Read More...

Tregu i sigurimeve është zgjeruar në periudhën janar-qershor duke u rritur me mbi 8%. Pesha kryesore dhe rritja më e madhe ka ardhur kryesisht nga sigurimet motorike, teksa një tendencë në zgjerim ka parë edhe segmenti i sigurimit të jetës.

Ekspertja e sigurisë Romina Radonshiqi u shpreh se sigurimi i banesave nga tërmeti është një masë mbrojtëse që duhet të merrej më herët. Më tej, Radonshiqi tha se për pensionistët dhe të papunët qeveria ka gjetur një zgjidhje duke marrë mbulimin e kostove për këto familje në nevojë për të cilat kjo pagesë ka një peshë në buxhetin e tyre.

“Është një masë mbrojtëse që duhet të ndërmerrej para shumë vitesh. Sigurimi i banesave është diçka shumë e rëndësishme, duhet të edukohemi t’i kushtojmë rëndësi sigurimit të jetës dhe pronës. Banesa është shumë e rëndësishme sepse hyn tek nevojat fiziologjike. Shqipëria është një vend me risk të lartë sizmik dhe sigurimi i ndërtesës duhet të na ulë mbrojtjen dhe menaxhimin e riskut. Është një nismë e vonuar, niveli i sigurimit të pronave ishte tepër i ulët nga qytetarët.

Në draft kemi edhe përshpejtim të procedurave, në një periudhë 9 mujore qeveria e ka përshpejtuar procedurën dhe kjo është një gjë shumë e mirë. Nuk do të influencojë shumë tek financat e individit. Pensionistët ose të papunët, për ta një shumë do të ndikonte në buxhetin e tyre ndaj dhe qeveria ka gjetur zgjidhje duke marrë mbulimin e kostove për këto familje në nevojë.” / abcnews.al

Përmbytjet e shkaktuara nga shirat e fortë në Pekin dhe zonat përreth kanë shkaktuar të paktën 30 të vdekur dhe kanë detyruar evakuimin e dhjetëra mijëra njerëzve. Shirat e shpeshta u intensifikuan rreth kryeqytetit kinez dhe zonave të tjera përreth, ku qyteti ka regjistruar reshje deri në 54 cm gjatë një periudhe “shira ekstreme të pandërprerë”, sipas agjencisë zyrtare të lajmeve Xinhua.

Sipas një deklarate nga Pekini, 28 persona humbën jetën në distriktin Miyun dhe dy të tjerë në distriktin Yanqing deri në mesnatë të së hënës. Të dy këto zona janë zona malore larg qendrës së qytetit.

Mbi 80,000 njerëz janë evakuuar në Pekin, duke përfshirë rreth 17,000 në Miyun, thuhet në deklaratën e qeverisë. Po ashtu, katër persona u raportuan të vdekur nga një shpërthim dheu në një zonë rurale të qarkut Luanping në provincën e Hebei, e cila kufizohet me Pekinin. Tetë persona janë shpallur të zhdukur.

Presidenti kinez Xi Jinping urdhëroi përpjekje të plota për kërkim-shpëtimin pas mesnatës së së hënës, për të minimizuar viktimat. Përmbytjet e fundit kanë shkaktuar viktima dhe dem ete medha në Pekin dhe provincat e Hebei, Jilin dhe Shandong, tha ai, sipas Xinhua.

Autoritetet e Pekinit shpallën një përgjigje emergjente të nivelit të lartë në orën 20:00 të së hënës, duke urdhëruar njerëzit të qëndrojnë brenda, duke mbyllur shkollat, pezulluar punët e ndërtimit dhe ndaluar turizmin dhe aktivitetet e jashtme.

/ abcnews.al

Janë gjithsej katër, dhe tre po tregohen protagonistë.

Rubini njihet në Rusi si skuadra e shqiptarëve, dhe rëndësia e tyre duket qartë pas dy javëve të para të kampionatit.

Skuadra nga Tatarstani ka arritur një fitore e një barazim, me 4 gola të shënuar e dy të pësuar, dhe që të gjitha rrjetat janë realizuar nga futbollistët që I përkasin kombit tonë.

Në ndeshjen e fundit, në barazimin luftarak ndaj Zenitit në Kazan, rezultati 0-2 u barazpeshua falë goditjeve nga Veldin Hoxha dhe Mirlind Daku.

I pari do të luajë për Kosovën, ndërsa I dyti është ndër futbollistët e Shqipërisë.

Ndeshja e javës së parë ishte në fushën e Ahmatit në Grozni në 20 korrik, dhe u arrit një fitore e rëndësishme 2-0.

Në startin e Premier Ligës ruse, Dardan Shabanhaxhaj dhe Veldin Hoxha.

Shabanhaxhaj ka zgjedhur të luajë për Austrinë, ndërsa është me origjinë nga Kosova.

Hoxha, I lindur në Kroaci, ka dy gola, ndërsa Daku ka një gol e një asist.

Besohet se sulmuesi kuqezi mund të luftojë për Këpucën e Artë, ndërsa Rubini ëndërron të garojë për titullin. / abcnews.al

Rripi i Gazës po përballet me skenarin më të rëndë të urisë. Paralajmërimi vjen nga mekanizmi kryesor global për matjen e urisë, Iniciativa e Klasifikimit të Fazës së Sigurisë Ushqimore që në raprtin e tyre thonë se ofensiva ushtarake e Izraelit dhe kufizimet e ashpra të ndihmës po shkaktojnë një krizë humanitare të paprecedentë.

“Dëshmitë në rritje tregojnë se uria masive, kequshqyerja dhe sëmundjet po çojnë në rritjen e vdekjeve të lidhura me mungesën e ushqimit,” thuhet në paralajmërimin zyrtar të Iniciativës së Klasifikimit të Fazës së Sigurisë Ushqimore. Megjithatë, institucioni theksoi se ky është një alarm dhe jo një klasifikim përfundimtar dhe zyrtar i urisë.Paralajmërimi vjen në një kohë kur numri i vdekjeve nga uria në territorin palestinez është në rritje, ndërsa komuniteti ndërkombëtar shton presionin ndaj Izraelit për përkeqësimin e situatës humanitare.  Vetë presidenti Amerikan Donald Trump deklaroi nga Mbretëria e Bashkuar se Uria ka mbërthyer Rripin e Gazës ndërkohë që Kryeministri Izraelit Benjamin Netanyahu, aleati I tij thotë se në enklavën palestineze nuk ka rënë Zija e Urisë. Iniciativa e  Klasifikimit të Fazës së Sigurisë Ushqimore kërkoi në alarmin e lëshuar prej saj ndërprerje të menjëhershme të luftimeve dhe lejimin pa ndalim të shpërndarjes së ndihmave humanitare.Sipas të dhënave më të fundit, rreth 470,000 persona në Gaza po përballen me “kushte të ngjashme me urinë”, ndërsa rreth 90,000 gra dhe fëmijë kanë nevojë për ndihmë urgjente ushqimore.

Ministria e Shëndetësisë në Gaza konfirmoi të hënën se pothuajse 150 persona kanë humbur jetën nga kequshqyerja që prej fillimit të luftës, përfshirë të paktën 88 fëmijë. Sipas të njëjtit burim, numri total i të vrarëve në Gaza është afruar në 60,000, me mijëra prej tyre fëmijë.Pas një bllokade 11-javore, Izraeli lejoi ndihma të kufizuara humanitare nga fundi i majit, por sipas organizatave humanitare, niveli i ndihmës së lejuar është shumë larg nga nevoja aktuale. Programi Botëror i Ushqimit ka paralajmëruar se një e treta e popullsisë në Gaza “nuk ha për ditë të tëra”, duke rritur frikën se numri i viktimave do të rritet ndjeshëm në mungesë të reagimit të menjëhershëm.

Edhe kete te marte pauza taktike e luftimeve vijon te jete aktive ne rripin e Gazes ku nga ora 10 e mengjesit deri ne oren 20 do te lejohet kalimi I ndihmave humanitare me kamione si dhe hedhja e tyre nga ajri per civilet palestineze. / abcnews.al

Më shumë se 60,000 palestinezë janë vrarë në Gaza që nga sulmi i 7 tetorit, sipas Ministrisë së Shëndetësisë së drejtuar nga Hamas.

Sulmi izraelit u lançua si hakmarrje për sulmin e Hamasit dhe grupeve të tjera militante, të cilat vranë rreth 1,200 persona dhe morën rreth 250 të tjerë si pengje.

Në 24 orët e fundit, 113 persona janë vrarë dhe 637 janë plagosur, sipas Ministrisë së Shëndetësisë së Hamasit, duke e çuar numrin e palestinezëve të vrarë që nga tetori 2023 në 60,034. Po ashtu, është raportuar se nga këto 113 viktima, 22 janë lidhur me pikë ndihme.

Numri i të vdekurve nuk bën dallim midis ushtareve dhe civilëve.

Ministria shtoi: “Disa viktima ende ndodhen nën rrënoja dhe nëpër rrugë, pasi ekipet e ambulancës dhe mbrojtjes civile nuk mund të arrijnë në ta për momentin.”

Dje 58 ish-ambasadorë të BE-së dënuan “veprimet çnjerëzore të përditshme të Izraelit ndaj popullit palestinez në Gaza”, duke i kërkuar Brukselit të ndërmarrë veprime. Komisioni Evropian reagoi menjëherë. Propozoi pezullimin e pjesshëm të aksesit të Izraelit në programin Horizon dhe fondet për kërkimin shkencor.

Ndërkohë, Holanda u shpreh e gatshme për “masa tregtare” kundër shtetit hebre. Më parë, 35 diplomatë të lartë italianë në pension i kishin dërguar një letër të hapur kryeministres Meloni, duke kërkuar njohjen e shtetit palestinez.

Me këtë qëllim, dje nisi një konferencë treditore në OKB, e drejtuar nga Franca dhe Arabia Saudite (partner kyç i Perëndimit në Lindjen e Mesme), që u bojkotua nga SHBA-të dhe Izraeli.

“Është një shfaqje kundërproduktive që ndihmon Hamasin”, u përgjigj me zemërim Shtëpia e Bardhë.

Samiti, i thirrur në qershor dhe më pas shtyrë për shkak të sulmit izraelit ndaj Iranit, synon të përcaktojë parametrat e një rruge për krijimin e një shteti palestinez, duke garantuar sigurinë e Izraelit.

“Nuk ka alternativë”, deklaroi ministri francez i Jashtëm Jean-Noel Barrot në fjalën e tij në Pallatin e Qelqit, “tani duhen masa konkrete”.

Përveç Parisit, janë 11 vende evropiane që kanë njoftuar njohjen e njëanshme të shtetit palestinez: Suedia, Sllovenia, Spanja, Irlanda, Bullgaria, Qipro, Republika Çeke, Hungaria, Rumania, Polonia dhe Sllovakia.

Po kështu mendojnë 144 vende anëtare të OKB-së nga 193 në total. Italia, si Mbretëria e Bashkuar dhe Gjermania, është ende e rezervuar.

“Nuk është çështje përmbajtjeje, por kohe”, shpjegoi ministri i Jashtëm, Antonio Tajani, pasi kryeministrja Giorgia Meloni e kishte cilësuar iniciativën e Macron si “kundërproduktive”.

Sipas Romës, është i nevojshëm njohja reciproke paraprake e Izraelit në Lindjen e Mesme. Një qëndrim i ngjashëm mban edhe kryeministri britanik Keir Starmer, i cili megjithatë mund të ndryshojë dhe të njohë së shpejti Shtetin e Palestinës, nën presionin e më shumë se 200 deputetëve dhe disa ministrave të rëndësishëm.

Edhe Selia e Shenjtë u përfshi në debat dhe kritikoi Melonin, e cila kishte cilësuar si të parakohshme këtë nismë. “Pse e parakohshme?”, pyeti retorikisht kardinali Pietro Parolin. Bashkëpunëtori i parë i Papës shikon me simpatinë konferencën e OKB-së të nisur nga Franca dhe Sauditë.

“Shpresojmë të sjellë ndonjë fryt”, tha ai. Sekretari i Shtetit të Vatikanit u pyet dje nga gazetarët, në margjinat e Xhubileut të influencerëve katolikë, për vendimin e fundit të Macron për njohjen formale të Palestinës në shtator.

“Ne prej kohësh, siç thoni ju, e kemi bërë këtë”, deklaroi duke adoptuar dialektin romak të bashkëbiseduesve të tij.

“Për ne kjo është zgjidhja, pra njohja e dy shteteve që jetojnë pranë njëri-tjetrit me autonomi, por edhe me bashkëpunim dhe siguri”, tha ai.

Selia e Shenjtë kishte nënshkruar 25 vjet më parë një marrëveshje bazë me Organizatën për Çlirimin e Palestinës (Olp), ndërsa dhjetë vjet më parë, me vullnetin e Papa Françeskut, u nënshkrua marrëveshja me Shtetin palestinez. Qeveria izraelite atëherë shprehu “keqardhjen” e saj.

Kohët e fundit, kolonët izraelitë sulmuan Taybeh, fshatin e fundit të krishterë në Bregun Perëndimor, dhe praninë e tyre nëpër vendbanime, sipas Parolinit, “nuk ndihmon në realizimin e shtetit palestinez”.

Sa i përket kishës në Gaza që u godit nga ushtria izraelite, kardinali, i cili prej ditësh kishte shprehur dyshime mbi rastësinë e incidentit, vuri në dukje se “nëse duhet, mund të gjendet mënyra” për të shmangur atë që Izraeli e quajti “gabim në zjarr”.

Situata në Rripin e Gazës, tha Parolin, “është e paqëndrueshme”.

Gjatë 24 orëve të fundit janë evidentuar 52 vatra zjarri, ndër të cilat 2 janë ende aktive, 4 vatra janë në monitorim dhe 46 janë shuar.

Mbeten aktive vatrat në këto zona:

–           Në zonën perëndimore të tunelit të Skërficës, bashkia Gjirokastër, ku ndërhyrja nuk mundëson futjen e trupave, për shkak të terrenit të thepisur dhe bimësisë shumë të dendur. Ditën e sotme vatra e zjarrit po monitorohet nga MZSH e Bashkisë.

–           Në fshatin Spatharë, bashkia Skrapar,  ku zjarri ka  rënë në një sipërfaqe kullote.  Në vendngjarje ndodhen forca nga të gjitha strukturat operacionale, që po punojnë  për vënien nën kontroll të vatrës.

Në monitorim,  me qëllim shmangien e riaktivizimit  janë vatrat në këto zona:

–           Në Parkun Kombëtar të Prespës, fshati Lajthizë, bashkia Pustec

–           Në fshatin Dishnicë, bashkia Korçë

–           Në fshatin Strelcë, bashkia Maliq

–           Në fshatin Veliq, bashkia Tropojë.

Në operacionet për shuarjen e zjarreve u angazhuan:

–           52 automjete zjarrfikëse

–           722 forca operacionale.

–           Gjithashtu në operacionet e ditës së djeshme morën pjesë dhe 2 helikopterë nga Forcat e Armatosura, që operuan në dy zona.

Sipas informacionit të dërguar nga Instituti i Gjeoshkencave,

sot priten reshje të dobëta deri lokalisht mesatare në qarkun Shkodër, Kukës, Lezhë dhe Durrës, dhe të dobëta në shumicën e qarqeve të vendit.

Për sa u përket zjarreve në pyje

sot pritet nivel rreziku “I LARTË” në qarqet Elbasan, Fier, Berat dhe Korçë, ndërsa në qarqet e tjerë pritet nivel rreziku “I MODERUAR. / abcnews.al

Read More...

Pësoi goditje në tru, Pandeli Gjika është pacienti i parë në vend, që kreu ndërhyrjen e veçantë në kokë.

75 vjeçari, 6 muaj më herët pësoi ishemi cerebrale, për të cilën iu nënshtrua edhe ndërhyrjes kirurgjikale në tru. Si fillim mjekët ndërhynë në qetësimin e trurit, në mënyrë që të ulej edema e enjtur, dhe më pas në rivendosjen e kafkës së munguar gjatë kohës së rikuperimit. Kohë që zgjati plotë 6 muaj.

“Kranoplastika është një ndër procedurat më të rëndësishme tek këta pacientë që pësojn goditje në tru. Sepse pacienti kur bie në gjendjet e para të strokut, ndonjëherë kemi edhe rëndime të pacientit siç mund të ndodh edhe edema malinje të trurit. Për këto rëndime na duhet të bëjm edhe dekompresimin, të relaksojm trurin, në mënyrë që të ulim edemën. Pacienti jonë, është pacienti më me fat, sepse ndërhyrja është kryer shpejt, brenda dy ditëve. Pas 6 muajve, kemi bërë rivendosjen e kafkës, kranoplastikë”, Hasan Bayindir.

Mjekja neurologe, Arlinda Abazaj tregon shenjat me të cilat u paraqit pacienti, nga humbja e vetëdijes, tek paraliza e anës së majtë.

“Pandeli Gjika, i cili ka ardhur urgjencë me shenjat e para të sëmundjes të filluara prej 48 orësh në shtëpi.  Vështirësi në të folur, përgjumje”.

Kjo është ndërhyrja e parë e realizuar me sukses në vendin tonë, dhe kjo falë bashkëpunimit të stafit mjekësor turko shqiptarë në spitalin Memorial të Fierit.

Sipas mjekëve që realizuan ndërhyrjen, pacienti 75 vjeçarë tashmë gëzon shëndet të plotë.

Mjekët theksojn se tek keto nderhyrje neurologjike kraniektomia dekompresive është shumë e rëndësishme që të realizohet në kohën e duhur, pasi çdo vonesë mund të rrezikoj jetën e pacientit.

Kranioplastika është një procedurë e specializuar neurokirurgjikale që aplikohet në raste dëmtimesh traumatike, defekte kongjenitale apo ndërhyrjesh të mëparshme kirurgjikale në tru.

Kjo teknikë ndihmon jo vetëm në rikuperimin estetik dhe funksional të kafkës, por edhe në mbrojtjen e trurit nga dëmtime të mëtejshme. / abcnews.al

Teksa Ballkani dhe Europa janë në luftë me zjarret që kanë shkrumbuar mijëra hektarë dhe kanë detyruar mijëra njerëz të evakuohen, Rumania përballet me një situatë të pazakontë të motit për këtë stinë.

Të paktën tre persona kanë humbur jetën në Rumaninë lindore për shkak të përmbytjeve. Ndërkohë qindra njerëz u evakuuan teksa autoritetet po kërkojnë për persona të zhdukur.

Rreth 25 fshatra në nëntë rajone u goditën nga shirat e rrëmbyeshëm dhe erërat e forta që shkatërruan çatitë dhe shkulën pemët, duke bllokuar qarkullimin në rrugët kombëtare.

Qarqet më të goditura në Rumaninë veriore ishin Neamt dhe Suceava, ku dy lumenj dolën nga shtrati, duke lënë të vdekur një 66-vjeçar dhe duke detyruar qindra njerëz të evakuoheshin.

Agjencia e emergjencave tha gjithashtu se dy gra, të moshës 85 dhe 83-vjeç, gjithashtu humbën jetën si pasojë e përmbytjeve.

Agjencia e menaxhimit të ujërave e Ministrisë së Mjedisit tha se niveli i ujit në dia lumenj u rrit në nivele rekord dhe po vijon puna për riparimin e urave të shembura.

/ abcnews.al

Mbi 120 kamionë me ndihma ushqimore u shpërndanë nga Kombet e Bashkuara dhe disa agjenci në ditën e parë të pauzës humanitare në Gaza. Mediat bëjnë të ditur se 180 kamionë të tjerë kanë hyrë në Rrip, dhe pritet shpërndarja e tyre. Paralelisht, Izraeli, Jordania dhe Emiratet e Bashkuara Arabe kryen dërgesa të vogla ndihmash nga ajri.

Por, pavarësisht kësaj pauze të shpallur nga Izraeli për të lejuar futjen e ndihmës humanitare, të paktën 62 persona kanë vdekur në Gaza vetëm që nga mëngjesi.

“34 prej tyre po prisnin në radhë për t’u furnizuar me ndihma”, raporton Al Jazeera duke cituar burime lokale.

Sekretari i Përgjithshëm i Kombeve të Bashkuara, Antonio Guterres bëri thirrje që uria mos të përdoret kurrë “si armë lufte”.

“Konfliktet vazhdojnë të përhapin urinë në Gaza, Sudan dhe gjetkë. Uria nxit paqëndrueshmërinë dhe minon paqen. Ne kurrë nuk duhet ta pranojmë urinë si armë lufte”, tha Guterres.

Por nga ana tjetër, kryeministri izraelit Benjamin Netanjahu vijon të mohojë krizën e urisë. “Nuk ka politikë urie dhe as zi buke në Gaza”, tha Netanjahu. Madje ai shkoi më tej duke thënë se Izraeli e ka lejuar ndihmën humanitare gjatë gjithë luftës.

Sipas Sky News, gati 100 persona u vranë dje ndërsa kërkonin ndihmë në Gaza. Forcat Mbrojtëse të Izraelit thanë se trupat “qëlluan me të shtëna paralajmëruese për të larguar një kërcënim të menjëhershëm” pasi “një grumbullim prej mijëra njerëzish u identifikua në Rripin verior”. / abcnews.al

Një ngjarje e rëndë tronditi pasditen e të dielës pasagjerët e një fluturimi të kompanisë ajrore Easy Jet që ishte nisur nga Aeroporti Luton I Londrës dhe kishte si destinacion Belfastin, por për shkak të një kërcënimi me bombë u detyrua të bënte ulje emergjente në aeroportin e Glasgow në Skoci.

Gjatë fluturimit, një burrë 41-vjeçar, identiteti i të cilit nuk është bërë ende publik, u ngrit dhe bërtiste me zë të lartë “Allahu Akbarr” ndërsa kërcënonte se kishte një bombë me vete. Dëshmitarët thane se burri bërtit gjithashtu frazat “vdekje e Amerikës” dhe “vdekje e Donald Trump” në një kohë kur presidenti Amerikan po zhvillon një vizitë zyrtare në Mbretërinë e Bashkuar.

Pas këtyre deklaratave burri hyri me force në tualetin e Avionit. Nën panik një grup pasagjerësh pritën daljen e tij nga tualeti dhe më pas ndërhynë me vendosmëri duke e neutralizuar burrin dhe duke e mbajtur të lidhur me rripa sigurie deri në uljen emergjente të avionit në Glasgou.

Në aeroport, policia skoceze ka arrestuar menjëherë të dyshuarin. Pas një kontrolli të imtësishëm, autoritetet konfirmuan se nuk u gjet asnjë eksploziv në bordin e avionit. Zedhenesi I policise Skoceze tha se ngjarja po hetohet si një incident me motiv të mundshëm terrorist.

Fatmirësisht, asnjë prej udhëtarëve nuk pësoi lëndime, ndërsa reagimi i shpejtë i tyre dhe i ekuipazhit u vlerësua si vendimtar për parandalimin e një tragjedie të mundshme.

41 vjecari pritet të dale përpara gjykatës ku do të njihet me akuzat që rëndojnë ndaj tij.

Loja e dominove eshte kthyer ne nje perleshje mes dy te moshuareve, perplasje qe degradoi deri ne perdorimin e armeve te ftohta.

Burime nga policia thone per ABC News se ngjarja ka ndodhur rreth ores 15.00 te mesdites se kesaj te hene ne qender te qytetit te Durresit ne sheshin “Pranvera”. Ne vendin e ngjarjes kane mberritur disa patrulla policie dhe nja autambulance qe transportoi drejt spitalit te Durresit te plagosurin.

Policia ka nisur hetimet dhe ka shoqeruar autorin e dyshuar te cilin po e pyet ne lidhje me motivin e konfliktit dhe dinamiken e ngjarjes. /abcnews.al

Presidenti i SHBA, Donald Trump, ka njoftuar një afat të ri të shkurtuar prej 10 deri në 12 ditësh për Rusinë që të ndërmarrë hapa konkretë për t’i dhënë fund luftës në Ukrainë, duke shprehur pakënaqësinë e tij me mungesën e përparimit në terren.

I pyetur nga gazetarët për deklaratat e mëparshme mbi afatin 50-ditor, Trump tha:

“Do të vendos një afat të ri, rreth 10 ose 12 ditë që nga sot. Nuk ka arsye për të pritur më… nuk po shohim asnjë përparim të vërtetë.”

Ky reagim vjen pas deklaratës së tij të mëparshme, ku presidenti amerikan u shpreh “shumë i zhgënjyer” me Vladimir Putinin, për shkak të sulmeve të fundit ruse në qytete si Kievi, ku pati viktima civile, përfshirë në një shtëpi pleqsh.

Trump kishte kërcënuar më herët gjatë këtij muaji me “tarifa të ashpra” deri në 100% ndaj Rusisë, nëse nuk arrihet një marrëveshje paqeje brenda afatit fillestar 50-ditor.

Me këtë paralajmërim të ri, Trump rrit ndjeshëm presionet mbi Kremlinin, duke kërkuar veprim të menjëhershëm për t’i dhënë fund një lufte që ka shkaktuar mijëra viktima dhe ka trazuar stabilitetin global. / abcnews.al

Si rezultat i veprimeve hetimore për dokumentimin e rasteve të zjarrvënieve dhe nxjerrjen përpara përgjegjësisë ligjore të autorëve, specialistët për Hetimin e Krimeve të Komisariatit të Policisë Sarandë referuan materialet procedurale në Prokurori, për shtetasin:

F.M., 70 vjeç, banues në fshatin Markat, Konispol.

Nga hetimet paraprake dyshohet se ky shtetas, më datë 26.07.2025, rreth orës 09:00, ka ndezur zjarr me qëllim pastrimin e një pjese toke kullotë në malin e fshatit Markat dhe, si pasojë e përhapjes së flakëve nga era e fortë, është djegur një sipërfaqe prej 3.5 hektarësh me barishte dhe shkurre. Zjarri është përhapur edhe në territorin e banuar të fshatit, ku ka shkaktuar djegien e një stalle me bagëti të imta (10 krerë dele) dhe një koteci me shpendë. / abcnews.al

Çmimet e naftës u rritën të hënën pas marrëveshjes tregtare të arritur mes Shteteve të Bashkuara të Amerikës dhe Bashkimit Europian, duke lehtësuar shqetësimet se tarifat e larta mund të dëmtonin aktivitetin ekonomik dhe të kufizonin kërkesën për karburante.

Kontratat feature të naftës brent u rritën më 0.8%, duke arritur në 69 dollarë për fuçi. Çmimet e naftës u mbështetën edhe nga pritshmëritë pozitive për një zgjatje të mundshme të afatit të tarifave të SHBA ndaj Kinës.

Të hënën pritet që negociatorët e nivelit të lartë të dy vendeve të zhvillojnë një takim në Stokholm, ku synohet zgjatja e afatit të tarifave më 12 gusht, jo më 1 gusht siç presidenti amerikan Donald Trump ka përcaktuar si datë për nisjen e zbatimit.

Çmimet e naftës prekën të premten e kaluar nivelin më të ulët në tre javë, të ndikuara nga shqetësimet në rritje për tregtinë globale. ndërkohë, ecuria e tyre do të varet në vijim edhe nga vendimi i Organizatës së Vendeve Eksportuese të naftës dhe aleatëve, por dhe tensionet në Lindjen e Mesme.

Sipas analistëve të tregut, nuk ka gjasa që të ndryshojnë planet aktuale për rritjen e prodhimit të naftës me 548 mijë fuçi në ditë në gusht, por burime pranë organizimit thanë se është ende herët për ta thënë këtë.

Analistët e JP Morgan thanë se kërkesa globale për naftë u rrit me 600,000 fuçi në ditë në korrik në krahasim me të njëjtën periudhë të një viti më parë, ndërsa rezervat globale të naftës u rritën me 1.6 milion fuçi në ditë.

Në Lindjen e Mesme, Huthet e Jemenit thanë të dielën se do të shënjestrojnë anijet e kompanive që bëjnë biznes me portet izraelite, pavarësisht kombësisë, në atë që e quajtën një fazë e katërt e operacioneve ushtarake kundër Izraelit për shkak të konfliktit në Gaza.

Kantieri i rrugës Shirokë – Zogaj në Shkodër, ku punimet po vijojnë me ritme të shpejta për zgjerimin e këtij segmenti, një investim i rëndësishëm infrastrukturor që jo vetëm nxit zhvillimin e turizmit në zonë, por edhe lidh Shqipërinë me Malin e Zi.

/ abcnews.al

Komisariati i Policisë Librazhd, në bashkëpunim me Sektorin për Hetimin e Krimeve të Rënda të DVP Elbasan, në vijim të punës për goditjen e veprimtarisë kriminale në fushën e vjedhjes së pronës dhe pasurisë, si rezultat i veprimeve të shpejta hetimore të kryera me metoda proaktive, në drejtimin e Prokurorisë së Elbasanit, ka finalizuar operacionin policor të koduar “Partners in crime”.

Si rezultat i këtij operacioni është bërë i mundur identifikimi, kapja dhe arrestimi në flagrancë i shtetasve:

V.K., 32 vjeç, banues në Shkodër dhe M. K., 33 vjeçe, banuese në Tiranë, për veprën penale “Vjedhja me dhunë”, kryer në bashkëpunim;

E.Sh., 40 vjeç, banues në Pogradec, për veprën penale “Përvetësimi i parave ose mallrave të vjedhura”.

Nga hetimet e kryera gjatë operacionit dyshohet se shtetasit M. K. dhe V. K., në bashkëpunim me njëri-tjetrin, kanë kryer 2 vjedhje në fshatin Sheje, konkretisht:

-Më datë 25.07.2025, i kanë marrë me dhunë portofolin me një shumë parash, një 68-vjeçari, i cili është dëmtuar lehtë;

-Më datë 27.07.2025, i kanë marrë me dhunë çantën dhe celularin, një 62-vjeçareje, e cila është dëmtuar lehtë. Ajo ka marrë mjekim në spitalin e Librazhdit dhe është jashtë rrezikut për jetën.

Celularin që ia kanë vjedhur 62-vjeçares, ata ia shitur shtetasit E. Sh.

Gjatë operacionit janë sekuestruar celulari i blerë nga shtetasi E. Sh. dhe 3 celularë që i janë gjetur autorëve, të cilët dyshohen të vjedhur, çanta e vjedhur, automjeti që përdornin autorët, të cilin e kishte marrë me qira shtetasiV. K. dhe veshje të ndryshme që dyshohet se ata i përdornin gjatë vjedhjeve. / abcnews.al

Presidenti i SHBA, Donald Trump, ka shprehur zhgënjimin e tij të thellë ndaj presidentit rus Vladimir Putin, duke kërcënuar se do të shkurtojë afatin 50-ditor që i kishte dhënë më herët Moskës për të arritur një marrëveshje paqeje në Ukrainë.

Duke folur për mediat në Skoci, pak para se të hynte në ambientet e brendshme pas një takimi me kryeministrin britanik Sir Keir Starmer, Trump u ndal tek lufta mes Rusisë dhe Ukrainës – një konflikt për të cilin ai ka premtuar vazhdimisht se do ta përfundojë brenda një dite nëse rizgjidhet.

“Nëse unë nuk do të isha këtu, do të kishit gjashtë luftëra të mëdha në botë,” deklaroi Trump, duke iu referuar ndikimit të tij si faktor stabiliteti.

Më pas, ai foli për zhvillimet më të fundit në Ukrainë:

“Ne kemi pasur diskutime, ti dhe unë [drejtuar Starmer], dhe kemi menduar disa herë se kishim arritur një zgjidhje. Dhe pastaj presidenti Putin del dhe nis të hedhë raketa në ndonjë qytet si Kievi dhe vret një numër të madh njerëzish.”

Trump u shpreh se është “shumë i zhgënjyer” me Putinin dhe shtoi se do të rishikojë afatin 50-ditor që kishte vendosur për të gjetur një zgjidhje paqësore:

“Do ta ul këtë afat, sepse mendoj se tashmë e di përgjigjen,” tha ai.

Më herët gjatë muajit, Trump kishte paralajmëruar taksat e ashpra ndaj Rusisë, duke përmendur tarifa rreth 100%, nëse nuk arrihet një marrëveshje për t’i dhënë fund luftës brenda afatit të vendosur. / abcnews.al