BRUKSEL, 16 korrik /ATSH-DPA/- Komisioni Evropian planifikon të rrisë buxhetin afatgjatë të BE-së në nje total prej 2 trilionë eurosh (2,3 trilionë dollarë) për vitet 2028 deri në 2034, tha sot komisioneri Evropian për Buxhetin, Anti-Mashtrimin dhe Administratën Publike, Piotr Serafin në Parlamentin Evropian në Bruksel.

Kjo shifër është afërsisht 700 miliardë euro më shumë se ajo që është caktuar për periudhën aktuale shtatëvjeçare nga viti 2021 deri në vitin 2027.

“Fondet për mbrojtjen do të 5-fishohen, duke e bërë sigurinë një nga prioritetet kryesore të viteve të ardhshme në bllokun prej 27 anëtarësh”, tha Serafin.

Presidentja e Komisionit Evropian, Ursula von der Leyen tha se buxheti i propozuar adreson sfidat e Evropës dhe forcon pavarësinë e bllokut.

Buxheti i BE-së, i quajtur korniza financiare shumëvjeçare, përcakton prioritetet e politikave të Bashkimit Evropian për vitet e ardhshme dhe vlerën e parave që do të ndahen për fusha të ndryshme.

Komisioni synon të reformojë buxhetin prej trilionë eurosh, duke u përqendruar më shumë në shpenzimet që lidhen me mbrojtjen dhe konkurrueshmërinë, duke shtuar burime të reja dhe duke ndryshuar kriteret e financimit.

Propozimi do të diskutohet dhe ndryshohet nga Parlamenti Evropian dhe shtetet anëtare të BE-së.

Korniza afatgjatë pasohet nga buxhete vjetore që përfshijnë shpenzime të detajuara. //a.i/

The post BRUKSEL – BE propozon rritjen e fondeve për mbrojtjen në një buxhet prej 2 trilionë eurosh appeared first on Agjencia Telegrafike Shqiptare.

DAMASKË, 16 korrik /ATSH-DPA/- Autoritetet siriane njoftuan sot një marrëveshje të re armëpushimi për provincën jugore të Sweida-s – pas disa ditësh luftimesh, por mbetet e pasigurt nëse paqja do të mbizotërojë – pasi një udhëheqës lokal i pakicës druze e hodhi poshtë marrëveshjen.

Kjo vjen pas prishjes së një armëpushimi të shkurtër – vetëm një ditë më parë për t’i dhënë fund përplasjeve të dhunshme sektare – që thuhet se kanë shkaktuar vdekjen e mbi 300 personave dhe e kanë nxitur Izraelin të sulmojë objektiva në të gjithë Sirinë, përfshirë Damaskun.

“U arrit një marrëveshje për një armëpushim në Sweida dhe për krijimin e pikave të kontrollit të sigurisë në të gjithë qytetin”, tha agjencia shtetërore e lajmeve SANA, duke cituar një burim nga Ministria e Brendshme.

Kushtet e marrëveshjes u njoftuan nga Sheikh Yusuf al-Jarbou, një nga udhëheqësit shpirtërorë të komunitetit druze, në një deklaratë të transmetuar nga media shtetërore.

Sipas al-Jarbou, Sweida do të riintegrohet plotësisht në shtetin sirian.

Ai tha se marrëveshja kërkon riaktivizimin e institucioneve dhe shërbimeve shtetërore, si dhe një angazhim për të mbështetur të drejtat e qytetarëve bazuar në drejtësi dhe barazi.

Megjithatë, një tjetër udhëheqës fetar i pakicës druze, i cili thuhet se është i afërt me Izraelin, hodhi poshtë pretendimet se ishte arritur një marrëveshje, duke u bërë thirrje luftëtarëve druze të vazhdojnë të rezistojnë.

Në një deklaratë të nënshkruar nga Sheikh Hikmat al-Hijri, ai kërkoi çlirimin pa kushte të të gjithë Sweida-s nga qeveria dhe forcat rivale dhe u bëri thirrje luftëtarëve të mbetur nga këto grupe të dorëzoheshin në mënyrë paqësore. //a.i/

The post DAMASKË – Druzët e Sirisë arrijnë marrëveshje të re armëpushimi me qeverinë në Sweida appeared first on Agjencia Telegrafike Shqiptare.

UASHINGTON, 16 korrik /ATSH-DPA/- Sekretari amerikan i Shtetit, Marco Rubio ka shprehur shqetësim pas sulmeve izraelite në kryeqytetin sirian, Damask.

“Ne duam që luftimet të ndalen”, tha sot Rubio në Uashington.

Ai shtoi se SHBA-ja po bisedonte me të gjitha palët dhe shpresonte që të arrihej një marrëveshje.

“Por, ne jemi shumë të shqetësuar”, shtoi Rubio.

Pas disa ditësh dhune midis grupeve druze dhe beduine sunite në Sirinë jugore, Izraeli – një aleat i ngushtë i Shteteve të Bashkuara të Amerikës – bombardoi disa objektiva në Damask, përfshirë hyrjen e Ministrisë së Mbrojtjes.

Gazetari izraelit Barak Ravid raportoi, duke cituar një zyrtar të lartë amerikan, se qeveria amerikane i kishte bërë thirrje Izraelit të ndalonte sulmet në Siri dhe të hynte në dialog me qeverinë në Damask me qëllim uljen e tensioneve. //a.i/

The post UASHINGTON – Rubio: SHBA shumë e shqetësuar për përleshjet në Siri appeared first on Agjencia Telegrafike Shqiptare.

BRUKSEL, 16 korrik /ATSH-DPA/- Presidenti i Këshillit Evropian Antonio Costa ka shprehur shqetësim për situatën në Damask – pas sulmeve izraelite ndaj kryeqytetit sirian.

“Sovraniteti dhe integriteti territorial i Sirisë duhet të respektohen”, shkroi Costa në një postim në X.

“U bëj thirrje të gjitha palëve të vetëpërmbahen nga dhuna dhe të ulin tensionet”, shtoi ai.

Deklarata presidentit të KE-së vjen pasi ushtria izraelite bombardoi objektiva në Damask, përfshirë selinë ushtarake.

Dëshmitarët okularë raportuan gjithashtu shpërthime në një vend që përfshin Ministrinë e Mbrojtjes.

Një përfaqësues ushtarak tha se një “vend ushtarak” pranë pallatit presidencial ishte goditur, gjithashtu.

Sulmet izraelite erdhën si përgjigje ndaj trazirave në Sirinë jugore, ku forcat qeveritare janë akuzuar për shtypje të dhunshme ndaj pakicës druze.

Përplasjet midis bedouinëve sunitë dhe civilëve druzë në Sirinë jugore janë përshkallëzuar ndjeshëm ditët e fundit, të përqendruara në qytetin me shumicë druze, Sweida. //a.i/

The post BRUKSEL – BE e shqetësuar nga sulmet izraelite ndaj Damaskut appeared first on Agjencia Telegrafike Shqiptare.

TEHERAN, 16 korrik /ATSH-DPA/- Udhëheqësi suprem iranian, Ayatollah Ali Khamenei nuk e ka përjashtuar diplomacinë në sfondin e tensioneve ushtarake dhe mosmarrëveshjes bërthamore.

“Ne kemi të gjitha mjetet e nevojshme, siç janë logjika dhe forca ushtarake”, tha sot 86-vjeçari në një fjalim.

“Prandaj, Irani do të veprojë me vetëbesim dhe forcë, qoftë në fushën e diplomacisë apo të ushtrisë”, shtoi ai.

Sipas një raporti nga faqja amerikane e lajmeve “Axios”, SHBA-ja, Gjermania, Franca dhe Britania e Madhe i kanë dhënë udhëheqjes iraniane një afat deri në fund të gushtit për të arritur një marrëveshje të re bërthamore. Pas kësaj, do të rivendosen sanksione të ashpra të OKB-së.

Qeveria iraniane sinjalizoi së fundmi gatishmërinë e saj për të biseduar, me kusht që të përmbusheshin disa parakushte – duke përfshirë një garanci se Irani nuk do të sulmohet gjatë negociatave dhe njohjen e programit të tij  bërthamor civil.

Para luftës 12-ditore me Izraelin në qershor, Uashingtoni dhe Teherani kanë negociuar për rreth dy muaj mbi programin bërthamor të diskutueshëm të Iranit.

Bisedimet u bllokuan dhe SHBA-ja kërkoi ndalimin e pasurimit të uraniumit nga Irani – një vijë e kuqe për Teheranin.

Perëndimi akuzon Iranin se kërkon të prodhojë armë bërthamore, gjë që qeveria iraniane e ka mohuar.

Teherani shpreson që negociatat do të ndihmojnë, ndër të tjera, në heqjen e sanksioneve të rrepta ekonomike.

Vëzhguesit gjithashtu shohin mundësinë që lufta midis Izraelit dhe Iranit të shpërthejë sërish. //a.i/

The post IRAN – Udhëheqësi suprem nuk përjashton diplomacinë në mosmarrëveshjen bërthamore appeared first on Agjencia Telegrafike Shqiptare.

BRUKSEL, 15 korrik /ATSH-DPA/ – BE ka kërcënuar Gjeorgjinë, një vend kandidat për anëtarësim, me sanksione për shkelje të vlerave thelbësore evropiane.

“Shkelja e vlerave demokratike nga Gjeorgjia nuk do të kalojë pa pasoja”, tha shefja e politikës së jashtme të BE-së, Kaja Kallas – pas një takimi të ministrave të Jashtëm të bllokut në Bruksel.

“Ata kanë kushte të caktuara që duhet t’i përmbushin”, u tha ajo gazetarëve të martën.

Një masë e mundshme do të ishte pezullimi i udhëtimit pa viza ose i marrëveshjes aktuale të partneritetit BE-Gjeorgji.

Kallas i kërkoi qeverisë gjeorgjiane të bënte ndryshime deri në fund të gushtit.

Këto ndryshime përfshijnë mbrojtjen e lirisë së tubimit dhe shprehjes, respektimin e të drejtës së privatësisë dhe respektimin e ligjeve kundër diskriminimit.

Kallas deklaroi se BE nuk kërkon të dëmtojë popullsinë gjeorgjiane, por theksoi se besueshmëria e Bashkimit Evropian është gjithashtu në rrezik.

Kritika i drejtohet kryesisht partisë aktuale në pushtet, “Ëndrra Gjeorgjiane”, e cila është akuzuar për kufizime ndaj medias së pavarur dhe organizatave joqeveritare.

Bruksel gjithashtu ka shqetësime se Gjeorgjia po ndikohet nga Rusia.

Në përgjigje të zhvillimeve, BE-ja e ka ngrirë procesin e pranimit të Gjeorgjisë në bllok, vitin e kaluar.

Vendit me 3,7 milionë banorë iu dha statusi i kandidatit në fund të vitit 2023 – pasi aplikoi për anëtarësim në BE – menjëherë pas pushtimit rus në Ukrainë – në shkurt të vitit 2022.//a.i/

The post BRUKSEL – BE kërcënon me sanksione kandidaten për anëtarësim, Gjeorgjinë appeared first on Agjencia Telegrafike Shqiptare.

UASHINGTON, 15 korrik /ATSH-DPA/- Presidenti i SHBA-së Donald Trump tha sot se bisedimet me Bashkimin Evropian për një marrëveshje tregtare po bëjnë progres – ndërsa paralajmëroi se tarifat prej 30% për mallrat nga blloku ishin tashmë një marrëveshje.

BE ka dërguar një ekip ekspertësh të tregtisë në Uashington për bisedime në nivel teknik, ndërsa presioni rritet për të siguruar një marrëveshje me administratën Trump – përpara se tarifat ndëshkuese të hyjnë në fuqi më 1 gusht.

“Jemi duke biseduar me BE-në dhe po bëjmë progres. Por, ne tashmë kemi një marrëveshje me BE-në. Është letra që i dërguam. Tarifa për BE-në ishte 30%. Por ne, në të njëjtën kohë, po bisedojmë”, u tha Trump sot gazetarëve.

Brukseli kërkon të shmangë tarifat prej 30% për mallrat e BE-së, të njoftuara nga presidenti amerikan, Donald Trump, i cili tha gjatë fundjavës se do t’i vendoste këto tarifa nëse BE-ja nuk bënte lëshime të mjaftueshme.

Republikani ka bërë thirrje për masa për të reduktuar deficitin tregtar të SHBA-së me BE-në, duke përfshirë potencialisht tarifa më të ulëta për eksportet amerikane në Evropë ose zhvendosjen e prodhimit evropian në SHBA.

Deri në kërcënimin e fundit të tarifave të Trump, zyrtarët e BE-së kishin shprehur optimizëm se një marrëveshje kornizë për të ulur tensionin në luftën tregtare ishte e arritshme, pas disa muajsh bisedimesh të vazhdueshme.

Në rast se SHBA-ja miraton tarifat e reja më 1 gusht, BE-ja ka sinjalizuar se do të hakmerret me kundërtarifa. //a.i/

The post UASHINGTON – Trump: SHBA dhe BE po bëjnë progres në marrëveshjen tregtare appeared first on Agjencia Telegrafike Shqiptare.

UASHINGTON, 15 korrik /ATSH/- Presidenti i SHBA-së, Donald Trump, njoftoi sot një marrëveshje tregtare me Indonezinë, pakti i fundit – në një përpjekje për të forcuar marrëdhëniet me partnerët tregtarë dhe për të reduktuar deficitin tregtar, edhe pse Bashkimi Evropian po përgatit masa hakmarrëse nëse bisedimet me Uashingtonin dështojnë, sipas “Reuters”.

“Sapo arritem një marrëveshje tregtare me Indonezinë. Unë bisedova drejtpërdrejt me presidentin e vendit, shumë të respektuar”, tha Trump në një postim në “Truth Social”.

Tregtia totale e Indonezisë me SHBA-në – rreth 40 miliardë dollarë amerikanë në vitin 2024 – nuk renditet në 15 vendet e para, por ka qenë në rritje.

Eksportet amerikane në Indonezi u rritën me 3,7% vitin e kaluar, ndërsa importet u rritën me 4,8% – duke e lënë SHBA-në me një deficit tregtar mallrash prej gati 18 miliardë dollarësh amerikanë.

Trump paralajmëroi më herët, Indonezinë se do të vendoste një tarifë prej 32% – që do të hynte në fuqi më 1 gusht – në një letër dërguar presidentit të vendit javën e kaluar.

Trump u dërgoi letra të ngjashme partnerëve tregtarë, duke përfshirë Kanadanë, Japoninë dhe Brazilin, duke vendosur norma tarifore të përgjithshme që variojnë nga 20% deri në 50%, si dhe një tarifë prej 50% për bakrin.

Që nga lançimi i politikës së tij tarifore, Trump ka arritur vetëm disa marrëveshje pavarësisht se ekipi i tij ka njoftuar se synon të arrijë “90 marrëveshje në 90 ditë”.

Deri më tani, janë arritur marrëveshje kornizë me Britaninë e Madhe dhe Vietnamin, dhe një marrëveshje e përkohshme me Kinën – për të parandaluar tarifat e larta të Trump ndërsa negociatat vazhdojnë midis Uashingtonit dhe Pekinit. //a.i/

The post SHBA – Trump arrin marrëveshje tregtare me Indonezinë appeared first on Agjencia Telegrafike Shqiptare.

UASHINGTON, 15 korrik /ATSH/- Sekretari i përgjithshëm i NATO-s, Mark Rutte paralajmëroi sot se vende si Brazili, Kina dhe India mund të goditen shumë rëndë nga sanksionet nëse vazhdojnë të bëjnë biznes me Rusinë.

Deklarata e Rutte erdhi gjatë një takimi me senatorët në Kongresin e SHBA-së – një ditë pasi presidenti amerikan, Donald Trump njoftoi dërgimin e armëve të reja në Ukrainë.

Gjithashtu, Trump paralajmëroi se do të vendoste tarifa të reja “të ashpra” prej 100% për blerësit e eksporteve ruse, nëse nuk arrihej një marrëveshje paqeje brenda 50 ditësh.

Sekretari i përgjithshëm i NATO-s, Mark Rutte u takua dje me presidentin amerikan, Donald Trump – si pjesë e vizitës së tij dyditore në Uashington. //a.i/

The post SHBA – Rutte: Brazili, Kina dhe India mund të goditen rëndë nga sanksionet appeared first on Agjencia Telegrafike Shqiptare.

BRUKSEL, 15 korrik /ATSH-DPA/- Bashkimi Evropian ka dërguar një ekip ekspertësh të tregtisë në Uashington për bisedime në nivel teknik, ndërsa presioni rritet për të siguruar një marrëveshje me administratën Trump përpara se tarifat ndëshkuese të hyjnë në fuqi më 1 gusht.

“Një telefonatë midis komisionerit të Tregtisë të BE-së Maros Sefcovic dhe përfaqësuesit të Tregtisë së SHBA-së Jamieson Greer ishte planifikuar gjithashtu për sot”, tha Komisioni Evropian.

Sefcovic zhvilloi dje një bisedë telefonike me sekretarin e Tregtisë të SHBA-së, Howard Lutnick, tha një zëdhënës, megjithëse nuk u zbuluan detaje të diskutimeve.

Brukseli kërkon të shmangë tarifat prej 30% për mallrat e BE-së, të njoftuara nga presidenti amerikan, Donald Trump, i cili tha gjatë fundjavës se do t’i vendoste këto tarifa nëse BE-ja nuk arrinte të ofronte lëshime të mjaftueshme.

Republikani ka bërë thirrje për masa për të reduktuar deficitin tregtar të SHBA-së me BE-në, duke përfshirë potencialisht tarifa më të ulëta për eksportet amerikane në Evropë ose zhvendosjen e prodhimit evropian në SHBA.

Deri në kërcënimin e fundit të tarifave të Trump, zyrtarët e BE-së kishin shprehur optimizëm se një marrëveshje kornizë për të ulur tensionin në luftën tregtare ishte e arritshme, pas disa muajsh bisedimesh të vazhdueshme.

Në rast se SHBA-ja miraton tarifat e reja më 1 gusht, BE-ja ka sinjalizuar se do të hakmerret me kundërtarifa.

Sefcovic paralajmëroi dje se një tarifë prej 30% për BE-në do të përbënte një ndalim de facto tregtar. //a.i/

The post BRUKSEL – Ekspertët tregtarë të BE-së për bisedime në Uashington appeared first on Agjencia Telegrafike Shqiptare.

LONDER, 15 korrik /ATSH-DPA/- Presidenti i SHBA-së, Donald Trump mbështeti projektet e naftës dhe gazit në vend të projekteve “të dëmshme” të energjisë së erës – ndërsa njoftoi se do të takohej me kryeministrin britanik Keir Starmer për bisedime në “kryeqytetin evropian të naftës”, Abërdin, Skoci.

Trump tha se do të zhvillonte një “takim shtetëror” me Starmer gjatë vizitës së tij private në Skoci, këtë muaj.

Zyra e Starmer konfirmoi dje se kryeministri do të udhëtonte në veri dhe do të takohej me Trump.

Trump zotëron dy resorte golfi në Skoci.

Përpara vizitës së tij në Britaninë e Madhe, ai e përshkroi BM-në si një vend të shkëlqyer dhe një aleat të vërtetë të SHBA-së.

“Më pëlqen shumë kryeministri, edhe pse është liberal’, tha Trump në një intervistë për BBC duke iu referuar liderit britanik, Keir Starmer.

“Në Abërdin, ka shumë naftë. Ata duhet të heqin qafe mullinjtë me erë pasi janë vërtet të dëmshëm për bukurinë e Skocisë dhe te çdo vendi tjetër”, tha presidenti Trump.

Trump do të zhvillojë gjithashtu një vizitë shtetërore në Britaninë e Madhe në shtator. //a.i/

The post SHBA – Trump takim me Starmer në “kryeqytetin e naftës” appeared first on Agjencia Telegrafike Shqiptare.

sankBRUKSEL, 15 korrik /ATSH-DPA/- Ministrat e Punëve të Jashtme të Bashkimit Evropian nuk arritën të miratonin unanimisht sot paketën e 18-të të sanksioneve të bllokut ndaj Rusisë për shkak të luftës në Ukrainë, pasi Sllovakia vuri veton.

“Jam vërtet e trishtuar që nuk arritëm këtë marrëveshje sot”, tha shefja e Punëve të Jashtme të BE-së, Kaja Kallas, pas takimit ministror në Bruksel, ku lufta në Ukrainë ishte në krye të axhendës.

Grupi i propozuar i masave ndëshkuese synon sektorët financiarë dhe të energjisë të Rusisë – në përgjigje të refuzimit të presidentit Vladimir Putin për të rënë dakord për një armëpushim – pa kushte në Ukrainë.

Megjithatë, sanksionet u pezulluan pasi kryeministri sllovak, Robert Fico muajin e kaluar tha se nuk ishte gati ta mbështeste propozimin, duke përmendur shqetësimet në lidhje me importet e gazit të Sllovakisë.

“Duhet të them se ishim shumë afër për të siguruar miratimin e Sllovakisë”, tha Kallas.

“Tani, topi është në fushën e Sllovakisë dhe ne duhet ta arrijmë këtë marrëveshje”, shtoi ajo.

Të 27 anëtarët e BE-së duhet të mbështesin sanksionet e reja përpara se ato të mund të zbatohen.

“Sanksionet janë të nevojshme për t’i kufizuar Rusisë mjetet për të zhvilluar këtë luftë. Bashkimi Evropian do të vazhdojë të rrisë kostot, për të ndaluar agresionin e Moskës”, tha Kallas.

Me të mbërritur në takim, ministri gjerman për Evropën, Gunther Krichbaum, tha se masat e reja duhet të miratoheshin sa më shpejt të ishte e mundur.

“Është e rëndësishme të ndërmerren veprime vendimtare për të siguruar që Rusia të vihet nën presion dhe që Ukraina të vihet në një pozicion më të fortë negociues”, tha ai.

“Vetëm atëherë do të jetë e mundur të arrihet një marrëveshje e drejtë në fund të ditës”, shtoi ai.

Sipas planeve, çmimi maksimal ndërkombëtar për eksportet e naftës ruse do të ulet në 45 dollarë për fuçi, nga 60 dollarë për fuçi – por masa nuk arriti të marrë mbështetje unanime në takimin e G7, muajin e kaluar.

“Edhe nëse amerikanët nuk janë dakord, por vendet e tjera të G7 janë dakord, atëherë ne do të ecim përpara me masën”, tha Kallas.

Kallas tha se e mirëpriti njoftimin e SHBA-së për dërgimin e armëve mbrojtëse në Ukrainë. //a.i/

The post BRUKSEL – BE shtyn vendimin për paketën e 18-të të sanksioneve ndaj Rusisë appeared first on Agjencia Telegrafike Shqiptare.

BRUKSEL, 15 korrik /ATSH/- Bashkimi Evropian po kërkon përditësime nga Izraeli mbi zbatimin e një marrëveshjeje të re për të ofruar ndihmë humanitare në Gazë, tha sot diplomatja më e lartë e bllokut, Kaja Kallas, sipas AP.

Ministrat e Jashtëm të 27 vendeve anëtare të BE-së u takuan në Bruksel pas një marrëveshjeje të re për ndihmën në Gazë, e cila u arrit kryesisht nga shefja e politikës së jashtme të BE-së, Kallas, dhe ministri i Jashtëm Izraelit, Gideon Saar.

Saar u takua dje me udhëheqësit e BE-së, pasi ranë dakord javën e kaluar për të lejuar ushqimin dhe karburantin e nevojshëm në enklavën bregdetare prej 2,3 milionë banorësh, të cilët kanë duruar më shumë se 21 muaj luftë.

“Ne kemi arritur një mirëkuptim të përbashkët me Izraelin për të përmirësuar vërtet situatën në terren dhe nuk ka të bëjë me dokumentin, por me zbatimin e këtij dokumenti”, tha Kallas para takimit të Këshillit të Punëve të Jashtme.

“Për sa kohë që nuk është përmirësuar situata humanitare, atëherë nuk kemi bërë mjaftueshëm,” tha ajo, përpara se të bënte thirrje për armëpushim.

Detajet e marrëveshjes mbeten të paqarta, por zyrtarët e BE-së kanë hedhur poshtë çdo bashkëpunim me Fondin Humanitar të Gazës – të mbështetur nga Izraeli për shkak të shqetësimeve etike dhe të sigurisë.

Hapja e më shumë kalimeve kufitare dhe lejimi i më shumë kamionëve me ndihma në Gazë është përparësi, por zyrtarët thonë se do të donin të ngrinin një stacion monitorimi në kalimin Kerem Shalom.

Kallas tha se ministrat do të diskutojnë gjithashtu programin bërthamor të Iranit, shqetësimet mbi zhvillimet në Gjeorgji dhe Moldavi, si dhe sanksionet e reja ndaj Rusisë.

Vendet evropiane si Irlanda, Holanda dhe Spanja kanë bërë thirrje gjithnjë e më shumë që lidhjet e BE-së me Izraelin të rivlerësohen pas luftës në Gazë.

Një raport nga Komisioni Evropian gjeti “indikacione” se veprimet e Izraelit në Gazë po shkelin detyrimet e të drejtave të njeriut në marrëveshjen që rregullon lidhjet e tij me BE-në – por blloku është i ndarë në lidhje me masat që duhet të marrë kundër Tel Avivit.

Lufta në Gaza filloi pasi militantët e udhëhequr nga Hamasi sulmuan Izraelin jugor më 7 tetor 2023, duke vrarë rreth 1200 njerëz dhe duke marrë peng 251 të tjerë, shumica e të cilëve janë liruar në armëpushimet e mëparshme.

“Izraeli u përgjigj me një ofensivë që ka vrarë më shumë se 58 000 palestinezë, më shumë se gjysma e tyre gra dhe fëmijë”, sipas Ministrisë së Shëndetësisë së Gazës. //a.i/

The post BRUKSEL – BE kërkon më shumë informacion nga Izraeli mbi zbatimin e marrëveshjes së ndihmës për Gazën appeared first on Agjencia Telegrafike Shqiptare.

LONDËR, 14 korrik /ATSH/- A mund të jetë dehidratimi i fshehur – shkaku i lodhjes suaj gjatë ditës? Të gjithë kemi përjetuar etjen dhe është e pakëndshme. Është gjithashtu shenja e parë e dehidratimit, e cila mund të avancojë shpejt, sipas BBC.

Dehidratimi i lehtë deri në të moderuar zhvillohet vetëm pas disa orësh, në varësi të moshes, shëndetit dhe faktorëve mjedisorë.

Personat mund të përjetojnë lodhje, marramendje dhe konfuzion. Pas 24 orësh, efektet e dehidratimit të rëndë mund të rezultojnë në simptoma serioze, duke përfshirë shokun dhe krizat epileptike.

Dehidratimi i fshehur (ose dehidratimi i nivelit të ulët kronik) mund të ndodhë kur jeni të dehidratuar lehtë gjatë një periudhe të gjatë kohore, dhe mund të ketë efekte si fizike ashtu edhe mendore.

Efektet e dehidratimit të fshehur

Siç sugjeron edhe vetë emri, dehidratimi i fshehur është një gjendje disi e fshehtë dhe ju mund të vuani nga efektet e saj pa qenë të vetëdijshëm për shkakun.

Lodhja renditet si ndër simptomat kryesore të dehidratimit të fshehur, të cilat përfshijnë gjithashtu:

• Urinë të errët
• Gojë të thatë
• Marramendje
• Dhimbje koke
• Mungesë përqendrimi

Trupi i njeriut përbëhet mesatarisht nga 60% ujë. Truri dhe zemra janë 73% ujë dhe muskujt përmbajnë 75% ujë.

Dehidratimi shkakton rënie të vëllimit të gjakut, duke rezultuar në presion më të ulët të gjakut – që do të thotë një ulje e rrjedhjes së gjakut në tru, e cila shkakton lodhje.

Njerëzit përjetojnë një rënie natyrale të energjisë pas drekës, megjithatë, nëse nuk jeni hidratuar mjaftueshëm gjatë gjithë ditës, trupi juaj do të ketë një deficit duke bërë që kjo rënie të jetë më ekstreme.

Rekomandohet që një i rritur duhet të pijë nga gjashtë deri në tetë gota ujë (1,2-2 litra) në intervale të rregullta gjatë gjithë ditës.

Meqenëse këshillohet të pihet deri në 2 litra ujë në ditë, cilësia e ujit mbetet shumë e rëndësishme.

Përmirësimi i zakoneve të pirjes së ujit duke pasur një konsum të qëndrueshëm gjatë gjithë ditës do të japë rezultate pozitive, veçanërisht nëse vuani nga mungesa e përqendrimit dhe lodhja gjatë pasdites. //a.i/

The post A mund të jetë dehidratimi i fshehur shkaku i lodhjes suaj gjatë ditës? appeared first on Agjencia Telegrafike Shqiptare.

BRAZILIA, 14 korrik /ATSH-ANSA/- Presidenti brazilian, Luiz Inacio Lula da Silva ka urdhëruar ngritjen e një komiteti të kabinetit të nivelit të lartë për të udhëhequr diskutimet – midis qeverisë braziliane, udhëheqësve të biznesit dhe grupeve të industrisë – mbi tarifën prej 50% të vendosur nga SHBA-ja ndaj eksporteve braziliane.

Administrata e presidentit Lula shpreson të negociojë heqjen e tarifave, por gjithashtu po planifikon të përdorë ligjin e reciprocitetit ekonomik të Brazilit nëse bisedimet dështojnë.

Negociatat do të koordinohen nga komiteti i kabinetit, i cili pritet të krijohet në ditët në vijim.

Grupi ka të ngjarë të përfshijë të paktën pesë ministra të kabinetit dhe përfaqësues nga sektorët e biznesit më të prekur nga rritja e tarifave.

Nëse negociatat dështojnë, qeveria synon të zbatojë Ligjin e Reciprocitetit Ekonomik, me dekretin zbatues që pritet të miratohet nesër.

I miratuar në prill, Ligji i Reciprocitetit autorizon Brazilin të vendosë kundërtarifa për importet nga vendet e tjera dhe të pezullojë koncesionet tregtare.

Ligji është nënshkruar nga presidenti Lula, megjithëse disa dispozita mbeten subjekt i rregullimit të mëtejshëm. //a.i/

The post BRAZIL – Lula krijon komitetin e nivelit të lartë për të udhëhequr negociatat e tarifave me SHBA-në appeared first on Agjencia Telegrafike Shqiptare.

BRUKSEL, 14 korrik /ATSH-ANSA/- Ka pasur disa sinjale se më shumë kamionë dhe furnizime po mbërrijnë në Gazë, por Bashkimi Evropian nuk sheh përmirësim të mjaftueshëm në terren, tha sot shefja e politikës së jashtme të BE-së, Kaja Kallas, përpara një takimi me zyrtarë të lartë të Lindjes së Mesme dhe BE-së, në Bruksel.

“Situata në terren, në Gazë është serioze. Është një gjë të nënshkruash marrëveshje në letër dhe një tjetër t’i zbatosh ato”, tha Kallas.

BE-ja arriti një marrëveshje me Izraelin javën e kaluar për të përmirësuar situatën humanitare në Rripin e Gazës, duke përfshirë rritjen numrit të kamionëve me ndihma dhe hapjen e pikave të kalimit dhe rrugëve të caktuara të ndihmës.

“Më kërkuan të hartoja një listë me sanksione, tani u takon 27 vendeve të vendosin se çfarë duhet të bëjnë”, tha Kallas duke iu referuar masave te mundshme kundër Izraelit për shkelje të të drejtave të njeriut.

Në qershor të vitit 2025, Spanja, Irlanda dhe Sllovenia kërkuan pezullimin e Marrëveshjes së Asociimit BE-Izrael.

Suedia gjithashtu i ka kërkuar Këshillit Evropian të miratojë sanksione kundër ministrave izraelitë që promovojnë aktivitete të paligjshme të vendbanimeve dhe punojnë në mënyrë aktive kundër një zgjidhjeje të negociuar me dy shtete.

Në përputhje me rrethanat, përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas ka propozuar një listë të sanksioneve ndaj Izraelit, të cilat do të diskutohen në Këshillin e ardhshëm të BE-së. //a.i/

The post BRUKSEL – BE: Ndihma për Gazën e kufizuar, pavarësisht marrëveshjes me Izraelin appeared first on Agjencia Telegrafike Shqiptare.

UASHINGTON, 14 korrik /ATSH-DPA/- Sekretari i përgjithshëm i NATO-s, Mark Rutte përshëndeti sot njoftimin e presidentit të SHBA-së, Donald Trump, për vendosjen e sanksioneve të ashpra ndaj Rusisë nëse nuk arrihej një marrëveshje me Ukrainën.

“Nëse do të isha Vladimir Putin do t’i rishqyrtoja negociatat me Ukrainën më seriozisht”, tha Rutte.

Ai tha se njoftimi i presidentit Trump ishte një lajm vërtet i shkëlqyer për Ukrainën.

I dërguari special i SHBA-së, Keith Kellogg mbërriti sot në Kiev për bisedime me udhëheqësit ukrainas, mes sinjaleve se mbështetja e Uashingtonit për Ukrainën po forcohet.

Qëndrimi i Trump ka marrë një drejtim tjetër. Ai kishte shpresuar se do të ishte në gjendje t’i jepte fund luftës përmes negociatave – dhe ka zhvilluar disa telefonata me Putinin.

Kohët e fundit, ai ka shprehur pakënaqësinë – duke thënë se ishte shumë i zhgënjyer me presidentin Putin.

Trump njoftoi më herët se SHBA-ja do t’i shiste sisteme armësh “Patriot” vendeve evropiane për t’i dërguar në Ukrainë.

“Do të jetë një biznes për ne. Do t’u dërgojmë vendeve evropiane sisteme “Patriot”, për të cilat ata kanë shumë nevojë sepse Putini, me të vërtetë befasoi shumë njerëz”, u tha Trump gazetarëve.

“Patriot” është një nga sistemet më moderne të mbrojtjes ajrore në botë – që përdoret për të luftuar avionët armik, raketat balistike dhe raketat kruz. //a.i/

The post SHBA – Rutte: Nëse do të isha Vladimir Putin do t’i rishqyrtoja më seriozisht negociatat me Ukrainën appeared first on Agjencia Telegrafike Shqiptare.

UASHINGTON, 14 korrik /ATSH-ANSA/- Presidenti i SHBA-së, Donald Trump i tha sot homologut të tij francez, Emmanuel Macron, gjatë një bisede telefonike, se udhëheqësi rus Vladimir Putin “dëshironte të merrte gjithçka”, duke iu referuar ofensivës së re – të planifikuar nga Moska në Ukrainën lindore, sipas “Axios”

Trump iu referuar një bisede telefonike midis dy udhëheqësve më 3 korrik.

Gjatë kësaj bisede, lideri rus, Putini i tha presidentit Trump se po planifikonte një përshkallëzim tjetër në lindje gjatë 60 ditëve të ardhshme, për të arritur kufijtë administrativë të rajoneve ku ai ka një prani të konsiderueshme.

Trump synon të njoftojë sot një plan të ri për të armatosur Ukrainën, i cili do të përfshijë dërgimin e armëve sulmuese në Kiev.

Iniciativa e re – do të prezantohet në një takim në Uashington midis Trump dhe sekretarit të përgjithshëm të NATO-s, Mark Rutte.

Plani ka të ngjarë të përfshijë raketa me rreze të gjatë veprimi – të afta për të arritur objektiva brenda territorit rus, përfshirë Moskën.

“Nuk kam rënë ende dakord rreth numrit te sistemit “Patriot” që do të dërgohen, por ukrainasit do të kenë disa prej tyre sepse kanë nevojë për mbrojtje, dhe BE-ja do të paguajë. Ne nuk do të paguajmë asgjë, por do t’i dërgojmë”, tha Trump.

“Jam shumë i zhgënjyer me udhëheqësin rus Vladimir Putin. Ai flet bukur dhe pastaj bombardon gjithçka në mbrëmje”, tha ai.

“I dërguari special i SHBA-së për Ukrainën, Keith Kellogg mbërriti sot në Kiev, në vizitën e tij në vend të njoftuar javën e kaluar”, sipas këshilltarit kryesor të presidentit ukrainas, Andriy Yermak, në Telegram.

“Ne e mirëpresim ngrohtësisht të dërguarin special të SHBA-së, Keith Kellogg, në Ukrainë”, shkroi Yermak.

“Paqja përmes forcës është parimi i presidentit të SHBA-së, Donald Trump, dhe ne e mbështesim këtë qasje”, shtoi ai. //a.i/

The post UASHINGTON – Trump: Putini po planifikon një ofensivë të re në lindje të Ukrainës appeared first on Agjencia Telegrafike Shqiptare.

ROMË, 14 korrik /ATSH/- Presidenti i SHBA-së Donald Trump ka sulmuar sërish me taksa të reja, ndërsa BE përpiqet të vlerësojë ndikimin e tarifave amerikane në eksporte, sipas të përditshmes italiane “La Notizia”.

Qëndrimi i Donald Trump mbetet i pandryshueshëm

“Lufta e tarifave është e drejtë dhe e pashmangshme. E gjithë bota ka përfituar për një kohë të gjatë nga SHBA-ja”, tha presidenti amerikan në një postim në “Truth Social”.

“Shtetet e Bashkuara të Amerikës janë grabitur në tregti dhe ushtri, nga miqtë dhe armiqtë, për dekada të tëra”, tha ai.

Sipas Trump, ajo që ka ndodhur deri më tani kishte kushtuar mijëra dollarë dhe situata nuk ishte më e qëndrueshme.

“Vendet duhet të ndalen dhe të thonë: Faleminderit për shumë vitet e lirisë. Por ne e dimë se tani duhet të bëni atë që është e drejtë për Amerikën”, shtoi ai.

Sa do të ndikojnë tarifat e Trump në BE? 

Sipas Leopoldo Rubinacci, zëvendësdrejtori i Drejtorisë së Përgjithshme për Tregtinë e Komisionit, tarifat do të ndikojnë në 70% të eksporteve të BE-së në Shtetet e Bashkuara të Amerikës – duke arritur në 380 miliardë euro.

Në Komisionin e Tregtisë të Parlamentit Evropian, Rubinacci shpjegoi se administrata amerikane po kryente hetime, veçanërisht në lidhje me Seksionin 232 të Aktit të Zgjerimit të Tregtisë të vitit 1962 – i cili prek produktet e aviacionit, produktet farmaceutike, mineralet kritike, drurin, bakrin dhe mallra të tjera.

Nëse Trump do të vendoste tarifa ndaj këtyre produkteve, pjesa e eksporteve të prekura do të rritej në 97%. //a.i/

The post BRUKSEL – BE: Tarifat e Trump do të ndikojnë në 70% të eksporteve të bllokut në SHBA appeared first on Agjencia Telegrafike Shqiptare.

LONDËR, 13 korrik /ATSH/- Muret skulpturore prej betoni të lakuar përqafojnë një sërë tarracash të mbjella për macet dhe qentë në këtë spital veterinar në Shqipëri, të projektuar nga kompania zvicerane “Davide Macullo Architects”, sipas një artikulli të botuar në britaniken “Dezeen”.

E vendosur në kryeqytetin shqiptar, Tiranë, ndërtesa prej 2,243 metrash katrorë përmban një klinikë veterinare dhe një hotel për kafshë shtëpiake në tre katet e saj.

Sipas “Davide Macullo Architects”, muret e lakuara prej betoni të klinikës dhe tarracat e jashtme do të kontribuojnë në mirëqenien psikologjike të kafshëve shtëpiake që trajtohen, duke ndihmuar në eliminimin e frikës nga mbyllja.

“Hapësira e bollshme jashtë spitalit bie në kontrast me logjikën e strukturuar të planit, duke krijuar një ndjenjë mrekullie dhe harmonie”, tha kompania.

Ashtu si në kujdesin shëndetësor njerëzor, psikologjia hapësinore luan një rol kritik – format fluide eliminojnë çdo frikë nga mbyllja, duke krijuar një mjedis të hapur dhe çlirues.

Përveçse i japin ndërtesës atë që kompania e quan një pamje “fluide, skulpturale”, muret e ekspozuara të betonit u transportuan në ambientet e brendshme, ku ato formojnë një hyrje dhe zonë pritjeje me xham.

Në pjesën e prapme të ndërtesës, dhomat e trajtimit dhe zyrat e klinikës zënë një zonë drejtkëndëshi, në formë L-je, në katin e parë.

Sipër, këto dhoma perimetrike kanë mure paksa të përkulur, të krijuara aty ku format e lakuara të betonit nderpresin planin e këndeve të drejta.

“Ajo që fillon si gjeometri e thjeshtë statike – e rrënjosur në psikologjinë hapësinore dhe parimet antropologjike – shpaloset në një rrjet dinamik kthesash që e shndërrojnë këtë hapësirë në një vend të vërtetë, plot lëvizje dhe jetë”, tha kompania.

“Kontrasti midis formave të buta, organike dhe forcës së papërpunuar të betonit i shton intensitetin estetik”, tha “Davide Macullo Architects”.

Në katet e sipërme, zonat publike si korridoret dhe një mensë në katin e dytë kanë qasje në tarracat e ngritura të klinikës, të cilat janë të hijezuara nga muret skulpturore dhe kanë vazo betoni.

“Davide Macullo Architects” kishin për qëllim që këto tarraca të vepronin si hapësira terapeutike si për pacientët kafshë shtëpiake të klinikës ashtu edhe për pronarët e tyre, duke krijuar zona gjysmë të izoluara larg klinikës kryesore.

“Tarracat dhe kopshtet nuk janë thjesht dekorative, ato shërbejnë si hapësira terapeutike për ‘pacientët’, duke u ofruar atyre dritë, ajër dhe një lidhje me natyrën”, shtoi kompania.

Organizimi i hapësirave për macet dhe qentë ndjek të njëjtat parime si ato për njerëzit, rehati, veçim kur është e nevojshme dhe një qasje e menduar mirë ndaj bashkëjetesës.//a.i/

1 nga 19

The post “Dezeen”: “Davide Macullo Architects” përfundon spitalin veterinar për macet dhe qentë në Tiranë appeared first on Agjencia Telegrafike Shqiptare.