Dashi
Të lindur më: 21 Mars – 19 Prill
Në dashuri, mund të ndjeni një nevojë për t’u afruar më shumë me partnerin, por kini kujdes nga keqkuptimet e vogla. Në punë, një projekt që ka kërkuar vëmendjen tuaj mund të marrë një kthesë pozitive falë këmbënguljes suaj. Shëndeti është i qëndrueshëm, por shmangni stresin e panevojshëm gjatë ditës. Financat janë të qëndrueshme, por është mirë të shmangni shpenzimet impulsive sot.

Demi
Të lindur më: 20 Prill – 20 Maj
Marrëdhëniet romantike mund të sjellin surpriza të këndshme, veçanërisht nëse jeni të hapur për biseda të sinqerta. Në ambientin e punës, bashkëpunimi me kolegët do të jetë çelësi i suksesit dhe do të ndiheni të vlerësuar. Kujdesuni për dietën dhe mos neglizhoni aktivitetin fizik, pasi energjia juaj mund të bjerë pasdite. Në aspektin financiar, bëni një analizë të shpenzimeve për të shmangur pakujdesitë.

Binjakët
Të lindur më: 21 Maj – 20 Qershor
Sot, jeta juaj sentimentale mund të përmirësohet nëse i kushtoni më shumë vëmendje ndjenjave të partnerit. Në punë, jeni të motivuar dhe keni mundësi të shfaqni aftësitë tuaja, por duhet të ruani qetësinë në situata të vështira. Shëndeti kërkon pushim të mjaftueshëm, kështu që mos e teproni me angazhimet. Financat janë të stabilizuara, por mos u tërhiqni nga investime të pasigurta.

Gaforrja
Të lindur më: 21 Qershor – 22 Korrik
Një bisedë e rëndësishme me një person të dashur mund të sjellë qartësi dhe afrim në marrëdhënie. Në vendin e punës, do të keni mundësi të merrni një përgjegjësi të re që do t’ju ndihmojë të dalloheni. Kujdesuni për shëndetin mendor, pasi tensionet mund të ndikojnë në gjumin tuaj. Financiarisht, është dita e duhur për të planifikuar buxhetin e ardhshëm.

Luani
Të lindur më: 23 Korrik – 22 Gusht
Në dashuri, mund të ndiheni të papërmbajtur dhe dëshironi të bëni hapa të mëdhenj, por është mirë të mendoni dy herë para se të veproni. Projektet profesionale kërkojnë më shumë vëmendje dhe përkushtim, sidomos në komunikim me eprorët. Shëndeti është i mirë, por mos neglizhoni shëndetin emocional. Në financa, shmangni shpenzimet e panevojshme dhe fokusohuni në kursime.

Virgjëresha
Të lindur më: 23 Gusht – 22 Shtator
Marrëdhëniet personale janë të harmonizuara sot, sidomos nëse jeni të hapur ndaj ndjenjave të reja. Në punë, një koleg mund t’ju ofrojë ndihmë të vlefshme në një çështje të ndërlikuar. Shëndeti është stabil, por është e këshillueshme të bëni më shumë aktivitet fizik. Financat paraqiten më të sigurta nëse qëndroni larg riskut.

Peshorja
Të lindur më: 23 Shtator – 22 Tetor
Sot, një bisedë e thellë me partnerin mund të zgjidhë një paqartësi që ju ka shqetësuar prej kohësh. Në aspektin profesional, idetë tuaja do të vlerësohen, por duhet të tregoni kujdes në menaxhimin e kohës. Kujdesuni për shëndetin, pasi mund të keni nevojë për më shumë pushim. Financat janë të mira, por mos u joshni nga ofertat e shpejta.

Akrepi
Të lindur më: 23 Tetor – 21 Nëntor
Dita sjell harmoni në marrëdhëniet tuaja, dhe është momenti i duhur për të ndarë ndjenjat tuaja më të thella. Në punë, mund të merrni një lajm të mirë në lidhje me një projekt të vjetër. Shëndeti është i qëndrueshëm, por ushqehuni më shëndetshëm për të ruajtur energjinë. Në financiarë, një shpenzim i papritur mund të ndikojë në buxhet, ndaj kini kujdes.

Shigjetari
Të lindur më: 22 Nëntor – 21 Dhjetor
Në dashuri, mund të ndjeni nevojën për më shumë hapësirë personale, ndaj komunikoni qartë dëshirat tuaja. Në punë, mos u nxitoni me vendime të rëndësishme, pasi sot është më mirë të reflektosh sesa të veprosh. Shëndeti kërkon pak pushim dhe relaks, veçanërisht në orët e vona. Financat janë të balancuara, por kini kujdes me huazimet.

Bricjapi
Të lindur më: 22 Dhjetor – 19 Janar
Sot mund të përjetoni emocione të forta në jetën sentimentale, prandaj tregoni durim dhe mirëkuptim ndaj partnerit. Në ambientin e punës, do të keni mundësi të shfaqni kreativitetin dhe të fitoni vlerësim nga të tjerët. Shëndeti është i mirë, por mos harroni të ushtroni apo të ecni në natyrë. Në aspektin financiar, është një ditë e mirë për të bërë plane afatgjata.

Ujori
Të lindur më: 20 Janar – 18 Shkurt
Një takim i papritur mund të ndezë flakën e pasionit në jetën tuaj dashurore, ndaj jini të hapur për të reja. Në punë, do të ndiheni të motivuar për të përfunduar detyrat që i keni lënë pezull. Kujdesuni për shëndetin, sidomos për sistemin tretës. Financiarisht, shmangni shpenzimet e kota dhe mendoni për kursime.

Peshqit
Të lindur më: 19 Shkurt – 20 Mars
Në marrëdhëniet personale, mund të ndiheni të mbështetur dhe të vlerësuar nga të afërmit. Në aspektin profesional, përkushtimi juaj do të shpërblehet me një lajm të mirë ose një vlerësim të veçantë. Shëndeti është i qëndrueshëm, por mos harroni të merrni pushime të shkurtra gjatë ditës. Financat janë të balancuara, por është mirë të shmangni investimet e rrezikshme.

The post Horoskopi 16 Korrik, ja çfarë kanë parashikuar yjet për ju appeared first on Albeu.com.

Policia e Cërrikut ka arrestuar 55-vjeçarin Kastriot Omeri, pasi ndaj tij është bërë denoncim për dhunë në familje.

U raportua se Omeri dyshohet se ka ushtruar dhunë fizike dhe psikologjike ndaj ish-bashkëshortes së tij, shtetases Anita Toska, 51 vjeçe.

Ngjarja ka ndodhur pasditen e sotme në oborrin e banesës ku viktima jeton në lagjen numër 2 të qytetit.

Dhuna dyshohet të jetë ushtruar për motive të dobëta, ndërsa menjëherë pas denoncimit është lëshuar edhe një urdhër mbrojtjeje në favor të gruas.

Policia ka marrë masat e menjëhershme për ndalimin e autorit dhe po vijon hetimet për zbardhjen e plotë të ngjarjes.

Autoritetet policore nxisin qytetarët të denoncojnë çdo formë dhune, duke garantuar se rastet do të trajtohen me seriozitetin dhe urgjencën që kërkojnë.

The post EMRI/ Dh*noi ish-bashkëshorten, arrestohet 55-vjeçari appeared first on Albeu.com.

Sulmet izraelite gjatë 24 orëve të fundit kanë vrarë më shumë se 90 palestinezë në të gjithë Rripin e Gazës, përfshirë dhjetëra gra dhe fëmijë, thanë zyrtarët shëndetësorë.

Një nga sulmet në kampin e refugjatëve Shati në veri vrau një anëtar 68-vjeçar të Hamasit që ishte pjesë e legjislaturës palestineze, si dhe një burrë e grua dhe gjashtë fëmijët e tyre që po strehoheshin në të njëjtën ndërtesë, sipas zyrtarëve nga Spitali Shifa, ku u dërguan viktimat.

Një nga sulmet më vdekjeprurëse goditi një shtëpi në lagjen Tel al-Hava të qytetit të Gazës të hënën në mbrëmje, duke vrarë 19 anëtarë të një familjeje që jetonin atje, sipas Spitalit Shifa. Viktimat përfshijnë tetë gra dhe gjashtë fëmijë.

Një tjetër sulm goditi një tendë ku strehoheshin të zhvendosur në të njëjtën lagje, duke vrarë një burrë e grua dhe dy fëmijët e tyre. Ushtria izraelite nuk i ka komentuar deri tani këto sulme.

Ndërkohë, Ministria e Shëndetësisë në Gazë raportoi të martën pasdite se trupat e 93 personave të vrarë nga sulmet izraelite janë sjellë në spitalet e Gazës gjatë 24 orëve të fundit, së bashku me 278 të plagosur.

Politikani i Hamasit i vrarë në një nga sulmet e së martës në mëngjes, Mohammed Faraj al-Ghoul, ishte anëtar i bllokut përfaqësues të Hamasit që fitoi vende në Këshillin Legjislativ Palestinez në zgjedhjet e fundit të mbajtura mes palestinezëve në vitin 2006.

Hamasi fitoi shumicën në ato zgjedhje, por marrëdhëniet me fraksionin kryesor Fatah, i cili kishte udhëhequr prej kohësh Autoritetin Palestinez, u përkeqësuan dhe përfunduan me marrjen e kontrollit të Gazës nga Hamasi në vitin 2007. Këshilli legjislativ nuk është mbledhur zyrtarisht më prej atëherë.

Ushtria izraelite thotë se i shënjestron vetëm militantët dhe përpiqet ta shmangë dëmtimin e civilëve. Ajo fajëson Hamasin për vdekjet e civilëve pasi militantët veprojnë në zona me popullsi të dendur.

The post Sulmet në Rripin e Gazës vranë 90 palestinezë gjatë 24 orëve të fundit, mes viktimave një anëtar i Hamasit appeared first on Albeu.com.

Afera e inceneratorëve duket se nuk mbaron asnjëherë. Ashtu sikurse kostot financiare që ajo prodhon për qytetarët shqiptarë.

Qeveria shqiptare pagoi mbi 3.3 miliardë lekë me tvsh ose 33 milionë euro me kursin aktual për të ndërtuar inceneratorin e Elbasanit.

Pas ndërtimit me Partneritet Publik Privat nga kompania Albtek Energy dhe shlyerjes së plotë të pagesave nga buxheti i shtetit, vepra kaloi në pronësinë e bashkive të qarkut Elbasan, të cilat krijuan ndërmarrjen Eco-Elb për menaxhimin e inceneratorit dhe landfillit.

Por në vend të një aseti, që do të zgjidhte problemin e mbetjeve në Elbasan, qytetarët shqiptarë kanë paguar 33 milionë euro një gropë të madhe financiare.

Të dhënat e siguruara nga Kapitali tregojnë se inceneratori i Elbasanit ka filluar të prodhojë humbje në seri, teksa borxhet e kompanisë po bëhen mal, ashtu si plehrat, të cilat herë pas herë përfundojnë në flakë.

Dhe me sa duket për shkak të humbjeve të vazhdueshme, kompania Eco-Elb po shkon në pamundësi financiare.

Një javë më parë ndërmarrja Eco-Elb së bashku me inceneratorin si aset të saj u sekuestrua nga një kompani private për shkak të borxheve të pashlyera. Kapitali nuk arriti të saktësojë dot se për sa detyrime bëhet fjalë në total, por faturat e pashlyera i përkasin minimalisht vitit të kaluar.

Pas njoftimeve të vazhdueshme për shlyerjen e tyre vullnetare, kompania private 2 AT e Alketa Torit dhe Nuçi Shamijas ka marrë udhër përmbarim me vendim gjykate duke vendosur në sekuestro kuotat e shoqërisë Eco-Elb dhe bashkë me të edhe inceneratorin.

Dy muaj më parë, Bashkia e Elbasanit vendosi të rrisë çmimin për depozitimin e mbetjeve urbane në landfill, nga 2500 lekë në 2600 lekë për ton, pa TVSH. Praktikisht inceneratori i Elbasanit tashmë tarifon thuajse njësoj se ai i Tiranës. Por jo vetëm kaq.

çmimi 2600 lekë ose 26 euro për tonë është vetëm për depozitimin në landfill, pra me incenerator fikur. Nëse inceneratori i Elbasanit ndizet, atëherë tarifa e depozitimit shkon automatikisht në 5 mijë lekë ose 50 euro për ton.

Në relacionin e rritjes së tarifave thuhet se çmimi u rrit në bazë të analizës së kostos për landfillimin.

Aktualisht, mbetjet thjesht depozitohen në landfill, ndërsa inceneratori, që do t’i digjte mbetjet për të krijuar energji, nuk dihet se kur do të vihet në punë.

Tarifa e re nuk paguhet drejtpërdrejt nga qytetarët, megjitheate rritja mund të ndikojë tek ata, pasi bashkitë mund të rrisin tarifën për pastrimin dhe sherbimet.

Ndërkohë që landfilli eshte i tejmbushur me mbetje urbane, nuk ka një datë të qartë se kur do të vihet në punë inceneratori i Elbasanit, një projekt i shumëpërfolur dhe me kosto të lartë.

Por pavarësisht tarifave të larta që paguhen nga Bashkitë dhe qytetarët e qarkut të Elbasanit, inceneratori vazhdon të prodhojë humbje. Dhe me sa duket do ta bëjë këtë gjithë kohën, pasi koha po tregon se djegësit janë një aset toksik, të cilët jo vetëm nuk e zgjidhën problemin e mbetjeve, por tashmë po djegin paratë publike me humbjet e tyre./ Kapitali.al

The post Humbje dhe borxhe të papaguara/ Kompania private sekuestron Inceneratorin e Elbasanit appeared first on Albeu.com.

Kryebashkiaku i Lezhës, Pjerin Ndreu ka treguar sot këndvështrimin e tij për valën e shembjeve të ndërtimeve pa leje në vend. I ftuar në “Frontline”, Ndreu shprehu dakordësinë e tij për aksionin e lirimit të hapësirave publike, duke thënë se subjekti i parë që u prek ishte vëllai i tij, që zotëronte një lokal në bulevardin “Zogu i Parë” në Tiranë. Shembja e ndërtimeve pa leje në fshatin turistik të Thethit, për Ndreun është një vendim i përligjur e qeverisë, por mendon se koha që duhej të zhvillohej do të ishte më e duhur ajo pas sezonit turistik.

“Gjithmonë ka pasur ndërhyrje të tilla. Qeveria nuk është ajo që kujdeset për hapësirat publike, e ka pushteti lokal, bashkitë e kanë detyrë. U përmend Lezha dhe unë mendoj se edhe Lezha ka probleme. Lokali i parë që është rrëzuar te bulevardi Zogu i Parë është lokali i vëllait tim, këtu në Tiranë. Ka pas disa vite që paguante taksa, por në fund të fundit ka një filozofi, një mënyrë si trajtohen hapësirat publike. Ka një klauzolë për leje provizore që duhet të rinovohen një herë në vit. Shumica e atyre nuk kanë ardhur për t’i rinovuar. Bashkia nuk mund të lërë leje të përhershme në hapësirë publike. Leje të lehta me rinovim.

Kam konflikt interesi se Thethi është dashuria ime e pikave malore në Europë. Thethi për mua është diçka që e adhuroj. Jam frekuentues familjarisht i Thethit prej vitesh dhe banorët e Thethit janë më të mirët që kam parë. Nuk janë banorët e Thethit shumica e atyre që kanë hyrë tani në Theth. Janë shumë të tjerë që nuk kanë lidhje me shtëpitë e vjetra të Thethit. Kam frikë se kanë përfituar njerëz në paligjshmëri.

Kryeministri u ka thënë që do t’u japë tapitë tokat, të gjitha atyre që kanë paur bujtina, kanë pas një shtëpi. Kisha një vit e sa pa hyrë në Theth, ishte komplet tjetër gjë. Kam ngelur i befasuar nga një bum shumë i madh ndërtimi. Unë mendoj që institucionet që e kanë pasur për detyrë atë punën e kanë pasur përgjegjësinë. Nëse unë shkoj ndërtoj aty dhe nuk më thotë njeri gjë, unë mund të ndërtoj”, tha Ndreu.

The post “Në Tiranë, lokali i parë që u çmontua ishte i vëllait tim!” Hapësirat publike, Kryebashkiaku i Lezhës: Aksioni në Theth mund të kryhej pas sezonit turistik appeared first on Albeu.com.

Qeveria në detyrë e Kosovës tha të martën se ndihet e “shqetësuar” dhe se e kundërshton aktgjykimin e Gjykatës Supreme për shfuqizimin e një udhëzimi të saj administrativ, si dhe vendimin se një ministër në detyrë nuk mund të nxjerrë akte nënligjore dhe udhëzime administrative pasi të jetë bërë deputet i Kuvendit.

Supremja e shpalli të paligjshëm dhe e shfuqizoi një udhëzim administrativ të nxjerrë nga ministri në detyrë i Financave, Hekuran Murati, duke thënë se ushtrimi i funksioneve të deputetit dhe të ministrit në të njëjtën kohë është i ndaluar.

Në një reagim për media, Qeveri në detyrë e cilësoi si “të pabazuar në ligj” dhe “arbitrar” vendimin e Supremes për shfuqizimin e udhëzimit administrativ për shfrytëzimin e pajisjeve elektronike fiskale, sistemeve fiskale dhe softuerëve elektronike fiskalë.

“Konkretisht, neni 31 i Ligjit për Qeverinë nuk përmban asnjë ndalesë lidhur me nxjerrjen e akteve nënligjore nga një qeveri në detyrë apo ministrat në detyrë. Ky nen kufizon veprimtarinë e qeverisë në detyrë vetëm në çështje madhore, si: marrëveshje ndërkombëtare që kërkojnë ratifikim në Kuvend, amendamente kushtetuese, projektligje të reja, strategji dhe koncept-dokumente – por jo në nxjerrjen e akteve zbatuese, siç është Udhëzimi Administrativ në fjalë”, tha Qeveria në detyrë.

Udhëzmi administrativ ishte publikuar në gazetën zyrtare më 16 prill, një ditë pasi ishte miratuar nga ministri në detyrë, i cili është gjithashtu i betuar si deputet i legjislaturës së re pas zgjedhjeve të shkurtit.

Por, sipas Qeverisë së udhëhequr nga kryeminsitri në detyrë Albin Kurti, procedura për hartimin e këtij udhëzimi “kishte nisur më 20 nëntor 2024, në kohën kur Qeveria gëzonte mandat të plotë kushtetues dhe ligjor, gjë që i jep këtij akti nënligjor legjitimitet të plotë proceduror dhe substancial”.

“Vendimi i Gjykatës Supreme është i brishtë edhe në aspektin logjik dhe kushtetues, për faktin se vetë ai e njeh ekzistencën dhe funksionimin e Qeverisë në detyrë, por njëkohësisht e mohon të drejtën e saj për të ushtruar një kompetencë që nuk është e ndaluar me ligj”, tha ajo.

Në lidhje me vendimin e Supremes se një ministër në detyrë nuk mund të nxjerrë akte nënligjore dhe udhëzime administrative pasi të jetë bërë deputet i Kuvendit, Qeveria në detyrë tha se Gjykata Kushtetuese e Kosovës “lejon një gjë të tillë”, pasi Kuvendi i Kosovës nuk është konstituuar ende pas zgjedhjeve të 9 shkurtit.

Por, Eugen Cakolli nga Instituti Demokratik i Kosovës, tha në një reagim në Facebook se Gjykata Supreme e “qartësoi përfundimisht” se ministrat, tashmë me mandat si deputetë, nuk mund të vazhdojnë të ushtrojnë funksione ekzekutive pas certifikimit të rezultateve nga Komisioni Qendror i Zgjedhjeve.

“Çdo vendim i marrë prej tyre pas 27 marsit është nul dhe bie ndesh me Kushtetutën, si dhe parimin e ndarjes së pushteteve. Po ashtu, Gjykata konfirmoi se anëtarët e Qeverisë nuk mund të marrin vendime, sepse teknikisht Qeveria aktuale nuk ka më mandat për t’i miratuar ato”, tha ai.

Ligji për Qeverinë saktëson se një qeveri në detyrë nuk mund të tejkalojë autorizimet e saj të kufizuara dhe ndalon qartë ndërmarrjen e vendimeve madhore.

Qeveria në detyrë tha se ndaj këtij vendimi do t’i shfrytëzojë “mjetet juridike në dispozicion për të kthyer ligjshmërinë dhe standardet demokratike”.

Ndaj vendimeve të Supremes mund të bëhet ankesë vetëm për shkelje të mundshme kushtetuese në Gjykatën më të lartë të vendit, Gjykatën Kushtetuese./REL/

The post Qeveria e Kosovës kundërshton vendimin e Gjykatës Supreme si “arbitrar dhe të njëanshëm” appeared first on Albeu.com.

Donald Trump në një deklaratë nga Shtëpia e Bardhë ka deklaruar i prerë se në luftën Rusi-Ukrainë nuk mban anën e askujt.

Kjo deklaratë erdhi pas një telefonate të bërë me Zelenskyn, ku ky i fundit i kërkuar Uashingtonit raketa Tomahawk me rreze të gjatë veprimi, por administrata Trump ende nuk ka marrë ndonjë vendim për shkak të shqetësimeve në lidhje me përdorimin e tyre të pamatur.

“Administrata amerikane nuk ka ndërmend të furnizojë Ukrainën me raketa me rreze të gjatë veprimi’’, deklaroi më tej Presidenti Donald Trump.

FT vuri në dukje gjithashtu se administrata e mëparshme e Biden kishte ngritur shqetësime të ngjashme në lidhje me përdorimin e raketave lundruese kundër objektivave në tokën ruse, duke rrezikuar potencialisht një zgjerim të konfliktit.

The post Pas bisedës telefonike me Zelenskyn, Trump i prerë: Nuk do mbaj anën e askujt! Refuzon ta ndihmojë me raketa appeared first on Albeu.com.

Sara Hoxha dhe Erik Fullani janë përsëri në qendër të vëmendjes pas fotove të reja që i kapin së bashku, duke vërtetuar dyshimet për një marrëdhënie mes tyre.

Dyshja, e cila ka qenë temë diskutimi gjatë kësaj vere, duket se nuk po përpiqet më ta fshehë lidhjen e tyre, pasi janë fotografuar në momente shumë të afërta gjatë pushimeve në jug të Shqipërisë.

Pamjet e publikuara nga “Revista Class” tregojnë Sarën dhe Erikun pranë detit, duke shijuar rërën e bardhë dhe ujin kristaltë, në një atmosferë që nuk lë vend për dyshime mbi natyrën e raportit të tyre.

Këto imazhe konfirmojnë spekulimet dhe thashethemet që kanë qarkulluar për javë me radhë, se Sara dhe Erik mund të jenë në një lidhje romantike, edhe pse asnjëri prej tyre nuk ka bërë ende ndonjë deklaratë publike për të sqaruar situatën.

Përveç pushimeve, dyshja janë parë shpesh në dalje të përbashkëta në Tiranë dhe në evente të ndryshme, duke treguar një afërsi të dukshme mes tyre.

Ky pushim romantik duket si një konfirmim indirekt i marrëdhënies që ka nisur mes tyre, dhe gjithashtu po i shton kuriozitetin dhe interesin e publikut për historinë e tyre.

Ndërkohë që ata preferojnë të ruajnë privatësinë, imazhet dhe momentet e kapura nga kamerat nuk kanë lënë dyshime për intensitetin e lidhjes së tyre në këtë fazë.

The post FOTO/ Pas deklaratës së Ledrit, Sara Hoxha dhe Erik Fullani nuk fshihen më, dalin krah për krah në plazh appeared first on Albeu.com.

Pas skandalit të raportuar në burgun e sigurisë së Lartë në Drenovë ku modelja kosovare Ziza Pajaziti, ka zhvilluar takime speciale me të burgosurin, Laert Haxhiu, të tjera ngjarje të tilla janë publikuar në media, kësaj radhe në shënjestër është vendosur burgu i Reçit në Shkodër.

Bëhet fjalë për dy vajza të pretenduara se vijnë nga shoëbizi shqiptar të identifikuara me inicialet A. D., dhe R. R., të cilat kanë kryer takime speciale me të burgosur të këtij institucioni në javë të ndryshme.

Nuk dihet saktësisht se cilët prej të burgosurve janë takuar me vajzat në fjalë, por burime për media tregojnë se takimet janë zhvilluar me anëtarë të fisit Bajri të Shkodrës.

Takimet speciale janë regjistruar rreth dy muaj më parë. Emrat e tyre rezultojnë të regjistruara në regjistrat e hyrjeve dhe daljeve të këtij burgu si dhe gjithashtu prezenca e tyre është filmuar dhe nga kamerat e sigurisë së këtij institucioni.

Në dijeni të këtyre takimeve mendohet të ketë qenë dhe shefi i policisë së burgut të Reçit, Dylber Beqiri si dhe drejtori i burgut, Leonard Mardoda. Burime për media kanë bërë me dije se Drejtoria e Burgjeve ka lëshuar masat e pezullimit nga detyra të Beqirit dhe Mardodës.

The post Thellohet skandali/ Pas Ziza Pajazitit me Laert Haxhiun, vajza të showbizit takime “speciale” në Burgun e Reçit me grupin Bajri appeared first on Albeu.com.

Pas dëshmisë së dhënë nga familjarët e 23-vjeçarit dhe sekuestrimit të kamerave të sigurisë të bizneseve përgjatë aksit kombëtar Burrel-Tiranë, grupi hetimor bëri të mundur edhe identifikimin e autorëve të dyshuar për krimin makabër.

Njëri prej tyre është Petrit Çakrri, një prej dëshmitarëve okularë i vrasjes së ish deputetit të Partisë Demokratike, Azem Hajdari, mbrëmjen e 12 shtatorit 1998.

Hetimet kanë zbuluar se Çakrri ka marrë me qira në Rinas, dy automjete, një Range Rover të zi dhe një Honday të bardhë.

Petrit Çakrri, i cili pasi dha dëshminë për atë që njihet si procesi i Shekullit, rezulton të ketë patur procedentë të shumtë penalë, që nga vjedhjet e deri tek përplasjet me policinë.

Teksa në vitin 2017 u arrestua nën dyshimet për mashtrim me pasoja të rënda. Ku në aktakuzë thuhej se ai kishte mashtruar një biznesmen nga Vora, të cilit i kishte marrë një shumë prej 4.4 mln lekësh të reja duke iu prezantuar si tregtar.

Të cilit i kishte premtuar se do t’i siguronte mallra me çmime më të lira sesa tregu.

Çakrri, që u tradhtua nga kamerat e sigurisë dhe GPS e makinës që kishte marrë me qira dhe që përdori në krim.

Nga ku hetuesit përmes pamjeve filmike kanë mundur të zbulojnë pikën e dhënies së automjeteve me qira ku del se pasi kanë dorëzuar makinat që përdoren në krim, kanë marrë automjete të tjera po me qira.

Por, zbulimi i GPS së makinës, i ka mundësuar grupit të hetimit, se automjeti me të cilin udhëtonte Çakrri, që tashmë e ka ndryshuar mbiemrin në Hoxha ka lëvizur në trajektoren ku ka lëvizur edhe Renis Dobra.

Pas krimit, Petrit Çakrri është larguar nga Shqipëria dhe besohet të ketë dalë jashtë vendit nga pika e kalimit kufitar të Morinës.

Ndërsa nipi i tij u ndalua nga policia dhe iu sekuestrua celulari, aty ku besohet se janë gjendur prova të shumta që mund të zbërthejnë detaje të mëtejshme për vrasjen e Renis Dobrës.

The post EMRI/ Rrëmbimi dhe ekzekutimi i Renis Dobrës, identifikohet një prej autorëve të dyshuar, dëshmitar i vrasjes së Azem Hajdarit appeared first on Albeu.com.

Ish-deputeti i Partisë Demokratike, Ervin Salianji ka fituar edhe në Gjykatën e Lartë përballjen me aktivisten Evi Kokalari pasi kjo e fundit e kishte paditur për shpifje.

Gjykata e Lartë vendosi sot të rrëzojë rekursin e depozituar nga aktivistja shqiptaro-amerikane Evi Kokalari. Edhe rreth 2 vite më parë, Salianji fitoi gjyqin në Apelin e GJKKO-së ndaj aktivistes.

Në vendimin e bërë publik nga Gjykata e Lartë thuhet se u vendos mospranimi i rekursit të paraqitur nga e dëmtuara akuzuese Evi Kokalari (Angelakis), kundër vendimit nr.43 datë 11.10.2022 të Gjykatës së Posaçme të Apelit për Korrupsionin dhe Krimin e Organizuar.

Kjo çështje mes Salianjit dhe Kokalarit nisi gjatë një interviste televizive, ku demokrati e cilësoi aktivisten si të sëmurë mendore, skizofrene dhe të lidhur me organizatën terroriste greke, “Agimi i Artë”. Kjo deklaratë është shoqëruar dhe nga replika të vazhdueshme nga ana e Kokalarit.

The post U padit për shpifje, Salianji fiton gjyqin ndaj Kokalarit, Gjykata e Lartë rrëzon rekursin e aktivistes appeared first on Albeu.com.

Në jetën e çdo njeriu ka momente që lënë gjurmë të pashlyera në zemër. Për familjen Llakaj, këto tre vitet e fundit kanë qenë një udhëtim i dhimbshëm mes mungesës, pikëllimit dhe forcës për të vazhduar përpara.

Vajza e aktorit të njohur Agron Llakaj, Alkida, ka folur për herë të parë publikisht për këtë plagë të hapur në zemrën e familjes së saj, humbjen e nënës.

Në një rrëfim të ndjerë në emisionin Top Story, ajo ndau me publikun emocionet që i kanë shoqëruar që prej asaj dite të korrikut kur mësuan diagnozën fatale të mamasë.

Me zërin që dridhej, Alkida tregoi se si babai i saj nuk e ka ndalur asnjëherë dashurinë dhe përkushtimin, çdo ditë i çon lule në vendin ku prehet gruaja e jetës së tij.

“Sa vite ka im atë në skenë unë i kam në jetë, pothuajse 40 vjet është dalja ime e parë televizive, isha shumë e dyzuar, unë s’isha emocionalisht mjaftueshëm e fortë për të folur për babin sepse e kam kudo të asociuar kudo me mamin, qoftë edhe në telefonin tim unë i kam të dy të pandashëm, ashtu dua t’i mbaj gjithmonë pranë zemrës sime.

Janë 3 vite që për ne kanë qenë një sfidë, ka qenë mes korriku ku ne morëm një diagnozë fatale të mamit dhe deri sot që flasim janë 3 vite pikëllim, për ne është si të jesh brenda një humnere për shkak të humbjes sonë, kemi humbur boshtin e familjes.

Postimet e babit nuk janë të hiperbolizuara, shkon përtej kësaj, prej ditës që mami është larguar nga jeta, babi e viziton çdo ditë, në rastet kur është dashur të jetë jashtë Tiranës më ka thënë Alkida shko tek mami, sigurisht unë shkoj edhe pa ma lënë porosi. Kam njohur një dimension të jashtëzakonshëm, human të tij.’’

The post “Që nga humbja e nënës, çdo ditë është një pikëllim i madh”, e bija e Agron Llakajt: Postimet e babit nuk janë të hiperbolizuara, shkon çdo ditë tek varri me lule appeared first on Albeu.com.

Pesë administratorë të njësive administrative në Bashkinë Përmet kanë paraqitur dorëheqjen nga detyra.

Dorëheqjet janë bërë nga administratorët e njësive Përmet, Çarçovë, Frashër, Petran dhe Piskovë.

Kujtojmë që të hënën, edhe në Bashkinë e Gjirokastrës, 7 administratorë të njësive paraqitën dorëheqjet e tyre.

Këto zhvillime vijnë pas kërkesës së kryeministrit Edi Rama për shkarkimin dhe rifreskimin e stafeve drejtuese në të gjitha bashkitë e vendit.

The post ‘Fshesa’ e Ramës mbërrin edhe në Bashkinë e Përmetit/ Dorëhiqen drejtuesit e 5 njësive administrative appeared first on Albeu.com.

Ditën e mërkurë vendi ynë do të jetë në ndikimin e kushteve atmosferike të qëndrueshme. Moti parashikohet i kthjellët në pjesën më të madhe të territorit, me vranësira në zhvillim në orët e mesditës kryesisht përgjatë relieveve malore të vendit.

Dita e nesërme do të sjellë rritje të tempraturave, pasi vendi ynë ëhstë i përfshirë nga vala e të “nxehtit afrikan”, që pritet të vijojë deri në fund të muajit. Gjatë ditës së nesërme temperaturat maksimale do të arrijnë deri në 38 gradë celcius, ndërsa ato minimale në 16 gradë celcius.

Era do të fryjë me drejtim verilindje–veriperëndim me shpejtësi mesatare 5 m/s, ndërsa përgjatë vijës bregdetare dhe zonat luginore era fiton shpejtësi deri në 8 m/s.

The post Temperatura të larta, Shqipëria pritet të ‘përvëlohet’, ja sa do të shënojë termometri ditën e nesërme appeared first on Albeu.com.

Egli Tako, këngëtarja dhe ish-banorja e BBVA ka vazhduar me koncertet në Shqipëri, por edhe Kosovë. Ashtu si Gjesti edhe Egli pasi publikoi disa projekte muzikore, ka nisur të përformojë në Clubet e natës brenda dhe jashtë vendit.

Pas puthjes së bluzës ku shfaqej me Gjestin, Egli këtë herë ka bërë diçka tjetër për të tërhequr vëmendjen, por si duket për keq.

Gjatë performancës së saj, Egli surprizoi të pranishmit duke kënduar edhe hitin e njohur “Mora fjalë” të ikonës së muzikës shqiptare, Shkurte Fejza.

Mirëpo, në tentativë për të komunikuar me publikun, ajo tha: “A ka shqiptarë në Kosovë, apo vetëm kosovarë jeni?”

Kjo frazë, megjithëse mund të jetë thënë në mënyrë spontane, preku një temë të ndjeshme që është diskutuar shpesh në arenën publike dhe veçanërisht në formate televizive si Big Brother, ku debati për identitetin kombëtar “shqiptar” apo “kosovar” ka qenë vazhdimisht temë përplasjesh.

The post Egli Tako shkon në Pejë, trondit publikun me pyetjen ‘’pa takt’’: A ka shqiptarë këtu apo vetëm kosovarë? appeared first on Albeu.com.

Bashkimi Evropian po kërkon përditësime nga Izraeli për zbatimin e një marrëveshjeje të re për të dërguar ndihma humanitare në Rripin e Gazës, tha të martën shefja e politikës së jashtme të bllokut, Kaja Kallas.

Ministrat e Jashtëm të 27 vendeve anëtare të BE-së takohen sot në Bruksel, pas një marrëveshjeje të re për ndihmat në Gazë, e cila është arritur kryesisht nga Kallas dhe ministri i jashtëm izraelit, Gideon Saar.

Saar u takua me liderët e BE-së të hënën, pasi javën e kaluar u pajtua të lejojë hyrjen e ushqimit dhe karburantit të domosdoshëm në enklavën bregdetare me 2.3 milionë banorë.

“Ne kemi arritur një mirëkuptim të përbashkët me Izraelin për të përmirësuar vërtet gjendjen në terren, por nuk ka të bëjë me dokumentin, por me zbatimin e tij”, tha Kallas para takimit të Këshillit të Punëve të Jashtme.

“Përderisa gjendja nuk është përmirësuar vërtet, atëherë nuk kemi bërë mjaftueshëm”, shtoi ajo, duke bërë thirrje për armëpushim.

Hollësitë e marrëveshjes mbeten ende të paqarta, por zyrtarët e BE-së kanë hedhur poshtë çdo bashkëpunim me Fondin Humanitar të Gazës të mbështetur nga Izraeli për shkak të shqetësimeve etike dhe të sigurisë.

Hapja e më shumë pikave kufitare dhe lejimi i më shumë kamionëve me ndihma për të hyrë në Gazë është prioritet, por zyrtarët thonë se përfundimisht duan të krijojnë një pikë vëzhgimi në pikën kufitare Kerem Shalom.

Shtete evropiane si Irlanda, Holanda dhe Spanja po bëjnë gjithnjë e më shumë thirrje për rishikim të marrëdhënieve të BE-së me Izraelin pas luftës në Gazë.

Një raport i Komisionit Evropian gjeti “tregues” se veprimet e Izraelit në Gazë po shkelin detyrimet për të drejtat e njeriut të përfshira në marrëveshjen që rregullon marrëdhëniet me BE-në, por blloku është i ndarë për mënyrën se si të veprojë në këtë rast.

Presioni publik për sjelljen e Izraelit në Gazë e bëri të mundur këtë marrëveshje të re humanitare edhe pa armëpushim, tha ministri i Jashtëm holandez, Caspar Veldkamp.

“Ajo forcë e 27 shteteve anëtare të BE-së është ajo që dua ta ruaj tani”, tha ai.

Ministri i Jashtëm i Spanjës, Jose Manuel Albares Bueno, tha se hollësitë e marrëveshjes po diskutohen ende dhe se BE-ja do t’i vëzhgojë rezultatet për të parë nëse Izraeli po e zbaton marrëveshjen.

“Nuk e dimë nëse do të dimë si funksionon”, tha ai. “Është shumë e qartë që kjo marrëveshje nuk është fundi. Ne duhet ta ndalim luftën”.

Lufta në Gazë nisi pasi Hamasi – grupi palestinez i shpallur organizatë terroriste nga SHBA dhe BE – e sulmoi Izraelin më 7 tetor 2023, duke vrarë rreth 1.200 njerëz dhe duke marrë peng 251 të tjerë.

Shumica e pengjeve janë liruar gjatë armëpushimeve të mëparshme.

Prej atëherë, lufta e Izraelit në Gazë ka vrarë më shumë se 58.000 palestinezë, mbi gjysma e tyre gra dhe fëmijë, sipas Ministrisë së Shëndetësisë në Gazë.

BE-ja ka parë hyrjen e disa kamionëve me ndihma në Gazë, por “jo mjaftueshëm”, tha Hajda Lahbib, komisionarja e BE-së për ndihmën humanitare dhe menaxhimin e krizave.

“Situata është ende shumë e rrezikshme, shumë e dhunshme, me bombardime që vazhdojnë në terren, kështu që partnerët tanë humanitarë nuk mund të veprojnë. Ky është realiteti, kemi nevojë për një armëpushim”, tha ajo./rel

The post Ministrat e BE diskutojnë marrëveshjen me Izraelin për t’i rritur ndihmat për Gazën appeared first on Albeu.com.

Ditën e sotme Drejtoria e policisë së Vlorës ka vijuar kontrollet në të gjitha rrugët e qytetit bregdetar për evidentimin dhe ndëshkimin e parkimeve të parregullta që pengojnë lëvizjen e qytetarëve dhe automjeteve.

Mësohet se përveç gjobave të majme për shoferët e mjeteve, policia ka bërë dhe konfiskimin e mjeteve me karrotrec, ndërsa shoferët rrezikohet të ndiqen edhe penalisht.

Burimet për mediat bëjnë me dije se gjatë katër ditëve të fundit janë vendosur mbi 200 gjoba, si edhe heqja e makinave me karrotrec ku pronari i makinës duhet te kryejë pagesën e gjobës dhe më pas mund te marre makinën.

The post Policia e Vlorës aksione blic në qytetin bregdetar, gjoba të majme dhe konfiskim makine për parkimet e gabuara në rrugë appeared first on Albeu.com.

Një 46-vjeçar banues në Tiranë është proceduar penalisht dhe ndaj një 33-vjeçareje që ndodhet tashmë në masën “arrest shtëpie” u referuan materiale shtesë.

Kjo ndodhi pas kallëzimit të një 34-vjeçareje nga Lezha e cila thotë se 33-vjeçarja nëpërmjet mashtrimit, i ka marrë të dhënat personale dhe me to ka marrë kredi në institucionin financiar që administron 46-vjeçari.

“Gjithashtu, referuan materialet në Prokurori ku nisi procedimi penal për shtetasin A. A., 46 vjeç, banues në Tiranë, dhe materialet shtesë për shtetasen D. C., 33 vjeçe, aktualisht me masë sigurie “Arrest në burg” (e arrestuar në kuadër të operationit “Kredia”), pasi ka kallëzuar shtetasja M. S., 34 vjeçe, banuese në Lezhë, se shtetasja D. C., nëpërmjet mashtrimit, i ka marrë të dhënat personale dhe me to ka marrë kredi në institucionin financiar që administron shtetasi A. A”, njofton policia.

The post Akuzohen se morën kredi duke i vjedhur të dhënat një 34-vjeçareje, telashe për një të re dhe administratorin e një institucioni financiar appeared first on Albeu.com.

Është finalizuar paraditen e sotme operacioni i Inspektoratit Kombëtar të Mbrojtjes së Territorit (IKMT) në Theth, me shembjen me eksploziv të ndërtesës së fundit pa leje në zonë.

Godina 3-katëshe u rrëzua përmes një shpërthimi të komanduar, i cili u realizua me sukses nga forcat xheniere, pa shkaktuar incidente.

Ky ishte akti përmbyllës i një aksioni intensiv 9-ditor në një prej zonave më të frekuentuara turistike të veriut të vendit. Gjatë këtij operacioni, janë shembur gjithsej 100 objekte të ndërtuara pa leje, në kuadër të lirimit të hapësirave publike dhe ruajtjes së integritetit të zonës së mbrojtur.

IKMT dhe autoritetet vendore e kanë cilësuar këtë ndërhyrje si të domosdoshme për të mbrojtur peizazhin natyror dhe për të garantuar zhvillimin e qëndrueshëm të turizmit në Theth.

The post Shembet ndërtesa e fundit pa leje në Theth, përmbyllet operacioni 9-ditor i IKMT appeared first on Albeu.com.

Aktorja dhe moderatorja e njohur, Jonida Vokshi, ka ndarë një rrëfim të ndjerë mbi një nga humbjet më të mëdha në jetën e saj: ndarjen nga jeta të të atit. Në një komunikim të sinqertë me ndjekësit në rrjetet sociale, Jonida është treguar e hapur dhe tepër njerëzore, duke prekur zemrat e shumë prej tyre.

E pyetur nga një ndjekës që po përballet me të njëjtën dhimbje, Jonida u përgjigj:
“Ende nuk jam pajtuar me faktin, ende nuk jam vërtetë koshiente. Ka momente që e ndjej që ka ndodhur vërtet dhe ato janë momentet më të vështira.”

Ajo rrëfeu se mënyra më e afërt për ta përballuar boshllëkun që ka lënë pas babai i saj, është përmes kujtimeve dhe rrëfimeve që ndan për të.
“Por vazhdoj të jetoj me të, tregoj historitë e tij kudo,” – tha ajo me emocion.

Në këtë reflektim të thellë, Jonida ndau edhe një mesazh forcues për të gjithë ata që po kalojnë të njëjtin udhëtim dhimbjeje:
“Është proces, më i vështiri në botë, por jetësor. Dhemb, por të jep forcë të luftosh që ai të jetë krenar për ty, prej nga kudo të sheh e të ruan.”

The post FOTO/ “Ende nuk jam pajtuar me faktin”, rrëfimi prekës i Jonida Vokshit për humbjen e të atit appeared first on Albeu.com.