Kryetari i Lidhjes Social Demokrate të Maqedonisë, Venko Filipçe sot ka bërë të ditur dhe disa nga emrat e tjerë që do të garojnë në zgjedhjet lokale të tetorit.

Emrat e bërë publik janë për 16 komuna, teksa bie në sy emri i ish-ministres së Mjedisit Jetësor, Kaja Shokova, e cila do të garojë për qytetin e Shkupit.

Përveç Shukovës, emrat e tjerë të kandidatëve që sot i bëri publik Filipçe janë:

Komuna e Manastirit – Metodija Kunovski
Komuna e Vallandovës – Pero Kostadinov
Komuna e Vinicës – Goce Milevski
Komuna e Zrnovcit – Vanço Mitev
Komuna e Kavadarcit – Viktor Velevski
Komuna e Karposhit – Maja Mojsova Miovska
Komuna e Kisella Vodës – Goran Trajkovski
Komuna e Mavrovë-Rostushës – Anes Ahmeti
Komuna e Novosellës – Petar Spasov
Komuna e Petrovecit – Elizabeta Zelenikovska
Komuna e Prilepit – Petra Lukarovska
Komuna e Radovishit – Risto Spasov
Komuna e Sveti Nikollës – Dejan Giçev
Komuna e Çashkës – Goran Stojanovski
Komuna e Bërvenicës – Svetllana Mitrevska Angellkovska

Kujtojmë se shumica e partive kanë filluar me publikimin e emrave të kandidatëve për zgjedhjet komunale, vetëm edhe disa prek tyre janë duke zhvilluar anketa për emrat final që do të garojnë në zgjedhjet e tetorit.

The post LSDM bën të ditur edhe disa emra të kandidatëve me të cilët do të garojë në zgjedhjet lokale appeared first on Telegrafi.

Gjykata Themelore Penale në Shkup sot solli aktvendim për tre nga gjithsej katër të dyshuarit në rastin për ndërmjetësimin e vajzave nga Brazili për prostitucion në Shkup.

De Jesus Neves Marliene, shtetase e Brazilit, u dënua me burg në kohëzgjatje prej pesë vjet e gjashtë muaj, ndërsa të dyshuarin të tretë, Sabedin Demiri dhe të dyshuarit e katërt Nemanja Mihajlovski, shtetas të Maqedonisë së Veriut, u është shqiptuat aktvendim alternativ, gjegjësisht një vit burg dhe një vit e gjashtë muaj nëse kryejnë vepra penale në tre vitet e ardhshme.

Gjykata në seancën e sotme solli vendim që të ndahet procedura për të akuzuarin e dytë Maan Mahmalad, shtetas i Maqedonisë së Veriut, sepse vetëm ai nuk e pranoi fajin nga katër të dyshuarit.

Sipas akuzës për brazilianet u krijuan profile ku postoheshin numra telefoni, çmimet e shërbimeve seksuale dhe shërbimeve shtesë, si dhe foto me përmbajtje eksplicite.

De Jesus Neves Marliene, tha se i kontrollonte profilet, kontaktonte me klientë potencialë, organizoi orarin ditor të klientëve për secilën vajzë, si dhe ka përcaktuar kohëzgjatjen e shërbimeve, e cila lëvizte nga 150 euro për gjysmë ore, 200 euro për një orë, 300 euro për dy orë, 450 euro për tre orë dhe 800 euro për gjithë natën për shërbime seksuale, teksa nga fitimi total ajo ka ndaluar 30 për qind të shumës për vete.

The post Shqiptohen mbi pesë vite burgim për shtetasen e Brazilit e cila ndërmjetësonte vajza për prostitucion në Shkup appeared first on Telegrafi.

Pranë Ministrisë së Punëve të Brendshme është formuar njësi e re e specializuar e sigurisë kibernetike.

Ajo do të jetë përgjegjëse për mbrojtjen dhe monitorimin gjithëpërfshirës të sistemeve të informacionit të Ministrisë së Punëve të Brendshme, do të kryejë analiza të vazhdueshme dhe zbulimin në kohë të kërcënimeve kibernetike, do të kryejë instalimin, mirëmbajtjen dhe menaxhimin e sigurisë së infrastrukturës së IT-së së ministrisë.

“Kjo njësi do të jetë një shtyllë kyçe në mbrojtjen e sovranitetit digjital të MPB-së si institucion që menaxhon vëllimin më të madh dhe më të ndjeshëm të të dhënave personale të qytetarëve të vendit. Siguria e këtyre sistemeve është çështje jo vetëm e kapacitetit institucional, por edhe e stabilitetit të shtetit dhe besimit të qytetarëve. Të gjitha aktivitetet e njësisë së sapokrijuar synojnë avancimin e sigurisë dhe qëndrueshmërisë së infrastrukturës së brendshme të IT-së të vetë Ministrisë, me fokus ekskluzivisht në mbrojtjen e sistemeve të saj të informacionit. Për herë të parë, Ministria ka blerë pajisje moderne teknike dhe softuerike për monitorimin proaktiv, zbulimin dhe parandalimin e sulmeve kibernetike, duke hedhur kështu themelet për mbrojtje sistemike dhe afatgjatë”, theksoi ministri Toshkovski.

Sipas Toshkovskit, me këtë iniciativë, Ministria e Punëve të Brendshme vendos një standard të ri të mbrojtjes kibernetike, që nënkupton një mburojë sigurie moderne, të qëndrueshme dhe të fuqishme që përmbush sfidat e sotme dhe siguron besimin publik se të dhënat e qytetarëve gëzojnë mbrojtje të lartë.

The post MPB me njesi të re të specializuar për sigurinë kibernetike appeared first on Telegrafi.

Ushtria po modernizohet dhe ne po forcojmë kapacitetet mbrojtëse të vendit përmes prokurimit të pajisjeve të reja ushtarake në përputhje me standardet e NATO-s, tha sot kryeministri Hristijan Mickoski.

Në një ceremoni ku morën pjesë pjesëtarë të Ushtrisë, Ministri i Mbrojtjes dhe përfaqësues të bashkësisë ndërkombëtare, Mickoski theksoi se janë zbatuar dy kontrata që sjellin rezultate konkrete për sistemin mbrojtës të Maqedonisë.

“Jam krenar të njoftoj se Ministria e Mbrojtjes ka zbatuar me sukses dy kontrata të rëndësishme për prokurimin e pajisjeve të reja moderne ushtarake – pajisje që janë plotësisht në përputhje me standardet e NATO-s.

Ky nuk është vetëm një prokurim. Ky është një vizion për Maqedoninë si një anëtare e qëndrueshme, e sigurt dhe e përgatitur e Aleancës së NATO-s. Ky është një mesazh se shteti po bëhet një forcë që qëndron në këmbët e veta”, tha Mickoski.

Në kuadër të kontratës së parë, siç tha ai, janë blerë dhe tashmë janë dorëzuar gjashtë obusë – sisteme të fuqishme artilerie që do të forcojnë kapacitetin e Ushtrisë sonë. Së bashku me to, parashikohet edhe furnizimi me municione me rreze të rritur veprimi, dorëzimi dhe pagesa e të cilave janë planifikuar për vitin 2026./Telegrafi/

The post Maqedonia e Veriut forcon kapacitetin mbrojtës, siguron pajisje të reja ushtarake sipas standardeve të NATO-s appeared first on Telegrafi.

Ministria e Shëndetësisë informon opinionin publik se, sipas parashikimit më të fundit nga Drejtoria për Punë Hidrometeorologjike (DPHM), në periudhën prej 20 deri më 24 korrik 2025 pritet rritje e ndjeshme e temperaturave ditore, të cilat në disa rajone mund të arrijnë deri në 41°C.

Me këtë rast, MSH rikujton rëndësinë e respektimit të rekomandimeve të përgjithshme për mbrojtjen e popullatës nga temperaturat e larta.

– Qëndroni në ambiente të mbyllura dhe të freskëta, veçanërisht në periudhën nga ora 11:00 deri në 17:00.
– Konsumoni mjaftueshëm lëngje, duke shmangur pijet alkoolike dhe ato të ëmbla.
– Vishni rroba të lehta dhe me ngjyrë të çelët, dhe përdorni mbrojtje për kokën dhe sytë.
– Shmangni aktivitetet fizike gjatë orëve më të nxehta të ditës.
– Kushtoni vëmendje fëmijëve, të moshuarve, personave me sëmundje kronike dhe grave shtatzëna – këto grupe janë veçanërisht të ndjeshme ndaj temperaturave të larta.
– Në rast të simptomave si marramendje, dhimbje koke, të përziera ose rrahje të shpejta të zemrës – kërkoni menjëherë ndihmë mjekësore.
– Shtyni aktivitetet në ambient të hapur gjatë pjesës më të nxehtë të ditës.
– Siguroni kushte mikroklimatike (ambient të freskët me temperaturë deri në 25°C) si në vendin e punës ashtu edhe në shtëpi.

The post Paralajmërimi për temperatura të larta, Ministria e Shëndetësisë kërkon të respektohen rekomandimet e përgjithshme për mbrojtjen e shëndetit appeared first on Telegrafi.

Lidhur me ndërprerjen e furnizimit me ujë të Spitalit të Fëmijëve Kozle, NP “Ujësjellësi dhe Kanalizim” – Shkup informoi sot pasdite se gjatë inspektimit të tyre kanë arritur në përfundimin se arsyeja e ndërprerjes nuk është në juridiksionin e tyre.

Ata theksuan se bëhet fjalë për një defekt që është në pronësi të spitalit.

“NP “Ujësjellës dhe Kanalizime”-Shkup njofton opinionin se ekipet tona kryen një inspektim të plotë në terren dhe konkluduan se shkaku i ndërprerjes nuk është në juridiksionin tonë. Domethënë, bëhet fjalë për një defekt në instalimin e furnizimit me ujë në pronësi të spitalit. Autoritetet në spital janë njoftuar për sa më sipër dhe ata duhet ta sanojnë defektin në instalimin e brendshëm të furnizimit me ujë”, thonë nga Ujësjellësi i Shkupit.

Ndërmarrja publike thekson se pavarësisht apeleve të tyre, gjatë inspektimit kanë konkluduar se spitali Kozle po përdor ujë të pijshëm në mënyrë joracionale, duke ujitur zonën e parkut brenda spitalit, ndërsa aktivitetet kryesore të punës së spitalit neglizhohen./Telegrafi/

The post NP “Ujësjellës dhe Kanalizime” – Shkup: Defekti në instalimin e ujësjellësit në Kozle nuk është në juridiksionin tonë appeared first on Telegrafi.

Nën ndikimin e një mase të ngrohtë ajri nga jugu, nga nesër do të pasojë një periudhë moti me diell dhe shumë i ngrohtë me vranësira të lehta deri në mesatare, njoftojnë nga Departamenti për Punë Meteorologjike.

Mot veçanërisht i nxehtë pritet gjatë javës së ardhshme, kur temperatura ditore do të jetë mbi 30 gradë kudo, në shumë vende do të kalojë 35, ndërsa disa vende mbi 40 gradë./Telegrafi/

The post Moti për ditët në vijim në Maqedoninë e Veriut appeared first on Telegrafi.

Ambasadori i Kosovës në Maqedoninë e Veriut Florian Qehaja, në emisionin “PodGo” në Telegrafi Maqedoni, ka folur për rrugën Tetovë – Prizren, për të cilën tha se është në fazën e projektimit të tunelit dhe se e njëjta do ta shkurtojë distancën në 50 minuta vozitje nga njëri në qytetin tjetër.

“Jemi në fazën e projektimit, nuk kemi dilemë që do të realizohet, por synojmë që ky vullnet politik të përkthehet edhe në punë konkret në terren. Nuk dorëhiqemi në atë që duhet ta lidhim më afër Tetovën me Prizrenin. Jemi në fazën e projektimit të tunelit, i cili do të jetë 6 kilometër, më i madh se ai i Kalimashit, në këtë fazë nuk ka dinamikë shumë të madhe”.

“Ngecja për momentin është në Fakultetin e Ndërtimtarisë në Shkup. Po ta kishim ne këtë punë do ta respektonim më shumë. Kemi interes strategjik dhe nuk kemi dilema a do të bëhet, por kur do të bëhet”, tha mes tjerash ambasadori Qehaja.

Ai foli edhe për rrugën Shkup – Bllacë, për të cilën tha se është më e arritshme të realizohet./Telegrafi/

The post Qehaja për rrugën Tetovë – Prizren: Jemi në fazën e projektimit të tunelit, nuk kemi dyshime se do të bëhet appeared first on Telegrafi.

Komunikacioni në rrugët e vendit po zhvillohet pa ndërprerje, nëpër rrugë të thata. Intensiteti i komunikacionit në akset rrugore jashtë mjediseve urbane është rritur. Në vendkalimet kufitare nga ana e Maqedonisë, nuk ka pritje të gjata për hyrje dhe dalje nga vendi.

LAMM rekomandon shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.

Nga 1 korriku deri më 31 gusht, në rrugët shtetërore në Maqedoni u vendos regjim i përkohshëm veror i trafikut, i cili ndalon lëvizjen e automjeteve të rënda transportuese me një masë totale mbi 15 tonë, gjatë fundjavave dhe në ditët me temperatura jashtëzakonisht të larta.

The post Rritet intensiteti i komunikacionit, nuk ka pritje në pikat kufitare appeared first on Telegrafi.

Kryetari i Kuvendit të Republikës së Maqedonisë së Veriut, Afrim Gashi, u takua me deputetin e Bundestagut Gjerman, Tilman Kuban, i shoqëruar nga drejtori i Fondacionit Konrad Adenauer në Shkup, Daniell Braun.

Në takim u shpreh kënaqësia e veçantë për realizimin e vizitës, si dhe për interesin dhe mbështetjen e vazhdueshme të Republikës Federale të Gjermanisë për përparimin e Maqedonisë së Veriut. Kryetari Gashi e theksoi rolin e rëndësishëm të Gjermanisë në mbështetjen e qëllimeve tona strategjike – anëtarësimin në NATO dhe procesin e integrimit evropian.

Në këtë drejtim, u përshëndet emërimi i Manuel Saracin si i dërguar special për Ballkanin Perëndimor, i cili paraqet konfirmim të mëtejshëm të angazhimit të Gjermanisë ndaj rajonit. U theksua rëndësia e Procesit të Berlinit, i iniciuar nga kancelarja Merkel, si dhe rezultatet pozitive që i sjell brenda kuadrit rajonal.

Gashi shprehu mirënjohje për Rezolutën e Bundestagut të vitit 2023, e cila konfirmon mbështetjen për anëtarësimin e Maqedonisë së Veriut në BE dhe afirmon identitetin, kulturën dhe gjuhën maqedonase.

Deputeti Kuban, i cili është emëruar edhe zëdhënës për çështjet evropiane në Bundestag, i përcolli Kryetarit përshëndetjet e ngrohta nga ministri i Punëve të Jashtme të Republikës Federale të Gjermanisë, Johan Vaderpull, me iniciativën e të cilit u realizua vizita, me qëllim që të demonstronte vullnetin e qartë të qeverisë aktuale gjermane për të çuar përpara procesin e zgjerimit. Theksoi se nevojitet vizion i ri për zgjerimin dhe për përshpejtimin e rrugës evropiane të vendit tonë. Në këtë kontekst, theksoi se është me rëndësi të veçantë të hapet Klasteri Fondamentet dhe të arrihet përparimi i vërtetë në fushat, të tilla si reforma e administratës publike, gjyqësori, lufta kundër krimit të organizuar dhe korrupsionit, dhe se në aspektin e miratimit të legjislacionit të nevojshëm, është e rëndësishme të ketë proces paraprak të konsultimit të gjerë me faktorët relevantë shoqërorë. Bashkëbiseduesit ranë dakord që marrëdhëniet e shkëlqyera dypalëshe midis dy parlamenteve do të vazhdojnë të avancohen në periudhën e ardhshme, si në nivel kryetarësh dhe deputetësh, ashtu edhe përmes shkëmbimit të suksesshëm të përvojave në nivel ekspertësh në kuadër të projektit për sigurim të pavarur parlamentar dhe fushave të tjera me interes të ndërsjellë. Një vlerësim iu dha punës së suksesshme të Fondacionit Konrad Adenauer në Shkup dhe kontributit të tyre në proceset demokratike në dekadat e fundit.

The post Gashi-Kuban: Rezoluta e Bundestagut të vitit 2023, konfirmon mbështetjen për anëtarësimin e Maqedonisë së Veriut në BE appeared first on Telegrafi.

Fillimi i procesit gjyqësor për Rade Trajkovski-Shtekli dhe nëntë persona tjerë të akuzuar për tregti me drogë shtyhet për më 7 gusht për shkak të gjendjes shëndetësore të të akuzuarit Rade Trajkovski-Shtekli.

Siç informon gjyqtari Ilija Tërpkov, Trajkovski në mëngjes ishte i pakomunikueshëm dhe i çorientuar, prandaj urgjentisht duhej të transferohet në Qendrën Klinike. Sulme të tilla, siç plotësoi, kishte edhe gjatë ditës së djeshme.

Seanca e sotme, e caktuar për në orën 10, së pari ishte shtyrë për në 11. Por edhe pas shtyrjes, i pandehuri ende nuk ishte dërguar në spital.

“Nga burgu morëm informacion se i pandehuri ende nuk është dërguar në spital, sepse presin asistim nga MPB. Duke qenë se ai ende nuk është dërguar dhe gjykata nuk mund të presë tërë ditën për t’u dërguar në mjek i pandehuri, gjykimi shtyhet për më 7 gusht”, tha gjyqtari Tërpkov.

Pas shtyrjes, prokurorja Verica Berzhecka Kërsteva, ka informuar se në ndërkohë, Shtekli ka dorëzuar raport psikiatrik se nuk është i aftë të ndjekë gjykimet, ndërsa prokurorja informoi se edhe Prokuroria do të kryejë ekspertizë në lidhje me atë rrethanë dhe do të kërkojë mbledhje përgatitore për të krahasuar ekspertizat.

Prokuroria për ndjekjen e krimit të organizuar dorëzoi aktakuzë kundër 10 personave për shitje të drogës, kryesisht në lagjen e Shkupit, Aerodrom.

Hetimi ka zgjatur pothuajse një vit dhe përfshinte masa të veçanta hetuese. Së pari janë përfshirë 16 persona, por shtatë prej tyre kanë lidhur marrëveshje dhe kanë marrë dënime me burg prej 3 deri 3,5 vjet.

Siç njoftuan paraprakisht nga Prokuroria, grupi është organizuar mirë, me role qartë të ndara – nga furnizimi deri te shitja e kokainës dhe marihuanës.

Sipas hetimit, droga është ruajtur në banesa me qira, ndërsa është shitur me çmim prej 4.500 deri 6.000 denarë për një gramë kokainë dhe 200 deri 300 denarë për një gramë marihuanë. Ata kanë komunikuar përmes Snapchat-it, ndërsa dëshmi të rëndësishme ishin marrë përmes sistemit “Cellebrite” për analizë të telefonave, donacion nga SHBA.

The post Gjykimi i “Shteklit” dhe grupit të tij, shtyhet për më 7 gusht appeared first on Telegrafi.

Deri në fund të muajit duhet të dihet modeli se si do të reagohet në rritjen e çmimeve të produkteve ushqimore. Kryeministri Hristijan Mickoski sot në deklaratë për mediat tha se ende po kryhen analiza dhe se po shqyrtohen disa qasje, pa zbuluar detaje të mëtejshme.

“Parametrat ende po analizohen, kemi tregues të qartë se ku është inflacioni bazë që ndikon në inflacionin përfundimtar. Pres që deri në fund të këtij muaji ta kemi konceptualizuar modelin dhe nëse ky trend vazhdon edhe në muajt në vijim, do të kemi masa. Po shqyrtojmë disa qasje. Po konsultohemi me profesorë, dhe ata po bëjnë analiza, edhe ne po bëjmë analiza edhe me Inspektoratin e Tregut. Po flasim edhe me zinxhirët e marketeve, kështu që na duhet një qasje e përbashkët, të mos e shohim veten si palë të ndryshme, por ta shohim problemin në mënyrë holistike për të arritur një zgjidhje të përhershme, tha Mickoski në një konferencë të përbashkët për shtyp në Qeveri me ministrin e Vetëqeverisjes Lokale Zlatko Perinski.

Sipas Mickoskit, është shumë më e rëndësishme të shihet se nga vjen problemi me rritjen e çmimeve dhe të reagohet aty, në vend që të merren masa afatshkurtra.

“Pjesa më e madhe e fokusit tonë është te inflacioni bazë. Është më e lehtë të zbatohet një masë që do të japë rezultate në afat të shkurtër, por tani po e analizojmë më hollësisht për të parë se nga vjen problemi. Interesi ynë si Qeveri është të kemi qytetarë të kënaqur që do të kenë çmimet më të ulëta në Evropë, por pyetja është nëse kjo është realisht e mundur. Do të bëjmë gjithçka që është në fuqinë tonë që qytetarët, brenda mundësive tona, të kenë çmimet më të ulëta në Evropë, por duhet të hyjmë në bazë, në themel”, tha Mickoski.

Më 7 korrik, kryeministri paralajmëroi se do të kryhet një analizë e detajuar e inflacionit bazë, pas së cilës do të dalin me masa të sakta dhe të synuara.

“Nuk jemi të kënaqur që kjo po ndodh, por duhet të bëjmë një analizë të detajuar në fushën e inflacionit bazë sepse bisedova me disa profesorë të ekonomisë dhe përfundimi është se pjesa e produkteve që krijojnë këtë inflacion ndoshta në raportin furnizues-market nuk është rritur aq shumë, sa në inflacionin bazë dhe në fushën e inflacionit të shërbimeve. Shumë shpejt do të ketë masa që duam të jenë të sakta dhe të synuara. Nuk duam që ato të jenë masa që do të shkaktojnë stuhi”, tha Mickoski në konferencën për shtyp në Qeveri.

Të dhënat e Entit shtetëror të statistikës tregojnë se shpenzimet e jetesës në qershor janë rritur për 4,5 për qind në nivel vjetor, ndërsa çmimet në pakicë për 3,7 për qind.

The post Rritja e vazhdueshme e çmimeve, Mickoski: Deri në fund të muajit do të kemi një model veprimi dhe do të dihet se çfarë masa do të ndërmarrim appeared first on Telegrafi.

Zëvendësministri i Punëve të Brendshme, Astrit Iseni, i ka replikuar deputetit të BDI-së, Arbër Ademi, kjo, pasi Ademi gjatë ditës tha se po fshihet neni 96 nga Ligji për polici, nen që parasheh përfaqësim të drejtë dhe adekuat në këtë institucion.

Sipas Isenit, kjo është një dezinformatë e turpshme dhe se e vërteta flet krejtësisht ndryshe.

Iseni sqaron se asgjë që garanton përfaqèsimin adekuat nuk është fshirë.

Ja dhe postimi i tij I plotë:

DEZINFORMATË E TURPSHME, E VËRTETA FLET KREJTËSISHT NDRYSHE!
Sot, një ish-deputet që për 20 vite ishte pjesë e pushtetit që e braktisi përfaqësimin e shqiptarëve në polici, ka zgjedhur të manipulojë opinionin publik me një shpifje të radhës.
Arbër Ademi po përhap panik të qëllimshëm duke pretenduar se me propozim-ligjin për ndryshimin e Ligjit për Policinë po fshihet neni 96, i cili garanton përfaqësimin e drejtë dhe adekuat të komuniteteve në këtë institucion. Kjo është një DEZINFORMATË dhe një përpjekje për të mashtruar qytetarët shqiptarë!
E vërteta është kjo:
Asnjë parim i përfaqësimit të drejtë dhe adekuat nuk është fshirë, përkundrazi, është përforcuar në Ligjin për Ministrinë e Punëve të Brendshme, i cili është aktualisht në procedurë parlamentare. Ky ligj, si ligj bazë (lex generalis) në raport me Ligjin për Policinë (lex specialis), në nenin 8 e përcakton qartë:
Neni 8
(1) Gjatë punësimit në Ministri janë të përfaqësuar në mënyrë të drejtë dhe adekuate edhe qytetarët që i përkasin të gjitha komuniteteve, duke respektuar kriteret e profesionalizmit dhe kompetencës.
(2) Gjatë punësimit në Ministri respektohet parimi i barazisë gjinore.
Kjo do të thotë që nuk fshihet asnjë nga parimet që rregulloheshin në nenin 96 të Ligjit për Policinë, përkundrazi, ato janë të garantuara në një ligj më të lartë dhe më të gjerë që rregullon funksionimin e gjithë Ministrisë.
Për më tepër, sipas standardeve juridike dhe Rregullores për hartimin e ligjeve, nuk lejohet që e njëjta normë të përsëritet në dy ligje që trajtojnë të njëjtën materie. Kjo është arsyeja pse dispozita është vendosur në ligjin më të gjerë dhe jo më në Ligjin për Policinë, për të shmangur dublimin juridik.
Prandaj, i bëj thirrje Arbër Ademit që të ndalojë me gënjeshtrat dhe frikësimin e shqiptarëve. Ai dhe partia e tij kanë pasur dekada për ta zbatuar përfaqësimin e drejtë por nuk e bënë. Tani nuk kanë të drejtë morale të flasin në emër të shqiptarëve.
Unë, si zëvendësministër i Punëve të Brendshme, garantoj se përfaqësimi i drejtë dhe adekuat, profesionalizmi dhe barazia gjinore do të jenë parime themelore dhe të paprekshme të çdo ligji dhe çdo institucioni nën këtë Ministri.

The post Iseni i reagon Ademit: Po shpërndanë dezinformata, nuk është fshirë asgjë që garanton përfaqësimin e shqiptarëve në MPB appeared first on Telegrafi.

Qeveria e Republikës së Maqedonisë së Veriut informon se për shkak të interesimit të madh dhe reagimit pozitiv nga qytetarët, zgjatet afati për aplikim në thirrjen publike për angazhimin e 400 zjarrfikësve në mbarë vendin. Afati do të vlejë deri më 23 korrik, e mërkurë.

Nga Qeveria thonë se vendimi për zgjatjen e afatit është marrë me qëllim që t’u jepet mundësi sa më shumë qytetarëve të interesuar të aplikojnë, duke shtuar se, bëhet fjalë për një masë të rëndësishme e cila drejtpërdrejt forcon kapacitetet e sistemit për mbrojtje dhe shpëtim, sidomos në prag të sezonit veror dhe rrezikut të shtuar nga zjarret.

“Kjo masë, e cila del nga Plani për Punësim 2025, paraqet një investim sistematik dhe thelbësor në sigurinë publike dhe kujdesin për qytetarët. Angazhimi i 400 zjarrfikësve është hapi i parë i tillë i madh pas më shumë se një dekade dhe i përgjigjet drejtpërdrejt mungesës shumëvjeçare të kuadrove në njësitë zjarrfikëse”.

“Qeveria mbetet e përkushtuar në krijimin e një sistemi funksional, të shpejtë dhe efikas për mbrojtje dhe i fton qytetarët të përfitojnë nga kjo mundësi dhe të aplikojnë. Thirrja është e hapur për të gjithë personat e kualifikuar, ndërsa të gjitha detajet për aplikim janë të disponueshme në ueb-faqet zyrtare të komunave”, thonë nga Qeveria./Telegrafi/

The post Zgjatet afati për aplikim në thirrjen publike për angazhimin e 400 zjarrfikësve appeared first on Telegrafi.

Përfaqësuesit e koalicionit VLEN, sot kanë vizituar Medresenë “Isa Beu” në Shkup, pas kalimit të ligjit në qeveri për akreditimin e Medresesë. Kryetari i Bashkësisë Fetare Islame, Shaqir Fetahu, shprehu falënderim për kalimin e ligjit në Qeveri dhe tha se kjo do të ndikojë në rritjen e numrit të nxënësve në medrese.

“Shprehim falënderime për punën që kanë bërë. këtë ditë dhe kalimin e këtij ligji e definojmë si ngjarje historike, pasi përpjekjet tona mbi katër dekada tashmë janë realizuar dhe tani medreseja dhe nxënësit e saj barazohen me nxënësit e shkollave të mesme në RMV”.

“Kam bindjen se ka pasur ambient për të shprehur gëzim për këtë ligj, kjo do të ndikojë në rritjen e numrit të nxënësve në gjithë territorin. Pasi të gjithë ata që duan të ndjekin procesin edukativo-arsimor në medrese, janë të bindur se do të kenë mundësi të vazhdojnë në të gjitha fakultetet e vendit dhe jashtë vendit”, tha mes tjerash Fetahu.

Ndërsa zv.kryeministri Izet Mexhiti, tha se është eliminuar një nga diskriminimet e të kaluarës, sa i përket nxënësve të medresesë.

“Eliminohet një diskriminim i të kaluarës, edhe përfaqësues të BFI edhe përfaqësues të politikës nuk në të kaluarën ne politikanët nuk kemi ditur të japim përgjigje pse nxënësit e medresesë “Isa Beu” nuk kanë mundur të shkollohen si të tjerët. Sot konstatojmë që eliminohet ky diskriminim dhe do të ketë barazi. Tani udhëheqësia e medresesë duhet të merret me cilësinë e mësimit dhe kushteve, ndërsa pjesa tjetër është realizuar”, tha Mexhiti.

I pyetur se kur do ta dorëzojnë në Kuvend, Mexhiti tha se pret që deri në shtator edhe zyrtarisht Medreseja “Isa Beu” të jetë e barabartë me të gjithë shkollat e mesme tjera./Telegrafi/

The post Liderët e VLEN-it vizitojnë Medresenë “Isa Beu”, Fetahu: Nxënësit e medresesë janë barazuar me nxënësit tjerë appeared first on Telegrafi.

Sot jemi këtu për të paralajmëruar për përpjekjen e rrezikshme dhe të dëmshme të Pançe Toshkovskit dhe Qeverisë për ta partizuar dhe shkatërruar policinë si shërbim profesional. Me ndryshimet e propozuara në Ligjin për Policinë, Toshkovski sulmon drejtpërdrejt sistemin e karrierës, poshtëron njohuritë dhe përvojën dhe hap dyert për punësime masive të ushtarëve partiakë dhe mbështetësve të OBRM-PDUKM-së, tha Bogdanka Kuzeska, zëdhënëse e LSDM-së.

“Që të jemi të qartë. Me ndryshimet në Nenin 2, Toshkovski parashikon emërimin e personave me arsim të pamjaftueshëm dhe pa përvojë në një pozicion drejtues në pozicionet më të larta. Kjo e degradon policinë dhe në vend të profesionistëve, sillen këshilltarë me role dhe merita të përcaktuara paqartë.

Me Nenin 4, fshihen kriteret për një minimum prej 6 vjetësh përvojë dhe 4 vjetësh pozicion drejtues për kreun e SPB-së. Kjo do të thotë që një person që ka kaluar provimin e stazhit dje, pra kushdo që Toshkovski zgjedh, mund të bëhet kreu i SPB-së”, thotë Kuzeska.

Nga atje kërkojnë që këto ndryshime të tërhiqen menjëherë./Telegrafi/

The post LSDM: OBRM-PDUKM po partizan policinë dhe po shkatërron karrierën e profesionistëve appeared first on Telegrafi.

Para pak minutash, Rrjeti Sizmologjik i Maqedonisë së Veriut njofton se është ndjerë tërmet në Maqedoni, Kosovë dhe Serbi.

Nga atje thonë se tërmeti është regjistruar në ora 22:43 dhe ka pasur epiqendrën në Kosovë, 39 kilometra në verilindje të Shkupit, me magnitudë prej 2.6 të shkallës së Rihterit.

“Sipas informacioneve të deritashme, me të cilat disponon observatori, tërmeti është ndjerë në Shkup dhe rrethinën e afërt me intensitet prej III shkallë sipas Shkallës makrosizmike europiane”, thuhet në njoftim.

The post Është regjistruar tërmet në Shkup appeared first on Telegrafi.

Lidhja Auto-Moto e Maqedonisë njofton se komunikacioni në vend po zhvillohet pa pengesa dhe në rrugë të thata.

Nga atje thonë se komunikacioni jashtë mjediseve urbane po zhvillohet me intensitet të rritur.

“Në vendkalimet kufitare nuk pritje të gjata për hyrje dhe dalje nga vendi”, thonë nga LAMM.

Nga atje u bëjnë thirrje shoferëve që të kenë kujdes me shpejtësinë e automjeteve, veçanërisht nëpër luginat e vendit ku mund të ketë rrëshqitje të dheut./Telegrafi/

The post LAMM: Në vendkalimet kufitare nuk ka pritje të gjata për hyrje dhe dalje na RMV appeared first on Telegrafi.

Në kuadër të aktiviteteve për modernizimin e sistemit të pagesave dhe inkurajimin e pagesave elektronike, Këshilli i Bankës Popullore në seancë miratoi vendim për një model krejtësisht të ri për tarfifimin e bankave për kryerjen dhe nivelizimin e pagesave në Sistemin Ndërbankar të Pagesave të Maqedonisë

Modeli, siç informojnë nga Banka Popullore, bazohet në parimet dhe praktikat e bankave qendrore në Eurosistem për kompensime fikse dhe të parashikueshme sipas vëllimit të transaksioneve, të cilat, thonë, krijohet një hapësirë për thjeshtim dhe ulje të kompensimeve që bankat i paguajnë nga klientët për kryerjen e pagesave elektronike përmes sistemeve të pagesave në vend.

“Në të njëjtën kohë, Këshilli i Bankës Popullore vendosi tarifë për pagesat e organeve shtetërore në euro me vendet nga SEPA në një shumë fikse prej 3 euro për transaksion për urdhëresat e iniciuara në mënyrë elektronike dhe 5 euro për urdhëresat e iniciuara në letër. Kompensimet e ulëta dhe fikse për transaksion, krahasuar me tarifat e ndryshueshme në varësi të shumës së transaksionit që imponohen nga marrëveshjet komplekse korresponduese me bankat e huaja, do të çojnë në kursime të konsiderueshme për shtetin gjatë kryerjes së pagesave ndaj organeve shtetërore me vendet evropiane, thuhet në kumtesën e sotme nga Banka Popullore.

Vendimi, i marrë në seancën e djeshme, thonë nga Banka, është marrë në kontekstin e anëtarësimit të vendit tonë në SEPA dhe fazës së vazhdueshme të harmonizimit me standardet evropiane, ndërsa me të cilëm krijohet bazë për një ulje më të gjerë të shpenzimeve të pagesave ndërkufitare në euro, si nga Banka Popullore për organet shtetërore ashtu edhe nga bankat për klientët e tyre.

“Banka Popullore edhe më tej do të vazhdojë të punojë në mënyrë aktive për thjeshtimin dhe uljen e shpenzimeve të pagesave në vend dhe në vendet e SEPA-s me qëllimin përfundimtar të ofrimit të shërbimit më të mirë për qytetarët dhe një mjedisi të favorshëm afarist për kompanitë”, thekson Banka Popullore.

Në të njëjtën seancë, Këshilli i Bankës Popullore miratoi edhe Raportin për rreziqet në sektorin bankar për tremujorin e parë të vitit 2025.

Këshilli i Bankës Popullore e miratoi edhe Vendimin për vendosjen e një sistemi të ri për mbledhjen dhe dorëzimin e të dhënave nga bankat dhe kursimoret. Sistemi i ri ISIDORA do të mundësojë të dhëna më gjithëpërfshirëse dhe me cilësi më të lartë për statistikat monetare, mbikëqyrjen dhe stabilitetin financiar, në përputhje me standardet evropiane dhe ndërkombëtare. Me zbatimin në faza, sistemi do të zëvendësojë praktikën aktuale dhe do të kontribuojë në raportim më efikas, fleksibël dhe më të thjeshtë.

The post Banka Popullore: Ulen kompensimet për kryerjen e pagesave në vend dhe në SEPA appeared first on Telegrafi.

Aktive janë tri zjarre në sipërfaqe të hapur deri në orën 12:00, nga gjithsej pesë gjatë ditës së sotme, informoi Qendra për Menaxhim me Kriza (QMK). Është shuar një, ndërsa nën kontroll është një zjarr në vend të hapur.

QMK njoftoi se aktive janë zjarret në Komunën Veles në fshatrat Xhidimircë – Krushjë – Ivankovci ku po digjet pyll i përzier, në Komunën Makedonski Brod ndërmjet fshatit Creshnevë, Llokvicë, Krapë po digjet pyll i degraduar ahu, shkurre dhe vegjetacion i ulët edhe në Komunën Vasilevë në fshatin Niviçinë ku po digjet pyll me kërcell të ulët.

Nën kontroll është vendosur zjarri në Komunën Dojran në fshatin Nikoliç ku po digjet pyll me kërcell të ulët.

Është shuar një zjarr në Komunën Çuçer Sandevë në fshatin Gornjan ku u dogj pyll me kërcell të ulët.

The post QMK: Tre zjarre aktive, një është shuar si dhe një është nën kontroll appeared first on Telegrafi.