Nga Liridon Mulaj – Në një shkrim të fundit të analistit britanik me titull “Lufta moderne kundër fëmijërisë”, ai parashtron të gjitha ritualet dhe zakonet e fëmijërisë, të cilat e bënin brezin e viteve ’90-të që, përmes interaktivitetit fizik dhe personal, të ndërtonte një jetë më të denjë e po ashtu plot me kujtime. Por sa e mundur është kjo sot, në një shoqëri që rend drejt ndryshimeve shpesh të dëmshme?

Marjeta, dikur mësuese, sot specialiste e bibliotekës në Rrogozhinë ka arritur të mbajë gjallë tek të rinjtë dashurinë për të lexuar, një dashuri që po zbehet çdo herë e më shumë.

Teksa kërkoja në rrjete sociale për bibliotekat e rretheve, ajo që më ra në sy ishte faqja në Facebook e Bibliotekës së Rrogozhinës.

Postimet me fotot e fëmijëve, por edhe të rinjve, të cilët e frekuentonin këtë ambient edhe gjatë muajve të nxehtë të korrikut, ishin të shumta. Të jem i sinqertë, gati-gati surreale, duke pasur parasysh kohën e papërshtatshme, e cila fëmijët dhe të rinjtë ose i gjen në fshat, ose në plazh, por rrallë në bibliotekë.

Pas një ore udhëtim nga Tirana, bibliotekën e gjeta lehtësisht. Një godinë njëkatëshe, e lyer dhe e sistemuar mirë, gjendej në anën e majtë të rrugës kryesore që përshkon qytetin.

Marjeta, specialistja e bibliotekës, doli të më priste sapo më pa. “Mirë se erdhët!” – foli ende pa u afruar.

Brenda na prisnin disa të rinj, të cilët, sapo hymë brenda, u ngritën në këmbë.

Deri këtu nuk kishte asgjë për t’u çuditur. Fundja, disa të rinj i gjen kushdo, mendova, për një takim mbasditeje. Por kur Marjeta nisi të rrëfejë, atëherë kuptova se nuk ishte një takim çfarëdo.

Të rinjtë e pranishëm ishin të gjithë studentë që shkolloheshin dhe jetonin në Tiranë. Edhe pse ata praktikisht kishin ikur nga Rrogozhina për të mos u kthyer më aty (na e pohuan vetë), ardhja e tyre në bibliotekë dhe vizita që ata bënin sa herë ktheheshin për pushime ishte mbresëlënëse.

Ajo që unë parashtrova ishte pyetja se, mos ndoshta në Rrogozhinë, të rinjtë dhe të rriturit së bashku po tentojnë, në një farë mënyre, të mos e lënë fëmijërinë e dikurshme , atë tradicionale me libra e lojëra aktive të ikë?

Por përgjigjja më erdhi prej secilit mëvetësisht. Arsyeja pse ata riktheheshin në bibliotekën e qytetit ishte Marjeta, zonja me buzëqeshje, e cila e konsideronte bibliotekën jo si një vend pune ku në fund të muajit do të marrë një rrogë, por si misionin e saj të jetës: t’i ndryshojë faqen një qyteti të tërë, duke nisur nga biblioteka.

Marjeta është specialistja e bibliotekës, e cila, prej një viti e gjysmë, i ka dhënë një tjetër shtysë bibliotekës, por edhe impaktit të librit te lexuesit, kryesisht te fëmijët dhe të rinjtë.

Gjithçka për të nisi kur ajo pati një problem shëndetësor, i cili nuk e lejoi më të ushtronte profesionin e saj të mësueses.

“Unë pata një problem shëndetësor, prej të cilit u detyrova të heq dorë nga profesioni i mësuesisë. Dhe erdha të kërkoja punë në Rrogozhinë, diku në Bashki. Por fati e deshi që unë të emërohesha specialiste në bibliotekë. Në Rrogozhinë ka shumë njerëz që e duan punën, dhe unë këtu ndihem shumë mirë, pasi kam mbështetje për çdo aktivitet apo nismë që organizoj.” thotë Marjeta për GazetaSi.al.

Pyetjes sesi arrin t’i bindë apo t’i tërheqë ende të rinjtë që kanë ikur nga Rrogozhina, por që kthehen sërish këtu njësoj si dikur, Marjeta thotë se në Rrogozhinë ka shumë njerëz që janë të etur për dije, për kulturë, dhe prandaj përpiqet t’i bëjë ata pjesë të përhershme të takimeve dhe mbledhjeve të bibliotekës. Këtë e dëshmon edhe prezenca e të rinjve të cilët janë rikthyer nga kryeqyteti, ku studiojnë, për t’iu dedikuar jetës kulturore edhe gjatë pushimeve.

Mario, student i vitit të tretë për mjekësi në Tiranë, thotë për Gazetasi.al se leximi për të ka nisur si dëshirë e vonë, por që nga libri i parë ai nuk i është ndarë më leximit.

“Nuk kisha ndonjë tendencë të madhe të lexoja i vogël, por nisa të dashurohesha me librat non-fiction, të cilët më ndihmonin për rritje personale. I lexoja dhe librat e detyrueshëm të shkollës në programe, por për mua një nga autorët më të dashur mbetet Robert Greene.”

Ai thotë se sa herë kthehet në Rrogozhinë, e frekuenton bibliotekën për të qëmtuar ndonjë libër të mirë, por edhe për t’u mbledhur me miqtë e fëmijërisë. Madje, shton se vetë ai ka nxitur edhe të ëmën që të bëhet lexuese.

“Sa herë kthehem në Rrogozhinë, kthehem dhe në bibliotekë. Shkolla që bëj nuk më jep shumë hapësira për të lexuar libra artistikë, por sa herë mundem e shfrytëzoj kohën për ndonjë libër të mirë. Madje, unë kam shtyrë dhe mamin tim që të lexojë, dhe ajo sot është një nga lexueset më të mira të bibliotekës.”

Mario thotë se ikja nga Rrogozhina për të studiuar në Tiranë ishte për arsye rritjeje në karrierë dhe formim. Edhe pse ai pëlqen jetën e qetë të qytetit të tij, kthimi nuk është më opsion për të.

Të njëjtën gjë thotë edhe Amari, një tjetër i ri i lindur dhe rritur në Rrogozhinë, por që studion në Tiranë për inxhinieri informatike. Ai thotë se në fëmijëri lexonte kryesisht libra fetarë.

“Të them të drejtën, që i vogël kam lexuar më shumë libra fetarë sepse jam edhe praktikant i besimit islam. Por ishte zyshë Marjeta që më shtyu drejt leximit të letërsisë, duke më sugjeruar fillimisht Ismail Kadarenë. E mbarova shpejt atë libër dhe, në fakt, më pëlqeu shumë. Libri, sipas meje, është një mësues personal që komunikon vetëm me ty dhe që të ndihmon të bëhesh i zoti i vetes.”

Ai thotë se rikthimi i tij në bibliotekën e qytetit është edhe për arsye se brezi i tij nuk ishte mësuar ende me teknologjinë, por edhe nga shtysa e madhe që i jep zysha, e cila e ka mësuar me librin që në fëmijëri. Kur pyetet për njerëzit e Rrogozhinës, Amari ka një përgjigje sa të sinqertë, po aq edhe origjinale.

“Njerëzit e Rrogozhinës janë njerëz që nuk e duan ndryshimin. Ndihen rehat në atë komfort zonën e tyre, e gjithashtu nuk i presin mirë ndryshimet, derisa shohin më pas efektet e këtyre ndryshimeve. Vetëm atëherë binden se ndryshimet jo gjithmonë janë për keq,” – përfundon Amari.

Një nga vajzat më aktive në Bibliotekë, Lejla, është edhe një nga lexueset më të mira mes të rinjve në Rrogozhinë. Fakti se Marjeta është mamaja e saj, ka ndikuar thelbësisht në dashurinë e saj për librin.

“E vogël kam qenë vajzë që më pëlqenin aventurat, pra më shumë të luaja sesa të lexoja. Librat e parë që lexoja ishin ato me figura. Sot kam arritur të lexoj libra me një mijë e pesëqind faqe pa figura, sepse kuptova se imazhin e ushqen mendja. Pasionin për leximin ma kanë ushqyer prindërit e mi, të cilët kanë lexuar gjithë kohës.”

Lejla thotë se, si bashkëmoshatarët e saj, edhe ajo do të studiojë në Tiranë. Madje për mjekësi.

“Unë do të studioj për mjekësi dhe ky është viti kur edhe unë do të largohem nga Rrogozhina. Por e ndjej si detyrim që në të ardhmen një pjesë e vetes sime dhe kontributit tim profesional i përket dhe do t’i përkasë Rrogozhinës.”

Por, përtej pasionit për letërsinë, duket se edhe qasjet e të rinjve për profesionin e së ardhmes përputhen. Pas Marios dhe Lejlës, të dy mjekë të ardhshëm, edhe Aleksi është një i ri nga Rrogozhina, i cili studion në Tiranë për imazheri dhe po ashtu frekuenton Bibliotekën e qytetit të tij sa herë kthehet.

“Unë nuk kam lexuar kur isha më i vogël. Shtysën më të madhe e kam nga zysha e shkollës së mesme, e cila më ngjizi pasionin për letërsinë. Kur fillova të lexoj, u ndjeva dhe keq pse nuk kisha lexuar më herët. Gjithashtu, unë preferoj edhe poezinë. Rikthehem në bibliotekën e qytetit sepse më pëlqejnë shumë aktivitetet që organizohen këtu.”

Aleksi thotë se, sa herë kthehet në qytetin e tij, i duket tashmë më i vogël dhe me më pak njerëz.

“Sa herë kthehem në Rrogozhinë, qyteti më duket më i vogël dhe me më pak njerëz. Edhe pse e dua qytetin tim, nuk besoj se do të kthehem më këtu,” – thotë ai.

Në shoqërinë e sotme, misioni konsiderohet shpesh si një sipërmarrje utopike. Shtoji këtu fenomenet që e kanë shndërruar shoqërinë tonë në një shoqëri konsumi, por edhe në grupime të cilat rendin pas një jete të vrullshme, shpesh të pakuptimtë, duket sikur Marjeta dhe biblioteka e Rrogozhinës janë një kundërthënie e gjithçkaje që na rrethon.
Ajo e thotë me krenari se, prej një viti e gjysmë, janë shtuar lexuesit të cilët e frekuentojnë bibliotekën dhe gjejnë aty libra të mirë.

Sa mallëngjyese kjo nismë është edhe njëfarë stopimi i jetës së shpejtë dhe teknologjisë, e cila duket sikur i ka shpallur luftë një jete organike dhe një fëmijërie plot me kujtime.

Marjeta beson se, nëpërmjet librit dhe kulturës, një qytet mund të ndryshojë, ose së paku të ruajë me fanatizëm ato rituale dhe tradita të cilat nuk duhet të humbasin, ku një ndër to, padyshim, mbetet leximi.

The post Të ruash fëmijërinë përmes librit/ Marjeta, gruaja që po ‘ringjall’ traditën e leximit në Rrogozhinë appeared first on Gazeta Si.

Nga Gazeta Si- Franca, Spanja, Italia, Danimarka dhe Greqia do të testojnë një plan për një aplikacion verifikimi të moshës për të mbrojtur fëmijët në internet, tha Komisioni Europian, mes shqetësimit global në rritje në lidhje me ndikimin e mediave sociale në shëndetin mendor të fëmijëve.

Konfigurimi për aplikacionin e verifikimit të moshës është ndërtuar mbi të njëjtat specifikime teknike si Portofoli Europian i Identitetit Digjital, i cili do të lançohet vitin e ardhshëm. Pesë vendet mund ta personalizojnë modelin sipas kërkesave të tyre, ta integrojnë në një aplikacion kombëtar ose ta mbajnë atë veçmas.

Verifikimi do të bëjë të mundur kontrollin anonim të moshës së përdoruesve, pa ruajtur të dhëna personale si emrin ose datën e lindjes së tyre.

“Fëmijët meritojnë një fëmijëri digjitale të sigurt. Ky është një nga prioritetet kryesore të Presidencës daneze. Pa verifikimin e duhur të moshës, ne nuk do të mund t’i mbrojmë fëmijët online”, tha Caroline Stage Olsen, ministrja e Danimarkës për Çështjet Digjitale.

The post BE lançon aplikacionin online për verifikimin e moshës për fëmijët appeared first on Gazeta Si.

Nga Jack Butler – Në romanin Fundi i Fëmijërisë (Childhood’s End) të Arthur C. Clarke, botuar në vitin 1953, alienë dashamirës mbërrijnë në Tokë, ndajnë teknologjinë e tyre me njerëzimin dhe e udhëheqin atë drejt një epoke të artë. Por, siç ndodh shpesh në fantashkencë, qëllimi i tyre i vërtetë i fshehur është ta drejtojnë racën njerëzore drejt bashkimit me “Mbimendjen” (Overmind) një vetëdije kolektive që përfshin gjithë universin. Ky është hapi i ardhshëm në evolucionin tonë dhe, në të njëjtën kohë, fundi i fëmijërisë sonë si specie.

Ky transformim nis me fëmijët që lindin në epokën e re të përuruar nga alienët. Ata shfaqin fuqi psikike të pakuptueshme për prindërit e tyre. Në fakt, këto janë shenja të hershme të Mbimendjes, të cilës ata shërbejnë si enë. Kështu, ata lënë pas prindërit, njerëzimin dhe në fund vetë planetin.

Sigurisht, asgjë e ngjashme nuk po ndodh me fëmijët që rriten sot, të paktën sa dimë ne. Por ndryshimet e jetës amerikane që nga koha e fëmijërisë sime më bëjnë të mendoj se fëmijëria, ashtu siç e kemi njohur dhe përjetuar për dekada, madje edhe për shekuj, po zhduket. Dhe pasojat mund të jenë të rënda  jo vetëm për fëmijët, por për të gjithë ne.

Kam qenë me fat që e përjetova një fëmijëri që, përveç disa detajeve të sipërfaqshme, nuk ndryshonte shumë nga ajo e brezave të mëparshëm, madje as nga ajo e prindërve të mi. Verërat kishin njëfarë strukture, sporte, detyra shtëpie, pushime familjare por koha në mes ishte kryesisht në dorën time. Shumicën e saj e kaloja në aventura të lagjes: me biçikleta apo në ndjekje të një qëllimi që vetëm ne e kuptonim; hapnim shtigje në pyll dhe ndërtonim fortesa. Në mbrëmje luanim “kap flamurin” apo pjeknim marshmallow mbi zjarr. Edhe muajt e vitit jashtë verës nuk ishin më pak të gjallë: sa më shumë kohë të lirë kishim, aq më shumë lojë të papërcaktuar jashtë përjetonim.

Ky stil jete ekziston ende në disa pjesë të Amerikës moderne, por është gjithnjë e më i rrallë. Në vitet ’90, kur isha fëmijë, rreth 20 milionë fëmijë të moshës 7 deri në 17 vjeç ngisnin biçikletën të paktën gjashtë herë në vit. Sot, ky numër është përgjysmuar. Fëmijët që luajnë jashtë shpesh shkaktojnë shqetësim, dyshim apo edhe ndërhyrje ligjore. Janë shumë të zhurmshëm. Dhe për më tepër: ku janë prindërit e tyre? Presioni social i ka shtyrë fëmijët gjithnjë e më herët drejt një karriere meritokratike, ku gjithçka e konsideruar “e kotë”  si loja jashtë  shihet me përçmim. Sepse, në fund të fundit, çfarë vlere ka kjo për një CV?

Jeta përpara ekranit dhe telefonit po i largon fëmijët jo vetëm nga natyra dhe nga loja, por edhe nga njëri-tjetri. Teknologjia ishte duke hyrë gradualisht edhe në fëmijërinë time (shpesh kalonim nga loja jashtë te sesionet me PlayStation 2, zakonisht me shokë), por isha me fat që kur doli iPhone-i, unë isha gati për gjimnaz.

Është e lehtë të biesh në nostalgji për fëmijërinë tënde. Dhe gjithashtu është e lehtë të harrosh se ndryshimi është i pandalshëm  dhe jo gjithmonë për keq. Paraardhësit e mi do të habiteshin që fëmijëria ime kishte kaq pak punë ferme.

Por disa nga prirjet e sotme janë vërtet shqetësuese. Po rriten breza të rinj që nuk dinë të mendojnë apo të veprojnë në mënyrë të pavarur. Që kanë nevojë për udhëzim dhe stimul të vazhdueshëm nga jashtë. Që njohin vetëm një botë ku çdo përgjigje mund të gjendet menjëherë përmes një ekrani. Që i shmangen përplasjes së papritur, përvojës së drejtpërdrejtë, realitetit të vërtetë. Që besojnë se marrëdhëniet e bazuara vetëm në aplikacione mund të zëvendësojnë lidhjet e jetës reale. Dëshmitë po shtohen se këta të rinj janë gjithnjë e më të paaftë për detyra bazike, si drejtimi i makinës (që shumë prej tyre as nuk e dëshirojnë) apo edhe leximi. E gjithë kjo po shpie në sëmundje të mosveprimit  atë që Yuval Levin e quajti “patologjitë e pasivitetit.”

Prandaj, kjo luftë moderne kundër fëmijërisë duhet të na frymëzojë të bëjmë gjithçka që mundemi për të ruajtur apo rikthyer thelbin e saj. Të lejojmë  madje, kur duhet, të detyrojmë  fëmijët të luajnë jashtë. Të kufizojmë kohën që kalojnë para pajisjeve. Dhe, më e rëndësishmja, të mos i dorëzohemi vetë versioneve për të rritur të po këtyre sjelljeve që po dëmtojnë fëmijët tanë. Nuk duhet të lejojmë që ekranet të na shkëpusin nga bota reale, apo që marrëdhëniet dixhitale të zëvendësojnë ato të vërtetat  në vend që thjesht t’i plotësojnë.

Në Fundi i Fëmijërisë, zhdukja e racës njerëzore ndodh me një ndjenjë të trishtë por të pashmangshme, që ndonëse sjell humbje, shihet si përmbushja e fatit të saj. Por ne nuk jemi të destinuar të largohemi nga realiteti dhe nga njëri-tjetri. Megjithatë, gjithnjë e më shumë fëmijë po bëjnë pikërisht këtë. Nëse nuk përballemi me forcat që po i japin fund fëmijërisë, pasojat nuk do i ndjejmë vetëm tek fëmijët. Sepse, edhe pse ndoshta nuk e besojmë, ata fëmijë dikur do të bëhen të rritur.

Burimi: National Review

The post Lufta moderne kundër fëmijërisë appeared first on Gazeta Si.

Gazeta Si – Pas disa seancash të dështuara, i penduari i tretë i drejtësisë në dosjen “Plumbi i Artë”, Skerdi Tase, ka zbardhur detaje tronditëse për atentate të porositura në Fier, ku sipas tij ishte përfshirë së bashku me emra të njohur të botës së krimit.

Si porositës i dy atentateve në vitin 2018 dhe 2019, akuzohet Albert Pashaj dhe ekzekutimi do të kryhej nga “vartësi” i Nuredin Dumanit, Henrik Hoxhaj, të cilin e kishte paguar 80 mijë euro.

Në dëshminë e tij, Tase tha se ishte njohur me Henrik Hoxhajn në vitin 2017, përmes një shoku të përbashkët, të cilin e identifikon si Viron Tavanxhi dhe dyshohet të ketë qenë edhe kontakti i porositësit të njërit prej atentateve.

“Henrikun e takova për herë të parë në vitin 2017. Viron Tavanxhi na njohu për të ekzekutuar një person në Fier. Henriku kishte të gjitha të dhënat e shënjestrës dhe një makinë ‘Alfa Romeo’, si dhe një armë automatike”, deklaroi Tasi.

Sipas tij, viktima që synonin ishte Agim Boriçi, një emër i njohur në Fier. Tase tregoi se ditën e atentatit, Hoxhaj e kishte njoftuar me urgjencë: “Henriku më tha se porositësi i kishte kërkuar llogari – ‘Shumë po e zgjasni atë punë’.”

Atentati ndaj Agim Boriçit

Tase rrëfeu tentativën për vrasjen e Agim Boriçit në vitin 2018 në një lokal në Fier. Fillimisht, ai bashkë me Henrik Hoxhën kanë shkuar në spital për ta ekzekutuar Gim Boriçin, por nuk e kanë gjetur.

Më pas ata shkuan drejt shtëpisë, për ta vrarë, ndërsa Gim Boriçi ka qenë duke pirë kafe bashkë me të vëllanë.

Të dy i shpëtuan atentatit, ndërsa Tase ka rrëfyer në GJKKO se teksa po qëllonte me breshëri ndaj tyre, i ngeci kallashi.

Më pas, në rol është futur edhe Henrik Hoxhaj, i cili ka qëlluar me pistoletë derisa i mbaruan plumbat, por vëllezërit Boriçi shpëtuan pa i kapur asnjë fishek.

“Gim Boriçin shkuam ta qëllonim tek spitali, por nuk e gjetëm, ishte larguar, në makinën e punës, ‘Reno Clio’ kishim edhe armët, ishim të pajisur dhe me maska si këto që përdor policia, pastaj shkuam tek shtëpia e tij, e pamë duke pire kafe me vëllain, Henriku tha :’Bëhu gati se qenkan të dy’. Ndaluam para lokalit, fillova të qëlloj, më ngeci kallashi. Henriku gjuajti me një pistoletë deri sa i mbaruan fishekët, ata nuk i kapi asnjë fishek”, tha Tase në GJKKO.

Më pas ai ka rrëfyer si dogjën mjetin, duke pësuar edhe vetë djegie në fytyrë e duar. “Dogjëm makinën pas atentatit diku tek shinat e trenit, u dogja dhe vet pak nga zjarri në fytyrë dhe duar, u larguam pastaj në shtëpi”, tregon Tase.

Fajin për atentatin që nuk u realizua, Henrik Hoxhaj ia la Skerdi Tases. “Kisha hedhur dorezat në një kosh plehrash pas atentatit ndaj Boriçit, edhe ato mu dogjën pak. Henriku më bënte mua fajtor që nuk u bë puna siç duhet. Henriku kishte frikë mos kishim lënë prova, por ‘Reno’, Renato Saliaj, i tha që të rrinim pa merak se s’kishin asgjë”, ka thënë Tase.

Atentati ndaj Hajredin Beharit

Në vijim, Skerdi Tase deklaroi se Hoxhaj kishte marrë përsipër edhe një tjetër atentat, ekzekutimin e Hajredin Beharit, i njohur si tregtar nafte. Shënjestra sipas tij, frekuentonte një lokal përballë shtëpisë dhe kishte një dyqan vajrash për makina.

Ai shtoi se Behari ishte lokalizuar në një bar pranë rrethrrotullimit të parkut në Fier. “Mora armën dhe shkova atje. Kur më pa, ai bërtiti dhe u shtri përdhe. Mendova se e qëllova, por pastaj ika nëpër rrugicat e qytetit dhe hodha pistoletën në lumin Gjanicë”, rrëfeu Tasi.

Ai konfirmoi gjithashtu se atentati ishte porositur nga Viron Tavanxhi dhe se tentativa ishte realizuar në vitin 2018, edhe pse përgatitjet kishin nisur një vit më herët.

Ai ka treguar se si qëlloi me breshëri për ta vrarë Beharin, ndërsa ky i fundit është futur poshtë një tavoline për t’i shpëtuar plumbave.

Më pas është larguar nga vendi i ngjarjes dhe armën tha se e kishin hedhur në lumin Gjanica. Por, ndërsa Behari i shpëtoi atentatit, Tase tregon përplasjen me Henrik Hoxhajn, i cili i ka bërtitur se përse nuk u krye vrasja.

“Qëllova një breshëri për të vrarë Aredin Behari, ai u fut poshtë një tavolinë, mendova se e kapën fishekët, pastaj u largova me priste “Riku” 100 metra më larg, un mendova e kam vrarë, kaluam mbi lumin Gjanica aty ku hodhëm dhe armën ‘scorpion’. Debatuam me Henrikun që nuk u krye vrasja, më tha pse e more përsipër kur se bëje dot, pasi Aredini kishte thënë emrin e porositësit në polici. Henrikun e pyeten në polici, dhe me tha qe kishte dale emri i porositësit (i referohet Albert Pashaj)”, ka dëshmuar Tase.

Akuzat

Henrik Hoxhaj, i akuzuar si “ushtar” i Nuredin Dumanit, u arrestua mbrëmjen e 29 marsit të vitit 2022 në Fier, pak pasi Dumani kishte marrë mjekim për plagosje në shpinë nga tre mjekë në një shtëpi private.

Së bashku me Dumanin, ai është në cilësinë e të penduarit, si bashkëpunëtor i Prokurorisë së Posaçme, duke rrëfyer të paktën 12 vrasje dhe dhjetëra krime të tjera në një dekadë, si dhe porositë që merrte për ekzekutime, me pagesa deri në 200 mijë euro.

Prokuroria e Posaçme ka mbyllur në janarin e vitit 2024 hetimet për dosjen “Plumbi i Artë” dhe ka dërguar çështjen në gjykatë për 20 të pandehur.

Mes personave që do të gjykohen, janë Nuredin Dumani, Henrik Hoxhaj, Erion Alibej, Skerdi Tase dhe 16 të pandehur të tjerë.

Ata janë të dyshuar për një seri vrasjesh, atentate të mbetur në tentativë, apo vjedhje me dhunë, ngjarje të cilat u zbardhën pas dëshmisë së bashkëpunëtorit të drejtësisë Nuredin Dumani.

Ky i fundit akuzohet si autor i 9 vrasjeve dhe tentativave për vrasje, si dhe tre raste të tjera të vjedhjeve me dhunë.

The post ‘Plumbi i Artë’/ Skerdi Tase zbardh atentatet (e dështuara) në Fier, emrat e porositësve dhe si shpëtuan shënjestrat appeared first on Gazeta Si.

Një 55-vjeçar ka humbur jetën në Koplik të Malësisë së Madhe, pasi u dëmtua duke hapur një pus.

Aksidenti ka ndodhur në lagjen “Mehaj” rreth orës 10:30. Sipas policisë, viktima është 55-vjeçari A.H., i cili humbi jetën duke punuar me sondë shpimi për hapjen e një pusi uji.

Ngjarja konsiderohet aksidentale.

The post Dëmtohet duke hapur pusin, humb jetën 55-vjeçari në Koplik appeared first on Gazeta Si.

Gazeta Si – Për herë të parë në Theth, do të përdoret shpërthimi me tritol. Mëngjesin e sotëm, forcat e IKMT dhe forcat xhenio të Forcave të Armatosura kanë mbërritur ne godinën e fundit për ta shembur.

Mbrëmë u shemb vetëm një shtëpize druri ndërsa sot, do të shembet një godinë 3 katëshe. Për këtë arsye kanë mbërritur edhe forcat xhenio të cilët po studiojnë objektin dhe po marrin masat për vendosjen e lendes plasëse. Në afërsi të ndërtesës është edhe shtëpia tjetër e familjes Çerkaj, me leje.

Ndërkohë, një grup qytetarësh nga Mirdita u nisën drejt Thethit, në solidaritet me banorët e zonës së Dukagjinit.

Nën moton “Mirdita solidarizohet me Dukagjinin”, kjo iniciativë vjen si shprehje e mbështetjes për vëllezërit e gjakut në Shalë e Shosh, të cilët po përballen me sfida serioze që prekin jetesën, trashëgiminë dhe të ardhmen e tyre në këto treva historike.

Mirditorët u shprehën se ky udhëtim nuk është thjesht simbolik, por një thirrje për ndërgjegjësim kombëtar dhe veprim konkret.

“Mirdita, ka qenë krah për krah me pjesën tjetër të Veriut në kohë vështirësish, sot rikonfirmon lidhjet e gjakut, të besës dhe të trashëgimisë kulturore me Dukagjinin. Mirdita nuk hesht. Mirdita qëndron krah Dukagjinit, në mbrojtje të jetës, dinjitetit dhe tokës që na rriti”, shprehen ata.

“Mirdita solidarizohet me Dukagjinin” – sepse jemi një, sepse bashkimi është forca jonë më e madhe.

The post Godina e fundit në Theth do të shembet me tritol. Aktivistë nga Mirdita në mbështetje të banorëve appeared first on Gazeta Si.

Gazeta Si – Që prej të shtunës së datës 12 korrik, ish-ministri i Shëndetësisë Ilir Beqaj, ndodhet i shtruar në spital.

Sipas burimeve paraprake, Beqaj është shtruar me urgjencë në QSUT pasi kishte temperaturë të lartë dhe infeksion të rëndë në lëkurë. Sipas mjekëve, gjendja e tij është ende e pastabilizuar.

Ish-ministri Beqaj mbahet prej 1 viti në paraburgimin e Durrësit për dosjen SASPAC të abuzimit me donacionet e huaja, ndërsa po gjykohet me procedurë të zakonshme për dosjen e “Sterilizimit”.

Nga hetimet e kryera nga Prokuroria e Posaçme, ka rezultuar se ish-ministri nuk ka evituar konfliktin e interesit me biznesmenin Ilir Rrapaj, fituesin e koncesionit me vlerë 100 milionë Euro dhe nuk ka kërkuar studim të detajuar për nevojat e sterilizimit në mënyrë që të zgjidhte një variant më pak të kushtueshëm.

SPAK i akuzon për falsifikim të dokumenteve, mashtrim dhe shpërdorimit të detyrës.

The post Ish-ministri Ilir Beqaj shtrohet me urgjencë në QSUT për një infeksion të rëndë appeared first on Gazeta Si.

Përafërsisht 40% e popullsisë europiane është alergjike ndaj polenit dhe simptomat e tyre shkaktojnë një humbje prej rreth 100 milionë ditësh shkolle dhe pune çdo vit.

Prevalenca ka qenë në rritje për dekada dhe kjo ka të ngjarë të vazhdojë, një ndryshim aq i shpejtë sa ndryshimet gjenetike dhe shëndetësore nuk mund të jenë përgjegjëse vetëm për këtë.

Higjiena e përmirësuar, përdorimi i gjerë i antibiotikëve, ndryshimet në stilin e jetës, dieta, ndotja dhe kriza klimatike mendohet gjithashtu se luajnë një rol të madh në këtë rritje.

Por tani ka shpresë të re për ata që vuajnë. Studiuesit kanë krijuar një antitrup i cili kur aplikohet në pjesën e brendshme të hundës ndalon zhvillimin e simptomave të astmës dhe alergjive të shkaktuara nga Artemisa, shkaku më i zakonshëm i alergjive ndaj polenit në Azinë qendrore dhe pjesë të Europës, ku midis 10% dhe 15% e njerëzve janë alergjikë ndaj saj.

“Kjo është hera e parë që një antitrup monoklonal i projektuar për të bllokuar një alergjen specifik të polenit është dërguar direkt në hundë dhe është treguar se mbron nga simptomat e alergjisë në rrugët e sipërme dhe të poshtme të frymëmarrjes”, thotë Kaissar Tabynov autori kryesor i studimit.

“Në të ardhmen, antitrupa të ngjashëm mund të zhvillohen për alergjenë të tjerë kryesorë të polenit, siç është bari. Kjo hap derën për një brez të ri trajtimesh precize për alergjitë që veprojnë shpejt, pa gjilpëra dhe përshtaten me ndjeshmëritë individuale ndaj alergjenëve.”

The post Zbulohet antitrupi kundër alergjive ndaj polenit appeared first on Gazeta Si.

Gazeta Si – Pak para përplasjes së Boeing 787 të Air India, në kabinën e pilotimit ka pasur një “debat të ashpër” mbi arsyen pse motorëve u ishte ndërprerë furnizimi me karburant në një fazë kritike, duke i nxjerrë ata jashtë funksionit dhe duke shkaktuar rrëzimin e avionit. Njëri nga pilotët i ka kërkuar tjetrit — disa herë — “pse i fike?”, me një ton “dramatik dhe gjithnjë e më të dëshpëruar”.

Ky është një nga detajet më të rëndësishme që del nga dëgjimi i skedarëve audio të kutisë së zezë, sipas asaj që rrëfejnë për “Corriere della Sera” dy burime perëndimore në dijeni të përmbajtjes.

Raporti paraprak

Të njëjtat burime theksojnë se raporti paraprak — i hartuar nga autoritetet indiane — e ka anashkaluar plotësisht këtë moment, të konsideruar thelbësor për të kuptuar çfarë ka ndodhur në bord.

Po ashtu, kritikohet vendimi për ta reduktuar në vetëm një rresht e gjysmë — në një dokument prej 15 faqesh — shkëmbimin mes komandantit dhe zëvendëspilotit mbi arsyen e fikjes së motorëve, “kur biseda ka zgjatur disa sekonda dhe një pilot ka pyetur disa herë “pse i fikët?”, zbulojnë burimet.

Aksidenti

Fluturimi AI171 i Air India u rrëzua në periferi të Ahmedabad-it rreth tridhjetë sekonda pas ngritjes. Avioni ishte nisur drejt Londrës, në aeroportin Gatwick, Londër.

Aeroplani — me 242 persona në bord — kishte probleme me motorët që në çastet e para. Në përplasje humbën jetën 260 vetë: 241 mes pasagjerëve (vetëm një person i mbijetuar) dhe anëtarëve të ekuipazhit, si dhe 19 të tjerë që ndodheshin në mensën universitare mbi të cilën u përplas avioni (e jo 29 siç ishte komunikuar më parë).

Fikja e motorëve

Gjithçka në bord ndodhi me shpejtësi, konfirmon raporti paraprak. Tre sekonda pas ngritjes, ndërprerësit që kontrollojnë rrjedhën e karburantit janë zhvendosur njëri pas tjetrit nga “Run” në “Cut off’.

Dokumenti nuk saktëson se si janë zhvendosur. Burimet e konsiderojnë këtë një “veprim të qëllimshëm njerëzor”.

Zyra për hetimin e aksidenteve ajrore të Indisë — përgjegjëse për hetimin — nuk ka dhënë përgjigje për pyetjet e “Corriere”-s.

Pikat e errëta

Raporti nuk sqaron nëse ishte komandanti ai që e pyeti zëvendëspilotin nëse i kishte fikur motorët, apo anasjelltas.

Skedarët audio, sipas burimeve, janë në duart e autoriteteve indiane, të cilat e dinë, bazuar në katër “pista” zanore, se kush ka thënë çfarë. Por pyetja — “e drejtpërdrejtë, jo hezituese” — të lë të kuptosh se njëri prej pilotëve mund të ketë parë diçka. Kutia e zezë regjistron atë që përshkruhet si të bërtitura dhe përsëritjen e pyetjes “pse e bëre?”, e ndjekur nga “nuk kam qenë unë”.

Dhjetë sekonda

Debati dhe habia e përzier me tronditje, mund të shpjegojnë pse janë dashur disa sekonda për të rikthyer rrjedhën e karburantit në të dy motorët.

Dhjetë sekonda më vonë, një nga pilotët në kabinë rindez furnizimin e karburantit për motorin 1 (atë në të majtë), dhe katër sekonda më pas për motorin 2.

Një sekuencë që nuk konfirmon nëse ishte komandanti ai që u përpoq të shpëtonte situatën, pa sukses, apo zëvendësi i tij.

Po ashtu, nuk sqarohet se cili prej të dyve lëshoi alarmin e trefishtë “may-day”, gjashtë sekonda para përplasjes.

Buletini i vitit 2018

Raporti i autoriteteve indiane përmban disa pjesë të kritikuara nga përfaqësuesit perëndimorë, sepse — siç shpjegojnë ata — “fut elementë që krijojnë konfuzion”.

Si për shembull referenca ndaj një buletini informues të vitit 2018 të Administratës Federale të Aviacionit (FAA) të SHBA-së lidhur me një “çaktivizim të mundshëm të mekanizmit të bllokimit të ndërprerësit të kontrollit të karburantit”, i cili megjithatë nuk përfaqësonte një “gjendje rreziku”, që të justifikonte masa më të rrepta.

Air India e ka zëvendësuar dy herë, pas vitit 2018, të gjithë konsolën qendrore ku ndodhen dy ndërprerësit.

Inspektimet

Hetuesit, në raportin paraprak, shkruajnë se deri tani nuk kanë gjetur prova që kërkojnë ndërhyrje në avionët Boeing ose në motorët GE Aerospace.

Por kjo ka mjaftuar për të krijuar alarme. Dhe për këtë arsye vetë FAA ka njoftuar ditët e fundit homologët ndërkombëtarë se dy levat “nuk përfaqësojnë një problem sigurie”.

Autoriteti rregullator i aviacionit të Indisë ka urdhëruar kompanitë ajrore vendase që të inspektojnë ndërprerësit në avionët 787 (si ai i përfshirë në aksident) dhe 737 “për të verifikuar ndonjë mosfunksionim në mekanizmin e bllokimit”. Air India ka nisur tashmë kontrollet, pa konstatuar deri më tani ndonjë problem.

Pa probleme të konstatuara

Edhe disa kompani ajrore të Lindjes së Mesme kanë filluar të inspektojnë flotat e tyre Boeing. “Oman Air” ka përfunduar kontrollet në ndërprerësit e karburantit të rreth dhjetë avionëve 787 dhe tani po kontrollon 737-at e flotës së saj, pa gjetur ndonjë problem.

“Royal Jordanian” ka përfunduar një kontroll vizual të levave në avionët e saj 787 dhe as aty nuk janë konstatuar ndonjë problematikë.

Agjencia Evropiane për Sigurinë e Aviacionit (EASA), ka deklaruar se aktualisht nuk ka në plan inspektime të detyrueshme për modelin Boeing 787.

Burimi: “Corriere della Sera”; Përshtati: Gazeta “Si”

The post Tragjedia / ‘Pse i fike motorët, pse?’ Ulërimat mes pilotëve të Air India para rrëzimit: Nuk e bëra unë! appeared first on Gazeta Si.

Gazeta Si – Fotoja e gjeneruar nga Inteligjenca Artificiale, tregon një Xhaxha Sam me tiparet e Donald Trumpit, i cili me një armë lodër qëllon flluska sapuni drejt kullave të Kremlinit.

Nuk bëhet fjalë për ndonjë shaka të zakonshme nga kanalet ultranacionaliste të Telegram-it, por për mënyrën se si agjencia “Ria Novosti”, një nga tre agjencitë shtetërore të lajmeve, ka vendosur të ilustrojë komentin e saj mbi njoftimin e bërë nga presidenti amerikan.

Titulli, edhe më thumbues, pasi është një citim i qartë i frazës që Trump i tha Volodymyr Zelenskit gjatë takimit të tyre të parë dhe të famëkeq në Shtëpinë e Bardhë: “Uashingtoni nuk ka kartat për të kërcënuar Moskën“.

Shkrimi vijon, i gjithi në vijën e ironisë: “Shtetet e Bashkuara e kanë ndryshuar sërish — për të disatën herë! — politikën e tyre lidhur me furnizimin me armë të Ukrainës. Dje i furnizonin, sot jo, nesër ndoshta sërish. Strategjia jonë për të shtypur armatimet perëndimore dhe për të denazifikuar fizikisht Ukrainën po funksionon mirë dhe nuk ka arsye për ta braktisur atë. (…) Mbeten sanksionet, famëkeqet taksa doganore prej 500% që ligjvënësit amerikanë do të vendosin ndaj çdo vendi që blen hidrokarbure nga Rusia. Jo, nuk është një gabim shtypi apo një zero e tepërt: në planet e tyre janë vërtet taksa prej 500%… Blerësit tanë kryesorë sot janë India dhe Kina. A duan vërtet SHBA-të të shpallin një bllokadë tregtare ndaj këtyre vendeve gjigande? Do të jetë me të vërtetë interesante të shohim këtë spektakël…“.

Nëse ky është reagimi zyrtar nga mediat e kontrolluara nga presidenca dhe qeveria ruse, imagjinoni të tjerat.

“Veshët e Trumpit përkëdhelen nga elozhet e burokratëve amerikanë dhe ai duket i lumtur të nënshkruajë urdhrin ekzekutiv të nevojshëm, i stolisur me një dozë të mirë lajkash për mënyrën se si po e bën Amerikën sërish të madhe me një të rënë të stilolapsit. “Krenaria është padyshim mëkati im i preferuar”, thoshte personazhi i Al Pacinos në filmin “Avokati i djallit”.

Kështu flet nënkryetarja e Institutit shtetëror për kërkime dhe parashikime strategjike, Viktoria Fedosova, zakonisht e pozicionuar në linja më të moderuara.

Në të njëjtën vijë është edhe kanali Telegram, Rybar, që numëron një milion e gjysmë ndjekës: “Mali polli një mi të pafajshëm“.

Retorika amerikane për ruajtjen e paqes u zëvendësua, siç pritej, me deklarata për furnizimin e afërt me armë të reja për regjimin e Kievit. Nga llomotitja e zakonshme e Trump-it mund të kuptosh se Evropa do të paguajë për ndihmën.

E gjitha kjo forcon bindjen tonë: e rëndësishme për Rusinë është të kuptojë se në këto rrethana janë realitetet në fushën e betejës që përcaktojnë diplomacinë, dhe jo e kundërta“.

Qofshin nga skifterët e “partisë së luftës” apo nga “pëllumbat”, të gjitha reagimet janë në të njëjtën linjë, pasojë e refleksit pavlovian që aktivizohet gjithmonë në këto rrethana.

Me Rusinë, ultimatumet nuk funksionojnë, shkruan Izvestia, e jo më “para-ultimatumet”. Politika ngjitet mbi këtë krenari kombëtare me zellin e zakonshëm.

“Nxitoj të zhgënjej presidentin amerikan: aktualisht nuk tregtojmë pothuajse asgjë me SHBA-të, një qarkullim tregtar qesharak prej tetë miliardë dollarësh”, thotë Aleksej Zhuravlev, nënkryetar i Komisionit të Mbrojtjes në Dumën ruse.

Në këtë kontekst, gati të çuditshme duken fjalët e kujdesshme të Kirill Dimitriev, “amerikani i Kremlinit” me studime në Harvard, figurë kyçe në negociatat me administratën amerikane, i cili kujton “nevojën për një dialog konstruktiv” me SHBA-të, duke theksuar se “retorika e presionit ndaj Rusisë” nuk funksionon më dhe se ka nevojë “të korrigjohen gabimet e bëra nga Biden”.

Dyshime të mëdha mbi sanksionet dytësore ka edhe një vëzhgues neutral, si Alexey Kalmykov, komentator ekonomik për shërbimin rus të BBC-së: “Nëse Trump i referohet Kinës si partneri kryesor tregtar i Rusisë, le të themi se ai e ka humbur tashmë këtë betejë. Trump e ka provuar më parë, por Pekini iu përgjigj ashpër dhe ia hoqi dëshirën. Kjo është një kërcënim pa peshë”.

Ndërkohë, kanali Telegram, “Insider”, që mbledh burime anonime nga Kremlini, pohon se presidenti po përgatit “një përgjigje të ashpër” ndaj Trumpit.

Por ndoshta, edhe kjo është vetëm propagandë. Kur gjërat janë të paqarta, ose e vendosin përballë një udhëkryqi, Vladimir Putin gjithmonë zgjedh të heshtë… dhe të presë.

Burimi: “Corriere della Sera”

The post Rusia ironizon Trumpin dhe kërcënon: Xhaxha Sam fryn flluska sapuni. Armët do flasin vetë! appeared first on Gazeta Si.

Presidenti i SHBA-së, Donald Trump, ka deklaruar se është i zhgënjyer nga Vladimir Putini, por ende ‘nuk e ka përfunduar marrëdhënien me të’.

Në një intervistë telefonike për BBC, kreu i Shtëpisë së Bardhë theksoi: “Nuk kam besim pothuajse te askush”, kur u pyet nëse i beson liderit rus.

Deklaratat vijnë disa orë pasi Trump shpalli planet për të dërguar armë në Ukrainë dhe paralajmëroi se do të vendosë tarifa të ashpra ndaj Rusisë nëse nuk arrihet një marrëveshje armëpushimi brenda 50 ditëve.

Në intervistën nga Zyra Ovale, presidenti amerikan konfirmoi përkushtimin ndaj NATO-s, një aleancë që dikur e kishte quajtur “jashtë loje”. Ai tha se tani aleanca ka ndryshuar sepse vendet anëtare po paguajnë detyrimet e tyre.

Trump foli edhe për marrëdhënien me Putinin, duke pranuar se ka menduar se një marrëveshje me Rusinë ishte e afërt katër herë, por çdo herë, sipas tij, Putini e ka shkatërruar shpresën me veprime të reja, siç është bombardimi i ndërtesave në Kiev.

“Jam i zhgënjyer, por nuk kam përfunduar me të,” tha Trump. “Do të kemi një bisedë të mirë. Mendoj se jemi afër, dhe pastaj ai rrëzon një ndërtesë në Kiev.”

The post Trump paralajmëron Rusinë: Ende s’kam mbaruar me Putinin appeared first on Gazeta Si.

Gazeta Si – Një 39-vjeçar, Denis alias Denis Meçolli, u arrestua në Athinë, pasi ishte shpallur në kërkim nga autoritetet shqiptare për një plagosje me thikë të ndodhur në Korçë.

Ndaj Meçollit ishte caktuar masa e sigurisë “arrest me burg” nën dyshimin se plagosi me thikë Ergys Shtyllën. 39 vjeçari akuzohet për veprat penale “vrasja me dashje e mbetur në tentativë”.

Ngjarja ndodhi në qytetin e Korçës më 4 shkurt kur Meçolli goditi me thikë Shtyllën. Në dëshminë që ky i fundit dha për policinë tha se konflikti kishte nisur për shkak të shitjes së një makine.

Pas arrestimit në Greqi, kanë nisur procedurat për ekstradimin e 39 vjeçarit drejt Shqipërisë.

The post Tentoi të vriste me thikë një person në Korçë, kapet në Greqi pas 5 muajsh 39-vjeçari appeared first on Gazeta Si.

Një gjykatë në Shtetet e Bashkuara ndaloi përkohësisht vendimin e Qeverisë amerikane për t’iu hequr statusin e mbrojtjes së përkohshme afganëve që gjenden në SHBA.

Kjo u jep së paku edhe një javë kohë mijëra afganëve që rrezikojnë të dëbohen dhe të kthehen në Afganistan, vendin që kontrollohet nga talibanët.

Gjykata e Apelit për Qarkun e Katërt në Riçmond, Virxhinia, vendosi një pezullim administrativ mbi vendimin për t’i dhënë fund statusit të mbrojtjes së përkohshme për afganët, duke e shtyrë atë deri më 21 korrik.

Kjo masë erdhi pas një kërkese nga organizata CASA, e cila mbron të drejtat e emigrantëve.

CASA paraqiti një kërkesë urgjente më 14 korrik, pikërisht në ditën kur pritej të përfundonte statusi i mbrojtjes për afganët.

Gjykata nuk dha asnjë arsye për vendimin e saj, ndërsa administrata amerikane ka afat deri më 16 korrik, për të dhënë përgjigje.

Departamenti amerikan i Sigurisë Kombëtare njoftoi më 12 maj se statusi i mbrojtjes së përkohshme për afganët do të skadojë më 14 korrik.

Ky vendim do t’i prekte rreth 9.000 deri në 12.000 afganë që aktualisht jetojnë dhe punojnë ligjërisht në Shtetet e Bashkuara, në kuadër të këtij programi.

The post Gjykata në SHBA ndalon përkohësisht përpjekjet për t’iu hequr mbrojtjen afganëve appeared first on Gazeta Si.

Nga Gazeta Si – Në një karrierë të shpërndarë në 16 vite, Thomas Müller pa dhe fitoi gjithcka me klubin e fëmijërisë, Bayern Munich dhe Kombëtaren e Gjermanisë, duke cimentuar vendin dhe emrin e tij mes më të mëdhenjvë në Botën e futbollit, me rekorde që ndoshta edhe mund të mos thyhen asnjëherë. Më poshtë ju ftojmë të lexoni për karrierën dhe shifrat e vendosura nga Müller pas vallëzimit të fundit me ngjyrat e Bayern në “FIFA Club World Cup 2025”…
1 – Müller fitoi “FIFA World Cup 2014” në Brazil. Ai gjithashtu mori “Silver Boot” si Shënuesi i dytë më i mirë (5 gola) dhe “Silver Ball” si Lojtari i dytë më i Mirë pas Lionel Messi-t.
2 – Müller fitoi dy herë “UEFA Champions League” (2013 dhe 2020), si dhe luajti në dy Finale të humbura në 2010 dhe 2012. Ai ishte titullar në të katërta sfidat dhe shënoi në ruletën e 11m në humbjen e 2012 në “Allianz Arena”.
2 – Müller fitoi “UEFA Super Cup” në dy edicione (2013 dhe 2020) dhe “FIFA Club World Cup” në 2013 dhe 2020. Titulli i vitit 2020 ishte pjesë e “sextuple” në historinë e Bayern.
5 – Müller shënoi 5 tregolësha në karrierën e tij (për të rritur). Katër me fanellën e Bayern (dy në Bundesliga dhe 2 në DFB Cup), plus 1 për Gjermaninë në “2014 World Cup” kundër Portugalisë.
6 – Eshtë numri i trofeve që Müller fitoi në “DFB Cup”. Vetëm Bastian Schweinsteiger fitoi më shumë (shtatë).
8 – Numri i turneve madhorë ku Müller u grumbullua nga Gjermania (4 Kupa Bote dhe 4 Europianë). Ai luajti 36 ndeshje në këto kompeticione.
8 – Numri i golave që Müller shënoi kundër Barcelona-s. Asnjë lojtar tjetër që nuk ka luajtur asnjëherë në Spanjë nuk ka shënuar kaq shumë ndaj katalansve.

10 – Mosha në të cilën Müller iu bashkua Akademisë së Bayern nga klubi lokal, TSV Pähl në vitin 2000.
10 – Golat që Müller shënoi në Kupën e Botës (2010, 2014, 2018 dhe 2022). Vetëm 8 lojtarë në historinë e kompeticionit shënuan më shumë.
13 – Titujt kampionë që Müller fitoi në Bundesliga, më shumë se cdo lojtar tjetër në histori.
13 – Numri i trainerëve me të cilët Müller luajti në skuadrën e parë të Bayern (përfshi edhe ata provizorë). Ai luajti më shumë ndeshje nën drejtimin e Pep Guardiola-s (148).
13 – Numri që Müller mbajti më shumë në karrierën e tij te Gjermania.
16 – Numri i sezoneve rradhazi në të cilët Müller shënoi në Bundesliga, barazoi rekordin e Holger Fach, Mats Hummels, Bernd Nickel, Olaf Thon dhe Michael Zorc. Vetëm Nickel (Eintracht Frankfurt) dhe Zorc (Borussia Dortmund) e bënë dicka të tillë për një klub të vetëm.
17 – Numri i sezoneve që Müller luajti në Bundesliga. Vetëm Manfred Kaltz (për Hamburg), Karl-Heinz ‘Charly’ Körbel (për Frankfurt) dhe Klaus Fichtel (për Schalke 04) zhvilluan më shumë sezone për një klub të vetëm në kompeticion (të gjithë 19).

21 – Numri i asistëve që Müller dha në Bundesliga 2019/20. Rekord i ri në kampionat dhe barazim i rekordit të Lionel Messi-t në top5 kampionatet në Europë.
25 – Numri që mbajti Müller në skuadrën e parë të Bayern. Ai e shpjegon me dhënien e bluzës nga kujdestari i dhomave të zhveshjes që ndoshta mendonte se – “Nuk do qëndroja gjatë në klub, por u gabua”.
27 – Kundërshtari i preferuar në karrierën e Müller ishte Wolfsburg, të cilin e mundi 27 herë (nga 32 përballjet). Skuadër e preferuar për Müller edhe për shënimin e golave (15).
30 – Numri i asistëve që Müller dha në Champions League, i klasifikuar në vendin e 6 bashkë me Xavi Hernández.
34 – Numri i trofeve madhorë që Müller fitoi në karrierën e tij, lojtari më i suksesshëm në historinë e futbollit gjerman bashkë me Toni Kroos. 33 trofetë ai i fitoi me Bayern, plus “2014 World Cup” me Gjermaninë.
36 – Totali i golave të Müller në “DFB Cup”, i klasifikuar në vendin e 8 të të gjitha kohërave dhe vetëm 3 më pak se Robert Lewandowski, Hannes Löhr dhe Klaus Allofs në vendin e 5.
40 – Numri i kartonave të verdhë që Müller mori në 749 ndeshjet e luajtura për Bayern. Ai mori vetëm dy kartona të kuq (1 direkt, 1 pas dy të verdhave), duke humbur vetëm 5 ndeshje për shkak pezullimi.
45 – Müller luajti në 45 ndeshje “Der Klassiker” kundër Dortmund-it.
45 – Totali i golave që Müller shënoi për Gjermaninë, në vendin e 6 të të gjitha kohërave bashkë me Karl-Heinz Rummenigge-n.

56 – Totali i golave që Müller shënoi në Champions League, më shumë se cdo lojtar tjetër gjerman dhe i 6 i të gjitha kohërave. Golin e parë e shënoi në debutim kundër Sportingut të Lisbonës në Marsin e 2009.
67 – Numri i ndeshjeve që Müller luajti në “DFB Cup” – më shumë se cdo lojtar tjetër i Bayern dhe i 6 në listën e të gjitha kohërave të kompeticionit. Ai fitoi 58 prej tyre.
111 – Numri ndeshjeve që Müller fitoi në Champions League. Vetëm Cristiano Ronaldo fitoi më shumë (115).
131 – Totali i ndeshjeve që Müller luajti për Gjermaninë, nga debutimi në Marsin e 2010 deri në Korrik 2024. Vetëm Lothar Matthäus (150) dhe Lukas Podolski (137) luajtën më shumë për Kombëtaren.
150 – Golat që Müller shënoi në Bundesliga duke u renditur në vendin e 17 në historinë e kampionatit dhe i 4 në historinë e Bayern pas Gerd Müller (365), Leëandoëski-t (238) dhe Rummenigge-s (162).
163 – Numri i ndeshjeve që Müller luajti në Champions League (plus 2 në kualifikuese), duke kaluar Xavi Hernández (Barcelona) dhe vendosur një rekord në kompeticion për ndeshjet me një klub të vetëm në fitoren 9-2 ndaj Dinamos së Zagreb-it në Shtatorin e 2024. Ai është në vendin e 3 të të gjitha kohërave bashkë me Messi-n, pas vetëm Cristiano Ronaldo-s (183) dhe Iker Casillas (177).

178 – Numri i golave që u nisën nga këmbët e Müller në Bundesliga, më shumë se cdo lojtar tjetër nga viti 1992.
250 – Numri total i golave që Müller shënoi në të gjithë kompeticionet për skuadrën e parë të Bayern. Vetëm Gerd (566) dhe Lewandowski (344) shënuan më shumë për bavarezët.
238 – Numri i asistëve që Müller dha në karrierën e tij tek Bayern, më shumë se 100 nga ndjekësit, Franck Ribéry dhe Marco Reus.
328 – Ishin golat në të cilët u përfshi Müller (150 gola, 178 asists) në Bundesliga.
362 – Numri i ndeshjeve të fituara nga Müller në Bundesliga, 6 më shumë se Manuel Neuer. Por ai është i vetmi që ka fituar më shumë se 300 ndeshje për një klub (Neuer ka 279 fitore për Bayern).
503 – Ishin ndeshjet e Müller në Bundesliga, rekordmeni i Bayern (i ndjekur nga Sepp Maier me 473). Vetëm 11 lojtarë kanë luajtur më shumë në Bundesliga, ndërsa vetëm Michael ‘Ata’ Lameck (518 për Bochum), Kaltz (581 për Hamburg) dhe Körbel (602 për Frankfurt) luajtën më shumë ndeshje për një klub.
756 – Müller theu rekordin e Maier te Bayern me 710 ndeshje në raundin e 2 të sezonit 2024/25 ndaj Freiburg. Ai e përmirësoi rekordin me 756 në ndeshjen e fundit për klubin. 149 më shumë se cdo lojtar tjetër me përjashtim të portierëve (Gerd Müller ndjek me 607).
2008 – Viti në të cilin Müller debutoi për skuadrën e parë të Bayern kur zëvendësoi Miroslav Klose-n në minutën e 79th të barazimit 2-2 kundër Hamburg-ut që kishte në përbërje Vincent Kompany. Ishte vetëm 1 muaj përpara ditëlindjes së 19.
2010 – Ishte Kupa e parë e Botës për Müller (kishte luajtur vetëm 2 ndeshje për Gjermaninë), ku ai fitoi “Golden Boot” (5 gola, plus tre asists) si dhe cmimin “Best Young Player”.
2025 – Müller la Bayern-in si një Legjendë e klubit dhe futbollit gjerman në fund të rrugës në “FIFA Club World Cup 2025”.

The post Thomas Müller në shifra appeared first on Gazeta Si.

Nga Gazeta Si- Policia e Vlorës ka zbardhur ngjarjen e rëndë të një dite më parë në lagjen Kushtrimi, ku 17-vjeçarja tentoi vetëvrasjen me armë zjarri, duke mbetur e plagosur rëndë me plagë në kokë.

Për këtë ngjarje, policia ka arrestuar babain e vajzës, 43-vjeçarin S.S., i cili akuzohet se ka dhunuar të bijën. Sipas bluve, e mitura tentoi vetëvrasjen pas dhunës së ushtruar nga i ati.

Në hetim është vënë edhe gjyshi i vajzës, për armëmbajtje pa leje, i cili po hetohet në gjendje të lirë. Kjo pasi tentativa e vetëvrasjes ndodhi në shtëpinë e gjyshërve, me armën që gjyshi mbante pa leje.

Arma e krimit, tip pistoletë, është fshehur nga familjarët dhe nuk është gjetur ende nga policia.

17-vjeçarja e vetëplagosur në kokë mori fillimisht mjekim në Spitalin e Vlorës dhe më pas u dërgua për mjekim në Spitalin e Traumës, ku ndodhet në gjendje të rëndë.

The post Vlorë, 17-vjeçarja tentoi vetëvrasjen pas dhunës në familje, arrestohet babai. Nën hetim edhe gjyshi appeared first on Gazeta Si.

Sot vendi ynë do të ndikohet nga kushte atmosferike kryesisht të qëndrueshme, duke sjellë mot të kthjellët në pjesën më të madhe të territorit gjatë orëve të paradites.

Nga mesdita e në vijim priten shtime graduale të vranësirave në zonat malore, të cilat herë pas here do të jenë të dendura, veçanërisht në lindje.

Në këto zona parashikohen reshje shiu lokale.

The post Në zonat malore priten reshje të izoluara shiu appeared first on Gazeta Si.

Gazeta Si – Pas një aksioni që zgjati për më shumë se 7 ditë, mbrëmjen e së hënës është prishur dhe ngrehina e fundit e ndërtuar pa leje në zonën turistike malore të Thethit.

Edhe prishja e këtij objekti u shoqërua me protestën dhe kundërshtinë e pronarëve, të cilët pas disa orësh e panë të shembje nga ekskavatori i IKMT.

Pronarëve u ishte dhënë koha deri në orën 18:00 të ditës së sotme që strukturat t’i çmontonin vetë. Një gjë e tillë nuk ka ndodhur dhe fadromat e IKMT-së kanë ndërhyrë natën për ta shembur.

Fillimisht pati rezistencë nga banorët, ku u tentua t’i bllokohej rruga fadromës dhe më pas rreth 30 banorë u ngujuan brenda godinës për të mos lejuar shembjen e objektit, ku mes tyre kishte edhe gra edhe fëmijë.

Gjithsesi, rezistenca e tyre nuk zgjati më shumë se një orë dhe ata u larguan paqësisht, pas një telefonate me pronarin e objektit, i cili ndodhej në Valbonë me një grup turistësh.

Sipas informacione, ai u ka kërkuar familjarëve të tij dhe banorëve të tjerë që të largohen për të mos rrezikuar jetën e askujt, duke qenë se është edhe natë.

Banorët kanë kërkuar një vendim gjykate që të justifikojë ligjërisht shembjen e ndërtesës, ndërsa janë ulur në rrugë për të bllokuar kalimin e mjeteve të IKMT-së.

Policia ka ndërhyrë duke krijuar një kordon sigurie dhe ka tentuar të largojë banorët, por situata mbeti për minuta e tensionuar.

Pavarësisht përpjekjeve për të nisur shembjen, familjarët janë futur brenda objektit, duke e bërë të pamundur ndërhyrjen e fadromës, deri sa më në fund u doreëzuan.

Në mbrëmje, kryeministri Edi Rama ka publikuar pamjet nga pastrimi i inerteve nga shembja masive e godinave pa leje në Theth.

Në një postim në rrjetet sociale, Rama shkruan se ka filluar Rilindja Urbane 2.0 si domosdoshmëri jetike për Shqipërinë 2030 në BE.

Kreu i qeverisë thekson se forcat e xhenjos nuk do të largohen nga Thethi deri kur të jetë hequr edhe mbeturina e fundit, ndërkohë që mbetet edhe nje godinë masive për t’u shembur, që të përmbyllet ekzekutimi i plotë i vendimeve të IKMT

“Ka nisur sot në Theth me mbështetjen e forcave të xhenjos, pastrimi i mbetjeve inerte të ekzekutimit të vendimeve në ngarkim të 40 subjekteve që kishin mbjellë mbi 100 ngrehina pa leje – nga ato me mure tek ato me kontruksion metalik e me dru – në dhunim ekstrem të ligjit për zonat e mbrojtura, të historisë e të pejsazhit magjepsës të asaj zone dhe të turizmit që kanë kultivuar në vite ata që kanë sakrifikuar për ta bërë Thethin destinacionin që është sot- thekson Rama – Forcat e xhenjos nuk do të largohen nga Thethi deri kur të jetë hequr edhe mbeturina e fundit, ndërkohë që mbetet edhe nje godinë masive për t’u shembur, që të përmbyllet ekzekutimi i plotë i vendimeve të IKMT dhe rikthimi i Thethit në normalitetin e para kësaj marrëzie kriminale. Ka filluar Rilindja Urbane 2.0 si domosdoshmëri jetike për Shqipërinë 2030 në BE”, shkruan Rama.

Ky aksion i IKMT-së, i cili ka zgjatur një javë, ka çuar në shembjen e rreth 70 ndërtimeve të paligjshme në zonën e mbrojtur të Thethit.

Pas përfundimit të ndërhyrjeve, strukturat shtetërore pritet të tërhiqen nga territori i Parkut Kombëtar.

The post Shembet mes tensioneve të banorëve godina e fundit në Theth. Rama: Rilindja urbane 2.0 appeared first on Gazeta Si.

Gazeta Si – Të hënën, 24 korrik, gjatë një takimi me Sekretarin e Përgjithshëm të NATO-s, Mark Rutte, në Shtëpinë e Bardhë në Uashington, presidenti i SHBA-ve, Donald Trump, konfirmoi se Shtetet e Bashkuara do t’i dërgojnë NATO-s “armë me cilësi të lartë dhe më të mirat në arsenalin e tyre”, e cila do të paguajë për to dhe nga ana tjetër do t’i dërgojë ato në Ukrainë, në mënyrë që të mund të mbrohet nga Rusia.

Diskutimet e tyre, u përqendruan tek lufta në Ukrainë. Trump është shprehur me kërcënim ndaj Rusisë, lidhur me situatën.

Presidenti i SHBA-ve, tha se Rusia do të përballet me tarifa shumë të ashpra, nëse brenda 50 ditëve nuk do të arrihet marrëveshja me Ukrainën.

Trump tha se Moska duhet ta rikthejë ekonominë e Rusisë në rrugën e duhur.

Ai u shpreh se Rusia ka “potencial të jashtëzakonshëm” dhe shtoi se duhet t’i përdorë burimet e saj për tregti dhe jo për luftë.

“Unë flas shumë me të”, thotë Trump për Presidentin e Rusisë Putin.

Ai thotë se bisedat janë shumë të këndshme, por shton se biseda “nuk do të thotë asgjë” pasi raketat godasin qytetet, raporton BBC.

Sakaq, Donald Trump thotë se është “shumë, shumë i zhgënjyer” me Rusinë dhe ka njoftuar planet për të dërguar armë “të nivelit të lartë” në Ukrainë , nëpërmjet NATO-s.

The post Ultimatumi i Trump: I zhgënjyer me Putinin për Ukrainën, marrëveshje për 50 ditë ose tarifa 100% appeared first on Gazeta Si.

Nga Federico Fubini – Disa muaj më parë, Gao Shanwen, ekonomisti kinez që i kishte quajtur të dhënat ekonomike të vendit të tij të rreme, u zhduk në Pekin.

Jo, rritja aktuale nuk ishte 5% e deklaruar nga qeveria – kishte thënë Gao – por pak mbi 2%. Dhe jo, papunësia e të rinjve nuk ishte në nivelin më të lartë prej 17%, por rreth 40%. Pra, Gao ishte zhdukur dhe mbetet i tillë.

Ka kaluar pak kohë, por kurrë nuk e imagjinova se kinezi i radhës, zhdukjen e të cilit do ta raportoja, do të mbante emrin e Xi Jinping.

Po, ai: Sekretari i Partisë Komuniste, presidenti i Republikës Popullore dhe kryetari i Komisionit Qendror Ushtarak, që tani shërben një mandat të tretë të paprecedentë që nga koha e Mao Ce Dunit.

Ai u zhduk në moshën 72 vjeç. Pastaj, sigurisht, u rishfaq. Por nuk është normale që Xi të zhduket për dy javë, dy herë radhazi, midis majit dhe korrikut.

Është gjithashtu hera e parë që nga viti 2012 që Xi ka munguar në samitin vjetor të BRIC: ai nuk ishte në Brazil një javë më parë.

Edhe më pak normal është fakti që për tre ditë rresht – midis 2 dhe 5 qershorit – gazeta “People’s Daily” dhe agjencia zyrtare e lajmeve Xinhua shmangën përmendjen e udhëheqësit të vendit në asnjë mënyrë.

Gjithashtu kurioze është rënia e ndjeshme – e vënë re nga vëzhguesit – në referencat ndaj “Mendimit Xi Jinping” si parimi udhëheqës i partisë në komunikimet e Këshillit të Shtetit dhe Ministrisë së Jashtme.

Çfarë po ndodh rreth udhëheqësit më të fuqishëm të ekonomisë më të madhe në botë (për sa i përket vëllimeve të prodhimit) që nga Deng Xiaoping?

Askush jashtë nuk mund ta dijë. Nuk ka aspak gjasa që Xi Jinping të bjerë siç ra Mikhail Gorbachev në gusht 1991. Por diçka po ndodh. Le të shohim.

Gjeneralët e zhdukur

Zhdukjet e papritura të figurave të larta në Pekin janë ekuivalenti kinez i rënies “aksidentale” të menaxherëve nga dritaret në Rusi.

Një nga rastet e fundit të dukshme ishte ai i Qin Gang, Ministër i Jashtëm deri më pak se dy vjet më parë dhe, para kësaj, ambasador kinez në Uashington.

Duket se krimi i tij ishte të kishte një marrëdhënie me një grua kineze që nuk ishte miratuar plotësisht nga partia, ndërsa ai jetonte në Shtetet e Bashkuara. Thashethemet e fundit sugjerojnë se ai u rishfaq së fundmi si zyrtar në bibliotekën qendrore të partisë në Pekin.

Por ajo që po i ndodh Xi Jinping dhe udhëheqjes ushtarake, ku ai është teorikisht udhëheqësi absolut, i përket një kategorie tjetër. Sepse në muajt e fundit, dhe me intensitet në rritje midis fundit të pranverës dhe verës, kanë ndodhur shumë ngjarje të pazakonta.

– Brenda ushtrisë, disa figura të larta që historikisht konsiderohen shumë të afërta me Xi Jinping i janë nënshtruar disa spastrimeve.

– Vetë udhëheqësi u zhduk publikisht, së pari midis 21 majit dhe 5 qershorit dhe më pas midis 24 qershorit dhe 7 korrikut.

– Në samitin e BRICS në Brazil, një grup udhëheqësish nga vendet në zhvillim që vetë Xi i ka ushqyer gjithmonë personalisht, udhëheqësi kinez për herë të parë u tërhoq nga eventi, duke përmendur “mbivendosje të rendit të ditës” (ai dërgoi Kryeministrin Li Qiang në vendin e tij).

– Së fundmi, siç u vu re nga kanali indian News 18 (i cili vepron në bashkëpunim me CNN), për tre ditë të gjata gjatë zhdukjes së Xi në fillim të qershorit, media zyrtare e partisë nuk e përmendi fare udhëheqësin e tyre.

Çuditërisht, apo jo?

Katër të dhëna nuk janë të mjaftueshme për të dekretuar fundin ose rënien e pushtetit të Xi, i cili tani është në gjysmë të mandatit të tij të tretë dhe teorikisht i kualifikuar për rizgjedhje për një kohë të pacaktuar.

Por ka mjaftueshëm të dhëna për të dyshuar se vështirësitë e zgjatura ekonomike dhe rezultatet kontradiktore të negociatave të tarifave me Shtetet e Bashkuara të Donald Trump po prodhojnë – ndoshta për herë të parë – një dobësim të Xi-së.

Spastrimet në nivelet më të larta të pushtetit në Kinë janë duke vazhduar dhe Xi Jinping ishte i pari që iu drejtua atyre për të ushtruar pushtetin e tij.

Edhe këtë herë, vendimi për të larguar dhe ndëshkuar gjeneralë të caktuar mund të jetë i tij, megjithatë ai ka të bëjë me besnikët që vetë Xi i kishte vendosur në ato pozicione.

Një analist kinez për Korporatën Australiane të Transmetimeve (ekuivalenti i BBC-së në Australi) vuri në dukje së fundmi se Gjenerali He Weidong, gjenerali i dytë më i lartë në ushtri dhe bashkë-nënkryetar i Komisionit të fuqishëm Qendror Ushtarak, nuk është shfaqur në publik që nga 11 marsi.

Sa i përket kolegut të tij, Xu Qiliang, ai zyrtarisht vdiq më 2 qershor në moshën relativisht të re, 75 vjeç, në rrethana që nuk janë shpjeguar kurrë saktësisht. Vdekja e tij ndodhi në të njëjtat ditë gjatë të cilave “People’s Daily” dhe Xinhua kishin ndaluar së raportuari për Xi.

Cilët ishin këta dy gjeneralë? Tek He Weidong dhe Xu Qiliang, Xi Jinping dukej se kishte gjetur dy burra të besuar për të konsoliduar kontrollin e tij mbi ushtrinë.

Spastrimet e mëparshme brenda ushtrisë në muajt e fundit kishin përfshirë Shefin e Shtabit të Marinës Li Hanjun, ish-gjeneralin e lartë Liu Shipeng (atëherë kreu i Korporatës Kombëtare Bërthamore të Kinës) dhe një gjeneral tjetër dhe anëtar të Komisionit Qendror Ushtarak të quajtur Miao Hua.

Gjenerali Lin Xiangyang, kreu i Komandës së Kuadrantit Lindor, gjithashtu dha dorëheqjen së fundmi.

Akuzat janë pothuajse gjithmonë të njëjta: “Shkelje të dyshuara serioze të disiplinës dhe ligjit”, pra, korrupsion.

Është një nga mjetet që Xi Jinping ka përdorur për të konsoliduar pushtetin e tij gjatë viteve, dhe është e mundur që ai vetë urdhëroi spastrimet e popullit të tij, paranojak si të gjithë perandorët nga frika e tradhtisë.

Por një tjetër mundësi është që ata gjeneralë që kishin qenë gjithmonë pranë udhëheqësit të jenë shkarkuar nga njeriu që – me të, ose ndoshta tani mbi të – është më i fuqishmi në Kinë: Zhang Youxia (foto më poshtë me Vladimir Putinin).

Shoku i Fëmijërisë

Kush është Zhang? Për Xi-në, ai është një shok i përjetshëm; gjenerali me gradën më të lartë në parti, i cili kontribuoi në mënyrë vendimtare në rizgjedhjen e tij të tretë në vitin 2022.

Por Zhang Youxia është gjithashtu armiku më i ngushtë i Xi-së. Një video tregon (minuta e katërt) se si, në një plenum të rëndësishëm të partisë këtë vit, Zhang Youxia kthen shpinën dhe as nuk shqetësohet ta përshëndesë Xi Jinping, ndërsa një vit më parë ai i ishte drejtuar atij me servilizëm dhe i kishte bërë homazhe.

Zhang Youxia është komandanti më i lartë ushtarak i partisë dhe nënkryetari (i dyti vetëm pas Xi-së) i Komisionit Qendror Ushtarak.

Babai i Xi-së dhe babai i Zhang-ut luftuan së bashku në revolucion përkrah Maos; prandaj është shumë e mundshme që të dy – të cilët janë pothuajse të njëjtën moshë – ta kenë njohur njëri-tjetrin që nga fëmijëria.

Por tani, ndër levat e tjera të pushtetit, Zhang kontrollon edhe zyrën që siguron sigurinë personale të Xi Jinping-ut, duke e bërë në një farë mase udhëheqësin e partisë një peng të mundshëm. Spastrimet në ushtri mund të jenë iniciuar nga Xi kundër Zhang-ut ose nga Zhang kundër Xi-së.

Këto me siguri tregojnë për paqëndrueshmëri në krye të Pekinit, një dobësim dhe vënie në pikëpyetje të pushtetit të pakontestueshëm të Sekretarit.

Nuk ka kaluar pa u vënë re që gjatë mungesës së Xi në maj-qershor, u mbajt një aktivitet i Këshillit të Shtetit që – në mënyrë të paprecedentë – nuk e përmendi Xi-në.

Pse na shqetëson e gjithë kjo? Ne kemi diskutuar tashmë vështirësitë dhe kontradiktat e ekonomisë kineze, plotësisht e pabalancuar drejt prodhimit të orientuar drejt eksportit, por e paaftë për të mbështetur konsumin e brendshëm dhe punësimin e të rinjve.

Tani, përshkallëzimi i tensioneve tregtare nën Donald Trump vetëm sa e ndërlikon situatën. Në këtë sfond, nuk është për t’u habitur që lidershipi i Xi-së po vihet në pikëpyetje në krye të partisë dhe shtetit: ai është treguar i paaftë për të ribalancuar ekonominë, për të mbështetur të ardhurat e familjeve ose për të hequr mbeturinat e flluskës së tmerrshme të pasurive të paluajtshme që shpërtheu vite më parë.

Fraksione të tjera në Pekin do të duan të qërojnë hesapet me të, jo më pak reformistët e moderuar që mbështetën ish-Presidentin Hu Jintao, të cilin vetë Xi e poshtëroi publikisht në vitin 2022.

A do të thotë kjo se Xi Jinping është gati të humbasë zyrtarisht pushtetin? Ndoshta jo; ai mbetet një kafshë politike me nëntë jetë. Por ia vlen të shikohen hapat e mëtejshëm.

Burimi: “Corriere della Sera”

The post Ku është ‘zhdukur’ udhëheqësi Xi Jinping dhe pse hesht media shtetërore! Çfarë po ndodh në Kinë? appeared first on Gazeta Si.

Gazeta Si – Gjykata Themelore në Prishtinë ka shpallur fajtor dhe ka dënuar me nga një vit burg secilin ish-kryeministrin e vendit, Agim Çeku, dhe 9 të akuzuar të tjerë në rigjykimin e rastit “Veteranët”, ndërsa i ka liruar plotësisht nga akuzat dy të tjerë.

Çeku, ish-ministri i Mbrojtjes Rrustem Berisha, ish-deputeti Shkumbin Demalijaj, pastaj Sadik Halitjaha, Qelë Gashi, Shukri Buja, Ahmet Daku, Faik Fazliu, Fadil Shurdhaj dhe Xhavit Jashari u gjetën fajtorë për keqpërdorim të detyrës duke i shkaktuar buxhetit të shtetit dëme në vlerë mbi 88 milionë euro.

Nuredin Lushtaku dhe Smajl Elezaj u shpallën të pafajshëm për akuzat e njëjta.

Gjykatësi Gazmend Bahtiri tha se Nuredin Lushtaku dhe Smajl Elezaj lirohen nga akuza “pasi nuk kanë pasur cilësinë e personit zyrtar”.

Bahtiri shtoi se pas administrimit të provave personale dhe materiale, përtej dyshimit të bazuar mirë, është vërtetuar se të akuzuarit kanë kryer veprën penale, raporton Betimi për Drejtësi.

Ky rast u kthye në rigjykim më vendim të Gjykatës së Apelit në vitin 2022, pasi Gjykata Themelore i kishte liruar nga akuzat që të gjithë 12 të pandehurit në vitin 2021.

Sipas prokurorëve, numri i përfituesve të jashtëligjshëm nga statusi i veteranëve mund të jetë deri në 19 mijë njerëz.

Bahtiri shtoi se Gjykata nuk ka mundur ta identifikojë secilin prej 19 mijë e 500 aplikacioneve për statusin e veteranit, andaj vlerëson se duhet të shqyrtohet procedura përkatëse pastaj të merret vendim se a gëzojnë statusin e veteranit apo jo.

Sipas aktakuzës së përgatitur nga ish-prokurori special, Elez Blakaj, personat e përfshirë thuhet se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, shfrytëzuan detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të buxhetit të shtetit./REL/

The post ‘Veteranët’, dënohet me 1 vit burg ish-kryeministri i Kosovës Agim Çeku dhe 9 të tjerë appeared first on Gazeta Si.