LONDËR, 29 korrik /ATSH-DPA/- Britania e Madhe do ta njohë shtetin e Palestinës në shtator para Asamblesë së Përgjithshme të OKB-së, nëse Izraeli nuk e lehtëson krizën në Gazë, tha sot kryeministri britanik, Keir Starmer në takimin e kabinetit qeveritar.

“Ky hap do të ndërmerret nga Britania e Madhe – vetëm nëse qeveria izraelite nuk arrin një armëpushim në Gazë; nuk e bën të qartë se nuk do të ketë një aneksim të Bregut Perëndimor dhe nuk angazhohet në një proces afatgjatë paqeje që ofron një zgjidhje me dy shtete”, sipas një njoftimi nga mbledhja e Kabinetit.

“Ne presim që të paktën 500 kamionë të hyjnë në Gaza çdo ditë – por e vetmja mënyrë për t’i dhënë fund kësaj krize humanitare është përmes një zgjidhjeje afatgjatë”, tha Starmer duke folur nga “Downing Street”.

“Ne po mbështesim përpjekjet e SHBA-së, Egjiptit dhe Katarit për të siguruar një armëpushim jetësor’, shtoi ai.

“Ky armëpushim duhet të jetë i qëndrueshëm dhe duhet të çojë në një plan më të gjerë paqeje, të cilin po e zhvillojmë me partnerët tanë ndërkombëtarë”, tha Starmer.

Kryeministri britanik tha se do të bënte një vlerësim se sa shumë i kanë përmbushur palët këto hapa përpara se të merrte një vendim përfundimtar për një zgjidhje me dy shtete.//a.i/

The post LONDËR – Starmer: BM do të njohë shtetin palestinez nëse Izraeli nuk e lehtëson krizën në Gaza appeared first on Agjencia Telegrafike Shqiptare.

LONDËR, 23 korrik /ATSH-DPA/ – Vala e parë e sanksioneve të Britanisë së Madhe, që synon figurat kryesore në rrjetet e trafikimit të qenieve njerëzore, ka hyrë në fuqi në një përpjekje për të synuar ata që lehtësojnë imigracionin e paligjshëm.

Njëzet e pesë individë dhe subjekte janë në shënjestër, përfshirë një furnizues të anijeve të vogla në Azi dhe udhëheqësit e rrjetit me bazë në Ballkan dhe Afrikën e Veriut.

Gjithashtu në shënjestër janë “ndërmjetësit” që transferojnë para nëpërmjet sistemit ligjor të transferimit të parave Hawala në Lindjen e Mesme, i përdorur për pagesat që lidhen me kalimet e La Manshit.

Alen Basil, një ish-përkthyes policie, i cili më vonë drejtoi një rrjet trafikimi në Serbi me ndihmën e oficerëve të korruptuar të policisë, është gjithashtu në listë.

Sekretari i Jashtëm David Lammy tha se ky ishte “një moment historik në angazhimin e qeverisë për të luftuar krimin e organizuar të imigracionit dhe për të zvogëluar migrimin e parregullt në Britaninë e Madhe”.

“Nga Evropa në Azi, ne po i trajtojmë kontrabandistët e njerëzve që lehtësojnë migrimin e parregullt, duke i synuar ata kudo që të jenë në botë dhe duke i detyruar ata të paguajnë për veprimet e tyre”, shtoi Lammy.

“Mesazhi im për bandat që rrezikojnë pa mëshirë jetët e cenueshme për fitim është ky: ne e dimë se kush jeni dhe do të punojmë me partnerët tanë në të gjithë botën për t’ju mbajtur përgjegjës”, tha Lammy.

Masat synojnë të synojnë bandat e krimit të organizuar kudo që ndodhen në botë dhe të ndërpresin rrjedhën e tyre të parave, përfshirë ngrirjen e llogarive bankare, pronës dhe aseteve të tjera./  /os/

The post LONDËR – MB nis sanksionet kundër rrjeteve të trafikimit të qenieve njerëzore appeared first on Agjencia Telegrafike Shqiptare.

LONDËR, 18 korrik /ATSH-DPA/- Britania e Madhe ka vendosur sanksione të reja ndaj spiunëve rusë, të cilët, sipas saj, janë përgjegjës për një fushatë disavjeçare të aktivitetit kibernetik keqdashës në BM dhe vende të tjera.

Masat synojnë tre njësi të shërbimeve sekrete ruse (GRU) dhe 18 oficerë të përfshirë në spiunazh dhe hacker-im.

“Sanksionet synojnë një njësi të GRU-së – që zbuloi online informacione për të ndihmuar në shënjestrimin e sulmeve me raketa në Mariupol të Ukrainës, përfshirë atë që shkatërroi teatrin e qytetit me qindra civilë të strehuar”, tha Ministria e Jashtme.

Disa nga oficerët e shërbimeve sekrete të sanksionuar ishin të përfshirë në shënjestrimin e një pajisjeje në pronësi të Yulia Skripal me një program keqdashës të njohur si X-agent.

Kjo ndodhi pesë vjet para përpjekjes në Salisbury për të helmuar Yulia Skripal dhe babanë e saj Sergei Skripal – me agjentin vdekjeprurës nervor “Novichok”.

Helmimi i Sergei dhe Yulia Skripal, i njohur edhe si helmimi i Salisbury-t, ishte një atentat i dështuar për të helmuar Sergei Skripal, një ish-oficer ushtarak rus dhe agjent i dyfishtë për shërbimet sekrete britanike në qytetin, Salisbury, Angli, më 4 mars 2018.

“Spiunët e GRU po zhvillojnë një fushatë për të destabilizuar Evropën, për të minuar sovranitetin e Ukrainës dhe për të kërcënuar sigurinë e qytetarëve britanikë”, tha sekretari i Jashtëm, David Lammy.

Ai tha se BM-ja po ndërmerrte “veprime vendimtare” me sanksionet kundër spiunëve rusë.

“Kërcënimet dhe agresioni hibrid i presidentit rus Vladimir Putinit nuk do ta thyejnë kurrë vendosmërinë tonë. Mbështetja e BM-së dhe aleatëve tanë për Ukrainën dhe sigurinë e Evropës është e patundur”, tha Lammy. //a.i/

The post LONDËR – BM vendos sanksione ndaj oficerëve të shërbimeve sekrete ruse appeared first on Agjencia Telegrafike Shqiptare.

LONDËR, 18 korrik /ATSH-DPA/ – Kancelari gjerman, Friedrich Merz deklaroi se do të kishte votuar ”jo” në referendumin e Brexit-it nëse do të ishte britanik, por, sipas tij, duhet ta pranojmë që Britania e Madhe nuk është më pjesë e Bashkimit Evropian.

Merz nënshkroi dje një marrëveshje me BM-në e cila premton të ”forcojë sigurinë euroatlantike” dhe gjithashtu mund të lirojë vizitat e shkëmbimit të shkollave dhe portat elektronike të pasaportave.

Marrëveshja, që do të njihet si Traktati i Kensington-it, u nënshkrua me kryeministrin britanik Keir Starmer në muzeun V&A në Londër, dhe u nënshkrua gjithashtu nga sekretari i Jashtëm David Lammy dhe homologu i tij gjerman, Johann Wadephul.

Berlini ra dakord vitin e kaluar ta bënte lehtësimin e kontrabandës së emigrantëve në BM një vepër penale në një veprim që do t’u japë zbatuesve të ligjit më shumë kompetenca për të hetuar furnizimin dhe ruajtjen e anijeve të vogla që do të përdoren për kalimet e kanalit te La Manshit.

”Propozimet që do të nënkuptojnë sekuestrimin e anijeve të vogla janë një shenjë e qartë se ne jemi seriozë”, tha Starmer.

I pyetur nëse i mungon Britania e Madhe në zemër të BE-së, Merz i tha programit “Today” të BBC Radio 4 se “po. Ne kishim të njëjtat mendime në kaq shumë çështje politike, dhe nëse do të isha një britanik, një qytetar britanik, do të kisha votuar për të qëndruar”.

“Por kjo ka ndodhur tani dhe ne duhet ta pranojmë këtë. Ne duhet të punojmë për këtë, dhe kjo është një nga arsyet pse jam këtu sot për të nënshkruar këtë traktat me BM-në dhe Gjermaninë mbi miqësinë dhe bashkëpunimin e ngushtë”, shtoi Merz./  /Ad.Ab./

The post BM – Merz: Duhet ta pranojmë Brexit-in, pavarësisht dëshirave appeared first on Agjencia Telegrafike Shqiptare.

LONDER, 17 korrik /ATSH-AA/ – Në një rishikim të plotë të sistemit zgjedhor të Mbretërisë së Bashkuar, qeveria ka njoftuar planet për t’u dhënë 16 dhe 17-vjeçarëve të drejtën për të votuar në të gjitha zgjedhjet në Mbretërinë e Bashkuar.

Në një dokument të ri strategjik, qeveria e Mbretërisë së Bashkuar tha se kjo është pjesë e një përpjekjeje më të gjerë për të modernizuar demokracinë, për të rritur pjesëmarrjen dhe për të rivendosur besimin publik në politikë.

Ndryshimi e afron pjesën tjetër të Mbretërisë së Bashkuar me Skocinë dhe Uellsin, ku 16-vjeçarët tashmë mund të votojnë në zgjedhjet lokale dhe të decentralizuara.

Reformat janë një premtim kyç sipas “planit për ndryshim” të qeverisë.

“Ne po ndërmarrim veprime për të shembur barrierat ndaj pjesëmarrjes dhe për të përmbushur angazhimin tonë në manifest për t’u dhënë 16-vjeçarëve të drejtën për të votuar”, tha në një deklaratë zv.kryeministrja e Mbretërisë së Bashkuar, Angela Rayner.

Sipas strategjisë së re, rregullat e identifikimit të votuesve do të zbuten, me kartat bankare të lëshuara në Mbretërinë e Bashkuar të shtuara në listën e identifikimeve të pranueshme. Dokumentet digjitale të identifikimit, të tilla si Karta e Veteranit dhe patentat e drejtimit, do të lejohen gjithashtu kur të jenë të disponueshme.

Një certifikatë digjitale e autoritetit të votuesve do të futet për të përmirësuar qasjen dhe për të ulur kostot.

Një sistem më i automatizuar i regjistrimit të votuesve do të thjeshtojë regjistrimet dhe do të zvogëlojë dyfishimin në të gjitha shërbimet qeveritare.

“Duke përmbushur angazhimin tonë në manifest për të zgjeruar të drejtën e votës për 16 dhe 17-vjeçarët, ne po bëjmë një hap përpara në rivendosjen e besimit publik”, tha në një deklaratë ministrja e Mbretërisë së Bashkuar për Demokracinë, Rushanara Ali.   os/

The post LONDER – BM do të ulë moshën e votimit në 16 vjeç appeared first on Agjencia Telegrafike Shqiptare.

LONDËR, 17 korrik /ATSH-DPA/- Numri i nxënësve në shkollat shtetërore në Angli pritet të bjerë me gati 400,000 deri në vitin 2030 për shkak të rënies së nivelit të lindjeve, sipas shifrave te qeverisë britanike.

“Popullsia që ndjek shkollat fillore pritet të bjerë me një ritëm më të shpejtë sesa ishte parashikuar gjatë pesë viteve të ardhshme”, sipas Departamentit të Arsimit (DfE).

Kjo vjen ndërsa shkollat fillore në disa pjesë të Anglisë, përfshirë Londrën, kanë qenë duke marrë në konsideratë mbylljen e tyre për shkak të rënies së numrit të nxënësve dhe presioneve të financimit.

Parashikimet e fundit të DfE, sugjerojnë se 4 205 117 nxënës do të jenë në shkollat fillore deri në vitin 2030 – një rënie prej 300 000 nga popullsia në vitin 2025.

Ndërkohë, parashikohet që 3 135 086 nxënës të jenë në shkollat e mesme shtetërore në vitin 2030 – që është 97 000 më e ulët se popullsia aktuale e shkollave në vitin 2025.

Një rritje e popullsisë në Angli është zhvendosur në shkollat e mesme, por DfE tha se ky numër nxënësish do të arrijë kulmin në vitet 2026-2027.

Muajin e kaluar, një ish-sekretar i Arsimit bëri thirrje që financimi i shkollave të mos gjykohej më në bazë të numrit të nxënësve për shkak të rënies së numrit të nxënësve.

Deputeti konservator i Parlamentit (MP) Damian Hinds tha se rënia e numrit të fëmijëve në shkolla tregonte se financimi që matet në bazë të numrit të nxënësve nuk ishte më një pasqyrim i mirë i faktit nëse financimi po rritej apo po ulej. //a.i/

The post BM – Numri i nxënësve në shkolla pritet të bjerë me 400 000 gjatë 5 viteve appeared first on Agjencia Telegrafike Shqiptare.

LONDËR, 11 korrik /ATSH/- Fansat e “Oasis” janë “çmendur” sërish pas muzikës së grupit anglez të Rock-ut – pas ribashkimit të tyre, duke e renditur atë në vendin e parë në top listën e albumeve më të mira në Britaninë e Madhe, sipas BBC.

Pasi grupi nisi turneun e tyre të rikthimit javën e kaluar, albumi “Time Flies” është rikthyer në vendin e parë, i ndjekur nga “(What’s the Story) Morning Glory?” i vitit 1995 – i renditur në vendin e dytë.

Albumi debutues “Definitely Maybe”, i vitit 1994 është në vendin e katërt.

“Oasis” kanë pasur tetë albume në vendin e parë në total, dhe për herë të fundit kryesuan listën me “Definitely Maybe” shtatorin e kaluar pasi u njoftua ribashkimi i grupit.

Albumet “Time Flies” dhe “Morning Glory” gjithashtu u rikthyen në pesë vendet e para në atë kohë.

Tre nga këngët e tyre kanë hyrë gjithashtu në listën e 20 këngëve më të mira këtë javë, të kryesuara nga “Acquiesce”, në vendin e 17 – e ndjekur nga “Don’t Look Back in Anger” në vendin e 18-të dhe “Live Forever” në vendin e 19-të.

Noel dhe Liam Gallagher i dhanë fund mosmarrëveshjeve duke u rikthyer në skenë për herë të parë pas 16 vitesh. //a.i./

The post MUZIKË – “Oasis” pushton top listat britanike pas ribashkimit appeared first on Agjencia Telegrafike Shqiptare.

BERLIN, 9 korrik /ATSH-DPA/- Kancelari gjerman Friedrich Merz do të vizitojë Londrën – në një përpjekje për të krijuar bashkëpunim më të ngushtë me Britaninë e Madhe në politikën e jashtme dhe të sigurisë.

“Unë kërkoj një bashkëpunim më të ngushtë, jo vetëm brenda Bashkimit Evropian, por edhe me Britaninë e Madhe – sepse ky vend është me rëndësi strategjike për sigurinë e Evropës”, tha Merz sot në parlamentin gjerman.

Kancelari gjerman tha se kishte pranuar një ftesë për të udhëtuar në Londër për bisedime.

Diskutimet me kryeministrin britanik, Keir Starmer pritet të përfshijnë gjithashtu një marrëveshje partneriteti.

Merz shprehu kënaqësinë e tij për përpjekjet e qeverisë britanike – për t’u harmonizuar me Bashkimin Evropian në politikën e jashtme dhe të sigurisë – pavarësisht Brexit.

“Nuk e fsheh faktin se ende më vjen shumë keq që Britania e Madhe u largua nga Bashkimi Evropian”, shtoi ai. //a.i/

The post BERLIN – Merz viziton Londrën mes përpjekjeve për bashkëpunim më të ngushtë me BM-në appeared first on Agjencia Telegrafike Shqiptare.

LONDËR, 8 korrik /ATSH-DPA/- Presidenti francez Emmanuel Macron bëri thirrje për njohjen e shtetësisë palestineze në një fjalim të mbajtur sot para Parlamentit britanik – duke theksuar se kjo ishte rruga e vetme drejt paqes.

Macron tha se armëpushimi ishte një çështje e një “urgjence absolute” dhe se një zgjidhje me dy shtete do të sillte siguri në rajon.

“Jemi të vetëdijshëm se një rrugëdalje politike është thelbësore dhe unë besoj në të ardhmen e zgjidhjes me dy shtete – si një bazë për arkitekturën rajonale të sigurisë – që do t’i mundësojë Izraelit të jetojë në paqe dhe siguri përkrah fqinjëve të tij”, tha presidenti francez.

“Por dua të jem i qartë, thirrja sot për një armëpushim në Gazë pa asnjë kusht, thjesht i tregon pjesës tjetër të botës – se për ne si evropianë – nuk ka standarde të dyfishta dhe, meqenëse jemi të lidhur me jetët njerëzore, meqenëse jemi të lidhur me integritetin territorial, duam armëpushim, pa diskutim”, theksoi ai.

“Dhe sot, të punojmë së bashku për të njohur shtetin e Palestinës dhe nisja e këtij momenti politik është e vetmja rrugë drejt paqes”, tha Macron. //a.i/

The post LONDËR – Macron: Njohja e Palestinës, rruga e vetme drejt paqes appeared first on Agjencia Telegrafike Shqiptare.

LONDËR, 8 korrik /ATSH/- Presidenti francez Emmanuel Macron tha sot në parlamentin britanik se Britania e Madhe dhe Franca kishin për detyrë ta trajtonin çështjen e emigracionit të paligjshëm me humanizëm, solidaritet dhe vendosmëri, sipas BBC.

“Nuk mund të lejojmë që rregullat e vendeve tona për pranimin e emigrantëve të shkelen dhe rrjetet kriminale të shfrytëzojnë në mënyrë cinike shpresat e kaq shumë individëve”, tha Macron duke folur në ditën e parë të vizitës së tij shtetërore në BM.

Macron dhe bashkëshortja e tij Brigitte do të marrin pjesë në një banket shtetëror në Kështjellën Windsor, këtë mbrëmje së bashku me mbretin, mbretëreshën dhe princeshën e Uellsit.

Më herët, mbreti Charles dhe presidenti francez, Macron kryen një inspektim ceremonial në Kështjellën Windsor.

Macron dhe kryeministri Keir Starmer do të zhvillojnë takime nga e mërkura që synojnë trajtimin e emigracionit të paligjshëm. //a.i/

The post LONDËR – Macron: BM dhe Franca kanë për detyrë të trajtojnë me vendosmëri emigracionin e paligjshëm appeared first on Agjencia Telegrafike Shqiptare.

LONDËR, 4 korrik /ATSH-DPA/- Kryeministri britanik Keir Starmer dhe presidenti Emmanuel Macron do të organizojnë takimin e “koalicionit të të gatshmëve”, javën e ardhshme në Londër.

Starmer dhe lideri francez, Macron do të takohen me aleatët ditën e enjte.

Britania e Madhe dhe Franca kanë udhëhequr përpjekjet për të krijuar koalicionin, një forcë paqeruajtëse që synon të kontrollojë çdo marrëveshje të ardhshme armëpushimi në Ukrainë dhe të pengojë kërcënimet e mëtejshme nga Rusia.

Efektiviteti i koalicionit është vënë në pikëpyetje, pasi vetëm Londra dhe Parisi deri më tani kanë treguar se do të ofrojnë ushtarë në vijën e parë të frontit.

Misioni paqeruajtës do të bazohet gjithashtu në mbështetjen ajrore të SHBA-së, diçka që presidenti Donald Trump nuk ka dashur ta thotë hapur se mund ta ofrojë. //a.i/

The post LONDËR – BM pret takimin e “koalicionit të të gatshmëve” javën e ardhshme appeared first on Agjencia Telegrafike Shqiptare.

LONDËR, 4 korrik /ATSH-DPA/- Policia britanike ka arrestuar pothuajse 2 000 persona në një operacion njëjavor kundër rrjeteve të drogës, tha Këshilli Kombëtar i Shefave të Policisë (NPCC).

Forcat në të gjithë vendin kryen 1 965 arrestime, mbyllën 241 rrjete të trafikimit të drogës dhe sekuestruan 501 armë, afërsisht 178 kilogramë drogë të klasit A ​​dhe rreth 2,4 milionë paund (3,3 milionë dollarë) midis 23 dhe 29 qershorit.

Në Londër, Policia Metropolitane arrestoi 301 persona prej të cilëve 111 janë akuzuar.

Policia e Londrës gjithashtu mbylli më shumë se 100 rrjete të trafikimit të drogës dhe sekuestroi 12 armë zjarri, 78 armë – duke përfshirë shpata samurai dhe thika Zombie, gati 70 kilogramë drogë të klasit A ​​dhe më shumë se 600 000 paund.

Rrjetet e trafikimit të drogës janë zakonisht banda urbane, të cilat përdorin linja telefonike për të shitur drogë, kryesisht kokainë të fortë dhe heroinë, te klientët në qarqe të tjera.

“Elementi i saj më i fshehtë” përfshin shfrytëzimin e personave të cenueshëm, përfshirë fëmijët dhe ata me probleme të shëndetit mendor ose varësisë, duke i rekrutuar ata për të shpërndarë drogë ose duke përdorur shtëpitë e tyre si bazë për trafikim”, tha Policia Metropolitane. //a.i/

The post BM – Policia britanike arreston 2 000 persona në një operacion njëjavor kundër drogës appeared first on Agjencia Telegrafike Shqiptare.

LONDËR, 30 qershor /ATSH-DPA/- Sekretari i Jashtëm i Britanisë së Madhe, David Lammy do të diskutojë thellimin e lidhjeve tregtare dhe të mbrojtjes me Turqinë në vizitën e tij të parë dypalëshe në Ankara të hënën.

Ai do të zhvillojë bisedime mbi Lindjen e Mesme dhe Ukrainën me ministrin e Jashtëm të Turqisë, Hakan Fidan.

Vizita e tij vjen ndërsa po zhvillohen bisedime mbi një marrëveshje të re të tregtisë së lirë midis Britanisë së Madhe dhe Turqisë.

Britania e Madhe dhe Turqia janë gjithashtu në bisedime për të eksportuar avionë luftarakë “Eurofighter Typhoon” në Turqi.

Sekretari i Jashtëm do të vizitojë fabrikën “Nurol Makina” për të parë automjete të blinduara të ndërtuara duke përdorur pajisje dhe motorë sigurie të prodhuar në Britaninë e Madhe.

Lammy do të takohet gjithashtu me shefin e “Airbus Turkey”, Simon Ward, në aeroportin e Ankarasë, për të shënuar një marrëveshje të kohëve të fundit midis kompanisë hapësinore dhe linjës ajrore turke të ngarkesave “MNG Airlines” për avionë komercialë që përdorin motorë “Rolls-Royce”.

“Në një botë gjithnjë e më të paqëndrueshme, Britania e Madhe dhe Turqia mbeten miqtë dhe partnerët më të ngushtë, ndërsa punojmë së bashku për të gjetur zgjidhje paqësore për konfliktin në Lindjen e Mesme dhe pushtimin e paligjshëm të Ukrainës nga Rusia.

“Marrëdhënia jonë është një marrëdhënie që u sjell rezultate të drejtpërdrejta qytetarëve turq dhe britanikë në vend – tregtia midis kombeve tona është përgjegjëse për mijëra vende pune, ndërsa lidhjet tona të sigurisë dhe mbrojtjes ndihmojnë në mbajtjen e njerëzve tanë të sigurt”, tha ai. //a.i/

The post BM – Sekretari i Jashtëm Lammy takohet me homologun turk në Ankara appeared first on Agjencia Telegrafike Shqiptare.

LONDËR, 24 qershor /ATSH-DPA/ – Izraeli dhe Irani duhet të rikthehen te armëpushimi i brishtë i ndërmjetësuar gjatë natës, tha kryeministri britanik Keir Starmer, mes një shkëmbimi të ri armiqësish në Lindjen e Mesme.

Dy vendet ndërluftuese kishin nënshkruar një marrëveshje armëpushimi të propozuar nga presidenti i SHBA-së Donald Trump.

Por, Izraeli pretendoi se Irani e shkeli marrëveshjen duke kryer sulme me raketa pasi ajo hyri në fuqi.

Shefat ushtarakë të Iranit e mohuan këtë, por u përballën me një sulm të ri të urdhëruar nga ministri Izraelit i Mbrojtjes, Israel Katz.

Trump bëri thirrje që Izraeli të tërheqë avionët e tij luftarakë dhe pretendoi se si ai ashtu edhe Irani “nuk e dinë çfarë po bëjnë”, ndërsa u nis për në samitin e NATO-s në Holandë.

Ndërkohë, ndërsa mbërriti në samit, Starmer bëri thirrje që armëpushimi të respektohet.

“Dua që armëpushimi të vazhdojë dhe për këtë arsye, natyrisht, sa më shpejt të kthehemi te kjo aq më mirë dhe ky është mesazhi që po diskutoj me udhëheqës të tjerë sot’’, u tha ai gazetarëve.

“Kemi një armëpushim. Duhet të kthehemi te ai armëpushim, i cili është në përputhje me atë që kam thënë për uljen e tensioneve për një kohë të gjatë tani”, shtoi ai.

Zyra e Starmer tha se Mbretëria e Bashkuar po i jepte përparësi rikthimit të Iranit në bisedime për të rënë dakord për një zgjidhje të qëndrueshme.

“Prioriteti ynë tani është një zgjidhje diplomatike, prandaj kryeministri i ka kërkuar Iranit të kthehet në tryezën e negociatave në kërkim të një zgjidhjeje të qëndrueshme”, tha një zëdhënës./   /os/

The post BM – Starmer: Irani dhe Izraeli t’i rikthehen armëpushimit appeared first on Agjencia Telegrafike Shqiptare.

LONDËR, 23 qershor /ATSH-DPA/- Britania e Madhe dënon fuqishëm çdo përshkallëzim në Lindjen e Mesme, tha sot ministri i Forcave të Armatosura, Luke Pollard – pas sulmit të Iranit me raketa në një bazë ushtarake amerikane, në Katar.

Irani njoftoi në televizionin shtetëror se kishte sulmuar forcat e stacionuara në Bazën Ajrore amerikane al-Udeid në Katar, një hakmarrje ndaj sulmeve të Amerikës ndaj centraleve të saj bërthamore.

Ministri i Forcave të Armatosura, Pollard tha se Britania e Madhe po monitoronte nga afër situatën – që po ndryshonte me shpejtësi – dhe se qeveria e BM-së dënonte fuqimisht çdo përshkallëzim.

“Mbrojtja e forcave tani është në nivelin e saj më të lartë në të gjitha njësitë e vendosura në Lindjen e Mesme”, tha ai.

“Avionët shtesë “Typhoon” të Forcave Ajrore të njoftuar nga kryeministri tani kanë mbërritur në rajon për të përforcuar qëndrimin tonë, për të penguar kërcënimet dhe për të siguruar partnerët tanë, dhe dua të jem i qartë, ne nuk do ta përjashtojmë dërgimin e pajisjeve të mëtejshme nëse kërkohen”, tha ai.

Ministria e Jashtme këshilloi shtetasit britanikë në Katar të strehoheshin pas një alarmi sigurie nga SHBA-ja.

Katari, i cili më herët mbylli përkohësisht hapësirën e tij ajrore, tha se i kishte interceptuar me sukses raketat dhe nuk ishin raportuar viktima.

Një bazë ushtarake në Irak që strehonte trupa amerikane u raportua gjithashtu si një tjetër shënjestër, por Irani nuk mori përsipër përgjegjësinë për atë sulm. //a.i/

The post LONDËR – BM dënon fuqishëm përshkallëzimin e konfliktit pas sulmit të Iranit në bazën ushtarake amerikane appeared first on Agjencia Telegrafike Shqiptare.

LONDËR, 23 qershor /ATSH-DPA/- Parandalimi i Iranit për të siguruar armë bërthamore është një “gjë e mirë” për Britaninë e Madhe, tha “Downing Street”, ndërsa refuzoi të komentonte nëse sulmet e SHBA-së ndaj vendit ishin të ligjshme.

Një zëdhënës i Zyrës së Kryeministrisë tha se fokusi i qeverisë ishte sigurimi i një zgjidhjeje diplomatike – pas sulmit të SHBA-së kundër programit bërthamor të Iranit gjatë fundjavës.

“Jemi të qartë se parandalimi i Iranit për të siguruar armë bërthamore është një gjë e mirë për këtë vend”, tha ai.

“Por, fokusi ynë është zgjidhja diplomatike. Ky është prioriteti dhe kjo është ajo për të cilën po punon çdo anëtar i kësaj Qeverie dhe ky ka qenë fokusi i thirrjeve me partnerët ndërkombëtarë gjatë fundjavës”, theksoi ai.

Por, i pyetur nëse sulmet kishin shkelur të drejtën ndërkombëtare, zëdhënësi nuk pranoi të komentonte.

Më herët, sekretari i Jashtëm Britanik, David Lammy i kërkoi Iranit të angazhohej në bisedime, ndërsa e paralajmëroi Teheranin kundër bllokimit të Ngushticës së Hormuzit ose sulmit ndaj bazave amerikane në Lindjen e Mesme.

Kryeministri britanik Keir Starmer paralajmëroi dje se ekziston rreziku që kriza të përshkallëzohet përtej Lindjes së Mesme.

“Është një rrezik përtej rajonit, dhe kjo është arsyeja pse i gjithë fokusi ynë ka qenë në uljen e tensioneve, rikthimin e negociatave – pasi ky është një kërcënim shumë real në lidhje me programin bërthamor”, tha Starmer. //a.i/

The post BM – Londra: Ndalimi i programit bërthamor të Iranit është “një gjë e mirë” appeared first on Agjencia Telegrafike Shqiptare.

LONDËR, 21 qershor /ATSH-ANSA/ – Një pikë kthese historike që ndan ndërgjegjet. 

Dhoma e Komuneve miratoi ligjin që synon të legalizojë të drejtën e të rriturve me sëmundje terminale për t’u ndihmuar për të vdekur, siç është parashikuar prej kohësh në ligjet e vendeve të ndryshme liberale në Evropën kontinentale, por siç BM e kishte refuzuar me shumicë vetëm 10 vjet më parë.

Teksti, i quajtur Projektligji për të rriturit me sëmundje terminale (Fundi i Jetës), zbatohet për Anglinë dhe Uellsin, ndërsa Skocia dhe Irlanda e Veriut janë në rrugën e tyre për ta ligjëruar këtë çështje në mënyrë autonome, në bazë të decentralizimit.

Deputetët e Westminster, të cilët e kishin miratuar atë në leximin e parë në nëntor me 330 vota pro kundër 275 votave kundër, e miratuar dje në një version të ndryshuar, pas një debati të karakterizuar nga tone jo pa emocione nga të dyja palët.

Ligji u miratua me 314 vota pro dhe 291 kundër, me ndarje dypartiake brenda të gjitha grupeve parlamentare, pas historive të përvojave të dhimbshme personale ose familjare.

Ligji do të kalojë tani në Dhomën e Lordëve, ku megjithatë pritet një shumicë e madhe pro.

Teksti kufizon mundësinë e kërkimit të “vetëvrasjes së asistuar” – me pëlqimin e dy mjekëve – për të gjithë personat e moshës 18 vjeç e lart që i nënshtrohen “diagnozave terminale” me një jetëgjatësi të treguar jo më shumë se gjashtë muaj./ a.jor.

The post BM – Pikë kthese historike për ligjin e eutanazisë appeared first on Agjencia Telegrafike Shqiptare.

TEHERAN, 14 qershor /ATSH/ – Irani ka paralajmëruar Britaninë e Madhe dhe Francën se do të sulmojë bazat e tyre ushtarake në Lindjen e Mesme “nëse ato ndihmojnë në pengimin e sulmeve të saj ndaj Izraelit”, shkruan skytg24.it.

Ndërkohë, Ministri i Jashtëm Antonio Tajani tha në një seancë dëgjimore në Komitetin e Punëve të Jashtme të Dhomës së Senatit: “Në fazën menjëherë pas sulmit të djeshëm izraelit, fola edhe me ministrat e jashtëm të Francës, Gjermanisë dhe Mbretërisë së Bashkuar. Të gjithë më konfirmuan se asnjëri prej tyre nuk ishte informuar paraprakisht për sulmin izraelit”.

”Kam mbledhur shqetësimin më të thellë të komunitetit për këtë skenar, por jo në këtë kohë, kur ende kishte një shpresë të zbehtë të lidhur me kanalin e dialogut midis Shteteve të Bashkuara dhe Iranit. Duke rënë dakord të mbetemi në kontakt të ngushtë, ne ndamë vullnetin për të punuar së bashku për të parandaluar një deeskalim”, shtoi Tajani. /os/

The post FOKUS – Irani: Nëse BM dhe Franca pengojnë sulmet tona ndaj Izraelit do të godasim bazat e tyre ushtarake appeared first on Agjencia Telegrafike Shqiptare.

LONDER, 14 qershor /ATSH-DPA/ – Ish-kapiteni i Anglisë, David Beckham, është nderuar me titullin ”Kalorës i Mbretit” në ceremoninë e ditëlindjes së Mbretit, së bashku me ish-kampionen e tenisit të Wimbledonit, Virginia Wade, dhe talentin e ri të shigjetave, Luke Littler.

Beckham, i cili fitoi tituj në katër vende dhe luajti 115 ndeshje për vendin e tij, u nderua për kontributet e tij në sport dhe bamirësi.

Sir David gjithashtu fitoi Ligën e Kampionëve me Manchester United në vitin 1999, dhe pasi u tërhoq si lojtar u bë themelues dhe bashkëpronar i klubit amerikan ”Inter Miami”.

Ai ka qenë ambasador për bamirësinë globale UNICEF që nga viti 2005 dhe ka qenë ambasador për Fondacionin e Mbretit që nga viti i kaluar.

”Duke u rritur në Londrën Lindore me prindër dhe gjyshër britanikë kaq patriotë dhe krenarë, nuk e imagjinoja kurrë se do të merrja një nder kaq të përulur”, theksoi Beckham në një deklaratë. /os/

The post SOFT NEWS – David Beckham me titullin ”Kalorës i Mbretit” appeared first on Agjencia Telegrafike Shqiptare.

LONDËR, 11 qershor /ATSH/- SHBA-ja ka dënuar vendimin e qeverisë britanike, së bashku me Kanadanë, Norvegjinë, Zelandën e Re dhe Australinë, për të sanksionuar dy ministra të kabinetit izraelit të ekstremit të djathtë, tha sekretari amerikan i Shtetit, Marco Rubio, sipas “Reuters”.

Vendet vendosën sanksione ndaj ministrave të ekstremit të djathtë, Itamar Ben-Gvir dhe Bezalel Smotrich, duke i akuzuar ata për nxitje të përsëritur të dhunës kundër palestinezëve në Bregun Perëndimor.

“Këto sanksione nuk i çojnë përpara përpjekjet e udhëhequra nga SHBA-ja për të arritur një armëpushim, për të sjellë të gjithë pengjet në shtëpi dhe për t’i dhënë fund luftës”, tha Rubio në një postim në X.

“Shtetet e Bashkuara të Amerikës kërkojnë anulimin e sanksioneve dhe qëndrojnë krah për krah me Izraelin”, shtoi ai.

Ministri i Jashtëm britanik, David Lammy tha se dy ministrave izraelitë do t’u ndalohej hyrja në Britaninë e Madhe dhe do t’u ngriheshin të gjitha asetet në BM për shkak të nxitjeve të përsëritura të dhunës kundër komuniteteve palestineze.

Ambasadori i SHBA-së në Izrael, Mike Huckabee tha se masa ishte e papërshtatshme dhe tha se SHBA-ja do të reagonte në mënyrë të përshtatshme ndaj asaj që ai e përshkroi si një tejkalim i jashtëzakonshëm i kufirit.

Smotrich dhe Ben-Gvir i përkasin dy partive të krahut të djathtë të cilat ndihmojnë në koalicionin qeveritar të Netanyahut.

Të dy ministrat janë kritikuar për qëndrimin e tyre të ashpër ndaj luftës në Gazë.

Smotrich ka bërë fushatë kundër lejimit të ndihmës në Gazë, ndërsa Ben-Gvir ka bërë thirrje që populli i Gazës të zhvendoset nga territori. //a.i/

The post UASHINGTON – SHBA-ja dënon sanksionet e qeverisë britanike ndaj ministrave izraelitë appeared first on Agjencia Telegrafike Shqiptare.