Ka dështuar edhe përpjekja e fundit për ta funksionalizuar legjislaturën e nëntë të Kuvendit të Kosovës, vetëm pak orë para hyrjes në fuqi të afatit të vendosur nga Gjykata Kushtetuese.

Pas orës 00:00 të së premtes, deputetët e zgjedhur nuk do të mund të marrin asnjë veprim për çështjen e konstituimit të Kuvendit deri më 8 gusht, për shkak të masës së përkohshme të vendosur nga Kushtetuesja.

Saga parlamentare, që vijon prej më shumë se tre muajsh, është shoqëruar me 54 tentativa për të thirrur dhe zhvilluar një seancë funksionale, të gjitha të dështuara.

Zjarri vijon me intesitet në malin Shashicë. Pavarësisht se në majën e malit sipër Vlorës pati ndërhyrje nga toka dhe ajri, flakët ende nuk janë vendosur nën kontroll.
Jo vetëm që nuk janë vendosur nën kontroll, por mesa duket vatra e zjarrit është përhapur edhe më tej.

Flakët po i afrohen më tepër shtëpive të banuara të Kaninës, duke e bërë të rrezikshme situatën.

Ndërkohë, territori i djegur prej tyre është shtuar edhe më tepër. Ndërhyrja nga ajri është ndalur për shkak të errësirës. Flakët në terren po luftohen me forcat zjarrfikëse të Vlorës, të cilët pavarësisht punës së palodhur nuk po ia dalin dot t’i vendosin nën kontroll.

Ndërkohë, shtëllungat e tymit kanë mbuluar në total bregdetin e Vlorës, duke u dukur nga kilometra larg.

Smartphonet shpërqendrojnë dhe ndikojnë negativisht në rezultatet shkollore. Kjo është një çështje e nxehtë që nuk njeh kufij dhe që ka bërë që Holanda të ndërmarrë një hap drastik, ndalimin e plotë të përdorimit të celularëve në shkolla.

Përfitimet janë të qarta, të qëndruarit larg pajisjeve elektronike gjatë mësimit apo edhe gjatë pushimeve sjell efekte pozitive jo vetëm në përvetësimin e dijes, por edhe në aspektin social.

Ky ndryshim i madh është bërë i mundur nga udhëzimet e reja të miratuara nga Ministria e Arsimit në janar 2024, të cilave tashmë i janë përshtatur shumica e shkollave në vend. Sot, afro dy të tretat e shkollave të mesme holandeze i kërkojnë nxënësve të lënë telefonat në shtëpi. Në disa shkolla, celularët vendosen në dollapë të posaçëm dhe qëndrojnë aty deri në fund të ditës shkollore.

Sipas intervistave të zhvilluara nga Instituti Kohnstamm, 75% e nxënësve thonë se përqendrohen më lehtë në mësim ose në detyra, ndërsa 59% raportojnë përmirësim të klimës në klasë dhe të marrëdhënieve me bashkëmoshatarët. Pa telefon në duar, të rinjtë flasin më shumë mes tyre, debatojnë, luajnë, lëvizin, shohin njëri-tjetrin në sy dhe lexojnë më shumë libra. Efektet pozitive ndihen edhe në luftën kundër bullizmit.

Disa nxënës tregojnë se edhe pasi kthehen në shtëpi, kanë më shumë dëshirë të ndërveprojnë me njerëzit përreth sesa të kontrollojnë njoftimet në telefon. “Tani që nuk mund të bësh më një foto fshehurazi dikujt në klasë dhe ta shpërndash në një grup WhatsApp, është rritur ndjesia e sigurisë sociale“, thotë doktori Alexander Krepel, studiues në Kohnstamm Instituut.

Por Holanda nuk është e vetmja që po vepron kundër përdorimit të celularëve në shkolla. Franca ishte ndër të parat, duke ndaluar përdorimin e telefonave për nxënësit nga mosha 11 deri në 15 vjeç që në vitin 2018. Për fëmijët më të vegjël, ndalimi ka qenë gjithmonë absolut. Nga viti i ardhshëm shkollor, Franca do ta ashpërsojë më tej masën: nxënësit nuk do të lejojnë vetëm të mos i përdorin, por do t’i dorëzojnë telefonat në dollapë të posaçëm të administruar nga mësuesit, për t’i marrë sërish vetëm në fund të ditës.

Kjo vjen pas një periudhe prove të quajtur “pushimi dixhital”, në të cilën morën pjesë rreth njëqind shkolla franceze gjatë gjashtë muajve të fundit.

Një studim i Universitetit të Birmingham mbi 1.227 nxënës në 30 shkolla, i publikuar në revistën Lancet, thekson se ndalimi i telefonave në shkollë nuk mjafton. Për të pasur një ndikim të qartë në mirëqenien mendore dhe fizike të adoleshentëve, është e nevojshme të kontrollohet edhe koha që kalojnë në rrjete sociale pas mësimit dhe në shtëpi.

Në Mbretërinë e Bashkuar, 90% e shkollave ndalojnë përdorimin e telefonave në klasë, por 79% e lejojnë që nxënësit t’i mbajnë me vete. Një raport i UNESCO-s i vitit 2024 vëren se edhe një shpërqendrim i vogël nga telefoni kërkon të paktën 20 minuta që një nxënës të rifitojë përqendrimin e mëparshëm – një kohë që në epokën e mbingarkesës së stimujve nuk është aspak e vogël.

Në Spanjë, rajoni Castilla y León ka ndaluar celularët në shkolla që nga viti 2007, dhe pjesa më e madhe e vendit është përshtatur me këtë praktikë.

Po Shqipëria? Në Itali, Ministri i Arsimit Giuseppe Valditara ka parashikuar ndalimin e telefonave në shkollat fillore dhe të mesme dhe ka nënshkruar një qarkore që do ta zgjerojë këtë ndalim edhe për shkollat e mesme të larta nga viti shkollor 2025/2026. Ministri ka cituar disa herë raportin e OECD, sipas të cilit 17% e adoleshentëve ndihen të shqetësuar dhe të stresuar kur u hiqen pajisjet dixhitale, një simptomë që ngjan me ato të varësisë.

Zjarri në malin e Borshit vijon ende me intensitet të lartë, teksa situata është alarmante.

Edhe pse zjarrfikësit e Himarës gjatë gjithë ditës kanë qenë në terren, nuk kanë arritur ta marrin situatën nën kontroll.

Terreni i vështirë ka qenë ai i cili ka vështirësuar punën e forcave zjarrfikëse.

Zjarri po i afrohet Puqerasit dhe Borshit, teksa në rrezik janë banesat.

Flakët vijojnë të lëshojë tym, i cili përfshin të gjithë vijën bregdetare nga Borshi, Qeparoi deri në Himarë.

PD ka reaguar në lidhje me situatën e krijuar prej disa ditësh nga zjarret që kanë përfshirë zona të ndryshme të vendit.

Në reagimin zyrtat të selisë blu, u kërkohet qytetarëve që të tregohen të kujdesshëm si dhe të ndihmojnë personat e tjerë që mund të jenë në rrezik.

PD thotë gjithashtu se kryrministri Edi Rama është me pushime, ndërsa autoritetet kanë dështuar të mbajnë nën kontroll situatën.

PD akuzon qeverinë se bën shpenzime luksi dhe nuk investon në mbrojtjen civile.

REAGIMI I PD

Nga Jugu në Veri, Shqipëria është pushtuar nga zjarret.

Ndërkohë që, u bëjmë thirrje banorëve, qytetarëve dhe turistëve të tregojnë kujdes të shtuar, të largohen sa më parë nga zonat e  kërcënuara, dhe të ndihmojnë këdo në rrezik. Partia Demokratike shpreh indinjatën e thellë me reagimin minimalist dhe thuajse përqeshës të autoriteteve.

Jo vetëm ndërhyrjet bëhen me vonesë, por janë mungesa e alarmit dhe angazhimit që e bëjnë situatën  të duket edhe më kaotike, kërcënuese dhe dëshpëruese.

Zjarret, përmbytjet, fatkeqësitë natyrore përsëriten në Shqipëri, si në të gjithë botën, dhe kjo nuk është në dorë të qeverive, por përgatitjet, gatishmëria, vullneti, janë detyrë dhe në dorë të tyre.

Siç e kemi parë prej vitesh, qeveria dërgon ushtrinë dhe zjarrfikësit, të cilët u sulen zjarreve me shkurre, me lopata dhe batanije, si në një vend të Botës së Tretë, apo të sapodalë nga lufta dhe në mungesë të mjeteve bazike.

Një pamje tjetër shohim prej tri javësh në Theth, Tiranë dhe gjithandej nëpër Shqipëri.

Për të shembur bujtinat në Theth dhe marrë para shitësit të rigonit në Sarandë, qeveria dërgoi IMT, Tatimet, Policinë dhe Ushtrinë, me mjete të rënda, me arrogancë, të armatosur deri në dhëmbë, në luftë me qytetarët.

Për Edi Ramën, prioritet absolut është uzurpimi i pushtetit lokal, jo zjarret dhe dhjetëra problemet që kërcënojnë qytetarët dhe jetën e tyre.

Për Edi Ramën, prioritet është spektakli me satelitët “Albania 1” dhe “2”, apo dronët për të cilët, pasi i hedh në Facebook për t’u mburrur nuk ka kush as t’i lexojë dhe as kush t’i komandojë. Sepse, Edi Rama e ka bërë ushtrinë e një vendi të NATOs, një organizatë që shkon të fikë zjarret me shkurre dhe pagure.

Prandaj, përballja me zjarret dhe fatkeqësitë natyrore që kërcënojnë qytetarët janë të mekura.

Do të jetë kështu këtë verë dhe tjetrën, sepse Edi Rama nuk kujtohet dhe as kujdeset për infrastrukturën e shtetit, për fondet e emergjencave, për modernzimin e ekipeve të kërkim-shpëtimit. Paratë që i merr nga taksat i bën shpenzime luksi për vete dhe ministrat, udhëtime me carter, koncerte të shtrenjta apo kopësht 4 milion euro në oborrin e Kryeministrisë.

Edi Rama është me pushime, pasi bëri zhurmën me drejtorët, me heqjen e tendave dhe terrorizimin e Thethit, por zjarret nuk bëjnë pushim dhe pyjet, territori, bizneset, shtëpitë dhe jeta e qytetarëve është në rrezik.

Edi Rama nuk është zjarrfikës, por ai nuk mund të lejohet të jetë Kryeministri që hedh Shqipërinë në zjarr.

Pesë persona kanë humbur jetën gjatë natës në Ukrainë dhe Rusi si pasojë e shkëmbimeve intensive me dronë dhe raketa midis dy vendeve, ndërsa përpjekjet për një armëpushim vijojnë të dështojnë.

Zyrtarët ukrainas konfirmuan se Rusia qëlloi mbi 200 dronë dhe rreth 30 raketa, duke goditur kryesisht rajonin e Dnipropetrovsk, ku mbetën të vrarë tre persona dhe u plagosën gjashtë të tjerë. Në Rusi, autoritetet lokale në Rostov njoftuan se dy persona vdiqën pas një sulmi me dron ukrainas që përfshiu një makinë në flakë.

Sulmet ndodhën paralelisht me përditësimet nga të dyja palët për zhvillimet në front. Rusia deklaroi se ka marrë kontrollin e dy fshatrave – Zelenyi Hai në Donetsk dhe Maliivka në Dnipropetrovsk. Ndërkohë, presidenti ukrainas Volodymyr Zelensky tha se forcat e tij po i shtyjnë gradualisht trupat ruse nga rajoni i Sumyt, përfshirë çlirimin e fshatit Kindrativka.

Zelensky theksoi në rrjetin X se sulmet me dronë ukrainas ndaj bazave dhe aeroporteve ushtarake në Rusi janë një përgjigje ndaj agresionit, duke i quajtur “argumente që e afrojnë paqen”.

Ndërkohë, një qendër tregtare, një bllok banimi dhe një zonë industriale u dëmtuan në qytetin Dnipro, ndërsa pamjet e publikuara tregonin makina dhe ndërtesa të djegura.

Pavarësisht sulmeve, përpjekjet diplomatike për paqe mbeten të pasuksesshme. Raundi i tretë i bisedimeve për armëpushim u zhvillua në Stamboll të mërkurën, por nuk solli asnjë përparim. Të dyja palët u akuzuan reciprokisht për refuzimin e propozimeve të njëra-tjetrës.

Pasi negociatat ndërmjet Rusisë dhe Ukrainës, më 23 korrik, përfunduan pa ndonjë përparim të madh, Uashingtoni njoftoi se do t’i shesë Kievit një pako pajisjesh ushtarake në vlerë prej 322 milionë dollarësh.

Një ditë më pas, Departamenti amerikan i Shtetit bëri të ditur aprovimin e shitjes së një pakoje tjetër ushtarake për Ukrainën, që kushton 330 milionë dollarë.

Dy sisteme të armëve, të cilat Ukraina tashmë i përdor, do të përforcohen me pajisje dhe mbështetje shtesë në kuadër të shitjes së pakos së parë, sipas një komunikate për media nga Departamenti i Mbrojtjes i Shteteve të Bashkuara të Amerikës.

Raketa HAWK

Një raketë HAWK duke u lëshuar gjatë stërvitjeve në Tajvan, më 2022.

Uashingtoni thotë se Ukraina do të mund të blejë “artikuj dhe shërbime të ndërlidhura të mbështetjes për sistemin raketor HAWK”, me vlerë prej 172 milionë dollarësh.

HAWK është akronim për Homing All The Way Killer, emër që i është dhënë raketës për shkak të aftësisë së saj për t’u drejtuar deri në momentin e goditjes.

Arma është krijuar në vitet ’50, për mbrojtje ndaj aeroplanëve të shpejtë luftarakë dhe ndaj disa raketave. Raketat HAWK ishin dislokuar përgjatë vijës bregdetare të Floridës, gjatë Krizës Kubane me Raketa, më 1962.

Një lëshues i raketave HAWK, i fotografuar në Floridë, gjatë Krizës Kubane me Raketa, më 1962.

Sistemi HAWK është joefektiv përballë shumë prej raketave të shpejta dhe moderne, ndërsa ushtria e SHBA-së e ka zëvendësuar sistemin me raketa Patriot në vitet ’90. Por, kërcënimet aktuale ndaj qyteteve ukrainase, që përfshijnë dronët e ngadalshëm Shahed, të prodhimit iranian, i kanë dhënë HAWK-ut një rol të ri.

Versionet e sistemit që i janë dhënë më parë Ukrainës raportohet të kenë arritur sukses në pengimin e bombardimeve ruse. Ushtria ukrainase ka pohuar se një sistem i vetëm HAWK ka rrëzuar 40 dronë dhe 14 raketa.

Autoblinda Bradley

Një Bradley gjatë përdorimit nga ushtria ukrainase, më 2023.

SHBA-ja thotë se Ukraina mund të blejë autoblinda Bradley, me vlerë prej 150 milionë dollarësh, bashkë me kapacitetet për mirëmbajtjen dhe riparimin e tyre, si dhe pajisje të ndërlidhura me to.

Kur nisi ndërtimi fillestar i kohës së Luftës së Ftohtë i atij që do të shndërrohej në autoblindën Bradley, qëllimi ishte të krijohej një mjet i blinduar transporti, i cili do të mund të bartte trupa nëpër një terren post-apokaliptik, pas një shkëmbimi bërthamor.

Sot, autoblindat Bradley, që kanë marrë emrin nga një gjeneral i Luftës së Dytë Botërore, shërbejnë kryesisht si “taksi të fushëbetejës”, për të transportuar trupa nëpër pothuajse çfarëdo terreni, duke i mbrojtur ato nga të shtënat dhe shpërthimet.

Pas transportimit të luftëtarëve, automjetet mund t’i mbulojnë ata me një top të fuqishëm 25-milimetërsh. Autoblindat Bradley munden, po ashtu, të pajisjen me raketa të afta për shkatërrimin e tankeve të armikut.

Një ushtar ukrainas brenda një Bradley, më 2023.

Bradleyt janë kritikuar për blindën e tyre relativisht të butë prej alumini, dhe për lartësinë e tyre, që i bën ato objektiva të dallueshme në terren të hapur.

Më shumë se 150 nga Bradleyt që i janë dërguar Ukrainës raportohet të jenë shkatërruar, braktisur apo kapur. Shtatëmbëdhjetë Bradley janë shkatërruar në një betejë në jug të Ukrainës, në qershorin e 2023-tës.

Përveç raketave HAWK dhe autoblindave Bradley, Ukraina do të mund të blejë edhe pajisje për riparimin dhe mirëmbajtjen e obusëve M109, dhe për mbështetjen e sistemeve të prodhimit amerikan për mbrojtje ajrore.

Uashingtoni thotë se shitja e armëve për Ukrainën “nuk do ta ndryshojë ekuilibrin bazik ushtarak në rajon”./ REL

Ministri i Financave, Petrit Malaj, ka ndarë në Facebook bilancin e parë të aksionit për formalizimin e tregut të produkteve bujqësore dhe blegtorale, si dhe për rritjen e sigurisë ushqimore.

Sipas tij, në vetëm 12 ditë janë inspektuar 209 subjekte dhe janë bllokuar 76.1 ton mallra që nuk përmbushnin standardet.

“Ky është vetëm fillimi,” shkruan Malaj, duke theksuar se aksioni do të vijojë për të garantuar një treg të formalizuar, produkte të sigurta e të gjurmueshme, dhe mbrojtje për fermerët dhe prodhuesit e ndershëm.

Ministri nënvizon se objektivi i këtij operacioni është vendosja e rregullave të barabarta për të gjithë dhe forcimi i besimit të konsumatorit te produktet vendase.

“Plazhet e Shqipërisë që do të jenë hit këtë verë”, ky është titulli intrigues i një artikulli dedikuar vijës sonë bregdetare publikuar në “National Geographic” në gjuhën spanjolle.

Vendi ballkanik thuhet se shkëlqen me një thesar plazhesh kilometrash të gjata, ndërsa përshkruhet si parajsa e pazbuluar e Mesdheut.

“Shqipëria ka gjithçka që i nevojitet për t’u bërë destinacioni më i lakmuar i verës në Europë, me plazhe spektakolare me rërë, të panjohura për shumë udhëtarë”, shkruhet në artikull.

Plazhet që rekomandon National Geographic janë ai i Ksamilit, Borshit, Jalës, Dhërmiut, Gjipesë, Lukovës, Kakomesë, Porto Palermos si dhe Qeparoit.

“Nëse Shqipëria do të përmblidhej vetëm në një plazh, fituesi do të ishte Ksamili”, citohet në shkrimin, ku vlerësohet rëra e bardhë dhe padiskutim ishujt që janë një magnet për not.

Sakaq si një nga plazhet më të mëdha urbane të Shqipërisë, sugjerohet Dhërmiu.

Ai që magjeps është plazhi i Kakomesë, një mrekulli natyrore në formë gjysmëhëne e rrethuar nga bimësi e harlisur.

Nga ana tjetër Jala cilësohet si një nga parajsat e bregdetit Jon, ndërsa Lukova është ideale për të shijuar qetësinë e Rivierës Shqiptare./ Tv Klan

Vijon beteja me flakët në vendin tonë. 26 vatra zjarri u njoftuan deri pasdite nga Ministria e Mbrojtjes, nga të cilat 17 aktive dhe 9 në monitorim.

Në Dibër, në vendin e quajtur “Liqeni i Luleve”, pjesë e Parkut Kombëtar Lurë, zjarri po zhvillohet në 2 vatra, por nuk është dashur ndërhyrje përtej forcave bashkiake.

Ndërkohë që ndihmë nga ajri u kërkua në fshatin Zall Gjoçaj, kurse vatra e zjarrit ne Ulëz u shua në anë e Dibres, por jo të Mirditës.

Aktive mbetet vatra në Livadhet e Peladhisë në Bulqizë.

Në Vlorë, tek “Maja e Paliskës”, mbi fshatin Dukat, ka vazhduar puna gjithë ditën për shuarjen e zjarrit e po ashtu në Delvinë. Në operacion janë 60 efektivë dhe 4 zjarrfikëse të Forcave të Armatosura, si dhe helikopterë shqiptarë e hungarezë. Zjarri është nën kontroll, por janë përshkuar 10 banesa.

Vatra zjarri ka edhe në Lezhë, Milot, Korçë, Librazhd, por edhe në zonën e Shkopetit në Kurbin, ku ka shkuar edhe shefi i shtabit të përgjithshem të Forcave të Armatosura, Arben Kingji.

Pasdite vonë u njoftua se në Bulqize ka rënë zjarr në vendin e quajtur Qafë Bualli. Janë angazhuar 8 mjete zjarrfikëse, 2 helikopterë dhe dhjetra forca.

Zjarrfikësit po luftojnë me flakët pranë Athinës dhe në disa rajone të tjera të Greqisë këtë të shtunë, ndërsa vendi mesdhetar po përballet me valën e tretë të të nxehtit për këtë verë. Disa fshatra dhe zona të banuara janë evakuuar për shkak të rrezikut në rritje nga zjarret.

Në fshatin Drosopigi, rreth 25 kilometra në veri të Athinës, janë dëgjuar shpërthime teksa re të mëdha tymi kanë mbuluar zonën. Në këtë fshat ndodhen edhe fabrika me materiale të ndezshme. Dy helikopterë janë angazhuar për të hedhur ujë nga ajri, ndërsa 65 zjarrfikës me 26 automjete dhe dy avionë po përpiqen të vendosin nën kontroll flakët.

Sipas mediave vendase dy banesa janë përfshirë nga zjarri, ndërsa autoritetet u kanë kërkuar banorëve të fshatit Krioneri të zhvendosen drejt Athinës për siguri.

Temperaturat në Greqi pritet të arrijnë deri në 44 gradë Celsius këtë të shtunë, paralajmëroi shërbimi meteorologjik grek.

Në ishullin Evia, janë dislokuar 115 zjarrfikës me 24 automjete për të përballuar flakët, të mbështetur nga gjashtë avionë dhe shtatë helikopterë. Por erërat e forta po e vështirësojnë ndjeshëm operacionin. Banorëve të zonës Triada në Evia u është kërkuar të jenë gati për evakuim në rast emergjence.

Zjarri në Evia është një nga seritë e zjarreve që kanë shpërthyer gjatë këtij muaji për shkak të erërave të fuqishme dhe thatësirës ekstreme.

Edhe në ishullin Kythira, autoritetet kanë urdhëruar evakuimin e fshatrave Aroniadika, Pitsinades dhe Aryoi. Në rajonin e Messinisë, në perëndim të Athinës, është dhënë gjithashtu urdhër evakuimi për banorët e Kryonerit dhe Sellasit.

Të gjitha këto zona ishin të përfshira në listën e rajoneve të Greqisë në alarm të lartë për zjarre, për shkak të temperaturave rekord dhe erërave të forta të parashikuara për këtë fundjavë.

Finlanda ka regjistruar 14 ditë radhazi temperatura që tejkalojnë 30 gradë Celsius, duke vendosur një rekord të ri kombëtar për motin dhe duke tejkaluar rekordin e mëparshëm të vitit 1972, raportoi Instituti Meteorologjik Finlandez, sipas “Helsinki Times”.

Pragu u kalua sërish dje në Parikala, ku temperaturat arritën në 30,3 gradë Celsius. Rekordi i mëparshëm për 13 ditë radhazi – mbi 30 gradë Celsius – u regjistrua në vitin 1972.

Kjo është vala më intensive dhe e qëndrueshme e të nxehtit në historinë e Finlandës, e cila daton që nga viti 1961. Periudha e gjatë pa shi e ka lënë pjesën më të madhe të tokës së Finlandës jashtëzakonisht të thatë.

Instituti Meteorologjik ka lëshuar paralajmërime për shkak të të nxehtit dhe zjarreve në pyje – në pjesë të mëdha të vendit. Nxehtësia pritet të vazhdojë deri në fundjavë. Sipas parashikimeve, në disa pjesë të Laplandës dhe Finlandës lindore ka të ngjarë të ketë reshje shiu.

Deri të dielën, moti i paqëndrueshëm mund të përfshijë zona më të gjera, duke përfshirë bregdetin perëndimor dhe Finlandën qendrore. Sipas meteorologut Ville Siiskonen, temperaturat arritën kulmin në juglindje dhe në disa pjesë të Ostrobothnia Veriore.

Agjencia e Menaxhimit Emergjent ka bërë të ditur se shkaku i temperaturave të larta dhe erërave të forta, në disa zona të Kosovës janë përhapur zjarre.

“Situata e përcjellë nga Qendra Operative e Agjenciësë, rezulton me gjithsej 29 vatra të zjarreve në 8 orët e fundit”, thuhet në njoftimin e Agjencisë.

17 prej këtyre zjarreve tashmë janë lokalizuar, ndërsa 12 mbeten ende aktive.

Agjencia u bëri thirrje qytetarëve që të mos ndezin zjarre në ambiente të jashtme dhe të lajmërojnë zjarrvëniet në numrat emergjent 112, 193 dhe 192.

Më herët, kjo agjenci kishte thënë se shumica e zjarreve masive në Kosovë shkaktohen nga dora e njeriut.

Edhe pse Agjencia e Menaxhimit Emergjent nuk ka treguar se në cilat zona janë përhapur zjarre, kryetari i Komunës së Suharekës, Bali Muharremaj, ka bërë të ditur për zjarre në disa fshatëra të kësaj komune.

“Kushdo që ka mundësi e që ka pajisje per shuarje të zjarrit, le të ndihmoj në hapësirën Dubravë – Sallagrazhdë – Mushtisht”, shkroi në Facebook, ku publikoi një video.

Agjencia e Menaxhimit Emergjent raportoi edhe dje për gjithsej 23 zjarre, prej të cilat shtatë kishin qenë aktive deri në orën 15:00.

Ende nuk dihet se sa dëme janë shkaktuar, por më parë gjatë këtij muaji janë publikuar shumë video në rrjete sociale që tregonin se si arat e mbjella me drithëra si grurë kapeshin nga zjarret.

Sipas Sistemit Evropian të Informacionit për Zjarret në Pyje (EFFIS), gjatë vitit 2024 në Kosovë ishin regjistruar 94 zjarre, të cilat kishin djegur gjithsej 12.079 hektarë pyje dhe shkurre./ REL

Policia italiane e Bolonjës ka goditur një rast të trafikut të sasive të konsiderueshme të drogës gjatë orëve të fundit.

Skuadra operacionale njoftoi se prangosur një 52-vjeçar shqiptar, i cili po fshihte 15 kg drogë lëndë narkotike në një apartament në ‘Via Bigari’. Ndërhyrja erdhi pas informacioneve për lëvizjet e dyshimta të shqiptarit në zonë dhe të dhënave se ai posedonte lëndën narkotike në banesë.

Kontrollet e oficerëve i çuan brenda frigoriferit të të dyshuarit, ku u gjetën të fshehura 25 pako celofani që përmbanin hashash dhe 5 të tjera që përmbanin marihuanë, me një peshë totale prej afërsisht 15 kilogramësh.

Shqiptari u arrestua me akuzën e posedimit me qëllim shpërndarjen e narkotikëve dhe u dërgua në Burgun e Dozzës, në pritje të një seance dëgjimore për dënimin.

Qeveria ka publikuar për konsultim publik metodologjinë e re për përcaktimin e taksës për pasuritë e paluajtshme dhe çmimet e reja të referencës në 61 bashki të vendit.

Projektvendimi i Ministrisë së Financave automatikisht do të rrisë detyrimin e qytetarëve për taksën e ndërtesës, ku çmimet më të larta janë përcaktuar në bashkitë bregdetare, sidomos në Durrës, Sarandë dhe Vlorë.

Metodologjia e miratuar nga qeveria përcakton se vlera e apartamentit që disponon një qytetar llogaritet mbi çmimet e referencës.

Ndërsa detyrimi për taksën e ndërtesës përcaktohet mbi vlerën e apartamentit. Si rrjedhojë, rritja e detyrimit të taksave për qytetarët do të jetë në përqindje të njëjtë me rritjen e çmimeve të referencës. Shkalla e taksës së ndërtesës për qëllime banimi është 0,05% e vlerës së apartamentit.

Çmimet e referencës në Bashkinë e Durrësit variojnë nga 45 mijë lekë më i liri në 200 mijë lekë/m² më i shtrenjti. Ky çmim prej 2 mijë euro metri katror është në zonën e portit të Durrësit ku po ndërtohet marina e jahteve dhe ka një trefishim të çmimit, pasi më parë ishte 65 mijë lekë/m². Në zonën kadastrale 6, që përfshin gjirin e Lalzit, çmimi i referencës është përcaktuar 140 mijë lekë/m², ndërsa pjesa tjetër varion nga 124 mijë në 100 mijë lekë/m².

Qendra urbane e Vlorës është ndarë në 4 zona kadastrale, ku çmimet variojnë nga 65 mijë në 98 mijë lekë/m². Ndërkohë që për herë të parë edhe ishullit të Sazanit i është përcaktuar çmim reference prej 200 mijë lekë/m². Në Sazan pritet të ndërtohet projekti prej 1.4 miliardë eurosh i Jared Kushner, dhëndri i presidentit Trump.

Në Bashkinë Himarë çmimet variojnë nga 45 mijë në 140 mijë lekë/m². Çmimet më të larta janë në zonën detare të Dhërmiut, Jalës dhe Palasës, të cilat janë 100 mijë–140 mijë lekë/m².
Ndërkohë, në zonën e Radhimës çmimi i referencës është 90 mijë lekë/metër katror.

Çmimet e referencës në Sarandë, në krahasim me çmimet që ishin më parë, janë rritur me 80%. Saranda aktualisht ndahet në 5 zona kadastrale me çmime që variojnë nga 65 mijë në 100 mijë lekë/m², çmimet më të larta në zonën qendrore të Sarandës dhe në Ksamil.

Edhe Korça ka rritje të çmimeve të referencës me rreth 45%. Çmimi më i lartë është 70 mijë lekë për metër katror.
Po ashtu, edhe Shkodra ka një rritje të çmimeve të referencës me 30%, dhe veç zonës urbane edhe zona e Velipojës ka arritur një çmim reference prej 75 mijë lekë/m². Për qarkun Lezhë, çmimet variojnë nga 33 mijë në 70 mijë lekë për m², ku më të lartat janë çmimet në Shëngjin dhe në Tale.

Rritja e çmimeve fiskale do të sjellë rritje të pagesës vjetore të taksës së ndërtesës, si për apartamentet e banimit, ashtu edhe për bizneset. Kjo rritje për banorët e Bashkisë së Tiranës u bë në vitin 2023, të cilët u përballën me një rritje prej 75%.

Klan News

Sacha Baron Cohen, i njohur për rolet e tij komike si Borat, Ali G dhe Brüno, është kthyer së fundmi në vëmendjen e publikut, por këtë herë jo për ndonjë film satirik. Në kopertinën e revistës Men’s Fitness, 53-vjeçari shfaqet pa bluzë, me një fizik të tonifikuar që ka habitur të gjithë.

Pas ndarjes nga aktorja australiane Isla Fisher, me të cilën kishte një martesë prej më shumë se një dekade dhe tre fëmijë, Cohen duket se ka zgjedhur të sfidojë mitin e “dad bod” (trupi tipik i baballarëve) dhe është hedhur në një transformim të plotë fizik, të cilin vetë e quan “një krizë e moshës së mesme”.

Me ndihmën e një trajneri personal, një kuzhinier privat dhe madje edhe mjetesh si Ozempic, aktori i ka hyrë seriozisht “garës së muskujve” që mbizotëron në Hollywood.

Kjo metamorfozë nuk është krejtësisht e rastësishme. Baron Cohen është përzgjedhur për të interpretuar rolin e Mephisto-s, një antagonist i Marvel që bën marrëveshje djallëzore me njerëzit.

Ky rol kërkon një prezencë fizike mbresëlënëse dhe Cohen duket se ka vendosur të përputhet me standardet e trupave të superheronjve të kohëve moderne.

Megjithatë, ndërsa fansat mund të admirojnë përkushtimin e tij, disa pyesin nëse ky ndryshim është më shumë egocentrizëm sesa art. A është kjo thjesht një formë e re për të tërhequr vëmendje? Apo një krizë identiteti pas ndarjes?

Në një kohë kur muskujt barazohen me famë, Cohen duket se po rishkruan imazhin e tij publik. Por mbetet për t’u parë nëse kjo pamje e re do të jetë po aq e suksesshme sa “monokini” i gjelbër i Boratit.

Major League Soccer (MLS) ka zyrtarizuar pezullimin e Lionel Messit dhe Jordi Albës për ndeshjen e ardhshme të Inter Miamit, si ndëshkim për mungesën e tyre në sfidën All-Star të zhvilluar të mërkurën. Të dy lojtarët, sipas rregullores së ligës, ndëshkohen automatikisht me përjashtim nga ndeshja pasardhëse zyrtare e kampionatit.

Ky vendim ka ngjallur reagime të forta nga klubi i Inter Miami, me pronarin kryesor Jorge Mas që e cilësoi sanksionin “të pakuptimtë dhe të padrejtë”. Në një prononcim për mediat, të cituara nga “MARCA”, Mas theksoi: “Ky sanksion është i bazuar në një rregull ekzistues, por është i padrejtë dhe një ndëshkim i tepruar. Lojtarët detyrohen të zgjedhin mes një miqësoreje, një eventi All-Star dhe një ndeshjeje zyrtare. Kjo nuk ka kuptim.”

Lionel Messi ndodhet në mes të negociatave për rinovimin e kontratës me Inter Miami, e cila skadon në dhjetor 2025. Pronari Mas konfirmoi se lojtari është i zhgënjyer me vendimin: “Reagimi i Leos ishte siç pritej, aspak pozitiv. Ai dëshiron të luajë ndeshjen e nesërme. Shpresoj që ky sanksion të mos ketë pasoja afatgjata, por për momentin zhgënjimi është i madh.”

Mas gjithashtu bëri thirrje për ndryshim të rregullores, duke theksuar rëndësinë që Messi ka për ligën.

“Shpresoj që kjo ngjarje të detyrojë komisionin e MLS-së të rishikojë rregullin. MLS-ja ishte një para se të vinte Leo dhe është një tjetër tani. Askush nuk e kujton rezultatin e All-Star vitin e kaluar. Është një miqësore dhe ndoshta duhet luajtur në një periudhë tjetër të vitit”, tha Jorge Mas.

Shqipëria do të përdorë teknologji të avancuara si inteligjenca artificiale për të zbuluar, parandaluar dhe reaguar ndaj sulmeve kibernetike, me të cilat shteti, qeveria dhe ekonomia po përballen në mënyrë të vazhdueshme.

“Ndërsa shikojmë që kemi pasur një rritje të sulmeve, apo të llojshmërisë së sulmeve kibernetike, një pjesë e tyre ditëve të sotme kanë filluar të bëhen edhe nëpërmjet inteligjencës artificiale… AI përdoret për sulmet por duhet të përdoret masivisht edhe për mbrojtjen kibernetike,” tha Floreta Faber, zv/drejtore e Autoritetit Kombëtar për Sigurinë Kibernetike.

Një gjë e tillë është parashikuar në Strategjinë Kombëtare të Sigurisë Kibernetike 2025–2030, ku për herë të parë pjesë e saj është edhe mbrojtja ndaj kërcënimeve hibride, siç është dezinformimi.

“Mis informacioni është një nga problematikat që gjithnjë e më shumë duhet të gjejë mënyrën për ta parandaluar.”

Mbrojtja e infrastrukturës kritike dhe e të dhënave të qytetarëve do të forcohet më tej, ndërsa lista e tyre po zgjerohet.

“Tashmë është mbi 200, është një listë që pritet të aprovohet së shpejti nga KM, deri sot që flasim kemi 159 infrastruktura kritike dhe të rëndësishme.”

Një rëndësi të veçantë do të marrë nxitja e kulturës kibernetike përmes ndërgjegjësimit publik. Kostoja e përgjithshme për zbatimin e strategjisë deri në vitin 2027 shkon në rreth 68 milionë euro.

Vitin e kaluar, në vendin tonë ka pasur 32 incidente që kanë ardhur për shkak të numrit në rritje të sulmeve në fushën e sigurisë kibernetike./ Tv Klan

Ambasadori i Kamboxhias në OKB bëri thirrje për një armëpushim “të menjëhershëm dhe pa kushte” me Tajlandën, pasi mosmarrëveshja midis dy vendeve hyri në ditën e tretë. Deri më tani, të paktën 30 persona janë vrarë, përfshirë civilë, dhe mijëra të tjerë janë detyruar të largohen nga shtëpitë e tyre.

Këshilli i Sigurimit i OKB-së mbajti një takim urgjent me dyer të mbyllura në New York, me të 15 anëtarët që u bënë thirrje palëve të ulin tensionet, të tregojnë përmbajtje dhe ta zgjidhin mosmarrëveshjen në mënyrë paqësore.

“Ne gjithashtu bëjmë thirrje për zgjidhje paqësore të mosmarrëveshjes”, tha Chhea Keo.

Ai iu përgjigj akuzave se Kamboxhia sulmoi Tajlandën, duke pyetur se si një vend i vogël pa forcë ajrore mund të sulmonte një vend shumë më të madh me një ushtri tre herë më të madhe se ajo, duke theksuar: “Ne nuk e bëjmë këtë.”

Por kryeministri në detyrë i Tajlandës, Phumtham Wechayachai, tha se Kamboxhia mund të jetë fajtore për krime lufte për shkak të vdekjes së civilëve dhe dëmeve të shkaktuara në një spital.

Ai tha se Tajlanda kishte ushtruar “përmbajtje dhe durim maksimal përballë provokimeve dhe agresionit” nga Kamboxhia.

Tensionet mbi një zonë kufitare të diskutueshme shpërthyen në luftime pasi një shpërthim mine tokësore përgjatë kufirit plagosi pesë ushtarë tajlandezë.

Kufiri prej 800 kilometrash midis Tajlandës dhe Kamboxhias është kontestuar për dekada, por konfrontimet e kaluara kanë qenë të kufizuara dhe të shkurtra. Shpërthimi i fundit i madh në vitin 2011 la 20 të vdekur. 

Ekonomist, zhvillues softuerësh, por edhe punonjës shërbimi në fushën e turizmit janë disa nga profesionet më të kërkuara mes 6000 mijë vendeve të lira të punës të shpallura në portalin zyrtar të punësimit puna.gov.al.

Pozicionet e punës variojnë sipas nivelit arsimor, ndërkohë që kërkesa e lartë lidhet me sezonalitetin e ndryshimeve në tregun e punës.

“Disa nga profesionet që kërkohen më shumë për nivelin e lartë janë ekonomistë, menaxher dhe drejtues, inxhinierë, analistë dhe zhvillues softëer-ësh, drejtues në sektorin e hoteleri-turizmit. Ndërsa për arsim të mesëm dhe të ulët profesionet më të kërkuara janë kamarierë dhe banakierë, kuzhinierë, shoferë të mjeteve të rënda, recepsionistë, shitës në dyqan,“ tha Gertiola Çepani, drejtore e Shërbimit të Punësimit, AKPA.

Sipas zyrtarëve të punësimit, qytetarët po tregojnë më shumë ndërgjegjësim në përdorimin e platformës digjitale, duke shmangur ndërmjetësimin fizik në aplikim.

“Është vënë re një rritje e aktivitetit për të rinjtë, sidomos për ata persona që kanë aftësi dixhitale, të cilët aplikojnë direkt për vendin e punës pa ndërmjetësimin e zyrave të punës. Pjesa tjetër e punëkërkuesve referohet nëpërmjet zyrave të punësimit.”

Aplikimi online është thjeshtëzuar, ofrohet pa pagesë dhe qëndron i hapur për të gjithë qytetarët. Institucionet e punësimit e shohin platformën si një mjet kyç për ndërmjetësimin mes ofertës dhe kërkesës në tregun e punës.