Detaje të reja të publikuara nga mediat kroate, tregojnë se spiunja e dyshuar nga Mitrovica, 46 vjeçarja Ana Murganiq, kishte komunikim me të akuzuarin për sulmin terrorist në Banjskë, Vladimir Radivojeviqin, i njohur me nofkën “Mami”. Lista Serbe e ka mohuar se e njeh spiunen e dyshuar nga Mitrovica, por Slavko Simiqi ka fotografi bashkë me Vladimir Radivojeviqin “Mamin”, me të cilin duken shumë të afërt.

Mediat kroate po pretendojnë se spiunja e dyshuar nga Mitrovica, Ana Murganiq, ka spiunuar për Listën Serbe, por Igor Simiq dje tha se as ai e as Lista Serbe nuk e njohën spiunen e dyshuar.

Por, provat që dalin në dritë, e tregojnë të kundërtën.

Spiunja e dyshuar e cila ra në pranga të kroatëve bashkë me të dashurin kroat J.I, pilot i KFOR-it, del se ka pasur kontakte edhe me një serb që akuzohet nga Prokuroria në Kosovë se ishte pjesë e sulmit terrorist në Banjskë.

Sipas mediave kroate, gjatë hetimeve është gjetur se serbja nga Mitrovica, komunikonte edhe me njërin prej të kërkuarve kryesor në rastin Banjska, Vladimir Radivojeciqin, i njohur me nofkën “Mami”.

“A.M. i shkroi edhe shokut të saj të fëmijërisë, Vladimir Radivojeviq, i njohur si Mami, një nga përfaqësuesit e serbëve nga veriu i Kosovës. Ai vjen nga Mitrovica, ashtu si ajo, por autoritetet e Kosovës e konsiderojnë atë një nga udhëheqësit e të ashtuquajturave “Brigada Veriore”, një organizatë aktive në veri të vendit që është e lidhur me struktura nga Beogradi…– Index.Hr

… Hetuesit e konsiderojnë mesazhin që A. M. i dërgoi atij si të diskutueshëm, duke shkruar: “Duhet ta sqarosh sulmin ndaj KFOR-it në çdo mënyrë që di dhe mundesh.” Po atë ditë, i dashuri i saj pilot i dërgoi një mesazh: “Vërtet e ke prishur punën mbrëmë.” –Index.Hr

E provat, sikurse këto fotografi tregojnë se Mami kishte raporte të mira me zyrtarë të lartë të Listës Serbe. Aty ai shihet me Slavko Simiqin, njeriun që tash po pretendon të bëhet nënkryetar i Kuvendit.

Kujtojmë se Mami-t i ishte gjetur telefoni pranë bombës shpërthyese që rezultoi me vrasjen e Policit rreshter, tash heroit, Afrim Bunjaku në ditën kritike të 24 shtatorit 2023.

Mesazhi që mediat kroate publikuan që serbja ia dërgoi Radivojeviqit, lidhet me datën 25 dhjetori 2022, datë kur në Zubin Potok u sulmuan ushtarët e KFOR-it nga persona të maskuar.

Sipas mediave kroate, çifti që u arrestuar për spiunazh u takuan 9 vjet më herët, në vitin 2016, atëherë kur Ana Murganiq punonte si përkthyese në EULEX, ndërsa piloti kroat ishte pjesë e kontigjentit të KFOR-it.

Për Vladimir Radivojeviqin ose “Mamin”, më herët është raportuar se është njeri i afërt edhe me Aleksandar Vuçiq.

Lista Serbe pos që e kanë mohuar se nuk e njohin këtë grua nuk kanë folur për asnjë detaj lidhur me skandalin.

Dyshimet janë se piloti kroat duke shfrytëzuar pozitën e tij në KFOR, të dashurës serbe, i ka dhënë informacione mbi lëvizjet e trupave të misionit paqeruajtës të NATO-s, e cila më pas ia ka dhënë Listës Serbe. Spiunazh dyshohet se kanë bërë edhe në periudhën kur i dyshuari për sulm ndaj zyrave të KQZ-së, Dejan Pantiq, nga veriu, nuk mund të transportohej për në Prishtinë./Tv Dukagjini/

The post Detaje tjera nga afera e spiunimit në KFOR, agjentja serbe fliste me të akuzuarin e Banjskës – ai ka foto me Slavko Siqmiqin appeared first on Telegrafi.

Njohësit dhe monitoruesit e sistemit të drejtësisë thonë se në praktikë nuk ndodh që një person të mos paraqitet kaq gjatë për të dhënë dëshminë e tij në Prokurori, sikurse në rastin e kryeministrit në detyrë Albin Kurti, që është thirrur si dëshmitar për rezervat shtetërore.

Në Prokurorinë Speciale disa herë u paraqit ministrja e Tregtisë, Rozeta Hajdari.

Aty shkuan edhe zyrtarë të partisë që udhëheq me shtetin, Lëvizjes Vetëvendosje.

Por, duket se me vullnetin e tij nuk do të ndodhë që aty të shihet edhe kryeministri në detyrë i Kosovës, Albin Kurti, pasi insiston që një deklaratë të tillë ta jap në zyrën e tij në Qeveri.

Përkundër kësaj, Prokuroria i kërkoi Gjykatës që Kurtin ta detyroj dhe ta sjell për të dëshmuar, por as kjo nuk ndodhi.

Krejt kjo tashmë, sipas ish-kryetarit të Gjykatës së Apelit, Hasan Shala, ka mbetur në dorë të gjykatës, meqë prokuroria nuk ka më çka të veprojë.

“Çështja tashmë është në gjykatë, gjykata tash është e detyruar, nga ana e prokurorisë, që ajo të marrë vendim dhe të sigurojë prezencën e tij që të dëshmojë në cilësinë e dëshmitarit në Prokurorinë Speciale”, ka thënë Hasan Shala, ish-kryetar i Gjykatës së Apelit.

Edhe pse sipas Shalës ka mbetur vetëm një formë që Kurti të shkojë në prokurori.

“Prokuroria ka qenë e detyruar të kërkojë nga gjykata, saktë, gjyqtari i shqyrtimit paraprak, që të dërgojë një ftesë që ai të paraqitet në prokurori. Mirëpo, edhe pse nuk e ka shfrytëzuar këtë të drejtë, atëherë gjykata ka qenë e detyruar të marrë aktvendim dhe ta dënojë me gjobë dy herë. Tani nuk ka mbetur tjetër veçse kryeministri të shkojë i shoqëruar nga policia në prokurori, që i njëjti të japë deklaratën e tij si dëshmitar”, ka thënë Hasan Shala, ish-kryetar i Gjykatës së Apelit.

E çfarë veprimesh do të marr kjo gjykatë, nuk kanë kthyer përgjigje në pyetjet e televizionit.

Kjo mund të zgjasë pafundësisht sipas ligjit, përkundër që në praktikën e përditshme këto raste nuk zgjasin kaq shumë, thotë Gzim Shala, nga Instituti i Kosovës për Drejtësi.

“Kryesisht, në procedurë paraprake vendimet merren më shpejt, në raport me obligueshmërinë, dhe në raport me gjobën vendimet kanë qenë më të shpejta. Por tash nuk dihet çka ka ndodhur me rastin konkret, nuk dihet nëse pas vendimit të fundit të gjykatës ka pasur ndonjë kërkesë të re nga prokuroria apo jo. Pra, kanë kaluar disa muaj dhe nuk ka informacion në këtë drejtim”, ka thënë Gzim Shala, IKD.

Nëse kanë bërë kërkesë përsëri në Gjykatë, që Kurti të sillet në prokurori me çfarëdo forme, nuk kanë kthyer përgjigje as nga Prokuroria Speciale.

The post Kurti apo Prokuroria Speciale, a do ta detyrojë gjykata kryeministrin në detyrë të dëshmojë? appeared first on Telegrafi.

Krahas situatës politike në Kosovë dhe protestave në Serbi, sipas analistëve politikë, një ndër faktorët kryesor që po ndikon që të mos ketë zhvillime në procesin e dialogut, është konflikti Rusi-Ukrainë, dhe qëndrimi i administratës Trump, i cili mund të sjellë ndryshim në dialogun Kosovë-Serbi dhe në epilogun përfundimtar.

Vizita e rregullt në Kosovë e Emisarit të BE-së për dialogun, ku edhe vetë e konfirmoi se nuk pret zhvillime të reja për shkak të situatës politike, tregon nivelin ecjes përpara në këtë proces.

Krahas bllokadës politike në Kosovë edhe në Serbi nuk po ndalen protestat e dhunshme ndaj pushtetit të Vuçiqit.

Sa i përket dialogut, Kosova mbetet me qëndrimet e vjetra, ndërsa Serbia vazhdon me kushtëzimet që i harron pas disa kohësh. Të fundit kushtëzim e kishte për lirimin nga paraburgimi të Igor Popoviqit, i cili pasi e cilësoi UÇK-në organizatë terroriste dhe u dënua për nxitje të përçarjes dhe mosdurimit, më pas u shkarkua nga vetë Serbia, nga posti i ndihmësdrejtorit në të ashtuquajturën, Zyra për Kosovën.

Se çka pritet nga procesi i dialogut, a pritet të ketë një takim të nivelit të lartë, dhe cili është plani i përmendur nga ndërmjetësuesit e ri të dialogut, nga BE nuk treguan, përkundër pyetjeve të adresuara.

Sipas vëzhguesve të procesit të dialogut, problemet rajonale nuk janë e vetmja pengesë që po e zvarrit procesin e dialogut.

“Si zhvillimet në Kosovë për shkak të bllokimit të institucioneve të reja, po ashtu edhe trazirat në Serbi, duket që kanë ndikuar në frenimin e këtij procesi dhe në të njëjtën kohë duhet të jemi real edhe vetë Bashkimi Europian, ndonëse e konsideron si prioritet normalizimin e marrëdhënieve ndërmjet Kosovës dhe Serbisë, realisht në këtë fazë nuk është tejet i fokusuar për Rajonin e Ballkanit Perëndimor për shkak të negociatave që kanë filluar ndërmjet Presidentit Trump dhe presidentit Putin për të ardhmen e Ukrainës”, ka thënë Afrim Kasolli – analist.

Kasolli thotë se Kosova ka paguar kosto për shkak të zvarritjeve në procesin e dialogut por as Serbia nuk është se ka mbetur pa pasoja.

“Kosova po vazhdon të jetë ende nën masa sanksionuese të BE-së, pikërisht për shkak të telasheve që kanë ndodhur, dhe agjenda e integrimit, agjenda e konsolidimit ndërkombëtar të shtetit të Kosovës do të mbetet e bllokuar për aq kohë sa nuk merr epilog ky proces sepse ne jemi pajtuar në proces që kushti i integrimit të Kosovës në strukturat euro-atlantike, kalon nga progresi në procesin e dialogut”,  ka thënë Afrim Kasolli – analist.

Edhe analisti tjetër Melazim Koci, mendon se zhvillimet në Kosovë dhe Serbi, vetëm pjesërisht kanë ndikuar në gjendjen e dialogut, sepse sipas tij vëmendjen e ka marrë konflikti Rusi-Ukrainë.

Sa i përket qasjes amerikane, Koci mendon se Trump ka lënë të nënkuptohet se marrëveshja franko-gjermane nuk është e vlefshme për të.

“Presidenti Trump nuk është i njohur për diplomaci shumëpalëshe ai çështjet ndërkombëtare duket se dëshiron t’i zgjidhë në formë të njëanshme dhe të drejtuar nga Washingtoni. Kësaj radhe besoj këtë e bën më të mundur fakti që ai komunikon shumë shpesh me presidentin Putin, dhe nuk përjashtoj mundësinë që në komunikimin direkt Trump-Putin të gjendet një zgjidhje për Kosovën, jo tani por në një fazë të mëvonshme pasi të shihet se çka do të ndodhë me Ukrainën, atë e shoh si zgjidhje në kuptimin që z. Trump do të tentojë të kërkoj nga Putin, që ai të njoh Pavarësinë e Kosovës pavarësisht, qëndrimit të Serbisë”, ka thënë Melazim Koci – analist.

Koci nuk e përjashton mundësinë që të ketë takime të nivelit më të ulët, të cilat sipas tij më shumë janë përpjekje për ta paraqitur dialogun si proces që po funksionon, sesa që mund të sjellin rezultate./RTV Dukagjini/

The post Dialogu Kosovë-Serbi nën hijen e zhvillimeve rajonale e ndërkombëtare appeared first on Telegrafi.

Po bëhet gati një javë që kur KEDS-i nisi shkyçje masive të energjisë elektrike ndaj bizneset që mbetën pa kontratë për furnizim një furnizues i licencuar në tregun e lirë. Por, asnjë deklaratë nuk u dha institucionet qendrore, ani pse përfaqësuesit e bizneseve ka kohë që kanë parashtruar kërkesat e tyre. Ato thonë se qeveria në detyrë ka dalë në anën e furnizuesve, gjersa theksojnë se e njëjta injoroi kërkesat e tyre për subvencionim.

Kanë kaluar disa ditë qëkur në fuqi hyri vendimi i Zyrës së Rregullatorit të Energjisë për shkyçjen e bizneseve që nuk arritën të lidhin kontratë me një furnizues të licencuar për tregun e lirë.

Zhurmë nga bizneset u bë, e edhe paralajmërime u dhanë nga përfaqësuesit e odave të bizneseve për pasojat e formës në të cilën hyri në fuqi vendimi.

Por as edhe një deklarim e veprim nuk u ndërmor nga institucionet qendrore, as nga Presidenca e as nga qeveria në detyrë.

Kjo për përfaqësuesit e bizneseve mbetet zhgënjyese.

“Fatkeqësisht institucionet nuk kanë mbështetur fare bizneset ani se rreth 60% e buxhetit të shtetit mbushet po nga këto biznese që dolën dhunshëm në tregun e lirë. Përkundër kërkesave publike, letrave dhe disa takimeve, institucionet në heshtje kanë mbështetur veprimin e ZRRE-së. Për më tepër përkundër që BE shprehu gatishmërinë që të mbështeste Kosovën të kalonte këtë proces hap pas hapi dhe për të cilin ofroi mbi 22 milionë euro, institucionet sërish heshtën. Kjo është një porosi shumë negative si për bizneset vendëse ashtu edhe për ato të jashtme që kanë investuar dhe që në një nga kushtet e favorshme u është thënë se është energjia”, ka thënë  Kushtrim Ahmeti, kryetar i Dhomës së Tregtisë dhe Industrisë në Kosovë.

Njëzëri shprehen edhe nga Oda Ekonomike gjersa thonë se qeveria ka marrë një anë tjetër.

“Tek ne është kriju precepsioni se ma shumë Qeveria ka qenë në anën e furnizuesve sesa bizneseve edhe si nuk e kanë marrë mundim asnjë reagim të ketë. Ju kujtohet në fillim të qershorit se si ministrja ka qenë kategorike që bizneset të lidhin kontratë me furnizuesit dhe aty e kemi kuptuar se s’është në rregull.  Kemi kërku nga kryeministri me subvencionu ashtu siç ka kërkuar ZRrE për një subvencionim 50 milionësh po s’kemi pas përgjigje”, ka thënë Lulzim Rafuna, kryetar i Odës Ekonomike.

Rafuna thotë se qeveria ka injoruar thirrjet e tyre ndonëse.

Mes të tjerash, kritika i drejtohen edhe Presidentes, Vjosa Osmani.

“Ju kemi drejtu edhe Presidencës, s’kemi pas asgjë zyrtare por do ishte shumë e mirëseardhur dhe jo të qëndrojë në heshtje gjersa shkatërrohet ekonomia. Rrugës do ishte që qeveria të subvenciononte shumën. Tash është edhe më e vogël se po flasim për 7-8 muaj, të ketë një paketë mbështetëse dhe një kërkesë tek ZRRE ta përgatisë terrenin më mirë”, ka thënë Lulzim Rafuna, Kryetar i Odës Ekonomike.

Televizioni ka pyetur Presidencën që nga java e kaluar për një koment por e njëjta, sikurse edhe qeveria në detyrë, nuk janë deklaruar për Dukagjinin.

Nga vendimi i ZRrE-së preken 1400 biznese, ndërsa shkyçja e tyre ka nisur që nga dita e shtunë dhe po vazhdon ende./Tv Dukagjini

The post Mbi 1,400 biznese të shkyçura nga energjia, institucionet qendrore në heshtje appeared first on Telegrafi.

9 anëtarë të familjes Ujkani, në Reznik të Vushtrrisë, më 6 prill 1999 u masakruan e u dogjën nga forcat paramilitare, policore e ushtarake serbe.

Në seancën ku ia caktuan 30 ditë paraburgim si i dyshuar për krime lufte ndaj civilëve shqiptarë, erdhi e doli me duar të lidhura. Por gjatë luftës, Sinisha Spasiqin, banorët e Reznikut të Vushtrrisë e kujtojnë me revole në duar dhe të shoqëruar me paramilitarë e forca serbe.

“Spasiqin në këtë shtëpinë e Shaip Zenelit u kanë këtu punkti këtu, u kanë komandandir i paramilitarëve Spasiqi, atë e kam njohur qysh para luftës… qitu e kam pa shumë herë Spasiqin, edhe këtu ka nejt ai me paramilitarët. Atë ditë u dalë me ata paramilatarët me dy kerre prej këtu edhe Spasiqi… knej nuk e kam pa se nuk kam guxu me u afru, se mos po na vrasin…” , ka thënë dëshmitari i masakrës, Bilall Ujkani.

Bilall Ujkani do të bëhej dëshmitar i masakrës së familjes së tij, për të cilën dyshohet edhe Spasiqi.

Një ditë para masakrës, më 5 prill 1999, kushëririn Faikun, e kërcënuan me armë në kokë. Atë e detyruan të tregojë se ku i ka të afërmit.

Të nesërmen, më 6 prill, nisën britmat, ekzekutimet, filluan të shtënat, shtëpitë u dogjën.

Edhe Billalli pa e ditur se çka po ndodhte andej mureve, bashkë me gruan dhe djalin 9 vjeçar po e prisnin vdekjen.

“I tha çka po i bojna po i vrasim, ai tha jo njëherë edhe u nis këndej rreth 20 metra, ai po thotë mos luaj prej këtu se ju vrasim, ky u nis në drejtim të tij, ai vetëm kur njeriu nuk po u tuke vetëm kur e kam pa e ka qu automatin edhe ja ka dhanë një refall në dritare mbi kokë edhe tu kapën ata ndërmjet vete a e pe që gati më vrave mua edhe dulën te kamxhiku te kusherini…”, ka shtuar Ujkani.

E vetmja që mbijetoi nga shtëpitë e vëllezërve ishte Nazmie Ujkani, të cilës ia masakruan burrin, e vetë arriti të largohet.

Bashkë me të, me gruan dhe djalin e mitur, Bilalli tash 77 vjeçar, u kthye tek shtëpitë e vëllezërve.

“Kjo shtëpia e nipit, Ymer Ujkani, edhe jam hy por nuk kam mujt me pa asgjë të kallta krejt, kulmi ish ra, katër shpijave iu ka dalë flaka. Kam vazhdu te shpija dytë Muhamet Ujkani vëllai aty u kanë vëllai me gruan Fatimen edhe aty e kalltë. Jam shku te shtëpia e vëllait, Behxhetit, vëllai Behxheti edhe aty kurgjo nuk kemi mujt me pa. Gruan e ka pasur Nazmija ajo ka shpëtu. Pas kësaj kam shku tek shtepija e vëllait Fehmisë, aty nuk kam pa asgjë. Ishte Sofia, të dy ishin të vrarë e të djegur”, ka thënë Ujkani.

3 vëllezërit, nipin, dy gratë e vëllezërve i pa të vrarë e të djegur deri në asht, por për Bilallin tmerri nuk përfundoi me kaq. Serbët e ekzekutuan edhe kushëririn Faikin, nga i cili një ditë para masakrës, me dhunë kishin marrë informacione për kushërinjtë e tij, të cilët i paralajmëroi për rrezikun, por nuk shpëtuan.

“E kam gjetur Faikin të vrarë plumbin në ballë, shpija nuk ish kallë hiq, e kishin ujdis sikur kur fle”, ka shtuar Ujkani.

Tefik dhe Halide Ujkani, edhe këta kushërinj, u ekzekutuan disa metra më larg, vetëm për faktin se dyshohet që i kishin njohur serbët që i takuan në rrugë dhe u vranë për t’i zhdukur gjurmët e dëshmitarët e mundshëm.

Skena e krimit kishte mbetur e paprekur në qiell të hapur deri më 17 qershor. Atë ditë mbesa, Nedimja, u kthye, në shtëpinë ku ishte rritur, duke e kërkuar nënën e babën.

“Ata gjatë bisedës në mes vete i kam dëgju, që këtu është përdor diçka se këtu nuk mundet trupi i njeriut me u djeg në atë formë me u bë shkumë edhe mbetjet kanë qenë të pakta të tilla, prej secilës kuformë ne kemi arritur me thanë kështu, një palë grushta eshtra me i gjetë për me i dëshmu krejt. Njëjtë i ke gjetë edhe prindërit e tu? Njëjtë të dy prindërit e mi. Njëjtë prindërit e mi njëtjë axhallarët, pak diçka pjesën e kurrizit e ka pasur më të ruajtur djali i axhës, Ymer Ujkani”, ka thënë Nedime Ujkani.

Pak kocka nga ato çka kanë mbetur nga 9 anëtarët e familjes Ujkani, u varrosën më 23 qershor 1999.

Sinisha Spasiqi përpos për pjesëmarrjen në masakrën e Reznikut dyshohet edhe për dëmtim e plaçkitje, dhunë fizike e seksuale ndaj civilëve gjatë luftës në Vushtrri.

Për krime ndaj shqiptarëve në këtë zonë, përfshirë edhe Reznikun, aktakuzë është ngritur edhe ndaj serbit, Sllagjan Trajkoviq.

Në Reznik, Vërnicë dhe Shallc gjatë luftës janë vrarë e masakruar 21 civilë shqiptarë./Tv Dukagjini

The post Spasiqi në paraburgim për krime lufte, dëshmitarët rrëfejnë masakrën në Reznik appeared first on Telegrafi.

Të dyshuarit për vrasjen e tre personave në Gjilan, Mefail Shkodra dhe djemtë e tij, ende nuk janë arrestuar nga Policia e Kosovës. Gjersa hetimet kanë hyrë në javën e dytë të tyre, njohës të këtyre çështjeve thonë se Shkodra i takon kategorisë së personave të përgatitur dhe mund të ketë gjetur një strehim në Serbi. Ata udhëzojnë që Policia e Kosovës të bashkëpunojë me EULEX-in.

Është bërë një javë qëkur në Gjilan ndodhi një vrasje e trefishtë pas disa gjuajtjeve me armë që dyshohen se erdhën si shkak i fajdeve.

Të dyshuarit kryesor për këtë rast, Mefail Shkodra dhe djemtë e tij, Engjulli dhe Edonisi nuk kanë arritur të lokalizohen ende nga Policia e Kosovës ani pse janë në kërkim tash e 7 ditë.

Të dielën, Drejtoria e Policisë në Gjilan ka deklaruar se po punohet intensivisht për kapjen e tyre.

Por, për njohës të çështjeve ku të përfshirë janë persona të kësaj natyre, lokalizimi i tyre s’është i lehtë.

“S’është e lehtë të gjendet persona të tillë sepse pas kryerjes së aktit, ata përgatitin terrenin dhe i shmangen komunikimit, jetojnë në situata tejet sekrete dhe për këtë paraqet vështirësi edhe tek organet e rendit.  Me punë operative, me persona të caktuar zyrtar që nuk janë në uniformë punojnë në terren, komunikojnë për të ardhur deri te mundësia e gjetjes nëse janë brenda territorit”, ka thënë për Tv Dukagjinin Emrush Kastrati, ish-gjyqtar.

Me hetimet që po hyjnë në javën e dytë, Kastrati thotë se nuk duhet përjashtuar mundësia që të njëjtit të kenë kaluar në Serbi, për ç’ka, Policia e Kosovës, sipas tij, duhet të ndërmarrë veprime shtesë.

“Realisht dhe në formë potenciale ekziston mundësia që për shkak të pozitës gjeografike të Gjilanit dhe pjesës së Serbisë ku jeton komuniteti shqiptar, të njëjtit të kenë kaluar andej mirëpo, në rast se gjinden atje, mundësitë e bashkëpunimit me Serbinë janë të pamundshme sepse Serbia nuk bashkëpunon juridikisht me organet e Kosovës por mund të kryhet përmes EULEX për aq kohë sa ka vullnet edhe Serbia”, ka thënë Emrush Kastrati, ish-gjyqtar.

Për ish-hetues policorë, kërkimi i ndihmës nga EULEX-i mbetet mundësia e vetme.

“Meqenëse Policia e Kosovës dhe e Serbisë nuk kanë një bashkëpunim direkt dhe ky bashkëpunim bëhet përmes disa strukturave të Policisë së UMNIKU-t apo edhe Policisë së EULEX që të bahet një trysni përmes EULEX ose BE Serbisë, që t’i arrestojë dhe t’i ekstradojë në Kosovë. Përndryshe, mundësitë janë të kufizuara”, ka thënë Hilmi Canolli, ish-hetues në Policinë e Kosovës.

Mefail Shkodra ishte i dënuar nga Gjykata e Gjilanit për armëmbajtje pa leje, vjedhje e shërbimeve komunale e për shkaktim të rrezikut të përgjithshëm.

I njëjti së bashku me djalin e tij, i kërkuar gjithashtu, ishin arrestuar e më pas liruar gjatë vitit të kaluar për veprën penale të fajdes e detyrimit, për shkak se kishin paguar dorëzani.

The post Ish-hetuesit: Të dyshuarit për vrasjen në Gjilan mund të kenë kaluar në Serbi, EULEX mund të ndihmojë appeared first on Telegrafi.

Gjithsej 39 ekstradime nga Kosova dhe vende të tjera janë kryer nga janari deri në qershor të këtij viti. Njohësit e sigurisë vlerësojnë punën e institucioneve në këtë drejtim, dhe thonë se shtetin tonë e pengon shumë mos anëtarësimi në organizata ndërkombëtare

Bashkëpunimi mes institucioneve të Kosovës dhe Shqipërisë në fushën e sigurisë shpesh ka sjellë rezultate pozitive.

Dy shtetet kanë përmbyllur me sukses një tjetër proces ekstradimi.

“Raportohet se nga Shqipëria është ekstraduar një mashkull kosovar i shpallur në kërkim nga autoritetet kosovare. I njëjti, pas kryerjes së procedurave, është marrë nga Njësia e Mbrojtjes së Afërt për procedura të mëtejshme”, thuhet në njoftimin nga Policia e Kosovës.

Nga ky institucion këtë të enjte treguan për televizionin Dukagjini edhe numrin në total të ekstradimeve.

Brenda gjashtë muajve të parë këtij viti janë realizuar 39 ekstradime, prej tyre 15 ekstradime nga Kosova për në shtete të tjera, ndërsa 24 ekstradime nga shtete të tjera në Kosovë.

Punën e institucioneve të Kosovës në këtë drejtim po e konsideron të mirë njohësi i çështjeve të sigurisë, Refki Morina.

“Kjo shkon përmes Ministrisë së Drejtësisë, në koordinim me gjykatat, edhe bëhet ekstradimi i personave nëse edhe tek ne është parë me Kod Penal si vepër penale. Gjithashtu, ekstradimi ndodh me shtete që kemi marrëveshje bilaterale me ta”, ka thënë Refki Morina, njohësi i çështjeve të sigurisë.

Ndërkaq, Valdet Hoxha tregon se çka e pengon Kosovën në këtë fushë.

“Natyrshëm, që pengesat janë të mëdha për shkak të mos anëtarësimit të Kosovës në Interpol dhe Europol, pastaj edhe mos anëtarësimi në Këshillin e Evropës, mos pasja me të gjitha vendet marrëveshje bilaterale për ekstradim. Megjithatë, Kosova është mjaft aktive edhe duke lëshuar fletarrestë përmes mekanizmave ndërkombëtarë apo vendeve mike”, ka thënë Valdet Hoxha, ekspert i sigurisë.

Gjatë vitit 2024, 77 persona janë ekstraduar nga Kosova në shtetet tjera dhe anasjelltas. Ndërsa, janë realizuar tri ekstradime transit përmes territorit të Kosovës, që e çon numrin e përgjithshëm në 80./Tv Dukagjini/

The post Kosova aktive në ekstradimin e të arrestuarve, 39 raste më 2025 appeared first on Telegrafi.

Kishin qenë duke u larguar nga fshati me 15 traktorë, burra dhe gra së bashku, kur ranë në pritë të ushtarëve serbë.

Kështu e nis historinë e saj e mbijetuara e radhës e dhunës seksuale nga lufta e fundit në Kosovë, në emisionin “Debat Plus” të TV Dukagjinit.

Pasi ushtarët i kishin ndarë burrat nga gratë, këto të fundit u përballën me një prej armëve më të rënda të luftës: dhunën seksuale.

“Na ndanë burrat dhe na futën brenda. Më vonë erdhën, na tërhoqën zvarrë dhe na çuan në dhoma lart. Na dhunuan, na zhveshën, teshat na i prenë me thikë. Jo vetëm teshat, por edhe lëkurën e trupit na e çanin. Për orë të tëra na mbanin aty, na maltretonin dhe na rrihnin. Na thoshin: ‘Ku e keni NATO-n?’ dhe përmendnin emrat e udhëheqësve të saj, si Xhimi Shea…”, rrëfen ajo.

Sipas saj, burrat ishin ngujuar në hambarë, të rrahur dhe të detyruar të dëgjonin britmat e grave dhe fëmijëve.

Ajo thekson se ushtarët serbë nuk kursyen askënd, pavarësisht moshës.

“Ka pasur shumë gra, vajza, plaka. Nuk është kursyer asnjë moshë. Plakat i rrihnin, i zhveshnin lakuriq dhe i godisnin… Po, i rrihnin”, kujton ajo, duke shtuar se mes viktimave kishte edhe fëmijë.

Përveç dhunës seksuale dhe asaj fizike, torturat ishin nga më çnjerëzoret. Në natën e festës së Bajramit, ushtarët serbë i bënë një pyetje makabre:

“Cilin fëmijë do të ta presim për ta bërë kurban? Këtë nuk e harroj kurrë dhe nuk mund ta fal. E harrova veten, kur më erdhi puna te fëmija. Më gjuajtën djalin nga prehri, ma morën…”

Djali i saj ishte vetëm dy vjeç. Pas kësaj, e morën edhe atë me dhunë.

“Ma kapën djalin dhe e hodhën. Pastaj më kapën mua për flokësh. Unë nuk doja të shkoja, po bërtisja ‘s’dua, s’dua’. Më tërhoqën zvarrë për shkallë. Ishte mbrëmje… Na çonin nëpër dhoma, teshat na i prenë me thikë. Tri ditë nuk kishim asgjë për të veshur.”

Gjatë gjithë kohës, pyetja që përsëritej nga ushtarët ishte e njëjta:

“Ku e keni UÇK-në? Ku e keni NATO-n?”

The post Rrëfimi i të mbijetuarës së dhunës seksuale gjatë luftës: Na pyesnin “ku e keni NATO-n” appeared first on Telegrafi.

Një tjetër e mbijetuare e dhunës seksuale gjatë luftës së fundit në Kosovë ka ndarë historinë e saj tronditëse në emisionin “Debat Plus” në TV Dukagjini.

Ajo ka treguar se ishte vetëm 11 vjeçe kur u dhunua nga ushtarë serbë, njëri prej të cilëve e njihte që para luftës. Ky person, të cilin e përmend me emrin “Gjura”, kishte punuar më herët me babain e saj.

Derisa mendonte se babai ishte i vdekur, ajo më pas e pa të gjallë në një stacion policie ku po mbahej peng nga forcat serbe, pasi kriminelët kishin marrë atë dhe nënën e saj.

“Fiks Gjura ka qenë. Tri ditë e tri netë… Nëna në një dhomë, unë në një dhomë tjetër, që ishte një stallë lopësh. Na morën atë ditë kur e gjuajtën nga djepi vëllain tim. Aty e futën nënën në kerr, katër me maska, Gjura si ‘bos’, me grada në krah, i rrihte gjoksin dhe u kthyen të më merrnin mua”, ka rrëfyer ajo.

Ajo tregon se vendi ku u çuan ishte përdorur si “stacion dhunimi” për gratë dhe vajzat shqiptare.

“Aty kishte vetëm kashtë në dysheme, rroba dhe sende të grave. Gjura tha ‘lema mu këtë të renë’… dhe më pas nuk e dija ku po më çonin”, tha ajo.

Sipas saj, dhunuesi i kërkonte ta zhvishte dhe i siguronte ushqim vetëm nëse pranonte kushtet e tij.

“Tha: shpërthekomi pullat e këmishës. Nuk munda… duart nuk më punonin. Sot nuk e dua burrin, nuk kam dëshirë as për jetën intime. Ai më detyronte që edhe kur të kthehesha, duhej prapë ta kënaqja nëse doja ujë ose ushqim”, shtoi e mbijetuara.

Kur u takua përsëri me nënën pas largimit të ushtarëve, ajo e gjeti atë të lënduar dhe me shenja në gjithë trupin.

Pas luftës, nëna e saj e fejoi në moshën 21-vjeçare me një burrë që fillimisht e pranoi të kaluarën e saj.

“Në takimin e parë, nëna i tha të vërtetën: ‘Kjo është vajza ime deri sot’. Ai e pranoi. Por me kohën, qëndrimi i tij ndryshoi dhe filloi dhuna fizike. Nga 16 vite martesë, 11 i kalova me prindërit e tij. Dhuna e luftës u zëvendësua nga dhuna në familje”, ka treguar ajo.

Sipas saj, problemet u thelluan kur vëllai i bashkëshortit kërkoi të martohej me motrën e saj, kërkesë që ajo e refuzoi.

“Hyri inati, pse nana nuk ia dha vajzën. Ai më tha para të gjithëve: ‘Po hajt se veç unë të kam marrë ashtu si je kanë’”, kujton ajo.

Pasi vjehrri mori vesh për dhunën që ajo kishte përjetuar gjatë luftës, e përzuri nga shtëpia.

The post “Lema mu këtë të renë” – e mbijetuara e dhunës seksuale me histori rrëshqethëse appeared first on Telegrafi.

Në emisionin “Debat Plus” sonte rrëfimin po e jep një tjetër i mbijetuar i dhunës seksuale nga lufta e fundit në Kosovë.

Ai ka rrëfyer gjerë e gjatë për tmerrin që e përjetuan, dhunën që panë me sy të tyre, përfshirë masakra.

Por, në kulmin e luftës, familja mbeti pa ushqime dhe këtu ai vendosi të dal për të kërkuar ushqime, në shtëpi tjera të braktisura dhe këtu i ndodhi tmerri kur hasi në tre zyrtarë policorë serbë, të cilët e morën dhe e dërguan në një restorant.

Aty thotë që përjetoi tmerrin e jetës së tij.

“Antiqe, hajde t’ia kryejmë punën këtij, më kanë kap zhag, më rrehen, më kanë lidh duart, më kanë ngreh zhag, më kanë shti në restorant, i ashtuquajturi atëherë është quajtur Restorant “Beogradi”, është përballë kinemasë ABC, ashtu e ka pas atë emër. Aty i rrahun, i torturum kur jam hy i kam pa dy zonja, dy femra shqiptare të zhveshura, atëherë m’u kanë këput dy këmbët, ato veç i kishin pas dhunu ato. Aty më kanë shtri për toke, më ka ra shkelëm ma ka qit njani kamën këtu, më kanë desh edhe më ka dhunu qiky Antiqi, me fjalën ante, po emrin ky e ka pas Antiq, e ka pas një shejë në ballë këtu, i madh 2 metra..” ka rrëfyer ai.

I emocionuar e me zë të dridhur, ai u bënë thirrje atyre dy grave që të paraqiten për të dëshmuar atë që ndodhi aty.

“Si n’kllapi u rreha përjashta, shkelmin kur ma ka qit këtu më ka dhunu ky, dhe Antiqi, brima e atyre dy vajzave, zonjave gjithë kam kërkue është edhe dëshmitar edhe shoqata jem edhe psikologia, gjithë herë kam kërku ju lutem nëqoftëse jeni gjallë dikun, lajmërohuni në shoqatën në Prishtinë, tregone rastin edhe vendin në qoftëse nuk e dini pytne dikan restorant është quajtur restorant Beogradi, ku jeni hi ju”, shprehet ai tek thotë se përkrahja e familjes së tij asnjëherë nuk ka munguar.

Ai falënderon QKRMT-në gjithashtu për ndihmën që i kanë ofruar ndër vite për të zbutur sado pak traumën e dhimbjen që e ka nga ky krim i tmerrshëm lufte i forcave të Serbisë.

The post “Më dhunuan në sy të dy grave, i kishin dhunuar edhe ato”- rrëfen i mbijetuar i dhunës seksuale nga lufta e fundit në Kosovë appeared first on Telegrafi.

Zëvendësministri në detyrë i Drejtësisë, Vigan Qorrolli, ka reaguar ndaj vendimit të fundit të Gjykatës Kushtetuese, duke e cilësuar atë si një ndërhyrje të paprecedent në punën e Kuvendit të Kosovës.

Në emisionin special në TV Dukagjini, Qorrolli ka thënë se Gjykata Kushtetuese ka tejkaluar kompetencat e saj kushtetuese dhe ka cenuar autonominë funksionale të pushtetit legjislativ.

“Për arsye shumë të thjesht që është edhe kushtetuese, edhe juridike edhe logjike. Sepse sot në gjënë që ka shpallur gjykata Kushtuese, që nënkupton dispozitivin e një aktgjykimi, Gjykata ka marrë një veprim që në përmbajtje e tij juridike dhe pasojën institucionale që do ta prodhojë përben tejkalim të kompetencave kushtetuese dhe njëkohësisht cenim të autonomisë funksionale të Kuvendit, si pushtet legjislativ”.

“D.m.th. kjo është një ndërhyrje brutalisht e kodifikuar e Gjykatës Kushtetuese në kompetencat e Kuvendit të Kosovës. Zakonisht laikët në demokracitë e brishta thonë që po ndërhynë politike në gjyqësor. Ky është rasti më eklatant në demokracinë e reja të Evropës postkomuniste, të 35 viteve të fundit që gjyqësori ndërhynë në kompetencat e pushtetit legjislativ…”, ka thënë Qorrolli.

The post Qorrolli për vendimin e Kushtetueses: Ndërhyrje brutale në kompetencat e Kuvendit të Kosovës appeared first on Telegrafi.

Komisioni i Përbashkët për të Zhdukurit do të duhet që deri në Qershor të mbante gjashtë takime në kryesimin e Bashkimit Evropian, sipas asaj që ishin pajtuar Kosova e Serbia, por asnjë i tillë nuk ka ndodhur. Kosova fajëson Serbinë për bllokadën, BE-ja nuk jep detaje, ndërsa njohës të procesit fajësojnë bllokun 27 anëtarësh për mungesë presioni ndaj Beogradit zyrtar.

Gjashtë takime të Komisionit të Përbashkët Kosovë-Serbi për të zhdukurit me dhunë gjatë luftës, nën kryesimin e Bashkimit Evropian, do të duhej të mbaheshin deri në qershor.

Por ende nuk është mbajtur as takimi i parë, përkundër darkordimit për termat e referencës në dhjetorin e vitit të kaluar.

Më 15 janar, duke refuzuar pjesëmarrjen, Serbia pamundësoi punimet e komisioni jo-politik dhe që atëherë nuk pati më njoftime për përpjekje të reja.

Tash e disa muaj Bashkimi Evropian përsërit përgjigjen e njëjtë për kohën kur mund të mbahet takimi i parë.

“Do ta kumtojmë në kohën e duhur”, thuhet nga Bashkimi Evropian

Bllokimi i punës së komisionit nga Serbia, sipas kabinetit të zëvendëskryeministrit në detyrë për dialog Besnik Bislimi “demaskoi qasjen destruktive dhe mungesën e vullnetit për zbardhjen e fatit të personave të zhdukur me dhunë”.

“Jemi në kontakt të vazhdueshëm me emisarin Sorensen në lidhje me këtë çështje e cila kërkon edhe angazhimin e BE-së por që nuk mund të ecë përpara pa reflektim nga ana e Serbisë. Mos përmbushja e termave të referencës nga Beogradi zyrtar është shkelje e qartë e dakordimit të dhjetorit të vitit të kaluar, ndërsa mungesa e shtyrjes përpara të një çështjeje të tillë urgjente e të karakterit humanitar siç shprehet edhe në Aneksin e Zbatimit të Ohrit, është tregues i refuzimit të Serbisë ndaj këtij aneksi shtojcë të Marrëveshjes Bazë dhe kundërshtimit të tyre ndaj normalizimit të marrëdhënieve e fqinjësisë së mirë”, ka deklaruar Klisman Kadiu, këshilltar i zëvendëskryeministrit për dialog

Pasi tha se Serbia më 2011 kishte nënshkruar konventën e OKB-së për mbrojtje nga zhdukja dhe nuk e zbaton atë, profesori Dritëro Arifi theksoi se kur nuk ka presion shteti fqinj shpërfill gjithçka.

“Ka një neglizhencë totale nga Bashkimi Evropian në trajtimin e vlerave humanitare, pra ky është problemi. Dhe duke e ditur një shtet siç është Serbia që nuk respekton as marrëveshjet ndërkombëtare, as vlerat njerëzore dhe humanitare, unë e shoh të pamundur të realizohet një marrëveshje e tillë në konditat çfarë gjendet shteti serb”, ka thënë Dritëro Arifi, profesor.

Profesori Arifi nuk pret zhvillime pozitive, teksa përmend që Serbia politizon secilën temë.

“Çdo problem teknik me Serbinë është në nivel politik, pra është nivel i luftës që prek gjithçka. Kosova e ka të pamundur të bëj më shumë. Kosova e ka bërë, deri diku, po themi, maksimumin sa ka mundur ta bëjë. Por, presionin politik dhe ligjor mund ta bëjë vetëm Bashkimi Evropian, sepse ai është e fasilituesi, por është edhe financuesi më i madh i vendeve të Ballkanit Perëndimor, respektivisht Kosovë, Serbi. Dhe, nëse BE-ja e mban një neutralitet karshi çështjes humanitare unë e shoh si një çështje që nuk do të zgjidhet  edhe për një kohë shumë të gjatë”, ka thënë Dritëro Arifi, profesor.

Me marrëveshjen bazë dhe shtojcën e Ohrit, çështja e personave të zhdukur ishte cilësuar humanitare dhe me nevojë urgjente për t’u zgjidhur.

Në këtë kontekst, Albin Kurti dhe Aleksandar Vuçiq më 2 Maj 2023 u pajtuan për një deklaratë të përbashkët për të zhdukurit, por e cila mbeti vetëm në letër./Tv Dukagjini

The post Fati i të zhdukurve mbetet peng i lojës politike – Serbia bllokon, BE hesht appeared first on Telegrafi.

Në një rrëfim për televizionin Dukagjini, Imer Gashi nga fshati Busi i komunës së Prishtinës ka treguar se si Serbia po përpiqet që për vrasjen e tre serbëve, nga një serb tjetër, fajin t’ua lë shqiptarëve. Gashi tha se më 1999, Sërgjan Simiq kishte vrarë me sopatë Zhivojin, Trojan dhe Zhivko Simiqin, e më pas kishte ikur drejt Serbisë. Ai tregoi se me qëllim të fabrikimit dhe propagandës, së fundmi në fshat ishin një grup serbësh.

Tre serbë që dyshohet të jenë vrarë me sopatë nga kushëriri i tyre në maj të vitit 1999 në fshatin Busi të Prishtinës, nëpërmjet fabrikimit e propagandës, Serbia po përpiqet t’i paraqesë si “të masakruar nga fqinjët shqiptarë”.

Në një rrëfim për televizionin Dukagjini, Imer Gashi nga Busia tha se në përvjetorin e vrasjes së Zhivojin, Trojan dhe Zhivko Simiq – në fund të muajit maj të këtij viti – një grup serbësh së bashku me prijës fetarë ishin në fshat.

Ai fillimisht ishte habitur me numrin njerëzve, automjeteve dhe kamerave që pa poshtë pronës së tij.

Sipas Gashit, në vendin ku ishin vrarë tre serbët, ata vendosën lule dhe një kryq të improvizuar – teksa kryen filmime, siç tha, për një “dokumentar” propagandues.

“Isha pak ma naltë, edhe më thotë një pop, a e din qysh u kanë ngjarja? Po qysh ka me kanë ngjarja, ju vet i keni mytë, thashë”, ka thënë Imer Gashi, Banor i fshatit Busi, Prishtinë.

Duke përmendur me emër e mbiemër dëshmitar nga komuniteti serb, Gashi tha se tre serbët i kishte vrarë kushëriri i tyre Sërgjan Simiq, për të cilin tha se nga paslufta jeton në Serbi – pasi edhe para luftës u bënte probleme shqiptarëve.

“Ky krimineli është njëfar, Sërgjan… Simiq, Sërgjan Simiq. Këta ma ka tregu edhe një serb është i këtuhit, kojshi i joni, jeton atje ***, ma ka tregu historinë se qysh ka ndodhë vrasja e këtyre serbëve”, ka thënë Imer Gashi, banor i fshat Busi, Prishtinë.

Teksa tregoi se më 1999, kur kishte ndodhur rasti, në fshat nuk kishte shqiptarë, Imer Gashi tha se sherr për vrasjen mes serbëve ishte bërë ndarja e mbi 1000 bagëtive të cilat ata, sipas tij, i kishin vjedhur.

“Këta i ka pre një bashkëvendas i tyre, d.m.th këta dojnë me bë një propagandë kinse i kena pre na shqiptarët. Këta pas luftës i kanë vjedhë gjanë (bagëtinë) e katunit, të Busisë, të Kullecve edhe të Mramorit, edhe i kanë pru këtu te shpijat e tyre ku i kanë ma poshtë. Edhe nuk kanë mujt me ra në marrëveshje me i nda gjanë (bagëtinë) d.m.th. lopë, dhenë e çka kanë pasë, edhe ai krimineli që i ka pre këta, i ka marrë gjanë (bagëtinë), i ka shitë dhe ka ecë për Serbi”, ka thënë Imer Gashi, Banor i fshat Busi, komuna e Prishtinës.

Gashi tha se një kohë serbët ishin përpjekur që fajin t’ia mveshin një bashkëfshatari shqiptar, tashmë të ndjerë, por shtoi se për përpjekjet për fabrikim mori vesh vetëm së fundmi.

Në një libër propagandues, Serbia fajëson, siç thuhet, fqinjët shqiptarë për kasaphanen ndaj anëtarëve të familjes Simiq.

Prokuroria, e cila kuptoi për rastin vetëm pas interesimit të televizionit Dukagjini, shprehi gatishmëri për veprim.

“Prokuroria Speciale e Republikës së Kosovës nuk ka pranuar deri më tani asnjë informacion lidhur me rastin për të cilin keni adresuar pyetjen. Megjithatë, Departamenti për Hetimin e Krimeve të Luftës do ta trajtojë këtë informacion në bashkëpunim me hetuesit policorë”, ka thënë Arbnora Luta, zëdhënse e Prokurorisë Speciale.

Ndërkohë, Gashi u shpreh i gatshëm që rrëfimin e tij ta japë edhe në institucionet e drejtësisë.

The post Tre serbë u vranë nga kushëriri i tyre në Busi të Prishtinës, banori rrëfen për tentativën serbe për të manipuluar të vërtetën appeared first on Telegrafi.

Ndonëse nuk janë shkyçur përkundër tejkalimit të afatit për furnizim të përkohshëm nga KEK, bizneset e mëdha, pa kontrata, nuk e dinë se na kush po furnizohen. Derisa paqartësitë vazhdojnë në mungesë të informacioneve zyrtare, sipas llogaritjeve të Odës Ekonomike dëmi ditor në faturat e rrymës, si pasojë e moszbatimit të aktgjykimit të Komerciales, është 328 mijë euro.

As në ditën e dytë nga përfundimi i periudhës 60-ditore të furnizimit të përkohshëm nga KEK-u, si Furnizues i Mundësisë së Fundit, bizneset e mëdha, që nuk kanë kontrata, nuk e dinë se nga kush po e marrin rrymën.

Në heshtje dhe pa njoftim për të ardhmen e procesit të hapjes së tregut, ata nuk janë shkyçur, përkundër tejkalimit të afatit.

Duke vënë në pah paqartësitë në mungesë të njoftimit zyrtar, në Dhomën e Tregtisë dhe Industrisë vazhdimin e furnizimit e lidhin me aktgjykimin e Gjykatës Komerciale, në të cilin thuhet se “anulohet në tërësi” vendimi i ZRRE-së për hapjen e tregut të energjisë elektrike për bizneset e mëdha.

“Çka ka ndodhë tash? Tash nuk e di askush çka është duke u bë, do të thotë shkyçje nuk ka, sepse vendimi nuk e lejon një gjë të tillë, derisa të dalë vendimi final”, ka thënë Kushtrim Ahmeti, Drejtor i Dhomës së Tregtisë dhe Industrisë.

Duke mirëpritur aktgjykimin dhe duke kërkuar hetime për procesin, Ahmeti e vlerësoi të çuditshme, siç u shpreh, “mbylljen e ZRRE-së pas krekosjes se kanë të drejtë deri në ditën e publikimit të aktgjykimit”

“Kam pritur që ZRRE-ja, së pari, të dalë menjëherë dhe ta sqarojë në publik e jo të fshihet në zyrë tash, e jo me nejtë gjithë ditën mbyllë nëpër mbledhje. Por të dalë prej momentin që e ka marrë aktgjykimin e gjykatës dhe ta sqarojë në publik, me ua dërgua edhe njoftimet kompanive që i ka qitë padrejtësisht, por edhe vetë kompanive që janë në proces më u thënë duhet ta stoponi këtë punë”, ka thënë Kushtrim Ahmeti, Drejtor i Dhomës së Tregtisë dhe Industrisë.

Duke përmendur pasojat financiare, Oda Ekonomike përsëriti kërkesën ndaj ZRRE-së për pezullim të procesit, duke thënë se ai vendim do të përbënte “akt patriotik”.

“Bazuar në të dhënat preliminare, konsumi vjetor i bizneseve të përfshira në tregun e lirë vlerësohet të jetë rreth 550 GWh. Me çmimet aktuale të ofruara në tregun e lirë, kjo përkthehet në një kosto minimale prej rreth 120 milionë euro në vit. Nga kjo rezulton një dëm mesatar prej rreth 328 mijë euro në ditë, respektivisht rreth 10 milionë euro në muaj, si pasojë e moszbatimit të aktgjykimit të Gjykatës Komerciale nga ZRrE“, ka thënë Oda Ekonomike e Kosovës.

Më 30 Korrik u publikua një aktgjykim i Gjykatës Komerciale që e shpalli të jashtëligjshëm dhe e anuloi në tërësi njoftimin e ZRRE-së për nxjerrjen bizneseve në tregun e hapur nga 1 Qershori.

Megjithatë, As ZRRE, KEK e as KESCO nuk janë përgjigjur për këtë çështje./RTV Dukagjini

The post Paqartësi dhe heshtje: Bizneset kanë rrymë por s’dinë kush ua sjell, ZRRE-ja s’flet appeared first on Telegrafi.

Në ciklin e rrëfimeve të të mbijetuarve të dhunës seksuale gjatë luftës së fundit në Kosovë, gratë përpos se viktima, patën edhe role të tjera esenciale për atë kohë.

Përveç që u përball me dhimbjen dhe dhunën, e mbijetuara që po rrëfen sonte historinë e saj në “Debat Plus”, u bë nënë e çdo ushtari dhe bijë e çdo të plagosuri.

Me zë të ngadalshëm e fjalë të rënduara nga emocionet, ajo kujton se aso kohe kujdesej për çdo nevojë të ushtarëve.

“Mbeta shtatzënë, i kisha dy muaj e tre javë qashtu. Majshim miell, bajshim miell për familjen, për refugjatët, janë kanë edhe disa ushtarë në shtëpinë tonë aty, në tonën jo në fakt në qat shpijën që ishim pozicionu. Sigurojshim bukën. Ua kom la çorapat, ua kom la të mbathurat në mbramje, ju kom bo bukë ka 4-5 herë në ditë. Edhe pastaj jemi shku me bajt miell”.

Por ajo që e përjetoi më rëndë ishte skena kur në një shtëpi të braktisur ku qëndronin, u detyrua të pastrojë të mbeturat e dikujt që kishte mbetur i vrarë nga një granatë.

“Na ishim në *** te vorret të pozicionuar në shtëpinë e ***, edhe vllaun e *** e patën vra me granatë dore. Unë vet me duart e mija e kom la gjakun e tij edhe copat mishit. Po njeri po u bojke i fortë”, rrëfen ajo momentin e rëndë.

Ajo kujton se në luftën për mbijetesë kërkonin për ushqim nga fshati në fshat.

Por pikërisht në një prej këtyre ditëve, vetëm pak metra pas ndarjes prej familjares hasi në policine serbe.

Nga familjarja u nda dhe vetëm 200 metra më pas hasi në ata për të cilët kishte dëgjuar shumë por përballë nuk i kishte pasur deri atëherë.

Ajo rrëfen momentin kur hasi në forcat serbe të veshura me uniforma policie.

“Para ftyrës edhe mbrapa ftyrës kom pa policë, ka pas të maskum e të pamaskum, po kujt i ka ra ndërmend me u merr me ta. Po armët, që të bëjnë përshtypje, gjuha serbe, një femër krejt zi oborri, para shpinde dhe prapa shpinde edhe ma kanë bo ‘Digji vamo’ (hajde këtu), se unë serbisht nuk di. Ia kom bo, e kom gabu rrugën. Edhe më kanë kap për momentin tu m’sulmu, fizikisht. Më goditshin, këto sheja të ballit i kom krejt prej armëve”, ka shpjeguar momentin e përballjes me policët serbë.

Pas dhunës fizike, që e kujton sa herë që del para pasqyrës, e mbijetuara u tërhoq zvarrë drejt një dhome ku do të përjetonte aktin më çnjerëzor të luftës.

“Me armë, më kanë shti me një dhomë. Vërtetë t’u hi e kom pa gjakun nëpër korridor, gjakun e kom pa. Më kanë shti, më kanë dhunu, tre-katër vetë tu m’sillë, më kanë zhvesh, jom kon me trenerka. Kom pas shaminë kështu ndër fyt, se më thojke nana si parandjenjë mos po të dhunojnë, po më kishte bo Zoti guri nuk kom ditë as me u tut as me u trembë prej dhimbjes të njerëzve, me hongër me pi. S’di, s’kom ditë me u frikësu deri kom has n’ta. Jom mundu mos me i lanë me më zhvesh. Kom pas do trenerka të gumës, të Gjermanisë ato pos me i preh se nuk çkyhen, tesha gumë, teshat e brendshme mi kanë çky. Kanë fillu tu m’goditë, tu m’zhveshë edhe kanë nis tu m’dhunu. Njoni më dhunojke tjetri dilke te dera përcjellke terrenin, të tjerët u nijshin atje në oborr. Më ka dhunu i pari tu m’sillë, më ka dhunu i dyti, u ardhë tjetri, ky më dhunojke ai i mshojke armë e dilke përjashtë. Edhe ky më mshojke me armë…”, vazhdon rrëfimin e mbijetuara e këtij akti barbar nga policët serb.

Megjithatë, nuk përfundoi vetëm me kaq. Për ta poshtëruar dhe lënduar deri në skaj, polici i pestë që e kishte dhunuar përdori edhe një shishe xhami.

“I nijsha unë krismat, a janë kanë UÇK-ja gati për me iu hi me iu ra, a për me u taku, a çka po di unë veç qaq janë dal rreptë apo janë dal shpejt sikur vetima, se iu ka ardh urdhëri t’u i bërtitë serbisht njëri-tjetrit hajde a ‘bërrzhi’ a qysh nifar fjale me ik. Me pantoll për këmbë u dal i fundit, një shishe të xhamit kanë tentu, edhe i ka bërtitë ky tjetri a dinë ma shpejt, se unë se kuptoj serbishten e as nuk di, veç janë dalë, dmth në fund ma kanë qit shishen edhe sot jom edhe e çkyme. Ma kanë, dmth në pjesët intime shishen e xhamit në fund ma kanë qit. Tani unë e kom pa veç që kanë dal. Unë e dekt se e dekt. Jom çu si zhag t’u u vesh”, ka përshkruar ajo momentet e fundit tronditëse.

Me largimin e policëve, ajo gjeti forcën që të ngrihet e të largohet nga ajo shtëpi e kur arriti aty, nuk i tregoi askujt.

“Po më thotë vjehrra, a je tranu, a t’kanë lanë ment ti je shtatëzane e ti po hin në ujë të ftohtë, thash jom lodhë, e jom rrëzu e jom vrae thash po ma don qashtu me hi. Krejt ujë shkojke po e ngrejke kjo a e dinë që osht si ujëmbledhës e në oborr shkojke gjaku. Ajo veç pak me u pas afru, e kish pa gjakun vade, shkojke me ujë. Hi kaculna ndër çeshme me kry e me krejt. Thotë ti a je tranu, thotë ti qysh po hin shtatzanë në ujë. Me i thanë se cka m’ka gjetë…shkoj dhe me thotë *** se çka u vonove, ajo që u nda. Thash – valla e humba rrugën edhe thash e tu ik e asi u çka ki kështu, thash jom rrëzu e jom sakatu thash”, vazhdon ajo tutje rrëfimin.

Sot e kësaj dite, fjetja me dritë fikur për të është e pamundur.

The post U dhunua nga policët serbë me shishe xhami, e mbijetuara e dhunës seksuale në luftë: Edhe sot i vuaj pasojat appeared first on Telegrafi.

Për 350 vende në Policinë e Kosovës kanë aplikuar afro 6900 qytetarë në konkursin e fundit, i cili u mbyll së fundmi. Sipas njohësve të kësaj fushe, kjo po bëhet më shumë për të hyrë në punë të shtetit shkaku i stabilitetit më të madh, ndërkaq trajnimi i tyre do të zgjatet në 6 muaj, siç kishte qenë më herët.

Shumë shpejt pritet që Kosovës t’i shtohen edhe 350 policë të rinj.

Kjo pasi që sapo është mbyllur konkursi i hapur nga Policia e Kosovës.

Megjithatë, për këto pozita do të zhvillohet një garë e ashpër, meqenëse numri i aplikimeve është goxha i madh

“Në konkursin për zyrtarë policorë, që ka qenë i hapur nga data 17 qershor deri më 7 korrik, kanë aplikuar gjithsej 6818 veta, prej tyre 5569 meshkuj dhe 1249 femra.”

Por, si shpjegohet një interesim kaq i madh për një numër të kufizuar të të pranuarve?

“Qytetarët e Kosovës e kanë një përshtypje që domosdo duhet të jenë të punësuar në një punë të shtetit, e cila është një qasje e gabuar e djemve dhe vajzave të reja, sepse një punë e shtetit nuk sjell edhe një punë të sigurt, një punë e shtetit nuk të sjell të ardhura të mjaftueshme dhe të sigurta për të jetuar”, tha Visar Rrecaj, ish-zyrtar i Policisë së Kosovës

E pas rastit të fundit në Lipjan, ku një qytetar ndërroi jetë, e dyshimet janë që kanë kaluar kompetencat e tyre zyrtarët policorë, si pasojë e mos profesionalizmit të tyre dhe mos përgatitjes së tyre të mjaftueshme në Akademinë e Policisë, e cila momentalisht zgjatë afro 3 muaj, nga 6 sa ka qenë, sipas Rrecajt, ka qenë një gabim.

“Trajnimet kryhen, por koha gjatë së cilës ata i kryejnë këto trajnime, nuk mjafton që këto trajnime të kthehen në shprehi, sepse trajnimet fizike e psikike duhet të përsëriten shumë gjatë, deri të kthehen në shprehi”, tha Visar Rrecaj, ish-zyrtar i Policisë së Kosovës

Televizioni Dukagjini ka pyetur Policinë nëse trajnimi në Akademinë Policore do të kthehet në 6 muaj prej gjeneratës së re e tutje, nga 3 muaj sa është aktualisht, por ky institucion nuk ka kthyer përgjigje.

Megjithatë, prej burimeve të saj televizioni mëson se një gjë e tillë do të ndodhë.

Pritshmëri të tilla ka edhe ish-nënkoloneli Refki Morina.

“Trajnimi që ka qenë 3 muaj, shumë shpejt do të kthehet në 6 muaj. Në bazë të informacioneve që kemi, do të kenë trajnime të mjaftueshme si për armë dhe të tjerat, dhe duhet t’i kushtohet rëndësi shumë edhe trajnimeve që do të kryhen pas Akademisë, sidomos në punën e tyre fushore 19-javore”, tha Refki Morina, Ish-nënkolonel në Policinë e Kosovës .

Ani pse zyrtarisht nuk është thënë, si arsye për shkurtimin e trajnimit është përmendur në opinionin publik nevoja që policët e rinj të dalin në terren meqë, sipas diskutimeve, ka pasur mungesë të tyre./RTV Dukagjini/

The post Interesim i madh për t’u bërë polic, trajnimi në akademi pritet të kthehet në 6 muaj appeared first on Telegrafi.

Në episodin e parë të ciklit të ri të emisionit “Debat Plus”, para publikut vjen një rrëfim rrëqethës e tronditës nga një i mbijetuar i luftës në Kosovë.

Kjo dëshmi nuk është vetëm për të dokumentuar krimet e kryera, por për të thyer heshtjen që për vite kishte rënduar mbi barrën e përjetimit dhe dhunës.

Emisioni nisi me një reflektim mbi jetën e para luftës e të mbijetuarit të dhunës seksuale nga forcat serbe – një jetë modeste në një fshat malor, e mbushur me vështirësi, punë si arsimtar dhe përpjekje për një jetë të dinjitetshme.

Por, ngjarjet që ndodhin në vitin 1998-1999 shënuan pikën e kthesës.

Ishte periudha kur ai për herë të parë dëgjoi për Ushtrinë Çlirimtare të Kosovës e cila po luftonte forcat serbe, pikërisht atëherë frika, dhuna dhe persekutimi hynë në mënyrë brutale në jetën e tij dhe të familjes së tij.

Rrëfimi i tij përfshin ndarjen nga gruaja dhe fëmijët, djegien e fshatit, depërtimin me dhunë, rrahjet, poshtërimin dhe aktet e dhunës seksuale ndaj tij.

“Tmerr çka s’ta merr mendja hiq. E filloi lufta edhe neve si zakonisht, e kemi pas punktin e policisë dy kilometra prej fshatit tonë edhe gjithë kemi qenë me frikë, hyjshin policia vazhdimisht, çdo dy ditë, na gjithë kemi fjetë në mal, më së zori e kanë pas fëmija edhe gratë, se prapë na iknim por fëmija e gratë e kanë pas zor, se ka pas herë që me ka dy ditë s’kemi hangër bukë… Ujë pijshim se gjenim përrockave, e me hangër ka ndodhë dy ditë s’kemi hangër”, ka rrëfyer ai.

“… me maska vinin, dy ofansiva kanë hy në fshat tonë. Ofansiven e parë s’kanë mujt s’kanë mujt me më za, ndërsa, në ofansiven e dytë me kanë za dhe na kanë mbledhë në fshat aty, kemi qenë 480 vetë, kurr s’e harroj atë 480 vetë edhe na kanë mbleshë një arë edhe e kanë djegë tërë fshatin…Po, po krejt, edhe gra e fëmijë i kanë marrë i kanë qu për *******, neve burrave na kanë mbledhë në një arë edhe, se e dinin disa gjuhën, unë s’e kam ditë gjuhën serbe, thamë, çka bahet me neve, thanë, me juve po ju pret masakra e ******** se dy ditë kanë hy në ************ e kanë kry masakrën, tani kanë hy në fshatin tonë”, ka rrëfyer ai..

Në këtë rrëfim rrëqethës, i mbijetuari tregon se si u kap nga forcat serbe, bashkë me 480 burra të tjerë nga fshati dhe zona përreth, dhe u dërgua në drejtim të ************, me tanke para e mbrapa, të shtyrë e të rrahur brutalisht.

“Po pas masakrës së **********në ora 4 u kry ofansiva, ata qysh thoshin, edhe u mblidhen të shkolla në fshat aty që janë mbledh ushtria, policia krejt me maska, të ngjyrosur, edhe tha, u kry ofansiva, tha me sukses edhe këta krejt me i marrë e me i qu në ***********…. edhe kah jemi shku rrugës në fshatin **********, **********”, ka thënë ai.

Dy herë ai përjetoi dhunë seksuale nga policë serbë – njëri prej tyre e urinoi mbi trupin e tij të përgjakur dhe të rrëzuar në dysheme.

“… edhe veç ma ka ba me gisht hajde, edhe na kanë qu e kemi shkarku zhavorin e kena maru si punkt edhe me kanë marr mu me kanë shti mrena në shpi të ******** edhe me kanë dhunu.…Jo, unë kam qenë një dhomë vetëm edhe krejt ata gjashtë kanë qenë, i kanë qu tjetër vend…Krejt të maskum, edhe më ka ra të fikt, unë s’kam ditë kurgja hiq, kur më ka dal çpia(më ka ardhë vetëdija), më urinonte, një polic, kur kqyri krejt gjak isha kanë….edhe më ka rrokë grykë automati në shpinë, bile i kam shenjat në shpinë edhe më ka thanë serbisht hyn në kolonë”, ka rrëfyer ai.

Përmes zërit të tij të thyer por të vendosur, dëshmitari solli një kujtesë të gjallë për tmerret që ndodhën në luftën e fundit në Kosovë.

Ky rrëfim nuk është vetëm dokument i së shkuarës, por një thirrje për drejtësi dhe një kujtim i gjallë për brezat e sotëm e të ardhshëm që të mos harrojnë. Kjo është vetëm një nga shumë dëshmitë që emisioni “Debat Plus” do të sjellë në ciklin e tij të ri, i cili synon të ndriçojë të vërtetat e pathëna të luftës përmes zërave të atyre që mbijetuan.

The post Një zë që thyen heshtjen – rrëfimi i një të mbijetuari të dhunës seksuale gjatë luftës në Kosovë appeared first on Telegrafi.

Derisa Gjykata Komerciale aprovoi kërkesën për masë sigurie, respektivisht pezullim të vendimit të ZRRE-së për hapjen e tregut të energjisë elektrike për bizneset e mëdha, Rregullatori nuk i sheh aktvendimet në raste individuale si precedent. Ndërkohë, kërkesa për masë sigurie nga përfaqësues të bizneseve në tërësi u refuzua nga Gjykata Themelore. Sidoqoftë, krahas asaj kolektive, beteja vazhdon me padi individuale në Gjykatën Komerciale.

Vendime të kundërta lidhur me kërkesën për masë sigurie ndaj vendimit të Zyrës së Rregullatorit për Energji për hapjen e tregut të energjisë elektrike për bizneset e mëdha, kanë nxjerrë gjykata të ndryshme në vend.

Departamenti për Çështje Administrative i Gjykatës Themelore, refuzoi dy kërkesa të Odës Ekonomike dhe Shoqatës së Prodhuesve në emër të bizneseve, si dhe të PDK-së për masë sigurie.

Ndërsa, Gjykata Komerciale ka aprovuar masën e sigurisë ndaj vendimit të ZRRE-së në disa raste individuale të padive të bizneseve që preken nga procesi, duke e pezulluar atë deri në aktgjykimin përfundimtar.

Rregullatori, që refuzon ta pezullojë vendimin në tërësi duke mos i konsideruar aktvendimet individuale si precedent të përgjithshëm, nuk lëvizi nga qëndrimi.

“Jo, këto Aktvendime nuk krijojnë precedent për të gjithë procesin dhe nuk kanë efekt të përgjithshëm. Çdo vendim për masë të sigurisë ka efekt vetëm për palët përkatëse në procedurë. Vendosja e masës së sigurisë kërkon parashtrim të veçantë dhe individual të kërkesës për pezullim dhe shqyrtohet në bazë të rrethanave të veçanta të secilit rast nga Gjykata”.

Në Shoqatën e Prodhuesve, kërkesa e të cilëve për pezullim të vendimit në emër të bizneseve si tërësi u refuzua, këmbëngulin se Rregullatori duhet të pajtohet për pezullim pasi paditë individuale po vazhdojnë.

“Gjykata Themelore, Departamenti për Çështje Administrative, kemi marrë dje njoftimin që e ka refuzua masën pezulluese, por nuk e ka refuzua padinë. Ne do të vazhdojmë me Gjykatën e Apelit dhe tutje qëllimi ynë ka qenë për një vendim për procesin në tërësi, ndërkohë ne jemi duke vazhdua me të gjitha bizneset edhe paditë individuale. Paditë individuale po pezullohen nga Gjykata Komerciale”, ka deklaruar Kushtrim Ajvazi, kryetar i Shoqatës së Prodhuesve.

Ai sqaroi se për shkaqe ligjore padia bashkë me OEK-un u adresua në Themelore pasi u bë në emër të bizneseve, teksa ato individuale kanë adresë Komercialen.

Ndërsa u shpreh i bindur se institucionet e drejtësisë do t’u japin të drejtë në të gjitha paditë.

“Të jemi të qartë, edhe pse kemi shkua si grup, ne individualisht të gjitha bizneset janë duke dorëzua lëndë individuale, ne jemi duke pritë dhe çdo ditë po marrim përgjigje për rastet individuale që po pezullohen. Ky rast nuk nënkupton që po i dëmton bizneset në paditë individuale. Paditë individuale janë duke vazhdua, do të vazhdojnë deri te padia e fundit ku do të fitojmë rastin”, ka theksuar Ajvazi.

Nga 1 Qershori, rreth 1300 biznese me më shumë se 50 punëtorë ose më shumë se 10 milionë euro qarkullim vjetor, janë nxjerrë në tregun e hapur të energjisë elektrike përkundër protestave dhe kërkesës së përsëritur për shtyrjen e procesit për një vit, me qëllim përgatitjen e tregut dhe bizneseve./RTV Dukagjini

The post Konfuzion ligjor për vendimin e ZRRE-së, gjykatat me vendime të ndryshme – bizneset kërkojnë drejtësi appeared first on Telegrafi.

Ministri në detyrë i Mbrojtjes, Ejup Maqedonci, në një intervistë në emisionin Personale në RTV Dukagjini, ka deklaruar se lufta e Ushtrisë Çlirimtare të Kosovës mund të konsiderohet ndër më të pastrat në historinë e njerëzimit.

Megjithatë, sipas tij, pas përfundimit të luftës, shoqëria kosovare dhe klasa politike nuk kanë bërë sa duhet për ta mbrojtur dhe promovuar këtë pjesë të lavdishme të historisë kombëtare.

Maqedonci ka theksuar se vendi ka qenë nën një presion të vazhdueshëm ndërkombëtar për ta lënë në hije të kaluarën çlirimtare, në funksion të krijimit të një rendi të ri në Ballkan.

Ai ka komentuar edhe për themelimin e Gjykatës Speciale, duke thënë se në kohën kur është marrë ai vendim, nuk ka qenë e mundur të bëhej më shumë për ta parandaluar atë.

“Ne nuk e kemi pasur sigurinë as për të ardhmen e vendit… e gjithë shoqëria jonë, por besoj se edhe të gjithë ata që ishin në politikë për këto 25 vite, nuk kanë bërë mjaftueshëm për të ruajtur vlerat e UÇK-së, për të promovuar luftën e drejtë dhe të pastër të UÇK-së dhe për të penguar synimet e Serbisë dhe aleatëve të saj për të denigruar UÇK-në”, ka deklaruar ai.

”Gjykimi në Hagë nuk është gjykim personal por ndaj një kauze. Atje janë marrur drejtuesit e UÇK-së dhe duke u dënuar apo synuar të dënohen, dënohet komplet struktura”, ka thënë ai.

Në pyetjen se sa po bënë shteti jonë tani për të mbrojtur këta krerët të cilët janë atje, Maqedonci ka thënë:

”Do të duhej të ishte e kundërta besoj”, ka thënë ai.

Maqedonci vlerësoi se mungesa e një qëndrimi të unifikuar dhe të qëndrueshëm për ta mbrojtur historinë e luftës së UÇK-së ka lënë hapësirë që Serbia të vazhdojë përpjekjet për ta kriminalizuar atë luftë, përmes narrativave ndërkombëtare dhe nismave ligjore.

The post Maqedonci: Lufta e UÇK-së ishte e lavdishme, por shoqëria dhe politikanët nuk e promovuan mjaftueshëm appeared first on Telegrafi.

Në mbyllje të serisë së hulumtimeve të emisionit “Debat Plus”, publiku u njoh me kulmin e një rrëfimi tronditës mbi figurën shumëdimensionale të Nazim Bllacës, ish-mësuesi i gjeografisë që u bë dëshmitar kyç i EULEX-it dhe, sipas materialeve të publikuara, njëkohësisht bashkëpunëtor i prokurorisë serbe.

Përmes përgjimeve të incizuara gjatë kohës sa Bllaca ndodhej në burg, dëshmohet se ai gëzonte privilegje të jashtëzakonshme për një të dënuar për vrasje: komunikonte për orë të tëra në telefon me Zdenka Pumper, hetuese e lartë e EULEX-it, e cila më vonë do të bëhej pjesë e Zyrës së Prokurorit të Specializuar në Hagë.

Në momente kur kërkesat e tij për ulje dënimi, lirim me kusht apo avancim të rasteve në drejtësi nuk plotësoheshin, Bllaca kërcënonte se do të tërhiqej nga bashkëpunimi dhe se do të dilte publikisht kundër EULEX-it.

Në një nga përgjimet, ai dëgjohet duke thënë:

“Nëse EULEX-i nuk e çon përpara, unë më 21 janar do t’ia zgjas dorën Danillos, ty edhe me ju thanë ‘Na falni, mbaroj gjithçka’… e më dërgoni për atje. Le të lëshon ndonjë prokuror një letër që Bllaca s’don më”.

Për më tepër, ai pohon se kishte hapur Facebook-un nga burgu, ndonëse nuk kishte të drejtë, dhe kishte paralajmëruar se do të fliste publikisht për çështje të ndjeshme, përfshirë rastet Bamieh dhe Ratel, dy prokurorë të përfshirë në akuza ndaj ish-krerëve të UÇK-së.

“Pas 10 ditësh, Bllaca do të flas, edhe pikë”, – shkruante ai.

Bllaca paraqitet si “agjent i dyfishtë”, dëshmitar që për 6 vjet kishte ndihmuar EULEX-in të ndërtonte raste të mëdha gjyqësore, përfshirë katër procese penale në Kosovë, dhe që, sipas të gjitha gjasave, është përfshirë edhe si dëshmitar në Hagë.

Emri i tij është përmendur edhe nga vet mbrojtja e Kadri Veselit në procesin aktual.

Ndërkohë, Zdenka Pumper, personi që bashkëpunoi nga afër me Bllacën për vite me radhë në Kosovë, tashmë koordinon hetimet në Hagë kundër Hashim Thaçit, Kadri Veselit, Jakup Krasniqit dhe Rexhep Selimit.

Sipas vetë Bllacës, “nuk ka çështje që Zdenka nuk e di në Kosovë”, duke e përshkruar atë si njërën nga figurat më të fuqishme në zinxhirin e drejtësisë ndërkombëtare që ka vepruar në Kosovë.

Ky kapitull final i hulumtimit të ‘Debat Plus’ ka lënë shumë pyetje të hapura për legjitimitetin e proceseve të drejtësisë ndërkombëtare, për rolet e individëve kyç në ndërtimin e aktakuzave, dhe mbi të gjitha, për përdorimin politik e juridik të dëshmitarëve që veprojnë në kushte të paqarta dhe shpesh të dyshimta.

“Debat Plus” përmbylli episodin e fundit me thirrjen për të vazhduar kërkimin drejt së vërtetës dhe drejtësisë, në një sistem ku besimi publik është lëkundur dhe ku faktet shpesh janë të errësuara nga interesa të ndërlikuara ndërkombëtare.

“Në një sistem ku e vërteta mbetet shpesh e fshehur, e keqpërdorur dhe e manipuluar, për ne mbetet detyrë të vazhdojmë të kërkojmë përgjigje dhe drejtësi”, ka thënë Ermeal Panduri./RTV Dukagjini/

The post Bllaca, dëshmitari që shkruante nga burgu në Facebook dhe udhëzonte drejtësinë ndërkombëtare appeared first on Telegrafi.