Mbrëmjen e sotme, rreth orës 21:30, në aksin Fier–Levan.

Përplasja ka ndodhur në vendin e quajtur kthesa e Azotikut, ku janë përplasur dy automjete, një tip Mercedes dhe një tip Citrown.

Si pasojë e përplasjes, njëri prej mjeteve ka përfunduar në kanalin anësor të rrugës.

Fatmirësisht, nuk ka të lënduar, por vetëm dëme materiale.

The post Aksident në aksin Fier–Levan, përplasen “kokë më kokë” dy automjete appeared first on Albeu.com.

Një vatër e re zjarri është aktivizuar në Gramsh. Mësohet se zjarri ka rënë në fshatin Ermenj. Fatkeqësisht zjarri po përjapet me shpejtësi duke rrezikuar banesat. Banorët kanë kërkuar ndihmë urgjente që flakët të izolohen në kohë pa iu afruar pranë banesave.

Edhe pse autoritetet janë njoftuar menjëherë, terreni i vështirë ka qenë në favor të flakëve të cilat janë përhapur shpejt duke djegur bimësinë në zonë. Në Gramsh zjarret kanë pushuar vendin prej ditësh ndërsa banorë të shumtë janë në qiell të hapur pasi banesat e tyre janë djegur.

The post Aktivizohet një tjetër vatër zjarri në Gramsh, banorët e fshatit Ermenj kërkojnë ndërhyrje urgjente, rrezikohen banesat appeared first on Albeu.com.

Ambasada e Greqisë në Shqipëri i ka shprehur ngushëllime dhe mbështetje vendit tonë për situatën e krijuar nga zjarret.

Përmes një postimi në “Facebook”, ambasada shpreh solidaritet me Shqipërinë, teksa thekson se janë duke monitoruar situatën me frontin e gjerë të zjarreve në vend..

Më tej shtojnë se në kuadrin e kapaciteteve dhe mundësive, vendi fqinj ‘kontribuon në përpjekjet për shuarjen e zjarreve me mjete ajrore zjarrfikëse, si në kuadër të Mekanizmit Evropian të Mbrojtjes Civile, ashtu edhe në kontekstin e bashkëpunimit dypalësh’.

Postimi i plotë i Ambasadës së Greqisë:

Ambasada e Greqisë në Shqipëri shpreh ngushëllimet e saj të sinqerta vendit mik dhe fqinj, Shqipërisë, dhe monitoron situatën me frontin e gjerë të zjarreve në vend.

Në frymën e bashkëpunimit dhe solidaritetit, Greqia, brenda kuadrit të kapaciteteve të saj, kontribuon në përpjekjet për shuarjen e zjarreve me mjete ajrore zjarrfikëse, si në kuadër të Mekanizmit Evropian të Mbrojtjes Civile, ashtu edhe në kontekstin e bashkëpunimit dypalësh.

The post Zjarret në vendin tonë, Greqia sensibilizohet me Shqipërinë: Jemi duke monitoruar situatën appeared first on Albeu.com.

Departamenti Amerikan i Shtetit ka publikuar raportin për vitin 2024, në lidhje me të drejtat e njeriut, përfshirë dhe Shqipërinë.

Sa i përket vendit tonë, në raport theksohet nuk pati ndryshime të rëndësishme në situatën e të drejtave të njeriut në Shqipëri gjatë vitit.

Sipas raportit, qeveria ndërmori hapa të besueshëm për të identifikuar dhe ndëshkuar zyrtarët që kryen shkelje të të drejtave të njeriut.

Por më tej theksohet se sa i përket seksionit për arrestimet dhe paraburgimin, aplikohet në formë të zgjatur dhe pa akuza.

Sipas raportit, evidentohet se Avokati i Popullit, Komiteti Shqiptar i Helsinkit dhe Instituti për Aktivizëm dhe Ndryshim Social kanë evidentuar se zgjatja e periudhës së paraburgimit mbetet një problem i vazhdueshëm.

“Ligji dhe kushtetuta ndalonin arrestimin dhe ndalimin arbitrar dhe parashikonin të drejtën e çdo personi për të kundërshtuar ligjshmërinë e arrestimit ose ndalimit të tij në gjykatë. Qeveria në përgjithësi i respektoi këto kërkesa. Ligji kërkon që shumica e hetimeve paraprake të përfundojnë brenda tre muajsh, por prokurori ka të drejtë të zgjasë këtë periudhë. Paraburgimi nuk duhet të zgjasë më shumë se tre vjet. Sipas Ministrisë së Brendshme dhe Drejtorisë së Përgjithshme të Burgjeve (DPB), nuk është raportuar asnjë rast ku personat të jenë mbajtur përtej afateve të parashikuara me ligj.

Mungesa e gjyqtarëve dhe prokurorëve vonoi procedurat penale. Burimet e kufizuara materiale, mungesa e hapësirës, menaxhimi i dobët i kalendarit gjyqësor, stafi i pamjaftueshëm dhe mosparaqitja e avokatëve dhe dëshmitarëve gjithashtu e penguan sistemin gjyqësor të gjykonte çështjet në kohën e duhur. Sipas DPB-së, procesi i verifikimit të sistemit të drejtësisë e përkeqësoi situatën dhe çoi në vende të lira në gjykata dhe prokurori”, thuhet në raport.
Sa i përket mbrojtjes së refugjatëve, raporti i DASH shprehet: Qeveria bashkëpunoi me Zyrën e Komisionerit të Lartë të OKB-së për Refugjatët (UNHCR) dhe organizata të tjera humanitare në ofrimin e mbrojtjes dhe ndihmës për refugjatët, refugjatët e kthyer ose azilkërkuesit, si dhe persona të tjerë të shqetësuar. UNHCR, nëpërmjet partnerit të saj, Shërbimeve Shqiptare për Refugjatët dhe Migrantët, monitoroi intervistat personale me azilkërkuesit gjatë procesit të përcaktimit të statusit të refugjatit dhe mbështeti integrimin e tyre.

The post “Qeveria mori masa për të ndëshkuar zyrtarët që kryen shkelje të të drejtave të njeriut”, raporti i DASH për Shqipërinë: Paraburgimi i zgjatur mbetet problem appeared first on Albeu.com.

Sot, aktori i madh dhe një ndër njerëzit më të vyer të skenës shqiptare, Bujar Asqeriu feston ditëlindjen.

Në këtë 13 dhjetor, Mjeshtri i Madh dhe Nderi i Kombit mbush plot 69 vite jetë. Me një karrierë mbi 50-vjeçare, aktori ka me dhjetëra role shumë të suksesshme në teatër dhe kinematografi.

Në kinema ai ka shkëlqyer me kryerolin e tij, atë të Avni Rustemit si dhe me dhjetëra role të tjera. Me zërin e mrekullueshëm dhe me paraqitjen e tij skenike Asqeriu ka shkëlqyer me trupën e Teatrit Kombëtar edhe në skenën e teatrit Globe në Londër, ku luhen veprat e Shekspirit.

Gjatë gjithë jetës së tij artistike ai është karakterizuar jo vetëm nga talenti, por edhe nga puna, serioziteti, përkushtimi ndaj çdo roli.

Bujar Asqeriu nuk është vetëm një artist, një ikonë në Panteonin e skenës shqiptare, por edhe një intelektual dhe qytetar i devotshëm, që artin, talentin, fjalën, mendimin dhe angazhimin e tij e vuri në shërbim të Shqipërisë.

Bujar Asqeriu lindi më 13 gusht 1956 në Vlorë, dhe mbahet mend për shumë role të spikatura në ekran. Ai diplomua si aktor nga Akademia e Arteve në Tiranë dhe për plot 15 vite të jetës së tij ishte aktor i Teatrit “Petro Marko” të Vlorës.

Ndërsa për rolet më të famshme në botën e filmin, nuk mund të lëmë pa përmendur personazhin Telo në filmin “Njeriu i mire”, i vitit 1982 dhe Avni Rustemit në filmin “Një emër midis njerëzve” 1983, për të cilët ka fituar Medalionin e Festivaleve të Filmit përkatësisht në vitet 1983 dhe 1985.

The post Mjeshtri i Madh i kinematografisë shqiptare Bujar Asqeriu feston 69 vjetorin appeared first on Albeu.com.

Kreu i qeverisë Edi Rama ka reaguar sërish për situatën e zjarreve në vend, teksa shprehet se të gjitha strukturat shtetërore janë në gatishmëri për të shuar flakët dhe parandaluar sa më shumë dëmet.

Reagimi i kryeministrit Edi Rama:

Një ditë sakrifice dhe krenarie për të gjitha strukturat shtetërore, që vijojnë pa ndërprerje përpjekjet në terren për shuarjen e flakëve në të gjithë vendin

Gjatë 24 orëve të fundit:

34 vatra aktive

13 të izoluara dhe të shuara

Në operacione janë angazhuar:

Dhjetëra mjete zjarrfikëse dhe trupa të Shërbimit të Mbrojtjes nga Zjarri dhe Shpëtimi në të gjitha bashkitë e prekura

Mbi 600 efektivë të Forcave të Armatosura, zjarrfikës, punonjës bashkiakë dhe forca vullnetare

5 helikopterë dhe 1 avion zjarrfikës Canadair i sjellë bujarisht nga miqtë e shtrenjtë italianë

Qindra mjete, përfshirë autoambulanca dhe mjete transporti për evakuimin dhe mbështetjen e banorëve

Vatra që kërkojnë vëmendje në vazhdim: Delvinë, Poliçan, Gramsh, Dropull, Finiq, Berat, Tepelenë dhe Bulqizë, ku forcat nga toka dhe mjetet nga ajri po punojnë pa u ndalur për mbrojtjen e jetës së qytetarëve dhe pronës.

Gatishmëria është maksimale dhe bashkëpunimi mes të gjitha strukturave shtetërore dhe mbështetja e partnerëve europianë dhe emiratas po vijon për të përballuar këtë situatë të vështirë.

The post “Një ditë sakrifice dhe krenarie për të gjitha strukturat shtetërore”, Rama për situatën e zjarreve në vend: Gatishmëria është maksimale appeared first on Albeu.com.

Një tërmet me magnitudë 4.7 ballë goditi brigjet e Nisyros, Greqi, të mërkurën në mbrëmje.

Epiqendra e tërmetit ndodhej 38 kilometra në jugperëndim të ishullit.

Thellësia fokale e tërmetit është 122 kilometra.

Për fat të mirë, deri më tani sipas mediave greke nuk raportohet për të lënduar apo objekte të dëmtuara.

The post Pas zjarreve të shumta, Greqia goditet edhe nga tërmeti appeared first on Albeu.com.

Nga të dhënat paraprake, rreth 40 shtëpi në fshatrat e Gramshit janë djegur nga zjarri dhe janë kthyer të pabanueshme, megjithëse ende nuk ka përfunduar evidentimi i plotë për shkak se flakët vazhdojnë me intensitet.

Korrespondentja e Top Channel Bruna Kërçyku bën me dije se sa i përket aspektit të blegtorisë, katër fshatra të cilat nuk patën kohë të përgatiteshin për evakuimin, Kullollas, Bletëz, Menkollar dhe Shimër ishin më të dëmtuara dhe sipas verifikimeve në terren një numër prej 50-60 bagëtish janë gjendur të djegura dhe disa dhjetëra kafshë pune që nuk kishin arritur të dilnin nga strehat. Ditën e sotme u morën masa për groposjen.

Edhe ato bagëti që i kanë mbijetuar flakëve në fshatrat më të thella ku nisi vatra e zjarrit thuajse nuk kanë shanse për të mbijetuar për shkak të vapës dhe mungesës së ujit duke qenë se banorët vijojnë të jenë të evakuuar. Po ashtu, përbën rrezik për rikthimin e tyre në banesa.

Flakët aktualisht janë me intensitet të vogël por ende po monitorohet nga strukturat vendore sepse era herë pas herë rrit intensitetin, shton rrezikun për vatrave të reja.

The post Zjarri në Gramsh, rreth 40 banesa të shkrumbuara nga flakët/ Banorë të evakuar dhe frikë për vatra të reja appeared first on Albeu.com.

Sean Combs, i njohur si Diddy, ka depozituar një padi në Gjykatën Federale të Distriktit Jugor të New York-ut kundër Courtney Burgess, Ariel Mitchell dhe kompanisë mediatike Nexstar Media Inc.

Në padi thuhet se ata kanë krijuar një skemë të qëllimshme për të fabrikuar dhe transmetuar lajme të rreme, përfshirë video të trilluara të sulmeve seksuale, një raport të rremë policie për përdhunim dhe regjistrime sekrete të përdorura për shantazh.

Sipas padisë, avokatja Ariel Mitchell, e cila kohët e fundit thuhet se i ka dhënë ryshfet një dëshmitari në gjyqin kundër reperit, i ka përsëritur akuzat e fabrikuara edhe në televizion kombëtar. Ajo ka pretenduar se ekzistonte një raport policie që konfirmonte akuzat se Diddy kishte përdhunuar një grua në mars të vitit 2018.

Shtohet po ashtu se kompania televizive i ka transmetuar këto deklarata me pakujdesi totale.

Combs kërkon dëmshpërblim prej jo më pak se 100 milionë dollarë për dëmin që i është shkaktuar reputacionit të tij.

The post Diddy ngre padi për shpifje, kërkon 100 mln $ dëmshpërblim appeared first on Albeu.com.

Presidenti i Shteteve të Bashkuara, Donald Trump, ka lëshuar një paralajmërim të ashpër ndaj Kremlinit, duke i dhënë ultimatum Vladimir Putinit që të ndalojë luftën në Ukrainë deri të premten, përndryshe do të përballet me “pasoja të rënda”.

Në një deklaratë të fortë për mediat, Trump tha: “Nuk mendoj se mund ta bind Putinin të mos bombardojë civilët, sepse e kam bërë këtë në bisedat e kaluara dhe ai ka vazhduar të lëshojë raketa.”

Pavarësisht skepticizmit për ndikimin e drejtpërdrejtë mbi vendimet e liderit rus, Trump theksoi se qëllimi i tij mbetet i qartë: “Dua që lufta të mbarojë.”

Kjo deklaratë vjen në një moment kritik, ndërsa lufta në Ukrainë ka hyrë në vitin e tretë, me intensitetin e sulmeve ajrore ruse që nuk ka shënuar ulje. Presidenti amerikan nuk ka specifikuar se cilat do të jenë pasojat, por përdorimi i frazës “pasoja të rënda” është interpretuar si kërcënim për masa të reja ekonomike, ushtarake ose diplomatike.

Deri tani, administrata Trump ka ndjekur një linjë të alternuar mes presionit dhe diplomacisë në raport me Rusinë, por ultimatumi i sotëm përbën një nga mesazhet më të drejtpërdrejta dhe kërcënuese ndaj Moskës.

Ekspertët ndërkombëtarë shprehen skeptikë se një afat i vendosur publikisht do të ndikojë vendimmarrjen e Kremlinit. Megjithatë, mesazhi i Trump sinjalizon se Uashingtoni është i gatshëm të rrisë ndjeshëm presionin ndaj Rusisë nëse nuk ka përparim në drejtim të një armëpushimi apo marrëveshjeje paqeje.

Situata në Ukrainë mbetet dramatike, me viktima të shumta në radhët e civilëve dhe me mijëra të zhvendosur çdo muaj.

The post Takimi Trump-Putin në Alaskë, Presidenti i SHBA-së paralajmëron liderin rus: Nëse nuk e ndalon luftën të premten, do ketë pasoja të rënda appeared first on Albeu.com.

Viti 2025 po rezulton të jetë viti i Pamelanaissance.

Ish-ylli i Baywatch na mahniti me filmin “The Last Showgirl”, një film që u rendit në listën e Filmave më të Mirë të Vitit 2025. Pastaj ishte roli i saj kryesor në filmin Naked Gun, në të cilin shkëlqen përballë Liam Neeson.

Tani, ka një ndryshim të vogël: Anderson po shet turshi artizanale.

Aktorja 58-vjeçare dhe ikona e kulturës pop është bashkuar me markën e stilit të jetesës nga Los Angeles, Flamingo Estate, për një lansim të kufizuar, “Pamela’s Pickles” – kavanoza me turshi pikante dhe lulesh që kushtojnë 38 dollarë (32 euro) një copë.

Me sa duket, receta bazë vjen nga tezja e madhe e Andersonit, Vie. Aktorja shtoi një shije personale me petale trëndafili të thata, ndërsa Flamingo Estate shtresoi piper rozë, spec djegës guajillo dhe kripë deti të tymosur, së bashku me piper organik Espelette rigjenerues.

Epo, e gjitha kjo është për një kauzë të mirë, pasi 100 për qind e të ardhurave nga turshitë vegane do të dhurohen për Qendrën e Kafshëve të Egra të Kalifornisë (CWC), një strukturë trajtimi mjekësor dhe rehabilitimi për kafshët e egra që ofron kujdes mjekësor për më shumë se 4,000 kafshë të egra çdo vit.

The post Pamela Anderson do hapë biznes turshish, ja cila është kauza e saj appeared first on Albeu.com.

Kryetari i Partisë Demokratike, Sali Berisha, kërkoi sot mbledhjen urgjente të Këshillit të Sigurisë Kombëtare, duke e lidhur këtë me përkeqësimin e situatës nga zjarret, veçanërisht në Delvinë dhe Gramsh.

Thirrje të ngjashme kanë ardhur edhe nga përfaqësues të tjerë të opozitës.

Megjithatë, burime për Report Tv bëjnë të ditur se Këshilli i Sigurisë Kombëtare, i drejtuar nga Presidenti Bajram Begaj, nuk do të mblidhet në këto momente. Nga Presidenca saktësojnë se, në kushtet kur forcat janë të angazhuara në terren, prioritet mbetet ndihma direkte për të përmirësuar situatën.

Sipas të njëjtave burime, më herët është mbledhur Komiteti i Mbrojtjes Civile, nën udhëzimet e të cilit po veprohet dhe po menaxhohet situata.

Ky strukturë koordinon punën e të gjitha ekipeve të emergjencës, duke udhëhequr operacionet për kontrollin e flakëve dhe evakuimin e banorëve në zonat më të rrezikuara.

Autoritetet vijojnë apelimin për bashkëpunim dhe ndjekjen e udhëzimeve zyrtare, ndërsa frontet e zjarrit mbeten ende aktive në disa zona të vendit.

The post Zjarret në vend, menaxhimi i situatës nën udhëzimet e Komitetit të Mbrojtjes Civile appeared first on Albeu.com.

Bordi i drejtorëve të Barcelonës miratoi këtë të mërkurë një garanci prej shtatë milionë eurosh për të balancuar llogaritë dhe për t’iu afruar arritjes së rregullit 1:1 dhe për të qenë në gjendje të regjistrojë nënshkrime të reja.

Presidenti e kishte kërkuar këtë nga anëtarët e tjerë të bordit, të cilët e miratuan unanimisht në një takim të mbajtur këtë pasdite.

Arsyeja për këtë miratim është se klubi kishte shpenzuar më shumë se ç’duhej, veçanërisht në lidhje me seksionet e tij sportive. Kjo rritje e shpenzimeve ndikon në “Fair Play”-in e ekipit të parë. Ky miratim balancon financat dhe e çon një hap më afër regjistrimit të lojtarëve të rinj.

Megjithatë, ata nuk do të jenë në gjendje ta bëjnë këtë ende. Është një hap përpara, por ka ende çështje për t’u zgjidhur, veçanërisht ajo e kutive VIP në Spotify Camp Nou. Pasi auditori dhe LaLiga ta vërtetojnë këtë çështje, klubi do të jetë rikthyer te Rregulli 1:1, pasi vlera e kutive VIP është 100 milionë euro.

Ndërkohë, klubi është ende duke pritur që komiteti mjekësor i LaLigas të vendosë për operacionin në shpinë të Ter Stegen dhe mungesën e tij të pritshme. Nëse është më shumë se katër muaj, ata mund të përdorin një pjesë të pagës së portierit gjerman për të regjistruar Joan Garcían. Ky opsion do të ishte i menjëhershëm, pasi nuk varet nga Fair Play.

The post Bordi miraton për Barçën garancinë prej shtatë milionë euro… appeared first on Albeu.com.

Situata në njësinë Skënderbegas të Gramshit vijon të jetë e rënduar si pasojë e zjarrit.

Ndërkohë në terren kanë zbritur ekipet e Ministrisë së Bujqësisë, të cilat po marrin masa për groposjen e kafshëve të ngordhura që janë djegur.

Kjo ndërhyrje e shpejtë vjen për të shmangur përhapjen e ndonjë epidemie.

Kujtojmë se si pasojë e flakëve, 39 banesa u shkrumbuan, sipërfaqe të mëdha me pyje e shkurre, por edhe dhjetëra bagëti që mbetën të rrethuara nga flakët.

Në mesditë, flakët kanë hyrë në fshatin e tetë të kësaj njësie. Për shuarjen e tij po punojnë më shumë se 350 efektivë, të ndihmuar edhe nga ajri me helikopter.

Nisur nga situata e rënduar, kanë nisur edhe evakuimet e banorëve, por për zjarrfikësit beteja me ta ka qenë po aq e vështirë sa beteja që po zhvillojnë prej dy ditësh me zjarrin.

The post Frikë për përhapjen e sëmundjeve, nis groposja e kafshëve të djegura në Gramsh appeared first on Albeu.com.

Presidenti i Serbisë, Aleksandër Vuçiç ka deklaruar së fundmi se nuk ka ndërmend të kandidojë sërish për të njëjtin post. Vuçiç u shpreh se mandati i tij do të përfundojë për një vit e gjysmë ndërsa shtoi se ai nuk është një diktator siç e paraqesin. Vuçiç e quan veten një veteran politik.

“Karrierën time si president do ta përfundoj për një vit e gjysmë. Unë jam një veteran politik dhe nuk mund të kandidoj më për president, dhe as që më shkon ndër mend të ndryshoj Kushtetutën për ta bërë këtë. Nuk jam diktator, siç më paraqesin zakonisht në mediat austriake.”-tha ai.

Presidenti i Serbisë nuk dha një datë të saktë për zgjedhjet ndërsa theksoi se do të shpallen përpara afatit të parashikuar me ligj. Aleksandër Vuçiç deklaroi se kjo është në kompetencë të institucioneve shtetërore.

“Do të ndihmoj dikë dhe do të luftoj që ata që mendoj se mund ta çojnë Serbinë përpara të kenë sukses në zgjedhje, këtë do ta bëj patjetër. Nga cilat pozita, kjo nuk është temë tani, dhe as nuk mund ta them.”-deklaroi ai.

The post Vuçiç: S’do kandidoj më për President! Jam veteran politik, s’jam diktator siç më quajnë appeared first on Albeu.com.

Qëndrimi i Rusisë për fundin e luftës mbetet i pandryshuar. Këtë e ka bërë të ditur vetë presidenti rus Vladimir Putin i cili në një deklaratë të bërë ditën e sotme.

Kushtet vazhdojnë të jenë ato që Putin vendosi vitin e kaluar: tërheqjen e plotë të forcave të Kievit nga 4 rajonet kryesore të Ukrainës dhe braktisjen e ambicieve të saj për në NATO.

Deklarata e Kremlinit vjen dy ditë përpara takimit Trump- Putin në Alaskë, me presidentin Amerikan që ka deklaruar se për të arritur paqe në Luftën e Europës Lindore të dyja palët duhet të bëjnë lëshime territoriale.

Rusia kontrollon aktualisht 19% të territorit të Ukrainës duke përfshirë Krimenë, gadishullin e aneksuar në vitin 2014, Rajonin e Luhanskut I cili është 100% I pushtuar si dhe pjesë të tjera të rajoneve të Donetskut,Zaporizhias dhe Hersonit që janë pushtuar nga forcat ushtarake të Moskës në mbi 70%.

Liderët Europianë mbajtën gjithashtu një samit virtual me Presidentin Amerikan Donald Trump përpara se kreu i Shtëpisë së Bardhë të takoj Presidentin Rus Vladimir Putin.

Biseda virtuale është organizuar nga Gjermania ndërkohë që Brukseli zyrtar e ka bërë të qartë se Ukraina duhet të lejohet të zgjedhë vetë mbi të ardhmen e saj.

The post Pak para Samitit SHBA-Rusi, Putin shuan shpresat për mbarimin e luftës: Qëndrimi ynë nuk ka ndryshuar, duam Krimenë dhe 4 rajonet e Ukrainës appeared first on Albeu.com.

Situata nga zjarret në zonën e Delvinës mbetet shqetësuese, ndërsa gjatë përpjekjeve për shuarjen e tyre ka ndodhur një incident serioz.

Nënkryetari i Bashkisë së Delvinës, Filip Xuxi, është asfiksuar nga tymi teksa ndodhej në vijën e parë të frontit të zjarrit, si pjesë e grupit të emergjencës që po punon për kontrollin e situatës.

Xuxi u transportua me urgjencë në spital në gjendje të rënduar shëndetësore për shkak të inhalimit të tymit në sasi të mëdha. Ai ndodhet nën kujdesin e mjekëve në repartin e urgjencës, dhe gjendja e tij po monitorohet nga afër.

Zjarret kanë përfshirë disa zona pyjore përreth qytetit, duke shkaktuar dëme të konsiderueshme materiale dhe duke vështirësuar ndërhyrjen për shkak të terrenit të vështirë dhe erërave të forta.

Autoritetet lokale dhe forcat zjarrfikëse po vazhdojnë përpjekjet për të vënë nën kontroll flakët, duke apeluar për ndihmë shtesë dhe kujdes maksimal nga banorët e zonës.

The post Asfiksohet nga tymi nënkryetari i Bashkisë Delvinë, ishte pjesë e grupit për shuarjen e flakëve appeared first on Albeu.com.

Flakët që nisën nga Bashkia e Delvinës kanë përfshirë malin e Sopotit dhe tashmë kanë hyrë në territorin e Bashkisë Gjirokastër.

Korrespondentja e Top Channel Kristina Fidhi raporton se zjarri, i fuqizuar nga era dhe thatësira, paraqet një kërcënim serioz për qytetin e Gjirokastrës dhe fshatin Lazarat.

Forcat zjarrfikëse të Gjirokastrës po luftojnë për ta ndalur përhapjen e flakëve, të ndihmuara nga disa banorë të Lazaratit, të cilët po përballen me zjarrin në majën e Sopotit. Çdo minutë konsiderohet kritike, ndërsa flakët vazhdojnë të mbulojnë zonën, duke rritur rrezikun e përhapjes.

Operacioni i emergjencës vazhdon pa garanci se zjarri do të kontrollohet së shpejti, ndërsa autoritetet apelojnë për kujdes maksimal dhe respektim të udhëzimeve për evakuim nga banorët e zonës.

The post Flakët që nisën në Delvinë tashmë përhapen edhe në Gjirokastër, kërcënim serioz për disa fshatra appeared first on Albeu.com.

Ambasada e Shteteve të Bashkuara në Tiranë ka bërë një njoftim zyrtar lidhur me situatën e zjarreve në vend ku iu ka bërë thirrje qytetarëve amerikanë në Shqipëri të tregojnë kujdes dhe të ndjekin udhëzimet e autoriteteve.

Në një mesazh për qytetarët amerikanë, ambasada thekson rëndësinë e kujdesit të shtuar në zonat e rrezikuara.

“Ambasada e Shteteve të Bashkuara në Tiranë po vazhdon të ndjekë nga afër disa zjarre në zona të ndryshme të vendit dhe u bën thirrje të gjithë qytetarëve amerikanë të tregojnë kujdes në zonat e rrezikuara nga zjarret.” -thuhet në njoftimin zyrtar.

Gjithashtu, disa zona në të gjithë vendin janë nën urdhër evakuimi për shkak të rrezikut të lartë nga zjarret.

Situata më kritike është rregjistruar në Delvinë dhe Gramsh ku ka pasur dëme të shumta materiale dhe ka pasur evakuime masive.

The post Ambasada Amerikane në Tiranë thirrje qytetarëve të saj: Tregoni kujdes në zonat e rrezikuara nga zjarret appeared first on Albeu.com.

Ushtria izraelite ka vazhduar bombardimet në Qytetin e Gazës më 13 gusht, para një ofensive të planifikuar për marrjen nën kontroll të plotë të kësaj zone, teksa Ministria e Shëndetësisë në Gazë tha se në 24 orët e fundit janë vrarë 123 persona.

Shifrat e viktimave janë më të lartat e regjistruara brenda një jave, teksa lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – pothuajse është në vitin e dytë. Kryeministri izraelit, Benjamin Netanyahu, përsëriti një ide që palestinezët duhet të largohen nga Gaza.

“Ata nuk po dëbohen, do t’u lejohet të ikin”, tha ai për kanalin izraelit të televizionit i24NEWS. “Të gjithë ata që shqetësohen për palestinezët dhe thonë se duan t’i ndihmojnë, duhet të hapin dyert e tyre dhe të mos na japin ne leksione”.

Arabët dhe shumë udhëheqës botërorë janë kundër idesë për zhvendosjen e popullsisë së Gazës prej 2 milionë banorësh. Ndërkaq, palestinezët thonë se një zhvendosje e tillë do të ishte sikurse një tjetër Nakba (katastrofë), kur qindra mijëra palestinezë u larguan apo u dëbuan gjatë luftës më 1948.

Plani për rimarrjen e Qytetit të Gazës nga Izraeli – që e kishte marrë nën kontroll në ditët e para të luftës, por më pas ishte tërhequr – pritet të ndodhë pas disa javësh, sipas zyrtarëve. Kjo nënkupton se ende ka shpresa që të arrihet një armëpushim, megjithëse bisedimet për të kanë ngecur dhe lufta po vazhdon.

Aeroplanët dhe tanket izraelite sulmuan rëndë zona të ndryshme në Qytetin e Gazës, duke shkatërruar shtëpi gjatë natës, thanë banorët. Sipas mjekëve, 12 persona u vranë pasi u godit një shtëpi në lagjen Zeitun.

Sulme ka pasur edhe në pjesë të tjera të Gazës, përfshirë në Han Junis, ku janë vrarë tetë palestinezë që po prisnin në radhë për të marrë ndihma, thanë mjekët palestinezë. Për këtë rast, ushtria izraelite nuk ka komentuar.

Edhe tetë persona të tjerë, përfshirë tre fëmijë, kanë vdekur nga uria dhe kequshqyerja në Gazë në 24 orët e fundit, tha Ministria e Shëndetësisë në Gazë. Sipas kësaj ministrie, që nga nisja e luftës 235 persona, përfshirë 106 fëmijë, kanë vdekur nga uria apo kequshqyerja.

Lufta nisi më 7 tetor 2023, pasi Hamasi sulmoi jugun e Izraelit duke vrarë afër 1.200 persona dhe duke rrëmbyer 251 të tjerë. Ofensiva izraelite ka vrarë më shumë se 61.000 palestinezë, sipas Ministrisë së Shëndetësisë në Gazën e kontrolluar nga Hamasi – shifra që OKB-ja i konsideron të besueshme./ REL

The post Sulmet izraelite vrasin 123 persona në Gazë në 24 orët e fundit appeared first on Albeu.com.