Read More...

TIRANË- Avokati Edmond Petraj u shpreh se në Shqipëri ka abuzime sa i takon aplikimeve të masave për “shpërdorim detyre”

Ai theksoi se me aplikimin e këtyre masave po abuzohet, pasi qytetarëve po u hiqet e drejta e lirisë për gjëra shumë të vogla dhe të papërfillshme.

Sipas tij, në rastet e shpërdorimit të detyrës jo gjithmonë ka vjedhje dhe korrupsion.

Ai pohoi se parimi i proporcionalitetit duket që nuk merret parasysh fare nga gjykatat e vendit dhe kjo qasje shtoi avokati është e gabuar.

“Kjo pjesë e shpërdorimit të detyrës, që BE na ka lënë si hapësirë për të vepruar, mendoj se është largimi nga ndjekja e veprave penale për pjesën e abuzimit me detyrën, por që kjo duhet standardizuar. Unë jam dakord që kjo duhet ndryshuar.  Me shpërdorimin e detyrës po abuzohet, sidomos masën e sigurisë dhe me heqjen e lirisë. Shpërdorimin nuk është gjithmonë vjedhje apo korrupsion, por mund të këtë bërë gabim njerëzor, tha ai në “Real Story”./abcnews.al

TIRANË- Eksperti i marrëdhënieve ndërkombëtare, Andi Hoxhaj, i ftuar në “Real Story” u shpreh se Gjykata duhet të luajë një rol me proaktiv.

Ai pohoi se nocioni i proporcionalitetit nuk merret parasysh nga organet ligjzbatuese.

“Gjykatat duhet të luajnë një rol më proaktiv, sidomos njëherë sa i takon aplikimit të proporcionalitetit, sepse ti nuk mund ta interpretosh ligjin njësoj për të gjithë.

Parimi i proporcionalitetit as nuk aplikohet fare nga gjyqtarët, por e marrin ashtu siç vjen dhe siç ngrohet nga prokuroria dhe kjo kërkon një debat më të gjerë”, theksoi ai./abcnews.al

“Administrata është vetë e kriminalizuar”, kështu u shpreh juristja Brizida Gjikondi në emisionin “Real Story në ABC News. Deklaratë e cila solli edhe diskutim në panel.

“Ata që shkojnë në administratë aspirojnë vetëm të pasurohen. Kjo është dramatike. Këtë 10-vjeçar të fundit është akoma më rëndë. Nuk e kam dëgjuar kryeministrin të flasë kundër të korruptuarve qoftë si fenomen. Nëse ne nuk i vëmë emrin ne nuk kemi për t’u shëruar në shoqëri”, tha Gjikondi.

Gjithashtu juristja Gjikondi shtoi se sipas saj administrata është vetë e kriminalizuar dhe sipas sa, ata që shkojnë në administratë aspirojnë të pasurohen.

Nga ana e tij avokati Edmond Petraj tha se ne në vend kemi përzgjedhje e gabuar të administratës

“Ne e nisim me shpërdorim detyrë, të hedhim hekurat dhe më pas të ngarkojmë dhe me katër akuza të tjera. Administrata nuk punon do lirshëm. Nëse e kriminalizon duke e frikësuar që t’i vërviten prangat në çdo moment tregon që nuk ka liri dhe ndaj BE është fokusuar tek kjo anë. Administrata jonë është e përzgjedhur politikisht. Dhe mund të them që kemi përzgjedhje të gabuar të administratës”, tha ai.

/abcnews.al/

TIRANË- Qytetarët shqiptarë nuk mund të ndëshkohen me burg për një arkë peshk. Kështu u shpreh gazetari dhe analisti i njohur, Skënder Minxhozi, në studion e emisionit “Real Story” në ABC News.

Ai theksoi se në Shqipëri ka abuzime me detyrën, por rastet duhen parë me kujdes të veçantë dhe të mos merren masa represive kur konstatohen gabime të vogla.

Ai u shpreh se abuzim me detyrën ka kapur nivele të larta, ndërsa shtoi se ka pasur raste kur abuzime ka shkaktuar humbje jetësh.

“Ka nevojë që mos t’i vësh çdokujt një hanxhar dhe ta dënosh edhe për një arkë peshk. Nëse ka një gjë që shpërdorohet në Shqipëri, është detyra. Ky është perceptimi popullor. Nuk është se është gabim me thënë të drejtën. Këto abuzimet me detyrën ka kapur maja të frikshme, është shumë i lashtë, është me shumë kate, me shumë zero, është me dëme me të gjithë llojet e qeverive dhe mazhorancave. Kemi krime të lashta, që ne i kemi diskutuar shumë është këto jo vetëm me abuzim që ka sjellë dëme materiale, por që ka dëmtuar dhe ka marrë jetë njerëzish”, theksoi ai./abcnews.al

TIRANË- Eksperti i marrëdhënieve ndërkombëtare, Andi Hoxhaj, i ftuar në emisionin “Real Story” u shpreh se burgjet në Shqipëri janë të mbipopulluara.

Ai theksoi se në këto momente që flasim, janë rreth 4800 persona në paraburgim, ndaj të cilëve vijojnë hetimet.

“Në Shqipëri kemi burgjet janë të mbipopulluara. Kemi në paraburgim kemi më shumë, kemi mbi 4800 veta dhe në vetvete këto a e kanë ndryshuar sjelljen”, tha ai.

Ky shqetësim është ngritur dhe nga ekspertë dhe juristë të vendit, të cilët e shohin të pabazë dhe jo-logjike këtë mbipopullim./abcnews.al

Avokati Romeo Kara u shpreh se “shpërdorimi i detyrës” është i lidhur me korrupsionin.

Gjatë intervistës në emisionin “Real Story” në ABC News, avokati theksoi se në sjellje mund të krahasohemi me Europën, por shtoi se në veprim nuk ndryshon nga Italia e viteve ’80.

“Frymëzimi garancia dhe krijimi i një edukate që mund të shpërdorosh detyrën qoftë edhe pa bërë detyrën kanë krijuar kosto edhe te qytetarët e thjeshtë. Ne në sjellje, jemi pothuajse si Europa në vitet ‘80. Raportin qytetar shqiptar ne e kemi shumë problematik. Edhe kjo situatë me prishjen e ndërtimeve pa leje bazën kanë pasur shpërdorimin e detyrës. Pra Europa ka kërkuar nuk është përcaktuar saktë cila sjellje dënohej. Ligji duhet ta përcaktojë më saktë. Ne jemi më afër me rastin rumun dhe polak. Ne kemi marrë legjislacioni gjerman dhe jemi bazuar shumë atje. Dhe kam bindjen se nuk kemi akoma jurist prokuror të aftë që të mbushin letrat si duhet. Ne si legjislacion shqiptar e kemi të zgjeruar klauzolën e vogël. Ne kemi hequr dhe abuzimin për vendime të padrejta të gjykatësve”, tha ai.

/abcnews.al/

Korrupsioni vepër penale apo administrative? Kjo pyetje u shtrua në diskutim në emisionin “Real Story” në ABC News me një panel të ftuarish, juristja Brizida Gjikondi, avokati Edmond Petraj dhe avokati Romeo Kara si edhe analisti Skënder Minxhozi.

Juristja Brizida Gjikondi u shpreh se i qëndron idesë që për veprën e korrupsionit masa të ashpërsohej.

“Personalisht do të doja që vepra e korrupsionit, masa të ashpërsohej. Edhe ideja që ka hedhur Rama që të bëjmë ministër robotë për të evituar korrupsionin, më duket skandaloze. E thënë nga një kryeministër që nuk merret me vatrën e infeksionit të korrupsionit. Jemi të korruptuar në mënyrën se si funksionojmë dhe se si duhet të pasurohemi”, tha ajo.

Ndërsa avokati Edmond Petraj, gjatë intervistës, tha se kjo masë është kthyer në një çengel që administrata nuk punon dot.

“Unë jam pro ndryshimit. Janë disa elementë sa i përket shpërdorimit të detyrës. Shpërdorimi i detyrës në BE ka tjetër mënyrë se si argumentohet nga vetë BE. E kanë pjesë të kodit penal por më shumë fokusohen tek pjesa e korrupsionit. Unë e shikoj shpërdorimin e  detyrës në disa elementë, mund ta shpërdorojë edhe nga paaftësia. BE është e idesë që kjo masë të fokusohet më shumë tek pjesa e korrupsionit. Kjo është një logjikë që patjetër duhet të kemi një përafrim. Kjo masë është kthyer në një çengel që administrata nuk punon dot”, u shpreh ai.

TIRANË- Eksperti i marrëdhënieve ndërkombëtare, Andi Hoxhaj, i ftuar në “Real Story”, tha se me nismën e Italisë, Bashkimi Evropian kërkon që korrupsioni të mos klasifikohet si vepër penale, por si një shkelje administrative.

Ai theksoi se ky është diskutimi, i cili po bëhet sot në vendet e unionit.

“Ky është një debat i gjerë në BE, aty janë pesë vende anëtarë të BE, që nuk janë të qarta sa i takon legjislacionit dhe si interpretohet ligji sa i takon abuzimit me detyrën. Aktualisht ajo çfarë po ndodh në BE, është që duhet të vihet një direktivë sa i takon antikorrupsionit, që ato të harmonizohen në të gjithë BE. Aktualisht kërkojnë që mos të jetë vepër penale, por të jetë një vepër administrative dhe kjo është e iniciuar nga Italia”, tha ai.

Ai thekson se aktualisht jemi në kushtet kur BE kërkon ta heqë korrupsionin nga vepra penale, ndërsa vendeve kandidate u kërkojnë të rrisin rekordet penale në këtë drejtim. Kjo sipas tij krijon premisa për diskutime.

“Nëse BE kërkon që ta kthejë në një vepër administrative, atëherë çfarë i kërkon vendeve kandidate. Te vendet kandidate kërkon që ju të rrisni numrin e rekordeve sa i takon abuzimit me detyrën. Ky është dhe debati që po ndodh dhe në BE”, theksoi ai./abcnews.al

Kreu i lëvizjes ‘Bashkë’ Arlind Qori i ftuar në ‘Real Story’ tha se në bashkinë e Tiranës votat në favor të PS kanë rënë ndjeshëm. Në bazë të shifrave rezulton që PS është 5.79 për qind në rënie votash për dy vite. Qori vijoi duke thënë më tej se në Tiranë ka vend për shpresë dhe se në zgjedhjet e ardhshme lokale, nëse mbahen, Rama ka një armë mangut e cila është humbja e Berishës.

“Ka një bashki ku votat kanë rënë ndjeshëm, dhe është Tirana. Po të krahasosh votat në dy vite janë 5.79 për qind në rënie me votuesit brenda vendit. Në zgjedhjet lokale kam përshtypjen nuk voton Diaspora sepse janë më indiferent.

 Politika nuk është aritmetikë. Në një kryeqendër si Tirana ka një frymë kundra. Niveli i presionit sepse Tirana është një qytet kompleks, ka një potencial më të madh politik. Në zgjedhje, Ramës do i mungojë një armë shumë e fortë. Me këtë rezultat që pati Berisha është më pak i besueshëm. Përpara zgjedhjeve kishte një optimizëm, ndryshimet e pushtetit në Amerikë krijuan një iluzion, kur Berisha mori rezultatin më të keq, e ka të vështirë të dalë të thotë votoni. Në mometin ku Rama nuk do shesë gogolin tek elektorati, votuesi do shohi që ka alternativa të tjera përveç PD. Mospërputhja mes simpatizimit dhe votës, njerëzit që na kanë simpatizuar kanë qenë shumë më tepër se ata që na kanë votuar dhe është shumë pozitive. Në Tiranë ka vend për shpresë!”

Qori tha me bindje se në zgjedhjet e ardhshme Lëvizja Bashkë do të hyjë si parti e vetme sepse për ta kanë rëndësi parimet.

“Ne e dimë që partitë në Shqipëri janë të pareformueshme. Mbas dy vjetësh do jetë i njëjti film. Lëvizja Bashkë do të hyjë si parti e vetme, për ne kanë rëndësi parimet. Me cilët faktorë nuk do bëjmë kompromis, kur shohim që partitë e tjra i kanë të zhytura duart ne mbajmë distancën dhe u tregojmë që ja ku keni një parti të vërtetë.” 

/ abcnews.al

Në një debat të zhvilluar në emisionin “Real Story” në ABC News, analistët Martin Leka dhe Roland Bejko trajtuan çështjen e fragmentimit të partive kryesore në Shqipëri, me fokus të veçantë mbi të majtën dhe të djathtën politike.

Leka theksoi se përçarja e së majtës së Ramës mund të vijë vetëm nga një forcë e majtë me ideale të qarta, duke kritikuar partitë e vogla që, sipas tij, thjesht qahen.

“Berisha thotë kërkon edhe të ikë Veliaj edhe të qëndrojë në bashki. Ai kërkon që të përçajë të majtën e Ramës. Partia e majtë e Ramës mund të çahet vetëm nga një parti e majtë apo e qendrës së majtë duke pasur ideale dhe programe të ndryshme nga këto partitë e vogla që qahen”, tha analisti Martin Leka.

Ndërkohë, Bejko argumentoi se vetëm largimi i Berishës, si akt i vetëdijshëm apo si pasojë e ndërhyrjes së faktorit ndërkombëtar, mund të çojë drejt një bashkimi të së djathtës dhe një ndryshimi të vërtetë politik.

“Partia çahet vetëm nëse Berishës i vjen një frymëzim hyjnor dhe dorëhiqet. E çan një e djathtë e bashkuar. Nëse Berisha tërhiqet dhe kujdeset për një proces të paanshëm, ose drejtësia dhe amerikanët”, u shpreh analisti Roland Bejko./abcnews.al

Analisti Ergys Mërtiri komentoi për ‘Real Story’ përçarjen brenda lëvizjes ‘Shqipëria Bëhet’ mes Lapajt dhe Shabanit. Mërtiri tha se debatet brenda kësaj partie vijnë për shkak të mandateve të limituara dhe nuk ka një korelacion mes mungesës së idealeve dhe përçarjes politike.

Më tej në analizën e tij, Mërtiri tha se partitë e vogla duhet të bashkohen brenda një boshti politik.

“Fakti që zihen për një mandat, janë banale. Nuk do të thotë se ata nuk kanë parime apo nuk e duan këtë vend. Nuk mund tua mohojmë këtë gjë vetëm se tregojnë papjekuri në këtë aspekt. Nuk mund ju vendosim vizën. Mund ta quaj dhe egoizëm që këta nuk u bën bashkë përpara zgjedhjeve. Po të ishin bërë bashkë, do kishin bërë një goditje.

Do kishte mandate për të gjithë dhe nuk do ziheshit. Ata kanë një mandat prandaj zihen. Është e vështirë të mbash aktivistë të bashkuar dhe përçarja është normale. Njerëzit që përçahen nuk do të thotë që nuk kanë ideale. Duhet të ketë një bashkim, duhet të sillen si një bosht. Nëse flitet për ideale, ideali nuk mund të shkojë përpara pa thyer sistemin.” / abcnews.al

Në një analizë mbi zhvillimet e fundit në skenën politike, analisti Martin Leka në emisionin “Real Story” në ABC News kritikoi ashpër nismën “Shqipëria Bëhet”, të cilën e cilësoi si një dështim që konfirmon modelin e vjetër të politikës.

Sipas tij, zgjedhjet në Tiranë mbeten thellësisht politike, për shkak të peshës së madhe elektorale të kryeqytetit. Ai theksoi se rrëzimi i kryeministrit Rama nuk mund të ndodhë pa një bashkëpunim të gjerë, përfshirë edhe figura si Berisha, Lapaj e Shehaj.

“Kemi përpara dy shembuj. Një shembull është politika e modelit të vjetër, si “Shqipëria Bëhet”, që tregon ë fakt që Shqipëria s’bëhet. Një komedi e paparë që i dha simptomat që në fushatë. Gjithçka bëhet dhe që duhet të diskutohet, është që zgjedhjet në Tiranë mbetet sërish politike sepse Tirana ka 1/3 e votuesve. Me shembullin që na tregoi “Shqipëria Bëhet” na tregon që nuk bëhet asnjë koalicion. Për të rrëzuar Ramën duhet të bëjë koalicion me Berishën, Lapajn, Shehajn e të tjerë”, tha analisti Leka.

Nga ana tjetër, Arlind Qori, kreu i “Lëvizjes Bashkë”, theksoi se formacioni i tij ka zgjedhur qëllimisht të dalë kundër rrymës politike të zakonshme, duke u mbështetur te idetë dhe jo te pazaret familjare apo aleancat e vjetra.

Ai shprehu kënaqësinë që nuk është përfshirë në konfliktet mes figurave të njohura, të cilat i cilësoi si përplasje mes “tezesh e dajash”. Sipas Qorit, problemi i partive të reja është se imitojnë më të keqen e të vjetrave, duke humbur vlerën e ideologjisë dhe reputacionit politik në afatgjatë.

“Ne dolëm kundër rrymës sepse ne besojmë në një politike të papëlqyer, ku kanë rëndësi idetë. Jam shumë i lumtur që Lëvizja Bashkë nuk u përfshi në sherr të tillë me teze dhe daja, se i binte të zgjoja edhe unë tezen time. PS dhe PD kanë qenë pjesë e organizimit të Shqipërisë, por që kanë degraduar rrugës. Problemi me partitë e reja janë që të imitojnë partitë e vjetra, por jo që në ideologjinë e tyre, por në fazën më të degraduar që kanë. Në politikën afatgjatë është shumë i rëndësishëm reputacioni. Në fund far është reputacioni që të mban në politikë”, tha Arlind Qori./abcnews.al

Telenovela verore politike vijon, Veliaj në burg, Berisha me farsën dhe ‘Shqipëria Bëhet’ thellon përcarjen po aq sa humbjen. Analisti Roland Bejko tha për ‘Real Story’ se partitë opozitare duhet të bashkohen por kanë një mur të madh që është Berisha. Më tej, Bejko theksoi se zgjedhjet lokale në Shqipëri kanë pasur gjithmonë natyrë politike.

“Me këtë rezultat partitë opozitare duhet të bashkohen, praktikisht kanë një mur të madh që është Sali Berisha. Qenia e tij në krye të PD pengon një sërë faktorësh opozitar. Ata duke mos iu bashkuar këtij koalicioni i prishin punë. PD është dëmtuar pas zgjedhjeve, ka një rënie të entuziazmit të votuesve. Qytetarët votojnë ndryshe në zgjedhjet parlamentare dhe lokale. Në zgjedhje lokale votohet për një individë. Në zgjedhjet lokale në Shqipëri kanë gjithmonë natyrë politike, duke qenë se partitë identifikohen me liderin.”

Gjatë fjalës së tij, analisti Ergys Mërtiri tha se tre eksponentët kryesorë politik Rama, Veliaj dhe Berisha nuk duan që të ketë zgjedhje të reja lokale. Sipas Mërtirit dy palët fshihen pas njëri tjetrit dhe votuan për një Kod Zgjedhor që i garanton Ramës qëndrimin në krye të qeverisë, dhe Berishës postin e liderit të opozitës.

“Dy faktorët e rëndësishëm pozita dhe opozita sot janë në koalicion, sot nuk ka politikë. Janë të vegjlit që garojnë por nuk e rrëzojnë sistemin. Nëse zgjedhjet bashkiake janë administrative dhe ndryshojnë nga ato politikë, këto tani nuk janë as për të menaxhuar qytetin. Veliaj nuk do zgjedhje sepse është në burg. Berisha nuk do të ketë zgjedhje sepse nuk do që të humb. Rama nuk do të ketë zgjedhje sepse i hapet një bela brenda të vetëve. Të treja palët janë okej dhe janë në marrëveshje mos të ketë zgjedhje.

Kur politika është bipolare, dy palët fshihen pas njërit tjetrit. Kanë hyrë në një kod zgjedhor ku bëjnë marrëveshje të dyja palët, Rama të qëndroj në pushtet dhe Berisha të qëndrojë në krye të opozitës.” / abcnews.al

Kreu i “Lëvizjes Bashkë”, Arlind Qori, ka përsëritur distancimin e formacionit të tij politik nga të dy krahët tradicionalë të politikës shqiptare, qeveria dhe opozita, duke theksuar se Lëvizja Bashkë përfaqëson një alternativë të re.

Në një intervistë për emisionin “Real Story” në ABC News, Qori deklaroi se forca që ai përfaqëson do të ketë me siguri një kandidat për Bashkinë e Tiranës në rast të zgjedhjeve të parakohshme, ndërsa kërkoi sërish shkarkimin e kryebashkiakut Erion Veliaj.

“Nuk kemi asnjë gjë të përbashkët as me qeverinë dhe as me opozitën. Kështu që ne jemi të distancuar nga çdo element i së keqes që na ka mbytur prej dekadash. Është një pluralizëm i ideve të ngushta, por jo i popullsisë. Nuk e di nëse do të ketë zgjedhje në Tiranë. Ajo që Lëvizja Bashkë ka në dorë është që me siguri do të ketë kandidatin e vet në Bashkinë e Tiranës, nëse do të jem unë apo dikush tjetër ka kohë. E sigurt është që ne do të bëjmë të njëjtën fushatë të pazakontë, kudo të na vijë rasti. Ne vazhdojmë të kërkojmë shkarkimin e Erion Veliajt, e kemi kundërshtuar në çdo hap të tij. Për ne është gjë pozitive që Veliaj është duke u hetuar. Për ne Veliaj duhet të shkarkohet dhe Tirana të shkojë në zgjedhje të parakohshme”, tha Arlind Qori./abcnews.al

Avokati Arbër Hoxha thotë se drejtësia, duhet të vendosë mbi bazën e provave, duke iu referuar edhe çështjes ndaj kryebashkiakut të Tiranës, Erion Veliaj, i cili tashmë është marrë zyrtarisht i pandehur nga SPAK.

Në emisionin “Real Story” në ABC News, Hoxha u shpreh se në themel të çështjes, mund të ndryshohet masa për Veliajn, nga arrest në burg, në arrest shtëpiak.

“Drejtësia, mbi të gjitha një drejtësi funksionale dhe e guximshme, duhet të vendosë mbi bazën e provave, dhe jo mbi bazën e emrave. Që do të thotë, zoti Veliaj, unë i uroj shumë sukses në raport me fatin e vet personal, pse jo, edhe politik. Dhe mbi të gjitha, besoj se ndaj zotit Veliaj, në themel të çështjes, mund të ndryshohet masa e sigurimit, të paktën në arrest shtëpie”, theksoi ai./abcnews.al

Veliaj është pas hekurave që prej shkurtit, por interesi publik dhe politik qëndron mbi drejtimin e bashkisë së Tiranës.

Analisti Roland Lami tha se duhet të shtrojmë pyetjen nëse PS është më e fortë apo atakohet më shumë pas arrestimit të një prej eksponentëve të rëndësishëm politik si Veliaj.

“Sot Veliaj është përballë akuzës, dhe shtrohet pyetja PS është më e fortë apo atakohet më shumë. Fati i PS nuk lidhet me atë të Veliat.Kur atakohesh krijon kosto dhe për partinë politike. Veliaj mund ta ndjekë çështjen deri në fazën finale.”

Gazetari Flogert Muça u shpreh për ‘Real Story’ se nuk ka pse Rama të marrë kosto politike për dosjen Veliaj, por në anën tjetër të monedhës mund t’i kthehet në kosto elektorale.

“Është argument që nuk ka pse të marrë kosto politike Edi Rama dhe mos të bëjmë sikur jetojmë në parajsën e demokracisë. Por kundërargumenti, Rama duke bërë këtë lëshim mund t’i kthehet në kosto elektorale. Duke hyrë në garë, kandidatët mund t’i thonë këtij do i besojmë ne. Nuk ka pasur asnjë bashki të madhe që ka ndodhur kjo.”

/ abcnews.al

Në një analizë të drejtpërdrejtë në emisionin “Real Story” në ABC News, analisti Arben Meçe komentoi zhvillimet më të fundit që lidhen me përballjen ligjore të kryebashkiakut të Tiranës, Erion Veliaj, si dhe solli në vëmendje raste të tjera të ngjashme në skenën politike shqiptare.

Meçe theksoi se ndryshe nga rasti i Jamarbër Malltezit, i cili ndodhet në fazë gjykimi për një vepër penale, apo Sali Berishës, që ndonëse përballet me akuza të rënda është ende i lirë, Veliaj po kalon një proces ku ka të drejtë të kërkojë ndryshimin e masës së sigurisë, ndërsa vazhdon të deklarojë pafajësinë e tij.

Sipas Meçes, situata ndaj Veliajt është kthyer në një përplasje mes ligjit dhe perceptimit publik, ku shumë qytetarë shohin një lloj ndëshkimi nga ana e kryeministrit Rama, një ide që ai e hodhi poshtë, duke argumentuar se Rama po qëndron jashtë këtij procesi dhe është i përqendruar në menaxhimin e punëve të qytetit.

“Jamarbër Malltezi e kishte kaluar fazën e deklarimit të veprës penale dhe ishte në gjykim. Berisha është me vepër penale sot dhe është i lirë. Veliaj ka të drejtë të kërkoj ndryshimin e masës së sigurisë. Erion Veliaj të gjitha deklaratat e i ka që unë jam i pafajshëm, ai nuk e pranon fajësinë. Ne jemi në një pistë ligjore dhe në një debat politik për Erion Veliajn. Jo më shumë se sa një orë më parë dy miqtë më takojnë dhe më thonë pse Edi Rama po dënon Erion Veliajn. Sepse kanë këtë perceptim, ndërkohë që Rama nuk është i përfshirë fare. Rama qëndron në distancë dhe është i fokusuar që të zgjidhë hallet që ka qyteti. Sali Berisha po paralizohet sepse prodhoi VKM dhe prodhuan korrupsion dhe normalisht duhet të pranojë që të japë dorëheqjen”, tha analisti./abcnews.al

Erion Veliaj ndodhet që prej muajit shkurt në paraburgim ndërkohë që interesi i qytetarëve dhe klasës politike lidhet me drejtimin e bashkisë më të madhe në vend.

Analisti Roland Lami tha se në Tiranë ka disa komponentë që mund të shpien në zgjedhje të parakohshme. Lami në analizën e tij tha se shumë vende të BE në të cilën drejtues të institucioneve janë gjendur në gjykim juridik, janë distancuar nga posti politik, gjë që sipas Lamit duhet të ishte bërë edhe nga Veliaj.

“Janë disa komponentë që Tirana të ketë zgjedhje të parakohshme. Në politikë nuk gjykohet ftohtësisht. Politikisht a mundet  një kryetar bashkie të mund të mbajë bashkinë kryesore ku ndërkohë precedentët e mëparshëm, kur dikush atakoihet politikisht dhe akuza ndaj tij është e rëndë. Moralsiht ndjen detyrimin për tu distancuar nga posti politik dhe i drejtohet gjykimit juridik. Këtë e bëjën shumë vende në BE. Elementi i dytë, Veliaj është përfaqësues i subjektit politik dhe PS nuk ka pse i lejon kosto vetes që një person të abuzoj me statusin e kryetarit të bashkisë. Mund të interpretohet si suport politik.” / abcnews.al

Avokati Arbër Hoxha thotë se nuk është e largët dita, që kryeministri Edi Rama do shkarkojë Erion Veliajn, nga posti i kryebashkiakut të Tiranës.

Në emisionin “Real Story” në ABC News, Hoxha u shpreh se Veliaj do shkarkohet për shkelje të rëndë të kushtetutës.

Ndërsa politologu Roland Lami deklaroi se rasti Veliaj, shërbeu për të parë se si SPAK do vepronte si institucion dhe shtoi se drejtësia duhet të qëndrojë neutrale.

Arbër Hoxha: Zoti Veliaj ka thënë që po mbahet në burg pa akuzë. Tani, nga i dyshuar, është i pandehur dhe besoj se nuk do të jetë e largët dita që zoti Veliaj do të shkarkohet nga kryeministri për shkelje të rëndë të kushtetutës. Besoj se nuk do të jetë e largët dita që zoti Veliaj do të shkarkohet për shkelje të rëndë të kushtetutës. Vendimet e Gjykatës së Lartë janë vendime të Kolegjit.

Roland Lami: Rasti Veliaj, krijon një bilanc pozitiv te qeveria e zotit Rama, por edhe te SPAK. E ekspozon qeverinë të distancuar nga drejtësia. Në perceptimin e BE krijohet ideja që institucionet e pavarura po lëvizin pa ndërhyrje politike. Rama, nuk e ka për gjë të çojë edhe një nga bijtë e tij. Në aspektin e bilancit të SPAK, edhe për SPAK është një bilanc, me një figurë të lartë si zoti Veliaj. Nëse tek zoti Rama, politizimi i çështjes është në ADN e partive politike, drejtësia duhet të qëndrojë strikt, neutral. Rasti Veliaj ishte për të parë si vepron SPAK si institucion. Duhet të na shërbente si rast model, duke pasur si busull ligjin dhe provën. Janë 3-4 komponentë, magnësi në rastin e zotit Veliaj. Mënyra se si është mbajtur në paraburgim./abcnews.al