ka bërë këtë sqarim pasi u pyet nga moderatori i emisionit Debat Plus, Ermal Panduri, nëse kandidimi i tij ishte i pavarur apo i nxitur nga kryeministri.

Panduri: Ju nuk jeni të shtyrë nga Albin Kurti, pra ju vetë, me vetiniciativë, pa kërkesën e Albin Kurtit, po kandidoni për nënkryetar?

Rashiq: Normalisht që kemi biseduar sa i përket kandidimit tim potencial, por kjo ka ndodhur diku, mos gabofsha, në mars pas zgjedhjeve. Kemi debatuar dhe unë, në një moment kur ka dalë kjo temë, kam thënë pse jo, sepse me të vërtetë dua ta prezantoj një fytyrë tjetër të përfaqësimit të serbëve në institucione, jo sikur kemi pasur rastin deri më tani.

The post Rashiq: Kam biseduar me Kurtin para kandidimit për nënkryetar të Kuvendit appeared first on Telegrafi.

Në Muzeun Etnologjik të Gjakovës është mbajtur takimi i parë i Komitetit Drejtues për Zhvillimin Urban Qarkor, i cili mblodhi përfaqësues nga institucionet qendrore, komunat dhe partnerët zhvillimorë për të forcuar bashkëpunimin drejt qyteteve më të gjelbra dhe më të qëndrueshme ndaj ndryshimeve klimatike.

Takimi kishte për qëllim njohjen e ndërsjellë të institucioneve partnere dhe angazhimeve të tyre brenda programit, prezantimin e objektivave për nxitjen e qëndrueshmërisë klimatike dhe zhvillimit urban të qëndrueshëm dhe krijimin e një kuptimi të përbashkët mbi drejtimin strategjik, koordinimin dhe mekanizmat e zbatimit.

Pjesëmarrësit zhvilluan edhe një vizitë në terren te lumi Lukac, ku pritet të realizohet një projekt demonstrues që synon reduktimin e rreziqeve klimatike dhe krijimin e hapësirave publike më të shëndetshme dhe më të qëndrueshme.

Ky partneritet, i mbështetur nga Bashkëpunimi Gjerman për Zhvillim (GIZ) dhe Sekretariati Shtetëror i Zvicrës për Çështje Ekonomike (SECO), po vendos themelet për një zhvillim urban të integruar, gjithëpërfshirës dhe të qëndrueshëm në Kosovë.

The post Kosova fuqizon bashkëpunimin për zhvillim urban të qëndrueshëm ndaj ndryshimeve klimatike appeared first on Telegrafi.

Detaje të reja të publikuara nga mediat kroate, tregojnë se spiunja e dyshuar nga Mitrovica, 46 vjeçarja Ana Murganiq, kishte komunikim me të akuzuarin për sulmin terrorist në Banjskë, Vladimir Radivojeviqin, i njohur me nofkën “Mami”. Lista Serbe e ka mohuar se e njeh spiunen e dyshuar nga Mitrovica, por Slavko Simiqi ka fotografi bashkë me Vladimir Radivojeviqin “Mamin”, me të cilin duken shumë të afërt.

Mediat kroate po pretendojnë se spiunja e dyshuar nga Mitrovica, Ana Murganiq, ka spiunuar për Listën Serbe, por Igor Simiq dje tha se as ai e as Lista Serbe nuk e njohën spiunen e dyshuar.

Por, provat që dalin në dritë, e tregojnë të kundërtën.

Spiunja e dyshuar e cila ra në pranga të kroatëve bashkë me të dashurin kroat J.I, pilot i KFOR-it, del se ka pasur kontakte edhe me një serb që akuzohet nga Prokuroria në Kosovë se ishte pjesë e sulmit terrorist në Banjskë.

Sipas mediave kroate, gjatë hetimeve është gjetur se serbja nga Mitrovica, komunikonte edhe me njërin prej të kërkuarve kryesor në rastin Banjska, Vladimir Radivojeciqin, i njohur me nofkën “Mami”.

“A.M. i shkroi edhe shokut të saj të fëmijërisë, Vladimir Radivojeviq, i njohur si Mami, një nga përfaqësuesit e serbëve nga veriu i Kosovës. Ai vjen nga Mitrovica, ashtu si ajo, por autoritetet e Kosovës e konsiderojnë atë një nga udhëheqësit e të ashtuquajturave “Brigada Veriore”, një organizatë aktive në veri të vendit që është e lidhur me struktura nga Beogradi…– Index.Hr

… Hetuesit e konsiderojnë mesazhin që A. M. i dërgoi atij si të diskutueshëm, duke shkruar: “Duhet ta sqarosh sulmin ndaj KFOR-it në çdo mënyrë që di dhe mundesh.” Po atë ditë, i dashuri i saj pilot i dërgoi një mesazh: “Vërtet e ke prishur punën mbrëmë.” –Index.Hr

E provat, sikurse këto fotografi tregojnë se Mami kishte raporte të mira me zyrtarë të lartë të Listës Serbe. Aty ai shihet me Slavko Simiqin, njeriun që tash po pretendon të bëhet nënkryetar i Kuvendit.

Kujtojmë se Mami-t i ishte gjetur telefoni pranë bombës shpërthyese që rezultoi me vrasjen e Policit rreshter, tash heroit, Afrim Bunjaku në ditën kritike të 24 shtatorit 2023.

Mesazhi që mediat kroate publikuan që serbja ia dërgoi Radivojeviqit, lidhet me datën 25 dhjetori 2022, datë kur në Zubin Potok u sulmuan ushtarët e KFOR-it nga persona të maskuar.

Sipas mediave kroate, çifti që u arrestuar për spiunazh u takuan 9 vjet më herët, në vitin 2016, atëherë kur Ana Murganiq punonte si përkthyese në EULEX, ndërsa piloti kroat ishte pjesë e kontigjentit të KFOR-it.

Për Vladimir Radivojeviqin ose “Mamin”, më herët është raportuar se është njeri i afërt edhe me Aleksandar Vuçiq.

Lista Serbe pos që e kanë mohuar se nuk e njohin këtë grua nuk kanë folur për asnjë detaj lidhur me skandalin.

Dyshimet janë se piloti kroat duke shfrytëzuar pozitën e tij në KFOR, të dashurës serbe, i ka dhënë informacione mbi lëvizjet e trupave të misionit paqeruajtës të NATO-s, e cila më pas ia ka dhënë Listës Serbe. Spiunazh dyshohet se kanë bërë edhe në periudhën kur i dyshuari për sulm ndaj zyrave të KQZ-së, Dejan Pantiq, nga veriu, nuk mund të transportohej për në Prishtinë./Tv Dukagjini/

The post Detaje tjera nga afera e spiunimit në KFOR, agjentja serbe fliste me të akuzuarin e Banjskës – ai ka foto me Slavko Siqmiqin appeared first on Telegrafi.

Policia Rrugore u ka bërë thirrje të gjithë drejtuesve të automjeteve që të tregojnë kujdes të shtuar gjatë fundjavës, pasi priten reshje të dendura shiu.

Përmes një njoftimi, Policia rrugore apelon që shoferët të tregohen të kujdesshëm me shpejtësinë, parakalimet e gabuara, konsumin e alkoolit, etj.

Po ashtu, Policia Rrugore bën të ditur se është prezente në akset rrugore nacionale, urbane e rurale, duke përdorur mjetet inteligjente për matjen e shpejtësisë, dronët dhe alkooltestuesit.

APEL PËR MË SHUMË KUJDES PËRGJATË FUNDJAVËS

Nisur nga shkeljet e shumta të konstatuara nga shërbimet e Policisë Rrugore, më së shumti gjatë fundjavëve, shkelje që përbëjnë rrezik të madh për përfshirje në ngjarje rrugore, si dhe nisur nga fakti që parashikohet që përgjatë fundjavës të ketë reshje shiu, Policia Rrugore apelon për të gjithë drejtuesit e automjeteve dhe motomjeteve:

Të tregojnë kujdes në akset rrugore ku mund të ketë prezencë uji.

Të mos drejtojnë automjetet apo motomjetet me shpejtësi tej normave të lejuara.

Të mos drejtojnë automjetet dhe motomjetet nën efektin e alkoolit apo, më keq akoma, në gjendje të dehur, por të përdorin automjetet e transportit publik.

Të vendosin rripin e sigurimit dhe të detyrojnë edhe pasagjerët për ta vendosur atë.

Të mos kryejnë parakalime të gabuara apo sjellje agresive në rrugë dhe të mos përdorin celularin gjatë drejtimit të automjetit.

Për të gjithë drejtuesit e motomjeteve, biçiklistët dhe ata me monopatina:

Gjatë natës të veshin jelekët fosforeshentë që të bëhen të dallueshëm në trafik në kushtet e errësirës.

Të vendosin kaskë mbrojtëse në kokë.

Policia Rrugore është prezente në akset rrugore nacionale, urbane e rurale, duke përdorur mjetet inteligjente për matjen e shpejtësisë, dronët dhe alkooltestuesit.

Në rast nevoje, telefononi në numrin pa pagesë 112 dhe shërbimet e Policisë do t’ju vijnë menjëherë në ndihmë.

The post Parashikimi për reshje të dendura shiu gjatë fundjavës, Policia shqiptare del me njoftim të rëndësishëm appeared first on Telegrafi.

Kryeministri në detyrë i Republikës së Kosovës, Albin Kurti, bashkë me ministren në detyrë të Ekonomisë, Artane Rizvanolli, zëvendësshefin e seksionit për Bashkëpunim në Zyrën e BE-së në Kosovë, Alessandro Bianciardi, nënkryetarin e Komunës së Mitrovicës së jugut, Arian Tahiri, Drejtorin e Departamentit të Operacioneve të Fondit të Kosovës për Efiçiencë të Energjisë, Petrit Ahmeti, mori pjesë në përurimin e rinovimeve për efiçiencë të energjisë të ndërtesave për banim social në Desi dhe në Shipol të Mitrovicës.

“Gjatë përurimeve kryeministri Kurti tha se ndërtesat sociale ekzistuese po i bëjmë të jetueshme, të sigurta, të ngrohta dimrit e të freskëta verës, me kushte të dinjitetshme për jetesë për të gjithë banorët, duke shënuar kështu një hap të rëndësishëm në rrugën tonë drejt një shteti, i cili kujdeset për qytetarët, veçanërisht për ata që kanë më shumë nevojë për përkujdesje dhe përkrahje”, ka njoftuar Zyra e Kryeministrit.

Në objektin në Desi jetojnë 24 familje me 116 banorë gjithsej, kurse në Shipol jetojnë 18 familje. Kryeministri theksoi se ky projekt është pjesë e një programi të mbështetur nga Bashkimi Evropian, që bashkë me Fondin e Kosovës për Efiçiencë të Energjisë dhe komunat, po zbatohet për rinovimin e 28 ndërtesave të banimit social anembanë Kosovës dhe që po ndryshon jetën e qindra familjeve. Si rezultat i këtyre rinovimeve, kursehet energjia elektrike në masë të konsiderueshme dhe në këtë mënyrë njerëzit edhe shpenzojnë më pak, por edhe kanë kushte më të mira për jetesë.

“Kjo është pra politika jonë e përbashkët, që shteti të jetë pranë qytetarëve, me punë konkrete, me projekte që ndihen në përditshmërinë e jetës suaj, që përmirësojnë shtëpitë, shkollat, spitalet dhe ofrojnë më shumë dinjitet për të gjithë”, deklaroi kryeministri gjatë vizitës së sotme.

Ai u shpreh mirënjohës për bashkëpunimin ndërinstitucional, dhe falënderoi në veçanti Bashkimin Evropian për këtë mbështetje që po ia bënë Republikës së Kosovës, mirëqenies së qytetarëve, sidomos atyre në nevojë, të cilëve duhet t’ju shërbejë më së shumti dhe në vazhdimësi.

The post BE dhe Fondi për Efiçiencë mbështesin rinovimin e 28 objekteve të banimit social në Kosovë appeared first on Telegrafi.

Dëshmi që kryeministri në detyrë, Albin Kurti, s’ka legjitimitet po konsiderohet letra që ambasadori i Bashkimit Evropian në Kosovë, Aivo Orav, i ka dërguar kreut qeveritar, ku njofton se nuk do të zhvillohen takime brenda ndërtesës së Qeverisë së Kosovës, derisa vendi të ketë një ekzekutiv me mandat të plotë.

Deputetja e Aleancës për Ardhmërinë e Kosovës (AAK), Time Kadrijaj, thotë se letra e diplomatit të BE-së është shqetësuese dhe konfirmim që anëtarët e kabinetit qeveritar që ushtrojnë edhe postin e deputetit s’kanë legjitimitet dhe po i mbajnë dhunshëm pozitat në ekzekutiv. E njohës politikë thonë se, mes tjerash, letra e Orav tregon domosdoshmërinë e konstituimit të Kuvendit dhe formimit të qeverisë së re, pas zgjedhjeve parlamentare të 9 shkurtit.

Orav, përmes një letre dërguar kryeministrit në detyrë, Albin Kurti, thekson se shefat e misioneve të shteteve të BE-së nuk do të zhvillojnë takime brenda ndërtesës së ekzekutivit, derisa të ketë një qeveri me mandat të plotë, duke iu referuar edhe një vendimi të Gjykatës Supreme më 25 qershor, ku mes tjerash theksohet se një ministër i certifikuar si deputet nuk mund të ushtrojë funksione ekzekutive.

Këtë letër e kanë konfirmuar edhe në Qeverinë e Kosovës, mirëpo kanë potencuar se Kurti është kryeministër në detyrë dhe si i tillë i zhvillon takimet në objektin e Qeverisë së Kosovës.

Deputetja Kadrijaj thotë për KosovaPress se Kurti s’ka legjitimitet dhe as mandat për të ushtruar postin e kryeministrit në detyrë derisa është edhe deputet. Sipas saj, ai po e zvarrit qëllimisht konstituimin e Kuvendit të Kosovës, pasi nuk i ka votat për të formuar qeverinë e ardhshme dhe po dëshiron të vazhdojë të qëndrojë si kryeministër në detyrë.

Ajo, krahas letrës së dërguar nga diplomatët e BE-së, përmend edhe masat ndëshkuese të BE-së ndaj Kosovës, ku thekson se vendi po humb shumë edhe në aspektin financiar.

“Kjo është shqetësuese, duhet të jetë shqetësuese, sepse po konfirmohet se kjo është një qeveri jolegjitime e cila dhunshëm po e mban peng qeverisjen e Kosovës. Nuk kanë mandat për të qenë në këto pozicione – as pozita e kryeministrit, e po as edhe pozitat e ministrave. Këta qëllimshëm po e zvarrisin këtë proces në moskonstituimin e Kuvendit, që më pas të kalojmë në fazën tjetër kur duhet të zgjidhet qeveria… Kosova është vend i sanksionuar dhe po vazhdojnë të mbeten në fuqi sanksionet e vendosura ndaj kësaj qeverie, të cilat për mosrespektim të marrëveshjeve, por edhe për mospërfillje të koordinimit me faktorët ndërkombëtarë për veprime të pakoordinuara, ne jemi të sanksionuar tash e sa vite”, thekson Kadrijaj.

Në anën tjetër, analisti politik, Dorajet Imeri, thotë për KosovaPress se shkresa e dërguar në qeveri nga ana e përfaqësuesve të BE-së në Kosovë është dëshmi edhe për urgjencën që të konstituohet Kuvendi i Kosovës dhe rrjedhimisht të formohet qeveria e re.

Sipas tij, Kosova dhe BE-ja janë partnerë strategjikë, andaj duhet të ruhet komunikimi në nivelin më të lartë.

“Shkresa e dërguar në qeveri nga ana e përfaqësuesve të Bashkimit Evropian është edhe një ftesë që sa më parë të konstituohen institucionet e Kosovës dhe në veçanti Kuvendi dhe qeveria. Është e domosdoshme që partitë të reflektojnë dhe sa më parë që të jetë e mundur të kompletohen institucionet e Republikës. Kosova dhe BE-ja janë partnerë strategjikë. Kosova, duke e ditur se ka të ardhme evropiane, duhet ta kuptojë se ruajtja e këtij partneriteti dhe bashkëpunimi në nivelin më të lartë është domosdoshmëri”, thekson Imeri.

Duke iu përgjigjur letrës së dërguar nga shefi i Zyrës së BE-së në Kosovë, zëdhënësi i qeverisë në detyrë, Përparim Kryeziu, ka thënë se kushdo që kërkon takim me kryeministrin në detyrë duhet të vijë në vendin ku punon ai – në objektin e Qeverisë së Kosovës.

Megjithatë, Kryeziu tha se Kurti zhvillon takime pune edhe jashtë zyrës së tij, mirëpo paraprakisht duhet të ketë dakordim të palëve.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës. Gjithsesi, kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve. Takime jashtë mjediseve të kryeministrisë kanë ndodhur edhe në të kaluarën, edhe gjatë kohës sa ka qenë me mandat të plotë”, deklaron Kryeziu.

The post Analistët: Letra e BE ndaj Kurtit tregon urgjencën për formimin e qeverisë së re appeared first on Telegrafi.

Në tre vitet e fundit, komunave të Kosovës u janë marrë mbi 210 milionë euro si pasojë e vendimeve gjyqësore që lidhen me zbatimin e kontratave kolektive.

Pasojat e bllokimit të xhirollogarive bankare përmes përmbaruesve, po konsiderohen të padrejta, pasi po pamundësojnë realizimin e projekteve dhe investimeve kapitale.

Kështu ka deklaruar drejtori ekzekutiv i Asociacionit të Komunave të Kosovës, Sazan Ibrahimi.

“Në të kaluarën Komunat janë pyetur se ku po duan me iu marrë këto mjete, mirë po tani gjatë kësaj periudhe të fundit kohore atyre vetëm po iu merren mjetet edhe pse janë të zotuara dhe pastaj po shkaktojnë edhe probleme tjera zingjirore”, ka thënë Ibrahimi për RTK-në.

Ai ka shtuar se mungon gatishmëria e nivelit qendror për të bashkëpunuar me komunat dhe për të gjetur një zgjidhje të përbashkët.

Njëra nga komunat e prekura është edhe ajo e Deçanit, e cila tash e dy javë i ka të bllokuara xhirollogaritë bankare.

Komunat i kanë kërkuar Qeverisë për të gjetur një zgjidhje dhe të garantojë funksionimin normal të tyre, në mënyrë që qytetarët të mos privohen nga shërbimet dhe investimet publike.

The post Komunave po u bllokohen llogaritë appeared first on Telegrafi.

Një ngjarje e rëndë është shënuar në Shkodër mbrëmjen e sotme, ku një person ka vrarë me armë zjarri një 61-vjeçar.

Krimi ka ndodhur rreth orës 20:00, në fshatin Abat, Shalë. Ka qenë shtetasi me iniciale N.M., i cili vrau 61-vjeçarin P.P.

Nuk dihet motivi i kësaj ngjarjeje. Sakaq, po punohet për kapjen e autorit nga ana e uniformave blu.

Një grup hetimor është ngritur gjithashtu për sqarimin e rrethanave dhe dokumentimin ligjor të ngjarjes.

“Shkodër / Informacion paraprak

Rreth orës 20:00, në fshatin Abat, Shalë, shtetasi N. M., në rrethana ende të paqarta, dyshohet se ka vrarë me armë zjarri shtetasin P. P., 61 vjeç.

Shërbimet e Policisë janë nisur menjëherë për në fshatin Abat, për të bërë të mundur kapjen e autorit.

Ndërkohë, është ngritur një grup i posaçëm hetimor, për sqarimin e rrethanave dhe dokumentimin ligjor të ngjarjes“, njofton policia.

The post Vritet me armë zjarri 61-vjeçari në Shkodër, shpallet në kërkim autori appeared first on Telegrafi.

Pasditen e sotme “Tuneli i Llogorasë” është mbyllur përkohësisht për shkak të një aksidenti.

Sipas informacioneve të policisë, aksidenti ka pasur vetëm dëme materiale dhe nuk raportohet për të lënduar.

Sipas njoftimit të policisë në aksident janë përfshirë tre automjete.

Ngjarja ka shkaktuar trafik të rënduar përgjatë dhjetëra kilometrave dhe ka bllokuar dhjetra automjete.

Njoftimi i policisë

Sot, më datë 28.07.2025, rreth orës 15:45, në “Tunelin e Llogarasë”, ka ndodhur një përplasje midis tre automjeteve, vetëm me dëme materiale.

Në aksident janë përfshirë automjetet: tip “Audi”, me drejtues shtetasin A. M., tip “Volvo”, me drejtues shtetasin A. H., dhe tip “Mitsubishi”, me drejtues shtetasin K. M.

Pas përfundimit të veprimeve proceduriale, automjetet e aksidentuara u spostuan dhe qarkullimi në tunelin e Llogarasë vijon normalisht.

The post Aksident i trefishtë në tunelin e Llogarasë, rëndohet trafiku në dhjetra kilomentra appeared first on Telegrafi.

Ish-deputeti i Partisë Demokratike të Kosovës (PDK), Xhavit Haliti, ka reaguar pas publikimit të një punimi hulumtues nga kryeparlamentari Dimal Basha dhe bashkautorja maqedonase Jana Arsovska, ku ai përmendet lidhur me fondin “Vendlindja Thërret” dhe pretendime për lidhje me krimin e organizuar pas luftës.

Në Debat Plus, Haliti ka mohuar kategorikisht se ka qenë përgjegjës për fondin apo për logjistikën e UÇK-së.

Ish-deputeti gjithashtu u shpreh se raportimet që lidhen me UÇK-në dhe krimin e organizuar janë përpjekje për denigrim.

“Së pari për opinion dua të them që s’kam qenë shef i fondit Vendlindja thërret. Dhe s’kam qenë përgjegjës për atë fond…

Sa i përket krimit të organizuar, ka 30 vjet që kam dëgjuar e kanë shkruar gazetat se unë qëndroj në krye të krimit të organizuar, vrasje… dua të them pasluftës, fondi ka qenë problematik, se gjithmonë ku ka pare ka probleme. Dhe decentrazilimi i fondit, i përdorimit të fondit ka krijuar probleme të mëdha. Fondi i decentralizuar, ka ndikuar që vende të caktuar që kanë menaxhuar fondet si grupe, kanë dërguar mjete në Kosovë… dhe kështu ka funksionuar. Unë përfaqësuar Kosovën në raporte ndërkombëtare dhe UÇK-në në Shqipëri, dhe kam qenë anëtar i shtabit qendror dhe shtabit të përgjithshëm. Asnjëherë me dije time, nëse dikush ka shkruar ose ka thënë është punë e tij, unë kurrë s’kam qenë shef i logjistikës. Kamë punuar e ndihmuar logjistikën nga funksioni im, në raport me shtetin dhe këto raporte që po flas…shumica e fondeve kanë kaluar në menaxhim qeverisë së përkohshme.

…Të gjithë artikujt e kësaj atyre kanë qenë që i ka bërë UDBA… Dimali mendoj përveç përgjigje për dezinformata të opinioni ndërkombëtar, përmes punimeve të tilla duhej të jepte llogari para organeve të drejtësisë në Kosovë. Sepse është përpjekur ta denigrojë përmes emrave UÇK-në. Duhet të dënohet. Është e barabartë me tradhti”, ka thënë Haliti në Debat Plus.

The post “Shkrim i bërë nga UDB-ja” – Haliti: Punimi i Dimal Bashës denigron UÇK-në, është i barabartë me tradhti appeared first on Telegrafi.

Deputeti i Lidhjes Demokratike të Kosovës (LDK), Arben Gashi, ka komentuar zhvillimet e fundit politike, duke thënë se Kosova ndodhet në një bllokadë të rrezikshme për shtetin dhe qytetarët.

“Frika nga dalja në opozitë, frika nga shkuarja në zgjedhje dhe frika nga marrja e vendimeve po e mbajnë vendin të bllokuar. Kjo gjendje po e rrezikon esencën e shtetit, po kërcënon të ardhmen dhe po e bllokon zhvillimin ekonomik, shoqëror e politik të Kosovës”, ka shkruar Gashi.

Ai theksoi se është koha që vendi të zhbllokohet, duke apeluar që Vetëvendosje të tregojë gatishmëri për kompromis.

“VV duhet ta dijë se kompromisi është baza e demokracisë. Duhet ta dijë se zhbllokimi i institucioneve është detyrë politike dhe patriotike. Dhe duhet ta dijë se, nëse dështon t’i bëjë këto si partia e parë në rezultat zgjedhor, atëherë ka obligim të krijojë gjendjen që vendimmarrja t’u kthehet qytetarëve të vendit”, ka theksuar deputeti i LDK-së./Telegrafi/

The post Arben Gashi: Frika nga dalja në opozitë dhe nga shkuarja në zgjedhje po e mban Kosovën të bllokuar appeared first on Telegrafi.

Kryeministri në detyrë i Republikës së Kosovës, Albin Kurti, ka liruar nga detyra zëvendëskryeministren për Çështje të Pakicave dhe të Drejtat e Njeriut, Emilija Rexhepi.

Lirimi nga detyra vjen pas emërimit të Rexhepit në pozitën e nënkryetares së Kuvendit të Kosovës.

“Kryeministri në detyrë i Republikës së Kosovës, Albin Kurti, e ka liruar dje nga detyra zëvendëskryeministren për Çështje të Pakicave dhe të Drejtat e Njeriut, Emilija Rexhepi, pas emërimit të saj në pozitën e nënkryetares së Kuvendit nga radhët e komuniteteve joshumicë joserbe”, thuhet në njoftim.

The post Emilija Rexhepi lirohet nga detyra e zëvendëskryeministres appeared first on Telegrafi.

Policia Kufitare Vlorë u ka shkuar në ndihmë disa pushuesve që u rrezikuan gjatë lundrimit me mjetet e tyre lundruese, në Sarandë dhe në Palasë.

“Pas marrjes së njoftimit se, rreth një milje larg Gjirit të Sarandës, kapiteni i një jahti me flamur maltez kërkonte ndihmë pasi mjeti i tij lundrues kishte pësuar defekt dhe kishte marrë ujë, shërbimet e Policisë Kufitare ndërhynë menjëherë dhe bënë të mundur shoqërimin e kapitenit në mënyrë të sigurt në breg dhe rimorkimin e jahtit në Portin e Limionit.

Pas marrjes së njoftimit se, në zonën e Shën Andreut, disa turistë që ndodheshin në bordin e një mjeti lundrues po rrezikoheshin për shkak të kushteve të vështira të detit, shërbimet e Policisë Kufitare ndërhynë menjëherë dhe bënë të mundur shoqërimin e turistëve në mënyrë të sigurt në breg dhe ankorimin e mjetit të tyre lundrues në molin e Palasës”, bëri me dije policia.

The post Rrezikuan të mbyten, policia kufitare u shkon në ndihmë pushuese në Sarandë e Palasë appeared first on Telegrafi.

Analisti politik, Ylli Hoxha, ka komentuar zhvillimet e fundit rreth zgjedhjes së kryetarit të Kuvendit të Kosovës, duke e cilësuar kandidaturën e Dimal Bashës si një lëvizje taktike të kryeministrit Albin Kurti.

Sipas tij, Kurti si “ekspert i lojës” ia ka lëshuar një “jadec” opozitës, e në veçanti Partisë Demokratike të Kosovës (PDK).

“Jadec-in e hëngrën. Z. Kurti ua lëshoi në dorë si ekspert i lojës dhe këta ia mundësuan pak a shumë atë që u përpoq të arrinte nga vendimi i Gjykatës Kushtetuese: të krijojë atmosferën që ai propozon disa kandidatë dhe akuzon opozitën për mungesë vullneti për të bashkëpunuar, për shkak të shumësisë së emrave”, ka thënë Hoxha në emisionin “Debat Plus” .

Ai theksoi se PDK-ja ka rënë në këtë kurth vetë, pasi kishte deklaruar se do të votonte 35 deputetë, përfshirë edhe Dimal Bashën.

“Askush nuk e ka detyruar PDK-në ta thotë këtë. Ata e bënë vetë. Dhe ditën kur e propozuan, manifestuan mungesë të jashtëzakonshme lidershipi”, ka shtuar Hoxha.

Analisti kritikoi mungesën e instinktit politik te drejtuesit e opozitës në sallën e Kuvendit, duke thënë se kryetarët e partive dhe shefat e grupeve parlamentare do të duhej të tregonin autonomi dhe veprim të matur në momente të tilla.

The post ”Kurti ia la “jadec-in” PDK-së” – Ylli Hoxha: Me refuzimin e Dimal Bashës, opozita tregoi mungesë lidershipi appeared first on Telegrafi.

Aktualisht, autoritetet po vijojnë operacionet për neutralizimin e vatrave të zjarrit në fshatin Poros në Vlorë dhe në Bogovë të Skraparit.

Katër helikopterë po operojnë në këto dy zona, duke u fokusuar në shuarjen e flakëve dhe mbrojtjen e zonave të rrezikuara.

Njëkohësisht, Forca Ajrore po monitoron territorin me dronët TB-2, me qëllim identifikimin e vatrave të reja të mundshme dhe evidentimin e rastëve të mundshme të zjarrëvënieve të qëllimshme.

Operacioni vazhdon intensivisht për të parandaluar përhapjen e flakëve dhe për të siguruar sigurinë e komuniteteve përreth.

“Qendra Kombëtare Operacionale e Emergjencave Civile (QKOEC) në AKMC raporton se prej orës 09:00, deri në orën 16:30, datë 25.08.2025, janë raportuar 10 vatra zjarri nga të cilat 6 janë shuar dhe 4 të tjera janë aktive”, njoftoi më herët Ministria e Mbrojtjes.

The post Katër helikopterë “luftë” me flakët në Shqipëri appeared first on Telegrafi.

Profesori Mazllum Baraliu ka folur rreth betejës së humbur të KQZ-së përballë Listës Serbe, pasi PZAP ka rrëzuar vendimin e saj për të mos certifikuar listën e kandidatëve të këtij subjekti politik për zgjedhjet lokale.

Ai ka thënë se situata e fundit është pothuajse e njëjtë me atë që ndodhi në prag të zgjedhjeve nacionale.

“Për afërsisht po, por për arsye se motivet të cilat ne nuk i njohim – të cilat mund të jenë të natyrës klasifikuese, por që do të duhej të ishin të rëndësisë specifike – janë përafërsisht të njëjta. Mbase sepse përafërsisht subjekti më i madh politik, madje edhe koalicioni fitues i zgjedhjeve të fundit në nivel qendror, edhe herën e parë edhe tani ka insistuar dhe votuar që të mos certifikohet ky subjekt politik. Madje ka edhe të dhëna parciale që elementë të këtij subjekti politik kanë qenë vazhdimisht në pozita destruktive ndaj Kosovës”, ka thënë Baraliu.

Ai shtoi se Gjykata Supreme ka të drejtë të kërkojë prova shtesë në rast se nuk ka të mjaftueshme në trajtimin e lëndës ndaj Listës Serbe, në mënyrë që të marrë një vendim “dukshëm më të përpunuar, më substancial në kuptimin e brendisë së çështjes dhe shpjegimit të elementeve”, ka thënë ai në Five në RTV Dukagjini.

The post Baraliu: Gjykata Supreme mund të kërkojë prova shtesë për rastin e Listës Serbe appeared first on Telegrafi.

Bashkimi Evropian ka ndarë 7.5 milionë euro shtesë për Kosovën në kuadër të Pakos së Mbështetjes Energjetike (IPA 2023), duke e rikonfirmuar mbështetjen e tij për tranzicionin e gjelbër dhe energjinë e pastër në vend.

Sipas njoftimit të Zyrës së BE-së në Kosovë, fondet u disbursuan më 19 gusht 2025 dhe janë pjesë e ndihmës së përgjithshme prej 75 milionë eurosh që ka ofruar BE-ja deri tani për sektorin energjetik.

Falë kësaj mbështetjeje: Mbi 200,000 familje kanë marrë ndihmë për pagesën e faturave të energjisë, janë rinovuar mbi 3,600 shtëpi për efiçiencë energjetike, 28 objekte banesore të familjeve të cenueshme janë në proces rinovimi, mbi 40,000 familje dhe 154 biznese janë pajisur me panele solare dhe teknologji të kursimit të energjisë.

“BE-ja qëndron pranë Kosovës dhe popullatës së saj në rrugën drejt energjisë së qëndrueshme, dekarbonizimit dhe sigurisë energjetike”, thuhet në njoftim.

The post BE-ja jep 7.5 milionë euro shtesë për qëndrueshmërinë energjetike të Kosovës appeared first on Telegrafi.