Presidenti i Republikës së Shqipërisë, Bajram Begaj, ka shpërndarë një mesazh në platformën “X”, ku shpreh kënaqësinë për takimin në Ohër me liderin e BDI-së, Ali Ahmeti.

Në deklaratën e tij, kreu i shtetit thekson rolin vendimtar të shqiptarëve në Maqedoninë e Veriut si faktor shtetformues dhe kontribuues të rëndësishëm për paqen, stabilitetin dhe integrimin euroatlantik të vendit.

“Me Ali Ahmetin është gjithmonë kënaqësi të takohesh e të ndash mendime. Shqiptarët në Maqedoninë e Veriut janë faktor vendimtar shtetformues dhe mbështetës të palëkundur të rrugës Euroatlantike të vendit, duke dëshmuar ngahera përkushtim ndaj paqes, stabilitetit, bashkëjetesës dhe vlerave demokratike”, ka shkruar Presidenti Begaj.

Me Ali Ahmetin është gjithmonë kënaqësi të takohesh e të ndash mendime.

Shqiptarët në Maqedoninë e Veriut janë faktor vendimtar shtetformues dhe mbështetës të palëkundur të rrugës Euroatlantike të vendit, duke dëshmuar ngahera përkushtim ndaj paqes, stabilitetit, bashkëjetesës… pic.twitter.com/zxUJEDpdCX

— Bajram Begaj (@BajramBegajAL) July 13, 2025

Spitali Nasser në jug të Gazës ka raportuar se 24 persona janë vrarë pranë një pike shpërndarjeje ndihmash humanitare. Sipas dëshmitarëve palestinezë që ndodheshin në vendngjarje, forcat izraelite hapën zjarr ndaj civilëve që po përpiqeshin të siguronin ushqim të shtunën.

Nga ana tjetër, Forcat e Mbrojtjes së Izraelit (IDF) kanë deklaruar se nuk ka të dhëna për persona të plagosur nga ana e tyre në atë zonë. Një zyrtar ushtarak izraelit tha se ka pasur të shtëna paralajmëruese për të shpërndarë turmën, e cila sipas IDF-së, përbënte një kërcënim.

As pretendimet e dëshmitarëve palestinezë dhe as deklaratat e ushtrisë izraelite nuk janë verifikuar në mënyrë të pavarur. Izraeli nuk lejon hyrjen e mediave ndërkombëtare, përfshirë BBC-në, në Rripin e Gazës.

Pamjet që BBC ka parë më vonë gjatë së shtunës tregojnë disa trupa të mbuluar me çanta plastike në oborrin e spitalit Nasser, të rrethuar nga infermierë dhe njerëz me rroba të përgjakura. Në një tjetër video, një burrë tregon se njerëzit po prisnin për ndihma kur u qëlluan për rreth pesë minuta. Një punonjës i emergjencës akuzoi forcat izraelite për “vrasje me gjakftohtësi”.

Agjencia e lajmeve Reuters tha se ka folur me dëshmitarë që përshkruan njerëz të qëlluar në kokë dhe në pjesën e sipërme të trupit.

Një vit pas atentatit të 13 korrikut 2024 në Butler, Pennsylvania, që i mori jetën një mbështetësi dhe e la të plagosur vetë Donald Trump, Presidentin e SHBA-ve vazhdon ta përshkruajë atë ngjarje si një moment që ndryshoi jo vetëm fushatën, por edhe vetë atë si lider politik dhe si njeri.

Në momentin kur plumbi i atentatorit kaloi centimetra pranë kokës së tij, Trump ishte duke parë një grafik mbi emigracionin, i vendosur në anën tjetër të skenës. Ky kthim koke i shpëtoi jetën, dhe shumë nga ndjekësit e tij e konsideruan këtë “dorë të Zotit”.

“Ndodhi një bashkësi rrethanash që shmangu tragjedinë. Ai flet gjithmonë për ndërhyrje hyjnore,” deklaroi drejtori i komunikimit në Shtëpinë e Bardhë, Steven Cheung.

Atentatori 20-vjeçar, Thomas Matthew Crooks, u qëllua për vdekje nga shërbimi sekret në vendngjarje. Përveç Trumpit, nga të shtënat humbi jetën edhe një qytetar, Corey Comperatore, dhe u plagosën dy persona të tjerë. Ngjarja tronditi skenën politike amerikane dhe u pa si një pikë kthese në fushatën zgjedhore presidenciale të vitit 2024.

Vetëm dy ditë pas atentatit, Trump u rikthye në skenën politike, duke u shfaqur në Konventën Republikane në Milëaukee, në një hyrje spektakolare që simbolizonte rikthimin e tij si një “kampion” i papërkulur. Që nga ajo ditë, retorika e tij ka përfshirë gjithnjë e më shumë referenca fetare dhe misionare. Ai ka përshkruar shpëtimin nga vdekja si një thirrje hyjnore për të “shpëtuar Amerikën”.

“Nuk dua të them se ishte vetëm rastësi. Më pëlqen të besoj se ishte Zoti. Ai po na shikon,” deklaroi Trump në një intervistë, duke shtuar se përvoja e ka forcuar shpirtërisht dhe politikisht: “Ndryshoi diçka brenda meje. E ndjej veten më të fortë.”

Pas atentatit, siguria në tubimet e tij u përforcua ndjeshëm, ndërsa për disa javë ato u mbajtën në ambiente të mbyllura. Më vonë, me vendosjen e barrierave të blinduara, Trump rifilloi mitingjet karakteristike, edhe pse u duk herë pas here i ndjeshëm ndaj lëvizjeve të papritura nga audienca.

Ngjarja në Butler u përdor nga përkrahësit për të theksuar një dimension “mistik” të lidershipit të tij. Ndër ta, edhe Elon Musk, i cili e mbështeti hapur vetëm një ditë pas atentatit dhe u shfaq krah tij në një tubim tre muaj më vonë.

Pavarësisht momenteve ku u përpoq të promovonte unitetin kombëtar, Trump shpejt iu rikthye sulmeve të ashpra ndaj kundërshtarëve, sidomos Joe Biden dhe Kamala Harris. Megjithatë, bashkëpunëtorët e afërt thonë se ajo që mbeti nga 13 korriku ishte një ndjenjë më e thellë misioni.

“Pas atij momenti, ai e ndjeu edhe më fort përgjegjësinë për të punuar në emër të popullit,” u shpreh Steven Cheung. “Misioni i tij mori një rëndësi edhe më të madhe.”/abcnews.al

Lubjan Camema, 28 vjeç, është vënë në prangat e policisë së Kavajës, pasi mashtroi babain e tij duke inskenuar rrëmbimin e vet për të përfituar para. Në pranga u vu edhe bashkëpunëtori i tij, 45-vjeçarin Bernard Kiptiu, i cili do të merrte shumën e kërkuar.

“Specialistët për Hetimin e Krimeve në Komisariatin e Policisë Kavajë arrestuan në flagrancë shtetasit L. C., 28 vjeç, banues në Kavajë, dhe B. K., 45 vjeç, banues në Durrës. Nga veprimet hetimore rezultoi se shtetasi L. C. kishte mashtruar babain e tij, shtetasin B. C., duke i thënë se ishte rrëmbyer dhe se për lirimin e tij kërkohej një shumë eurosh. Rreth 100 metra larg vendit të ngjarjes, shërbimet e Policisë gjetën edhe 28-vjeçarin, i cili u arrestua në flagrancë, pasi rezultoi se kishte inskenuar ngjarjen dhe dy ditë më parë i kishte marrë automjetin babait të tij, dhe dyshohet se e ka shitur”, njofton policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kavajë, për veprime të mëtejshme, për veprën penale “Mashtrimi”, kryer në bashkëpunim./abcnews.al

Një ngjarje e rëndë ka ndodhur pasditen e djeshme në Valias, ku një 34-vjeçar, Franci Xhaferri, është plagosur me armë zjarri.

Sipas policisë, ngjarja ka ndodhur në një lokal në Valias, ku Besnik Koçiu, 51 vjeç, dyshohet se ka qëlluar me armë zjarri Franc Xhaferrin, 34 vjeç, të cilët jetonin në të njëjtën lagje. Pas plagosjes në këmbë, Franci Xhaferri është transportuar me urgjencë në spital dhe, sipas mjekëve, ndodhet jashtë rrezikut për jetën.

Pas hetimeve të shpejta, autoritetet arritën të identifikojnë dhe kapin Besnik Koçiun, i cili u arrestua për akuzën e plagosjes nga pakujdesia. Gjatë kontrollit të banesës së Koçiut, u gjet dhe u sekuestrua arma e zjarrit, një pistoletë, e dyshuar se është përdorur në kryerjen e plagosjes.

Gjithashtu, është arrestuar edhe i dëmtuari, Franci Xhaferri, pasi ai nuk ka bashkëpunuar plotësisht me hetuesit. Ai ka refuzuar të japë informacion të mjaftueshëm për rrethanat e ngjarjes dhe personin e dyshuar si autor të plagosjes, duke penguar hetimin.

Dyshohet se nga pakujdesia plagosi me armë zjarri një 34-vjeçar, identifikohet, kapet dhe vihet në pranga 51-vjeçari.Në pranga edhe 34-vjeçari i dëmtuar, për veprime që pengojnë zbulimin e së vërtetës.

Sekuestrohet arma e zjarrit me të cilën 51-vjeçari dyshohet se ka kryer plagosjen./abcnews.al

Ministria e Mbrojtjes njofton se gjatë 24 orëve të fundit janë regjistruar 18 vatra zjarri në disa bashki të vendit, duke përfshirë zona me rrezik të lartë përhapjeje. Aktualisht, 2 vatra vijojnë të jenë aktive, ndërsa 2 të tjera janë nën monitorim të vazhdueshëm nga strukturat përkatëse. Situata paraqitet më problematike në disa rajone të jugut dhe veriut të vendit, ndërsa autoritetet po ndjekin nga afër zhvillimin e tyre për të parandaluar përhapjen e mëtejshme të flakëve.

Aktualisht mbeten aktive vatrat:

• Qarku Dibër. Në vendin e quajtur “Liqeni i Luleve”, pjesë e Parkut Kombëtar Lurë, njësia administrative Lurë, bashkia Dibër, ka vijuar puna për shuarjen e zjarrit të rënë në një sipërfaqe pyjore me pisha dhe livadh. Për shuarjen e tij u angazhuan 6 efektivë të MZSH Dibër, 5 forca pyojre, 20 forca bashkiake, 30 efektivë nga Forcat e Armatosura, dhe helikopteri Cougar. Si pasojë është përshkuar njësipërfaqe rreth 30 ha. Ditën e sotme po vazhdon puna me të njëjtat kapacitete nga forcat operacionale, për shuarjen e vatrës së zjarrit.
• Qarku Tiranë. Në fshatin Zambish, njësia administrative Lekaj, bashkia Rrogozhinë, është punuar për shuarjen e zjarrit të rënë në një sipërfaqe me dushqe. Gjatë ditës së djeshme zjarri ka marrë përmasa akoma dhe më të mëdha për shkak të erës dhe është përhapur edhe në fshatrat Berdal, Thartor dhe Moroj, duke rrezikuar banesat në disa momente. Në vendngjarje u angazhuan Shërbimi vendor i MZSH të bashkisë Rrogozhinë me 1 automjet zjarrfikës dhe 10 efektivë, 30 forca bashkiake, 20 forca vullnetare, si dhe 1 helikopter i Forcave të Armatosura. Ditën e sotme forcat operacionale po vazhdojnë punën në terren për fikjen përfundimtare të zjarrit.

Në monitorim:

• Qarku Lezhë. Në kufirin midis fshatrave Skuraj dhe Gallatë, njësia administrative Milot, bashkia Kurbin. Në vendngjarje u angazhuan25 forca bashkiake, 20 forca policore, 6 forca nga Shërbimi Pyjor, 3 forca vullnetare dhe 30 efektivë të Forcave të Armatosura, bënë krehjen e zonës. Terreni është i pjerrët dhe me shkurre. Vatra mbetet nën monitorimin e strukturave vendore. Sipërfaqa e djegur është rreth 23 ha.
• Qarku Elbasan. Në vendin e quajtur “Mal Plak”, njësia Administrative Polis, bashkia Librazhd, ka vijuar puna për shuarjen e zjarrit tërënë në një sipërfaqe pyjore. Në vendngjarje u angazhuan Shërbimi vendor i MZSH Librazhd me 1 automjet zjarrfikëse dhe 8 efektivë, 3 inspektorë të pyjeve si edhe 10 forca vullnetare, të cilët punuan deri vonë për vënien nën kontroll të vatrës . Zjarri ka intesitet të ulët dhe vatra mbetet nën monitorimin e strukturave vendore.

Kryesisht zjarret janë regjistruar në sipërfaqe me shkurre dhe bimësi, ku si pasojë janë djegur rreth 79 hektarë. Në një rast, në fshatin Tarazh, njësia administrative Rrëshen, bashkia Mirditë zjarri ka rënë zjarr në një shtëpi private. Si pasojë, u dogj kuzhina dhe salloni i shtëpisë. Shkaku i rënies së zjarrit është i panjohur.

Në operacionet për shuarjen e zjarreve u angazhuan 26 automjete zjarrfikëse dhe 268 forca operacionale. Gjithashtu në operacionet e ditës së djeshme morën pjesë edhe Forcat e Armatosura me 60 efektivë dhe 2 helikopterë Cougar./abcnews.al

Policia e Shkodrës ka vijuar me operacionin e koduar “Koordinata”, i cili synon goditjen e kultivimit të paligjshëm të bimëve narkotike në të gjithë territorin e qarkut. Gjatë kontrolleve të kryera në disa njësi administrative janë gjetur dhe asgjësuar 2,943 bimë të dyshuara narkotike të llojit Cannabis Sativa.

Sipas njoftimit zyrtar të Policisë, për shpërdorim detyre janë proceduar penalisht dy roje mjedisi. Operacioni është zhvilluar në disa zona të qarkut, ku janë evidentuar rastet më të mëdha të kultivimit:

Në njësitë administrative Pult dhe Shosh (Shkodër), u asgjësuan 735 bimë kanabisi. Në Kastrat dhe Gruemirë (Malësi e Madhe), u asgjësuan 1,631 bimë. Në Temal dhe Shllak (Vau i Dejës), u asgjësuan 139 bimë. Në Luf-Qerret dhe Gjegjan (Pukë), u asgjësuan 438 bimë.

Policia bën me dije se kontrollet do të vijojnë në të gjithë qarkun, ndërsa vijon puna për identifikimin dhe kapjen e autorëve të përfshirë në këtë aktivitet kriminal.

Operacioni “Koordinata” është pjesë e një strategjie të gjerë për parandalimin dhe ndëshkimin e kultivimit të kanabisit në veri të vendit./abcnews.al

Read More...

Policia ka arrestuar 41-vjeçarin Musli Aslani, i cili kërkohej nga autoritetet austriake, për disa vepra të rënda penale. Musli Aslani i lindur dhe banues në Shkup, Maqedonia e Veriut ishte shpallur në kërkim ndërkombëtar, pasi ndaj tij është lëshuar urdhër arresti nga Zyra e Prokurorit Publik Innsbruck, Vjenë, Austri, për kryerjen e veprave penale “Trafikim droge”, “Kërcënim i rrezikshëm”, “Zhvatje e rënduar”, dhe “Plagosje”.

Këto vepra janë të parashikuara nga Kodi Penal Austriak, ku parashikohet një dënim maksimal deri në 20 vjet burgim.

“Në kuadër të këtij operacioni, në Tiranë, u bë e mundur lokalizimi, kapja dhe arrestimi i shtetasit M. A., 41 vjeç, lindur dhe banues në Shkup, Maqedonia e Veriut.

Ky shtetas ishte shpallur në kërkim ndërkombëtar, pasi ndaj tij është lëshuar urdhër arresti nga Zyra e Prokurorit Publik Innsbruck, Vjenë, Austri, për kryerjen e veprave penale “Trafikim droge”, “Kërcënim i rrezikshëm”, “Zhvatje e rënduar”, dhe “Plagosje”. Gjatë kontrollit fizik, 41-vjeçarit iu gjet një sasi lënde e dyshuar narkotike kanabisi, e cila u sekuestrua në cilësinë e provës materiale”, njofton policia.

Interpol Tirana vijon procedurat ligjore për ekstradimin e këtij shtetasi, në bashkëpunim me autoritetet austriake./abcnews.al

Rusia nuk ka ndërmend të sakrifikojë për Iranin. Pavarësisht nëse mbetet një aleat i dobishëm apo jo, për Kremlinin prioritetet sot janë të tjera. Mediat liberale ruse, të cilave ende u lejohet ndonjë devijim i rrallë nga linja zyrtare, kanë raportuar së fundmi për një takim urgjent të mbajtur në Kremlin pas sulmit të parë izraelit në Teheran, më 13 qershor.

Në tryezë ishin të pranishëm drejtuesit më të lartë të Ministrisë së Mbrojtjes, qeverisë, Këshillit të Sigurisë dhe vetë presidenti Vladimir Putin.

Për një herë, në një ambient ku zakonisht mbizotërojnë ndasitë dhe debatet, të gjithë pjesëmarrësit ndanë të njëjtin mendim: më parë duhej ruajtur marrëdhënia që po konsolidohet me Donald Trump, pastaj balanca e brishtë me Izraelin, e më pas dhe vetëm më pas marrëdhënia historike me Teheranin.

Irani nuk shihej si një partner i humbur, por pranë tij, Rusia rrezikonte të perceptohej si e dobët, në një fazë të re të riformatimit të ekuilibrave ndërkombëtarë, pas ndryshimeve në Shtëpinë e Bardhë në janar.

Rezultati i përplasjes së fundit në Lindjen e Mesme, ku u përfshinë edhe Shtetet e Bashkuara, nuk ka ndryshuar përfundimet e asaj nate në Kremlin. Irani, megjithëse jo i braktisur, ekspozoi dobësi që rrezikuan edhe pozitën e Rusisë si hallka e parë në zinxhirin e aleancave të saj.

Kështu, lajmi i publikuar nga portali amerikan Axios sipas të cilit Putin mbështet një marrëveshje bërthamore që i ndalon Iranit pasurimin e uraniumit, sipas kushteve të propozuara nga SHBA dhe Izraeli – ende nuk është konfirmuar zyrtarisht, por është i besueshëm. Sipas burimeve, qëndrimi i Moskës i është komunikuar si administratës Trump, ashtu edhe përfaqësuesve iranianë, të cilët, sipas “Novaya Gazeta”, e kanë refuzuar këtë propozim duke e cilësuar si një diktat.

Pasurimi i uraniumit ka qenë gjithmonë pika më e nxehtë në negociatat me Iranin. Teherani ka insistuar në të drejtën për të zhvilluar këtë proces brenda territorit të vet, ndërsa SHBA dhe Izraeli kërkojnë ndalimin e tij të plotë. Kjo mbetet një çështje që mund të ndezë një tjetër valë konflikti, një skenar që Rusia do të donte të shmangte, por që e sheh gjithnjë e më të mundshëm, duke marrë parasysh qëndrimin refuzues të Iranit për të diskutuar.

Pikërisht për këtë arsye, Putin ka vendosur të lë hapur një derë, në përputhje me qëndrimet e tij të mëparshme që flisnin për të drejtën e Iranit për një program bërthamor civil, por jo ushtarak.

Rreshtimi i Moskës me aksin SHBA-Izrael mund të përbëjë një ndryshim të madh në peizazhin diplomatik, duke larguar më tej Rusinë nga një aleat i komplikuar si Irani, dhe në të njëjtën kohë duke i ofruar mundësi të reja politike Kremlinit, sidomos nëse bisedimet bërthamore japin fryte.

Sipas burimeve pranë presidencës ruse, analiza të detajuara janë bërë për përfitimet dytësore që mund të sjellë kjo krizë. Rusia ka pasur gjithmonë një marrëdhënie të ftohtë me Iranin, përforcuar edhe nga vendimi i saj për të mbështetur rezolutën e OKB-së në qershor 2010, e cila vendosi sanksione ndaj Teheranit, si dhe për të mos i furnizuar kurrë sistemet e mbrojtjes ajrore.

Në Kremlin mbizotëron bindja se qëndrimi neutral dhe ndërmjetësues i Rusisë në konfliktin izraelito-iranian ka ndikuar që Donald Trump të mos ndërmarrë masa më të ashpra sanksionuese ndaj Moskës kohët e fundit.

“Do të ndjekim interesat tona”, thuhet se u shprehën burime zyrtare pas sulmit ajror izraelit. Marrëveshja komplekse me regjimin iranian nuk i ka sjellë ndonjë ndikim të madh Rusisë në Lindjen e Mesme, ndërkohë që afrimi me administratën Trump, për të cilin Irani është çështje kyçe, mund të përkthehet në përfitime shumë më konkrete sidomos në konfliktin me Ukrainën./abcnews.al

Një botë ku mund të shkarkosh gjithë përmbajtjen e Netflix-it në vetëm 16 sekonda nuk është më fantazi shkencore — falë një arritjeje të re të shkencëtarëve japonezë, ajo po bëhet realitet.

Studiuesit nga National Institute of Information and Communications Technology në Japoni kanë vendosur një rekord të ri botëror për shpejtësinë e internetit, duke arritur 1,02 petabit për sekondë, ose 1,020,000 gigabit. Kjo shifër mbresëlënëse u arrit në një distancë prej 1,808 kilometrash, duke thyer rekordin e mëparshëm të vendosur në tetor të vitit 2021.

Çelësi i këtij suksesi ishte përdorimi i një kablloje të re me fibër optike, e cila përdor një teknologji të avancuar që arrin të transmetojë 19 kanale drite të ndara brenda të njëjtës hapësirë ku zakonisht kalon vetëm një. Kjo rrit ndjeshëm kapacitetin e të dhënave që mund të dërgohen njëkohësisht.

Ky përparim teknologjik nuk është thjesht një rekord – ai ofron një pamje të qartë të së ardhmes së internetit, ku shpejtësitë ultra të larta do të bëjnë të mundur gjëra që sot duken të paarritshme.

Për shembull, me një lidhje të tillë, do të ishte e mundur të shikosh 10 milionë video në rezolucion 8K njëkohësisht, ose të shkarkosh të gjithë Wikipedia-n brenda një sekonde. Kjo teknologji premton gjithashtu përparime të mëdha në fushën e Inteligjencës Artificiale, realitetit virtual, dhe madje edhe të holografisë.

Për botën që po ecën gjithnjë e më shumë drejt të dhënave masive dhe përpunimit të avancuar, kjo është një hap gjigant përpara.

Nuk është as zog, as avion, është filmi më i ri “Superman” që po ngjitet fuqishëm drejt majës së arkëtimeve në kinematë amerikane.

Filmi i prodhuar nga Warner Bros. Pictures, me regji nga James Gunn, arkëtoi rreth 56.5 milionë dollarë vetëm të premten në SHBA, duke iu shtuar 22.5 milionë dollarëve të fituara nga shfaqjet e para të enjten. Bazuar në parashikimet e hershme, “Superman” pritet të arrijë shifrën e afërsisht 130 milionë dollarëve në tregun amerikan deri në fund të fundjavës.

Kompania Warner Bros. Discovery, pronare e CNN, e ka konsideruar këtë film si një nga më sfiduesit për t’u parashikuar në aspektin e suksesit financiar.

“‘Superman’ ka qenë një nga filmat më të vështirë për t’u projektuar,” tha Shawn Robbins, drejtor analitik në Fandango dhe themelues i faqes Box Office Theory. Ai thekson se interesi për filmat me superheronj ka rënë kohët e fundit, veçanërisht për filmat e DC Studios, të cilët kanë hasur vështirësi përballë suksesit të Marvel.

Megjithatë, ky projekt shënon një rifillim për universin filmik të DC-së. “Ky është një ‘Superman’ për epokën moderne dhe një mundësi për një rifreskim të identitetit të DC Comics,” tha Paul Dergarabedian, analist i lartë në kompaninë Comscore.

Sipas Dergarabedian, pritshmëritë fillestare për filmin ishin rreth 90 milionë dollarë, por pritja pozitive nga publiku dhe kritika ka ndikuar në rritjen e parashikimeve. Filmi ka marrë 82% vlerësim në Rotten Tomatoes dhe 95% në Popcornmeter, duke reflektuar një pritje të ngrohtë.

Krahasuar me adaptimin e mëparshëm të personazhit nga Zack Snyder në “Man of Steel” (2013), i cili arkëtoi rreth 402.6 milionë dollarë në SHBA (i rregulluar për inflacion), filmi i ri ofron një qasje më të lehtë dhe më optimiste ndaj figurës ikonike të Supermanit.

Filmi gjithashtu ka përfituar nga interesimi i rritur për prodhime të mëdha verore, si “Jurassic World Rebirth”, që debutoi javën e kaluar me 147 milionë dollarë në arkëtimet amerikane.

“‘Superman’ është një film tipik veror një film argëtues që të fton në kinema,” shtoi Dergarabedian.

Robbins theksoi se filmi i ri është dalluar nga filmat e tjerë të zhanrit, falë tonit më të lehtë dhe optimizmit që përcjell, pavarësisht vlerësimit PG-13. Ai parashikon që filmi do të tërheqë jo vetëm adhuruesit e komikëve, por edhe familjet.

Ndërkohë, disa filma të tjerë me superheronj kanë dështuar në arkëtime, siç ishte rasti i “The Marvels” në vitin 2023, që debutoi me vetëm 46 milionë dollarë, shifra më e ulët në historinë e MCU-së. Në të kundërt, filmi “Deadpool & Wolverine”, me vlerësim R, arkëtoi mbi 200 milionë dollarë vetëm në fundjavën e parë të korrikut 2024.

“Publiku ka parë aq shumë filma superheroikë në 20 vitet e fundit, sa shumë prej tyre ndihen të lodhur nga ky zhanër. Mendojnë: ‘Është i mirë, por dua diçka ndryshe’,” shpjegoi Robbins.

Sipas tij, suksesi i “Superman” do të varet kryesisht nga forca e fjalës së gojës në ditët në vijim.

“Gjithmonë ka qenë një lojë pritshmërish — dhe gjithmonë do të mbetet e tillë,” përfundoi Robbins./abcnews.al

Udhëheqësi i Koresë së Veriut, Kim Jong-un, ka rikonfirmuar mbështetjen e tij të plotë për Rusinë në luftën në Ukrainë, gjatë një takimi me ministrin e Jashtëm rus, Sergei Lavrov, njoftoi të dielën agjencia shtetërore e lajmeve KCNA.

Lavrov ndodhet për një vizitë treditore në Korenë e Veriut, pjesë e një serie takimesh të nivelit të lartë ndërmjet dy vendeve, teksa thellohen lidhjet ushtarake dhe politike mes tyre. Sipas KCNA, takimi mes Kim Jong-unit dhe Lavrovit u zhvillua të shtunën “në një atmosferë të ngrohtë e shoqërore, të mbushur me besim”.

Gjatë takimit, Kim deklaroi se Koreja e Veriut është “gati të mbështesë pa kushte dhe të inkurajojë të gjitha masat që ndërmerr udhëheqja ruse për të adresuar shkakun rrënjësor të krizës në Ukrainë”.

Lavrov, gjatë një deklarate për mediat nga qyteti lindor Wonsan, ku zhvilloi takime me Kim Jong-un dhe homologen e tij koreano-veriore, Choe Son Hui, tha se dy vendet do të mbështesin integritetin territorial të njëra-tjetrës. Ai vlerësoi gjithashtu Wonsan-in si një “destinacion turistik tërheqës”, ndërsa shtoi: “Shpresojmë që të bëhet i njohur jo vetëm për qytetarët vendas, por edhe për turistët rusë.”

Ministri i Jashtëm rus paralajmëroi gjithashtu SHBA-në, Korenë e Jugut dhe Japoninë për krijimin e një aleance të sigurisë që synon Korenë e Veriut. “Paralajmërojmë kundër shfrytëzimit të këtyre lidhjeve për të ndërtuar aleanca që synojnë ndonjë vend të caktuar, përfshirë Korenë e Veriut dhe, sigurisht, Rusinë,” tha Lavrov, sipas agjencisë ruse të lajmeve Tass.

Marrëdhëniet në rritje midis Moskës dhe Phenianit kanë ngritur shqetësime në Seul dhe Uashington, të cilët frikësohen se Rusia mund t’i transferojë Koresë së Veriut teknologji të ndjeshme që do të forcojnë programet e saj bërthamore dhe raketore. Lavrov, nga ana e tij, tha se e kuptonte vendimin e Phenianit për të zhvilluar armë bërthamore. “Teknologjitë që përdor Koreja e Veriut janë rezultat i punës së shkencëtarëve të saj. Ne i respektojmë aspiratat e tyre dhe i kuptojmë arsyet që i shtyjnë drejt këtij zhvillimi,” tha ai.

Ndërkohë, Ukraina njoftoi se të paktën gjashtë persona u vranë nga sulmet ajrore ruse gjatë natës së të shtunës, ku u përdorën qindra dronë dhe raketa me rreze të gjatë veprimi. “Rusët po vazhdojnë të përdorin taktikat e tyre të terrorit kundër vendit tonë, duke goditur në mënyrë të përqendruar qytete dhe rajone të ndryshme,” tha presidenti ukrainas, Volodymyr Zelenskyj, në fjalimin e tij të mbrëmjes.

Sipas tij, Rusia lëshoi 26 raketa lundrimi dhe 597 dronë sulmues, më shumë se gjysma e të cilëve ishin të tipit iranian “Shahed”. Forcat ajrore ukrainase bënë të ditur se kishin rrëzuar 319 dronë dhe 25 raketa, por një raketë dhe rreth 20 dronë goditën pesë vendndodhje të ndryshme.

Zelenskyj tha se sulmet shkaktuan vdekjen e dy personave dhe plagosjen e 20 të tjerëve në rajonin jugperëndimor të Çernivcit, larg vijës së frontit. Dymbëdhjetë persona u plagosën në Lviv, gjithashtu në perëndim, ndërsa dy të tjerë humbën jetën në Dnipropetrovsk dhe tre u plagosën në Kharkiv.

Ai shtoi se disa nga dronët e përdorur nga Rusia ishin “simulatorë”, të cilët synonin të “mbingarkonin sistemin e mbrojtjes ajrore dhe ta bënin më të vështirë rrëzimin e dronëve vetëvrasës”. Ministria ruse e Mbrojtjes deklaroi se kishte goditur objekte të industrisë ushtarake në Lviv, Kharkiv dhe Lutsk, si dhe një aerodrom ushtarak.

Në një mesazh video, Zelenskyj njoftoi se Ukraina është pranë një marrëveshjeje të re për sistemet raketore “Patriot” dhe raketat përkatëse. Ai shtoi se vendi po rrit gjithashtu prodhimin e sistemeve të veta mbrojtëse.

I dërguari i posaçëm amerikan, Keith Kellogg, pritet të nisë vizitën e tij në Ukrainë të hënën, ndërsa përpjekjet e Uashingtonit për një armëpushim kanë ngecur. Ish-presidenti amerikan Donald Trump deklaroi se të hënën do të japë një “deklaratë të rëndësishme… për Rusinë”. Ndërkohë, Kremlini përsëriti të premten kundërshtimin e tij ndaj një force paqeruajtëse evropiane në Ukrainë, pasi presidenti francez Emmanuel Macron bëri të ditur se aleatët e Kievit kishin një plan “gati për t’u zbatuar menjëherë pas një armëpushimi”.

Zelenskyj u bëri thirrje aleatëve perëndimorë që të marrin masa konkrete për t’i dhënë fund luftës së nisur nga Rusia në shkurt 2022. “Intensiteti i sulmeve ajrore ruse kërkon vendime të shpejta dhe mund të ndalet tani përmes sanksioneve,” shkroi ai në rrjetet sociale. Ai kërkoi veçanërisht ndëshkime për ata që “ndihmojnë Rusinë në prodhimin e dronëve dhe përfitojnë nga nafta e saj”./abcnews.al

Në mbledhjen e Komisionit të Trashëgimisë së Kulturës Botërore të UNESCO-s në Paris u pranuan në listën e objekteve të mbrojtura të kulturës botërore kështjellat përrallore të mbretit të Bavarisë Ludwig i II si dhe shtëpia mbretërore në Berg.

Këto kështjella në mjedise idilike natyrore që prej mëse 140 vjetësh janë si një magnet për turistët. Vetëm vitin e kaluar janë joshur të vizitojnë këto vepra mjeshtërore rreth 1,7 milionë vizitorë nga brenda dhe jashtë vendit.

Tri kështjellat e famshme të Ludwig-ut të II u ndërtuan gjatë mbretërimit të tij me shuma maramendëse parash. Kështjellat Linderhof dhe Herrenchiemsee, ku janë vendosur ekspozitat qëndrore në kujtim të Ludwig-ut të II, si dhe kështjella Neuschwanstein.

Ludwig i II është konsideruar në gjithë botën si gjermani më i njohur, megjithëse parë hollë ai ka qenë bavarez: Mbreti Ludwigu i II ka lindur më 25 gusht 1845 në kështjellën Nymphenburg afër Mynihut dhe ka vdekur më 13 qershor 1886 në liqenin Starnberger. Ludwigu i II. ka sunduar nga 1864 deri në vdekjen e tij si mbreti i Bavarisë. Ai nuk ka qenë mbret “konvencional”, të cilit nuk i interesonte shumë politika, lufta dhe administrata. Ai angazhohej për artin, ndërtimin e kështjellave shumë pompoze, mbështeste Richard Wagnerin dhe muzikën e tij./DW

Bashkimi Evropian dhe Meksika kanë reaguar me zhgënjim ndaj kërcënimit të Presidentit amerikan Donald Trump për vendosjen e tarifave prej 30% ndaj importeve të tyre duke nisur nga 1 gushti.

Meksika e cilësoi këtë si një “marrëveshje të padrejtë” dhe theksoi se sovraniteti i saj nuk është i negociueshëm. Ndërkohë, Presidentja e Komisionit Evropian, Ursula von der Leyen, paralajmëroi se BE është gati të marrë “masa reciproke proporcionale”, nëse do të jetë e nevojshme. Megjithatë, të dyja palët shprehën dëshirën për të vijuar negociatat me SHBA-në.

Trump ka bërë të qartë se nëse ndonjë prej partnerëve tregtarë do të hakmerrej me tarifa të ngjashme, ai do të përgjigjej me rritje të mëtejshme të taksave mbi importet.

Gjatë kësaj jave, Trump njoftoi gjithashtu tarifa të reja ndaj mallrave nga Japonia, Koreja e Jugut, Kanadaja dhe Brazili, që do të hyjnë në fuqi muajin e ardhshëm. Në një letër drejtuar presidentes së Komisionit Evropian, Ursula von der Leyen, ai shkroi:

“Për vite me radhë kemi diskutuar marrëdhëniet tona tregtare me Bashkimin Evropian dhe kemi përfunduar se duhet të largohemi nga këto disbalanca të thella dhe të vazhdueshme tregtare, të krijuara nga tarifat dhe barrierat tuaja tregtare.”

Në të njëjtën letër, ai theksonte se marrëdhënia tregtare SHBA-BE ka qenë “larg reciprocitetit”. Në rast se BE ose Meksika vendosin tarifa të reja hakmarrëse, Trump paralajmëroi se do t’i përgjigjej me rritje të mëtejshme përtej 30%.

Në një intervistë të regjistruar për Fox News që u transmetua të shtunën në mbrëmje, Presidenti Trump deklaroi se disa vende janë “shumë të shqetësuara” nga tarifat, por sipas tij ato po sjellin “qindra miliarda dollarë në arkën amerikane”.

Brukseli dhe Uashingtoni pa marrëveshje para afatit

Bashkimi Evropian, që shpesh ka qenë në shënjestër të kritikave të Trump, ka përpjekur të arrijë një marrëveshje tregtare me Uashingtonin përpara afatit të 1 gushtit. Megjithatë, negociatat kanë mbetur pezull dhe nuk ka pasur njoftime për ndonjë përparim konkret.

Në vitin 2024, deficiti tregtar i SHBA-ve me BE-në arriti në 235.6 miliardë dollarë (rreth 202 miliardë euro), sipas Zyrës së Përfaqësuesit të Tregtisë së SHBA-së.

Von der Leyen konfirmoi se BE mbetet e gatshme “të punojë për një marrëveshje deri më 1 gusht”, por shtoi se “do të ndërmarrim të gjitha hapat e nevojshëm për të mbrojtur interesat evropiane, përfshirë miratimin e masave reciproke nëse është e domosdoshme”.

Reagime të ashpra nga liderët evropianë

Presidenti francez Emmanuel Macron e quajti vendimin e Trump “të papranueshëm” dhe kërkoi përgatitjen e masave hakmarrëse. Kryetari i Komitetit të Tregtisë në Parlamentin Evropian, Bernd Lange, e cilësoi lëvizjen si “një shuplakë në fytyrë për negociatat” dhe kërkoi që BE të veprojë pa vonesë.

Nga ana tjetër, disa liderë të BE-së u shprehën për vijimin e dialogut. Kryeministrja italiane Giorgia Meloni tha se beson te një “marrëveshje e drejtë”, ndërsa kryeministri holandez Dick Schoof theksoi se BE “duhet të mbetet e bashkuar dhe e vendosur” për të arritur një marrëveshje të dobishme për të dyja palët.

Shoqata Gjermane e Industrisë së Automjeteve paralajmëroi për kosto të larta të mundshme për prodhuesit gjermanë dhe e cilësoi vendimin e Trump si “shqetësues për përshkallëzimin e konfliktit tregtar”.

Meksika: Sovraniteti nuk negociohet

Në një letër drejtuar presidentes meksikane Claudia Sheinbaum, Trump kritikoi Meksikën për mosveprim të mjaftueshëm ndaj trafikut të drogës, duke e cilësuar vendin si një “fushë loje për kartelet”.

Presidentja Sheinbaum u shpreh optimiste për një marrëveshje me SHBA-në, por theksoi se: “Ka gjëra për të cilat mund të negociojmë dhe gjëra që nuk negociohen kurrë. Sovraniteti ynë nuk është në tryezë”.

Në një deklaratë të përbashkët, ministritë e Ekonomisë dhe të Jashtme të Meksikës e quajtën lëvizjen e Trump një “marrëveshje të padrejtë”.

Ende nuk është e qartë nëse produktet meksikane që tregtohen brenda kuadrit të Marrëveshjes SHBA-Meksikë-Kanada (USMCA) do të përjashtohen nga tarifat, ndërkohë që Shtëpia e Bardhë ka deklaruar se Kanadaja do të përjashtohet.

Deri më tani, administrata Trump ka shpallur kushte tarifore për 24 vende dhe Bashkimin Evropian, dhe synon të përmbyllë “90 marrëveshje në 90 ditë”, sipas këshilltarit të tregtisë Peter Navarro. Deri tani janë njoftuar vetëm dy marrëveshje paraprake – me Britaninë e Madhe dhe Vietnamin.

Shqipëria vijon të jetë nën ndikimin e masave ajrore të nxehta dhe të thata, duke sjellë një tjetër ditë me mot përvëlues. Sipas MeteoAlb, e diela e 13 korrikut 2025 do të karakterizohet nga kthjellime të shumta dhe diell i fortë në të gjithë territorin.

Temperaturat e ajrit pritet të shënojnë rritje të ndjeshme në orët e mesditës, ku maksimumet do të kapin vlerat deri në 36°C, veçanërisht në zonat e ulëta dhe ato të jugut. Mëngjesi ka nisur me mot të kthjellët dhe temperatura të buta, por që nga ora 10:00 e tutje pritet një rritje graduale e ndjeshme e të nxehtit.

Orët më të nxehta të ditës do të jenë nga 12:00 deri në 16:00, periudhë gjatë së cilës qytetarët këshillohen të shmangin ekspozimin e drejtpërdrejtë në diell. Gjatë mbrëmjes pritet një rënie graduale e temperaturave, duke sjellë një mot më të freskët, me minimumet që do të zbresin deri në 24°C.

Rekomandime për qytetarët:

Institucionet shëndetësore apelojnë për kujdes të shtuar ndaj temperaturave të larta, sidomos për fëmijët, të moshuarit dhe personat me sëmundje kronike. Këshillohet përdorimi i ujit në sasi të bollshme, veshje të lehta dhe shmangia e qëndrimit në ambiente të hapura gjatë pikës maksimale të nxehtësisë./abcnews.al

Dashi – E diela sjell një aleancë të veçantë mes Diellit dhe Hënës që ju hap horizonte të reja në ndjenjat personale. Ndjeni një nevojë të fortë për t’u çliruar nga një barrë emocionale që e keni mbajtur për një kohë të gjatë. Në dashuri, veçanërisht për beqarët, shfaqet një mundësi e papritur. Në punë, mund të keni intuita të vlefshme, por shmangni marrjen e vendimeve – shtyjini për më vonë. Shëndeti është në përmirësim, por mos e teproni. Në këtë ditë me energji të veçanta, yjet ju sugjerojnë t’u kushtoni rëndësi ëndrrave: mbartin mesazhe të rëndësishme. Mbylleni ditën me një moment mirënjohjeje. Mos ndiqni impulsin, por dritën që ju udhëheq.

Demi – E diela sjell një energji të thellë për ju, të ngarkuar me ndjesi të forta. Planetët ju shtyjnë drejt një reflektimi të qetë, por të rëndësishëm. Mund të ndodhë një përballje me dikë nga e kaluara. Mos e shmangni: përballja me të pathënat do t’ju sjellë qetësi të brendshme. Në dashuri, qëndrueshmëria është e mundur, por kërkon ndershmëri të plotë. Puna është në pauzë, por një ide e shkëlqyer mund të lindë pikërisht në heshtje. Shëndeti është i mirë, por keni nevojë të çlironi mendjen. Kjo është një ditë që mund të sjellë magji të padukshme nëse i dëgjoni sinjalet e trupit.

Binjakët – 13 korriku sjell një qiell të dyanshëm për ju: dritë dhe hije që ndërthuren njësoj si emocionet tuaja. Do përjetoni momente të qarta mendore të ndjekura nga luhatje humori. Mos u trembni: ky është ritmi juaj natyror. Në dashuri gjithçka është e mundur – një fjalë e thënë me ndjenjë mund të rizgjojë një flakë të vjetër ose ta shuajë atë. Puna dhe financat nuk janë prioritet sot, por me ndihmën e Mërkurit, ju vijnë ide të reja për të ardhmen. Ecni në natyrë për të pastruar mendjen. Taroti ju flet për “Zgjedhje”: dëgjoni intuitën tuaj. Kujdes me fjalët – ato mund të shërojnë ose të plagosin. Sot, jini mjeshtër i komunikimit, ashtu siç vetëm ju dini.

Gaforrja – Hëna dhe Neptuni vallëzojnë në qiellin tuaj, duke e kthyer këtë të diel në një ditë perfekte për të liruar emocionet. Mos e fshehni ndjeshmërinë tuaj – sot ajo është forca juaj më e madhe. Në dashuri ka nevojë për butësi, por edhe për qartësi. Nëse ndieni pasiguri, flisni. Familja ka një rol të madh sot dhe mund të jetë ose strehë, ose kufi – ju vendosni. Puna nuk është në fokus, por një mesazh i papritur mund të ndikojë në javën që vjen. Kujdesuni për shëndetin me ujë dhe pushim. Taroti flet për “Shërim të brendshëm”. Një ditë emocionesh të thella, si një liqen i qetë që fsheh botë të padukshme. Frymoni me ritmin e Hënës.

Luani – Dielli, udhëheqësi juaj qiellor, ju dhuron forcë dhe guxim këtë të diel të ndritshme. Një takim, edhe i shkurtër, mund të ndezë një ndjenjë të re. Nëse jeni në një lidhje, flisni për ëndrrat tuaja të përbashkëta. Puna nuk ju lë rehat as ditën e pushimit, por sot është mirë të ngadalësoni dhe të dëgjoni trupin. Shëndeti është në ngritje, por mos e teproni me aktivitet fizik – ushtrohuni me maturi. Yjet flasin për energji diellore: ndizni një qiri të verdhë dhe lejoni dritën të ju udhëheqë. Taroti tregon “Zgjerim”: bota ju pret. Një e diel për ta jetuar me pasion dhe bujari, ashtu siç i ka hije një Luani.

Virgjëresha – Mendja juaj është aktive, por kjo e diel është ideale për t’i dhënë pushim. Në dashuri, komunikimi është thelbësor – mos supozoni se tjetri e di çfarë ndjeni. Puna mund të presë, por një ide e rëndësishme mund t’ju vijë në ëndërr. Kujdesuni për veten dhe ata që doni – është koha për përkujdesje. Shëndeti kërkon vëmendje, sidomos stomaku dhe zorra. Taroti tregon kartën e “Priftereshës së Lartë”: dëgjoni intuitën tuaj femërore, edhe nëse jeni mashkull. Një e diel për të rifituar lidhjen me tokën dhe me ritmin tuaj të brendshëm.

Peshorja – E diel e ekuilibrave të brishtë për ju, të dashur Peshore. Yjet kërkojnë harmoni, por jo në kurriz të së vërtetës. Mund të thirreni për të ndërmjetësuar në një çështje familjare apo emocionale. Dashuria është intensive, por kini kujdes të mos idealizoni. Beqarët mund të përjetojnë një takim të papritur nën dritën e Hënës që i çrregullon ëmbëlsisht. Puna nuk ju shqetëson sot, por jeni të frymëzuar nga arti dhe bukuria. Shëndeti ndikohet nga humori: rrethojeni veten me ngjyra të çelura dhe muzikë të qetë. Këshilla e ditës: lini vend për gjithçka që ju bën mirë. Taroti tregon kartën e “Drejtësisë”: veproni me baraspeshë. Një e diel elegante, e pezulluar mes ëndrrës dhe realitetit.

Akrepi – Ujërat e thella të shpirtit tuaj lëkunden fuqishëm sot, Akrep. Një ditë e dendur me ndjesi, intuita dhe dëshira të fshehura që dalin në sipërfaqe. Mund të merrni një zbulesë të rëndësishme, ndoshta në ëndërr. Në dashuri, ata që kanë mbyllur një kapitull tani ndiejnë thirrjen për një fillim të ri. Puna nuk është në qendër të vëmendjes, por një projekt i mbajtur fshehur mund të marrë formë. Shëndeti po përmirësohet, por kushtojini vëmendje gjumit. Lëreni veten të lirë – shkruani, meditoni, krijoni hapësirë. Taroti sjell “Hënën”: gjithçka është në transformim. Ruani sekretet tuaja, por mos u bëni rob i tyre. Një e diel e metamorfozës, ku e fshehta mund të lulëzojë.

Shigjetari – Qielli i së dielës ju dhuron lehtësi, të dashur Shigjetarë. Energjia e Jupiterit ju mbron dhe ju fton të eksploroni, qoftë edhe brenda vetes. Në dashuri, hapësirë për dialog të këndshëm: çiftet rifitojnë afërsinë, beqarët shkëlqejnë. Puna mund të presë, por mendja juaj tashmë ka fluturuar larg. Shëndeti është i mirë, por shmangni tepricat. Sot është dita për të zgjeruar horizontet – kanalizoni energjinë në drejtimin e duhur. Taroti tregon “Bota”: jeni gati të pushtoni territore të reja. Një e diel dinamike, ku liria është çelësi i çdo ekuilibri. Dëgjoni shpirtin tuaj udhëtar.

Bricjapi – E diel reflektive dhe me disiplinë të ëmbël për ju, Bricjapë, qielli është i qëndrueshëm por kërkon pak më shumë fleksibilitet nga ana juaj. Në dashuri ndjenjat janë të thella, të qeta: çiftet kujtojnë premtime të vjetra. Beqarët ndihen të tërhequr nga persona ndryshe nga zakonisht. Puna nuk largohet nga mendja juaj, por sot keni nevojë për pushim të vërtetë. Shëndeti kërkon vëmendje – sidomos për tensione në muskuj. Këshilla e ditës: ecni në natyrë dhe lini telefonin në shtëpi. Taroti tregon “Ermitin”: vetmia nuk është bosh, por dritë. Një ditë për t’u jetuar me ngadalësi, me lexime dhe frymëmarrje të vetëdijshme. Edhe malet e mëdha pushojnë ndonjëherë.

Ujori – Qielli i së dielës ju frymëzon me vizione të reja, Ujorë. Horoskopi ju fton të ëndërroni, por me këmbë në tokë. Në dashuri jeni të shqetësuar – flisni me partnerin ose hulumtoni brenda vetes. Beqarët mund të marrin një telefonatë të papritur. Puna nuk ndalet në mendjen tuaj, por përgjigjet vijnë vetëm kur qetësoheni. Ushqeni shëndetin mendor me art, muzikë dhe miq të sinqertë. Sot është dita për një zgjim shpirtëror – meditoni ose mbani një ditar ëndrrash. Taroti sjell “Yllin”: jeni të udhëhequr, edhe nëse nuk e kuptoni menjëherë. Një e diel elektrizuese dhe e hollë: ndizni dritën brenda vetes.

Peshqit – Të ndjeshëm dhe ëndërrimtarë, nesër do të ndjeni valë të forta emocionale. Në dashuri jeni magnetikë: kush ju takon ndien një energji të veçantë. Çiftet rigjejnë butësinë, beqarët mund të përjetojnë një dashuri me shikim të parë. Puna sot nuk ka rëndësi – dhe me të drejtë. Shëndeti kërkon pushim për të gjetur ekuilibrin. Fuqia juaj sot është imagjinata: vizatoni, shkruani, dëgjoni muzikë. Taroti ju jep “Të Marrin”: liri, besim dhe surprizë. Një e diel që ka shijen e një ëndrre – gjithçka është e mundur, nëse e mbani zemrën të hapur.

Sekretari amerikan i Shtetit, Marco Rubio, është takuar të premten me homologun e tij kinez, Wang Yi, në Kuala Lumpur të Malajzisë, teksa dy fuqitë kryesore ekonomike po konkurrojnë për të shtyrë përpara agjendat e tyre në Azi, në kohën e tensioneve gjithnjë e në rritje për shkak të politikës tarifore të presidentit amerikan, Donald Trump.

Diplomati më i lartë i Washingtonit është në Malajzi në udhëtimin e tij të parë në kontinentin e Azisë që kur e nisi detyrën, duke marrë pjesë në Samitin e Azisë Lindore dhe Forumit Rajonal të ASEAN-it, së bashku me homologët nga Japonia, Kina, Koreja e Jugut, Rusia, Australia, India, Bashkimi Evropian dhe shtetet e Azisë Juglindore.

Takimi i tij me Wang është zhvilluar paralelisht me rritjen e tensioneve globale si pasojë e vendimeve të Trumpit, përderisa autoritetet kineze i kanë paralajmëruar këtë javë Shtetet e Bashkuara që të mos i rivendosin tarifat e larta ndaj mallrave me origjinë nga Kina, ka raportuar Reuters.

Pekini zyrtar gjithashtu ka kërcënuar se do të hakmerret karshi vendeve që nënshkruajnë marrëveshje me SHBA-në, të cilat kanë për qëllim përjashtimin e Kinës nga zinxhirët e furnizimit.

Vizita e Rubios është pjesë e përpjekjeve për të rivendosur fokusin e SHBA-së në rajonin e Indo-Paqësorit dhe për të shkuar përtej konflikteve në Lindjen e Mesme dhe Evropë, që kanë preokupuar shumicën e agjendës së jashtme të administratës Trump.

Mirëpo, kjo është vënë nën hije nga njoftimi i kësaj jave për tarifat e reja amerikane kundrejt shumë vendeve aziatike dhe aleatëve të SHBA-së, që përfshijnë tarifa prej 25% mbi Japoninë, Korenë e Jugut dhe Malajzinë, 32% për Indonezinë, 36% për Tajlandën dhe Kamboxhian, dhe 40% për Myanmarin dhe Laosin.

Analistët kanë theksuar se qëllimi i vizitës së Rubios është që të riafirmohet pikëpamja se Shtetet e Bashkuara mbeten partner më i besueshëm se Kina.

Në Departamentin Amerikan të Shtetit kanë njoftuar se Rubio është takuar të premten edhe me homologët e Tajlandës, Kamboxhias dhe Indonezisë.

Një ditë më parë, ai u kishte thënë ministrave të jashtëm të Azisë Juglindore se rajoni i Indo-Paqësorit ngelet pikë kyçe e politikës së jashtme të SHBA-së.

Një vatër zjarri është aktivizuar pak minuta më parë në një sipërfaqe me shkurre mbi fshatin Hudënisht të Pogradecit. Aktualisht vatra është aktive ndërsa kanë mbërritur edhe forcat zjarrfikëse të Pogradecit.

Duke qenë se tereni është malor ka vështirësi në ndërhyrje për të neutralizuar flakët, të cilat po mbështeten edhe nga era.

Rreth 20 persona janë vënë në dispozicion për fikjen e zjarrit mbi fshatin Hudënisht aty ku prej rreth 1 ore flakët kanë përfshirë masivin pyjor të përbërë me shkurre dhe pisha. Ndërkohë që flakët janë duke u neutralizuar duhet theksuar që ndërhyrja po kryhet vetëm me trupa nga toka për shkak se terreni është i pamundur të aksesohet me mjete.

Nga zjarri është përfshirë një sipërfaqe e konsiderueshme pyjore, zjarrfiksja e Pogradecit ka qenë e parë që ka mbërritur në vatrën e ndezur dhe si fillim ka bllokuar përhapjen e flakëve në dy krahë.

/abcnews.al

Ka ndërruar jetë gruaja ukrainase. Do dërgohet drejt morgut të Tiranës për faktin se është shtetase e huaj. Vajza ndodhet ende ne intubim.

Dy turistet ukrainase rrezikuar mbytjen mesditën e kësaj të premteje në bregdetin e Vlorës, në afërsi të zonës së “Ujit të Ftohtë”. Ato u dërguan me urgjencë në spital në gjendje të rëndë./abcnews.al