Për herë të parë në Shqipëri, teknologjia e dronëve po përdoret në bujqësi për luftimin e dëmtuesve dhe mbrojtjen e kulturave bujqësore.

Në Boshanj të  Maliqit ka nisur spërkatja e sipërfaqeve me misër përmes dronëve bujqësorë, pas konstatimit të pranisë së rrënjëngrënësit të misrit .

Rreth 100 hektarë me misër në zonat e prekura po trajtohen me dronë bujqësorë, një teknologji moderne që synon kufizimin e përhapjes së insektit dhe mbrojtjen e prodhimit.

Ndërhyrja është ndërmarrë nga Ministria e Bujqësisë dhe Zhvillimit Rural, Autoriteti Kombëtar i Veterinarisë dhe Mbrojtjes së Bimëve, në bashkëpunim me Bashkinë Maliq.

Fermerët thonë se dëmet nga ky dëmtues kanë qenë të ndjeshme këtë sezon dhe shpresojnë që ndërhyrjet të japin rezultat, duke shmangur përsëritjen e situatës në vitet e ardhshme.

Autoritetet bëjnë me dije se monitorimi do të vijojë edhe pwr  përfundimin e ciklit biologjik të karkalecit, ndërsa ndërhyrjet do të kryhen menjëherë në rast të shfaqjes së vatrave të reja.

Kostot e këtij shërbimi janë plotësisht të mbuluara, ndërsa monitorimi dhe masat mbrojtëse do të vijojnë edhe në ditët në vazhdim për të garantuar mbrojtjen e kulturave të misrit dhe mbështetjen e fermerëve.  / ABCNEWS.AL /

Një sulm amerikan ka dëmtuar rëndë një impiant për filtrimin e ujit të detit në fshatin Bunji, në qarkun Jask të provincës Hormozgan në Iran, duke ndërprerë furnizimin me ujë të pijshëm për mijëra banorë.

Sipas Hamzeh Pour, drejtuesit të kompanisë së ujësjellësit dhe kanalizimeve në Hormozgan, sulmi ka shkaktuar ndërprerjen e plotë të furnizimit me ujë për 20 fshatra, ku jetojnë rreth 10 mijë persona.

Ai deklaroi se nga sulmi u dëmtuan stacioni i pompimit që merrte ujë nga deti, si dhe një transformator energjie që shërbente për funksionimin e impiantit të shkripëzimit. Për pasojë, procesi i prodhimit dhe shpërndarjes së ujit të pijshëm është bllokuar.

Zyrtari iranian i cilësoi sulmet amerikane si “akte kriminale dhe terroriste”, duke akuzuar Washingtonin se ka goditur infrastrukturë jetike për popullsinë civile.

Ndërkohë, ambasadori i përhershëm i Iranit në Kombet e Bashkuara, Amir-Saeid Iravani, ka dërguar një letër te sekretari i përgjithshëm i OKB-së, Antonio Guterres, ku ka dënuar sulmet amerikane ndaj objekteve civile iraniane.

Në letër, Iravani deklaroi se sulmet amerikane kanë shkaktuar dëme të mëdha në porte, rrjete transporti, objekte komunikimi, qendra logjistike, instalime radarësh, sisteme të mbrojtjes bregdetare dhe infrastruktura të tjera të domosdoshme për jetën civile dhe ekonominë kombëtare.

Sipas tij, Shtetet e Bashkuara mbajnë “përgjegjësi të plotë ndërkombëtare” për viktimat, të plagosurit, dëmtimin e infrastrukturës jetike dhe pasojat mjedisore të shkaktuara nga sulmet.

“Vazhdimi i këtyre sulmeve të paligjshme përbën një kërcënim serioz për paqen dhe sigurinë ndërkombëtare, lirinë e lundrimit, stabilitetin rajonal dhe sigurinë e Gjirit Persik dhe ngushticës së Hormuzit”, u shpreh Iravani.

Sulmet vijnë në një periudhë të tensioneve të larta mes Iranit dhe Shteteve të Bashkuara, ndërsa infrastruktura civile dhe rrugët strategjike të energjisë në rajon janë kthyer në pika kyçe të përplasjes mes palëve.

Ministri i Brendshëm, Besfort Lamallari, ka paralajmëruar shtimin e kontrolleve në të gjithë vendin për ndotjen akustike, duke theksuar se zhurmat e tepërta nuk mund të cenojnë qetësinë e qytetarëve dhe turistëve.

Përmes një postimi në rrjetet sociale, Lamallari u shpreh se zhurma nuk është argëtim dhe se askush nuk ka të drejtë të shqetësojë komunitetin apo vizitorët me muzikë në volume të larta.

Sipas tij, Policia e Shtetit do të intensifikojë kontrollet në të gjithë territorin për të evidentuar çdo rast të ndotjes akustike dhe për të ndëshkuar shkelësit, në zbatim të legjislacionit në fuqi.

Ministri theksoi se çdo subjekt apo individ që shpërfill rregullat dhe vijon të krijojë shqetësime me muzikë në nivele të papranueshme do të përballet me masat e Policisë së Shtetit.

Në të njëjtën kohë, Lamallari u bëri thirrje qytetarëve të denoncojnë çdo rast të ndotjes akustike duke telefonuar në numrin 129, duke nënvizuar se bashkëpunimi i tyre është i rëndësishëm për garantimin e qetësisë publike, sidomos gjatë sezonit turistik.   / abcnews.al /

Lufta ndaj policëve që shkelin ligjin ka sjellë rezultate edhe gjatë gjysmës së parë të vitit 2026. Agjencia e Mbikëqyrjes Policore (AMP) ka publikuar bilancin e saj 6-mujor, ku rezulton se dhjetëra efektivë janë përballur me masa të rënda, nga përjashtimi nga Policia e deri te arrestimi dhe ndjekja penale.

Sipas raportit, nga janari deri në qershor janë përjashtuar nga radhët e Policisë së Shtetit 24 efektivë. Ndërkohë, 232 punonjës policie dhe dy punonjës të Gardës së Republikës janë referuar në Prokurori për vepra të ndryshme penale.

Goditjet nuk kanë mbetur vetëm te procedimet. Gjatë kësaj periudhe, AMP ka arrestuar në flagrancë nëntë punonjës policie, një gardist dhe një punonjës të Mbrojtjes nga Zjarri dhe Shpëtimit, të dyshuar për shkelje të ligjit gjatë ushtrimit të detyrës.

Raporti hedh dritë edhe mbi denoncimet e qytetarëve. Në gjashtë muaj, AMP ka marrë 752 ankesa, por pjesa më e madhe e tyre nuk janë konfirmuar pas verifikimeve. Konkretisht, 434 ankesa kanë rezultuar të pabazuara, ndërsa për 251 të tjera nuk janë gjetur prova të mjaftueshme.

Megjithatë, një pjesë e kallëzimeve kanë nxjerrë në pah shkelje të dyshuara. Si rezultat i tyre, AMP ka regjistruar 15 procedime penale, të cilat janë në proces hetimi.

Bilanci i publikuar tregon se kontrollet ndaj efektivëve të Policisë së Shtetit vijojnë me synimin për të larguar nga uniforma ata që abuzojnë me detyrën, ndërsa qytetarët mbeten një hallkë e rëndësishme përmes denoncimeve të rasteve të paligjshmërisë.

Kompania Trump Media & Technology Group (TMTG), e cila zotëron rrjetin social Truth Social, ka vendosur ta kthejë në biznes shpejtësinë me të cilën postimet e Donald Trump mund të ndikojnë në tregjet financiare.

Shërbimi i ri quhet Truth API dhe pritet të nisë më 1 gusht. Ai do t’u ofrojë bankave dhe kompanive të tregtimit algoritmik një mënyrë për të marrë njoftime më shpejt se përdoruesit e zakonshëm të platformës.

Ideja është që kompanitë financiare të kenë akses të menjëhershëm te postimet e Trump, pasi disa prej deklaratave të tij në Truth Social kanë shkaktuar më parë lëvizje të forta në bursat ndërkombëtare.

Sipas raportimeve, shërbimi do të kushtojë rreth 100 mijë dollarë në muaj dhe do të përfshijë 10 llogaritë më të ndjekura dhe më me ndikim në platformë. Mes tyre është edhe profili i vetë Donald Trump, por edhe llogaritë e djemve të tij, Donald Trump Jr. dhe Eric Trump, si dhe të disa mbështetësve të njohur.

Truth API do të përfshijë edhe një arkiv me postimet që nga viti 2022 dhe synon kompanitë që humbin para kur marrin informacion me vonesë. Për tregtarët algoritmikë, edhe disa milisekonda avantazh mund të sjellin fitime të mëdha.

TMTG thotë se disa kompani janë tashmë të interesuara për këtë shërbim, por nuk ka bërë publike emrat e tyre.

Postimet e Trump kanë ndikuar tregjet

Arsyeja pse ky shërbim mund të ketë kërkesë lidhet me ndikimin që postimet e Trump kanë pasur në tregjet financiare.

Një nga rastet më të njohura ndodhi më 9 prill 2025, kur bursat amerikane u rritën ndjeshëm pasi Trump njoftoi në Truth Social një pezullim 90-ditor të disa tarifave të reja tregtare.

Në atë moment, një postim i vetëm i presidentit pati ndikim më të madh se disa deklarata zyrtare nga institucionet ekonomike amerikane.

Debat për konflikt interesi

Shërbimi i ri ka hapur edhe debate për konflikt të mundshëm interesi.

Sipas dokumenteve zyrtare, Donald J. Trump Revocable Trust, i cili menaxhon pasuritë e presidentit dhe drejtohet nga djemtë e tij, zotëron rreth 41% të aksioneve të TMTG.

Kjo do të thotë se kompania që shet akses të privilegjuar te postimet e Trump kontrollohet pjesërisht nga familja e tij.

Kritikët argumentojnë se tregtarët që paguajnë për të marrë më shpejt informacionet që mund të ndikojnë bursat, po i sjellin gjithashtu të ardhura familjes Trump.

Senatori demokrat Ron Wyden e ka kritikuar nismën, duke thënë se ajo mund të përfitojë financiarisht familjen Trump dhe investitorët e mëdhenj që mund të paguajnë për këtë akses.

A është e ligjshme?

Ekspertët ligjorë thonë se, nga pikëpamja teknike, shërbimi mund të jetë i ligjshëm.

Sipas tyre, platformat teknologjike mund t’u ofrojnë disa klientëve akses më të shpejtë në informacion, edhe pse kjo krijon avantazh ndaj përdoruesve të tjerë.

Megjithatë, debati kryesor nuk lidhet aq me ligjin, por me mënyrën e biznesit dhe me pyetjen nëse është e drejtë që disa investitorë të kenë informacion më shpejt për shkak të mundësisë financiare.

Pse TMTG po kërkon burime të reja fitimi

Pas krijimit të Truth Social, kompania e Trump ka pasur vështirësi të konkurrojë me rrjetet e mëdha sociale dhe po kërkon mënyra të reja për të rritur të ardhurat.

Truth API shënon hyrjen e saj në tregun e shitjes së të dhënave financiare, një industri ku kompani si Bloomberg dhe Refinitiv kanë ndërtuar prej vitesh biznese të mëdha.

Por ndryshimi është se, ndërsa kompanitë tradicionale shesin informacione nga burime të pavarura, në rastin e Truth API burimi kryesor i informacionit është vetë Trump dhe rrethi i tij politik.

Kjo ka bërë që nisma të shihet si një model biznesi i pazakontë, ku ndikimi politik dhe interesat financiare ndërthuren drejtpërdrejt.

Pushues vendas dhe të huaj kanë zgjedhur Vlorën për pushimet e tyre verore. Ne  mesin e korrikut  numri I turisteve eshte rritur ndjeshem.

Shume prej tyre kane ardhur nga   Europa.    Deti eshte ai qe I terheq.

Gjithashtu shume  shqiptare qe jetojne jashte vendit  jane kthyer per te pushuar prane familjareve.

Harta e turisteve  qe  frekuentojne  Vloren kete vit eshte zgjeruar ndersa vizitoret nga Anglia dhe Suedia jane shtuar.

Ky qytet per ta eshte një nga destinacionet ideale per te kaluar pushimet.

Një sulm me dronë ukrainas ndaj një qendre logjistike në rajonin Tambov të Rusisë ka shkaktuar të paktën shtatë viktima dhe 24 të plagosur.

Dronët goditën gjatë natës një qendër logjistike të kompanisë Wildberries në qytetin Kotovsk, ku humbën jetën punonjës të turnit të natës. Kompania bëri të ditur se një tjetër qendër logjistike e saj, në Elektrostal të rajonit të Moskës, u sulmua gjithashtu

Autoritetet njoftuan se zjarri në objektin e Tambovit është vënë nën kontroll, ndërsa zjarrfikësit vijojnë punën për shuarjen e flakëve në zonën e Moskës.

Gjatë natës drejt rajonit të kryeqytetit rus u lëshuan mbi 370 dronë ukrainas. Pjesa me e madhe e tyre u neutralizuan nga sistemet e mbrojtjes ajrore, ndërsa 64 prej tyre u rrëzuan përpara se të afroheshin pranë Moskës.

Ukraina ka shtuar sulmet me dronë ndaj objektivave në territorin rus, duke i cilësuar ato si kundërpërgjigje ndaj bombardimeve të vazhdueshme ruse mbi qytetet ukrainase.

Ndërkohë, përpjekjet diplomatike të udhëhequra nga Shtetet e Bashkuara për t’i dhënë fund luftës duket se kanë ngecur muajt e fundit, ndërsa vëmendja e Washingtonit është përqendruar edhe te zhvillimet e konfliktit me Iranin.

Edhe pse i nxehti dhe mungesa e reshjeve  kanë përfshirë vendin përgjatë dy muajve të fundit niveli i ujit në Fierzë mbetet  mbi mesataren për periudhën e verës.Sipas të dhënave kuota rezulton  292,3 metra mbi nivelin e detit  edhe pse ka pësuar një ulje me rreth 4 metra ndërsa prurjet janë   120 metër kub ujë në sekondë. Nëse shohim historikun e nivelit të ujit në Fierzë nga të dhënat e Korporatës Elektroenergjitike Shqiptare  rezulton se janë të rralla nivele të tilla  për korrikun  duke siguruar prodhim të  pandërprerë të energjisë elektrike deri në sezonin e reshjeve të vjeshtës.

Liqeni i Fierzes, për më shumë se dy muaj ruajti të paprekur rezervën ujore dhe kuotën maksimale prej 296 metrash mbi nivelin e detit, një periudhë e pazakontë për periudhën e verës.

Ndërkohë,që  Shqipëria po zgjeron burimet alternative të prodhimit të energjisë. Aktualisht, rreth 10% e energjisë elektrike totale për të cilën ka nevojë vendi po  prodhohet nga parqet fotovoltaike, ndërsa objektivi është që deri në vitin 2030 më shumë se gjysma e prodhimit të energjisë të vijë nga burimet e rinovueshme.

Këto të dhëna janë optimiste në një kohë që ndodhemi në mesin e verës dhe  ka rritje të numrit të turistëve të cilët kanë sjellë një shtim të ndjeshëm të konsumit të energjisë elektrike në vend. Të dhënat e Operatorit të Sistemit të Shpërndarjes tregojnë se gjatë muajit qershor konsumi u rrit me rreth 13.9% krahasuar me të njëjtën periudhë të vitit të kaluar, ndërsa për gjashtëmujorin e parë të vitit rritja ka qenë rreth 10%.  / abcnews.al /

Nje operacion i organizuar dhe i koordinuar nga oficeret e Departamentit te Hetimit dhe Ndjekjes Penale te Krimeve ne Follorine ka cuar ne arrestimin e nje shtetasi shqiptar, 68 vjec, i dyshuar per trafikim te nje sasie te madhe lende narkotike.

Sipas autoriteteve greke, pas shfrytezimit te informacionit operacional dhe ne kuader te masave per goditjen e trafikut nderkombetar te droges, policia lokalizoi mengjesin e djeshem automjetin qe drejtohej nga 68-vjecari ne nje zone te Follorines.

Gjate kontrollit te mjetit u gjeten dy canta udhetimi dhe nje thes, brenda te cileve ndodheshin 50 pako me marijuane, me nje peshe totale bruto prej 55 kg e 422 grame. Gjithashtu, policia sekuestroi edhe 3 telefona celulare, te cilet do te sherbejne per hetimet.

Kohet e fundit eshte konstatuar nje riaktivizim i trafikut nderkombetar te droges nga Shqiperia drejt Greqise. Gjate 11 muajve te fundit, policia greke ka sekuestruar mbi 1.2 ton marijuane ne zonat e Igumenices, Janines, Kosturit, Follorines dhe Selanikut.

Rastet me te shumta lidhen me linjen e trafikut Sarande–Igumenice, nga e cila dyshohet se eshte transportuar pothuaj gjysma e sasise se droges se sekuestruar ne keto zona. Ne nje prej rasteve me te bujshme, autoritetet greke kane bllokuar ne Igumenice edhe nje skaf te ngarkuar me lende narkotike.

Read More...

Izraeli thuhet se i ka riklasifikuar krokodilët e Nilit si kafshë “të kujdesura” , duke hapur potencialisht rrugën për përdorimin e tyre si pjesë e sigurisë së burgjeve.

Propozimi kontrovers për të rrethuar burgjet me hendeqe të mbushura me krokodilë thuhet se u propozua në fund të vitit të kaluar nga Ministri i Sigurisë Kombëtare i ekstremit të djathtë, Itamar Ben-Gvir, i cili argumentoi se zvarranikët do të forconin sigurinë dhe do të pengonin përpjekjet e arratisjes. Plani fillimisht u konsiderua ligjërisht i parealizueshëm nga Autoriteti i Natyrës dhe Parqeve të Izraelit, sepse krokodilët e Nilit klasifikoheshin si kafshë të egra që mund të mbaheshin vetëm në kopshte zoologjike dhe rezervate të kafshëve të egra.

Kjo pengesë ligjore thuhet se u hoq këtë javë kur Ministri i Mbrojtjes së Mjedisit Idit Silman e riemërtoi krokodilin e Nilit si një “kafshë të egër të kujdesur”, raportuan mediat izraelite të premten. Klasifikimi i ri lejon që zvarranikët të mbahen në një gamë më të gjerë ambientesh, duke përfshirë potencialisht edhe burgjet.

Emërtimi i ri thuhet se vjen pavarësisht paralajmërimeve nga këshilltarja ligjore e ministrisë, e cila i tha Silman se nuk kishte autoritet për të vendosur në mënyrë të njëanshme mbi statusin e krokodilëve dhe për të hedhur themelet për vendosjen e tyre në burgje. Disa javë më parë, Ben-Gvir dhe Silman thuhet se zhvilluan një takim me këshilltaren ligjore dhe shefen e Autoritetit të Natyrës dhe Parqeve, Raya Soraki, duke i shtyrë ata që të pranonin planin e dyshimtë.

Sipas raportimeve të medias izraelite, Ben-Gvir dëshiron t’i prezantojë fillimisht zvarranikët në burgun Ketziot, një qendër burgimi në Izraelin jugor që mban kryesisht të burgosur palestinezë. Pasi ai e paraqiti propozimin për herë të parë, Shërbimi i Burgjeve të Izraelit (IPS) e shqyrtoi atë dhe dërgoi oficerë në fermën e krokodilëve Hamat Gader në fillim të janarit për t’u njohur me zvarranikët.

Sipas njoftimeve, IPS e priti propozimin e ministrit në mënyrë të favorshme, duke marrë në konsideratë zgjedhjen e ekzemplarëve më të vegjël që do të kushtonin rreth 8,000 dollarë për kokë, në vend të zvarranikëve më të vjetër që kushtonin rreth 20,000 dollarë. “Kjo është një shumë relativisht e vogël krahasuar me investimin në siguri që kërkon një burg, dhe rezultatet do të ishin edhe më të mira”, tha një burim i IPS për gazetën Maariv në atë kohë, duke shtuar se zvarranikët e vegjël “gjithashtu të rrezikshëm” përfundimisht do të rriteshin brenda kompleksit të burgut.

Read More...

Mbështetja për presidentin rus Vladimir Putin po vazhdon të bjerë, duke arritur nivelin më të ulët që nga fillimi i luftës në Ukrainë.

Sipas një sondazhi të fundit të zhvilluar nga qendra ruse e kërkimeve të opinionit FOM, përkrahja për Putinin ka rënë me 5 pikë përqindje brenda një jave, nga 71% në 66%.

Një rënie e tillë nuk ishte regjistruar që nga shtatori i vitit 2022, kur Kremlini u detyrua të shpallte mobilizimin e pjesshëm ushtarak për të përforcuar frontin në Ukrainë.

Edhe pse niveli i mbështetjes për Putinin mbetet ende më i lartë se para nisjes së pushtimit të Ukrainës, ekspertët vërejnë se po zbehet efekti i njohur si “grumbullimi rreth flamurit”, kur qytetarët priren të bashkohen rreth udhëheqësit të tyre gjatë një lufte.

Sipas Denis Volkov, drejtues i institutit të sondazheve Levada, rënia e mbështetjes nuk prek vetëm presidentin, por edhe institucionet e tjera shtetërore. Shkaku kryesor lidhet me përkeqësimin e standardit të jetesës dhe problemet ekonomike.

Një nga shqetësimet kryesore të qytetarëve rusë është bërë kriza e karburanteve, e shkaktuar nga sulmet ukrainase ndaj rafinerive ruse. Në disa rajone çmimet e benzinës janë rritur ndjeshëm, ndërsa në zona të tjera karburanti është kufizuar dhe janë krijuar radhë të gjata në pikat e furnizimit.

Mediat ruse raportuan edhe rastin e një 80-vjeçari në qytetin Lysva, në rajonin e Permit, i cili humbi jetën pasi u ndje keq ndërsa priste në radhë për të marrë karburant. Sipas tyre, ky ishte rasti i dytë i ngjashëm brenda më pak se një muaji.

Megjithatë, pavarësisht rënies së mbështetjes ndaj Putinit, kritikat publike ndaj tij mbeten të rralla për shkak të presionit ndaj zërave kundërshtues.

Së fundmi, blogeri kritik ndaj Kremlinit, Ilya Remeslo, u arrestua nën akuzën për përhapje të “lajmeve të rreme” për ushtrinë ruse, një vepër që në Rusi mund të dënohet deri në 10 vite burg.

Remeslo, i cili më parë kishte pasur qëndrime më afër qeverisë, tërhoqi vëmendjen pasi kritikoi hapur luftën në Ukrainë dhe kërkoi dorëheqjen e Putinit. Para arrestimit, ai kishte shkruar se situata në Rusi mund të shkonte drejt një momenti ku edhe një tronditje e vogël mund të sillte humbjen e pushtetit nga presidenti rus.

Nuk mundi dot që ta ndryshonte historinë.

Tomas Tuhel e ëndërroi shumë që ta fitonte Kupën e Botës me Anglinë, dhe iu afrua shumë duke arritur deri në gjysmëfinale, por nëse bën një hulumtim, sheh se ai kishte traditën kundër.

Asnjëherë nuk ka ndodhur që kur kanë nisur kampionatet botërore në 1930, që një trajner I huaj të fitojë titullin, madje as që të arrijë në finale.

Në 22 turnetë e mëparshëm, teknikët kanë qenë gjithmonë vendas, përfshi edhe Skalonin e Argjentinës dhe Deshampin e Francës në 2022.

Nuk pati ndryshi në 2018, me Deshampin dhe Zlatko Daliç të Kroacisë, e kështu me emra të shquar si Zagallo, Ramsej, Helmut Shën, Bearxot, Bilardo apo Del Boske, sa për të përmendur disa prej tyre.

Një traditë që në 2030 do të mbushë shekullin, në Botërorin që do të jetë jubilar në Spanjë, Portugali e Marok e do të mbahet në 100-vjetorin e nisjes së këtij spektakli.

Ka pasur shumë kritika për Tuhelin.

Gjermani u sulmua se nuk tregoi guxim, se tërhoqi ekipin prapa, dhe se bëri zëvendësimet e gabuara.

Gjithçka mund të qendrojë, por po ashte qenka edhe një peshë historike, ajo që një trajner I huaj kurrë nuk e ka fituar ndonjëherë Kupën e Botës, madje nuk ka arritur dot as në finale.

Mbi 200 artistë nga Shqipëria, Italia, Mali i Zi, Kosova dhe Maqedonia e Veriut sollën në Korçë  traditat  muzikore të vendeve të tyre.

Edicioni I dytë I festivalit ndërkombëtar të bandave  synon  të promovojë Korçën si një destinacion të rëndësishmë të turizmit kulturor.

Banda e Forcave të Armatosura  interpretoi në qytetin ku u hodhën themelet e orkestrës së parë të shtetit shqiptar.

Orkestra e Kotorrit, një nga më të vjetrat në Ballkan e cila mori pjesë për herë të parë  solli  një repertor me marshime, muzikë klasike dhe kolona zanore filmash.

“Këtë vit ne festojmë 184 vjetorin. Kjo është hera jonë e parë në Shqipëri. Jemi të kënaqur.”

Ndersa artistet  nga  Italia vleresuan  mikepritjen e qytetit.

” Përgëzime të gjithë qytetit sepse është vërtet një mikpritje fantastike. Jeni të mrekullueshëm! Faleminderit pafund për mikpritjen.”

Paradat e orkestrave dhe  muzika e zgjedhur  kanë sjellë një atmosferë tē veçantë në Korçë  duke tërhequr vëmendjen e vizitorëve të shumtë.

Policia Kufitare e Vlorës ka zbardhur ngjarjen e ndodhur një ditë më parë pranë ishullit të Sazanit, ku 11 emigrantë nga vendet e treta rrezikuan të mbyteshin teksa lundronin me një gomone.

Si rezultat i hetimeve, është arrestuar organizatori i dyshuar i tentativës për transportimin e tyre drejt Italisë. Bëhet fjalë për një 43-vjeçar Masud Emir nga Afganistani, i cili, sipas Policisë, kishte organizuar nga Greqia futjen në mënyrë të paligjshme në Shqipëri të 10 shtetasve të huaj, me qëllim dërgimin e tyre më pas në Itali.

Nga hetimet rezulton se gomonen ai e kishte marrë në Seman të Fierit, në vendin që i ishte dërguar si lokacion nga një shtetas shqiptar, identiteti i të cilit nuk është zbuluar ende. Policia vijon punën për identifikimin dhe kapjen e tij.

Në kuadër të operacionit, specialistët për Hetimin e Krimit në Drejtorinë Vendore për Kufirin dhe Migracionin Vlorë, në bashkëpunim me Prokurorinë, arrestuan 43-vjeçarin për veprën penale “Ndihma për kalim të paligjshëm të kufijve”.

Ndërkohë, u proceduan penalisht për veprën penale “Kalimi i paligjshëm i kufirit shtetëror” edhe 10 shtetasit e tjerë, nga Bangladeshi, Pakistani, Liberia dhe Haiti, të cilët ndodheshin në bordin e gomones.

Sipas Policisë, emigrantët ishin futur ilegalisht në Shqipëri nga territori grek, ndërsa më pas do të transportoheshin me gomone nga Semani drejt Italisë.

Shqipëria pritet të vendosë për herë të parë një kuadër ligjor të posaçëm për raportimin dhe shkëmbimin automatik të informacionit mbi kripto-asetet. Projektligji synon përafrimin e legjislacionit shqiptar me atë të Bashkimit Evropian, në kuadër të procesit të integrimit.

Projektligji parashikon që Drejtoria e Përgjithshme e Tatimeve të jetë autoriteti përgjegjës për administrimin e sistemit të raportimit, mbledhjen dhe shkëmbimin e informacionit, si edhe për mbikëqyrjen e zbatimit të detyrimeve nga subjektet raportuese.

Ofruesi i shërbimit të kriptoaseteve do të ketë detyrimin që të raportojë pranë administratës tatimore  të identifikoj klientët, të verifikojnë rezidencën e tyre tatimore, të mbledhin dhe ruajnë informacion mbi transaksionet, si dhe ta raportojnë atë periodikisht pranë Drejtorisë së Përgjithshme të Tatimeve. Dokumentacioni do të duhet të ruhet për të paktën shtatë vjet.

Në rast të shkeljes së këtyre detyrimeve parashikohet edhe vendosja e gjobave që variojnë nga 700 mijë lekë deri në 1 milionë lekë.

Objektivi kryesor i nismës është rritja e transparencës fiskale, forcimi i bashkëpunimit ndërkombëtar në fushën e tatimeve dhe krijimi i një kuadri të unifikuar për monitorimin e transaksioneve me kripto-asete, në përputhje me standardet e Bashkimit Evropian.

Sipas relacionit shoqërues, shpjegohet se rritja e përdorimit të kripto-aseteve për investime, pagesa dhe transferta ndërkufitare ka krijuar vështirësi për autoritetet tatimore në identifikimin e të ardhurave dhe pronësisë së këtyre aseteve, duke shtuar rrezikun e evazionit fiskal.

Konflikti ushtarak mes Shteteve të Bashkuara dhe Iranit po hyn në një fazë edhe më të rrezikshme, ndërsa sulmet ajrore vazhdojnë për natën e shtatë radhazi.

Tensionet janë përshkallëzuar në zonën e Ngushticës së Hormuzit, një nga korridoret detare më të rëndësishme për transportin global të naftës.

Sipas mediave iraniane, bombardimet e fundit amerikane goditën objektiva në provincën Hormozgan, në jug të Iranit, ku tre persona humbën jetën dhe tetë të tjerë mbetën të plagosur. Shpërthime u raportuan edhe në qytetin Sirik dhe në ishullin Qeshm, pranë Ngushticës së Hormuzit.

Komanda Qendrore e SHBA-së deklaroi se operacionet synojnë dobësimin e kapaciteteve ushtarake të Iranit dhe kufizimin e aftësisë së tij për të kryer sulme në rajon.

Në kundërpërgjigje, Irani njoftoi se ka goditur objektiva ushtarake amerikane në disa vende fqinje. Garda Revolucionare Iraniane bëri të ditur se ka lëshuar raketa balistike dhe dronë ndaj bazave amerikane në Bahrein, duke përfshirë depo ushtarake dhe një qendër të inteligjencës.

Pas sulmeve, në Bahrein u aktivizuan sirenat e mbrojtjes ajrore, ndërsa autoritetet u bënë thirrje qytetarëve të strehoheshin në vendet më të afërta të sigurta.

Ndërkohë, Garda Revolucionare pretendoi se dy cisterna nafte shpërthyen pasi hynë në një zonë të minuar në jug të Ngushticës së Hormuzit, duke akuzuar SHBA-në për dhënien e udhëzimeve të rreme për lundrim.

Po ashtu, Irani njoftoi se ka ndaluar katër cisterna të tjera, duke pretenduar se ato po kalonin përmes Ngushticës së Hormuzit me mbështetjen e SHBA-së.

Tymi i zjarreve masive në Kanada ka përkeqësuar ndjeshëm cilësinë e ajrit në një pjesë të madhe të Shteteve të Bashkuara, duke prekur mbi 100 milionë banorë në 18 shtete dhe Uashington DC.

Qytete si Chicago, Detroit, Milwaukee, Filadelfia dhe Uashingtoni po përballen me nivele të larta ndotjeje, ndërsa autoritetet u kanë bërë thirrje qytetarëve të qëndrojnë në ambiente të mbyllura dhe të përdorin maska mbrojtëse nëse dalin jashtë.

Për shkak të tymit janë shtyrë ndeshje sportive, janë anuluar aktivitete në natyrë dhe janë mbyllur përkohësisht disa parqe argëtimi.

Meteorologët parashikojnë se situata do të fillojë të përmirësohet gjatë fundjavës, falë reshjeve të shiut, ndryshimit të erërave dhe një fronti të ftohtë që pritet të shpërndajë tymin.

Sipas ekspertëve, grimcat e imëta të tymit mund të shkaktojnë probleme serioze me frymëmarrjen dhe të përkeqësojnë sëmundjet e zemrës dhe mushkërive, veçanërisht te fëmijët, të moshuarit dhe personat me probleme shëndetësore.

Një 39-vjeçar është arrestuar në Malësi të Madhe, pasi ishte shpallur në kërkim ndërkombëtar nga autoritetet spanjolle për trafikim të lëndëve narkotike dhe pjesëmarrje në organizatë kriminale.

Arrestimi u krye në kuadër të operacionit policor të koduar “Fast”, i zhvilluar nga specialistët e Sektorit për Kërkimin (FAST Albania), në bashkëpunim me Drejtorinë Vendore të Policisë Shkodër, pas koordinimit informativ dhe operacional me homologët në Spanjë.

Sipas Policisë, 39-vjeçari, i lindur në Koplik, u lokalizua dhe u arrestua provizorisht në Malësi të Madhe.

Ai ishte shpallur në kërkim ndërkombëtar nga Interpol Madrid, pasi autoritetet gjyqësore spanjolle, me vendim të datës 8 korrik 2026, i kishin caktuar masën e sigurisë “Arrest në burg” për veprat penale të trafikimit të lëndëve narkotike dhe pjesëmarrjes në organizatë kriminale, të kryera me qëllim tregtimin e lëndëve narkotike.

Procedurat për ekstradimin e tij drejt Spanjës vijojnë në bashkëpunim me autoritetet përkatëse.