Mëngjesin e sotëm, deputeti socialist Erion Braçe, ka denoncuar me anë të një video në rrjete sociale derdhjen e ujërave të zeza, në Liqenin Artificial në Tiranë.

Socialisti shprehet se ky krim mjedisor, duhet të ndalet menjëherë dhe shton më tej se kjo evidentohet edhe për shkak të aromës së rëndë që ndihet në zonë.

“Derdhja e ujërave të zeza në liqen është krim mjedisor, mjafton të lëvizësh në këtë anën e liqenit që kufizuar me liqenin e thatë dhe zonën rreth e qark për të kuptuar thjesht nga aromat se sa ujëra të zeza po derdhen në liqen. Duhet ndalur. Kjo është e vetmja hapësirë ujore brenda parkut dhe brenda gjithë Tiranës”, dëgjohet të thotë Braçe në video.

Krahas videos, deputeti shkruan se: “DERDHJA E UJRAVE TË ZEZA NË LIQEN NGA ZONA E LIQENIT TË THATË – mbi të dhe anash tij në drejtim të Kopshtit Zoologjik, ËSHTË EVIDENTE, TË ÇAJNË HUNDET, VEÇANËRISHT PAS NJË PERIUDHE TË GJATË TË NXEHTË DHE PA RRESHJE. NUK KA DHUNIM MË TË RËNDË TË HAPËSIRËS PUBLIKE, NË KUFIJTË E NJË KRIMI MJEDISOR! DUHET TË NDAAAAAALUUUUUUR!”.

 

View this post on Instagram

 

A post shared by Erion Braçe (@erionbrace)

The post Erion Braçe denoncon krimin mjedisor: Ujërat e zeza po derdhen në Liqenin Artificial (VIDEO) appeared first on Albeu.com.

Në një intervistë televizive, meterologia Rezarta Xhakollari, u shpreh se muaji korrik do të jetë i nxehtë, me temperatura tipike për stinën e verës.

Xhakollari u shpreh se në mes të korrikut, temperaturat do të shkojnë deri në 41 gradë.

“Dita e djeshme është regjistruar 37 gradë në disa qytete. Edhe nesër, do të kemi rritje 1-2 gradë, por ende nuk kemi atë 40 gradshin e famshëm. Javës tjetër do të kemi temperatura 40 gradë.

Pas datës 21 do të kemi temperatura të larta. Nga e mërkura deri të shtunën, do të kemi temepratura 40-41 gradë celcius. Parashikohet në fund të korrikut të ketë reshje. Nga sot, na pret një korrik dinamik, por nuk kemi korrik klasik të thatë”, tha meterologia për Abc News.

The post Temperaturat e larta mbërthejnë vendin/ Flet meterologia: Ferr deri në fund të muajit, ja çfarë na pret pas datës 21 korrik appeared first on Albeu.com.

Prokuroria e Posaçme, ka dhënë pretencën për ish- kryebashkiakun e Himarës Jorgo Goro dhe ish-drejtorin Vasillaq Strakosha.

SPAK ka kërkuar dënimin me 2 vite burg për Goron, që konvertohet në 1 vit e 4 muaj pas gjykimit të shkurtuar.

Ndërsa për Strakoshën ka kërkuar dënimin me 1 vit e 6 muaj, që konvertohet në 1 vit burg.

Akuzat:

Jorgo Goro, ish- Kryetari i Bashkisë Himarë, i akuzuar për kryerjen e veprës penale të “Shpërdorimi i detyrës”, (më shume se një herë sipas fakteve penale të përshkruara ne akuzë) e kryer në bashkëpunim parashikuar nga neni 248 e 25 i Kodit Penal.

Vasillaq Strakosha, ish-Drejtor i Drejtorisë së Mbrojtjes dhe Menaxhimit të Tokës pranë Bashkisë Himarë, i akuzuar për kryerjen e veprës penale të “Shpërdorimi i detyrës”, (më shume se një herë sipas fakteve penale të përshkruara ne akuzë) e kryer ne bashkëpunim parashikuar nga neni 248 e 25 i Kodit Penal (sipas fakteve penal të procedimin penal nr. 298 të vitit 2021 i bashkuar me procedimin penal nr 127/2024.

The post Akuzohen për “Shpërdorim detyre”/ SPAK jep pretencën, ja sa vite burg u kërkua për Jorgo Goron dhe ish-drejtorin e Bashkisë Himarë appeared first on Albeu.com.

Ditën e djeshme, një ngjarje e rëndë ka ndodhur në qytetin e Vlorës, ku një 17-vjeçare është dërguar me urgjencë në spital nga familjarët, pasi ka pësuar plagë të shkaktuara nga armë zjarri.

E mitura jetonte me gjyshërit, ndërsa prindërit e saj janë të divorcuar.

Vlorë/Vijojnë hetimet për zbardhjen dhe dokumentimin e ngjarjes së ndodhur dje, në lagjen “Kushtrimi”, ku u vetëplagos rëndë me armë zjarri një 17-vjeçare.

Vihet në pranga babai i 17-vjeçares dhe procedohet në gjendje të lirë gjyshi i saj.

Në vijim të veprimeve hetimore që po kryhen në drejtimin e Prokurorisë, për zbardhjen e rrethanave të ngjarjes së ndodhur mesditën e djeshme, në lagjen “Kushtrimi”, ku një shtetase 17 vjeçe mbeti e plagosur rëndë pas tentativës për vetëvrasje me armë zjarri, specialistët për Hetimin e Krimeve të Komisariatit të Policisë Vlorë:

arrestuan në flagrancë, për veprat penale “Dhuna në familje” dhe “Shkaktimi i vetëvrasjes”, shtetasin S. S., 43-vjeç, banues në fshatin Romës, Vlorë, pasi dyshohet se, për shkak të dhunës së ushtruar ndaj vajzës së tij të mitur, ajo ka tentuar të vetëvritet, në gjendje të rënduar psikologjike, me armë zjarri të dyshuar pistoletë;

referuan materialet në Prokurori ku nisi procedimi në gjendje të lirë për shtetasin P. H., 76-vjeç, gjyshi i të miturës, për veprën penale “Mbajtja pa leje dhe prodhimi i armëve, armëve shpërthyese dhe i municionit”, pasi dyshohet se posedonte në mënyrë të paligjshme armën e zjarrit me të cilën ka tentuar të vetëvritet mbesa e tij.

Vijon puna për gjetjen e armës së zjarrit, e cila dyshohet se është fshehur nga familjarët pas ngjarjes, si dhe kryerja e veprimeve të tjera hetimore, me qëllim dokumentimin e plotë të mekanizmit dhe rrethanave të kësaj ngjarjeje.

Shtetasja e mitur ndodhet në Spitalin e Traumës, nën kujdesin e mjekëve.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

The post Ngjarja e rëndë në Vlorë/ 17-vjeçarja tentoi vetëvrasjen pasi ushtruan dhunë ndaj saj, arrestohet babai, procedohet edhe gjyshi appeared first on Albeu.com.

Në një intervistë nga Zyra Ovale, presidenti Donald Trump mbështeti NATO-n, pasi dikur e kishte përshkruar atë si të vjetëruar, duke pohuar mbështetjen e tij për parimin e mbrojtjes së përbashkët të organizatës.

Presidenti amerikan, Donald Trump, ka thënë se është i zhgënjyer, por nuk ka mbaruar ende me Vladimir Putinin, në një telefonatë ekskluzive me BBC-në.

Presidenti amerikan u pyet nëse i besonte udhëheqësit rus, teksa u përgjigj se ai nuk i beson pothuajse askujt.

Trump foli disa orë pasi njoftoi planet për të dërguar armë në Ukrainë dhe paralajmëroi për tarifa të ashpra ndaj Rusisë nëse nuk do të kishte marrëveshje armëpushimi brenda 50 ditësh.

Presidenti bëri telefonatën, e cila zgjati 20 minuta, me BBC-në pas bisedave rreth një interviste të mundshme për të shënuar një vjetorin e atentatit ndaj jetës së tij në një tubim fushate në Butler të Pensilvanisë.

I pyetur nëse mbijetesa e atentatit e kishte ndryshuar, Trump tha se i pëlqente të mendonte për këtë sa më pak të ishte e mundur.

“Nuk më pëlqen të mendoj nëse kjo më ka ndryshuar mua”, tha Trump. Duke u ndalur tek kjo, shtoi ai, “mund të më ndryshojë jetën”.

Megjithatë, pasi sapo u takua me shefin e NATO-s, Mark Rutte, në Shtëpinë e Bardhë, presidenti kaloi një pjesë të konsiderueshme të intervistës, duke folur gjerësisht për zhgënjimin e tij me udhëheqësin rus.

Trump tha se kishte menduar se një marrëveshje, ishte në plan me Rusinë katër herë të ndryshme. Kur u pyet nga BBC nëse kishte mbaruar me Putinin, presidenti u përgjigj: “Jam i zhgënjyer me të, por nuk kam mbaruar me të. Por jam i zhgënjyer prej tij”.

I pyetur se si Trump do ta bindte Putinin të “ndalonte gjakderdhjen”, presidenti amerikan tha: “Po punojmë për këtë, Gary”.

“Do të zhvillojmë një bisedë të shkëlqyer. Do të them: ‘Kjo është mirë, mendoj se jemi afër përfundimit’, dhe pastaj ai do të shembëjë një ndërtesë në Kiev”.

Biseda kaloi te NATO-ja, të cilën Trump më parë e ka kritikuar si “të vjetëruar”. I pyetur nëse ende mendonte se ky ishte rasti, ai tha: “Jo. Mendoj se NATO tani po bëhet e kundërta e kësaj”, sepse aleanca “po paguante faturat e veta”.

Ai tha se ende besonte në mbrojtjen kolektive, sepse kjo do të thoshte që vendet më të vogla mund të mbroheshin kundër vendeve më të mëdha. Trump tha se udhëheqësit e vendeve, përfshirë Gjermaninë, Francën dhe Spanjën, e kishin respektuar atë dhe vendimmarrjen e tij, pjesërisht sepse udhëheqësit botërorë besonin se kishte “shumë talent” në zgjedhjen dy herë në presidencë.

Kur u pyet nëse udhëheqësit botërorë ishin ndonjëherë “të dukshëm në lajkat e tyre”, Trump u përgjigj se mendonte se ata “thjesht po përpiqeshin të ishin të sjellshëm”.

Presidenti Trump u pyet gjithashtu, për të ardhmen e Mbretërisë së Bashkuar në botë dhe tha se mendonte se ishte një “vend i shkëlqyer – e dini që unë zotëroj prona atje”.

Lidhur me çështjen e Brexit-it, ai tha se ajo kishte qenë “disi e çrregullt, por mendoj se po rregullohet”.

Presidenti tha gjithashtu për Sir Keir Starmer se, i pëlqen shumë edhe pse është liberal dhe vlerësoi marrëveshjen tregtare Britani-SHBA.

Ai foli rreth asaj se si mezi priste një vizitë të dytë shtetërore në Mbretërinë e Bashkuar në shtator të këtij viti.

Lidhur me atë që donte të arrinte gjatë vizitës, Trump tha: “Kalofshi mirë dhe respektoni Mbretin Charles, sepse ai është një zotëri i shkëlqyer”.

The post Trump për BBC: Nuk i besoj pothuajse askujt, jam i zhgënjyer me Putinin, por nuk kam mbaruar punë me të appeared first on Albeu.com.

Çdo qytetar me vendbanim apo vendqëndrim në Shqipëri, do të ketë detyrimin të bëjë vetëdeklarimin e adresës së banimit nëpërmjet e-Albania.

Por me qëllim vërtetimin që qytetari banon në adresën e deklaruar, do të ketë detyrimin të ngarkojë dokumentin e pronësisë së apartamentit, apo të kontratës së qirasë për ata që banojnë në qira.

E njëjta procedurë do të zbatohet edhe për rastet e ndryshimit të adresës së vendbanimit, ku qytetarët do të duhet të ngarkojnë çdo dokument të ligjshëm që provon vendbanimin apo vendqëndrimin e tyre në adresën e deklaruar.

Mënyra e paraqitjes së kërkesës për deklarimin e adresës së banimit apo ndryshimit të saj, përcaktohen në vendimin “Për përcaktimin e mënyrës së paraqitjes së kërkesës, të dokumentacionit të nevojshëm, të rregullave për deklarimin dhe ndryshimin e vendbanimit ose të vendqëndrimit të shtetasve, si dhe për shtetasit në institucionet shëndetësore dhe në institucionet e ekzekutimit të vendimeve penale”.

Vendimi hyri në fuqi pas botimit në Fletoren Zyrtare.

“Shtetasit me vendbanim ose vendqëndrim në territorin e Republikës së Shqipërisë kryejnë deklarimin, ndryshimin ose saktësimin e vendbanimit apo të vendqëndrimit në rrugë elektronike (on-line), në portalin qeveritar “e-Albania”, duke ngarkuar dokumentin e pronësisë së banesës, kontratën e qiramarrjes, të huadhënies, të përdorimit ose çdo dokument tjetër të ligjshëm, që provon vendbanimin ose vendqëndrimin e tyre në adresën e deklaruar”, theksohet ndër të tjera në vendim.

Zyrat e gjendjes civile, nga ana tjetër, janë të detyruara të verifikojnë saktësinë e adresave dhe të njoftojnë qytetarët brenda 24 orëve në rast të mungesës së dokumentacionit, të cilin qytetarët duhet ta plotësojnë brenda 3 ditëve.

Vendimi po ashtu përcakton se të gjithë anëtarët e një familjeje duhet të kenë të njëjtën adresë vendbanimi, që plotëson të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë.

Në rastet kur një person kërkon të regjistrohet në një familje ekzistuese, kërkesa duhet të konfirmohet online nga kryefamiljari.

Ndryshimi i adresës nga një anëtar i rritur i familjes, kërkon gjithashtu shkëputjen nga familja ekzistuese në sistemin elektronik.

Vendimi po ashtu, përcakton se institucionet shëndetësore dhe ato të ekzekutimit të vendimeve penale, kur mbajnë shtetas për më shumë se tre muaj, kanë detyrimin të raportojnë automatikisht pranë gjendjes civile për vendqëndrimin e tyre.

Pas daljes nga këto institucione, njoftimi për përditësim të adresës duhet të bëhet brenda 5 ditëve.

Vendimi i plotë:

Shtetasit me vendbanim ose vendqëndrim në territorin e Republikës së Shqipërisë kryejnë deklarimin, ndryshimin ose saktësimin e vendbanimit apo të vendqëndrimit në rrugë elektronike (on-line), në portalin qeveritar “e-Albania”, duke ngarkuar dokumentin e pronësisë së banesës, kontratën e qiramarrjes, të huadhënies, të përdorimit ose çdo dokument tjetër të ligjshëm, që provon vendbanimin ose vendqëndrimin e tyre në adresën e deklaruar.

Shtetasi, i cili kërkon të banojë në një familje ekzistuese, paraqet kërkesën në rrugë elektronike (on-line), nëpërmjet portalit qeveritar “e-Albania”.

Kjo kërkesë duhet të konfirmohet nga kryefamiljari i familjes pritëse në portalin qeveritar “e-Albania”, duke respektuar standardet e banimit, të miratuara nga legjislacioni në fuqi.

Dokumentet e ngarkuara nga shtetasi në shërbimin elektronik në portalin qeveritar “eAlbania” ruhen në bazën e të dhënave të Regjistrit Kombëtar të Gjendjes Civile.

Deklarimi, ndryshimi ose saktësimi i vendbanimit, me kërkesë të kryefamiljarit, pasqyrohet njëkohësisht për të gjithë anëtarët e tjerë të familjes.

Anëtari madhor i familjes, i cili kërkon të ndryshojë vendbanimin, më parë duhet të kryejë procedurën e veçimit nga familja.

Të gjithë anëtarët e një familjeje duhet të kenë të njëjtën adresë vendbanimi, që plotëson të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë.

Shtetasi ka detyrimin të deklarojë vendqëndrimin e tij, përveç rasteve të parashikuara në pikën 8 të këtij vendimi.

Për shtetasit, që kryejnë dënimin në institucionet e ekzekutimit të vendimeve penale apo qëndrojnë në institucionet e paraburgimit në pritje të vendimit gjyqësor për më shumë se 3 (tre) muaj dhe shtetasit që qëndrojnë pa ndërprerje në institucione shëndetësore për kurim mjekësor afatgjatë dhe kur qëndrimi në këto institucione zgjat më shumë se 3 (tre) muaj, institucioni përgjegjës duhet të paraqesë, brenda 48 (dyzet e tetë) orëve nga plotësimi i afatit të mësipërm, pranë zyrës së gjendjes civile, që ka në juridiksion territorial institucionin përkatës, listën emërore të tyre, e cila duhet të përmbajë emrin, mbiemrin dhe numrin personal.

Kur përfundon qëndrimi i shtetasve në një nga institucionet e përcaktuara në pikën 8 të këtij vendimi, institucioni përkatës njofton zyrën e gjendjes civile, që ka në juridiksion territorial lidhur me këtë fakt, brenda 5 (pesë) ditëve.

Shkëmbimi i të dhënave, sipas pikave 8 dhe 9 të këtij vendimi, kryhet me ndërveprim nëpërmjet platformës qeveritare të ndërveprimit.

Në rastet kur konstatohet se anëtarët e së njëjtës familje kanë adresë vendbanimi të ndryshme nga njëri-tjetri, nëpunësi duhet të kryejë saktësimin e të dhënave të vendbanimit.

Me ndryshimin e vendbanimit të shtetasve, nga zyrat e gjendjes civile në bashki/njësi administrative kryhen përditësimet e përbërësve të tjerë të gjendjes civile, si elementet e adresës së vendbanimit dhe numri i votimit.

Zyrat e gjendjes civile në bashki/njësi administrative, në rastin kur konstatojnë se ka mangësi në dokumentacion për deklarimin, ndryshimin ose saktësimin e vendbanimit apo të vendqëndrimit, njoftojnë brenda 24 (njëzet e katër) orëve shtetasit për plotësimin e dokumentacionit nëpërmjet portalit qeveritar “e-Albania”.

Plotësimi i dokumentacionit të kërkuar nga zyra e gjendjes civile bëhet nga shtetasit brenda 3 (tri) ditëve nga njoftimi.

Zyrat e gjendjes civile në bashki/njësi administrative, në rastin kur konstatojnë se adresa e shtetasit nuk përmban të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë, njoftojnë, brenda 24 (njëzet e katër) orëve, shtetasit për plotësimin e dokumentacionit nëpërmjet portalit qeveritar “e-Albania”. Plotësimi i dokumentacionit të kërkuar nga zyra e gjendjes civile bëhet nga shtetasit brenda 3 (tri) ditëve nga njoftimi.

Zyrat e gjendjes civile në bashki/njësi administrative, kur konstatojnë element të pasaktë të adresës, që mund të rregullohet prej tyre, e saktësojnë këtë element kryesisht, pa qenë nevoja për aplikim nga ana e shtetasit. 16.

Drejtoria e Përgjithshme e Policisë së Shtetit apo zyra që mbulon shtetësinë dhe refugjatët njofton shërbimin e gjendjes civile për çdo akt që krijon, shuan apo ndryshon të drejta lidhur me vendqëndrimin e shtetasve të huaj me leje qëndrimi, të shtetasve të huaj që kanë fituar statusin e refugjatit ose të mbrojtjes plotësuese, si dhe të personave pa shtetësi.

Nëpunësi i zyrës së gjendjes civile, pas marrjes së dokumentacionit dhe të kërkesës nga shtetasit apo nga institucionet që e kanë këtë detyrim ligjor, bën deklarimin ose ndryshimin e adresës së shtetasit të huaj në Regjistrin Kombëtar të Gjendjes civile, sipas rregullave të përcaktuara nga legjislacioni në fuqi për të huajt.

Vendimi nr. 1243, datë 11.12.2009, i Këshillit të Ministrave, “Për përcaktimin e dokumenteve, që duhen të paraqesin shtetasit, e të procedurave që duhet të kryejnë zyrat e gjendjes civile, në bashki/ njësi administrative dhe institucionet shtetërore të posaçme, për ndryshimet e vendbanimit/adresës së shtetasve”, të ndryshuar, shfuqizohet.

Ngarkohen Ministria e Brendshme, Drejtoria e Përgjithshme e Gjendjes Civile, zyrat e gjendjes civile në bashki/njësi administrative, Ministria e Drejtësisë, Ministria e Shëndetësisë dhe Mbrojtjes Sociale dhe njësitë e vetëqeverisjes vendore për zbatimin e këtij vendimi. Ky vendim hyn në fuqi pas botimit në Fletoren Zyrtare./ Monitor

The post Vetëdeklarimi i adresës në e-Albania me dokumente pronësie do të jetë i detyrueshëm, ja si do të funksionojë appeared first on Albeu.com.

Shqipëria kryesoi Europën në vitin 2024, për normat më të larta të migracionit neto negativ (kthimet minus ikjet) me -12.1 banorë të larguar nga vendi për 1000 banorë në vitin 2024, nga -11.7 që ishte ky tregues në vitin 2022.

Emigrimi neto jo vetëm që nuk po përmirësohet, por fenomeni është bërë kronik dhe po thellohet në mënyrë të qëndrueshme. (shiko tabelën e mëposhtme).

Të dhënat e Eurostat, tregojnë se për çdo 1000 banorë vitin e kaluar mbi 12 janë larguar nga vendi një normë shumë herë më e lartë se vendet e tjera të Rajonit dhe Europës Lindore, ku në shumicën prej tyre me 2024 kthimet në shtëpi janë më ta larta se ikjet.

Në pjesën më të madhe të Bashkimit Europian ka rënie të emigracionit pas vitit të jashtëzakonshëm 2022, kur lufta në Ukrainë dhe lirimi i kufizimeve pandemike sollën flukse të larta lëvizjeje, por në Shqipëri tendenca është krejt e kundërt. Emigrimi nuk po ndalet dhe duket se nuk ka asnjë ngadalësim real.

Rezultatet tregojnë se në shumicën e vendeve te Ballkanit kthimet janë më të larta se ikjet në 2024. Në Bosnjë emigracioni neto ishte 0.1% më 2024, nga një trend negativ në vitet e shkuara.

Bilanci i migracionit neto u kthye pozitiv ishe ne Maqedoninë e Veriut , +0.3 më 2024 nga negativ që ishte në vitet e shkuara.

Gjithashtu, në Serbi ka tendenca pozitive pasi ikjet me kthimet u barazuan me 2024, nga një bilanc negativ që ishte në të shkuarën.

Sipas të dhënave zyrtare të INSTAT për 1 janar 2025, mosha mediane e popullsie shqiptare rrit me 0,8 vjet brenda 1 viti duke arritur në 44,3-vjeç, ndërsa emigracioni neto (ikjet minus ardhjet) arritën në rreth -29 mijë persona. Në dy vite 2023 dhe 2024 emigrimi neto shënoi -72,597 persona.

Nga viti 2015 deri në 2020, emigracioni neto (ikjet minus ardhjet) ishte rreth -16 mijë persona në vit, 80% e tyre të rinj, ndërsa nga 2020 – 2025 ky tregues është mesatarisht -34,5 mijë në vit. Emigracioni i të rinjve është rritur më shumë se dyfishi pas pandemisë

Anketat e Monitor, kanë treguar se, njerëzit nuk po largohen vetëm nga varfëria, por edhe mungesa e shpresës se gjërat mund të përmirësohen dhe gjithashtu, vlerësojnë të rëndësishme mungesën e cilësisë në shërbimet shëndetësore dhe arsimore.

Më shumë se 66% e të anketuarve që jetojnë në Shqipëri, 568 persona nga 857 gjithsej, dhanë si arsye për emigrimin “mungesën e perspektives për të ardhmen”.

Gjithashtu, më shumë se gjysma mendojnë si arsyen e dytë më kryesore për largimin nga vendi “standardet më të larta të jetesës”, në vend të tretë “mungesa e një shërbimi shëndetësor të përshtatshëm”, në vend të katërt, ”mungesa e sigurisë dhe stabilitetit politik, ndërsa 46% e të anketuarve kishin si një arsye “arsim më të mirë për fëmijët”.

Ndryshe nga vende që kanë krijuar politika për të tërhequr ose rikthyer diasporën, Shqipëria nuk ka asnjë politikë efektive për të ruajtur apo kthyer qytetarët e saj.

Për më tepër, shpesh emigrimi është parë si “zgjidhje” e heshtur për të ulur presionin ekonomik dhe social brenda vendit.

Kjo humbje e vazhdueshme njerëzore solli pasoja të drejtpërdrejta ekonomike, sociale dhe demografike. Tregu i punës po ngushtohet, popullsia po plaket dhe zonat rurale po boshatisen.

Shërbimet publike, nga arsimi tek shëndetësia, po e ndiejnë mungesën e specialistëve, ndërsa investimet po zhvendosen drejt vendeve me më shumë stabilitet demografik.

Nëse në disa vende të rajonit kjo prirje po zbutet falë politikave të rikthimit ose integrimit në tregje më të mëdha, në Shqipëri mungesa e një strategjie të qartë për të ndaluar ose kthyer valët e emigrimit vetëm sa po e përkeqëson situatën./ Monitor

The post Eurostat: Shqipëria kryesoi Europën për emigracion neto negativ më 2024 appeared first on Albeu.com.

Sot, më 15 korrik 2025, dollari amerikan, blihet me 82.8 lekë dhe shitet me 83.8 lekë.

Euro, blihet me 97.2 lekë dhe shitet 98 lekë.

Franga zvicerane, këmbehet në blerje me 103.8 lekë, ndërsa në shitje me 104.8 lekë.

Paundi britanik, blihet me 111.8 lekë dhe shitet me 113 lekë.

Dollari kanadez, sot në blerje këmbehet me 60.4 lekë, ndërsa në shitje me 61.8 lekë.

Më poshtë, po sjellim të dhënat e këmbimin valutor, për të gjitha monedhat e huaja:

The post Këmbimi valutor/ Çfarë po ndodh me monedhat e huaja? Me sa po blihen dhe shiten dollari dhe euro appeared first on Albeu.com.

Ditën e sotme, i nxehti Afrikan vijon ndikimin e tij edhe gjatë ditës, duke sjellë mot të kthjellët dhe temperatura të larta, ku vlera ekstrem priten në zonat Jugore deri në 39 gradë Celcius.

Orët e pasdites sjellin prezencë të vranësirave të pakta në të gjithë territorin e vendit, ku më të dukshme do të jenë në zonat verilindore dhe juglindore, duke sjellë momenet me pika shiu.

Rritet ndjeshëm lagështira relative në ajër, duke bërë që i nxehti të ndjehet edhe më shumë.

Temperaturat e ajrit do të rriten sërisht në mesditë, duke luhatur vlerat ditore nga 9°C temperatura më e ulët e shënuar në qytetin e Ersekës deri në 39°C vlera më e lartë, e cila pritet për-gjatë Ultësirës Perëndimore.

Era do të fryjë e lehtë dhe herë pas herë mesatare me shpejtësi mbi 40 km/h nga drejtimi permanent Veriperëndimor, duke krijuar në brigjet detare dallgëzim 3 ballë.

The post Parashikimi i motit 15 Korrik 2025/ Rikthehet i nxehti afrikan, ja qyteti ku temperaturat pritet të arrijnë pikun appeared first on Albeu.com.

Dashi

Marrëdhënia me atë qe keni ne krah do jete shume e paqëndrueshme gjate kësaj dite. Nuk do jeni shume ne humor dhe here pas here do debatoni ashpër me te. Beqaret do jene te parrezistueshem dhe do marrin propozime pa fund. Ne planin financiar nuk do keni dëshirë te ulni shpenzimet dhe kjo mund ta përkeqësoje gjendjen ne te cilën ndodheni.

Demi

Kjo dite do jete mjafte përshtatshme për te bere disa rregullime ne jetën tuaj ne çift ose për te marre vendime për te ardhmen. Te dy do jeni realiste dhe te qarte pe rate qe doni te bëni. Beqaret jo vetëm qe do kenë takime, por mund te fillojnë edhe histori dashurie pasionante. Ne planin financiar merrini gjerat shtruar edhe sikur t’iu dalin vështirësi.

Binjaket

Kjo dite do jete mjaft romaneske për te dashuruarit. Gjithçka do ndodhe si me magji dhe here pas here do iu duket vetja sikur jeni vërtet ne një ëndërr te bukur. Beqaret nuk do jene ne humorin e duhur për te dale e për te njohur persona te rinj. Për një buxhet te qëndrueshëm shpenzoni aq sa ua mban xhepi jo me tepër. Vetëm disa mund te përfitojnë ndonjë shpërblim nga puna.

Gaforrja

Dita do filloje me se miri sot, por me kalimin e orëve situata do iu dale jashtë kontrollit. Mos lejoni qe problemet ne pune apo ne familje te ndikojnë ne lidhjen tuaj. Beqaret duhet te reflektojnë shume here para se te pranojnë ndonjë takim me persona qe sapo i kane njohur. Te ardhurat do jene ne te njëjtën gjendje si disa dite me pare. Nuk keni perse te shqetësoheni.

Luani

Do jete dita me e favorshme sot për te zgjidhur te gjitha debatet dhe problemet ne çift. Do toleroni me shume se kurdoherë tjetër. Beqaret do jene ne kërkim te princit te kaltër, por nuk do arrijnë dot ta gjejnë as gjate kësaj dite. Buxhetit do i bëni një riorganizim te përgjithshëm sepse kohet e fundit e kishit lënë goxha pas dore. Dëgjojini edhe këshillat e disa te afërmve.

Virgjeresha

Ata qe janë ne një lidhje do jeni me te ndjeshëm dhe me romantike gjate kësaj dite. Priten çaste te mrekullueshme pranë atij qe dashuroni. Beqaret do kenë një dite te zakonshme pa ndonjë takim mbresëlënës. Mos kërkoni asgjë me ngut ose me inat. Financat do kërkojnë me tepër vëmendje. Po i kaluat limitet e shpenzimeve do keni vështirësi te mëdha.

Peshorja

Do jeni shume xheloze ndaj partnerit tuaj gjate kësaj dite dhe kjo do sjelle probleme serioze ne lidhjen qe keni dertuar. Mos e teproni nëse nuk doni ta humbisni atë qe keni ne krah. Beqaret me mire te qëndrojnë vetëm sepse përndryshe do përballen me zhgënjime. Edhe pse do e keni te vështirë te kurseni duhet me doemos ta bëni këtë qe te mos keni vështirësi financiare.

Akrepi

Dite shume e mire kjo e sotmja për ata qe janë ne një lidhje. Do ndiheni te sigurte dhe te lumtur pranë atij qe keni ne krah dhe do dëshironi qe t’i bëni gjerat me serioze. Beqaret nuk do jene ne humorin e duhur për te kërkuar dike. Financat do jene goxha te paqëndrueshme. Shmangni çdo lloj shpenzimi te tepruar dhe çdo lloj huaje. Nuk është ende momenti për ta lënë veten te lire.

Shigjetari

Dite shume e zakonshme dhe pa asgjë te veçante kjo e sotmja. Merrini gjerat si t’iu vijnë pa e vrare shume mendjen se ç’do ndodhe me tej. Beqaret duhet te gjejnë mënyrën e duhur për te joshur personin qe pëlqejnë dhe do ia arrijnë qëllimit. Te ardhurat nuk do jene te mira për te gjithë. Ata qe kane pasur probleme do e kenë serish te vështirë te kryejnë ndonjë shpenzim me tepër.

Bricjapi

Jeta sentimentale e çifteve do jete e mrekullueshme sot. Do flisni me hapur për gjithçka dhe nuk do mani me mëri për te kaluesen. Beqaret do jene te lire te bëjnë çfarë te duan sepse mundësitë për takime dhe për aventura do jene te shumta. Financat do jene me delikate se disa dite pa pare, prandaj duhen marre sa me shpejt masa strikte.

Ujori

Do jeni shume te qarte për ato qe doni te bëni ne jetën tuaj ne çift sot dhe marrëdhënia me partnerin do ketë ndryshime. Nëse jeni lodhur nga rutina e kohëve te fundit mund te merrni vendime drastike. Beqaret nuk do jene ne humorin e duhur për te dale e për t’u njohur me persona te rinj. Ne planin financiar do jene disa te afërm qe do iu ndihmojnë ta stabilizoni situatën.

Peshqit

Do jeni gjithë kohës me nerva sot dhe shpesh do ja nxirrni gjithçka atij qe keni ne krah. Kujdes mos e teproni sepse edhe durimi e ka një kufi. Beqaret do jene pa fat kështu qe edhe sikur te kërkojnë gjithë kohës nuk do e gjejnë princin e kaltër. Ne planin financiar do jeni me fat. Do shpenzoni për gjithçka qe doni dhe do hiqni edhe disa para mënjanë.

The post Horoskopi 15 Korrik, ja çfarë kanë parashikuar yjet për ju appeared first on Albeu.com.

Në episodin më të fundit të podkastit të Alketa Vejsiut,

Ledri Vula vazhdoi të tregojë më shumë nga jeta e tij personale, këtë herë për një temë që rrallë e ka prekur publikisht.
Kur Alketa e pyeti drejt:

“A të kanë tradhtuar ndonjëherë?”,

Ledri u përgjigj pa u menduar gjatë:
“Po.”

Megjithatë, reperi nuk dha asnjë detaj më shumë dhe nuk zbuloi se për kë bëhej fjalë, duke ruajtur diskrecionin e zakonshëm për çështjet e ndjeshme personale.

Përgjigjja e tij e shkurtër, por e qartë, mjaftoi që të nxiste reagime dhe kureshtje në rrjetet sociale, ku fansat kanë nisur të spekulojnë për periudhën apo personin në fjalë.

Si gjithmonë, Ledri e lë të hapur interpretimin, duke folur shumë me pak fjalë.

The post ‘A të kanë tradhëtuar ndonjëherë?’ Ledri Vula jep përgjigjen befasuese appeared first on Albeu.com.

Emisioni “FiksFare” denoncoi mosveprimet e Policisë së Sarandës për kërcënimet dhe sharjet e dy motrave në rrjetin social “Tik Tok”, të cilat thanë për emisionin se persona që fshihen pas një tastiere shkruajnë ofendime shumë të rënda.

Të dyja, njëra 19 dhe tjetra 36 vjeçe, deklaruan se një person u hedh foto dhe video me imazhet e tyre në “Tik Tok”, duke i sharë dhe ofenduar.

Ato kanë bërë ankesë dhe kallëzim në Policinë e Sarandës, por deri kur u ankuan te Fiksi s’ishte marrë asnjë masë. Policia vetëm sa i sorollat!

“Na shajnë dhe ofendojnë. Nga fjalët më banale të ndryshme dhe me etiketime nga më të rëndat. Duhet të jenë persona të njohur, pasi na përmendin edhe detaje nga jeta jonë, dinë ku qëndrojmë, ku shkojmë në shkollë dhe çfarë bëjmë gjithë ditën” thotë njëra prej tyre.

Ndërkohë, më e vogla shton se ata që i bëjnë këto shkrime e dinë se ku bëjnë shkollën, çfarë mësuese ka dhe çfarë lënde jep. “Unë jam në shkollë profesionale dhe e dinë se kur shkoj dhe kush më jep mësim. Më shkruan fjalët më banalet” thotë e reja. Ato thonë se kanë shkuar disa herë në Policinë e Sarandës, pasi ka edhe specialistë të kibernetikës, por s’kanë ndërhyrë. “Ankesa vazhdimisht. Na thonë jo nuk mbyllin, s’po i identifikojmë dot” pohojnë motrat. Sipas tyre, faqja që është hapur në “Tik Tok” quhet “ENIGMA”.

Pas ankesës, dy motrat shkojnë në Policinë e Sarandës dhe takojnë specialistin e kibernetikës, atje ku kanë bërë edhe kallëzimet dhe ankesat. Ai i thotë se ka edhe raste të tjera, por është problem që të hiqen pasi nuk gjenden. Specialisti shton se çështja ka shkuar edhe në prokurori dhe mirë është që të shkoni edhe atje.

“S’ke ç’u bën atyre. Janë edhe të tjerë që iu është bërë diçka e tillë. Janë ankuar, po ajo specialistja tjetër që merret është me leje dhe sa të kthehet do të merret” shton ai. Specialisti i thotë se janë këqyrur ato faqe dhe se faqja në “Tik Tok” quhet “ENIGMA”. “Shko interesohu edhe njëherë në Prokurorinë e Sarandës. I kam çuar letrat dhe ata duhet të ndërhyjnë” thotë ai.

Fiksi u interesua edhe në Policinë e Shtetit për këtë rast, ku mësuam se çështja do të ndiqej me përparësi. Mësohet se specialistët e Tiranës kontaktuan me Sarandën, ku u morën masa paraprakisht, pasi është kontaktuar edhe me rrjetin social “Tik Tok” dhe faqja u mbyll. Por, asnjë person s’u identifikua!

The post FOTO/ Kërcënohen dhe ofendohen dy motra nga Saranda në “TikTok”, policia nuk ndërhyn appeared first on Albeu.com.

Mbrëmjen e kësaj të hëne është shembur edhe godina e fundit e ndërtuar pa leje në zonën e Thethit. Përtej rezistencës së banorëve dhe rezistencës së tyre, objektet pa leje janë shembur pas një urdhri të Kryeministrit Edi Rama.

Një banor i zonës, pronar i objektit të shembur, deklaroi për mediat këtë mbrëmje se nuk do të ndalen së protestuari. Ai është shprehur se nëse është e nevojshme, do të japin edhe jetën.

“Po, do rezistojmë deri në fund, do japim dhe jetën, nuk ka problem. A do vdesim një ditë? Një ditë do vdesim dhe borxhet i marrim me vete, na i paguan Edi Rama bashkë me Benet Becin. I bëjmë thirrje gjithë Shqipërisë, botës dhe ambasadave të bashkohen me ne. Ta shpëtojnë Thethin që duan ta grabisim.

U tha mbrëmë se po bëjmë diçka, sonte kanë ardhur për të na prerë në besë. Më i madhi i Shkodrës duhej të kishte qenë me ne, të qante hall me ne. Hajdeni na shihni se kemi hall.

Edi Rama na ka thënë sot se nuk kanë shembur shtëpia të thethianëve. Ne jemi fiks nga Thethi dhe thojini Ramës se këtu na ke deri të vish ti të na shikosh”, u shpreh një nga banorët.

The post Shembjet në Theth, sipërmarrësi thirrje shqiptarëve dhe ndërkombëtarëve: Bashkohuni me ne, jemi gati të japim jetën appeared first on Albeu.com.

Drejtuesi i SPAK, Altin Dumani kërkoi shkarkimin e prokurores së Vlorës, Flora Çela për dështime të përsëritura në hetimin e çështjeve, veçanërisht për mënyrën e hetimit të kryer pas kapjes së 16 tonë cannabis sattiva në vitin 2017. Subjekti kundërshtoi gjetjet duke pretenduar se nuk kishte shkelje penalizuese.

Drejtuesi i SPAK, Altin Dumani u qëndroi shkaqeve të ankimit ndaj konfirmimit në detyrë të prokurores së Vlorës, Flora Çela duke kërkuar shkarkimin e saj për probleme në kriterin e profesionalizimit dhe në vlerësimin tërësor të çështjes në drejtim të cënimit të besimit të publikut tek drejtësia.

Dumani i filloi bisedimet përfundimtare në këtë çështje lidhur me hetimin e kryer nga prokurorja Çela për 16 tonë cannabis sattiva të kapur në Vlorë në vitin 2017. Ai vërejti se çështja ishte regjistruar për prodhim dhe shitje të narkotikëve, armëmbajtje pa leje dhe pastrim të produkteve të veprës penale.

Sipas Dumanit, sasia e konsiderueshme e drogës, e paketuar dhe gati për transport, sasia e armëve dhe municioneve të sekuestruara, si dhe arrestimi zyrtarëve publikë, tregonte se kishte një organizim të gjerë për mundësimin e trafikimit të 16 tonëve hashash.

Ai theksoi se subjekti dështoi që të shpjegojë gjatë hetimit administrativ dhe në Kolegj, përse nuk e ka transferuar atëherë çështjen në ish-Prokurorinë e Krimeve të Rënda, pasi dukej se bashkëpunimi kishte qenë i posaçëm. Deklarimi i subjektit se Krimet e Rënda atëherë ishin mbyllur, u gjet i pavërtetë. Dumani solli në vëmendje se ish-Prokuroria e Krimeve të Rënda kishte vijuar të ushtronte veprimtarinë edhe dy vjet pas regjistrimit të këtij procedimi të hetuar prej subjektit.

Po ashtu, një DVR e sekuestruar në një lokal, prej nga mund të siguroheshin të dhëna për bashkëpunëtorët dhe organizatorët e sigurimit dhe trafikimit të kësaj lënde narkotike, ishte kqyrur një vit më vonë. Sipas procesverbaleve të mbajtur, është shënuar se nuk funksiononte, ndërkohë që Dumani theksoi se kqyrja duhej të ishte realizuar nga ekspertë.

Edhe gjatë caktimit të masave të sigurisë, sipas Dumanit, subjekti duket se ka zbehur ekzistencën e dyshimit të arsyeshëm, ndërsa nuk ka kryer hetimin pasuror për një prej personave të dyshuar.

Dumani tha se është e provuar se subjekti nuk ka kryer veprimet e duhura hetimore lidhur me sigurimin e sasisë së drogës dhe as për destinacionin.

Ai theksoi se nga ky rast, më së paku nxirren në pah mangësi dhe hetime të dobta të kryera nga ana e subjektit, prej nga është bërë e pamundur të zbardhet i plotë mekanizimi i ngjarjes dhe roli i përgjegjësisë së secilit prej pjesëmarrësve në ato veprime të paligjshme.

Dumani pohoi se subjekti nuk ka arritur të provojë të kundërtën e gjetjeve të hetimit administrativ edhe në disa çështje të tjera të hetuara prej saj. Ai kërkoi që gjetjet të konsiderohen në vlerësimin tërësor.

Në përfundim, drejtuesi i SPAK u shpreh se mangësitë profesionale të konstatuara, e bëjnë të pamundur përmbushjen e kritereve kushtetuese për kualifikimin profesional të prokurores Flora Çela dhe kërkoi shkarkimin e saj nga detyra.

Subjekti i kundërshtoi shkaqet e Dumanit, duke parashtruar intepretim ligjor të kundërt për faktet e konstatuara. Përfaqësuesja e saj ligjore, avokatja Romina Zano paraqiti një analizë ligjore, duke pretenduar se gjetjet nuk mund të sjellin penalizim. Duke sjellë në vëmendje opinionet e Komisionit të Venecias dhe jurispudencën e Gjykatës Kushtetuese, Zano tha se vlerësimi profesional duhet të kryhet bazuar në partimet e objektivitetit dhe proporcionalitetit. Sipas saj, vlerësimi profesional duhet të mbështetet në indikatorë konkretë e të matshëm dhe se çdo konstatim për të metat e subjektit duhet të jetë i arsyetuar mbi akte konkrete.

Zano tha se subjekti mund të konsiderohet i papërshtatshëm, nëse shfaq gjykim të dobët, mosrespektim të të drejtave të palëve në proces, si dhe kur gabimet janë të rënda e të përsëritura.

Prokurorja Flora Çela paraqiti mbrojtjen për çështjet e relatuara nga Dumani. Ajo këmbënguli se në hetimin e 16 tonëve cannabis sattiva ka vepruar në përputhje me Kodin e Procedurës Penale.

Ajo theksoi se nuk ka mohuar tendencën e trafikimit të lëndës narkotike, por nga aktet e administruara nuk ka pasur prova konkrete për një gjë të tillë. Sipas subjektit, pjesa më e madhe e drogës kishte qenë e degraduar dhe nuk mund të tregtohej. Çela pretendoi se nuk ka pasur elementë që të procedonte për grup të strukturuar kriminal. Ajo solli si argument faktin se kur kishte elementë të trafikimit të lëndës narkotike apo të grupit të strukturuar kriminal, atëherë policia e referonte çështjen drejtëpërdrejtë tek ish-Prokuroria e Krimeve të Rënda.

Në vijim, subjekti tha se nuk u arrit të gjendeshin të dhëna për bashkëpunim të posaçëm, pasi të dyshuarit ishin dy persona, ndërkohë që për grup të strukturuar kriminal duhet bashkëpunimi i tre personave.

Lidhur me kqyrjen me vonesë të pajisjes, prej nga mund të siguroheshin të dhëna për persona të tjerë, subjekti tha se pajisjes në fjalë i ishte hequr ‘truri’ dhe nuk kishte mundësi të siguroheshin informacione shtesë. Për këtë arsye, sipas saj nuk është kryer ekspertimi.

Çela deklaroi ndër të tjera se kishte kryer hetime për aq sa kishte pasur prova. Ajo kundërshtoi edhe gjetjet e çështjeve të tjera dhe konstatimin për cënim të besimit të publikut, duke theksuar se nuk gjendej në të tilla kushte. Në përfundim, prokurorja Flora Çela kërkoi lënien në fuqi të vendimit.

Kolegji u tërhoq për marrjen e vendimit që njoftoi se do ta shpallë më datë 25 korrik, në orën 15:30./Reporter.al/

The post Dështoi në hetimin e disa çështjeve, Altin Dumani kërkon shkarkimin e prokurores Flora Çela appeared first on Albeu.com.

Presidenti ukrainas Volodymyr Zelensky shprehu mirënjohjen e tij ndaj Presidentit të SHBA-së Donald Trump për gatishmërinë e tij për të mbështetur popullin ukrainas, duke theksuar se lufta vazhdon vetëm për shkak të Rusisë dhe këmbënguljes së Vladimir Putin për ta zgjatur atë.

“Rusia po përpiqet ta paraqesë luftën si ‘normalitetin e ri’. Ne kurrë nuk duhet ta pranojmë këtë. Paqja është e mundur vetëm përmes forcës ”, theksoi Zelensky, duke vënë në dukje se duhet bërë gjithçka për të ndaluar gjakderdhjen , për të arritur paqe të vërtetë dhe për të siguruar sigurinë.

Presidenti ukrainas ka bërë përsëri thirrje për ndalimin e të gjitha financimeve të luftës ruse, si dhe bllokimin e marrëdhënieve të Moskës me Iranin dhe Korenë e Veriut.

“Të gjitha furnizimet me pajisje dhe komponentë që forcojnë industrinë ushtarake ruse duhet të ndalen”, tha ai.

Në të njëjtën kohë, ai shprehu kënaqësinë e tij me përpjekjet e koordinuara me Shtetet e Bashkuara, Gjermaninë dhe Norvegjinë në lidhje me vendimin e ri për të furnizuar Ukrainën me sisteme Patriot. Siç theksoi ai, Kievi po punon paralelisht për të arritur marrëveshje të rëndësishme mbrojtëse me Uashingtonin.

Në përfundim, Zelensky siguroi se Ukraina mbetet plotësisht e gatshme për çdo përpjekje të sinqertë dhe efektive drejt paqes së qëndrueshme dhe sigurisë së vërtetë.

“Rusia është ajo që nuk është e gatshme dhe duhet të detyrohet dhe kjo është pikërisht ajo që po ndodh tani”, përfundoi ai.

The post “Mirënjohës ndaj Trump për mbështetjen ushtarake”/ Zelensky: Paqja do të vijë vetëm përmes forcës appeared first on Albeu.com.

Kryeministri Edi Rama ka bërë një postim mbrëmjen e sotme në rrjetet sociale teksa aksioni për prishjen e ndërtesave pa leje në Theth po shkon drejt përfundimit. Rama thotë se tashmë ka filluar Rilindja Urbane 2.0 si domosdoshmëri jetike për Shqipërinë 2030 në BE.

Ai thotë se ka nisur sot në Theth me mbështetjen e forcave të xhenjos, pastrimi i mbetjeve inerte të ekzekutimit të vendimeve në ngarkim të 40 subjekteve që kishin mbjellë mbi 100 ngrehina pa leje. Kreu i qeverisë thekson se forcat e xhenjos nuk do të largohen nga Thethi deri kur të jetë hequr edhe mbeturina e fundit.

Rama thotë se mbetet edhe një godinë masive për t’u shembur, që të përmbyllet ekzekutimi i plotë i vendimeve të IKMT dhe rikthimi i Thethit, sipas tij, në normalitetin e para kësaj “marrëzie kriminale”, siç e quan kryeministri.

POSTIMI:

Ka nisur sot në Theth me mbështetjen e forcave të xhenjos, pastrimi i mbetjeve inerte të ekzekutimit të vendimeve në ngarkim të 40 subjekteve që kishin mbjellë mbi 100 ngrehina pa leje – nga ato me mure tek ato me kontruksion metalik e me dru – në dhunim ekstrem të ligjit për zonat e mbrojtura, të historisë e të pejsazhit magjepsës të asaj zone dhe të turizmit që kanë kultivuar në vite ata që kanë sakrifikuar për ta bërë Thethin destinacionin që është sot.

Forcat e xhenjos nuk do të largohen nga Thethi deri kur të jetë hequr edhe mbeturina e fundit, ndërkohë që mbetet edhe nje godinë masive për t’u shembur, që të përmbyllet ekzekutimi i plotë i vendimeve të IKMT dhe rikthimi i Thethit në normalitetin e para kësaj marrëzie kriminale Ka filluar Rilindja Urbane 2.0 si domosdoshmëri jetike për Shqipërinë 2030 në BE.

The post “Ka filluar Rilindja Urbane 2.0!” Rama: Forcat e xhenjos nuk do të largohen nga Thethi deri kur të jetë hequr edhe mbeturina e fundit appeared first on Albeu.com.

Vijojnë tensione në aksionin e IKMT-së për shembjen e ndërtesave pa leje në Theth, teksa raportohet se disa banorë, familjarë janë futur brenda një banese dhe po pengojnë prishjen e saj.

Sipas informacioneve, disa banorë po kundërshtojnë prishjen një godine ndërsa fadroma e IKMT ka mbërritur në objektin e fundit që ishte llogaritur për t’u shembur.

Bëhet me dije se pronarët kanë kërkuar më parë që të pritet verdikti i gjykatës pasi çështja është në gjykatë dhe brenda 5 ditëve mund të merret vendimi.

The post Tensione në aksionin e IKMT-së për shembjen e ndërtesave pa leje në Theth, banorët futen në banesë, nuk lejojnë prishjen e objektit appeared first on Albeu.com.

Ish-presidenti Bamir Topi, në emisionin “Të Paekspozuarit” në MCN TV iu rikthye përpasjeve të ashpra madje edhe publike me kryeministrin Sali Berisha në vitet 2008 dhe më pas në vitin 2011.

Ai tha se përplasja e parë ndodhi pas shpërthimit në Gërdec ku vdiqën 26 njerëz dhe u plagosën mbi 300 të tjerë, pas të cilës edhe u bë edhe marrëveshja Berisha-Rama për ndryshimet kushtetuese. Ndërsa kulmi i përplasjeve institucionale ndodhi pas vrasjes së 4 protestuesve në bulevard, përpara kryeministrisë më 21 janar 2011, gjatë protestës së organizuar nga PS-ja, kut Topi tha se mbështeti organet e drejtësisë që ishin sulmuar ashpër nga kryeministri i asaj kohe, Berisha.

“Përplasja e vërtetë me Berishën ka ndodhur në vitin 2008 dhe ka qenë shumë institucionale. Nisi pas 15 marsit 2008 me shpërthimin e Gërdecit. Pasi jemi kthyer nga Bukureshti kur morën ftesën për anëtarësimin në NATO dhe 2-3 ditë pas këtij momenti shikoj flash informativ që vinte nga komisioni i ligjeve dhe çështjeve kushtetuese, i cili po trajtonte marrëveshjen që është votuar më 21 prill 2008. Aty ngrihet një ish-deputete e Shkodrës dhe propozon që ndryshimet kushtetuese që do të bëheshin të kundërfirmoseshin nga kryeministri. Kishte filluar lufta. Ishte një nga normat më antidemokratike. Ky episod ngriti alarmin se unë s’kisha asgjë në dorë, asnjë letër. Unë mora informacionin se këta po punonin me opozitën. Ishte një projekt i Berishës dhe i Ramës dhe e futën Shqipërinë në një periudhë krizash ciklike.

Me kushtetutën që këta realizuan ti mund të zëvendësosheshe për 24 orë me 71 vota jo me 84 si më parë.

Kam folur një javë para se të miratohej kjo marrëveshje okulte se dëmi ishte te partitë brenda, beteja kundër institucioneve, kthimi nga republikë parlamentare në republikë kryeministore. Ka 17 vite që unë i bie kësaj melodie që opozita sot e mallkon, por nuk e thotë dot se e ka arkitektin aty brenda.

Një javë pas Gërdecit unë thirra Këshillin e Sigurisë Kombëtare dhe në atë takim ka patur diskutime që mbeten aty brenda, janë në Arkivën e Presidencës.

Përplasja jonë vjen në 21 janar 2011. Këtu gjërat harrohen shumë shpejt. Pas asaj që ndodhi në bulevard unë kam dalë në një status dhe ka qenë shqetësim maksimal nga ana ime se ishin vrarë njerëz dhe mesa duket ajo që kam cilësuar ka qenë vrasjet në bulevard dhe nuk kam thënë vrasjet në kryeministri. Të gjithë e panë skenën 3D dhe mbajta qëndrim shumë të fortë dhe më pas u dhashë mbështetje publike institucioneve të drejtësisë nga prokurorja e përgjithshme e më tej”- u shpreh ndër të tjera ish-presidenti Topi.

The post Bamir Topi: Përplasja ime me Berishën nis pas Gërdecit dhe kulmon në 21 Janar! appeared first on Albeu.com.

Kësaj here në zyrën ovale dhe në prani të sekretarit të përgjithshëm të NATO-s, Mark Rutte, kreu i Shtëpisë së Bardhë thotë se ndaloi konfliktin dhe se sekretari i shtetit, Marko Rubio, po punon mbi atë çështje dhe gjithashtu në ndalimin e luftërave të tjera.

“Kemi qenë shumë të suksesshëm në ndalimin e luftrave. Zgjidhëm atë mes Indisë dhe Pakistanit. Kishit Ruandën dhe Kongon që vazhdonte prej 30 vitesh.

Meqë ra fjala për Indinë dhe Pakistanin, do të kishte qenë një luftë bërthamore nëse vazhdonte dhe një javë tjetër. Ashtu si po shkonte, po bëhej shumë keq. E ndalëm atë përmes tregtisë. U thashë se nuk do bënim tregti, nëse nuk e zgjidhin këtë. Dhe kështu që ndaluan.

Ruanda dhe Kongo po vazhdon prej 30 vitesh si luftë. Të paktën 7 milionë njerëz u vranë me armë shumë mizore, si hanxharë. Askush nuk u afrohej vendeve. Zgjidhëm çështjen mes Serbisë dhe Kosovës. Ishte një luftë që do të ndodhte. Në atë çështje përdora tregtinë, në fakt e përdor edhe për shumë gjëra. Tregtia është diçka e mirë për të mbyllur luftëra. Ishte me të vërtetë e rëndësishme shumë. Marco po punon fort me të gjithë këtu për paqen”, tha Trump.

The post Deklarata pranë kreut të NATO-s, Trump: Do kishte luftë Serbi-Kosovë, por e zgjidhëm appeared first on Albeu.com.

Një aksident i rëndë ka ndodhur mbrëmjen e sotme në aksin Elbasan-ish-Metalurgji.

Mësohet se një automjet ka përplasur një person i cili po qarkullonte me biçikletë në vendin e quajtur ish-qendra tregtare.

Si pasojë e përplasjes drejtuesi i biçikletës mësohet se ka pësuar dëmtime të shumta në kokë dhe ndodhet në gjendje kritike për jetën.

The post Aksident i rëndë në aksin Elbasan-ish-Metalurgji/ Makina përplas biçikletën, plagoset një person appeared first on Albeu.com.