Pas 4 transferimeve të bujshme që kanë kryer deri tani me Alexander Arnold, Dean Hujisen, Franco Mastantuono dhe Alvaro Carreras, Real Madrid po planifikon të bëjë dhe një goditje të bujshme në mesfushë, për t’i bërë të mundur Xabi Alonso-s të ketë një dispozicion një ekip të kompletuar.

Dëshira e madhe e Florentino Perez dhe vetë Xabi Alonso-s është mesfushori i Manchester City, Rodri. Trajneri bask e sheh Rodrin si organizatorin që i duhet projektit të tij, një mesfushor qendror me vizion dhe aftësi organizative si dhe të jetë një urë lidhëse me sulmin. Megjithatë, në Madrid janë të vetëdijshëm që operacioni për transferimin e Rodri-t do jetë shumë i vështirë, duke ditur rëndësinë që ka spanjolli tek ekipi i drejtuar nga Pep Guardiola.

Burime pranë klubit madrilen tregoojnë se drejtuesit e “Los Blancos” kanë një propozim vërtet të bujshëm për anglezët, që në total shkon rreth 220 milionë euro. Perez është i gatshëm të ofrojë 40 milionë euro plus dy lojtarë që vlerësohen shumë nga Guardiola si Rodrygo Goes dhe Eduardo Camavinga.

Vlera në treg e brazilianit është 100 milionë euro, ndërsa vlera e francezit 80 milionë euro. Deri tani jemi ende në fazat fillestare të negociatave, por mund të thuhet me siguri të plotë që Rodri është në radarin e Real Madridit dhe drejtuesit e klubit madrilen janë të gatshëm të bëjnë transferimin më të bujshëm të kësaj merkatoje, që sigurisht do ketë një kosto të jashtëzakonshme.

Liverpool ka zyrtarizuar blerjen e radhës në merkaton e verës, duke prezantuar sulmuesin francez Hugo Ekitike.

Lojtari u transferua nga Eintracht Frankfurt dhe u pagua 79 milionë paund nga “The Reds”, shkruan A2.

23-vjeçari Ekitike u kërkua nga trajneri Arne Slot. Francezi kaloi testet mjekësore dhe firmosi kontratë 6-vjeçare me Liverpool.

Ai do t’i bashkohet ekipit në fazën përgatitor në Azi, por nuk pritet të luajë në ndeshjen e radhës miqësore, atë ndaj Milanit. m.p.

Juristi Ylli Manjani ka komentuar akuzat që rëndojnë ndaj kryebashkiakut të Tiranës, Erion Veliaj, ku tha se mund të përballet me një dënim deri në 10 vite burg nëse vërtetohen të katër akuzat e ngritura ndaj tij nga SPAK.

I ftuar në Euronews Albania, Manjani kritikoi ashpër publikimin në media të akuzave përpara se ato t’i komunikoheshin zyrtarisht Veliajt, duke e cilësuar këtë si një shkelje serioze të procedurës dhe një paragjykim të çështjes.

“Nuk shpëton pa 10 vjet burg nëse vërtetohen të 4 akuzat siç janë ndërtuar. Nuk është aspak normale, madje është totalisht anormale që përpara se t’i komunikohet akuza personit publikohet nga media. Ai prokuror që e ka nxjerrë këtë dhe e ka hedhur në media dje duhet të qërrohet nga sistemi sot. Kjo çështje është e paragjykuar se është gjykuar në publik, çfarë duhet të bëjë ai gjyqtari që do ketë në dorë çështjen”, tha Manjani. m.p.

Një vendim historik nga një gjykatë e lartë e OKB-së ka hapur rrugën që shtetet të mund të padisin njëra-tjetrën për ndryshimet klimatike, duke përfshirë edhe emetimet e gazrave që ngrohin planetin.

Por, gjyqtari në Gjykatën Ndërkombëtare të Drejtësisë në Hagë të Holandës tha të mërkurën se gjetja se kush e ka shkaktuar një aspekt të caktuar të ndryshimit klimatik mund të jetë i vështirë.

Ky vendim do të shihet si një fitore për vendet që janë shumë të ndjeshme ndaj ndryshimeve klimatike, të cilat erdhën në gjykatë pasi u ndjenë të frustruara për mungesën e përparimit global në trajtimin e problemit. Çështja e paprecedentë në Gjykatën Ndërkombëtare të Drejtësisë (GJND) ishte ideja e një grupi studentësh të rinj të drejtësisë nga ishujt e ulët të Paqësorit, në vijën e parë të frontit të ndryshimeve klimatike, të cilët dolën me idenë në vitin 2019.

Një nga këta studentë, Siosiua Veikune nga Tonga, ishte në Hagë për të dëgjuar vendimin.

“Nuk kam fjalë. Kjo është kaq emocionuese. Ka shumë emocione që na përshkojnë. Kjo është një fitore për komunitetet tona”, tha ai për BBC News.

“Sonte do të fle më i qetë. Gjykata Ndërkombëtare e Drejtësisë (GJND) ka njohur atë që kemi përjetuar – vuajtjet tona dhe të drejtën tonë për të ardhmen”, tha Flora Vano, nga Vanuatu, i cili konsiderohet vendi më i prekshëm ndaj motit ekstrem në nivel global.

GJND-ja konsiderohet gjykata më e lartë në botë dhe ka juridiksion global. Avokatët i kanë thënë BBC News se vendimi mund të përdoret që javën e ardhshme, duke përfshirë edhe gjykatat kombëtare jashtë GJND-së.

Aktivistët dhe avokatët e klimës shpresojnë se vendimi historik tani do të hapë rrugën për kompensim nga vendet që historikisht kanë djegur më shumë lëndë djegëse fosile dhe për këtë arsye janë më përgjegjëset për ngrohjen globale. Shumë vende më të varfra e kishin mbështetur çështjen nga frustrimi, duke pretenduar se vendet e zhvilluara nuk po i mbajnë premtimet ekzistuese për të trajtuar problemin në rritje.

Por vendet e zhvilluara argumentuan se marrëveshjet ekzistuese për klimën, përfshirë marrëveshjen historike të Parisit të OKB-së të vitit 2015, janë të mjaftueshme dhe nuk duhet të vendosen detyrime të mëtejshme ligjore. Të mërkurën, gjykata e hodhi poshtë këtë argument.

Gjyqtari Iwasawa Yuji tha gjithashtu se nëse vendet nuk zhvillojnë planet më ambicioze të mundshme për të trajtuar ndryshimet klimatike, kjo do të përbënte një shkelje të premtimeve të tyre në Marrëveshjen e Parisit. m.p.

Pas marrjes së Erion Veliajt si të pandehur nga SPAK, Agron Shehaj tha në Euronews Albania se legjitimiteti politik i Veliajt ka marrë fund që nga momenti i arrestimit të tij.

Shehaj vlerësoi se çështja tashmë është në duart e drejtësisë, por shtoi se fakti që prokuroria ka paraqitur prova publike e bën të pamundur, sipas tij, një rikthim të Veliajt në krye të Bashkisë së Tiranës.

“Legjitimiteti i Erion Veliajt në krye të bashkisë së Tiranës dhe pretendimet për tu rikthyer si kryetar i bashkisë Tiranë, mbaruan që në ditën kur Veliaj u arrestua, ditën që të gjithë pamë provat që kishin prokurorët dhe nuk ka dyshim për këtë. Kjo gjë do të vazhdojë, ai ka një gjyq, ka një çështje me drejtësinë që i takon drejtësisë dhe vetë atij të dalë të mbrohet nga akuzat e prokurorisë.

Ky është një nga vendet më të korruptuara në Europë. Deri dje nuk kishim drejtësi fare, tani është bërë një reformë në drejtësi që po ndodh një ndryshim. Disa politikanë të akuzuar për korrupsion ose janë në burg, ose janë në hetim, ose i janë ngritur akuza sepse kanë vjedhur shqiptarët.

Të gjithë këta që akuzohen, thonë që janë të ndershëm. Dy janë gjërat: Ose nuk është e vërtetë që ky paska qenë një vend i korruptuar dhe politikanët kanë qenë të korruptuarit, ose prokurorët kanë qenë kaq të paaftë sa kanë ngritur akuza për ata pak të ndershmit”, tha Agron Shehaj. m.p.

Edi Rama, kryetari i Partisë Socialist, i bën vetë lajmet dhe të gjithë strukturën e tyre, madje duket sikur mendon dhe për impaktin e tyre. Nis fushata, denoncon parregullsitë e strukturave të pushtetit vendor dhe më gjerë, akuzon për dështime dhe parashikon se çdo të bëjë në të ardhmen.

Opozita nëpërmjet z. Berisha pothuaj përditë po jep skemën e asaj që i dëmtoi në zgjedhje dhe akuzon, ndërsa e vendos theksin tek përdorimi i administratës dhe njëjtësimin e maxhorancës me shtetin, një fenomen që e realizuan dhe vetë dikur në krye të vendit.

Kryetari i PD-së, Berisha, i gjendur vazhdimisht nën pyetjet e njëjta të gazetarëve për të ashtuquajturin nenin e statutit “Basha”, e ka gati përgjigjen standarte: “Tani, statuti është në rregull, nuk ka nevojë për momentin për ndonjë ndryshim. Sigurisht që pasi të finalizojmë denoncimin në Shqipëri dhe botë të farsës elektorale, PD do bëjë një analizë të plotë të të gjitha problemeve në mënyrë që të modernizohet dhe të hapet gjithnjë e më shumë.”

Ka një sens që vazhdohet nga njerëzit e PD-së, ndërkohë që nuk po shikojnë dot ndryshimin dhe atë që u kërkon publiku: Jemi nën një regjim dhe duhet të luftojmë me këtë regjim, duket sikur është lajtmotivi i të gjithës.

Në fakt, regjimi pas viteve ‘90 është demokratik, por hibridizimi i saj tashmë është larguar nga demokracia dhe këtë e kemi përballë me mënyrën sesi bëhen zgjedhjet, ndarjen e pushteteve dhe mënyrën sesi ndahet pasuria publike, për të mos renditur një mal tjetër me çështje. m.p.

Gazetari Ardit Hoxha deklaroi në Euronews Albania se brenda kryesisë së Partisë Demokratike kanë kuptuar se Sali Berisha mund të largohet nga drejtimi i partisë.

“Të gjithë e dinë brenda PD se Sali Berisha nuk e ka të gjatë në politikë. Nuk ia lejon mosha dhe gjendja fizike. Mendoj se ai nuk e shtyn më shumë se një vit apo dy. Demokratët janë të vetëdijshëm se Berisha do të tërhiqet. Mund të jetë pjesë e sferës politike, por jo në krye të partisë. Do të distancohet nga pozicioni i tij aktual”. m.p.

Të martën, në Serbi u mbajt një festë e madhe me rastin e hapjes së seksionit Pakovraće-Pože në autostradën Miloš Veliki.

Në ceremoni morën pjesë presidenti serb Aleksandër Vuçiç dhe kryetarja e parlamentit serb Ana Brnabiq, Ministri i Punëve të Brendshme Ivica Daçiç, por edhe ministri shqiptar Demo Berisha, i cili është President i Partisë Përparimtare Serbe, e të tjerë ministra të kabinetit.

Të ftuarit shijuan vaktin e pasur dhe trombistët, ndërsa në pamjet e publikuara në rrjet shihet Vuçiç, duke u relaksuar me një gotë birrë.

Ajo çka bie në sy është se presidenti serb u kënaq veçanërisht nga kënga ‘Garda e Mbretit Petra që marshon’, të cilën e këndoi me gëzim dhe ndoqi ritmin me grushtin e ngritur. m.p.

Furnizimi me ujë, sidomos në këto ditë më temperatura përvëluese është një domosdoshmëri. E kundërta raportohet në një nga lagjet më të populluara në Tiranë.

Një qytetare me emrin Eleonora ka denoncuar në redaksinë e Dosja.al situatën e mungesës së ujit te Kopshti Botanik në Tiranë.

Ajo është shprehur se asnjë person kompetent për zgjidhjen e situatës nuk e hap telefonin. E ndërsa furnizimi me ujë 24 orë nga politikanët në qeverisje është premtuar shumë herë duket se rritja e temperaturave e ka shkrirë këtë premtim.

Termometri pritet të shënojë ditën e nesërme 40 gradë. Siç është raportuar vendi ynë dhe jo vetëm po përballet me javën më të nxehtë të vitit.

Bashkimi Evropian dhe Shtetet e Bashkuara të Amerikës duket se janë pranë finalizimit të një marrëveshjeje tregtare, e cila do të vendosë tarifa doganore prej 15% mbi importet evropiane në SHBA.

Kjo lëvizje synon të shmangë kërcënimin e Presidentit Donald Trump për rritjen e këtyre tarifave në 30% duke filluar nga 1 gushti, sipas burimeve të “Financial Times” që citojnë tre burime të mirëinformuara.

Marrëveshja e re përfshin tarifa të ndërsjella dhe është ndërtuar mbi një strukturë të ngjashme me marrëveshjen bilaterale të arritur së fundmi ndërmjet SHBA-së dhe Japonisë.

Sipas Financial Times, në kuadër të negociatave, pritet heqja e ndërsjellë e tarifave doganore për një sërë produktesh strategjike, përfshirë aeroplanë, pije alkoolike dhe pajisje mjekësore.

Komisioni Evropian, i cili ka përgjegjësinë për politikën tregtare të BE-së, njoftoi përfaqësuesit e vendeve anëtare të mërkurën, pas kontakteve intensive me zyrtarë amerikanë.

Që prej muajit prill, eksportuesit evropianë kanë qenë të detyruar të paguajnë tarifa shtesë prej 10% për të hyrë në tregun amerikan, përveç tarifave ekzistuese mesatare prej 4.8%.

Sipas burimeve, tarifa e përgjithshme prej 15% do të përfshijë edhe tarifat ekzistuese, çka për Brukselin përfaqëson një ruajtje të status quosë. Veçanërisht për industrinë automobilistike, ku tarifat aktuale arrijnë në 27.5%, marrëveshja do të sillte një ulje të ndjeshme në nivelin 15%. m.p.

Një 30-vjeçar që vrau katër studentë të Universitetit të Idahos në SHBA, në nëntor të vitit 2022 është dënuar me burgim të përjetshëm, pasi nëna e njërës prej viktimave të tij shprehu zhgënjimin e saj që ai nuk do të ekzekutohet.

Bryan Kohberger, një ish-student i drejtësisë penale, fillimisht i mohoi vrasjet, por më vonë u deklarua fajtor si pjesë e një marrëveshjeje që nënkuptonte se ai do të shmangte dënimin me vdekje.

Kohberger hyri fshehurazi në një shtëpi me qira në Idaho, e cila nuk është shumë larg kampusit universitar, dhe vrau Ethan Chapin, Xana Kernodle, Madison Mogen dhe Kaylee Goncalves.

Miqtë dhe familjet e viktimave dhanë deklarata, duke folur emocionalisht për jetën e të vrarëve.

Në gjykatë, Bethany Funke, e cila i mbijetoi sulmit, tha për shoqet e saj të dhomës në një deklaratë: “E urrej që ato kanë ikur, por për ndonjë arsye, unë jam ende këtu dhe kam mundësi të jetoj. Ende mendoj për këtë çdo ditë. Pse unë? Pse arrita të jetoja unë dhe jo ato?”

Ekzaminimet pas vdekjes treguan se katër personat që vdiqën ishin goditur me thikë disa herë dhe ka të ngjarë të kenë qenë në gjumë kur u sulmuan, shkruan A2 CNN.

Iftuar sot në emisionin “Live From Tirana” me Ronaldo Sharkën ka qenë Jozefin Marku. Ish-banori i edicionit të katërt të “Big Brother VIP” ka zbuluar ekskluzivisht më shumë detaje në lidhje me karrierën muzikore, projektet që do të vijnë, jetën personale dhe jo vetëm kaq…

Gjatë qëndrimit në shtëpinë e “Big Brother VIP” historia e tij e dashurisë me Loredanën ka qenë në qendër të vëmendjes, por edhe pas përfundimit të reality show-t, marrëdhënia e tyre ka ngjallur interes të madh. Si vazhdon historia e tyre?

Ronaldo: Lori ka folur shumë tek “Goca dhe Gra” për ty, nuk e di nëse t’i kanë çuar fansat. Njëherë thotë se nuk i pëlqejnë meshkujt me muskuj ndërkohë që ka qenë e dashuruar me një djalë me muskuj. Në episodin e fundit kishte thënë që jam shumë mirë tani dhe e lumtur. Kur je takuar ti me Loredanën për herë të fundit?

Jozi: Ka disa muaj që nuk takohem dhe për atë që ka thënë se i pëlqejnë meshkujt me bark, ka sa të duash.

Ronaldo: Nuk tha këtë. Ajo u shpreh se nuk i pëlqejnë meshkujt me muskuj.

Jozi: Okej, ti e di që i kam pak qejf këto… normalisht aty duhet të dalë kur nuk preferon ato me muskuj i bie që ashtu kemi sa të duash.

Ronaldo: I keni mbyllur përfundimisht gjërat ju? Kur “BBV” mbaroi unë e kam intervistuar në tapetin e kuq dhe ajo më tha se e dua ende. Pavarësisht se rrjeti ziente, disa prej njerëzve të gjykonin dhe tashmë të duan, Loredana tha që unë e dua. Ajo i doli kundër babait të saj dhe publikut pak në një periudhë kohe. Ku mbaroi kjo dashuria juaj?

Jozi: Unë ndoshta nuk kam folur shumë por kam mbajtur shumë e më shumë ndërsa dikush ka folur shumë dhe nuk ka mbajtur hiç.

Ronaldo: Ti je i veprave?

Jozi: Aty preferoj të rri, jo shumë tek fjalët.

Ronaldo: Tek “Goca dhe Gra” si ishte takimi me Loredanën? Thjesht si moderatore emisioni apo…

Jozi: Prisja një tjetër reagim, ishte diçka e ftohtë shumë.

Ronaldo: E ftohtë në ekran apo edhe jashtë ekranit?

Jozi: Në ekran, prisja një tjetër reagim të them të drejtën.

Ronaldo: Po jashtë kamerave folët ose shkëmbyet një bisedë?

Jozi: Jo. m.p.

Prej disa javësh në vendin tonë vijon aksioni për lirimin e hapësirave publike pas urdhrit të Kryeministrit Edi Rama. Kreu i qeverisë ka publikuar së fundmi një foto në rrjete sociale ku duket një ndërtim ‘pa leje’ edhe në Londër.

Edi Rama ironizon duke thënë se mund ta kenë edhe shqiptarët. Rama thekson se këtë foto ja kanë dërguar dhe po e ndan në rrjete sociale për pak humor.

“Nuk e di a e kanë vërtetë shqipot këtë lokalin me shtesa mbi trotuar në Londër, po qesha shumë kur ma çuan dhe po e ndaj me ju për pak humor”, ka shkruar Rama. m.p.

Kryetari i Partisë Demokratike të Kosovës, Memli Krasniqi, deklaroi se kreu i LVV-së, Albin Kurti nuk do ta propozojë Fatmir Limajn për kryeparlamentar.

Sipas tij, mungesa e transparencës në diskutimet mes Kurtit dhe Limajt është “shenjë që diçka nuk është në rregull”.

Kështu u shpreh Krasniqi pas ndërprerjes së seancës, ku tha se nuk beson që Limaj do të jetë kandidat për kryeparlamentar, shkruan A2.

“A e keni parë ju ndokund që është kandidat? E para, unë nuk besoj kurrë që do të jetë kandidat, sepse një gjë të tillë ia kam thënë edhe atij personalisht, nuk e emëron, nuk e propozon Albin Kurti asnjëherë. Kështu që për këtë temë besoj që s’kemi me pas as arsye me e diskutu, përveç në mënyrë hipotetike… Mungesa e transparencës nga të dyja palët është pak një shenjë që diçka nuk është në rregull, besoj që ka të bëjë me apetitet pushtetore sepse nuk ma merr mendja që janë duke negociuar programin qeverisës me fol se sa duhet të rriten pagat ose se sa duhet të rriten pensionet”. m.p.

Një 35-vjeçar ka humbur jetën pasditen e sotme në Itali për shkak të vapës. Mediat italiane bëjnë të ditur se 35-vjeçari ishte në makinë së bashku me vajzën e tij trevjeçare, duke pritur gruan e tij, e cila po largohej nga puna në një hotel vendas. Tragjedia ndodhi në Otranto në një ditë përvëluese teksa automjeti ishte parkuar në një zonë me diell dhe, sipas hetimeve nxehtësia ekstreme mund të ketë shkaktuar një atak në zemër.

Kur gruaja mbërriti, e gjeti burrin e saj pa ndjenja. Përpjekjet për ta sjellë në jetë ishin të pasuksesshme. Viktima ishte me origjinë nga Sierra Leone. Karabinierët gjithashtu iu përgjigjën vendit të ngjarjes. Ky rast e çon numrin e vdekjeve të lidhura me nxehtësinë në Salento në gjashtë në vetëm dy ditë, pesë prej tyre në vetëm 24 orë.

Vdekja e 35-vjeçarit nga Sierra Leone është pjesë e një situate gjithnjë e më shqetësuese, ndërsa autoritetet po hetojnë nëse vdekjet lidhen drejtpërdrejt me nxehtësinë e madhe,.

Salento ka qenë nën rrethim për ditë të tëra nga një valë e të nxehtit afrikan që ka bërë që temperaturat të rriten shumë mbi 40 gradë Celsius. Sipas të dhënave të Forcave Ajrore Italiane, në disa zona të rrethinës së Leçes janë regjistruar temperatura deri në 45°C. Qytetet e Leçes dhe Foxhisë janë klasifikuar me flamur të kuq nga Ministria e Shëndetësisë për ditë të tëra. Emergjenca nuk prek vetëm më të prekshmit: edhe individët e shëndetshëm janë në rrezik nga goditja nga nxehtësia , dehidratimi dhe sëmundjet e papritura. Numri i emergjencës 118 po merr një numër në rritje thirrjesh në lidhje me të fikët dhe probleme me zemrën. m.p.

Gjykata e Posaçme e Shkallës së Parë për Korrupsionin dhe Krimin e Organizuar ka dhënë vendimin përfundimtar për çështjen penale që përfshin dhjetë të pandehur, të cilët akuzoheshin për parregullsi në procedurat e prokurimeve publike dhe falsifikim dokumentesh.

Seanca përfundimtare u zhvillua më 23 korrik 2025, përpara trupit gjykues të përbërë nga gjyqtarët Irena Gjoka, Erjon Çela dhe Rudina Palloj, ndërsa procesi u ndoq sipas gjykimit të zakonshëm.

Nga vendimi i shpallur, shtatë të pandehur u shpallën të pafajshëm, pasi gjykata vlerësoi se mungonin elementët e veprës penale në akuzat ndaj tyre. Ata janë: Miranda Shkurti, Nikollaq Mihali, Admir Pahumi, Arbër Troka, Almir Hoxhaj, Arjana Hasani, si dhe Simon Prendi – ky i fundit vetëm për akuzën e falsifikimit të dokumenteve.

Ndërkohë, katër të tjerë u gjetën fajtorë për shkeljen e barazisë në tendera apo ankande publike, sipas nenit 258 të Kodit Penal. Ata u dënuan me 6 muaj burgim, por dënimi iu pezullua, duke u zëvendësuar me 60 orë punë në interes publik, mbikëqyrje nga Shërbimi i Provës dhe ndalim për ushtrimin e funksioneve publike për një periudhë 1-vjeçare (për tre prej tyre).

Të dënuarit janë:

Simon Prendi (gjithashtu u shpall i pafajshëm për falsifikim dokumentesh)
Erdit Salillari
Sonila Qato

Gjykata vendosi që shpenzimet e procedurës t’i ngarkohen personave të shpallur fajtor, në mënyrë solidare. Vendimi mund të ankimohet brenda 15 ditëve nga dita pasuese e shpalljes së tij, në Gjykatën e Posaçme të Apelit për Korrupsionin dhe Krimin e Organizuar. M.P.

Një mjet është djegur teksa ishte në ecje në autostradën Lushnje -Fier në afërsi të pushimit të shoferit.

Mjeti tip Ford është djegur totalisht ndonëse ndërhyrja e zjarrfikësve të Lushnjes ka qenë e menjëhershme. Paraprakisht dyshohet për një defekt në sistemin elektrik të mjeti, ndërsa të tre personat që udhëtonin në të kanë shpëtuar dhe nuk kanë lëndime.

Si pasojë e ndërhyrjes së zjarrfikëses janë krijuar radhë të gjata në autostradë edhe pse shërbimet e policisë rrugore janë të gjitha në terren. Në vendngjarje edhe grupi hetimor për të dokumentuar ngjarjen dhe për të përcaktuar shkaqet. m.p.

Denis Bajri është ekstraduar pasditen e sotme nga Dubai. 37-vjeçari ishte shpallur në kërkim ndërkombëtar, dhe rezulton si një person me rrezikshmëri shumë të lartë shoqërore. Bajri akuzohet për një sërë veprash penale në fushën e krimeve kundër personit, të kryera në formën e grupit të strukturuar kriminal dhe për armëmbajtje pa leje.

GJKKO i ka caktuar masën e sigurisë “Arrest në burg”, për veprat penale: “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal; “Prodhimi dhe mbajtja pa leje e armëve luftarake dhe municioneve”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; dhe “Sigurimi i kushteve dhe i mjeteve materiale për të kryer vrasje”, kryer në formën e veçantë të bashkëpunimit, atë të grupit të strukturuar kriminal.

Në përfundim të procedurave të ekstradimit 37-vjeçari iu dorëzua Drejtorisë së Përgjithshme së Burgjeve. Denis Bajri (Bajroviç) dyshohet se është autor i vrasjes së Gjon Ndojt (Boriçi), ngjarje e cila ka ndodhur më 9 Gusht të viti 2020 në Shkodër. Dyshimet janë se ekzekutimin e Ndojit, Bajri e bëri me porosi të Ervis Martinajt. m.p.

Kryeministri Edi Rama thotë se Agjencia Kombëtare e Bregdetit dhe strukturat e tjera janë çdo ditë në krye të detyrës për të garantuar një sezon turistik të sigurt dhe të pastër.

Kreu i ekzekutivit ka publikuar disa foto në Facebook, ku shkruan se shtimi i plazheve publike, ka rritur numrin e pushuesve, çka shton edhe më shumë përgjegjësinë për mirëmbajtjen e plazheve.

“Me Agjencinë Kombëtare të Bregdetit, agjencitë rajonale dhe strukturat e tjera, jemi çdo ditë në terren, për të monitoruar garantimin e një sezoni turistik të pastër, të rregullt dhe respektim të parcelave publike siç parashikohet në rregulloren e re të menaxhimit të plazheve, ku dyfishimi i aksesit në plazhet publike, shton edhe përgjegjësitë për mirëmbajtjen, pastrimin dhe modelin qytetar në respektimin e hapësirave të përbashkëta; Sarandë, Zvërnec, Darzezë, Radhimë, Ksamil, Livadh, Velipojë, Golem, Spille, Golem dhe Gjiri i Lalzit”. m.p.

Avokatët ndërkombëtarë të Erion Veliajt kanë reaguar pasi SPAK mori zyrtarisht të pandehur kryebashkiakun e Tiranës, duke i komunikuar 4 akuza.

Avokatët ndërkombëtarë thonë se mbajta në burg e Veliajt është e paarsyeshme dhe joproporcionale.

Sipas tyre, Veliaj është penguar që të ketë akses te avokatët e tij ndërkombëtarë.

Reagim i avokatëve ndërkombëtarë të z. Veliaj:

Sot, 163 ditë pas ndalimit të z. Erion Veliaj, rezultatet e hetimit të zgjatur nga SPAK i janë dorëzuar nga ana e prokurorisë së posaçme. Avokatët e z. Veliaj mund të nisin tashmë shqyrtimin e provave të çështjes, të kundërshtojnë qëndrimin e SPAK-ut ndaj tij dhe të paraqesin prova në mbështetje të mbrojtjes.

Z. Veliaj i mohon në mënyrë të prerë të gjitha akuzat për shkelje të ligjit. Ne mbetemi në bindjen se vijimi i ndalimit të z. Veliaj është i paarsyeshëm, i panevojshëm dhe joproporcional. Kemi shqetësime serioze se kërkesat e Konventës Evropiane për të Drejtat e Njeriut (KEDNJ) nuk janë respektuar në rastin e tij. Fatkeqësisht, prej gati 3 muajsh, z. Veliaj është penguar të ketë akses te avokatët e tij ligjorë ndërkombëtarë, gjë që cënon seriozisht aftësinë e tij për të ushtruar të drejtat që i garanton KEDNJ-ja.

Si një funksionar i zgjedhur në mënyrë demokratike, të cilit i është pamundësuar ushtrimi i mandatit, është thelbësore që SPAK të ketë vlerësuar domosdoshmërinë e vazhdimit të ndalimit të tij. Deri më sot, nuk ka asnjë provë që kjo është bërë.

Jemi thellësisht të shqetësuar për mënyrën se si është zhvilluar hetimi. Së fundmi, detaje në lidhje me përfundimin e hetimit dhe raportin e Prokurorisë janë rrjedhur në mediat shqiptare. Kjo rrjedhje informacioni është në përputhje me trajtimin që i është bërë z. Veliaj që prej ditës së arrestimit, ku të dhëna paragjykuese mbi hetimin e SPAK-ut janë publikuar vazhdimisht në hapësirën publike. Nga informacionet e marra prej avokatëve të tij vendas, kuptojmë se këto rrjedhje përbëjnë shkelje të sekretit hetimor sipas legjislacionit shqiptar.

Ne do të vazhdojmë të punojmë ngushtësisht me ekipin ligjor vendas të z. Veliaj dhe të ndjekim çdo mjet ligjor të mundshëm. m.p.