Një apartament është përfshirë nga flakët mesditën e sotme në zonën pranë rrugës “Transballkanike” në Vlorë.

Nga informacionet e para mësohet se zjarri ka shpërthyer brenda apartamentit ndërsa zjarrfikësit kanë mundur ta izolojnë përhapjen e tij në banesat ngjitur.

Deri më tani raportohet vetëm për dëme materiale. m.p.

Përfaqësuesi i posaçëm i Bashkimit Europian për dialogun Kosovë-Serbi, Peter Sorensen, deklaroi se gjendja e dialogut është “gjallë dhe mirë” pas vizitës së papritur në Prishtinë. Paraditen e sëmërkurës takoi presidenten Vjosa Osmani dhe kryeministrin në detyrë Albin Kurti me të cilët tha se diskutoi për zbatimin e Marrëveshjes së Ohrit. Sorensen theksoi edhe faktin e mungesës së institucioneve pas zgjedhjeve të shkurtit që ndikon në dialog.

“Jam këtu për shkak të mandatit tim, për të diskutuar se si ta implementojmë Marrëveshjen e Ohrit. Sigurisht, situata politike këtu nënkupton që gjërat mundtë marrin më shumë kohë. E di këtë, kështu që ky është një takim i rregullt. Jam i lumtur që jam këtu”, u shpreh Sorensen.

Presidentja Vjosa Osmani tha se me Sorensen diskutoi zhvillimet e fundit në vend, rëndësinë e avancimit të integrimit europian, nevojën për të hequr masat ndëshkuese të BE-së ndaj Kosovës dhe arrestimet arbitrare të qytetarëve nga Serbia. Në lidhje me dialogun, ajo kërkoi objektiva të qarta për këtë proces.

“Një proces dialogu i drejtë, i paanshëm dhe me objektiva të qarta është thelbësor për paqen dhe stabilitetin në rajon”, theksoi Osmani.

Sorensen mori detyrën në muajin shkurt por për shkak të zgjedhjeve në Kosovë dhe protestave në Serbi nuk ka arritur ende të bind palët për një takim të nivelit të lartë. Kurti dhe Vuçiç nuk janë takuar në kuadër të dialogut që nga shtatori i vitit 2023 para se të ndodhte akti terrorist i Banjskës. m.p.

I intervistuar nga numri i sotëm i “Gazzetta dello Sport”, Fabio Capello ka folur për Milanin, duke u ndalur te Rafael Leao: “Rafa është një histori më vete. Nuk ka dyshime që është një talent i madh, por deri tani ka qenë shumë i paqëndrueshëm. Ja pra, me Allegrin pres që të jetë më i vazhdueshëm dhe vendimtar. Shenjat e para tashmë janë dhënë.

A nevojitet një qendërsulmues? Epo, para së gjithash është çështje numrash. Te Milani është vetëm Gimenez, i cili në 6 muajt e parë me fanellën kuqezi ka lënë disa dyshime, si edhe shumë të tjerë nga skuadra.

Gimenez ka treguar diçka, por shumë pak në krahasim me shpenzimin e bërë nga klubi dhe pritshmëritë e të gjithëve në momentin e mbërritjes së tij. Duhet thënë gjithashtu se te Milani i sezonit të kaluar pak gjëra funksionuan siç duhet, ndaj ka edhe ai ndonjë justifikim”.

Te “Djalli” po përflitet transferimi i Dusan Vlahovic. A mund të shënojë serbi 20 gola në sezon me kuqezinjtë? Ja si përgjigjet Capello: “I ka realizuar tashmë te Fiorentina. Edhe në vitin e fundit me Max te Juventusi nuk ishte shumë larg (16 gola), ndonëse pati një periudhë me vështirësi të përgjithshme.

Dusan është një qendërsulmues tipik, e ka golin brenda vetes, nëse rifiton besimin dhe krijon rastet e duhura. E kam thënë disa herë, do të vinte te Milani me dëshirën për të treguar veten sërish dhe me më pak presion. Këto nuk janë dy detaje pa rëndësi…” m.p.

Kryeministrja e Italisë, Giorgia Meloni, u takua mbrëmjen e djeshme në Beograd me Presidentin e Serbisë, Aleksandar Vuçiç.

Sipas njoftimit zyrtar të qeverisë italiane, takimi shërbeu si një mundësi për të rikonfirmuar mbështetjen e plotë të Italisë për procesin e anëtarësimit të Serbisë në Bashkimin Evropian, si dhe për reformat që Beogradi ka ndërmarrë në këtë drejtim.

Gjatë takimit u diskutua edhe për marrëdhëniet dypalëshe ndërmjet Italisë dhe Serbisë, me synimin për të forcuar më tej bashkëpunimin në të gjitha fushat me interes të përbashkët.

Në fokus të bisedimeve ishin gjithashtu çështjet kyçe ndërkombëtare, përfshirë luftën në Ukrainë, si dhe zhvillimet rajonale.

Të dy liderët theksuan rëndësinë e stabilitetit dhe sigurisë në Ballkanin Perëndimor, duke rikonfirmuar mbështetjen për dialogun Prishtinë-Beograd, të ndërmjetësuar nga Bashkimi Evropian. m.p.

Rubrika “Ne, evropianët” na çoi këtë të martë, më 5 gusht, në Shqipëri apo El Doradon e re për pushuesit, sipas stacionit të njohur informativ francez, Franceinfo.

”Ky vend i ish-Bllokut Lindor ishte për një kohë të gjatë një nga regjimet më të mbyllura në Evropë. Tani po hapet për turizëm, me rezultate spektakolare.

Një rritje prej 80% e turistëve në pesë vjet.

Ujëra bruz dhe ishuj të shkretë. Kjo nuk është as Karaibet dhe as Maldivet, por Shqipëria, e vendosur midis Greqisë dhe Italisë, e cila tani është gjithashtu e njohur për turistë nga e gjithë bota.

Shqipëria, ku qytetërimet mesdhetare kanë pasuar njëra-tjetrën, secila duke lënë gjurmë sublime greke, romake, bizantine, veneciane dhe osmane.

Dhe kohët e fundit, përgjatë gjithë vijës bregdetare, bunkerë po aq të shëmtuar sa periudha në të cilën u ndërtuan.

Dhe gjithashtu në Tiranë, kryeqytet, një mbetje e një regjimi komunist paranojak që kishte frikë nga pushtimet.

Njëri prej tyre tani është shndërruar në një muze për turistët mosbesues.

“Ky bunker nuk u përdor kurrë për luftë, sepse nuk patëm kurrë luftë. Pas Luftës së Dytë Botërore, u përdor shumë për të marrë në pyetje njerëzit”, shpjegon Sokol Selami, një guidë në ”Bunk’Art”.

12 milionë turistë në vitin 2024

Kështu veproi regjimi i terrorit i Enver Hoxhës, i fundit i admiruesve të Stalinit. Për më shumë se 40 vjet, Shqipëria mbeti një nga vendet më të mbyllura në botë.

Në vitin 1991, regjimi ra.

Shqiptarët zbuluan lirinë.

Gati 35 vjet më vonë, ndërtesa ultramoderne po shfaqen në sheshin kryesor të Tiranës.

Toka e shqiponjave është hapur ndaj botës së jashtme. Dhe turistët po vërshojnë.

12 milionë u numëruan vitin e kaluar.

Ky është një efekt pas Covid-19 dhe medieve sociale që po e popullarizojnë destinacionin.

“Ne erdhëm të filmojmë Shqipërinë për të inkurajuar njerëzit të vizitojnë këtë vend, sepse në Poloni nuk është ende një destinacion kaq popullor”, thotë Adrianna Skon, një influencere polake.

Dhe profesionistët e turizmit kanë gjetur mënyrën se si ta shesin atë.

“Jam këtu me ftesë të një agjencie udhëtimesh polake që shet udhëtime në Shqipëri. Ne donim vetëm të kontrollonim nëse është vërtet mjaftueshëm interesante për ta rekomanduar, dhe që nga dita jonë e parë, menduam se ishte vërtet e shkëlqyer”, shpjegon gruaja e re në hyrje të videos së saj.

Këto video janë krijuar nga influencerë dhe marka, por edhe nga udhëtarë të zakonshëm.

Në mediat sociale, Shqipëria po shpërthen si destinacion.

“Ne pamë video në TikTok dhe pastaj bëmë disa kërkime dhe kjo na çoi këtu”, rrëfyen turistët.

Një tjetër avantazh për një audiencë shpesh shumë të re janë çmimet janë shumë të ulëta/kb

Kryeministri Edi Rama ka njoftuar nisjen e transformimit të plotë të Banjave të Bënjës, një prej destinacioneve kryesore turistike në zonën e Përmetit dhe Këlcyrës. Përmes një postimi në Facebook, ai ka ndarë pamjet e projektit që po realizohet nga Fondi Shqiptar i Zhvillimit, me synimin për të përmirësuar shërbimet bazë dhe përvojën turistike në këtë zonë termale.

Rikualifikimi përfshin përmirësimin e infrastrukturës si parkimi, furnizimi me ujë dhe krijimin e ambienteve rekreative, ndërsa po punohet edhe për një model të qëndrueshëm menaxhimi bashkë me institucionet lokale dhe agjencitë përkatëse.

“Transformimi tërësor i Banjave të Bënjës ka nisur, ku me ndërhyrjen e Fondit Shqiptar të Zhvillimit po zbatohet projekti që përmirëson përvojat turistike në Ujërat Termale të Bënjës, një destinacion shumë i frekuentuar i hartës turistike të Përmetit e Këlcyrës, ku është i nevojshëm rikualifikimi për të garantuar disa shërbime bazë si parkimi, furnizimi me ujë, shërbimet, por edhe një ambient më rekreativ, ndërsa me bashkitë, Agjencinë Kombëtare të Zonave të Mbrojtura dhe me Zyrën e Administrimit të Parkut Kombëtar të Vjosës vijon puna për një model menaxhimi të qëndrueshëm të këtij investimi”, ka shkruar kryeministri Rama./kb

Nga Fejzo Subashi
Barazia para ligjit është një nga vlerat themelore të të drejtave të njeriut, si dhe elementi e parimi kryesor i demokracisë dhe një vendi që është apo pretendon se është demokratik. Barazia është jo vetëm shtylla e çdo demokracie të vërtetë, por edhe themeli i qenësisë dhe ndjesisë qytetar, pavarësisht postit apo funksionit që mban apo që të kanë dhënë. Sepse, postin, mund ta marrësh, por zakonisht të ta japin është më e mundur, por që ta meritosh është e vështirë.
Aksioni i fundit i kryeministrit Edi Rama për “çlirimin” e hapësirave publike, jo vetëm në Tiranë, por në të katër anët e vendit, mund të lexohet edhe si një sinjal se shteti i së drejtës ende përpiqet të afirmohet mbi anarkinë e të drejtës mbi pronën e sidomos asaj urbane dhe ligjin e më të fortit. Ky aksion absolutisht, nëse nuk mbetet selektiv, mund të përbëjë një akt vetëkorrigjimi dhe përgjegjësie qeverisëse për gjithçka që nuk është bërë mirë më parë, apo është lënë në harresë, apo më e keqja është bër keq.
Por të jemi të qartë: nuk është ky një mbrojtje e drejtësisë selektive, as një mbështetje për spektakle me uniforma dhe kamera. Është një thirrje për të kuptuar se shteti është ligji, dhe ligji është për të gjithë. Kjo mbi të gjitha është kulturë dhe domosdoshmëri kultura qytetare. Dhe që të ndodhë kjo, duhet qytetari, jo batakçiu. Qytetaria dhe qënësa qytetar nuk është as pasaportë privilegji dhe as instrument hakmarrjeje.
Fatkeqësisht, fenomeni i pushtimeve të hapësirave publike apo ndërtimeve pa leje nuk është dhe nuk duhet të jetë ekskluzivitet i Tiranës, Durrësit, Vlorës, apo Sarandës. Kjo “sëmundje” është në të katër anët e vendit, deri në fshatin më të largët. Nëse e intepertojm dhe zbatojmë kështu flasim për shtet ligjor, demokratik dhe parimor, ndryshe ndodhemi para faktit selektiv dhe postë demokratik dhe ligjor. Deri më sot realiteti ka treguar në shumë raste se: ligji aplikohet vetëm mbi të dobëtit, ndërsa “të fortët” mbeten të paprekur, me prona të uzurpuara, me pallate të ngritura pa leje, me arrogancën që kalon për pushtet lokal apo klan familjar. Ky fenomen në Tiranë, Durrës, Vlorë, Leszh dhe Sarandë është i dukshëm, i prekshëm , por fatkeqësisht është i shtrirë dhe prezent në të katër anët e vendit edhe në zonën dhe fshatin më të humbur.
Kjo është padrejtësi, por është edhe pengesë zhvillimi. Mbi të.gjitha është moszbatim ligji dhe mungesë e Shtetit dhe qeverisjes. Ndoshta kjo është një nga arsyet e mungesës së investimeve serioze në zonat rurale? Sepse ka humbur besimi se ka një shtet që mbron ligjin dhe jo vetëm interesin e çastit. Pushtimi i tokës në fshat, ndërtimet pa leje dhe krijimi i “ligjeve të fshatit” janë po aq të rrezikshme sa edhe ndërtimi pa leje i kullave në qendër të qytetit. Nëse i pari është i paprekur, pse duhet të ndëshkohet vetëm i dyti?
Personalisht, jam kundër urrejtjes ndaj kujtdo vetëm sepse është i pasur. Pasuria nuk është krim. Por krim është moszbatimi i ligjit, dhe këtu s’duhet të ketë asnjë tolerancë, për askënd. Përse është kjo përbuzje, bile edhe ligjore, në lidhje me qënsin qyteyar dhe sjelljen e qasjen i till kud që të jesh. Në qasje dhe sjellje e tillë ndikon drejtë për drejtë në qënsinë qyteyar i kulturuar me qasje dhe sjellje ligjore. Ligji është i përgjithshëm dhe për të gjithë dhe jo selektiv. Nuk besoj se ka në Botë institucion që prodhon ligj selektivë. Aq më keq zbatimi dhe ushtrimi i forcës dhe të drejtës ligjore. Përgjegjësia ligjore duhet të jetë për këdo që e ka thyer ligjin, qofshin oligarkë apo “të fortë” lokalë, qytetarë apo zyrtarë.

Kjo qasje është shumë më tepër se një debat urbanistik. Është rruga drejt integrimit evropian, ose më saktë, pengesa kryesore për të. Evropa nuk pranon dy standarde drejtësie, nuk toleron spektakle politike në emër të reformave, dhe nuk inkurajon institucione që përdorin ligjin si armë për të goditur të pambrojturit. Integrimi evropian është një proces serioz reformash, jo një fasadë aksionesh të përkohshme.
Shqipëria ka nevojë për institucione të forta, të pavarura, që nuk ulin kokën përballë të fortëve dhe që veprojnë njësoj në çdo fshat e qytet, pa dallim statusi, partishmërie apo pasurie. Në fund të fundit, shteti nuk është pasqyra e frikës, por garancia e drejtësisë./kb

Për të dytin vit radhazi në ndihmë të bujqësisë dhe zhvillimit rural, Qeveria po aplikon Skemën Kombëtare të Investimeve që mbështet fermerët me financim grant për investime në mekanizimin e bujqësisë.

Përmes kësaj skeme mbështeten fermerët për blerjen e traktorëve, makinerive dhe pajisjeve moderne për mekanizimin dhe përmirësimin e proceseve të punës në fermat bujqësore dhe blegtorale.

Aplikimi i mekanizimit dhe teknologjive të reja në bujqësi i ndihmon fermerët të rrisin produktivitetin dhe cilësinë e punës së tyre.

Sipas Agjencisë për Zhvillimin Bujqësor dhe Rural, vitin e kaluar kërkesat më të larta për financim përmes Skemës Kombëtare të Investimeve, ishin për blerjen dhe përmirësimin e mjeteve dhe mekanikës bujqësore.

Qeveria përmes kësaj skeme financon 50% të vlerës totale të faturave tatimor, deri në 5 milionë lekë për subjekt.

Ky investim mbështet fermerët në modernizimin e bujqësisë dhe blegtorisë, për realizimin e punës në mënyrë më efikase dhe të sigurt, për të përmirësuar jetën dhe prodhimin e tyre.

Skema Kombëtare e Investimeve 2025, përmbledh nëntë masa, që përfshin gjithë bujqësinë që nga mbjellja e fidanëve të pemëve frutore deri në përpunimin e fruta-perimeve. Këtu përmblidhen mekanika, blegtoria, ndërtimi i stallave, bletaria.

Aplikimet për të përfituar nga kjo skemë janë hapur më 30 korrik dhe do të vazhdojnë deri më 30 shtator 2025.

Ndërkohë vitin e kaluar nga 404 aplikime në Skemën Kombëtare të Investimeve 2024, 305 kërkesa janë për mekanikë bujqësore.

Për mekanikën bujqësore vlera mesatare për fermerë shkon 30 deri 36 mijë euro ku 50% financohet grant nga Skema e Investimeve. Ndërsa pjesa tjetër do të paguhet nga fermeri, fond të cilin fermeri mund ta marri kredi në bankë duke përdorur Fondin e Garancisë Sovrane ku shteti mbështet 80% të kolateralit./kb

Autoritetet turke janë në alarm pas zhdukjes së biznesmenit të njohur Halit Yukay, i cili është shpallur i humbur që nga mbrëmja e së shtunës, kur u nis me jahtin e tij nga Turqia me destinacion ishullin grek të Mykonosit.

Jahti i 43-vjeçarit turk u gjet i dëmtuar rëndë dhe gjysmë i mbytur nga roja bregdetare turke, në ujërat pranë ishullit Prokonnisos në Detin e Marmaras.

Familjarët e Yukay dhanë alarmin pasi humbën kontaktet me të menjëherë pas nisjes së tij. Roja bregdetare u njoftua zyrtarisht në orën 23:40 të së hënës, ndërsa të martën në orën 14:30, një anije tregtare njoftoi autoritetet se kishte gjetur mbetje të një mjeti lundrues. Më vonë u konfirmua se bëhej fjalë për jahtin “Graywolf” të biznesmenit turk.

Për kërkimin e tij u angazhuan zhytës profesionistë, një helikopter dhe mjete lundruese të rojes bregdetare, por deri më tani nuk është arritur të gjendet asnjë gjurmë e tij.

Halit Yukay, i lindur në vitin 1982, është themeluesi dhe pronari i kompanisë turke Mazu Yachts, e cila merret me prodhimin e jahteve luksoze. Ai e nisi karrierën e tij si punëtor në kantierë detare dhe e realizoi ëndrrën për të krijuar kompaninë e tij në vitin 2011./kb

Gjatë gjashtë muajve të parë të këtij viti, të ardhurat tatimore nga shitja e pasurive të paluajtshme kanë qenë në rritje.

“Sipas informacionit nga Drejtoria e Përgjithshme e Tatimeve për Shoqatën Shqiptare të Pasurive të Paluajtshme (NAREA),- shkruan Monitor,- për gjashtë muajt e parë të këtij viti janë arkëtuar gjithsej 4.2 miliardë lekë nga tatimit mbi të ardhurat nga shitja e pasurive të paluajtshme”.

Kjo do të thotë se të ardhurat janë rritur me 26% krahasuar me të njëjtën periudhë të një viti më parë.
Por pse kjo rritje?

“Rritja e të ardhurave mund të jetë një tregues i tërthortë i ecurisë së shitjeve në tregun e pasurive të paluajtshme. Rritja e të ardhurave tregon rritjen e bazës së tatueshme, që mund të vijë nga rritja e transaksioneve të shitblerjes, por edhe nga rritja e çmimeve”, shkruan Monitor.

Në masën dërrmuese të ardhurat prej këtij tatimi vijnë nga Drejtoria e Tatimpaguesve të Mëdhenj, ku pothuajse 99% e tyre i takojnë kësaj drejtorie duke nënkuptuar se tatimi buron kryesisht nga shitjet e firmave të ndërtimit.

Ndërkohë, të ardhurat nga drejtoritë rajonale rezultojnë në nivele shumë të ulëta. Sipas shifrave të Drejtorisë së Përgjithshme të Tatimeve, për gjashtë muajt e parë të vitit të ardhurat totale nga drejtoritë tatimore ishin vetëm 54 milionë lekë ose sa 1.3% e të ardhurave totale. Këto të ardhura paraqiten në rënie me 26% krahasuar me një vit më parë.

Të ardhurat e vogla nga transaksionet e rishitjes, të kryera nga individët, mund të shpjegohen me rivlerësimet e kryera në vitet e mëparshme, që kanë tkurrur bazën e tatueshme, por ndoshta në një masë të madhe edhe me kryerjen e një pjese të madhe të transaksioneve me çmime fiktive.

Por, nga ana tjetër, agjentët e pasurive të paluajtshme shprehen se procesi i rivlerësimit që pritet prej më shumë se një viti ka ndikuar negativisht në tregun e rishitjes së pronave. Një pjesë e pronarëve preferojnë ta shtyjnë nxjerrjen e pronave në shitje, deri në kryerjen e rivlerësimit, për të përfituar një vlerë më të ulët tatimi.

Në këtë kuptim, rënia e të ardhurave nga tatimi i pronave të shitura prej individëve duket se konfirmon një tendencë rënëse të transaksioneve në këtë segment të tregut, shkruan Monitor.

Sipas ligjit në fuqi, të ardhurat nga shitja e pasurive të paluajtshme, e llogaritur si diferenca mes çmimit të shitjes së pronës dhe çmimit të blerjes (ose atij të rivlerësuar) së saj, tatohen në masën 15%.

Megjithatë, qeveria ka aplikuar rivlerësime të herëpashershme të pronave me një shkallë më të ulët tatimore. Rivlerësimet u mundësojnë pronarëve ta sjellin vlerën e pronës së tyre në nivelet e tregut, duke ulur vlerën e tatimit të paguar në rast të shitjes së saj.

Muajin e kaluar, qeveria shqiptare hodhi për konsultim publik projektligjin për rivlerësimin e radhës së pasurive të paluajtshme. Projektligji pritet t’u mundësojë individëve dhe bizneseve të rivlerësojnë pronat e tyre me një tatim prej 5%, duke filluar nga 1 janari 2026./kb

Qeveria norvegjeze ka urdhëruar një rishikim të thelluar të portofolit të fondit të saj sovran prej 1.9 trilion dollarësh, për të siguruar që investimet të mos përfshijnë kompani izraelite që kontribuojnë në pushtimin e Bregut Perëndimor apo në konfliktin në Rripin e Gazës.

Ky vendim erdhi pas një raportimi të gazetës norvegjeze Aftenposten, e cila zbuloi se fondi kishte blerë aksione në kompaninë izraelite Bet Shemesh Engines Ltd (BSEL), që ofron shërbime për forcat ajrore izraelite, përfshirë mirëmbajtjen e avionëve luftarakë.

Sipas të dhënave nga Norges Bank Investment Management (NBIM), institucioni që menaxhon fondin, investimi në BSEL ka nisur në vitin 2023 me një aksion prej 1.3%, i cili u rrit në 2.09% deri në fund të vitit 2024, duke arritur një vlerë prej 15.2 milionë dollarësh.

Kryeministri norvegjez Jonas Gahr Støre e cilësoi këtë zhvillim si “shqetësues” dhe theksoi nevojën për transparencë dhe qartësi në mënyrën se si fondi investon në kompani të lidhura me konfliktin izraelito-palestinez. “Ajo që lexova më shqetësoi”, deklaroi ai për televizionin publik NRK.

Guvernatori i Bankës Qendrore dhe njëkohësisht ministri i Financave, Jens Stoltenberg, njoftoi se, për shkak të situatës së tensionuar në Gaza dhe Bregun Perëndimor, do të ndërmerret një rishikim i plotë i investimeve të NBIM në kompani izraelite.

Nga ana tjetër, drejtori ekzekutiv i NBIM, Nicolai Tangen, sqaroi se kompania BSEL nuk është përfshirë në ndonjë listë ndalimi të rekomanduar, as nga Kombet e Bashkuara, e as nga Këshilli Etik i vetë fondit.

Aktualisht, fondi sovran i Norvegjisë zotëron aksione në 65 kompani izraelite, me një vlerë totale prej 1.95 miliardë dollarësh. Në qershor, Parlamenti norvegjez rrëzoi një propozim për tërheqjen e plotë të fondit nga kompanitë që operojnë në territoret e okupuara palestineze.

Ndërkohë, fondi ka filluar tërheqjen nga disa investime, duke përfshirë shitjen e aksioneve në një kompani energjetike dhe një grup telekomunikacioni izraelit. Këshilli Etik i fondit po shqyrton gjithashtu mundësinë e rekomandimit për tërheqje nga pesë banka izraelite.

Ky zhvillim e vendos Norvegjinë në qendër të vëmendjes ndërkombëtare, si një nga vendet e para që ndërmerr hapa konkretë për të lidhur investimet shtetërore me respektimin e të drejtave ndërkombëtare dhe të drejtave të njeriut./kb

Portugalia po përjeton një valë të re të të nxehtit, me temperatura që arrijnë në 41 gradë Celsius. Gushti mund të jetë muaji më i nxehti në 15-20 vitet e fundit, sipas “Euronews”.

Temperaturat minimale variojnë nga 16 deri në 24 gradë Celsius, ndërsa temperaturat maksimale variojnë nga 28 deri në 41 gradë Celsius.

Rajonet veriore të Portugalisë, Viana do Castelo, Braga, Porto, Vila Real dhe Bragança, janë sërish subjekt i një alarmi të kuq të të nxehtit.

“Alarmi i kuq, shkalla më e lartë, është lëshuar për shkak të vazhdimësisë së temperaturave maksimale jashtëzakonisht të larta, përveç bregdetit”, sipas Institutit Meteorologjik Portugez (IPMA).

Gushti mund të jetë më i nxehti në 15-20 vitet e fundit, në terma të përgjithshëm, veçanërisht për sa i përket temperaturave minimale, por edhe për sa i përket temperaturave maksimale./kb

Një kujtim i vjetër, një aromë e njohur, një melodi e harruar… ndonjëherë mjafton një detaj i vogël për të na kthyer vite pas në kohë. Tani, shkenca ka një shpjegim të qartë për këtë fenomen të njohur, duke sugjeruar se kujtimet e harruara mund të mos jenë aq të pakthyeshme sa kemi menduar deri më tani.

Sipas disa studimeve të reja, kujtesa është shumë më elastike dhe e ndërlidhur me kontekstin në të cilin është krijuar. Aromat, tingujt, emocionet dhe situatat që përjetojmë në momentin e formimit të një kujtimi mund të luajnë një rol të madh në rikthimin e tij,  edhe pas një kohe të gjatë.

Udhëtimi mendor në kohë si çelës për kujtesën

Një nga studimet më të rëndësishme që konfirmon këtë teori është publikuar së fundmi në revistën shkencore Proceedings of the National Academy of Sciences. Studiuesit gjermanë analizuan efektin që ka “udhëtimi mendor në kohë” në rikthimin dhe ruajtjen e kujtimeve, duke përfshirë 1,216 pjesëmarrës në dy eksperimente të kujtesës.

Në eksperimentin e parë, pjesëmarrësit duhej të mësonin përmendësh një listë fjalësh, ndërsa në të dytin, ata lexuan një tekst. Më pas, grupet u ndanë në dy kategori: disa duhej të rikujtonin informacionin pa ndihmën e ndonjë konteksti, ndërsa të tjerët u udhëzuan të “kthenin mendërisht” në momentin kur ishin përfshirë për herë të parë në mësim. pra të kujtonin emocionet, mendimet dhe rrethanat e asaj kohe.

Kujtesa e pjesëmarrësve u testua pas 4 orësh, 24 orësh ose 7 ditësh.

Çfarë treguan rezultatet?

Rezultatet ishin mbresëlënëse. Pjesëmarrësit që përjetuan “kthim mendor në kohë” rikujtuan më mirë informacionin, sikur të ishin duke e përjetuar për herë të dytë momentin. Ndikimi më i madh u vu re kur rikujtimi me kontekst u bë pas 4 ose 24 orësh. Sa më shumë kohë kalonte, aq më pak funksiononte kjo metodë, por gjithsesi, ndikimi ishte i matshëm.

Kjo gjetje sfidon bindjen tradicionale se ringjallja e kontekstit është thjesht një ndihmë e përkohshme. Në fakt, studimi sugjeron se rikthimi i kontekstit jo vetëm që rikthen kujtimet në sipërfaqe, por ndikon edhe në mënyrën si ato ruhen dhe harrohen më vonë.

Kujtesa si mitologji: Sizifi modern

Studiuesit krahasojnë këtë proces me mitin e Sizifit, heroit mitologjik që shtynte përjetësisht një shkëmb në një kodër, vetëm për ta parë atë të rrokullisej sërish poshtë. Në mënyrë të ngjashme, kujtimet mund të “ringjallen” përkohësisht përmes rikujtimit me kontekst, por pa përforcim të mëtejshëm, ato fillojnë sërish të zbehen.

Megjithatë, ndryshe nga Sizifi, ne kemi mundësinë të ndërhyjmë në këtë cikël dhe të forcojmë kujtesën në mënyrë të qëndrueshme, për sa kohë e rikthejmë në mënyrën e duhur.

Një dritë shprese për kujtimet e humbura

Ky studim hap një dritare të re për të kuptuar mënyrën se si funksionon kujtesa dhe çfarë mund të bëjmë për ta mbajtur atë të gjallë. Ai ofron shpresë se edhe kujtimet që dukeshin të humbura mund të rikthehen, përforcohen dhe ruajnë ngjyrat e origjinalit, për sa kohë dimë si t’i qasemi.

Për të gjithë ata që luftojnë me “harresën”, ndoshta gjithçka që duhet të bëni është të riktheheni, jo vetëm me mendje, por edhe me zemër në vendin ku gjithçka nisi./kb

Departamenti i Drejtësisë në Shtetet e Bashkuara ka njoftuar arrestimin dhe ngritjen e akuzave penale ndaj dy shtetasve kinezë, Chuan Geng dhe Shiwei Yang, të cilët dyshohet se kanë eksportuar në mënyrë të paligjshme drejt Kinës mikroçipa të avancuar për inteligjencën artificiale, me një vlerë prej dhjetëra miliona dollarësh.

Sipas autoriteteve amerikane, aktiviteti i tyre ka ndodhur midis tetorit 2022 dhe korrikut 2025, dhe përfshin edhe çipat më të avancuar Nvidia H100, të cilët janë ndër më të kërkuarit për aplikime në fushën e inteligjencës artificiale.

Të dy të dyshuarit nuk kanë pasur licencat e nevojshme të eksportit, të cilat kërkohen nga Departamenti Amerikan i Tregtisë për teknologjitë sensitive që mund të kenë përdorim të dyfishtë civil dhe ushtarak.

Geng dhe Yang thuhet se kanë vepruar përmes kompanisë së tyre Alx Solutions Inc, menjëherë pas vendimit të SHBA për të vendosur kufizime ndaj eksporteve të mikroçipave të teknologjisë së lartë drejt Kinës.

Zyrtarët amerikanë e kanë cilësuar këtë rast si një kërcënim serioz për sigurinë kombëtare, duke theksuar se Shtetet e Bashkuara do të vazhdojnë të mbrojnë teknologjinë e ndjeshme nga përdorimi i paautorizuar dhe transferimi jashtë vendit.

Hetimet janë ende në vazhdim dhe priten zhvillime të mëtejshme në këtë çështje./kb

Nga Ylli Manjani

Ngatërrimi i drejtësisë penale me marrëdhëniet juridiko-civile të pronës përbën një ndërhyrje të rrezikshme në të drejtën kushtetuese e pronës dhe sigurinë ligjore për të.

Drejtësia penale si pjesë e të drejtës publike, duhet të synojë garancinë e pronës jo pasigurinë e saj.

Dmth drejtësia penale siguron që ti marrë plaçkën e vjedhur hajdutit, mashtruesit, grabitësit, pastruesit të parave që janë krijuar me krim apo të korruptuarit. Po kaq. Dhe këtë e bën në një proçes strikt të provuari në një sallë gjyqi.

Pra drejtësia penale merr pasurinë që vjen nga një vepër penale, vepër kjo që ka patur për qëllim krijimin e pasurisë dhe JO ÇDO VEPËR PENALE.

Në fakt, këtë llogjikë e kemi kompromentuar kur, për internacionalizëm idiot, kemi vendosur të vetshpallemi shoqëri mafioze dhe kemi miratuar ligjin antimafia. Ky ligj pas ndryshimeve që pësoi me rastin e reformës, lejon drejtësinë penale të marrë pasuritë private edhe mbi bazë indiciesh!!!

Kujdes indiciesh, as dyshimesh të arsyeshme dmth. Prova jo e jo. As vendime dënimi penal nuk kërkohet për të të marrë pronën dhe me nofkën publike “mafioz!!!

E kemi bërë kërë kompromis abuziv me lirinë e pronës, ashtu siç kemi bërë kompromisin për të larguar gjykatës e prokurorë nga sistemi pas një vettingu gjithashtu abuziv, në kuptimin pa proçes gjyqsor të rregullt.

Tani projekt kodi i ri penal propozon që të gjithë ata që kanë një pronë në Shqipëri, të pranojnë të jetojnë në pjesën e mbetur të jetës nën presionin e një vettingu abuziv ligjor e popullor.

“Pasurim i paligjshëm”, është neni që propozohet.

Dhe nëse është “i ligjshëm” apo jo këtë nuk e paravlerëson një proçes gjyqsor, por një polic, inspektor, apo prokuror inatçor ose protagonist. Nuk po përfshij këtu inatet për politikë…

Shkurt, propozohet që çdokush që ka një pasuri duhet të ketë edhe barrën të provojë se kjo pasuri është e ligjshme, sa herë policit/prokurorit/inspektorit dhe më vonë afërmendsh gjykatësit, i duket joproprocional pasurimi jot.

Padyshim është vepra penale më sexy për populizëm. Ajo ushqen bindshëm inatin popullor shqiptar sipas legjendës “merrja lopën atij tjetrit”. Ndaj çelja e debatit mbi këtë temë ë vendos në rrisk të madh publik.

Por, punë e madhe! Debati mbetet.

A ka të drejtë drejtësia penale të injorojë kotratat e shitblerjes, testamentet, sipërmarrjet për shkak se dikujt pa interes juridiko civil këto kontrata nuk i duken bindëse?!

Cili është interesi i të drejtës publike (penale në këtë rast), të krijojë sa më shumë individëtë zhveshur nga të drejtat dhe garancitë civile? Çfarë shoqërie po ndërtojmë?

Po pse duhet të blesh e mbash prona në shqipëri në këto kushte, pra kur mjeti ligjor për fitimin e pronësisë (neni 41 i Kushtetutës) u injoroka nga një polic/prokuror/inspektor/afërmendsh gjykatës?!

Apo skanë dalë nga vettingu, të karikuar gjith mllef tani… !?
***
Disa thonë se këtë nen e paska edhe Italia.

Tani, nuk preferoj të debatoj me asnjë që vë në bazë të arsyetinit llogjikën e majmunit.

Së dyti, ligji itslian menaxhon 60 milionë Italianë ku çështjet e pronës e të pasurimit janë sqaruar shekuj më parë.

Së treti, në Itali vepron mafia Italiane, e cila ka rregulla paralele me shtetin.

Së katërti, nuk pa një përdorim të gjerë dhe abuziv të këtyre ligjeve sui generis sepse magistratura Italiane është afërmendsh e pandikuar.
***
Mbetem i bindur se juridiksioni i drejtësisë penale mbi çështjet e pasurisë dhe pronës, duhet të kthehet në origjinë. Pra të merret me plaçkën e vjedhur dhe jo me çdo pasuri.

Edhe ligjin antimafia duhet ta intefrojmë brenda proçesit penal, dhe jo proçes më vete. Mafizoi të gjykohet si mafioz, dhe jo shoqëria të prezumohet mafioze dhe, të ngarkohet me barrë prove.!!!

Ligjshmërinë e pasurisë nuk e çmon juridiksioni penal. Përndyshe i shfuqizojmë të gjithë ligjet e tjera e mbajmë vetëm kodin penal.

E mbani mend filmin?
“Ky është si Kurani mor qafir”!/kb

Arabia Saudite ka nisur ndërtimin e Aeroportit Ndërkombëtar të Mbretit Salman, i cili pritet të jetë më i madhi në botë dhe të hapet në vitin 2030. Ai do të shtrihet në një sipërfaqe prej 57 kilometra katrorë e barabartë me madhësinë e 14,000 fushave futbolli, dhe do të ndërtohet rreth Aeroportit aktual King Khalid në Riad.

Aeroporti i ri do të ketë gjashtë pista fluturimi, hapësira moderne për pushim dhe argëtim, si dhe 12 kilometra katrorë të dedikuara për qendra tregtare. Kapaciteti do të jetë 120 milionë pasagjerë në vit deri në 2030 dhe 185 milionë deri në vitin 2050.

Me hapjen e tij, numri i ngritjeve dhe uljeve të avionëve në vend do të rritet nga 211 mijë në mbi një milion në vit. Kostoja e projektit vlerësohet në 30 miliardë dollarë.

Aeroporti do të ofrojë ambiente të brendshme dhe të jashtme me shumë gjelbërim, dritare gjigante panoramike për të parë avionët, një qytet argëtimi, një park ujor gjigant me makina zhytëse dhe katër atraksione madhore, përfshirë trenin më të lartë ujor në botë.

Në janar 2025, përfundoi edhe riparimi i terminalit të Aeroportit King Khalid, duke e çuar projektin një hap më pranë realizimit./kb

Oksigjeni është jetik për ekzistencën tonë, por për sa kohë do të vazhdojë të na mbështesë? Një studim i ri i realizuar nga shkencëtarë të NASA-s dhe Universitetit Toho në Japoni paralajmëron se atmosfera e pasur me oksigjen e Tokës mund të shkatërrohet brenda një miliard vitesh.

Edhe pse duket si një afat shumë i largët, rënia e parë e ndjeshme e niveleve të oksigjenit mund të fillojë shumë më herët ndoshta brenda 10 mijë viteve të ardhshme. Sipas Christopher Reinhard, bashkautor i studimit nga Instituti i Teknologjisë i Xhorxhias, “jeta e atmosferave të pasura me oksigjen mund të jetë më e shkurtër nga sa kemi menduar deri tani”.

Studiuesit janë fokusuar në lidhjen mes niveleve të oksigjenit dhe rritjes graduale të ndriçimit të Diellit. Me rritjen e temperaturave në Tokë, dioksidi i karbonit (CO₂) në atmosferë do të fillojë të shpërbëhet, duke vështirësuar procesin e fotosintezës themelor për mbijetesën e bimëve dhe për prodhimin e oksigjenit.

Nëse bimët nuk mund të mbijetojnë, pasojat do të jenë dramatike, pasi ato janë burimi kryesor i oksigjenit në planet. Mungesa e prodhimit të oksigjenit do të çojë në zhdukjen e shtresës mbrojtëse të ozonit, duke lejuar që rrezatimi ultravjollcë të arrijë në sipërfaqen e Tokës.

Njëkohësisht, në atmosferë do të grumbullohen sasi të larta të metanit një gaz serrë i fuqishëm, duke krijuar një mjedis të papërshtatshëm për jetën siç e njohim. Sipas udhëheqësit të studimit, Kazumi Ozaki, do të ndodhë një “deoksigjenim i madh”, ku atmosfera e Tokës do të karakterizohet nga përqendrime të larta të metanit, nivele shumë të ulëta të CO₂ dhe mungesë të shtresës së ozonit.

Kjo atmosferë toksike nuk do të mbështesë jetën e njerëzve dhe specieve të tjera që varen nga oksigjeni, pasi parashikohet që përqendrimet e oksigjenit të bien deri në një milion herë më pak se sot. Mund të mbijetojnë vetëm disa mikroorganizma anaerobe, të cilat nuk kanë nevojë për oksigjen të ngjashme me format e para të jetës.

Megjithatë, lajmi nuk është alarmant për ne personalisht pasi këto ndryshime pritet të ndodhin në një të ardhme shumë të largët, kur njerëzimi ka shumë gjasa të mos ekzistojë më.

E rëndësishme për t’u theksuar është se kjo rënie e oksigjenit nuk vjen si pasojë e ndryshimeve klimatike të shkaktuara nga njerëzit, por si pjesë e evolucionit natyror të Tokës. Sipas studiuesve, kjo njohuri është e rëndësishme jo vetëm për të kuptuar të ardhmen e planetit tonë, por edhe për kërkimet e jetës në planetë të tjerë që kanë atmosferë me oksigjen.

Megjithëse një planet mund të ketë oksigjen sot, kjo nuk do të thotë që ai do ta ketë përgjithmonë. Në fund të fundit, studimi na kujton një të vërtetë themelore: asgjë nuk është e përhershme. Dhe kjo na bën të reflektojmë më thellë mbi kushtet që e bëjnë jetën të mundur në Tokë dhe sa të brishta janë ato në të vërtetë./kb

Gjykata e Apelit në Tiranë ka shtyrë për ditën e sotme vendimin për masat e sigurisë ndaj zyrtarëve dhe ish-zyrtarëve të arrestuar për evazionin fiskal të kompanisë së naftës “Bankers Petroleum”.

Vendimi do të shpallet sot në orën 10:00, avokatët e të dyshuarve sapo kanë përfunduar mbrojten dhe parashtrimet e tyre mbi ankimin për masat e sigurisë qe u caktuan nga gjykata e Fierit.

Kujtojmë se prokuroria ka kërkuar arrest me burg për 10 zyrtarët dhe ish-zyrtarët e “Bankers Petroleum”. Ish-drejtori Leonidha Çobo e drejtori aktual i kompanisë Hongping Xiao së bashku me zyrtarë të tjerë të kësaj kompanie, akuzohen për evazion fiskal dhe pastrim parash. Seanca u zhvillua me dyer të mbyllura për shkak të natyrës së çështjes dhe kërkesës së palëve për ruajtje të konfidencialitetit./kb

Ditën e mërkurë vendi ynë do të ndikohet nga kushte atmosferike relativisht të qëndrueshme.

Moti parashikohet i kthjellët e me vranësira mesatare e hera-herës deri të dendura në orët e mesditës në relievet malore në verilindje e juglindje.

Vranësirat do të shoqërohen me reshje shiu me intensitet të ulët në zonën lindore të vendit, kryesisht në relievet malore, ndërsa pjesa tjetër e territorit parashikohet pa reshje.

Era do të fryjë me drejtim verilindje – veriperëndim me shpejtësi mesatare 7m/s, ndërsa në zonat luginore dhe përgjatë vijës bregdetare hera-herës do të fitojë shpejtësi 7-14m/s./kb

Shtetasi kosovar Behar Preniqi është i fundit qytetar i arrestuar nga autoritetet serbe në vargun e arrestimeve të fundit që janë bërë në territorin e Serbisë.

Preniqi u ndalua në pikën kufitare Batrovci, në kufirin ndërmjet Kroacisë dhe Serbisë, ndërsa po udhëtonte nga Gjermania drejt Kosovës.

Ministria e Punëve të Jashtme reagoi duke e cilësuar rastin si arrestim arbitrar dhe të paprovokuar.

Ajo i bëri thirrje bashkësisë ndërkombëtare që të reagojë zëshëm dhe me vendosmëri ndaj praktikave represive të Serbisë, të cilat janë në kundërshtim me parimet themelore të të drejtës ndërkombëtare dhe me konventat ndërkombëtare për të drejtat e njeriut: “Rasti i fundit i arrestimit të qytetarit Behar Preniqi përbën një tjetër dëshmi të qartë të praktikave të papranueshme dhe destruktive të autoriteteve serbe, të cilat bien në kundërshtim të hapur me të drejtën ndërkombëtare dhe me standardet themelore për mbrojtjen e të drejtave të njeriut”.

Ekspertët e sigurisë këto arrestime i konsiderojnë si hakmarrje pasi autoritetet kosovare arritën të zbulojnë një rrjet spiunazhi duke arrestuar 6 persona si dhe ndihmësdrejtorin e të ashtuquajturës “Zyrë për Kosovën” në Qeverinë e Serbisë, Igor Popoviç që u zbulua se ka regjistuar jashtëligjshëm takimet në Bruksel.

Gurakuç Kuçi, ekspert i sigurisë, deklaroi: “Vargu i atyre të cilët u zbuluan nga institucionet e sigurisë së Kosovës që janë spiunë të Serbisë në Kosovë e bëri Serbinë të duket dhe të demaskohet si një shtet i cili është duke bërë një agresion spiunazhi ndaj një shteti tjetër, tani Serbia për të relativizuar dhe për të humbur në media këtë çështje ajo ka filluar si një lloj hakmarrje dhe njëlloj propagande me arrestimin e disa shqipatrëve”.

Në paraburgim në Serbi është edhe Arbnor Spahiu ish-polic i Kosovës me akuzën se ka marr pjesë në rastin e Banjskës edhe pse ishte dorëhequr një vit para ngjarjes. Gjithashtu, u ndalua edhe Lulzim Halili si pjesëtar i Ushtrisë Çlirimtare të Kosovës, edhe pse u konstatua nga organizatat e veteranëve se nuk është në listën e tyre.

Ndërsa autoritetet serbe ndaluan edhe Sasha Gjorgjeviç si i dyshuar për bashkëpunëtor të Shërbimit Informativ të Shtetit të Shqipërisë (SHISH), përmes Agjencisë Kosovare të Inteligjencës (AKI): “[Serbia] Me patjetër, sidomos për rastet e fundit në Kosovë duhet ta mbrojë imazhin e vet në çdo formë dhe imazhi i tyre po mbrohet në formën më të keqe për shqiptarët sepse shqiptarët të cilët po i arresotjnë ata janë realisht njerëz të pafajshëm”.

Ministria e Punëve të Jashtme u bëri sërish thirrje gjithë qytetarëve të Republikës së Kosovës që të shmangin udhëtimet përmes territorit të Serbisë, për të garantuar sigurinë dhe mirëqenien e tyre./kb