Senati miratoi planin e presidentit Donald Trump për shkurtime në vlerë 9 miliardë dollarë në financimin e ndihmave amerikane në botë dhe të transmetimeve publike, duke i dhënë presidentit republikan fitore tjetër. Me 51 vota pro e 48 kundër, senatorët e kaluan kërkesën e Trump-it për shkurtime në vlerë 9 miliardë dollarë nga shpenzimet tashmë të miratuara nga Kongresi.

Shumica e shkurtimeve janë për programe që ndihmojnë vendet e huaja për të luftuar sëmundjet, luftërat e fatkeqësitë natyrore, por plani ndalon plotësisht 1.1 miliardë dollarët që Korporata për Transmetimet Publike do të merrte gjatë dy viteve të ardhshme.

Trump e shumë nga republikanët e tjerë argumentojnë se shpenzimet për transmetimet publike janë të panevojshme dhe e kritikojnë mbulimin e lajmeve të tyre si “të njëanshëm”.

Paketa të veçanta për anulime të fondeve nuk kanë kaluar prej dekadash, pasi ligjvënësit kanë hezituar ta dorëzojnë kontrollin kushtetues mbi shpenzimet. Por, republikanët e Trump-it, të cilët kanë shumicë të ngushtë në Senat dhe në Dhomën e Përfaqësuesve, treguan pak dëshirë për t’i kundërshtuar politikat e tij që nga fillimi i mandatit të dytë në janar.

Nëntë miliardë dollarët në fjalë përfaqësojnë një shumë mjaft të vogël në krahasim me buxhetin federal prej 6.8 trilion dollarësh dhe janë vetëm një pjesë e vogël e fondeve të miratuara nga Kongresi që administrata Trump ka mbajtur pezull teksa synon shkurtime të mëdha, shumë prej të cilave të urdhëruara nga Departamenti për Efikasitetin Qeveritar (DOGE) i drejtuar nga miliarderi Elon Musk.

Sipas ligjvënësve demokratë, deri në mesin e qershorit, Trump kishte bllokuar 425 miliardë dollarë financime të miratuara më parë nga Kongresi. Megjithatë, Trump dhe mbështetësit e tij kanë premtuar më shumë kërkesa për “anulim fondesh”, në përpjekje për ta tkurrur qeverinë federale.

Dhoma e Përfaqësuesve miratoi legjislacionin për anulimin e fondeve muajin e kaluar me 214 vota pro dhe 212 kundër, pa ndryshuar kërkesën e Trump-it. Katër republikanë iu bashkuan 208 demokratëve për të votuar kundër.

Por, pasi disa senatorë republikanë shprehën shqetësim për shkurtimet në programet globale shëndetësore, drejtori i Zyrës për Menaxhimin dhe Buxhetin, Russell Vought, tha se PEPFAR, një program global për luftën kundër HIV/AIDS-it i nisur në vitin 2003 nga Presidenti George W. Bush, do të përjashtohej nga shkurtimet. / abcnews.al

Të paktën 22 persona humbën jetën të enjten nga sulmet ajrore izraelite në Rripin e Gazës, përfshirë një burrë dhe një grua që u vranë në një sulm ndaj Kishës së Familjes së Shenjtë në Gaza, një vend që Papa i ndjerë Françesku e përmendte shpesh në mesazhet e tij.

Sipas Patriarkanës Latine të Jeruzalemit, sulmi ishte “i dukshëm” nga ushtria izraelite dhe shkaktoi plagosjen e disa personave të tjerë, përfshirë priftin argjentinas Gabriele Romanelli, i cili ishte në kontakt të rregullt me Papën për situatën në Gaza. Ai mori lëndime të lehta dhe u trajtua në Spitalin Al-Ahly.

Fotot e publikuara nga kisha tregonin dëmtime në çati dhe thyerje të dritareve. “Lutemi për shpirtin e viktimave dhe për një fund të këtij konflikti barbar. Asgjë nuk justifikon sulmet ndaj civilëve të pafajshëm,” thuhej në deklaratën e kishës.

Ndërkohë, Izraeli vazhdon ofensivën ndaj Hamasit, edhe pse bisedimet për armëpushim po zhvillohen në Doha. Një zyrtar amerikan tha se bisedimet po përparojnë, por përfaqësuesit e Hamasit deklaruan se nuk ka pasur ndonjë përparim konkret.

Në Jabalia, në veri të Gazës, një burrë, gruaja e tij dhe pesë fëmijët e tyre u vranë nga një tjetër sulm ajror. Tetë burra që kishin marrë përgjegjësinë për të mbrojtur kamionët me ndihma humanitare po ashtu humbën jetën në veri. Të tjera sulme vranë tre persona në Gaza qendrore dhe katër të tjerë në Zeitoun, lindje të qytetit të Gazës.

Kryeministrja italiane Giorgia Meloni dënoi sulmet duke i quajtur “të papranueshme” dhe tha se “asnjë veprim ushtarak nuk e justifikon një sjellje të tillë”. / abcnews.al

Qeveria britanike ka shpallur planet për të ulur moshën minimale për të votuar në 16 vjeç, një ndryshim që synohet të hyjë në fuqi përpara zgjedhjeve të ardhshme të përgjithshme.

Ministrja për Demokracinë, Rushanara Ali, e quajti këtë ndryshim “tërmet politik” dhe tha për BBC se do të sigurojë që zëri i të rinjve të dëgjohet. Sipas saj, në moshën 16 vjeç një person mund të punojë, të paguajë taksa dhe të bashkohet me ushtrinë, prandaj është e drejtë që të kenë të drejtë vote.

Aktualisht, 16-vjeçarët mund të votojnë vetëm në zgjedhjet lokale në Skoci dhe Uells, por jo në zgjedhjet parlamentare të Mbretërisë së Bashkuar apo në Angli dhe Irlandën e Veriut.

Ky do të ishte ndryshimi më i madh në trupin elektoral që nga viti 1969, kur mosha për të votuar u ul nga 21 në 18 vjeç.

Ndërsa Unioni Kombëtar i Studentëve e quajti vendimin “fitore të madhe për të rinjtë”, opozita konservatore kritikoi politikën si “konfuze”. Deputeti Paul Holmes theksoi se 16-vjeçarëve nuk u lejohet ende të blejnë alkool, bileta lotarie apo të martohen pa leje, por do të lejohen të votojnë.

Nga ana tjetër, ndryshimet në rregullat për donacionet do të detyrojnë partitë të verifikojnë burimin e fondeve nga kompani, duke siguruar që ato të kenë të ardhura reale në MB apo Irlandë.

Komisioni Zgjedhor do të ketë fuqi më të mëdha ndëshkimi, duke përfshirë gjoba deri në 500,000 paund për shkelësit e rregullave.

Liberal Demokratët përshëndetën votën në moshën 16 vjeç si “një vendim të qartë”, por kërkuan masa më të forta për të parandaluar ndikimin e oligarkëve të huaj në politikën britanike.

/ abcnews.al

Read More...

Ish kryenashkiaku i Stambollit Ekrem Imamoglu u dënua me një vit e 8 muaj burg nga një gjykatë turke, e cila nuk vendosi asnjë kufizim në aktivitetin e tij politik.

Rivali i presidentit turk Recep Tajip Erdogan do të vuajë një dënim një vit, 5 muaj e 15 ditë burg për “fyerje publike të një zyrtari publik” dhe dy muaj e 15 ditë për “kërcënime”.

Megjithatë Gjykata rrëzoi akuzën për shënjestërimin e individëve që kanë shërbyer në luftën kundër terrorizmit.

Imamolgu përballej me një dënim maksimal me burgim prej 7 vitesh e katër muajsh.

Hetimi i prokurorisë kundër tij në këtë rast u urdhërua më 20 janar për deklaratat që ai bëri në një intervistë televizive në lidhje me kreun e Prokurorisë Publike të Stambollit, Akin Gürlek, dhe familjen e tij.

Gurlek, 43 vjeç, fillimisht si gjyqtar dhe më pas si prokuror, luajti një rol të rëndësishëm në gjyqe të mëdha që përfshinin ndjekje penale të figurave të opozitës, përfshirë dënimin e bashkëkryetarit të Partisë së Drejtësisë Popullore dhe ndjekjet penale të kryetarëve të bashkive të partisë opozitare. Ai më parë kishte shërbyer si zëvendësministër i drejtësisë.

Imamoglu i ka mohuar akuzat duke e quajtur procesin një ndëshkim dhe jo drejtësi, dhe ka akuzuar gjykatën se vepron nën presionin e qeverisë. / abcnews.al

Teksa palestinezët e dëshpëruar janë në kërkim të ushqimit, thirjet ndërkombëtare për sanksione ndaj Izraelit janë rritur.

Raportuesja speciale e Kombeve të Bashkuara për Gazën dhe Bregun Perëndimor Francesca Albanese tha se është koha që kombet në mbarë botën të ndërmarrin veprime konkrete për të ndaluar atë që ajo e quajti gjenocid në Gaza.

Ajo theksoi se ccdo shtet duhet të rishikojë dhe pezullojë menjëherë të gjitha lidhjet me Shtetin e Izraelit, duke filluar nga marrëdhëniet ushtarake, diplomatike dhe ato ekonomike.

Albanese shprehu bindjen e saj se Shtetet e Bashkuara janë plotësisht bashkëpunëtore në atë që po bën Izraeli, duke furnizuar me armë.

Ministrja e jashtme sllovene Tanja Fajon u bëri thirrje vendeve të Bashkimit Evropian të mbështesin sanksione më të ashpra kundër Izraelit për shkak të situatës humanitare në Gaza.

Fajon tha se unioni duhet të përdorë të gjitha mjetet në dispozicion për të ushtruar presion mbi Izraelin dhe për të parandaluar vdekjet e civilëve.

Sllovenia ka qenë ndër kritikët më të fortë të Izraelit që nga fillimi i luftës në Gaza, duke u bërë thirrje anëtarëve të tjerë të BE të bashkojnë forcat në sanksionet tregtare dhe të vendosin një embargo armësh.

Ndërkohë kryeministri britanik Keir Starmer tha se ishte i tmerruar nga raportet për civilë të vrarë në Gaza, ndërsa përpiqeshin të merrnin ndihmë humanitare.

“Izraeli duhet të marrë masa që mbrojnë siç duhet civilët në përputhje me ligjin ndërkombëtar. Ne gjithashtu duam të shohim, një armëpushim të menjëhershëm”, tha Starmer.

Më shumë se 2 milionë palestinezë të Gazës po jetojnë një krizë katastrofike humanitare. Që prej fillimit të luftës 21 mujore, Izraeli ka bombarduar dhe rrethuar Rripin e Gazës, duke e lënë enklavën në prag të urisë.

Policia e Burgjeve ka ndërmarrë një aksion të gjerë kontrolli në institucionet e vuajtjes së dënimit 313 dhe 302 në Tiranë.

Burime zyrtare bëjnë me dije se kontrollet janë zhvilluar në mënyrë të befasishme (blic), me qëllim identifikimin dhe sekuestrimin e sendeve të ndaluara, përfshirë telefonat celularë, që mund të jenë futur në mënyrë të paligjshme në ambientet e burgjeve. / abcnews.al

Bashkimi Evropian dështoi për të dytën ditë me radhë në miratimin e paketës së 18-të të sanksioneve ndaj Rusisë, ndërsa Sllovakia vazhdon të kërkojë garanci të reja lidhur me furnizimin me gaz pas vitit 2027, raportojnë diplomatë të BE-së.

Sipas katër diplomatëve të BE-së, vetoja e Sllovakisë gjatë një takimi të ambasadorëve të vendeve anëtare ka bllokuar përkohësisht miratimin e paketës së re të sanksioneve. Dy prej diplomatëve thanë gjithashtu se edhe Malta ka pasur kundërshtime.

Qeveria sllovake, e udhëhequr nga kryeministri Robert Fico, ka deklaruar se nuk do ta miratojë paketën e re pa marrë garanci të qarta që vendi nuk do të preket nga plani paralel i BE-së për të hequr dorë nga gazi rus deri në fund të vitit 2027.

“E konsiderojmë propozimin për braktisjen e energjisë ruse si një formë sanksioni dhe për këtë arsye e lidhim atë drejtpërdrejt me paketën e 18-të të sanksioneve,” shkroi Fico në një letër drejtuar Presidentes së Komisionit Evropian, Ursula von der Leyen.

Fico theksoi se votimi për paketën e re të sanksioneve duhet të ndodhë vetëm pasi të jenë zgjidhur në mënyrë substanciale rreziqet lidhur me furnizimin me gaz pas vitit 2028.

Komisioni Evropian i kishte dërguar një letër Sllovakisë të martën, duke u përpjekur të bindte Bratislavën për tërheqjen e vetos, por përgjigjja e Ficos konfirmoi se nevojiten më shumë bisedime për të qartësuar angazhimet e BE-së ndaj vendit të tij.

Sllovakia vazhdon të mbështetet në gazin rus dhe shpesh ka mbajtur qëndrime pro-ruse në lidhje me luftën në Ukrainë. Sipas qeverisë sllovake, ndërprerja e menjëhershme e kontratës ekzistuese me kompaninë ruse Gazprom – e cila është e vlefshme deri në vitin 2034 – mund të shkaktonte mungesa të energjisë, rritje të çmimeve dhe pasoja financiare për shtetin.

Për dallim nga plani për fazën e largimit nga energjia ruse, që mund të miratohet me shumicë të përforcuar në BE, sanksionet kërkojnë unanimitet, duke i dhënë Sllovakisë mundësinë e bllokimit të tyre.

Paketa e 18-të e sanksioneve do të ishte përgjigje ndaj agresionit të vazhdueshëm të Rusisë në Ukrainë, pas pushtimit të vitit 2022, por për momentin ajo mbetet pezull për shkak të kundërshtimeve të brendshme brenda bllokut.

Edi Rama u rikthye sërish Vlorë.

Helikopteri që po transportonte shefin e qeverisë u pa të ulej në ish-fushën e aviacionit të qytetit bregdetar. Burime thonë se kryeministri u drejtua menjëherë drejt vilave qeveritare në zonën e Ujit të Ftohtë.

Kjo e mërkurë shënon edhe vizitën e tretë të Edi Ramës në Vlorë në pak ditë, por ende është e paqartë arsyeja e kësaj ndalese.

Nëse rikthimi në qytetin bregdetar vjen pas aksionit të ndërmarrë për lirimin e hapësirave publike, problematikat përgjatë këtij sezoni veror, apo Rama do ta shfrytëzojë qëndrimin në vilën qeveritare për të konceptuar riformatimin e skuadrës Rama 4, që në këtë mandat të ri, mban barrën por edhe privilegjin e 83 mandateve.

Katër persona, dy gra dhe dy burra, janë arrestuar nga Policia, pas bastisjeve në agjencitë  e Arkivave dhe atë Kadastrale ne Kosove

Dyshimet mbi të cilat janë kryer bastisjet kanë të bëjnë me keqpërdorim të detyrës zyrtare.

Bastisjet përveç Prishtinës janë kryer edhe në komunen e Ferizaj dhe Shtimes.

Njësia Speciale e Policisë së Kosovës e nisi kete aksion mëngjesin e së mërkurës, aksion i cili eshte konfirmuar nga Kaltrina Shala, zëdhënëse në Prokurorinë Themelore në Prishtinë.

“Prokuroria Themelore në Prishtinë në koordinim dhe bashkëpunim të ngushtë me Policinë e Kosovës, sipas urdhëresës nga gjykata, ka ndermarre nje aksion për bastisje dhe kontroll në institucionin e Arkivës dhe atë kadastral të Kosovës për veprën penale ‘Keqpërdorim i pozitës apo autoritetit zyrtar’”, ka thënë ajo. / abcnews.al

Gjykata Supreme e Kosovës e konsideron ndërhyrje të papranueshme në pavarësinë e gjyqësorit reagimin e Qeverisë në detyrë, pas shfuqizimit të Udhëzimit Administrativ për Shfrytëzimin e Pajisjeve Elektronike Fiskale, Sistemeve Fiskale dhe Softuerëve Elektronikë Fiskalë, firmosur nga ministri ne detyre I Ekonomise Hekuran Murati,

Sipas Gjykatës, reagimi i Qeverisë në detyrë po bene jo vetëm një keqinterpretim të natyrës së vendimmarrjes gjyqësore, por edhe një tentativë për të vënë në pikëpyetje autoritetin e gjyqësorit.

Në një komunikatë për media, Gjykata Supreme thekson se të gjitha institucionet, përfshirë Qeverinë, janë të obliguara ta respektojnë pavarësinë e gjyqësorit si një nga themelet e rendit kushtetues të Republikës së Kosovës dhe, si të tilla, duhet të tregojnë përkushtim në zbatimin e këtij parimi.

“Çdo përpjekje për ta vënë në pikëpyetje autoritetin e Gjykatës dhe legjitimitetin e vendimeve të saj, përmes deklaratave politike, cenon pavarësinë e gjyqësorit dhe dëmton besimin e qytetarëve në institucionet e drejtësisë. Gjykata Supreme pret, në radhë të parë, që institucionet shtetërore të tregojnë gatishmëri për zbatimin e vendimeve gjyqësore, si kusht i funksionimit të shtetit ligjor. Gjykata Supreme do të vazhdojë të ushtrojë funksionin e saj në mënyrë të pavarur dhe të pandikuar, duke garantuar zbatimin e ligjit,” thuhet më tej në komunikatën për media.

Qeveria në detyrë, pas vendimit të Gjykatës Supreme për shfuqizimin e Udhëzimit Administrativ për arkat fiskale, e ka cilësuar atë si arbitrar dhe si një interpretim të njëanshëm të dispozitave ligjore.

Në aktgjykimin e Gjykatës Supreme thuhet se ministrat, të cilët janë edhe deputetë, nuk mund të nxjerrin akte nënligjore, pasi kjo bie ndesh me dispozitat kushtetuese, nderkohe qe qeveria Kurti sillet ende si nje ekzekutiv me pushtet te plote, edhe pse ka siguraruar vetem 48 deputete nga zgjedhjet e 9 shkurtit.

Kryetari i Partisë Demokratike të Kosovës, Memli Krasniqi tha se Gjykata Speciale sot humbi një mundësi për ta forcuar besimin në drejtësinë ndërkombëtare.

 “Çlirimtarët, familjet e tyre, ne dhe cilido qytetar i Kosovës nuk kemi kërkuar favore, por vetëm drejtësi. Drejtësi që nuk ndikohet nga paragjykimet. Që nuk e ngatërron lirinë me fajin. Sepse liria nuk është faj. Kurrë s’ka qenë. Kurrë s’do të jetë”, shtoi ai.

Krasniqi tha se “historia nuk guxon dhe nuk mund të shkruhet në sallat e heshtura të gjykatave, sepse është shkruar në sakrificat e popullit tonë për liri”.

“Drejtësia mund të vonohet, por e vërteta nuk do të ndryshojë asnjëherë. Ata janë të pafajshëm. Ata janë çlirimtarë. Prandaj, e presim me padurim vendimin final për lirinë e tyre. Dielli do të lind përsëri – për çlirimtarët, për Kosovën dhe për të vërtetën”, shkroi ai.

Reagimet nuk kane munduar as nga rradhet e tjera te PDK.
Vlora Çitaku, nenkryetare e PDK shkruan se ndaj ish krereve te UCK po behet padrejtesi.

“Kur Paneli Gjykues bëhet njësh me Prokurorinë, aty nuk ka drejtësi.

Ka vetëm një padrejtësi special” shkruan Citaku ne llogarine e saj ne facebook.

Rrjeti eshte i mbushur me reagime kunder vendimit te Hages.

Hashim Thaçi, Kadri Veseli, Jakup Krasniqi e Rexhep Selimi ndodhen në paraburgim në Hagë prej nëntorit të vitit 2020. / abcnews.al

Read More...

Tregtarët e kafesë po garojnë për të importuar sasi sa më të mëdha të kafesë braziliane në Shtetet e Bashkuara përpara se të hyjë në fuqi tarifa e re prej 50% ndaj produkteve braziliane, e vendosur nga administrata presidentit Donald Trump.

Tarifa, e cila do të zbatohet nga data 1 gusht, ka shkaktuar një valë të madhe kërkese nga importuesit amerikanë që po përpiqen të shmangin rritjen e kostove. Brazili është furnizuesi më i madh i kafesë për SHBA-në, dhe ky zhvillim pritet të ketë ndikim të ndjeshëm në treg.

Sipas të dhënave më të fundit, çmimet për konsumatorët amerikanë u rritën në muajin qershor, pjesërisht për shkak të ndikimit të tarifave të mëparshme të vendosura nga administrata Trump. Konsumatorët tashmë po ndiejnë efektin, përfshirë edhe në çmimin e një filxhani kafeje.

Analistët paralajmërojnë se pas hyrjes në fuqi të tarifës, çmimi i kafesë në SHBA mund të rritet ndjeshëm, duke goditur direkt konsumatorët dhe industrinë e restoranteve dhe kafeneve.

/ abcnews.al

Parlamenti i Ukrainës ka miratuar një shtesë buxhetore prej 9.8 miliardë dollarësh për ushtrinë dhe sektorin e mbrojtjes, në përpjekje për të përballuar vazhdimin e luftës me Rusinë, e cila po zgjat më shumë se dy vjet pa shenja përfundimi.

Sipas njoftimit të ligjvënësve dhe Ministrisë së Financave, ndryshimet e reja në buxhet rrisin shpenzimet totale të mbrojtjes për vitin 2025 në 2.2 trilionë hryvnia (rreth 53.2 miliardë dollarë) një nivel rekord për Ukrainën që nga fillimi i agresionit rus.

Shtesa prej 412 miliardë hryvnash synon të mbulojë nevojat urgjente për armatim, pajisje ushtarake dhe mbështetje logjistike për forcat e armatosura në vijën e frontit.

Qeveria ukrainase është përballur me presion në rritje për të siguruar më shumë burime financiare për ushtrinë, teksa luftimet në lindje dhe jug të vendit vazhdojnë me intensitet të lartë dhe ndihma perëndimore shpesh vonohet.

Amendamentet pritet të kalojnë edhe në leximin e dytë në javët e ardhshme për t’u bërë zyrtarisht pjesë e buxhetit të shtetit. / abcnews.al

Sulme të fuqishme ajrore tronditën kryeqytetin sirian Damask në orët e para të mëngjesit të së mërkurës, duke pasur si objektiv Ministrinë e Mbrojtjes, ndërsa Izraeli paralajmëroi veprime të forta kundër forcave qeveritare siriane që po kryejnë sulme ndaj komuniteteve druze në jug të vendit.

Sipas dëshmitarëve dhe raportimeve, avionë luftarakë izraelitë fluturuan në lartësi të ulët mbi Damask dhe realizuan një seri goditjesh intensive në zonën qendrore të qytetit. Një sërë shpërthimesh të fuqishme u dëgjuan në afërsi të ndërtesave qeveritare, ndërsa një re e dendur tymi u ngrit nga zona ku ndodhet Ministria e Mbrojtjes.

Autoritetet izraelite kanë deklaruar se nuk do të lejojnë që forcat e Presidentit Bashar al-Assad të vazhdojnë ofensivën kundër pakicës druze dhe kanë kërkuar tërheqjen e menjëhershme të trupave siriane nga jugu i vendit.

Zhvillimet vijnë në një kohë tensionesh në rritje përgjatë kufirit siriano-izraelit, ku përplasjet mes grupeve lokale, forcave qeveritare dhe interesave rajonale kanë krijuar një situatë të ndërlikuar dhe të rrezikshme.

SHQIPËRI- Harta e dorëheqjeve të drejtuesve vendorë është zgjeruar këtë të martë. Në Bashkinë Belsh, janë larguar një sërë administratorësh dhe drejtorësh lokale, duke i hapur rrugë një faze të re, të përzgjedhjes së drejtuesve të rinj mbi bazën e meritës dhe performancës.

Në Përrenjas tre administrator kanë dhënë dorëheqjen ndërsa drejtorët do ti nënshtrohen një vlerësimi të thelluar të punës së kryer deri më tani.

Dorëheqjet janë finalizuar edhe në Bashkinë e Gramshit, përkatësisht 9 administratorë, drejtorë dhe sekretari i përgjithshëm i bashkisë.

Përpara kryebashkiakut Kristjan Shkreli, dorëheqjen e kanë paraqitur tre nënkryetarët, pesë administratorët dhe të gjithë drejtorët në Bashkinë e Vaut të Dejës.

Dorëheqjet e administratorëve janë konfirmuar edhe në Bashkinë e Selenicës.

Largime ka edhe në qarkun e Beratit.

Kryetarët e njësive administrative në Polican dhe Kuçovë janë dorëhequr ndërsa në Skrapar, kryebashkiaku Adriatik Mema thotë se nuk do të bëjë lëvizje pasi administratorët dhe drejtorët janë emëruar së fundmi.

Administratorët e njësive Fushë Krujë, Cudhi, Thumanë, Bubq e Nikël, dy nënkryetarët dhe drejtuesit e drejtorive, kanë paraqitur dorëheqjet e tyre tek kryetari i Bashkisë Krujë, Artur Bushi.

4 nga 6 administratorët e njësive në bashkinë e Maliqit janë dorëhequr të martën ndërkohë që 2 administratorë kanë mbushur moshën e pensionit. Deri në këto momente asnjë lëvizje nuk është kryer në Bashkinë e Pogradecit.

Sa i përket bashkive të jugut, të gjithë nënkryetarët, administratorët dhe drejtorët e Bashkisë Sarandë kanë paraqitur dorëheqjen.

Në Konispol nuk ka ende largime ndërsa burime thonë se ka patur një debat mes kryebashkiakut Dule dhe kreut të qeverisë lidhur me shkarkimet e mundshme.

Përjashtim nga e gjithë reforma e vetëpastrimit bën bashkia e Pustecit, aty ku jeton minoriteti maqedonas. Për shkak të numrit të vogël të banorëve dhe numrit të kufizuar të personelit në bashki, nuk ka as administratorë dhe as drejtorë/abcnews.al

Sekretari i Përgjithshëm i PL Tedi Blushi i ftuar ne ‘Real Story’ tha se drejtësia e re është më e korruptuar se më parë. Më tej, ai tha se për mbrojtjen e Metes po ecet në dy shina. Blushi theksoi se gjendja e Metës në burg është shumë e mirë dhe se me këtë cështje do të shkojnë deri në Gjykatën e Strasburgut.

“Gjykatat vendosin afërmendsh cfarë kërkon SPAK. SPAK ka të drejtë të përgjojë të gjithë gjyqtarët, ata janë në kushte presioni, a mund të presësh një gjyqtart që ka përgjime të marrë një vendim? Tani drejtësia është më tepër e korruptuar.

Për mbrojtjen e Metës po ecim në dy shina paralele, e para në studio televizive për akuzat politike dhe shkalla e fundit do të jetë Gjykata e Strasburgut ku kjo ceshtje do te fitohet dhe do të jetë një njollë. Meta nuk ka asnjë shqetësim, gjendja e tij është e shkëlqyer. Ka qenë dy javë më parë kampion i ping pongut atje dhe asnjë shqetësim pë të, nuk e lejojnë deri më tani të ushtrojë asnjë sport.” / abcnews.al

Sekretari i Përgjithshmë i PL Tedi Blushi tha për ‘Real Story’ se kërkojnë shfuqizim të masës së sigurisë së Metës pasi janë shkelur ligjet dhe Konventa për të drejtat e njeriut.

Më tej, Blushi tha se SPAK ka dashur të krijojë një narrativë në publik duke dhënë opsionin që Meta do të arratisej përpara se ai të arrestohej. Sipas Blushit, kjo ka qenë një prej arsyeve të Metës dhe retorikës së tij të ashpër ndaj SPAK.

“Ne kërkojmë shfuqizim të masës arrest me burg sepse janë shkelur ligjet dhe konventa europiane e të drejtave të njeriut. Meta nuk është kundër hetimeve, por t’i kushtëzosh lirinë pa pasur asnjë provë. Meta ka shkuar në SPAK sa herë e kanë thirrur.

Meta është shprehur kundër mënyrës autokrate. Retorika e Metës ndaj SPAK ka qenë e ashpër sepse jo më pak se dy vite para momentit të rrëmbimit të tij ka pasur një fushatë mediatike të sponsorizuar nga SPAK duke nxjerrë disa elementë të dosjes duke nxjerrë që Meta është fajtor.

SPAK ka dashur të krijojë një narrativë në publik duke i dhënë dhe opsionin e arrastisjes, Meta madje e ka denoncuar. Meta ka qenë gati për ccdo skenarë, i përgatitur.” / abcnews.al

Read More...