Oleksandr Usyk dhe Daniel Dubois do të ndeshen sot (dy vite pas sfidës së parë) për unifikimin e titujve botërorë. Usyk fitoi përballjen e parë ndaj Dubois në Poloni ndërsa tani gjigandët e peshës së rëndë do të ndajnë ringun e “Wembley Stadium”. Ukrainasi ka të gjithë titujt e mundshëm me përjashtim të atij në IBF që mbahet nga rivali britanik. Usyk arriti të rekuperonte terren dhe mundte Dubois pas një gjuajtje nën brez të cilën skuadra e britanikut e konsideron edhe sot brenda rregullave, një gjuajtje në trup. Ndërsa Dubois prej asaj mbrëmjeje ka qënë në formën më të mirë të mundshme duke fituar ndaj Jarrell Miller, Filip Hrgovic dhe Anthony Joshua.

Këtë të fundit, 27 vjecari e rrëzoi KO në “Wembley”, Shtatorin e kaluar. Usyk gjithashtu nuk ka pësuar asnjë humbje, duke rregjistruar dy fitore me vendimin e gjyqtarisë ndaj Tyson Fury-t në 2024. Fitorja e parë e bëri 38 vjecarin Usyk, Kampionin e parë të padiskutueshëm në 24 vitet e fundit. Ndërkohë Dubois u promovua nga “interim” në Kampion të Rregullt në versionin IBF. Eventi në “Wembley” do të startojë në orën 18:30 (CEST) ndërsa ndeshja kryesore pritet të startojë në orën 22:45 (CEST). Dubois ka 24 ndeshje në karrierën e tij (22 fitore, 2 barazime, 21 fitore me KO) ndërsa Usyk ka 23 ndeshje (23 fitore, 14 me KO). Për të parën herë në “Wembley” do të boksohet për katër brezat e peshës super të rëndë.

Kalendari i eventit në “Wembley Stadium”:
– Oleksandr Usyk vs. Daniel Dubois 2; Titujt e Usyk: WBA (Super), WBC, WBO, IBO & The Ring. Titulli i Dubois: IBF.
– Lawrence Okolie vs. Kevin Lerena;  Titulli i Okolie: WBC silver heavyweight title
– Daniel Lapin vs. Lewis Edmondson; Titujt e Lapin: IBF Intercontinental & WBA Continental light heavyweight
– Vladyslav Sirenko vs. Solomon Dacres; Heavyweight
– Aadam Hamed vs. Ezequiel Gregores; Super lightweight
– Lasha Guruli vs. James Francis; Super lightweight

The post Usyk 2 Dubois – në ‘Wembley’ për unifikimin e titujve në peshën e rëndë appeared first on Gazeta Si.

Gazeta Si – Një ngjarje tragjike ka ndodhur pasditen e kësaj të premteje në fshatin Labinot-Fushë të Elbasanit, ku dy të mitur kanë humbur jetën pasi u mbytën në rrjedhën e lumit Shkumbin.

Sipas informacioneve paraprake, fëmijët ndërsa ruanin bagëtitë së bashku me një familjare të tyre kishin hyrë në ujë për t’u larë, por rrjedha e fortë dhe mungesa e sigurisë bënë që ata të mos arrinin të dilnin më në breg.

Banorë të zonës dhe forcat e emergjencës që mbërritën aty u përpoqën t’i ndihmonin, por fatkeqësisht, trupat e pajetë të të miturve u gjetën pak më vonë në një kanal të lumit më poshtë.

Ngjarja ka tronditur gjithë zonën, ndërsa familjarët ndodhen në gjendje të rënduar psikologjike të afërm e bashkëfshatarë të viktomave .

Autoritetet kanë nisur hetimet për të zbardhur rrethanat e plota të kësaj tragjedie. Praprakisht raportohet se viktimat ja vëllezër 8 dhe 10 vjeç.

The post Elbasan / U futën për t’u larë, mbyten 2 vëllezër të mitur në lumin Shkumbin appeared first on Gazeta Si.

Gazeta Si – Ish-presidenti brazilian Jair Bolsonaro, i cili është në gjyq për një grusht shteti të tentuar, do të detyrohet të mbajë një byzylyk elektronik në kyçin e këmbës dhe të jetë nën “arrest shtëpiak” gjatë natës (nga ora 19:00 deri në orën 07:00) dhe në fundjavë.

Masa u vendos me anë të një urdhri nga Alexandre de Moraes, një anëtar i Gjykatës Supreme të Brazilit, i cili po gjykon Bolsonaron për rolin e tij të mundshëm në përpjekjen e dyshuar të ish-qeverisë për të parandaluar inaugurimin e Presidentit aktual Luiz Inácio Lula da Silva dhe për të ruajtur pushtetin e tij.

Të premten në mëngjes, Policia Federale mbërriti në shtëpinë e tij në Brasilia, kryeqytetin e vendit, për të aplikuar pajisjen dhe për të kryer një kontroll.

Përveç byzylykut dhe kërkesës për të qëndruar në shtëpi natën, Bolsonaro do të duhet të zbatojë një sërë kufizimesh: ai nuk do të jetë në gjendje të komunikojë me ambasadorë dhe diplomatë të huaj ose të afrohet në ndonjë ambasadë, të përdorë mediat sociale ose të mbajë kontakt me të dyshuar të tjerë, përfshirë djalin e tij Eduardo Bolsonaro, një kongresmen, i cili aktualisht ndodhet në Shtetet e Bashkuara.

Vendimi vjen në mes të tensioneve të larta politike dhe gjyqësore dhe kryesisht synon të parandalojë Bolsonaron që të kërkojë azil politik jashtë vendit.

Kjo mundësi ka qarkulluar për disa javë dhe fitoi terren të mëtejshëm të enjten, kur Presidenti i SHBA-së Donald Trump bëri thirrje publikisht për t’i dhënë fund gjyqit kundër tij, duke e quajtur atë përndjekje politike.

Javën e kaluar, Trump lëshoi një letër drejtuar qeverisë braziliane, duke kërcënuar në thelb të vendosë tarifa prej 50% për mallrat braziliane nëse gjyqi kundër Bolsonaros nuk ndërpritet.

The post Ish-presidenti brazilian, Jair Bolsonaro do të mbajë byzylyk elektronik gjatë gjyqit të tij appeared first on Gazeta Si.

Gazeta Si – Një shpërthim i fuqishëm ka tronditur mëngjesin e sotëm një qendër trajnimi të Departamentit të Sherifit të Qarkut të Los Anxhelesit, duke shkaktuar vdekjen e të paktën tre personave, sipas raportimeve paraprake.

Ngjarja ndodhi rreth orës 07:30 me orën lokale (15:30 BST), ndërsa shkaqet e shpërthimit mbeten ende të paqarta. Autoritetet kanë nisur hetimet dhe vendi i ngjarjes është rrethuar nga forcat e sigurisë.

Prokurorja e Përgjithshme e SHBA-së, Pam Bondi, ka konfirmuar përmes një postimi në platformën X (ish-Twitter) se agjentët federalë dhe ekipet e FBI-së janë të pranishëm në vendngjarje dhe po ofrojnë mbështetje të plotë për autoritetet lokale.

“Agjentët tanë federalë janë në vendngjarje dhe po punojmë për të mësuar më shumë. Ju lutemi lutuni për familjet e zëvendësve të sherifit të vrarë”, shkruan Bondi.

Ajo gjithashtu bëri të ditur se ka komunikuar me Prokurorin e SHBA-së për Kaliforninë dhe me Sherifin e Qarkut të Los Anxhelosit, Robert Luna, për të koordinuar reagimin institucional ndaj ngjarjes së rëndë.

The post Shpërthim në qendrën e trajnimit të policisë në Los Anxheles, vriten 3 oficerë appeared first on Gazeta Si.

Nga Gazeta Si – Ditën e sotme në Shtëpinë e futbollit, u hodh shorti për sezonin 2025-2026 në Kategorinë Superiore. Ashtu siç Gazeta Si raportoi më herët, siparin do ta ngrerë Finalja e sezonit të shkuar, me një ndryshim të vetëm – Vllaznia vs. Egnatia nuk do të luhet në “Aur Albania” por në “Loro Boriçi”. Ndërkohë më poshtë ju njohim me 14 sfidat më të rëndësishme të sezonit. Mes tyre ka ndeshje Derbi dhe Klasike:

Java 5 – 27.09.2025 Tirana – Dinamo
Java 6 – 04.10.2025 Partizani – Tirana
Java 8 – 25.10.2025 Vllaznia – Tirana
Java 9 – 29.10.2025 Dinamo – Partizani
Java 15 – 07.12.2025 Tirana – Partizani
Java 17 – 20.12.2025 Tirana – Vllaznia
Java 18 – 24.12.2025 Partizani – Dinamo
Java 23– 07.02.2026 Tirana – Dinamo
Java 24 – 15.02.2026 Partizani – Tirana
Java 26 – 28.02.2026 Vllaznia – Tirana
Java 27 – 08.03.2026 Dinamo – Partizani
Java 32 – 18.04.2026 Dinamo – Tirana
Java 33 – 26.04.2026 Tirana – Partizani
Java 36 – 10.05.2026 Partizani – Dinamo

The post Sfidat më të rëndësishme në Superiore 25/26 appeared first on Gazeta Si.

Gazeta Si – Anëtarja e pandehur e Komisionit të Prokurimeve Publike, Lindita Skeja, kishte garanci nga titullari i institucionit, gjithashtu nën akuzë, Jonaid Myzyri, se për firmat që do të vendoste në rastet e shqyrtimit të ankesave ndaj procedurave në tenderë, nuk do t’i hynte gjemb në këmbë.

Të paktën këtë siguri i shpreh nënës së saj në një bisedë telefonike të përgjuar nga SPAK për të gjetur prova të shkeljes së barazisë në tenderë.

“Ai na mbajti kështu, që krijuam besim që ne jemi miqtë e atij, edhe rrimë të qetë, Na ofroi mori informacionesh. Unë vajta dhe i shërbeva si qeni. I shërbeva me sy mbyllur”, thotë Lindita Skeja.

SPAK thotë se një pjesë e mirë e komunikimeve përgjuar zyrtares Lindita Skeja lidhen me akuzën për të cilën dyshohet Jonaid Myzyri, kreu i KPP-së, i marrë i pandehur për tenderin për mirëmbajtjen e aksit rrugor 58.7 km Shpal-Ura e Repsit me vlerë 2.29 milionë euro.

Zyrtarja e KPP-së, Lindita Skeja, nga sa flet me nënën në telefon, lë të kuptohet se ka vepruar me urdhër të titullarit të institucionit, dhe se drejtuesit e institucionit merrnin para në këmbim.

“E dua edhe pikë, e dua kështu, firmos ne, të gjithë si delet. Shkonim ku të na thërrisnin, rresht. Firmën ne, e lekët ata. Më çoi mua në KPP, përballem unë me lloj-lloj pisllëku” shprehet zyrtarja.

Gjatë bisedës së përgjuar për të zbuluar korrupsionin në zyrat e shtetit, SPAK ra në gjurmët e një grabitje në shtëpinë e Lindita Skejës në një fshat të Librazhdit, të 200 mijë eurove nga disa persona të maskuar, dhe marrjen peng të vëllait të saj që i pikasi, për disa momente, derisa të mos kishin rrezik se do të njoftonte policinë.

Për vjedhjen ajo flet me të ëmën dhe në këtë bisedë që gjendet në fashikullin e Myzyrit, duke u shprehur e bindur se ajo që ka ndodhur nuk lidhet me punën e saj

“Unë punë si gjithë dynjaja bëj, ika unë, vajtën të tjerët. A ka vajtur njeri t’i vjedhë tek shtëpia ata?”, thotë Lindita Skeja gjatë bisedës me nënën.

Kjo shumë e madhe në shtëpinë e saj, për të cilën hetuesit e SPAK janë duke kërkuar informacione nga policia e Librazhdit dhe Elbasanit nëse vjedhja e pretenduar në vitin 2020, është denoncuar apo jo, lë dyshime se paratë e korrupsionit mund të jenë shpërndarë mes anëtarëve të KPP-së.

Rasti i vjedhjes dhe rrëmbimit, përbën një episod të veçuar në hetimin e dyshimeve për korrupsion me prokurimet publike.

Marrë nga: “Shqiptarja.com”

The post Përgjimi i zyrtares që fundosi kreun e KPP, Jonaid Myzyri: I shërbeva si qeni! Ne firmosim, ata marrin lekët appeared first on Gazeta Si.

Nga Liridon Mulaj- Që nga hartat etnografike, të krijuara me materiale tekstile, tek dokumentarët e kohës së diktaturës e deri tek poezitë apo videoartet mbi Çamërinë dhe kujtesën, Vila 31 për të dytën herë brenda vitit shndërrohet në një galeri të artit pamor.

Nga një dhomë në tjetrën dhe nga një holl në tjetrin, teksa vila përshkohet nëpërmjet korridoreve të mëdha e me dritë të ish-vilës së diktatorit, të shfaqen instalacione dhe ekrane të mëdha që shfaqin video dhe zëra të cilët nëpërmjet imazhit audioviziv përpiqen të jenë pjesë integrale e ambienteve të asaj shtëpie, në të cilën për shumë vite me radhë, diktatori jetoi vitet kulminante të jetës dhe pushtetit të tij.

Ky fakt duket sikur te artistët krijon një lloj makthi psikologjik, sidomos tek artistët e rinj shqiptarë, të cilët edhe pse nuk e kanë jetuar atë kohë dhe dinë shumë pak për diktatorin, rrëfenjat e prindërve apo edhe gjyshëve ua kanë rrëfyer deri diku tmerrin e diktaturës.

Këtë fakt e cek edhe artisti shkodran Kajro Urovi, i cili studion fotografi në Londër. I lindur në Itali dhe i zhvendosur në Londër në moshën 14-vjeçare, ai thotë për GazetaSi.al se si reagoi gjyshja e tij shkodrane kur mori vesh se nipi i saj do të flinte në vilën e ish-diktatorit.

“Gjyshja u habit shumë kur i thashë se do të flija për tre muaj në shtëpinë e Enver Hoxhës. Ajo më ka rrëfyer herët historinë e saj personale në komunizëm. Por për kontekstin për të cilin unë gjendem këtu, gjërat janë paksa ndryshe sot.”

Urovi thotë se puna e tij artistike ka lidhje me objektet e gjetura përreth vilës nga kopshtari i saj në vitet e diktaturës. Diçka që e shtyu atë drejt njohjes së diktatorit në një kontekst tjetër, atë të kohës së tij.

“Objektet që unë kam ekspozuar janë disa objekte të cilat kopshtari që punonte këtu në vitet ’80 i ka gjetur në ambientet përreth dhe i ka ruajtur deri më sot. Në ekran mandej kam shfaqur intervistën e kopshtarit Bajram Hysaj, i cili rrëfen për kohën dhe vendin ku i gjeti objektet. E gjithashtu ai rrëfen për kohën kur punonte si kopshtar dhe ndante ditën e tij me familjen e diktatorit”, thotë Urovi.

Kajro, i cili jeton në dhomën ku dikur jetonte Nexhmije Hoxha, thotë se rrëfimi i kopshtarit ka qenë interesant, por dhe e kuriozonte për të kuptuar më mirë kontekstin e kohës kur vila ka qenë në funksion.

Por në vilë ka edhe punë artistike të cilat kërkojnë të rikthejnë sërish vëmendjen nga çështje të rëndësishme kombëtare, siç është edhe Çamëria, një çështje e pazgjidhur prej thuajse 80-vitesh. Artistja çame, Erdiola Kanda Mustafaj, e cila jetën e saj e ndan mes Italisë dhe Francës, thotë për GazetaSi.al se rikthimi te rrënjët nëpërmjet punës së saj me titull “Kthim nga Çamëria” dhe qasja të cilën ajo ka për vendlindjen e paraardhësve, vjen në një tjetër prizëm, në të cilin nuk është trajtuar më parë: nëpërmjet artit pamor, instalacionit, poezisë dhe dokumenteve që dëshmojnë për kohën.

“Pika e rëndësishme prej së cilës jam nisur është prejardhja ime çame. Unë e nisa këtë studim për të sjellë një narracion ndryshe, parë nga narracioni shqiptar por edhe ai grek, të cilin nuk kam arritur ta gjej, pra nuk ekziston. Unë besoj se nëpërmjet poezisë, për shembull, mund të krijosh një lidhje më të fortë dhe shpirtërore me kohë të largëta.

Duke qenë tashmë brezi i tretë i çamëve të shpërngulur, ajo nuk beson më në zgjidhjen e çështjes. Por beson se nëpërmjet artit pamor mund të sjellë më shumë dritë dhe një perspektivë të re.

“Unë i përkas brezit të tretë të çamëve të zhvendosur nga Çamëria. Historitë janë të largëta dhe, të jem e sinqertë, nuk besoj më se kjo çështje do të zgjidhet. Por besoj se mund të sjellim një dritë në tërë këtë histori. Unë besoj se arti pamor është një gjuhë e re të cilën ne po e mësojmë prej viteve të fundit, sidomos në Shqipëri. Është një instrument ose një tjetër gjuhë e cila ndihmon të risjellim kujtesën në fokus.”

Erdiola, e cila jetën e saj e ndan mes Francës dhe Italisë, thotë se është shumë e inspiruar nga jetesa në vilën e Enverit por dhe nga Shqipëria.

“Ndryshe nga vendet e tjera të Europës ku informacioni gjendet kollaj dhe kudo, në Shqipëri duhen kontakte dhe kjo është shumë interesante. Unë besoj se Shqipëria do të jetë tashmë një nga destinacionet e mia kryesore të aplikimit të artit tim, i cili ka si qëllim memorien dhe kujtesën kolektive. Historia shqiptare më nxit shumë mendim dhe reflektim”, përfundon Erdiola.

Në pritje të artistëve të rinj për një tjetër fazë krijimi dhe njohjeje me historinë e Vilës 31, por dhe të Shqipërisë në tërësi, shtëpia ku dikur jetonte Enver Hoxha duket sikur ngadalë po bie në hullinë e asaj që kryeministri Rama deklaroi në ceremoninë hapëse të rezidencës: “Se në këtë vilë do të bëjmë gjithçka të cilën diktatori nuk e bëri dot.”

Përtej fjalëve dhe premtimeve, në Vilën 31 sot bëhet art nga një brez i cili padyshim sjell për publikun shqiptar një qasje të re dhe një kontekst të ri të asaj çka mbetet nga kujtesa e trishtë e një vendi të vuajtur si Shqipëria.

The post Artistët e rinj u rikthehen ‘plagëve të vjetra’ përmes artit modern në vilën 31 appeared first on Gazeta Si.

Gazeta Si – Nxehtësia ekstreme e këtyre ditëve përfaqëson një rrezik serioz për shëndetin dhe, në organizmat më të brishtë, mund të çojë në pasoja të rënda.

Dy studime të botuara në  “Jama” dhe “Circulation”, konfirmojnë se valët ekstreme të nxehtësisë janë të lidhura me një rritje të vdekshmërisë nga shkaqe të ndryshme.

Nxehtësia ekstreme shkakton probleme shëndetësore kur ndryshon sistemin e rregullimit të temperaturës së trupit.

Normalisht, trupi ftohet duke djersitur, por në kushte të caktuara fizike dhe mjedisore kjo nuk është e mundur.

Nëse, për shembull, lagështia është shumë e lartë, djersa nuk avullohet shpejt dhe nxehtësia e trupit nuk eliminohet në mënyrë efektive.

Prandaj, temperatura e trupit rritet me shpejtësi dhe mund të dëmtojë disa organe jetësore, përfshirë trurin.

Në raste më pak serioze, të cilat zakonisht përfshijnë subjekte të shëndetshme, ekspozimi i zgjatur ndaj temperaturave të larta mund të shkaktojë çrregullime të lehta, të tilla si dhimbje barku, të fikët, edemë, por edhe gjendje më serioze si bllokim, goditje nga nxehtësia, dehidratim.

Kushtet ekstreme të nxehtësisë, nga ana tjetër, mund të përkeqësojnë gjendjen shëndetësore të njerëzve me sëmundje kronike para-ekzistuese, të tilla si sëmundjet kardiovaskulare dhe cerebrovaskulare, sëmundjet kronike të mushkërive, çrregullimet mendore, sëmundjet e sistemit nervor qendror, sëmundjet e mëlçisë dhe veshkave dhe sëmundjet metabolike (p.sh. diabeti), të cilat rrisin ndjeshëm rrezikun e vdekjes gjatë valëve të të nxehtit, veçanërisht tek të moshuarit.

Sëmundje të tjera kronike që dëmtojnë mekanizmin e termo-rregullimit mund të rrisin rrezikun gjatë periudhave të temperaturave të larta: për shembull, skleroderma, në të cilën djersitja bllokohet për shkak të hollimit të epidermës, dhe fibroza cistike, në të cilën djersitja e tepërt mund të shkaktojë dehidratim dhe dështim të qarkullimit të gjakut.

Goditja nga dielli

Një rritje e temperaturës së trupit për shkak të kapacitetit të pamjaftueshëm të termorregullimit mund të shkaktojë goditje nga dielli, e cila ndodh për shkak të ekspozimit të zgjatur ndaj rrezatimit diellor, veçanërisht në ditët shumë të nxehta të verës pa erë dhe në rastin e rrezatimit intensiv diellor. Mund të shfaqen eritema ose djegie, të shoqëruara ose jo nga simptomat e goditjes nga nxehtësia.

Dehidratimi

Një nga shkaqet e sëmundjeve edhe më serioze është dehidratimi, i shkaktuar nga një humbje uji nga trupi më e madhe se ajo e futur. Trupi dehidratohet dhe fillon të funksionojë dobët kur:

– kërkohet një sasi më e madhe uji, si në rastin e temperaturave të larta të mjedisit për shkak të djersitjes

– humbasin shumë lëngje, si në rastin e etheve, të vjellave dhe diarresë

– një person nuk merr vullnetarisht ujë të mjaftueshëm në mungesë të stimulimit të etjes në rastin e marrjes së ilaçeve që mund të nxisin eliminimin e lëngjeve (për shembull diuretikë, laksativë).

Simptomat kryesore janë etja, dobësia, marramendja, palpitacionet, ankthi, lëkura dhe mukozat e thata, ngërçet muskulore, presioni i ulët i gjakut.

Tension i ulët i gjakut

Njerëzit me hipertension dhe sëmundje të zemrës, veçanërisht nëse janë të moshuar, por edhe shumë njerëz të shëndetshëm, mund të përjetojnë episode të uljes së tensionit të gjakut, veçanërisht kur kalojnë nga një pozicion shtrirë në një pozicion në këmbë. Në këto raste, këshillohet që:

– të shmangni kalimin e menjëhershëm nga një pozicion horizontal në një pozicion vertikal, i cili gjithashtu mund të shkaktojë humbje të vetëdijes

– të mos ngriheni papritur nga shtrati, veçanërisht natën, por të ndaloni në pozicione të ndërmjetme (për shembull: të uleni në buzë të shtratit për disa minuta) para se të ngriheni.

Stresi nga nxehtësia

Ekziston gjithashtu stresi nga nxehtësia, i shkaktuar nga një shembje e enëve periferike me një furnizim të pamjaftueshëm të gjakut në tru.

Simptomat mund të shfaqen gjatë aktivitetit fizik në një mjedis tepër të nxehtë, veçanërisht tek subjektet jo të aklimatizuara, me efikasitet të reduktuar kardiak (kompensim i pamjaftueshëm në rast të vazodilatacionit të përhapur periferik) për shkak të një vëllimi të zvogëluar të gjakut për shkak të dehidratimit.

Manifestohet me djersitje të madhe, një ndjenjë të lehtë çorientimi, keqtrajtim të përgjithshëm, dobësi, të përziera, të vjella, dhimbje koke, takikardi dhe hipotension oliguri (ulje e prodhimit të urinës), konfuzion, nervozizëm. Nëse nuk diagnostikohet dhe trajtohet menjëherë, mund të përparojë në goditje nga nxehtësia.

Goditja nga nxehtësia

Goditja nga nxehtësia ndodh kur aftësia fiziologjike për të rregulluar temperaturën është e kompromentuar dhe manifestohet me një gamë të gjerë shenjash dhe simptomash në varësi të ashpërsisë së gjendjes.

Mund të ndodhë kur ekspozoheni ndaj një temperature shumë të lartë, të shoqëruar me lagështi të lartë dhe mungesë ventilimi.

Mund të ndodhë jashtë, në një mjedis të mbyllur ose në një vend ku dielli nuk shkëlqen drejtpërdrejt. Simptoma e parë është një gjendje e keqe e përgjithshme e papritur, e ndjekur nga dhimbje koke, të përziera, të vjella dhe një ndjenjë marramendjeje, deri në gjendje ankthi dhe konfuzioni.

Mund të humbni vetëdijen. Temperatura e trupit rritet me shpejtësi (në 10-15 minuta) deri në 40-41° C dhe pasohet nga një mosfunksionim i mundshëm i organeve të brendshme, i cili mund të çojë në vdekje.

Përshtati: Gazeta “Si”

The post Pse njerëzit vdesin nga nxehtësia dhe ç’ndodh kur ndryshon temperatura e trupit? appeared first on Gazeta Si.

Gazeta Si – Efekti i Shqipërisë, për sa i përket turizmit në plazh, duket se po zbehet. Ose më saktë, nuk tërheq më segmentin e turistëve italianë të cilët, gjatë tre viteve të fundit, e kanë gjetur të përshtatshme të kalojnë pushimet në anën tjetër të Adriatikut.

“Në të vërtetë, – shpjegon Michele Viola, pronar i operatorit turistik ‘Goodays’, – ne kemi vënë re tashmë një rënie fillestare në fund të sezonit të verës së kaluar. Ky trend është përsëritur ndjeshëm në vitin 2025: pak njerëz po telefonojnë për të rezervuar bregdetin shqiptar; grupet preferojnë të zgjedhin mundësi të tjera”.

Shifrat, të paktën ato nga agjencia me seli në Bari, tregojnë një rënie krahasuar me tre vjet më parë, kur “italianët që vizitojnë bregdetin shqiptar u rritën me 30 përqind falë një fluksi të konsiderueshëm të nxitur nga përballueshmëria e çmimeve dhe bukuria e rajonit”.

“Duhet të jemi të qartë, – vazhdon Viola, – dhe të shpjegojmë se të ardhurat e familjeve italiane janë vazhdimisht në rënie dhe të shkuarit me pushime është një problem. Pra, ndërsa Shqipëria ofronte një raport të përshtatshëm kosto-përfitim, kombinimi nuk funksionon më. Rezervimet janë shumë më poshtë gjysmës së asaj që ishin tre vjet më parë”, – tha ai për “Corriere della Sera”.

Duke parë këtë rënie, Viola, thekson se turistët kanë nisur të zgjedhin lokacionet e tyre turistike në bregdetin e Puljias.

“Agjencia jonë po ecën mirë me ture të organizuara, nga Egjipti në Dubai e deri në Spanjë. Qarkullimi i përgjithshëm është rritur falë këtij specializimi. Tendenca midis atyre që nuk udhëtojnë jashtë vendit është të qëndrojnë në Puglia, ndoshta duke përfituar nga fundjavat në vendpushimet bregdetare, duke u mbështetur në hotele me mëngjes”.

“Shqipëria, – thotë Massimo Salomone, koordinator i seksionit të turizmit të Confindustria Puglia dhe president i Seksionit të Turizmit të Confindustria Bari dhe BAT, – sigurisht që është rritur si destinacion, i mbështetur nga investimet e shpejta në infrastrukturë dhe burokracia e përmirësuar, por ekuacioni me turizmin me kosto të ulët është shpesh mashtrues. Ka aspekte të destinacionit shqiptar, të tilla si shërbimet, transparenca e çmimeve dhe cilësia e ofertave turistike, që meritojnë kujdes absolut, siç theksohet nga disa dëshmi pushuesish. Qëllimi ynë nuk është të rrisim konkurrencën, por më tepër të ndërtojmë një sinergji pozitive. Puglia dhe Shqipëria ndajnë Detin Adriatik dhe një trashëgimi kulturore historike që mund të bëhet forca lëvizëse për projekte të integruara, si në aspektin e turizmit ashtu edhe të infrastrukturës”.

Megjithatë, sipas Salomones, “është e rëndësishme të sqarohet se Italia (dhe Puglia në veçanti) mbetet një destinacion shumë i popullarizuar për turistët italianë”.

Në fund të fundit, ekziston një problem i rritjes së kostove që po ndikon në klasën e mesme, ku ndryshe nga vendet e tjera turistike në Ballkan, duket se vetëm Greqia po ia del mbanë.

“Segmenti i klientëve që janë të gatshëm të tolerojnë shërbim më pak efikas për një çmim të përgjithshëm më të ulët, – përfundon Piero Innocenti, zëvendëspresident i Fiavet Puglia, – me sa duket nuk gjen më stimujt e duhur, sepse presin kursime më të konsiderueshme. Me sa duket, tarifat në Shqipëri janë rritur dhe kjo është dekurajuese. Kjo vlen edhe për destinacione të tjera, si Kroacia dhe Mali i Zi, ndërsa Greqia po ia del mbanë. Segmenti i kroçerave po performon gjithashtu mirë në shtator dhe tetor. Po Puglia? Sektori po vazhdon trendin e tij si vitin e kaluar dhe prania e lidhjeve ajrore me jashtë po lejon rritjen e vazhdueshme”.

Përshtati: Gazeta “Si”

The post Rritja e çmimeve ‘largon’ turistët italianë nga Shqipëria, pushuesit po tërhiqen (dhe tani po zgjedhin Puglian) appeared first on Gazeta Si.

Nga Gazeta Si- Parku Kombëtar i Lurës prej 3 ditësh është nën pushtimin e flakëve, ku zjarri ka djegur sipërfaqe të konsiderueshme.

Ministria e Mbrojtjes tregon se në zonën e quajtur “Liqeni i Luleve”, pjesë e Parkut të Lurës, dy vatra janë ende aktive, njëra në krahun e Gurë Lurës, dhe zona tjetër afër kanalit të ujit të HEC-it, e cila konsiderohet e izoluar dhe është nën monitorim.

Ndërkohë 3 vatra të tjera zjarri janë ende aktive, nga 24 të regjistruara në 24 orët e fundit. Në Bulqizë, në zonën e “Malit të Peladhisë”, vijon puna për shuarjen e një vatre të riaktivizuar. Deri tani janë përfshirë rreth 32 hektarë me shkurre dhe barishte. Zjarri është aktiv vetëm në një vatër mbi fshatin Vlash.

Në Fier, në zonën Drenovë–Gorishovë, vatra e zjarrit vijon të jetë aktive, ku për shkak të terrenit të thyer dhe përhapjes së shpejtë të flakëve, kontrolli i situatës ka qenë i vështirë.

Në Himarë, në fshatin Borsh, ka rënë zjarr në një sipërfaqe pyjore.

Si pasojë e zjarreve janë djegur mbi 154 hektarë me shkurre dhe bimësi, si dhe më shumë se 3,000 rrënjë ullinj.

Instituti i Gjeoshkencave njofton se nuk priten reshje, ndërsa rreziku për zjarre mbetet i lartë në qarqet Tiranë, Elbasan, Fier, Berat, Korçë dhe Gjirokastër. 

The post Parku i Lurës vijon në flakë prej disa ditësh, 3 vatra të tjera aktive në Himarë, Fier dhe Bulqizë appeared first on Gazeta Si.

Gazeta Si – Dy persona janë arrestuar pasi janë kapur në flagrancë duke ndërtuar një objekt dy katësh pa leje në zonën e “Kodrës së Diellit” në Tiranë.

Policiatha se në pranga kanë rënë inxhinieri N.V., 37 vjeç dhe punonjësi i ndërtimit A.D., 28 vjeç.

Policia shpalli në kërkim pronarin S.I 37 vjeç për llogari të të cilit po ndërtohej objekti ndërsa procedoi penalisht babain e tij i cili po ndiqte punimet.

Aksioni është zhvilluar në kuadër të operacionit të nisur në shkallë vendi për lirimin e hapësirave publike të zaptuara dhe kundër ndërtimeve pa leje. Materialet procedurale iu referuan Prokurorisë së Tiranës, për veprime të mëtejshme

The post Ndërtim pa leje te ‘Kodra e Diellit’, arrestohet inxhinieri dhe punëtori (video) appeared first on Gazeta Si.

Nga Gazeta Si- Duke folur për zhvillimet teknologjike, kryeministri Edi Rama tha se shumë shpejt, inteligjenca artificiale mund të bëhet anëtari më efikas i bordit qeverisës.

“Shumë shpejt AI mund të bëhet anëtari më efikas i bordit, shumë shpejt mund të vijë dita që qeverinë mund ta kesh AI, ministrin “X” e ke AI, nuk ka as kushëri për të fut në punë, as interesa të prishë proceset dhe nuk po them që është synimi ynë, megjithëse me shumë kënaqësi mund të merrej përsipër”, u shpreh Rama.

Në takimin me përfaqësues të teknologjisë në Berat, Rama solli në vëmendje rastin e Emirateve të Bashkuara Arabe, ku një vëzhgues i krijuar përmes Inteligjencës Artificiale merr pjesë në mbledhjet e bordit dhe ndërhyn me këshillime.

“Ishim me përfaqësuesit e delegacionit të Emirateve të Bashkuara dhe pashë që mbledhjet e bordit të tyre bëheshin me praninë e një vëzhguesi Inteligjencë Artificiale. Dhe vëzhguesi IA ishte pjesë e bordit dhe pasi flisnin, ai mbante gjithë shënimet, prodhonte protokollin, dhe jepte opinion mbi çfarë u tha duke ju referuar gjërave që ata i kanë bërë përpara dhe mund t’i kishin harruar në atë diskutim, ose duke ju referuar gjërave që kishin thënë se do t’i mbanin parasysh me temën”, tha Rama.

The post ‘Do vijë dita që të kemi ministër AI’/ Rama: Nuk ka as kushëri për të futur në punë, as interesa appeared first on Gazeta Si.

Netflix thotë se ka përdorur efekte vizuale të krijuara nga inteligjenca artificiale gjeneruese (IA) në një nga serialet e tij origjinale televizive për herë të parë.

Bashkëdrejtori ekzekutiv i gjigantit të transmetimit, Ted Sarandos, tha se IA u përdor për të krijuar një skenë të një ndërtese që shembej në serialin argjentinas të fantastiko-shkencor, The Eternauts.

Ai tha se teknologjia i lejoi ekipit të prodhimit të përfundonte sekuencat më shpejt dhe me një kosto më të ulët.

Përdorimi i IA-së është i diskutueshëm në industrinë e argëtimit për shkak të shqetësimeve se krijon përmbajtje duke përdorur punën e të tjerëve pa pëlqimin e tyre dhe frikës se do të zëvendësojë punën e njerëzve.

Sarandos i bëri komentet e tij ndërsa Netflix njoftoi një rritje prej 16% të të ardhurave për tre muaj deri në fund të qershorit krahasuar me të njëjtën periudhë të vitit të kaluar.

Firma e transmetimit tha se performanca më e mirë se sa pritej u rrit nga suksesi i serisë së tretë dhe të fundit të ‘Squid Game’, i cili deri më tani ka tërhequr 122 milionë shikime.

I pyetur në lidhje me përdorimin e inteligjencës artificiale nga Netflix, Sarandos tha se teknologjia u ka lejuar produksioneve me buxhete më të vogla të përdorin efekte vizuale të përparuara.

Inteligjenca artificiale e përdorur në ‘The Eternauts’ ndihmoi ekipin e prodhimit të përfundonte një sekuencë që tregon shembjen e një ndërtese në Buenos Aires 10 herë më shpejt sesa nëse do të kishin përdorur mjete tradicionale të efekteve speciale.

“Kostoja thjesht nuk do të kishte qenë e realizueshme për një shfaqje me atë buxhet”.

The post Netflix përdor efektet e inteligjencës artificiale për herë të parë për të ulur kostot appeared first on Gazeta Si.

Gazeta Si – Një 23-vjeçar shqiptar u arratis të enjten në mëngjes, më 17 korrik, gjatë transportit të të burgosurve në qytetin Baden të kantonit Aargau, në Gjermani.

Pavarësisht një operacioni të menjëhershëm të kërkimit, ku u angazhuan dhe qentë e njësive speciale, ai vazhdon të jetë në arrati.

Media gjermane Badener Tagblatt shkruan se shqiptari 23-vjeçar kishte veshur pantallona të zeza, një xhaketë të zezë me mëngë me motive të bardha dhe këpucë të bardha.

Në momentin e arratisjes, ai i kishte ende prangat në duar. Sipas Policisë së kantonit të Aargaut, i arratisuri nuk përbën rrezik për publikun.

Policia gjermane ka publikuar një foto të tij, por nuk ka bërë të ditur identitetin. 23-vjeçari nga Shqipëria ka qenë i veshur me pantallona të zeza, xhaketë të zezë dhe këpucë të bardha.

Pavarësisht se nisi menjëherë një kërkim për gjetjen e tij fill pas arratisjes, nuk u bë e mundur gjetja e shqiptarit.

Sipas policisë gjermane, 23-vjeçari është i dënuar nga një gjykatë e shkallës së parë për krime kundër pronës, por vendimi nuk është i formës së prerë.

Policia gjermane, në thirrjen që u ka bërë qytetarëve që të denoncojnë nëse pikasin shqiptarin, nuk e konsideron atë një person të rrezikshëm.

The post Gjermani, 23-vjeçari shqiptar arratiset gjatë transportit të të burgosurve appeared first on Gazeta Si.

Pas më shumë se 3 muajve nga Finalja e sezonit të shkuar, Vllaznia dhe Egnatia do të përballen sërish, këtë herë në “Loro Borici” për siparin e sezonit të ri në Kategorinë Superiore. Ky ishte verdikti i shortit të hedhur në Shtëpinë e Futbollit në Kryeqytet. Në të vërtetë, sezoni i kampionëve dhe nënkampionëve ka filluar përpara 23 Gushtit, pasi dy skuadrat më të mira në futbollin shqiptar luajtën sfidat e para në Kupat e Evropës. Egnatia u eleminua nga UEFA Champions League dhe do të vazhdojë të luajë në Conference League. Ndërsa Vllaznia u kualifikua në raundin e dytë të Conference League. Sa i përket klaendarit të plotë në javën e parë të Superiore 25/26 ai është si më poshtë:

The post Fillon Superiore 25/26, FSHF përcaktoi shortin! appeared first on Gazeta Si.

Nga Gazeta Si- Nga Berati ku zhvilloi një takim me përfaqësues të teknologjisë, inovacionit, start up-eve, kryeministri Edi Rama propozoi ngritjen e një Këshilli ose Forumi ku të mblidhen 3 herë në vit për të diskutuar.

“Ja vlen të kemi një Këshill, një forum, ku të mblidhemi të paktën 3 herë në vit për të diskutuar mbi çështjet dhe të rejat, qoftë për mirë qoftë për keq, të katërmujorit të mëparshëm, natyrisht nëse ju jeni dakord”, tha Rama.

Kryeministri theksoi se duhet të adresohen problematikat e botës së re të teknologjisë dhe të krijohet një urë komunikimi me komunitetin teknologjik, duke shtuar që edhe shteti të bëhet partner.

“Jam i bindur që nëse krijojmë një sinergji duke u përpjekur, duke vënë në dispozicion mjetet që kemi, patjetër që mund të krijojmë edhe më shumë hapësirë, brumë për të pjekur në këtë furrë të re”, tha Rama, duke shtuar se i ka kërkuar ministres për Sipërmarrjen që të organizojë shpesh takime dhe trajnime me to.

“Ne kemi filluar të kuptojmë se si mund të bëhemi partnerë të drejtpërdrejtë me ju”, theksoi Rama.

Në fokus të diskutimit ishte edhe siguria kibernetike. Ndërsa tha se tashmë Shqipëria është e pavarur në sektorin e shërbimeve digjitale, Rama theksoi nevojën për rritjen e ndërgjegjësimit në sektorin privat.

“Kemi cloudin tonë në shërbimet tona digjitale, jemi të pavarur. Por jam i vetëdijshëm sa boshllëqe kemi, sidomos në sektorin privat ku ka mangësi të mëdha informuese dhe vetëdijes se çfarë mund të vijë nga ekspozimi ndaj sulmeve kibernetike. Po forcojmë mbrojtjen tonë në sektorin publik, jemi të shqetësuar që sektorin provat nuk po ecën me të njëjtin ritëm. Mund të jemi një ofertë për sektorin provat duke parasysh parasysh talentet që keni arritur të mblidhni”, tha Rama.

The post Rama me përfaqësues të start up-eve: Të ngremë një Këshill dhe të mblidhemi 3 herë në vit, dua të jemi partnerë appeared first on Gazeta Si.

Gazeta Si – Një raport i ri i inteligjencës amerikane ka arritur në përfundimin se centrali bërthamor iranian në Fordow u dëmtua rëndë dhe potencialisht u shkatërrua nga bombardimet amerikane në fund të qershorit, ndërsa dy centralet e tjera të goditura, në Isfahan dhe Natanz, pësuan dëme më pak të rënda.

Raporti sugjeron se bombardimet ka të ngjarë të kenë zvogëluar aftësinë e Iranit për të prodhuar një armë bërthamore, duke e kthyer programin e tij bërthamor me vite prapa.

Megjithatë, mbeten shumë pyetje në lidhje me shkallën e plotë të dëmit dhe ndikimin e tij në programin e tij bërthamor.

Menjëherë pas bombardimeve, presidenti Donald Trump dhe disa anëtarë të administratës së tij lëshuan deklarata propagandistike, të tilla si duke thënë se aftësitë bërthamore të Iranit ishin “shkatërruar plotësisht”.

Disa raporte mbi këtë çështje u botuan më pas nga agjencitë e inteligjencës amerikane dhe izraelite dhe Agjencia e Energjisë Atomike e OKB-së (IAEA), të cilat përmbajnë disa informacione kontradiktore. Irani, megjithatë, ka mbetur shumë sekret për këtë çështje.

Prandaj, është ende e paqartë se sa shpejt Irani mund ta rifillojë programin e tij bërthamor, nëse do të donte, dhe sa shumë është ngadalësuar ai.

Sipas shumë ekspertëve, bombardimet kanë dëmtuar ndjeshëm aftësitë e tij bërthamore, por nuk i kanë eliminuar ato plotësisht, siç do të dëshironin Shtetet e Bashkuara dhe Izraeli.

The post Raporti i ri amerikan: Sulmet në Iran dëmtuan rëndë uzinën bërthamore në Fordow appeared first on Gazeta Si.

I quajtur çiklisti më i mirë i të gjitha kohërave nga Lance Armstrong (ish fitues në Tour), slloveni Pogačar fitoi etapën e 12 në “Tour 2025”, e 3 në këtë edicion që e ndihmon atë të marrë kontrollin e Bluzës së Verdhë në Klasifikimin e Përgjithshëm. Tre herë fituesi i “Tour de Francë” që kërkon triumfin e 4 rradhazi, arriti në kuotën e 20 fitoreve, duke barazuar Nicolas Frantz në Klasifikimin e të gjitha kohërave.

• Fitore në historinë e “Tour de France”
  35 – Mark Cavendish (GBR)
  34 – Eddy Merckx (BEL)
  28 – Bernard Hinault (FRA)
  25 – André Leducq (FRA)
  22 – André Darrigade (FRA)
  20 – Nicolas Frantz (LUX), Tadej Pogačar (SLO)

The post Pogačar fiton etapën e 12 në ‘Tour 2025’ – e 20 në karrierën e sllovenit appeared first on Gazeta Si.

Nga Gazeta Si- “Harkëtarët”, një serial radiofonik i BBC-së rreth jetës rurale angleze, arrin më shumë se 4 milionë dëgjues në një javë normale. Këtë verë, grupi me të njëjtin emër po shqyrtonte mundësinë e një vizite në Shqipëri. Deri vonë, vendi konsiderohej i rrezikshëm. Udhëtimi i mundshëm i “Harkëtarëve” pasqyron transformimin e Shqipërisë në një destinacion turistik kryesor.

Në komunizëm, Shqipëria kishte rreth 5,000 turistë në vit. Tirana kishte dy hotele për të huajt dhe në restorantet jashtë qytetit, menuja mund të përbëhej nga një konservë me ton me një qepë të njomë.

Megjithatë, deri në vitin 2014, Shqipëria pati rreth 3.4 milionë vizitorë të huaj, dhe vitin e kaluar numri zyrtar arriti në 11 milionë. Por kjo shifër është mashtruese: shumë janë qytetarë të diasporës që kanë pasaporta të huaja. Ata vizitojnë vendin disa herë në vit dhe numërohen nga e para çdo herë. Megjithatë, është e qartë se turizmi po shpërthen.

Hotelet dhe komplekset e vilave po mbijnë si kërpudha përgjatë bregdetit. Një aeroport i ri do të hapet së shpejti për t’i shërbyer Vlorës, një destinacion jugor plazhi. Shqiptarët e diasporës mund të mos jenë turistë klasikë, por ata blejnë apartamente pushimi, shkojnë në plazh dhe hanë jashtë njësoj si kushdo tjetër.

Agjencitë e pronave reklamojnë në rusisht, italianët vijnë për shërbime të lira dentare, kosovarët tani ankohen se Turqia është më e lirë. Turizmi i tepërt po bëhet shqetësim, pasi vendpushimet dikur të vogla si Saranda dhe Ksamili po mbushen me njerëz. Hotelet, të cilave u mungon stafi i kualifikuar, po rekrutojnë filipinas.

Kjo valë ka nisur të krijojë edhe tensione për një pasuri të pakët: ujin. Në parim, Shqipëria ka mjaft burime ujore. Por pas një shekulli me investime të pamjaftueshme, qytetet e saj po përballen me mungesa.

Ndërkohë që ndërtimet përgjatë bregut shtohen me ritme të vrullshme, po vendosen tuba për të sjellë ujë nga zonat e brendshme. Banorët aty thonë se mezi kanë ujë për vete dhe për bujqësi; tani ai po kanalizohet për të mbushur pishinat e turistëve.

Një rast i bujshëm lidhet me planet për të devijuar ujin e lumit Shushicë drejt rajonit bregdetar të Himarës. Pjesa më e madhe e lumit ndodhet brenda një parku kombëtar.

Astrit Balilaj, kryeplaku i fshatit Kuç, një nga mbi 30 komunitetet që po protestojnë, thotë se lumi ka gjithnjë e më pak ujë për shkak të ndryshimeve klimatike. Ai shton se autoritetet lokale i kanë informuar instancat më të larta për shqetësimet, “por janë injoruar”.

Olsi Nika, drejtues i organizatës mjedisore EcoAlbania, paralajmëron se humbja e ujit do të dëmtonte ekosistemin lokal. Ai thekson gjithashtu se brenda parkut janë ndërtuar restorante turistike pa leje dhe se në afërsi ka rrjedhje nafte nga puse të amortizuar.

Vitin e kaluar, banorët e fshatit Dukat në jug të Vlorës bllokuan punimet për një projekt 9 milionë eurosh për devijimin e ujit drejt zonave turistike luksoze. Në mars, edhe fshatarët e Tragjasit fqinj u përleshën me policinë për të njëjtin projekt. Kryeministri Edi Rama deklaroi se ka ujë për të gjithë.

Por sipas Olsi Nikës, kjo do të ishte e vërtetë vetëm nëse shteti do të kishte planifikuar në mënyrë afatgjatë.

“Qeveria kujdeset vetëm për interesat e veta,” thotë Salibe Daupi, pronare restoranti lokal. “Ata duhet të kujdesen për ne.”

Edhe kufizimi i turizmit mund të nxisë zemërim. Javën e kaluar në Theth, një fshat malor në veri, protestuesit hodhën koktej Molotovi ndaj fadromave që po prishnin kabina të ndërtuara pa leje për turistët. Pronarët thonë se qeveria u kishte premtuar legalizimin e tyre.

Ndërkohë, Jared Kushner, dhëndri i Donald Trump-it, ka pasur më shumë fat me qeverinë shqiptare. Ai ka shprehur interes për të ndërtuar një resort në Zvërnec, një zonë e virgjër mes detit Adriatik dhe lagunës së Nartës, e njohur për kolonitë e flamingove.

Gjithashtu dëshiron të zhvillojë ishullin e Sazanit, 10 kilometra larg. Pak përpara betimit të Trump-it si president, qeveria shqiptare miratoi një plan fillestar që i hapte rrugë një investimi prej 1.4 miliardë eurosh në Sazan. Por Zvërneci ndodhet në një zonë të mbrojtur. EcoAlbania ka çuar në gjykatë qeverinë për një ligj të ri që lejon zhvillimet luksoze në këto zona të mbrojtura.

Nëse planet e tij ecin përpara, Kushner do të presë që qeveria të gjejë burime uji edhe për këto projekte. Nika thotë se të luftosh të pasurit dhe të fuqishmit në Shqipëri është dekurajuese, sepse zakonisht e marrin çfarë duan. Por shpresa, njësoj si uji, buron gjithmonë. Përveç në rastet kur devijohet.

Burimi: “The Economist”

The post The Economist: Fluksi i turistëve në Shqipëri po vë në provë një pasuri të pakët, ujin appeared first on Gazeta Si.

Gazeta Si – Sherri për shfrytëzimin e një hapësire në plazh në zonën e lagjes nr.3, dyshohet se është shkaku i plagosjes së dyfishtë me armë zjarri në Sarandë.

Sipas burimeve paraprake, bëhet me dije se dy të plagosurit nga Kamza, kishin në posedim një sipërfaqe tokë në Sarandë, përgjatë vijës bregdetare, ngjitur me pronën e dy vëllezërve që akuzohen si autorë të dyshuar të ngjarjes.

Sipas policisë, në pranga ka rënë njëri prej të plagosurve, Gëzim Hajdaraj, të cilit iu gjet një pistoletë pa leje.

Ndërsa në kërkim janë shpallur 4 persona të tjerë, dy prej tyre vëllezër, të identifikuar si, Erjon Canaj, 36 vjeç, Ramazan Canaj alias Zoto, 43 vjeç, Artan Murtaj dhe Klaus Jaçaj.

“Dyshohet se 43-vjeçari R. Z. ka hapur zjarr ndaj dy të rinjve nga Tirana, G. H., 33 vjeç, dhe E. L., 25 vjeç, të cilët u plagosën rëndë dhe ndodhen në Spitalin e Traumës në Tiranë. Personat në kërkim janë: R. Z., 43 vjeç, për “Vrasje në rrethana të tjera cilësuese”, e mbetur në tentativë, dhe bashkëpunëtorët E. C., 36 vjeç, A. M., 43 vjeç, dhe K. J., 31 vjeç, për “Përkrahje e autorit të krimit”, sqaron policia në njoftimin për shtyp.

Përplasja ka ndodhur rreth orës 15:00 të enjten e datës 17 korrik në një lokal, ku Ramazan Zoto ka qëlluar me armë ndaj Gëzim Hajdarajt, 33 vjeç dhe Ernest Lamajt, 25 vjeç, duke i lënë të dy të plagosur.

Hajdaraj dhe Lamaj u transportuan drejt spitalit të Traumës në Tiranë për të marrë ndihmë mjekësore. Policia e Sarandës akuzon Ramadan Zoton alias Ramadan Canaj si autor që tentoi të vriste me armë Lamën dhe Hajdarajn, duke i lënë të plagosur.

Për këtë arsye, ndaj tij është ngritur akuza e “vrasjes në rrethana të tjera cilësuese e mbetur në tentativë”. Ndërsa 3 të tjerët; Erjon Canaj, Artan Murtaj dhe Klaus Jaçaj akuzohen për përkrahje të autorit të krimit.

Gjatë hetimeve që policia po ushtronte për zbardhjen e ngjarjes, u krye edhe një kontroll në banesën e Gëzim Hajdarit, njërit prej të plagosurve, të cilit iu gjet një pistoletë pa leje duke sjellë edhe arrestimin në flagrancë aktualisht në spitalin e Traumës.

Në vendngjarje u sekuestruan, në cilësinë e provës materiale, 4 gëzhoja arme zjarri, një armë zjarri pistoletë tip “Beretta” dhe një krehër me 9 fishekë. Ndërkohë po vijon puna për kapjen e personave në kërkim

The post Sherri për shfrytëzimin e plazhit shkak për plagosjen e dyfishtë në Sarandë, 4 autorët në kërkim appeared first on Gazeta Si.