Nga Gazeta ‘Si’- OKB-ja i ka quajtur “alarmante” raportet në lidhje me një vendim të mundshëm për të zgjeruar operacionet ushtarake të Izraelit në të gjithë Rripin e Gazës.

Ndihmës sekretari i përgjithshëm i OKB-së, Miroslav Jenca gjatë një takimi të Këshillit të Sigurimit të OKB-së ku u diskutua mbi situatën në Gaza, tha se një veprim i tillë do të shkaktonte pasoja katastrofike dhe se mund të rrezikonte më tej jetën e pengjeve të mbetura në Gaza.

“Raportet e fundit në lidhje me vendimin e Benjamin Netanyahut për të zgjeruar operacionet ushtarake të Izraelit përmes Rripit të Gazës, nëse janë të vërteta janë tejet alarmante”, tha ai duke shtuar se “kjo do të rrezikonte pasoja katastrofike për miliona palestinezë dhe mund të rrezikonte më tej jetën e pengjeve të mbetura në Gaza”

Më tej nënvizoi se e drejta ndërkombëtare është e qartë në këtë drejtim; Gaza është dhe duhet të mbetet një pjesë integrale e shtetit të ardhshëm palestinez.”

The post Zyrtari i OKB: Zgjerimi i operacioneve izraelite në Gaza do shkaktonte pasoja katastrofike appeared first on Gazeta Si.

Nga Gazeta Si – Elfyn Evans rimori kryesimin në botërorin e Rally-t pas vendit të 4 në “Rally Finland” që u fitua nga heroi lokal, Kalle Rovanpera.

Uellsiani nuk ruajti dot shpejtësinë e Rovanpera-s ndërsa Toyota u bë konstruktori i vetëm që vendos 5 makina në 5 vendet e para pas Lancia-s që e bënte diçka të tillë në “Rally de Portugal” në vitin 1990.

Shpejtësia mesatare e Rovanpera-s gjatë 4 ditëve ishte 129.95km/h. më e larta në historinë “WRC” që i dha mundësinë të fitonte me një diferencë prej 39.2 sekondash.

Hyundai me Thierry Neuville dhe Adrien Fourmaux patën probleme me gomat dhe nuk e vunë dot nën presion 24 vjeçarin Rovanpera.

Ndërsa Evans mund të festojë kthimin në vendin e parë të klasifikimit të përgjithshëm, Rovanpera është vetëm 3 pikë pas tij në vendin e dytë.

Ndërkohë 6.6 sekonda ndanë japonezin Takamoto Katsuta, francezin Sebastien Ogier dhe Evans që në finish zunë përkatësisht vendet 2-3 dhe 4 ndërsa finlandezi Sami Pajari kompletoi pesëshen e Toyota-s në krye.

The post Rovanpera fitoi Finlandën, Evans rimori kryesimin e përgjithshëm appeared first on Gazeta Si.

Nga Gazeta ‘Si’- Një vizitë e papritur e presidentit të Shteteve të Bashkuara të Amerikës, Donald Trump në tarracën e një prej objekteve të Shtëpisë së Bardhë ka nxitur kureshtjen e shumë gazetarëve se çfarë po bënte ai aty.

Lideri amerikan, ndonëse në një largësi të konsiderueshme, iu është përgjigjur atyre me shaka se ishte duke vendosur një armë bërthamore.

Trump shoqërohej nga disa anëtarë të stafit, truprojat, dhe sipas disa burimeve mund të ketë në mendje disa ndryshime strukturore në Shtëpinë e Bardhë.

Sipas mediave, në plan është ndërtimi i një salle vallëzimi që do të kushtojë plot 200 milionë dollarë.

Sipas Shtëpisë së Bardhë, salla e re, me një sipërfaqe prej rreth 8,400 metrash katrorë, do të jetë në gjendje të akomodojë deri në 650 persona – tre herë më shumë se kapaciteti i Sallës Lindore, e cila deri më tani është hapësira më e madhe e ngjarjeve në kompleks.

Kjo është arsyeja pse vitet e fundit, ngjarjet në shkallë të gjerë, siç janë darkat shtetërore në nder të krerëve të shteteve, janë pritur në tenda të posaçme në lëndinën jugore të Shtëpisë së Bardhë.

The post Trump shfaqet në çatinë e Shtëpisë së Bardhë dhe iu flet me shaka gazetarëve: Po vendos armë bërthamore appeared first on Gazeta Si.

Nga Gazeta ‘Si’– Territori shqiptar këtë të mërkurë do të ndikohet nga kushte atmosferike relativisht të qëndrueshme.

Moti parashikohet i kthjellët e me vranësira mesatare e hera-herës deri të dendura në orët e mesditës në relievet malore, në verilindje e juglindje. Temperaturat do të variojnë nga 18-34 gradë celsius.

Vranësirat do të shoqërohen me reshje shiu me intensitet të ulët në zonën lindore të vendit, kryesisht në relievet malore, ndërsa pjesa tjetër e territorit parashikohet pa reshje.

Era do të fryjë me drejtim verilindje – veriperëndim, me shpejtësi mesatare 7m/s. Në zonat luginore dhe përgjatë vijës bregdetare, hera-herës, era do të fitojë shpejtësi 7-14m/s.

The post Temperaturat deri në 34 gradë celsius appeared first on Gazeta Si.

Gazeta Si – Sot në orën, 10:00 Gjykata e Juridiksionit të Përgjithshëm të Apelit në Tiranë do të vendosë për masat e sigurisë që ishin ankimuar nga avokatët e 10 të akuzuarve të akuzuar për evazion fiskal të “Bankers Petroleum”, teksa 4 të tjerë janë të shpallur në kërkim.

Seanca e apelit që u zhvillua të martën, 5 gusht, zgjati për më shumë se gjashtë orë. Të arrestuar janë CEO kinez i kompanisë së naftës dhe ish-drejtori, kurse në arrest shtëpie 5 të tjerë dhe 3 në detyrim paraqitjeje.

Të arrestuarit kanë apeluar masat e sigurisë që janë dhënë nga Gjykata e Fierit më 5 korrik. Drejtori i Përgjithshëm i “Bankers”, shtetasi kinez Hong Ping Xiao, ish-drejtori Leonidha Çobo kanë masë sigurie “arrest në burg”.

Pesë persona të tjerë janë lënë në arrest shtëpie, ndërsa 3 të tjerë në detyrim paraqitje dhe ndalim të daljes jashtë vendit.

Hetimet për “Bankers Petroleum Albania LTD” kanë nisur më 30 dhjetor të vitit të kaluar, pas referimit nga Drejtoria e Hetimit Tatimor.

Gjatë këtyre muajve, prokuroria thotë se në bashkëpunim të ngushtë me “Tatimet” kanë grumbulluar prova të mjaftueshme, të cilat krijojnë dyshimin e arsyeshëm se janë kryer disa vepra penale.

Nga hetimi rezulton se “Bankers Petroleum Albania Ltd”, nga viti 2004 e deri në fund të vitit 2024 ka dalë me humbje, çka ka bërë që shteti shqiptar të mos përfitojë asnjë të ardhur prej 20 vitesh nga ky aktivitet, pavarësisht se janë nxjerrë e tregtuar sasi të konsiderueshme karburanti në zonat e njohura me rezerva nafte, Patos-Marinëz-Fier.

Ndërkohë shoqëria ka kryer eksporte dhe shitje brenda vendit nga viti 2004 deri në vitin 2024 në vlerën prej 532,433,614,112 lekë.

Dyshohet se, gjatë gjithë periudhës që ka ushtruar aktivitetin e saj, shoqëria “Bankers Petroleum Albania Ltd” ka rritur në mënyrë fiktive shpenzimet e saj, me qëllim që në bilancin vjetor të rezultojë me humbje.

Më pas nuk ka paguar asnjë tatim mbi fitimin, por ka përfituar nga rimbursimi i TVSH-së nëpërmjet skemave mashtruese, e ndihmuar dhe nga individë e shoqëri të tjera kontraktuese të saj, me objekte dhe veprimtari të ndryshme.

The post Apeli i Tiranës vendos sot për masat e sigurisë ndaj 10 zyrtarëve të ‘Bankers’ appeared first on Gazeta Si.

Nga Gazeta Si – Një gol nga 11 metrat iu mjaftoi azerëve të arrinin fitoren e tretë rradhazi në turret paraeleminatore të UEFA Champions League. Një gabim nga Webster në tentativë për të spastruar zonën e rreptësisë ndëshkoi Shkëndijën me 11 metërsh të cilin e ktheu në gol Toral Bayramov.

Pas minutës së 18 gjithcka ishte e barabartë me përjashtim të rezultatit. Rastet për shënim 17-18 për miqtë, goditjet nga këndi 6-7 dhe madje edhe kartonat e verdhë, 4-3. Ndeshja e kthimit do të zhvillohet një javë më pas në orën 18:00 në “Tofiq Bəhramov adına Respublika stadionu” të Bakusë.

The post Qarabag largohet me fitore nga Shkupi appeared first on Gazeta Si.

Gazeta Si – Ish-presidenti amerikan Bill Clinton dhe bashkëshortja e tij, ish-Sekretarja e Shtetit, Hillary Clinton, janë ndër emrat e njohur që kanë marrë thirrje zyrtare nga një komision i Kongresit të SHBA-ve për të dëshmuar lidhur me çështjen e financierit të ndjerë dhe të dënuar për abuzim seksual, Jeffrey Epstein.

Thirrjet u lëshuan të martën, 5 gusht, nga republikani James Comer, kryetar i Komisionit për Mbikëqyrje të Dhomës së Përfaqësuesve. Përveç çiftit Clinton, thirrje janë lëshuar edhe për tetë persona të tjerë.

Komisioni po kërkon të hetojë më tej të kaluarën e Epstein, pas vendimit të administratës së Donald Trump për të mos publikuar dokumente të tjera federale që lidhen me çështjen.

Ky vendim shkaktoi reagime të forta, si nga mbështetësit e Trump-it ashtu edhe nga disa përfaqësues liberalë, të cilët besojnë se në dosjet e papublikuara mund të gjendet një “listë klientësh” me emra të njohur të lidhur me Epstein-in.

Thirrjet për dëshmi përfshijnë figura nga Departamenti i Drejtësisë gjatë administratave Obama, Trump dhe Biden. Vetë departamenti është thirrur gjithashtu për të dorëzuar dokumente që lidhen me Epstein.

Sipas Comerit, një njoftim për dëshmi i është dërguar edhe ish-Prokurorit të Përgjithshëm Merrick Garland, i cili drejtoi Departamentin e Drejtësisë gjatë presidencës së Joe Biden.

Thirrje për dëshmi kanë marrë edhe dy ish-prokurorët e përgjithshëm të administratës Trump: Jeff Sessions dhe William Barr. Gjithashtu, edhe ish-drejtorët e FBI-së, James Comey dhe Robert Mueller, pritet të paraqiten para komisionit.

Nuk është ende e qartë nëse personat e përmendur do të paraqiten për të dëshmuar dhe nëse dëshmitë e tyre do të jenë publike.

Jeffrey Epstein u arrestua në vitin 2019 nën akuzat për trafikim të të miturve dhe vepra të tjera penale gjatë administratës së parë të Trump-it. Ai vdiq në burg po atë vit, në një ngjarje që autoritetet e cilësuan si vetëvrasje, por që u shoqërua me teori të shumta konspirative.

The post Hetimet për dosjen ‘Epstein’, Kongresi thërret në gjyq Bill dhe Hillary Clinton appeared first on Gazeta Si.

Gazeta Si – Vlora është përfshirë nga një stuhi me rrebeshe shiu, trafik dhe kaos pasditen e kësaj të marte, edhe pse në kulmin e sezonit veror.

Si pasojë e shndërrimeve të befasishme klimatike teksa turistët e qytetarët ndodheshin në plazh, brenda pak minutash qielli është ngrysur dhe shiu i rrëmbyeshëm dhe era e fortë kanë përshkuar qytetin bregdetar.

Reshjet e shiut të rëna me intensitet të lartë për pak minuta kanë bërë që rrugët kryesore të qytetit të përmbyten si pasojë e prezencës së lartë të ujit.

Siç shihet nga pamjet, niveli i ujit në rrugë është rritur, ndaj bashkia ka shpallur gjendjen e emergjencës.

Shiu ka pasur intesitet të lartë, duke krijuar probleme në edhe disa lagje, kryesisht në infrastrukturën rrugore.

Në brendësi të lagjes ‘Pavarësia’, ‘Skelë’, por dhe përgjatë bulevardit kryesor, ka pasur jo vetëm vështirësi qarkullimi dhe pamundësi për të lëvizur, por edhe rrëke uji nëpër rrugë.

Një prej rrugëve dhe zonave më të prekura nga përmbytjet e shiut të verës është edhe ajo “Albano dhe Romina”, ku ka prezencë të madhe uji dhe vështirësi për qarkullim.

Përmbytjes nuk i ka shpëtuar as lagja e vjetër historike e “Muradies”. Lumenj uji nëpër rrugë që kanë kthyer përmbys çadra, tavolina dhe karrige lokalesh, duke shkaktuar dëme të konsiderueshme materiale.

Klientë që kanë lënë porositë nëpër tavolinat jashtë dhe janë larguar për të gjetur strehë, teksa shiu me rrëke përfshinte të gjithë qytetin.

Shërbimet e emergjencës ndërhynë menjëherë me pastrimin e pusetave për të ndihmuar në largimin e ujërave dhe rivendosjen e normalitetit.

The post Stuhi vere në Vlorë, reshje intensive dhe erëra të forta. Përmbyten rrugët kryesore appeared first on Gazeta Si.

Nga Gazeta Si – Fillon pas pak minutash sfida mes kuqezinjve të Tetovës dhe azerëve të Qarabag, e vlefshme për turin e 3 paraeleminator në UEFA Champions League. Skuadrat do të luajnë me këto formacione:

The post Shkëndija-Qarabag, formacionet zyrtare appeared first on Gazeta Si.

Gazeta Si – Ishte ora 8:15 e mëngjesit më 6 gusht 1945, kur një Boeing B29 i Ushtrisë Amerikane hodhi bombën atomike të njohur si “Little Boy” mbi qytetin e Hiroshimës, një port i madh japonez.

Tre ditë më vonë, i njëjti fat i ndodhi edhe Nagasakit aty pranë: mbi 210,000 viktima, kryesisht civilë, përfshirë ata që humbën jetën menjëherë dhe ata që vdiqën në muajt që pasuan për shkak të materialit radioaktiv të mbetur në ajër; më shumë se 150,000 u plagosën.

Të paktën 70% e ndërtesave u shkatërruan. Tetëdhjetë vjet më vonë, Japonia dhe e gjithë bota i kujtojnë dy shpërthimet që ndryshuan historinë përgjithmonë, duke sjellë epokën bërthamore dhe duke demonstruar potencialin e një teknologjie të aftë për të shkatërruar të gjithë njerëzimin.

Vendimi u mor nga presidenti i SHBA-ve, Harry Truman për ta përfunduar më shpejt Luftën e Dytë Botërore. Deri më sot, Japonia mbetet i vetmi komb që ka pësuar një sulm bërthamor gjatë kohës së luftës.

Lajmi!

Ushtria mori një lajm të ngjashëm nga telegrafi hekurudhor: një shpërthim i raportuar. Por radari nuk kishte zbuluar një sulm ajror. Me sa duket, kishte pasur një gabim.

Tokio u përpoq të kontaktonte Hiroshimën. Heshtje. Një oficer i ri mori urdhër të fluturonte atje dhe të hetonte. Njëqind milje larg destinacionit të tij, ai pa një re tymi.

Kur ai dhe piloti i tij arritën në Hiroshima, ata panë shkatërrime të papara më parë: ndërtesa të rrafshuara, një qytet në flakë, tym dhe re të çuditshme në qiell.

Do të duheshin disa orë para se Tokio të zbulonte se çfarë e kishte shkaktuar këtë, por ky ishte kulmi i një historie që kishte filluar katër vjet më parë.

Lufta në Lindjen e Largët

Data 7 dhjetor 1941, shënoi fillimin e një prej kapitujve më tragjikë të Luftës së Dytë Botërore në Lindjen e Largët.

Japonia, me një seri sulmesh rrufe, sulmoi kolonitë britanike në Malajzi, Hong Kong, Singapor, Borneo dhe Burma, si dhe shtete të tjera si Inditë Lindore Hollandeze, Tajlanda dhe Kina. Pushtimet shoqëroheshin me brutalitet ndaj civilëve dhe robërve të luftës.

Objektivi i Japonisë ishte të siguronte territore dhe burime natyrore, veçanërisht naftë, por kjo e vuri përballë pranisë amerikane në rajon – sidomos në Filipine.

Për të neutralizuar Marinën Amerikane, Japonia ndërmori sulmin surprizë mbi bazën detare në Pearl Harbor, në Hawaii. Edhe pse goditja nxori jashtë funksionit disa anije amerikane, aeroplanmbajtëset – asetet më jetike – mbetën të paprekura. Por pasoja më e madhe ishte se Shtetet e Bashkuara hynë zyrtarisht në luftë.

Në vend që të forconin kontrollin rajonal, Japonia zgjoi gjigantin në gjumë – industria amerikane filloi me ritme të jashtëzakonshme ndërtimin e një flote të re.

Në qershor 1942, Japonia pësoi një humbje vendimtare në Atollin Midway, territor strategjik amerikan, ku humbi katër aeroplanmbajtëse, mjete të pazëvendësueshme. Nga ai moment, Japonia nisi rrugën e pashmangshme të rënies.

Gjatë viteve që pasuan, forcat britanike, të Commonwealth-it, kineze dhe veçanërisht amerikane, filluan të përparojnë në Paqësor, në një fushatë të quajtur “island hopping”. Betejat ishin të përgjakshme: Guadalcanal, Saipan, Iwo Jima dhe Okinawa, sollën forcat aleate pranë brigjeve të Japonisë.

Në korrik 1945, Japonia ishte e shteruar nga burimet, ndërsa Aleatët kishin triumfuar në Europë dhe po dërgonin forca drejt Lindjes. Megjithatë, Japonia refuzonte dorëzimin.

Aleatët planifikuan një pushtim amfib në Kyushu, më 1 nëntor 1945 – një betejë që pritej të sillte miliona viktima.

Plani sekret

Shkenca bërthamore kishte dëshmuar se energjia e madhe mund të lirohej përmes ndarjes së atomit. Megjithatë, vetëm projekti amerikan Manhattan, nën drejtimin e J. Robert Oppenheimer, arriti ta konkretizonte këtë në armë. Më 16 korrik 1945, në shkretëtirën e New Mexico-s, u testua me sukses arma e parë bërthamore – Testi Trinity.

Më 26 korrik, presidenti Truman dhe aleatët lëshuan Deklaratën e Potsdamit, duke kërkuar dorëzim të pakushtëzuar nga Japonia dhe duke paralajmëruar për “shkatërrim të menjëhershëm dhe të plotë”. Japonia e injoroi paralajmërimin.

6 gusht 1945, mëngjesi i qetë që u shndërrua në ferr!

Qytetarët e Hiroshimës u zgjuan në një mëngjes të ngrohtë e të qetë. Alarmet e natës për sulm ajror ishin rremë. Askush nuk e priste atë që do të ndodhte.

Ora 08:15 – një top zjarri me temperaturë ylli shpërtheu në qiell. Brenda një sekonde, diametri i shpërthimit arriti 270 metra. Njerëzit brenda një gjysmë milje nga epiqendra u avulluan, duke lënë vetëm hije të djegura në tokë e mure. Temperatura në tokë arriti afro 4,000°C. Rreth 80,000 persona humbën jetën menjëherë.

Të tjerët pësuan djegie të tmerrshme nga rrezatimi. Kiyoshi Tanimoto, një pastor metodist, e përshkroi: “Një blic drite preu qiellin… dukej si një fletë dielli”.

Valët goditëse udhëtuan me shpejtësi 1,580 km/h. Dritaret u thyen, pluhuri dhe tymi u përhapën. Një foto nga konvoji amerikan tregon renë e kërpudhës, e cila arriti deri në 15 km lartësi.

Koloneli Paul Tibbets, piloti i avionit Enola Gay, tha: “Qyteti që e pamë qartë në diell, tani ishte një njollë e shëmtuar. Zjarre po shpërthenin kudo”.

Në Tokio, lajmet vinin njëri pas tjetrit. Një raport tregonte: “E gjithë Hiroshima u shkatërrua menjëherë nga një bombë e vetme.” Po atë mbrëmje, Shtetet e Bashkuara konfirmuan: “Bombë e madhe u hodh mbi Hiroshima më 5 gusht në orën 19:15 sipas kohës së Uashingtonit”.

Truman, që kishte marrë vendimin pas shumë diskutimesh, e dinte se kjo fuqi duhej demonstruar edhe një herë për të çuar luftën drejt fundit.

Përshtati: Gazeta “Si”

The post Hiroshima, bota përkujton 80-vjetorin e bombardimit atomik amerikan appeared first on Gazeta Si.

Gazeta Si – Një gjykatë moldave ka dënuar Evghenia Gutul, guvernatoren pro-ruse të rajonit autonom të Gagauzisë, me shtatë vjet burg për mbledhje dhe përdorim mashtrues të fondeve ruse midis viteve 2019 dhe 2022, kur ajo ishte sekretare e SOR, një parti euroskeptike dhe populiste me lidhje të ngushta me Rusinë.

Gutul, 38 vjeçe, ka qeverisur Gagauzinë që nga viti 2023. Partia e saj, SOR, u shpall jokushtetuese po atë vit, kur një gjykatë zbuloi se kishte paguar individë për të organizuar protesta dhe trazira kundër qeverisë pro-perëndimore të presidentes Maia Sandu.

Moldavia është një vend kandidat për anëtarësim në Bashkimin Evropian: zgjedhjet parlamentare do të mbahen në fund të shtatorit dhe shteti i vogël ka frikë nga ndërhyrje të reja ruse, siç ndodhi gjatë fushatës presidenciale të tetorit 2024.

Moldavia ka qenë e pavarur që nga shpërbërja e Bashkimit Sovjetik në vitin 1991. Ajo është pa dalje në det dhe kufizohet me Ukrainën në lindje dhe Rumaninë në perëndim.

Përveç rajonit autonom të Gagauzisë, i cili banohet kryesisht nga njerëz që flasin turqisht, ajo përfshin edhe Transnistrinë, një rajon pro-rus që prej kohësh ka pretenduar pavarësi.

The post Moldavia dënon politikanen pro-ruse me 7 vjet burg për abuzim të fondeve appeared first on Gazeta Si.

Gazeta Si – Anëtarë të qeverisë izraelite dhe drejtues ushtarakë, kanë pasur mosmarrëveshje me kryeministrin Benjamin Netanjahu, i cili po planifikonte një ofensivë për të pushtuar plotësisht Rripin e Gazës.

Por nga zyra e Netanjahut, konfirmohet se “ushtria do të zbatojë vendimet e qeverisë” pavarësisht gjithçkaje.

Sipas mediave britanike, por edhe ato izraelite, thuhet se një takim i kabinetit të sigurisë izraelite, i cili duhej të diskutonte urdhrin e kryeministrit Benjamin Netanyahu për “pushtimin e plotë” të Gazës, ishte planifikuar për sot, por është shtyrë për shkak të tensioneve në rritje mbi realizueshmërinë e këtij plani.

Gjithashtu, zyrtarë të lartë ushtarakë dhe ish-komandantë të lartë kanë paralajmëruar se plani do të rrezikonte jetën e pengjeve izraelite që mbahen ende nga Hamas, dhe se operacioni mund të shkaktonte izolim më të madh ndërkombëtar për Izraelin, si dhe do t’i detyronte ushtarët izraelitë të përballeshin me një popullatë ku ende do të ishin të pranishëm luftëtarë të Hamasit.

Mes “kundërshtarëve” është edhe kreu i ushtrisë (IDF), gjenerali lejtënant Eyal Zamir.

Burime të ndryshme raportojnë për mediat në fjalë se Zamir është kundër planit të Netanyahu-t dhe mund të japë dorëheqjen ose të detyrohet të japë dorëheqjen nëse plani miratohet.

The post Tensione mbi pushtimin e Gazës, zyra e Netanjahut: Ushtria do zbatojë vendimet e qeverisë appeared first on Gazeta Si.

Nga Gazeta Si – Të gjithë të lumtur dhe të kënaqur, mund të përkufizohet në këtë mënyrë mbyllja e Sagës “Milan-Jashari”.

34 milionë euro (në 4 këste) plus 3 milionë të tjera bonus si dhe dëshira e palêkundur e futbollistit dardan, bindën Club Brugge ta lënë të lirë drejt Serie A.

Kujtojmë që Jashari ishte objektiv i Igli Tares që ditën e parë si Drejtor Sportiv në Milanello.

Për mesfushorin dardan u interesuan Leverkusen në Bundesliga dhe Neom SC në Saudi Pro League.

Zyrtarizimi i mbërritjes së tij në Milano u bë pak orë pas prezantimit të Luka Modric.

The post Kuqezi me kohë të plotë – Jashari vjen në mbrëmje në Milano appeared first on Gazeta Si.

Gazeta Si – Presidentja e Kosovës, Vjosa Osmani ka tërhequr kërkesën e saj drejtuar Gjykatës Kushtetuese në lidhje me ngërçin e Kuvendit për shkak se gjyqtar raportues i çështjes ishte caktuar serbi Radomir Llaban.

Sipas Osmanit, institucionet e sigurisë kanë mbledhur informacione për veprimtari të rrezikshme për sigurinë kombëtare të Llabanit.

Osmani tha se në interesin e vendit, tërheqja e kërkesës është vendim i domosdoshëm pasi rendi kushtetues nuk mund të mbrohet nga persona që sipas institucioneve të sigurisë e rrezikojnë rendin kushtetues.

“Ju njoftoj se sot në përputhje me ligjin për Gjykatën Kushtetuese, dhe rregulloren e kësaj Gjykatë kam tërhequr kërkesën numër KO215/25, e paraqitur në 22 korrik. Këtë e kam bërë si një reagim të menjëhershëm ndaj informatës tashmë të konfirmuar, se si gjyqtar raportues në këtë kërkesë është caktuar gjyqtari Radomir Llaban, për veprimtarinë e rrezikshme të të cilit në vitet 2018, 2021 dhe 2024, institucionet tona të sigurisë kanë dorëzuar informacione të qarta e zyrtare.

Sipas këtyre informatave të cilat në vitet 2021 dhe 2024 po ashtu janë ndarë edhe me Gjykatën Kushtetuese, ky gjyqtar paraqet rrezik për sigurinë kombëtare të Republikës së Kosovës dhe është i angazhuar në veprimtari kundër rendit kushtetues të Republikës së Kosovës”, tha Osmani.

Presidentja e Kosovës tha se zgjedhja e këtij gjyqtari, është jo vetëm shqetësues por edhe e rrezikshme, dhe “mund të ketë pasoja të rënda dhe potencialisht të pakthyeshme. Kjo cënon besueshmërisë e gjykatës Kushtetuese dhe krijon rrezikun për krijimin e një precedenti.”

Më tej, Osmani theksoi se kjo nuk lidhet me preferencat e saj personale si presidente për gjyqtarët, por me informacionet zyrtare që institucionet e Kosovës kanë bërë publike ndër vite.

Presidentja Osmani, më 22 korrik, i kishte kërkuar Gjykatës Kushtetuese jo vetëm një pezullim të përkohshëm të afatit 30 ditor, por dhe të shqyrtojë “konfliktin e kompetencave kushtetuese” nga moskonstituimi dhe pasojat juridike të kalimit të këtij afati.

The post Gjyqtari serb kërcënim për sigurinë kombëtare, Vjosa Osmani tërheq kërkesën në Kushtetuese appeared first on Gazeta Si.

Gazeta Si – Dhjetëra kongresmenë demokratë të Teksasit – rreth 57 – u larguan nga shteti i tyre të dielën e kaluar, duke gjetur strehim në Illinois, Boston dhe Albany, New York, për dy javët e ardhshme.

Qëllimi i tyre është të bllokojnë një plan të mbështetur nga Trump për të ruajtur shumicën republikane në Dhomën e Përfaqësuesve për dy vitet e fundit të mandatit të tij, duke rivizatuar hartën e Kolegjit Zgjedhor.

Kjo është pjesë e një beteje më të gjerë, mbarëkombëtare përpara zgjedhjeve të mesit të mandatit në SHBA.

Zakonisht, partia që fiton zgjedhjet presidenciale humbet në të paktën një dhomë të Kongresit dhe në nëntor 2026, republikanët kanë frikë për Dhomën e Përfaqësuesve, ku ata mbajnë një shumicë të ngushtë.

Për të shmangur humbjen e kontrollit të Dhomës së Përfaqësuesve dhe për të rrezikuar bllokimin e planit të tij, Donald Trump i ka kërkuar guvernatorit republikan të Teksasit, Greg Abbott, të rivizatojë hartën e Kolegjit Zgjedhor për të siguruar që republikanët të fitojnë pesë vende shtesë (ata aktualisht kontrollojnë 25 nga 38 të shtetit).

Plani parashikon ndryshimin e kufijve të Hjustonit, Dallasit, Austinit dhe disa distrikteve të kontrolluara nga demokratët në kufirin me Meksikën.

Abbott thirri një seancë të posaçme legjislative për të bërë ndryshimet. Për ta parandaluar këtë, duke mos arritur një kuorum prej dy të tretash, anëtarët demokratë të legjislaturës së Teksasit ikën, duke bojkotuar seancën legjislative.

Ata përballen me gjoba prej 500 dollarësh në ditë për braktisjen e vendeve të tyre, një veprim që mund të mos i pëlqejë disa prej zgjedhësve të tyre, pasi mungesa e tyre pengon diskutimin e legjislacionit për të adresuar përmbytjet e fundit.

Guvernatori tha se do të kërkonte të largonte anëtarët nëse nuk do të ktheheshin në vendet e tyre deri në orën 3 të pasdites dje, duke deklaruar se ata do të kryenin “një krim”, nëse do të përpiqeshin të mblidhnin fonde për të paguar gjobat që lidhen me mungesën e tyre.

“Demokratët e Teksasit”, deklaroi guvernatori, “kanë dështuar në detyrën e tyre. Duke u larguar nga Teksasi, ata po mbajnë peng një ligj kyç për të ndihmuar viktimat e përmbytjeve dhe për të çuar përpara masat fiskale”.

Sipas mediave amerikane, një votim u zhvillua gjatë natësi: Dhoma e Përfaqësuesve të Teksasit miratoi, me 85 vota pro dhe 6 kundër, urdhër-arrestin për demokratët që po iknin.

Abbott urdhëroi forcat e rendit të Teksasit të “gjejnë, arrestojnë dhe sjellin përsëri në sallën e Dhomës së Përfaqësuesve të gjithë ata që kanë dështuar në detyrën e tyre ndaj teksanëve”.

Kërkesa është në thelb simbolike, vëren “Texas Tribune”, sepse “urdhër-arresti” është i zbatueshëm vetëm brenda kufijve të shtetit.

Dhe demokratët që po iknin, kishin pritur të qëndronin larg për dy javë, deri në fund të seancës së posaçme legjislative të verës.

Kjo është një betejë kombëtare e paprecedentë, me Partinë Republikane që po shqyrton gjithashtu manipulimin e zgjedhjeve në shtete të tjera “të kuqe” si Ohio, Indiana dhe Missouri.

Ngjarja ka shkaktuar një reagim të ashpër nga guvernatorët në shtetet “blu” si Kalifornia, Illinois, Nju Jorku dhe Nju Xhersi, të cilët po kërcënojnë me masa simetrike (megjithëse opsionet e tyre janë të kufizuara).

“Ky nuk është një bllof”, tha Guvernatori i Kalifornisë, Gavin Newsom, të premten e kaluar, duke e përshkruar atë si një betejë “ekzistenciale” pas takimit me disa nga kongresmenët “e dëbuar” të Teksasit.

Ndërkohë, ish-guvernatori republikan, Arnold Schwarzenegger ka mbajtur anën e Newsom, duke thënë se është gati të bëjë fushatë kundër planit të manipulimit të zgjedhjeve në shtetin e tij.

“Ai mendon se rindarja e distrikteve është e keqe”, tha zëdhënësi i aktorit, Daniel Ketchell. “Ai është kundër asaj që po bën Teksasi dhe mendon se është gabim që Kalifornia të ndjekë shembullin”.

Përshtati: Gazeta “Si”

The post Teksas, republikanët urdhërojnë arrestimin e demokratëve që ikën nga Parlamenti appeared first on Gazeta Si.

Nga Gazeta “SI”– Vepra “Ridënimi” e autorit të njohur shqiptar Fatos Lubonja është përzgjedhur mes 14 titujve të nominuar për çmimin letrar “Angelus” 2025, një nga çmimet më të rëndësishme për Letërsinë e Europës Qendrore, që vlerëson prozën e përkthyer në gjuhën polake.

Botuar në Poloni me titullin “Drugi wyrok”, libri është përkthyer nga Dorota Horodyska dhe është publikuar nga shtëpia botuese “Pogranicze”. Përkthimi i tij është mbështetur nga Qendra Kombëtare e Librit dhe Leximit (QKLL), përmes Fondit të Përkthimit Letrar nga Gjuha Shqipe në Gjuhë të Huaj, një nismë e përvitshme që synon promovimin e letërsisë shqipe në botë.

“Ridënimi” i përket gjinisë së kujtimeve dhe konsiderohet një nga veprat më të rëndësishme të letërsisë së kujtesës, ku Lubonja sjell dëshminë e jetës së tij në burgjet e diktaturës komuniste.

Lista përfundimtare me shtatë finalistët e çmimit “Angelus” 2025 pritet të publikohet në muajin shtator, ndërsa vepra e Lubonjës vijon të tërheqë vëmendjen e kritikës dhe lexuesit polak.

Çmimi letrar “Angelus” jepet çdo vit në Poloni për veprat më të mira të autorëve nga Europa Qendrore që trajtojnë temat historike dhe shoqërore të rajonit. Ai është themeluar në vitin 2006 në qytetin e Wrocław dhe konsiderohet një nga çmimet më prestigjioze për prozën e përkthyer në gjuhën polake.

Fituesi shpërblehet me një shumë të konsiderueshme monetare, ndërsa përkthyesi i veprës së shpërblyer gjithashtu nderohet me një çmim të veçantë. Ky çmim ofron një platformë të rëndësishme për autorët nga Europa Qendrore për të prezantuar letërsinë e tyre në arenën ndërkombëtare.

The post Fatos Lubonja, kandidat për çmimin prestigjioz letrar ‘Angelus 2025’ në Poloni appeared first on Gazeta Si.

Nga Gazeta ‘Si’- Kryetari i PD, Sali Berisha, ka akuzuar qeverinë se po fshihet pas një krize të thellë në sektorin e turizmit, duke e cilësuar zhvlerësimin e euros si “toksinën e vërtetë të ekonomisë shqiptare”.

Në një deklaratë për mediat, Berisha tha se pavarësisht propagandës për 10 milionë turistë, Shqipëria këtë vit po përjeton një rënie dramatike të vizitorëve në plazhe, liqene dhe destinacione turistike.

Ai akuzoi qeverinë dhe mediat pranë saj për “heshtje mafioze” dhe për fshehje të shkakut të vërtetë që, sipas tij, është forcimi artificial i lekut nga paraja e ardhur nga trafiku i drogës.

“Shkaku madhor i kësaj rënie dramatike është narko-euroja! Narko-euro është toksina e vërtetë e ekonomisë dhe turizmit shqiptar. Turisti që më parë me 100 euro blinte një shërbim, sot i duhen 135 euro për të njëjtën gjë,” deklaroi Berisha.

Sipas tij, zhvlerësimi me 35% i euros dhe dollarit në Shqipëri ka rritur çmimet për turistët e huaj, duke e bërë vendin më të shtrenjtë se disa vende të Bashkimit Europian. Ai e cilësoi këtë një “krim të heshtur” dhe akuzoi operatorët turistikë dhe ekspertët për bashkëpunim në këtë fshehje.

“Të fshehësh këtë fakt, bëhesh bashkëfajtor në një krim. Po dëmtohet një nga sektorët më strategjikë të vendit,” theksoi Berisha.

Berisha përmendi gjithashtu periudhën 2005–2012 si kohë të një rritjeje të fortë të turizmit falë infrastrukturës, ndërsa sipas tij, rritja e viteve të fundit është artificiale dhe manipulim statistikor që përfshin pasagjerët e linjave ajrore dhe jo vizitorë realë.

The post Berisha: Turizmi ka dështuar, shkak eurot e drogës appeared first on Gazeta Si.

Gazeta Si – Një hasmëri e vjetër me dy familje të tjera, njëra nga Puka, dyshohet të jetë pista kryesore e hetimit në lidhje me vrasjen e 65-vjeçarit Frrok Lleshaj në Vaun e Dejës.

Burime paraprake nga Policia e Shkodrës, thonë se janë shoqëruar në komisariat 12 persona, të cilët mund të kenë dijeni për ngjarjen.

Sipas të dhënave nga ekspertiza e policisë, 65-vjeçari është qëlluar me pistoletë nga një distancë e afërt, çka shton dyshimet se autori ka bashkëpunuar me persona të tjerë.

Policia ka sekuestruar pamjet e kamerave të sigurisë të një banese pranë vendit të ngjarjes, të cilat pritet të ndihmojnë në identifikimin e autorëve.

Gjithashtu, dyshohet se autori është larguar me motoçikletë, duke përfituar nga errësira për t’u zhdukur me shpejtësi nga vendi i krimit.

Gjithnjë sipas burimeve policore, hasmëria mes familjes Lleshaj dhe dy familjeve të tjera ka prodhuar që nga fillim të viteve ’90 pesë viktima deri më tani.

Frrok Lleshaj është i treti që vritet pas djalit dhe vëllait të tij në fillim të viteve ’90, ndërsa të vrarë janë edhe kushëriri i tij, Dodë Lleshaj, me të cilin nisi konflikti, si dhe një shtetas tjetër nga Puka.

Ngjarja e parë ndodhi në vitin 1991, kur djali i 65-vjeçarit u vra në Greqi. Asokohe u tha se i riu ishte vrarë nga policia greke në rrethana të paqarta, por familja e Frrok Lleshajt dyshonte se pas ngjarjes fshiheshin kushërinjtë e tij.

Disa vite më vonë, dyshohet se Frrok Lleshaj mori gjakun e djalit të tij, duke vrarë kushëririn Dodë Lleshaj. Megjithatë, ai nuk e pranoi asnjëherë autorësinë e kësaj ngjarjeje.

Ndërkohë, një tjetër konflikt lindi me një familje nga Puka. Frrok Lleshaj qëlloi për vdekje një person tjetër, për të cilin e pranoi autorësinë në gjykatë dhe u dënua me 25 vite burg. Nga këto dy hasmëri të vjetra dhe ende të pambyllura, mbetet i vrarë edhe vëllai i 65-vjeçarit.

Frrok Lleshaj kishte dalë nga burgu në vitin 2023, por ishte braktisur nga familja, gruaja dhe fëmijët. Ai jetonte i vetëm në fshatin Paçram, duke u marrë me blegtori.

Vrasja ndodhi pranë banesës së tij, ndërsa ai po ecte në rrugët e fshatit. Trupi i tij u gjet nga një kalimtar i rastësishëm, i cili njoftoi menjëherë policinë.

Grupi hetimor po verifikon gjithashtu edhe veprimtarinë e 65-vjeçarit pas daljes nga burgu, për konflikte të mundshme që mund të ketë pasur me persona të tjerë. Por deri më tani, nuk është zbuluar asnjë gjurmë që mund të çonte në zbardhjen e ngjarjes.

The post Vrasja e 65-vjeçarit në Vaun e Dejës, dyshohet se autori e qëlloi nga afër dhe u largua me motor appeared first on Gazeta Si.

Gazeta Si – Prej orës 11:00 të mëngjesit, vijon në Gjykatën e Apelit në Tiranë seanca për masat e sigurisë ndaj 10 të arrestuarve për evazionin fiskal të kompanisë së naftës “Bankers Petroleum” me qendër në Fier. Të arrestuarit kanë apeluar masat e sigurisë që janë dhënë nga Gjykata e Fierit më 5 korrik.

Drejtori i Përgjithshëm i Bankers, shtetasi kinez Hong Ping Xiao, ish-drejtori Leonidha Çobo kanë masë sigurie “arrest në burg”.

Pesë persona të tjerë janë lënë në “arrest shtëpie”, ndërsa 3 të tjerë në detyrim paraqitje dhe ndalim të daljes jashtë vendit.

Më herët, përfaqësues të ambasadës kineze në Tiranë nuk u lejuan të ndjekin nga afër seancën në gjykatë.

Seanca ka nisur paradite dhe pritet të zgjasë për shkak të numrit të lartë të të arrestuarve që kanë apeluar masën e sigurisë.

Të akuzuarit pretendojnë se nuk kanë lidhje me akuzat dhe kërkojnë masa më të buta sigurie.

Dhjetë zyrtarët e kompanisë, akuzohen si të përfshirë në skemën e mashtrimit fiskal të “Bankers Petroleum”, e cila dyshohet se për 20 vite me radhë ka kryer evazion fiskal duke deklaruar vetëm humbje, ndërkohë që kishte nxjerrë miliarda euro fitim nga shitja e naftës brenda dhe jashtë vendit.

Hetimet për Bankers janë zhvilluar nga Prokuroria e Fierit, në bashkëpunim me strukturat tatimore dhe policore, dhe lidhen me dyshime për deklarime të rreme tatimore dhe shmangie të detyrimeve financiare në një shkallë masive.

Prokuroria e Fierit i akuzon të arrestuarit dhe të shpallurit në kërkim për veprat penale: “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”.

The post Dyshohen për evazion fiskal, vijon në Apel seanca për 10 zyrtarët e ‘Bankers Petroleum’ appeared first on Gazeta Si.

Kompania amerikane e xhinseve, American Eagle synonte të godiste me reklamën e re ku shfaqej aktorja Sydney Sweeney. Reklama përmbante gjuhë provokuese që padyshim do të nxiste debat. Qëllimi u arrit, por debati nuk është ai që kompania do të dëshironte.

Me titullin “Sydney Sweeney ka xhinse (jeans që në anglisht tingëllon njësoj si genes, gjene) të mrekullueshme”, fushata nisi në debat mbi rracizmin dhe standardet perëndimore të bukurisë duke nervozuar fanatikët e kulturës “woke” në Amerikë. Problemi në reklamë ishte se “gjenet” e Sydney janë flokët bjonde, lëkura e bardhë dhe sytë blu – një rikthim në narrativën naziste.

Ekspertët e shohin lojën e fjalëve gjene dhe xhinse si diçka e pamenduar, dhe shtojnë se kritikët nuk do të kishin zë nëse reklama do të përfshinte dhe personazhe të tjerë nga rraca të tjera.

“Mund të ketë ndodhur nga injoranca, përtacia ose me qëllim”, thotë profesori i marketingut, Marcus Collins. “Në asnjë nga tre rastet, nuk është gjë e mirë”.

Ajo që shqetëson më shumë kritikët është një pjesë në video kur Sydney thotë se “gjenet (xhinset) trashëgohen njësoj si sytë. Të miat janë blu (edhe sytë edhe xhinset).”

Të paturit gjene të mira është një kompliment por në këtë rast ka një antitezë djallëzore. Superioriteti i gjeneve ishte politikë e Adolf Hitler, i cili kishte një plan për të vendosur në krye rracën Ariane – bjondët.

Shalini Shankar, një antropologe kulturore dhe gjuhësore në Universitetin Northëestern në Evanston, Illinois, tha se kishte probleme me “gjenet” e American Eagle kundrejt “xhinseve” sepse përkeqëson një koncept të kufizuar të bukurisë.

“American Eagle, mendoj, dëshiron të riemërtohet për një lloj të veçantë amerikani të bardhë të privilegjuar,” tha Shankar. “Dhe ky është lloji i imazhit që ata duan të qarkullojnë për njerëzit që duan të veshin xhinsin e tyre.”

Në debatin e xhinseve dhe gjeneve të Sweeney-t është përfshirë edhe Donald Trump. Ai nuk komentoi kritikat, por tha se “nëse Sydney është republikane, reklama e saj është fantastike” dhe dënoi politikat “woke”.

Sipërmarrës dhe ekspertë të fushës, raportojnë një rritje të imazheve të vajzave të bardha në reklama, që prej rikthimit të Trump në qeveri dhe goditjes së politikave DEI.

The post Reklama e xhinseve të aktores së famshme ‘trazon’ Amerikën: Naziste! appeared first on Gazeta Si.