LONDËR, 31 korrik /ATSH-DPA/-  Një “problem i lidhur me radarin” shkaktoi dje  dështimin e kontrollit të trafikut ajror (ATC) që la fluturimet në të gjithë Britaninë e Madhe , thanë zyrtarët.

Drejtori ekzekutiv i Shërbimeve Kombëtare të Trafikut Ajror (NATS), Martin Rolfe, u thirr sot për të folur me sekretaren e Transportit, Heidi Alexander, një ditë pasi mijëra pasagjerë nuk fluturuan nga problemi teknik që detyroi anulimin e më shumë se 150 fluturimeve.

Linjat ajrore po kërkojnë një shpjegim për atë që ndodhi.

Një zëdhënës i NATS tha se “ky ishte një problem i lidhur me radarin, i cili u zgjidh duke kaluar shpejt në sistemin rezervë, gjatë së cilës kohë ne zvogëluam trafikun për të siguruar sigurinë”.

“Nuk ka prova se kjo kishte të bënte me kibernetikën. Kjo ishte një ngjarje e izoluar dhe nuk ka prova të aktivitetit të dëmshëm”,  shtoi ai.

Problemi ndodhi në qendrën e kontrollit të NATS në Swanwick, Hampshire, dhe preku pjesën më të madhe të Anglisë dhe Uellsit.

Më shumë se 700 000 pasagjerëve iu anuluan fluturimet në aeroportet e Mbretërisë së Bashkuar, në gusht 2023, kur NATS pësoi një problem teknik gjatë përpunimit të një plani fluturimi./ /Ad.Ab./

The post BM – Qindra fluturime të anuluara, pas problemeve në kullën e trafikut ajror appeared first on Agjencia Telegrafike Shqiptare.

BRUKSEL, 31 korrik /ATSH-AFP/ – Komisioni Evropian deklaroi sot se projektligji i miratuar po sot në Ukrainë rikthente garancitë themelore, që mundësonin pavarësinë e agjencive antikorrupsion.

“Sipas mendimit tonë, ligji i ri adreson sfidat kryesore që paraqet pavarësia e Agjencisë Kombëtare Kundër Korrupsionit (NABU) dhe Zyrës së Prokurorit të Specializuar Kundër Korrupsionit (SAP)”, tha zëdhënësi i Komisionit, Guillaume Mercier.

Parlamenti ukrainas miratoi sot me shumicë të madhe votash një projektligj që rivendos pavarësinë e organeve kundër korrupsionit, duke përmbysur një tekst të mëparshëm të kritikuar nga shoqëria civile dhe Bashkimi Evropian.

Një total prej 331 deputetësh, minimumi i kërkuar ishte 226, votuan në favor të tekstit të ri të propozuar nga presidenti Volodymyr Zelensky gjatë seancës plenare, e cila u transmetua drejtpërdrejt.

Kryeministrja Yulia Svyrydenko e përshëndeti menjëherë votimin, duke siguruar se ligji i ri “eliminon rrezikun e ndërhyrjes në punën e agjencive kundër korrupsionit”.

“Kjo është një përgjigje e qartë ndaj pritjeve të shoqërisë dhe partnerëve tanë evropianë”, shtoi ajo në median sociale.

Dokumenti i mëparshëm, i miratuar më 22 korrik, e vendosi Agjencinë Kombëtare Kundër Korrupsionit (NABU) dhe Zyrën e Prokurorit të Specializuar Kundër Korrupsionit (SAP) drejtpërdrejt nën mbikëqyrjen e Prokurorit të Përgjithshëm, i emëruar direkt nga presidenti./ /Ad.Ab./

The post BRUKSEL – BE: Projektligji i miratuar në Ukrainë rikthen pavarësinë e agjencive antikorrupsion appeared first on Agjencia Telegrafike Shqiptare.

RIGA, 31 korrik /ATSH-DPA – Kryeministri lituanez Gintautas Paluckas tha se do të japë dorëheqjen mes presionit në rritje për shkak të akuzave për konflikte interesi dhe nepotizëm.

“Kam vendosur të jap dorëheqjen nga detyra e kryeministrit”, njoftoi Paluckas në një deklaratë, duke shtuar se së shpejti do t’ia paraqesë dorëheqjen presidentit, Gitanas Nauseda.

Paluckas është vënë gjithnjë e më shumë nën kritika për shkak të akuzave për marrëveshje të dyshimta biznesi dhe është përballur me thirrje për dorëheqjen e tij, përfshirë edhe nga njëri prej dy partnerëve të koalicionit në qeverinë e tij të qendrës së majtë.

Hetimet janë duke vazhduar për marrëveshjet e kaluara dhe të tashme të biznesit që përfshijnë 45-vjeçarin, i cili deri më tani mohoi çdo konflikt interesi dhe i hodhi poshtë akuzat si sulme të qëllimshme nga kundërshtarët politikë.

Në deklaratën e tij, Paluckas tha se nuk besonte se kishte kryer ndonjë shkelje serioze gjatë mandatit të tij në detyrë. Megjithatë, ai nuk donte ta bënte qeverinë dhe punën e saj peng të “skandaleve”, tha ai.

Paluckas, i cili dha dorëheqjen gjithashtu si udhëheqës i social-demokratëve, është kryeministër i Lituanisë që nga nëntori i vitit 2024. /Ad.Ab./

The post LITUANI – Kryeministri Paluckas drejt dorëheqjes? appeared first on Agjencia Telegrafike Shqiptare.

GAZA, 31 korrik /ATSH/ – Më shumë se 50 palestinezë u vranë dhe 400 të tjerë u plagosën ndërsa prisnin ushqim pranë një kalimi në veri të Gazës, thonë burime të  një spitali, ndërsa i dërguari special i SHBA-së Steve Witkoff mbërriti në Izrael, sipas BBC-së.

Pamjet filmike treguan viktima nga incidenti pranë kalimit Zikim duke u çuar me karroca në spitalin al-Shifa në qytetin e Gazës.

Agjencia e Mbrojtjes Civile e drejtuar nga Hamasi në Gaza tha se forcat izraelite qëlluan mbi turmat e mbledhura rreth kamionëve me ndihma. Ushtria izraelite tha se trupat qëlluan “të shtëna paralajmëruese”, por se “nuk ishte në dijeni të ndonjë viktime”.

Witkoff do të takohet me zyrtarë izraelitë të cilët po shqyrtojnë masa ndëshkuese kundër Hamasit pasi bisedimet për armëpushim dhe lirimin e pengjeve ngecën javën e kaluar.

Ai gjithashtu thuhet se do të vizitojë vendet e shpërndarjes së ndihmave të drejtuara nga Fondacioni Humanitar i Gazës (GHF) i mbështetur nga Izraeli dhe SHBA-të, mes zemërimit ndërkombëtar në rritje për situatën e rëndë humanitare në territorin palestinez.

Ministria e shëndetësisë e Gazës  raportoi shtatë vdekje të tjera të lidhura me kequshqyerjen, duke e çuar totalin në 154 që nga fillimi i luftës.

Kjo ndodhi një ditë pasi ekspertët globalë të sigurisë ushqimore të mbështetur nga OKB-ja paralajmëruan se “skenari më i keq i urisë” “po ndodh aktualisht” midis popullsisë prej 2.1 milionë banorësh.

Agjencitë e OKB-së kanë thënë gjithashtu se ka uri masive  në Gaza dhe kanë fajësuar Izraelin, i cili kontrollon hyrjen e të gjitha furnizimeve nëyonë. Por Izraeli ka këmbëngulur se nuk ka kufizime në shpërndarjen e ndihmës dhe se “nuk ka uri”.

Pavarësisht kësaj, katër ditë më parë zbatoi masa që, sipas saj, synojnë të ndihmojnë OKB-në dhe partnerët e saj të mbledhin ndihmë nga kalimet dhe ta shpërndajnë atë brenda Gazës, duke përfshirë “pauza taktike” të përditshme në operacionet ushtarake në tre zona dhe krijimin e asaj që i quan “korridore të caktuara humanitare”. /Ad.Ab./

The post GAZA – Mbi 50 të vdekur dhe 400 të plagosur pas sulmeve izraelite appeared first on Agjencia Telegrafike Shqiptare.

PEKIN, 31 korrik /ATSH-AFP/ – Numri i të vdekurve nga shirat e rrëmbyeshëm që goditën Pekinin është rritur në 44, me nëntë të zhdukur, ku shumica e vdekjeve kanë ndodhur në një azil pleqsh, njoftuan sot autoritetet.

Pjesë të Kinës veriore, veçanërisht kryeqyteti, janë goditur nga përmbytje të shumta ditët e fundit, duke detyruar dhjetëra mijëra banorë të largohen nga shtëpitë e tyre.

”Sipas përllogaritjeve deri në mesditën e sotme, 44 persona kanë vdekur dhe nëntë janë të zhdukur”, tha Xia Linmao, një zyrtar i lartë komunal, në një konferencë për shtyp.

“Mes 23 dhe 29 korrikut, Pekini përjetoi reshje ekstreme shiu”, shtoi ai.

”Ato kanë shkaktuar humbje të konsiderueshme në njerëz”, theksoi Xia/ /Ad.Ab./

The post PEKIN – 44 viktima dhe nëntë të zhdukur nga shirat e rrëmbyeshëm appeared first on Agjencia Telegrafike Shqiptare.

UASHINGTON, 31 korrik /ATSH-DPA/ – I dërguari i posaçëm i SHBA-së për Lindjen e Mesme Steve Witkoff, pritet të udhëtojë për në Izrael si pjesë e përpjekjeve të Uashingtonit për të ndërmjetësuar krizën humanitare që po përkeqësohet në Rripin e Gazës, sipas raporteve të mediave amerikane.

Mediet ”NBC News” dhe ”The Hill”, duke cituar një zyrtar amerikan, thanë se Witkoff  mbërrin sot në Izrael.

Udhëtimi vjen ndërsa negociatat për armëpushim midis Izraelit dhe organizatës islamike palestineze Hamas mbeten të bllokuara.

Presidenti Donald Trump, kohët e fundit ka shtuar presionin për më shumë ndihma ushqimore për civilët në Gaza.

“Pavarësisht nëse flasin për uri apo jo, ata janë fëmijë që po vuajnë nga uria”, tha Trump gjatë fluturimit të tij nga Skocia për në Uashington./  /Ad.Ab./

The post  SHBA – I dërguari i posaçëm Witkoff në Izrael për krizën humanitare appeared first on Agjencia Telegrafike Shqiptare.

UASHINGTON, 31 korrik /ATSH-DPA/ – Presidenti amerikan, Donald Trump njoftoi mbrëmë një marrëveshje tregtare me Korenë e Jugut.

“Ne kemi rënë dakord për një tarifë prej 15% për Korenë e Jugut. Amerikës nuk do t’i ngarkohet një tarifë”, tha Trump në platformën e tij Truth Social, pasi më parë kishte kërcënuar të vendoste tarifa prej 25% për importet e produkteve të Koresë së Jugut nga 1 gushti.

Sekretari i Tregtisë i SHBA-së, Howard Lutnick, tha se norma e tarifës do të zbatohej edhe për importet e makinave.

Trump tha se Koreja e Jugut do t’u “jepte Shteteve të Bashkuara 350 miliardë dollarë për investime në pronësi dhe të kontrolluara nga Shtetet e Bashkuara, dhe të zgjedhura nga unë, si president”.

“Seuli gjithashtu pranoi të blinte gaz natyror të lëngshëm (LNG) ose produkte të tjera energjie me vlerë 100 miliardë dollarë dhe të pranonte produkte amerikane si makina dhe produkte bujqësore”, tha presidenti Trump.

Koreja e Jugut është një eksportuese e rëndësishme makinash në SHBA.

“Ne kemi kapërcyer një pengesë të madhe”, tha presidenti i Koresë së Jugut, Lee Jae Myung, sipas agjencisë së lajmeve Yonhap.

“Nëpërmjet kësaj marrëveshjeje, qeveria ka eliminuar pasiguritë në mjedisin e eksportit dhe ka krijuar kushte që kompanitë tona të konkurrojnë në kushte të barabarta ose superiore me vendet e mëdha”, shtoi ai./  Ad.Ab./

The post SHBA – Trump njofton marrëveshje tregtare me Seulin me tarifa prej 15% appeared first on Agjencia Telegrafike Shqiptare.

PARIS, 31 korrik /ATSH-ANSA/ – Franca mirëpret njoftimin e qeverisë kanadeze për qëllimin e saj për të njohur shtetin e Palestinës në Asamblenë e Përgjithshme të OKB-së në shtator”, thanë burime në Pallatin Elisee pas njoftimeve në Otava.

Presidenti Emmanuel Macron, vazhduan burimet në Paris, “pati mundësinë të diskutonte sot këtë çështje me kryeministrin kanadez.

“Ne mezi presim të punojmë me Kanadanë për të ringjallur perspektivën e paqes në rajon. Ne do të vazhdojmë përpjekjet tona për të inkurajuar të tjerët të bashkohen me këtë moment përpara Asamblesë së Përgjithshme në shtator”, përfunduan burimet.

Sipas REL, Kryeministri i Kanadasë, Mark Carney deklaroi se Kanadaja do ta njohë shtetin palestinez në shtator, duke u bërë vendi i tretë i grupit të G7-s që bën një njoftim të tillë në ditët e fundit.

Carney tha se marrja e këtij vendimi do të varet nga reformat që do të kryhen, përfshirë zotimin e Autoritetit Palestinez që t’i mbajë zgjedhjet e reja vitin e ardhshëm, pa pjesëmarrjen e Hamasit.
Hamasi është grup palestinez i shpallur terrorist nga Shtetet e Bashkuara dhe fuqi të tjera./ /Ad.Ab./

The post PARIS – Franca mirëpret njoftimin e Kanadasë për njohjen e Palestinës appeared first on Agjencia Telegrafike Shqiptare.

BRUKSEL, 30 korrik  /ATSH-AFP/ – Ekonomia e eurozonës u zgjerua në mënyrë të papritur në tremujorin e dytë të vitit 2025, treguan sot të dhënat zyrtare, pavarësisht tensioneve tregtare ndërkombëtare.

Agjencia zyrtare e të dhënave e BE-së tha se zona e monedhës së vetme me 20 vende regjistroi një rritje prej 0,1 për qind gjatë periudhës prill-qershor nga tremujori i mëparshëm.

Që kur presidenti i SHBA-së Donald Trump u kthye në Shtëpinë e Bardhë në janar, ai e ka goditur BE-në me një sërë tarifash “të dhimbshme”, por blloku arriti një marrëveshje të dielën për të shmangur një luftë tregtare në rritje.

Zyrtarët e BE-së shpresojnë se marrëveshja do të sjellë siguri  për kompanitë dhe do të shmangë “dhimbjet” e mëtejshme ekonomike, por analistët paralajmërojnë se Evropa do të marrë ende një goditje në prodhimin e saj nga marrëveshja, e cila parashikon një tarifë prej 15 për qind për shumicën e eksporteve.

Të dhënat e Eurostatit sot treguan se ekonomia e dytë më e madhe e Evropës, Franca, i tejkaloi pritjet për t’u rritur me 0,3 për qind në tremujorin e dytë, por ishte Spanja ajo që ishte performuesja kryesore duke regjistruar një rritje prej 0,7 për qind midis prillit dhe qershorit.

Fuqia ekonomike e Evropës, Gjermania, u tkurr në mënyrë të papritur me 0,1 për qind nga tremujori i mëparshëm. Ekonomia e Italisë gjithashtu u tkurr me 0,1 për qind në të njëjtën periudhë.

Shifra e eurozonës ishte më e mirë se 0.0 përqind e parashikuar nga analistët për Bloomberg dhe FactSet, dhe vjen pasi ekonomia e zonës së monedhës së vetme u rrit me 0,6 për qind në tremujorin e parë.

Ekonomistët kanë paralajmëruar megjithatë kundër leximit të tepërt të të dhënave të tremujorit të parë, pasi kjo ndodhi për shkak të një ndryshimi ekstrem në shifrat e Irlandës.

Ekonomia e BE-së me 27 vende u zgjerua me 0.2 përqind gjatë periudhës prill-qershor nga tremujori i mëparshëm, pasi regjistroi një rritje prej 0.5 përqind në tre muajt e parë të vitit 2025.

Viti ka qenë plot pasiguri për Evropën. Trump kërcënoi me taksa prej 30% për shumicën e mallrave evropiane nëse Brukseli dhe Uashingtoni nuk do të arrinin një marrëveshje deri më 1 gusht.

Marrëveshja e së dielës nuk ka nxjerrë detaje, me shumë gjëra që ende po negociohen, por të dy palët konfirmuan se shumica e produkteve të BE-së do të përballeshin me normën e tarifës prej 15%, duke përfshirë produktet farmaceutike dhe gjysmëpërçuesit.

Ekonomistët paralajmëruan se marrëveshja do të shkaktonte disa dëme në ekonominë e eurozonës.

“Me tarifën universale prej 15% të SHBA-së që ka të ngjarë të zbresë rreth 0.2% nga PBB-ja e rajonit, rritja ka të ngjarë të mbetet e dobët në pjesën tjetër të këtij viti”, tha Franziska Palmas, ekonomiste e lartë për Evropën në ”Capital Economics”.

Në gjysmën e parë të vitit, kompanitë evropiane nxituan të transportonin më shumë mallra për të shmangur tarifat më të larta të Trump.

Ministri i Ekonomisë i Francës, Eric Lombard, tha se shifrat për Francën treguan se kompanitë e vendit, megjithatë, po rezultonin rezistente ndaj rritjes së tarifave të SHBA-së.

Franca tani po shtyn për tarifa zero për alkoolin, duke përfshirë shampanjën dhe verërat, si dhe pijet alkoolike, ndërsa bisedimet për këtë çështje janë ende duke vazhduar.

Zyrtarët evropianë thonë se marrëveshja përfshinte një marrëveshje mbi përjashtimet dypalëshe nga tarifat për mallra të caktuara, por se cilat prej tyre saktësisht mbeten për t’u përcaktuar./   /Ad.Ab./

The post FOKUS – Ekonomia e eurozonës zgjerohet, por ndikimi i tarifave është i dukshëm appeared first on Agjencia Telegrafike Shqiptare.

FRANKFURT, 30 korrik /ATSH-DPA/ – Prodhimi i Brendshëm Bruto gjerman (PBB) u tkurr me 0,1% në tremujorin e dytë 2025, krahasuar me periudhën tremujore të mëparshme, tha sot Zyra Federale e Statistikave.

Kjo vjen pas një rimëkëmbjeje të papritur të vogël në fillim të vitit, të cilën zyra, e njohur edhe si Destatis, e rishikoi në 0,3% nga 0,4%.

Ekspertët kryesisht ia atribuuan rritjen e tremujorit të parë efekteve parashikuese për shkak të asaj që në atë kohë kishte qenë një njoftim i planeve nga presidenti i amerikan Donald Trump për të vendosur tarifa të larta ndaj Bashkimit Evropian.

Që nga fundjava, të paktën është sqaruar përafërsisht se nën cilat kushte dukshëm më të ashpra ekonomia gjermane, e orientuar drejt eksportit, mund të shesë ende mallra në SHBA.

Në negociatat me Komisionin Evropian, Trump ka vendosur tarifa të njëanshme, ose asimetrike, prej 15% për importet nga BE.

Qeveria amerikane më parë kishte kërcënuar me një tarifë prej 30% dhe kishte kërkuar tashmë tarifa më të larta për mallra të caktuara si çeliku, alumini ose makinat.

Disa nga këto tarifa më të larta janë ende në fuqi.

Sipas Destatis, investimet në pajisje dhe ndërtim ishin veçanërisht më të ulëta nga prilli në qershor krahasuar me tremujorin e mëparshëm.

Në të kundërt, shpenzimet private dhe qeveritare të konsumit u rritën, të përshtatura për çmimin, sezonin dhe kalendarin./  /Ad.Ab./

The post GJERMANI – Ekonomia tkurret me 0,1% në T2 2025 appeared first on Agjencia Telegrafike Shqiptare.

MOSKË, 30 korrik /ATSH-DPA/ – Rusia dhe Kina do të nisin të premten manovra të përbashkëta ushtarake në Detin e Japonisë, njoftoi Flota Ruse.

Manovrat, të cilat janë pjesë e serisë “Ndërveprimi Detar”, do të zhvillohen nga 1 deri më 5 gusht dhe përshkruhen nga Moska si thjesht mbrojtëse dhe jo të drejtuara kundër ndonjë vendi.

Sipas raporteve të mediave shtetërore sot, duke cituar Flotën e Paqësorit, qëllimi i tyre është të forcojnë bashkëpunimin dhe të lehtësojnë shkëmbimin e njohurive midis forcave detare ruse dhe kineze.

Manovrat do të përfshijnë nëndetëse, aviacion detar dhe anije.

Aktivitetet do të përfshijnë operacione të përbashkëta kërkim-shpëtimi, ushtrime kundër nëndetëseve dhe mbrojtje ajrore, si dhe qitje me artileri të drejtpërdrejtë në një zonë të caktuar trajnimi, njoftoi flota ruse.

Qendra komanduese për këtë operacion ndodhet në qytetin portual të Vladivostokut.

Moska dhe Pekini kanë zhvilluar rregullisht stërvitje të përbashkëta detare që nga viti 2012.

Rusia ka theksuar interesin e saj për të demonstruar vazhdimisht fuqinë e saj ushtarake në rajon, veçanërisht në dritën e asaj që e konsideron si rritje të aktivitetit amerikan në Paqësor.

Kremlini gjithashtu synon të japë sinjal se ushtria e tij mbetet e aftë për operacione globale, pavarësisht pushtimit në vazhdim të Ukrainës. /Ad.Ab./

The post FOKUS – Manovra të përbashkëta detare ruso-kineze në Detin e Japonisë appeared first on Agjencia Telegrafike Shqiptare.

BRUKSEL, 30 korrik /ATSH-AFP/ – Bashkimi Evropian njoftoi sot se do të fillojë zbatimin e kontrollit të automatizuar kufitar pas dy muajsh, i cili përfundimisht do të zëvendësojë vulosjen manuale të pasaportave.

Ky sistem i ri do të regjistrojë në një skedar të përbashkët emrat, numrat e pasaportave, gjurmët e gishtërinjve dhe fotot e të gjithë shtetasve të vendeve të treta që udhëtojnë në Evropë për një qëndrim të shkurtër.

“Kjo do të na ndihmojë të dimë se kush po hyn dhe po del nga BE-ja”, tha komisioneri evropian për Migracionin, Magnus Brunner.

Zbatimi i këtij sistemi, i cili ka qenë në diskutim për gati 10 vjet, megjithatë, do të zbatohet gradualisht me kalimin e kohës.

“Shtetet anëtare, udhëtarët dhe bizneset do të kenë kohë të përshtaten me sistemin e ri”, deklaroi Komisioni.

Sistemi “hyrje/dalje” po shkakton ngurrim midis disa kompanive të transportit, të cilat kanë frikë se do të zgjasë radhët në aeroporte dhe stacione treni.

Kryebashkiaku i Londrës, Sadiq Khan, shprehu gjithashtu shqetësimin se sistemi mund të shkaktojë kaos në qytetin e tij, veçanërisht në stacionin St. Pancras, nga nisen dhe mbërrijnë trenat e Eurostar.

Autoritetet britanike i kanë paralajmëruar tashmë qytetarët e tyre se do të kërkohen “disa minuta” kohë shtesë pritjeje për “çdo pasagjer” që të kalojë kufirin.
Komisioni Evropian siguron se fushatat informuese do të ndihmojnë në lehtësimin e këtij sistemi.

Ai këmbëngul se ai do të “parandalojë migrimin e parregullt dhe do të mbrojë sigurinë e qytetarëve evropianë”.

Njëzet e nëntë vende do të marrin pjesë në këtë kontroll të automatizuar, të gjitha vendet e BE-së përveç Qipros dhe Irlandës, si dhe Islanda, Lihtenshtejni, Norvegjia dhe Zvicra./ /Ad.Ab./

The post BRUKSEL – BE nis kontrollin e automatizuar kufitar appeared first on Agjencia Telegrafike Shqiptare.

ROMË, 30 korrik /ATSH/ – Papa Leone XIV bëri thirrje sot për një angazhim të ripërtërirë  diplomatik për të zgjidhur konfliktet, ndërsa shënoi 50-vjetorin e Marrëveshjeve të Helsinkit, marrëveshja historike e epokës së Luftës së Ftohtë që solli një epokë të re sigurie dhe të drejtave të njeriut, sipas AP-së.

Në fund të audiencës së tij të përgjithshme, papa i parë amerikan në histori tha se ”1 gushti shënon përvjetorin e përfundimit të samitit të 35 vendeve në Finlandë që rezultoi në Aktin Final të Helsinkit, i cili vite më vonë ndihmoi në lindjen e Organizatës për Siguri dhe Bashkëpunim në Evropë”.

Duke ripërtërirë thirrjen e tij për paqe në botë, papa tha se “sot, më shumë se kurrë, është e domosdoshme të çmojmë frymën e Helsinkit, të këmbëngulim në dialog, të forcojmë bashkëpunimin dhe ta bëjmë diplomacinë mënyrën e preferuar për të parandaluar dhe zgjidhur konfliktet”.

Në kulmin e politikës së qetësimit gjatë Luftës së Ftohtë në vitet 1970, presidenti finlandez Urho Kekkonen organizoi një samit mes SHBA-së dhe Bashkimit Sovjetik, ku presidenti amerikan Gerald Ford, udhëheqësi sovjetik Leonid Brezhnev dhe të tjerë nënshkruan një angazhim historik për paqen, kontaktet Lindje-Perëndim, sigurinë evropiane dhe të drejtat e njeriut.

Ndërsa lufta e Rusisë në Ukrainë vazhdon, ai kujtoi se Selia e Shenjtë kishte dërguar një delegacion në samitin finlandez, i kryesuar nga arqipeshkvi Agostino Casaroli, i cili më vonë do të bëhej sekretar shteti në Vatikan dhe njihej për promovimin dhe ndjekjen e një politike të Ostpolitik – pra hapje dhe dialog me Evropën Lindore.

Audienca e përgjithshme e zhvilluar sot shënoi rifillimin e takimit javor të papës me besimtarët pas një pushimi veror njëjavor.

Sheshi i Shën Pjetrit ishte veçanërisht i mbushur, duke pasur parasysh mbërritjen e dhjetëra mijëra pelegrinëve në qytet për një festë njëjavore të Vitit të Shenjtë për katolikët e rinj./  /Ad.Ab./

The post VATIKAN – Papa Leone XIV: Angazhim të ripërtërirë diplomatik për të zgjidhur konfliktet appeared first on Agjencia Telegrafike Shqiptare.

UASHINGTON, 30 korrik /ATSH-DPA/ – Presidenti amerikan, Donald Trump kërkoi rritjen e ndihmës ushqimore për civilët në Rripin e Gazës duke paralajmëruar se fëmijët atje po vuajnë nga uria.

”Qoftë edhe nëse nuk e pranojnë si uri, ata janë fëmijë që po vdesin nga uria”, tha Trump për gazetarët gjatë udhëtimit të tij me ”Air Force One”, në kthim nga Skocia drejt Uashingtonit.

”Shikon nënat, i duan aq shumë fëmijët e tyre. Por, s’ka asgjë që duket se mund të bëjnë”, shtoi ai.

Kur u pyet nëse e kishte diskutuar këtë çështje me Zonjën e Parë Melania, presidenti Trump u përgjigj se ”ajo sheh të njëjtat pamje që shihni edhe ju, që i shohim të gjithë. Dhe mendoj se kushdo, përveç nëse është me të vërtetë pa zemër, ose më keq akoma, i çmendur, nuk ka çfarë të thuash tjetër përveçse se është e tmerrshme kur sheh fëmijët në atë gjendje”.

”Duhet t’u çojnë ushqime. Dhe ne do t’u çojmë ushqime”, tha Trump.

Presidenti amerikan ka bërë më parë thirrje për më shumë ndihmë nga Izraeli për popullsinë e uritur në Gaza, duke adoptuar një ton dukshëm më të ashpër mbi këtë çështje.

Ndërkohë, qëndrimi zyrtar i qeverisë amerikane mbetet se grupi islamik palestinez ”Hamas” mban përgjegjësinë kryesore për krizën humanitare në Gaza./ /Ad.Ab./

The post SHBA – Trump: Fëmijët në Gaza po vdesin urie, më shumë ndihma ushqimore appeared first on Agjencia Telegrafike Shqiptare.

TOKIO, 30 korrik /ATSH-DPA/ – Japonia lëshoi sot paralajmërime për cunami, pasi një tërmet i fuqishëm goditi gadishullin Kamçatka të Rusisë duke shkaktuar rritje të baticës përgjatë pjesëve të vijës bregdetare veriore.

”Dallgë deri në 60 centimetra u vunë re përgjatë brigjeve të prefekturave Hokkaido dhe Iwate”, raportoi transmetuesi publik NHK.

Autoritetet paralajmëruan se dallgët e cunamit mund të arrijnë deri në tre metra.

Agjencia Meteorologjike e Japonisë u bëri thirrje banorëve në zonat bregdetare të evakuohen në vende më të larta ose në strehimore të caktuara dhe i këshilloi ata të qëndrojnë në vende të sigurta pavarësisht nxehtësisë intensive të verës.

”Paralajmërimi mund të mbetet në fuqi për një ditë tjetër ose më gjatë”, tha agjencia.

Nuk pati raportime të menjëhershme për viktima ose dëme, sipas një zëdhënësi të qeverisë.

Qeveria në Tokio ngriti një ekip reagimi ndaj krizave për të monitoruar situatën./   /Ad.Ab./

The post JAPONI – Dallgë të larta përfshijnë bregdetin verior të vendit, pas tërmetit në Rusi appeared first on Agjencia Telegrafike Shqiptare.

UASHINGTON, 29 korrik /ATSH-AFP/ – Presidenti Donald Trump denoncoi sot një akt dhune si “të pakuptimtë” të kryer nga një “njeri i çmendur”, pasi një person i armatosur vrau katër vetë në një qiellgërvishtëse në Nju Jork, para se të vriste veten.

“Jam informuar për të shtënat tragjike që ndodhën në Manhattan, një vend që e njoh dhe e dua”, shkroi presidenti amerikan në platformën e tij Truth Social.

”Kam besim te forcat tona të rendit për të zbuluar arsyet që e shtynë këtë njeri të çmendur të kryejë një akt kaq të pakuptimtë dhune”, shtoi ai.

Një  person hyri mbrëmë në një kullë zyrash në Manhattan duke qëlluar me pushkë dhe  duke vrarë katër persona, përfshirë një oficer policie të qytetit të Nju Jorkut, dhe duke plagosur një të pestë përpara se të vriste veten, thanë zyrtarët, sipas AP.

Të shtënat ndodhën në një qiellgërvishtëse që është shtëpia e selisë së NFL-së dhe ”Blackstone”, një prej firmave më të mëdha të investimeve në botë, si dhe qiramarrësve të tjerë.

”Personi i armatosur, i identifikuar nga autoritetet si Shane Tamura nga Las Vegas, kishte një histori të dokumentuar të shëndetit mendor”, sipas komisioneres së policisë, Jessica Tisch, por motivi i tij ishte ende i panjohur./  /Ad.Ab./

The post UASHINGTON – Trump e denoncon si “të pakuptimtë” aktin e dhunës në Nju Jork appeared first on Agjencia Telegrafike Shqiptare.

RIO DE ZHANEIRO, 29 korrik /ATSH-DPA/ – Ish-presidenti i Kolumbisë, Álvaro Uribe, u shpall fajtor për manipulim dëshmitarësh dhe mashtrim procedural në një gjyq historik, hera e parë që një ish-kreu i shtetit në vend dënohet për një vepër penale.

Gjatë shpalljes së vendimit që zgjati më shumë se 10 orë, gjyqtarja Sandra Heredia deklaroi se prokuroria kishte provuar përfshirjen e Uribes në këto krime.

Vendimi nuk është ende përfundimtar, dhe ekipi ligjor i Uribes pritet të apelojë. Një gjykatë apelimi duhet të japë vendim deri në mes të tetorit, përndryshe rrezikon që çështja të parashkruhet dhe të mbyllet.

Uribe, 73 vjeç, e ndoqi seancën online. Dënimi do të shpallet në një seancë të veçantë. Ai përballet me deri në tetë vjet burg, mundësisht në arrest shtëpie.

Ai u shpall fajtor për dy nga tre akuzat, ndërsa akuza për ryshfet u hodh poshtë.

Çështja buron nga procedurat që vetë Uribe i nisi më shumë se një dekadë më parë kundër senatorit të krahut të majtë Iván Cepeda, i cili kishte hetuar lidhjet e dyshuara të Uribes me grupet paraushtarake.

Situata u përmbys në vitin 2018 kur vetë Uribe u akuzua se kishte ushtruar presion ndaj ish-të burgosurve paraushtarakë për të dhënë dëshmi shfajësuese për të. Procedurat u vonuan vazhdimisht dhe vetëm në vitin 2024 u ngritën akuza kundër tij.

Uribe, një konservator që shërbeu si president nga viti 2002 deri në vitin 2010, mbetet një figurë përçarëse në Kolumbi. Mbështetësit e shohin atë si një mbrojtës të vendosur të sigurisë kombëtare gjatë një periudhe konflikti të fortë me grupet guerile të krahut të majtë.

Kritikët, megjithatë, e akuzojnë atë për shkelje të të drejtave të njeriut dhe mbajtjen e lidhjeve të ngushta me forcat paraushtarake.

Konflikti i brendshëm dekadash i Kolumbisë midis forcave qeveritare, guerilëve dhe paraushtarakëve të krahut të djathtë ka lënë rreth 220 000 njerëz të vdekur dhe miliona të zhvendosur./  /Ad.Ab./

The post KOLUMBI – Ish-presidenti Uribe shpallet fajtor për manipulim dëshmitarësh appeared first on Agjencia Telegrafike Shqiptare.

MYNIH, 29 korrik /ATSH-DPA/ – Fatkeqësitë natyrore si zjarret, stuhitë dhe tërmetet shkaktuan dëme prej 131 miliardë dollarësh në të gjithë botën në gjysmën e parë të vitit 2025, totali i dytë më i lartë për një periudhë të gjysmës së parë që nga viti 1980, sipas kompanisë gjermane të sigurimeve “MunichRe”.

Vetëm zjarret në Kaliforni shkaktuan dëme prej rreth 53 miliardë dollarësh në janar, duke i bërë ato katastrofën më të kushtueshme nga zjarri të regjistruar ndonjëherë, sipas “MunichRe”.

Në përgjithësi, Shtetet e Bashkuara të Amerikës  u goditën veçanërisht rëndë, me stuhi dhe tornado të shumta të forta që i çuan humbjet totale në 92 miliardë dollarë ,që përfaqësojnë 70% të dëmeve globale.

Ngjarja më vdekjeprurëse ishte një tërmet i 28 marsit në Mjanmar, i cili shkakto vdekjen e 4 500  vetave.

Shkencëtarët në ”MunichRe” thonë se fatkeqësitë natyrore të lidhura me motin po bëhen më të shpeshta dhe të rënda për shkak të ngrohjes globale.

Nga totali i dëmeve prej 131 miliardë dollarësh, 80 miliardë dollarë ishin të siguruar, të dy shifrat janë shumë mbi mesataren e rregulluar nga inflacioni për dekadat e fundit.

Vetëm gjysma e parë e vitit 2011, e shënuar nga tërmeti dhe cunami i Japonisë, pa humbje të përgjithshme më të larta./  /Ad.Ab./

The post FOKUS – Fatkeqësitë natyrore shkaktuan 131 miliardë dollarë dëme në 2025 appeared first on Agjencia Telegrafike Shqiptare.

TEL AVIV, 29 korrik /ATSH-DPA/ – Sipas autoriteteve izraelite, 260 kamionë që transportonin ndihma humanitare hynë sot në Rripin e Gazës, pasi Izraeli filloi të lejojë më shumë furnizime në territorin palestinez.

“Dyqind e gjashtëdhjetë kamionë të tjerë kanë hyrë në Gaza dhe tani po presin të mblidhen dhe të shpërndahen”, shkroi në platformën X COGAT, autoriteti ushtarak izraelit përgjegjës për aprovimin dhe koordinimin e ndihmave.

Këto dërgesa janë tepër të nevojshme për popullsinë civile palestineze të Gazës, për të cilën organizatat humanitare thonë se po përballet me nivele të paprecedenta urie për shkak të ofensivës së vazhdueshme ushtarake izraelite në këtë zonë.

Duke përshëndetur ndihmën e re që po mbërrin, koordinatori i emergjencave i OKB-së, Tom Fletcher tha se dërgesat janë vetëm një “pikë në oqean” krahasuar me nevojat reale, duke theksuar se ditët në vijim janë vendimtare për mirëqenien e popullsisë në Gaza.

Ndërsa presioni ndërkombëtar ndaj Izraelit për të lejuar më shumë ndihma po rritet, ushtria izraelite njoftoi dje se do të vëzhgojë një “pauzë taktike ditore të vetëdeklaruar të veprimeve ushtarake për qëllime humanitare” në disa zona të Gazës.

Pauza do të zbatohet në zonën al-Mawasi në jugperëndim të rripit bregdetar, në Deir al-Balah në qendër dhe në qytetin e Gazës në veri, zona këto ku ushtria izraelite aktualisht nuk po vepron, sipas saj./  /Ad.Ab./

The post GAZA – Edhe 260 kamionë të tjerë me ndihma hyjnë në zonë appeared first on Agjencia Telegrafike Shqiptare.

NEVADA, 29 korrik /ATSH-DPA/ – Tre persona u vranë dhe dy të tjerë u plagosën rëndë në një të shtënë me armë jashtë një kazinoje në shtetin amerikan të Nevadës, thanë autoritetet lokale të hënën.

Të shtënat ndodhën dje në mëngjes. Personi i dyshuar i armatosur, i cili gjithashtu mori një plagë me armë zjarri, u arrestua dhe u shtrua në spital.

Policia tha se nuk kishte asnjë tregues fillestar se i dyshuari i njihte viktimat. Motivi pas të shtënave mbetet i paqartë.

Shtetet e Bashkuara kanë luftuar prej kohësh me dhunën e përhapur me armë. Armët e zjarrit janë lehtësisht të arritshme dhe në pronësi të zakonshme.

Sipas Qendrave të SHBA-së për Kontrollin dhe Parandalimin e Sëmundjeve (CDC), dhjetëra mijëra njerëz vdesin nga lëndimet e lidhura me armët çdo vit.
Ndërsa të shtënat masive në shkolla, supermarkete dhe vende të tjera publike shpesh ripërtërijnë thirrjet për kontroll më të rreptë të armëve, përpjekjet legjislative kanë ngecur kryesisht.
Reformat e propozuara vazhdojnë të përballen me kundërshtimin e ligjvënësve republikanë dhe lobit me ndikim të armëve./ /Ad.Ab./

The post SHBA – Sërish të vdekur nga të shtënat me armë, jashtë një kazinoje në Nevada appeared first on Agjencia Telegrafike Shqiptare.