LONDËR, 17 korrik /ATSH-DPA/- Numri i nxënësve në shkollat shtetërore në Angli pritet të bjerë me gati 400,000 deri në vitin 2030 për shkak të rënies së nivelit të lindjeve, sipas shifrave te qeverisë britanike.

“Popullsia që ndjek shkollat fillore pritet të bjerë me një ritëm më të shpejtë sesa ishte parashikuar gjatë pesë viteve të ardhshme”, sipas Departamentit të Arsimit (DfE).

Kjo vjen ndërsa shkollat fillore në disa pjesë të Anglisë, përfshirë Londrën, kanë qenë duke marrë në konsideratë mbylljen e tyre për shkak të rënies së numrit të nxënësve dhe presioneve të financimit.

Parashikimet e fundit të DfE, sugjerojnë se 4 205 117 nxënës do të jenë në shkollat fillore deri në vitin 2030 – një rënie prej 300 000 nga popullsia në vitin 2025.

Ndërkohë, parashikohet që 3 135 086 nxënës të jenë në shkollat e mesme shtetërore në vitin 2030 – që është 97 000 më e ulët se popullsia aktuale e shkollave në vitin 2025.

Një rritje e popullsisë në Angli është zhvendosur në shkollat e mesme, por DfE tha se ky numër nxënësish do të arrijë kulmin në vitet 2026-2027.

Muajin e kaluar, një ish-sekretar i Arsimit bëri thirrje që financimi i shkollave të mos gjykohej më në bazë të numrit të nxënësve për shkak të rënies së numrit të nxënësve.

Deputeti konservator i Parlamentit (MP) Damian Hinds tha se rënia e numrit të fëmijëve në shkolla tregonte se financimi që matet në bazë të numrit të nxënësve nuk ishte më një pasqyrim i mirë i faktit nëse financimi po rritej apo po ulej. //a.i/

The post BM – Numri i nxënësve në shkolla pritet të bjerë me 400 000 gjatë 5 viteve appeared first on Agjencia Telegrafike Shqiptare.

LONDËR, 11 korrik /ATSH/- Fansat e “Oasis” janë “çmendur” sërish pas muzikës së grupit anglez të Rock-ut – pas ribashkimit të tyre, duke e renditur atë në vendin e parë në top listën e albumeve më të mira në Britaninë e Madhe, sipas BBC.

Pasi grupi nisi turneun e tyre të rikthimit javën e kaluar, albumi “Time Flies” është rikthyer në vendin e parë, i ndjekur nga “(What’s the Story) Morning Glory?” i vitit 1995 – i renditur në vendin e dytë.

Albumi debutues “Definitely Maybe”, i vitit 1994 është në vendin e katërt.

“Oasis” kanë pasur tetë albume në vendin e parë në total, dhe për herë të fundit kryesuan listën me “Definitely Maybe” shtatorin e kaluar pasi u njoftua ribashkimi i grupit.

Albumet “Time Flies” dhe “Morning Glory” gjithashtu u rikthyen në pesë vendet e para në atë kohë.

Tre nga këngët e tyre kanë hyrë gjithashtu në listën e 20 këngëve më të mira këtë javë, të kryesuara nga “Acquiesce”, në vendin e 17 – e ndjekur nga “Don’t Look Back in Anger” në vendin e 18-të dhe “Live Forever” në vendin e 19-të.

Noel dhe Liam Gallagher i dhanë fund mosmarrëveshjeve duke u rikthyer në skenë për herë të parë pas 16 vitesh. //a.i./

The post MUZIKË – “Oasis” pushton top listat britanike pas ribashkimit appeared first on Agjencia Telegrafike Shqiptare.

BERLIN, 9 korrik /ATSH-DPA/- Kancelari gjerman Friedrich Merz do të vizitojë Londrën – në një përpjekje për të krijuar bashkëpunim më të ngushtë me Britaninë e Madhe në politikën e jashtme dhe të sigurisë.

“Unë kërkoj një bashkëpunim më të ngushtë, jo vetëm brenda Bashkimit Evropian, por edhe me Britaninë e Madhe – sepse ky vend është me rëndësi strategjike për sigurinë e Evropës”, tha Merz sot në parlamentin gjerman.

Kancelari gjerman tha se kishte pranuar një ftesë për të udhëtuar në Londër për bisedime.

Diskutimet me kryeministrin britanik, Keir Starmer pritet të përfshijnë gjithashtu një marrëveshje partneriteti.

Merz shprehu kënaqësinë e tij për përpjekjet e qeverisë britanike – për t’u harmonizuar me Bashkimin Evropian në politikën e jashtme dhe të sigurisë – pavarësisht Brexit.

“Nuk e fsheh faktin se ende më vjen shumë keq që Britania e Madhe u largua nga Bashkimi Evropian”, shtoi ai. //a.i/

The post BERLIN – Merz viziton Londrën mes përpjekjeve për bashkëpunim më të ngushtë me BM-në appeared first on Agjencia Telegrafike Shqiptare.

LONDËR, 8 korrik /ATSH-DPA/- Presidenti francez Emmanuel Macron bëri thirrje për njohjen e shtetësisë palestineze në një fjalim të mbajtur sot para Parlamentit britanik – duke theksuar se kjo ishte rruga e vetme drejt paqes.

Macron tha se armëpushimi ishte një çështje e një “urgjence absolute” dhe se një zgjidhje me dy shtete do të sillte siguri në rajon.

“Jemi të vetëdijshëm se një rrugëdalje politike është thelbësore dhe unë besoj në të ardhmen e zgjidhjes me dy shtete – si një bazë për arkitekturën rajonale të sigurisë – që do t’i mundësojë Izraelit të jetojë në paqe dhe siguri përkrah fqinjëve të tij”, tha presidenti francez.

“Por dua të jem i qartë, thirrja sot për një armëpushim në Gazë pa asnjë kusht, thjesht i tregon pjesës tjetër të botës – se për ne si evropianë – nuk ka standarde të dyfishta dhe, meqenëse jemi të lidhur me jetët njerëzore, meqenëse jemi të lidhur me integritetin territorial, duam armëpushim, pa diskutim”, theksoi ai.

“Dhe sot, të punojmë së bashku për të njohur shtetin e Palestinës dhe nisja e këtij momenti politik është e vetmja rrugë drejt paqes”, tha Macron. //a.i/

The post LONDËR – Macron: Njohja e Palestinës, rruga e vetme drejt paqes appeared first on Agjencia Telegrafike Shqiptare.

LONDËR, 8 korrik /ATSH/- Presidenti francez Emmanuel Macron tha sot në parlamentin britanik se Britania e Madhe dhe Franca kishin për detyrë ta trajtonin çështjen e emigracionit të paligjshëm me humanizëm, solidaritet dhe vendosmëri, sipas BBC.

“Nuk mund të lejojmë që rregullat e vendeve tona për pranimin e emigrantëve të shkelen dhe rrjetet kriminale të shfrytëzojnë në mënyrë cinike shpresat e kaq shumë individëve”, tha Macron duke folur në ditën e parë të vizitës së tij shtetërore në BM.

Macron dhe bashkëshortja e tij Brigitte do të marrin pjesë në një banket shtetëror në Kështjellën Windsor, këtë mbrëmje së bashku me mbretin, mbretëreshën dhe princeshën e Uellsit.

Më herët, mbreti Charles dhe presidenti francez, Macron kryen një inspektim ceremonial në Kështjellën Windsor.

Macron dhe kryeministri Keir Starmer do të zhvillojnë takime nga e mërkura që synojnë trajtimin e emigracionit të paligjshëm. //a.i/

The post LONDËR – Macron: BM dhe Franca kanë për detyrë të trajtojnë me vendosmëri emigracionin e paligjshëm appeared first on Agjencia Telegrafike Shqiptare.

LONDËR, 4 korrik /ATSH-DPA/- Kryeministri britanik Keir Starmer dhe presidenti Emmanuel Macron do të organizojnë takimin e “koalicionit të të gatshmëve”, javën e ardhshme në Londër.

Starmer dhe lideri francez, Macron do të takohen me aleatët ditën e enjte.

Britania e Madhe dhe Franca kanë udhëhequr përpjekjet për të krijuar koalicionin, një forcë paqeruajtëse që synon të kontrollojë çdo marrëveshje të ardhshme armëpushimi në Ukrainë dhe të pengojë kërcënimet e mëtejshme nga Rusia.

Efektiviteti i koalicionit është vënë në pikëpyetje, pasi vetëm Londra dhe Parisi deri më tani kanë treguar se do të ofrojnë ushtarë në vijën e parë të frontit.

Misioni paqeruajtës do të bazohet gjithashtu në mbështetjen ajrore të SHBA-së, diçka që presidenti Donald Trump nuk ka dashur ta thotë hapur se mund ta ofrojë. //a.i/

The post LONDËR – BM pret takimin e “koalicionit të të gatshmëve” javën e ardhshme appeared first on Agjencia Telegrafike Shqiptare.

LONDËR, 4 korrik /ATSH-DPA/- Policia britanike ka arrestuar pothuajse 2 000 persona në një operacion njëjavor kundër rrjeteve të drogës, tha Këshilli Kombëtar i Shefave të Policisë (NPCC).

Forcat në të gjithë vendin kryen 1 965 arrestime, mbyllën 241 rrjete të trafikimit të drogës dhe sekuestruan 501 armë, afërsisht 178 kilogramë drogë të klasit A ​​dhe rreth 2,4 milionë paund (3,3 milionë dollarë) midis 23 dhe 29 qershorit.

Në Londër, Policia Metropolitane arrestoi 301 persona prej të cilëve 111 janë akuzuar.

Policia e Londrës gjithashtu mbylli më shumë se 100 rrjete të trafikimit të drogës dhe sekuestroi 12 armë zjarri, 78 armë – duke përfshirë shpata samurai dhe thika Zombie, gati 70 kilogramë drogë të klasit A ​​dhe më shumë se 600 000 paund.

Rrjetet e trafikimit të drogës janë zakonisht banda urbane, të cilat përdorin linja telefonike për të shitur drogë, kryesisht kokainë të fortë dhe heroinë, te klientët në qarqe të tjera.

“Elementi i saj më i fshehtë” përfshin shfrytëzimin e personave të cenueshëm, përfshirë fëmijët dhe ata me probleme të shëndetit mendor ose varësisë, duke i rekrutuar ata për të shpërndarë drogë ose duke përdorur shtëpitë e tyre si bazë për trafikim”, tha Policia Metropolitane. //a.i/

The post BM – Policia britanike arreston 2 000 persona në një operacion njëjavor kundër drogës appeared first on Agjencia Telegrafike Shqiptare.

LONDËR, 30 qershor /ATSH-DPA/- Sekretari i Jashtëm i Britanisë së Madhe, David Lammy do të diskutojë thellimin e lidhjeve tregtare dhe të mbrojtjes me Turqinë në vizitën e tij të parë dypalëshe në Ankara të hënën.

Ai do të zhvillojë bisedime mbi Lindjen e Mesme dhe Ukrainën me ministrin e Jashtëm të Turqisë, Hakan Fidan.

Vizita e tij vjen ndërsa po zhvillohen bisedime mbi një marrëveshje të re të tregtisë së lirë midis Britanisë së Madhe dhe Turqisë.

Britania e Madhe dhe Turqia janë gjithashtu në bisedime për të eksportuar avionë luftarakë “Eurofighter Typhoon” në Turqi.

Sekretari i Jashtëm do të vizitojë fabrikën “Nurol Makina” për të parë automjete të blinduara të ndërtuara duke përdorur pajisje dhe motorë sigurie të prodhuar në Britaninë e Madhe.

Lammy do të takohet gjithashtu me shefin e “Airbus Turkey”, Simon Ward, në aeroportin e Ankarasë, për të shënuar një marrëveshje të kohëve të fundit midis kompanisë hapësinore dhe linjës ajrore turke të ngarkesave “MNG Airlines” për avionë komercialë që përdorin motorë “Rolls-Royce”.

“Në një botë gjithnjë e më të paqëndrueshme, Britania e Madhe dhe Turqia mbeten miqtë dhe partnerët më të ngushtë, ndërsa punojmë së bashku për të gjetur zgjidhje paqësore për konfliktin në Lindjen e Mesme dhe pushtimin e paligjshëm të Ukrainës nga Rusia.

“Marrëdhënia jonë është një marrëdhënie që u sjell rezultate të drejtpërdrejta qytetarëve turq dhe britanikë në vend – tregtia midis kombeve tona është përgjegjëse për mijëra vende pune, ndërsa lidhjet tona të sigurisë dhe mbrojtjes ndihmojnë në mbajtjen e njerëzve tanë të sigurt”, tha ai. //a.i/

The post BM – Sekretari i Jashtëm Lammy takohet me homologun turk në Ankara appeared first on Agjencia Telegrafike Shqiptare.

LONDËR, 24 qershor /ATSH-DPA/ – Izraeli dhe Irani duhet të rikthehen te armëpushimi i brishtë i ndërmjetësuar gjatë natës, tha kryeministri britanik Keir Starmer, mes një shkëmbimi të ri armiqësish në Lindjen e Mesme.

Dy vendet ndërluftuese kishin nënshkruar një marrëveshje armëpushimi të propozuar nga presidenti i SHBA-së Donald Trump.

Por, Izraeli pretendoi se Irani e shkeli marrëveshjen duke kryer sulme me raketa pasi ajo hyri në fuqi.

Shefat ushtarakë të Iranit e mohuan këtë, por u përballën me një sulm të ri të urdhëruar nga ministri Izraelit i Mbrojtjes, Israel Katz.

Trump bëri thirrje që Izraeli të tërheqë avionët e tij luftarakë dhe pretendoi se si ai ashtu edhe Irani “nuk e dinë çfarë po bëjnë”, ndërsa u nis për në samitin e NATO-s në Holandë.

Ndërkohë, ndërsa mbërriti në samit, Starmer bëri thirrje që armëpushimi të respektohet.

“Dua që armëpushimi të vazhdojë dhe për këtë arsye, natyrisht, sa më shpejt të kthehemi te kjo aq më mirë dhe ky është mesazhi që po diskutoj me udhëheqës të tjerë sot’’, u tha ai gazetarëve.

“Kemi një armëpushim. Duhet të kthehemi te ai armëpushim, i cili është në përputhje me atë që kam thënë për uljen e tensioneve për një kohë të gjatë tani”, shtoi ai.

Zyra e Starmer tha se Mbretëria e Bashkuar po i jepte përparësi rikthimit të Iranit në bisedime për të rënë dakord për një zgjidhje të qëndrueshme.

“Prioriteti ynë tani është një zgjidhje diplomatike, prandaj kryeministri i ka kërkuar Iranit të kthehet në tryezën e negociatave në kërkim të një zgjidhjeje të qëndrueshme”, tha një zëdhënës./   /os/

The post BM – Starmer: Irani dhe Izraeli t’i rikthehen armëpushimit appeared first on Agjencia Telegrafike Shqiptare.

LONDËR, 23 qershor /ATSH-DPA/- Britania e Madhe dënon fuqishëm çdo përshkallëzim në Lindjen e Mesme, tha sot ministri i Forcave të Armatosura, Luke Pollard – pas sulmit të Iranit me raketa në një bazë ushtarake amerikane, në Katar.

Irani njoftoi në televizionin shtetëror se kishte sulmuar forcat e stacionuara në Bazën Ajrore amerikane al-Udeid në Katar, një hakmarrje ndaj sulmeve të Amerikës ndaj centraleve të saj bërthamore.

Ministri i Forcave të Armatosura, Pollard tha se Britania e Madhe po monitoronte nga afër situatën – që po ndryshonte me shpejtësi – dhe se qeveria e BM-së dënonte fuqimisht çdo përshkallëzim.

“Mbrojtja e forcave tani është në nivelin e saj më të lartë në të gjitha njësitë e vendosura në Lindjen e Mesme”, tha ai.

“Avionët shtesë “Typhoon” të Forcave Ajrore të njoftuar nga kryeministri tani kanë mbërritur në rajon për të përforcuar qëndrimin tonë, për të penguar kërcënimet dhe për të siguruar partnerët tanë, dhe dua të jem i qartë, ne nuk do ta përjashtojmë dërgimin e pajisjeve të mëtejshme nëse kërkohen”, tha ai.

Ministria e Jashtme këshilloi shtetasit britanikë në Katar të strehoheshin pas një alarmi sigurie nga SHBA-ja.

Katari, i cili më herët mbylli përkohësisht hapësirën e tij ajrore, tha se i kishte interceptuar me sukses raketat dhe nuk ishin raportuar viktima.

Një bazë ushtarake në Irak që strehonte trupa amerikane u raportua gjithashtu si një tjetër shënjestër, por Irani nuk mori përsipër përgjegjësinë për atë sulm. //a.i/

The post LONDËR – BM dënon fuqishëm përshkallëzimin e konfliktit pas sulmit të Iranit në bazën ushtarake amerikane appeared first on Agjencia Telegrafike Shqiptare.

LONDËR, 23 qershor /ATSH-DPA/- Parandalimi i Iranit për të siguruar armë bërthamore është një “gjë e mirë” për Britaninë e Madhe, tha “Downing Street”, ndërsa refuzoi të komentonte nëse sulmet e SHBA-së ndaj vendit ishin të ligjshme.

Një zëdhënës i Zyrës së Kryeministrisë tha se fokusi i qeverisë ishte sigurimi i një zgjidhjeje diplomatike – pas sulmit të SHBA-së kundër programit bërthamor të Iranit gjatë fundjavës.

“Jemi të qartë se parandalimi i Iranit për të siguruar armë bërthamore është një gjë e mirë për këtë vend”, tha ai.

“Por, fokusi ynë është zgjidhja diplomatike. Ky është prioriteti dhe kjo është ajo për të cilën po punon çdo anëtar i kësaj Qeverie dhe ky ka qenë fokusi i thirrjeve me partnerët ndërkombëtarë gjatë fundjavës”, theksoi ai.

Por, i pyetur nëse sulmet kishin shkelur të drejtën ndërkombëtare, zëdhënësi nuk pranoi të komentonte.

Më herët, sekretari i Jashtëm Britanik, David Lammy i kërkoi Iranit të angazhohej në bisedime, ndërsa e paralajmëroi Teheranin kundër bllokimit të Ngushticës së Hormuzit ose sulmit ndaj bazave amerikane në Lindjen e Mesme.

Kryeministri britanik Keir Starmer paralajmëroi dje se ekziston rreziku që kriza të përshkallëzohet përtej Lindjes së Mesme.

“Është një rrezik përtej rajonit, dhe kjo është arsyeja pse i gjithë fokusi ynë ka qenë në uljen e tensioneve, rikthimin e negociatave – pasi ky është një kërcënim shumë real në lidhje me programin bërthamor”, tha Starmer. //a.i/

The post BM – Londra: Ndalimi i programit bërthamor të Iranit është “një gjë e mirë” appeared first on Agjencia Telegrafike Shqiptare.

LONDËR, 21 qershor /ATSH-ANSA/ – Një pikë kthese historike që ndan ndërgjegjet. 

Dhoma e Komuneve miratoi ligjin që synon të legalizojë të drejtën e të rriturve me sëmundje terminale për t’u ndihmuar për të vdekur, siç është parashikuar prej kohësh në ligjet e vendeve të ndryshme liberale në Evropën kontinentale, por siç BM e kishte refuzuar me shumicë vetëm 10 vjet më parë.

Teksti, i quajtur Projektligji për të rriturit me sëmundje terminale (Fundi i Jetës), zbatohet për Anglinë dhe Uellsin, ndërsa Skocia dhe Irlanda e Veriut janë në rrugën e tyre për ta ligjëruar këtë çështje në mënyrë autonome, në bazë të decentralizimit.

Deputetët e Westminster, të cilët e kishin miratuar atë në leximin e parë në nëntor me 330 vota pro kundër 275 votave kundër, e miratuar dje në një version të ndryshuar, pas një debati të karakterizuar nga tone jo pa emocione nga të dyja palët.

Ligji u miratua me 314 vota pro dhe 291 kundër, me ndarje dypartiake brenda të gjitha grupeve parlamentare, pas historive të përvojave të dhimbshme personale ose familjare.

Ligji do të kalojë tani në Dhomën e Lordëve, ku megjithatë pritet një shumicë e madhe pro.

Teksti kufizon mundësinë e kërkimit të “vetëvrasjes së asistuar” – me pëlqimin e dy mjekëve – për të gjithë personat e moshës 18 vjeç e lart që i nënshtrohen “diagnozave terminale” me një jetëgjatësi të treguar jo më shumë se gjashtë muaj./ a.jor.

The post BM – Pikë kthese historike për ligjin e eutanazisë appeared first on Agjencia Telegrafike Shqiptare.

TEHERAN, 14 qershor /ATSH/ – Irani ka paralajmëruar Britaninë e Madhe dhe Francën se do të sulmojë bazat e tyre ushtarake në Lindjen e Mesme “nëse ato ndihmojnë në pengimin e sulmeve të saj ndaj Izraelit”, shkruan skytg24.it.

Ndërkohë, Ministri i Jashtëm Antonio Tajani tha në një seancë dëgjimore në Komitetin e Punëve të Jashtme të Dhomës së Senatit: “Në fazën menjëherë pas sulmit të djeshëm izraelit, fola edhe me ministrat e jashtëm të Francës, Gjermanisë dhe Mbretërisë së Bashkuar. Të gjithë më konfirmuan se asnjëri prej tyre nuk ishte informuar paraprakisht për sulmin izraelit”.

”Kam mbledhur shqetësimin më të thellë të komunitetit për këtë skenar, por jo në këtë kohë, kur ende kishte një shpresë të zbehtë të lidhur me kanalin e dialogut midis Shteteve të Bashkuara dhe Iranit. Duke rënë dakord të mbetemi në kontakt të ngushtë, ne ndamë vullnetin për të punuar së bashku për të parandaluar një deeskalim”, shtoi Tajani. /os/

The post FOKUS – Irani: Nëse BM dhe Franca pengojnë sulmet tona ndaj Izraelit do të godasim bazat e tyre ushtarake appeared first on Agjencia Telegrafike Shqiptare.

LONDER, 14 qershor /ATSH-DPA/ – Ish-kapiteni i Anglisë, David Beckham, është nderuar me titullin ”Kalorës i Mbretit” në ceremoninë e ditëlindjes së Mbretit, së bashku me ish-kampionen e tenisit të Wimbledonit, Virginia Wade, dhe talentin e ri të shigjetave, Luke Littler.

Beckham, i cili fitoi tituj në katër vende dhe luajti 115 ndeshje për vendin e tij, u nderua për kontributet e tij në sport dhe bamirësi.

Sir David gjithashtu fitoi Ligën e Kampionëve me Manchester United në vitin 1999, dhe pasi u tërhoq si lojtar u bë themelues dhe bashkëpronar i klubit amerikan ”Inter Miami”.

Ai ka qenë ambasador për bamirësinë globale UNICEF që nga viti 2005 dhe ka qenë ambasador për Fondacionin e Mbretit që nga viti i kaluar.

”Duke u rritur në Londrën Lindore me prindër dhe gjyshër britanikë kaq patriotë dhe krenarë, nuk e imagjinoja kurrë se do të merrja një nder kaq të përulur”, theksoi Beckham në një deklaratë. /os/

The post SOFT NEWS – David Beckham me titullin ”Kalorës i Mbretit” appeared first on Agjencia Telegrafike Shqiptare.

LONDËR, 11 qershor /ATSH/- SHBA-ja ka dënuar vendimin e qeverisë britanike, së bashku me Kanadanë, Norvegjinë, Zelandën e Re dhe Australinë, për të sanksionuar dy ministra të kabinetit izraelit të ekstremit të djathtë, tha sekretari amerikan i Shtetit, Marco Rubio, sipas “Reuters”.

Vendet vendosën sanksione ndaj ministrave të ekstremit të djathtë, Itamar Ben-Gvir dhe Bezalel Smotrich, duke i akuzuar ata për nxitje të përsëritur të dhunës kundër palestinezëve në Bregun Perëndimor.

“Këto sanksione nuk i çojnë përpara përpjekjet e udhëhequra nga SHBA-ja për të arritur një armëpushim, për të sjellë të gjithë pengjet në shtëpi dhe për t’i dhënë fund luftës”, tha Rubio në një postim në X.

“Shtetet e Bashkuara të Amerikës kërkojnë anulimin e sanksioneve dhe qëndrojnë krah për krah me Izraelin”, shtoi ai.

Ministri i Jashtëm britanik, David Lammy tha se dy ministrave izraelitë do t’u ndalohej hyrja në Britaninë e Madhe dhe do t’u ngriheshin të gjitha asetet në BM për shkak të nxitjeve të përsëritura të dhunës kundër komuniteteve palestineze.

Ambasadori i SHBA-së në Izrael, Mike Huckabee tha se masa ishte e papërshtatshme dhe tha se SHBA-ja do të reagonte në mënyrë të përshtatshme ndaj asaj që ai e përshkroi si një tejkalim i jashtëzakonshëm i kufirit.

Smotrich dhe Ben-Gvir i përkasin dy partive të krahut të djathtë të cilat ndihmojnë në koalicionin qeveritar të Netanyahut.

Të dy ministrat janë kritikuar për qëndrimin e tyre të ashpër ndaj luftës në Gazë.

Smotrich ka bërë fushatë kundër lejimit të ndihmës në Gazë, ndërsa Ben-Gvir ka bërë thirrje që populli i Gazës të zhvendoset nga territori. //a.i/

The post UASHINGTON – SHBA-ja dënon sanksionet e qeverisë britanike ndaj ministrave izraelitë appeared first on Agjencia Telegrafike Shqiptare.

LONDËR, 11 qershor /ATSH-DPA/- Britania e Madhe ka rënë dakord për një kufi fluid midis Gjibraltarit dhe Spanjës – që nuk do të kërkonte kontrolle për njerëzit që kalojnë kufirin, tha sot qeveria britanike, duke hapur rrugën për finalizimin e një marrëveshjeje pas Brexit me BE-në.

Sekretari i Jashtëm Britanik, David Lammy zhvilloi bisedime me kryeministrin Fabian Picardo në Gjibraltar – së bashku me ministrin e Territoreve përtej Detit të Britanisë së Madhe, Stephen Doughty.

Liderët, më pas udhëtuan në Bruksel për bisedime me përfaqësuesit e BE-së dhe Spanjës.

Bisedimet mbi rregullat që rregullojnë kufirin e Spanjës dhe Gjibraltarit kanë vazhduar që kur Britania e Madhe u largua nga Bashkimi Evropian në vitin 2020. //a.i/

The post LONDËR – BM dhe Spanja bien dakord për kufirin fluid midis Gjibraltarit dhe Spanjës appeared first on Agjencia Telegrafike Shqiptare.

LONDËR, 10 qershor /ATSH-DPA/- Dy ministra të qeverisë izraelite, Itamar Ben-Gvir dhe Bezalel Smotrich, janë sanksionuar nga Britania e Madhe, Australia, Kanadaja, Zelanda e Re dhe Norvegjia – për shkak të qëndrimit të tyre ndaj Gazës.

Ben-Gvir, ministri i Sigurisë në qeverinë e koalicionit të kryeministrit Benjamin Netanyahu, dhe Smotrich, ministri i Financave, do të përballen me ndalim udhëtimi dhe ngrirje të aseteve.

Ky veprim vjen ndërsa Britania e Madhe dhe vendet e tjera perëndimore kërkojnë të rrisin presionin mbi qeverinë e Izraelit mes luftës së vazhdueshme në Gazë.

Ministri i Jashtëm izraelit, Gideon Saar tha se ishte e papranueshme që përfaqësuesit e zgjedhur dhe anëtarët e qeverisë t’i nënshtroheshin këtyre masave.

“E diskutova sot me kryeministrin Netanyahu dhe do të zhvillojmë një takim të posaçëm qeveritar në fillim të javës së ardhshme për të vendosur për përgjigjen tonë ndaj këtij vendimi të papranueshëm”, tha Saar.

Smotrich dhe Ben-Gvir i përkasin dy partive të krahut të djathtë të cilat ndihmojnë në koalicionin qeveritar të Netanyahut.

Të dy ministrat janë kritikuar për qëndrimin e tyre të ashpër ndaj luftës në Gazë.

Smotrich ka bërë fushatë kundër lejimit të ndihmës në Gazë, ndërsa Ben-Gvir ka bërë thirrje që populli i Gazës të zhvendoset nga territori.

Britania e Madhe dhe aleatët e saj kanë rritur presionin ndaj Izraelit në muajt e fundit – për shkak të mungesës së vazhdueshme të ndihmës në Gazë, si dhe sugjerimeve se mund të nisë një ofensivë të re në shkallë të gjerë në territor.

Raportet sugjerojnë se një sasi e vogël ndihmash është lejuar të hyjë në Gazë – mes një iniciative të re të mbështetur nga SHBA-ja dhe Izraeli, në vend të programit të mëparshëm të drejtuar nga OKB-ja. //a.i/

The post FOKUS – Dy ministra izraelitë sanksionohen nga BM, Australia, Kanadaja, Zelanda e Re dhe Norvegjia, për shkak të qëndrimit të tyre ndaj Gazës appeared first on Agjencia Telegrafike Shqiptare.

LONDËR, 7 qershor /ATSH-DPA/- Sekretari i Jashtëm Britanik, David Lammy, do të kërkojë thellimin e lidhjeve ekonomike Britani a Madhe-Indi, ndërsa viziton Nju Delhin këtë fundjavë.

“Marrëveshja tregtare e arritur së fundmi midis BM-së dhe Indisë është vetëm fillimi i ambicieve tona”, tha Lammy më herët.

Tregtia dhe migrimi do të jenë në krye të axhendës së diskutimeve të sekretarit të Jashtëm – i cili ka planifikuar të takohet me kryeministrin indian, Narendra Modi dhe ministrin e Punëve të Jashtme, S Jaishankar.

Ministria e Jashtme tha se Lammy, i cili pritet të mbërrijë sot në Nju Delhi, do të diskutojë gjithashtu përshkallëzimin e fundit të tensioneve – pas sulmit terrorist në Pahalgam dhe menyrat për të arritur paqe të qëndrueshme në interes të stabilitetit në rajon.

Pakistani dhe India ranë dakord për një armëpushim të ndërmjetësuar nga SHBA-ja, muajin e kaluar, pasi armiqësitë në rritje midis dy rivalëve të armatosur me armë bërthamore shkaktuan një sulm vdekjeprurës ndaj turistëve në Pahalgam, Kashmir.

“Nënshkrimi i një marrëveshjeje të tregtisë së lirë është vetëm fillimi i ambicieve tona – ne po ndërtojmë një partneritet modern me Indinë për një epokë të re globale’, tha Lammy përpara vizitës.

“Ne duam të rrisim bashkëpunimin në nxitjen e teknologjisë inovative, përballimin e krizës klimatike dhe përmbushjen e prioriteteve tona të migracionit, si dhe ofrimin e një sigurie më të madhe për njerëzit tanë”, shtoi ai.

Ministria e Jashtme tha se bisedimet në Nju Delhi synojnë thellimin dhe diversifikimin e Partneritetit Strategjik Gjithëpërfshirës midis dy vendeve. //a.i/

The post LONDËR – BM synon thellimin e lidhjeve me Indinë, ndërsa diplomati i lartë viziton Nju Delhin appeared first on Agjencia Telegrafike Shqiptare.

LONDËR, 2 qershor /ATSH-DPA/- Britania e Madhe regjistroi pranverën më të ngrohtë këtë vit dhe gjithashtu sezonin e gjashtë më të thatë që nga fillimi i regjistrimeve, tha sot Zyra Meteorologjike.

Shifrat paraprake treguan se temperatura mesatare e kësaj pranvere prej 9,5 gradë Celsius ishte mbi mesataren klimatologjike afatgjatë me 1,4 gradë Celsius – duke regjistruar sezonin më të ngrohtë që nga fillimi i regjistrimeve në vitin 1884.

“Tetë nga 10 pranverat më të ngrohta në Britaninë e Madhe janë regjistruar që nga viti 2000, dhe tre pranverat më të ngrohta që nga viti 2017”, tha agjencia.

Britania e Madhe mund të kishte regjistruar pranverën e saj më të thatë në më shumë se 100 vjet në mesin e majit, derisa vendi u përfshi nga shiu në dy javët e fundit – duke e bërë atë pranverën e gjashtë më të thatë që nga viti 1836.

Me vetëm 128,2 milimetra reshje, kjo pranverë ishte 40% nën mesataren afatgjatë dhe më e thata në më shumë se 50 vjet. //a.i/

The post METEO – BM regjistron pranverën më të thatë në më shumë se 50 vjet appeared first on Agjencia Telegrafike Shqiptare.

LONDËR, 1 qershor /ATSH-DPA/ – Më shumë se 1 100 emigrantë mbërritën në Mbretërinë e Bashkuar pasi kaluan dje La Manshin, thënë ndryshe numri më i lartë i regjistruar në një ditë të vetme deri më tani këtë vit.

Shifrat e fundit të Ministrisë së Brendshme tregojnë se 1 194 emigrantë mbërritën me 18 anije duke e çuar totalin vjetor të përkohshëm deri më tani në 14 811.

Kjo është 42% më e lartë se e njëjta ditë e vitit të kaluar (10 448) dhe 95% më shumë se e njëjta ditë në vitin 2023 (7 610), sipas analizës së të dhënave nga agjencia e lajmeve PA.

Është ende më e ulët se totali më i lartë ditor prej 1 305 mbërritjesh që nga fillimi i të dhënave në vitin 2018, i cili u regjistrua më 3 shtator 2022.

Sekretari britanik i Mbrojtjes, John Healey tha se skenat e emigrantëve që merreshin nga kontrabandistët “si në një taksi” për t’u sjellë në Mbretërinë e Bashkuar ishin “tronditëse”.

Ai tha se është një “problem vërtet i madh” që policia franceze nuk është në gjendje të ndërhyjë për të kapur anijet në ujëra të cekëta.

Oficerët e policisë franceze u panë duke parë emigrantët, përfshirë fëmijë, të hipnin në një plazh në Gravelines, midis Calais dhe Dunkirk, dhe autoritetet u fotografuan më pas duke shoqëruar anijet.

Autoritetet franceze thanë se shpëtuan 184 persona.

Healey tha se Mbretëria e Bashkuar po bën presion që francezët të vënë në fuqi rregulla të reja në mënyrë që të mund të ndërhyjnë.

“Ata nuk po e bëjnë këtë, por, për herë të parë pas vitesh ne kemi nivelin e bashkëpunimit të nevojshëm. Ne kemi marrëveshjen që ata do të ndryshojnë mënyrën e punës së tyre, dhe përqendrimi ynë tani është t’i shtyjmë ata të mund të kapin këta kontrabandistë dhe t’i ndalojnë këta njerëz në anije, jo vetëm në breg”, theksoi ai./ a.jor.

The post BM – Mbërritje rekord emigrantësh brenda një dite përmes La Manshit appeared first on Agjencia Telegrafike Shqiptare.