BRUKSEL, 17 korrik /ATSH/ – Shtetet e Bashkuara e kërcënuan gjatë fundjavës Bashkimin Evropian me tarifa prej 30 për qind, duke tronditur Brukselin pikërisht kur po mendonte se bërja e një marrëveshjeje tregtare transatlantike ishte pothuajse punë e kryer.

Blloku ende shpreson se një marrëveshje do të mundë të arrihet para afatit të 1 gushtit, kur pritet të hyjnë në fuqi tarifat ndëshkuese të SHBA-së.

Por, BE-ja gjithashtu ka përgatitur kundërmasa, duke rritur mundësinë e një lufte tregtare me pasoja të rënda për ekonominë botërore.

Mund të thuhet se njoftimi i Donald Trumpit më 12 korrik – për vendosjen e një tarife të përgjithshme prej 30 për qind për të gjitha importet nga blloku me 27 vende anëtare – ishte goxha tronditës.

Prej se presidenti amerikan kërcënoi për herë të parë BE-në, si dhe shumicën e partnerëve të tjerë tregtarë botërorë, me masa të rënda tregtare në fillim të prillit, Brukseli ka qenë i gatshëm për ta gjetur njëfarë kompromisi.

Diplomatët dhe politikanët evropianë besojnë se një marrëveshje transatlantike ishte shumë pranë, duke lënë të kuptohet se mund të pranohej një tarifë bazë prej rreth 10 për qind, me përjashtime dhe kuota për industri të ndryshme që do të shtjelloheshin më vonë.

Duke folur në kushte anonimiteti, ata thonë se e shohin kthesën e papritur nga Shtëpia e Bardhë si një “taktikë negociuese” për ta siguruar një marrëveshje më të mirë, veçanërisht për kompanitë teknologjike amerikane që përballen me taksa të rritura në Evropë.

BE-ja ende shpreson se mund të arrihet diçka para afatit të 1 gushtit, edhe në qoftë se është vetëm një shtyrje për disa muaj.

Qëllimi është të rikthehen tarifat në 10 për qind apo afër kësaj shifre. BE-ja është e gatshme të pranojë tarifë prej 15 për qind si kufi maksimal pa ndërmarrë masa hakmarrëse.

Kundërmasa në vlerë miliarda euro

Ndërkohë, Komisioni Evropian ka përgatitur pikërisht kundërmasa të tilla. Madje ka përpiluar një listë 200-faqëshe me mallra amerikane që mund të goditen.

Të miratuara nga ministrat e Tregtisë të BE-së gjatë një takimi në Bruksel më 14 korrik, komisioni propozoi kundërmasa në vlerë 72 miliardë euro, që synojnë gjithçka, nga avionët, pjesët e makinave dhe pijet alkoolike si burboni, deri te sende më të vogla si çakmakët dhe tubat për duhan, shkruan REL.   /os/

The post FOKUS – Kërcënimi i SHBA-së me tarifa rrit rrezikun për Evropën teksa shtohet frika për luftë tregtare appeared first on Agjencia Telegrafike Shqiptare.

The post SHBA – Trump do të vendosë tarifa mbi 10% për vendet më të vogla appeared first on Agjencia Telegrafike Shqiptare.

Komisioni i BE-së u ka paraqitur zyrtarisht shteteve anëtare listën e kundërtarifave prej 72 miliardë eurosh të gatshme për t’u zbatuar në përgjigje të së ashtuquajturave tarifa reciproke të SHBA-së për makinat.

Pas mbylljes së konsultimit publik më 10 qershor, paketa fillestare prej 95 miliardë eurosh u zvogëlua, por – sipas listës së parë nga ANSA – ajo ruan bazat e eksporteve të SHBA-së si mishin e viçit dhe derrit, SUV-ët, kamionçinat dhe komponentët e avionëve të lidhur me ”Boeing ”.

Gjithashtu në shënjestër është uiski ikonik i Kentuckyt.

”Lista është ende subjekt i ndryshimeve ”, specifikon një burim diplomatik, duke konfirmuar se shqyrtimi nga të 27-t do të çojë në “rregullime të mëtejshme” para miratimit.

Lista, e reduktuar në afërsisht 200 faqe nga 218 faqet fillestare të hartuara midis prillit dhe majit, u vu në tryezën e të 27-ve me një vlerë totale prej 72,1 miliardë eurosh, që do t’i shtohet paketës fillestare prej 21 miliardë eurosh të ngrira deri më 1 gusht.

Lista mban një strukturë të synuar që synon sektorët me ndikim të lartë ekonomik dhe politik, me qëllim ribalancimin e bilancit tregtar me Uashingtonin: nga uiski i Kentuckyt, pavarësisht presionit të fortë nga Italia, Franca dhe Irlanda për të mbrojtur sektorin e pijeve nga hakmarrja e Trump – te karavidhet e Maineit, nga agrumet e Floridës te mikroçipat e Teksasit dhe teknologjia ”Silicon Valley”.

Ajo gjithashtu përfshin sektorë kyç për shtetet bujqësore dhe prodhuese, të tilla si soja e Luizianës, mishi i viçit dhe shpendët dhe produktet e drurit, të konsideruara si impute strategjike për prodhimin amerikan dhe thelbësore për ekonomitë e shteteve si Xhorxhia, Virxhinia dhe Alabama.

Brukseli po përgatit një kundërsulm në dy fronte, industrinë agro-ushqimore dhe të rëndë.
Kundërtarifat për produktet ushqimore të konsumit ndikojnë në një vlerë prej afërsisht 6,3 miliardë eurosh si fruta, perime, reçel, mish të freskët dhe të përpunuar, pije alkoolike (verë, birrë, pije alkoolike), ëmbëlsira, erëza, duhan, lëngje dhe shurupe.

Vetëm sektori i prodhimeve të detit vlen 510 milionë euro dhe përfshin salmonin, butakët dhe peshkun e Alaskës.

Bllokada industriale shumë më e madhe prek industritë e rënda dhe teknologjike, me një vlerë prej 65,7 miliardë eurosh si avionë dhe pjesë këmbimi ”Boeing” (10,8 miliardë euro), përbërës automobilistikë (9,9 miliardë euro), makineri (9,4 miliardë euro), pajisje mjekësore (7,6 miliardë euro), kimikate dhe plastikë (7,7 miliardë euro), pajisje elektrike (6,1 miliardë euro) dhe instrumente precize.

Produktet farmaceutike, gjysmëpërçuesit dhe lëndët e para të rëndësishme si bakri dhe druri, ende të përjashtuara nga tarifat e Uashingtonit, mbeten jashtë fushëveprimit.
Një përjashtim i mëtejshëm ka të bëjë me produktet për përdorim ushtarak, të cilat Brukseli i ka lënë qëllimisht jashtë perimetrit të tarifave, edhe në dritën e lëshimeve të bëra nga Shtëpia e Bardhë në lidhje me blerjet e armëve nga SHBA-ja.

Krahas kundërtarifave, ekzekutivi i BE-së po propozon gjithashtu një paketë të synuar kufizimesh mbi eksportet evropiane jashtë shtetit, me vlerë 94,4 milionë euro duke u përqendruar në skrapin e metaleve me ngjyrë dhe aluminin.

GARMISCH-PARTENKIRSCHEN (Gjermani), 15 korrik /ATSH-DPA/ – SHBA-ja nuk duhet ta nënvlerësojë gatishmërinë e Evropës për t’u kundërpërgjigjur, nëse tarifat e planifikuara prej 30% për mallrat e BE-së hyjnë në fuqi, tha sot kancelari gjerman Friedrich Merz.

”Qeveria amerikane duhet ta dijë se Evropa është e gatshme t’u përgjigjet ngarkesave tepër të larta doganore me masa të ngjashme”, tha Merz në një takim me kabinetin bavarez në malin më të lartë të Gjermanisë, Zugspitze.

Merz tha se është në kontakt të ngushtë me presidentin e SHBA-së Donald Trump dhe presidenten e Komisionit Evropian, Ursula von der Leyen.

”Bashkimi Evropian ende shpreson për një zgjidhje të negociuar për mosmarrëveshjet tarifore”, tha kancelari.

“Qëllimi ynë është dhe mbetet të arrijmë shpejt një zgjidhje që lehtëson tregtinë me Shtetet e Bashkuara dhe siguron tarifa më të ulëta përsëri”, tha Merz.

“Tani kemi kohë deri në fund të korrikut për të zhvilluar negociata”, shtoi ai.

Trump  njoftoi javën e kaluar një afat deri më 1 gusht për negociatat.

Një tarifë prej 30% për të gjitha mallrat e BE-së do të kishte ndikime të mëdha në ekonominë e Gjermanisë, e cila është shumë e fokusuar në eksporte./   /Ad.Ab./

The post GJERMANI – Merz: SHBA të mos nënvlerësojë BE-në për mosmarrëveshjet tarifore appeared first on Agjencia Telegrafike Shqiptare.

Bashkimi Evropian ka përgatitur një listë tarifash  në vlerë prej 21 miliardë eurosh – për mallrat amerikane, nëse dy palët nuk arrijnë marrëveshje tregtare, tha ministri i Jashtëm i Italisë, Antonio Tajani. Presidenti amerikan, Donald Trump, paralajmëroi të shtunën se do të vendosë tarifa prej 30% për importet nga Meksika dhe Bashkimi Evropian, nisur nga […]

The post BE gati t’i vendosë tarifa SHBA-së, nëse s’ka marrëveshje appeared first on BoldNews.al.

Presidentja e Komisionit Evropian, Ursula von der Leyen, ka reaguar me tone të forta pas vendimit të Presidentit amerikan Donald Trump për vendosjen e një tarife 30% mbi produktet e eksportuara nga Bashkimi Evropian drejt SHBA-së, duke paralajmëruar pasoja serioze për ekonominë globale dhe furnizimet transatlantike. Në një deklaratë zyrtare, von der Leyen theksoi se […]

The post Von der Leyen reagon ashpër pas tarifave të Trump: BE-ja gati për kundërmasa appeared first on BoldNews.al.

UASHNGTON, 12 korrik /ATSH-DPA/ – Presidenti amerikan Donald Trump ka njoftuar se Bashkimi Evropian dhe Meksika do të përballen me një tarifë prej 30% për importet në SHBA që nga 1 gushti.

Ai paralajmëroi se do të vendoste taksa edhe më të larta mbi importet nëse ndonjëri prej partnerëve tregtarë të SHBA-së do të vendoste të hakmerrej.

Trump ka publikuar në rrjetin e tij social Truth në një imazh të letrës së tij që i ka dërguar presidentes së Komisionit Evropian, Ursula von der Leyen, mbi vendimin.

Në letër, Trump u ankua për deficitin tregtar “afatgjatë, të madh dhe të vazhdueshëm” që Shtetet e Bashkuara kanë me BE-në, duke akuzuar bllokun prej 27 vendesh për politika dhe barriera tregtare të padrejta.

Trump shkroi se administrata e tij do të eliminonte normën e lartë të tarifës nëse “Bashkimi Evropian, ose vendet brenda tij, vendosin të ndërtojnë ose prodhojnë në Shtetet e Bashkuara”.

Këtë javë, Trump u dërgoi një mori letrash udhëheqësve të huaj duke i informuar ata për tarifat e reja të larta që ai synon të vendosë për produktet e tyre duke filluar nga 1 gushti. /os/

The post SHBA – Trump: BE dhe Meksika nga 1 gushti tarifa prej 30% për mallrat e tyre drejt SHBA-së appeared first on Agjencia Telegrafike Shqiptare.

Presidenti amerikan, Donald Trump ka bërë të ditur të shtunën se do të vendosë 30 për qind tarifë kundër mallrave të Bashkimit Evropian dhe Meksikës prej 1 gushtit. Trump i ka prezantuar tarifat ndaj dy prej partnerëve më të mëdhenj tregtarë të Shteteve të Bashkuara përmes dy letrave të publikuara në rrjetet sociale. Në letrën […]

The post Trump vendos 30% tarifë kundër mallrave të BE-së dhe Meksikës appeared first on BoldNews.al.

BRUKSEL, 11 korrik /ATSH/- Bashkimi Evropian u përgatit sot për një letër të mundshme nga presidenti i SHBA-së, Donald Trump – ku përshkruhen detyrimet e planifikuara për partnerin e tij më të madh tregtar dhe të investimeve, pas zgjerimit të luftës së tij tarifore në ditët e fundit, sipas “Reuters”.

BE, fillimisht ka shpresuar për arritjen e një marrëveshjeje gjithëpërfshirëse tregtare, duke përfshirë tarifa zero-për-zero për mallrat industriale, por pas disa muajsh bisedimesh të vështira – ndoshta do të duhet të pajtohet me një marrëveshje të përkohshme duke shpresuar se diçka më e mirë mund të negociohet ende.

Blloku me 27 vende është nën presione kontradiktore, ndërsa fuqia gjermane kërkoi një marrëveshje të shpejtë për të mbrojtur industrinë e saj.

Anëtarët e tjerë të BE-së, si Franca thanë se negociatorët e BE-së nuk duhet të dorëzohen dhe të pranojnë një marrëveshje të njëanshme me kushtet e SHBA-së.

Pasi e mbajti pjesën më të madhe të botës në ankth për qëllimet e tij, Trump ka njoftuar tarifa të reja për një numër vendesh, duke përfshirë Japoninë dhe Korenë e Jugut, së bashku me një tarifë prej 50% ndaj bakrit dhe një rritje prej 35% ndaj mallrave kanadeze.

Politika e tij tarifore – që nga kthimi në Shtëpinë e Bardhë – ka filluar të gjenerojë dhjetëra miliarda dollarë të ardhura në muaj për qeverinë amerikane – dhe të dhënat të cilat pritet të publikohen sot në mbrëmje do të tregojnë – se të ardhurat që nga dita e inaugurimit të tij në janar deri në qershor e kanë kaluar 100 miliardë dollarë – fitimi më i madh vjetor i arritur ndonjëherë nga tarifat doganore.

“Ne mbetemi të përgatitur për të nënshkruar një marrëveshje me SHBA-në. Le të shohim se çfarë do të paraqesin miqtë tanë në Uashington pas disa orësh”, tha zëdhënësi i BE-së Olof Gill në një konferencë për shtyp.

Një burim me njohuri për negociatat SHBA-BE tha se një marrëveshje ishte afër, por se ishte e vështirë të parashikohej nëse BE-ja mund të merrte ende një letër që njoftonte më shumë tarifa ose kur mund të finalizohej ndonjë marrëveshje.

Aksionet evropiane shënuan sot një rënie, ndërsa investitorët prisnin informacion mbi tarifat ndaj BE-së.

Normat e larta që Trump njoftoi papritur këtë javë për Brazilin dhe më pas për Kanadanë janë emblematike të qasjes së tij të paparashikueshme për zbatimin e taksave. //a.i/

The post KOMENT – BE në pritje të tarifave të reja të Trump pas disa muajsh bisedimesh të vështira appeared first on Agjencia Telegrafike Shqiptare.

Presidenti i SHBA-së, Donald Trump, ka njoftuar se do të vendosë një tarifë prej 35% mbi mallrat kanadeze duke nisur nga 1 gushti, ndërsa të dy vendet janë në prag të një afati të vetëcaktuar për të arritur një marrëveshje të re tregtare.

Ky paralajmërim u publikua përmes një letre në platformën e tij Truth Social, ku përfshihen gjithashtu kërcënime për tarifa të gjera prej 15% deri në 20% ndaj shumicës së partnerëve tregtarë të SHBA-së.

Kryeministri kanadez, Mark Carney, reagoi përmes një postimi në rrjetin X, duke theksuar se qeveria e tij do të vazhdojë të mbrojë punëtorët dhe bizneset kanadeze, ndërsa synojnë një marrëveshje të re përpara afatit të gushtit.

Aktualisht, Kanadaja është e goditur nga një tarifë ekzistuese 25% për disa produkte, përfshirë ato të çelikut, aluminit dhe industrisë së automobilave tarifa të vendosura nga administrata Trump më herët.

Letra ndaj Kanadasë është vetëm një nga mbi 20 të tilla që Trump ka dërguar këtë javë ndaj partnerëve të tjerë tregtarë si Japonia, Koreja e Jugut dhe Sri Lanka. Në të gjitha këto letra, ai paralajmëron se tarifat e reja do të hyjnë në fuqi më 1 gusht.

Sipas burimeve amerikane, SHBA ka vendosur një tarifë të përgjithshme 25% ndaj të gjitha importeve kanadeze, por aktualisht ekziston një përjashtim për produktet që respektojnë marrëveshjen CUSMA (Marrëveshja Kanada-SHBA-Meksikë). Nuk dihet ende nëse kërcënimi më i fundit për tarifa do të prekë mallrat e mbuluara nga kjo marrëveshje.

Trump ka vendosur gjithashtu tarifa të reja globale: 50% për importet e aluminit dhe çelikut dhe 25% për të gjitha automjetet që nuk prodhohen në SHBA. Ai ka paralajmëruar gjithashtu një tarifë 50% për importet e bakrit, e cila do të hyjë në fuqi muajin tjetër.

Kanadaja, që shet rreth 75% të mallrave të saj në SHBA dhe është një qendër e rëndësishme për prodhimin e makinave dhe metaleve, pritet të goditet rëndë nga këto masa.

Në letrën e tij, Trump shkruan se tarifat 35% janë të ndara nga masat sektoriale dhe se ato nuk do të aplikohen nëse kompanitë kanadeze vendosin të prodhojnë brenda SHBA-së.

Ai lidhi tarifat edhe me atë që e quajti “dështimi i Kanadasë për të ndalur fluksin e fentanilit drejt SHBA-së”, si dhe me tarifat ekzistuese që Kanadaja ka vendosur ndaj fermerëve amerikanë të qumështit dhe deficitit tregtar mes dy vendeve.

“Nëse Kanada bashkëpunon me mua për të ndaluar rrjedhën e fentanilit, ndoshta do të marrim parasysh një rishikim të kësaj letre. Këto tarifa mund të modifikohen, lart ose poshtë, në varësi të marrëdhënieve me vendin tuaj,” shkruan Trump.

Presidenti amerikan ka akuzuar më parë Kanadanë dhe Meksikën për lejimin e kalimit të njerëzve dhe fentanilit drejt SHBA-së. Por sipas të dhënave të Doganës dhe Patrullës Kufitare të SHBA-së, vetëm 0.2% e konfiskimeve të fentanilit ndodhin në kufirin me Kanadanë – pjesa dërrmuese ndodh në kufirin me Meksikën.

Më herët këtë vit, Kanadaja njoftoi shtim të fondeve për sigurinë kufitare dhe emëroi një zyrtar të posaçëm për çështjen e fentanilit, në përgjigje të shqetësimeve të ngritura nga Trump.

Kanadaja dhe SHBA-ja janë përfshirë prej muajsh në bisedime intensive për një marrëveshje të re tregtare dhe të sigurisë. Gjatë Samitit të G7-ës në qershor, Carney dhe Trump u zotuan të arrinin një marrëveshje brenda 30 ditëve, me një afat përfundimtar më 21 korrik.

Trump ka paralajmëruar se në rast të kundërmasave nga Kanadaja, do të rrisë më tej tarifat. Kanadaja ka vendosur tashmë tarifa të kundërta ndaj SHBA-së dhe ka deklaruar se do të ndërmarrë të tjera nëse nuk arrihet një marrëveshje brenda afatit.

Në fund të qershorit, Carney hoqi një taksë ndaj gjigantëve teknologjikë amerikanë, pas presionit të Trump, i cili e cilësoi si “sulm të hapur” ndaj SHBA-së dhe kërcënoi të tërhiqej nga bisedimet. Kryeministri kanadez u shpreh se heqja e taksës ishte “pjesë e një negociate më të gjerë” për tregtinë mes dy vendeve. Zyra e Kryeministrit Carney i tha BBC-së se nuk kishte një koment të menjëhershëm për letrën e Trump.

The post Trump shpall tarifat e reja prej 35% për importet e Kanadasë nga 1 gushti appeared first on Lapsi.al.

UASHINGTON, 11 korrik /ATSH-DPA/ – Presidenti i SHBA-së, Donald Trump tha dje se tarifat prej 35% do të vendosen për importet nga Kanadaja duke filluar nga 1 gushti.

“Duke filluar nga 1 gushti 2025, ne do t’i ngarkojmë Kanadasë një tarifë prej 35% për produktet kanadeze të dërguara në Shtetet e Bashkuara, të ndara nga të gjitha tarifat sektoriale”, tha Trump në një letër drejtuar kryeministrit kanadez Mark Carney të ndarë në platformën e tij Truth Social.

“Nëse për ndonjë arsye vendosni të rrisni tarifat tuaja, atëherë, pavarësisht numrit që zgjidhni t’i rrisni ato, do t’i shtohen 35% që ne ngarkojmë”, vazhdoi Trump.

Në letrën njëfaqëshe, presidenti i SHBA-së akuzoi përsëri Kanadanë se nuk arriti të ndalonte fluksin e fentanilit opioid në Shtetet e Bashkuara, megjithëse të dhënat tregojnë se vetëm një sasi e vogël e drogës sintetike vjen në vend nga fqinji i saj verior.

“Duhet të përmend se rrjedha e fentanilit vështirë se është sfida e vetme që kemi me Kanadanë, e cila ka shumë politika tarifore dhe jotarifore dhe barriera tregtare, të cilat shkaktojnë deficite tregtare të paqëndrueshme kundër Shteteve të Bashkuara”, tha Trump.

SHBA është partneri më i rëndësishëm tregtar i Kanadasë.

Gjatë javës së kaluar, Trump u ka dërguar letra një mori vendesh, përfshirë aleatët kryesorë Japoninë dhe Korenë e Jugut, duke u thënë atyre të presin tarifa më të larta nëse nuk mund të arrihet një marrëveshje e re tregtare.

Trump ka filluar të nxjerrë rregulla të reja tarifore për mallrat që hyjnë në SHBA që nga e hëna, kur ai gjithashtu zgjati një pauzë 90-ditore për të ashtuquajturat tarifa reciproke të njoftuara për herë të parë më 2 prill./  a.jor.

The post SHBA – Trump: Tarifat prej 35% ndaj Kanadasë hyjnë në fuqi më 1 gusht appeared first on Agjencia Telegrafike Shqiptare.

Vendet aziatike po përballen me pasiguri të thellë ekonomike pas një vale të re kërcënimesh tarifore nga Presidenti i SHBA-së, Donald Trump, i cili ka paralajmëruar rritje të ndjeshme të tarifave ndaj një sërë shtetesh eksportuese në rajon.

Në mesin e tyre janë Japonia, Koreja e Jugut, Vietnami, Kamboxhia, Sri Lanka dhe Tajlanda, të gjitha pjesë e një liste prej 23 vendesh që kanë marrë letra nga Trump këtë javë. Presidenti amerikan ka kërcënuar me tarifa deri në 35%, përfshirë një rritje të përgjithshme nga 10% në 20% për shumicën e partnerëve tregtarë, duke vendosur afatin për marrëveshje deri më 1 gusht.

Kryeministri japonez Shigeru Ishiba e ka quajtur këtë qasje “thellësisht për të ardhur keq”, ndërsa negociatat kanë ngecur pavarësisht vizitave të njëpasnjëshme të ministrit të tregtisë në Uashington. Japonia ka kërkuar mbrojtje për prodhuesit e saj të makinave dhe ka refuzuar të hapë plotësisht tregun e brendshëm për orizin amerikan – një pikë ndjeshme në negociata.

Sipas analistëve, përkundër marrëdhënieve të forta ushtarake dhe ekonomike me SHBA-në, Tokio po trajtohet njësoj si çdo partner tjetër tregtar, çka mund të përbëjë një kthesë të rëndësishme në marrëdhëniet dypalëshe.

Fituesit dhe humbësit e përkohshëm

Fitues të përkohshëm janë vendet që kanë fituar shtyrje të afatit, duke u dhënë kohë për të negociuar marrëveshje më të favorshme. Ekonomitë në zhvillim si Tailanda dhe Malajzia po kërkojnë qartësi mbi rregullat, sidomos lidhur me mallrat e transborduara – mallra kineze të ridrejtuara përmes vendeve të treta.

Megjithatë, shumica e vendeve aziatike janë në anën humbëse. Prodhuesit rajonalë, që varen nga eksportet drejt SHBA-së, përballen me kostot në rritje dhe pasiguri që pengon investimet. Sipas ekonomistit Alex Capri, kjo ndikon në zinxhirët e furnizimit global, ku tarifat e reja do të kërkojnë teknologji të sofistikuar për gjurmimin e përbërësve dhe origjinës së mallrave.

Goditje për vende si Vietnami dhe Kamboxhia

Vietnami, megjithëse arriti marrëveshje të hershme, tani përballet me tarifa deri në 40%, ndërsa Kamboxhia, një ekonomi e brishtë e varur nga tekstilet dhe veshjet, është në pozicion të vështirë për të përballuar tarifa prej 35%.

Nga ana tjetër, Koreja e Jugut dhe Japonia, për shkak të ndikimit ekonomik dhe politik, mund të kenë më shumë hapësirë manovrimi, edhe pse jo garanci për shmangien e tarifave.

SHBA-Kinë: Kush përfiton nga kaosi tregtar?

Sipas disa analistëve, Kina mund të përfitojë në mënyrë strategjike, duke u paraqitur si një partner më i qëndrueshëm në rajon përkundër tensioneve që edhe ajo vetë ka me disa fqinjë. Ndërkohë, SHBA mund të humbasë ndikim, pasi vendet e Azisë e shohin Uashingtonin si më të paparashikueshëm.

“Pozicioni negociues i SHBA-së është zbehur,” tha prof. David Jacks, duke shtuar se marrëveshjet e ardhshme tregtare mund të jenë më të dobëta dhe më të ndërlikuara për t’u zbatuar.

Përfundimi: Kaos i zgjatur, me ndikime afatgjata

Presidenti Trump ka zgjedhur të publikojë letrat tarifore në rrjetet sociale, në vend të kanaleve zyrtare diplomatike, gjë që analistët e quajnë teatër politik, por që rrit pasigurinë për partnerët tregtarë.

Afati i 1 gushtit është vetëm hapi i radhës në një proces që pritet të jetë i gjatë dhe i mbushur me tensione. Siç tha një analist: “Të gjithë po e kuptojnë se divorci me SHBA-në nuk është i thjeshtë – dhe mund të zgjasë me vite, në mos dekada.”

The post Tarifat e Trump ‘trondisin’ Azinë/ Kush po përfiton dhe kush po pëson humbje? appeared first on Sot News | Lajme.

Presidenti amerikan Donald Trump ka paralajmëruar vendosjen e një tarife të re prej 35% ndaj të gjitha mallrave kanadeze, duke filluar nga 1 gushti, nëse nuk arrihet një marrëveshje e re tregtare midis dy vendeve brenda afatit të vendosur për 21 korrik.

Ky paralajmërim u bë publik përmes një letre të postuar në Truth Social, pjesë e një fushate më të gjerë që përfshin më shumë se 20 letra drejtuar partnerëve kryesorë tregtarë të SHBA-së, përfshirë Japoninë, Korenë e Jugut dhe Sri Lankën. Për të gjithë këta vende, Trump ka kërcënuar me tarifa të reja që variojnë nga 15% deri në 35%.

Në letrën drejtuar Kanadasë, Trump e kushtëzoi tarifën me disa faktorë politikë dhe ekonomikë, duke përfshirë:

-Dështimin e Kanadasë për të ndaluar rrjedhën e fentanilit në SHBA.

-Taksat kanadeze ndaj fermerëve amerikanë të qumështit.

-Deficiti tregtar në rritje mes dy vendeve.

“Nuk do të ketë tarifa nëse Kanadaja ose kompanitë brenda vendit vendosin të ndërtojnë ose prodhojnë brenda SHBA-së,” shkruan Trump. Ai shtoi se tarifat “mund të modifikohen, lart ose poshtë, varësisht nga marrëdhënia me vendin tuaj”.

Kryeministri kanadez Mark Carney reagoi menjëherë përmes platformës X, duke theksuar se qeveria e tij do të vazhdojë të mbrojë interesat e punëtorëve dhe bizneseve kanadeze, ndërsa mbetet e angazhuar për arritjen e një marrëveshjeje të drejtë me SHBA-në.

The post Tensionet tregtare po rriten sërish/ Trump paralajmëron tarifa 35% për Kanadanë appeared first on Sot News | Lajme.

UASHINGTON, 9 korrik /ATSH-DPA/ – Presidenti amerikan Donald Trump dërgoi sot letra për gjashtë vende të tjera, duke njoftuar vendosjen e tarifave të reja të larta që do të hyjnë në fuqi më 1 gusht.

Trump i publikoi këto letra në platformën e tij “Truth Social”, ku iu drejtohej liderëve në Filipine, Brunei, Moldavi, Algjeri, Irak dhe Libi .

Njoftimi vjen vetëm dy ditë pasi Trump u dërgoi letra edhe 14 vendeve të tjera, përfshirë aleatëve kryesorë si Japonia dhe Koreja e Jugut, duke i paralajmëruar për tarifa më të larta nëse nuk arrihej një marrëveshje e re tregtare.

Algjeria, Libia dhe Iraku do të përballen me tarifa prej 30%, Brunei dhe Moldavia me 25% ndërsa Filipinet me 20%.

Trump nisi prezantimin e rregullave të reja tarifore për mallrat që hyjnë në SHBA – që prej ditës së hënë, kur gjithashtu njoftoi zgjatjen me 90 ditë të “tarifa reciproke” që i shpalli për herë të parë, më 2 prill.

Këto tarifa kanë shkaktuar shqetësim të madh në bordet drejtuese të kompanive dhe në disa vende.

Megjithatë, investitorët duket se e kanë pritur me qetësi lajmin, pasi bursat amerikane kanë vijuar të rriten.

Trump tha dje se do t’i qëndrojë afatit të 1 gushtit, duke shkruar në Truth Social: “Nuk do të ketë zgjatje të afatit”.  /Ad.Ab./ //a.i/

The post SHBA – Trump njofton tarifa të reja tregtare për gjashtë vende të tjera appeared first on Agjencia Telegrafike Shqiptare.

Presidenti amerikan, Donald Trump ka thënë se do të vendosë tarifa prej 25 për qind ndaj Japonisë dhe Koresë së Jugut, duke rritur presionin ndaj dy aleatëve amerikanë dhe dhjetëra ekonomive tjera për të arritur marrëveshje tregtare me Uashingtonin.

Trump u ka nisur letra të ngjashme liderëve të Afrikës së Jugut, Malajzisë, Mianmarit, Laosit dhe Kazakistanit, duke thënë se do t’i godasë me tarifa produktet e tyre, prej 25 deri në 40 për qind.

Presidenti ka thënë në fundjavë se duke nisur nga ditë e hënë ai do të dërgojë një mori letrash nëpër shtete të ndryshme për t’i informuar se do t’i zbatojë masat e ashpra që në prill i pati shtyrë për një periudhë kohore.

Në letrat dërguar liderëve të Japonisë dhe Koresë së Jugut, Trump ka thënë se rritja e tarifave do të ndodhë pasi marrëdhëniet tregtare me Uashingtonin, “fatkeqësisht janë larg reciprokes”.

Në letra është thënë se data e fundit për hyrje në fuqi të tarifave është 1 gushti dhe ka paralajmëruar për përshkallëzim të mëtejmë nëse shtetet e përfshira hakmerren me kundërmasa.

Aktualisht, këto shtete janë goditur me 10 për qind tarifë – masë që Trumpi e zbaton në pothuajse të gjithë partnerët tregtarë.

Megjithatë, presidenti amerikan ka thënë se është i gatshëm t’i ulë tarifat nëse shtetet i ndryshojnë politikat tregtare.

Kryeministri i Japonisë, Shigeru Ishiba, ka thënë të dielën se ai “nuk do të bëjë lehtësisht kompromis” në bisedimet tregtare me Uashingtonin.

Deri më tani, Uashingtoni ka arritur marrëveshje tregtare vetëm me Britaninë dhe Vietnamin, derisa Shtetet e Bashkuara dhe Kina janë pajtuar për t’i ulur përkohësisht tarifat në produktet e njëra-tjetrës, që shkonin në mbi 100 për qind./REL

The post Trump vendos tarifa prej 25 për qind ndaj Koresë së Jugut dhe Japonisë, më 1 gusht hyjnë në fuqi appeared first on Albeu.com.

LONDËR, 7 korrik /ATSH – DPA/ – Kryeministri irlandez Michael Martin mbetet “shpresëplotë” që BE-ja mund të arrijë një marrëveshje me SHBA-në për tarifat, pasi administrata e presidentit amerikan Donald Trump shtyu afatin për rritjen e normave.

Martin tha sot se të dyja palët vazhdojnë të negociojnë detajet e marrëveshjeve të ardhshme.

Deklarata e tij erdhi pasi zëdhënësja e Shtëpisë së Bardhë, Karoline Leavitt, njoftoi se presidenti Trump do të shtynte rritjen e tarifës bazë prej 10% deri më 1 gusht.

“Ne mbetemi shpresëplotë që SHBA dhe Bashkimi Evropian mund të bien dakord për një marrëveshje kuadër këtë javë”, tha Martin duke folur për median pas një telefonate me presidenten e Komisionit Evropian, Ursula von der Leyen.

“Ende ka disa çështje për t’u negociuar, asgjë nuk është refuzuar përfundimisht”, shtoi ai.

“Por, edhe nëse arrihet një marrëveshje kornizë, do të ketë ende shumë negociata më pas”, tha Martin.

“Kështu që, edhe pse do të krijonte një farë qartësie për afatin e shkurtër, do të mbeteshin ende disa çështje të pazgjidhura në lidhje me çështjet tregtare midis Bashkimit Evropian dhe Shteteve të Bashkuara të Amerikës dhe gjithashtu me vende të tjera’, shtoi ai.

Martin mbështeti qëndrimin e Bashkimit Evropian për të nxitur arritjen e një marrëveshjeje për të ofruar siguri për konsumatorët, bizneset dhe industrinë. /Ad.Ab./ /a.i/

The post IRLANDË – Martin: Shpresëplotë për marrëveshjen e tarifave SHBA-BE appeared first on Agjencia Telegrafike Shqiptare.

UASHINGTON, 7 korrik /ATSH-DPA/- Presidenti i SHBA-së Donald Trump do të shtyjë vendosjen e tarifave të larta ndaj partnerëve tregtarë deri më 1 gusht, tha sot zëdhënësja e Shtëpisë së Bardhë Karoline Leavitt, vetëm dy ditë perpara se detyrimet shtesë të hynin në fuqi.

Leavitt tha se Trump do të nënshkruante një dekret për të zgjatur pezullimin e tarifave të planifikuara, pasi u dorëzoi disa vendeve letrat me detaje rreth planit të tij.

Ky veprim synon të mbajë jashtë diskutimit tarifat e planifikuara ndaj importeve ndërsa negociatat vazhdojnë, megjithëse shumë detaje mbeten të pazgjidhura, duke përfshirë mënyrën se si do të strukturohen marrëdhëniet e ardhshme tregtare midis SHBA-së dhe Bashkimit Evropian.

Afati i fundit i pezullimit të tarifave për BE-në ishte vendosur gjithashtu të përfundonte të mërkurën.

BE ka qenë e angazhuar në bisedime të vazhdueshme me SHBA-në për të shmangur kërcënimin e rritjes së importeve.

Se çfarë do të thotë konkretisht afati i ri për BE-në ende nuk është sqaruar.

Letrat e para me tarifa të reja janë publikuar

Letrat e para – me rregulloret e reja tarifore – iu dorëzuan Japonisë, Koresë së Jugut, Afrikës së Jugut dhe Malajzisë.

Zëdhënësja e Shtëpisë së Bardhë tha se tarifat e reja të listuara në letra do të hynin në fuqi më 1 gusht, ose do të bëhej një marrëveshje.

Leavitt tha se 12 letra pritej të dërgoheshin sot dhe se do të kishte letra shtesë … në ditët në vijim.

Negociatat me këto vende pritet të vazhdojnë deri në afatin e fundit.

BE-ja ka shpresuar në arritjen e një marrëveshjeje bazë për të zgjidhur mosmarrëveshjen tarifore.

“Presidentja e BE-së Ursula von der Leyen zhvilloi dje një bisedë telefonike me presidentin Trump për të diskutuar gjendjen aktuale të negociatave”, konfirmoi një zëdhënës në Bruksel.

A janë në proces marrëveshje të tjera tregtare?

Në prill, Trump prezantoi një tarifë bazë prej 10% për pothuajse të gjitha importet nga Bashkimi Evropian.

Përveç kësaj, tarifa të veçanta zbatohen për produkte të caktuara, të tilla si çeliku, alumini dhe importet e automjeteve.

Me politikën e tij tarifore, Trump synon të sigurojë rritjen e prodhimit në SHBA.

Sekretari Amerikan i Thesarit, Scott Bessent tha se pritet finalizimi i shumë marrëveshjeve si rezultat i letrave.

Një nga qëllimet fillestare të paketës tarifore të Trump ishte të detyronte vendet e tjera të ulnin barrierat tregtare për importet nga Shtetet e Bashkuara të Amerikës. //a.i/

The post SHBA – Trump zgjat afatin për negociatat mbi tarifat amerikane deri më 1 gusht appeared first on Agjencia Telegrafike Shqiptare.

UASHINGTON, 7 korrik /ATSH/ – Presidenti Donald Trump tha sot se SHBA-ja do të vendosë një tarifë prej 25% ndaj importeve nga Japonia dhe Koreja e Jugut – duke filluar nga 1 gushti, ndërsa prezantoi dy letrat e para nga ato që ai ka thënë se do të jenë një valë letrash drejtuar partnerëve tregtarë, ku shpjegohen taksat e reja me të cilat ata do të përballen, sipas AP.

“Mallrat e importuara në SHBA nga Japonia, Koreja e Jugut, Malajzia dhe Kazakistani tani do të përballen me tarifa prej 25%, sipas letrave që Trump postoi në Truth Social.

Norma për Korenë e Jugut është e njëjtë me atë që Trump njoftoi fillimisht më 2 prill, ndërsa norma për Japoninë është 1 pikë më e lartë se ajo e njoftuar fillimisht.

Deri më tani janë arritur vetëm dy marrëveshje, me Britaninë e Madhe dhe Vietnamin.

Masat e tij kanë tronditur vazhdimisht tregjet financiare dhe i kanë bërë politikëbërësit të përpiqen të mbrojnë ekonomitë e tyre.

Sekretari amerikan i Thesarit, Scott Bessent tha sot se do të bënte disa njoftime për tregtinë gjatë 48 orëve të ardhshme, duke shtuar se posta e tij elektronike ishte mbushur me oferta nga vendet që përpiqen të arrijnë një marrëveshje për tarifat para afatit të 9 korrikut.

Nuk u bë e qartë nëse letra të tjera drejtuar liderëve – do të bëheshin publike përpara afatit të së mërkurës.

Trump e ka lënë pjesën më të madhe të botës në pritje – lidhur me rezultatin e bisedimeve disamujore me vendet që shpresojnë të shmangin rritjen e konsiderueshme të tarifave që ai ka paralajmëruar.

“Kemi pasur shumë njerëz që kanë ndryshuar qasje në lidhje me negociatat. Duke nisur që mbrëmë posta ime elektronike ishte me plot oferta të reja, shumë propozime të reja”, tha Bessent në një intervistë për “CNBC”.

“Prandaj, do të jenë disa ditë të ngarkuara”. shtoi ai  /Ad.Ab./ /a.i/

The post SHBA – Trump njofton rritje të tarifave prej 25% ndaj importeve nga Japonia dhe Koreja e Jugut appeared first on Agjencia Telegrafike Shqiptare.

Presidenti amerikan Donald Trump po rrit presionin ndaj vendeve partnere për të përshpejtuar arritjen e marrëveshjeve tregtare, ndërsa afati i pezullimit të tarifave të reja po i afrohet fundit.

Sipas këshilltarëve të Shtëpisë së Bardhë, Trump mund të bëjë koncesione të reja, por gjithçka mbetet në dorën e tij. Afati 90-ditor për pezullimin e tarifave skadon më 9 korrik, ndërsa aplikimi i tyre do të nisë më 1 gusht.

“Shtetet e Bashkuara janë gjithmonë të hapura për dialog. Por kur afatet skadojnë, presidenti vendos nëse do të ketë zgjatje apo jo”, deklaroi Kevin Hassett, drejtor i Këshillit Kombëtar Ekonomik.

Në të njëjtën linjë u shpreh edhe Stephen Miran, kreu i grupit të këshilltarëve ekonomikë, i cili konfirmoi se koncesione të tjera janë të mundshme, por nën presion.

Shtëpia e Bardhë pritet të dërgojë letra zyrtare vendeve të interesuara, duke i njoftuar për aplikimin e tarifave. Kjo lëvizje ka shtuar pasigurinë për bizneset dhe partnerët tregtarë të SHBA-së, të cilët nuk e dinë ende nëse do të përfshihen në këtë valë të re tarifash.

Tarifat e shpallura më 2 prill kishin ngritur shqetësime për ndikimin negativ në ekonominë globale, duke shkaktuar rënie të tregjeve financiare. Si pasojë, Uashingtoni pezulloi zbatimin për 90 ditë. Deri më tani, marrëveshje të plota janë arritur vetëm me Mbretërinë e Bashkuar dhe Vietnamin.

“Kush bashkohet me BRICS, përballet me 10% tarifë shtesë” – Trump paralajmëron vendet anti-amerikane

Në një tjetër deklaratë të ashpër, presidenti Trump paralajmëroi se çdo vend që bashkohet me politikat anti-amerikane të grupimit BRICS do të përballet me një tarifë shtesë prej 10 për qind.

“Çdo vend që rreshtohet me politikat anti-amerikane të BRICS do të përballet me një tarifë shtesë 10%. Nuk do të ketë përjashtime,” shkroi Trump në rrjetet sociale.

BRICS, grupim ku bëjnë pjesë Kina, India, Rusia, Brazili dhe Afrika e Jugut, është shpesh në fokus të kritikave të Trumpit. Presidenti amerikan e ka konsideruar këtë grup si një sfidë të drejtpërdrejtë për interesat ekonomike të SHBA-së.

Nga ana tjetër, Rusia ka reaguar ndaj deklaratës së presidentit amerikan, duke theksuar se BRICS “nuk është i orientuar kundër asnjë vendi” dhe promovon një rend botëror shumëpalësh dhe të drejtë.

LEXONI GJITHASHTU:

• BRICS kritika për tarifat dhe tensionet në Lindjen e Mesme por jo SHBA-në apo Rusinë
• Trump: Jemi afër një marrëveshjeje për Rripin e Gazës, mund të arrihet brenda javës

The post Trump rrit presionin, paralajmëron tarifa për vendet që nuk pranojnë marrëveshje appeared first on Euronews Albania.

Presidenti i SHBA-së, Donald Trump njoftoi se nga e hëna (7 korrik) do të nisin dërgimet e letrave zyrtare për vendosjen e tarifave të reja tregtare ndaj partnerëve ndërkombëtarë të SHBA-së. Ai tha se do të jenë 12 deri në 15 letra, ndërsa disa marrëveshje janë finalizuar tashmë.

Edhe pse më herët ishte parashikuar që tarifat të hynin në fuqi më 9 korrik, Trump nuk dha një datë të saktë, duke thënë vetëm se “shumica do të jenë të përfunduara” deri atëherë. Sekretari i Tregtisë, Howard Lutnick, deklaroi se tarifat do të hyjnë në fuqi më 1 gusht.

Trump kishte paralajmëruar më parë tarifa bazë prej 10%, me mundësi rritjeje deri në 50%. Në platformën e tij Truth Social, ai konfirmoi se letrat do të nisin të dërgohen nga ora 12:00 ET dhe paralajmëroi një tarifë shtesë prej 10% për vendet që mbështesin politikat “anti-amerikane” të bllokut BRICS.

Lajmi ka shkaktuar lëkundje në tregjet aziatike, me indekset kryesore që shënuan rënie të lehtë për shkak të paqartësive mbi afatet dhe përmbajtjen e tarifave.

The post Tarifat në fuqi/ Trump nis nga sot njoftimet zyrtare për partnerët tregtarë appeared first on Sot News | Lajme.