Papunësia në Gjermani ka kaluar për herë të parë pragun e 3 milionë personave në një dekadë, duke nxitur shqetësime të mëdha për ecurinë e ekonomisë dhe duke rritur presionin mbi qeverinë që të sjellë rezultate të shpejta nga planet gjigante të investimeve.

Sipas të dhënave të publikuara nga Zyra Federale e Punësimit këtë të premte, 29 gusht, këtë muaj numri i të papunëve arriti në 3.02 milionë, me një rritje prej 46 mijë personash krahasuar me muajin korrik.

“Në Gjermani, tre milionë nuk është thjesht një shifër. Është një prag simbolik që ndan forcën nga dobësia,” u shpreh Carsten Brzeski, kreu i makroekonomisë globale në ING.

Kriza u thellua më tej nga inflacioni, i cili u rrit mbi pritshmëritë në gusht, duke arritur në 2.1% nga 1.8% që ishte në korrik.

Ekonomia më e madhe e Europës po përballet me një ngërç të zgjatur, të ndikuar nga tarifat doganore të vendosura nga SHBA-të dhe pasojat e luftës së Rusisë në Ukrainë. Për herë të parë, Gjermania rrezikon tre vite radhazi pa rritje ekonomike.

Edhe ministrja e Punës, Baerbel Bas, paralajmëroi se kërkesa për punë po bie me shpejtësi, vetëm në gusht u raportuan 631 mijë vende të lira pune, 68 mijë më pak se një vit më parë.

Qeveria gjermane ka vënë në dispozicion një fond të posaçëm prej 500 miliardë eurosh për infrastrukturën dhe rimëkëmbjen ekonomike, por ekspertët thonë se rezultatet do të duan vite për t’u ndjerë. Kancelari Friedrich Merz pranoi se rritja e papunësisë tregon se reformat janë të domosdoshme.

Kriza po ndikon edhe në konsum. Shumë familje po kursejnë më shumë nga frika për të ardhmen, ndërsa shitjet me pakicë ranë me 1.5% në korrik, shumë më tepër se pritshmëritë e analistëve që parashikonin një rënie prej vetëm 0.4%.

The post Gjermania kalon pragun fatal, mbi 3 milionë të papunë për herë të parë në një dekadë first appeared on JavaNews.al.

Transporti në vendin tonë pritet të pësojë një transformim në vitet e ardhshme, çka do të ndikojë edhe në reduktimin e emetimeve të gazeve me efekt serrë dhe përshtatjen ndaj ndryshimeve klimatike.

Sipas Raportit të Gjendjes në Mjedis, i publikuar nga Agjencia Kombëtare e Mjedisit, deri në vitin 2030, rreth 30% e transportit rrugor do të transferohet drejt hekurudhës, duke lehtësuar ndjeshëm ngarkesën në rrugë dhe duke ulur ndotjen e ajrit.

Aktualisht, transporti rrugor konsiderohet ndër kontribuesit kryesorë të ndotjes së ajrit dhe të emetimeve të CO2 në vend, teksa nisja e funksionimit të trenave shihet si një nga masat më të rëndësishme për reduktimin e konsumit të lëndëve djegëse fosile, që janë karburantet.

Ndërkaq, parashikimi që rreth 30% e transportit rrugor të zhvendoset në hekurudhë lidhet ngushtë me përfundimin e disa prej projekteve më të rëndësishme hekurudhore në vend, si linja Tiranë – Durrës – Rinas dhe Vorë – Hani i Hotit.

Sipas afateve tw bwra publike, projekti për ndërtimin e linjës Vorë – Hani Hotit pritet të përfundojë pikërisht në vitin 2030, teksa aktualisht është në fazë tenderimi për përzgjedhjen e kompanisë që do kryejë punimet.

Ndërkohë linja Tiranë – Durrës – Rinas është më e avancuar, por afati për përfundimin e plotë është shtyrë disa herë. Së fundmi u bë me dije se trenat për këtë linjë hekurudhore parashikohet të vijnë në 3-mujorin e parë të vitit 2027.

Përveç përfitimeve mjedisore, zhvendosja drejt transportit hekurudhor pritet të sjellë edhe rritje të sigurisë rrugore, kursime ekonomike dhe lehtësi në lëvizjen e mallrave dhe qytetarëve.

The post Plani: 30% e transportit rrugor do kalojë në hekurudhë deri në vitin 2030 first appeared on JavaNews.al.

Një zjarr i përmasave të mëdha u aktivizua mbrëmjen e sotme në Nikël të Krujës si pasojë e djegies së mbeturinave në një kanal, i cili ndodhej pranë një kabine elektrike.

Flakët rrezikojnë mjetet dhe disa banesa që ndodhen pranë.

Për shuarjen e tij janë angazhuar zjarrëfikës dhe punonjës të njësisë vendore ndërsa zjarri vijon të përhapet duke krijuar vatra të reja.

The post Krujë, i vihet zjarri mbeturinave pranë kabinës elektrike në Nikël, në rrezik banesat first appeared on JavaNews.al.

Sipas raportimeve të Financial Times, presidenti amerikan Donald Trump është përfolur se ka propozuar vendosjen e forcave paqeruajtëse kineze në Ukrainë, një ide që thuhet se lidhet me një sugjerim të mëhershëm nga presidenti rus Vladimir Putin.

Megjithatë, një burim nga kampi i Trump e ka mohuar kategorikisht këtë pretendim, duke deklaruar se nuk ka pasur asnjë diskutim për forca paqeruajtëse kineze.

Propozimi i raportuar ka shkaktuar shqetësim në Kiev dhe në disa kryeqytete evropiane, duke pasur parasysh mbështetjen që Pekini i ka dhënë hapur Moskës gjatë luftës në Ukrainë.

Ndërkohë, Ukraina dhe aleatët e saj perëndimorë po shqyrtojnë mundësinë e krijimit të një force ndërkombëtare neutrale për të garantuar sigurinë në rajon. Turqia ka shprehur gatishmërinë për të marrë pjesë në këtë nismë si pjesë e përpjekjeve për ruajtjen e paqes.

The post Financial Times: Trump propozon forca paqeruajtëse kineze për Ukrainën first appeared on JavaNews.al.

Në një Shqipëri ku çdo cep i Instagram-it ndriçon me dritat LED të “haulit” të fundit apo me filtrin e një dite “perfekte”, influencuesit kanë marrë një status që dikur u rezervohej vetëm VIP-ave klasikë.

Me një telefon në dorë dhe një audiencë të ndërtuar mbi një algoritëm, ata janë kthyer në motorë ekonomikë që prodhojnë të ardhura të konsiderueshme, tashmë edhe në objekt vëzhgimi të Administratës Tatimore…

Në rrjetet sociale shqiptare, çdo mëngjes fillon me një ”story”. Një kafe në dritë të mëngjesit, një “unboxing”, një urim me zë të ëmbël për ndjekësit, një bashkëpunim i koduar si dashuri e sinqertë për një produkt të ri.

Në sipërfaqe, ky është një ritual modern, një formë komunikimi e përditshme, intime dhe e padëmshme. Por pas këtij rrëfimi minimalist fshihet një realitet financiar shumë më i madh sesa duket: një ekonomi në hije, që funksionon nëpërmjet shikimeve, pëlqimeve dhe një audience që konvertohet në të ardhura të ndjeshme.

Në Shqipëri, ku shumica e të rinjve janë përdorues aktivë të rrjeteve sociale dhe ku tregu reklamues dixhital është rritur me mbi 25% çdo vit pas pandemisë, fenomeni i influencuesve nuk është më një trend i pakicës, por një pjesë qendrore e mënyrës sesi konsumohet, reklamohet dhe shitet gjithçka, nga kremi për fytyrën te mendimi për veten.

Dhe po, shitet edhe “mendja”! Dhe megjithatë, për vite me radhë, këto të ardhura nuk janë përfshirë në logjikën fiskale të shtetit, duke krijuar një vakum të rrezikshëm: nga njëra anë kemi qytetarë që fitojnë dhjetëra mijë euro në vit; nga ana tjetër, një shtet që deri dje nuk dinte as ku t’i kërkonte.

Në njoftimin e disa muajve më parë nga Drejtoria e Përgjithshme e Tatimeve, i bazuar në verifikime me bankat, thuhej se mbi 33 milionë euro janë gjeneruar nga individët nëpërmjet platformave dixhitale si Meta, Facebook, YouTube, Google, etj.

Shifra është zyrtare, por në të vërtetë nuk përfaqëson të gjithë tregun, ajo është vetëm maja e një ajsbergu të të ardhurave të pamatshme, të cilat, për shkak të natyrës së decentralizuar dhe të paformalizuar të sektorit, nuk janë as të dokumentuara, as të kontrolluara.

Ky realitet po ndryshon. Për herë të parë, individët që gjenerojnë të ardhura nga platformat sociale janë ftuar të deklarojnë fitimet e tyre në formularin vjetor DIVA 2024.

E nëse për shumicën e profesionistëve të lirë, kjo datë ishte e pritur dhe e pranuar, për shumë influencues ajo përfaqësonte një dilemë ekzistenciale: të pranojnë se janë biznese dhe të hyjnë në sistem, apo të vijojnë të qëndrojnë në hijen e famës, pa llogari e pa përgjegjësi.

Aneid Kaloti, themelues i platformës “SHET Industry”, që ndjek nga afër zhvillimet e tregjeve kreative, shprehet se aktualisht, menaxhimi bëhet nga agjenci të mirëfillta, por edhe formalizimi total i tregut është çështje kohe. “Ne jemi dëshmitarë të një realiteti të ri ekonomik që po e sfidon modelin tradicional të sipërmarrjes.

Kur të ardhurat e një vajze që publikon një video ‘morning routine’ kalojnë të ardhurat e një biznesi të vogël që paguan qiranë, sigurimet dhe taksat, shteti nuk mund të mbyllë më sytë. E njëjta logjikë duhet të vlejë për të gjithë: nëse fiton, kontribuo”, thotë ai.

Influencuesit janë bërë motorët më të fuqishëm të komunikimit tregtar dhe shpesh edhe kulturor. Ata ndikojnë në vendimet për blerje, në vlerat që promovohen, në mënyrën si të rinjtë e shohin veten, suksesin, trupin, modën dhe identitetin.

Dhe këtë ndikim e ushtrojnë pa ndonjë mbikëqyrje institucionale, pa trajnime për përgjegjësi sociale, pa etikë të detyrueshme. Ata janë një media alternative me ndikim masiv, por pa strukturë llogaridhënieje.

Tomi Kallanxhi, themelues i “Big Media Expert”, e artikulon më drejtpërdrejt këtë boshllëk: “Në çdo treg serioz, influencuesit nuk janë thjesht persona me shumë ndjekës, ata janë subjekte tregtare.

Ata kanë marrëveshje, kontrata, detyrime ligjore. Në Shqipëri, ndodh e kundërta. Fama perceptohet si e mjaftueshme për të justifikuar të ardhura të pamatshme. Kjo ka deformuar mënyrën sesi shihet puna, suksesi dhe përgjegjësia. Ka deformuar edhe tregun e agjencive të marketingut dixhital, jo të gjitha janë të formalizuara”, pohon ai.

Problemi është se shumë influencues nuk janë thjesht të pandërgjegjshëm; ata funksionojnë në një ekosistem ku informaliteti është normë. Pagesat për bashkëpunime shpesh bëhen “cash” ose përmes platformave të pallogaritura në sistemin tatimor shqiptar.

Një pjesë e tyre edhe me shkëmbime klering. Asnjë kontratë, asnjë faturë, asnjë deklarim. Po a është influenceri shqiptar shpesh viktimë e një sistemi të ndërtuar për të nxitur fshehjen dhe jo transparencën?

Në vendet perëndimore, ky është një debat i kaluar. Franca, Italia, Gjermania e kanë përfshirë prej kohësh industrinë dixhitale në sistemin e vet të tatimeve dhe së drejtës së punës.

Sipas ligjit të ri të 2024 të Bashkimit Europian, influencuesit janë të detyruar të etiketojnë qartë përmbajtjen e sponsorizuar, të deklarojnë partneritetet tregtare dhe të paguajnë kontribute sociale si çdo profesionist tjetër i pavarur. Në Shqipëri, kjo etikë është ende larg, duke qenë një sektor shumë i ri dhe i pastrukturuar.

Formalizimi i kësaj industrie nuk duhet të fillojë me frikë, por me edukim, thotë për “Monitor”, Selami Xhepa, ekspert i ekonomisë. Sipas tij, shteti nuk mund të vijë me gjoba pa ofruar më parë mjete për orientim dhe strukturim.

“Këta individë duhet të kuptojnë si të hapin një NIPT, si të lëshojnë një faturë, si të bëjnë vetëdeklarim online, si të përfshihen në skemat e sigurimeve shoqërore dhe shëndetësore.

Në të kundërt, çdo përpjekje për të përfshirë këtë sektor në sistemin tatimor do të dështojë dhe do të kthehet në një betejë kulturore, ku fama përplaset me burokracinë, dhe ku viktimizimi mediatik mbizotëron mbi logjikën fiskale”, thotë z. Xhepa.

Fitime të majme?

Aneid Kaloti thekson se pagesa që merr një influencues nuk përcaktohet vetëm nga numri i ndjekësve, por nga një kombinim faktorësh që lidhen me korrektësinë ndaj publikut dhe mënyrën e komunikimit me të.

Ai nënvizon se ka rëndësi nëse një person është thjesht figurë publike apo ndërvepron realisht me audiencën, duke ndarë momente nga jeta e përditshme, si veshje, gatime, pushime apo evente të ndryshme.

Këto elemente e bëjnë marrëdhënien me ndjekësit më të afërt dhe më autentike, duke rritur vlerën e influencuesit në sytë e bizneseve.

Sipas tij, një tjetër tregues i rëndësishëm është analiza e numrave, që përfshin jo vetëm ndjekësit, por edhe nivelin e angazhimit, shikueshmërinë dhe ndikimin real që ka influencuesi në audiencë. Këto matje ndihmojnë markat të kuptojnë nëse investimi në një bashkëpunim është i justifikuar dhe cilat janë përfitimet që mund të marrin në këmbim.

Z. Kaloti shton se figurat publike, veçanërisht ata që janë të mirënjohur në ekranet mediatike, zakonisht paguhen më shumë.

Arsyeja, sipas tij, lidhet me imazhin që kanë ndërtuar dhe reputacionin e tyre të konsoliduar, i cili e bën më të lehtë për markat të lidhin produktin ose shërbimin e tyre me një figurë të besueshme dhe të njohur nga një audiencë e gjerë.

Sipas Tomi Kallanxhit, drejtues i “Big Media Expert”, tregu i influencuesve në Shqipëri ka evoluar dukshëm me kalimin e kohës. Agjencitë aktualisht luajnë rol kyç si urë ndërmjet influencuesve dhe kompanive, duke strukturuar bashkëpunimet dhe duke ndihmuar në profesionalizimin e lidhjeve mes palëve.

Ai thekson se marketingu dixhital tashmë ka marrë pjesën më të madhe të “tortës” nga ai tradicional, kompanitë janë gjithnjë e më shumë të orientuara drejt këtij modeli. Për këtë arsye, format e bashkëpunimit janë zhvilluar në paketa që përfshijnë story, postime dhe reels në Instagram, dhe pagesat variojnë nga 50 euro për një foto deri në mbi 5 mijë euro për paketë.

Sipas z. Kallanxhi, pagesat nuk varen nga numri i ndjekësve, por nga reagimet që influencuesi gjeneron, specifikisht nga sa herë postimet u shfaqen ndjekësve në ekran gjatë një muaji.

Gjithashtu, është thelbësore që produkti të pasqyrojë audiencën e influencuesit; p.sh., një modele nuk është e përshtatshme për reklamimin e produktit për bebe, pasi audiencat duhet të përputhen për të maksimizuar efektivitetin, përfundon ai.

Pagesat për influencerët në Shqipëri

Foto e vetme në Instagram

Shpesh përdoret për promovime të shpejta dhe të drejtpërdrejta të produkteve ose shërbimeve. Çmimi fillon nga 50 euro dhe rritet në varësi të audiencës dhe nivelit të angazhimit.

Story të sponsorizuar

Një nga format më popullore, pasi lejon komunikim të shpejtë dhe interaktiv me ndjekësit. Pagesat variojnë zakonisht nga 50 deri në 150 euro për një story, me mundësi shtesë nëse përfshihet edhe link drejt produktit ose një seri storiesh.

Reels / Video të shkurtra

Shërbejnë për të treguar produktin në veprim, duke gjeneruar më shumë shikueshmëri organike. Çmimi zakonisht është 100 deri në 500 euro, në varësi të idesë kreative, kohëzgjatjes së videos dhe cilësisë së prodhimit.

Paketa të plota (postime + reels + story)

Për fushata të strukturuara marketingu, kompanitë zgjedhin paketa të kombinuara që ofrojnë ekspozim të vazhdueshëm. Këto paketa mund të arrijnë mbi 5 000 euro, sidomos kur përfshihet një figurë publike e njohur ose kur bashkëpunimi zgjat për disa javë.

Faktorët që ndikojnë në pagesë

Çmimet nuk varen vetëm nga numri i ndjekësve, por më shumë nga angazhimi real që gjeneron influencuesi (pëlqime, komente, shpërndarje) dhe përputhja e produktit me audiencën e tij. Një audiencë e përfshirë dhe e besueshme është çelësi për një bashkëpunim të suksesshëm./Marrë nga Monitor

The post Nga “like” te ligji, audienca 33 milionë euro e VIP-ave të rrjeteve sociale first appeared on JavaNews.al.

Prefektura e Durrësit ka bërë të ditur se është neutralizuar intensiteti i flakëve në zjarrin që ra në Zonën e Mbrojtur Krastë-Virjon dhe përhapja e mëtejshme e tyre.

Përmes një njoftimi, Prefektura e Durrësit bën të ditur se në total në aksionin për shuarjen e flakëve u angazhuan 10 zjarrfikës, 13 punonjës të Administratës së Zonave të Mbrojtura, 4 punonjës të Shërbimit Pyjor dhe 5 efektivë të Komisariatit të Policisë Krujë.

Po ashtu, në njoftim bëhet e ditur se duke u koordinuar me Agjencinë Kombëtare të Mbrojtjes Civile u sigurua edhe mbështetja nga ajri për shuarjen e flakëve, shkruan A2 CNN.

Në përfundim, Prefektura e Durrësit u bën thirrje që të shmangin situata zjarrëvënieje, që bëhen të vështira më pas për t’u neutralizuar.

Njoftimi i Prefekturës së Durrësit:

Prej mëngjesit Zona e Mbrojtur Krastë-Virjon me pisha u përfshi nga flakët e shpërndara në 5 vatra të shkëputura nga njëra-tjetra.

Që prej orës 07:15 të mëngjesit të sotëm, pas evidentimit të vatrave të zjarrit, menjëherë u nisën forcat zjarrfikëse të M.Z.Sh-së Krujë, Administratës së Zonave të Mbrojtura, shërbimit pyjor, efektivë të Komisariatit të Policisë Krujë me qëllim izolimin, fikjen dhe eleminimin e rrezikut të përhapjes së flakëve.

Në total u angazhuan 10 zjarrfikës, 13 punonjës të Administratës së Zonave të Mbrojtura, 4 punonjës të Shërbimit Pyjor, 5 efektivë të Komisariatit të Policisë Krujë. Operacioni në terren u ndoq nga Nënprefekti Z. Xhek Xheka, Sektori i Emergjencave Civile.

Për shkak të terrenit të thyer, mungesës së infrastrukturës rrugore, pyllit të dendur, ndërhyrja në vatra ishte shumë e vështirë në brëndësi të pyllit, duke kërkuar ecje në këmbë për të mbërritur pranë vatrave, duke e bërë situatën komplekse.

Në këto kushte, duke u koordinuar me Agjencinë Kombëtare të Mbrojtjes Civile, siguruam mbështetje nga ajri për të neutralizuar intensitetin e flakëve dhe përhapjen e mëtejshme.

Falenderoj Ministrin e Mbrojtjes Z. Pirro Vengu,Drejtorin e Agjencisë Kombëtare të Mbrojtjes Civile Z. Haki Çako për mbështetjen e pakursyer, si dhe ekuipazhin e helikopterit të Forcës Ajrore Nënkolonel Bedri Kaloshi, Major Olgert Hysa, Rreshter Agron Greca!

Strukturat tona përgjegjëse me përkushtim, guxim dhe profesionalizëm qëndrojnë çdo ditë në vijën e parë të mbrojtjes së jetës, pronës, mjedisit, pyjeve.

Apeli i Prefektit të Qarkut Z. Emiljan Jani për kujdes të shtuar nga të gjithë, për të shmangur situata të vështira për t’u neutralizuar. Zjarrvënia përbën vepër penale dhe ndëshkohet me ligj!

The post Zjarri në Zonën e Mbrojtur Krastë-Virjon, Prefektura e Durrësit tregon si paraqitet situata first appeared on JavaNews.al.

Presidenti amerikan Donald Trump ka njoftuar sot, 29 gusht, shkurtimin e 5 miliardë dollarëve ndihma të huaja, të miratuara më parë nga Kongresi, një lëvizje që rrit gjasat për një mbyllje të pjesshme të qeverisë federale, ndërsa demokratët e kundërshtojnë ashpër.

Sipas Shtëpisë së Bardhë, shkurtimet prekin programe të Departamentit të Shtetit dhe të Agjencisë së Shteteve të Bashkuara për Zhvillim Ndërkombëtar (USAID).

“Presidenti gjithmonë do të vendosë Amerikën të parën,” thuhet në deklaratën e Zyrës së Menaxhimit dhe Buxhetit.

USAID, e themeluar në vitin 1961 nga John F. Kennedy, është dobësuar ndjeshëm vitet e fundit.

Pas marrjes së mandatit, Trump ka reduktuar ndjeshëm programet e saj, ndërsa Sekretari i Shtetit Marco Rubio shkurtoi 85% të fondeve dhe e bashkoi agjencinë me Departamentin e Shtetit. Rubio përshëndeti masën e fundit, duke thënë se shërben për të “çrrënjosur mashtrimin dhe abuzimet” në qeveri.

Nga ana tjetër, lideri i demokratëve në Senat, Chuck Schumer, e cilësoi të paligjshme manovrën e Trump, pasi sipas tij presidenti po bllokon fonde tashmë të miratuara. “Është e qartë se as Trump e as Republikanët nuk kanë një plan për të shmangur një mbyllje të dhimbshme dhe krejtësisht të panevojshme të qeverisë,” u shpreh ai.

Kundërshti ka edhe në mesin e republikanëve…

Trump, i cili nisi mandatin e dytë në janar, ka ndërmarrë një fushatë për të zvogëluar ose shkrirë institucione të tëra federale, ndërsa synon të zgjerojë fuqitë presidenciale. Republikanët kontrollojnë të dyja Dhomat e Kongresit, por për miratimin e ligjeve të reja të shpenzimeve kanë nevojë për votat e demokratëve në Senat.

Demokratët kanë paralajmëruar se një veprim i tillë do të shkaktojë dëme të mëdha në buxhet. Një mbyllje e pjesshme e qeverisë konsiderohet e rrallë, por është tejet e kushtueshme.

The post Krizë buxhetore në Washington, Trump shkurton 5 mld $ ndihma të huaja first appeared on JavaNews.al.

Një skandal i madh spiunazhi ka tronditur Austrinë, ku një ish-oficer i inteligjencës, Egisto Ott, është paditur me akuza të rënda, përfshirë mbështetjen e një shërbimi rus të inteligjencës. Aktakuza, e paraqitur në një gjykatë në Vjenë, e akuzon Ott-in për spiunazh në dëm të Austrisë dhe shpërdorim detyre.

Sipas prokurorëve, Ott, i cili u arrestua në mars të vitit të kaluar, dyshohet se ka mbledhur informacione të ndjeshme dhe të dhëna personale nga bazat e të dhënave të policisë nga viti 2017 deri në 2021. Këto informacione dyshohet se u kaluan te Jan Marsalek, një bashkatdhetar austriak i arratisur, i kërkuar për mashtrim pas falimentimit të kompanisë gjermane Wirecard. Besohet se Marsalek tani ndodhet në Rusi dhe ka lidhje të drejtpërdrejta me agjencinë ruse të inteligjencës, FSB.

Prokurorët theksojnë se Ott ka pranuar “shpërblime financiare” për informacionet e dhëna. Mes akuzave të tjera, ai dyshohet se në nëntor 2022, me urdhër të Marsalek, dorëzoi një laptop që përmbante pajisje komunikimi të sigurt të vendeve të Bashkimit Evropian, në këmbim të 20,000 eurove. Ky kompjuter më pas iu dorëzua një shërbimi rus të inteligjencës.

Një oficer i dytë policie, emri i të cilit nuk u bë i ditur, gjithashtu u akuzua për bashkëfajësi, pasi dyshohet se ka kaluar informacione personale pa autorizim. Të dy të dyshuarit, nëse shpallen fajtorë, rrezikojnë dënime me burg nga gjashtë muaj deri në pesë vjet.

The post Skandal spiunazhi në Austri: Ish-oficeri i inteligjencës akuzohet për lidhje me Rusinë first appeared on JavaNews.al.

Shqipëria po merr gjithnjë e më shumë vëmendjen e mediave ndërkombëtare. Së fundmi, prestigjiozja kanadeze “The Star” ka renditur plazhin e Dhërmiut mes gjashtë plazheve më të veçanta të Europës, ku turistët mund të gjejnë freski në ditët përvëluese të verës.

Në artikullin e botuar, riviera shqiptare përshkruhet si një alternativë e re ndaj bregdeteve të mbipopulluara të Kroacisë dhe Greqisë. Dhërmiu, me rreth 1.6 kilometra shtrirje rërë të bardhë, gjire të fshehura shkëmbore dhe atmosferën festive që sjellin festivalet muzikore ndërkombëtare, është kthyer në një magnet për turistët.

“The Star” thekson gjithashtu aktivitetet sportive që ofron zona, te pamjet spektakolare të detit Jon dhe maleve Akrokeraune që ngrihen mbi bregdet, e kompletojnë këtë eksperiencë të rrallë.

Në listën e “The Star” janë përfshirë edhe destinacionet e njohura europiane si plazhi Golden Horn në Kroaci dhe duna gjigante e rërës Dune du Pilat në Francë.

Por fakti që Shqipëria renditet përkrah destinacioneve të konsoliduara të kontinentit është një tjetër dëshmi se riviera shqiptare po kthehet në një prej pikave më tërheqëse të turizmit europian.

The post “Shqipëria, mes vendeve më të bukura të Europës”, Dhërmiu përshkruhet si alternativë ndaj Kroacisë dhe Greqisë first appeared on JavaNews.al.

Depozitat në euro rezultojnë të jenë rritur në mënyrë të konsiderueshme edhe për bizneset. Sipas të dhënave nga Banka e Shqipërisë, rreth 283 miliardë lekë ishin depozitat e bizneseve në banka gjatë korrikut, shifër kjo rreth 3.5% më e lartë se në muajin pararendës.

Të gjitha paratë që qytetarët dhe bizneset mbajnë në bankë, pra paratë në llogaritë bankare, në llogari kursimi, në depozita afatshkurtra ose afatgjata dhe të tjera llogariten si depozita të përfshira në paranë e gjerë.

Depozitat në lekë të bizneseve kapin një vlerë prej 116 miliardë lekësh, ndërsa ato në valutë kanë arritur në 166 miliardë lekë në korrik. Nëse bëjmë një krahasim me muajin qershor, kuptojmë që depozitat në lekë kanë pësuar një rritje me gati 3.3%, ndërsa ato në valutë janë rritur me 3.7%.

Ndërkohë, sipas statistikave të Bankës së Shqipërisë, depozitat e transferueshme, të cilat i referohen parave që ne mbajmë në llogaritë tona bankare, janë ato me shumën më të lartë, ndjekur nga depozitat e tjera dhe depozitat me likuiditet të lartë, pra ato pa afat.

Pjesa më e madhe e depozitave janë në Tiranë, pasi në këtë qark është përqendruar shumica e popullsisë dhe bizneseve.

Për sa i përket normave të interesit të depozitave në lek, ato kanë qenë në rënie të vazhdueshme në 2025. Pavarësisht se normat e interesit nuk kanë qenë shumë të favorshme dhe fitimi nga depozitat është më i vogël se më parë, kursimet e shqiptarëve në bankë kanë qenë sërish në rritje. Ndërkohë, normat e interesit për depozitat në euro mbeten më të ulëta se ato në lek.

The post Pse bizneset preferojnë të kursejnë në euro? first appeared on JavaNews.al.

Kryetarja e komanduar e Bashkisë së Tiranës, Anuela Ristani, ka bërë një apel për qytetarët që të tregojnë kujdes për shkak të motit të përkeqësuar që pritet në ditët në vijim.

Sipas Buletinit Meteorologjik të Shërbimit Meteorologjik Ushtarak, nga data 29 gusht deri më 2 shtator vendi do të përballet me situata të vështira atmosferike, me reshje shiu me intensitet të lartë.

“Të dashur qytetarë,

Sipas Buletinit Meteorologjik të Shërbimit Meteorologjik Ushtarak, për periudhën 29 Gusht 2 Shtator priten situata të vështira atmosferike me reshje shiu me intensitet të lartë.

Ju këshillojmë të tregoni kujdes gjatë këtyre ditëve, të shmangni lëvizjet e panevojshme në zonat me rrezik përmbytjeje dhe të merrni masat e nevojshme për sigurinë tuaj dhe të familjeve tuaja, shprehet Ristani.


Ajo garantoi se strukturat e Bashkisë së Tiranës dhe Emergjencat Civile janë në gatishmëri të shtuar për menaxhimin e situatës.

“Strukturat e Bashkisë dhe Emergjencat Civile janë në gatishmëri të shtuar për menaxhimin e situatës.
Për çdo rast emergjent, mund të kontaktoni në numrat:

112 – Emergjencat Civile
S
127 -Urgjenca Mjekësore
128 – Policia

Bashkia është pranë jush dhe në shërbimin tuaj 24/7”, nënvizon Ristani.

 

View this post on Instagram

 

A post shared by Anuela Ristani (@anuela.ristani)

The post Reshjet e dendura të shiut gjatë fundjavës, Bashkia Tiranë apel qytetarëve: Evitoni lëvizjet dhe… first appeared on JavaNews.al.

Një operacion i gjerë antidrogë i koduar “Aristeo” ka çuar në një goditje të fortë ndaj trafikut të drogës në provincën e Oristanos, në Sardenjë.

Karabinierët, në bashkëpunim me skuadronin e Helikopterëve të Sardenjës, sekuestruan 4,506 bimë marihuane dhe rreth 300 kilogramë kanabis të përpunuar, duke arrestuar tetë persona, pesë prej të cilëve me origjinë kolumbiane.

Operacioni u zhvillua në një fermë të izoluar në zonën e Villaurbanës, ku të arrestuarit u kapën në flagrancë brenda një depoje që shërbente si laborator për tharjen dhe përpunimin e drogës.

Gjatë kontrollit, u gjetën edhe sasi të mëdha kanabisi të tharë, enë plastike me boçe, para të gatshme dhe pajisje për paketim.

Testimet laboratorike të kryera konfirmuan se niveli i THC-së tejkalonte ndjeshëm kufijtë e lejuar nga ligji, duke e klasifikuar sasinë e kapur si drogë e rrezikshme.

Bimët, me një lartësi nga 80 cm deri në 1.30 metra, ishin të kultivuara në mënyrë profesionale dhe të ujitura përmes një sistemi modern i ushqyer nga një pompë, e lidhur me pusin e fermës.

The post Zbulohet parcela gjigante me kanabis në Itali, 8 të arrestuar first appeared on JavaNews.al.

Dita e shtunë do të sjellë përkeqësim të motit në të gjithë territorin. Kapiteneria e Portit Sarandë, ka njoftuar se për shkak të përkeqësimit të kushteve atmosferike dhe detare, është ndaluar dalja në det e mjeteve lundruese.

Po ashtu, kapiteneria paralajmëron të gjithë përdoruesit e mjeteve lundruese, se mosrespektimi i këtij urdhëri përbën shkelje ligjore dhe do të penalizohet sipas legjislacionit në fuqi.

Njoftimi:

Për shkak të përkeqësimit të kushteve atmosferike dhe detare, përfshirë erërat me intensitet të lartë dhe dallgëzimin përtej normave të lejuara për lundrim të sigurt, NDALOHET çdo dalje në det e mjeteve lundruese, përfshirë mjetet turistike, peshkarexhat dhe skafet e vogla, në të gjithë gjirin dhe zonën bregdetare të Sarandës, Ksamilit dhe Borshit.

Ky ndalim hyn ne fuqi nga data 30/08/2025, ora 06:00, dhe do të qëndrojë  aktiv deri në një përmirësim të kushteve detare dhe një njoftim të dytë zyrtar nga Kapiteneria e Portit Sarandë.

Kujtojmë të gjithë përdoruesit  e mjeteve lundruese se mosrespektimi i këtij urdhëri përbën shkelje ligjore dhe do të penalizohet sipas legjislacionit në fuqi.

The post Përkeqësimi i motit, Kapiteneria e Sarandës ndalon daljen në det të mjeteve lundruese first appeared on JavaNews.al.

Përmes një dekreti, presidentja e Kosovës, Vjosa Osmani, ka harmonizuar listën e vendit për organizatat e huaja terroriste me atë të Shteteve të Bashkuara.

Në mesin e organizatave që i janë shtuar listës janë kartele, por edhe Ansar Allah nga Jemeni, apo rebelët Huthi.

Pesidentja Osmani tha se Kosova qëndron pranë SHBA-së në luftën kundër krimit të organizuar transnacional dhe terrorizmit, karteleve të drogës e regjimeve kriminale “sepse udhëheqja amerikane e bën botën më të sigurt”.

“Historia tregon një të vërtetë të thjeshtë: kur Amerika udhëheq, ka më shumë paqe, më shumë siguri dhe më shumë liri globalisht. Kosova gjithmonë do të qëndrojë pranë SHBA-së për të avancuar këtë vizion dhe në përpjekje për të luftuar të gjithë ata që rrezikojnë sigurinë kombëtare të aleates sonë më të rëndësishme”, shkroi Osmani.

Në dekret përmenden dy urdhrat ekzekutiv të Trumpit të lëshuara në janar të këtij viti. Përmes këtyre urdhrave Trump vendosi në listën e organizatave të huaja terroriste një sërë kartelesh, por edhe grupe të tjera.

Për cilat organizata dhe kartele bëhet fjalë?

Më 20 janar, ai lëshoi urdhrin ekzekutiv për të futur në listën e organizatave të huaja terroriste: Cártel del Golfo , Cártel de Jalisco Nueva Generación, Cártel de Sinaloa, Cártel del Noreste, Carteles Unidos, La Nueva Familia Michoacana, Mara Salvatrucha (MS-13) dhe Tren de Aragua.

Ndërkaq, përmes urdhrit të 22 janarit, SHBA-ja shpalli sërish organizatë terroriste Ansar Allah, apo rebelët Huthi në Jemen. Ky grup ka mbështetjen e Iranit.

Gjatë mandatit të tij të parë presidencial, Trump e kishte shpallur rebelët Huthi si organizatë të huaj terroriste, por ai vendim ishte shfuqizuar nga administrata e Joe Bidenit për shkak të shqetësimeve se një gjë e tillë mund të pengonte dërgimin e ndihmave të domosdoshme në Jemen.

Edhe në të kaluarën, Kosova ka harmonizuar listat e organizatave terroriste me ato të shpallura nga SHBA-ja. Një hap të tillë ndërmori më 2020, kur shpalli Hezbollahun e Libanit organizatë terroriste./ REL

The post Kosova në linjë me SHBA-në, zgjeron listën e organizatave të huaja terroriste first appeared on JavaNews.al.

Avokati i Sali Berishës, Genc Gjokutaj kritikoi vendimin e Komisionit Rregullator për të vulosur zgjedhjet e 11 majit, duke e quajtur këtë akt si “vrasje të zgjedhjeve të lira”.

Gjokutaj foli si klienti i tij, Berisha, duke u shprehur se shkeljet ishin skandaloze dhe manipulimi ishte i dukshëm, prandaj rezultati nuk duhej certifikuar.

Gjokutaj akuzoi edhe Celibashin si një eksponent të Partisë Socialiste që mbështeti një proces zgjedhor të deformuar.

Ai shtoi se opozita nuk njeh zgjedhjet, por do të vazhdojë luftën brenda dhe jashtë parlamentit. Sipas tij, djegia e mandateve ka dëmtuar opozitën dhe beteja duhet zhvilluar edhe në mënyrë institucionale për të tërhequr vëmendjen ndërkombëtare.

“Shkeljet ishin skandaloze dhe sërish Komisioni Rregullator e njohu rezultatin e zgjedhjeve të 11 majit. U cënua liria e zgjedhjes së individit. Janë vrarë zgjedhjet e lira.

Thellësia e rezultatit ka brenda manipulimin, është votuar për cdertifikimin e “11 majit”, 3:2 sepse nuk mund të certifikohen zgjedhje të tilla.

Zgjedhjet nuk u festuan, sepse sa duket ka socialistë që iu vjen turp për atë që ka ndodhur. Ju e dini se Celibashi është eksponent pranë Partisë Socialiste dhe u certifikuan zgjedhjet e deformuara.

PS ka gjysmën e partisënë burg për korrupsion, kemi korrupsion galopant, që përditë kërcet. Këta e thanë saktë rezultatin zgjedhor, si ka mundësi nga e dinin? Opozita s’duhet t’i njohë zgjedhjet.

Shkuarja në parlament nuk do të thotë se opozita njeh zgjedhjet, por thjesht ti po lufton edhe jashtë parlamentit, edhe brenda Kuvendit. Djegia e mandateve i krijoi dëm opozitës.

Beteja duhet bërë edhe në mënyrë institucionale, sepse kështu merr edhe vëmendje nga ndërkombëtarët dhe i jep puls jetës opozitare e parlamentare”, tha Gjokutaj në një intervistë për News24.

The post “U vranë zgjedhjet e lira”, avokati i Berishës: Opozita s’i njeh, por shkon në Kuvend sepse… first appeared on JavaNews.al.

Me temë “Inovacioni, Zhvillimi i Gjelbër dhe Prosperiteti” u hap edicioni i 7-të i Ekspozitës Kinë-Shtetet Arabe në Yinchuan, kryeqendra e Rajonit Autonom Ningxia Hui të Kinës veriperëndimore, duke tërhequr më shumë se 7600 pjesëmarrës dhe mbi 2200 ndërmarrje dhe institucione nga 75 vende dhe rajone, shkruan “Xinhua”.

Duke shënuar një ngjarje historike, në event marrin pjesë të 22 vendet arabe, së bashku me delegacione nga 31 rajonet në nivel provincial të Kinës, Korpusi i Prodhimit dhe Ndërtimit të Xinjiang, SAR Hong Kongu e Makao dhe Tajvani ekspozita katërditore do të ketë panaire dhe forume tregtare të fokusuara në tetë sektorë kryesorë, duke përfshirë investimet, transferimin e teknologjisë dhe bashkëpunimin për inovacionin, bujqësinë moderne, turizmin dhe pronën intelektuale.

Në eventin e këtij viti, Emiratet e Bashkuara Arabe janë ftuar si vendi i nderit. Ekspozita Kinë-Shtetet Arabe, e nisur në vitin 2013, ka mbajtur gjashtë edicione, duke shërbyer si një platformë e rëndësishme për të nxitur bashkëpunimin midis Kinës dhe vendeve arabe
Gjatë kësaj kohe, janë arritur një mori projektesh bashkëpunimi në fusha të ndryshme, duke përfshirë bujqësinë moderne, teknologjinë e lartë dhe të re, energjinë dhe industrinë kimike.
Kina ka qenë partneri më i madh tregtar i shteteve arabe për vite me radhë. Tregtia dypalëshe arriti në 407.4 miliardë dollarë amerikanë në vitin 2024, duke shënuar një rritje prej 2.3 për qind në baza vjetore.

The post Hapet ekspozita “Inovacioni, zhvillimi i gjelbër dhe prosperiteti” first appeared on JavaNews.al.

45 vjeçari me identitet të dyfishtë Olsi Meta alias Kristian Koni, i dënuar më parë për “Vrasje me paramendim” dhe “Trafikim të lëndëve narkotike”, kryer në kuadër të një grupi të strukturuar kriminal, është vënë nën hetim nga organet ligj zbatuese ditën e djeshme (28 Gusht) me dyshime të forta për pastrim parash.

Investimet në bizneset e tij, kryesisht në fushën imobilare, kanë sjellë edhe dyshime të forta se bëhet fjalë për pastrim parash në vlera të mëdha, rreth 26.5 milionë euro.

Olsi Meta alias Kristian Koni dyshohet se po i sjell paratë nga shitja e lëndëve narkotike dhe me to po investon në ndërtime në Tiranë dhe bregdet.

Dokumentet e siguruara nga gazetarja e Vizion Plus, Blerina Cene tregojnë se pavarësisht mungesës së licencave të transportit dhe aktivitetit konkret në disa fusha, kompania ka xhiruar qindra mijëra euro. Vetëm në vitin 2024, Kriol.al ka dalë me një fitim prej rreth 12 mijë eurosh. Pra, 1 mijë euro në muaj.

Ndërkohë, që në të njëjtin vit firma ka xhiruar gjysmë milioni euro, duke bërë kontrata me kompani të tjera.

Dyshime për call-centera të paligjshme

Burime hetimore bëjnë me dije se Meta dyshohet gjithashtu të jetë i përfshirë në call-centera të paligjshme, aktivitet i ndaluar në vendin tonë  për shkak të mashtrimeve dhe skemave të zhvatjes. Adresat e disa kompanive të regjistruara prej tij përkojnë me ato të call-centereve që operojnë në kryeqytet.

Investime në pasuri luksoze

Përveç Kriol.al, në vitin 2023 ai ka hapur edhe një kompani tjetër me objekt të gjerë veprimtarish, që përfshin dhënien me qira të apartamenteve dhe dhomave. Bëhet me dije se Meta ka krijuar një rrjet faturash dhe kontratash me kompani të tjera, duke justifikuar lëvizjen e shumave të mëdha parash.

Hetimet e deritanishme tregojnë se nga aktivitetet e tij, Meta ka arritur të zotërojë prona të shumta në Tiranë dhe bregdet, përfshirë apartamente, vila dhe hotele në zona si Palasa dhe Dhërmi.

The post Nga anonim në oligark! Skema e 45-vjeçarit që iu bllokuan 26 milionë euro pasuri marramendëse first appeared on JavaNews.al.

Në një zhvillim të rëndësishëm diplomatik, Kaja Kallas, Përfaqësuesja e Lartë e BE-së, ka dënuar ashpër sulmet e fundit të Rusisë ndaj Kievit dhe qyteteve të tjera të Ukrainës. Ajo theksoi se këto sulme “përfaqësojnë një përshkallëzim të qëllimshëm dhe minojnë përpjekjet për paqe”.

Deklarata, e lëshuar në emër të BE-së, u mbështet nga 26 shtete anëtare, ndërsa Hungaria vuri veton ndaj një deklarate të përbashkët, duke theksuar sërish ndarjen e saj nga pozicionet e shumicës së bllokut evropian.

Në deklaratë theksohet qartë: “Rusia duhet t’i ndalë vrasjet dhe të demonstrojë një dëshirë të sinqertë për paqe: sulmet e qëllimshme kundër civilëve dhe objektivave jo-ushtarake janë krime lufte.” Gjithashtu, u bë e ditur se bastisja dëmtoi ndërtesat e delegacionit të BE-së në Kiev, duke treguar se këto sulme kanë prekur edhe praninë diplomatike evropiane në vend.

Ky veprim i 26 vendeve të BE-së, i udhëhequr nga Kallas, shërben si një thirrje e fortë ndaj Moskës për të ndalur dhunën dhe për të respektuar ligjin ndërkombëtar. Ndërkohë, vetoja e Hungarisë nënvizon sfidat e unitetit brenda BE-së në çështjet që lidhen me politikën e jashtme, sidomos kur bëhet fjalë për marrëdhëniet me Rusinë. Kjo situatë krijon një precedent që mund të ndikojë në vendimet e ardhshme të BE-së, veçanërisht në lidhje me sanksionet dhe ndihmën ndaj Ukrainës.

The post BE dënon sulmet ruse, Hungaria refuzon të bashkohet first appeared on JavaNews.al.

Ndoc Maçaj, autori që ekzekutoi një natë më parë Piro Prronin ka dhënë dëshminë e tij para grupit hetimor. Maçaj, i cili ashtu sikurse u bë me dije edhe më herët rezulton të jetë kushëriri i 61-vjeçarit, ka deklaruar se e kreu krimin pas një konflikti të vazhdueshëm me Prronin.

Sipas tij, ky i fundit prej një muaji e akuzonte se i kishte vjedhur portofolin, një akt të cilin Maçaj thekson se nuk e ka kryer.

“I bëra be në kishë që nuk e kisha vjedhur unë,” ka deklaruar ai përpara hetuesve. Por, pavarësisht insistimit të tij se nuk e kishte vjedhur portofolin, kushëriri i tij vijonte ta akuzonte.

Mbrëmjen e kaluar, natën kur dhe ndodhi ngjarja, ai ka treguar se 61-vjeçari e kishte akuzuar sërish dhe e kishte fyer dhe për këtë arsye Maçaj nxori armën e zjarrit dhe e qëlloi për vdekje.

Piro Prroni

Kujtojmë se ngjarja e rëndë ndodhi mbrëmjen e së mërkurës në fshatin Abat të Shalës në Shkodër. Pas vrasjes, Ndoc Maçaj u largua nga vendi i ngjarjes, por arratisja e tij zgjati për vetëm pak orë pasi paraditen e kësaj të enjte ai vendosi që të dorëzohej në Komisariat.

Sakaq theksojmë se fillimisht u tha se kjo ngjarje erdhi si rrjedhojë e konflikteve të dy kushërinjve për pronat. Mirëpo, kjo dëshmi e dhënë së fundmi nga Maçaj ka ngritur një tjetër pistë. Grupi hetimor është duke hetuar të gjitha pistat me qëllim për të zbardhur këtë ngjarje dhe zbulimin e shkakut shtyu Ndoc Maçajn t’i merrte jetën kushëririt të tij, Piro Prronit.

“Shkodër/Vijojnë veprimet hetimore për zbardhjen dhe dokumentimin e rrethanave dhe shkakut të vrasjes së 61-vjeçarit, mbrëmjen e djeshme, në fshatin Abat.    

Dyshohet se vrau me armë zjarri pistoletë, 61-vjeçarin, për motive të dobëta, arrestohet 58-vjeçari, i cili u vetëdorëzua disa orë pas ngjarjes, bashkë me armën e krimit.    

Specialistët e Sektorit për Hetimin e Krimeve ndaj Personit vunë në pranga shtetasin N. M., 58 vjeç, për veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.  

Ky dyshohet se dje, në fshatin Abat, Shalë, ka vrarë me armë zjarri pistoletë, për motive të dobëta, shtetasin P. P., 61 vjeç, banues në fshatin Abat.    

Shërbimet e Policisë kanë gjetur në vendin e ngjarjes dhe kanë sekuestruar dy gëzhoja pistolete  dhe 2 mjete prerëse (thikë dhe kmesë). Materialet procedurale do t’i kalojnë Prokurorisë, për veprime të mëtejshme”, njoftoi Policia më herët.

The post Vrau kushëririn, flet Ndoc Meçaj: Iu betova në kishë, por ai më akuzonte për vjedhjen e portofolit first appeared on JavaNews.al.

“Përshëndetje! Jam Erion Veliaj. Një mikut tim i nevojiten 70 mijë euro. Rregullohemi bashkë diku tjetër”. Një mesazh me këtë tekst i ka mbërritur në rrjetin “Telegram” nga një numër i panjohur një biznesmeni ndërtimi në kryeqytet, më 26 shtator të vitit 2023. Pas tij nuk ishte kryebashkiaku i Tiranës, por një 28-vjeçar nga Elbasani, i cili ishte duke vënë në jetë një skemë mashtrimi.

Në vijim të komunikimit, biznesmeni me iniciale G. A. ka treguar gatishmëri t’ia dërgonte paratë te zyra në bashki. Nga bashkëbiseduesi i është kërkuar fillimisht t’i dorëzonte të hollat në Vlorë, më pas në një restorant të njohur pranë Lushnjës, e në përfundim kanë lënë si pikë takimi parkimin e një qendre tregtare pranë Kthesës së Kamzës në Tiranë.

Por, teksa ka shkuar në vendin e caktuar, personi që do të merrte paratë nuk e dinte që në çantën e vënë përpara syve nuk kishte euro, por letra, dhe se gjithçka po ndodhte para syve të oficerëve të policisë, të cilët ndërhynë dhe bënë arrestimin e tij, shkruan A2 CNN.

Pas ndalimit, personi ka komunikuar me porositësin, duke pretenduar se paratë u morën, ç’ka çoi më pas në identifikimin e katër personave të tjerë të përfshirë.

Për këtë përpjekje zhvatjeje, Gjykata e Tiranës ka fajësuar pak ditë më parë për “mashtrim” të mbetur në tentativë, të pandehurit Xhensil Qefa-Hida dhe Leonard Xhika dhe i ka dënuar me nga 3 vjet burg secilin. Për shkak të gjykimit të shkurtuar, dënimi u ul në 2 vjet, ndërsa për të pandehurin Xhika, gjykata pezulloi burgun dhe e la për 4 vite në Shërbim Prove.

Sipas vendimit gjyqësor të siguruar nga A2 CNN, “truri” i përpjekjes së mashtrimit ishte i pandehuri Xhensil Qefa-Hida. Ai u dënua në mungesë, pasi nuk është arrestuar. Qefa rezulton se ka kontaktuar biznesmenin, duke u hequr si Erion Veliaj dhe, nga ana tjetër, ka instruktuar Leonard Xhikën të shkonte të merrte paratë. Përmes një personi tjetër, ai i ka vënë në dispozicion Xhikës një telefon, duke e udhëzuar që ta hidhte bashkë me numrin pas takimit me biznesmenin.

Në deklarimet e tij, Xhika ka pretenduar se kishte komunikuar në “Telegram” me Qefën, i cili i kishte kërkuar të shkonte të merrte një porosi në Tiranë tek një person, një shumë prej 20 mijë eurosh, nga të cilat mund të mbante 3 mijë.

Në të njëjtën dosje, gjykata fajësoi edhe tre persona të tjerë. Mikel Panxhi, Xhonatan Xhaferri dhe Petro Ferzaj u dënuan përfundimisht me nga 8 muaj burg për “moskallëzim krimi”. Sipas vendimit, pasi ka kujtuar se ishin marrë paratë, Xhensil Qefa-Hida i ka kontaktuar, duke u kërkuar të takonin Xhikën për të marrë disa shuma parash, për t’ia çuar njerëzve të tjerë, duke mbajtur një përqindje për vete.

The post U prezantuan si Erion Veliaj për t’i zhvatur ndërtuesit 70 mijë euro, dënohen për mashtrim first appeared on JavaNews.al.