TEL AVIV, 14 korrik /ATSH-DPA/ – Partitë ultraortodokse izraelite po kërcënojnë përsëri të tërhiqen nga qeveria e kryeministrit Benjamin Netanyahu për shkak të planeve për shërbimin e detyrueshëm ushtarak.

Gazeta “Haaretz” raportoi se dy parti, ”Shas” dhe ”United Torah Judaism”, po planifikojnë të braktisin koalicionin nëse përjashtimet për burrat ultraortodoksë hebrenj nuk përfshihen në legjislacionin mbi shërbimin ushtarak.

Koalicioni i Netanyahut ka një shumicë të ngushtë në Knesset, parlamenti izraelit, me  68 nga 120 vende.

Çështja e rekrutimit të burrave shumë fetarë izraelitë në ushtri ka qenë një pikë tensioni prej kohësh për koalicionin e Netanyahut.

Kjo është rikthyer në agjendë për shkak të luftës në Gaza, me komandantët që paralajmërojnë për një mungesë urgjente të ushtarëve të gatshëm për luftë.

Ndërsa anëtarët e komuniteteve ultraortodokse janë përjashtuar nga shërbimi i detyrueshëm ushtarak për dekada të tëra, përjashtimi skadoi vitin e kaluar dhe qeveria nuk ka arritur të miratojë një ligj të ri për të çimentuar statusin e veçantë.

Gjykata Supreme lëshoi një vendim vitin e kaluar që burrat ultraortodoksë hebrenj duhet të rekrutohen në shërbim ushtarak./   /Ad.Ab./

The post IZRAEL – Partitë ultraortodokse mund të largohen nga koalicioni appeared first on Agjencia Telegrafike Shqiptare.

KIEV, 14 korrik /ATSH-ANSA/ – Presidenti ukrainas, Volodymyr Zelensky ka propozuar që ministrja aktuale e Ekonomisë, Yulia Svyrydenko të udhëheqë qeverinë ukrainase për të rinovuar degën ekzekutive, sipas asaj që lideri ukrainas shkroi në Telegram.

“Po fillojmë një transformim të degës ekzekutive në Ukrainë. Kam propozuar që Yulia Svyrydenko të udhëheqë qeverinë ukrainase dhe të përditësojë ndjeshëm punën e saj”, shkroi Zelensky.
“Pres me padurim të paraqes programin e veprimit të qeverisë së re në të ardhmen e afërt”, shtoi ai.

Ditët e fundit, Zelensky njoftoi riorganizimin e kabinetit dhe duket se ministri i Mbrojtjes, Umerov do të bëhet ambasadori i ardhshëm ukrainas në Shtetet e Bashkuara.

“Me Svyrydenkon ndajmë një raport mbi zbatimin e marrëveshjeve me partnerët evropianë dhe amerikanë në mbështetje të Ukrainës, të arritura në konferencën e fundit mbi rindërtimin e Ukrainës. Ne duhet të zbatojmë sa më shpejt të jetë e mundur gjithçka që mund të mbështesë stabilitetin e shtetit dhe shoqërisë sonë”, theksoi presidenti ukrainas./ /Ad.Ab/

The post KIEV – Zelensky propozon Yulia Svyrydenko në postin e kryeministres appeared first on Agjencia Telegrafike Shqiptare.

KIEV, 14 korrik /ATSH–DPA/ – I dërguari special i SHBA-së, Keith Kellogg mbërriti sot në Kiev për bisedime me udhëheqësit ukrainas, mes shenjave se mbështetja e Uashingtonit për Ukrainën po forcohet.

Kellogg u prit nga Andriy Yermak, kreu i zyrës së presidentit ukrainas, Volodymyr Zelensky.

“Ka shumë tema për bisedime”, tha Yermak në një postim në Telegram me fotografi të mbërritjes së diplomatit amerikan.

Yermak tha se bisedimet do të përqendroheshin në fushën e mbrojtjes, rritjes së sigurisë, armëve dhe bashkëpunimit të zgjeruar midis Ukrainës dhe Shteteve të Bashkuara.

Vizita vjen ndërsa qëndrimi i presidentit të SHBA-së Donald Trump mbi konfliktin e Ukrainës duket se po ndryshon, pas muajsh përpjekjesh të pasuksesshme për të siguruar një armëpushim në konflikt.

Ai kritikoi dje presidentin rus Vladimir Putin, duke thënë se “ai flet mirë dhe pastaj i bombardon të gjithë në mbrëmje. Pra, ka një problem të vogël atje”.

Trump tha se synon të autorizojë shitjen e sistemeve mbrojtëse raketore ”Patriot” te Bashkimi Evropian, i cili më pas do t’ia furnizonte ato Ukrainës.

Në një shenjë të mëtejshme se mbështetja për Ukrainën po forcohet potencialisht, sekretari i përgjithshëm i NATO-s, Mark Rutte, ndodhet në Uashington për bisedime me presidentin Trump./   /Ad.Ab./

The post FOKUS – Kellogg mbërrin në Kiev për bisedime me liderët ukrainas appeared first on Agjencia Telegrafike Shqiptare.

DYSELDORF, 14 korrik /ATSH-DPA/ – Mesfushori Granit Xhaka mund të jetë lojtari i fundit që largohet nga nënkampionëy e Bundesligës, Bayer Leverkusen, sipas raporteve të shumta gjermane.

“Sky TV” tha se 32-vjeçari zviceran me origjinë shqiptare ka “një marrëveshje verbale në parim” me klubin e Ligës Profesionale Saudite, Neom SC, për një transferim gjatë verës.

Gazeta “Bild” dhe revista sportive “Kicker” raportuan gjithashtu interesin e Neom SC.

“Sky” tha se Neom e ka informuar Leverkusenin për qëllimet e tij, me një tarifë transferimi të vlerësuar në 6,0 milionë euro për Xhakën, i cili ka një kontratë me Leverkusenin deri në vitin 2028.

Ende nuk ka marrëveshje midis klubeve, por Sky tha se bisedimet për vendimmarrjen mund të zhvillohen sot.

Nuk ishte e qartë nëse Xhaka do t’i bashkohej Leverkusenit sot  në një udhëtim në Rio de Zhaneiro për një kamp stërvitor 10-ditor.

Leverkusen tashmë ka humbur trajnerin Xabi Alonso i cili shkoi te Real Madridi, organizatorin e lojës Florian Wirtz dhe mbrojtësin e djathtë Jeremie Frimpong që shkuan te Liverpooli, dhe qendërmbrojtësin Jonathan Tah te Bayern Munich.

Leverkuseni ka sjellë gjithashtu përforcime, të udhëhequra nga organizatori i lojës Malik Tillman, i cili erdhi nga kampionët holandezë PSV Eindhoven./  /Ad.Ab./

The post GJERMANI – Xhaka drejt sauditëve të Neom SC? appeared first on Agjencia Telegrafike Shqiptare.

BRUKSEL, 14 korrik /ATSH-DPA/ – Tarifat e shpallura të SHBA-së prej 30% mbi importet nga Bashkimi Evropian do të ndikojnë rëndë në tregtinë dhe zinxhirët e furnizimit transatlantik, paralajmëron negociatori kryesor i tregtisë i BE-së.

“Do të ketë një ndikim të madh në tregti. Do të jetë pothuajse e pamundur të vazhdojmë tregtinë siç jemi mësuar në një marrëdhënie transatlantike”, tha komisioneri i Tregtisë i BE-së Maros Sefcovic në lidhje me kërcënimin e rritjes së tarifave nga 1 gushti.

“Kjo e ndalon tregtinë”, theksoi Sefcovic, i cili kryeson ekipin negociator të BE-së në mosmarrëveshjen tregtare me Uashingtonin.

“Zinxhirët e furnizimit transatlantik do të preken rëndë në të dyja anët e Atlantikut”, tha ai, duke shtuar se ”edhe SHBA-ja nuk do ta donte një skenar të tillë”.

BE-ja po tregonte “durim të jashtëzakonshëm, kreativitet të jashtëzakonshëm për të gjetur zgjidhjet” me SHBA-në, tha ai.

Njoftimi i presidentit Donald Trump se po vendos tarifa shtesë erdhi ndërsa negociatorët e BE-së shpresonin se ishte e arritshme një marrëveshje.

Pavarësisht zhgënjimit, Sefcovic ende synon  arritjen e një zgjidhjeje, duke njoftuar bisedime të reja me homologët e tij amerikanë.

“Nuk mund ta imagjinoj të largohem pa përpjekje të vërteta”, shtoi ai.

Sefcovic po merr pjesë në një takim të ministrave të tregtisë së BE-së në Bruksel. Komisioneri tha se do të diskutojë kundërmasat e mundshme me ministrat për t’u përgatitur në rast se negociatat dështojnë./  /Ad.Ab./

The post BRUKSEL – Sefcovic: Tarifat e reja të SHBA-së mbi importet e BE-së do të pengonin tregtinë appeared first on Agjencia Telegrafike Shqiptare.

PARIS, 14 korrik  /ATSH/ – Presidenti francez, Emmanuel Macron ka paraqitur planet për një rritje të madhe të shpenzimeve për mbrojtjen, duke paralajmëruar se liria e Evropës po përballet me një “kërcënim më të madh” se kurrë më parë që nga fundi i Luftës së Dytë Botërore, sipas BBC.

Në një fjalim drejtuar forcave të armatosura në Paris, ai tha se “po jetojmë në një moment vendimtar” për shkak të gjendjes komplekse gjeopolitike.

Macron kërkoi që shpenzimet për mbrojtjen e Francës të rriten me 3,5 miliardë euro vitin e ardhshëm dhe më pas edhe me 3,0 miliardë euro të tjera në vitin 2027.

Duke iu referuar kërcënimit nga Rusia, ai dënoi “politikat imperialiste” dhe “fuqitë që aneksojnë territore”.

Macron premtoi të dyfishojë buxhetin ushtarak të Francës deri në vitin 2027, tre vjet më herët nga sa ishte planifikuar fillimisht.

Në vitin 2017, buxheti i mbrojtjes ishte 32 miliardë euro dhe sipas planeve do të arrijë në 64 miliardë euro për dy vjet.

Këto propozime duhet ende të miratohen nga qeveria franceze.

“Që të jesh i lirë në këtë botë, duhet të jesh i frikshëm. Që të jesh i frikshëm, duhet të jesh i fuqishëm”, tha ai në fjalim, i cili u mbajt në prag të Ditës së Bastijës.

Macron tha se bota po përjeton rikthimin e fuqisë bërthamore dhe “përhapjen e konflikteve të mëdha”.

Ai përmendi gjithashtu bombardimin amerikan të Iranit, luftimet mes Indisë dhe Pakistanit dhe atë që e quajti “luhatjet e mbështetjes amerikane për Ukrainën”.

Muajin e kaluar, vendet anëtare të NATO-s ranë dakord të angazhohen që të shpenzojnë 5% të PBB-së çdo vit për mbrojtje, nga objektivi i mëparshëm prej 2%./  /Ad.Ab./

The post FRANCË – Macron: Liria e Evropës po përballet me sfidat më të mëdha që nga LIIB appeared first on Agjencia Telegrafike Shqiptare.

UASHINGTON, 14 korrik /ATSH-DPA/  – Presidenti i SHBA-së Donald Trump tha se synon t’i shesë Bashkimit Evropian raketat “Patriot”, që më pas blloku i 27 vendeve t’ia japë Ukrainës.

Duke folur me gazetarët në aeroportin ushtarak të bazës ”Andrews”, pranë Uashingtonit, Trump e përshkroi marrëveshjen si një transaksion biznesi, duke thënë se “Bashkimi Evropian po paguan për to. Ne nuk po paguajmë asgjë për to, por do t’ua dërgojmë… do t’u dërgojmë atyre sisteme ‘Patriot”.

“Nuk kam rënë dakord ende për numrin, por ata do të kenë disa sepse kanë nevojë për mbrojtje”, shtoi ai.

Presidenti amerikan nuk tha se cilat vende të BE-së do të paguanin për armët dhe as nuk dha detaje./  /Ad.Ab./

The post SHBA – Trump: Do t’i shesim BE-së raketat ”Patriot” për Ukrainën appeared first on Agjencia Telegrafike Shqiptare.

PRAGË, 12 korrik /ATSH/ – Kryeministri i Sllovakisë, Robert Fico deklaroi sot se vendi synon të arrijë deri të martën një marrëveshje me Komisionin Evropian dhe partnerët e BE-së për të siguruar garanci që nuk do të ketë pësoja nga ndërprerja e furnizimit me gaz rus si dhe për paketën e re të sanksioneve kundër Rusisë, sipas Reuters.

Sllovakia ka bllokuar paketën e 18-të të sanksioneve për shkak të mosmarrëveshjes me një propozim të veçantë të Komisionit që parashikon ndërprerjen e të gjitha importeve të gazit rus nga viti 2028.

Sipas Sllovakisë, kjo mund të shkaktojë mungesa, rritje të çmimeve dhe tarifave të tranzitit si dhe pretendime për dëmshpërblim nga furnizuesi rus ”Gazprom”. /Ad.Ab./  a.jor.

The post SLLOVAKI – Fico: Synojmë marrëveshje për ndërprerjen e furnizimeve me gaz rus appeared first on Agjencia Telegrafike Shqiptare.

BOGOTA, 12 korrik /ATSH/ – Autoritetet kolumbiane njoftuan se kanë kapur një drejtues të dyshuar të mafies italiane “Ndrangheta” në Amerikën Latine, i akuzuar për drejtimin e dërgesave të kokainës dhe për menaxhimin e rrugëve të trafikut të paligjshëm drejt Evropës, sipas AP.

Policia e identifikoi të dyshuarin si Giuseppe Palermo, i njohur edhe me emrin “Peppe”, një shtetas italian i kërkuar me urdhër arresti ndërkombëtar të Interpol-it në 196 shtete.

”Ai u arrestua në rrugë në kryeqytetin kolumbian, Bogota, gjatë një operacioni të koordinuar mes autoriteteve kolumbiane, italiane dhe britanike, si dhe agjencisë së zbatimit të ligjit të Bashkimit Evropian, Europol”, sipas një raporti zyrtar.

”Palermoja besohet se është pjesë e një prej bërthamave më të forta dhe më të lidhura të mafies ‘Ndrangheta”, tha kreu i policisë kolumbiane, Carlos Fernando Triana, në një postim në platformën X.

“Ndrangheta”, një nga organizatat kriminale më të fuqishme dhe më të fshehta të Italisë, ka shtrirë ndikimin e saj edhe jashtë vendit dhe akuzohet gjerësisht për importimin e kokainës në Evropë.

”I dyshuari jo vetëm që drejtonte blerjen e dërgesave të mëdha të kokainës në Kolumbi, Peru dhe Ekuador, por kontrollonte gjithashtu edhe rrugët detare dhe tokësore që përdoren për transportimin e drogës drejt tregjeve evropiane”, shtoi Triana./   /Ad.Ab./  a.jor.

The post KOLUMBI – Arrestohet një nga drejtuesit e dyshuar të “Ndrangheta”-s appeared first on Agjencia Telegrafike Shqiptare.

MOSKË, 12 korrik /ATSH-DPA/ – Ministri i Jashtëm rus, Sergei Lavrov vlerësoi sot aleancën ushtarake me Korenë e Veriut, gjatë një vizite në këtë vend të mbyllur diktatorial.

“Miqtë tanë koreanë kanë riafirmuar mbështetjen e tyre të pakushtëzuar për të gjitha objektivat e operacionit special ushtarak dhe veprimet e udhëheqjes dhe ushtrisë ruse”, tha Lavrov, duke përdorur termin që Kremlini përdor për pushtimin e Ukrainës e që ka nisur prej më shumë se tre vitesh.

Koreja e Veriut e ka mbështetur luftën e Rusisë kundër Ukrainës duke i dërguar Moskës armë dhe ushtarë.

Bisedimet e ministrit Lavrov me homologen e tij koreano-veriore, Choe Son Hui, në qytetin portual Wonsan u zhvilluan në sfondin e raportimeve mediatike për një dërgim të ri të ushtarëve koreanoveriorë në Rusi.

Ushtarë nga Koreja e Veriut janë dislokuar në rajonin perëndimor rus të Kurskut, për të rimarrë pjesë të zonës që ishin zënë nga trupat ukrainase.

Edhe pse u desh kohë që ky dislokim të njihej zyrtarisht, në fund të qershorit televizioni shtetëror i Koresë së Veriut, KCTV, transmetoi pamje ku udhëheqësi Kim Jong Un vendoste flamurin koreano-verior mbi një arkivol duke nderuar me gjasë ushtarë që humbën jetën në luftën në Ukrainë.

Në kryeqytetin koreano-verior, Phenian, Lavrov falënderoi Korenë e Veriut për ndihmën dhe shpalli se në Kursk do të ngrihet një memorial për ushtarët koreanoveriorë të rënë ne Ukrainë./ /Ad.Ab./ a.jor.

The post RUSI – Lavrov: Koreja e Veriut mbështet plotësisht qëllimet e pushtimit të Ukrainës appeared first on Agjencia Telegrafike Shqiptare.

LOS ANXHELES, 12 korrik /ATSH/ – Një gjykatëse federale mori dje vendimin se Departamenti i Sigurisë Kombëtare (DHS) ka kryer ndalime dhe arrestime gjatë kontrolleve të emigracionit në Los Anxheles pa pasur dyshime të arsyeshme dhe urdhëroi që të ndalohen ndalimet që bazohen vetëm mbi racën, gjuhën e folur apo profesionin e personave, sipas CNN.

Gjykatësja e Distriktit, Maame Ewusi-Mensah Frimpong, e emëruar nga ish-presidenti Joe Biden, urdhëroi që DHS të hartojë udhëzime të qarta për oficerët, për të përcaktuar “dyshimin e arsyeshëm” pa u mbështetur tek raca apo etnia e dukshme, gjuha apo theksi, “prania në një vend të caktuar”  apo “lloji i punës që dikush bën”.

Vendimi erdhi pasi Unioni Amerikan për Liritë Civile (ACLU)  në Kaliforninë Jugore paditi javën e kaluar administratën Trump në emër të pesë personave dhe disa organizatave që mbrojnë të drejtat e emigrantëve, duke pretenduar se DHS, i cili mbikëqyr Shërbimin e Emigracionit dhe Doganave (ICE), kanë kryer arrestime antikushtetuese dhe ka penguar të ndaluarit të kenë qasje te avokatët e tyre.

Vendimi është i kufizuar vetëm në juridiksionin e Qarkut Qendror të Kalifornisë, që përfshin Los Anxhelesin dhe rrethinat.

Në vendimin e saj, Frimpong shkroi se gjykata duhej të vendoste nëse paditësit mund të provonin që administrata Trump ”po kryen patrullime lëvizëse pa dyshime të arsyeshme dhe po mohon qasjen te avokatët”.

Gjykatësja shtoi se administrata ”dështoi” të japë informacion mbi bazën ligjore të arrestimeve të kryera./   /Ad.Ab./  a.jor.

The post SHBA – Gjykata urdhëron administratën Trump të ndalojë arrestimet e emigrantëve pa shkak të besueshëm appeared first on Agjencia Telegrafike Shqiptare.

KIEV, 12 korrik /ATSH-DPA/ – Rusia kreu një valë sulmesh me raketa dhe dronë gjatë natës në Ukrainën perëndimore, duke goditur zona larg vijës së frontit, njoftuan sot mediet dhe zyrtarë ukrainas.

Sipas tyre, numri i kombinuar i dronëve dhe raketave ishte 623.

Sipas gazetës “The Kyiv Independent” ka pasur shpërthime në qytetin Lviv, pranë kufirit me Poloninë, dhe në Chernivtsi, afër kufirit me Rumaninë.

Gjithashtu, transmetuesi publik “Suspilne” njoftoi për një shpërthim të fuqishëm në qytetin veriperëndimor të Lutskit.

”Në Lviv, një ndërtesë u përfshi nga flakët pas sulmeve”, bëri të ditur kryebashkiaku Andriy Sadovyi përmes një postimi në Telegram.

”Forcat ajrore ukrainase kishin paralajmëruar më herët për raketa balistike dhe dronë që po vinin nga Rusia drejt perëndimit”, raportoi “The Kyiv Independent”.

Sipas burimeve zyrtare, dronë u panë gjithashtu duke iu afruar rajoneve Ternopil dhe Volyn.

Polonia, fqinja perëndimore e Ukrainës, ngriti avionë luftarakë për të mbrojtur hapësirën e saj ajrore gjatë sulmeve, njoftuan Forcat e Armatosura Polake në platformën X./   /Ad.Ab./ a.jor.

The post KIEV – Rusia lëshon 623 dronë dhe raketa kundër Ukrainës appeared first on Agjencia Telegrafike Shqiptare.

UASHINGTON, 12 korrik /ATSH-DPA/ – Sekretari amerikan i Shtetit, Marco Rubio mori dje vendimin për kufizime udhëtimi ndaj presidentit kuban, Miguel Díaz-Canel lidhur me rolin e tij në shtypjen e protestave masive në vitin 2021.

Rubio tha se ”SHBA po kufizon vizat për figurat kryesore të regjimit kuban, presidentin Díaz-Canel, ministrin e Forcave të Armatosura Revolucionare, Alvaro López Miera, ministrin e Brendshëm, Lazaro Álvarez Casas dhe të afërmit e tyre lidhur me përfshirjen  e tyre  në brutalitetin e regjimit kuban ndaj popullit të Kubës”.

Këto sanksione do të prekin edhe familjarët e afërt të këtyre liderëve.

“Departamenti i Shtetit gjithashtu shtoi ndërtesën e kontrolluar nga regjimi ‘Torre K’ në listën e kufizimeve për Kubën, për të penguar që dollarët amerikanë të financojnë shtypjen nga regjimi kuban”, shkroi Rubio në një postim në platformën X.

“Ndërkohë që populli kuban vuan nga mungesa e ushqimit, ujit, ilaçeve dhe energjisë elektrike, regjimi shpërdoron paratë për të pasuruar njerëzit e vet të brendshëm”, shtoi Rubio.

Ministri i Jashtëm kuban, Bruno Rodríguez reagoi në X, duke thënë se “SHBA ka kapacitetin të vendosë sanksione udhëtimi kundër liderëve revolucionarë dhe të zhvillojë një luftë të gjatë dhe të pamëshirshme ekonomike kundër Kubë, por nuk ka kapacitetin të thyejë vullnetin e këtij populli apo të drejtuesve të tij”.

Në korrik të vitit 202, në disa qytete u mbajtën protesta për liri dhe kundër shtypjes dhe keqmenaxhimit politik.

Pas protestave masive, qindra demonstrues u dënuan me burg./  /Ad.Ab./ a.jor.

The post UASHINGTON – SHBA vendos sanksione ndaj liderëve të Kubës appeared first on Agjencia Telegrafike Shqiptare.

KOPENHAGË, 11 korrik /ATSH/ – Qeveria daneze do të ashpërsojë masat kundër krijimit dhe shpërndarjes së imazheve të rreme “deepfake” të gjeneruara nga inteligjenca artificiale – duke ndryshuar ligjin e të drejtave të autorit – për të garantuar që çdo individ të ketë të drejtën mbi trupin, tiparet dhe zërin e tij, sipas “The Guardian”.

Qeveria daneze tha se do të forcojë mbrojtjen kundër imitimeve digjitale të identitetit të njerëzve – në atë që besohet të jetë ligji i parë i këtij lloji në Evropë.

Pas një marrëveshjeje të gjerë mes partive politike, Ministria e Kulturës planifikon të paraqesë një propozim për konsultim para pushimeve të verës dhe më pas ta dorëzojë për miratim në vjeshtë.

“Projektligji dërgon një mesazh të qartë se të gjithë kanë të drejtë mbi trupin, zërin dhe tiparet e tyre, gjë që duket se nuk mbrohet nga ligji aktual kundër IA-së gjenerative”, tha ministri danez i Kulturës, Jakob Engel-Schmidt.

Kjo masë, që besohet të ketë mbështetjen e rreth 90% deputetëve, vjen mes zhvillimeve të shpejta të teknologjisë së IA-së – e cila e ka bërë më të lehtë se kurrë krijimin e një imazhi, videoje ose audioje të rreme që imiton dikë tjetër. /Ad.Ab./ /a.i/

The post Danimarka masa të ashpra kundër imazheve “deepfake” appeared first on Agjencia Telegrafike Shqiptare.

BEJRUT, 11 korrik /ATSH/ – Libani nuk ka në plan të normalizojë marrëdhëniet me Izraelin për momentin, dhe synimi kryesor i Bejrutit është të arrijë një “gjendje pa lufte” me fqinjën e tij jugor, tha sot presidenti i vendit, sipas AP.

Komentet e presidentit Joseph Aoun erdhën ndërkohë që administrata Trump po përpiqet të zgjerojë marrëveshjet Abraham të nënshkruara në vitin 2020, ku Izraeli arriti marrëveshje historike me Emiratet e Bashkuara Arabe dhe Bahreinin.

Në maj, presidenti sirian Ahmad al-Sharaa tha gjatë një vizite në Francë se vendi i tij po zhvillon bisedime indirekte me Izraelin për të parandaluar që aktivitetet ushtarake përgjatë kufirit të tyre të dalin jashtë kontrollit. Bisedimet për paqe midis Izraelit dhe Sirisë janë shtuar pas rrëzimit nga pushteti të presidentit Bashar Assad në dhjetor.

Aoun shtoi në komentet e shpërndara nga zyra e tij se vetëm shteti libanez do të ketë armë në të ardhmen, dhe vendimin nëse Libani do të hyjë në luftë apo jo do ta marrë qeveria libaneze.

“Paqja është gjendja e mungesës së luftës dhe kjo është ajo që ka rëndësi për ne në Liban për momentin,” citohet të ketë thënë Aoun për vizitorët të premten. Ai shtoi gjithashtu se “çështja e normalizimit (me Izraelin) nuk përfshihet në politikën e jashtme aktuale të Libanit”. /Ad.Ab./

The post BEJRUT – Presidenti Aoun: Libani nuk ka në plan të normalizojë marrëdhëniet me Izraelin appeared first on Agjencia Telegrafike Shqiptare.

KIEV, 11 korrik /ATSH -DPA/ – Presidenti ukrainas Volodymyr Zelensky tha se i janë premtuar dërgesa të reja armësh nga Shtetet e Bashkuara të Amerikës  dhe aleatët evropianë.

“Sipas të gjitha raporteve  kanë rifilluar dërgesat e (pezulluara) të armëve”, tha  Zelensky sot në një  videomesazh.

Për javën e ardhshme janë planifikuar bisedime mbi mbështetjen ushtarake, ndër të tjera, me të dërguarin e posaçëm amerikan Keith Kellogg.

“Ne gjithashtu po përgatisim paketa të reja armësh nga Evropa”, tha Zelensky. Ai gjithashtu pret “masa të forta” lidhur me sanksione të reja kundër Rusisë.

Javën e kaluar, SHBA vendosi përkohësisht një ndalim të pjesshëm të dërgesave të armëve që tashmë ishin premtuar per Ukrainën. /Ad.Ab./

The post UKRAINË – Zelensky konfirmon rifillimin e dërgesave të armëve nga SHBA appeared first on Agjencia Telegrafike Shqiptare.

ROMË, 11 korrik /ATSH/ – Giorgio Armani, themeluesi i shtëpisë “ikonë” italiane të modës që mban emrin e tij, festoi  sot 91-vjetorin e lindjes me një mesazh që konfirmon rikthimin e tij në shtator, pas një problemi shëndetësor që e detyroi të mungonte në sfilatat e modës në Milano dhe Paris, sipas “Reuters”.

Ishte hera e parë që Armani mungonte në një nga ngjarjet e tij të modës.

Muajin e kaluar, kompania njoftoi se ai po shërohej në shtëpi, pa dhënë detaje të tjera mbi gjendjen e tij shëndetësore. Ndërkohë, agjencitë italiane të lajmeve raportuan se ai kishte kaluar disa ditë në spital.

“Në javët e fundit, e kam ndier fort përqafimin e atyre që kanë menduar për mua”,  tha Armani në një letër të hapur të botuar nga disa gazeta italiane. Ai shprehu mirënjohje ndaj familjes, kolegëve, punonjësve, medias dhe njerëzve në rrjetet sociale.

“Sot, në 91-vjetorin tim, dua t’ju falënderoj të gjithëve për afërsinë që më keni treguar. Nuk ishte e lehtë për mua që të mos e dëgjoja duartrokitjen tuaj drejtpërdrejt. Ju falënderoj nga zemra dhe shihemi përsëri në shtator,” shtoi ai.

Java e ardhshme e modës në Milano është planifikuar të zhvillohet nga data 23 deri më 29 shtator. /Ad.Ab./

Top of Form

Bottom of Form

The post MODË – Giorgio Armani feston 91- vjetorin e lindjes appeared first on Agjencia Telegrafike Shqiptare.

UASHINGTON, 11 korrik /ATSH/ – Izraeli beson se rezervat e uraniumit të pasuruar, të groposura thellë në një objekt bërthamor iranian që u godit nga ushtria amerikane, janë potencialisht të rikuperueshme, tha një zyrtar i lartë izraelit, sipas AP.

Ndërkohë, agjencia që ndërtoi bombat amerikane “bunker buster” të përdorura për të goditur dy objekte të tjera bërthamore tha se ende po pret të dhëna për të përcaktuar nëse ato municione arritën objektivat  e tyre.

Të dyja këto zhvillime shtojnë këndvështrime të reja mbi dëmet nga sulmet e muajit të kaluar, kur Shtetet e Bashkuara te Amerikes u përfshinë në luftën e Izraelit për të eliminuar kërcënimin që Irani të zhvillojë një armë bërthamore. Irani thotë se programi i tij është paqësor.

Presidenti Donald Trump këmbëngul se sulmet amerikane “shkatërruan plotësisht” tre objektet bërthamore iraniane që u goditën. Vlerësime ndërkombëtare dhe një vlerësim fillestar I shërbimeve amerikane të zbulimit kanë qenë më të kujdesshme, me Agjencinë e Inteligjencës së Mbrojtjes së SHBA-së që në një raport paraprak tha se sulmet shkaktuan dëme të konsiderueshme në objektet Fordo, Natanz dhe Isfahan, por nuk i shkatërruan plotësisht ato.

Drejtori i CIA-s, John Ratcliffe, u ka thënë më pas ligjvënësve amerikanë skeptikë se sulmet ushtarake amerikane shkatërruan objektin e vetëm të konvertimit të metaleve në Iran, një pengesë për programin bërthamor që do të kërkojë vite për t’u kapërcyer, dhe se komuniteti i inteligjencës ka vlerësuar që shumica dërrmuese e uraniumit të pasuruar të Iranit ka të ngjarë të mbetet ende e groposur nën rrënojat e Isfahanit dhe Fordos.

Zyrtari foli me gazetarët në kushte anonimiteti për të ndarë vlerësime izraelite që nuk ishin bërë publike më parë.

Izraeli beson se uraniumi i pasuruar i Iranit ishte shpërndarë në tre objektet dhe nuk ishte lëvizur, tha zyrtari izraelit. Ekspertë të çarmatimit bërthamor dhe të mosshpërndarjes kanë paralajmëruar se iranianët mund të kishin lëvizur rezervat diku më të sigurt teksa Izraeli i godiste objektet bërthamore muajin e kaluar dhe shtohej pritshmëria që edhe ushtria amerikane të ndërhynte.

Uraniumi i pasuruar në Isfahan potencialisht mund të rikuperohet nga iranianët, por për ta arritur do të duhej një përpjekje shumë e vështirë, tha zyrtari izraelit. /Ad.Ab./

The post IZRAEL – Irani mund të rikuperojë uraniumin e pasuruar nga objekti bërthamor i goditur nga SHBA appeared first on Agjencia Telegrafike Shqiptare.

OSLO, 11 korrik /ATSH-DPA/ – Fituesja iraniane e Çmimit Nobel për Paqen, Narges Mohammadi, i ka thënë komitetit norvegjez të  Nobelit për kërcënimet shqetësuese  me jetë ndaj saj.

Aktivistja për të drejtat e njeriut I tha kryetarit të komitetit, Jørgen Watne Frydnes, gjatë një “telefonate urgjente” se kishte marrë kërcënime të drejtpërdrejta dhe të tërthorta për “eliminim fizik” nga agjentë të regjimit iranian, njoftoi sot komiteti.

Mohammadi u nderua me Çmimin Nobel për Paqen në vitin 2023. Ajo e mori këtë çmim për luftën e saj kundër shtypjes së grave dhe dënimit me vdekje në Iran, si dhe për përkushtimin ndaj të drejtave të njeriut dhe lirisë.

Komiteti Nobel tha se ishte “thellësisht i shqetësuar” për kërcënimet  ndaj Mohammadit, por edhe për të gjithë iranianët që shprehin mendime kritike ndaj regjimit iranian.

Në deklaratë, Frydnes u bëri thirrje autoriteteve iraniane që “të mbrojnë jo vetëm jetën e tyre, por edhe lirinë e tyre të  shprehjes”.

Së fundmi, Mohammadi, së bashku me aktivisten iraniane të të drejtave të njeriut Shirin Ebadi, e cila është gjithashtu fituese e Çmimit Nobel për Paqen, ka bërë thirrje për t’i dhënë fund luftës midis Izraelit dhe Iranit. /Ad.Ab./

The post NORVEGJI – Fituesja e Çmimit Nobel: Irani po më kërcënon me “eliminim fizik” appeared first on Agjencia Telegrafike Shqiptare.

ROMË, 10 korrik /ATSH/ – Italia u shpreh se kompanitë që kanë ndihmuar në financimin e luftës së Rusisë kundër Ukrainës duke bërë biznes me këtë vend, duhet të përjashtohen nga rindërtimi i Ukrainës, sipas “Reuters”.

Kryeministrja italiane Giorgia Meloni tha më herët se pjesëmarrësit në konferencën e  mbajtur në Romë – për rimëkëmbjen e Ukrainës kishin premtuar më shumë se 10 miliardë euro – për të ndihmuar vendin e shkatërruar nga lufta.

“Ne duam të punojmë me Ukrainën për të siguruar që subjektet që kanë kontribuar në financimin e makinerisë së luftës ruse të mos përfitojnë nga rindërtimi”, tha Meloni gjatë një konference për shtyp.

“Rruga për ne është e qartë, të vazhdojmë të mbështesim Ukrainën dhe nga ana tjetër të rrisim presionin ndaj Rusisë, mbi të gjitha përmes sanksioneve”, shtoi Meloni.

Bashkimi Evropian ka miratuar një sërë sanksionesh kundër Moskës që kur Rusia pushtoi Ukrainën në shkurt 2022.

Një deklaratë e Ministrisë italiane të Financave tha se ministri i Ekonomisë, Giancarlo Giorgetti e kishte diskutuar çështjen e ndalimit të kompanive pro-ruse gjatë një takimi dypalësh me homologun e tij ukrainas, Serhii Marchenko. /Ad.Ab./ /a.i/

The post ITALI – Meloni: Kompanitë pro-ruse të përjashtohen nga rindërtimi i Ukrainës appeared first on Agjencia Telegrafike Shqiptare.