Pretendimi: Kjo video tregon mbytjen e një varke nga hedhja në det e një gruaje të shëndoshë 

Verdikti: E pavërtetë, Gjeneruar me AI

————————————————————-

Një video që duket se tregon një grua të shëndoshë duke u hedhur nga një varkë duke e përmbytur atë si pasojë, po qarkullon në rrjete sociale.

Megjithatë, një shqyrtim i kujdesshëm i videos zbulon detaje që nuk përputhen me realitetin dhe tregojnë se kjo video është gjeneruar me anë të programeve të inteligjencës artificiale (AI).

Për shembull, burrat e ulur me shpinë nga gruaja ndërsa ajo hidhet në ujë, kthejnë kokat gati 180 gradë për ta parë. Megjithatë trupat e tyre nuk kthehen. Kjo është veçanërisht e dallueshme për burrin në të majtë, i cili duket se po “këput qafën” për të parë prapa.

Më tej, “EVID SHN CO182” emri i varkës, i shkruar në trupin e saj, nuk ka asnjë kuptim.

Kur gruaja hidhet në ujë, ajo shfaqet në video si një formë e sfumuar me ngjyrë të verdhë jo-natyrale.

Një tjetër tregues i çuditshëm është pozicioni i dy personave të ulur në pjesën e pasme të varkës ndërsa ajo anohet. Ata janë ende në një pozicion të drejtë, pavarësisht ndryshimeve fizike që duhet t’i bënin të lëviznin.

Për më tepër, mënyra e përmbytjes së varkës nuk përputhet me ligjet e fizikës. Varka anohet dhe hunda bie nën ujë. E gjithë varka lundron, dhe në momentin që 10% e pjesës së përparme bien nën vijën e ujit, gjysma e pasme ngrihet nga uji. Vetëm graviteti do të mjaftonte për ta nxjerrë hundën e varkës përsëri nga uji.

E vetmja mënyrë që kjo fundosje do të funksiononte në një farë mënyre është nëse e gjithë varka do të ishte ndërtuar nga material jo-lundrues, do të ishte e zbrazët, trupi do të ishte çarë dhe uji do të mbushte menjëherë zonën e zbrazët nga përpara në prapa brenda 1 sekonde. 

Nëse përdorim mjetin e detektimit të pamjeve të gjeneruara me AI, Hive Moderation, për të analizuar këtë video rezulton gjithashtu se ajo është gjeneruar me AI.

Për të parandaluar që përmbajtje të tilla të keqinterpretohen, është e rëndësishme që çdo video, foto ose material tjetër i gjeneruar ose i manipuluar me inteligjencë artificiale të shënohet si i tillë. Kjo do të ndihmojë në informimin e audiencës dhe në mbrojtjen e tyre nga dezinformimi. Facebook i detyron përdoruesit të etiketojnë imazhet dhe videot e gjeneruara me AI si të tilla.

The post E gjeneruar mbytja e varkës nga kredhja në det appeared first on Faktoje.al.

Pretendimi: Kjo video tregon presidentin francez Emmanuel Macron në një diskotekë në Paris më 1984

Verdikti: Satirë, video e manipuluar

————————————————————

Një video që po qarkullon në rrjete sociale, përfshi ato shqipfolëse, pretendohet se tregon presidentin francez Emmanuel Macon duke vallëzuar në një diskotekë të Parisit në 1984.

Video, dukshëm, është modifikuar. 

Si fillim, në vitin 1984, Emmanuel Macron, lindur më 1977, do të ishte 7 vjeç.

Siç mund ta shohim në video, Macron po kërcen në një klub, megjithëse ka veshur rroba të ndryshme. Në fakt, fytyrat e njerëzve që kërcejnë në video janë zëvendësuar me fytyrën e Macron me anë të teknologjsë deepfake.

Video e ka origjinën në një llogari në platformën X, @JebraFaushay, e cila e shoqëroi klipin me përshkrimin: “Kjo është nga një diskotekë e vitit 1987, a e shihni udhëheqësin e Francës, Macron, me paruke?” Jebra Faushay, sipas një biografie në BuyMeACoffee, po “krijon satirë/lajme çdo ditë”. 

Me anë të motorrit të kërkimit pamor Google Lens, Faktoje gjeti videon origjinale, pjesa më e madhe e së cilës është xhiruar në klubin Stratus në San Diego në vitet 1986-1987.

Video origjinale, së cilës i është mbivendosur fytyra e Macron

Duke qenë se autori i videos origjinale prodhon satirë, dhe se video është kronologjikisht e palogjikshme dhe qartazi e montuar dobët, kjo video bie qartë në kategorinë e satirës.

Në 9 shkurt 2025, Macron promovoi Samitin e Veprimit për Inteligjencën Artificiale (IA), një takim ndërkombëtar që do të zhvillohej në Paris, duke u argëtuar me video parodi për veten e tij të gjeneruara nga inteligjenca artificiale në rrjetet e tij sociale. Video e mësipërme ishte ndër pamjet.

The post Ky version “yll diskoteke” i Macron është i manipuluar appeared first on Faktoje.al.

Pretendimi: Kjo foto tregon një vogëlushe në Gaza që i jep bukë gazetarit

Verdikti: E pavërtetë

————————————————————

Foto e një vajze të vogël po shpërndahet në rrjete sociale, përfshi edhe ato shqipfolëse, me pretendimin se ajo është një vogëlushe në Gaza e cila “i jep bukë gazetarit duke menduar se edhe ai është i uritur.”

Me anë të motorit të kërkimit pamor Google Lens, Faktoje gjeti se foto e mësipërme është postuar në rrjet të paktën që në vitin 2015, përpara bllokadës izraelite të Gazës. Megjithëse nuk arritëm të gjejmë prejardhjen e fotos, kush e ka shkrepur, kur dhe ku, çfarë është e sigurt është se ajo nuk tregon një vogëlushe në Gaza në vitin 2025. 

Në përshkrimin që shoqëron postimin e shtatorit 2015 nënkuptohet se vogëlushja është nga ose në Siri.

Palestinezët në të gjithë Gazën po vuajnë nga uria dhe mungesa e domosdoshmërive të tjera. Rripi i Gazës mbetet në prag të urisë si rezultat i mbylljes dhe bllokadës nga Izraeli, si dhe kufizimeve të vazhdueshme të paligjshme në hyrjen dhe shpërndarjen e ndihmës humanitare.

Për 11 javë, Izraeli bllokoi të gjitha ushqimet, ilaçet dhe furnizimet e tjera që të hynin në Gaza, duke akuzuar Hamasin për devijim të ndihmës për të financuar aktivitetet e tij ushtarake dhe të tjera, megjithëse OKB tha se sistemet e saj të monitorimit ishin të fuqishme. Që nga mesi i majit, Izraeli ka lejuar hyrjen e një sasie të vogël ndihme, përfshirë furnizime mjekësore.

Zyrtarët mjekësorë, punonjësit humanitarë dhe mjekët në Gaza kanë deklaruar se janë të mbingarkuar nga “incidente masive viktimash” pothuajse të përditshme, ndërsa përpiqen të përballen me të plagosurit nga zjarri izraelit ndaj palestinezëve që kërkojnë ndihmë.

Mjekët thonë se shumë nga njerëzit që po trajtojnë përshkruajnë se janë qëlluar ndërsa përpiqen të arrijnë në vendet e shpërndarjes të drejtuara nga Fondacioni Humanitar i Gazës (GHF), një organizatë sekrete e mbështetur nga ShBA dhe Izraeli që filloi shpërndarjen e ushqimit në fund të Majit 2025.

Grupet kryesore humanitare dhe të të drejtave të njeriut kanë kërkuar mbylljen e menjëhershme të GHF, të cilën e akuzojnë për “kufizimin e dy milionë njerëzve në zona të mbipopulluara dhe të militarizuara, ku përballen me të shtëna të përditshme dhe viktima masive.” Amnesty International i ka përshkruar veprimet e grupit si një “skemë militarizuar çnjerëzore dhe vdekjeprurëse”.

Që nga fillimi i sistemit të ri të shpërndarjes së ushqimit, të cilin Izraeli e quan të nevojshëm për të parandaluar që Hamasi të devijojë ndihmën humanitare, spitali në Rafah, në jug të Gazës, ka trajtuar më shumë se 2200 pacientë të plagosur nga armët dhe ka regjistruar më shumë se 200 vdekje.

Sipas UNICEF, numri i fëmijëve të kequshqyer në Rripin e Gazës po rritet me një ritëm alarmues, me 5119 fëmijë të moshës 6 muajsh-5 vjeç të shtruar në spital për trajtim për kequshqyerje akute vetëm në maj.

The post Kjo foto e fëmijës së uritur nuk është u shkrep në Gazën e rrethuar appeared first on Faktoje.al.

Pretendimi: Një prej avionëve amerikanë B-2 që bombardoi Iranin nuk u kthye pas, por u rrëzua nga Irani

Verdikti: E paprovuar

————————————————————

Në rrjete sociale, përfshi ato shqipfolëse, po qarkullon lajmi se një nga avionët amerikanë B-2, të cilët bombarduan Iranin në fund të qershorit 2025, nuk është kthyer sërish në bazë, por është rrëzuar dhe kapur nga Irani.

Si zakonisht, postimet në rrjete sociale nuk sjellin ndonjë provë për të mbështetur këtë pretendim. Nëse iranianët do të kishin shtënë në dorë avionin B-2 të rrëzuar kjo ngjarje nuk do të kalonte në heshtje nga propaganda e Teheranit.

Më 22 qershor 2025, ShBA sulmoi tre objekte bërthamore në Iran, si kundërpërgjigje ndaj raketave të lëshuara drejt Izraelit. Fabrika e Pasurimit të Uraniumit Fordow, Objekti Bërthamor Natanz dhe Qendra e Teknologjisë Bërthamore Isfahan u shënjestruan me katërmbëdhjetë bomba “bunker buster” me peshë 14,000 kg, të transportuara nga bombarduesit e fshehtë Northrop B-2 Spirit, dhe me raketa Tomahawk të lëshuara nga një nëndetëse.

Një grafik i publikuar nga Pentagoni tregonte itinerarin e fluturimit duke kaluar mbi Liban, Siri dhe Irak. “B-2-shat tanë hynë, dolën dhe u kthyen pa e ditur bota fare,” u tha gazetarëve të Sekretari amerikan i Mbrojtjes, Pete Hegseth.

Kronologjia e “Operacionit Midnight Hammer”, një sulm i ShBA ndaj objekteve bërthamore të Iranit, i publikuar nga Departamenti i Mbrojtjes, më 22 qershor 2025.

Operacioni zgjati afërsisht 18 orë, por nuk ka asnjë raport të besueshëm për rrëzimin e ndonjë avioni amerikan. Asnjë burim i besueshëm i mbrojtjes apo inteligjencës nuk ka konfirmuar ndonjë incident të tillë që përfshin një bombardues B-2.

Ndërkaq, raportime të shumta tregojnë bombarduesit që ishin të përfshirë në sulmin ndaj Iranit, duke u kthyer në ShBA. Llogaria zyrtare e Shtëpisë së Bardhë në platformën X ndau gjithashtu një video të bombarduesve B-2 që zbarkuan në Bazën Ajrore Whiteman në Missouri pasi goditën Iranin.

Të gjithë bombarduesit B-2 Spirit të përdorur në sulmin ndaj objekteve bërthamore të Iranit u kthyen në Shtetet e Bashkuara “pa incidente”, sipas deklaratave të presidentit Trump dhe qeverisë amerikane.

The post I pabazë rrëzimi i një prej avionëve B-2 që bombarduan Iranin appeared first on Faktoje.al.

Pretendimi: Ky imazh tregon një agjent izraelit të lidhur me një raketë iraniane drejt Izraelit

Verdikti: E pavërtetë, Gjeneruar me AI

———————————————————-

Në rrjete sociale, përfshi ato shqipfolëse, po qarkullon një imazh që duket se tregon një njeri të lidhur pas një rakete. Imazhi i turbullt shoqërohet me pretendimin se tregon agjentë izraelitë të kapur në Iran dhe të lidhur me raketën iraniane për t’u dërguar mbrapsht në Izrael.

Me anë të motorrit të kërkimit pamor Google Lens, Faktoje gjeti një version më të qartë dhe të plotë të imazhit të sfumuar.

Në versionin e plotë, vërehen disa tregues të zakonshëm të imazheve të gjeneruara me programe të inteligjencës artificiale (AI).

Flamuri iranian në raketë është i pasaktë, fytyra e burrit është e turbullt, litari rreth tij nuk duket i qëndrueshëm dhe parmakët dhe shkallët e rampës pranë raketës janë gjithashtu të shtrembër.

Më 15 qershor, policia iraniane njoftoi se kishte arrestuar dy agjentë “të dyshuar” të Mossad, të cilët dyshohet se qëndronin pas “akteve të sabotimit” në Iran. Megjithatë, në njoftim, apo në ndonjë tjetër burim zyrtar, nuk përmendet ‘kthimi’ i këtyre agjentëve në Izrael me anë të raketave.
Faktoje ka verifikuar edhe më parë një imazh të gjeneruar me AI që pretendohej se tregonte një spiun izraelit të lidhur fizikisht me një raketë dhe lëshuar drejt Izraelit

The post Irani nuk po i kthen agjentët e Izraelit të lidhur pas raketave appeared first on Faktoje.al.

Pretendimi: Sistemi HAARP ka goditur Francën me stuhi breshëri

Verdikti: E paprovuar

————————————————————

Pasi Franca u godit nga stuhi të dhunshme në fund të qershorit 2025, në rrjete sociale u ringjall teoria konspirative që pretendon se ndodhi të tilla ekstreme atmosferike shkaktohen nga famëkeqi “sistemi HAARP.”

Eshtë e vërtetë që natën e së mërkurës, 25 qershor, deri të enjten, 26 qershor, stuhi të dhunshme përfshinë Francën, duke shkaktuar vdekjen e dy personave dhe 17 të plagosur. Megjithatë, fajësimi i sistemit HAARP për këto stuhi mbetet një akuzë e pabazë.

Projekti studimor shkencor amerikan i quajtur HAARP është një projekt i përbashkët i Forcave Ajrore Amerikane dhe Marinës Amerikane i kijuar në vitin 1993, i cili i ka kaluar më vonë Universitetit të Alaskës Fairbanks (UAF) në vitin 2015.

HAARP shfaqet shpesh në narrativat konspiracioniste si një veprimtari djallëzore që përfshin shkaktimin e tërmeteve, uraganëve, përmbytjeve, thatësirave, stuhive, ndërprerjeve të energjisë, rrëzimit të avionëve apo sëmundjeve.

Karakteristika e tij kryesore është një transmetues me frekuencë të lartë që përdoret për të studiuar jonosferën, pjesë e atmosferës së sipërme të tokës. Duke analizuar se si valët e radios ndërveprojnë me elektronet në jonosferë, studiuesit në HAARP janë në gjendje të studiojnë fenomene, të tilla si efektet e aurora borealis, ose dritat veriore, në sistemet radio dhe komunikimet e avionëve në lartësi të mëdha.

HAARP ka si objekt studimi dhe eksperimentimi jonosferën, pjesë e atmosferës së sipërme të tokës. Gati të gjithë fenomenet e motit ndodhin më poshtë jonosferës, në troposferë. Kështu, HAARP nuk ka si të ndikojë në fenomenet e motit.

Që në krijimin e tij, HAARP ka qenë në shënjestrën e teorive konspirative. Fakti që puna studimore që kryen HAARP nuk është lehtësisht e kuptueshme nga publiku i gjerë, bën që këtij projekti t’i vishen fuqi mbinatyrore. Në 2016, dy burra nga Georgia, ShBA, u arrestuan me një arsenal masiv armësh. Ata kishin në plan të shkatërronin HAARP sepse besonin se instituti kërkimor manipulonte motin, kontrollonte mendjet e njerëzve, madje edhe rrëmbente shpirtra.

Sipas shkrimtarit të shkencës, Mick West, “mënyra për të përgënjeshtruar teoritë konspirative rreth HAARP është të përpiqesh t’i shpjegosh njerëzve ekzaktësisht çfarë HAARP bën. Shpjegoi se është thjesht një radiotransmetues që është në Alaskë dhe mund të ndikojë vetëm në një sasi të vogël ajri mbi të. Shpjegoji se fuqia e përdorur nga ky radiotransmetues është shumë shumë e vogël krahasuar me çfarë do të duhej për të bërë disa nga gjërat që po pretendohen.”

The post I pabazë fajësimi i sistemit HAARP për stuhitë në Francë appeared first on Faktoje.al.

Pretendimi: Qeveria ukrainase e Zelensky largohet nga Kievi dhe vendoset në Ukrainën perëndimore

Verdikti: E paprovuar

————————————————–

Në rrjete sociale, përfshi ato shqipfolëse, po qarkullon lajmi se qeveria ukrainase po përgatitet të evakuohet nga Kievi në Ukrainën perëndimore. Kjo lëvizje interpretohet si një pranim i mundshëm i humbjes së luftës nga Ukraina. 

Postimet në rrjete sociale i referohen një dokumenti të pretenduar sekret “dërguar nga Kabineti i Ministrave agjencive qeveritare” të bërë publik nga politikani ukrainas Igor Mosiychuk.

Sipas dokumentit të pretenduar, kryeministri ukrainas ka urdhëruar autoritetet qendrore ekzekutive të përgatisin ambjentet në Ukrainën perëndimore për një zhvendosje të mundshme, të zvogëlojnë stafin e ministrisë me 10% për shkak të humbjes së pozicioneve në zonat e pushtuara dhe të dërgojnë listat e punonjësve të pushuar nga puna në moshë mobilizimi në qendrat e rekrutimit.

Ihor Mosiychuk është gazetar, politikan, ish-anëtar i parlamentit ukrainas. Në mars të vitit 2024, Qendra ukrainase për Luftën Kundër Dezinformimit shtoi llogarinë TikTok të Ihor Mosichuk në listën e faqeve që përhapin lajme të rreme ruse.

Sipas Qendrës ukrainase për Luftën Kundër Dezinformimit, dokumenti është tërësisht i sajuar. Qendra konfirmoi se nuk ekziston një letër e tillë. Ajo nuk është regjistruar kurrë në Departamentin e Menaxhimit të Dokumenteve të Kabinetit të Ministrave, siç kërkohet. Që nga viti 2021, Këshilli i Ministrave i Ukrainës ka kaluar në menaxhimin elektronik të dokumenteve, gjë që ngre dyshime mbi formatin e dokumentit të publikuar. 

Gjithashtu, mungesa e një klasifikimi sekret për një dokument kaq të rëndësishëm është një shkelje kritike. Dokumentet e këtij niveli rëndësie klasifikohen gjithmonë në përputhje me rrethanat. Përveç kësaj, teksti i dokumentit përmban një numër të madh gabimesh drejtshkrimore, gjë që tregon gjithashtu një falsifikim.

“Operacione të ngjashme informacioni po kryhen nga armiku për të mbjellë panik në shoqëri dhe për të destabilizuar situatën në rajonet e Ukrainës. Mos bini pre e manipulimit të informacionit dhe besojini vetëm burimeve zyrtare”, shtoi Qendra.

Qendra për Luftën Kundër Dezinformimit vuri në dukje gjithashtu se kjo letër e rreme u ishte dërguar agjencive qeveritare dhe strukturave shtetërore me qëllim përhapje paniku.

Qeveria ukrainase po evakuon me të vërtetë, por vetëm civilët nga zonat e vijës së frontit për sigurinë e tyre. Kjo është një masë normale mbrojtëse dhe jo një shenjë e gatishmërisë së autoriteteve për t’u larguar.

The post I rremë urdhëri për zhvendosjen nga Kievi të institucioneve ukrainase appeared first on Faktoje.al.

Pretendimi: Ky imazh tregon një grup punëtoresh pastrimi 

Verdikti: E pavërtetë

————————————————–

Një imazh që ka marrë mbi 19 mijë pëlqime dhe 2 mijë komente në Facebook pretendon se tregon një grup punëtoresh pastrimi, të përbërë nga vajza të reja dhe të pashme, ndryshe nga çfarë jemi mësuar të shohim në këtë profesion.

Një pjesë e madhe e komenteve shprehin vlerësim për këto vajza që kanë pranuar të punojnë si pastruese dhe i përshëndesin ato.

Me anë të motorrit të kërkimit pamor Google Lens, Faktoje gjeti se imazhi është postuar në rrjet për herë të parë më 30 qershor në Facebook.

Imazhi i mësipërm shoqërohet me shënimin: “Skenë ilustruese e gjeneruar dixhitalisht.” Ky imazh është gjeneruar me anë të programeve të inteligjencës artificiale (AI). Punëtoret e pastrimit nuk ekzistojnë.

Këto video janë shembuj i çfarë është quajtur ‘AI slop’ që përkthehet në “llum AI.” 

Llum AI quhen imazhe, video apo shkrime me cilësi të ulët të krijuara duke përdorur teknologjinë gjeneruese të inteligjencës artificiale dhe të karakterizuara nga një mungesë e theksuar e përpjekjes, logjikës ose kuptimit.

Llumi AI në Facebook zakonisht ka për qëllim mbledhjen e sa më shumë komenteve, e kështu zakonisht konsiston në imazhe, dhe histori shoqëruese, që ngjallin emocione të forta tek njerëzit, si dashamirësia për një grup punëtoresh pastrimi simpatike.

Llumi AI që nxit komplimente, simpati dhe urime në tekstin shoqërues merr shumë angazhim. Postime të tilla mund të dallohen nga fjali si “E bëra me duart e mia, por jam i trishtuar sepse askush nuk e pëlqeu punën time”, “Sot është ditëlindja ime” ose “Nuk do të pendoheni kurrë që e keni pëlqyer këtë foto”.

Shembuj të llumit AI në Facebook

Për të parandaluar që përmbajtje të tilla të keqinterpretohen, është e rëndësishme që çdo video, foto ose material tjetër i gjeneruar ose i manipuluar me inteligjencë artificiale të shënohet si i tillë. Kjo do të ndihmojë në informimin e audiencës dhe në mbrojtjen e tyre nga dezinformimi. Facebook i detyron përdoruesit të etiketojnë imazhet dhe videot e gjeneruara me AI si të tilla.

The post Këto pastruese simpatike janë krijuar me IA appeared first on Faktoje.al.

Pretendimi: Ky imazh tregon një ushtar ukrainas para dhe pas 400 ditësh luftë

Verdikti: E pavërtetë, Gjeneruar me AI

——————————————————————

Në rrjete sociale, përfshi ato shqipfolëse, po qarkullon një imazh që pretendohet se tregon një ushtar ukrainas përpara dhe pasi u kthye në shtëpi pas 400 ditësh në luftë.

Megjithatë, personat në imazh nuk janë realë. Ky imazh është gjeneruar me anë të programeve të inteligjencës artificiale (AI).

Kjo dallohet më qartë në ndryshimin në gjatësi të ‘ushtarit’. Duket se para se të shkonte në luftë, ai ishte më i shkurtër, në krahasim me ‘gruan’ që ka pranë. Në imazhin e dytë vërejmë se ndryshimi mes gjatësisë së dy personazheve është më i madh, siç tregohet më poshtë.

Burri në imazhin majtas është më i shkurtër se burri në imazhin djathtas

Imazhi i mësipërm është një nga disa të tillë, të gjeneruar me AI, që qarkullojnë në rrjet me pretendimin se tregojnë ushtarë ukrainas të kthyer nga lufta. Këto foto shoqërohen me histori të trishtueshme, por pa emra, pa sfonde, pa koherencë përtej fotove çuditërisht të lëmuara dhe rrëfimeve që të copëtojnë zemrën.

Imazhe të ngjashme të gjeneruar me AI

Vlen këtu të bëjmë një krahasim me fotot reala para-dhe-pas të ushtarëve, nga ku mund të jenë frymëzuar dhe krijuesit e këtyre imazheve të gjeneruara.

Mykhailo Dianov, një muzikant që shërbeu në regjimentin Azov, ishte një nga 215 të burgosurit e luftës të liruar në një shkëmbim të papritur të burgosurish midis Ukrainës dhe Rusisë në shtator 2022. Fotot e Dianov të shpërndara nga ushtria ukrainase e tregojnë atë të dobësuar, të mavijosur dhe me shenja pas kohës së tij në një burg rus.

Oleksandr Strafun, i cili po luftonte në Mariupol, kontaktoi familjen për herë të fundit më 1 mars 2022. Më 14 qershor 2025, Strafun u kthye në shtëpi gjatë një shkëmbimi të të burgosurve të luftës. Imazhi i mëposhtëm krahason një foto të tij 1 muaj para robërisë, me një foto pas lirimit të tij nga burgu.

Këto imazhe janë shembuj i çfarë është quajtur ‘AI slop’ që përkthehet në “llum AI.” 

Llum AI quhen imazhe, video apo shkrime me cilësi të ulët të krijuara duke përdorur teknologjinë gjeneruese të inteligjencës artificiale dhe të karakterizuara nga një mungesë e theksuar e përpjekjes, logjikës ose kuptimit.

Llumi AI në Facebook zakonisht ka për qëllim mbledhjen e sa më shumë komenteve, e kështu zakonisht konsiston në imazhe, dhe histori shoqëruese, që ngjallin emocione të forta tek njerëzit. Llumi AI që nxit mëshirë, simpati dhe urime në tekstin shoqërues merr shumë angazhim. 

Për të parandaluar që përmbajtje të tilla të keqinterpretohen, është e rëndësishme që çdo video, foto ose material tjetër i gjeneruar ose i manipuluar me inteligjencë artificiale të shënohet si i tillë. Kjo do të ndihmojë në informimin e audiencës dhe në mbrojtjen e tyre nga dezinformimi. Facebook i detyron përdoruesit të etiketojnë imazhet dhe videot e gjeneruara me AI si të tilla.

The post I gjeneruar imazhi i plakjes së përshpejtuar të ushtarit ukrainas appeared first on Faktoje.al.

Pretendimi: Zara po dhuron kuti me rroba që kanë qenë në magazinë për më shumë se një vit

Verdikti: E pavërtetë, Skemë mashtrimi

————————————————————

Një faqe në Instagram e quajtur Zara Boxes ALB pretendon se firma e rrobave Zara po dhuron kuti me rroba, këpucë dhe çanta që kanë qenë në magazinë për më shumë se një vit, për të liruar vendin për koleksionin e ri, dhe fton lexuesit të aplikojnë për të marrë dhurata.

Postimi shqërohet me një fotografi të asaj që duket si një magazinë e kompanisë Zara dhe pakove të shumta të hapura në mënyrë të çrregullt të gatshme për t’u marrë nga dikush që do të pranojë ftesën për të klikuar butonin “Apliko tani” në faqe.

Megjithatë, nëse klikojmë mbi emrin e faqes së Instagramit, ajo nuk hap profilin e Zara Boxes ALB.

Nga një kërkim me motorin e kërkimit pamor Google Lens, Faktoje gjeti se imazhi i mësipërm është përdorur në rrjet për të bërë postime të ngjashme me atë të mësipërmin, në gjuhë të ndryshme si turqisht, çekisht dhe vietnamisht.

Në faqen zyrtare të Zara Albania, nuk ka ndonjë njoftim që përmend se firma po dhuron mall.

Kjo është një mënyrë që mashtruesit përdorin për të zhvatur para nga përdoruesit e rrjeteve sociale, e përshkruar edhe këtu.

The post Kompania Zara nuk po zbraz falas magazinat e saj appeared first on Faktoje.al.

Pretendimi: Kirurgu francez që planifikonte të ekspozonte Brigitte Macron vdes pasi bie nga dritarja.

Verdikti: E pavërtetë

————————————————————–

Në rrjete sociale, përfshi edhe ato shqipfolëse, po qarkullon lajmi se “kirurgu francez që planifikonte të ekspozonte Brigitte Macron vdes pasi bie nga dritarja.” 

Sipas postimeve, “kirurgu francez François Faivre, 58 vjeç, u gjet i vdekur më 29 qershor 2025, pasi ra nga dritarja e apartamentit të tij në Paris. Motra e Faivre, Anne Dupont, po sfidon përfundimin e policisë për vetëvrasje, duke sugjeruar se vdekja e tij mund të lidhet me një intervistë të ardhshme ku ai planifikonte të zbulonte informacione të ndjeshme në lidhje me operacionin e dyshuar transgjinor të Brigitte Macron, bazuar në dokumente nga Dr. Patrick Bouilly.”

Origjina e këtij lajmi duket se është një artikull i botuar më 1 korrik 2025 në faqen enquetedujour.fr.

Për të mbështetur pretendimet e tij, artikulli sjell një video të një interviste që kirurgu pretendohet se ka dhënë për revistën Closer, ku ai pretendon se e ka njohur Dr. Patrick Bui, i cili pretendohet se ka operuar Brigitte Macron. 

“Unë ende kam shumë informacion në formën e shënimeve, kopjeve të të dhënave mjekësore”, thotë një burrë me theks të Evropës Lindore, i ulur para kamerës. “Dr. Bui ishte një koleg i ngushtë i imi. […] Ai më tregoi në detaje rreth ndryshimeve fizike që pësoi zonja Brigitte Macron gjatë operacionit transgjinor.”

Videoja është shumë e besueshme. Imazhi është i qartë. Fjalët koherente, megjithëse pak të ngadalta, korrespondojnë me lëvizjet e gojës. 

Megjithatë, ky burrë nuk ekziston. Siç vërehet me sy të lirë, pamja e tij nuk përputhet me imazhin që shoqëron postimet në rrjete, që pretendohet se tregojnë kirurgun e ndjerë.

Një François Faivre është mjek i përgjithshëm në Perrigny në departamentin Yonne. Një tjetër François Faivre është drejtor operacionesh në Thalès. Një tjetër François Faivre është trajner sportiv dhe ishte trajneri i ekipit kombëtar zviceran të skive në terren të hapur. 

François Faivre në video duket sikur është krijuar nga inteligjenca artificiale, dhe lëvizjet e gojës së tij duken të jenë të gjeneruara me teknologjinë deepfake. Lëkura e tij është shumë e lëmuar, ai nuk i pulit sytë gjatë gjithë intervistës së pretenduar, as nuk shpreh ndonjë emocion, dhe drejtkëndori i bardhë në murin në sfond ndërpritet pas tij në një mënyrë jo natyrale.

Për më tepër, sipas një hetimi të Radio France, artikulli sillet nën emrin e një gazetareje që ekziston realisht. 

Audrey Parmentier është gazetare e pavarur dhe punon rregullisht për gazetën Le Monde. E kontaktuar nga departamenti i verifikimit të fakteve të Radio France, ajo konfirmoi se nuk e ka shkruar këtë artikull ose asnjë nga artikujt që i atribuohen asaj, prej marsit të vitit 2025.

“Është mjaft tronditëse,” tha ajo. “Kam mësuar se kam shkruar për këtë media lajmesh të rreme që nga marsi. Është mjaft shqetësuese kur shihni foton time, emrin tim dhe mbiemrin tim të lidhur me teori konspirative. Unë jam gazetare; nuk kam absolutisht asnjë lidhje me këtë përmbajtje.”

Radio kontaktoi katër gazetarët e tjerë të listuar si pjesë e ekipit editorial të faqes enquetedujour.fr. Të gjitha identitetet e tyre ishin vjedhur. Këta gazetarë, në teori, janë ligjërisht përgjegjës për përmbajtjen e artikujve që publikojnë. Janë punonjës të pavarur, punësimi i të cilëve është i pasigurt dhe mbështetet shumë në punën e tyre të mëparshme dhe gjurmën e tyre dixhitale. Shumica e tyre punojnë ose bashkëpunojnë me median investigative të krahut të majtë Streetpress. E kontaktuar nga franceinfo, ekipi editorial tha se po shqyrton të gjitha mjetet e mundshme ligjore për të bllokuar këtë manipulim.

Kjo taktikë keqinformimi i përngjan taktikave të përdorura tashmë në fushatat e dezinformimit pro-rus, duke filluar nga imitimi i personaliteteve dhe mediave dhe publikimi i artikujve të rremë të shtypit krejtësisht të shpikur ose edhe të gjeneruar nga inteligjenca artificiale në një operacion të quajtur “Stuhia-1516” nga Viginum, shërbimi francez përgjegjës për vigjilencën dhe mbrojtjen kundër ndërhyrjeve të huaja.

“Aktorët pas Stuhisë-1516 po kërkojnë të polarizojnë debatin demokratik në shoqëritë tona, të minojnë besimin në media dhe institucionet evropiane me qëllimin përfundimtar dhe strategjik të përfundimit të ndihmës perëndimore për Ukrainën”, shpjegoi Viginum në një raport në maj 2025. 

The post E rreme lidhja e kirurgut francez të vetëvrarë me sekretet e Brigitte Macron appeared first on Faktoje.al.

Pretendimi: Këto pamje tregojnë një zjarr në një rafineri nafte në Haifa pas një sulmi iranian

Verdikti: E pavërtetë

—————————————————————

Video e një zjarri të madh po qarkullon në rrjete sociale, përfshi ato shqipfolëse, me pretendimin se tregon pasojat e një sulmi iranian në një rafineri nafte në Haifa, Izrael. 

Video tregon një zjarr që digjet në një kompleks, ndërsa tymi i zi i trashë ngrihet në qiellin e natës. Një zonë urbane duket në sfond.

Me anë të motorit të kërkimit pamor Google Lens, Faktoje gjeti se video është postuar më 15 qershor në platformën X nga një përdorues iranian, shoqëruar me përshkrimin: “Një zjarr në depot e naftës Shahran në perëndim të Teheranit po përhapet në depot e tjera, që duket se përfshijnë të paktën 11 rezervuarë.”

Pamje të ngjashme shfaqen edhe në një video në YouTube të publikuar nga Forbes, me titull: “Depoja e naftës Shahran në Teheran, Iran, është goditur nga sulmet izraelite.”

Video është xhiruar nga një kontribues në Getty Images.

Një pjesë e mbishkrimit në faqen e Getty Images thotë: “Zjarri dhe tymi ngrihen në qiell pas një sulmi izraelit në depon e naftës Shahran më 15 qershor 2025 në Teheran, Iran.”

Ministria e naftës e Iranit tha se dy depo, përfshirë Shahranin, ishin goditur.

Elementet e videos, përfshi rezervuarët e mëdhenj të naftës, terrenin kodrinor dhe zonën urbane aty pranë, përputhen gjithashtu me pamjet satelitore të depos Shahran në Google Maps.

Depo e naftës Shahran në veriperëndim të Teheranit

Megjithëse zyrtarët izraelitë konfirmuan se një rafineri nafte në qytetin bregdetar të Haifës u godit vërtet nga një raketë iraniane më 15 qershor, video e mësipërme në fakt tregon një depo nafte iraniane pas një sulmi izraelit.

The post Pamjet e rafinerisë në flakë në Iran ndahen gabimisht si dëmet në Izrael appeared first on Faktoje.al.

Pretendimi: SHBA ndërpreu plotësisht ndihmën ushtarake për Ukrainën

Verdikti: Gjysëm e vërtetë

—————————————————————————

Në rrjete sociale, përfshi ato shqipfolëse, po qarkullon lajmi se ShBA ka ndërprerë plotësisht ndihmat ushtarake për Ukrainën.

Ky lajm është pjesërisht i vërtetë.

Në fakt, më 2 korrik 2025, në një deklaratë të dërguar me email mediave amerikane, zëdhënësja e Shtëpisë së Bardhë Anna Kelly tha se Departamenti i Mbrojtjes i ShBA vendosi të ndalojë disa dërgesa në Ukrainë pasi një shqyrtim zbuloi se rezervat ushtarake amerikane ishin të ulëta.

Ndërprerja e dërgesave të armëve është pjesë e një “rishikimi të aftësive” për të “siguruar që ndihma ushtarake amerikane të jetë në përputhje me prioritetet tona të mbrojtjes”, tha në një konferencë për shtyp më 2 korrik zëdhënësi i Pentagonit, Sean Parnell.

Pentagoni ka ndaluar dërgesat e sistemeve të mbrojtjes ajrore Patriot, raketat ajër-tokë Hellfire, raketat GMLRS të përdorura nga artileria raketore Himars, sistemet portative të mbrojtjes ajrore Stinger dhe predhat e artilerisë 155 mm të premtuara fillimisht nga administrata Biden.

Armët që duhej të dërgoheshin janë pjesë e ndihmës ushtarake dhe armëve me vlerë 66 miliardë dollarë të miratuar nga Kongresi nën administratën e Biden që nga shkurti i vitit 2022. Megjithëse nuk janë autorizuar shpenzime të reja nën administratën Trump, paketat e mëparshme të ndihmës ushtarake kanë vazhduar kryesisht, përveç një pauze të shkurtër në Mars.

Ndërkohë, zëdhënësja e Departamentit të Shtetit, Tammy Bruce, tha se “kjo nuk është një ndërprerje e ndihmës sonë për Ukrainën apo e furnizimit me armë. Kjo është një ngjarje dhe një situatë, dhe ne do të diskutojmë se çfarë tjetër do të dalë në të ardhmen”.

Pra, pretendimi se ShBA ka ndërprerë plotësisht dërgesat e armëve në Ukrainë nuk është tërësisht i vërtetë. Deri më tani, ShBA ka ndërprerë vetëm dërgesat e disa armëve.

The post ShBA nuk ndërpreu plotësisht ndihmat për Ukrainën appeared first on Faktoje.al.

Pretendimi: 2100 fëmijë u shpëtuan nga kafazet nën bazën ushtarake të Liqenit China në Kaliforni, ShBA

Verdikti: E pavërtetë

—————————————————————

Një lajm i hatashëm që po qarkullon në rrjete sociale, përfshi ato shqipfolëse, pretendon se marinsat amerikanë shpëtuan 2100 fëmijë nga kafazet nën bazën ushtarake të Liqenit China në Kaliforni, ShBA.

Megjithatë, një kërkim me fjalë kyçe nuk rezulton ndonjë raportim nga media të besueshme, vendase apo ndërkombëtare. Një ngjarje kaq e pazakontë detyrimisht do të ishte raportuar në masë, nëse do të ishte e vërtetë.

Nga kërkimi rezultoi gjithashtu se ky ‘lajm’ ka qarkulluar dhe më parë në rrjet, të paktën që nga viti 2021.

Në asnjë nga këto postime nuk ofrohet ndonjë provë e besueshme për këtë pretendim të pazakontë. Për të mbajtur këtë sekret, qindra, nëse jo mijëra, personel civil/ushtarak duhet të kenë qenë të përfshirë në këtë komplot dhe mbulimin e tij. 

Ligji amerikan, për më tepër, nuk do të lejonte Pentagonin të dërgonte trupa për të trajtuar një krim jo-ushtarak. Kjo do të shkelte rregullin Posse Comitatus. Forcat për të kapur një rrjet pedofilësh do të duhej të ishin nga FBI ose një forcë policore shtetërore ose e qytetit, por jo Pentagoni. 

Postimi i mësipërm i referohet si burim “Task Forcës së Pentagonit kundër Pederastisë.” Kjo duket se është një keqpërkthim i Pentagon Pedophile Task Force, një grup që promovon teori konspirative rreth trafikimit dhe abuzimit të fëmijëve në ShBA, një projekt i gazetarit amerikan Timothy Holmseth.

Pretendimi se Marinsat Amerikanë shpëtuan 2,100 fëmijë nga bazat dhe bunkerët nëntokësorë në Kaliforni e ka origjinën në një video të Holmseth nga viti 2019, i cili pretendonte se informacioni vinte nga një burim anonim në Pentagon.

Holmseth është një gazetar investigativ nga Minnesota, i cili ka përhapur teori të pabaza rreth zhdukjes së fëmijëve dhe rrjeteve të trafikimit për vite me radhë. Holmseth pretendoi se ishte anëtar i “Task Forcës së Pentagonit për Pedofilët”, por sipas një zëdhënësi të Departamentit të Mbrojtjes të ShBA, nuk ekziston një departament i tillë në Pentagon. Për më tepër, në gusht 2018, Holmseth tha për VICE se ai ndan vlerat e QAnon. Informacioni për fëmijët e rrëmbyer që torturohen në tunelet nën qytete në të gjithë botën është pjesë e teorisë së konspiracionit të QAnon.

Sipas teorisë konspirative të QAnon, bota sundohet nga dishepujt kanibalë të Satanit, të cilët udhëheqin një rrjet trafikimi fëmijësh në shkallë globale. Mbështetësit e kësaj lëvizjeje besojnë se presidenti i ShBA, Donald Trump, po kryente operacione sekrete kundër pedofilëve që adhuronin Satanin dhe kujdestarëve të tyre, të cilët, sipas tyre, janë grumbulluar në qeverinë, biznesin dhe median amerikane. Siç pretendon QAnon, po zhvillohen operacione sekrete për të ndihmuar fëmijët në tunele.

Marc Klaas, një aktivist për fëmijët e zhdukur dhe babai i një vajze të vogël që u rrëmbye dhe u vra, Polly Klaas tha për Lead Stories:

“Sapo pashë emrin Timothy Holmseth, më nxiti të flas sepse në të kaluarën ai më akuzoi se kisha mbuluar vrasjen e Polly-t. Sipas kontakteve të mia në websleuths dhe Levi Page, Holmseth, udhëheqësi i të ashtuquajturës Task Forcë Pedofile të Pentagonit, është aktualisht një njeri i kërkuar i cili ka shkelur vazhdimisht një urdhër ndalimi kundër avokates nga Florida, Kim Picazio.”

Në vitin 2009, Kim Picazio përfaqësoi nënën e fëmijës së zhdukur Haleigh Cummings. Holmseth akuzoi Picazio për pjesëmarrje në vrasjen e Haleigh. 

The post Asnjë bazë për operacionin e lirimit të 2100 fëmijëve në ShBA appeared first on Faktoje.al.

Pretendimi: Kjo video tregon shkatërrimin e Izraelit nga raketat iraniane

Verdikti: Gjeneruar me AI

—————————————————————

Një video që po shpërndahet në rrjete sociale, përfshi edhe ato shqipfolëse, pretendohet se tregon pamje me dron të shkatërrimit masiv në Izrael pas sulmeve me raketa nga Irani.

Megjithatë, me gjasa video e mësipërme ëshë gjeneruar me anë të programeve të inteligjencës artificiale (AI).

Një kërkim me anë të motorit të kërkimit pamor Google Lens rezultoi se video është postuar disa herë në rrjet në versionin e saj të tanishëm, por pa ndonjë burim që tregon origjinën e pamjeve, si autori apo media që i ka xhiruar.

Llogaria e TikTok @malka.415, emri i së cilës shfaqet në cepin e poshtëm, djathtas, rezulton të jetë fshirë.

Më tej, video përmban elementë që na bëjnë të mendojmë se ajo është gjeneruar me AI.

Ndonëse pamjet nga lart të qytetit të shkatërruar duken realiste, ato kanë ende pamje pikture. Ndriçimi dhe ngjyrat janë perfekte, në një mënyrë të panatyrshme.

Në skenën e fundit të videos, ku duket një grua duke qarë në mes të gërmadhave, gjendet treguesi i sigurt se video është gjeneruar me AI. Siç Faktoje ka nënvizuar edhe më parë, programet AI hasin më shumë vështirësi në gjenerimin e skenave realiste me njerëz sesa pamjeve të objekteve.

Kështu, siç tregohet më poshtë, në video duket një deformim i krahut të gruas në lëvizje, një tregues i origjinës së saj artificiale.

The post Shkatërrimet e bombardimeve në Izrael të gjeneruara me AI appeared first on Faktoje.al.

Pretendimi: Gjykata e Lartë e ShBA ndalon librat LGBT në shkolla

Verdikti: Mungon konteksti

—————————————————————

Një lajm i botuar më 27 qershor nga portali JOQ Albania pretendon se Gjykata e Lartë e ShBA ka vendosur në krah të prindërve dhe ka ndaluar librat LGBT në shkolla.

Lajmi duket se i referohet një vendimi të Gjykatës së Lartë amerikane në çështjen Mahmoud v. Taylor, që lidhej me të drejtën e prindërve që t’i largojnë fëmijët e tyre nga mësimdhënia që përfshin libra me personazhe LGBTQ+.

Çështja nisi në 2022 kur Shkollat ​​Publike të Qarkut Montgomery futën në kurrikulën e tyre fillore libra me figura si “Dasma e Xhaxha Bobit” dhe “Këlyshi i Krenarisë”, një libër për një qen që humbet në një paradë krenarie. Fillimisht, prindërit mund t’i zgjidhnin që fëmijët e tyre të mos merrnin pjesë në këto mësime, ngjashëm me politikat e edukimit seksual.

Por në mars të vitit 2023, bordi i shkollës eliminoi ato dispozita përjashtimi përveç edukimit seksual, duke përmendur mungesat në rritje dhe barrën administrative. Tre familje me besime të ndryshme, myslimane, katolike dhe ortodokse ukrainase, ngritën padi, duke argumentuar se kjo shkelte lirinë e tyre fetare.

Familjet nuk kërkonin të ndalonin librat, por t’i largonin fëmijët e tyre nga mësimet e librave.

Njësoj, Gjykata e Lartë amerikane nuk “ndaloi librat LGBT në shkolla”. Gjykata vendosi që politika e distriktit shkollor për të mos lejuar përjashtimet nga mësimet që përfshinin libra me tema LGBT shkelte të drejtën e prindërve për ushtrimin e lirë të fesë sipas Amendamentit të Parë. 

Vendimi i Gjykatës urdhëroi që “derisa të përfundojë i gjithë shqyrtimi i apelit në këtë rast, bordi [i shkollës] duhet të urdhërohet t’i njoftojë ata paraprakisht sa herë që një nga librat në fjalë ose ndonjë libër tjetër i ngjashëm do të përdoret në çfarëdo mënyre dhe t’u lejojë atyre që fëmijët e tyre të përjashtohen nga ai mësim.”
Duke dhënë një urdhër paraprak ndalimi, Gjykata nuk nxori një vendim përfundimtar mbi këtë çështje, duke arritur vetëm në përfundimin se prindërit ka të ngjarë të kenë sukses dhe duke e kthyer çështjen përsëri në gjykatën e shkallës së parë për shqyrtim, duke konsideruar mendimin e Gjykatës së Lartë.

The post Gjykata e Lartë e ShBA nuk ndaloi librat LGBT në shkolla appeared first on Faktoje.al.

Pretendimi: Një studim japonez ka zbuluar se sa më shumë doza vaksine anti-Covid të marrë një person, aq më herët është e mundshme që të vdesë

Verdikti: Mungon konteksti

————————————————

Në rrjete sociale, përfshi ato shqipfolëse, po qarkullon lajmi se një studim japonez ka zbuluar se sa më shumë doza vaksine anti-Covid të marrë një person, aq më herët është e mundshme që të vdesë.

Pretendimi i referohet kryesisht një studimi të udhëhequr nga Profesor Yasufumi Murakami nga Universiteti i Shkencave i Tokios, i cili thuhet se analizoi një databazë prej 18 milionë njerëzish në Japoni, si të vaksinuar edhe të pavaksinuar.

Artikulli citon Dr. Murakami si të ketë thënë: “Sa më shumë doza të marrë një person, aq më herët është e mundshme që të vdesë”.

Megjithatë, artikulli nuk përmban ndonjë lidhje që të dërgon tek studimi në fjalë, as titullin e studimit, kur dhe në çfarë reviste shkencore ai është botuar, apo ndonjë tjetër informacion identifikues.

Nga një kërkim me fjalë kyçe, dhe këqyrja e publikimeve nën emrin Yasufumi Murakami në databazat shkencore nuk rezultoi ndonjë studim si ai i cituar në artikull.

Nuk ka prova që sa më shumë doza vaksine anti-Covid të marrë një person, aq më herët është e mundshme që të vdesë. 

Një studim i nëntorit 2022 nga tre shkolla mjekësore japoneze, Zyra e Mjekut Ligjor të Tokios dhe Qeveria Metropolitane e Tokios zbuloi se efektet anësore të lidhura me vaksinën mund të kenë shkaktuar 1690 vdekje në Japoni midis 17 shkurtit 2021 dhe 17 prillit 2022. Megjithatë, studiuesit shtuan se “mungesa e informacionit të mjaftueshëm” pengoi një vlerësim të plotë të ndikimit të vaksinimit në këto vdekje. Studiuesit arritën në përfundimin se “shumë raste të vdekjeve pas vaksinimit kundër Covid-19 në këtë studim nuk treguan një lidhje të caktuar shkakësore midis vaksinimit dhe vdekjeve.”

Ndërkaq, një studim i gushtit 2022, i financuar pjesërisht nga Ministria e Shëndetësisë, Punës dhe Mirëqenies së Japonisë, tregoi se programi i vaksinimit i Japonisë çoi në “ulje të konsiderueshme” të rasteve të Covid (33%) dhe të vdekjeve (67%). Deri në momentin e shkrimit të këtij artikulli, qeveria japoneze dhe zyrtarët e shëndetësisë pohojnë se vaksinimi është forma më e mirë e mbrojtjes kundër infeksionit dhe sëmundjes së rëndë me Covid.

The post I pabazë studimi japonez për vdekjet e të vaksinuarëve nga Covid appeared first on Faktoje.al.

Pretendimi: Presidenti i Turqisë Erdogan merr vendimin e madh që ndryshon historinë

Verdikti: Mungon konteksti, clickbait

————————————————————

“Sulltani ngre në këmbë Turqinë! Erdogan merr vendimin e madh që ndryshon historinë nga Izraeli dhe Irani,” lajmëron artikulli i portalit “Shqip”. Titulli bombastik ka tërhequr natyrshëm vëmendjen e lexuesve dhe në Facebook lajmi është parë mbi 290 mijë herë.

Megjithatë, lexuesi kurioz që pret të lexojë për këtë vendim historik, do të zhgënjehet me të hapur artikullin.

Në brendi të tij zbulohet se “vendimi i madh që ndryshon historinë nga Izraeli dhe Irani” i referohet një deklarate të presidentit turk se Ankaraja do të rrisë ndjeshëm fuqinë e saj ushtarake përballë tensioneve në rritje mes Izraelit dhe Iranit. Ky është një vendim që po merret nga të gjitha vendet e NATO-s si pjesë e zotimit për të rritur në nivelin e pesë përqind të Prodhimit të Brendshëm Bruto (PBB) financimet ushtarake të tyre. Turqia është pjesë thelbësore e Aleancës të Atlantikut të Veriut si një nga aktorët kryesore të sigurimit të forcave njerëzore ushtarake, por së fundi duke rritur ndjeshëm edhe industrinë e saj ushtarake në prodhimin e armatimit dhe dronëve. 

Duke përdorur një titull gjysmak dhe mashtrues, faqja e detyron lexuesin të klikojë disa herë për të lexuar në përfundim një informacion që nuk ka lidhje aspak me atë çka titulli lë të kuptohet. Dukshëm qëllimi i faqes është që të mblidhen sa më shumë klikime dhe jo të informojë qytetarët. Duke kapitalizuar mbi frikën apo interesin e qytetarëve për të kuptuar nëse qeveria ka ndërmarrë ndonjë hap në lidhje me këtë situatë, faqja çorienton lexuesin me një titull që nuk përputhet aspak me brendinë e lajmit.

The post Erdogan nuk ngriti në këmbë Turqinë për konfliktin Izrael-Iran appeared first on Faktoje.al.

Pretendimi: Kjo video është një njoftim zyrtar nga presidenti amerikan Donald Trump duke promovuar kriptomonedhën Doge Coin

Verdikti: E pavërtetë, Deepfake

———————————————————

Një video që po qarkullon në rrjete sociale, përfshi ato shqipfolëse, duket se tregon presidentin amerika Donald Trump duke dhënë ç’pretendohet se është një “njoftim zyrtar” lidhur me vlerën e shkëmbimit të një kriptomonedhe të quajtur Doge Coin, në përfundim të së cilit, ai i nxit amerikanët të mos humbasin kohë por të blejnë këtë kriptomonedhë sa më shpejt për të ndryshuar jetën e tyre.

Megjithatë, që në pamje të parë lexuesit kritik do t’i ngjallen dyshime për vërtetësinë e kësaj video. 

Pamja e Trump, kryesisht mënyra e panatyrshme në të cilën lëviz goja e tij na bën të dyshojmë se kjo video është manipuluar me anë të teknologjisë deepfake, e cila manipulon shprehitë e fytyrës.

Me anë të motorit të kërkimit pamor Google Lens, Faktoje gjeti një video të ngjashme, të postuar nga llogaria e Shtëpisë së Bardhë në platformën X më 6 qershor 2025.

Gjasat janë që video ku Trump promovon Doge Coin është gjeneruar duke përdorur pamje nga një video e tillë, e një fjalimi të vërtetë të Trump, të cilat janë manipuluar me anë të tekonologjisë deepfake.

Për të treguar ndryshimin midis videos së vërtetë dhe asaj të gjeneruar me deepfake, më poshtë krahasojmë të dyja klipet. Vërreni lëvizjet e gojës së Trump në secilën.

Videos së manipuluar me deepfake i është shtuar audio me zërin e Trump. Zëri karakteristik i Trump ka arritur të imitohet nga një sërë programe të inteligjencës artificiale (AI) duke i dhënë mundësinë çdokujt ta bëjë presidentin të thotë çfarëdo, siç Faktoje ka treguar më parë.

Nuk ka postime zyrtare apo raportime se Trump ka folur apo promovuar ndonjëherë për kriptomonedhën Dogecoin. 

Në fakt, vlera e këmbimit e Dogecoin, e cila fitoi popullaritet pjesërisht sepse miliarderi Elon Musk dikur e quajti atë “kriptomonedha e popullit”, ra me 22% në fillim të Qershorit 2025. Kjo rënie korrespondoi me largimin zyrtar të Musk nga administrata Trump.

Video që po qarkullon në rrjete sociale dukshëm është një manipulim që shfrytëzon rrejshëm imazhin e Trump për të nxitur njerëzit të harxhojnë para, në këtë rast duke blerë Dogecoin.

The post I manipuluar promovimi i kriptomonedhave nga presidenti Trump appeared first on Faktoje.al.

Pretendimi: Kreu i PD Sali Berisha është në gjendje jo të mirë shëndetësore, gjë që dëshmohet nga çfarë ndodhi kur ai u ngrit në Parlament

Verdikti: Mungon konteksti, clickbait

——————————————————————————–

“Sali Berisha ne gjendje jo te mire shendetesore! Dalin pamjet nga Parlamenti, ja cfare ndodhi kur u ngrit”, njofton titulli i artikullit të portalit apkpro.online.

Megjithatë, kushdo që hap këtë lajm me dëshirën për të kuptuar se çfarë ndodhi në Parlament dhe gjendjen shëndetësore të Berishës, do të zhgënjehet.

Ajo që duket se artikulli ofron si provë e gjendjes jo të mirë shëndetësore të Berishës është fakti se ai “si rrallëherë ka zgjedhur të flasë nga karrigia në Parlament,” gjatë seancës plenare të 26 qershorit 2025.

Megjithatë, edhe kjo ‘provë’ hidhet poshtë nga vetë artikulli, i cili pranon se Berisha, megjithëse fillimisht zgjodhi të fliste nga vendi, “nuk zgjati as dy minuta nga koha e tij, [dhe] ai vendosi t’i drejtohet foltores në Kuvend.”

Artikulli madje përmban edhe një video që tregon pikërisht Berishën duke u ngritur nga karrigia e Parlamentit dhe duke iu drejtuar foltores.

Ky është një shembull i abuzimit që portalet online bëjnë duke njoftuar në titull zbardhjen e një informacioni, i cili më pas nuk gjendet aspak në brendi të tekstit. Qëllimi edhe në këtë rast është mbledhja e sa më shumë klikimeve për përfitime dhe jo informimi i lexuesve.

The post Abuzivë titujt për gjendjen shëndetësore të Sali Berishës appeared first on Faktoje.al.